ကိုမင်းကိုနိုင် အိမ်သို့ ဒေါ်အောင်ဆန်းစုကြည်သွားရောက်အားပေး

Sunday, 11 September 2011


မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်သည် ယနေ့ နေ့လည် ၁၂း၁၅ မိနစ်တွင် ကျိုင်းတုံ အကျဉ်းထောင်တွင် ထောင်ဒဏ် ၆၅ နှစ် နှင့် ၆ လ အကျဉ်းချထားခြင်း ခံနေရသော ၈၈ မျိုးဆက်ကျောင်းသား ခေါင်းဆောင် ကိုမင်းကိုနိုင်၏ နေအိမ်သို့ သွားရောက် အားပေးစကား ပြောခဲ့ပါတယ်။

ယခုကဲ့သို့ ဒေါ်အောင်ဆန်းစုကြည်က ကိုမင်းကိုနိုင်၏ မိသားစုများနှင့် အားပေးစကား ပြောကြား ခဲ့စဉ်တွင် ကိုမင်းကိုနိုင်၏ ဖခင်ဖြစ်သူ ပန်းချီဆရာကြီး ဦးသက်ညွန့်က ၄င်းကိုယ်တိုင် ရေးဆွဲထားသည့် ပန်းချီကား ကိုလည်း လက်ဆောင်အဖြစ် ပြန်လည် ပေးအပ်ခဲ့သည်။ ယခုကဲ့သို့ မိသားစုများကို လာရောက် အားပေးစကား ပြောကြားသည့်အတွက် မိသားစုဝင် များမှာ ၀မ်းမြောက် ၀မ်းသာ ဖြစ်ရကြောင်း မိသားစုဝင်များက ပြောသည်။ ထို့အပြင် တခြား ၈၈ မျိုးဆက်ကျောင်း သား ခေါင်းဆောင် များ၏ မိသားစု နေအိမ်များသို့လည်း သွားရောက် အားပေးမည် ဟု မျှော်လင့်ကြောင်း သိရပါသည်။

၈၈ မျိုးဆက်ကျောင်းသားခေါင်းဆောင် ကိုမင်းကိုနိုင်နှင့် လုပ်ဖော်ကိုင်ဖက်များသည် အကျဉ်းထောင်များ ထဲတွင် ၁၉၈၈ ခုနှစ် နောက်ပိုင်း ၁၄ နှစ် ကျော် အနည်းဆုံး နေထိုင် ခဲ့ကြရသူများ ဖြစ်ကြသည်။

ကျောင်းသားခေါင်းဆောင်များဖြစ်ကြသည့် ကိုမင်းကိုနိုင်၊ ကိုကိုကြီး၊ ကိုပြုံးချို၊ ကိုဌေးကြွယ်၊ ကိုမင်းဇေယျာ စသည့် ကျောင်းသား ခေါင်းဆောင်များသည် အကျဉ်းထောင်များက ပြန်လည် လွတ်မြောက် လာပြီးနောက် မြန်မာနိုင်ငံ ဒီမိုကရေစီ ရရှိရေး၊ လူ့အခွင့်အရေး မှတ်တမ်းများ ကောင်းမွန်စေရေး၊ အမျိုးသား ပြန်လည် သင့်မြတ်ရေးတို့ အတွက် ငြိမ်းချမ်းသော နည်းလမ်းဖြင့်သာ လုပ်ဆောင် ခဲ့ကြသည်။

၎င်းတို့သည် မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ကို နိုင်ငံရေးအရ အဓိက ၀န်းရံ နေကြသော အမျိုးသား ဒီမိုကရေစီ အဖွဲ့ချုပ် ပါတီဝင် မဟုတ်သည့် ကျောင်းသားများ ဖြစ်ကြသည်။

ဒေါ်အောင်ဆန်းစုကြည်သည် ၄င်းကို အဓိက ထောက်ခံသည့် NLD ပါတီပြင်မမှ ၈ လေးလုံး ဦးဆောင်သူများ ဖြစ်သည့် ကျောင်းသား ခေါင်းဆောင်များနှင့် တသားတည်း ရှိကြောင်း ပြသသည့် သွားရောက် အားပေးမှုလည်းဖြစ်သည်။

မြန်မာအစိုးရ အာဏာပိုင်များနှင့် မကြာသေးမီက တွေ့ဆုံမှုတချိုက လုပ်ဆောင်ခဲ့ပြီးနောက် ပါတီရပ် တည်ရေး၊ နိုင်ငံရေး အကျဉ်းသား လွတ်မြောက်ရေး စသည့် အကြောင်းအရာ များကို ဆွေးနွေး ခဲ့ပြီးနောက် နိုင်ငံရေး အကျဉ်းသားများလည်း ပြန်လည် လွတ်မြောက်လာမည်ဟု ဒေါ်အောင်ဆန်းစုကြည်က ယုံကြည်ထားသည်။

အကျဉ်းထောင် အသီးသီးရှိ ၈၈ မျိုးဆက်ကျောင်းသားခေါင်းဆောင်များကလည်း ဒေါ်အောင်ဆန်းစုကြည် ၏ အစိုးရနှင့် ပူးပေါင်း လုပ်ဆောင် တွေ့ဆုံ ဆွေးနွေးမှုများကို ကြိုဆို ကြသော်လည်း အစိုးရ ဘက်မှ ဒေါ်အောင်ဆန်းစုကြည်၏ စေတနာကို မရိုးမသား လုပ်၍ အသုံးချ သွားမည်ကို စိုးရိမ်ကြောင်း မကြာမီက အကျဉ်းထောင် အသီးသီးက ၈၈ မျိုးဆက် ကျောင်းသား ခေါင်းဆောင်များက ဖော်ပြခဲ့သည်။

သို့သော် ဒေါ်အောင်ဆန်းစုကြည်အနေဖြင့် အသုံးချခံရမည်ဟု မထင်မိကြောင်း။ အကယ်၍ နိုင်ငံနှင့် နိုင်ငံသူ နိုင်ငံသားများ အတွက် ကောင်းကျိုး ဖြစ်မည်ဆိုလျှင် သူမ အနေဖြင့် အသုံးချခံ ဖြစ်ချင်ဖြစ်ပါစေ ဟု လည်းပြောဆို ခဲ့သည်။

ထို့အပြင် ဒေါ်အောင်ဆန်းစုကြည်အနေဖြင့် လုပ်ဆောင်နေသော အစိုးရနှင့် ပူးပေါင်း ဆောင်ရွက်ရေး လမ်းကို ယုံယုံ ကြည်ကြည် ဆက်လက် လျှောက်လှမ်းနေကြောင်း၊ အကယ်၍ မိမိမှားယွင်းခဲ့လျှင် မိမိတာဝန်ယူမည် သာ ဖြစ်ကြောင်း မကြာသေးမီးက ထုတ်ဖော် ပြောဆိုထားသည်။