..............................

Friday, August 10, 2012

အရာရှိကြီးတွေ ပိုင်ဆိုင်မှုကြေညာရေး လွှတ်တော် ပယ်ချ

မစုမြတ်မွန်
09.08.2012

မြန်မာနိုင်ငံမှာ အစိုးရအဖွဲ့ဝင်တွေရဲ့ ပိုင်ဆိုင်မှုတွေကို လူသိရှင်ကြား ထုတ်ပြန်ပေးရေး အဆိုကို ဒီကနေ့ ပြည်သူ့ လွှတ်တော်မှာ မဲခွဲ ဆုံးဖြတ်ခဲ့တာမှာ ကန့်ကွက်မဲ အရေအတွက် များတဲ့အတွက် အတည် မပြုနိုင်ခဲ့ဘူးလို့ အဆို တင်သွင်းခဲ့တဲ့ ပုသိမ်မြို့နယ်၊ အမျိုးသား ဒီမိုကရေစီ အဖွဲ့ချုပ် ပြည်သူ့ လွှတ်တော် ကိုယ်စားလှယ် ဦးဝင်းမြင့်က ပြောပါတယ်။ အခုလို သူ့ရဲ့ အဆို မအောင်မြင်ပေမဲ့ နောင် အခွင့်အရေး ရတဲ့အခါ ဒီကိစ္စကို ထပ်ပြီး ကြိုးစား သွားမယ်လို့ ဆိုပါတယ်။ အပြည့်အစုံကို မစုမြတ်မွန်က တင်ပြပေးထား ပါတယ်။

မြန်မာနိုင်ငံမှာ ကောင်းမွန်တဲ့အုပ်ချုပ်ရေး၊ သန့်ရှင်းတဲ့အစိုးရ ဖြစ်ပေါ်လာဖို့အတွက် ပြည်ထောင်စု အစိုးရ၊ တိုင်းဒေသကြီး အစိုးရနဲ့ ပြည်နယ် အစိုးရ အဖွဲ့ဝင်တွေရဲ့ ရွှေ့ပြောင်းနိုင်သော ပစ္စည်း၊ မရွှေ့ပြောင်းနိုင်သော ပစ္စည်း ပိုင်ဆိုင်မှုတွေနဲ့ အကျိုးစီးပွားတွေကို အများပြည်သူ သိရှိအောင် လုပ်ပေးရေး အဆိုကို ဗုဒ္ဓဟူးနေ့တုန်းက ပြည်သူ့လွှတ်တော်မှာ ဆွေးနွေးပြီးတော့ မဲခွဲ ဆုံးဖြတ်ခဲ့တာမှာ ကန့်ကွက်မဲ အများစုနဲ့ ပယ်ချ ခံခဲ့ရပါတယ်။

ပုသိမ်မြို့နယ်၊ အမျိုးသား ဒီမိုကရေစီ အဖွဲ့ချုပ် ပြည်သူ့ လွှတ်တော် ကိုယ်စားလှယ် ဦးဝင်းမြင့်က ဒီအဆိုကို တင်သွင်းခဲ့သူ ဖြစ်ပါတယ်။

"ဆွေးနွေးတော့ ၈ ယောက် ထောက်ခံပြီး ဆွေးနွေးပါတယ်။ နောက်ကျတော့ ငါးဦးက ကန့်ကွက်ဆွေးနွေးပါတယ်။ ကိုယ်စားလှယ်တွေကတော့ -- က ကိုယ်စားလှယ် နှစ်ဦး၊ NDF က ကိုယ်စားလှယ် နှစ်နဲ့ ကျားဖြူက တဦးပါပါတယ်။ နောက်ဆုံး လွှတ်တော်မှာ မှတ်တမ်းတင်ထားဖို့ အဆိုကောင်း တစ်ခုဖြစ်တဲ့အတွက် မှတ်တမ်းတင်ထားဖို့ ပြည်ထောင်စု ရှေ့နေချုပ်က ပြောပါတယ်။ ဒါပေမဲ့ ပြည်သူ့လွှတ်တော် ဥက္ကဋ္ဌကြီးကလည်း ဒီအဆို မပျက်ပြယ်သွားစေချင်ဘူး။ အဆိုကောင်းဖြစ်တယ်။ ဒါကြောင့်မို့လို့ စဉ်းစားဖို့ အနေအထားနဲ့ ကျနော့်ကို မေးပါတယ်။ ကျနော်ကတော့ ပြည်သူ့ ကိုယ်စားလှယ် တယောက်အနေနဲ့ ကောင်းမွန်သောအုပ်ချုပ်ရေးနဲ့ သန့်ရှင်းတဲ့အစိုးရဖြစ်စေချင်တယ်။ နိုင်ငံတော် သမ္မတကြီးကလည်း ဒါမျိုးဖြစ်ရမယ်လို့၊ ဖြစ်အောင်လုပ်မယ်လို့ သူ့အဖွဲ့ကို ပြောတယ်။ ဒါကြောင့်မို့လို့ ကျနော်က ပြည်သူ့လွှတ်တော်က မဲခွဲ ဆုံးဖြတ်တာကို ခံယူမယ်လို့ ပြောတယ်။ အဲဒီအခါမှာ မဲခွဲတယ်။ မဲခွဲတော့ ကျနော် ရှုံးပါတယ်။"

အဲဒီတော့ လွှတ်တော်မှာ ဒီအဆိုကို လက်မခံဘူး ဆိုတဲ့အခါကျတော့ လွှတ်တော် ကိုယ်စားလှယ် အများစုက ပိုင်ဆိုင်မှုတွေကို အများပြည်သူ သိသင့်တယ်လို့ မထင်လို့ ဒီလိုမျိုး ပယ်ချခံရတယ်လို့ရော ထင်ပါသလားရှင့်။

"ကျနော် အဲဒီ ထင်မြင်ချက်တော့ မပေးပါဘူး။ ဒါကတော့ ခင်ဗျားတို့ဟာ ခင်ဗျားတို့ တွက်ကြည့်ပေါ့။ ကျနော်တို့ကတော့ ကျနော်တို့ လုပ်စရာရှိတဲ့ အလုပ်ကို လုပ်တာပါ။ ကျနော့်စိတ်ထဲရှိတဲ့ဟာကိုတော့ ကျနော်က ထင်မြင်ချက် မပေးချင်ဘူးလေ။"

ဒီမိုကရေစီကျင့်စဉ်အရ သူ့အနေနဲ့ အများသဘောကို လက်ခံမှာဖြစ်တယ်လို့ ဦးဝင်းမြင့်က ပြောပါတယ်။ ပြည်ထောင်စု တရားသူကြီးချုပ်က စပြီးတော့ ပြည်ထောင်စုဝန်ကြီးတွေ၊ တိုင်းဒေသကြီး၊ ဒါမှမဟုတ် ပြည်နယ်အစိုးရ ဝန်ကြီးချုပ်တွေ၊ ဝန်ကြီးတွေ စသည်ဖြင့် သမ္မတ ခန့်အပ်ထားတဲ့ ပုဂ္ဂိုလ်တွေရဲ့ စီးပွားပိုင်ဆိုင်မှုကို သမ္မတဆီကို စာရင်းတင်ပြရမယ်လို့ ဂျူလိုင်လကုန်ပိုင်း တုန်းကပဲ သမ္မတရုံးက ညွှန်ကြားချက် ထုတ်ခဲ့ပါတယ်။ ဒီလို ဆောင်ရွက်မှုကရော ကောင်းမွန်တဲ့ အုပ်ချုပ်ရေး၊ သန့်ရှင်းတဲ့အစိုးရဖြစ်လာဖို့အတွက် လုံလောက်တယ်လို့ မထင်ဘူးလားလို့ ဦးဝင်းမြင့်ကို မေးပါတယ်။

"ကျနော်တို့တင်တဲ့အဆိုက သမ္မတဆီ ပို့ဖို့မှ မဟုတ်ဘဲ။ ပွင့်လင်းမြင်သာမှုရှိဖို့၊ ပြည်သူလူထု သိအောင် ထုတ်ပြန်ကြေညာဖို့ ပြောတာပဲ။ ဟိုဟာက သမ္မတအစီအစဉ်အတိုင်းပဲ ရှိနေမှာ။ ကွာပါတယ်။"

အခုလို လွှတ်တော်မှာ အဆိုကို ပယ်ချ ခံခဲ့ရတဲ့အတွက် ဒီလို အဆိုမျိုး နောက်ထပ် တင်ဖို့ ရှိသလား ဆိုတော့ -

"အခုနက ပြောသလိုပါပဲ။ အခြေအနေ အချိန်အခါအရ အခွင့်အရေးပေါ်လာတဲ့အခါမှာ နိုင်ငံတော်နဲ့ နိုင်ငံသားတွေ အကျိုးစီးပွားအတွက် ကိုယ်စားလှယ် တယောက်အနေနဲ့ ကိုယ်လုပ်စရာရှိတာ ဆက်လုပ်မှာပါ။"

ပုသိမ်မြို့နယ်၊ အမျိုးသား ဒီမိုကရေစီ အဖွဲ့ချုပ် ပြည်သူ့ လွှတ်တော် ကိုယ်စားလှယ် ဦးဝင်းမြင့်ဖြစ်ပါတယ်ရှင်။ အမျိုးသားလွှတ်တော်မှာလည်း အမျိုးသားဒီမိုကရေစီအဖွဲ့ချုပ် ကိုယ်စားလှယ် တယောက်ဖြစ်တဲ့ ဒေါက်တာ မြတ်ဉာဏစိုး တင်ပြခဲ့တဲ့ လူဝင်မှု ကြိကြပ်ရေးဆိုင်ရာ အထူး စီမံချက်နဲ့ အရေးယူဖို့အဆိုကို အများသဘောနဲ့ လက်ခံဆွေးနွေးမှာ မဟုတ်ဘူးလို့ ဆုံးဖြတ်ခဲ့ပါတယ်။ အိမ်နီးချင်းနိုင်ငံတွေက လူမျိုးခြားတွေ နိုင်ငံထဲကို ဝင်ရောက်နေတာ၊ တခါ မသမာတဲ့နည်းနဲ့ နိုင်ငံသား စိစစ်ရေးကဒ်တွေ ကိုင်ဆောင်နေတာကို စီမံချက်ချ အရေးယူပေးဖို့အတွက် သူ အဆိုတင်သွင်းခဲ့တာ ဖြစ်ပါတယ်ရှင်။

Ref: VOA News

Read More...

ရခိုင် အရေးပေါ်ရံပုံငွေ ထည့်ဝင်ကြဖို့ ကုလပန်ကြား

ကိုကျော်ကျော်သိန်း
09.08.2012

မြန်မာနိုင်ငံမှာ လူလူချင်းစာနာမှုဆိုင်ရာ အကူအညီတွေကို လိုအပ်ချက် တိုးလာနေတယ် လို့ ကုလ သမဂ္ဂ တာဝန်ရှိသူ တဦးက ပြောလိုက်ပါတယ်။ ပဋိပက္ခဖြစ်နေတဲ့ဒေသတွေဆီ အကူအညီပေး အဖွဲ့အစည်းတွေကို သွားခွင့်ပြုပြီး လိုအပ်နေသူတွေကို အကူအညီပေးခွင့်ပြုဖို့လည်း တောင်းဆို လိုက်ပါတယ်။ ရခိုင်ပြည်နယ်က ဘေးဒုက္ခရောက်သူတွေကို အကူအညီပေးဖို့ အမေရိကန်ဒေါ်လာ ၃၂.၅ သန်း လှူဒါန်းကြဖို့လည်း အလှူရှင်နိုင်ငံတွေနဲ့ အဖွဲ့အစည်းတွေကို ကုလသမဂ္ဂ တာဝန်ရှိသူက ပန်ကြား လိုက်ပါတယ်။ အပြည့်အစုံကို ကိုကျော်ကျော်သိန်းက တင်ပြပေးထားပါတယ်။

မြန်မာနိုင်ငံမှာ အိုးအိမ်တွေကိုစွန့်ခွာပြီး ထွက်ပြေးနေကြရသူပေါင်း ၅၀၀,၀၀၀ ကျော် တို့ရဲ့ အခြေအနေ အပေါ် စိုးရိမ် မကင်း ဖြစ်မိတဲ့ အကြောင်းနဲ့ အဲဒီလူတွေကို အကူအညီပေးကြဖို့ ပန်ကြား လိုက်သူကတော့ ကုလသမဂ္ဂ လူလူချင်းစာနာမှု ရေးရာဆိုင်ရာ ညှိနှိုင်းဆောင်ရွက်ရေးရုံး (OCHA) ရဲ့ လုပ်ငန်းများ ဆိုင်ရာ ညွှန်ကြားရေးမှူး ဂျွန် ဂင်းဂ် (John Ging) ဖြစ်ပါတယ်။

သူဟာ မြန်မာနိုင်ငံဆီ လေးရက်ကြာ သွားရောက်ခဲ့ပြီးတဲ့နောက်မှာ ကြာသပတေးနေ့က အဲဒီလို ပန်ကြား လိုက်တာပါ။ မြန်မာနိုင်ငံမှာ တိုးတက်မှုတွေ ရလာနေပေမဲ့ ပဋိပက္ခတွေက ဆက်ဖြစ်နေသေးတာကြောင့် လိုက်နာသင့်တာတွေကို လိုက်နာ လုပ်ဆောင်ဖို့ ဂျွန် ဂင်းဂ်က တောင်းဆိုပါတယ်။

“လူလူချင်းစာနာမှုဆိုင်ရာ စံနှုန်းသတ်မှတ်ချက်တွေနဲ့ လူလူ ချင်း စာနာမှုဆိုင်ရာ နိုင်ငံတကာ ဥပဒေတွေကို လေးစား လိုက်နာဖို့ကိုလည်း ဂျွန်း ဂင်းဂ်က တောင်းဆိုခဲ့ပါတယ်။ တိုင်းပြည်မှာ ငြိမ်းချမ်းရေးရဖို့အတွက် သိသာထင်ရှားတဲ့ အားထုတ်မှုတွေကို မြန်မာအာဏာပိုင်တွေ လုပ်ခဲ့တယ်ဆိုတာ OCHA အဖွဲ့က အသိအမှတ်ပြုပါတယ်။ ဒါပေမဲ့လည်း ကချင်ပြည်နယ်မှာ ပဋိပက္ခဆက်ဖြစ်နေပြီး ရခိုင်ပြည်နယ်မှာ မကြာသေးခင်က ဖြစ်ခဲ့တဲ့ အဓိကရုဏ်းတွေကြောင့် လူပေါင်း ၆၀,၀၀၀ ကျော် အိုးအိမ်မဲ့ဖြစ်နေရပါတယ်။”

ဂျွန် ဂင်းဂ်ရဲ့မှတ်ချက်တွေကို ကြာသပတေးနေ့ ကုလသမဂ္ဂ ပုံမှန်သတင်းစာရှင်းလင်းပွဲအတွင်း ကုလသမဂ္ဂအတွင်းရေးမှူးချုပ် ရဲ့ ပြောရေးဆိုခွင့်ရှိသူ မာတင် နီဆားကီး (Martin Nesirky) ကပြောသွားတာပါ။

မြန်မာနိုင်ငံခရီးစဉ်အတွင်း ဂျွန် ဂင်းဂ်ဟာ မြန်မာအစိုးရအဖွဲ့ နိုင်ငံခြားရေးဝန်ကြီး၊ ရထား ပို့ဆောင်ရေးဝန်ကြီး၊ လူမှုဝန်ထမ်း ကယ်ဆယ်ရေးနဲ့ ပြန်လည်နေရာချထားရေး ၀န်ကြီးတွေနဲ့ တွေ့ဆုံ ဆွေးနွေးခဲ့ပြီးတော့ မြန်မာအစိုးရနဲ့ လူလူချင်းစာနာမှုဆိုင်ရာ အဖွဲ့အစည်းတွေ အကြား သိပ်ကောင်းမွန်တဲ့ ပူးပေါင်းဆောင်ရွက်မှုတွေရှိခဲ့တာကို ယေဘုယျအားဖြင့် ကြိုဆိုခဲ့ပါတယ်။ ဒါပေမဲ့ လည်း ကုလသမဂ္ဂနဲ့ နိုင်ငံတကာ အစိုးရမဟုတ်တဲ့အဖွဲ့အစည်း INGO တွေက ၀န်ထမ်း ၁၄ ဦးကို မြန်မာတာဝန်ရှိသူတွေက မကြာသေးခင်ကပဲ ထိန်းသိမ်းထားတဲ့အပေါ် အထူး စိုးရိမ်ကြောင်း ပြောခဲ့တယ်လို့ သြဂုတ်လ ၉ ရက်နေ့စွဲနဲ့ ကုလသမဂ္ဂရဲ့ ထုတ်ပြန်ချက်ထဲမှာ ဖော်ပြ ထားပါတယ်။

အဲဒီဝန်ထမ်းတွေကို ချက်ခြင်းပြန်လွှတ်ပေးဖို့၊ တရားဥပဒေစိုးမိုးရေးနဲ့ အပြည်ပြည်ဆိုင်ရာ သဘောတူညီချက်တွေကို လေးစား လိုက်နာဖို့ ကုလသမဂ္ဂရဲ့ မြန်မာနိုင်ငံ လူ့အခွင့်အရေး အခြေအနေဆိုင်ရာ အထူးစုံစမ်းစစ်ဆေးရေးမှူး တောမတ်စ် အိုဟေး ကင်တားနား (Tomas Ojea Quintana) က တောင်းဆိုခဲ့တာကို အခု မစ္စတာ ဂျွန် ဂင်းဂ်ကလည်း ထပ်ပြီး တောင်းဆိုပါတယ်။
အခုအချိန်ဟာ မြန်မာနိုင်ငံမှာ ထူးခြားတဲ့ အပြောင်းအလဲတွေ ဖြစ်ပေါ်နေသလို ပဋိပက္ခတွေကို စနစ်တကျ ကိုင်တွယ် မဖြေရှင်း ရင် ဖြစ်ပေါ်လာနိုင်တဲ့အကျိုးဆက်ကိုလည်း သူက သတိပေးခဲ့ပါတယ်။

“ဒီမိုကရေစီပြုပြင်ပြောင်းလဲရေး၊ ငြိမ်းချမ်းမှုတည်ဆောက်ရေးနဲ့ ဖွံ့ဖြိုးတိုးတက်ရေးလုပ်ငန်းစဉ်တွေမှာ သိသာထင်ရှားတဲ့ တိုးတက်မှုတွေရနေချိန်မှာပဲ ပဋိပက္ခနဲ့ လူမှုအဖွဲ့အစည်းအချင်းချင်းကြား တင်းမာမှုတွေ ဆက်ရှိနေတာဟာ တည်ငြိမ်မှုကို ခြိမ်းခြောက်နိုင်ပြီးတော့ လူလူချင်းစာနာမှု ဆိုင်ရာ အကူအညီတွေလိုအပ်ချက်ကို ကြီးမားလာစေပါတယ်။”

ကုလသမဂ္ဂအတွင်းရေးမှူးချုပ် ရဲ့ ပြောရေးဆိုခွင့်ရှိသူ မာတင် နီဆားကီးပါ။
လေးရက်ကြာ မြန်မာနိုင်ငံခရီးစဉ်အတွင်း ဂျွန် ဂင်းဂ်ဟာ ရခိုင်ပြည်နယ်ဆီ နှစ်ရက်ကြာ သွားရောက်ခဲ့ပါတယ်။ အဲဒီမှာ အိုးအိမ် စွန့်ခွာထွက်ပြေးသူတွေ ခိုလှုံနေကြတဲ့ သက်ကယ်ပြင် စခန်းနဲ့ ရွှေစေတီ ဘုန်းတော်ကြီးကျောင်းတွေဆီ သွားရောက်ပြီး ဒုက္ခရောက် နေသူတွေ ကို တွေ့ဆုံ မေးမြန်းခဲ့ပါတယ်။

အဲဒီလူတွေရဲ့ ချက်ခြင်းလက်ငင်း လိုအပ်ချက်တွေကို ကူညီဖို့နဲ့ တချိန်တည်းမှာပဲ လူမှုအဖွဲ့အစည်း အချင်းချင်းအကြား နောက်ထပ် ပဋိပက္ခမဖြစ်အောင် တားဆီးကာကွယ်နိုင်ဖို့ရာ အခြေခံကျတဲ့ ကိစ္စရပ်တွေကို ကိုင်တွယ်ဖြေရှင်းဖို့ လိုအပ်တယ်လို့ မစ္စတာဂင်းဂ် က ပြောပါတယ်။

ရခိုင်ပြည်နယ်က ဘေးဒဏ်သင့်သူတွေအတွက် ရခိုင်ပြည်နယ် လူလူချင်းစာနာမှု တုံ့ပြန် လုပ်ဆောင်ရေး ဆိုင်ရာ စီမံကိန်း ဆိုတာအတွက် ဒေါ်လာ ၃၂.၅ သန်း လှူဒါန်းကြဖို့လည်း မစ္စတာဂင်းဂ်က ပန်ကြားထားပါတယ်။ အလိုအပ်ဆုံးလူတွေကို ချက်ခြင်း အကူအညီပေးဖို့အတွက် ကုလသမဂ္ဂရဲ့ အရေးပေါ် တုန့်ပြန်လုပ်ဆောင်ရေး ဗဟိုရန်ပုံငွေ (CERF) ကနေ အမေရိကန် ဒေါ်လာ ၅ သန်းကို ကုလသမဂ္ဂလူလူချင်းစာနာမှုဆိုင်ရာ လက်ထောက် အတွင်းရေးမှူးချုပ် ဗယ်လာရီ အာမို့စ် (Valerie Amos) က ပေးအပ်ထားပါတယ်။

ဒီအတောအတွင်းမှာပဲ တူရကီနိုင်ငံခြားရေးဝန်ကြီး Mr. Ahmet Davutoglu ဟာလည်း မြန်မာနိုင်ငံ မှာရောက်နေပြီး သြဂုတ်လ ၉ ရက်နေ့က သမ္မတနဲ့ နေပြည်တော်မှာ တွေ့ဆုံခဲ့ပါတယ်။
ရခိုင်ဒေသ အရေးကိစ္စကြောင့် မြန်မာနိုင်ငံရဲ့ အပြုသဘောဆောင်တဲ့ပုံရိပ်ကို မထိခိုက်စေလိုကြောင်း၊ ရခိုင်ပြည်နယ်ဆီ သွားခွင့်ရတဲ့အတွက် ကျေးဇူးတင်တဲ့အကြောင်း၊ အဲဒီဒေသရဲ့ ပကတိအခြေအနေကို သိရရင် တခြားနိုင်ငံတွေကို ပြန်ပြောပြ နိုင်မယ့်အခွင့်အရေး ရမယ့်အကြောင်းနဲ့ လာမယ့်သီတင်းပတ် ဆော်ဒီအာရေဗျနိုင်ငံမှာကျင်းပမယ့် အစ္စလာမ်မစ် ညီလာခံအဖွဲ့ OIC အစည်းအဝေးမှာ ရခိုင်ဒေသအရေးကို ရှင်းလင်းတင်ပြပါမယ်ဆိုပြီး တူရကီနိုင်ငံခြားရေးဝန်ကြီးက ပြောခဲ့တာကို သမ္မတရုံး အင်တာနက်စာမျက်နှာမှာ တွေ့ရပါတယ်။

ရခိုင်ပြည်နယ်က အခုဖြစ်စဉ်ကို လူသားချင်း စာနာထောက်ထားမှုနဲ့ ရှုမြင်ပြီး အစ္စလာမ်ဘာသာဝင် ဗုဒ္ဓဘာသာဝင် အားလုံးကို ကူညီရမယ့်အကြောင်း၊ လောလောဆယ် တူရကီနိုင်ငံက အလှူရှင်တွေ ဆီကနေ အမေရိကန်ဒေါ်လာ သန်း ၅၀ ရခဲ့ပြီး ဒုက္ခသည်တွေကို ကူညီလိုပါတယ်လို့ တူရကီနိုင်ငံခြားရေးဝန်ကြီးက ပြောပါတယ်ခင်ဗျား။

Ref: VOA News

Read More...

တူရကီ နိုင်ငံခြားရေး ဝန်ကြီး သမ္မတ ဦးသိန်းစိန်နဲ့ တွေ့ဆုံ



09.08.2012
မြန်မာနိုင်ငံမှာရောက်နေတဲ့ တူရကီနိုင်ငံခြားရေး ၀န်ကြီး မစ္စတာ Ahmet Davutoglu ကို သမ္မတ ဦးသိန်းစိန်က နေပြည်တော်မှာ သြဂုတ်လ ၉ ရက်နေ့က တွေ့ဆုံခဲ့ပါတယ်။

မြန်မာနိုင်ငံဟာ အချိန်တိုကာလအတွင်း ပြုပြင်ပြောင်းလဲရေးကို အောင်မြင်စွာဆောင်ရွက်နိုင် တဲ့ နိုင်ငံ တခုဖြစ်တယ်လို့ နိုင်ငံ တကာက အသိအမှတ်ပြု လေးစားကြတဲ့ အကြောင်းနဲ့ ရခိုင်ဒေသ အရေး ကိစ္စကြောင့် မြန်မာနိုင်ငံရဲ့ အပြုသဘောဆောင် တဲ့ ပုံရိပ်ကို မထိခိုက်စေလိုတဲ့ အကြောင်း တူရကီနိုင်ငံခြားရေး ၀န်ကြီးက ပြောတာကို မြန်မာ သမ္မတရုံး အင်တာနက် စာမျက်နှာမှာ ဖော်ပြ ထားပါတယ်။

သူ့ရဲ့ အခုခရီးစဉ်အတွင်း ရခိုင်ပြည်နယ်ဆီ သွားခွင့်ပြုတဲ့အတွက် သမ္မတကို ကျေးဇူး တင်စကား ဆိုခဲ့သလို အဲဒီဘက်က ပကတိ အခြေအနေတွေကို တခြားနိုင်ငံတွေကို ရှင်းလင်း တင်ပြမယ့် အကြောင်းနဲ့ လာမယ့် သီတင်းပတ် ဆော်ဒီအာရေဗျနိုင်ငံ မှာ ကျင်းပမယ့် အစ္စလာမ်မစ် ညီလာခံ အဖွဲ့ (OIC) အစည်းအဝေး အတွင်း ရခိုင်ဒေသ အရေးကိစ္စကို ရှင်းလင်း တင်ပြမယ်လို့ လည်း တူရကီနိုင်ငံခြားရေး ၀န်ကြီးက ပြောခဲ့ပါတယ်။

ဒါ့အပြင် တူရကီနိုင်ငံက အလှူရှင်တွေ ပေးအပ်လှူဒါန်းလိုက်တဲ့ အလှူငွေ အမေရိကန်ဒေါ်လာ သန်း ၅၀ ကို ရခိုင်ဒေသက ဘေးဒဏ် သင့်သူတွေအတွက် အကူအညီပေးချင်တဲ့ အကြောင်းလည်း ပြောပါ တယ်။

တူရကီ နိုင်ငံခြားရေးဝန်ကြီးရဲ့ အခုခရီးစဉ်ဟာ တူရကီနိုင်ငံက အဆင့်မြင့် တာဝန်ရှိသူ တဦး မြန်မာနိုင်ငံဆီ ပထမဆုံး လာရောက်တဲ့ ခရီးစဉ်ဖြစ်ပါတယ်။ အရင်တုန်း ကတော့ မြန်မာနိုင်ငံ ဆိုင်ရာ တူရကီ သံရုံးကို တခြားနိုင်ငံတွေမှာ တွဲထားခဲ့ပေမဲ့ အခုတော့ သံအမတ်ကြီး အဆင့် ခန့်အပ် ထားပြီဖြစ်ပြီး ရန်ကုန်မြို့မှာ ယာယီသံရုံး ဖွင့်လှစ်တော့မှာ ဖြစ်ပါတယ်။

Ref: VOA News

Read More...

လူမျိုးတုံး သတ်ဖြတ်မှုစွပ်စွဲချက် မဟုတ် မမှန်ကြောင်း အမေရိကန် ပြည်ထောင်စု ပြောကြား

2012-08-09

ရခိုင်ပြည်နယ်က လူမျိုးရေး တင်းမာမှုတွေကို အထူးစိုးရိမ်နေဆဲ ဖြစ်ပေမဲ့ OIC အစ္စလာမ်မစ်နိုင်ငံများ အဖွဲ့က စွပ်စွဲသလို လူမျိုးတုံး သတ်ဖြတ်နေတယ် ဆိုတာ မဟုတ် မမှန်တဲ့ အကြောင်း အမေရိကန်ပြည်ထောင်စုက ပြောကြား လိုက်ပါတယ်။

မြန်မာလုံခြုံရေး တပ်ဖွဲ့တွေက ဘင်္ဂါလီ ရိုဟင်ဂျာ ဦးရေ နည်းသွားအောင် အစုလိုက် အပြုံလိုက် သတ်ဖြတ်နေတယ် ဆိုတာ မဟုတ်တဲ့ အကြောင်း အမေရိကန် နိုင်ငံခြားရေး ၀န်ကြီးဌာန တာဝန်ရှိသူ Patrick Ventrell က ပြောသွားတာပါ။

မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး ကိုယ်စားလှယ် Tomas Quintana ပြီးခဲ့တဲ့ သီတင်းပတ်က ရခိုင်ပြည်နယ်ကို သွားရောက်ချိန်မှာ အမေရိကန် တာဝန်ရှိ ပုဂ္ဂိုလ်တွေလည်း လိုက်ပါ သွားခဲ့ပါတယ်။

ဘင်္ဂါလီ ရိုဟင်ဂျာတွေကို မြန်မာအစိုးရက တရားမဲ့ လူမျိုးတုံး သတ်ဖြတ် ကျူးလွန်နေတာကို နိုင်ငံ တကာက ရပ်တန့် သွားအောင် အရေးယူ ဆောင်ရွက်ပေးတာ မရှိလို့ စိတ်ပျက်ရတဲ့ အကြောင်း OIC အတွင်းရေးမှူးချုပ် Ihsanoglu က ပြောကြားပြီး နာရီပိုင်း အကြာမှာ အမေရိကန်ပြည်ထောင်စုက အဲဒီလို ပြောတာလည်း ဖြစ်ပါတယ်။

ဒီလို ရက်ရက်စက်စက် ကျူးလွန်နေတယ်လို့ စွပ်စွဲ ခံနေရတဲ့နေရာကို အချက် အလက် ရှာဖွေရေး အဖွဲ့ တစ်ဖွဲ့ စေလွှတ်ဖို့ ဆွစ်ဇာလန်နိုင်ငံ ဂျီနီဗာမြို့မှာ ရှိတဲ့ ကုလသမဂ္ဂ အစ္စလာမ်မစ် အဖွဲ့က လူ့အခွင့်အရေး ကောင်စီကို အရေးတကြီး မေတ္တာရပ်ခံ သင့်တယ်လို့လည်း OIC အစ္စလာမ်မစ်နိုင်ငံများ အဖွဲ့ အတွင်းရေးမှူးချုပ်က အကြံပေးပါတယ်။

ဒါ့အပြင် ဖြစ်ရပ်တွေနဲ့ ပတ်သက်ပြီး အစ္စလာမ်မစ် စုံစမ်းရေး ကော်မတီ တစ်ရပ် ဖွဲ့စည်းဖို့လည်း သူက အဆိုပြုပြီး နောက်တကြိမ် ကျင်းပမယ့် ၀န်ကြီးအဆင့် ညီလာခံမှာ အစီရင်ခံစာ တစ်စောင် တင်သွင်း သင့်တယ်လိ်ု့ ပြောပါတယ်။

Ref: RFA News

Read More...

သတင်းဂျာနယ် သုံးပုံတပုံ စည်းကမ်း ဖောက်ဖျက်နေဟု စိစစ်ရေး ဆို

မျိုးသန့်
ကြာသပတေးနေ့၊ သြဂုတ်လ ၀၉ ရက် ၂၀၁၂

ရန်ကုန် (မဇ္ဈိမ) ။ ။ ပြည်တွင်းတွင် လက်ရှိ ထုတ်ဝေနေသည့် အပတ်စဉ်ထုတ် သတင်း ဂျာနယ် များ၏ သုံးပုံ တပုံမှာ စည်းမျဉ်း စည်းကမ်းများ ချိုးဖောက်နေကြသည်ဟု စာပေ စိစစ်နှင့် မှတ်ပုံတင် ဌာနက ဆိုသည်။

သတင်းဂျာနယ် ၄၉ စောင်အနက် ၁၆ စောင်မှာ စာပေ စိစစ်ရေး၏ မူဝါဒ စည်းမျဉ်း စည်းကမ်း တခုမဟုတ် တခုကို အပါတ်စဉ် ဖောက်ဖျက်နေကြသည်ဟု ပြန်ကြားရေး ဝန်ကြီးဌာန၏ အင်တာနက် စာမျက်နှာတွင် ဗုဒ္ဓဟူးနေ့က ရေးသား ထားသည်။

“ဦးတည်ရာလမ်းကြောင်း ပျောက်သွားခြင်းတဲ့လား” ခေါင်းစဉ်ဖြင့် ရေးသားထားသည့် စိစစ်ရေး ဌာန၏ အဆိုပါ ဆောင်းပါးတွင် အပတ်စဉ်ထုတ် ဂျာနယ် နှစ်စောင် ထုတ်ဝေခွင့် ယာယီ ရပ်ဆိုင်းခံရခြင်း အပေါ် ဝိုင်းဝန်းဝေဖန်မှုများ အား တုန့်ပြန်ရေးသား လိုက်ခြင်းလည်း ဖြစ်သည်။

“တရားလက်လွတ် အရေးယူမှု၊ နိုင်ငံ၏ ပြုပြင်ပြောင်းလဲရေး လုပ်ငန်းစဉ် များနှင့် ဒီမိုကရေစီ ဖွံ့ဖြိုး တိုးတက်မှုကို နည်းမျိုးစုံဖြင့် ဟန့်တားခြင်း၊ ဒီမိုကရေစီ စနစ်ကို တကယ် သွားနေတယ် ဆိုတာကို ပြန်ကြားရေး ဝန်ကြီးဌာနကော သိရဲ့လား” စသည့် ဝေဖန်ချက်များမှာ မှားယွင်းသည့် ဝေဖန်မှုများဟု ဆောင်းပါးက ဆိုသည်။

“အရေးယူမှုသည် ဒီမိုကရေစီစနစ်နှင့်အညီ လျှောက်လှမ်းနေသော အစိုးရ၏ ရည်မှန်းချက်နှင့် လုပ်ငန်းဆောင်တာများ ကို ရပ်တန့်စေရန် လည်းကောင်း၊ နောက်ကြောင်း ပြန်လှည့်ရန် လည်းကောင်း၊ လမ်းကြောင်းပျောက်စေရန် လည်းကောင်း စသဖြင့် ဝေဖန် စွပ်စွဲနေကြသော ဖြစ်ရပ် အခြေအနေမျိုး လုံးဝမဟုတ်ဟု အတိအလင်း ငြင်းဆိုလိုသည်” ဟု ဆောင်းပါးတွင် ရေးသားထားသည်။

စာပေစိစစ်ရေးဌာနသည် ဖြတ်တောက် အရေးယူခြင်းထက် စောင့်ကြည့် ပူးပေါင်းရေး မူဝါဒကို ကျင့်သုံးလျက် ရှိနေ သည်ဟုလည်း ဆောင်းပါးက ဆိုသည်။

ဇူလိုင် နောက်ဆုံးပတ်အတွင်း ထုတ်ဝေခွင့် ခေတ္တပိတ်ပင်ခံခဲ့ရသည့် ဂျာနယ်နှစ်စောင်ဖြစ်သည့် Envoy နှင့် The Voice ဂျာနယ် တို့သည် မေလနှင့် ဇွန်လများအတွင်း နောက်ဆုံးအဆင့် သတိပေးခံထားရသည့် ဂျာနယ်များဖြစ်ပြီး “ယင်း ဂျာနယ်နှစ်စောင်၏ စည်းကမ်း မလိုက်နာခဲ့ခြင်းအပေါ် စာပေစိစစ်နှင့် မှတ်ပုံတင်ဌာနက အခြားရွေးချယ်ရန် နည်းလမ်း မရှိတော့ဘဲ အရေးယူမှု ပြုလုပ်ခဲ့ရခြင်း ဖြစ်သည်” ဟုလည်း ဖြေရှင်းထားသည်။

နိုင်ငံတကာ သတင်းများ၊ ဆင်းရဲသား ဘဝသရုပ်ဖေါ်၊ ဂမ္ဘီရဆိုင်ရာ ရေးသားချက်၊ ဌာနဆိုင်ရာ လုပ်ငန်း များနှင့် ပတ်သက်သော ရေးသားချက် များကို ရေးသားနိုင်ရန် တင်းကြပ်ထားသည့် စိစစစ်ရေးမူဝါဒများကို ၂ဝဝ၅ ခုနှစ် ဇွန်လ အတွင်း ကတည်းက လျော့ပေါ့ပေးခဲ့ပြီး ဖြစ်သည်ဟုလည်း ဆိုသည်။

ထို့အပြင် ပုံနှိပ်မီဒီယာဥပဒေမူကြမ်းကို ပြည်ထောင်စု ရှေ့နေချုပ်ရုံးသို့ တင်ပြထားပြီးဖြစ်ကာ သြဂုတ်လ ဒုတိယပတ် တွင် သမ္မတရုံးသို့ တင်ပြမည်ဖြစ်ပြီး ယခု ကျင်းပလျက်ရှိသည့် လွှတ်တော်သို့ တင်ပြနိုင်ရန် စီစဉ်လျက်ရှိသည်ဟုလည်း ရေးသားထားသည်။

(စာပေစိစစ်ရေးဌာန၏ ဆောင်းပါးအပြည့်အစုံဖတ်ရန် အောက်ပါလင့်ခ်ကို သွားပါ။) http://www.ministryofinformation.gov.mm/index.php/articles/622-2012-08-08-03-30-14.html

Ref: မဇ္ဈိမ

Read More...

တူရကီ နိုင်ငံခြားရေးဝန်ကြီးနှင့်အဖွဲ့ ရခိုင်ပြည်နယ် သွားမည်

တင်ဇာအောင်
ကြာသပတေးနေ့၊ သြဂုတ်လ ၀၉ ရက် ၂၀၁၂

ရန်ကုန် (မဇ္ဈိမ) ။ ။ အစ္စလာမ် ပူးပေါင်းဆောင်ရွက်ရေးအဖွဲ့ (OIC) ၏ ကိုယ်စားလှယ် အဖြစ် တူရကီ နိုင်ငံခြားရေး ဝန်ကြီး အာမတ် ဒါဗူတိုဂလူ Ahmet Davutoglu ဦးဆောင်သည့် အဖွဲ့သည် ကြာသပတေးနေ့တွင် နေပြည်တော်သို့ ရောက်ရှိ လာပြီး သမ္မတ ဦးသိန်းစိန်နှင့် တွေ့ဆုံခဲ့ပြီးနောက် သောကြာနေ့တွင် ရခိုင်ပြည်နယ် အခြေအနေအား သွားရောက် လေ့လာကြမည်ဟု ပြန်ကြားရေး ဝန်ကြီးဌာနက သတင်းထုတ်ပြန်သည်။

၎င်းတို့နှင့် နိုင်ငံတကာမှ ကြားသိရသော ရခိုင်ပြည်နယ်တွင်း အရေးအခင်းများနှင့် ပတ်သက်သည့် သတင်းအချက် အလက်များမှာ အငြင်းပွား ဖွယ်ရာများ ဖြစ်နေသည်ဟု တူရကီ ဝန်ကြီးက သတင်းထောက်များအား ဗုဒ္ဓဟူးနေ့က ပြောဆို ခဲ့သည်။ ယခု ခရီးစဉ်မှ လေ့လာတွေ့ရှိ ရသော အခြေအနေများကို OIC သို့ ပြန်လည် တင်ပြသွားမည် ဖြစ်သည်။

သမ္မတ ဦးသိန်းစိန်နှင့် တွေ့ဆုံရာတွင် နှစ်နိုင်ငံ ဆက်ဆံရေး မြှင့်တင်မှု ကိစ္စများ၊ ဒုတိယ ကမ္ဘာစစ်အတွင်း မြန်မာနိုင်ငံ တွင် ကျဆုံး ခဲ့သော တူရကီ စစ်သည်တော်များ၊ သချိုင်းများ ကိစ္စ၊ စီးပွားရေး ပူးပေါင်းဆောင်ရွက်ရေး ကိစ္စတို့ အပြင် ရခိုင်ပြည်နယ် အတွင်း အခြေအနေ များကိုလည်း ဆွေးနွေးခဲ့ကြသည်ဟု ဝန်ကြီးဌာန ဝက်ဘ်ဆိုက်တွင် ပါရှိသည်။

တူရကီနိုင်ငံ လခြမ်းနီ (ကြက်ခြေနီ) အဖွဲ့သည် ရခိုင်ပြည်နယ် အတွက် ကယ်ဆယ်ရေး ပစ္စည်းများ အနေဖြင့် မီးဖိုချောင်သုံး ပစ္စည်းများဖြစ်သည့် ဇွန်း၊ ခရင်း၊ ယောက်ချိုဇွန်း၊ ဇလုံနှင့် ဒယ်အိုးများပါဝင်သည့် အထုပ်ပေါင်း ၇၂ဝ၊ ဆန်၊ ဆီ၊ ဆား၊ ပဲ နှင့် သကြားတို့ ပါဝင်သည့် အထုပ်ပေါင်း ၅၇၆ ထုပ် ယူဆောင်လာကြောင်း လူမှုဝန်ထမ်း ကယ်ဆယ်ရေးနှင့် ပြန်လည်နေရာ ချထားရေး ဦးစီးဌာန ညွှန်ကြားရေးမှူးချုပ် ဦးစိုးအောင် က ပြောသည်။

ယင်းအဖွဲ့မှ အကူညီပေးသည့် ပစ္စည်များသည် စုစုပေါင်းတန်ချိန် ၁၆.၅ တန်ရှိပြီး တူရကီနိုင်ငံ အနေဖြင့် ဒုက္ခသည်များ အတွက် ပထမဆုံး အကြိမ် ပံ့ပိုးခြင်း ဖြစ်ကြောင်း ၎င်းက ပြောသည်။

အဆိုပါ ကူညီထောက်ပံရေး ပစ္စည်းများကို ပြည်နယ် အစိုးရ အဖွဲ့ထံသို့ ယနေ့ လွှဲပြောင်းပေးအပ် လိုက်ကြောင်း သိရသည်။

တူရကီနိုင်ငံ သဘာဝ ဘေးအန္တရာယ်နှင့် အရေးပေါ် အခြေအနေ စီမံခန့်ခွဲမှု ဦးစီးဌာန (AFAD) ကလည်း မြန်မာနိုင်ငံရှိ မူဆလင် ဒုက္ခသည်များ အတွက် ကူညီထောက်ပံ့နိုင်ရန် ရန်ပုံငွေကောက်ခံခဲ့ရာ တူရကီ လီရာငွေ ၂.၁ သန်း (အမေရိကန် ဒေါ်လာ ၁.၃ သန်းကျော်) ရရှိ ထားသည်ဟု ယနေ့ထုတ်ပြန် ကြေညာထားသည်။

နိုင်ငံခြားရေးဝန်ကြီး၏ ယခုခရီးစဉ်မှာ တူရကီနိုင်ငံ၏ ပထမ ဆုံးသော အဆင့်မြင့် ကိုယ်စားလှယ် တဦး လာရောက်ခြင်း ဖြစ်ပြီး ယခုအခြေအနေတွင် မြန်မာ အစိုးရက လက်ခံခြင်းမှာ နိုင်ငံတကာ နယ်ပယ်တွင် တူရကီ၏ သြဇာကို ပြသရာ ရောက်သည်ဟု ဝန်ကြီး အာမတ် ဒါဗူတိုဂလူ က ထုတ်ဖော်ပြောဆိုသည်။

Ref: မဇ္ဈိမ

Read More...

ဖမ်းထားသော ရှမ်းတပ်ဖွဲ့ ပြန်လွှတ်မည်ဟု ဝ တပ်ဖွဲ့ပြော

ကျော်ခ
August 9, 2012

နယ်မြေကျူးကျော်မှုဖြင့် ဖမ်းဆီးထားသော ရှမ်းပြည် တပ်မတော်တောင်ပိုင်း SSA-S တပ်ဖွဲ့ ဝင် များကို အသက် အန္တရယ် မထိခိုက်စေဘဲ ပြန်လွှတ်ပေးမည် ဟု ဝပြည် သွေးစည်း ညီညွှတ်ရေး တပ်မတော်က ပြောဆို လိုက်သည်။

“သူတို့က နယ်မြေကျူးကျော်လာလို့လေ၊ ခဏတဖြုတ် ထိန်းထားတာပါ၊ အေးအေး ချမ်းချမ်း ပြန်လွှတ်ပေးမှာပါ၊ ပြန်လွှတ်ဖို့တော့ စီစဉ်နေတယ်၊ ဘယ်အချိန်ပြန်လွှတ်မယ် ဆိုတာတော့ မသိသေးဘူး” ဟု UWSA ၀ိန်းကောင်ခရိုင် အတွင်းရေးမှူး ဦးစောလွင် က ဧရာဝတီိသို့ ပြောသည်။

ဇူလိုင်လ ၃၁ ရက်နေ့က မိုင်းတုံမြို့နယ် UWSA ထိန်းချုပ်ရာ နယ်မြေ ရာဘာခြံထဲတွင် စိုက်ပျိုးရေး လုပ်ရန် အကြောင်းပြချက်ဖြင့် ရောက်ရှိနေသူ SSA-S တပ်ဖွဲ့ဝင်များနှင့် ဒေသခံ အချို့ကို နယ်မြေကျူးကျော်မှုဖြင့် နယ်မြေခံ UWSA တပ်ဖွဲ့များက ဖမ်းဆီး ထိန်းသိမ်းခဲ့သည်။

ထိုအဖွဲ့များကို လွှတ်ပေးရေးအတွက် ယခုလဆန်းပိုင်းပိုင်းအတွင်း၌ပင် နှစ်ဘက် တာဝန်ရှိသူများ နှစ်ကြိမ်တိုင် တွေ့ဆုံ ဆွေးနွေး ခဲ့သော်လည်း လွတ်မြောက်ရေး အဖြေ မထွက်ခဲ့ဘဲ ထိစပ် နယ်မြေများတွင် တပ်အင်အားများ တိုးချဲ့ထားပြီး တင်းမာနေလျှက် ရှိသည်။

“ကျနော်တို့ ခွင်ထဲမှာ သူတို့တပ်လာထိုင်တယ်လေ၊ ခင်ဗျားတို့ ဘာလာလုပ်လဲလို့မေးတော့ စိုက်ပျိုးရေး လာလုပ်တယ် ဘာညာ အဲဒီလိုပြောတယ်၊ စိုက်ပျိုးရေး လာလုပ်တာတော့ မဖြစ်နိုင်ဘူး” ဟု ဦးစောလွင် က ပြောသည်။

ဖမ်းဆီးထားသူများကို ရှမ်းပြည်တောင်ပိုင်းရှိ UWSA ထိန်းချုပ်ရာ တပ်စခန်းတွင် ထားရှိပြီး စိုးရိမ်စရာ မရှိကြောင်း သူက ဆက်ပြောသည်။ ယင်းသို့ ဖမ်းဆီးထိန်းသိမ်း ထားမှုကြောင့် နှစ်ဖက်တပ်များ တင်းမာသည့် အနေအထားတွင်ရှိသော်လည်း စစ်ရေးအရ ဖြေရှင်း သွားမည်မဟုတ်ဟု ဆိုသည်။

ဖမ်းဆီးခံထားရသူများထဲတွင် ရှမ်းပြည်တပ်မတော် တောင်ပိုင်းမှ အရာရှိ ၂ ဦးနှင့် တပ်သား ၅ ဦးအပါအဝင် အမာခံဒေသခံ အချို့ပါဝင်ကြောင်း၊ ၎င်းတို့ လွတ်မြောက်ရေးအတွက် SSA-S တာဝန်ရှိသူများနှင့် UWSA တာဝန်ရှိသူများ ယခုလဆန်းပိုင်း အတွင် ၂ ကြိမ်တွေ့ဆုံခဲ့ပြီဖြစ်သော်လည်း အဆင်မပြေခဲ့ကြောင်း SSA-S ပြောရေးဆိုခွင့်ရှိသူ ဗိုလ်မှူး စိုင်းလောင်ဆိုင်း က ပြောသည်။

ယခုဖြစ်ရပ်ကြောင့် နှစ်ဖက် ထိစပ်နယ်မြေများတွင် တပ်များထားရှိကြသော်လည်း တိုက်ခိုက်မှုများဖြင့် ဖြေရှင်းသွားမည် မဟုတ်ကြောင်း၊ ငြိမ်းချမ်းစွာဖြေရှင်းသွားမည်ဖြစ်ကြောင်း SSA-S ကလည်း ပြောသည်။

“စစ်ရေးနည်းလမ်းနဲ့ ပြန်ဖြေရှင်းဖို့ ဆန္ဒမရှိဘူး၊ ငြိမ်းချမ်းရေးလမ်းစဉ်အတိုင်း ဆွေးနွေးခြင်းနဲ့ အဖြေရှာခြင်းကိုပဲ ကျနော်တို့ သွားမှာပါ” ဟု ဗိုလ်မှူး စိုင်းလောင်ဆိုင်း က ဧရာဝတီသို့ ပြောသည်။

SSA-S နှင့် UWSA တို့အကြား ယခင်က ဆက်ဆံရေးကောင်းမွန်ခဲ့သော်လည်း ယခုဖြစ်ရပ်တွင် ပြေလည်နိုင်ရေး ကြန့်ကြာနေသည်။ နှစ်ဘက်ပြေလည်ရေး ဆွေးနွေးရန် တွေ့ဆုံရာတွင် SSA-S အနေဖြင့် အဆင့်မြင့်အရာရှိများ လွှတ်ပြီး ဆွေးနွေးခြင်း မရှိသည့်အတွက် အဆင်မပြေဖြစ်နေကြောင်း UWSA ဖက်မှသတင်းများကို ကိုးကား၍ ရှမ်းသံတော်ဆင့် သတင်းဌာန အယ်ဒီတာချုပ် ဦးခွန်ဆိုင်း က ပြောသည်။

သို့သော်လည်း SSA-S အနေဖြင့် မူးယစ်ဆေးဝါး တိုက်ဖျက်ရေး ကဏ္ဍများလှုပ်ရှားနေမှု၊ အစိုးရနှင့် ထိတွေ့ဆက်ဆံနေမှု အပေါ် အစိုးရ တပ်များနှင့် SSA-S တို့ ပူးပေါင်း၍ ပူးပေါင်းတိုက်ခိုက်နိုင်သည်ဟု UWSA ထိပ်ပိုင်း အရာရှိအချို့က သံသယဝင်နေကြောင်း ဦးခွန်ဆိုင်းက သုံးသပ်ပြောဆိုသည်။

သို့သော် SSA-S နှင့် အစိုးရတပ်များအကြား ရှမ်းပြည်နယ် အရှေ့ပိုင်း၊ တောင်ပိုင်းနှင့် မြောက်ပိုင်းတို့တွင် တိုက်ပွဲများ ဖြစ်ပွားနေလျက်ရှိပြီး ပဏာမ အပစ်ခတ်ရပ်စဲရေး ရရှိပြီးနောက်ပိုင်းတွင် တိုက်ပွဲပေါင်း ၂၈ ကြိမ်ရှိခဲ့ပြီဖြစ်ကြောင်း ဗိုလ်မှူး စိုင်းလောင်ဆိုင်း ကပြောသည်။

အပစ်ခတ်ရပ်စဲရေး သဘောတူညီမှု ရရှိထားသော်လည်း ယင်းသို့ တိုက်ပွဲများ ဖြစ်ပွားနေမှုနှင့်ပတ်သက်၍ အစိုးရအနေဖြင့် ကိုင်တွယ်ဖြေရင်းပေးရန်အတွက် ငြိမ်းချမ်းရေးဖော်ဆောင်ရေး အဖွဲ့များထံမှတဆင့် သမ္မတ ဦးသိန်းစိန်ထံ သြဂုတ်လ ၁ ရက်နေ့က စာရေးသား ပေးပို့ထားကြောင်း သိရသည်။

Ref: ဧရာဝတီ

Read More...

ရခိုင်တွင် ညမထွက်ရအမိန့် ထပ်မံ ထုတ်ပြန်

ခင်ဦးသာ
August 9, 2012

ရခိုင်ပြည်နယ် ကျောက်တော်၊ မင်းပြား၊ မြောက်ဦး မြို့များတွင် ယမန်နေ့ညက စတင်၍ ပုဒ်မ ၁၄၄ ညမထွက်ရ အမိန့် ထုတ်ပြန် လိုက်ကြောင်း သိရသည်။

ကျောက်တော်မြို့၌ ည ၇ နာရီမှ နံက် ၅ နာရီ အထိ ညမထွက်ရ ထုတ်ပြန်ထားပြီး မင်းပြားနှင့်မြောက်ဦး မြို့များတွင် ည ၁၀ နာရီမှ နံက် ၄ နာရီအထိ အသီးသီး ထုတ်ပြန်ထားကြောင်း၊ ထိုအမိန့်အား ဗဟိုမှ လမ်းညွန်ချက် အရ ဒေသဆိုင်ရာ အာဏာ ပိုင်များက မြို့အနှံ့ လိုက်လံကြေညာ ခဲ့ကြောင်း ဒေသခံများ က ဧရာဝတီကို ပြောသည်။

“စစ်တပ်ဗျူဟာမှူး က ညွန်ကြားတယ် ဆိုပြီး မြို့နယ်မှူးနဲ့ အဖွဲ့ဝင်တွေက စပီကာ နဲ့ကြေညာတယ်၊ အိမ်မှာရှိတဲ့ တုတ်တွေ၊ ဓား တွေ၊ ဂျင်ကလိ၊ လေးခွ က အစပေါ့ ရှိရင် သက်ဆိုင်ရာကို လာအပ်ပေးဖို့၊ စစ်ဆေးတွေ့ ရှိရင် အရေးယူမယ်လို့ ကြေညာတယ်” ဟု မင်းပြား မြို့ခံနှင့်ပြည်နယ် လွှတ်တော် ကိုယ်စားလှယ် ဦးသာကျော် က ပြောသည်။

ကျောက်တော်မြို့၌ ပြီးခဲ့သည့် ရက်ပိုင်းအတွင်း ဖြစ်ပွားခဲ့သည့် မီးရှို့မှု၊ အုပ်စုဖွဲ့ တိုက်ခိုက်မှု စသည့် ပဋိပက္ခများ ဖြစ်ပွားခဲ့သည့် အတွက် ထပ်မံ မဖြစ်စေရန် ယင်းအမိန့်ထုတ် ပြန်ရခြင်းကြောင်း ရခိုင်ဒေသတွင်း ဖြစ်ပွားခဲ့သည့် ပဋိပက္ခများနှင့် ပတ်သက်၍ ဖွဲ့စည်း ထားသော ပြန်ကြားရေး အဖွဲ့ဝင် ဦးမျိုးသန့် က ပြောပြသည်။

ကျောက်တော်မြို့၌ သြဂုတ်လ ၅ ရက်နေ့က စတင်ခဲ့သော ပဋိပက္ခများတွင် ဒေသခံ ရခိုင် တိုင်းရင်းသား များနှင့် ဘင်္ဂါလီလူမျိုးများ အကြား အပြန်အလှန် မီးရှို့မှုများကြောင့် ကျေးရွာ တချို့ မီးလောင်ကျွမ်းခဲ့ရာ အိမ်ခြေ ၃၀၀ ကျော် မီးလောင် သွားကြောင်း၊ သေ ဆုံးသူ တချို့နှင့် ထိခိုက် ဒဏ်ရာရသူ အနည်းငယ် ရှိကြောင်း ၎င်းက ဆက်ပြောသည်။

ဦးမျိုးသန့်က“သေဆုံးသူ တချို့ရှိပေမယ့် အလွန်နည်းပါတယ်၊ ဘယ်သူ ဘယ်ဝါ ဆိုတာ စာရင်း အတိအကျ မရသေးပါဘူး၊ အတိအကျ စိစစ်ပြီးတော့ ထုတ်ပြန်ပေးသွားမှာပါ၊ ဒီနေ့တော့ တည်ငြိမ် အေးချမ်းနေပါပြီ”ဟုလည်း ဆိုသည်။

ကျောက်တော် ပဋိပက္ခ ပြဿနာသည် မောင်တောမြို့ အကြမ်းဖက်မှု အပြီး အကြီးမားဆုံး ပြဿနာဖြစ်ကြောင်း၊ ယခင်က တဘက်နှင့် တဘက် ပဋိပက္ခတချို့ရှိခဲ့သော်လည်း ထိခိုက် ဒဏ်ရာရခြင်း မရှိကြောင်း ကျောက်တော် ဒေသခံများ က ပြော သည်။

ရခိုင်လူမျိုးများနှင့်ဘင်္ဂါလီလူမျိုးများအကြား အပြန်အလှန် မီးရှို့မှုများကြောင့် တောင်ပေါက်၊ အပေါက်ဝ၊ ရွှေလှိုင်၊ ဂုပ္ပီးထောင့်၊ ရွာညှာ စသည့်ကျေးရွာများ မီးလောင်ကျွမ်းသွားကြောင်း၊ ထိုကျေးရွာများ၌ ဘင်္ဂါလီလူမျိုးများ အပြင် ရခိုင်လူမျိုးများလည်း နေ ထိုင်ကြောင်း၊ မီးလောင်ကျွမ်းသွားသည့် နေအိမ်အများစုမှာ ဘင်္ဂါလီလူမျိုး နေအိမ်များ ဖြစ်ကြောင်းလည်း ဒေသခံများ က ပြော ဆို သည်။

“ဒီဒေသမှာ ရခိုင်တွေနဲ့ဘင်္ဂါလီတွေ နေလာတာ ကြာပေမယ့် ပြဿနာဖြစ်တာ တခါမှမရှိခဲ့ပါဘူး၊ ၀ါဆို လပြည့်နေ့မှာ ရခိုင်တွေ ပိုင်တဲ့ ကားဂိတ်ကို ဘင်္ဂါလီတစုက ဖျက်ဆီးတဲ့အပြင် ရခိုင်ပိုင်တဲ့ ဆန်စက်ကို မီးရှို့လိုက်တယ်၊ ဒီဆန်စက်က ဆန်တွေ ကို ရခိုင်တွေ စားနေကြတာပါ၊ အဲဒီနောက်ပိုင်းမှာ တဘက်နဲ့တဘက် ပြဿနာတွေ ကြီးထွားသွားတယ်”ဟု ကျောက်တော် ဒေသ ခံ ဦးမောင်မောင် က ဧရာဝတီကို ပြောသည်။

ကျောက်တော်မြို့၌ ယနေ့တွင် လုံခြုံရေး အင်အား တိုးချထားပြီး အခြေအနေ တည်ငြိမ်နေကြောင်း၊ စာသင်ကျောင်းများ၊ ဈေးဆိုင်များ ပုံမှန်ဖွင့်လှစ်ထားကြောင်း၊ ဘင်္ဂါလီကျေးရွာနှင့်နီးစပ်သည့် စာသင်ကျောင်းများ၊ ကျေးရွာများတွင် စစ်တပ်နှင့် ရဲတပ်ဖွဲ့ဝင်များကို ၅ ဦး၊ ၆ ဦး စသည်ဖြင့် လုံခြုံရေး ယူပေးထားကြောင်း သိရသည်။

မြောက်ဦးမြို့နယ်တွင်လည်း ညမထွက်ရ အမိန့်ထုတ်ပြန်ထားပြီး အခြေအနေ တည်ငြိမ်နေကြောင်း၊ မြောက်ဦးမြို့မှ လေးမိုင် ခန့် အကွာရှိ ကျေးရွာတခု၌ ယမန်နေ့ ညနေက ဒေသခံတိုင်းရင်းသားများနှင့် ဘင်္ဂါလီများ အကြား ပြဿနာတချို့ရှိ ခဲ့ ကြောင်း၊ သို့သော် အာဏာပိုင်များ၊ မြို့မိ မြို့ဘများက အခြေအနေ ထိန်းသိမ်းနိုင်ခဲ့ကြောင်း၊ ဘင်္ဂါလီ များပြားသည့် ကျေးရွာများ တွင် လုံခြုံရေး ပိုမို တိုးချထားကြောင်း သိရသည်။

“ဒေသတွင်းမှာ အခြေအနေ တည်ငြိမ်မှုမရှိတဲ့အတွက် မြို့သူ၊ မြို့သားတွေ တည်ငြိမ်အေးချမ်းစွာ နေထိုင်ရအောင် ည မထွက် ရ အမိန့် ထုတ်တာပါလို့ မြို့နယ် အာဏာပိုင်တွေက ည ၉ နာရီ ကျော်မှာ ကြေညာတယ်”ဟု မြောက်ဦး ဒေသခံ ဦးမောင်သန်း က ပြောသည်။

မြောက်ဦးမြို့ပေါ်တွင်လည်း လုံခြုံရေး တိုးမြှင့်ချထားပြီး စာကျောင်းများလည်း ပုံမှန်အတိုင်း ဖွင့်လှစ် သင်ကြားနေကြောင်း သိရ သည်။

မောင်တော အကြမ်းဖက်မှု အပြီး မောင်တော၊ ဘူးသီးတောင် ဒေသရှိ စာသင်ကျောင်း အားလုံးကို ယနေ့အထိ ပိတ်ထားဆဲ ဖြစ်ကြောင်း၊ မြို့ပေါ်ရှိ ဈေးများ၊ ဈေးဆိုင်များကိုလည်း နံနက် ၁၂ နာရီခန့်အထိသာ ဖွင့်လှစ်ရောင်းချနေကြောင်း၊ ပြည်ပ အကြမ်းဖက် အဖွဲ့ တချို့က မောင်တောကို ဗုံးခွဲ တိုက်မည်ဟု သတင်းများ ထွက်ပေါ်နေသည့်အတွက် ယမန်နေ့ က စတင်ပြီး လုံခြုံရေး အင်အား နေရာအနှံ့တိုးချထားကြောင်း ဒေသခံတချို့က ပြောပြသည်။

ရခိုင်ဒေသတွင်း ဖြစ်ပေါ်ခဲ့သော ပဋိပက္ခများ၊ အကြမ်းဖက်မှုများကြောင့် စစ်တွေ၊ ဘူးသီးတောင်၊ မောင်တော၊ ကျောက်ဖြူ၊ ရမ်းဗြဲ၊ သံတွဲ စသည့် မြို့နယ်များကို ဇွန်လ ၈ ရက်နေ့မှစတင်၍ ညမထွက်ရအမိန့် ပုဒ်မ ၁၄၄ ထုတ်ပြန်ခဲ့သည်။ ထို့နောက် ဇွန် လ ၁၀ ရက်နေ့တွင် ရခိုင်ပြည်နယ်တခုလုံးကို သမ္မတ ဦးသိန်းစိန်က အရေးပေါ် အခြေအနေ ကြေညာထားခဲ့သည်။

Ref: ဧရာဝတီ

Read More...

Wednesday, August 8, 2012

ပြည်ထောင်စုဝန်ကြီးများ ရှစ်လေးလုံး အခမ်းအနား အတွက် အလှူငွေ ပေးအပ်

2012-08-07

ပြည်ထောင်စု ၀န်ကြီးတွေဖြစ်တဲ့ ဦးအောင်မင်းနဲ့ ဦးစိုးသိန်းတို့ဟာ ဒီကနေ့ ညနေ (၅) နာရီလောက်မှာ (၂၄) နှစ်မြောက် ငွေရတု အကြို ရှစ်လေးလုံး အရေးတော်ပုံ နှစ်ပတ်လည် အခမ်းအနား ကျင်းပမယ့် မန္တလေးမြို့ ဒက္ခိဏာရာမ ဘုရားကြီး အလယ်တိုက်ကို သွားရောက်ပြီး ဆရာတော် ဦးခေမာကို အလှူငွေ ဆက်ကပ်သလို ကိုမင်းကိုနိုင် ခေါင်းဆောင်တဲ့ (၈၈) မျိုးဆက် ကျောင်းသား ခေါင်းဆောင်တွေ ကိုလည်း ၈ လေးလုံး အခမ်းအနား အတွက် ကျပ်ငွေ (၁၀) သိန်း ပေးအပ်ခဲ့ပါတယ်။

အခုလို လာရောက် ကူညီတာဟာ သမ္မတက ခွင့်ပြုလို့ ဖြစ်တယ်လို့ ၀န်ကြီး ဦးအောင်မင်းက (၈၈) မျိုးဆက် ကျောင်းသားတွေကို ပြောခဲ့ ပါတယ်။

"အရင်တုန်းက စနစ်က ခွင့်မပြုဘူး။ အခုက စနစ်က ခွင့်ပြုပြီ။ လုပ်လို့ ရသွားပြီ။ နိုင်ငံတော်က ခွင့်ပြု၊ သမ္မတကြီးက ခွင့်ပြုလို့ ကျွန်တော်တို့ လာလို့ ရတာပေါ့"

အစိုးရ ဝန်ကြီးတွေ ကိုယ်တိုင် ၈ လေးလုံး အရေးတော်ပုံ နှစ်ပတ်လည် အခမ်းအနား အတွက် အခုလို လာရောက် အားပေးတဲ့ အပေါ် ၈၈ မျိုးဆက် ကျောင်းသား ခေါင်းဆောင် ကိုမင်းကိုနိုင်က ကြိုဆိုလိုက်ပါတယ်။

"ဒီဟာက ဖြစ်သင့်ဖြစ်ထိုက်တာက ကြာပြီဗျ။ ဘာကြောင့်လဲ ဆိုတော့ ရှစ်လေးလုံးကြောင့်ပဲ ကျွန်တော်တို့ တိုင်းပြည် အကြီးအကျယ် ပြောင်းလဲခဲ့တယ်။ အမှောင်ထဲကနေ အလင်းဘက်ကို မျက်နှာမူလာတယ်။ အာဏာရှင် ဥခွံကွဲပြီးတော့ ဒီမိုကရေစီ သားပေါက်ခွင့် ရတယ်ပေါ့ဗျာ။ အဲဒီအပေါ်မှာ အသိအမှတ်ပြုတယ် လို့ပဲ ကျွန်တော် နားလည်ပါတယ်။ အဲတော့ ရေရှည်မှာ ကျွန်တော်တို့ တည်ဆောက်ရေး အတွက် အားလုံးပါဝင်တဲ့ နိုင်ငံရေး ဖြစ်စဉ်လို့ သမ္မတကြီးကိုယ်တိုင် ပြောထားတဲ့ အခါမှာ တစ်ယောက်နဲ့ တစ်ယောက် အပြန်အလှန် လေးစားနားလည်မှုက အင်မတန် အရေးကြီးပါတယ်။ အဲဒါကို ဒီကနေ့ တည်ဆောက်နိုင်ခဲ့တယ်။ အတိုင်းအတာ တစ်ခုအထိတော့ တည်ဆောက်နိုင်ခဲ့ပြီ။ ကောင်းတဲ့ လက္ခဏာပါ"

မနက်ဖြန် ကျင်းပမယ့် အခမ်းအနားကို ၀န်ကြီး ဦးအောင်မင်းနဲ့ ဦးစိုးသိန်းတို့ တက်ရောက်မယ်၊ မတက်ရောက်ဘူး ဆိုတာကိုတော့ လောလောဆယ် မသိရသေးပါဘူး။

ဝန်ကြီးတွေနဲ့ ဒီနေ့ညနေ တွေ့ဆုံပွဲမှာ (၈၈) မျိုးဆက် ကျောင်းသားများ အဖွဲ့က ကိုမင်းကိုနိုင် ရေးသားတဲ့ နောက်ကြည့်မှန် စာအုပ်နဲ့ ကိုမြအေး ရေးသားတဲ့ မိုးကောင်းကင်၌ တိမ်တိုက်များ စာအုပ်တွေကို လက်မှတ်ထိုးပြီး ၀န်ကြီးနှစ်ဦးကို မေတ္တာလက်ဆောင် ပေးလိုက်ကြပါတယ်။

Ref: RFA News

Read More...

ပဲခူးတိုင်း ရေကြီး၍ ကျေးရွာများနှင့် စပါးခင်းများစွာ ရေမြုပ်နေ

ကျော်ခ
August 7, 2012

ပဲခူးတိုင်း ပဲခူးမြို့ပေါ်ရပ်ကွက်များ အပါအဝင် ညောင်လေးပင်၊ သနပ္ပင်၊ ကဝ နှင့် မဒေါက် မြို့နယ်များတွင် ရေကြီးရေလျှံဖြစ်၍ စပါးခင်းများနှင့် ကျေးရွာများ ရေမြုပ်နေကြောင်း ဒေသခံများက ပြောသည်။

ညောင်လေးပင်မြို့နယ်တွင် မိုးများ ဆက်တိုက် ရွာသွန်းနေသကဲ့သို့ မြို့၏ အထက်ပိုင်းရှိ ရွှေကျင်ဆည်နှင့် ရဲနွယ် ဆည်တို့မှ ရေလွှဲချသဖြင့် ယခု လဆန်းပိုင်းမှ စ၍ ချောင်းကျိုး၊ တော်ပသီရွာနှင့် ထင်းကုန်းရွာ အပါအဝင် ကျေးရွာပေါင်း ၂၀ ကျော်မှ လယ်များနှင့် ရွာထဲရှိ လူနေအိမ်တချို့ ရေမြုပ်နေခြင်းဖြစ်ကြောင်း သိရသည်။

“အခုလယ်ကွင်းတွေအားလုံးက စပါးပင်တွေ မမြင်ရတော့ဘူး။ ကျနော်တို့ တရွာတည်း မှာကို ဧက ၂၈၀၀ ကျော်မြုပ်တယ်၊ ဒီရွာ ၂၀ ကျော်ဆိုရင် အနည်းဆုံး ဧက ၁ သောင်း ကျော်လောက် ရှိတယ်၊ လောလောဆယ် ကျွဲတွေ၊ နွားတွေနဲ့ အိမ်မွေး တိရစ္ဆာန် တွေကိုတော့ ရေလွတ်တဲ့ တာဘောင်တွေပေါ်မှာ ဆွဲတင် ထားရတာပေါ့”ဟု တော်ပသီ ကျေးရွာသား ကိုအေးလွင် က ဧရာဝတီသို့ ပြော သည်။

မြေနိမ့်ပိုင်း ကျေးရွာများထဲရှိ လမ်းများပေါ်တွင်လည်း ရေများ ဖုံးလွှမ်းနေပြီး သွားရေးလာရေး အခက်တွေ့နေကြောင်း၊ ယနေ့အထိ မိုး အဆက် မပြတ် ရွာသွန်းနေသဖြင့် စပါးပင်များ ပျက်စီး ဆုံးရှုံးမည်ကိုလည်း လယ်သမားများက စိုးရိမ်နေကြသည်ဟု ဆိုသည်။

“မျိုးစပါးတွေ ပုပ်ကုန်ရင်တော့ လောလောဆယ် စိုက်ပျိုးထားတဲ့ စရိတ်တွေက ဆုံးရှုံးကုန်ပြီလေ၊ ပထမ တရင်းက ဆုံးရှုံးပြီဆိုရင် တော့ ခေါင်းထောင်နိုင်တဲ့ အနေအထားမရှိတော့ဘူးလေ၊ ထပ်စိုက်မယ်ဆိုရင်တောင် ရာသီဥတု အခြေအနေက ဘာဖြစ်လာမယ် ဆိုတာ မှန်းလို့မှ မရတာ”ဟု ကိုအေးလွင် က ဆက်ပြောသည်။

မိုးအဆက်မပြတ်ရွာသွန်းမှုကြောင့် စစ်တောင်းမြစ်ရေလျှံကာ ညောင်လေးပင်မြို့နယ်အတွင်း မုက္ခမူကျေးရွာနှင့် မဒေါက်မြို့နယ် အတွင်းရှိ တောင်ကြီးကျေးရွာတို့တွင် နေအိမ် အများအပြားရေနစ်မြုပ်ခဲ့ပြီး ရေဘေးဒုက္ခသည်များကို မြို့ပေါ်ရှိ ပုဂ္ဂလိက အလှူရှင် များက ဆန်အိတ် ၁၅၀ လှူဒါန်းပေးသဖြင့် စက်လှေများဖြင့် နေအိမ်များအထိ ပို့ပေးနေကြောင်း ယနေ့ထုတ် မြန်မာ့ အလင်း သတင်းစာတွင်လည်း ဖော်ပြထားသည်။

အလားတူ ပဲခူးတိုင်း အရှေ့ပိုင်း ကဝမြို့နယ်တွင်းရှိ အုန်းနှဲ၊ ထာဝ၊ နိဗ္ဗာန်၊ ပိုင်ကျုံ၊ တောင်ကြီး၊ နဘဲပင်၊ မိုးခိုင်၊ ကျားတက်၊ ကမာကလဲ စသည့် ကျေးရွာများပိုင် လယ်မြေများလည်း ရေဖုံးလွှမ်းနေသည်မှာ တပတ်ကျော် နေပြီဖြစ်ကြောင်း ဒေသခံ လယ်သမားများက ပြောသည်။

ပဲခူးမြစ်ကမ်းနဖူးတွင်ရှိသော ကျားတက်နှင့် ကမာကလဲ ရွာများတွင် ဈေးဝယ်ခြင်း၊ ကူးသန်းသွားလာခြင်းများကို လှေအသုံးပြုသွားလာနေရသည်ဟု သိရသည်။

“ဘယ်နေရာကြည့်ကြည့် ရေပြင်ကြီးပဲဖြစ်နေတယ်၊ ရွာထဲတအိမ်နဲ့ တအိမ် သွားလာလို့တောင်မရဘူး၊ မနေ့က တာဘောင် ကျိုးမှာ စိုးလို့ ဘုန်းကြီးနဲ့ အတူလိုက်ပြီးသွားပြင်တဲ့အထဲက ဆယ်တန်းကျောင်းသား တယောက် ရေနစ်ပြီး သေသွားတယ်”ဟု ကျားတက် ကျေးရွာ လယ်သမားတဦးက ဧရာဝတီသို့ ပြောသည်။

ကျားတက်ကျေးရွာတွင်းရေများပြည့်လျှံနေသဖြင့် မူလတန်းကျောင်းကိုလည်း ရေကြီးနေချိန်ကာလအတွင်း ပိတ်ထားပြီး ကျောက် တန်း အထက်တန်းကျောင်းသို့ သွားတက်ရမည့် ကျောင်းသားများကလည်း လမ်းများပေါ်ရေကြီးမှုကြောင့် ကျောင်းသွားနိုင်ခြင်းမရှိကြောင်း ရွာခံများက ပြောသည်။

ပဲခူးမြို့ပေါ်ရှိ ကျောက်ကြီးစု၊ ရွာသစ်၊ အိုးလေးစု၊ ဇိုင်းဂနိုင်းမြောက်ပိုင်း၊ ကလျာဏီ၊ ကျွန်းသာယာ၊ ကြေးနီကန် စသည့် ရပ်ကွက်များ တွင်လည်း ရေကြီးနေပြီး သွားလာနေထိုင်ရေး အခက်ကြုံနေရကြောင်း မြို့ခံများက ပြောသည်။

အုန်းနှဲရွာခံတဦးကလည်း“အရင်က စက်လှေတို့ လှေတို့က ချောင်းထဲမှာပဲ မောင်းသွားနေကြတာ အခုက ရွာထဲမှာကို မောင်းလို့ရနေပြီ၊ ဒီရွာက တချို့တဲအိမ်တွေဆို မြုပ်ကုန်လို့ အိမ်ရှင်တွေ ခေါင်မိုးကနေ ဖောက်ထွက်ရတယ်၊ အာဏာပိုင် အဖွဲ့တွေကတော့ ကယ်ဆယ်ရေးစခန်း ၂ ခု လုပ်ပေးထားတယ်”ဟု ပြောသည်။

ပဲခူးတိုင်းအတွင်း၌ ယခင်နှစ်ကလည်း စပါးစိုက်ရာသီနှင့် ပဲစိုက်ရာသီများတွင် မိုးဖျက်သဖြင့် တောင်သူလယ်သမားများ အထိနာခဲ့ ရပြီး ယခုနှစ်တွင်လည်း ယင်းအခြေအနေဖြင့် ရင်ဆိုင်ရနိုင်ဖွယ်ဖြစ်နေသည်ဟု ဆိုသည်။

အလားတူ ဧရာဝတီတိုင်း ကန်ကြီးထောင့်မြို့နယ်အပိုင် ဒါးကမြို့တွင် ရေထိန်းတမံ ကျိုးပေါက်ခဲ့သဖြင့် စိုက်ပျိုးပြီးစ လယ်ဧက ၄,၃၀၀ ခန့် ရေနစ်မြုပ်ကြောင်း သိရသည်။

ဒါးကမြို့ရှိ ပေ ၃,၇၀၀ ခန့်ရှည်လျားသော မြေသားတမံ အမျိုးအစား ရေထိန်းတာမှာ သြဂုတ်လ ၁ ရက်နေ့က ကျိုးပေါက်ခဲ့ပြီး ယနေ့တိုင် ယင်းတာတမံအား ပြန်လည်ပြုပြင်နိုင်ခြင်း မရှိသည့်အတွက် တာအောက်ဘက်ရှိ လယ်စိုက်ခင်း အားလုံး ရေလွှမ်းခံရ သည်ဟု ဒါးကမြို့ခံတဦးက ပြောပြသည်။

“လယ်ကွင်းတွေက လုံးဝမြုပ်နေတုန်းပဲ။ စပါးပင်က ရေအောက်မှာ ၇ ရက်ပဲ အသက်ရှင်နိုင်တာ ဆိုတော့ လယ်ဧက ၄၀၀၀ ကျော်က ဆုံးရှုံးပျက်စီးမှာ လုံးဝ သေချာသွားပါပြီ”ဟု ၎င်းက ဆိုသည်။

ဒါးက မြစ်ရေတိုးမှုဒဏ်ကို မခံနိုင်ဘဲ သြဂုတ်လ ၁ ရက် နံနက် ၅ နာရီ ၃၀ ခန့်က တာအလယ်ပိုင်းမှ စတင်ကျိုးပေါက်ခဲ့ပြီးနောက် ရေတိုက်စားသဖြင့် မြေသားတာဘောင်မှာ ပေ ၁၇၀ ကျော် ပွင့်ထွက်သွားခဲ့ကြောင်း သိရသည်။

ဒါးကမြစ်ရေလျှံတက်မှုကြောင့် ယမန်နေ့ နံနက် ၆ နာရီ ပုသိမ်မြို့မှ ကြံခင်းမြို့သို့ မောင်းနှင်လာသော အမြန်ရထားကို ကျောင်း ကုန်း မြို့နယ် လှည်းဆိပ်ကျေးရွာ တံတားအနီး၌ ၄ နာရီခန့်အကြာ ရပ်တံ့ထားခဲ့ရကြောင်း ယနေ့ထုတ် မြန်မာ့အလင်း သတင်း စာတွင် ဖော်ပြထားသည်။

ယင်းတာကို လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနက ယခုနှစ် မေလကမှ တည်ဆောက်ခဲ့ခြင်းဖြစ်ရာ တည်ဆောက်ပြီး ၂ လ ကျော်အကြာတွင် ကျိုးပေါက်ခဲ့ခြင်း ဖြစ်ကြောင်း သိရသည်။

“တာကျိုးတော့ ရေတွေ ဒလဟောဝင်ပြီး စပါးတွေအားလုံး မြုပ်သွားတယ်။ လယ်ကွင်းတွေက ရေပြင်ကြီး ဖြစ်သွားတယ်”ဟု ယင်း ဒေသ သို့ သွားရောက် သတင်းယူခဲ့သည့် ပြည်တွင်း သတင်းထောက် တဦးကလည်း ပြောပြသည်။

တာကျိုးပေါက်မှုကြောင့် လူ၊ တိရစ္ဆာန်များနှင့် အိုအိမ်တိုက်တာများ သေကြေ ပျက်စီးခြင်း မရှိကြောင်း သိရသည်။

ယင်းဒေသသည် ရေနက်ကွင်း ဧရိယာဖြစ်သဖြင့် ဒေသခံလယ်သမားများမှာ ရေကျနောက်စိုက်စပါးများကိုသာ မိုးနှောင်းကာလဖြစ် သည့် စက်တင်ဘာလ နှင့် အောက်တိုဘာလတို့တွင် စိုက်ပျိုးလေ့ရှိကြသည်။

ယခုနှစ်တွင် နှစ်သီးစားစိုက်ပျိုးရန်ရည်ရွယ်ချက်ဖြင့် လယ်/ဆည်ဌာနက ရေထိန်းတာတည်ဆောက်ပေးခဲ့ရာ ပျဉ်းမငူ၊ ညောင်ချောင်း၊ စက်ကွင်း၊ ကညွတ်ကွင်း စသည့် ကျေးရွာအုပ်စု ၈ စုမှ လယ်သမားများက ယင်းတာအပေါ် ယုံကြည်စိတ်ချစွာဖြင့် တာအောက် ဘက်ပိုင်းတွင် လယ်ဧက ၆,၀၀၀ ကျော်ကို စိုက်ပျိုးခဲ့ကြကြောင်း သိရသည်။

ပျက်စီးသွားသည့် လယ်ယာမြေများအား ပြန်လည်စိုက်ပျိုးရန် မလွယ်ကူကြောင်း ကညွတ်ကွင်း ကျေးရွာမှ လယ်သမားတဦးက ပြော ဆိုသည်။

“လယ်တွေ ပျက်စီးသွားတော့ ကျနော်တို့ လယ်သမားတွေရဲ့ ငွေတွေ၊ အချိန်တွေ၊ လုပ်အားတွေ ဆုံးရှုံးခဲ့တာပေါ့ဗျာ။ ပြန်စိုက်ဖို့ကျတော့ ငွေကြေး မတတ်နိုင်တော့ မျိုးစပါးတွေ ၀ယ်ဖို့က ငွေမရှိဘူး။ ဒါကြောင့် ပြန်စိုက်ဖို့ မလွယ်ဘူး”ဟု သူက ပြောသည်။

ကျိုးပေါက်ခဲ့သည့် ရေထိန်းတာအား တိုင်း အစိုးရအဖွဲ့ဝင်များ၊ လယ်/ဆည် ၀န်ကြီးဌာနနှင့် အနောက်တောင်တိုင်း စစ်ဌာနချုပ်တို့ ဦးဆောင်ကာ သဲအိတ်ပေါင်း ၅၀,၀၀၀ ဖြင့် ပြန်လည် ပြုပြင်လျှက်ရှိကြောင်း သိရသည်။

ယမန်နေ့ မွန်းလွဲပိုင်း ၁၂ နာရီခွဲ အချိန် တိုင်းတာချက်အရ သံလွင်မြစ်ရေသည်လည်း ကရင်ပြည်နယ် ဘားအံမြို့တွင် ၈၅၅ စင်တီ မီတာ သို့ ရောက်ရှိ နေပြီး စိုးရိမ်ရေမှတ်အထက် ၁၀၅ စင်တီမိတာ (၃ ဒသမ ၄ ပေခန့်) ကျော်လွန်နေကြောင်း၊ အဆိုပါမြစ်ရေ သည် နောက် သုံးရက် အတွင်း ယင်းမြို့၏ စိုးရိမ်ရေမှတ် ၇၅၀ စင်တီမိတာအထက်တွင် ဆက်လက်တည်ရှိနိုင်ကြောင်း မိုးလေဝသနှင့် ဇလဗေဒ ညွှန်ကြားမှုဦးစီးဌာနက သတင်းထုတ်ပြန်ထားသည်။

သန့်စင်ငြိမ်းချမ်း ပူးပေါင်း ရေးသားသည်။

Ref: ဧရာဝတီ

Read More...

ယနေ့ အပြောင်းအလဲသည် ရှစ်လေးလုံး၏ အကျိုးဆက်ဟု ဆို

လင်းသန့်
August 8, 2012

၂၄ နှစ်အတွင်း၌ မြန်မာနိုင်ငံ၏ ပထမဆုံး နိုင်ငံရေး၊ စီးပွားရေး အဘက်ဘက်က ပြောင်းလဲလာမှု များသည် ရှစ်လေးလုံး လူထု တော်လှန်ရေးကြီး၏ အကျိုးဆက်ဖြစ်ကြောင်း ထိုစဉ်က လှုပ်ရှားမှုများတွင် ကဏ္ဍ အသီးသီး၌ ဦးဆောင် ပါဝင် ခဲ့သူများက ပြောဆိုကြသည်။

“ဒါကြောင့် အခုလို နှစ်ပတ်လည်နေ့ ရောက်တိုင်း ရှစ်လေးလုံး အရေးတော်ပုံရဲ့ ဂုဏ်ကျေးဇူးကို အမှတ်ရ နေတာပါ။ ဒီတိုက်ပွဲကြီးမှာ စွန့်လွှတ် အနစ်နာခံ သွားကြတဲ့ သူတွေ အားလုံးကို ကျနော်တို့ အလေးအမြတ် ဂုဏ်ပြုတယ်” ဟု ၈၈ မျိုးဆက်ကျောင်းသား ခေါင်းဆောင် ကိုကိုကြီးက ဧရာဝတီကို ပြောသည်။

ရှစ်လေးလုံး အရေးတော်ပုံကြီးသည် ဖြစ်ရိုးဖြစ်စဉ် အရေးတော်ပုံ မျိုးမဟုတ်ဘဲ နိုင်ငံသားများ ကိုယ်တိုင် ဦးဆောင် သည့် ထူးခြားသော အရေးတော်ပုံ ဖြစ်ကြောင်း၊ ပြည်သူလူထု မျှော်မှန်း ထားခဲ့သလောက် မပြည့်မီသေးသော်လည်း ယခုအခါ နိုင်ငံရေး ပြုပြင်ပြောင်းလဲမှုများ စတင် လုပ်ဆောင်နေသည်ကို တွေ့မြင်နေရကြောင်း သူက ဆိုသည်။

အမျိုးသား ဒီမိုကရေစီအဖွဲ့ချုပ် (NLD) ၏ ထိပ်တန်း ခေါင်းဆောင် တဦးဖြစ်သူ ဦးဝင်းတင် ကလည်း ရှစ်လေးလုံး အရေးတော်ပုံ ကြီးကြောင့် NLD ကဲ့သို့ နိုင်ငံရေး ပါတီကြီးများ၊ နိုင်ငံရေး ခေါင်းဆောင်များ ပေါ်ထွက်ခဲ့ကြောင်း၊ ယခု အစိုးရကလည်း လွှတ်တော် နိုင်ငံရေး လမ်းကြောင်းနှင့် ပြောင်းလဲ လုပ်ဆောင်လာပြီး ပြုပြင် ပြောင်းလဲရေးများ လုပ်ပြလာရကြောင်း ပြောသည်။

“လူတွေကြားထဲမှာလည်း ပြည်သူတွေဟာ နိုင်ငံရေး နိုးကြားလာတယ်၊ တက်ကြွလာတယ်၊ အကြောက်တရားတွေ လျော့လာတယ်” ဟု သူက ဆိုသည်။

စာရေးဆရာ သတင်းစာဆရာ နိုင်ငံရေး အကျဉ်းသားဟောင်းဖြစ်သူ ဆရာ မောင်ဝံသကလည်း ရှစ်လေးလုံး အရေးတော်ပုံသည် ၂၄ နှစ် ကြာလာခဲ့ပြီဖြစ်ပြီး ထိုစဉ်က တပါတီ အာဏာရှင်စနစ် ပြုတ်ကျကာ ဒီမိုကရေစီနိုင်ငံ ဖြစ်ရေး အပြောင်းအလဲကို လိုချင်ခဲ့သည့် ပြည်သူများ၏ တောင်းဆိုခဲ့မှုသည် လမ်းစပေါ် ရောက်ပြီဟု ယူဆ နိုင်ကြောင်း ပြောသည်။

“အခုထိတော့ ဒီမိုကရေစီ နိုင်ငံ မဖြစ်သေးဘူး။ ဒီမိုကရေစီနဲ့ လူ့အခွင့်အရေး ကိစ္စတွေမှာ အများကြီး ပြုပြင်ပြောင်းလဲ စရာတွေ ရှိသေးတယ်လို့ ကျနော် ပြောချင်ပါတယ်” ဟု ဆရာ မောင်ဝံသက ဆိုသည်။

ရှစ်လေးလုံး အရေးတော်ပုံ၏ အနှစ်သာရ ပန်းတိုင်ကို ယနေ့ အချိန်ထိ ရောက်မလာခြင်းသည် ထိုကာလက တောင်းဆိုချက် တခု ဖြစ်သည့် နိုင်ငံရေး ညီညွတ်မှုကို ယနေ့တိုင် မတည်ဆောက်နိုင်သေး သောကြောင့် ဖြစ်ကြောင်း ဦးဝင်းတင်က ထောက်ပြသည်။

“ဒီကနေ့ နိုင်ငံရေးအခြေအနေ တခုလုံးကို သုံးသပ်မယ်ဆိုရင် တစ် က ကျနော်တို့မှာ စည်းလုံးညီညွတ်ရေး မရှိဘူး။ စည်းလုံးညီညွတ်ရေး မရှိအောင်လဲ အစိုးရက နေပြီးတော့ ဦးတည်ချက်နဲ့ တမင်ကို ကြံရွယ်ပြီး အကွဲကွဲ ဖြစ်အောင် လုပ်နေတယ်ဆိုတာ ထင်ရှားပါတယ်” ဟု သူက ဆိုသည်။

အဓိက တောင်းဆိုခဲ့သည့် အာဏာရှင် စနစ်ဆိုး ပြိုလဲရေးကို မလုပ်ဆောင်နိုင်သေးဘဲ အာဏာရှင် စနစ်ဆိုး၏ အရှိန်သည် ယနေ့အထိ အမြစ်တွယ် တည်ရှိ နေသေးကြောင်းလည်း ဦးဝင်းတင်က ပြောသည်။

“စစ်အာဏာရှင်တွေဟာ ဒီမိုကရေစီဆိုတဲ့ အရေခြုံတယ်၊ အရပ်သား အစိုးရ ဆိုပြီး လုပ်လာတယ်။ ဘောင်းဘီ ချွတ်တွေ ကြီးစိုးနေဆဲပါပဲ။ ဘောင်းဘီချွတ်တွေ ကြီးစိုးနေတဲ့ ကာလမှာ နိုင်ငံရေး ပါတီတွေထဲမှာလည်း ဘောင်းဘီချွတ်ထားတဲ့ သူတွေ၊ စစ်သား တဖြစ်လဲတွေက ကြီးစိုးနေတယ်။ ပြည်ခိုင်ဖြိုးလို အဖွဲ့အစည်းက အစ တစည လို အဖွဲ့အစည်းက အလယ် နောက်တခါ NLD ထဲမှာလည်း တခါတုန်းကဆိုရင် ဘောင်းဘီချွတ်တွေ ကြီးစိုးချယ်လှယ်ဖို့ လုပ်ခဲ့တာပဲ” ဟု ဦးဝင်းတင်က ဆိုသည်။

ကိုကိုကြီးကလည်း ယခုအချိန်အထိ အကျဉ်းထောင် အသီးသီးတွင် ထိမ်းသိမ်းထားသည့် နိုင်ငံရေး အကျဉ်းသားများ ပြန် လည် လွတ်မြောက်လာရေး၊ တိုင်းရင်းသား နယ်မြေများတွင် စစ်ရေး ပဋိပက္ခများ ချုပ်ငြိမ်းပြီး ပြည်တွင်း ငြိမ်းချမ်းရေး ခိုင်မာစွာ ရရှိစေရေးနှင့် လူ့အခွင့်အရေး ချိုးဖောက်မှုများ ရပ်ဆိုင်းသွားစေရေး စသည်ဖြင့် များစွာ လုပ်ဆောင်ရန် လိုအပ်လျှက် ရှိနေကြောင်း ပြောသည်။

“မြန်မာနိုင်ငံရဲ့ နိုင်ငံရေးဖြစ်စဉ်မှာ အားလုံး ပူးပေါင်း ပါဝင်ဆောင်ရွက်နိုင်တဲ့ အခွင့်အလမ်း အပြည့်အ၀ ရဖို့၊ ကမ္ဘာအနှံ့ မှာ ရောက်နေတဲ့ မြန်မာနိုင်ငံသားတွေ အားလုံး ဂုဏ်သိက္ခာရှိရှိ ပြန်လာပြီး တိုင်းပြည် ပြန်လည် ထူထောင်ရေးမှာ လုံခြုံစိတ်ချစွာ လုပ်ဆောင်ခွင့် ရဖို့ကလည်း ဒီကနေ့ အကူးအပြောင်း ကာလမှာ အရေးအကြီးဆုံး လိုအပ်ချက် ဖြစ်တယ်” ဟု သူက ဆိုသည်။

ဦးဝင်းတင်က အာဏာရှင် စနစ်သည် ယနေ့အထိ မြန်မာနိုင်ငံ၏ ကဏ္ဍအသီးသီးတွင် ဆက်လက် အရှိန်ရနေဆဲ ဖြစ်ကြောင်း၊ ယခု ပြုပြင်ပြောင်းလဲမှုနှင့် ပတ်သက်၍လည်း ဝေဖန် ထောက်ပြစရာများ ရှိနေကြောင်း ပြောသည်။

“တိုင်းပြည်မှာ ဒီမိုကရေစီ အပြောင်းအလဲ အတွက်လုပ်တာတွေမှာ သူတို့ စစ်အာဏာရှင်ကို လူထုရဲ့ ဆန့်ကျင်မှု တဖြည်းဖြည်းနဲ့ ပျောက်ကွယ်အောင် အာသာဖြေတဲ့ အနေနဲ့ လုပ်နေတာပေါ့ဗျာ။ ထမင်းကို အငတ်ထားပြီး ထမင်း မကျွေးသေးဘဲနဲ့ အစာပြေ မုန့်လေး နည်းနည်းကျွေးတဲ့ ပုံစံမျိုး လုပ်နေတာ” ဟု သူက ဆိုသည်။

၁၉၈၈ ခုနှစ် မတ်လ ၁၃ ရက်နေ့တွင် စက်မှု တက္ကသိုလ် ကျောင်းသား ကိုဖုန်းမော်ကျဆုံးခဲ့ရပြီး ရန်ကုန် တက္ကသိုလ် ကျောင်းသား လှုပ်ရှားမှုများမှသည် သြဂုတ်လ ၈ ရက်နေ့တွင် ရှစ်လေးလုံး ဒီမိုကရေစီအရေးတော်ပုံကြီး ဖြစ်ပွား ခဲ့သည်။ မြန်မာနိုင်ငံတွင် သမိုင်းမှတ်တိုင် တခုဖြစ်ခဲ့သည် အဆိုပါ လှုပ်ရှားမှုကြီးအတွင်း တပ်မတော်သားများ အပါအ၀င် အစိုးရ ၀န်ထမ်းများနှင့် ပြည်သူတရပ်လုံးက မြန်မာ့ ဆိုရှယ်လစ် လမ်းစဉ်ပါတီ တပါတီ အာဏာရှင် အစိုးရကို ဆန့်ကျင်ခဲ့သည်။

လူထု လူတန်းစား အလွှာအသီးသီး၏ ဒီမိုကရေစီနှင့် လူ့အခွင့်အရေးအတွက် တောင်းဆိုတိုက်ပွဲ ၀င်မှုများကို ထိုစဉ်က ဦးနေဝင်း အစိုးရ၏ စစ်တပ်က ဖြိုခွင်းခဲ့မှုကြောင့် ရဟန်း၊ ရှင်လူ ကျောင်းသားများစွာ သေဆုံးခဲ့ရပြီး ဧရာဝတီ၏ စစ်တမ်း ကောက်ယူမှုအရ ၁၉၈၈ ခုနှစ် သြဂုတ်လ ၇ ရက်နေ့မှ ၁၇ ရက်နေ့အတွင်း ထိခိုက် ဒဏ်ရာရ သေဆုံးသူ ၂၁၀ ရှိခဲ့သည်။

တချို့သော အတည်မပြုနိုင်သည့် စာရင်းများအရ အရေးတော်ပုံ ကာလအတွင်း လူပေါင်း ၃၀၀၀ ကျော် သေဆုံးခဲ့ရသည်ဟု သိရသည်။ စက်တင်ဘာ ၁၈ ရက်နေ့တွင် မြန်မာ့ တပ်မတော်က အာဏာသိမ်းကာ န၀တ အစိုးရ တက်လာခဲ့ပြီး ၁၉၉၀ ခုနှစ် ပါတီစုံ ရွေးကောက်ပွဲကို ကျင်းပ ပေးခဲ့သော်လည်း နအဖ လက်ထက်အထိ စစ်အစိုးရ အဆက်ဆက်က အနိုင်ရ ပါတီ ဖြစ်သည့် NLD ပါတီကို အာဏာလွှဲပြောင်းပေးရန် ပျက်ကွက်ခဲ့သည်။

စစ်အစိုးရများက နှစ်ပေါင်း ၂၀ ကျော် အုပ်ချုပ်လာခဲ့ပြီး လွန်ခဲ့သည့် ၂၀၁၀ ပြည့်နှစ်တွင်မှ ရွေးကောက်ပွဲများ ပြန်လည် ကျင်းပကာ ယခုလက်ရှိ သမ္မတ ဦးသိန်းစိန် ဦးဆောင်သော အရပ်သား အစိုးရ တက်လာ၍ ပြုပြင်ပြောင်းလဲမှုများ စတင်ခဲ့ခြင်း ဖြစ်သည်။

Ref: ဧရာဝတီ

Read More...

ရှစ်လေးလုံး အခမ်းအနားအတွက် ၀န်ကြီးများ ငွေလှူ

07.08.2555

မြန်မာနိုင်ငံ ခေတ်သစ်သမိုင်းရဲ့ ဒီမိုကရေစီအရေး တောင်းဆို လှုပ်ရှားမှုတွေထဲက အကြီးမားဆုံး လှုပ်ရှားမှုကြီးလို့ ဆိုရမယ့် ရှစ်လေးလုံး အရေးတော် ပုံကြီး ဖြစ်ပေါ်ခဲ့တဲ့ ၂၄ နှစ် ပြည့် နှစ်ပတ်လည် အခါ သမယမှာ ထိန်းသိမ်း ခံထားရတဲ့ နိုင်ငံရေး အကျဉ်းသားတွေ အားလုံး လွှတ်ပေး ဖို့အတွက် ၈၈ မျိုးဆက် ကျောင်းသား ခေါင်းဆောင်တွေက တောင်းဆို လိုက်ပါတယ်။ ဒီအတောအတွင်း ဒီ နှစ် ပတ်လည် ပွဲ ကျင်းပဖို့ အခမ်းအနား ပြင်ဆင်နေကြတဲ့ ၈၈ မျိုးဆက်ကျောင်းသားတွေ ဆီကို ပြည်ထောင်စု ၀န်ကြီးတွေ ကိုယ်တိုင် သွားရောက် အားပေးခဲ့ပြီး အခမ်းအနား ကျင်းပရေး အတွက် အလှုငွေ ထည့်ဝင် လှုဒါန်းသွားခဲ့ပါတယ်။ အပြည့်အစုံကိုတော့ ဘန်ကောက်ရုံးကနေ ဆက်သွယ် စုံစမ်းထားတဲ့ ကိုဇော်ဝင်းလှိုင်က တင်ပြပေးပါမယ်။

အမျိုးသားရင်ကြားစေ့ရေးကို ဦးတည်တဲ့အနေနဲ့ အကျဉ်းကျနေ ကြတဲ့ နိုင်ငံရေး အကျဉ်းသားတွေကို လည်း ပြန်လွှတ်ပေးသင့်ပြီလို့ ၈၈မျိုးဆက် ကျောင်းသားခေါင်းဆောင် တဦးဖြစ်သူ ကိုကိုကြီး က တောင်းဆို လိုက်ပါတယ်။

ကိုကိုကြီး ။ “နိုင်ငံသားတွေအားလုံး ပါဝင်နိုင်တဲ့ အခြေအနေကို ဖန်တီးပေးဖို့ဆိုရင် ထောင် အသီး သီးမှာ အကျဉ်းကျနေကြခံနေရဆဲ ဖြစ်တဲ့ နိုင်ငံရေး အကျဉ်းသားတွေနဲ့ နိုင်ငံရေး လှုပ်ရှား မှုကြောင့် ဆက်စပ်ပြီးတော့ ထိန်းသိမ်း ခံနေရတဲ့ သူတွေကို လွှတ်ပေးဖို့က အရေးကြီးဆုံးပါ၊ နောက် ကျနော် တို့ နိုင်ငံမှာ အရေးတကြီးလိုအပ်နေတဲ့ အမျိုးသား ပြန်လည် သင့်မြတ်ရေးလို့ ပြောရင် သမိုင်း ကို မှန်မှန်ကန်ကန် လက်ခံနိုင်ဖို့ အရေးကြီးပါတယ်၊ အဲလို လက်ခံတဲ့ နေရာမှာ နိုင်ငံရေး အကျဉ်း သားတွေ နိုင်ငံရေးကြောင့် ထိန်းသိမ်း ခံထားရတဲ့သူတွေကို အသိအမှတ်ပြုဖို့ဟာလည်း အရေးကြီး ဆုံးပါ၊ ဒီတော့ ဒီနေ့ ဒီအချိန်ခါမှာ ထောင်အသီးသီးမှာ ကျန်ရှိနေသေးတဲ့ နိုင်ငံရေး အကျဉ်းသားတွေ အားလုံး ပြန်လည် လွတ်မြောက်ရေးနဲ့ နိုင်ငံအသီးသီးမှာ ရောက်ရှိ နေ တဲ့ ဒီမိုကရေစီရေး လှုပ်ရှားသူ အားလုံး အာမခံချက်ရှိရှိ်နဲ့ ကိုယ့်နိုင်ငံကို ပြန်လာနိုင်ဖို့ ဟာ နိုင်ငံ ပြုပြင်ပြောင်းလဲရေး၊ ပြန်လည် ထူထောင်ရေး အတွက် အရေးကြီးဆုံး လို့ ပြောချင်ပါ တယ်”

ရှစ်လေးလုံးရဲ့ ထူးခြားချက်ဟာ ခေါင်းဆောင် တဦးတယောက်ရဲ့ ဦးဆောင်မှုအောက်မှာ ဖြစ်ပေါ်ခဲ့တာ မဟုတ်ဘဲ တနိုင်ငံလုံးအတိုင်းအတာနဲ့ ဖိနှိပ်ခံ တပါတီ အာဏာရှင်စံနစ်အောက်က လွတ်မြောက်အောင် တတိုင်းပြည်လုံးက တညီတညွတ်တည်း တောင်းဆို ဆန္ဒပြခဲ့ကြတာဖြစ်တဲ့ အတွက် ဒါဟာ တိုင်းပြည် ပြုပြင် ပြောင်းလဲရေးလုပ်ငန်းတွေမှာ လူထုရဲ့ အခန်းကဏ္ဍ အရေးကြီး တယ်ဆိုတာကို ပြသလိုက်တာပဲလို့လည်း ကိုကိုကြီးက ပြောပါတယ်။

၁၉၈၈ ခုနှစ် စက်တင်ဘာ ၁၈ ရက်နေ့မှာ စစ်တပ်က အာဏာသိမ်းလိုက်တဲ့နေ့ကစလို့ အဲဒီ လူထု ဆန္ဒပြပွဲတွေ၊ သပိတ်စခန်းတွေ၊ ဒီမိုကရေစီအရေး လှုပ်ရှားမှုတွေလည်း တခုချင်း ဖြိုခွင်း ဖျက်ဆီးခံ ခဲ့ရပြီး ထောင်ပေါင်းများစွာသော အပြစ်မဲ့ ပြည်သူတွေ အသက်ဆုံးရှုံးခဲ့ကြရတာပါ။ အဲဒီအချိန်က စလို့ မြန်မာနိုင်ငံဟာလည်း စစ်အစိုးရရဲ့ အုပ်ချုပ်မှုအောက်မှာ အမှောင်ဖုံးတဲ့ ခေတ်တခေတ် ကို ဖြတ်သန်းခဲ့ရပြန်ပါတယ်။

ဒီနှစ်ပတ်လည်ပွဲ ကျင်းပဖို့ အခမ်းအနား ပြင်ဆင်နေတဲ့ ၈၈ မျိုးဆက် ကျောင်းသားတွေရှိရာ မန္တလေးမြို့ ဒက္ခိဏရာမ ဘုရားကြီးကျောင်း အလယ် တိုက် ရှိရာကို အင်္ဂါနေ့ ညနေစောင်း မှာပဲ ပြည်ထောင်စု ၀န်ကြီးတွေဖြစ်ကြတဲ့ မီးရထားဝန်ကြီး ဦးအောင်မင်းနဲ့ စက်မှုဝန်ကြီး ဦးစိုးသိန်း တို့ လာရောက် အားပေး ခဲ့ကြပြီး အလှုငွေတွေပါ ထဲ့ဝင်သွားတဲ့အတွက် ဒါဟာ အစိုးရအနေနဲ့ ရှစ်လေးလုံး အရေးတော်ပုံကြီးကို တနည်းအားဖြင့် အသိအမှတ်ပြုလိုက်တာပဲလို့ ၈၈ မျိုးဆက် ကျောင်းသားခေါင်းဆောင် ကိုကိုကြီးက ပြောပါတယ်။

ကိုကိုကြီး ။ “ပြည်ထောင်စုဝန်ကြီးတွေပေါ့နော်.. စက်မှုဝန်ကြီး ဦးစိုးသိန်း နဲ့ ရထားဝန်ကြီး ဦးအောင်မင်း.. သူတို့အဖွဲ့ လာပြီးတော့ ကျနော်တို့ အခမ်း အနား ပြင်ဆင်နေတဲ့ နေရာကို လာပြီးတော့ ဆရာတော်တွေကိုလည်း န၀ကမ္မအလှူငွေ နှစ်သိန်း လှူဒါန်းသွားတယ်၊ ပြီးတော့ ကျနော် တို့ကိုလည်း ဒီအခမ်းအနားအတွက် ၁၀ သိန်းပေါ့၊ ဦးအောင်မင်းက ၅ သိန်း၊ ဦးစိုးသိန်းက ၅သိန်း၊ ကျနော်တို့ကို လှူဒါန်း သွားတယ်၊ ဒါ ပြည်ထောင်စု ၀န်ကြီးတွေ အနေနဲ့ ၈ လေးလုံး အထိမ်းအမှတ်ပွဲကို အခမ်းအနားနေ့မှာ မတက်ရောက်နိုင်ပေမဲ့ သူတို့ ခုလို လာပြီးတော့ ပူးပေါင်း ဆောင်ရွက်မှု ပြတယ်ဆိုတာဟာ ကျနော်တို့ အမျိုးသား ပြန်လည် သင့်မြတ်ရေးအတွက် အလားအလာကောင်းတွေလို့ ကျနော်တော့ မျှော်လင့်ပါတယ်။ ခုလိုမျိုး ပြည်ထောင်စု ၀န်ကြီး တွေ အဆင့် လာရောက်ပြီးတော့ အခမ်းအနား ပြင်ဆင်နေတဲ့ နေရာမှာ လာရောက်ပြီးတော့ အားပေး သွားတယ်၊ ဆွေးဆွေးနွေးနွေးနဲ့ ကျနော်တို့နဲ့ ပူးပေါင်းဆောင်ရွက်တဲ့ လက္ခဏာဟာ ၈လေးလုံး အရေးတော်ပုံကြီးအပေါ်မှာ ထားတဲ့ သဘောထားပေါ့လေ၊ ဒါ ပျော့ပြောင်းတဲ့ သဘောထား၊ အရေးတော်ပုံကြီးကို အသိအမှတ်ပြုတဲ့ သဘောထားကို ပြသတယ်လို့ ကျနော်တော့ အဲသလို ယူဆပါတယ်”

မနက်ဖြန် ကျင်းပမယ့် ရှစ်လေးလုံး နှစ်ပတ်လည်ပွဲဟာလည်း ဖြတ်သန်းလာခဲ့တဲ့ ဒီမိုကရေစီအရေး လှုပ်ရှားမှုတွေအတွင်း အသက်ပေး စတေး ခဲ့ကြသူ တွေ၊ အနစ်နာခံခဲ့ကြသူတွေအားလုံးအတွက် ရည်စူးပြီး လုပ်ဆောင်တာဖြစ်တယ်လို့ ရှစ်လေးလုံး နှစ်ပတ်လည် အခမ်းအနား ဖြစ်မြောက်ရေး တာဝန်ခံ ၈၈ မျိုးဆက်ကျောင်းသားခေါင်းတဦးဖြစ်သူ ကိုပြုံးချိုက ပြောပါတယ်။

ကိုပြုံးချို ။ “ကျနော်တို့က အနစ်နာခံ ဆုံးရှုံးသွားခဲ့ရတဲ့ လူတွေအတွက် အမြဲတမ်း အမှတ်ရနေ တာ ဖြစ်တယ်၊ ကျနော်တို့ ဘာတွေပဲ လုပ်နေ လုပ်နေ သူတို့တတွေရဲ့ ရည်မှန်းချက်တွေ၊ ယုံကြည် ချက်တွေ အပေါ်မှာပဲ ထည့်သွင်းစဉ်းစား ဆောင်ရွက်နေတာ ဖြစ်တယ်၊ ကျနော်တို့နဲ့အတူတူ လက်တွဲ ခဲ့ကြ တဲ့ သူတွေ ဒီလို လမ်းခွတ်လပ်မှာ ကျဆုံးခဲ့ကြရသူတွေအတွက် ကျနော်တို့ တတ်နိုင် သလောက် ကုသိုလ်ပြုတယ်၊ အမျှအတန်း ပေးဝေတာ ဖြစ်တယ်၊ ပြီးတော့ သူတို့ရဲ့ ယုံကြည် ချက်တွေ အတွက် သူတို့ရဲ့ လိုလားမှုတွေအတွက်၊ ကျနော်တို့ ဒီမှာ စုဝေးကြပြီးတော့ ဘယ်လို အကောင်းဆုံး ဖော်ဆောင် နိုင်မလဲ.. သူတို့ရဲ့ ရည်မှန်းချက်တွေ၊ ကျနော်တို့ ပေးခဲ့တဲ့ ကတိတွေကို ဘယ်လောက်ထိ ပြည့်ပြည့်၀၀ နဲ့ ညီညီညွတ်ညွတ် ပါဝင်ဆောင်ရွက်နိုင်မလဲ ဆိုတာတွေပါ ကျနော် တို့ ဒီမှာ အချင်းချင်း မျှဝေကြမှာ ဖြစ်ပါတယ်”

ဒီ အခမ်းအနားကို နိုင်ငံရေးပါတီအသီးသီးက ခေါင်းဆောင်တွေ၊ ပြည်နယ်တိုင်းအသီးသီးက ကိုယ်စားလှယ်တွေ တတ်နိုင်သလောက် အများဆုံး တက်ရောက်နိုင်အောင် စီစဉ် ဖိတ်ကြားထား တယ် လို့ ကိုပြုံးချိုက ပြောပါတယ်။ မနက်ဖြန်ကျင်းပမယ့် ရှစ်လေးလုံး အခမ်းအနားကို ၈၈ မျိုးဆက် ကျောင်းသားအဖွဲ့ရဲ့ Facebook အင်တာနက် စာမျက်နှာကနေလည်း တိုက်ရိုက် ထုတ်လွှင့် သွားဖို့ စီစဉ်ထားတယ်လို့ သိရပါတယ် ခင်ဗျား။

Ref: VOA News

Read More...

မောင်တော ကျောင်းသားများ စာသင်နိုင်ရေး သမ္မတထံ စာတင်မည်

မေစစ်ပိုင်
August 7, 2012

ရခိုင်ပြည်နယ် မောင်တောခရိုင် တောင်ပိုင်းနှင့် မြောက်ပိုင်းဒေသရှိ ကျောင်းသား ကျောင်းသူ ၃ ထောင်နီးပါး အတွက် ကျောင်းများ ပြန်လည်ဖွင့်ကာ စာသင်ကြားနိုင်ခွင့် ရနိုင်ရေးအတွက် ဒေသခံများ စုပေါင်း လက်မှတ် ထိုး၍ နိုင်ငံတော် သမ္မတ ထံသို့ စာတင်မည်ဖြစ်ကြောင်း သိရသည်။

မောင်တောတွင် ပဋိပက္ခ စတင်ဖြစ်ပွားသည့် ဇွန်လ ၈ ရက်နေ့မှ ယခုအထိ ကျောင်းများ ပိတ်ထားခြင်းကြောင့် ကျောင်းသား ကျောင်းသူများ ပညာဆက်လက် သင်ကြားနိုင်ရန် ခက်ခဲနေကြောင်း၊ ထို့ကြောင့် မောင်တော ဒေသတ၀ိုက်ရှိ မောရ၀တီ၊ သီရိကုန်းပေါင်၊ ဘော့ကြီးကုန်းနှင့် ကိုင်းကြီးရွာ စသည့် ကျေးရွာပေါင်း ၅၀ ကျော်မှ ဒေသခံပြည်သူ ၅၀၀၀ ကျော်တို့က ကျောင်းသား ကျောင်းသူများ ပညာကောင်းမွန်စွာ ပြန်လည် သင်ကြားနိုင်ရန်၊ အခြေခံပညာ ကျောင်းများ ပြန်လည် ဖွင့်လှစ်ပေးရန်နှင့် လုံခြုံရေး အပြည့်အဝယူပေးရန်၊ ဒေသခံများထဲမှ အထက်တန်း အဆင့် အောင်မြင်ပြီးသူများကို ယာယီ ဆရာ၊ ဆရာမများ အဖြစ် ခန့်အပ် ထားနိုင်ရန် စသည်တို့အတွက် စုပေါင်း လက်မှတ်ရေးထိုးကာ သမ္မတ ဦးသိန်းစိန်ထံ တင်ပြသွားမည် ဖြစ်ကြောင်း မောင်တောမြို့နယ် လူငယ်ဖွံ့ဖြိုးရေး အဖွဲ့ (YDA) တွင် ကူညီဆောင်ရွက်နေသူ ဦးလှမြင့်က ပြောသည်။

“ဆယ်တန်း၊ ကိုးတန်းအောင်တဲ့ ဒေသခံ ကလေးတွေကို ဆရာ၊ ဆရာမတွေ အဖြစ် ပြန်ခန့်ပေးပြီး ကလေးတွေကို စာသင်ပေးနိုင်ဖို့ သမ္မတဆီကို စာတင် အကြောင်းကြားမှာပါ” ဟု သူက ဆိုသည်။

ယခင်က အဆိုပါ ခရိုင်အတွင်းရှိ ကျောင်းပေါင်း ၃၀ ကျော်တွင် စာသင်ကြား ပေးနေသော ဆရာ၊ ဆရာမဦးရေ ၆၀ ကျော်သည် ပဋိပက္ခကြောင့် နေရပ်သို့ ပြန်သွားကြပြီး နယ်မြေ တည်ငြိမ်စရှိသည့် တိုင်အောင် ပြန်လည် ရောက်ရှိ မလာသဖြင့်
အရည်အချင်း အသင့်အတင့် ရှိသူ ဒေသခံများကို ဆရာဆရာမ များအဖြစ် ယာယီခန့်အပ် ထားခွင့်ရရန် တောင်းဆိုခြင်း ဖြစ်ကြောင်း သိရသည်။

မောင်တော ဒေသတ၀ိုက်တွင် အခြေခံပညာ အထက်တန်းကျောင်း ၂ ကျောင်း၊ အလယ်တန်းကျောင်း ၅ ကျောင်းနှင့် မူလတန်းကျောင်း ၂၈ ကျောင်း ရှိသည်။

“စစ်တပ်က လုံခြုံရေး အပြည့်အ၀ မပေးနိုင်တဲ့အတွက် ဒေသခံတွေကပါ နယ်မြေ တ၀ိုက် ၀ိုင်းဝန်း စောင့်ကြည့် နေရတော့
သွားလာ လုပ်ကိုင်လို့ မရဘဲ စားဝတ်နေရေး၊ ပညာရေးက အစ အားလုံး ခက်နေတယ်” ဟု ထီးတန်းရွာ ဒေသခံ တဦးက ပြောပြသည်။

အဆိုပါဒေသတွင် ဘင်္ဂါလီဦးရေ ၉၀ ရာခိုင်နှုန်းကျော် ရှိနေပြီး ရခိုင်နှင့် တခြား တိုင်းရင်းသားမှာ ၁၀ ရာခိုင်နှုန်းခန့်ပင် မရှိကြောင်း သိရသည်။

ဒေသခံ ရခိုင်တိုင်းရင်းသူ ဆရာမတဦးက ကျောင်းများ ပြန်ဖွင့်လိုသော်လည်း ဘင်္ဂါလီကျောင်းသား ဦးရေ များပြား သောကြောင့် လုံခြုံရေး စိုးရိမ်ကြောင်း၊ ထို့ကြောင့် မူလတန်း အဆင့် ကျောင်းသား ငယ်များကိုသာ စာပြန်လည် သင်ကြားမည် ဖြစ်ပြီး အလယ်တန်းနှင့် အထက်တန်း အရွယ် ကျောင်းသားကြီးများကို စာပြန်လည် သင်ပေးရန်ကိုမူ အာဏာပိုင်များဘက်က လုံခြုံရေး အပြည့်အဝ ယူပေးမှသာ ဆက်လက် လုပ်ဆောင်လိုကြောင်း ပြောသည်။

ရခိုင်ဒေသ အသီးသီးတွင် ဇူလိုင်လကုန်ပိုင်းမှစတင်၍ အခြေခံ ပညာကျောင်း အသီးသီး ပြန်ဖွင့်နိုင်ပြီ ဖြစ်ကာ ယမန်နေ့က စစ်တွေ တက္ကသိုလ် ပြန်လည် ဖွင့်လှစ်ကြောင်း သိရသည်။ သို့ရာတွင် ဘူးသီးတောင်၊ မောင်တော ဒေသ တဝိုက်၌မူ ကျောင်းများ ပြန်လည် ဖွင့်လှစ်နိုင်ရေး ခက်ခဲနေသေးသည်။

မောင်တောခရိုင် တောင်ပိုင်းနှင့် မြောက်ပိုင်းရှိ ဒေသခံ ပြည်သူများမှာ လယ်ယာ လုပ်ကိုင်ခြင်း၊ တောင်ယာ ခုတ်ခြင်းနှင့် ရေလုပ်ငန်း လုပ်ကိုင်ခြင်း တို့ဖြင့် အသက်မွေး ၀မ်းကျောင်း ပြုကြသော်လည်း လက်ရှိတွင် ပုဒ်မ ၁၄၄ ထုတ်ပြန် ထားသေးသောကြောင့် သွားလာ လှုပ်ရှားရန် ခက်ခဲနေပြီး လုပ်ငန်းများ ရပ်ဆိုင်း ထားရကြောင်း သိရသည်။

အဆိုပါ ဒေသရှိ ရခိုင်နှင့် တခြားဒေသခံ တိုင်းရင်းသားများသည် NGO များ၏ အကူအညီ ပေးအပ်မှုကိုလည်း လုံးဝ လက်မခံကြပေ။

“အထူးသဖြင့် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) ရဲ့ အကူ အညီကို လုံးဝ မယူဘူး။ ၁၉၉၄ ခုနှစ် တုန်းက ဆူပူမှု ဖြစ်တော့ တိုင်းရင်းသား တွေကို မကူညီဘဲ ဘင်္ဂါလီတွေကိုပဲ ကူညီတာကို အခုထိ မှတ်ထားပြီး အကူအညီ မယူကြတာပါ” ဟု YDA အဖွဲ့ဝင် ဦးမောင်ထွန်းလှက ပြောသည်။

Ref: ဧရာဝတီ

Read More...

ရိုဟင်ဂျာအရေး သမ္မတ ဦးသိန်းစိန်ထံ ပါကစ္စတန် သမ္မတ စာပေးပို့

2012-08-07

ပဋိပက္ခတွေ ဖြစ်ပွားနေတဲ့ မြန်မာနိုင်ငံ ရခိုင်ပြည်နယ်အတွင်း ရိုဟင်ဂျာ မူဆလင်တွေရဲ့ အသက်အိုးအိမ်တွေ ဆုံးရှုံးနေရတဲ့ အပေါ် ပါကစ္စတန် အစိုးရနဲ့ ပြည်သူတွေက အလေးအနက် စိုးရိမ် ပူပန်ကြောင်း ပါကစ္စတန် သမ္မတ အလီ ဇာဒါရီက သမ္မတ ဦးသိန်းစိန်ထံကို မနေ့က စာရေးသား ပေးပို့ခဲ့ပါတယ်။

ပါကစ္စတန် သမ္မတရဲ့ပေးစာမှာ - ရိုဟင်ဂျာ မူဆလင်တွေ ကိုယ့်အိမ်ကိုယ်ပြန်ပြီး လုံခြုံ စိတ်ချရတဲ့ ဘ၀ ရရှိနိုင်ဖို့ အတွက် ပြန်လည် ထူထောင်ရေး လုပ်ငန်းစဉ်ကို မြန်မြန် ထက်ထက် ဆောင်ရွက်ပေးဖို့ ဦးသိန်းစိန်ကို တိုက်တွန်းထားပြီး၊ မတူညီတဲ့ လူအုပ်စု အချင်းချင်း ငြိမ်းငြိမ်း ချမ်းချမ်း အတူယှဉ်တွဲ နေထိုင်နိုင်တာဟာ မြန်မာနိုင်ငံရဲ့ ဒီမိုကရေစီ တက်လှမ်းရေး အစီအစဉ် အားကောင်း မောင်းသန်ဖြစ်လာဖို့အတွက် အရေးကြီးကြောင်း၊ ရပ်ရွာတွင်း နေထိုင်သူတွေ သဟဇာတဖြစ်မှ ဒီမိုကရေစီရဲ့ အသီးအပွင့်တွေကို ခံစားနိုင်မှာ ဖြစ်ကြောင်း၊ ဒါမှသာ မြန်မာနိုင်ငံရဲ့ ဒီမိုကရေစီ အသွင်ကူးပြောင်းရေး လုပ်ငန်းစဉ် နောက်ပြန် မဆုတ်နိုင်မှာ ဖြစ်ကြောင်း အလေးပေး ဖော်ပြထားပါတယ်။

Ref: RFA News

Read More...

နယ်ခြားစောင့်တပ်အဖြစ် လက်ခံရန် ‘မူ’ မရှိဟု ALP ပြော

ဟင်္သာနီ (မွန်မြေ)
အင်္ဂါနေ့၊ သြဂုတ်လ ၀၇ ရက် ၂၀၁၂

စံခလပူရီ (မဇ္ဈိမ) ။ ။ ရခိုင်ပြည် လွတ်မြောက်ရေးပါတီ ALP အနေဖြင့် နယ်ခြားစောင့်တပ် BGF အဖြစ် ပြောင်းလဲ ဖွဲ့စည်းရန် သဘောထား မရှိကြောင်း ALP ဒု-ဥက္ကဋ္ဌ ခိုင်စိုးနိုင်အောင် က ပြောကြားလိုက်သည်။

ALP အား အင်အားတိုးချဲ့ကာ BGF တခုအဖြစ် ဖွဲ့စည်းပေးရန် ဝန်ကြီး ဦးအောင်မင်း က ရခိုင် ဒီမိုကရေစီ အဖွဲ့ချုပ် ALD နှင့်တွေ့ဆုံစဉ် သဘောထား ပြုခဲ့သည့် အပေါ် ALP ဒု-ဥက္ကဋ္ဌ ခိုင်စိုးနိုင်အောင် က တုန့်ပြန်လိုက်ခြင်း ဖြစ်သည်။

“အစိုးရ ဘက်က အခုအထိ ကျနော်တို့ကို ပြောတာဆိုတာ၊ ဆွေးနွေးတာ၊ ကမ်းလှမ်း လာတာမျိုး ဘာမှ မရှိသေးပါဘူး။ ကျနော်တို့ ပါတီရဲ့ သဘောထားက ရှင်းရှင်းလေးပါ။ နယ်ခြားစောင့်တပ် BGF ကို လက်ခံဖို့ မူ မရှိပါဘူး” ဟု မဇ္ဈိမကို ပြောသည်။

ပြည်ထောင်စု ငြိမ်းချမ်းရေး ဖော်ဆောင်ရေး ဗဟိုကော်မတီ ဒု-ဥက္ကဋ္ဌ ဝန်ကြီး ဦးအောင်မင်း က ALD အတွင်းရေးမှူး ဦးမျိုးကျော် နှင့် ဇူလိုင် လကုန်ပိုင်းက တွေ့ဆုံစဉ် ALP နှင့် ပတ်သက်သည့် ၎င်း၏ သဘောထားကို ပြောကြားခဲ့ကြောင်း ပြည်တွင်း မီဒီယာ တခု၏ ဖေ့စ်ဘွတ် စာမျက်နှာတွင် ဦးမျိုးကျော်အား ကိုးကား၍ ဖော်ပြထားသည်။

ထိုကဲ့သို့ ဦးအောင်မင်း၏ သဘောထား ပြုသည့်အပေါ်လည်း မည်သို့မျှ သဘောထား မပေးလိုကြောင်း ခိုင်စိုးနိုင်အောင် က ပြောသည်။

ဧပြီလဆန်းပိုင်းက အစိုးရနှင့် အပစ်အခတ်ရပ်စဲရေး လက်မှတ်ရေးထိုး ထားသည့် ALP တွင် လက်နက်ကိုင် အင်အား ၅ဝဝ ခန့် ရှိပြီး စစ်တပ်နှင့် ပါတီဝင် စုစုပေါင်း အင်အားမှာ ၃,ဝဝဝ ခန့် ရှိသည်ဟု သိရသည်။

“ကျနော်တို့ အပစ်ရပ် သဘောတူတာကလည်း လက်နက်ကိုင် လမ်းစဉ်ကို စွန့်လွှတ်ဖို့ မဟုတ်ပါဘူး။ လက်နက်ကို ကိုယ့်လက်မှာ ကိုယ် ကိုင်ထားပါ။ အစိုးရနဲ့ ကျနော်တို့နဲ့ တိုင်းပြည် တိုးတက်ရေး အတွက် အတူတကွ ပူးပေါင်း ဆွေးနွေး ကြမယ်။ အဲလို အခြေခံ အချက်တွေနဲ့ အပစ် ရပ်ကြတာပါ” ဟု ခိုင်စိုးနိုင်အောင် က ဆိုသည်။

အပစ်အခတ် ရပ်စဲရေး သဘောတူညီချက်တွင် ပါဝင်သည့် လုပ်ငန်း စဉ်များကို ALP အနေနှင့် အကောင်အထည် ဖော်ရန် ရှိသော်လည်း ရခိုင်ပြည်နယ်၌ ဖြစ်ပွားနေသည့် ပြည်တွင်း ပဋိပက္ခများကြောင့် ကြန့်ကြာနေရသည်ဟု ပြောသည်။

ရခိုင် တိုင်းရင်းသား တိုးတက်ရေး ပါတီ RNDP မှ လွှတ်တော် ကိုယ်စားလှယ် ဦးဖေသန်းကမူ ALP အနေဖြင့် နယ်ခြားစောင့် တပ်အဖြစ် ဖွဲ့စည်းရန် လက်ခံပါက တိုင်းပြည်၏ အနောက်ဘက်မှ နိုင်ငံခြားသား တရားမဝင် ဝင်ရောက်လာမှုအား ကာကွယ်နိုင်မည်ဖြစ်ပြီး ဆက်ဆံရေးရုံး ထားရှိခြင်းထက် ပိုမိုကောင်းမွန်မည်ဖြစ်ကြောင်း တိုက်တွန်းထားသည်။

ရခိုင် ပြည်သူများအား အကာ အကွယ် ပေးရေးနှင့် ပတ်သက်၍ စက်တင်္ဘာလ တွင် ကျင်းပမည့် ဗဟိုကော်မတီတွင် အကျယ်တဝင့် ဆွေးနွေးမည်ဖြစ်ပြီး အစိုးရ ငြိမ်းချမ်းရေး အဖွဲ့နှင့် သြဂုတ်လကုန် (သို့မဟုတ်) စက်တင်္ဘာ လဆန်း၌ တွေ့ဆုံရန် ရှိသည် ဟုလည်း ခိုင်စိုးနိုင်အောင်မှ မဇ္ဈိမအား ပြောပါသည်။

ALP သည် ဧပြီလ ၅ ရက်နေ့တွင် အစိုးရနှင့် အပစ်အခတ် ရပ်စဲရေး၊ ဆက်ဆံရေးရုံး ဖွင့်လှစ်ရေး အပါအဝင် ပဏာမ သဘောတူညီချက် ၅ ချက် လက်မှတ် ရေးထိုးခဲ့သည်။

ကျောက်တော်၊ ပလက်ဝ၊ စစ်တွေနှင့် ရခိုင်ပြည်နယ်ရှိ မြို့ကြီး များ၌ ဆက်ဆံရေး ရုံးနှင့် စီးပွားရေး ရုံးများ ဖွင့်လှစ် သွားနိုင်ရန်လည်း ALP မှ စီစဉ်ထားကြောင်း သိရသည်။

ALP / ALA (ရခိုင်ပြည် လွတ်မြောက်ရေးတပ်)ကို ၁၉၇၃ ခုနှစ်တွင် စတင် တည်ထောင် ခဲ့ပြီး မြန်မာ-ဘင်္ဂလားဒေ့ရှ် နယ်စပ်၊ မြန်မာ-အိန္ဒိယ နယ်စပ်နှင့် မြန်မာ-ထိုင်း နယ်စပ် တို့တွင် အခြေစိုက်လျက် ရှိသည်။

Ref: မဇ္ဈိမ

Read More...

Tuesday, August 7, 2012

ပြည်သူ့လွှတ်တော်၌တရားဥပဒေစိုးမိုးရေးနှင့်တည်ငြိမ်အေးချမ်းရေး ကော်မတီကို အသစ်ဖွဲ့စည်းခဲ့ပြီး ဒေါ်အောင်ဆန်းစုကြည် ဥက္ကဋ္ဌ အဖြစ် ဆောင်ရွက်မည်

Tuesday, 07 August 2012

ဒေါ်အောင်ဆန်းစုကြည် ဥက္ကဋ္ဌအဖြစ် ဆောင်ရွက်မည့် တရားဥပဒေ စိုးမိုးရေးနှင့် တည်ငြိမ် အေးချမ်းရေး ကော်မတီ အသစ် ထပ်မံ ဖွဲ့စည်းခြင်းကို ပြည်သူ့ လွှတ်တော် မှ သဘော တူညီသည့်အတွက် အတည်ပြုကြောင်း ပြည်သူ့လွှတ်တော် ဥက္ကဋ္ဌ သူရ ဦးရွှေမန်းက ယနေ့ (သြဂုတ်လ ၇ ရက်) နံနက် ၁၀ နာရီ အချိန်တွင် ကြေညာခဲ့သည်။

ကော်မတီတွင် ဥက္ကဋ္ဌအဖြစ် အမျိုးသားဒီမိုကရေစီ အဖွဲ့ချုပ် ဥက္ကဋ္ဌ ပြည်သူ့ လွှတ်တော် ကိုယ်စားလှယ် ဒေါ်အောင်ဆန်းစုကြည်၊ အတွင်းရေးမှူး အဖြစ် အမျိုးသား ဒီမိုကရေစီ အဖွဲ့ချုပ်မှ ပုသိမ် မဲဆန္ဒနယ် ပြည်သူ့ လွှတ်တော် ကိုယ်စားလှယ် ဦးဝင်းမြင့် တို့က ဆောင်ရွက်မည်ဖြစ်ပြီး အဖွဲ့ဝင် ၁၅ ဦး ပါဝင်ကြောင်း သိရသည်။

ကော်မတီ၏ အဓိကတာဝန်မှာ လွှတ်တော် ကိုယ်စားလှယ်များ၊ တရားရေး အဖွဲ့အစည်းများ၊ အစိုးရ ၀န်ထမ်းများ၊ မီဒီယာများကြား တရားဥပဒေနှင့် အညီ ကျင့်သုံး နေထိုင်မှု ရှိစေရန် ကြပ်မတ် ထိန်းကျောင်းရမည် ဖြစ်ပြီး တိုင်းပြည်တည်ငြိမ် အေးချမ်းမှု ရရှိစေရန် ဆောင်ရွက်ရန် ဖြစ်ကြောင်း ပြည်သူ့ လွှတ်တော် ဒုတိယဥက္ကဋ္ဌ ဦးနန္ဒကျော်စွာက ကြေညာခဲ့သည်။ ထို့ပြင် အဆိုပါ ကော်မတီသည် ပြည်ထောင်စု အဆင့် ဖြစ်ကြောင်း ထပ်မံ ပြောကြားခဲ့သည်။

ကော်မတီကို (၁) ဒေါ်အောင်ဆန်းစုကြည် ဥက္ကဋ္ဌ- ကော့မှူး မဲဆန္ဒနယ်၊ (၂) ဦးမန်းမောင်မောင်ဥာဏ် ပန်းတနော် မဲဆန္ဒနယ်၊ အဖွဲ့ဝင် (၃) ဦးမင်းဆွေ၊ ဒိုက်ဦး မဲဆန္ဒနယ်၊ အဖွဲ့ဝင် (၄) ဒေါ်ဒွဲဘူ၊ အင်န်ဂျန်းယန် မဲဆန္ဒနယ်၊ အဖွဲ့ဝင်(၅) ဦးစိုင်းထွန်းစိန် မိုင်းပြင်း မဲဆန္ဒနယ်၊ အဖွဲ့ဝင် (၆) ဒေါက်တာရိုအုပ် မတူပီ၊ မဲဆန္ဒနယ်၊ အဖွဲ့ဝင် (၇) ဦးခင်မောင်မြင့် ဇီးကုန်း မဲဆန္ဒနယ်၊ အဖွဲ့ဝင် (၈) ဒေါ်မိယဉ်ချမ်း၊ ကျိုက်မရော မဲဆန္ဒနယ်၊ အဖွဲ့ဝင် (၉) ဒေါ်လဲ့လဲ့ဝင်းဆွေ၊ တာမွေ၊ မဲဆန္ဒနယ်၊ အဖွဲ့ဝင် (၁၀) ဦးစိုးရယ်၊ ဒီမောဆို၊ မဲဆန္ဒနယ်၊ အဖွဲ့ဝင် (၁၁) ဒေါ်ခင်စောဝေ၊ ရသေ့တောင် မဲဆန္ဒနယ်၊ အဖွဲ့ဝင် (၁၂) ဦးနယ်လ်ဆင် (ခ) ဦးဆောင်ဆီ ၊ ကျောက်မဲ မဲဆန္ဒနယ်၊ အဖွဲ့ဝင် (၁၃) ဦးသိန်းညွန့်၊ သင်္ဃန်းကျွန်း မဲဆန္ဒနယ်၊ အဖွဲ့ဝင် (၁၄) ဒေါက်တာ ဇော်မြင့်မောင်၊ ကျောက်ပန်းတောင်း မဲဆန္ဒနယ် အဖွဲ့ဝင် (၁၅) ဦးဝင်းမြင့်၊ ပုသိမ် မဲဆန္ဒနယ်၊ အတွင်းရေးမှူး တို့ဖြင့် ဖွဲ့စည်းခဲ့ခြင်း ဖြစ်သည်။

Ref: EMG News

Read More...

သမ္မတနှင့် တွေ့ဆုံဆွေးနွေးမှု နိုင်ငံရေးပါတီများ အားရ

ရန်ပိုင်
August 6, 2012

သမ္မတ ဦးသိန်းစိန်နှင့်တွေ့ဆုံကာ နိုင်ငံရေး၊ စီးပွားရေးနှင့် ပြည်တွင်း ငြိမ်းချမ်းရေး ကဏ္ဍများ အပေါ် ဆွေးနွေး ရခြင်းနှင့် ပတ်သက်၍ နိုင်ငံရေး ပါတီ များက ကျေနပ် အားရကြောင်း ပြောဆိုသည်ဟု သိရသည်။

ပြီးခဲ့သည့် စနေနေ့က နေပြည်တော်၌ သမ္မတ ဦးသိန်းစိန်နှင့် ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD)၊ ရခိုင် ဒီမိုကရေစီ အဖွဲ့ချုပ် (ALD)၊ တိုင်းရင်းသား စည်းလုံး ညီညွတ်ရေး ပါတီ၊ ကရင်ပြည်သူ့ တိုးတက်ရေး ပါတီ၊ မြန်မာ လူ့ဘောင်သစ် ဒီမို ကရက်တစ် ပါတီ၊ အမျိုးသား ဒီမိုကရေစီသစ် ပါတီ၊ အမျိုးသားနိုင်ငံရေး မဟာမိတ်များ အဖွဲ့ချုပ်ပါတီ၊ ချင်းတိုးတက်ရေး ပါတီ၊ ဇိုမီး ဒီမိုကရေစီ အဖွဲ့ချုပ်၊ ပအို့ဝ် အမျိုးသား အဖွဲ့ချုပ်၊ မတူကွဲပြားခြင်းနှင့် ငြိမ်းချမ်းရေး ပါတီ၊ မွန်ဒီမိုကရေစီ ပါတီ၊ ခေတ်သစ်ပြည်သူ့ ပါတီ၊ မြန်မာအမျိုးသား ကွန်ဂရက် ပါတီစသည့် ၁၄ ပါတီမှ ပါတီခေါင်းဆောင်များတို့က တွေ့ဆုံ ခဲ့ခြင်းဖြစ်သည်။

SNLD ပါတီက ပြည်တွင်း ငြိမ်းချမ်းရေးကို တနိုင်ငံလုံး အတိုင်း အတာဖြင့် လုပ်ဆောင်ရန်၊ လက်နက်ကိုင် အဖွဲ့ ကြီးငယ် မဟူ တပြေး ညီ ဆက်ဆံရန်၊ သံလွင်မြစ် အရှေ့ဘက် ကမ်းတွင် တရုတ် စကားပြောသည့် အမည်မသိ လက်နက်ကိုင် အဖွဲ့အစည်းများ စိမ့်ဝင် နေမှုကို တားဆီးပေးရန်၊ ပြည်ပရောက် မြန်မာနိုင်ငံ သားများအား လာမည့် ၂၀၁၄ ခုနှစ်တွင် ကောက်ယူမည့် သန်းခေါင်စာရင်း၌ အခက်အခဲမရှိ ပါဝင်နိုင်စေရန်၊ တိုင်းရင်းသား ဘာသာစကားကို သင်ရိုးညွှန်းတမ်းတွင် ပြဋ္ဌာန်းရန်တို့ကို တင်ပြခဲ့ကြောင်း ပါတီပြောရေး ဆိုခွင့်ရှိသည့် ဦးစိုင်းလိတ်ကဆိုသည်။

“သန်းခေါင်စာရင်း၊ မှတ်ပုံတင်ကိစ္စမှာ အခက်အခဲမရှိအောင် ကူညီမယ်ပြောတယ်၊ သံလွင် အရှေ့ဘက်ကမ်းက လက်နက်ကိုင် ကိစ္စကို သူလည်း သတိထားမိတယ်။ အခုဆိုရင် ၀ ဒေသမှာ တရုတ်ဆိုင်းဘုတ်တွေ ဖြစ်နေပြီလို့ဆိုတယ်” ဟု ၎င်းက ပြောသည်။

တိုင်းရင်းသား ဘာသာစကားများကို သင်ရိုးညွှန်းတမ်းတွင် ထည့်သွင်းရေးမှာ မြန်မာနိုင်ငံတွင် တိုင်းရင်းသား ပေါင်းစုံ နေထိုင်သည့် အတွက် မဖြစ်နိုင်ကြောင်း၊ ကျောင်းချိန်ပြင်ပတွင်သာ သင်စေလိုကြောင်း ဦးသိန်းစိန်က ပြန်လည်ပြောဆိုသည်ဟု သိရသည်။

မြန်မာနိုင်ငံသည် လူဦးရေ အင်အားကြီးသည့် အိန္ဒိယနှင့် တရုတ်နိုင်ငံအကြား တည်ရှိသည့်အတွက် ရခိုင်ပြည်နယ်၌ ဖြစ်ပွားခဲ့သည့် ပြဿနာများကို သင်ခန်းစာယူကာ လာမည့် ၂၀၁၄ ခုနှစ်တွင် ပြုလုပ်မည့် သန်းကောင်စာရင်းကောက်ခံသည့် ကိစ္စကို သေချာစွာ စိစစ်ရန်လည်း SNLD ပါတီအနေဖြင့် ပြောဆိုခဲ့သည်ဟု ဦးစိုင်းလိတ်က ဆိုသည်။

ALD ပါတီခေါင်းဆောင် ဦးအေးသာအောင် ကလည်း မြန်မာနိုင်ငံတွင် ဒီမိုကရေစီစနစ်သည် အစိုးရအဖွဲ့ အောက်ခြေပိုင်းတွင် အားနည်း နေသေးသဖြင့် ပိုမိုဖြစ်ထွန်းရေးအတွက် ၂၀၀၈ ဖွဲ့စည်းပုံကို ပြင်ဆင်ရန်၊ ပြည်တွင်းစစ်ကို သင်ခန်းစာယူပြီး ပင်လုံ ညီလာခံကဲ့သို့ တိုင်းရင်းသား ပေါင်းစုံပါဝင်သည့် ညီလာခံတခု ခေါ်ယူရန်၊ ရခိုင်ပြည်နယ်တွင် ဖြစ်ပွားခဲ့သည့် အကြမ်းဖက်မှုသည် ဘာသာရေးပဋိပက္ခကြောင့် မဟုတ်ဘဲ တဘက်နိုင်ငံမှ ခိုးဝင်လာသည့် ဘင်္ဂါလီများက ရခိုင်ပြည်နယ်ကို လွှမ်းမိုးရန် ကြိုးစားခြင်း ဖြစ်သောကြောင့် နိုင်ငံတော် လုံခြုံရေး၊ အမျိုးသားရေးတို့ကို အလေးအနက်ထားရန် တင်ပြခဲ့သည်ဟု ပြောပြသည်။

“လူဦးရေ အားကိုးနဲ့ မွတ်စလင်ပြည်နယ် လုပ်ချင်တာပါ။ ကျနော်တို့မှာ လူအခွင့်အရေး စာနာမှုရှိပါတယ်၊ ဒါပေမယ့် ဒီတခုတည်းကို ကြည့်လို့မရဘူး။ နိုင်ငံတော်လုံခြုံရေးနဲ့ ကြည့်ရမယ်၊ သမ္မတ ဦးသိန်းစိန် ပြောခဲ့တဲ့ အချက်သုံးချက်ကို ထောက်ခံတယ်” ဟု ၎င်းက ဆိုသည်။

ရခိုင်ပြည်နယ်၏ စီးပွားရေးမှာ လယ်ယာ စိုက်ပျိုးရေးနှင့် ငါးဖမ်းခြင်းအပြင်၊ ကူးသန်းရောင်းဝယ်ရေးကို အားထားနေရပြီး လက်ရှိ အခြေအနေတွင် ကူးသန်းရောင်းဝယ်ရေး ပျက်ပြားနေကြောင်း၊ ထို့အတွက် နိုင်ငံခြား ရင်းနှီးမြှုပ်နှံမှုများကို ရခိုင်ပြည်နယ် အတွင်း ဖော်ဆောင်ပေးရန်၊ ရခိုင်ကျေးရွာများကို ကာကွယ်ရန် ပြည်သူ့စစ် ထားပေးရန်တို့ကို တင်ပြခဲ့ကြောင်း ဦးအေးသာအောင်က ပြောသည်။

ကျန် တိုင်းရင်းသား ပါတီများဖြစ်သည့် ချင်း တိုးတက်ရေးပါတီ၊ ဇိုမီး ဒီမိုကရေစီ အဖွဲ့ချုပ်၊ ပအို့ဝ်အမျိုးသား အဖွဲ့ချုပ်နှင့် မွန်ဒီမိုကရေစီ ပါတီတို့ကလည်း ပြည်တွင်းစစ် ရပ်စဲရေး၊ တိုင်းရင်းသားများကို အခြေခံသည့် ညီလာခံ ခေါ်ယူရေး၊ ပင်လုံမူကို အခြေခံကာ နိုင်ငံရေး ပြဿနာများကို ဖြေရှင်းရေးဆိုသည့် သဘောထားများကို ထောက်ခံ ဆွေးနွေးကြောင်း သိရသည်။

သမ္မတ ဦးသိန်းစိန်နှင့် တွေ့ဆုံမှုကို ကျေနပ်အားရကြောင်း၊ သမ္မတကလည်း ဖွဲ့စည်းပုံ အခြေခံဥပဒေ ပြင်ဆင်ရေးမှာ ဖြစ်နိုင်ကြောင်း၊ ငြိမ်းချမ်းရေး အတွက်လည်း ကြိုးပမ်းဆောင်ရွက်နေပြီး ကချင်လွတ်လပ်ရေး တပ်မတော် (KIA) နှင့်လည်း ဆက်လက်ဆွေးနွေးကာ ငြိမ်းချမ်းရေးကို တည်ဆောက်မည်ဖြစ်ကြောင်း၊ ရခိုင်ပြည်နယ်အရေးသည် အမျိုးသားရေး ဖြစ်သည့် အတွက် အလေးထားကာ သိမ်သိမ်မွေ့မွေ့ နက်နက်ရှိုင်းရှိုင်း ဆောင်ရွက်သွားမည်ဟု ကတိပြုခဲ့ကြောင်း ပြောသည်ဟု ပါတီ ခေါင်းဆောင်များက ဆိုသည်။

တိုင်းရင်းသား စည်းလုံးညီညွတ်ရေး ပါတီ (တစည) ကလည်း ကုန်ဈေးနှုန်းကြီးမြင့်မှု၊ ငွေကြေး ဖောင်းပွမှုတို့ကြောင့် ပြည်သူများကို ထိခိုက်ပြီး စီးပွားရေးအကျပ်အတည်းမှ နိုင်ငံရေး အကျပ်အတည်းကို ဦးတည်စေမည်ဖြစ်ကြောင်း၊ စီးပွားရေးနှင့်ဆိုင်သော ကိန်းဂဏန်းများကို ပွင့်လင်းမြင်သာစွာ ထုတ်ပြန်ရန်လိုပြီး တိုင်းပြည်စီးပွားရေး အကောင်အထည် ဖော်ရာတွင် ဆုံးရှုံးလေလွင့်မှုများ မရှိရန် တတ်သိနားလည်သည့် ပညာရှင်များနှင့် စောင့်ကြည့်လေ့လာရေး အဖွဲ့များ ထားသင့်ကြောင်း၊ ပညာရေး ကဏ္ဍတွင်
အသုံးစရိတ် မြှင့်တင်ရန်နှင့် ပြင်ပတက္ကသိုလ်များနှင့် ပူးပေါင်းဆောင်ရွက်ရေး လိုကြောင်း၊ ကမ္ဘာ့ဘဏ်၊ အာရှ ဖွံ့ဖြိုးရေးဘဏ်၊ အပြည်ပြည်ဆိုင်ရာ ငွေကြေးရန်ပုံငွေ အဖွဲ့များနှင့်လည်း ထိတွေ့ဆက်ဆံမှုများ ရှိလာပြီဖြစ်ရာ အဆိုပါ ကဏ္ဍများတွင် စီးပွားရေး ကျွမ်းကျင်သည့် မြန်မာပညာရှင်များကို ခန့်ထားရန်တို့ကို တင်ပြဆွေးနွေးကြောင်း အတွင်းရေးမှူး ဦးဟန်ရွှေက ဧရာဝတီသို့ပြော သည်။

သမ္မတ ဦးသိန်းစိန်ကလည်း ပြည်ပရင်းနှီးမြုပ်နှံမှု (FDI)များနှင့် ပတ်သက်ပြီး တိုင်းပြည် နစ်နာမှုမရှိစေရန် မြန်မာ့စီးပွားရေး ရင်းနှီး မြှုပ်နှံမှု ကော်မရှင်ကို ၀န်ကြီး ၇ ဦးဖြင့် ဖွဲ့စည်းထားကြောင်း၊ ရင်းနှီးမြှုပ်နှံမှုဆိုင်ရာ ဥပဒေကြမ်းကိုလည်း ပြည်ပနိုင်ငံများနှင့် လိုက် လျောညီထွေ ဖြစ်ရန် ရေးဆွဲပြီး လွှတ်တော်တွင် တင်ပြထားရာ မကြာမီ အတည်ပြုပေးတော့မည် ဖြစ်ကြောင်း၊ နိုင်ငံရေး ပါတီများကလည်း ၀ိုင်းဝန်းကူညီ လုပ်ဆောင်ကြမည်ဆိုလျှင် မြန်မာပြည်သည် ၅ နှစ်တာအတွင်း တိုးတက်လာမည် ဖြစ်ကြောင်း ပြန်လည်တုံ့ပြန် ခဲ့သည်ဟု သိရသည်။

Ref: ဧရာဝတီ

Read More...

ပဋိပက္ခစုံစမ်းရေး မြန်မာအစိုးရလက်ခံရန် OIC တောင်းဆို

August 6, 2012

၅၇ နိုင်ငံဖွဲ့စည်းထားသော အစ္စလာမ်မစ် ပူးပေါင်းဆောင်ရွက်ရေး အသင်း Organisation of Islamic Cooperation (OIC) က ရခိုင် ပဋိပက္ခများနှင့် ပတ်သက်၍ အချက် အလက် ရှာဖွေ စိစစ်ရန် ကိုယ်စားလှယ် အဖွဲ့ တဖွဲ့ မြန်မာနိုင်ငံသို့ စေလွှတ်ရန် ရှိပြီး မြန်မာ အစိုးရက လက်ခံခွင့်ပြုရန် တောင်းဆို လိုက်သည်။

ဆော်ဒီအာရေးဗီးယားနိုင်ငံ ဂျဒ္ဒါမြို့တွင် တနဂ်နွေနေ့က ကျင်းပသော အလုပ် အမှုဆောင် အဖွဲ့ ဆွေးနွေးပွဲ အပြီး ထုတ်ပြန်ကြေညာရာ OIC အထွေထွေ အတွင်းရေးမှူး မစ္စတာ အက်မီလဒ်ဒင် အီစနိုဂလူးက “ရိုဟင်ဂျာ လူနည်းစုများ၏ ဒုက္ခကို လုံခြုံရေးကောင်စီ အနေဖြင့် အာရုံ စိုက်လာရေး တိုက်တွန်းရန် ကုလသမဂ္ဂရှိ မိမိတို့၏ ရုံးများကို ညွန်ကြားထားသည်” ဟု ဆိုသည်။

OIC ၏ ကြေညာချက်သည် ကုလသမဂ္ဂ မြန်မာနိုင်ငံ ဆိုင်ရာ လူ့အခွင့်အရေး ကိုယ်စားလှယ် မစ္စတာ သောမတ်စ် အိုဟေး ကင်တာနာ က ရခိုင်ပြည်နယ် အရေးနှင့် ပတ်သက်ပြီး လွတ်လပ်သည့် စုံစမ်းစစ်ဆေးမှုများ အမြန်ဆုံး လုပ်ဆောင်ရန် လိုအပ်ကြောင်း ပြောဆိုလိုက် အပြီး ပေါ်ထွက် လာခြင်းဖြစ်သည်။

ပြီးခဲ့သည့်အပတ် ရခိုင်အရေးအပါအဝင် လူ့အခွင့်အရေးအခြေအနေများကို စုံစမ်းရန် ကုလသမဂ္ဂ မြန်မာနိုင်ငံ ဆိုင်ရာ လူ့အခွင့်အရေး အထူး ကိုယ်စားလှယ် မစ္စတာ သောမတ်စ် ကင်တားနားကို ပဋိပက္ခဖြစ်ပွားရာ ဒေသများသို့ ပြီးခဲ့ရက်ပိုင်းက သွားရောက်ခွင့်ပြုခဲ့သည်။

သြဂုတ်လ ၄ ရက်နေ့က ကျင်းပသော မင်္ဂလာဒုံ လေဆိပ် သတင်းစာ ရှင်းလင်းပွဲတွင် ကင်တားနားက ရိုဟင်ဂျာများနှင့် ပတ်သက်သည့် ပြောဆိုဝေဖန်နေမှုများကို အတည်ပြုရန် မိမိအနေဖြင့် တာဝန်မရှိကြောင်း၊ အစိုးရ၏ စုံစမ်းရေးကော်မရှင် အနေဖြင့် တာဝန်ယူမှုနှင့် တာဝန်ခံမှုတို့ လိုအပ်ကြောင်း၊ ပုံကြီးချဲ့ခြင်းနှင့် ဖုံးဖိခြင်းများသည် မယုံကြည်မှု၊ တင်းမာမှု တို့ကိုသာဖြစ်စေသဖြင့် ရင်ကြားစေ့ရေး အတွက် မကောင်းကြောင်း ပြောဆိုသည်။

ထို့ပြင် ရိုဟင်ဂျာများအား နိုင်ငံသားဖြစ်ပိုင်ခွင့်အပေါ် ကန့်သတ်ထားသော ၁၉၈၂ နိုင်ငံသား ဥပဒေကို ပြင်ဆင် သင့်ကြောင်းလည်း အကြံပြုပြောဆိုသည်။

တချိန်တည်းမှာ ကမ္ဘာ့မူဆလင်ဘာသာဝင်အများဆုံးရှိရာ အင်ဒိုနီးရှားနိုင်ငံ၏ သမ္မတ ဆူဆီလို ယူဒိုယူနိုက ရခိုင် ပဋိပက္ခများ အား မြန်မာ အစိုးရက အကောင်းဆုံး ကိုင်တွယ်ဖြေရှင်းနေကြောင်း ထုတ်ပြန် ပြောဆိုလိုက်သည်။

ရခိုင် ပဋိပက္ခသည် ဘာသာရေးပဋိပက္ခ မဟုတ်ဘဲ ဒေသတွင်း လူအုပ်စုကြား ဖြစ်ပွား တတ်သည့် ပဋိပက္ခ သာဖြစ်ပြီး အကြောင်း တိုက်ဆိုင်စွာဖြင့် ရိုဟင်ဂျာများက မူဆလင်ဖြစ်ပြီး ရခိုင်များက ဗုဒ္ဓဘာသာ ဖြစ်ကြောင်းလည်း အင်ဒိုနီးရှား သမ္မတက ဆိုသည်။

ထို့ပြင် ရိုဟင်ဂျာများသည် ဘဂ်လားဒေ့ရှ် ဇာတိဖြစ်ကြောင်း၊ သို့ရာတွင် မျိုးဆက်လေးဆက် နေထိုင်လာသော ၎င်းတို့ကို မြန်မာ အစိုးရက တိုင်းရင်းသား စာရင်းတွင် ထည့်သွင်းမှု မရှိသေးကြောင်း၊ ရိုဟင်ဂျာ ဒုက္ခသည်များကို ကူညီထောက်ပံ့ကြရန် တိုက်တွန်းကြောင်းလည်း ဆိုသည်။

အင်ဒိုနီးရှား သမ္မတ၏ ကြေညာချက်သည် မလေးရှားနိုင်ငံ ကွာလာလမ်ပူတွင် ကျင်းပခဲ့သည့် OIC ဖော်ရမ်ကို တက်ရောက် ခဲ့သော အင်ဒိုနီးရှား ကြက်ခြေနီ ဥက္ကဌ ယခင် ဒု-သမ္မတ ယူစွပ်ကယ်လာ၏ ရိုဟင်ဂျာများအား ထောက်ပံ့ ကူညီရန် ဆော်ဩမှုအပြီး ပေါ်ထွက် လာခြင်းဖြစ်သည်။

စနေနေ့က ထုတ်ပြန်သည့် အီဂျစ် နိုင်ငံခြားရေးဝန်ကြီးဌာန၏ ကြေညာချက်ကလည်း “မြန်မာပြည်တွင် မူဆလင် များကို အကြမ်းဖက် တိုက်ခိုက်မှု များကို ရှုတ်ချကြောင်း” ဆိုသည်။ အီဂျစ် သံတမာန်များ အနေဖြင့် “နှစ်ဖက် အပျက်အဆီးများ အကြား ကွာဟချက်ကြီးပြီး မူဆလင် ရပ်ကွပ်များ ပို၍ အကြမ်းဖက်ခံရ အပျက်အဆီး ပိုများသည်မှာ ရှင်းလင်းစွာ တွေ့မြင်ခဲ့သည်” ဟုလည်း ဆိုသည်။

ကင်တားနားနှင့်အတူ ရခိုင်ဒေသသို့ သွားရောက်ခဲ့သည့် သံတမန်အဖွဲ့တွင် ဘင်္ဂလားဒေ့ရှ်၊ အင်ဒိုနီးရှား၊ ပါကစ္စတန်၊ ကူဝိတ်၊ ဆော်ဒီအာရေဗျ၊ လာအို၊ ကမ္ဘောဒီးယား၊ အီဂျစ်၊ ဘရာဇီး၊ အိန္ဒိယ၊ သီရိလကင်္ကာ စသည့် နိုင်ငံတကာ သံတမန်များ ပါဝင်သည်။

အီဂျစ်နိုင်ငံခြားရေးဝန်ကြီးဌာနအနေဖြင့် မြန်မာသံရုံးရှေ့ ဆန္ဒပြသူများ၏ ဒေါသကို စာနာနားလည်ကြောင်း၊ သို့သော် သံတမာန်များ၏ လုံခြုံရေးကို အီဂျစ်အစိုးရက ကာကွယ်ပေးရမည်ဖြစ်ပြီး သံတမာန်ရေးဖြေရှင်းမှုများကို လေးစားရမည်ဟုလည်း ဆိုသည်။

ယမန်နှစ်က ကိုင်ရိုရှိ အစ္စရေးနှင့် ဆီးရီးယား သံရုံးများကို ဆန္ဒပြသူများက ဝင်ရောက်စီးနင်းခဲ့ဖူးသည်။

Ref: ဧရာဝတီ

Read More...

ရပ်ဆိုင်းခံရသည့် ဂျာနယ်နှစ်စောင် ပြန်လည် ထုတ်ဝေခွင့်ရ

ဖနိဒါ
တနင်္လာနေ့၊ သြဂုတ်လ ၀၆ ရက် ၂၀၁၂

ချင်းမိုင်(မဇ္ဈိမ) ။ ။ ထုတ်ဝေခွင့် ပိတ်ပင်ထားခြင်းခံရသည့် အပတ်စဉ်ထုတ် The Voice Weekly နှင့် Envoy ဂျာနယ် တို့ကို ပြန်ကြားရေး ဝန်ကြီးဌာန စာပေ စိစစ်ရေးနှင့် မှတ်ပုံတင် ဌာနက ပြန်လည် ထုတ်ဝေခွင့်ပြုလိုက်ကြောင်း သိရသည်။

၎င်းဂျာနယ်နှစ်စောင်အား စာပေ စိစစ်ရေးဌာန၏ သတ်မှတ် စည်းကမ်းများ ချိုးဖောက်သည်ဟု ဆိုကာ ဇူလိုင်လ ၃၁ ရက်နေ့မှစ၍ အကန့်အသတ် မရှိ ရပ်ဆိုင်း ထားရာမှ ပြန်လည် ထုတ်ဝေခွင့်ပြုလိုက်ကြောင်း စာပေ စိစစ်ရေးနှင့် မှတ်ပုံတင် ဌာနက တနင်္လာနေ့တွင် သက်ဆိုင်ရာ ဂျာနယ် တာဝန်ရှိသူများအား ခေါ်ယူ၍ ပြောဆိုခဲ့ခြင်း ဖြစ်သည်။

“ကျနော်တို့ကို ဒီနေ့ နေ့လည် နှစ်နာရီ ပတ်ဝန်းကျင်လောက်မှာ စာပေစိစစ်ရေးက ခေါ်ပြောပါတယ်။ နှစ်ပတ်ပြည့်ရင် ထုတ်ဝေခွင့် ရမယ်လို့ ပြောပါတယ်” ဟု Envoy ဂျာနယ် အယ်ဒီတာချုပ် ဦးဇော်ထွဋ်မောင် က ပြောသည်။

လာမည့် သြဂုတ်လ ၁၅ ရက်နေ့တွင် စာမူများကို စာပေစိစစ်ရေး ဌာနသို့ တင်ပြပြီး ၁၉ ရက်နေ့တွင် ပြန်လည် ထုတ်ဝေ
ဖြန့်ချိမည် ဖြစ်ပြီး သတင်း မီဒီယာများအား ပိတ်ပင်မှုများ ထပ်မံ မဖြစ်ပေါ်စေလိုတော့ကြောင်းလည်း “ဒီလို မဖြစ်အောင် မီဒီယာရဲ့ အခန်းကဏ္ဍဟာ ဘာလဲ ဆိုတာကို သေချာအောင် သိအောင် မြင်အောင် ကြည့်တတ်ဖို့ လိုတယ်လို့ပဲ ယူဆပါတယ်။ နောက်နောင် မီဒီယာတွေကို ဂျာနယ်ပိတ်တဲ့ အထိ အရေးယူတာမျိုး မဖြစ်ဖို့ဘဲ မျှော်လင့်ပါတယ်။ အဲဒီအတွက် မီဒီယာကို ပိတ်တယ် ဆိုတဲ့ ဟာမျိုး မရှိသင့်တော့ဘူးလို့ ပြောချင်ပါတယ်” ဟု Envoy ဂျာနယ် အယ်ဒီတာချုပ် က ပြောသည်။

ယခုကဲ့သို့ ထုတ်ဝေခွင့် ရပ်ဆိုင်းလိုက်သည့်အတွက် ဝန်ထမ်းများ အပတ်စဉ် ရရှိနေသည့် အကျိုး ခံစားခွင့်များ ထိခိုက် နစ်နာမှုများ ရှိပြီး ဂျာနယ် အတွက်လည်း နှစ်ပတ် ထုတ်ဝေခွင့် မရသည့် အတွက် ဆုံးရှုံးမှုများ ရှိသည်ဟု ဦးဇော်ထွဋ်မောင်က ပြောသည်။

အလားတူ The Voice Weekly ကိုလည်း လာမည့် သြဂုတ်လ ၁၈ ရက်နေ့တွင် ပြန်လည် ထုတ်ဝေမည် ဖြစ်ကြောင်း Facebook တွင် စာဖတ် ပရိတ်သတ်များအား အသိပေးကြေညာထားသည်။

ထို့ပြင် ယာယီရပ်ဆိုင်းခံရသည့် ကာလအတွင်း The voice Weekly အား အားပေး ထောက်ခံခဲ့ကြသော စာဖတ် ပရိတ်သတ်များ၊ ပုံနှိပ် သတင်းမီဒီယာ အသိုင်းအဝိုင်းမှ လုပ်ဖော်ကိုင်ဘက်များ၊ နိုင်ငံရေး၊ စီးပွားရေး လူမှုရေး နယ်ပယ်များမှ သတင်း ရင်းမြစ်များနှင့် လူပုဂ္ဂိုလ်များအား အထူးကျေးဇူးတင်ကြောင်း မှတ်တမ်း တင်ထားသည်။

သြဂုတ်လ ၁ ရက်နေ့ထုတ် The Voice ဂျာနယ် မျက်နှာဖုံးတွင် ဝန်ကြီးငါးဦး ဌာနပြောင်းရွှေ့ရန် သတင်းများ ထွက်ပေါ်နေဟု ဖော်ပြ ခဲ့သဖြင့် ရပ်ဆိုင်း ခံလိုက်ရခြင်း ဖြစ်မည်ဟု ယူဆနေကြသည်။

ထိုဂျာနယ်များအား ရပ်ဆိုင်းခံလိုက်ရပြီးနောက် ရန်ကုန်၊ မန္တလေးမြို့ကြီး များတွင် သတင်းမီဒီယာ လွတ်လပ်ခွင့် ရရှိရေး အတွက် သတင်းထောက်များက မီဒီယာဖိနှိပ်မှု ချက်ချင်းရပ်၊ Stop Killing Press စာတတ်းပါ တီရှပ် အနက်ရောင်များ ဝတ်ဆင်၍ ငြိမ်းချမ်းစွာ လမ်းလျှောက် ဆန္ဒပြခဲ့ကြသည်။

Ref: မဇ္ဈိမ

Read More...

ကျောက်တော်မှာ ဆန်လု

ခင်ဦးသာ
August 6, 2012

ရခိုင်ပြည်နယ်တွင်း အခြေအနေများ ပုံမှန်ဖြစ်နေပြီဟု အစိုးရက ပြောဆိုနေသော်လည်း ကျောက်တော် မြို့နယ်ရှိ ကျေးရွာ တချို့ ၌ မီးရှို့ ခံရခြင်း၊ ဆန်စက်ရှိ ဆန်၊ စပါးများ လုယက်ခံရခြင်း တို့ ယမန်နေ့က ဖြစ်ပွားခဲ့သည်။

ကျောက်တော်မြို့နယ် တောင်ပေါက် ကျေးရွာရှိ ရခိုင်အမျိုးသား ဦးအောင်လှဇံ ၏ ဆန်စက်မှ ဆန်အိတ်များ၊ စပါးများ ကို အဓမ္မ ၀င်ရောက် လုယူခြင်း ခံရသည့်အပြင် ဆန်စက်လည်း မီးရှို့ခံရကြောင်း ဒေသခံများက ပြော သည်။

“ဦးအောင်လှဇံရဲ့ ဆန်စက် က ဆန်အိတ် ၄၀၀ ၀န်းကျင် အပြင် စပါးတင်း ထောင်နဲ့ချီ ပြီး လုယူကြတယ်၊ ပြီးရင် ဆန်စက် ကို မီးရှို့ကြတယ်၊ ဦးအောင်လှဇံတို့ ထွက်ပြေးလို့ လွတ်တယ်၊ ထိခိုက် ဒဏ်ရာရတဲ့သူတော့ မရှိဘူး”ဟု တောင်ပေါက် ရွာသားတဦး က ဧရာဝတီ ကို ပြောသည်။

ဦးအောင်လှဇံ၏ ဆန်စက်သို့ တောင်ပေါက်ရွာခံ ဘင်္ဂါလီ ၅၀ ကျော်က ညာသံပေး၍ အုပ်စုလိုက် ချီတက် လာကြပြီး ဆန်စက်ထဲသို့ ၀င်ရောက်၍ ပစ္စည်းများ ယူကြပြီး စက်ရုံဝင်းကို မီးရှို့ကြောင်း၊ စက်ရုံနှင့် အနီးရှိ အဆောင်တချို့ မီးလောင်ပြာ ကျသွားကြောင်း လည်း ၎င်းက ဆက် ပြောသည်။ တောင်ပေါက်ကျေးရွာ၌ ဘင်္ဂါလီလူမျိုးများ အပြင် ရခိုင် လူမျိုးများနှင့် တခြား တိုင်းရင်းသား တချို့လည်း နေထိုင်ကြောင်း သိရသည်။

ကျောက်တော် မြို့နယ်အတွင်းရှိ အပေါက်ဝ ကျေးရွာတွင်လည်း ယမန်နေ့က မီးရှို့မှု ဖြစ်ပွားရာ ဒေသခံ တိုင်းရင်းသား များ၏ နေအိမ်များ အပြင် ဘင်္ဂါလီ လူမျိုးများ၏ နေအိမ် တချို့လည်း မီးလောင်ကျွမ်းပြီး စုစုပေါင်း အိမ်ခြေ ၃၀ ဆုံးရှုံး သွား ကြောင်း လည်း သိရသည်။

ကျောက်တော်မြို့နယ်၌ ယမန်နေ့က စတင်၍ ပဋိပက္ခ ဖြစ်ပွားမှု တချို့ရှိခဲ့ကြောင်း၊ သို့သော် အခြေအနေ ကို ထိန်းသိမ်းနိုင်ကြောင်း၊ လူသေဆုံးမှု မရှိကြောင်း ရခိုင်ပြည်နယ် ဥပဒေချုပ်နှင့် ရခိုင်ဒေသ ပဋိုပက္ခများနှင့် ပတ်သက်၍ ဖွဲ့စည်းထားသော ပြန်ကြားရေး ဆပ်ကော်မတီ ဥက္ကဋ္ဌ ဦးလှသိန်း က ဧရာဝတီ ကို ပြောသည်။

“လူသေဆုံးတာ၊ ထိခိုက်တာ မရှိပါဘူး၊ ထိန်းမရလောက်အောင် ဆိုးဝါးတဲ့ အခြေအနေ လည်း မရှိပါဘူး၊ လုံခြုံရေး တာဝန်ရှိ သူတွေက စနစ်တကျ ဆောင်ရွက်နေကြပါတယ်”ဟု ၎င်း က ဆိုသည်။

ကျောက်တော် မြို့နယ် တ၀ိုက်တွင် စစ်တပ်၊ ရဲတပ်ဖွဲ့များ ပိုမိုချထားသည်ကို တွေ့ရကြောင်း၊ မြို့ပေါ်ရှိ ဈေးများနှင့် ဈေးဆိုင်များကိုလည်း ယနေ့ နေ့လည် ၁၂ နာရီ ခန့်မှ စ၍ ပိတ်ထားသည်ကို တွေ့ရကြောင်း၊ ကျောက်တော်မြို့ သို့ ရောက်ရှိနေသည့် ရခိုင်တိုင်းရင်းသားများ တိုးတက်ရေးပါတီ၏ ပြောခွင့်ရသူ ဦးခိုင်ပြည်စိုး က ပြောသည်။

“မြို့အ၀င်မှာ ရှိတဲ့ ဘင်္ဂါလီ ကျေးရွာ တ၀ိုက် မှာတော့ လုံခြုံရေး အပြည့်ချထားတာ တွေ့ရတယ်၊ တမြို့လုံးလည်း လူသွား၊ လူလာ နည်းပါးတာ တွေ့ရပြီး တိတ်ဆိတ်နေတယ်၊ မနေ့က မီးလောင်တဲ့ အထဲမှာတော့ ရခိုင်အိမ်တွေရော ဘင်္ဂါလီလူမျိုး အိမ်တွေလည်း ပါတယ် လို့ သိရတယ်”ဟု ဦးခိုင်ပြည်စိုး က ဧရာဝတီ ကို ပြောသည်။

မောင်တော၊ ဘူးသီးတောင်၊ စစ်တွေ ဒေသများနှင့် ရခိုင်ဒေသတွင်း ဖြစ်ပွားခဲ့သည့် ပဋိပက္ခများ နောက်ပိုင်း တွင် လုံခြုံရေး အခြေအနေများကြောင့် ဈေးများနှင့်ဈေးဆိုင် အများစုကို ပိတ်ထား ခြင်း၊ အရောင်းအ၀ယ် ကန့်သတ်ထားမှုတို့ ရှိပြီး ယခုအခါ ခိုးမှု၊ လုယက်မှု တချို့ ဖြစ်ပေါ်နေ ကြောင်း ဒေသခံ များက ပြောသည်။

ပဋိပက္ခကြောင့် ဒုက္ခရောက်နေကြသည့် ဒေသခံ ရခိုင်တိုင်းရင်းသားများ၊ ဘင်္ဂါလီလူမျိုးများ ၏ စားဝတ်နေရေး ကိစ္စကို မျှတစွာ ဆောင်ရွက်ပေး နေကြောင်း၊ ဘင်္ဂါလီလူမျိုးများ အတွက်လည်း နေထိုင်စရာ စခန်းများ၊ နေအိမ်များ ဆောက်လုပ်ပေး နေကြောင်း ပြည်နယ် အစိုးရ အာဏာပိုင်များက ပြောကြားသော်လည်း ပြည်ပအခြေစိုက် ရိုဟင်ဂျာအဖွဲ့များက မူဆလင်ဒုက္ခသည်များအနေဖြင့် စားရေရိက္ခာ မလောက်ငှဖြစ်နေကြောင်း ဆိုသည်။

ရခိုင်ဒေသတွင်း အခြေအနေသည် လုံးဝ တည်ငြိမ်အေးချမ်းမှု ရနေပြီဟု ပြည်နယ်အစိုးရ က ပြောဆိုနေပြီး အကြမ်းဖက်မှု စတင်ခဲ့သည့် မောင်တော၊ ဘူးသီးတောင် မြို့နယ်များမှအပ ကျန်ဒေသ များ၏ စာသင်ကျောင်းများ၊ တက္ကသိုလ်များ ပြန်လည်ဖွင့်လှစ်နေပြီ ဖြစ်ကာ စစ်တွေ တက္ကသိုလ်(ပင်မ)အား ယနေ့ စတင်ဖွင့်လှစ်ကြောင်း သိရသည်။

Ref: ဧရာဝတီ

Read More...

ကျောက်တော်မြို့နယ် ဆူပူမှု လူသေဆုံး

2012-08-06

ရခိုင်ပြည်နယ် စစ်တွေမြို့နဲ့ မိုင် (၈၀) ကျော် ကွာဝေးတဲ့ ကျောက်တော် မြို့နယ်က မူဆလင် အိမ်ခြေ အများဆုံး ရှိတဲ့ ကျေးရွာ (၃) ရွာ မနေ့က မီးရှို့ ခံခဲ့ရပြီး သေဆုံးသူ တချို့ ရှိခဲ့တယ်လို့ စုံစမ်း သိရှိရပါတယ်။ ဘင်္ဂါလီ ရိုဟင်ဂျာတွေနဲ့ ရခိုင် တိုင်းရင်းသားတွေ အကြား မနေ့က ဖြစ်ပွားခဲ့တဲ့ အကြမ်းဖက်မှုတွေကြောင့် သေဆုံးသူ ၃ ဦး နဲ့ ဒဏ်ရာရသူ ၅ ဦး ရှိတယ်လို့ အမည် မဖော်လိုတဲ့ အစိုးရ အရာရှိ တစ်ဦးကို ကိုးကားပြီး အေအက်ဖ်ပီ သတင်းမှာ ဒီကနေ့ ဖော်ပြပါတယ်။

ဒီကနေ့ နေလည်ပိုင်းမှာလည်း နောက်ထပ် ရွာတစ်ရွာ မီးရှို့ ခံခဲ့ရတယ်လို့ ကျောက်တော် ဒေသခံ တစ်ဦးက RFA ကိုပြောပါတယ်။

"နောက်ဆုံး အခြေအနေက ဒီနေ့နေ့လည် ၁၁ နာရီမှာ ကျွန်တော်တို့ ရွာညာရွာ ဆိုတာ အိမ်ခြေ ၁၁၀၊ ၁၃၀ လောက်ပဲ ရှိတဲ့ ရွာပါ။ ရွာသေးသေးလေးပါပဲ။ ဒါပေမဲ့ သူ့ပတ်ခြာလည်မှာတော့ ရခိုင်ရွာတွေပေါ့နော်။ အဲဒီရွာကို နေ့လည် ၁၁ နာရီမှာ မီးရှို့တယ်ဗျ။ မီးရှို့တော့ အခု ၁ နာရီခွဲလောက်မှာ အကုန်လုံး တစ်အိမ်မှ မကျန် အကုန်လုံး ပါသွားခင်ဗျ။ အားလုံးကလည်း ကစဥ့် ကလျားနဲ့ သွေးပျက်ပြီး ထွက်ပြေးနေရတဲ့ အချိန်ဆိုတော့ ကျွန်တော်တို့ တိတိကျကျတော့ မသိရသေးဘူးဗျ။ ဒါပေမဲ့ ဖြစ်ဖြစ်ခြင်း အပေါက်ဝ ဆိုတဲ့ မြို့မှာ၊ အပေါက်ဝ ဆိုတာ ဒါဒုတိယအကြိမ် မီးရှို့ခံရတာပါ။ ပထမ တစ်ကြိမ်က ၁၅ ရက် ၆ လမှာ တစ်ကြိမ်လောင်ပြီးတော့ ၄၆ အိမ် ပါပြီးပြီ။ ဒုတိယ တစ်ကြိမ် ထပ်လောင်တာက အဲဒီမှာ အိမ် ၅၀ ကျော်ပါတယ် ပြောတယ် ထပ်ပြီးတော့၊ နောက်ထပ် အဲဒီမှာ လူ ၄ ယောက်သေတယ် ပြောပါတယ်ဗျ။ အမျိုးသား ၃ ယောက်၊ အမျိုးသမီး ၁ ယောက်"

ရခိုင်ပြည်နယ် ကျောက်တော်မြို့နယ်မှာ မနေ့ကဖြစ်ပွားခဲ့တဲ့ ပဋိပက္ခတွေ အတွင်း ဒဏ်ရာရသူ (၂) ဦး ရှိပြီး အသေ အပျောက် စာရင်းကို မရရှိသေးကြောင်း ရခိုင်ပြည်နယ် အစိုးရအဖွဲ့ သတင်းပြန်ကြားရေး တာဝန်ခံ ဦးဝင်းမြိုင်က RFA ကိုပြောပါတယ်။

"ကျောက်တော်မြို့နယ် အခု ဖြစ်တာတော့ ဟုတ်တယ်ဗျ။ ဒါပေမဲ့ ဘယ်သူရှို့တယ် ဆိုတာ စုံစမ်းတုန်း ရှိနေသေးတယ်။ အသေ အပျောက်တော့ မကြားသေးဘူး ခင်ဗျ။ ဒဏ်ရာရတာတော့ ကြားတယ်ခင်ဗျ။ အတိအကျတော့ ကျွန်တော်တော့ မသိသေးဘူး။ အဲဒီမှာ မီးရှိူ့တာ ဘယ်သူ ရှို့မှန်းကို မသိသေးဘူး ဖြစ်နေတယ် အခုက၊ ရခိုင် အိမ်တွေရော၊ ကုလား အိမ်တွေရော ဆိုတော့လေ။ ကျွန်တော်တို့ အခုသိရတာက ဒဏ်ရာရတာ နှစ်ယောက်လို့ ကြားပါတယ်"

ရခိုင်တိုင်းရင်းသားများ တိုးတက်ရေးပါတီ ရခိုင်ပြည်နယ် လွှတ်တော် ကိုယ်စားလှယ် ဦးအောင်မြကျော် ကတော့ ပြည်နယ် အစိုးရနဲ့ ပြည်ထောင်စု အစိုးရကြား ပူးပေါင်းဆောင်ရွက်မှုတွေ ပိုပြီး လိုအပ်လာတယ်လို့ ပြောပါတယ်။

"တချို့ကဏ္ဍတွေမှာက ပြည်နယ်အစိုးရရဲ့ လုပ်ပိုင်ခွင့်က ရှိတယ်လို့ မတွေ့ရဘူး။ အပေါ်ကပဲ အဲလိုမျိုး ဆင်းလာတယ်။ ဒီပြည်နယ်မှာ ပြည်နယ်နဲ့ ပတ်သက်တဲ့ အခြေအနေ အတိုင်း အတာကို ပြည်နယ် အစိုးရက အများသိပါတယ်။ အဲဒီအချိန်မှာ သူတို့ရဲ့ လုပ်ပိုင်ခွင့်က လုပ်ချင်တဲ့ ကဏ္ဍတွေ၊ ဖြစ်ချင်တဲ့ ကဏ္ဍတွေပေါ့၊ လုပ်ပိုင်ခွင့် မရဘဲ အဲဒီအပေါ်လို့ခေါ်တဲ့ ပြည်ထောင်စု ဝန်ကြီးတွေက လာတယ်။ ဒု ဝန်ကြီးတွေက လာတယ်။ အဲတာတွေ command ပေးတဲ့ အောက်မှာပဲ လုပ်နေရတဲ့ သဘောမျိုး ဆိုတော့ အဲတာ တိုင်ပင်မှု ကဏ္ဍတွေက ဒီဘက်က အခြေအနေတွေကို အမှန်တကယ် အောက်ခြေအထိ လေ့လာမှုမရှိပဲ အပေါ်ကပဲ command ပေးနေတဲ့ ကဏ္ဍတွေမှာ အဲဒီလိုမျိုး ဖြစ်လာတဲ့ အတိုင်းအတာမှာ အဓိကရုဏ်းက ပြီးသွားမှာ မဟုတ်ဘူး။ တခြားမြို့ တွေကိုလည်း ကူးဆက်သွားမဲ့ အတိုင်းအတာမျိုးကိုတော့ မြင်နေရတယ်"

ကျောက်တော်မြို့နယ် အပေါက်ဝ၊ ဂုတ်ဘီထောင့်၊ ရွှေလှိုင်နဲ့ တောင်ပေါက် စတဲ့ကျေးရွာတွေမှာ မနေ့က သြဂုတ်လ (၅) ရက်နေ့ နေ့လည်ပိုင်းက စတင်ပြီး ဒေသခံ ရခိုင် တိုင်းရင်းသားတွေနဲ့ ဘင်္ဂါလီ ရိုဟင်ဂျာတွေ အကြား ပဋိပက္ခတွေ ဖြစ်ပွားခဲ့ပြီး အပြန်အလှန် နေအိမ် မီးရှို့မှုတွေ ဖြစ်ပေါ်ခဲ့ပါတယ်။ ဒေသခံ ရခိုင် တိုင်းရင်းသားတွေနဲ့ ဘင်္ဂါလီ ရိုဟင်ဂျာတွေ ဂျင်ကလိတွေ၊ လေးဂွတွေနဲ့ အပြန်အလှန် ပစ်ခတ်မှုတွေ ဖြစ်ပေါ်ရာကနေ စတင်ခဲ့တာ ဖြစ်တယ်လို့ ဒေသခံတွေက ပြောပါတယ်။

မနေ့က နေ့လည် (၁) နာရီခန့်မှာ အဲဒီလို နေအိမ်မီးရှို့မှုတွေကြောင့် အိမ်ခြေ (၁၀၀) ခန့်ရှိတဲ့ ကျောက်တော်မြို့နယ် ဂုတ်ဘီထောင် ကျေးရွာမှာလည်း နေအိမ် (၅၃) လုံးခန့် မီးလောင် ပျက်စီးဆုံးရှုံး သွားတယ်လို့ ဂုတ်ဘီထောင် ကျေးရွာသား တစ်ဦးဖြစ်သူ ကိုမျိုးထွန်းလှိုင်က RFA ကိုပြောပါတယ်။

ဒါ့အပြင် မနေ့က နေ့လည် (၂) နာရီခန့်အချိန်က အိမ်ခြေ (၁၀၀၀) ကျော်ခန့်ရှိတဲ့ အပေါက်ဝ ကျေးရွာမှာ ရခိုင်နဲ့ ဘင်္ဂါလီနေအိမ် (၂၅) အိမ်ခန့် မီးလောင် ဆုံးရှုံးခဲ့ပြီး ရွှေလှိုင်ကျေးရွာမှာ အိမ်ခြေ (၁၀၆) လုံးခန့် မီးလောင် ပျက်စီး ဆုံးရှုံးခဲ့တယ်လို့ သိရပါတယ်။

အခုလို ဒေသခံ ရခိုင်တိုင်းရင်းသားတွေနဲ့ ဘင်္ဂါလီ မူဆလင်တွေ ပဋိပက္ခတွေ အပြန်အလှန် ဖြစ်ပွားနေတဲ့ အချိန်မှာ အပေါက်ဝကျေးရွာ မှာတော့ အာဏာပိုင်တွေနဲ့ စစ်တပ်က အချိန်မီ ထိန်းသိမ်း ခဲ့ပေမယ့် ဂုတ်ဘီထောင် ကျေးရွာမှာတော့ အာဏာပိုင်တွေက အခင်းဖြစ်ပြီး (၃) နာရီလောက် အကွာမှာ ရောက်ရှိလာတဲ့ အတွက် မီးလောင်ဆုံးရှုံးမှု ပိုမို များပြားခဲ့တယ်လို့ သိရပါတယ်။

ဒီကနေ့မှာတော့ ကျောက်တော်မြို့မှာ အခြေအနေတွေ တင်းမာလျက်ရှိနေပြီး လုံခြုံရေးတွေကို တင်းကျပ်စွာ ချထားတယ်လို့ သိရပါတယ်။

Ref: RFA News

Read More...

လူမျိုး ဘာသာ မခွဲခြားဖို့ ပြင်သစ်အစိုးရတိုက်တွန်း

2012-08-06

လူမျိုးဘာသာ အဆင့်အတန်း မခွဲခြားဘဲ အရပ်ဘက် တိုင်းရင်းသား အားလုံးကို ကာကွယ် စောင့်ရှောက်မှုပေးဖို့ ပြင်သစ်နိုင်ငံ အစိုးရက မြန်မာ အစိုးရကို တိုက်တွန်း လိုက်ပါတယ်။ ရခိုင်ပြည်နယ်မှာ ဘင်္ဂါလီ ရိုဟင်ဂျာတွေနဲ့ ရခိုင် တိုင်းရင်းသားတွေ အကြမ်းဖက်မှု ထပ်မံ ဖြစ်ပွားတဲ့ သတင်းတွေ မနေ့က ထွက်လာပြီးတဲ့နောက် အဲဒီလို တိုက်တွန်း လိုက်တာပါ။

မြန်မာနိုင်ငံမှာ အမျိုးသား ရင်ကြားစေ့ရေး အောင်မြင် ထမြောက်ဖို့ တိုင်းရင်းသား ပြဿနာတွေကို ငြိမ်းချမ်းတဲ့ နည်းနဲ့ ပူးပေါင်း အဖြေရှာဖို့ အထူးတလည် အရေးကြီးတယ်လို့ ပြင်သစ်နိုင်ငံခြားရေး ၀န်ကြီးဌာန ဒု-ပြောခွင့်ရသူ Floreani က ပြောကြားပါတယ်။

ရခိုင်ပြည်နယ်က မူဆလင်တွေဟာ ဘယ်လို အခြေအနေ အဆင့် အတန်းမျိုးမှာ ဖြစ်နေပါစေ၊ လူ့အခွင့်အရေး လေးစား လိုက်နာတဲ့ အနေနဲ့ သူတို့ကို နိုင်ငံသားအဖြစ် အသိမှတ်ပြုခံပိုင်ခွင့်နဲ့ ပတ်သက်ပြီး ရှင်းရှင်း လင်းလင်း လုပ်ဖို့ ပြင်သစ်နိုင်ငံခြားရေး ၀န်ကြီး ဌာနက တိုက်တွန်းပါတယ်။

အရပ်သားတွေအပေါ် လုံခြုံရေးတပ်ဖွဲ့တွေရဲ့ အကြမ်းဖက် လုပ်ရပ်နဲ့ ပတ်သက်တဲ့ သတင်းတွေ ပေါ်ထွက်နေတာကို စိုးရိမ်မကင်း ဖြစ်ရတယ်လို့လည်း ဆိုပါတယ်။ အဆင့်အတန်း မခွဲဘဲ အရပ်သား အားလုံးကို ကာကွယ် စောင့်ရှောက်ဖို့နဲ့ ဖြစ်ရပ်တွေကို စုံစမ်း စစ်ဆေးဖို့ မြန်မာ အာဏာပိုင်တွေကို တိုက်တွန်း လိုက်ပါတယ်လို့ ပြင်သစ်နိုင်ငံခြားရေး ၀န်ကြီးဌာန ဒု-ပြောခွင့်ရသူ Floreani က ပြောသွားပါတယ်။

Ref: RFA News

Read More...

Monday, August 6, 2012

အငြိမ်းစားဗိုလ်ချုပ်ကြီး သူရဦးတင်ဦး၏ စစ်မှုထမ်း ဘ၀ ရခိုင်ပြည်နယ် အတွေ့ အကြုံ (အပိုင်း - ၁)

ဦးရော်နီညိမ်း
01.08.2012

အမျိုးသားဒီမိုကရေစီအဖွဲ့ချူပ်ရဲ့ နာယက တစ်ဦးဖြစ်တဲ့ မြန်မာ့ တပ်မတော်ရဲ့ စတုတ္ထမြောက် ကာကွယ်ရေး ဦးစီးချုပ် အဖြစ် တာဝန် ထမ်းဆောင်ခဲ့သူ အငြိမ်းစား ဗိုလ်ချုပ်ကြီး သူရ ဦးတင်ဦးကို ၁၉၄၈ လွတ်လပ်ရေး ရခါနီး အချိန်က စတင် ခဲ့တဲ့ ရခိုင်ပြည်နယ်ရဲ့ မတည်မငြိမ် အခြေအနေတွေနဲ့ ရခိုင်ပြည်နယ်မှာ သူ တာဝန် ထမ်းဆောင်စဉ်က အတွေ့အကြုံ တွေကို ဦးရော်နီညိမ်း က မေမြန်းဆွေးနွေးပြီး ဒီသီတင်းပတ်ရဲ့ “တပ်မှူးတပ်သား ပြောစကား” ကဏ္ဍကို တင်ဆက် လိုက်ပါတယ်။

ဦးတင်ဦး ။ ။ အဲဒီတုန်းက ဒီလို ဖြစ်တာဗျ။ ကျနော်တို့ လွတ်လပ်ရေး ရခါနီး အချိန်လောက်မှာ ပြဿနာလေးတွေ ပေါ်လာတာက ကျနော် တို့နဲ့ အတူ တပြိုင်နက်တည်း အိန္ဒိယကလည်း လွတ်လပ်ရေး ရခဲ့တယ်။ အိန္ဒိယက သိတဲ့ အတိုင်း မစ္စတာဂျင်းနား (ပါကစ္စတန် လွတ်လပ်ရေးခေါင်းဆောင် မိုဟာမက်အ လီဂျင်းနား Muhammad Ali Jinnah) တို့က မဟတ္တမဂန္ဓီ (Mahatma Gandhi) တို့၊ နေရူး (Jawaharlal Nehru) တို့ (အိန္ဒိယ လွတ်လပ်ရေး ခေါင်းဆောင် များ) ကို တိုင်းပြည်ခွဲထွက်မယ်လို့ တောင်းဆိုတော့ မဟတ္တမဂန္ဓီတို့၊ နေရူးတို့က သဘောမကျဘူးပေါ့။ သို့သော်လည်း မစ္စတာ ဂျင်းနားတို့က ပါကစ္စတန်ဆိုပြီး လုပ်ချင်တယ် ဆိုတော့ နောက်တော့ သူတို့ ခွဲပေးလိုက်ရတော့ အရှေ့ပါကစ္စတန် (East Pakistan)နဲ့ အနောက်ပါကစ္စတန် (West Pakistan) ဆိုပြီး ဖြစ်သွားတာပေါ့။

“အဲဒီအချိန်မှာ ကျနော်တို့ဘက်ကလည်း နတ်မြစ် (Naff River) ဆိုတာက ဟိုဘက်က ဒီဘက်ကိုကူး၊ ဒီဘက်က ဟိုဘက်ကိုကူး၊ ဥဒဟို ၀င်ထွက်သွား လာနေတာကိုး။ ဘာဖြစ်လို့လဲ ဆိုတော့ ကျနော်တို့ အားလုံးက အင်္ဂလိပ်ရဲ့ ကျွန်နိုင်ငံ၊ ကျွန်သားတွေကိုး ဗျ။ အဲဒီတော့ ကူးကြသွားကြနဲ့ ဒါတွေက ကူးလူးဆက်ဆံမှုတွေက ရှိနေတာကိုး။ အဲဒီအချိန်မှာ စစ် (ဒုတိယကမ္ဘာစစ်) ကလည်း ပြီး သွားပြီ ဆိုတော့ စစ်နဲ့ အတူ ပါလာတဲ့ ဘင်္ဂါလီ အလုပ်သမားတို့ ဘာတို့ စသည်ဖြင့် ပါလာကြတာတွေက ဒီဘက်ကို တော်တော် များများရောက်လာ ကြပြီးတော့ ဒီဘက်မှာပဲ နည်းနည်းပါးပါး ကျန်ရစ် ခဲ့ကြတာတွေ ရှိကောင်း ရှိခဲ့ပါတယ်။

“အဲဒီတုန်းက အဲဒီဒေသနေရာမှာ ဘူးသီးတောင် မောင်တောဒေသမှာတော့ ရခိုင်ရွာတွေ တော်တော် များများ ရှိကြတယ်။ အဲဒီတော့ ၀င်လာတာတွေက မသိသာဘူးပေါ့။ အဲဒီလို ဖြစ်ခဲ့တယ်ပေါ့။”

ဦးရော်နီညိမ်း ။ ။ အန်ကယ့်ကို တစ်ခု မေးကြည့်ချင်တာက အင်္ဂလိပ်ကနေပြီးတော့မှ ဂျပန်ကို ပြန်တိုက်ဖို့ အတွက် သူတို့ (ဘင်္ဂါလီ) တွေကို လက်နက်တ ပ်ဆင်ပြီးတော့မှ မြန်မာနိုင်ငံ ထဲကို လွှတ်လိုက်တယ်။ အန်ကယ်တို့ရဲ့ ဖက်ဆစ် တော်လှန်ရေး ဗမာ့ တပ်မတော်နဲ့ ပေါင်းပြီး တိုက်ဖို့ (သို့မဟုတ်) အင်္ဂလိပ်တပ်နဲ့ ပေါင်းပြီး တိုက်ဖို့ သဘောနဲ့။ ဒါပေမဲ့ သူတို့တွေက ဂျပန်နဲ့လည်း သေချာ မတိုက်လိုက်ရဘူး၊ လက်နက်တွေနဲ့ ကျန်ခဲ့တယ် ဆိုတဲ့ သဘောလား။ အဲဒါ အန်ကယ် သိသလောက် ပြောပြပေးပါ ခင်ဗျ။

ဦးတင်ဦး ။ ။ ဟုတ်တယ်၊ အဲဒီတုန်းက အရှေ့ပါကစ္စတန်ဆိုပြီး ဖွင့်လိုက်တဲ့ အချိန်မှာ ဒီဘက် က နောင်သော အခါ (ဘင်္ဂါလီ) ခေါင်းဆာင်ဖြစ်မဲ့ ပုဂ္ဂိုလ်တွေက အရှေ့ပါကစ္စတန်နဲ့ တဆက်တည်း တတွဲတည်း မေယုမြစ် (Mayu River) ရဲ့ အနောက်ဘက် မှာ မေယုနယ်ပေါ့၊ မေယု နယ်ဆိုတာ ဘူးသီးတောင် မောင်တော ပါပဲ။ အဲဒီမေယုနယ်ကို district (ခရိုင်) တစ်ခုအနေနဲ့ အရှေ့ပါကစ္စတန် ထဲကို ပါစေချင်တဲ့ သဘောရှိတယ်။ အဲဒီအတွက် ပြောတာ ဆိုတာတွေတော့ ရှိတယ်။ ဒါပေမဲ့လည်း မစ္စတာ ဂျင်းနားတို့ (ပါကစ္စတန်) ခေါင်းဆောင်တွေ အားလုံးက ဒီဘက် (အရှေ့ပါကစ္စတန်နဲ့ ဆက်စပ်နေတဲ့ မြန်မာနိုင်ငံ ဘက်ခြမ်း) နဲ့ ပတ်သက် တာတွေကို လုံးဝ စိတ်ပါဝင်စားခြင်း မရှိဘူး။ နောက်ပြီးတော့ ဒါနဲ့ ပတ်သက်လို့ ကင်းကင်းရှင်းရှင်း ပြတ်ပြတ်သားသား နေလိုက်တယ်။

သို့သော်လည်းပဲ ဒီဘက်မှာက ခုနက ကျန်ရစ်ခဲ့ တဲ့ လက်နက်တွေနဲ့ ပတ်သက်တာတွေ၊ အရင်တုန်းက (ဂျပန် ကိုတိုက်ဖို့ လွှတ်လိုက်တဲ့) ဒီဘက်ကို Bengal (ဘင်္ဂလား) ဘက်ကနေ ပါလာတဲ့သူ (ဘင်္ဂါလီ) တွေကလည်း ရှိနေကြတော့ သူတို့က ဆက်ပြီးတော့ မေယုကမ်းခြေ၊ မေယုမြစ်ရဲ့ အနောက်ဘက် ကမ်းကို သူတို့က စိုးမိုး ထားရမယ် ဆိုပြီးတော့၊ မူဂျာဟစ်ဒင် (အာရဗီ (Arabic) ဘာသာစကားနှင့် ဘာသာရေးအရ ခုခံ စစ်ပွဲ ဆင်နွှဲသူ တစ်ဦး တစ်ယောက်အား မူဂျာဟစ် (Mujahid)၊ တစ်ယောက်ထက်မက အများဆိုလျှင် မူဂျာဟစ်ဒင် Mujahidin, Mujahedeen) ဆိုပြီးတော့၊ မူဂျာဟစ်တွေ ပေါ်ပေါက် လိုက်တာပေါ့။

အဓိပ္ပာယ်ကတော့ အဲဒီမှာရှိတဲ့နယ်မြေနဲ့ ဆက်စပ်ပြီးတာ့ မေယုနယ် ဆိုတာကို ထူထောင်ချင်တဲ့ သဘောတွေ ရှိတယ်။ အဲဒီ အခါကျတော့ နိုင်ငံရဲ့ အချုပ်အခြာ ကို ထိခိုက် လာတာက တစ်ကြောင်း၊ အဲဒီဟာက အန္တရာယ်လည်း ကြီးမားနေတာက တစ်ကြောင်း၊ ဗိုလ်ချုပ်ကျော်ဇော (ယခု တရုတ်နိုင်ငံ တွင် နေထိုင်သည့် ဗမာပြည် ကွန်မြူနစ် ပါတီ၏ခေါင်းဆောင် တစ်ဦးဖြစ်သူ ရဲဘော် သုံးကျိပ်ဝင် အငြိမ်းစား ဗိုလ်မှူး ချုပ်ကျော်ဇော) ခေါင်းဆောင်တဲ့ ဗမာ့သေနတ်ကိုင် တပ်ရင်း (၅) (သနက ၅) က သွားပြီးတော့ ဒီမူဂျာဟစ်တွေကို နှိမ်နင်း တိုက်ခိုက်ချေမှူန်း လိုက်ရတယ်။

ဒီ သနက (၅) အတွက် လိုအပ်တဲ့ စစ်သည်အင်အားကို စစ်ရေးလေ့ကျင့်မှု အတွက် မေမြို့(ပြင်ဦးလွင်) မှာရှိတဲ့ training depot (BATD – Burma Army Training Depot) လေ့ကျင့်ရေး တပ်မှာ လေ့ ကျင့်ပေးပြီးတော့ သူတို့ကို မြန်မြန်ကျောင်းဆင်းပေးပါလို့ ပြောတဲ့ အတွက် အဲဒီ train (လေ့ကျင့်ရေး) လုပ်နေကြတဲ့ အထဲက တပ်ခွဲနှစ်ခွဲကို လေယာဉ်ပျံနဲ့ အဲဒီတုန်းက အင်ဒိုနီးရှားက လာတဲ့ (သယ်ယူပို့ဆောင်ရေး) Zero Zero One လေယာဉ်ကြီးတွေ ကက်သရင်းနား (Katherina) လေယာဉ်ကြီးတွေနဲ့ ကျနော်တို့က ခူသယ်ခေါက် သယ် (ရခိုင်ပြည်နယ်ကို) ပို့တယ်။ ကျနော်ကိုယ်တိုင် ပို့ရတယ်။ ကျနော်ကိုယ်တိုင်ပဲ ဒီလေယာဉ်တွေ အပေါ်မှာ လိုက်ပြီးတော့ နေ့ချင်းပြန် ချက်ချင်းပို့ဖူး တယ်။

ဦးရော်နီညိမ်း ။ ။ အဲဒီ သွားတိုက်တဲ့ တပ်ရင်း(သနက ၅) ထဲက ထင်ရှားတဲ့သူတွေ ပြောပြပါလား ခင်ဗျ။

ဦးတင်ဦး ။ ။ ဦးလွင် (ကွယ်လွန်သူ အမျိုးသားဒီမိုကရေစီအဖွဲ့ချုပ် အတွင်းရေးမှူး အငြိမ်းစား ဗိုလ်မှူးကြီး မောင်လွင်) ပါတယ်။ ဦးကြည်မောင် ပါတယ်။။ သူတို့တပ်ရင်းမှူးက ဒုတိယဗိုလ်မှူးကြီး ကင်မ်ပက်က်နက် (Lt. Colonel Campecgnec)။ ဦးကြည်မောင်က Major (ဗိုလ်မှူး)ကြည်မောင် 2 IC (Second-in-Command ဒုတပ်ရင်းမှူး) ဗျ။ Captain (ဗိုလ်ကြီး)မောင်လွင် တို့ကတော့ သူတို့အောက်က တပ်ခွဲမှူးတွေ။ နောက်တစ်ယောက်က နောက်ပိုင်း အင်းစိန် တိုက်ပွဲမှာ ကျသွားတဲ့ ဂျပန်ခေတ် စစ်တက္ကသိုလ်က ဆင်းလာတဲ့ ဗိုလ်လှသောင်း (ဗိုလ်မှူးလှသောင်း)။ သူတို့ ပါကြတယ်။ (မေဂျာကြည်မောင် = ၁၉၉၀ ရွေးကောက်ပွဲ ကာလ အမျိုးသား ဒီမိုကရေစီ အဖွဲ့ချုပ် ဥက္ကဋ္ဌ ကွယ်လွန်သူ အငြိမ်းစား ဗိုလ်မှူးကြီး ကြည်မောင်)

ဦးရော်နီညိမ်း ။ ။ သူရဦးထွန်းတင်(၁၉၈၈ စက်တင်ဘာ ၁၈ ရက်နေ့ စစ်အာဏာ သိမ်းချိန်က မြန်မာ့ ဆိုရှယ်လစ် လမ်းစဉ်ပါတီ အစိုးရ၏ ၀န်ကြီးချုပ် အငြိမ်းစား ဗိုလ်မှူးကြီး သူရ ထွန်းတင်) လည်းပါတယ်။ သူရေးတဲ့ (ကျနော် ကျင်လည် ခဲ့ရသော မြန်မာနှင့်ကမ္ဘာ)စာအုပ်မှာ ပါတယ်။

ဦးတင်ဦး ။ ။ ဟုတ်တယ်။ ဦးထွန်းတင်က အဲဒီတုန်းက Captain ။ ဦးထွန်းတင်လည်း ပါမယ်။ ဘာကြောင့်လဲ ဆို တော့ သူကလည်း သနက (၅) ကပဲ။ အဲဒီတုန်းက ဒီသနက(၅) တပ်ရင်း တစ်ရင်းလုံးပဲ (မူဂျာဟစ်တွေကို) သွားတိုက် ခဲ့ပါတယ်။ အောင်အောင်မြင်မြင်ပဲ တိုက်နိုင်ခဲ့ပါတယ်။ တပ်က ရဲဘော်တွေဆိုတာက သိတဲ့ အတိုင်းပဲ၊ ဖက်ဆစ် တော်လှန်ရေး တုန်းကကော၊ BDA (Burma Defence Army - ယခင် ဗမာ့ လွတ်လပ်ရေး တပ်မတော် (Burma Independence Army – BIA) ကို ဂျပန်ခေတ်တွင် BDA ဟု ပြောင်းလဲဖွဲ့စည်း) တုန်းကကော ပါလာကြတဲ့သူတွေ။ သူတို့ကို စစ်ရေး လေ့ကျင့်ခန်းတွေ ကျနော်တို့က ပေးပြီးမှ ရခိုင်ကို လွှတ်ခဲ့တာ ဆိုတော့ သူတို့က စစ်ရေးစစ်သွေး စစ်ရည် ၀နေပြီးသားတွေ။

လေ့ကျင့်ပေးလိုက်တဲ့ ဒီစစ်သည်တွေကို ကျနော်တို့က ကမန်းကတန်း ကျောင်းဆင်းပေးလိုက် ရတာဗျ။ သူတို့ကို ကျောင်းပြီးအောင် (၆) လ (၇) လ သင်တန်း မပေးလိုက်ရဘူး။ သုံးလေးလလောက်နဲ့ သင်တန်းပေးပြီး ကျမ်းသစ္စာ ကျိန်ဆိုပြီးတာနဲ့ ချက်ချင်း လေယာဉ်နဲ့ ပို့လိုက်ရတာ။ တောက်လျှောက် ရခိုင်ပြည်နယ်ကို ပို့လိုက်ရတာ။ (ဗမာ့တပ်မတော်ကို ဒုတိယကမ္ဘာစစ် အပြီး ပြန်လည် ဖွဲ့စည်းသော အခါ အရာရှိနှင့် စစ်သည် အားလုံး ဗြိတိသျှ စစ်တပ်၏ အခြေခံ စစ်သင်တန်းမှ စ၍ ပြန်တက်ကြရပြီး၊ စစ်သည်များမှာ အခြေခံ စစ်သင်တန်း ပြီးဆုံးလျှင် တပ်သားသစ်များ အဖြစ် ကျမ်းသစ္စာ ကျိန်ဆိုကြရသည်။)

အဲဒီတုန်းက တိုက်ပြီးပြန်လာကြတဲ့သူတွေ ပြောပြတာက မူဂျာဟစ်တွေကို ကာဆင်ကြီး ဆိုတဲ့ ပုဂ္ဂိုလ် က အုပ်ချုပ် တယ်။ ကာဆင်ကြီး တိုက်ပွဲမှာ ကျသွားတော့၊ မူဂျာဟစ်တွေ အစိပ်စိပ် အမွှာမွှာ အကွဲကွဲ အပြားအပြား ဖြစ်ပြီးတော့မှ နောက်ထပ်ခေါင်းဆောင် ကာဆင်လေး ဆိုတာ ပေါ်လာတယ်တဲ့။ နောက်ပိုင်းမှာ ကျနော်တို့ ဆက်ပြီး တိုက်ရတာကတော့ ကာဆင်လေးကနေ ပေါက်ဖွားလာတဲ့ မွေး ထုတ်ထားတဲ့ စူရစ်အာမက်တို့ စူရတန်မောက်တို့။ ဒီ နောက်ပေါက် ခေါင်းဆောင်တွေနဲ့ ကျနော် ရခိုင် တပ်ပေါင်းစုမှူး ဖြစ်လာတော့ နည်းနည်းပါးပါး ပြောက်တိပြောက်ကျား တွေ့ရပြန်သေးတယ်။

ဒါပေမယ့်လို့ အရှေ့ပါကစ္စတန်နဲ့ ကျနော်တို့နဲ့ နတ်မြစ် (Naff River) ကို အကြောင်းပြုပြီး ပြဿနာဖြစ် လို့ တိုက်ကြရတဲ့ အချိန်မှာ ခြေမြန်တပ်ရင်း(၄) နဲ့ ခြေမြန်တပ်ရင်း (၅) က လာပြီး ကူညီခဲ့တဲ့ အတွက်ကြောင့် (ဘူးသီးတောင်မောင်တော) မြောက်ဘက် အခြမ်းမှာ မူဂျာဟစ် ခိုအောင်းနေတာကို တိုက်မယ် ဆိုပြီးတော့ ဂုတ်ပိတံတား မြောက်ဘက်ခြမ်း တော်တော် လှမ်းလှမ်းမှာ တော်တော်လေး လိုက်တိုက်လိုက်တာ့ အဲဒီ မူဂျာဟစ် နောက်ဆုံး အသုတ်ကို ကျနော်တို့ အပြတ်ကို ချပစ်လိုက်တယ်။

အဲဒီမှာ မူဂျာဟစ် လေးဆယ်ကျော် ငါးဆယ်လောက် သေတယ်။ နောက်ပြီးတော့ လက်နက်တွေ ရလိုက်တယ်။ အဲဒီတုန်းက သတင်းကြားလို့ အဲဒီတောင်ကျောပေါ်က ဖြတ်ပြီးတော့ လက်နက်ကိုင် အဖွဲ့အစည်းတွေ ရောက်နေတယ် ကြားလို့ သွားတိုက်တာ။ ကျနော့်မှာ အခွင့်အရေး ကောင်း တစ်ခု ရတာက၊ ခြေမြန်တပ်တွေက ရောက်နေတဲ့ အချိန်မှာ နယ်စပ်မှာ ဖြစ်နေတဲ့ ကိစ္စတွေကလည်း (နယ် နိမိတ်) တိုင်းဖို့ထွာဖို့ သဘောတူ ပြီးဆုံးဖြတ်လိုက်တော့၊ ဒီတပ်တွေကို ပြန်ပို့ရမယ့်အစား မပို့ခင်မှာ အဲဒီ ဂုတ်ပိ တံတားရဲ့ မြောက်ဘက်ခြမ်း၊ ဂုတ်ပိတံတားဆိုတာက ဘူးသီးတာင် မြောက်ဘက်ကို တက်သွားတဲ့အခါ တောင်ဘဇား၊ တောင်ဘဇား ပြီးရင် ဂုတ်ပိတံတား၊ ဂုတ်ပိတံတားပြီးရင် မြောက်ဘက်မှာ ပန်ဇီဘဇား ဆိုတာရှိတယ်။ အဲဒီတောင်ပေါ် တောင် ကျောမှာ သွားတိုက်လိုက်တဲ့ အခါ နောက်ဆုံး အပြတ် ချလိုက်တဲ့အခါ အဲ့ဒီမှာ မူဂျာဟစ်ဟာ ပြတ်ထွက်သွားပြီ။ ပြီးသွားပြီ။

ဦးရော်နီညိမ်း ။ ။ အဲဒါ ဘယ် ခုနှစ်ကလဲ အန်ကယ်။

ဦးတင်ဦး ။ ။ အဲဒါက ကျနော် တပ်ပေါင်းစုမှူးဘ၀၊ ရခိုင်မှာ ဆိုတော့ ၁၉၅၉ ပေါ့။ (၁၉၆၀) ရွေးကောက်ပွဲ မလုပ်ရသေးဘူး။ တပ်တွေကို စစ်ဆေးပြီး ကိုယ့်နယ်စပ်နဲ့ ပတ်သက်တာတွေ ကိုယ်လုံခြုံအောင် လုပ်ကြရမယ် ဆိုတဲ့ အချိန်မှာ နတ်မြစ် (Naff River) တလျှောက်ကို ကျနော်တို့ သွားကြည့်လိုက်တဲ့ အခါမှာ လူတော်တော်များများက ရွာတွေမှာ စာရင်းမရှိ အင်းမရှိ လူတွေ ထပ်ပြုပြီး နေနေကြတာတွေကို ရှင်းရ လင်းရမယ် ဆိုတော့ အဲဒါတွေကို ကျနေယ်တို့က ရှင်း ရ လင်းရတာပေါ့ဗျာ။ ရှင်းရ လင်းရတယ် ဆိုတာက သူတို့နဲ့ ပတ်သက်တာတွေကို စစ်ဆေး၊ မသင်္ကာ ဘွယ်ဖြစ်တဲ့သူ (အရှေ့ပါကစ္စတန်) ဘက်မှ ခိုးဝင် လာသူတွေကို eviction order (မိမိပိုင်နယ်မြေ မှ နှင်ထုတ်သည့် အမိန့်)ပေးရတယ်။

ကျနော် မှတ်မှတ်ရရ မှတ်မိသလောက်ကတော့ (ခိုးဝင်လာသူ) လူ တစ်သောင်း သုံးထောင် ရှစ်ရာ နီးနီးလောက်ကို eviction order နဲ့ မောင်တောမြောက်ဘက်ခြမ်းကနေ တောင်ပြိုတို့လို နေရာတွေမှာ နတ်မြစ်တလျှောက် ဘေးနား ကလူတွေ သိပ်သိပ် သည်းသည်း ဖြစ်နေတဲ့ အပိုင်းနားက လူတွေကို အားလုံး စစ်ဆေးပြီးတော့ အဲဒီ့နောက်ပိုင်းမှာ မှတ်ပုံတင် လုပ်တာပဲဗျ။ မှတ်ပုံတင်ကို စပြီး လုပ်ရတာပဲ။ အဲဒီတုန်းက မှတ်ပုံတင်ဆိုတာ မရှိသေးဘူး။

ဦးရော်နီညိမ်း ။ ။ ဟုတ်ကဲ့၊ မြန်မာနိုင်ငံမှာ ၁၉၅၉ ခုနှစ်မှာ စပြီး အမျိုးသား မှတ်ပုံတင် စပြီးပေါ်ပေါက် ခဲ့တယ်လို့ မှတ်သား ဖူးပါတယ်။

ဦးတင်ဦး ။ ။ ဟုတ်တယ်၊ အဲဒီတုန်းက စပြီး အမျိုးသား မှတ်ပုံတင် စပြီး ဖြစ်လာတာ။ အဲဒါ (eviction order ဆောင် ရွက်ခြင်း) ပြီးသွားပြီး နည်းနည်း အေးအေးဆေးဆေး ဖြစ်သွားတော့မှ ဟိုတုန်းက အခေါ် ရခိုင်တိုင်း အတွက် မှတ်ပုံတင် အရာရှိတွေ (လ၀က -လူဝင်မှု ကြီးကြပ်ရေးနှင့် ပြည်သူ့ အင်အား ဦးစီးဌာန အရာရှိများ) ရောက်လာပြီးတော့ သူတို့ကို ၀ိုင်းပြီး ကျနော်က ကူညီရတာကိုး။

မှတ်ပုံတင်ကိစ္စတွေ မြန်မြန်ဆန်ဆန်ပြီးအောင် နယ်စပ်တွေမှာ တောက်လျှောက် ကျနော် တို့ဆီက တိုက်ရေယာဉ်တို့ စစ်ရေယာဉ် တို့နဲ့ နောက်သူတို့အတွက် ရေယာဉ်တွေကိုလည်း လုံခြုံရေး အကြောင်းပြုပြီး ငှားပြီးတော့ အကုန်လုံးကို မြန်မြန် လုပ်ရတာပဲလေ။

ဦးရော်နီညိမ်း ။ ။ ဟုတ်ကဲ့။ ၁၉၆၀ ရွေးကောက်ပွဲအချိန် ရောက်လာတော့ ရိုဟင်ဂျာကို (၀န်ကြီးချုပ်) ဦးနုကလည်း အသိအမှတ်ပြုခဲ့တယ် ဆိုတဲ့အသံတွေကိုလည်း အခုနောက်ပိုင်း ကျနော်တို့ ကြားကြရပါတယ်။ အဲဒီကိစ္စရဲ့ အရင်းအ မြစ် အစပထမက ဘယ်လိုဖြစ်တာလဲ ဆိုတာကို အန်ကယ် သိသလောက် ရှင်းပြပါ။

ဦးတင်ဦး ။ ။ ဒီလိုဗျ။ အဲဒီအချိန်လောက်အထိက ကျနော်လည်း ရိုဟင်ဂျာ ဆိုတာကို မသိဘူး၊ ကြားလည်း မကြားဖူး ဘူး။ ဒါပေမယ့် ဘယ်လိုဖြစ်သွား ခဲ့သလဲ ဆိုတော့ Caretaker Government (၁၉၅၈-၁၉၆၀ အိမ်စောင့်အစိုးရ) အချိန် မတိုင်ခင်မှာ ၁၉၅၆ ခုနှစ်မှာ ရွေးကောက်ပွဲ တစ်ခေါက် လုပ်ခဲ့တာကိုး။ အဲဒီ ၁၉၅၆ ရွေးကောက်ပွဲမှာ ဘာဖြစ်ခဲ့သလဲ ဆိုတော့ အဲဒီ ဘူးသီးတောင် မောင်တော ကနေ အမတ်လေးယောက် ပေါ်လာခဲ့တယ်။

စူလတန်မာမွတ် ရယ်၊ စူလ တန်အာမက်ရယ်၊ အဘူဘောရှော ရယ်၊ အဘူလခိုက် ရယ်။ ကျနော် သူတို့ နာမည်တွေ ကောင်းကောင်း မှတ်မိတယ်။

စူလတန်မာမွတ်က ဘူးသီးတောင် တောင်ပိုင်း၊ အဘူဘောရှောက ဘူးသီးတောင်မြောက်ပိုင်း၊ စူလတန် အာမက်က မောင်တောတောင်ပိုင်း၊ အဘူလခိုက်က မောင်တောမြောက်ပိုင်း၊ အမတ်တွေ ဖြစ်လာကြတယ်။ သူတို့က ဖဆပလ (၀န်ကြီးချုပ်ဦးနု ဦးဆောင်သည့် အာဏာရ ဖက်ဆစ် ဆန့်ကျင်ရေးပြည်သူ့ လွတ်လပ်ရေး ပါတီ) ထဲကနေ ပါလာကြ တယ်။ ရွေးကောက်ပွဲမှာ ၀င်ပါလာကြတော့………

ဦးရော်နီညိမ်း ။ ။ ဟုတ်ကဲ့ အန်ကယ်၊ တစ်ခုသိချင်တာက အဲဒီတုန်းက အမျိုးသား မှတ်ပုံတင် ဆိုတာ မလုပ်ရသေး ဘူးဆိုတော့၊ အဲဒီအမတ် အရွေးခံ ပုဂ္ဂိုလ်တွေကို မြန်မာနိုင်ငံသား အဖြစ် ဘယ်လိုနည်းနဲ့ အသိအမှတ်ပြုခဲ့ကြသလဲ။

ဦးတင်ဦး ။ ။ အဲဒါက အဲဒီမှာ ဘူးသီးတောင်မောင်တောမှာ ရှိနေတဲ့လူ အားလုံးကို (အာဏာရ ဖဆပလ အစိုးရက) မြန်မာနိုင်ငံသား ဖြစ်တယ်လို့ လုပ်လိုက်တဲ့ အပြင် အဲဒီမှာ ရိုဟင်ဂျာအဖြစ် အသိအမှတ်ပြုပေးဖို့ ပြောလိုက်ကြတာ ကြောင့် ဦးနုက ရိုဟင်ဂျာဆိုတာ ရှိတယ်လို့ ဆိုပြီး ဘာတွေ လုပ်ပေး လိုက်သလဲ ဆိုတော့ ရိုဟင်ဂျာနဲ့ ပတ်သက်လို့ အာရဗီ (Arabic) ဘာသာနဲ့ ထုတ်တဲ့ သတင်းစာတို့၊ အူရဒူ (Urdu) ဘာသာနဲ့ ထုတ်တဲ့ သတင်းစာတို့၊ မြန်မာ့အသံမှာ ရိုဟင်ဂျာနဲ့ ပတ်သက်တဲ့ အစီအစဉ် အခန်းကဏ္ဍ တစ်ခုကို တစ်နေ့ကို ၁၅ မိနစ် လွှင့်ပေးတာတို့ ဖြစ်သွားခဲ့တယ်။ အဲဒီမှာ တော်တော့ကို ဒေါတွေ ကန်ကြနဲ့ ကြီးကြီးကျယ်ကျယ်ကို ပြဿနာတွေ ဖြစ်ကြတယ်။ အဲဒီ့တော့မှပဲ ရိုဟင်ဂျာ ဆိုတာကို တော်တော်ကြားဖူး လိုက်တာပဲ။

ဦးရော်နီညိမ်း ။ ။ ဟုတ်ကဲ့၊ အန်ကယ့်ကို တစ်ခုလောက်တော့ ထပ်ပြီးမေးချင်ပါတယ်။ အဲဒီလို ၁၉၅၆ ခုနှစ်မှာ ဖြစ် လာတော့ ဒါက ဦးနုရဲ့ အရပ်သား အစိုးရက လုပ်တာ။ ၁၉၅၈ ခုနှစ် ဗိုလ်ချုပ်ကြီးနေ၀င်း ဦးဆောင်တဲ့ အိမ်စောင့်အစိုး ရ ပေါ်လာတဲ့ အချိန်ကျတော့ ဒီကိစ္စကို ဘယ်လို သဘောထားပါသလဲ။

ဦးတင်ဦး ။ ။ ကျနော်ကတော့ မြန်မာနိုင်ငံမှာ ရိုဟင်ဂျာ မရှိဘူးဆိုတဲ့ သဘောပဲ ထားတယ်။ ဘာလို့လဲ ဆိုတော့ ရိုဟင်ဂျာဆိုတာ မြန်မာနိုင်ငံမှာ လူမျိုးအနေနဲ့ ပြစရာ မရှိဘူးလေ။

ဦးရော်နီညိမ်း ။ ။ ဒါက အန်ကယ်က အဲဒီအချိန်က ရခိုင် တပ်ပေါင်းစုမှူး အနေနဲ့ သဘောထားတာ။ သို့သော်လည်းပဲ ကျနော် သိချင်တာက အစိုးရအဖွဲ့ တစ်ဖွဲ့လုံး အနေနဲ့ကော သို့မဟုတ် ကာကွယ်ရေး ၀န်ကြီးဌာန အနေနဲ့ကော တရားဝင် ဘယ်လို သဘာထား ပါသလဲ။ အဲဒီ ၁၉၅၈ ခုနှစ် Caretaker Government (အိမ်စောင့်အစိုးရ) အောက်မှာ။

ဦးတင်ဦး ။ ။ ရိုဟင်ဂျာ ဆိုတာ မရှိဘူး။ ဒါပေမယ့် တစ်ခုတော့ ရှိတယ်။ ဘယ်လို လုပ်လိုက်လဲ ဆိုတော့- (၁၉၆၀ ရွေးကောက်ပွဲ အနိုင်ရ ဦးနု၏ သန့်ရှင်း ဖဆပလ (၁၉၆၁ တွင် ပြည်ထောင်စုပါတီ ပထစဟု အမည်ပြောင်း) က ပြန် လည် အာဏာ ရချိန်တွင်) ဦးနုက အဲဒီ subject (ရိုဟင်ဂျာ ကိစ္စ)ကို သူ့ရဲ့ ၀န်ကြီးချုပ်ရုံးရဲ့ subject အဖြစ် ဗဟိုက ကိုင်တွယ်မယ် ဆိုပြီးတော့၊ သူက ယူလိုက်တယ် ခင်ဗျ။ အဲဒီတုန်းက နယ်စပ်ဒေသ(နယ်နိမိတ် တိုင်းထွာရေး) ကိစ္စ တွေနဲ့ ပတ်သက်လို့ ဗိုလ်မှူးကြီးစောမြင့် (ယိမ်းနွဲ့ပါး ) (ယခု မဟေသီမဂ္ဂဇင်း ထုတ်ဝေသူ) တို့က နယ်စပ် စစ်တံခွန် လွှင့်တယ်ဆိုတဲ့ တာဝန်အရ နယ်စပ်ဒေသ(ကချင်ပြည်နယ်ဘက်) တွေဘက်ကို သွားပြီး (နယ်စပ်လုံခြုံရေး) လုပ်ကိုင်ကြရတယ်။ (ဗိုလ်မှူးကြီးစောမြင့်မှ ကချင်ပြည်နယ် နယ်စပ်ဒေသ စစ်တံခွန်လွှင့် ခရီးစဉ်ကို ကလောင်အမည် ယိမ်းနွဲ့ပါး နှင့် ဆောင်းပါးများရေးသား ခဲ့သည်။)

သူတို့အဲဒီလို လုပ်သလို ရခိုင်ဘက်မှာလည်း အလားတူ နယ်စပ် လုံခြုံရေးကို လုပ်ကြရတဲ့ အခါ သူတို့က ဘင်္ဂါလီ မူစလင်တွေ ဆိုတော့ကာ တချို့ကလည်း ရခိုင်မူစလင် ရခိုင် အစ္စလမ်ဆိုပြီး ရှိကြတော့ အဲဒီဒေသ ဥပမာ ဘူးသီးတောင် မောင်တော မြောက်ခြမ်းမှာ ရှိတဲ့ ဘော်လီဘဇား အခုတော့ ကြိမ်ချောင်းပေ့ါ၊ အဲဒီ နောက်က ရှာဗီဘဇား အခုတော့ သမန်းသားပေါ့၊ အဲဒီကလူတွေက ဟိုက (အရှေ့ပါကစ္စတန်က) လူတွေ ၀င်ပြီးတော့ နောက်ထပ် ရောက်လာကြတာတွေကို အဲ့ဒီက လူတွေက မကြိုက်ဘူးဗျ။

ဒီလူတွေ နောက်ထပ်ရောက်လာတဲ့ အတွက် ဒို့တော့ ဒုက္ခရောက်တာ့မှာပဲ၊ လူတွေ များလာတဲ့ အတွက် ပြဿနာတွေတော့ ဖြစ်တော့မှာပဲ၊ စသည်ဖြင့် အဲဒီတုန်း ကတည်းက ကျနော်တို့နဲ့ အင်မတန် ခင်မင်ခဲ့တဲ့ ရခိုင်အစ္စလမ်၊ တချို့လည်း ဘင်္ဂါလီ အစ္စလမ်ပေါ့။ အဲဒီလူတွေက ကျနော်တော့၊ သူတို့နဲ့ တွေ့ကြပြုကြ ပြောဆိုနေကြ ဆိုတော့ သူတို့ကိုယ်တိုင်က အဲဒီလို များများစားစားနဲ့ ဟိုဘက်က ထပ် ၀င်လာကြတဲ့ သူတွေက သူတို့ကို ဒုက္ခပေးတော့မှာပဲ ဆိုပြီးတော့ အဲ့ဒီက လူတွေက မကြိုက်ကြဘူး ခင်ဗျ။ ဒါပေမဲ့ တစ်ခုတော့ ရှိတာပေါ့။ ဘာဖြစ်သလဲ ဆိုတော့ ကျနော်တို့ရဲ့ အစိုးရ ၀န်ထမ်းတွေကလည်း သိပ်ပြီးတော့ bribery and corruption ပေါ့။ သိပ်ပြီးတော့ လာဘ်စားတယ် ခင်ဗျ။ အဲဒီ (ဘူးသီးတောင်မောင်တော)ရောက်တဲ့ အစိုးရ ၀န်ထမ်း ဟာ သူဋ္ဌေးဖြစ်တော့တာပဲ။

ဦးရော်နီညိမ်း ။ ။ မြန်မာ့တပ်မတော်ရဲ့ စတုတ္ထမြောက် ကာကွယ်ရေး ဦးစီးချုပ် အဖြစ် တာဝန် ထမ်းဆောင် ခဲ့သူ၊ အငြိမ်းစား ဗိုလ်ချုပ်ကြီး သူရ ဦးတင်ဦးရဲ့ စစ်မှုထမ်းဘ၀ ရခိုင်ပြည်နယ် အတွေ့ အကြုံများ အပိုင်း(၂)ကို၊ ရှေ့သီတင်း ပတ် စနေနေ့ မနက်ခင်းနဲ့ ညနေခင်းတွေမှာ ဆက်ပြီး တင်ဆက်ပေးသွား ပါမယ် ခင်ဗျာ။ ကျနော် ရော်နီညိမ်းပါ။

Ref: VOA News

Read More...

သတင်းမီဒီယာ လွတ်လပ်ခွင့်အတွက် မန်းသတင်းထောက်များ တောင်းဆို

2012-08-05

မြန်မာနိုင်ငံမှာ သတင်းမီဒီယာ လွတ်လပ်ခွင့် အပြည့်အ၀ ရရှိရေး အတွက် မန္တလေးမြို့မှာ ရှိတဲ့ သတင်းထောက် စုစုပေါင်း အယောက် (၅၀) ကျော်ဟာ “မီဒီယာဖိနှိပ်မှု ချက်ချင်းရပ်၊ Stop Killing Press” စာတန်းပါ တီရှပ် အနက်ရောင်တွေကို ၀တ်ပြီး လူ စည်ကားတဲ့နေရာတွေမှာ ဒီကနေ့ ငြိမ်းချမ်းစွာ ဆန္ဒပြခဲ့ကြ ပါတယ်။

အဓိက အနေနဲ့ စာပေစိစစ်ရေး လုံးဝဖျက်သိမ်းပေးဖို့ တောင်းဆို ခဲ့ကြတယ်လို့ ပါဝင်သူ တဦး ဖြစ်တဲ့ အထက်မြန်မာပြည် သတင်းထောက်များ ကွန်ယက် တာဝန်ခံ ကိုစန်းယုကျော်က ပြောပါတယ်။

သတင်း မီဒီယာ လွတ်လပ်ခွင့်နဲ့ ပိတ်ပင်ခံထားရတဲ့ The Voice နဲ့ Envoy ဂျာနယ် နှစ်စောင်ကို ပြန်လည် ထုတ်ဝေခွင့်ပြုဖို့ မနေ့က ရန်ကုန်မြို့မှာ သတင်းထောက်တွေ ပြုလုပ်တဲ့ လက်မှတ်ရေးထိုး တောင်းဆိုမှုမှာ မန္တလေး သတင်းထောက် ၅၀ ကျော်ရဲ့ လက်မှတ်တွေကို ပေးပို့ခဲ့တယ်လို့ ကိုစန်းယုကျော်က ပြောပါတယ်။

ဒီကနေ့ ထုတ်ဝေတဲ့ အပတ်စဉ်ထုတ် The Nation သတင်းဂျာနယ်မှာ မျက်နှာဖုံး သတင်း အဖြစ် ဖော်ပြထားတဲ့ သတင်း လွတ်လပ်ခွင့် ရရှိရေး တောင်းဆို လှုပ်ရှားတဲ့ သတင်း ဓာတ်ပုံကို စာပေစိစစ်ရေးက ပယ်ချ ခဲ့တဲ့အပြင် ကြံ့ခိုင်ဖွံဖြိုးရေး ပါတီရဲ့ ရန်ကုန်တိုင်း ဒေသကြီး တာဝန်ခံ ဦးအောင်သိန်းလင်းကို ရာထူးက ဖယ်ရှားလိုက်တဲ့ သတင်းကိုလည်း ပယ်ချ ခဲ့တယ်လို့ သိရပါတယ်။

Ref: RFA News

Read More...

ပြည်ထောင်စု ငြိမ်းချမ်းရေးကော်မတီ KNU နဲ့ အကြို ဆွေးနွေး

မအေးအေးမာ
05.08.2012

ကရင်အမျိုးသား အစည်းအရုံးက ကိုယ်စားလှယ် အဖွဲ့နဲ့ မြန်မာအစိုးရ ဘက်က ပြည်ထောင်စု အဆင့် ငြိမ်းချမ်းရေး ဖော်ဆောင်မှု လုပ်ငန်းကော်မတီ ဒုဥက္ကဋ္ဌ၊ ရထား ပို့ဆောင်ရေး ၀န်ကြီးဌာန ပြည်ထောင် စု ၀န်ကြီး ဦးအောင်မင်းတို့ အဖွဲဟာ မကြာခင် လုပ်မယ့် အစည်းအဝေး အတွင်း နှစ်ဘက် တပ်မတော် က လိုက်နာ ကျင့်သုံးရမယ့် ကျင့်ဝတ် စည်းကမ်းတွေနဲ့ ပတ်သက် လို့ ဆွေးနွေးကြဖို့ အတွက် မြ၀တီမြို့ မှာ ဒီကနေ့ အကြို ညှိနှိုင်း ခဲ့ကြပါတယ်။ ဒီအကြောင်းကိုတော့ ထိုင်းအခြေစိုက် သတင်းထောက် မအေးအေးမာက သတင်ပေးပို့ ထားပါတယ်။

မြ၀တီမြို့ ခလရ (၂၇၅) တပ်တည်ရာနေရာမှာ ဆွေးနွေး ခဲ့ကြတဲ့ ဒီဆွေးနွေးပွဲမှာ လူဝင်မှု ကြီးကြပ်ရေး ၀န်ကြီးဌာန ပြည်ထောင်စု ၀န်ကြီး ဦးခင်ရီ ကတော့ အပစ်အခပ် ရပ်စဲရေးကို ပိုမို ခိုင်မာစေဖို့ နှစ်ဘက် လိုက်နာရမယ့် ကျင့်ဝတ် ကိစ္စတွေကို ဆွေးနွေးဖို့ အတွက် အကြို ညှိနှိုင်း ခဲ့ကြကြောင်း အခုလို ပြောသွားပါတယ်။

“အဓိက ကတော့ ကျနော်တို့ peace process ငြိမ်းချမ်းရေး လုပ်ငန်းစဉ်မှာ အဓိက ကျတဲ့ cease fire stage အပစ်အခတ် ရပ်စဲရေး အဆင်ကို ပိုပြီးတော့ ခိုင်မာ သွားအောင် နှစ်ဘက် လိုက်နာရမယ့် ကျင့်ဝတ်၊ အင်္ဂလိပ်လိုတော့ code of conduct for cease fire အဲဒါလေးတွေကို ကျနော်တို့ ဆွေးနွေးဖို့ အတွက် နောက်တကြိမ် အစည်းအဝေးကို သြဂုတ်လ နောက်ဆုံး ပတ်လောက်မှာ သင့်တဲ့နေရာမှာ၊ နီးတဲ့အခါ ထပ်ပြီး ဆွေးနွေး ကြမှာပေါ့။ အဲဒီအစည်းအဝေး အတွက် ကျနော်တို့ အကြို အစည်းအဝေး လာပြီးတော့ ဆောင်ရွက်တာ ဖြစ်ပါတယ်။ တချို့နေရာတွေမှာ အပစ်အခတ် ရပ်စဲရေး ယူထားသော်လည်းပဲ နည်းနည်းပါးပါး ဒီလို သွားရင်း လာရင်းနဲ့ ပစ်တာ ခတ်တာတွေ ရှိတယ်။”

ဆွေးနွေးမှုမှာ ပါဝင်ခဲ့တဲ့ ကရင်အမျိုးသားအစည်းအရုံး (KNU) ရဲ့ အမြဲတမ်း ဗဟိုကော်မတီဝင် ဖဒို သောသီ ကတော့ နှစ်ဘက် လိုက်နာရမယ့် ကျင့်ဝတ်တွေနဲ့ ပတ်သက်လို့ မြန်မာ အစိုးရ နဲ့ ကေအဲန်ယူကြားမှာ အရင်က ချပြ ဆွေးနွေးမှုတွေက ကွဲလွဲမှုတွေ ရှိနေသေးတဲ့ အကြောင်း၊ မြန်မာဘက်က တပ်မတော် စစ်သည်တော် ကျင့်ဝတ်တွေနဲ့သာ ဆွေးနွေးခဲ့တဲ့ အတွက် အခက်အခဲ ရှိခဲ့တယ်လို့ ဆိုပါတယ်။

“ဒီ code of conduct ဆိုတာ သူ့ဘက်က မရှိဘူးလေ။ သူ့ဘက်က အခါအားလျော်စွာ တပ်မတော် ကျင့်ဝတ် ၆၀ နဲ့ပဲ သူတို့ ပြောလေ့ ရှိတယ်လေ။ စစ်သည်တော် ကျင့်ဝတ် ၆၀ က တကယ့်ကိုပဲ လုံခြုံမှုရော၊ နောက်ပြီးတော့ စည်းကမ်းချက်နဲ့ အကျုံးဝင်တယ်လို့ သူတို့ ဘက်ကတော့ တွင်တွင်ကြီး ပြောတာပေါ့လေ။ ဒါပေမဲ့ အဲဒါတွေက တပ်မတော်က လိုက်နာ ကျင့်သုံးရမယ့် တပ်မတော် ကျင့်ဝတ် စည်းကမ်းပဲ။ နှစ်ဘက် အပစ်အခတ် ရပ်စဲလို့ လိုက်နာရမယ့် ကျင့်ဝတ် စည်းကမ်း မဟုတ်ဘူး။

ကျနော်တို့ဘက်က ရေးဆွဲတာက နှစ်ဦးနှစ်ဘက် တပ်မတော် နှစ်ဘက် စလုံးက လိုက်နာ ကျင့်သုံးရမယ့် စည်းကမ်းချက်တွေ ပေါ့နော်။ တပ်မတော် နှစ်ဘက်စလုံးက ကျနော်တို့ ဆီက စည်းကမ်းချက်တွေကို ကြည့်ပြီးတော့မှ ဒါတွေ သဘောတူနိုင်မယ် မတူနိုင်ဘူး၊ ဘယ်အချက်မှာ သဘော တူနိုင်တယ်၊ ဘယ်အချက်မှာ သဘောမတူနိုင်ဘူး။ ဒါမျိုးတွေက ညှိနှိုင်းရမယ့် သဘောတွေ ရှိတယ်လေ။ ဥပမာ သူတို့ခေါ်တဲ့ စစ်သည်တော် ကျင့်ဝတ် ၆၀ ဆိုတာမှာ ကျနော်တို့မှာ သူ့ထက်တောင် တချက် ပိုတာ ရှိပါတယ်။ အဲဒါ တပ်မတော် ကျင့်ဝတ်မှာ ကျနော်တို့ KNLA တပ်မတော်မှာလည်း ကျင့်ဝတ်ရှိပါတယ်။ ရဲဘော် ကျင့်ဝတ်တွေ ရှိပါတယ်။”

ဆွေးနွေးမှုတွေ အတွင်းမှာ အဓိက ဆွေးနွေးချက်တွေ ကတော့ လူ့အခွင့်အရေး ချိုးဖောက် ခံရမှုတွေ ရှိနေတာကြောင့်လို့ ဆိုပါတယ်။

“ကျနော်တို့က တပ်မဟာ (၁) နယ်မြေ၊ သထုံခရိုင်၊ ကုန်းတန်းကြီး၊ တခေါင်းမိုး ကျေးရွာတို့လို မျိုးမှာ သူတို့ လူအရှင် ပစ်သတ် တာမျိုးတွေက ရှိတယ်လေ။ ကျနော်တို့ ဘက်ကလည်း တခု ရှိတယ် ထင်ထင်ပေါ်ပေါ်။ နောက် တောင်ငူဘက်က ဆိုလို့ရှိရင်လည်း ဆန်သည်တာ၊ ရိက္ခသည်တာမျိုးတွေ ပစ်တာမျိုးတွေလည်း ရှိတယ်လေ။ နောက်ပြီးတော့ ကျနော်တို့ ဖာပွန်နယ်ဘက်က အင်ဥရှာရင်းနဲ့ မျှစ်ရှာရင်းနဲ့ အပစ်သတ် ခံရတာမျိုးတွေလည်း ရှိတယ်လေ။ သူတို့ ပစ်လည်းပစ်၊ သေလည်း သေတဲ့ အခါကျတော့ ဒါ အရပ်သား ဖြစ်နေတယ်လေ။ နောက်တခုကလည်း ဖာပွန်ဘက်က အထက်ဘက်က ရွာတရွာ ရှိသေးတယ်။ အဲဒီဘက်ကလည်း အပစ်ခံရတာပဲ။”

သြဂုတ်လ တတိယ အပတ်မှာ ကရင်ပြည်နယ် ဘားအံမြို့မှာတော့ နှစ်ဘက် လိုက်နာရမယ့် ကျင့်ဝတ်တွေနဲ့ ပတ်သက်လို့ ဆွေးနွေးဖို့ ရှိနေတယ်လို့ ဆိုပါတယ်။ ပြည်ထောင်စုဝန်ကြီး ဦးအောင်မင်းနဲ့ လုပ်ငန်းကော်မတီ အဖွဲ့ဝင်ဖြစ်တဲ့ လူဝင်မှုကြီးကြပ်ရေး ၀န်ကြီးဌာန ပြည်ထောင်စု ၀န်ကြီး ဦးခင်ရီ၊ ပြည်ထောင်စု ၀န်ကြီး ဦးစိုးသိန်းနဲ့ ကရင်ပြည်နယ် ၀န်ကြီးချုပ် ဦးဇော်မင်းတို့ ဟာ ဆွေးနွေးပွဲတွေ အပြီးမှာ ထိုင်းနိုင်ငံ မဲဆောက်မြို့က ဒေါက်တာ စင်သီယာမောင်ဆေးခန်းကို လာရောက်ခဲ့ပြီး မြ၀တီမြို့ကို လူနာတွေ လွှဲပြောင်း နိုင်ရေးတွေကိုလည်း ဆွေးနွေးသွားခဲ့ပါတယ်။

Ref: VOA News

Read More...

ရခိုင်ပြည်နယ်ခရီး ၈၈ ကျောင်းသားများ သတင်းစာရှင်းလင်း

2012-08-05

ရခိုင်ပြည်နယ်မှာ ဖြစ်ပွားခဲ့တဲ့ ဘင်္ဂါလီ-ရိုဟင်ဂျာ အရေး ကိစ္စဟာ အင်မတန် နက်နဲ သိမ်မွေ့တဲ့ အတွက် လူ့အခွင့်အရေး ရှုထောင့် တစ်ဘက်တည်းက မကြည့်ဘဲ တိုင်းတစ်ပါး နိုင်ငံသားတွေရဲ့ ကျူးကျော်မှု၊ နယ်စပ်ဒေသမှာ တာဝန် ထမ်းဆောင်တဲ့ အစိုးရ ၀န်ထမ်းတွေရဲ့ အဂတိ လိုက်စားမှု ကိစ္စတွေကိုပါ ဘက်ပေါင်းစုံက ထည့်သွင်း စဉ်းစားဖို့ လိုအပ်တယ်လို့ (၈၈) မျိုးဆက် ကျောင်းသား ခေါင်းဆောင် ကိုမင်းကိုနိုင်က ပြောကြားလိုက်ပါတယ်။

ရန်ကုန်မြို့ သင်္ဃန်းကျွန်းမြို့နယ်မှာ ရှိတဲ့ (၈၈) မျိုးဆက် ကျောင်းသားများ ရုံးချုပ်မှာ ဒီကနေ့ ညနေပိုင်းက ပြုလုပ်တဲ့ (၈၈) မျိုးဆက် ကျောင်းသားတွေရဲ့ ရခိုင်ပြည်နယ် ခရီးစဉ်နဲ့ ပတ်သက်တဲ့ သတင်းစာ ရှင်းလင်းပွဲမှာ ကိုမင်းကိုနိုင်က အခုလို ပြောကြားခဲ့တာ ဖြစ်ပါတယ်။

"ဒီကိစ္စမှာ လူ့အခွင့်အရေး ရှုထောင့် တစ်ဘက်တည်းက မကြည့်ဘဲ ကျနော်တို့ နိုင်ငံရဲ့ သမိုင်းကြောင်းနဲ့ ကျနော်တို့ တမျိုးသားလုံးရဲ့ အကျိုးစီးပွားတွေ၊ ပြည်ပက ကျူးကျော် ၀င်ရောက်နေမှုတွေ၊ အဲဒီမှာလည်း မတရားသဖြင့် ဒီက အကျင့်ပျက်တဲ့ ၀န်ထမ်းတွေကြောင့် တချိန်တုန်းက ၀င်ရောက်လာတဲ့သူ နည်းလမ်းပေါင်းစုံနဲ့ ၀င်ရောက် လာသူတွေ ရှိပါတယ်။ ဒါကြောင့် ကျနော်တို့ အမျိုးသား အကျိုးစီးပွား အတွက် နိုင်ငံသားတွေရဲ့ အခွင့်အရေးတွေနဲ့ တိုင်းရင်းသား ဆိုလည်း တိုင်းရင်းသားတွေနဲ့ အခွင့်အရေးတွေ အားလုံး ခြုံပြီး ကြည့်ရပါမယ်။ "

ဒါအပြင် ရခိုင်ပြည်နယ်မှာ ဖြစ်ခဲ့တဲ့ ပဋိပက္ခတွေနဲ့ ပတ်သက်လို့ လွတ်လပ်တဲ့ စုံစမ်း စစ်ဆေးရေး ကော်မရှင်ဖွဲ့ပြီး အခြေအနေ မှန်တွေ ဖော်ထုတ်ဖို့ မြန်မာနိုင်ငံ ဆိုင်ရာ ကုလသမဂ္ဂ လူ့အခွင့်အရေး အထူး ကိုယ်စားလှယ် မစ္စတာ ကင်တားနားရဲ့ တိုက်တွန်းချက် အပေါ် ၈၈ မျိုးဆက် ကျောင်းသားများ အဖွဲ့ရဲ့ သဘောထားနဲ့ ပတ်သက်လို့ ကိုယ်တိုင် သွားရောက် စုံစမ်း လေ့လာခဲ့တဲ့ မမီးမီးက အခုလို ပြောပါတယ်။

"လွတ်လပ်တဲ့ စုံစမ်းစစ်ဆေးရေး ကော်မရှင်မှာ ပါဝင်မယ့် သူတွေဟာ တကယ်ကို လွတ်လွတ် လပ်လပ် စုံစမ်းခွင့် ရသလား၊ မရသလား ဆိုတဲ့ အပေါ်မှာလည်း မူတည်သလို အာဏာပိုင်ကလည်း လွတ်လွတ်လပ်လပ် စုံစမ်းခွင့်ကို ခွင့်ပြုရမှာ ဖြစ်သလို ဒေသခံ တိုင်းရင်းသား ပြည်သူတွေကလည်း ကိုယ့်ရဲ့ ဒေသ အကျိုးစီးပွား အတွက် ဒီကော်မရှင်နဲ့ ပူးပေါင်းဆောင်ရွက်ရမှာ ဖြစ်ပါတယ်။"

(၈၈) မျိုးဆက်ကျောင်းသားများ အဖွဲ့ဟာ မကြာသေးခင်က ရခိုင်ပြည်နယ်ကို (၃) ကြိမ် သွားရောက်ခဲ့ပြီး ကျပ်သိန်း (၃၅၀) ဖိုးခန့် ရှိတဲ့ အကူအညီတွေကို ဒုက္ခသည်တွေထံ ပေးအပ်ခဲ့ပါတယ်။ ဒီခရီးစဉ်တွေနဲ့ ပတ်သက်တဲ့ အတွေ့အကြုံတွေကို ကိုမင်းကိုနိုင်၊ ကိုကိုကြီး၊ ကိုဂျင်မီ၊ ကိုပြုံးချို၊ မနီလာသိန်းနဲ့ မမီးမီးတို့က သတင်း မီဒီယာတွေကို ရှင်းလင်းပြောကြားခဲ့ ကြပါတယ်။

Ref: RFA News

Read More...

ရခိုင်ပြည်နယ်ပြဿနာ ဘာသာရေးပဋိပက္ခ မဟုတ်ကြောင်း အင်ဒို သမ္မတ ပြောကြား

2012-08-05

ကမ္ဘာမှာ မူဆလင်ဘာသာဝင် အများဆုံးရှိရာ နိုင်ငံဖြစ်တဲ့ အင်ဒိုနီးရှားနိုင်ငံရဲ့ သမ္မတ ဆူဆီလို ယူဒိုယူနိုက ရခိုင်ပြည်နယ်မှာ ဖြစ်ပေါ်နေတဲ့ ပဋိပက္ခနဲ့ ပတ်သက်လို့  မြန်မာနိုင်ငံ အစိုးရဟာ အကောင်းဆုံးဖြစ်အောင် ကိုင်တွယ် ဖြေရှင်းနေကြောင်း ပြောကြား လိုက်ပါတယ်။

အနောက်ဂျားဗားရှိ သူ ရဲ့နေအိမ်မှာ ကျင်းပတဲ့ သတင်းစာ ရှင်းလင်းပွဲမှာ သမ္မတ ယူဒိုယူနိုက သူ့ အနေနဲ့ မြန်မာနိုင်ငံ ရခိုင်ပြည်နယ်က အခြေအနေကို တတ်နိုင်သမျှ မှန်မှန်ကန်ကန် ပြည့်ပြည့်စုံစုံနဲ့ ဘက်မလိုက်ဘဲ ကြိုးစား ရှင်းပြနေတာ ဖြစ်ကြောင်းလည်း သတင်းထောက်တွေကို ပြောပါတယ်၊

ရခိုင်-ရိုဟင်ဂျာ ပဋိပက္ခဟာ ဘာသာရေး ပဋိပက္ခ မဟုတ်ဘဲ ဒေသတွင်း လူအုပ်စုကြား ဖြစ်ပွားတဲ့ ပဋိပက္ခသာဖြစ်ပြီး အကြောင်း တိုက်ဆိုင်လို့ ရိုဟင်ဂျာတွေက မူဆလင်ဖြစ်ပြီး ရခိုင်တွေက ဗုဒ္ဓဘာသာ ဖြစ်နေတာသာ ဖြစ်ကြောင်းလည်း အင်ဒိုနီးရှား သမ္မတ ကပြောပါတယ်။

ရိုဟင်ဂျာတွေဟာ ဘင်္ဂလားဒေ့ရှ် ဇာတိဖြစ်ကြောင်း၊ ဒါပေမဲ့ မျိုးဆက် လေးဆက်လောက် နေထိုင်လာတဲ့ သူတို့ကို မြန်မာ အစိုးရက တိုင်းရင်းသား ၁၃၅ မျိုးထဲမှာ ထဲ့သွင်းမှု မရှိသေးဘူးလို့လည်း ပြောပါတယ်။

ဒီပဋိပက္ခမှာ ရိုဟင်ဂျာ ဒုက္ခသည် ၂၈၀၀၀ ကနေ ၅၃၀၀၀ ထိ များပြားလာကြောင်း၊ စာရင်းအရ ရခိုင် ဒုက္ခသည် ၂၄၀၀၀ ရှိနေကြောင်း၊ ဝေဖန်သူတွေက မြန်မာ အစိုးရဟာ ရခိုင်တွေကို ဦးစားပေး နေတယ်လို့ ဆိုကြပေမဲ့ တဖက်မှာလည်း ရိုဟင်ဂျာတွေဟာ ကုလသမဂ္ဂရဲ့ အကူအညီ အထောက်အပံ့ ပိုရနေတယ်လုို့ ရခိုင်တွေက သတိမူ သဘောပေါက် ထားကြောင်းလည်း ပြောဆိုပါတယ်၊

မြန်မာနိုင်ငံက ပြဿနာ ဖြရှင်းရေးအတွက် အင်ဒိုနီးရှားနိုင်ငံ အနေနဲ့ သံတမန် လမ်းကြောင်းက တတ်နိုင်သမျှ ဆောင်ရွက်ခဲ့ပြီး သမ္မတ ဦးသိန်းစိန် ထံလည်း အင်ဒိုနီးရှားနိုင်ငံရဲ့ မျှော်လင့်မှုတွေနဲ့ ပတ်သက်လို့  စာပေးပို့မှာ ဖြစ်ကြောင်း သတင်းထောက်တွေကို ရှင်းပြ သွားပါတယ်။

Ref: RFA News

Read More...

အပေါ်သို့