ပူးပေါင်းဆောင်ရွက်ရေး နဲ့ နိုင်ငံရေးအကျဉ်းသား လွတ်မြောက်ရေး ဆက်နွယ်

ဒေါ်ခင်စိုးဝင်း
အင်္ဂါ, 13 စက်တင်ဘာ 2011

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်က လက်ရှိ မြန်မာနိုင်ငံ အခြေအနေတွေနဲ့ ပတ်သက်ပြီးတော့ အစိုးရနဲ့ တိုက်ရိုက် ဆွေးနွေး လာနိုင်တာဟာ နိုင်ငံရေးအရ တိုးတက်မှု ဖြစ်စဉ်တခု အဖြစ် သူယုံကြည်ကြောင်း ပြောဆိုခဲ့ပါတယ်။ ဗွီအိုအေ ၀ိုင်းတော်သူ ဒေါ်ခင်စိုးဝင်းကနေ မြန်မာနိုင်ငံကို ရောက်ရှိခိုက် ဒေါ်အောင်ဆန်းစုကြည်နဲ့ သီးသန့် တွေ့ဆုံ မေးမြန်းခွင့် ရခဲ့တဲ့ အချိန်မှာ ဒေါ်အောင်ဆန်းစုကြည်က အခုလို ပြောဆိုခဲ့တာပါ။ ဒေါ်ခင်စိုးဝင်းက တိုက်ရိုက် ပြောပြချက် အပြည့်အစုံကို တင်ပြ ထားပါတယ်။

ရတောင့်ရခဲ မြန်မာပြည်ဝင်ခွင့်ရတဲ့ အချိန်လေးမှာ တွေ့ဆုံမေးမြန်းခွင့် ရလိုရငြား ဗွီအိုအေက မေတ္တာ ရပ်ခံခဲ့တာကို NLD က စီစဉ် ပေးနိုင်ခဲ့လို့ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံ မေးမြန်းခွင့် ရခဲ့တာပါ။ ဒေါ်အောင်ဆန်းစုကြည်က ပြည်သူလူထု အကျိုးအတွက် ဆိုရင် မတူကွဲပြားတဲ့ အမြင်တွေကို ဘေးဖယ်ထားပြီး မြန်မာ အစိုးရနဲ့ ပူးပေါင်း ဆောင်ရွက်ကြမယ်လို့ လူသိရှင်ကြား ကြေညာ ထားပြီး ဖြစ်ပါတယ်။ ဒါပေမဲ့လည်း ယုံကြည်ချက်ကြောင့် အကျဉ်းကျ နေတဲ့သူတွေကို လွှတ်ပေးတာ မတွေ့ရ သေးတော့ နှစ်ဘက် ပူးပေါင်း ဆောင်ရွက်ကြမယ့် အလားအလာကို ထိခိုက်နိုင်ပါသလားလို့ မေးကြည့်တဲ့ အခါမှာ ဒေါ်အောင်ဆန်းစုကြည်က အခုလို ဖြေပါတယ်ရှင်။

“ဒါ မဖြစ်အောင် လုပ်ရမှာပေါ့။ ဘာဖြစ်လို့လဲ ဆိုတော့ အစကတည်းက ပြောထား ပြီးသားလေ၊ တွေ့ဆုံ ဆွေးနွေးပွဲတွေ အတွက် ဘယ်လိုမှ ကန့်သတ်ချက်တွေ မထားပါဘူးလို့ ပြောထားခဲ့တယ်။ အဲဒီတော့ အစ ကတည်းကလည်း ဒီဟာလုပ်မှ - ဟိုဟာလုပ်မှ ပြောမယ်လို့ ပြောထားတာမှ မဟုတ်ဘဲ။ နောက်ပြီးတော့ အစ်မ အမြင်မှာတော့ ဒီလို ပူးပေါင်း ဆောင်ရွက်တယ် ဆိုတာဟာ အကျဉ်းသားတွေ လွတ်မြောက်ရေး နဲ့လည်း တကယ်တော့ ကင်းကွာနေလို့ မဖြစ်ဘူး။ အစ်မတို့ လုပ်တဲ့ အလုပ်တွေဟာ အားလုံး တခုနဲ့တခု ဆက်နွယ်နေတာပဲ။ ဒီလို ပူးပေါင်း ဆောင်ရွက်ခြင်း အားဖြင့်ကိုလည်း နိုင်ငံရေး အကျဉ်းသားတွေ လွတ်မြောက်ရေး အတွက် ပိုပြီးတော့ အထောက်အကူ ဖြစ်နိုင်တယ်။ ဒီလိုပဲ ယူဆပါတယ်။”

မြန်မာအစိုးရဘက်ကနေ NLD အမျိုးသားဒီမိုကရေစီအဖွဲ့ချုပ်ကို နိုင်ငံရေးပါတီအဖြစ် မှတ်ပုံတင်ဖို့ တိုက်တွန်း ထားပါတယ်။ ၂၀၀၈ ခုနှစ် ဖွဲ့စည်းပုံကို လက်ခံ လာအောင်လည်း သမ္မတ ဦးသိန်းစိန် ကိုယ်တိုင် စည်းရုံးနေပါပြီ။ ၂၀၀၈ ခုနှစ်ဖွဲ့စည်းပုံကို လက်ခံပြီးတော့ နိုင်ငံရေး ပါတီတခု အဖြစ် လှုပ်ရှားဖို့ တိုက်တွန်း တာတွေကို NLD အနေနဲ့ လက်ခံမှာလား၊ တကယ်လို့ ၂၀၀၈ ခုနှစ် ဖွဲ့စည်းပုံမှာ ပါတဲ့ အချက်တွေကို ပြင်ဆင်လိုချင်တယ် ဆိုရင် ဘယ်အချက်တွေကို အဓိကထား ပြင်ဆင်ရမယ်လို့ မြင်ပါသလဲလို့ မေးတဲ့အခါမှာတော့ -

“ဒီဟာတွေကတော့ အခြေအနေပေါ်မှာ တည်ပါတယ်။ ဘာဖြစ်လို့လဲ ဆိုတော့ ကမ်းလှမ်းတယ် ဆိုတာကလည်း လူတွေက သူတို့ဟာ သူတို့ ထင်ကြေးနဲ့ ပြောတာပေါ့နော်။ အခုချိန်မှာ ဆိုလို့ရှိရင် အစ်မတို့က တယောက်နဲ့ တယောက် စပြီးတော့ စကားပြောတယ်။ တကယ့်ကို ထိထိ ရောက်ရောက် စကားပြောတဲ့ အဆင့်ကို စနိုင်ပြီဆိုတာ ဒါကိုပဲ တိုးတက်မှုတခုလို့ အစ်မတော့ ယုံပါတယ်။ အဲဒီတော့ ဒီအချိန်မှာတော့ အသေးစိတ် ဘာတွေ ဘာတွေ ဆွေးနွေးနေလဲ ဆိုတာကို မပြောတာဟာ သိပ်ပြီးတော့ သိမ်မွေ့နေတဲ့ အချိန်မှာ ဒီလို ထုတ်ဖော် ပြောလိုက်ခြင်း အားဖြင့် ကိုယ်လိုချင်တဲ့ ခရီးကို ချောချောမောမော မရောက်မှာစိုးလို့ မပြောတာပါ။ ဒါပေမဲ့ နိုင်ငံအပေါ်မှာ အမတို့မှာ တာဝန်ရှိတယ်။ တချိန်တခါမှာတော့ ပြည်သူကို အသိပေးရမယ် ဆိုတာ သိပါတယ်။ အသိပေးတဲ့ အခါ အသိပေးစရာ ရှိတဲ့ အခါကျ အသိပေးမှာပါ။ အသိပေးစရာ မရှိသေးတဲ့ အချိန်မှာ အသိပေးလိုက်ခြင်း အားဖြင့် နောက်တခါ ဘာမှ အသိပေးစရာ မဖြစ်လာမှာလည်း စိုးရိမ် ရတယ်လေ”

ဆက်ပြီးတော့ ပြီးခဲ့တဲ့ သြဂတ်စ်လ ၁၇ ရက်နေ့တုန်းက မြန်မာနိုင်ငံတော် သမ္မတဦးသိန်းစိန်က မိန့်ခွန်း ပြောတဲ့ နေရာမှာ ပြည်ပမှာ ရောက်ရှိနေတဲ့ မြန်မာနိုင်ငံ သားတွေကို ဖိတ်ခေါ် လိုက်ပါတယ်။ ဒီတော့ ပြည်ပရောက် မြန်မာနိုင်ငံ သားတွေ ပြန်လာ သင့်ပြီလို့ ယူဆ ပါသလား။ ပြန်လာဖို့ အတွက် ဘယ်လို အခြေအနေမျိုး အနေအထားမျိုး ရှိသင့်တယ်လို့ ရှုမြင်ပါသလဲလို့ မေးတဲ့ အခါမှာတော့ ဒေါ်အောင်ဆန်းစုကြည်က အခုလို ပြောပါတယ်။

“ဒါ နှစ်ပိုင်းပေါ့နော်၊ တပိုင်းကတော့ လူတိုင်း လူတိုင်းဟာ ကိုယ့်ဘ၀ အတွက် ကိုယ့်ဆုံးဖြတ်ချက်ကို ချရမယ်။ ဒါကတော့ တာဝန်သိပေါ့။ အခု တချို့က ပြောနေတယ်။ အစ်မကိုလည်း ဗွီအိုအေ မေးခွန်းက တဆင့်ရော၊ အာရ်၊အက်ဖ်အေ မေးခွန်းက တဆင့်ရော မေးနေကြတယ် ပေါ့နော်။ ပြန်လာ သင့်သလား။ အစ်မ အမြဲပြောတယ်။ ဒါ ကိုယ့်ဘာသာကိုယ် ဆုံးဖြတ်ရမယ်။ ဒါ ကိုယ့်ရဲ့ ဘ၀၊ ကိုယ့်ဘာသာကိုယ် သမ္မတကြီး ပြောတဲ့ မိန့်ခွန်းကို လေ့လာပြီးတော့ သက်ဆိုင်ရာ သံရုံးတွေမှာ မေးမြန်း စုံစမ်းပြီးတော့ ကိုယ်ပြန်လာချင်ရင် ကိုယ့်ဘာသာကိုယ် ဆုံးဖြတ်ရမယ်။ ပြန်မလာချင်လို့ ရှိရင်လည်း ကိုယ့်ဘာသာကိုယ် ဆုံးဖြတ်ရမယ်။ ဒီဟာကို နိုင်ငံရေး အရ ဘယ်လိုမြင်ရမလဲ ဆိုလို့ရှိရင်တော့ အဲဒါတော့ နည်းနည်း စောင့်ကြည့်ရမှာပေါ့။ ပြန်လာတဲ့သူတွေ အခြေအနေ ဘယ်လိုရှိသလဲ။ တချို့က ပြောတာပေါ့နော်။ ပြန်လာပြီးလို့ ရှိလို့ရှိရင် ပြဿနာရှာမှာတို့ ဘာတို့ - ဒါကတော့လည်း အမလည်း မပြောနိုင်ဘူး။ ဖြစ်မယ်၊ မဖြစ်ဘူးဆိုတာ။ တချို့ကျတော့လည်း ဒီအချိန်မှာ ပြန်လာသင့်သလား ပေါ့နော်။ နိုင်ငံရေး အမြင်နဲ့ ပြောတာပေါ့။ ပြန်လာသင့်သလား။ အဲဒီတော့ နိုင်ငံရေးအမြင်နဲ့ ပြန်လာ သင့်သလား ဆိုတာ ဘယ်မှာ တည်သလဲ ဆိုတော့ မြန်မာနိုင်ငံ ဒီမိုကရေစီ ရရှိရေးအတွက် ဘယ်လိုနည်းနဲ့ လှုပ်ရှားချင်သလဲ ဆိုတာပေါ်မှာ တည်တာပေါ့။ အခုချိန်မှာတော့ ဗမာပြည်မှာ နိုင်ငံခြားမှာ လှုပ်ရှားချင်တဲ့ ပုံစံနဲ့တော့ လှုပ်ရှားလို့ မရသေးဘူး ဆိုတာတော့ ဒါကတော့ ရှင်းပါတယ်။ နိုင်ငံခြားမှာ လှုပ်ရှားတဲ့ ပုံစံနဲ့ပဲ ဆက်ပြီး လှုပ်ရှားချင်တယ် ဆိုလို့ရှိရင်တော့ ဒါကို ရွေးရမှာပေါ့။ ဒါပေမဲ့ NLD နဲ့ ဒီမှာလာပြီး လှုပ်ရှားလို့ ရမယ်ထင်လို့ လှုပ်ရှားချင်တယ် ဆိုရင်လည်း လာပြီး လှုပ်ရှားနိုင် ပါတယ်”

ဆက်လက်ပြီး သူက အမေရိကန်အထက်လွှတ်တော်အမတ် ဂျဲင်(မ်) ၀က်ဘ်၊ ပေါ့နော်။ အရှေ့အာရှနဲ့ ပစိဖိတ်ရေးရာ ဆပ်ကော်မတီ ဥက္ကဋ္ဌက နေပြီးတော့ အမေရိကန်ရဲ့ မြန်မာနိုင်ငံ အပေါ် ရပ်တည်တဲ့ မူဝါဒကို ပြောင်းဖို့ သင့်မသင့်ပေါ့နော်။ ပြန်ပြင်ဆင်ဖို့ ရှိသင့် မရှိသင့်ဆိုတဲ့ ကြေညာချက်တခု ထုတ်ပါတယ်လို့ အဲဒီ ကြေညာချက်ကတော့ ၂၀၀၄ ခုနှစ်က ချမှတ်ထားတဲ့ မြန်မာနိုင်ငံ အပေါ် ပိတ်ဆို့မှုနဲ့ အရေးယူဖို့ အတွက် ပြဋ္ဌာန်းခဲ့တဲ့ Burmese Freedom and Democracy Act ဥပဒေကို သက်တမ်းတိုးဖို့ မဲခွဲကြတာနဲ့ ပတ်သက်ပြီးတော့ သူက ဒီ Statement လေးကို ထုတ်တာပါ။ ဒီပိတ်ဆို့မှုနဲ့ ပတ်သက်ပြီးတော့ ဒေါ်အောင်ဆန်းစုကြည်ရဲ့ အမြင်ကတော့ ဒီလိုပါ။

“ပြောင်းသင့်တဲ့အခါ ပြောင်းရမယ်ဆိုတာတော့ သဘောတူတာပေါ့။ သူက should be ready ဆိုတာ အစ်မကနေ ဒီဟာကို အဓိပ္ပာယ် တမျိုး ဖော်လိုက်မယ်။ သူကတော့ ဘယ်လို အဓိပ္ပာယ်နဲ့ ပြောလဲ မသိဘူး။ should be ready ဆိုတာဟာ အသင့်ဖြစ်နေရမယ် ပေါ့နော်။ ပြောင်းဖို့။ ပြောင်းဖို့ လိုတဲ့အချိန်မှာ ပြောင်းဖို့ ဆိုတာကတော့ အသင့် ဖြစ်နေရမှာပေါ့။ ဒါပေမဲ့ ပြောင်းဖို့ လိုတဲ့အချိန် ရောက်ပြီလား၊ မရောက်သေးဘူးလား ဆိုတာ- ဒါကလည်း သေသေချာချာ လေ့လာရမှာပေါ့။ စီးပွားရေး အမြင်နဲ့ ဆိုရင်တော့ ဒါ- အမတို့ အမြင်နဲ့ နည်းနည်း မတူဘူးပေါ့နော်။ ဘာဖြစ်လို့လဲ ဆိုတော့ အမတို့က စီးပွားရေးကို နိုင်ငံရေးနဲ့ ခွဲခြားလို့ မရဘူး ဆိုပြီးတော့ ယုံကြည်တယ်။ စီးပွားရေးက နိုင်ငံရေးအပေါ်မှာ လွှမ်းမိုးတယ် ဆိုရင်လည်း မဖြစ်သင့်ဘူး။ ဒီနှစ်ခုကို ညီညီမျှမျှ ကြည့်ပြီးတော့ လုပ်သွားရမှာပေါ့။”

နေုာက်ပြီးတော့ အနောက်နိုင်ငံတချို့က မြန်မာနိုင်ငံအပေါ် ဖွံ့ဖြိုး တိုးတက်ရေး အကူအညီတွေ ပေးဖို့ ချဉ်းကပ် တာတွေ ရှိတယ်။ သတင်းတွေ ထွက်နေတယ်။ အကူအညီတွေ ရမယ်ဆိုရင် ဘယ်လို အကူအညီမျိုး အဓိက လိုအပ်နေသလဲလို့ မေးတဲ့ အခါမှာတော့ ဒေါ်အောင်ဆန်းစုကြည်က မြန်မာပြည်မှာ အလိုအပ်ဆုံးကတော့ ပညာရေးနဲ့ ကျန်းမာရေး ကဏ္ဍ အတွက်ပဲလို့ ဖြေပါတယ်ရှင်။

Ref: VOA News