အောင်သက်ဝိုင်း
July 19, 2012
နံနက် ၈ နာရီအချိန် နီရဲ တောက်ပသည့် ကြယ်ဖြူ တလုံးပါ အာဇာနည် ဗိမာန်ရှေ့တွင် အ၀ါရင့်ရောင် ရှမ်းရိုးရာ အင်္ကျီနှင့် ဘောင်း ဘီ ကို ၀တ်ဆင် ထားသူတဦး လက်သီးဆုပ်လျက် ရှိနေသည်။
၎င်း၏ နောက်တွင် အ၀ါရောင်ခေါင်းပေါင်းနှင့် အနက်ရောင် တိုက်ပုံ အင်္ကျီ ၀တ်ဆင် ထားသူများနှင့် စစ်ယူနီဖောင်းဝတ် တပ်မတော် အရာရှိ တချို့ ရှိနေသည်။
ဝန်းကျင်တခုလုံး မှိုင်းညို့၍ နေသည်။ မကြာခင် စစ်ခရာသံ ဖြည်းညင်းစွာ ထွက်ပေါ် လာပါသည်။
ရှမ်းတိုင်းရင်းသားဝတ်စုံဝတ် အမျိုးသားက ခရာသံ ထွက်ပေါ် ချိန်တွင် သူ၏ ဦးခေါင်းကို ငုံ့ချလိုက်ပြီး အစိမ်းရောင် ယူနီဖောင်း ၀တ် စစ်သားများ ကလည်း ငြိမ်သက်စွာပင် အလေးပြုနေကြသည်။
ယနေ့ကျရောက်သည့် ၆၅ နှစ်မြောက် အာဇာနည်နေ့တွင် နှစ်ပေါင်း ၅၀ ကျော်အတွင်း အစိုးရ ထိပ်တန်း ခေါင်းဆောင်တဦး ဖြစ် သည့် ဒုတိယ သမ္မတ ဒေါက်တာ စိုင်းမောက်ခမ်း က အာဇာနည်ခေါင်းဆောင်များကို တက်ရောက် ဂါရ၀ပြုခြင်း ဖြစ်သည်။
၁၉၄၈ ခုနှစ် လွတ်လပ်ရေးရပြီးနောက် အာဇာနည်နေ့ကို နှစ်စဉ် နိုင်ငံ့ခေါင်းဆောင်များ တက်ရောက်ပြီး ခမ်းခမ်း နားနား ကျင်းပ ခဲ့ သော်လည်း ၁၉၆၂ ခုနှစ် ဗိုလ်ချုပ်ကြီးနေ၀င်း ဦးဆောင်သော စစ်အစိုးရက အာဏာ သိမ်းပြီးနောက် အာဇာနည်နေ့ကို ယဉ်ကျေးမှု ၀န်ကြီးဌာန ၀န်ကြီး အဆင့်ကသာ ဦးဆောင်ကျင်းပ စေခဲ့သည်။
၁၉၈၈ ခုနှစ် ရှစ်လေးလုံး အရေးအခင်းဖြစ်ပွားပြီးနောက် တက်လာသော စစ်အာဏာရှင် အစိုးရ ကလည်း အာဇာနည်နေ့ကို မှေးမှိန် စွာပင် ကျင်းပခဲ့ပြီး နေပြည်တော်သို့ မြို့တော် ပြောင်းရွှေ့ပြီးနောက်ပိုင်း ၂၀၀၈ ခုနှစ်တွင် ရန်ကုန်မြို့တော် စည်ပင် သာယာရေး ကော်မတီ ဥက္ကဋ္ဌ ရန်ကုန်မြို့တော်ဝန်အဆင့် က ဦးစီး ကျင်းပခဲ့သည်။
၂၀၁၀ ရွေးကောက်ပွဲအပြီး တက်လာသည့် သမ္မတ ဦးသိန်းစိန်အစိုးရက အာဏာရယူပြီး တနှစ် အကြာတွင် ယခုကဲ့သို့ ဒုတိယ သမ္မတ အဆင့် အစိုးရခေါင်းဆောင် တဦးက တက်ရောက် ဂါရ၀ပြုလာခြင်း ဖြစ်ပြီး ယင်းသို့ ကျင်းပပုံကိုလည်း အစိုးရပိုင် ရုပ်မြင်သံကြား ဌာန က တိုက်ရိုက်ထုတ်လွှင့်သည်။
ဒေါက်တာ စိုင်းမောက်ခမ်းက နိုင်ငံတော် သမ္မတ ရုံးဟု အမည် ထိုးထားသော လွမ်းသူ့ ပန်းခွေကို တဖြည်းဖြည်း မယူပြီး အာဇာနည် ဗိမာန်ရှေ့ ချထား လိုက်ချိန်တွင် သတင်းသမားများ၏ ကင်မရာသံများ တချပ်ချပ်ဖြင့် ထွက်ပေါ် လာသည်။
စစ်အစိုးရလက်ထက် ကျင်းပခဲ့သော အာဇာနည်နေ့ အခမ်းအနားများတွင် ယဉ်ကျေးမှု ၀န်ကြီး ဖြစ်ခဲ့သူများက ပုံမှန် တက်ရောက်ပြီး
အလေးပြု ခဲ့ကြသော်လည်း ယခု ဒုတိယ သမ္မတ ဒေါက်တာ စိုင်းမောက်ခမ်း တက်ရောက်သောနေ့တွင် ယာဉ်ကျေးမှုဝန်ကြီး ဦးကျော်ဆန်း ကို မတွေ့ရဘဲ သူ့အစား အလုပ်သမား ၀န်ကြီးနှင့် လူမှုဝန်ထမ်းနှင့် ပြန်လည် နေရာချထားရေး ၀န်ကြီး ဦးအောင်ကြည် တက်ရောက်သည်ကို တွေ့ရချိန်တွင် သတင်းသမားများ အကြား ဝေဖန်မှုများ ထွက်ပေါ်လာသည်။
“ဦးကျော်ဆန်းက ယဉ်ကျေးမှု ၀န်ကြီးပဲ။ ဒီ အခမ်းအနားက ဟိုးအရင်တုန်းက သူတက်နေကျ။ အခု သူမတက်ဘဲ ဦးအောင်ကြည် တက်တယ် ဆိုတော့ ဦးကျော်ဆန်းနေရာမှာ ဦးအောင်ကြည် အစားထိုးမယ် ဆိုပြီး ထွက်နေတဲ့ သတင်း မှန်တဲ့ပုံပဲ”ဟု ပြည်တွင်း သတင်းသမား တဦးက ပြောဆိုသည်။
ဒေါက်တာ စိုင်းမောက်ခမ်းက အာဇာနည်ခေါင်းဆောင်များကို အလေးပြု၊ ရှိခိုးဦးချ အမျှဝေပြီးနောက် အာဇာနည် ဗိမာန်မှ ပြန် လည် ထွက်ခွာ သွားသည်။
မနက် ၈ နာရီ ၁၅ မိနစ်ဝန်းကျင်တွင် အဖြူရောင် အင်္ကျီ၊ ယောဂီရောင် ထဘီနှင့် အနက်ရောင် ပုဝါကို ၀တ်ဆင် ထားသော အမျိုးသမီး တဦး အာဇာနည် ဗိမာန်ပေါ်သို့ တဖြည်းဖြည်း လှမ်းတက်လာသည်။
သူ၏ရှေ့တွင် လွမ်းသူ့ပန်းခြင်းနှင့် လွမ်းသူ့ပန်းခွေ နှစ်ခုကို အနက်ရောင်တိုက်ပုံဝတ် လူငယ်များက တဖြည်းဖြည်းချင်း မသယ်လာ သည်။
အမျိုးသမီး၏ မျက်ဝန်းက တောက်ပလှသော်လည်း မျက်နှာက တည်ကြည်မှုနှင့် လွမ်းဆွမ်မှု တချို့ ရောယှက်နေသည်။ သူသည်
လွတ်လပ်ရေး ဖခင်ကြီး အာဇာနည် ဗိုလ်ချုပ်အောင်ဆန်း ၏ သမီးငယ်လည်းဖြစ်သည့် မြန်မာ့ဒီမိုကရေစီ ခေါင်းဆောင် ဒေါ်အောင် ဆန်းစုကြည် ဖြစ်သည်။
သူ၏ လက်နှစ်ဘက်ကို ခပ်ဖွဖွဆုပ်ထားပြီး အာဇာနည်ဗိမာန်ရှေ့သို့ တဖြည်းဖြည်းချင်း လှမ်းလျှောက် လာသည်။ ယင်းနောက် လွမ်း သူ့ပန်းခြင်းကို ဗိမာန်ရှေ့တွင် ချပြီး ဦးခေါင်းကို ညွှတ်ကာ အလေးပြု လိုက်သည်။
အလေးပြုပြီးနောက် ကော်ဇောခင်းထားသော နေရာတွင် ထိုင်ချပြီး ထိခြင်းငါးပါးဖြင့် လက်ဆယ်ဖြာ မိုး၍ အာဇာနည် ဗိမာန်ရှေ့တွင် ဦးချ ကန်တော့လိုက်သည်။ ယင်းနောက် အာဇာနည်ဗိမာန်မှ ပြန်လည် ထွက်ခွာ သွားတော့သည်။
ယခုနှစ် အာဇာနည်နေ့ အခမ်းအနားသို့ ဗိုလ်ချုပ်အောင်ဆန်း ၏ သားကြီးဖြစ်သူ ဦးအောင်ဆန်းဦး မတက်ရောက်ဘဲ ကိုယ်စားလှယ် လွှတ်၍ လွမ်းသူ့ ပန်းခွေပို့ အလေးပြုသည်ကို တွေ့ရသည်။
အာဇာနည်ခေါင်းဆောင်များ၏ မိသားစုများ၊ တိုင်းဒေသကြီး အစိုးရ တာဝန်ရှိသူများ၊ အသင်းအဖွဲ့များ၊ နိုင်ငံရေးပါတီများ အသီးသီး
အလေးပြုပြီးနောက် နံနက် ၁၀ နာရီမှ စတင်ပြီး အများပြည်သူ ထောင်ပေါင်းများစွာက စတင် အလေးပြုကြသည်။
ယခုနှစ် အာဇာနည်နေ့သည် အာဇာနည်ဗိမာန်သွားရာ လမ်းတလျှောက် လူထောင်ပေါင်းများစွာ လာရောက် အလေးပြုကြသည့် အတွက် အာဇာနည်ဗိမာန် ၀န်းကျင်တလျှောက် လူတန်းကြီးများစွာ ဖြစ်နေသည်။
တာဝန်ရှိသူများကလည်း တင်းကျပ်စွာ စစ်ဆေးခြင်းမပြုဘဲ လူငါးယောက် တတွဲ စနစ်တကျ အာဇာနည် ဗိမာန်သို့ ညီညာစွာသွား ရောက် အလေးပြုကြရန် လိုက်လံ နှိုးဆော်နေသည်။ နေ့လယ် ၁၂ နာရီကျော်တွင် မိုးက သဲသဲမဲမဲ ရွာချ လာပြီ ဖြစ်သော်လည်း အာဇာနည်ဗိမာန် သွားရာလမ်း တလျှောက်တွင် လူများ ထောင်နှင့်ချီ ရှိနေဆဲ ဖြစ်သည်။
မိုးက သဲသဲမဲမဲရွာလိုက် တိတ်လိုက်ဖြစ်နေပြီး အာဇာနည်ဗိမာန် သွားရာ လမ်းတလျှောက် ချီတက်နေသော လူအုပ်ကြီးမှာ ရွာချနေ သော မိုးကို ဂရုမမူဘဲ အာဇာနည်ဗိမာန်သို့ တရွေ့ရွေ့လှမ်းလျှောက်နေကြဆဲ။
အမျိုးသား ဒီမိုကရေစီ အဖွဲ့ချုပ် ရုံးချုပ်ရှိရာ ရွှေဂုံတိုင်တွင်လည်း အာဇာနည်နေ့ အခမ်းအနား ကျင်းပနေသည့် အတွက် လူထောင်ချီ ရှိနေသည်။
ညနေ ၃ နာရီဝန်းကျင်တွင် ၈၈ မျိုးဆက်ကျောင်းသား ခေါင်းဆောင် မင်းကိုနိုင် ဦးဆောင်ပြီး အနုပညာရှင်များ၊ အဆိုတော်များ၊
သရုပ်ဆောင်များ ပါဝင်သော လူငါးရာကျော် ရှိသည့် လူအုပ်ကြီးက မိုးတဖွဲဖွဲ ကျနေသည့် ကြားမှ အမိုးအကာ မပါဘဲ အာဇာနည် ဗိမာန်သို့ ချီတက်လာသည်။
ကျောင်းသားသမဂ္ဂ အလံတော်ဖြစ်သည့် အနီရောင် ခွပ်ဒေါင်း အလံကလည်း ချီတက်ရာ လမ်းကြောင်း တလျှောက်တွင် တလူလူ လွင့် နေသည်။
ပြည်သူရာပေါင်းများစွာကလည်း ၈၈ မျိုးဆက်ကျောင်းသားများ နှင့် အနုပညာရှင် များကို ၀န်းရံပြီး လိုက်လံ ချီတက်ကြသည်။ တဖွဲဖွဲ ကျနေသည့် မိုးက သည်းသထက် သည်းလာသည်။
အာဇာနည်ကုန်းကို ချီတက်နေသော လူအုပ်က များသထက်များလာပြီး ထောင်ဂဏန်းကျော် အထိ ရှိလာသည်။ အာဇာနည် ဗိမာန် ရှေ့ဝန်းကျင်တခုလုံး လူများနှင့်ပြည့်နှက်နေသည်။
“ဗိုလ်ချုပ်အောင်ဆန်းဆိုတာ ဖေဖေတို့ တိုင်းပြည် လွတ်လပ်ရေး ရယူပေးခဲ့တဲ့ ခေါင်းဆောင်။ သူ့ကို မသမာတဲ့ လူတွေက လုပ်ကြံ လိုက်တာ။ အဲဒါကြောင့် အဲဒီနေ့ကို အာဇာနည်နေ့လို့ သတ်မှတ်တာ”ဟု ဆိုသော အသံက အသက် ၄၀ ကျော် အမျိုးသား တဦးဆီမှ ထွက်ပေါ် လာခြင်းဖြစ်ပြီး သူ၏သမီးငယ်ဖြစ်ပုံရသည့် အသက် ၅ နှစ် ၀န်းကျင်မျှသာ ရှိသေးသော ကလေးငယ်ကို ရှင်းပြနေခြင်း ဖြစ် သည်။
အာဇာနည်ဗိမာန်သို့ လာရောက်သော လူအုပ်က တဖြည်းဖြည်း များလာရုံမျှမက သံဃာတော်များ၊ သီလရှင်များ၊ ခရစ်ယာန် ဘုန်းတော်ကြီး တချို့နှင့် သီလရှင်တချို့ပါ လူအုပ်တွင် ပါဝင်လာသည်ကို တွေ့ရသည်။
ညနေ လေးနာရီ ဆိုလျှင် အာဇာနည်ဗိမာန် ပိတ်တော့မည်။ သို့သော်လည်း မိုးရွာသွန်းနေသော အာဇာနည် ဗိမာန် လမ်းတလျှောက် လူအုပ်ကြီးက တိုးဝှေ့နေဆဲ။
အာဇာနည်ဗိမာန်နှင့် မနီးမဝေး၌ ရပ်ထားသည့် Light Truck ကားပေါ်တွင် တပ်ဆင် ထားသော လော်စပီကာမှ “ငါတို့ ဗမာပြည် ၀ယ် မိဘတိုင်း ကကွယ် ဗိုလ်အောင်ဆန်းလို ဇွဲသတ္တိတွေ မွေးရမယ်”ဟူသော သီချင်းသံကလည်း အာဇာနည်ဗိမာန် ၀န်းကျင်တွင် ပျံ့လွင့် နေဆဲ ဖြစ်ပါသည်။ ။
Ref: ဧရာဝတီ
Friday, July 20, 2012
မိုးထဲ လေထဲ ပြောင်းလဲလာသည့် သမိုင်းဝင် အာဇာနည်နေ့
အာဇာနည်နေ့ အခမ်းအနား ဒု သမ္မတ ဒေါက်တာ စိုင်းမောက်ခမ်းနဲ့ ဒေါ်အောင်ဆန်း စုကြည် တက်ရောက်
2012-07-19
ရန်ကုန်မြို့ အာဇာနည် ဗိမာန်မှာ ဒီကနေ့မနက် ကျင်းပတဲ့ (၆၅) နှစ်မြောက် အာဇာနည်နေ့ အခမ်းအနားကို မြန်မာ အစိုးရ ကိုယ်စား ဒုတိယ သမ္မတ ဒေါက်တာ စိုင်းမောက်ခမ်း တက်ရောက်ခဲ့သလို ဒေါ်အောင်ဆန်းစုကြည်နဲ့ တကွ အာဇာနည် ခေါင်းဆောင်ကြီးတွေရဲ့ ကျန်ရစ်တဲ့ မိသားစု ၀င်တွေလည်း တက်ရောက်ကာ ၁၉၄၇ ခုနှစ် ဇူလိုင် ၁၉ ရက်နေ့က နယ်ချဲ့ လက်ပါးစေတွေရဲ့ လက်ချက်နဲ့ ကျဆုံး သွားခဲ့ရတဲ့ ဗိုလ်ချုပ်အောင်ဆန်းနဲ့ တကွ တခြား အာဇာနည် ခေါင်းဆောင်ကြီးတွေ ဖြစ်ကြတဲ့ ဦးဘဝင်း၊ မန်းဘခိုင်၊ ဒီးဒုတ် ဦးဘချို၊ သခင်မြ၊ မိုင်းပွန် စော်ဘွားကြီး စဝ်စံထွန်း၊ ဦးရာဇတ်၊ အတွင်းဝန် ဦးအုန်းမောင်နဲ့ ရဲဘော် ကိုထွေးတို့ရဲ့ အုတ်ဂူတွေမှာ လွမ်းသူ့ပန်းခွေချ အလေးပြု ခဲ့ကြပါတယ်။
အာဇာနည်နေ့ အခမ်းအနားကို အစိုးရ ထိပ်တန်း ခေါင်းဆောင်တွေ တက်ရောက်ခြင်း မပြုတာ ကြာပြီဖြစ်ပြီး အခုနှစ်မှာ ဒုတိယ သမ္မတ တစ်ဦး တက်ရောက်တဲ့ အပြင် အစိုးရပိုင် ရုပ်မြင် သံကြားကလည်း တိုက်ရိုက် ထုတ်လွှင့် ပြသခဲ့တဲ့အတွက် မြန်မာ့နိုင်ငံရေး ထူးခြား တိုးတက်မှု တစ်ခုအဖြစ် ရှုမြင်ကြပါတယ်။
မနှစ်က ကျင်းပတဲ့ အခမ်းအနားကို ရန်ကုန် မြို့တော်ဝန်ပဲ တက်ရောက် ခဲ့ပါတယ်။ ဒီကနေ့ ကျင်းပတဲ့ အခမ်းအနားကို တခြားနိုင်ငံရေး ပါတီ အသီးသီးက ကိုယ်စားလှယ်တွေ၊ သံတမန်တွေလည်း တက်ရောက် ဂါရဝပြု ခဲ့ကြပါတယ်။
အဲဒီနောက်ပိုင်း NLD အမျိုးသားဒီမိုကရေစီ အဖွဲ့ချုပ် ရုံးချုပ်မှာ ကျင်းပခဲ့တဲ့ အာဇာနည်နေ့ အခမ်း အနား မှာတော့ ပါတီ ဥက္ကဋ္ဌ ဒေါ်အောင်ဆန်း စုကြည်က မြန်မာနိုင်ငံမှာ အာဇာနည် စိတ်ဓာတ်တွေ ပြန့်ပွားစေဖို့ အတွက် လူတိုင်းရင်ထဲမှာ အာဇာနည်တွေကို လေးစားတဲ့ စိတ်ဓာတ်တွေ ရှိဖို့ လိုအပ်ကြောင်း ပြောကြားခဲ့ပါတယ်။
NLD ရုံးချုပ်မှာ ကျင်းပတဲ့ အာဇာနည်နေ့ အခမ်းအနားကို ပါတီခေါင်းဆောင်တွေ၊ အမေရိကန် သံအမတ်ကြီး Derek Mitchell အပါအ၀င် နိုင်ငံတကာ သံတမန်တွေ၊ (၈၈) မျိုးဆက် ကျောင်းသား ခေါင်းဆောင်တချို့ အပါအ၀င် စုစုပေါင်း အင်အား (၃၀၀၀) လောက် တက်ရောက်ခဲ့ပါတယ်။
အာဇာနည်ခေါင်းဆောင်တွေ လုပ်ကြံခံခဲ့ရတဲ့ နံနက် ၁၀ နာရီ ၃၇ မိနစ် အချိန်မှာ အားလုံးက အာဇာနည်ကုန်းဘက်ကို မျက်နှာမူပြီး တစ်မိနစ်ခန့် ငြိမ်သက်စွာ အလေးပြုခဲ့ကြပါတယ်။
အလားတူ အာဇာနည်နေ့ အခမ်းအနား တစ်ခုကို ရန်ကုန်မြို့ ဒီမိုကရက်တစ် ပါတီ ( မြန်မာ) ရုံးချုပ်မှာ ဒီကနေ့ မနက်ပိုင်းက ကျင်းပ ခဲ့ရာမှာ စာရေးဆရာ မောင်ဝံသ၊ ဆရာကျော်ဝင်းနဲ့ ဆရာဟိန်းလတ်တို့က အာဇာနည်နေ့နဲ့ ပတ်သက်တဲ့ အကြောင်းအရာတွေကို ဟောပြော ခဲ့ကြပါတယ်။
Ref: RFA News
မန္တလေး အစိမ်းရောင် လုပ်ငန်းငယ်များ ဖယ်ရှားပြောင်းရွှေ့ ခံရ
နေမျိုး
ကြာသပတေးနေ့၊ ဇူလိုင်လ ၁၉ ရက် ၂၀၁၂
နယူးဒေလီ (မဇ္ဈိမ)။ ။ မန္တလေးတိုင်း၊ ချမ်းအေးသာစံမြို့နယ်၊ မြို့တော်ဥယျာဉ် သာယာ လှပရေး အကောင်အထည် ဖော်ဆောင်ရွှက် ခဲ့သည့် ပန်းပညာရှင်များ၏ ပျိုးပင်လုပ်ငန်း ဆိုင်ခန်းများအား ဇူလိုင် ၁၉ ရက်နေ့က စည်ပင်မှ စတင် ဖယ်ရှားနေကြောင်း သိရသည်။
ကာလပေါက်ဈေး တဆိုင်လျှင် ကျပ်ငွေ သိန်း ၂ဝဝ ခန့်တန်ဖိုးရှိ ပျိုးဥယျာဉ် လုပ်ငန်း လုပ်ကိုင်သည့်ဆိုင် ၄ ဆိုင်အား စည်ပင် အမိန့်ဖြင့် ဖယ်ရှား ဖြိုချလိုက်ကြောင်း ပန်းပညာရှင်လည်းဖြစ် ဥယျာဉ်မှူး တဦးလည်းဖြစ်သူ ဦးလှထွန်းအောင်က ပြောသည်။
“ကျနော်တို့ အဆောက်အဦး၊ ဆိုင်ခန်းတွေ ဖျက်ဆီးဖြိုချ လိုက်တယ်။ သစ်ပင်၊ ပန်းပင်တွေလည်း သေကြေ၊ ပျက်ဆီး တယ်။ ဒုသမ္မတကြီးပြောတဲ့ အစိမ်းရောင် စီးပွားရေး၊ အများပြည်သူ ဝိုင်းဝန်းကူညီပေး ဆိုတဲ့ ဆောင်ပုဒ်၊ လေထဲမှာပဲ ပျောက်သွားတယ်။ ဘယ်သူက ကာကွယ်ပေးမလဲ၊ အစိမ်းရောင် စီးပွားရေးကို ဘယ်သူမှ အကာကွယ် မပေးပါဘူး” ဟု မဇ္ဈိမကို ပြောသည်။
မြို့တော်ဥယျာဉ်အနီးတဝိုက်ရှိ ညဘက် လုပ်ငန်းများဖြစ်သည့် ဘီယာ၊ အရက်၊ ကာရာအိုကေ တေးဂီတ လုပ်ငန်းများ အား ဖယ်ရှားခြင်း မရှိဘဲ ပျိုးဥယျာဉ် လုပ်ငန်းလုပ်ကိုင် ဆိုင်ခန်းများအား ရွှေးချယ် ဖယ်ရှားခဲ့ခြင်း ဖြစ်သည်ဟု ၎င်းဆိုသည်။
မန္တလေးမြို့၏ ဂုဏ်သိက္ခာနဲ့အညီ အများပြည်သူ အပန်းဖြေရန် ဥယျာဉ်တခု လိုအပ်ချက်ကြောင့် အကောင်အထည် ဖော်ရန် ဦးလှထွန်းအောင် အပါအဝင် ပန်းပျိုးပင် လုပ်ငန်း ပညာရှင် ၄ ဦးအား ၁၉၉၄ ခုနှစ်က မန္တလေးမြို့တော်ဝန် ဦးထွန်းကြည်က တာဝန်ပေးခဲ့ခြင်း ဖြစ်သည်။
နှစ်ပေါင်းများစွာ ဆောင်ရွက်ခဲ့ပြီး စိမ်းစိမ်းစိုစိုဖြင့် မြို့တော်ဥယျာဉ် အကောင်အထည် ပေါ်လာပြီးနောက် ဥယျာဉ်နှင့် လိုက်လျော ညီထွေရှိသည့် ပျိုးပင်များ ရောင်းချသည့် ဆိုင်ခန်းများအား ဖွင့်လှစ်စေကာ စည်ပင်အား လစဉ် ဆိုင်ခန်း ငှားရမ်းခများ မပျက်မကွက် ထမ်းဆောင် ခဲ့ရသည်ဟု သူက ဆက်ပြောသည်။
“တကယ်ဆို ပျိုးပင်လုပ်ငန်းဆိုတာ စီးပွားဖြစ်တဲ့ အလုပ်မျိုး မဟုတ်ပါဘူး။ ဝါသနာ တကယ်ပါမှ လုပ်လို့ရတဲ့ လုပ်ငန်းပါ။ အရက်၊ ဘီယာတွေဟာ လူအတွက် အန္တရာယ်တွေပါ။ အင်မတန်ပူတဲ့ မန္တလေးလို မြို့ကြီးမှာ သစ်ပင် ပန်းပင်ရောင်းတဲ့ လုပ်ငန်းတွေ အသက်တိုပြီး ပျောက်ဆုံးသွားမှာ အရမ်း စိုးရိမ်ပါတယ်” ဟု ပြောသည်။
ထိုကိစ္စနှင့်ပါတ်သက်ပြီး မြို့တော်ဝန်ထံ စာတင်ခဲ့ရာ မြို့တော်ဝန်က ပြန်လည် နေရာ ချထားပေးမည် ဟု ဆိုကာ နှစ်စဉ် ရေမြုပ်သည့် ကန်တော်ကြီးတွင် မြေနေရာ ချပေးကြောင်း “သစ်ပင်၊ ပန်းပင် သမားတွေဆိုတာက မြေအမျိုးအစား အရေးကြီးပါတယ်။ တခြား လုပ်ငန်းနဲ့ မတူပါဘူး” ဟု ဦးလှထွန်းအောင် က ဆိုသည်။
စည်ပင်မှဆွေးနွေး တိုင်ပင်ညှိနှိုင်းခြင်းမရှိဘဲ ပြောင်းရွေ့ရမည့်ရက် အလွန် နီးကပ် ချိန်တွင် တဘက်သတ် ပြောင်းရွှေ့မိန့် ထုတ်ကာ ဆိုင်ခန်းများအား ဖြိုချခဲ့သည်ဟု ၎င်းက ဆိုသည်။
စည်ပင်သာယာမှ ကစားကွင်းနှင့် မြို့တော်ဥယျာဉ် အဆင့်မြှင့်တင်ရေး စီမံချက် အတွက်ဟု အကြောင်းပြ၍ ထိုသို့ ဆိုင်ခန်းများအား ပြောင်းရွှေ့နေရာ ချထားစေခြင်းဖြစ်ကြောင်း သိရသည်။ သို့သော် ဥယျာဉ် အနီးတဝိုက် စည်းကား လာမှုကြောင့် ဥယျာဉ် အတွင်းရှိ ကစားကွင်းအား လေလံဆွဲသည့် လုပ်ငန်းရှင်ကြီးများ ဝင်ရောက် လာခြင်းကြောင့်ဟု လူအများက ခန့်မှန်းပြောဆို ကြသည်။
ယခင်က အဆိုပါ ပန်းပညာရှင်နှင့် စည်ပင်သာယာတို့ ပူးပေါင်းကာ အကြိမ်ဖန်များစွာ အစိမ်းရောင် ဗဟုသုတ အတွက် ပြည်သူအား ပန်းပြပွဲ၊ ပန်းပြိုင်ပွဲများ ကျင်းပ ပြုလုပ်ခဲ့လေ့ရှိသည်။
Ref: မဇ္ဈိမ
ကာကွယ်ရေး ဦးစီးချုပ် အိန္ဒိယနိုင်ငံကို သွားမည်
2012-07-19
အိန္ဒိယ မြန်မာနှစ်နိုင်ငံ စစ်ရေးဆိုင်ရာ ဆက်ဆံမှု ခိုင်မာမြဲမြံရေး အတွက် ကာကွယ်ရေး ဦးစီးချုပ် ဒုတိယ ဗိုလ်ချုပ်မှူးကြီး မင်းအောင်လှိုင်ဟာ လာမယ့် သြဂုတ် လဆန်းပိုင်းမှာ အိန္ဒိယနိုင်ငံကို လာရောက်မှာ ဖြစ်ကြောင်း အိန္ဒိယ သတင်းမီဒီယာတွေက မနေ့က ဖော်ပြခဲ့ကြပါတယ်။
ကာကွယ်ရေး ဦးစီးချုပ်ဟာ အိန္ဒိယနိုင်ငံမှာ သြဂုတ်လ (၁) ရက်နေ့ကနေ (၈) ရက်နေ့ အထိ နေထိုင်မှာဖြစ်ပြီး အိန္ဒိယ ကာကွယ်ရေး ၀န်ကြီး မစ္စတာ A K Antony အပါအ၀င် ကြည်း၊ ရေ၊ လေ အကြီးအကဲတွေနဲ့ တွေ့ဆုံမှာ ဖြစ်ပါတယ်။
ဒါအပြင် အရှေ့ပိုင်း ကြည်းတပ်၊ ရေတပ်စခန်း ဌာနချုပ်တွေနဲ့ တခြား ကာကွယ်ရေး ဆိုင်ရာ နေရာ ဌာနတွေကို သွားရောက် ကြည့်ရှုမယ်လို့ သိရပါတယ်။ ဒုတိယ ဗိုလ်ချုပ်မှူးကြီး မင်းအောင်လှိုင်ဟာ ဗုဒ္ဒဂါယာကိုလည်း သွားရောက်မှာ ဖြစ်ပါတယ်။
ပြီးခဲ့တဲ့ မေလကုန်ပိုင်းက အိန္ဒိယ ၀န်ကြီးချုပ် မန်မိုဟန်ဆင်း မြန်မာနိုင်ငံကို အလည်အပတ် သွားရောက် ခဲ့ပြီးတဲ့နောက် မကြာခင်မှာ ဒုတိယ ဗိုလ်ချုပ်မှူးကြီး မင်းအောင်လှိုင်ရဲ့ အိန္ဒိယခရီးစဉ် ပေါ်ပေါက်လာတာ ဖြစ်ပါတယ်။
မြန်မာ့ ဒီမိုကရေစီရေးအပေါ် ထောက်ခံအားပေးခဲ့တဲ့ အိန္ဒိယ အစိုးရဟာ ၁၉၉၀ ခုနှစ် နောက်ပိုင်းမှာ မူဝါဒ ပြောင်းလဲ သွားခဲ့ပြီး အနောက်နိုင်ငံတွေ စိုးရိမ်နေတဲ့ကြားက မြန်မာ စစ်အစိုးရကို ပင်လယ်ပြင် ကင်းလှည့် လေယာဉ်တွေ၊ ၁၀၅ မမ အမြောက်တွေ၊ စစ်ရေယာဉ်တွေ၊ စိန်ပြောင်းတွေနဲ့ ရိုင်ဖယ်သေနတ်တွေ ထောက်ပံ့ခဲ့ပါတယ်။
Ref: RFA News
ဘင်္ဂါလီ ရိုဟင်ဂျာကိစ္စ နိုင်ငံတကာ စည်းဝေးပွဲ ကျင်းပမည်
2012-07-19
မြန်မာနိုင်ငံ ရခိုင်ပြည်နယ်က ဘင်္ဂါလီ ရိုဟင်ဂျာတွေ ကိစ္စနဲ့ ပတ်သက်ပြီး အာဆီယံ အဖွဲ့ဝင် နိုင်ငံတွေ အတွင်း ဖြေရှင်းနိုင်ရေး အတွက် လာမယ့် သြဂုတ်လ (၁၄) ရက်နေ့မှာ နိုင်ငံတကာ စည်းဝေးပွဲ တစ်ရပ် ကျင်းပမယ်လို့ မလေးရှား Bernama သတင်းက ဖော်ပြပါတယ်။
ရိုဟင်ဂျာ အစ္စလာမ်တွေအတွက် လူသားချင်း စာနာတဲ့ အခြေခံ လိုအပ်ချက်တွေ ထောက်ပံ့ ကူညီနိုင်အောင် အဖွဲ့ကြီး တစ်ခု ဖွဲ့စည်းဖို့ စည်းဝေးပွဲ ကျင်းပတာ ဖြစ်ကြောင်း မလေးရှား နိုင်ငံတကာ အစ္စလာမ်မစ် ပူးပေါင်း ဆောင်ရွက်ရေးအဖွဲ့ ဥက္ကဋ္ဌက ပြောပါတယ်။
စည်းဝေးပွဲ ကျင်းပမယ့်နေရာကို မကြာခင် ဆုံးဖြတ်မှာဖြစ်ပြီး ဒေသတွင်းက အစိုးရ မဟုတ်တဲ့ အစ္စလာမ် အဖွဲ့အစည်းတွေ တက်ရောက်ကြဖွယ် ရှိတယ်လို့လည်း ဆိုပါတယ်။ ဒီအတွင်း နိုင်ငံတကာ လွတ်ငြိမ်း ချမ်းသာခွင့်အဖွဲ့ AI ကလည်း ရခိုင်ပြည်နယ် အတွင်း အကြမ်းဖက်မှုတွေ ဆက်လက် ဖြစ်ပွားနေကြောင်း ကြားသိနေရတဲ့ အတွက် အစိုးရ အနေနဲ့ လူသားချင်း စာနာမှု ကူညီရေး အဖွဲ့တွေကို ၀င်ခွင့် ပေးသင့်ကြောင်း သတင်းဌာန တစ်ခုနဲ့ မေးမြန်းခန်း တစ်ခုမှာ ပြောဆိုပါတယ်။
ထိခိုက် သေဆုံးသူတွေနဲ့ နေရာပြောင်းရွှေ့ခံရသူ အရေအတွက်ကို မေးမြန်းရာ မှာတော့ ဒေသတွင်းကို ၀င်ခွင့် မရတဲ့အတွက် အတိမကျ မသိရကြောင်း ပြောဆိုပါတယ်။
Ref: RFA News
မွန်စာပေ သင်ကြားရေး ဒေါ်လာတသန်း အစိုးရထောက်ပံ့မည်ဟုဆို
ကွန်းချမ်း
ကြာသပတေးနေ့၊ ဇူလိုင်လ ၁၉ ရက် ၂၀၁၂
စံခလပူရီ (မဇ္ဈိမ) ။ ။ ကျောင်းချိန်ပြင်ပတွင် တိုင်းရင်းသား စာပေကို သင်ကြားခွင့် ပြုမည် ဖြစ်ပြီး မွန်စာပေ သင်ကြားရေး အတွက် တနှစ်လျှင် ဒေါ်လာတသန်း ထောက်ပံ့သွားမည် ဖြစ်ကြောင်း သမ္မတ ဦးသိန်းစိန်နှင့် ဒီမိုကရေစီ မိတ်ဆွေများ ပါတီများမှ ခေါင်းဆောင်များ ဗုဒ္ဓဟူးနေ့က နေပြည်တော်တွင် တွေ့ဆုံစဉ် ရထား ပို့ဆောင်ရေးဝန်ကြီး ဦးအောင်မင်းက ပြောကြားခဲ့သည်။
တိုင်းရင်းသားဒေသများတွင် ကျောင်းချိန်အတွင်း သင်ခန်းစာများကို တိုင်းရင်းသား ဘာသာနှင့် တွဲ၍ သင်ကြားပေးရန် မွန်ဒေသလုံး ဆိုင်ရာ ဒီမိုကရေစီပါတီ (AMDP) ဒု-ဥက္ကဌ ဒေါက်တာနိုင်လှအောင်၏ တင်ပြချက်နှင့် ပတ်သက်ပြီး ပြည်ထောင်စု ဝန်ကြီးက သမ္မတ၏ ခွင့်ပြုချက်ဖြင့် ပြန်လည်ဖြေကြား လိုက်ခြင်း ဖြစ်သည်ဟု တွေ့ဆုံရာတွင် ပါဝင်သည့် ရခိုင်တိုင်းရင်းသားများ တိုးတက်ရေး ပါတီ (RNDP) အထွေထွေ အတွင်းရေးမှူး ဦးဦးလှစောက ပြောသည်။
“မွန်ပြည်သစ်ပါတီက နေပြီးတော့ မွန်ဒေသမှာ တိုင်းရင်းသားဘာသာ စာသင်ကျောင်းတွေ အတွက် တင်ပြထားတာ ရှိတယ်။ အလှူရှင်များ ကလည်း လှူထားတာ ရှိတယ်။ ငြိမ်းချမ်းရေး ဖြစ်မြောက်လို့ရှိရင် အဲဒီလှူထားတာကို ငြိမ်းချမ်းရေး ဒေသတွေမှာ ပြန်အသုံးချမှာ ဖြစ်တယ်။ မွန်စာသင်ကျောင်းတွေ အတွက် တနှစ်ကို ဒေါ်လာတသန်း ပေးမယ်လို့ သူတို့ စီစဉ်ထားတဲ့ အကြောင်းကို ဦးအောင်မင်းက ပြောတာပါ” ဟု မဇ္ဈိမကို ပြောသည်။
AMDP မှ အမျိုးသားလွှတ်တော် ကိုယ်စားလှယ် ဒေါက်တာ ဗညားအောင်မိုးက ဝန်ကြီး၏ ပြောဆိုချက်ကို စဉ်းစား သုံးသပ်ရန် လိုကြောင်းနှင့် နိုင်ငံတော် အစိုးရ အနေနှင့် တိုင်းရင်းသားတိုင်း၏ ပညာရေးဌာနကို ဖွင့်လှစ်ပေးပြီး စာပေ ယဉ်ကျေးမှု ရေရှည် တည်တံ့အောင် တာဝန်ယူရန် လိုကြောင်း ပြောသည်။
“အခုပေးပါတယ် ဆိုတဲ့ ဥစ္စာကလည်း စနစ်တကျ ရေရှည်ပုံစံနဲ့ ပေးတာ မဟုတ်ဘူး။ ဒီနှစ် ရပြီး နောင်နှစ် မရရင် မရဘူး။ ဒါက လတ်တလော တောင်းဆိုမှုကို ဖြေသိမ့်တာများ ဖြစ်နေမလား။ ဒါက ကျနော်တို့ စဉ်းစားစရာ။ နိုင်ငံတော် အစိုးရအနေနဲ့ ရိုးရိုးသားသားနဲ့ ဒီလောက် ပွင့်လင်းလာတယ်၊ ဒီလောက် စေတနာ ထားလာတယ် ဆိုရင်တော့ အများကြီး ဝမ်းသာပါတယ်” ဟု ဒေါက်တာ ဗညားအောင်မိုးက ပြောသည်။
ကျောင်းချိန် ပြင်ပတွင်သာ အတန်းတင် စာမေးပွဲအတွက် အကြုံး မဝင်သည့် မိခင်စာပေ သင်ကြားခြင်းမှာ တိုင်းရင်းသား ကလေးငယ်များ အတွက် ဝန်ထုပ်ဝန်ပိုး ဖြစ်လာစေနိုင်သည်သာမက ရေရှည် အကျိုးဖြစ်ထွန်းမှု နည်းပါးသည့် အတွက် ကျောင်းချိန် တွင်းတွင်သာ စာမေးပွဲစနစ်ဖြင့် သင်ကြား လိုကြောင်း တိုင်းရင်းသား နိုင်ငံရေး ခေါင်းဆောင်များက ပြောသည်။
“ကျောင်းပြင်ပဆိုတာ ကလေး ကစားချိန်၊ မလေးနက်တဲ့အချိန်။ အဲဒီတော့ ကျောင်းပြင်ပချိန်ကို စာသင်ခွင့် ပေးတယ် ဆိုတာ တိုင်းရင်းသားတွေကို လုံးဝ ဂရုမစိုက်တဲ့ သဘောမျိုးလို့ မြင်ပါတယ်။ ဒါက ကောင်းစေချင်တဲ့ သဘောမျိုး မဟုတ်ဘူး။ ဝတ်ကျေ တန်းကျေ လုပ်တဲ့သဘောမျိုး။ ဒါ့ကြောင့် ကျနော်တို့ပါတီက ကျောင်းပြင်ပချိန်ကို လက်မခံတာ” ဟု ဒေါက်တာ ဗညားအောင်မိုးက ပြောသည်။
ရှမ်းတိုင်းရင်းသားများ ဒီမိုကရက်တစ်ပါတီ (SNDP) မှ ပြည်သူ့လွှတ်တော် ကိုယ်စားလှယ် ဒေါ်နန်းဝါနုက “ကျောင်းချိန် အတွင်း ကာယ အချိန်မှာပဲ ဖြစ်ဖြစ် ထည့်သွင်းပြီး သင်ကြားစေချင်ပါတယ်။ ဖြစ်နိုင်ရင်တော့ အတန်းတင် စာမေးပွဲမှာ လည်း ဖြေစေချင်တာပေါ့နော်။ အဲဒီတော့မှ ကျမတို့ အတွက်လည်း ပိုပြီးတော့ အဓိပ္ပါယ် ရှိလာမယ်။ ကျမတို့ တိုင်းရင်းသား စည်းလုံး ညီညွတ်ရေး အတွက်ကော အဓိပ္ပါယ် ရှိလာမယ်” ဟု ဆိုသည်။
တိုင်းရင်းသားစာပေကို လွတ်လပ်ရေး အကြိုခေတ်တွင် စိတ်ကြိုက် ဘာသာရပ်အဖြစ် လည်းကောင်း၊ ပါလီမန် ဒီမိုကရေစီခေတ်တွင် မူလတန်း အောက်အဆင့်၌ လည်းကောင်း၊ မဆလ အစိုးရလက်ထက်တွင် ပညာရေး လက်တွေ့ ဖွံ့ဖြိုးရေး အချိန်၌လည်းကောင်း သင်ကြားခွင့် ရခဲ့သော်လည်း အတန်းတင် အစီအစဉ်တွင် ပါဝင်ခြင်း မရှိသည့်အတွက် ထိုက်သင့်သလောက် အကျိုး မရှိခဲ့ကြောင်း တိုင်းရင်းသားခေါင်းဆောင်များက ပြောသည်။
ကျောင်းချိန်ပြင်ပတွင်သာ တိုင်းရင်းဘာသာကို သင်ကြားပေးရန် လျာထားကြောင်းကို ပညာရေး ဝန်ကြီးဌာန ပြည်ထောင်စု ဝန်ကြီး ဒေါက်တာမြအေးကလည်း ဇွန်လ ၁၅ ရက်နေ့တွင် နေပြည်တော် ပညာရေးဝန်ကြီးဌာန အစည်းအဝေး ခန်းမ၌ ကျင်းပသည့် တိုင်းရင်းသား ဘာသာ သင်ကြားရေး အစည်းအဝေးတွင် ပြောကြား ခဲ့ဖူးသည်။
မိခင်ဘာသာ သင်ခန်းစာများကို တိုင်းရင်းသားဆရာ/ဆရာမများ၊ တိုင်းရင်းဘာသာ ကျွမ်းကျင် သူများ ဝိုင်းဝန်းစုပေါင်း
ပြုစုရမည် ဖြစ်ပြီး သင်ခန်းစာနှင့် ဆရာ့ လက်စွဲများကို အခြေခံပညာ သင်ရိုးညွှန်းတမ်း၊ သင်ရိုး မာတိကာနှင့် ကျောင်းသုံး စာအုပ် ကော်မတီက ဦးဆောင်၍ တိုင်းရင်သားစာပေနှင့် ယဉ်ကျေးမှုအသင်း (သို့မဟုတ်) တိုင်းရင်းသား စာပေ ပြန့်ပွားရေး အဖွဲ့တို့မှ ပူးပေါင်းရေးဆွဲမည် ဖြစ်ကြောင်း ဒေါက်တာမြအေးက ပြောဆိုသွားသည်။
Ref: မဇ္ဈိမ
ကချင် ငြိမ်းချမ်းရေး နှောင့်နှေးရခြင်း တရုတ်နှင့် မဆိုင်ဟုဆို
လဖိုင်
July 19, 2012
ကချင်ဒေသတွင် တိုက်ပွဲများ ပြန်လည်ဖြစ်ပွားခဲ့ပြီး အပစ်ရပ်ရန် ကိစ္စ နှောင့်နှေးခက်ခဲ နေရခြင်းမှာ အများ ထင်ကြေး ပေးသကဲ့သို့ တရုတ်သြဇာ သက်ရောက်မှုကြောင့် မဟုတ်ကြောင်း ကချင် လွတ်လပ်ရေး တပ်မတော် (KIA) ဒုတိယ စစ်ဦးစီးချုပ် ဗိုလ်မှူးချုပ် ဂွမ်မော်က ဧရာဝတီသို့ ပြောသည်။
ရခိုင်ပြည်နယ် ကျောက်ဖြူ ဒေသနှင့် တရုတ်နိုင်ငံ ကူမင်း မြို့သို့ သွယ်တန်း ထားသည့် သဘာဝ ဓာတ်ငွေ့ ပိုက်လိုင်း လုံခြုံရေး အရ တရုတ် အကျိုးစီးပွား ကာကွယ် လိုသောကြောင့် မြန်မာ့ တပ်မတော်က KIA ကို တိုက်ခိုက်ခြင်း ဖြစ်သည်ဟု ပြောဆိုနေကြခြင်းမှာ အခြေအနေ တခုတည်းကိုသာ ကြည့်ပြီး ဝေဖန်ကြခြင်း ဖြစ်ကြောင်း၊ ယင်းအချက်မှာ ယုတ္တိ မရှိကြောင်း ၎င်းက ဆက်ပြောသည်။
“နိုင်ငံတနိုင်ငံက တနိုင်ငံအပေါ် သြဇာလွှမ်းဖို့ဆိုတာ အတော် ခက်ပါတယ်။ နိုင်ငံမပြောနဲ့ ကျနော်တို့လို အဖွဲ့အစည်း ကိုတောင် သြဇာ သက်ရောက်ဖို့ ခက်ပါတယ်” ဟု ဗိုလ်မှူးချုပ် ဂွမ်မော်က ဆိုသည်။
ကချင်ပြည် လွတ်လပ်ရေး အဖွဲ့ (KIO) အနေဖြင့် ဇန်န၀ါရီ ၁၈ နှင့် ၁၉ ရက်နေ့က ပြည်ထောင်စု အဆင့် ငြိမ်းချမ်းရေး အဖွဲ့မှ ဦးအောင်သောင်း ဦးဆာင်သော အဖွဲ့နှင့် တွေ့ဆုံစဉ် အဆင့် ၃ ဆင့်ပါ အဆိုပြုလွှာ တင်ခဲ့သည်။ ယင်း အဆိုပြုလွှာတွင် ပထမ အဆင့် တိုက်ပွဲများ ရပ်သွားစေရန် ကြိုးစားရမည်၊ အပစ် ရပ်စဲပြီးမှ ဒုတိယ အဆင့်ဖြစ်သော နိုင်ငံရေး ဆွေးနွေးပွဲများ ပြုလုပ်မည်ဟု ပါရှိသည်။
“ကျနော်တို့ကတောင် ဒုတိယအဆင့် နိုင်ငံရေး ဆွေးနွေးပွဲကို သွားဖို့ပြောနေတာ နိုင်ငံတော် အစိုးရက ဘာလို့ ဒီအဆင့်ကို မတက်တာလဲလို့ ဦးအောင်မင်းကို ကျနော် မေးထားသေးတယ်” ဟု ဦးဂွမ်မော်က ပြောသည်။
လက်ရှိ အပစ်အခတ် ရပ်စဲရေး အလွတ်သဘော တွေ့ဆုံမူများတွင်လည်း ဆွေးနွေးပွဲများ အရှိန် ရလာပါက ပုံစံပြောင်းသွား သည်မှာ ၃ ကြိမ် ရှိနေပြီဖြစ်ကြောင်း သူက ဆိုသည်။
KIA က အပစ်အခတ် ရပ်စဲရေးသာမက နိုင်ငံရေးအရ ဆွေးနွေးရန်ပါ ကမ်းလှမ်း ထားသော်လည်း လက်ရှိ အချိန်ထိ အလွတ်သဘော ဆွေးနွေးပွဲသာ များနေသေးကြောင်း၊ လတ်တလော တွင်လည်း တွေ့ဆုံရန် အတွက် နေရာ သတ်မှတ်ရန် အခက်အခဲကြောင့် ဇူလိုင်လ အစောပိုင်းက တွေ့ဆုံရန် စီစဉ်ထားမှုများ နှောင့်နှေးနေကြောင်း၊ အစိုးရ ထိန်းချုပ်ရာ နယ်မြေ ဗန်းမော်မြို့တွင် တွေ့ဆုံရန် စီစဉ်သော်လည်း ဗန်းမော် လမ်းတလျှောက် တိုက်ပွဲများ ဖြစ်ပွား နေခြင်းကြောင့် KIO က လွယ်ဂျယ်မြို့နယ်အနီး ပရန်ငွမ် ကျေးရွာတွင် တွေ့ဆုံရန် အဆိုပြုထားရာ ညှိနှိုင်းနေဆဲ ဖြစ်ကြောင်း သိရသည်။
KIO အနေဖြင့် တိုက်ပွဲများ စတင်ဖြစ်ပွားခဲ့သည့် ဇွန်လ ၉ ရက် နောက်ပိုင်း အစိုးရနှင့် စတင်တွေ့ဆုံခဲ့ရာ တရားဝင် တွေ့ဆုံခြင်းနှင့် အလွတ်သဘော တွေ့ဆုံခြင်းများ ပေါင်းလျှင် ၉ ကြိမ်ရှိပြီဖြစ်သည်။
KIO ဌာနချုပ်တည်ရှိရာ လိုင်ဇာဒေသရှိ ဂိတ်သည် တရားဝင်ဂိတ် မဟုတ်သော်လည်း တရုတ်အစိုးရက ရွှေအဆင့် သတ်မှတ်ထားသည့် ဂိတ်ပေါက်ဖြစ်သည်။
ယခုလ အတွင်းကပင် လိုင်ဇာသို့ လာသည့်လမ်းကို ပြည်နယ်လမ်းမကြီးအဖြစ် အဆင့်မြှင့်တင် ခဲ့သည်။ လိုင်ဇာ လမ်းသည် မြန်မာပြည်နှင့် ကုန်စည် စီးဆင်းရာတွင် အတိုဆုံးလမ်းမလည်း ဖြစ်သည်။
ယခုနှစ် ဧပြီလအတွင်းက ကချင်ပြည်နယ်အတွင်းရှိ စစ်ပွဲများဖြစ်ပွားနေသည့် ဒေသများသို့ ခရီးသွားလာကြမည့် တရုတ်နိုင်ငံသားများကို အထူးသတိ ထားကြရန် တရုတ်အစိုးရက သတိပေးထားကြောင်း တရုတ်နိုင်ငံ ဆင်ဟွာ သတင်းတွင် ဖော်ပြခဲ့သည်။
တရုတ် လျှပ်စစ်စွမ်းအင် ကုမ္ပဏီ CPI သည် ကချင်ပြည်နယ်အတွင်း၌ ရေကာတာများ ဆောက်လုပ်ခြင်းကို မြန်မာအစိုးရနှင့် ဆက်သွယ် ဆောင်ရွက်နေသည်။ CPI သည် ရပ်ဆိုင်းလိုက်သည့် မြစ်ဆုံဆည် စီမံကိန်းတွင် အဓိက လုပ်ကိုင်နေသော ကုမ္ပဏီ ဖြစ်ပြီး မကြာသေးခင်က ဒေသခံရွာသားများကို ဆန်များဝေငှပေးခဲ့သည်။ မြစ်ဆုံ စီမံကိန်း ပြန်လည်စတင်ဖြစ်လျှင် ဒေသခံများ၏ နစ်နာမှုအတွက် တာဝန်ယူမည်ဟုလည်း ပြောခဲ့သေးသည်။
KIA နှင့် အစိုးရတပ်များသည် ယမန်နှစ် ဇွန်လအတွင်းက တိုက်ပွဲများ ပြန်လည်ဖြစ်ပွားခဲ့ပြီး ၁၇ နှစ်ကြာမြင့်ခဲ့သည့် အပစ် အခတ် ရပ်စဲရေး သဘောတူညီချက်လည်း ပျက်ပြားသွားခဲ့ရသည်။ ယင်းတိုက်ပွဲများကြောင့် ဒေသခံ အရပ်သား ပြည်သူ ၇၅၀၀၀ ခန့် ထွက်ပြေး တိမ်းရှောင်ခဲ့ရသည်။
Ref: ဧရာဝတီ
လူငယ်များ အာဇာနည်စိတ်မွေးရန် ဒေါ်စုတိုက်တွန်း
မျိုးသန့်
ကြာသပတေးနေ့၊ ဇူလိုင်လ ၁၉ ရက် ၂၀၁၂
ရန်ကုန်(မဇ္ဈိမ)။ ။ လူငယ်များ ကိုယ်ကျိုးမရှာသည့် မြင့်မြတ်သော အာဇာနည် စိတ်ဓာတ် မွေးကြရန် အမျိုးသား ဒီမိုကရေစီ အဖွဲ့ချုပ် NLD ဥက္ကဋ္ဌ ဒေါ်အောင်ဆန်းစုကြည်က ကြာသပတေးနေ့တွင် ကျရောက်သည့် ၆၅ နှစ်မြောက် အာဇာနည်နေ့ အခမ်းအနားတွင် တိုက်တွန်းပြောကြား သွားသည်။
လူထုပရိသတ် ၂,ဝဝဝ ကျော်ခန့် တက်ရောက် ဂါရဝပြုခဲ့ ကြသည့် NLD ရုံးချုပ်တွင်ပြုလုပ်သည့် အာဇာနည်နေ့ အခမ်း အနားတွင် ဒေါ်အောင်ဆန်းစုကြည်က အာဇာနည်စိတ်ဓါတ် မွေးမြူလေ့ကျင့်ကြရန် မြန်မာ လူငယ်များကို တိုက်တွန်းပြောကြား သွားခြင်း ဖြစ်သည်။
“ကျမတို့ လူငယ်တွေဟာ မြင့်မြင့်ကြံကြပါ။ ကိုယ့်ကိုယ်ကို အာဇာနည် စိတ်ဓာတ်နဲ့ နေနိုင်တဲ့ ပုဂ္ဂိုလ်တွေ ဖြစ်အောင် လို့ လေ့ကျင့်ကြပါ။ လေ့ကျင့် ယူလို့ရှိရင် ရပါတယ်။ အာဇာနည် စိတ်ဓါတ်ထဲမှာ ကိုယ်ကျိုး မရှာတဲ့ မြင့်မြတ်တဲ့ စိတ်ထား တခုလည်း ပါပါတယ်။ ကိုယ်ကျိုး ရှာတဲ့စိတ် ပါသွားပြီဆိုရင် ကိုယ့်ရဲ့ တိုးတက်ရေး အတွက်၊ ကိုယ့်ရဲ့ကိုယ်ကျိုး ကြီးပွားရေး အတွက် ဆိုတာကို သိပ်ပြီးတော့ အလေးထား သွားပြီ ဆိုရင် ဒါဟာ အာဇာနည် မဟုတ်တော့ပါဘူး” ဟု ဒေါ်အောင်ဆန်းစုကြည်က ပြောကြား သွားခဲ့သည်။
ယင်းအပြင် ဒေါ်အောင်ဆန်းစုကြည်က တိုင်းပြည် အတွက် အာဇာနည်ခေါင်းဆောင်များ များများ မွေးထုတ်ပေးနိုင်ရန် ပညာရေး စနစ်ကို ပြုပြင်ရန် လိုအပ်သည်ဟု ပြောဆို သွားသည်။ မိဘများ အနေဖြင့်လည်း သားသမီးများကို ပြုစုပျိုး
ထောင်ပေးပါရန် တိုက်တွန်းသွားခဲ့သည်။
“ပညာရေးစနစ် ပြုပြင်ပြီးတော့မှ ပိုပြီးတော့ အမြင်ကျယ်တဲ့ ပိုပြီးတော့ စိတ်ထားမြင့်တဲ့ နိုင်ငံသူ နိုင်ငံသားတွေကို ပြုစု ပျိုးထောင် ချင်ပါတယ်။ မိဘများမှာလည်း တာဝန်ရှိပါတယ်။ မိဘတွေ ကိုယ်တိုင်က သားသမီးတွေကို မှန်ကန်တဲ့ အတွေးအခေါ်တွေ မှန်ကန်တဲ့ သဘောထားတွေ ရှိအောင်လို့ လုပ်ပေးရမှာပါ။ အဲဒီလိုလုပ်ပေးမှ ကျမတို့ဟာ အာဇာနည်တွေများတဲ့ တိုင်းပြည် ဖြစ်လာပါလိမ့်မယ်” ဟု ဆက်လက်ပြောသွားသည်။
၆၅ နှစ်မြောက် အာဇာနည်နေ့တွင် NLD မှလည်း ကြေညာချက်တစောင် ထုတ်ပြန်ခဲ့ပြီး တိုင်းရင်းသား လူမျိုး အချင်းချင်း အမှန်တကယ် ချစ်ကြည် ရင်းနှီးမှုရှိပြီး တဦးနှင့်တဦး ယုံကြည်မှုအပြည့်အဝရှိရန် တိုက်တွန်းထားသည်။
အစိုးရ ဝန်ထမ်းများနှင့် ပတ်သက်၍လည်း “အစိုးရ အရာထမ်း အမှုထမ်းများ သည်လည်း ကိုယ်ကျိုး မရှာဘဲ ပြည်သူ့ အကျိုးကို လေးစား စွာဆောင်ရွက်ကြလျက် ပြည်သူများ အကြည်ညို မပျက်စေရန် အထူး သတိထား ကြရပေမည်” ကြေညာချက် အတွင်း တိုက်တွန်းရေးသား ထားသည်။
ရန်ကုန်မြို့ အာဇာနည်ဗိမာန်တွင် ပြုလုပ်သည့် ၆၅ နှစ်မြောက် အာဇာနည်နေ့ အခမ်းအနားသို့ ဒေါ်အောင်ဆန်းစုကြည် တက်ရောက်၍ ကျဆုံး သွားကြသည့် သူ၏ ဖခင်ကြီး ဗိုလ်ချုပ်အောင်ဆန်း အပါအဝင် အာဇာနည် ခေါင်းဆောင်များကို သွားရောက် ဂါရဝပြုခဲ့သေးသည်။
အစိုးရဘက်မှလည်း ဒုတိယသမ္မတ ဒေါက်တာ စိုင်းမောက်ခမ်း အပါအဝင် လူမှု ကယ်ဆယ်ရေးနှင့် ပြန်လည်နေရာချ ထားရေးဝန်ကြီး ဦးအောင်ကြည်၊ ရန်ကုန်မြို့တော်ဝန် ဦးလှမြင့်တို့ အာဇာနည်ဗိမာန်သို့ သွားရောက် ဂါရဝပြုခဲ့ကြသည်။
အာဇာနည် ၉ ဦးဖြစ်သည့် ဗိုလ်ချုပ် အောင်ဆန်း၊ သခင်မြ၊ ဒီးဒုတ် ဦးဘချို၊ ဦးရာဇာတ်၊ မန်းဘခိုင်၊ မိုင်းပွန် စော်ဘွားကြီး စပ်စံထွန်း၊ ဦးဘဝင်း၊ ဦးအုန်းမောင်၊ ရဲဘော် ကိုထွေး တို့သည် ဗြိတိသျှကိုလိုနီ အုပ်စိုးမှု လက်ထက် ၁၉၄၇ ခုနှစ် ဇူလိုင်လ ၁၉ ရက်နေ့ ရန်ကုန်မြို့ အတွင်းဝန်များ ရုံးတွင် မသမာသူတစု၏ လုပ်ကြံ သတ်ဖြတ်ခြင်းကို ခံခဲ့ကြရသည်။
Ref: မဇ္ဈိမ
Thursday, July 19, 2012
လျှပ်စစ်မီး၊ ကျန်းမာရေး၊ ပညာရေး ကိစ္စများ သမ္မတထံ ၁၀ ပါတီ တင်ပြ
မျိုးသန့်
ဗုဒ္ဓဟူးနေ့၊ ဇူလိုင်လ ၁၈ ရက် ၂၀၁၂
ရန်ကုန် (မဇ္ဈိမ) ။ ။ ဒီမိုကရေစီ မိတ်ဆွေ ၁၀ ပါတီမှ ခေါင်းဆောင်များနှင့် သမ္မတ ဦးသိန်းစိန်တို့ ပထမဆုံး အကြိမ် တွေ့ဆုံမှုကို နေပြည်တော် သမ္မတ အိမ်တော်တွင် ဗုဒ္ဓဟူးနေ့က ပြုလုပ်ရာ ဒေသတွင်း လိုအပ်ချက်များ ဖြစ်သည့် လျှပ်စစ်မီးရရှိရေး၊ ကျန်းမာရေး စောင့်ရှောက်မှု မြှင့်တင်ပေးရေး၊ ကျောင်းပညာရေး လိုအပ်ချက်များ ဖြည့်ဆည်းပေးရန် တို့ကို တင်ပြဆွေးနွေးခဲ့သည်ဟု ပါတီခေါင်းဆောင်များက မဇ္ဈိမကို ပြောသည်။
“ကျနော်တို့က နိုင်ငံတည်ဆောက်ရေးမှာ တည်ဆောက်ဖေါ် တည်ဆောက်ဖက် အနေနဲ့ အကြံဉာဏ်တွေ ပေးကြဖို့၊ အတူတူ ဝိုင်းလုပ်ကြဖို့ ရည်ရွယ်ချက်နဲ့ တွေ့ဆုံတာပါ။ ပြည်နယ်တွေ ကတော့ သူတို့ ဆိုင်ရာပြည်နယ်တွေမှာ ကျန်းမာရေး၊ ပညာရေး၊ လျှပ်စစ်ရရှိရေး အဲဒါတွေမှာ လိုအပ်တာတွေကို အကူအညီပေးဖို့ တင်ပြပါတယ်” ဟု ဆွေးနွေးပွဲ တက်ရောက်ခဲ့သူ ဒီမိုကရက်တစ်ပါတီ (မြန်မာ) ဥက္ကဋ္ဌ ဦးသုဝေ က ပြောသည်။
“သမ္မတကတော့ သူတို့ကလည်း အစီအစဉ်တကျ လုပ်နေတယ်ပေါ့လေ။ အခု တင်ပြတာတွေထဲက ဖြစ်နိုင်တာတွေကို ချက်ချင်း လုပ်ပေးမယ် ဆိုပြီးတော့ ပြောပါတယ်” ဟုလည်း ဦးသုဝေ က ဆက်ပြောသည်။
ထို့အပြင် ဗဟိုအစိုးရ၏ ငြိမ်းချမ်းရေး ဆောင်ရွက်ချက်များ၊ စီးပွားရေး လုပ်ငန်းများ လုပ်ဆောင်နေမှုများကို ၁ဝ ပါတီ ခေါင်းဆောင်များသို့ သမ္မတ က ပြန်လည်ရှင်းပြခဲ့သည်ဟု အမျိုးသား ဒီမိုကရေစီ အင်အားစုပါတီ NDF ၏ ဥက္ကဋ္ဌ ဦးခင်မောင်ဆွေ က ပြောသည်။
ဆွေးနွေးပွဲတွင် ဦးခင်မောင်ဆွေက နိုင်ငံခြားရင်းနှီးမြှုပ်နှံမှုများ ဝင်ရောက် လာပါက အငြင်းပွားမှုများ ဖြေရှင်းနိုင်ရန် ခုံသမာဓိ အဖွဲ့ ဖွဲ့စည်းဖြေရှင်းနိုင်ရန် တင်ပြခဲ့သည်ဟုလည်း မဇ္ဈိမကို ပြောသည်။
NDF ၏ ပါတီခေါင်းဆောင်ဖြစ်သူ ဒေါက်တာသန်းငြိမ်း ကလည်း လက်ရှိ ကျင့်သုံးနေသည့် ရွေးကောက် တင်မြှောက်ပုံ စနစ်သည် မဲဆန္ဒနယ် တခုအတွင်း ပါတီနှစ်ခုမှ ကိုယ်စားလှယ်နှစ်ဦး ဝင်ပြိုင်ပါက မဲ တမဲ အသာဖြင့်ပင် အနိုင်ရသည့် စနစ် ဖြစ်ခြင်းကြောင့် မဲဆန္ဒရှင် အများစု၏ ဆန္ဒကို ကိုယ်စားပြုနိုင်ရန် လာမည့် ရွေးကောက်ပွဲ များတွင် ‘အချိုးကျ ကိုယ်စားပြုစနစ်’ ကို ပြောင်းလဲ အသုံးပြုရန် ဆွေနွေး တင်ပြခဲ့သည်ဟု သိရသည်။
ထိုတင်ပြချက်နှင့်ပတ်သက်၍ “သမ္မတက ဒီစနစ်တခုဟာ လူအများစုကို အကျိုးပြုတာ ဆိုတော့ သူလည်းပဲ သဘောကျ တာ ရှိပါတယ်။ ဒီကိစ္စကိုတော့ ကျယ်ကျယ်ပြန့်ပြန့် ဆွေးနွေးဖို့ လိုတယ်ပေါ့နော်။ အားလုံးလည်း သဘောတူမယ် ကောင်းတယ် ဆိုရင်တော့ လုပ်ကြမယ်ပေါ့ဗျာ” ဟု ဦးခင်မောင်ဆွေ က ပြောသည်။
အဆိုပါ သမ္မတနှင့် တွေ့ဆုံပွဲသို့ အမျိုးသား ဒီမိုကရေစီ အင်အားစု ပါတီ၊ ဒီမိုကရက်တစ် ပါတီ (မြန်မာ)၊ ရှမ်းတိုင်းရင်းသား များ ဒီမိုကရက်တစ်ပါတီ၊ မွန်ဒေသလုံးဆိုင်ရာ ဒီမိုကရေစီ ပါတီ၊ ဖလုံစဝေါ် ဒီမိုကရက်တစ်ပါတီ၊ ရခိုင်တိုင်းရင်းသားများ တိုးတက်ရေးပါတီ၊ ဒီမိုကရေစီနှင့် ငြိမ်းချမ်းရေး ပါတီ၊ ချင်းအမျိုးသားပါတီ၊ ပြည်ထောင်စု ဒီမိုကရေစီပါတီ၊ ညီညွတ်ရေး နှင့် ငြိမ်းချမ်းရေး ပါတီတို့မှ ပါတီခေါင်းဆောင် ၁၂ ယောက် တက်ရောက် ခဲ့ကြသည်။ အစိုးရ ဘက်မှ သမ္မတ ဦးသိန်းစိန် နှင့် အတူ မီးရထားဝန်ကြီး ဦးအောင်မင်းနှင့် စက်မှုဝန်ကြီး ဦးစိုးသိန်းတို့ တက်ရောက်ခဲ့ကြသည်။
သမ္မတ ဦးသိန်းစိန်က တိုင်းပြည်တိုးတက်ရေးအတွက် ညီညီညွတ်ညွတ်ဖြင့် ဆောင်ရွက်ကြရန် ၁ဝ ပါတီ ခေါင်းဆောင် များအား ပြောကြားခဲ့ပြီး “ကျနော်တို့လည်း အဲဒါပဲ လုပ်နေတယ်၊ ကျနော်တို့လည်း လိုလားတယ်ပေါ့လေ။ နောက် ဒီလို ကာလမှာ တယောက်နဲ့တယောက် သံသယတွေထားပြီးတော့ အငြင်းပွားနေကြရမယ့် အချိန် မဟုတ်တော့ဘူး။ အားလုံး စုပေါင်းပြီးတော့လုပ်ဖို့ ကြိုးစားမယ်။ ကျနော်တို့ကလည်း တိုင်းပြည်အတွက် ပူးပေါင်းပြီး လုပ်ဆောင်ဖို့ အဆင်သင့် ရှိပါတယ်ဆိုပြီးတော့ ပြောခဲ့ပါတယ်” ဟု ဦးသုဝေက မဇ္ဈိမကို ပြောဆိုသွားသည်။
Ref: မဇ္ဈိမ
Wednesday, July 18, 2012
“အမျိုးသားရေးဟာ ဆားလိုပဲ”
July 17, 2012
၈၈ မျိုးဆက် ကျောင်းသားများအဖွဲ့ဟာ မကြာသေးမီက ရခိုင်ပြည်နယ် ပဋိပက္ခဒေသတွေကို သွားရောက်ပြီး လိုအပ်နေသူ တွေကို အကူအညီပေးတာ၊ အားပေးနှစ်သိမ့် စကားတွေပြောတာတွေ အပြင် အချက်အလက် ရှာဖွေရေးတွေလည်း လုပ်ဆောင်ခဲ့ ကြပါတယ်။ ၈၈ မျိုးဆက် ကျောင်းသားခေါင်းဆောင် တဦးဖြစ်တဲ့ ကိုကိုကြီးကို ရခိုင်ပြည်နယ် ခရီးစဉ်နဲ့ ပတ်သက်ပြီး ဧရာဝတီ သတင်းထောက် လင်းသန့်က ဆက်သွယ်မေးမြန်း ထားပါတယ်။
မေး။ ။ ရခိုင်ပြည်နယ် ပဋိပက္ခဖြစ်တဲ့နေရာတွေဆီ သွားပြီး ပြန်လာတဲ့ ကိုကိုကြီး အနေနဲ့ ဟိုက အတွေ့ အကြုံတွေကို ပြောပြပေးပါ။
ဖြေ။ ။ စစချင်းတော့ စစ်တွေပေါ့။ စစ်တွေ ရောက်တော့ ရခိုင် ဒုက္ခသည် စခန်းတွေကို သွားပြီး အားပေးခဲ့တယ်။ အဲဒီမှာ ရခိုင် ဒုက္ခသည် စခန်းတွေကတော့ ဘုန်းကြီးကျောင်း တွေရယ်၊ စာသင်ကျောင်းတွေမှာရယ် လောလောဆယ် ဒုက္ခသည် တွေကို နေရာ ချထားပေးတယ်။ သူတို့တွေနဲ့ တွေ့ဆုံပြီးတော့ အများပြည်သူ လှူလိုက်တဲ့ ငွေတွေထဲက စခန်းတခုကို ကျပ် ၅ သိန်းစီ လိုက်ပြီး လှူဒါန်းခဲ့တယ်။ ပြီးတော့ သူတို့ကိုလည်း အားပေးနှစ်သိမ့် ခဲ့တယ်။
စစ်တွေမှာ ညအိပ်ပြီးတော့ နောက်နေ့မှာ ဘူးသီးတောင် မောင်တောကို တောက်လျှောက် သွားတယ်။ မောင်တောမှာ ကျတော့ အခြေအနေက တမျိုး။ မောင်းတောမှာ အများစုက ဘင်္ဂါလီတွေ ချည်းပဲ ဖြစ်နေတယ်။ အဲဒီနား ရှိသမျှ ရွာတွေ အားလုံးက ဘင်င်္ဂါလီ ရွာတွေချည်းပဲ။ မြို့ပေါ်မှာ ရခိုင် အနည်းအကျဉ်းပဲ ရှိတယ်။ အဲဒီမှာ မြို့ခံတွေ ပြောသလောက် ကတော့ ၉၇ ရာခိုင်နှုန်းလောက်က ဘင်္ဂါလီတွေ။
နောက်တော့ ရခိုင်ရွာတွေ မီးရှို့ဖျက်ဆီး ခံရတာတွေ သွားကြည့်တယ်။ သူတို့ အနေနဲ့က စိတ်ပိုင်း ဆိုင်ရာမှာ လုံခြုံမှု မရှိတော့တဲ့ အခြေ အနေမျိုးတွေ ဖြစ်နေတယ်။ နောက်ဆုံး မောရ၀တီရွာ ဆိုရင် တရွာလုံး မီးရှို့ ဖျက်ဆီး ခံရတယ်။ အဲဒီမှာ ဘုန်းကြီးကျောင်းလည်း ဖျက်ဆီး၊ သတ်ဖြတ် မီးရှို့တာတွေ ခံခဲ့ရပြီးတော့ အလယ်သံပြာရွာမှာ ကွပ်ကဲရေး စခန်းပေါ့။ ကျောင်းဝန်းထဲမှာ ဒုက္ခသည်တွေ နေရာချထား ပေးထားတယ်။
အဲဒီလိုပဲ နောက်တနေရာမှာ ကျတော့လည်း စာသင်ကျောင်းထဲမှာ တွေ့တဲ့ ဟာတွေက တရွာလုံး ဖျက်ဆီး ခံရလို့ ရောက်နေတဲ့ ရခိုင် မိသားစုတွေ၊ ကလေး လ သားလေးတွေပါ ပါတယ်။ သူတို့တွေ အားလုံး တညလုံးလုံး တောထဲမှာ မေယုတောင်တွေကို ကျော်ပြီး ပုန်းအောင်းနေခဲ့ရတဲ့ အခြေအနေ မျိုးတွေလည်း ရှိတော့ တော်တော်တော့ စိတ်ထိခိုက်စရာ ကောင်းတာပေါ့လေ။
နောက် ပိုဆိုးတာက လုံခြုံရေး တပ်စခန်းတွေ ရှိတဲ့နေရာ အနားမှာတင် အဲဒီလို မီးရှို့ဖျက်ဆီး နေတာတွေကို မတားဆီး နိုင်ခဲ့တဲ့ အပေါ်မှာလည်း ဒေသခံတွေက အမြင် မကြည်ဘူး။ ရခိုင် အမျိုးသားကြီး တယောက် ဆိုရင်လည်း သူတို့ မွေးတဲ့မြေ ဒီမြေ ဒီရေမှာ သူတို့ ဒီလိုနေနေရတာ ကိုယ်နှိုက်က သူတို့အနေနဲ့ တာဝန် တခုလိုမျိုး ကျားကုတ် ကျားခဲ ရပ်တည်နေရတာ ဖြစ်တယ် ဆိုတဲ့ အကြောင်း ပြောပြီးတော့ မျက်ရည်ပါ ကျတယ်။ မချိတင်ကဲနဲ့ ဖြစ်နေရတာကို ကျနော်တို့လည်း စိတ်ထိခိုက်တယ်။ အဲဒါကတော့ မောင်းတောက အခြေအနေပေါ့။
စ ဖြစ်တဲ့ နေ့တုန်းကလည်း ၀တ်ပြုတဲ့ ဘင်္ဂါလီတွေက ဗလီထဲက ထွက်လာပြီးတော့ အုပ်စုလိုက် မီးရှို့တာတွေ၊ ဖျက်ဆီး တာတွေ လုပ်တယ်။ ၈ ရက်နေ့ပေါ့။ အဲဒီနေ့က ဗီဒီယိုခွေတွေလည်း ကျနော်တို့ကို ပေးလိုက်တယ်။ ဗီဒီယိုတွေလည်း ပြတယ်။ ဒါက မောင်းတောမှာ ရှိတဲ့ အခြေအနေတွေ။ ရခိုင်ရွာတွေ ဖျက်ဆီးခံရတယ်။
စစ်တွေကို အပြန်မှာ မွတ်စလင် ဒုက္ခသည် စခန်းတွေကိုလည်း ကျနော်တို့ သွားတယ်။ ကျတော်တို့ မရောက်ရောက်အောင် သွားခဲ့တယ်။ အဲဒီတော့ ဟိုမှာက မွတ်စလင် ဒုက္ခသည်တွေကို သီးခြား နေရာ ချထားပေးရတဲ့ သဘောရှိတယ်။ အဲဒီမှာ ကျတော့လည်း စိတ်ထိခိုက်စရာ ကောင်းတာက မြေကြီးပေါ်မှာတင် ရွက်ဖျင်တဲတွေ ထိုးပြီး နေနေရတယ်။ ဒုက္ခသည် တွေပေါ့။ နောက် ကလေးတွေ ကလည်း အများကြီးပဲ။ စခန်းတိုင်း စခန်းတိုင်းက လမ်းပေါ်တွေမှာရော၊ ဘာရော၊ ကျပ်ခဲ ပြွတ်သိပ် နေတာပေါ့။ အဓိက ကတော့ လူဦးရေ ပြန့်ပွားနှုန်းနဲ့ ပတ်သက်တဲ့ အကြောင်းချင်းရာ တခုအနေနဲ့ ဒါ ကျနော်တို့ သတိပြုမိတယ်။
ကျနော် မွတ်ဆလင် ဒုက္ခသည် စခန်းက တာဝန်ရှိတဲ့ သူတွေနဲ့ရော၊ ရွာခံတွေနဲ့ပါ သက်ကယ်ပြင်ကို ရောက်တော့လည်း ဆွေးနွေး ခဲ့တယ်။ အဲဒီမှာလည်း ကျနော် ဘာပြောခဲ့လဲဆိုတော့ ဒီ နိုင်ငံသားနဲ့ ပတ်သက်လို့ကတော့ ဘယ်ဘာသာ ကိုးကွယ်သူပဲ ဖြစ်ပါစေ အားလုံး တပြေးညီပဲ ဖြစ်ရမယ်။ အဲဒီတော့ ဖြစ်နေတဲ့ ကိစ္စဟာ ဘာသာရေး၊ လူမျိုးရေး မုန်းတီးမှု ပုံသဏ္ဍန် မဖြစ်စေရဘူး။ အဲဒီလိုလဲ မမြင်ဘူး။
အဲဒီတော့ နှစ်ပေါင်းများစွာ အကျင့်ပျက် ချစားမှုတွေကြောင့် တရားမ၀င် ၀င်လာတဲ့ ဘင်ဂါလီတွေရဲ့ ပြဿနာဟာ အခု အခြေအနေထိ ဖြစ်လာ တယ်ပေါ့။ အဲဒါကို ကျနော်တို့ ရေရှည် အမြော်အမြင်ရှိရှိ၊ ခေါင်းအေးအေးနဲ့ ဖြေရှင်းကြဖို့ လိုမယ်ဆိုတာကို ဒီအတိုင်းပဲ သူတို့ကို ကျနော်ပြောခဲ့တယ်။ ဒါ နိုင်ငံသား အခွင့်အရေး တန်းတူညီမျှမှုနဲ့ ဆိုင်တယ်။ ဒီအထဲမှာလည်း နိုင်ငံသား တယောက်ဖြစ်လာရင် နိုင်ငံတော်ရဲ့ ကျေးဇူး သစ္စာကို စောင့်သိဖို့၊ နိုင်ငံသားတယောက်ရဲ့ တာဝန် ၀တ္တရားတွေကို ထမ်းဆောင်ဖို့၊ ရှိနေတဲ့ လူ့အဖွဲ့အစည်းအတွင်းမှာ လူမှုရေး သဟဇာတ ဖြစ်အောင် နေနိုင်ကြဖို့၊ နောက် ကိုယ့်နောက်ပိုင်း လူငယ်မျိုးဆက်တွေကို ၀ိုင်းပြီးတော့ ထိမ်းကြဖို့ အစရှိသဖြင့် အဲဒါတွေ သူတို့ကို ပြောခဲ့တယ်။
ရခိုင်တိုင်းရင်းသားတွေ အနေနဲ့ကလည်း သီးခြားစီ ခွဲနေဖို့ ဆိုတာ ရေရှည်မှာလည်း ဒါ ပုံမှန် အခြေအနေ မဟုတ်ဘူး။ တကယ့် တကယ်က ကျနော်တို့ နိုင်ငံသားတွေ၊ ဘယ်လို ဘာသာပဲ ကိုးကွယ်သည်ဖြစ်စေ အားလုံးက လူမှုရေး သဟဇာတ ဖြစ်အောင် ရေရှည် ချင့်ချင့်ချိန်ချိန်နဲ့ စဉ်းစားကြရမှာ ဖြစ်တယ် ဆိုတာလည်း ပြောခဲ့တယ်။
အဲဒီမှာ စိုးရိမ်စရာ အခြေအနေတခုကို ပြောရမယ်ဆိုရင်တော့ ကျနော် မောင်တောကို ရောက်တဲ့ အချိန်မှာ ဒီ ပဋိပက္ခဖြစ်တဲ့ ကာလ အတွင်းက ကြွေးကြော်တဲ့ ကြွေးကြော်သံတခု၊ အစ္စလမ် ဂျီနာပါး ဆိုပြီး ကြွေးကြော်တယ်။ အဓိပ္ပာယ်က ဘာလဲ ဆိုတော့ ပါကစ္စတန်နိုင်ငံ အဓွန့်ရှည်ပါစေ ဆိုတာပဲ။ ဒါ ကျနော်တို့က အမျိုးသားရေးရာ ဆိုရင် နိုင်ငံသား ဖြစ်မှုနဲ့ ပတ်သက်တဲ့၊ အရေးပါတဲ့ ကိစ္စကို ကိုင်တွယ်ဖြေရှင်း ရတဲ့အခါမှာ နိုင်ငံတော်ရဲ့ ကျေးဇူးသစ္စာ စောင့်သိမှု ဆိုတဲ့ အပိုင်းပေါ့၊ အဲဒါလည်း ကျနော်တို့ အလေးအနက် ထားရမယ့် အပိုင်းပေါ့။
အဲဒီအခြေအနေတွေကို ကျနော်တို့က ဒေသတွေကို ကိုယ်တိုင်သွားခဲ့၊ ရောက်ခဲ့လို့ မြင်ရတာ။ လူသားချင်း စာနာမှု အရကတော့ ဘေးဒုက္ခ ရောက်နေတဲ့ ဘယ်သူပဲဖြစ်ဖြစ် အားပေး ကူညီရမယ်။ တတ်နိုင်သမျှ အစားအသောက်၊ အမိုးအကာတွေ ကျနော်တို့ ဖြေရှင်းပေးရမယ်။ ဒါက လူသားချင်း စာနာမှုအရ တယောက်နဲ့ တယောက် ထားရမယ့် အရာတခု။ နောက်တခုက နိုင်ငံရေးအရ ဘယ်နိုင်ငံဖြစ်ဖြစ် ကိုယ့်နိုင်ငံရဲ့ လိုအပ်ချက်ဖြစ်တဲ့ လိုက်လျောညီထွေဖြစ်တဲ့ နိုင်ငံသား ဥပဒေဆိုတာ ပြဌာန်းကြရတယ်။ နိုင်ငံတော်ရဲ့ လုံခြုံရေးကို ကာကွယ် စောင့်ရှောက်ကြရတယ်။
ကျနော်တို့မှာက စီးပွားရေးအရလည်း ဆင်းရဲတဲ့ နိုင်ငံဖြစ်တယ်။ နောက်တခါ အမျိုးသား ပြန်လည် သင့်မြတ်ရေးနဲ့ ပတ်သက်ပြီးတော့လည်း ကျနော်တို့က ထိခိုက်ဒဏ်ရာ အနာတရတွေ အများကြီးဖြစ်ခဲ့တဲ့ နိုင်ငံဆိုတော့ ကျနော်တို့ နိုင်ငံ ပြန်လည်ထူထောင်ရေးမှာ ဘက်ပေါင်းစုံကနေ ၀ိုင်းပြီးတော့ စဉ်းစား အဖြေရှာကြဖို့ လိုတယ်လို့ မြင်တယ်။ ကျနော်တို့ သွားခဲ့တဲ့ နေရာမှာလည်း အများပြည်သူ လှူဒါန်းလိုက်တဲ့ ငွေ၊ အစားအစာ၊ အ၀တ်အထည်တွေ အားလုံးကို မျှပြီး ကူညီနိုင်ဖို့ ကြိုးစားခဲ့တယ်။
မွတ်ဆလင် ဒုက္ခသည် စခန်းကိုလည်း ကျနော်တို့ ဆန်အိတ်တွေ၊ အ၀တ်အစားတွေ ပြည်နယ် အစိုးရကနေ တဆင့် လှူဒါန်းဖို့ စီစဉ်ခဲ့တယ်။ ရခိုင် ဒုက္ခသည် စခန်းတွေကိုလည်း အလားတူ လှူဒါန်းဖို့ ကြိုးစားခဲ့တယ်။ အဲဒီတော့ လူသားချင်း စာနာမှုဆိုင်ရာနဲ့ ပတ်သက်လို့ ကတော့ ဒုက္ခသည် အားလုံးကို အတတ်နိုင်ဆုံး အကူအညီ ပေးဖို့ ကျနော်တို့ ကြိုးစားတယ်။
မေး။ ။ အခု အင်တာနက်ပေါ်မှာ ကိုကိုကြီးပြောတဲ့ စကားဆိုပြီး ဖြန့်နေတာတွေ တွေ့ရတယ်။ ရိုဟင်ဂျာ အရေးမှာ တပ်မတော်နဲ့ လက်တွဲ ဖြေရှင်းမယ်လို့ ပြောတယ် ဆိုတာ ဟုတ်ပါသလား၊ ပြောခဲ့ရင် ဘယ်လို ရည်ရွယ်ချက်နဲ့ ပြောခဲ့တာ ပါလဲ။
ဖြေ။ ။ အဲဒီဟာက ၈ ရက်နေ့မှာ ရခိုင်ရွာတွေ ၂၀ လောက် မီးရှို့ဖျက်ဆီး ခံရတယ်။ ဌာနေ ရခိုင် လူမျိုးတွေက နေရပ် တွေကို စွန့်ခွာပြီးတော့ အသက်လုပြီး ပြေးကြရတယ် ဆိုတဲ့ အခြေအနေတုန်းက သတင်းစာ ရှင်းလင်းပွဲမှာ ကျနော် ပြောခဲ့ တယ်။ ရိုဟင်ဂျာဟာ ကျနော်တို့ တိုင်းရင်းသား လူမျိုး မဟုတ်ဘူး ဆိုတာ ကျနော် အတိအလင်း ပြောခဲ့တယ်။ နောက်တခု ကတော့ ကျနော်တို့ဟာ ဒီမိုကရေစီ ကိစ္စ၊ လူ့အခွင့်အရေး ကိစ္စ၊ တို်င်းရင်းသား တန်းတူ ညီမျှရေး ကိစ္စတွေ ငြင်းခုန် ပြောဆိုနေရတဲ့ အချိန်မှာ တဘက်က အမျိုးသားရေး ပြဿနာမျိုးလို ဖြစ်လာခဲ့မယ် ဆိုရင် ကျနော်တို့က တပ်မတော်နဲ့ပါ ပူးပေါင်း ဆောင်ရွက် ရလိမ့်မယ်လို့ ပြောခဲ့တယ်။ အမျိုးသားရေး ပြဿနာ ဖြစ်ခဲ့ရင်လို့ ကျနော် ရည်ညွှန်းပြီး ပြောဆို ခဲ့တယ်။
အဲဒီလို အမျိုးသားရေး ပြဿနာလိုမျိုး ရင်ဆိုင်လာရပြီ ဆိုရင်တော့ ကျနော်တို့က ကျန်တဲ့ အင်အားစုတွေ နဲ့ပါ အားလုံး ညှိနှိုင်းပြီး ပူးပေါင်းဆောင်ရွက် ကြရလိမ့်မယ် ဆိုတဲ့ဟာ ကျနော် ပြောခဲ့တယ်။ အဲဒါက ကျနော် ၈ ရက်နေ့ သတင်းစာ ရှင်းလင်းပွဲ အချိန်တုန်းက ပြောခဲ့တယ်။ ကျနော် တလျှောက်လုံး ရပ်တည် ခဲ့တာလည်း နိုင်ငံသား ဆိုတဲ့ အခြေခံ အပေါ်မှာပဲ ရပ်တည်ပြီး ပြောခဲ့တယ်။
မေး။ ။ အခု လူတွေက ပြောဆို ဝေဖန်နေတာတွေ ကြားရပါတယ်။ အခုဖြစ်ရပ်ကြီးရဲ့ နောက်ကွယ်က မရိုးသားမှုတွေနဲ့ ဖန်တီးနေသူတွေ ရှိတယ်၊ ဒီ ထောင်ချောက်ထဲကို တော်တော်များများလည်း သက်ဆင်းမိ နေကြတယ် ဆိုပြီးပြောတယ်၊ ကိုကိုကြီးတို့ ၈၈ မျိုး ဆက် ကျောင်းသားတွေလည်း ဆင်ထားတဲ့ ထောင်ချောက်ထဲ ရောက်နေကြပြီဆိုတဲ့ ဝေဖန်မှု တွေကို ဘယ်လို တုံ့ပြန်ချင်ပါလဲ။
ဖြေ။ ။ ကျနော်တို့ရဲ့ နိုင်ငံရေး ဖြတ်သန်းမှုဟာ ၂၄ နှစ် ရှိခဲ့ပါပြီ။ ပြောရင် ကျနော်တို့ ငွေရတု တိုင်တော့မယ်။ ဆိုတော့ ကောင်းကောင်း နားလည်ပါတယ်။ ဒီလို အသုံးချ ခံရတယ်ဆိုတာ ကျနော်တို့လည်း သူငယ်နှပ်စား မဟုတ်သလို လုပ်နေတဲ့ သူတွေကိုလည်း အထင်အမြင် လွဲစေနိုင်တဲ့ အသုံးအနှုန်းမျိုးတွေ မဖြစ်သင့်ဘူး။
ကျနော်ပြောနေတာလည်း အမျိုးသားရေး ပြဿနာလိုမျိုး ကိစ္စမျိုးမှာ ကျနော်တို့ အားလုံး လက်တွဲ ဆောင်ရွက်ကြဖို့၊ ပူးပေါင်း ဆောင်ရွက်ကြဖို့ လိုတယ်ဆိုတာကိုပဲ အဓိက ထားပြီး ပြောတယ်။ အဲဒီတော့ နိုင်ငံသား ဖြစ်မှုဆိုတဲ့ ကိစ္စဟာ အရေးတကြီး ကိစ္စအဖြစ်နဲ့၊ အဓိက ကိစ္စတခု အဖြစ်နဲ့ ဆောင်ရွက်ကြရတယ်။ ဆိုလိုတာက ကျနော် ခဏခဏ ဥပမာလေး ပြောဖူးတယ်။ အမေရိကန် နိုင်ငံမှာလည်းပဲ မက္ကဆီကို နယ်စပ် လုံခြုံရေးကို ကာကွယ် စောင့်ရှောက်နေရတဲ့ ကိစ္စမျိုး၊ နောက်တခါ အိန္ဒိယမှာ ဆိုရင်လည်း နယ်စပ်မှာ ခြံစည်းရိုးကာပြီးတော့ ခြံစည်းရိုးနားကပ်ရင် ပစ်ချတဲ့ အခြေအနေမျိုးတွေ အထိ ဒီလိုပဲ ဖြေရှင်းကြရတယ်။
တဘက်က လက်တွေ့ နိုင်ငံရေးမှာ နိုင်ငံနယ်နိမိတ်တွေနဲ့ နိုင်ငံရဲ့ အချုပ်အခြာ၊ အာဏာ ဆိုတာ အရှိတရားပါ။ အဲဒါကို ကိုင်တွယ်တဲ့ နေရာမှာ Humanism ဆိုတဲ့ လူသားဝါဒတို့၊ လူသားချင်း စာနာ ထောက်ထားတာတို့ ဆိုတာတွေနဲ့ မရောထွေး သင့်ဘူး။ အဲဒါတွေက တခုစီလို့ပဲ မြင်တယ်။ လူသားဝါဒကို ကျနော်လည်း အင်မတန် တန်ဖိုး ထားပါတယ်။ နိုင်ငံတနိုင်ငံရဲ့ နယ်မြေ၊ အချုပ်အချာ၊ လုံခြုံရေးဆိုတာတွေနဲ့ပါ ထည့်သွင်း စဉ်းစားဖို့ လိုလိမ့်မယ်လို့ မြင်တယ်။
မေး။ ။ ကိုကိုကြီးတို့ ၈၈ မျိုးဆက်တွေက အခုအခါမှာ မြန်မာပြည် အနောက်ဘက်က ကိစ္စတွေလည်း စိတ်ဝင်တစား ရှိနေတာ တွေ့ရတယ်။ တခါ မြောက်ဘက်ပိုင်းက ကိစ္စတွေလည်း စိတ်ဝင်တစား သွားခဲ့တာ တွေ့ရတယ်။ ဒီပြဿနာတွေ ပြေလည်အောင် ဘယ်လို ကဏ္ဍကနေ လုပ်ဆောင် သွားဖို့ ရှိပါသလဲ။
ဖြေ။ ။ ကျနော်တို့ အနေနဲ့ နိုင်ငံရဲ့ ဒေသအသီးသီးမှာ ဖြစ်နေတဲ့ ကိစ္စအားလုံးမှာ ကျနော်တို့နဲ့ ပတ်သက်တယ်။ ကျနော်တို့နဲ့ တာဝန်ရှိတယ်လို့ ခံယူထားတာ ဖြစ်တဲ့အတွက်ကြောင့် ကျနော်တို့ နိုင်ငံသား အားလုံးနဲ့ ပတ်သက်တဲ့ အရေးအရာ၊ မြန်မာနိုင်ငံ တခုလုံးနဲ့ ပတ်သက်တဲ့ အရေးအရာ အားလုံးကို ကျနော်တို့ရဲ့ အရေးကိစ္စတွေ အဖြစ်ပဲ သတ်မှတ်ပြီးတော့ အသိစိတ်နဲ့ပဲ ကျနော်တို့ ဆက်ပြီး ဆောင်ရွက်သွားမှာပါ။
မေး။ ။ ရခိုင်အရေး ဖြစ်တဲ့အချိန်မှာ ကိုကိုကြီး ပြောစကားကြောင့် ကိုကိုကြီးဟာ ကျဉ်းမြောင်းတဲ့ အမျိုးသားရေး ၀ါဒီဆိုပြီး ပြောဆို ဝေဖန်တာနဲ့ ပတ်သက်လို့ ဘာပြောချင်ပါသလဲ။ အမျိုးသားရေး စိတ်ဓာတ်ဆိုတာ ကိုကိုကြီးက ဘယ်လို ခံယူပြီး ဘယ်လို အဓိပ္ပာယ်ဖွင့်ပါသလဲ။
ဖြေ။ ။ ကျနော်တို့ နိုင်ငံတနိုင်ငံမှာ နိုင်ငံရေး ဦးဆောင်တဲ့ သူတွေမှာ အမျိုးသားရေး ဆိုတာ မရှိရင် ဘယ်လိုမှ နိုင်ငံကို ဦးဆောင်နိုင်တဲ့ တာဝန်ယူနိုင်တဲ့သူ ဖြစ်မလာနိုင်ဘူး။ အရေးအကြီးဆုံးက နိုင်ငံ တနိုင်ငံမှာ၊ နိုင်ငံရေး ခေါင်းဆောင်မှာ အမျိုးသားစိတ်ဓာတ်က ရှိကို ရှိရမယ်။ အမျိုးသား စိတ်ဓာတ်ဆိုတဲ့ နေရာမှာ အစွန်းမရောက်ဖို့ဘဲ အရေးကြီးတယ်။ ကမ္ဘာမှာလည်း အစွန်းရောက် အမျိုးသားရေးတွေကြောင့် တိုက်ပွဲတွေ၊ စစ်ပွဲတွေ၊ သွေးထွက်သံယိုတွေ ဖြစ်နေကြတာ ကျနော်တို့ ကောင်းကောင်းကြီး သင်္ခန်းစာ ယူပါတယ်။
သို့သော် အဲဒီအမျိုးသားရေး ဆိုတာ မပါတော့ဘူး ဆိုရင်တော့ သူ့ရဲ့ နိုင်ငံ နယ်နိမိတ်ဆိုတာ အချုပ်အချာအာဏာ၊ နိုင်ငံသားဆိုတာတွေပါ ပျောက်သွားလိမ့်မယ်။ အမျိုးသားရေးဟာ “ဆား” လိုပါပဲ။ ဆားမပါရင် ဟင်းမဖြစ်သလို ဆားများရင်လည်း ဟင်းပျက်ပါတယ်။ ကျနော်တို့က အမျိုးသားရေးကို ချိန်ချိန်ဆဆနဲ့ ကျနော်တို့ နိုင်ငံရဲ့ အကျိုးစီးပွား၊ အိမ်နီးချင်း နိုင်ငံတွေနဲ့ ချစ်ကြည်ရင်းနှီးတဲ့ ဆက်ဆံရေး၊ နိုင်ငံတကာ မိသားစုနဲ့ ချစ်ကြည်ရင်းနှီးတဲ့ ဆက်ဆံရေး ဆိုတာတွေကို တပြိုင်နက်တည်းမှာ တည်ဆောက်ကြရမှာပါ။
နိုင်ငံတကာ သတင်းမီဒီယာတွေ၊ အွန်လိုင်းသတင်းတွေမှာ လုပ်ကြံ ၀ါဒဖြန့်ထားတဲ့ ဖိုတိုရှော့ နဲ့ ပြုပြင်ထားတဲ့ သတင်း၊ ဓာတ်ပုံ ၀ါဒ ဖြန့်မှုတွေဟာ နိုင်ငံတကာ မိသားစုတွေ နားလည်ဖို့အတွက်ကို အကြီးအကျယ် အဟန့်အတား ဖြစ်စေပါတယ်။ အဲဒီတော့ ကျနော်တို့ နိုင်ငံမှာဖြစ်နေတဲ့ တကယ့် ပကတိ အခြေအနေတွေကို မှန်မှန်ကန်ကန် သိနိုင်ဖို့အတွက်ကို ယုံကြည် စိတ်ချ ရတဲ့အဖွဲ့အစည်းတွေ၊ သတင်းဌာနတွေရဲ့ အခန်းကဏ္ဍဟာ အရေးကြီးတယ်လို့ ပြောချင်ပါတယ်။ ။
Ref: ဧရာဝတီ
ကမ္ဘာ့အကျိုးဆောင်နိုင်ငံသားဆု လက်ခံဖို့ ဒေါ်စု နယူးယောက် လာမည်
ကိုသားညွန့်ဦး
အင်္ဂါ, 17 ဇူလိုင် 2012
ဒေါ်အောင်ဆန်းစုကြည်ဟာ နယူးယောက်အခြေစိုက် Altlantic Council ကချီးမြှင့်တဲ့ Global Citizenship Award ကမ္ဘာ့ အကျိုးဆောင် နိုင်ငံသားဆုကို လက်ခံယူဖို့ အမေရိကန်ပြည်ထောင်စုကို လာမယ့် စက်တင်ဘာ လမှာ လာရောက်ဖို့ ရှိနေပါတယ်။ ကမ္ဘာ့ အကျိုးဆောင်နိုင်ငံသား ဆုဟာ မိမိရဲ့ဒေသ လူ့အသိုင်းအ၀ိုင်း ကိုသာ မက နိုင်ငံတကာက လူအဖွဲ့အစည်း အတွက်ပါ ထူးထူးချွန်ချွန်ဆောင်ရွက် သူတွေကိုပေးတာမို့၊ ဒီဆု ဟာ ဒေါ်အောင်ဆန်းစုကြည်နဲ့ ကွက်တိ ကိုက်ညီမှု ရှိတယ်လို့ ဒီဆုပေးတဲ့ Altlantic Council ရဲ့ ဥက္ကဋ္ဌဖြစ် သူက ပြောပါတယ်။ Altlantic Council ရဲ့ ဥက္ကဋ္ဌလည်းဖြစ်၊ CEO အကြီးအကဲလည်းဖြစ်သူ Frederick Kempe ကို မေးမြန်း ထားတာကို ကိုသားညွန့်ဦးက တင်ဆက်ပေးပါမယ်။
အခု တတိယအကြိမ်ပေးအပ်တဲ့ Altanlic Council ရဲ့ Global Citizenship Awards မှာ အမျိုးသမီး နှစ်ဦး ပါဝင်ပါတယ်။ တဦးက မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် ဖြစ်ပြီး နောက်တဦးကတော့ ဂျပန် လူမျိုး ဒုက္ခသည်များ ဆိုင်ရာ ကုလသမဂ္ဂ မဟာမင်းကြီး Sadako Ogata ဖြစ်ပါတယ်။ ဒီနှစ်မှာ လေးဦး ချီးမြှင့်ခံ ရတဲ့အထဲ ကျန်နှစ်ဦး ကတော့ နိုဗယ်ဆုရှင် အမေရိကန်နိုင်ငံခြားရေး ၀န်ကြီးဟောင်း ဟင်နရီ ကစ်ဆင်ဂျားနဲ့ အမေရိကန် ဂီတပညာရှင်လည်းဖြစ်၊ လူသားချင်း စာနာ ကူညီမှု လုပ်ငန်းတွေမှာ တက်တက်ကြွကြွ ဆောင်ရွက်နေသူလည်းဖြစ်တဲ့ Quincy Jones ဖြစ်ပါတယ်။ ဒီဆုဟာ Atlantic Council ရဲ့ မျှော်မှန်း ထားချက်တွေ အတွက် ဖန်တီးထားတဲ့ အမြင့်ဆုံးဆုဖြစ်တယ်လို့ ဒီအဖွဲ့ရဲ့ ဥက္ကဋ္ဌလည်းဖြစ် (CEO) အကြီးအကဲလည်းဖြစ်သူ Frederick Kempe က ဗွီအိုအေ မြန်မာပိုင်းကို ပြောပါတယ်။
“သုံးနှစ်လောက်က စပြီး ဒီဆု ပေးလာတာပါ။ အတ္တလန်တိတ်ကောင်စီရဲ့ ကျယ်ပြန့်တဲ့ ရည်မှန်းချက်နဲ့ နိုင်ငံ တကာ ကိစ္စရပ်တွေမှာ ထူးထူးခြားခြား သတ္တိရှိရှိ အမြင်ကျယ်ကျယ် ဆောင်ရွက်ခဲ့ကြတဲ့ ခေါင်းဆောင်တွေကို အသိအမှတ်ပြုဖို့ ရည်ရွယ်ပါတယ်။ ဒေါ်အောင်ဆန်းစုကြည်ဟာ ဒီ ဆုအတွက် အခုလို ရည်ရွယ် ထားချက်တွေနဲ့ အပြည့် ကိုက်ညီပါတယ်။”
အရင်တုန်းကတော့ ဒီဆုကို ရရှိဖူးသူတွေ ထဲမှာတော့ IMF နိုင်ငံတကာငွေကြေး ရန်ပုံငွေ အဖွဲ့ရဲ့ စီမံခန့်ခွဲမှု ဆိုင်ရာ ညွန်ကြားရေးမှူး ခရစ်စတင်း လာဂါ့ဒ်၊ အမေရိကန် အထက်လွှတ်တော်အမတ် ဂျွန်ကယ်ရီ၊ လုပ်ကြံခံခဲ့ရ တဲ့ လစ်ဘနွန်ဝန်ကြီးချုပ်ဟောင်း Rafik Hariri တို့ ရရှိခဲ့ဖူးပါတယ်။ ဆု ချီးမြှင့်ခံရသူတွေဟာ ကမ္ဘာ့လူ သားတွေအတွက် အားကျ ဂုဏ်ယူစရာ အောင်မြင်မှုရသူတွေဖြစ်တယ်လို့ Kempe က ပြောပါတယ်။
“ဆုချီးမြင့်ခဲ့တဲ့ ခေါင်းဆောင်တိုင်းဟာ ကိုယ်ပိုင်အောင်မြင်မှုတွေ အသီးသီး ဆွတ်ခူး ခဲ့သူတွေပါ။ ဒေါ်အောင် ဆန်းစုကြည်ဟာလည်း ဒီမိုကရေစီနဲ့ လူ့အခွင့်အရေး အတွက် အစဉ်တစိုက် မမောမပန်း ကြိုးပမ်းဆောင်ရွက်ခဲ့ သူပါ။ ဒေါ်အောင်ဆန်းစုကြည်ဟာ လွတ်မြောက်မှုနဲ့ လူဂုဏ်သိက္ခာရဲ့ စံပြု သင်္ကေတဖြစ်လာပါတယ်။ ဆက်ပြီးတော့လည်း ကမ္ဘာလူသားတွေ အတွက် အားကျ ဂုဏ်ယူစရာ ပုဂ္ဂိုလ်ဖြစ်နေပါတယ်။ ”
ဒေါ်အောင်ဆန်းစုကြည်ကို လွတ်မြောက်မှု၊ ဒီမိုကရေစီ၊ လူ့အခွင့်အရေး အတွက် နိုင်ငံတကာရဲ့ စံပြုပုဂ္ဂိုလ်တဦး အဖြစ် ဆုချီးမြှင့်ခဲ့သလို ဒီနှစ်မှာ ဆုချီးမြင့်ခံရသူ နောက်ထပ် အမျိုးသမီးတဦးဖြစ်တဲ့ ကုလ ဒုက္ခသည်များဆိုင် ရာ အကြီးအကဲဟောင်း အိုဂါဒါကိုတော့ ကမ္ဘာမှာ ဒုက္ခတွေ အကြုံတွေ့ရဆုံး လူသားတွေအတွက် ရပ်တည်ပြော ဆိုမှု၊ လူ့အခွင့်အရေးအတွက် ရပ်တည်ကာကွယ်မှုတွေအတွက် အသိအမှတ်ပြု ချီးမြှင့်ခဲ့တာဖြစ်ပါတယ်။ ဒီ ဆုဟာ မိမိလူမှုအသိုင်းအ၀ိုင်းအတွက်သာမက ကမ္ဘာ့မိသားစု အသိုင်းအ၀ိုင်းအတွက်ပါ ရပ်တည် ဆောင်ရွက်ခဲ့ သူတွေကို ချီးမြင့်တဲ့ဆုဖြစ်တယ်လို့ Kempe က ပြောပါတယ်။
“ကမ္ဘာ့အကျိုးဆောင် နိုင်ငံသား Global Citizenlship ဆိုတာ မိမိရဲ့ မိသားစု မိမိနဲ့နီးစပ်တဲ့ လူ့အသိုင်းအ၀ိုင်း အတွက် တာဝန်ယူမှု တာဝန်ရှိမှုသာမကဘူး၊ ကမ္ဘာ့လူအဖွဲ့အစည်းကြီးတခုလုံးအတွက်လည်း တာဝန်ယူမှု တာဝန်ရှိမှု ဆိုတဲ့ အဓိပ္ပါယ်သက်ရောက်ပါတယ်။ မိမိနဲ့ မိုင်ထောင်နဲ့ချီဝေးတဲ့ ဒေသက လူတွေနဲ့ပါ ဆိုင်ပါတယ်။ ဒါတွေဟာလည်း ကမ္ဘာအသိုင်းအ၀ိုင်းရဲ့ အစိတ်အပိုင်းဖြစ်ပါတယ်။ မိမိဒေသက လူအသိုင်းအ၀ိုင်းကို ကူညီ စောင့်ရှောက်သလိုပဲ၊ အဲဒီ အဝေးက လူမှုအဖွဲ့အစည်းအတွက်လည်း တည်ဆောက်ပြုစုရမှာပါ။”
ဒေါ်အောင်ဆန်းစုကြည်ကိုတော့ ပြီးခဲ့တဲ့နှစ်ဆုရှင် IMF အကြီးအကဲ ခရစ်စတင်း လာဂါ့ဒ်က ချီးမြှင့်ပေးမှာ ဖြစ် ပါတယ်။ လာမယ့် စက်တင်ဘာလ ၂၁ ရက်နေ့၊ နယူးယောက်မှာလုပ်မယ့် အဲဒီ ဆုချီးမြှင့်ပွဲကိုတော့ ကမ္ဘာ့ခေါင်းဆောင်တွေ သံတမန်တွေအတော်များများ တက်ရောက်ဖွယ်ရှိတယ်လို့ သိရပါတယ်။
“အစိုးရပိုင်းခေါင်းဆောင်တွေ၊ နိုင်ငံအရပ်ရပ်က သံတမန်တွေ၊ သံအမတ်တွေ စုစုပေါင်း ၃၀၀ ကျော်လောက် တက်ရောက်မှာပါ။ ကျနော်တို့ ဒီအခမ်းအနားကို ကုလသမဂ္ဂရဲ့ အထွေထွေ ညီလာခံ ကျင်းပချိန်နဲ့လည်း တိုက်ပြီး ပြုလုပ်လေ့ ရှိပါတယ်။”
ဒေါ်အောင်ဆန်းစုကြည်ဟာ အမေရိကန်ပြည်ထောင်စုကို လာရောက်စဉ် မြို့တော် ၀ါရှင်တန် ဒီစီ ကိုလည်း လာ ရောက် လိမ့်မယ်လို့ မျှော်လင့် ရပါတယ်။ ဒေါ်အောင်ဆန်းစုကြည်ဟာ အမေရိကန်ပြည်ထောင်စုမှာ အမြင့်ဆုံး ဆုတဆုဖြစ်တဲ့ Congressional Gold Medal ဆုကိုလည်း ၂၀၀၈ ခုနှစ်မှာ ချီးမြှင့် ခံခဲ့ရတာပါ။ အခုလာမယ့် စက်တင်ဘာ ခရီးစဉ်အတွင်း ၀ါရှင်တန် ဒီစီကိုလာပြီး ဒီဆု လာရောက် လက်ခံ ယူဖို့ရှိမယ်လို့ ကွန်ဂရက် တာဝန် ရှိသူတွေက ပြောဆိုတယ်လို့ AFP သတင်းမှာ ရေးသားပါတယ်။ အမေရိကန်နိုင်ငံခြားရေး ဌာနကလည်း ဒေါ် အောင်ဆန်းစုကြည်လာရောက်မယ့် ခရီးစဉ်ကို ကြိုဆိုပြီး တကယ်လို့ သူ ရောက်လာခဲ့မယ် ဆိုရင် နှစ်နိုင်ငံ အပြန်အလှန် ဆွေးနွေးမှုတွေ ရှိမှာဖြစ်တယ်လို့ နိုင်ငံခြားရေးဌာန ပြောခွင့်ရသူက ပြောပါတယ်။ ဒါ့အပြင် ကုလ သမဂ္ဂအတွင်းရေးမှူးချုပ် ဘန်ကီမွန်း မြန်မာပြည်ရောက်စဉ်ကလည်း ဒေါ်အောင်ဆန်းစုကြည် ကို ဖိတ်ကြားခဲ့တာ ရှိတော့ အမေရိကန်လာရောက်စဉ် ကုလသမဂ္ဂကိုလည်း ဒေါ်အောင်ဆန်းစုကြည် လာရောက်မယ်လို့ မျှော်လင့် တဲ့အကြောင်း ကုလ အတွင်းရေးမှူးချုပ်ရုံး ပြောခွင့်ရသူ တဦးက ဗွီအိုအေ ကို ပြောပါတယ်။
Ref: VOA News
သမ္မတနဲ့ နိုင်ငံရေးဆယ်ပါတီ တွေ့ဆုံမည်
အင်္ဂါ, 17 ဇူလိုင် 2012
ဒီမိုကရေစီ မိတ်ဆွေပါတီများ ဆယ်ပါတီအဖွဲ့နဲ့ သမ္မတ ဦးသိန်းစိန် တို့ဟာ ဒီကနေ့ နေပြည်တော်မှာ တွေ့ဆုံကြဖို့ ရှိနေပါတယ်။
သမ္မတနဲ့ အတိုက်အခံနိုင်ငံရေးပါတီတွေ ပထမဆုံး အကြိမ်တွေ့ဆုံ ကြမယ့် ဒီတွေ့ဆုံမှုမှာ စီးပွားရေး၊ နိုင်ငံရေး နဲ့ ပြည်တွင်း ငြိမ်းချမ်းရေး ကိစ္စရပ်တွေကို တင်ပြ သွားမယ်လို့ တွေ့ဆုံမယ့် အထဲမှာ ပါဝင်တဲ့ ဒီမိုကရက်တစ် ပါတီ ဥက္ကဋ္ဌ ဦးသုဝေက ပြောပြပါတယ်။
“ဆယ်ပါတီအစည်းအဝေးမှာတော့ မူအားဖြင့်ကတော့ ခေါင်းစဉ်တမျိုးစီ၊ တပါတီ တမျိုးစီ တင်ပြမယ်ပေါ့နော်။ နားလည်မှု ရအောင်ပေါ့။ ကျနော်တို့က ပြီးခဲ့တဲ့ ၈ ရက်နေ့က ဝန်ကြီး ဦးအောင်မင်းရယ်၊ ဦးစိုးသိမ်းရယ်နဲ့တွေ့ တယ်လေ။ တွေ့ပြီးတော့မှ သူတို့က စီစဉ်ပေးတာပါ။ လိုအပ်တာလေးတွေ တင်ပြမှာပေါ့။ အများအားဖြင့် ကတော့ ကျနော်တို့က သမ္မတကြီးပြောတာကို နားထောင်မှာပေါ့ဗျာ။”
ဒီတွေ့ဆုံပွဲကိုတက်ရောက်မယ့် ဒီမိုကရေစီနဲ့ ငြိမ်းချမ်းရေး ပါတီ ကတော့ ပြည်တွင်း ငြိမ်းချမ်းရေး ဖော်ဆောင်ရေး လုပ်ငန်းစဉ်တွေ အတွက် အကြံပြု တင်ပြဖို့ စီစဉ်ထားသလို စီးပွားရေးနဲ့ ဆက်စပ်နေတဲ့ အလုပ်သမား၊ လယ်သမား ပြဿနာတွေကိုလည်း ကဏ္ဍအလိုက် တင်ပြကြမှာဖြစ်တယ်လို့ ဒီမိုကရေစီနဲ့ ငြိမ်းချမ်းရေး ပါတီ က အထွေထွေ အတွင်းရေးမှူး ဦးမျိုးညွန့်က ပြောပါတယ်။
“ကျနော်တို့တင်ပြမယ့်ဟာက ဆယ်မျိုးလောက် ရှိတာပေါ့လေ။ ဒါပေမဲ့လို့ အရေးကြီးတာလေး ပြောရရင်တော့ စီးပွားရေးနဲ့ ပတ်သက်လာလို့ရှိရင် ဒီမိုကရေစီ ပြုပြင်ပြောင်းလဲရေး များကဖြင့်ရင် ဦးသိန်းစိန်တို့ ဗဟိုအစိုးရ ကဖြင့် အားကျိုး မာန်တက်နဲ့ ဆောင်ရွက်နေတာတော့ ရှိတယ်။ သို့သော် စီးပွားရေးမှာ Monopoly economy က ရှိနေတုန်းပဲ။ အဲဒီလို မိုနိုပိုလီ အီကော်နော်မီက ရှိနေတဲ့ အတွက်ကြောင့် အဲဒါကို ဖယ်ရှားနိုင်ဖို့အတွက် ကျနော်တို့ ဟောဒါ-ဟောဒါတွေတော့ အကြံပြုလိုပါတယ်။ ဒီလို တင်ပြဖို့ အကြောင်းတွေရှိပါတယ်။”
ဒီမိုကရေစီမိတ်ဆွေ ပါတီများ ဆယ်ပါတီအဖွဲ့ဟာ ပြီးခဲ့တဲ့ ၂၀၁၀ ခုနှစ် ရွေးကောက်ပွဲမှာ ၀င်ရောက်ယှဉ်ပြိုင် ခဲ့ကြတဲ့ နိုင်ငံရေးပါတီတွေဖြစ်ပြီး ဒီအဖွဲ့မှာ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည် ဦးဆောင်တဲ့ NLD အမျိုးသား ဒီမိုရေစီအဖွဲ့ချုပ် ပါတီတော့ မပါဝင်ပါဘူး။
Ref: VOA News
အာဇာနည်နေ့ အခမ်းအနားတွေ ပိတ်ပင် ခံနေရ
2012-07-17
မြန်မာနိုင်ငံတ၀ှမ်းမှာ ဇူလိုင်လ ၁၉ ရက်နေ့ ကျင်းပမယ့် ၆၅ နှစ်မြောက် အာဇာနည်နေ့ အထိမ်း အမှတ် ချီတက် အလေးပြု လွမ်းသူ့ ပန်းခွေချမယ့် အစီအစဉ်တွေကို အာဏာပိုင်တွေက တားဆီး ပိတ်ပင်နေတယ်လို့ သတင်း ရရှိပါတယ်။
မွန်ပြည်နယ် အတွင်းက မြို့နယ် လေးမြို့နယ်မှာ ၆၅ နှစ်မြောက် အာဇာနည်နေ့ အခမ်းအနား ကျင်းပ ခွင့်ရဖို့ တင်ပြတောင်းဆို ခဲ့ရာ သက်ဆိုင်ရာ မြို့နယ် အာဏာပိုင်တွေက ခွင့်မပြုဘူးလို့ မော်လမြိုင်မြို့နယ်က NLD ပါတီဝင် တစ်ဦးဖြစ်တဲ့ ဦးကိုကိုဇော် က အာအက်ဖ်အေကို အခုလို ပြောပါတယ်။
"အာဇာနည်နေ့ အခမ်းအနား ကျင်းပမဲ့ နေရာက စည်ပင်သာယာပိုင် မြေဖြစ်နေတယ် ဆိုပြီးတော့ အဲဒါကို အကြောင်းပြချက် ပြပြီးတော့ ကျွန်တော်တို့ကို ကျင်းပခွင့် မပြုဘူးပေါ့။ အာဇာနည် ဗိမာန်ဆိုတာ ရန်ကုန်မှာပဲ ရှိတယ်တဲ့။ ရေးမှာ အာဇာနည်ဗိမာန် မရှိတဲ့အတွက် ကျင်းပခွင့် မပြုနိုင်ဘူး ဆိုပြီးတော့ အဲလိုပြောတာ။ မော်လမြိုင်မှာ ဆိုလို့ရှိရင် ဒီ သံလွင်ဥယျာဉ်ထဲမှာရှိတဲ့ ဗိုလ်ချုပ် ရုပ်ထုနေရာက အရင်ကတော့ အာဇာနည်နေ့ အခမ်းအနား ကျင်းပခဲ့တယ်ပေါ့နော်။ ဟိုအရင် အစိုးရတွေ လက်ထက်တုန်းက။ အခု ဒီနှစ်ကျတော့ ကျွန်တော်တို့က သွားလျှောက်တဲ့ အခါကြတော့ အဲဒါက အများပြည်သူ အပန်းဖြေရာ ဥယျာဉ်ဖြစ်တဲ့အတွက်၊ ပန်းခြံဖြစ်တဲ့အတွက် ခွင့်မပြုနိုင်ပါဘူး ဆိုပြီး အဲလိုအကြောင်းပြတယ်။ ပုံစံအတူတူပဲဗျ။ လေးမြို့နယ်လုံးက"
ရေးမြို့နယ်မှာ အာဇာနည်နေ့ အခမ်းအနား ကျင်းပခွင့် မပေးတဲ့အမိန့်စာကိုတော့ ရေးမြို့နယ် ရဲတပ်ဖွဲ့မှူးရုံးကနေပြီး ဇူလိုင်လ ၁၄ ရက် နေ့စွဲနဲ့ ပေးပို့ခဲ့တာဖြစ်ပြီး မော်လမြိုင်မြို့မှာတော့ ပြီးခဲ့တဲ့ ၃ ရက်ခန့်ကမှ မြို့နယ်အုပ်ချူပ်ရေးမှူးက အကြောင်းပြန်လာတာလို့ ပြောဆိုပါတယ်။ တဆက်တည်းမှာပဲ ချောင်းဆုံမြို့နယ်နဲ့ သံဖြူဇရပ် မြို့နယ်တွေမှာလည်း အလားတူ ပိတ်ပင်မှုတွေရှိကြောင်း ပါတီဝင်တွေက တင်ပြခဲ့ကြတယ်လို့ ဦးကိုကိုဇော်က ပြောပါတယ်။
အလားတူ ပြည်၊ ဒလ၊ တောင်ကြီး၊ ပင်လုံ၊ ပျဉ်းမနား၊ အောင်ပန်း စတဲ့မြို့တွေမှာလည်း အာဇာနည်နေ့ အခမ်းအနားတွေ ကျင်းပဖို့ စီစဉ်ကြတာကို သက်ဆိုင်ရာတွေက ပိတ်ပင်နေတဲ့အတွက် အာဏာပိုင်တွေရဲ့ လုပ်ဆောင်ချက်တွေအပေါ် မေးခွန်း ထုတ်စရာ ဖြစ်နေတယ်လို့ ၈၈ မျိုးဆက် ကျောင်းသား ခေါင်းဆောင် ကိုဂျင်မီက ဝေဖန်ပြောဆို လိုက်ပါတယ်။
"အောင်ပန်း နောက်ပြီးတော့အခု ဒလ နောက် ပြည်၊ အများပြည်သူက အာဇာနည်ခေါင်းဆောင်ကြီးတွေကို အလေးပြုဖို့၊ ပန်းခွေချဖို့ သူတို့မှာ မြို့မှာရှိတဲ့ အထွတ်အမြတ်တွေရှိတယ်။ အဲဒီမှာ ကျောက်တိုင်၊ ကျောက်တိုင်ဆိုရင် ဒါလွတ်လပ်ရေး ကျောက်တိုင်၊ လွတ်လပ်ရေး ကျောက်တိုင်က ဘယ်သူကို ကိုယ်စားပြုသလဲဆိုရင် ဒါ ဗိုလ်ချုပ်အောင်ဆန်းကို ကိုယ်စားပြုတယ်၊ အာဇာနည် ခေါင်းဆောင်တွေကို ကိုယ်စားပြုတယ်။ ပြီးတော့ ဗိုလ်ချုပ်ကြေးရုပ်၊ ဗိုလ်ချုပ်ကြေးရုပ် ဆိုတာကလည်း အာဇာနည်ခေါင်းဆောင်ကြီးပဲ။ ဒီလိုပဲ Monument တွေရှိတယ်။ အဲဒီမှာ သူတို့က ပန်းခွေချမယ်၊ အလေးပြုမယ် ဆိုတဲ့ကိစ္စတွေကို တားဆီးပိတ်ပင်နေတယ်"
၈၈ မျိုးဆက် ကျောင်းသားများအဖွဲ့ အနေနဲ့ ဇူလိုင် ၁၉ ရက်နေ့မှာ အာဇာနည်ဗိမာန်ကို သွားရောက် ပန်းခွေချ ကြမယ်လို့လည်း သိရပါတယ်။
Ref: RFA News
အမေရိကန်လွှတ်တော်အမတ်နဲ့ ဒေါ်အောင်ဆန်းစုကြည် တို့ ပိတ်ဆို့မှု ဆွေးနွေး
2012-07-17
အမေရိကန် အထက်လွှတ်တော်အမတ် Mitch McConnell နဲ့ ဒေါ်အောင်ဆန်းစုကြည် တို့ဟာ မနေ့ည ၈ နာရီကျော်က တယ်လီဖုန်း ပြောဆိုဆွေးနွေးရာမှာ အမေရိကန် အစိုးရက မြန်မာနိုင်ငံအပေါ် ပိတ်ဆို့ ဒဏ်ခတ်ထားတဲ့ Burma Freedom and Democracy Act နဲ့ ပတ်သက်ပြီး ဆွေးနွေးခဲ့ကြောင်း NLD ပါတီ ပြန်ကြားရေး တာဝန်ခံ ဦးအုန်းကြိုင်က အခုလို ပြောပါတယ်။
"ဆွေးနွေးတဲ့ အကြောင်းအရာက ၃ ခုပဲတဲ့။ တစ်ခုက မြန်မာနဲ့ အမေရိကန် ချစ်ကြည်စွာ ဆက်ဆံရေး အခု တိုးတက်လာတဲ့ကိစ္စ၊ ပိုမိုပြီးတော့ တိုးတက်ဖို့၊ နောက်မြန်မာနိုင်ငံမှာ ဖြစ်ပေါ်နေတဲ့ ဒီမိုကရေစီ ပြောင်းလဲမှုတွေ ပိုမို အရှိန်အဟုန်နဲ့ တိုးတက်လာစေဖို့၊ ပြည်သူလူထုရဲ့ ဘဝများ တိုးတက်ဖွံ့ဖြိုး သာယာလာဖို့ အဲဒီခေါင်းစဉ်တွေနဲ့ ဆွေးနွေး ဖြစ်ကြတယ်တဲ့။ ကျွန်တော်တို့ ပြန်ပြောရရင် ဒီကိစ္စတွေက ဟိုတနေ့ကတုန်းက ဒေါ်နန်းဝါနုတို့တင်တဲ့ အဲဒီအဆိုတွေနဲ့ ဆက်စပ်နေတယ်လို့ ကျွန်တော်ကတော့ အဲဒီလို ယုံကြည်တယ်။ အဲဒါဆိုရင်တော့ အလားအလာကောင်းတွေ ဖြစ်ပေါ်လာမယ်လို့ ကျွန်တော်ကတော့ အဲတာလေး ပြောချင်တယ်"
မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်ဟာ အမေရိကန် အခြေစိုက် Atlantic Council အဖွဲ့က ချီးမြှင့်တဲ့ ကမ္ဘာ့နိုင်ငံသားဆု “Global Citizen Award” ကို လက်ခံ ရယူဖို့အတွက် လာမဲ့ စက်တင်ဘာလအတွင်း အမေရိကန်နိုင်ငံသို့ သွားရောက်ဖို့ ရှိကြောင်း သိရပါတယ်။
ဆုပေးပွဲ အခမ်းအနားကို စက်တင်ဘာ ၂၁ ရက် နယူးယောက်မြို့မှာ ကျင်းပမှာ ဖြစ်ကြောင်း၊ Atlantic Council အဖွဲ့က သတင်း ထုတ်ပြန်ထားပါတယ်။ ပြီးခဲ့တဲ့နှစ်က ဆုရှင်တစ်ဦးဖြစ်တဲ့ အပြည်ပြည်ဆိုင်ရာ ငွေကြေးရန်ပုံငွေအဖွဲ့ IMF အမှုဆောင် ညွှန်ကြားရေးမှူး Christine Lagarde က ဒေါ်အောင်ဆန်းစုကြည်ကို ဆုပေးအပ်မှာ ဖြစ်တယ်လို့ ဆိုပါတယ်။
ဒေါ်အောင်ဆန်းစုကြည်နဲ့ အတူ ကုလသမဂ္ဂ ဒုက္ခသည်များဆိုင်ရာ မဟာမင်းကြီးဟောင်း Sadako Ogata၊ အမေရိကန် နိုင်ငံခြားရေး ၀န်ကြီးဟောင်းနဲ့ နိုဘယ်လ် ငြိမ်းချမ်းရေးဆုရှင် Henry Kissinger ၊ အမေရိကန် ဂီတပညာရှင်နဲ့ လူ့အခွင့်အရေး လှုပ်ရှားသူ Quincy Jones တို့လည်း ဒီဆု ချီးမြှင့်ခံခဲ့ရပါတယ်။
Ref: RFA News
လယ်သမားတွေကို ဆန္ဒပြခွင့်ပြု
2012-07-17
ဒဂုံမြို့သစ် (ဆိပ်ကမ်းမြို့နယ်) က လယ်ယာမြေ အဓမ္မ သိမ်းယူခံထားရတဲ့ လယ်သမားတွေကို သက်ဆိုင်ရာက ဆန္ဒပြခွင့် မနေ့က ပေးလိုက်ပြီလို့ သိရပါတယ်။
လူ (၉၀၀) ကျော် ပါဝင်ဆန္ဒပြဖို့ လျှောက်ထားခဲ့ပေမယ့် လူ (၃၀၀) ကျော်လောက်ပဲ ခွင့်ပြုချက် ရရှိခဲ့တယ်လို့ ဒီဆန္ဒပြပွဲကို ဦးဆောင်မယ့် ရှေ့နေ ဦးဖိုးဖြူက ပြောပါတယ်။
"၁၇ ရက်နေ့ မနက် ၁၀ နာရီ ၄၅ လောက်မှာ ငြိမ်းချမ်းစွာ စုဝေးခွင့်၊ ဆန္ဒပြခွင့် လိုင်စင်ကို ထုတ်ပေး လိုက်တယ်။ ဥပဒေ အခေါ် အရတော့ ခွင့်ပြုမိန့်ကို ထုတ်ပေးလိုက်တယ်။ လယ်သမားတွေ လျှောက်ထားတာက လူကိုးရာနဲ့ ဆန္ဒပြခွင့်ကို လျှောက်ထားတယ်။ မြို့နယ် ရဲတပ်ဖွဲ့မှူးက စစ်တာပြုတာနဲ့ နောက်ဆုံး လူ ၃၀၆ ဦးပဲ တင်ကျန်တော့တယ်"
လာမယ့်ဇူလိုင် (၂၀) ရက်နေ့ မနက် (၁၁) နာရီကနေ နေ့လည် (၁) နာရီအထိ ရန်ကုန်တိုင်း ဒေသကြီး လွှတ်တော် ကိုယ်စားလှယ်ဖြစ်သူ ဦးအောင်သန်းဦး ပိုင်တဲ့ ပင်လယ်ကိုးသွယ် ကုမ္ပဏီရှေ့မှာ ဆန္ဒပြကြမှာ ဖြစ်တယ်လို့ သိရတယ်။
ဒဂုံမြို့သစ် (ဆိပ်ကမ်းမြို့နယ်) က လယ်ယာမြေ အဓမ္မ သိမ်းယူ ခံထားရတဲ့ လယ်သမားတွေ သူတို့ရဲ့ လယ်ယာမြေတွေ ပြန်လည် ရရှိရေး အပါအ၀င် နိုင်ငံတ၀ှမ်းမှာ သိမ်းယူ ခံထားရတဲ့ လယ်ယာမြေတွေ ပြန်လည် ခွဲဝေပေးရေး ဆိုင်ရာ ဥပဒေ တရပ် အမြန်ဆုံး ပေါ်ပေါက်ရေး အတွက် ဒီဆန္ဒပြပွဲမှာ တောင်းဆိုသွားမှာ ဖြစ်တယ် လို့လည်း ဦးဖိုးဖြူက ပြောပါတယ်။ ဒဂုံမြို့သစ် (ဆိပ်ကမ်းမြို့နယ်) အတွင်း လယ်ယာမြေ ဧက တစ်သောင်းကျော်ကို ကုမ္ပဏီ (၁၆) ခုက သိမ်းယူထားတယ်လို့ သိရပါတယ်။
ဒီအတောအတွင်း လယ်ယာမြေ (၅၆၅) ဧက အသိမ်း ခံထားရတဲ့ လပွတ္တာမြို့နယ် ညောင်လိမ်ကျေးရွာနဲ့ သဲဖြူကုန်း ကျေးရွာက တောင်သူလယ်သမား (၁၅၆) ဦးကလည်း လာမယ့် ဇူလိုင် (၂၄) ရက်နေ့မှာ လပွတ္တာမြို့နယ် သကျမဟာရစိန် ဆုတောင်းပြည့်ဘုရား ရှေ့ကွင်းအတွင်းမှာ သူတို့ရဲ့ လယ်ယာမြေတွေ ပြန်လည်ရရှိရေး အတွက် တောင်းဆို ဆန္ဒပြဖို့ သက်ဆိုင်ရာ မြို့နယ်ရဲစခန်းမှာ ဒီကနေ့ စာတင် လိုက်တယ်လို့ တောင်သူ လယ်သမား အရေး ကူညီဆောင်ရွက်နေတဲ့ ရှေ့နေ ဦးဖိုးဖြူက ပြောပြပါတယ်။
Ref: RFA News
ဘင်္ဂါလီလူမျိုး ၇ ဦး မြန်မာ့ ရေတပ် ဖမ်းဆီး
ခင်ဦးသာ
July 17, 2012
ရခိုင်ပြည်နယ် ပေါက်တော ဒေသသို့ တရားမ၀င်ရောက်ရှိ လာသည့် ဘင်္ဂါလီလူမျိုး ၇ ဦးကို မြန်မာ့ တပ်မတော် ရေတပ် က ဖမ်းဆီးမိပြီး စုံစမ်း စစ်ဆေးမှုများ ပြုလုပ်နေကြောင်း သိရသည်။
“သူတို့ကို စစ်ဆေး နေတုန်းပါ၊ ဥပဒေ အရ ဆောင်ရွက် သွားဖို့ ရှိပါတယ်”ဟု ရခိုင်ပြည်နယ် အတွင်း ဖြစ်ပွားသည့် ပဋိပက္ခများနှင့် ပတ်သက်၍ ဖွဲ့စည်းထားသော ပြန်ကြားရေး အဖွဲ့ တာဝန်ခံ ဦးဝင်းမြိုင် က ပြောသည်။
ဖမ်းဆီးထားသူများအား စစ်ဆေးမေးမြန်းရာ တံငါသည်များ ဟု ပြောဆိုကြောင်း၊ ၎င်းတို့သည် ရခိုင်ပြည်နယ်မှ သစ်များကို သယ်ဆောင်ရန် လာခြင်းဖြစ်သည်ဟု ကြားသိ ရကြောင်းလည်း ၎င်းက ဆက်ပြောသည်။
သို့သော် ၎င်းတို့အား မည်သည့် အမှုဖြင့် စစ်ဆေးနေကြောင်းကိုမူ ဦးဝင်းမြိုင် က အသေးစိတ် ပြောဆိုခြင်း မရှိပေ။
စစ်တွေ ဒေသခံများ၏ ပြောဆိုချက်အရ ရခိုင်ပြည်နယ် ပေါက်တော ဒေသသို့ ရောက်ရှိ လာသည့် ထို ဘင်္ဂါလီများကို မြန်မာ ရေ တပ် က ဇူလိုင် ၁၅ ရက်နေ့တွင် ဖမ်းဆီးမိခြင်း ဖြစ်ကြောင်း၊ ၎င်းတို့နှင့်အတူ အန္တရာယ်ပြုနိုင်သော လက်နက်ပစ္စည်း တချို့ဖမ်း ဆီး ရမိကြောင်း သိရသည်။
နိရဉ္ဇရာ သတင်း၌ ယင်းဇူလိုင် ၁၅ ရက်နံနက်ပိုင်းက ပေါက်တော မြို့နယ် သဲခုံရွာ အနီးတွင် မြန်မာ့ ရေတပ်နှင့် စက်လှေဖြင့် ရောက်ရှိလာသော အမည်မသိ အဖွဲ့ တဖွဲ့တို့ ပစ်ခတ်မှု ဖြစ်ပွားကြောင်း၊ ယင်းအဖွဲ့မှ တဦး ဒဏ်ရာရရှိပြီး ၇ ဦးကို ဖမ်းဆီး ရမိကြောင်း၊ ဒဏ်ရာရသူကို ဆေးရုံသို့ ပို့ဆောင်ပြီး ဖမ်းဆီး မိသူများကို စစ်တွေထောင်သို့ ပို့ဆောင်ထားကြောင်း ဖော်ပြထားသည်။
အင်တာနက် သတင်းတချို့တွင်မူ မြန်မာရေပိုင် နက်သို့ စက်လှေ ၃ စီးနှင့်လူများ ၀င်ရောက်လာကြောင်း၊ သို့သော်လှေတစီးနှင့် အတူ လူ ၈ ဦးကိုသာ ဖမ်းဆီးရမိကြောင်း၊ ဖမ်းဆီး ရမိသူများမှာ နူရ်အာလောင်၊ မာဆင်၊ အဏ္ဏ၀ါဂ ၊ ဆာဒဲလ်၊ မိုဟာမက် အီနုစ်၊ နူရ်မာမောက်၊ ဆွေယော့ဒူလာမီရ်၊ မာမတ်အာလောင် တို့ ဖြစ်ကြောင်း ရေးသားထားသည်။
ဘင်္ဂလားဒေ့ရှ် နိုင်ငံမှ ရခိုင်ပြည်နယ် အတွင်းသို့ တရားမ၀င်ရောက်ရှိ လာသည့် ဘင်္ဂါလီ လူမျိုး ၁၀၀ ၀န်းကျင်အား အမ်းမြို့၌ ပြီး ခဲ့သည့်လ အတွင်း ဖမ်းဆီး ထိန်းသိမ်း ထားခဲ့သေးသည်။
ရခိုင်ပြည်နယ် အတွင်း ပဋိပက္ခများ ဖြစ်ပွားပြီးနောက် မြန်မာ-ဘင်္ဂလားဒေ့ရှ် နယ်စပ်ဒေသ လုံခြုံရေး တင်းကျပ် ထားပြီး ပင်လယ်ပြင် တွင်လည်း နှစ်နိုင်ငံ စလုံး၏ ရေတပ် သဘောင်္များ ကင်းလှည့်နေကြောင်း သိရသည်။
Ref: ဧရာဝတီ
ရခိုင်ပြည်နယ် ပဋိပက္ခကြောင့် အေးချမ်းစွာ ပညာ မသင်နိုင်သေး
ခင်ဦးသာ
July 17, 2012
ရခိုင်ပြည်နယ် စစ်တွေမြို့ပြင်ရှိ နည်းပညာကျောင်းမှ ပြန်လာသည့် ကျောင်းသားများကို ယနေ့ နေ့လယ်တွင် ဘင်္ဂါလီ ရွာသား တချို့က အနှောင့်အယှက် ပေးသောကြောင့် တာဝန်ရှိသူများက ကျောင်းသားများ ကျောင်းပြင် မထွက်ရန် သတိပေးထားပြီး လုံခြုံရေး အကာ အကွယ် ယူ၍ ကျောင်းသားများအား အိမ်ပြန်ပို့ပေးရန် စီစဉ်နေရကြောင်း သိရသည်။
“ကျနော့်သားက ကျောင်းကနေ ဆက်သွယ်တယ်။ ဘင်္ဂါလီ ရွာသားတွေက ကျောင်းက ပြန်လာတဲ့ သူတွေကို ဆိုင်ကယ်တွေနဲ့ လိုက်နှောင့်ယှက်လို့ ကျောင်းအုပ်ကြီးက ကလေးတွေကို ကျောင်းပြင် မထွက်ခိုင်း တော့ဘူး။ လုံခြုံရေးကို အကြောင်းကြား ထားတယ်။ လုံခြုံရေးတွေ လာမှ အိမ်ပြန်ပို့ပေးမယ် ပြောတယ်” ဟု နည်းပညာ တက္ကသိုလ် ကျောင်းသား မိဘတဦးက ဧရာဝတီသို့ ပြောသည်။
နည်းပညာ တက္ကသိုလ်သည် စစ်တွေမြို့နှင့် ၈ မိုင်ခန့်တွင် တည်ရှိကြောင်း၊ ကျောင်းသွားရာ လမ်းတလျှောက်၌ ဘင်္ဂါလီ ကျေးရွာတချို့ကို ဖြတ်သွား ရကြောင်း၊ မိဘအများစုသည် လုံခြုံရေး စိတ်မချ သည့်အတွက် သားသမီးများကို ကျောင်း ပြန်မတက် ခိုင်းသေးသည့်အတွက် ကျောင်းသား အနည်းငယ်သာ ရှိကြောင်း သိရသည်။
နည်းပညာကျောင်းအား ယမန်နေ့က စတင် ဖွင့်လှစ်ထားပြီး စစ်တွေမြို့ပေါ်မှ ကျောင်းသားများ တက်ရောက်နေ ကြကြောင်း၊ ကျောင်းကားများ၌ လုံခြုံရေး တပ်ဖွဲ့ဝင် တချို့လိုက်ပါပေးသည်ကို တွေ့ရကြောင်း ပန်းပျိုးလတ် ဘော်ဒါဆောင် ပိုင်ရှင်နှင့် ကျောင်းသား မိဘတဦး ဖြစ်သူ ဦးအောင်ကျော်ညွန့်က ပြောသည်။
“ဘော်ဒါဆောင်မှာတော့ ကျောင်းသားတွေ တ၀က်လောက်ပဲ ရှိတော့တယ်၊ မိဘတွေ ကလည်းပဲ စိုးရိမ်နေကြ တုန်းပဲ၊ မနေ့ကတော့ ကျောင်းကားတိုင်းမှာ စစ်သား တယောက်၊ နှစ်ယောက် လိုက်ပြီး လုံခြုံရေး ယူပေးတာတွေ့ရတယ်” ဟု ၎င်းက ဆိုသည်။
ရခိုင်ပြည်နယ်ရှိ တက္ကသိုလ်ကျောင်း တချို့ စတင် ဖွင့်နေပြီ ဖြစ်သော်လည်း လုံခြုံရေး အခြေအနေကြောင့် တက်ရောက်သူ နည်းပါးသေးကြောင်း သိရသည်။
စစ်တွေတက္ကသိုလ်မှ အပ နည်းပညာ တက္ကသိုလ်၊ ကွန်ပျူတာ တက္ကသိုလ်၊ အဝေးသင် တက္ကသိုလ် စသည့် ကျောင်းတချို့ကို ယမန်နေ့က ပြန်လည် ဖွင့်လှစ်ခဲ့သည်။
တက္ကသိုလ် ကျောင်းများတွင် လုံခြုံရေး အစီအစဉ်များ ဆောင်ရွက် ပေးထားကြောင်း၊ စစ်တွေ တက္ကသိုလ် ကိုလည်း မကြာမီ ဖွင့်လှစ်နိုင်ရန် စီစဉ်နေကြောင်း ရခိုင်ဒေသတွင်း ဖြစ်ပွားခဲ့သည့် ပဋိပက္ခများနှင့် ပတ်သက်၍ ဖွဲ့စည်း ထားသော ပြန်ကြားရေး အဖွဲ့ တာဝန်ခံ ဦးဝင်းမြိုင်က ဧရာဝတီကို ပြောသည်။
“စစ်တွေတက္ကသိုလ်က ဘင်္ဂါလီရွာတွေနဲ့ နီးတဲ့အတွက် တချို့က လုံခြုံရေး စိတ်မချ သေးတာရယ်၊ ကျောင်းသားတွေက လည်းပဲ ကိုယ့်ဒေသတွေကို ပြန်သွားကြတာ ရယ်ကြောင့်ပါ” ဟု ၎င်းက ဆိုသည်။
စစ်တွေမြို့နှင့် ရခိုင်ဒေသတွင်း ဖြစ်ပေါ်ခဲ့သည့် အကြမ်းဖက်မှုများကြောင့် စစ်တွေ၊ သံတွဲဒေသ တို့ရှိ တက္ကသိုလ်များကို ဇွန်လ ဆန်းမှ စတင်၍ ပိတ်ထားခြင်းဖြစ်သည်။ နေရပ် အသီးသီးသို့ ပြန်သွားသည့် ကျောင်းသားများနှင့် မိဘများထံ တာဝန် ရှိသူများ က အကြောင်းကြားထား ကြောင်းလည်း ဦးဝင်းမြိုင်က ပြောသည်။
တက္ကသိုလ်များ၌ တက်ရောက်နေသည့် ကျောင်းသားများမှာ ဒေသခံ တိုင်းရင်းသား ကျောင်းသားများသာ ရှိပြီး ဘင်္ဂါလီ ကျောင်းသား မရှိကြောင်း စစ်တွေမြို့ခံ ကိုညီညီက ပြောသည်။
ရခိုင်ပြည်နယ်ရှိ တက္ကသိုလ်၊ ကောလိပ်၊ အခြေခံ ပညာကျောင်းများ အားလုံး၌ အေးချမ်းစွာ ပညာ သင်ကြားနိုင်ရေး၊ ကျောင်းသားများ၏ လုံခြုံရေး၊ ဆရာ၊ ဆရာမ များ၏ လုံခြုံရေး ပိုမိုကောင်းမွန်စေရန် အစိုးရ အာဏာပိုင် တို့က တာဝန်ယူ ဆောင်ရွက်
ပေးနိုင်ရေး အတွက် ရခိုင် တိုင်းရင်းသားများ တိုးတက်ရေးပါတီ (RNDP) လွှတ်တော် ကိုယ်စားလှယ် များက အစိုးရထံ တင်ပြ ထားကြောင်း သိရသည်။
စစ်တွေမြို့ပေါ် နှင့် ဒေသ တ၀ိုက်ရှိ အခြေခံပညာ ကျောင်းများ အားလုံးနီးပါးကို ဖွင့်လှစ်ထားပြီ ဖြစ်ကြောင်း၊ သို့သော် မိဘ တချို့က ၎င်းတို့ သားသမီးများကို စိတ်မချသည့် အတွက် ကျောင်းသို့ ပို့ဆောင်ခြင်း မရှိကြောင်းလည်း ဦးဝင်းမြိုင်က ပြော သည်။ အကြမ်းဖက်မှု စတင်ခဲ့သည့် မောင်တော၊ ဘူးသီးတောင် မြို့တို့တွင်မူ ကျောင်းများအားလုံး ပိတ်ထားဆဲ ဖြစ်သည်။
မေလေး ပူးပေါင်းရေးသားသည်။
Ref: ဧရာဝတီ
ဒုက္ခသည်များကို ဖမ်းဆီးခြင်းကြောင့် ဆွေးနွေးမှု ထိခိုက်နိုင်ဟု KIO ပြော
ဖနိဒါ
အင်္ဂါနေ့၊ ဇူလိုင်လ ၁၇ ရက် ၂၀၁၂
ချင်းမိုင်(မဇ္စျိမ) ။ ။ ကချင်စစ်ပြေးဒုက္ခသည်များကို ကချင် လွတ်လပ်ရေး အဖွဲ့ KIO နှင့် ပတ်သက် သည်ဟု စွပ်စွဲကာ ဖမ်းဆီးနှိပ်စက်မှုများ ပြုလုပ်နေခြင်းသည် အစိုးရနှင့် ငြိမ်းချမ်းရေးဆွေးနွေးမှု လုပ်ငန်းစဉ် များအား ထိခိုက်စေနိုင်သည် ဟု KIO က ပြောဆို လိုက်သည်။
“မြို့ပေါ်ဆွေးနွေးဖို့ ခေါ်တဲ့အခါ မသွားတဲ့ကိစ္စက ဒီအချက်တွေလည်း ပါတယ်။ အခု လူထု တော်တော် များများဟာ အစိုးရကနေ ဖမ်းဆီးနှိပ်စက်တဲ့ ဒုက္ခ ခံရတာမျိုး၊ လူစဉ် မမီအောင် နှိပ်စက်တာမျိုး လုပ်နေကြတယ်။ ဒီလို အချိန်မှာ ကျနော်တို့က သက်တောင့် သက်သာနဲ့ ဗန်းမော်မှာ၊ မူဆယ် ဘက်မှာ သွားပြီးတော့ ဆွေးနွေးမယ် ဆိုတာက လူထု အမြင်မှာ မရှင်းလင်းဘူး။ ဒီလို ဆက်လုပ်နေတယ် ဆိုရင်တော့ သူတို့ ငြိမ်းချမ်းရေး လုပ်ငန်းစဉ် ဆိုတာ အများကြီး ထိခိုက်မှု ဖြစ်ပွားမှာပဲ” ဟု KIO တွဲဘက် အတွင်းရေးမှူး ဦးလနန် က မဇ္ဈိမကို ပြောသည်။
မြစ်ကြီးနားမြို့ ရွှေစက်ကျေးရွာ နှစ်ခြင်းအသင်းတော် ဘုရားကျောင်း ဒုက္ခသည် စခန်းမှ ကချင်အမျိုးသား ဦးဘရန်ယုံ၊ ဦးလဖိုင်ဂမ်၊ တာလောကြီးကျေးရွာမှ ဦးဇော်ဘောမ်နှင့် ဦးဇခုန်လရိန်တို့ လေးဦးကို KIO နှင့် ပတ်သက်သူများ ဖြစ်သည်ဟု ဆိုကာ ဖမ်းဆီး နှိပ်စက်မှုများ ပြုလုပ်နေသည်ဟု သူတို့အမှုကိုလိုက်ပါ ကူညီပေးနေသည့် ရှေ့နေ ဦးမာခါးက ပြောသည်။
ဇွန်လ ၁၅ ရက်နေ့က မြောက်ပိုင်းတိုင်းစစ်ဌာနချုပ် လက်အောက်ခံ ခလရ ၃၇ တပ်ဖွဲ့များက ယင်းတို့ လေးဦးကို ဖမ်းဆီးခဲ့ပြီး စရဖသို့ လွှဲပြောင်းပေးလိုက်ပြီးနောက် လက်ရှိ မြစ်ကြီးနားထောင်ကြီးတွင် ရမန်ယူနေသည်ဟု ဆိုသည်။
ထို့ပြင် မြစ်ကြီးနားမြို့ ဂျန်မိုင်ကောင်း ရပ်ကွက် ဒုက္ခသည် စခန်းမှ စစ်ပြေး ဒုက္ခသည် ဦးဘရန်ရှောင် ကိုလည်း KIO တပ်ကြပ်ကြီး အဆင့်ဟု စွပ်စွဲဖမ်းဆီးကာ နှိပ်စက် ညှဉ်းပမ်းမှုများ ပြုလုပ်နေသည်။ သို့သော် ဦးဘရန်ရှောင်မှာ KIO နှင့် လုံးဝ ပတ်သက်မှု မရှိကြောင်းနှင့် စစ်ဖက်ရေးရာ လုံခြုံရေး တပ်ဖွဲ့-စရဖ လုပ်ဆောင်နေခြင်းမှာ အစိုးရ၏ အကွက်ဆင် လုပ်ရပ်ဖြစ်ကြောင်း ဦးလနန်က စွတ်စွဲ ပြောဆိုလိုက်သည်။
အသက် ၂၉ နှစ်အရွယ်ရှိ ဦးဘရန်ရှောင်မှာ KIA ဝန်ထမ်းဖြစ်ပြီး ကိုယ်ပိုင်နံပါတ် ၁၈,၅၅၅ ဖြစ်သည်ဟု တရားလို ဘက်မှ ထွက်ဆို ထားချက်သည် လုပ်ကြံပြောဆိုခြင်း ဖြစ်ပြီး လက်ရှိ KIO ၏ အဆိုပါ ကိုယ်ပိုင် နံပါတ်ရှိသူများသည် အသက်အားဖြင့် ၆ဝ နှစ်ကျော် ရှိသည့် ပုဂ္ဂိုလ်များသာ ဖြစ်သည်ဟု ဦးလနန် က ဆိုသည်။
“ဦးဘရန်ရှောင်ဟာ KIO နဲ့ ဘယ်လိုမှ ပတ်သက်မှု မရှိဘူး။ ကိုယ်ပိုင်နံပါတ် တသောင်းကျော်ရှိတဲ့ ပုဂ္ဂိုလ်တွေဟာ အသက်ရှင်မယ် ဆိုရင် အခုချိန်မှာ အသက် ၆ဝ ကျော် ၇ဝ ကျော်ရှိတဲ့ ပုဂ္ဂိုလ်တွေပဲ။ အခုအချိန်မှာ ကျနော်တို့ ကိုယ်ပိုင်နံပါတ်တွေက တသောင်းကျော် မကတော့ပါဘူး ခင်ဗျာ” ဟု ပြောသည်။
ထို့ပြင် ယခုကဲ့သို့ ဖမ်းဆီးခံထားရသော စစ်ပြေး ဒုက္ခသည်များအား တရားရုံးတွင် လိမ်လည်၍ ထွက်ဆို ခိုင်းခြင်းမှာ အစိုးရ အနေဖြင့် ဒုက္ခသည်များအား စေတနာရှင် လူမှုအသင်းအဖွဲ့များ၊ နိုင်ငံတကာက ကူညီထောက်ပံ့မှု မပေးစေရန် ရည်ရွယ်ချက်ရှိရှိနှင့် လုပ်ဆောင်နေခြင်း ဖြစ်သည်ဟု ဦးလနန်က ပြောဆိုလိုက်သည်။
“အစိုးရ ရည်မှန်းချက်က ကချင်ဒုက္ခသည်တွေကို လူမှုအသင်းအဖွဲ့၊ စေတနာရှင်တွေ မရှိအောင်လုပ်တဲ့ ကိစ္စပဲ။ အမှန်တကယ် ကျနော်တို့ KIO ဝန်ထမ်းတွေ အဲဒီစခန်းတွေမှာ သွားနေဝံ့မှာ မဟုတ်ဘူး။ မရှိတဲ့ဟာကို အဲဒီလို လုပ်တယ်ဆိုတော့ ဒုက္ခသည်တွေကို အကူအညီ မပေးအောင် ရည်ရွယ်ချက် ရှိရှိနဲ့ လုပ်တာပဲ” ဟု မဇ္စျိမကို ပြော သည်။
တိုက်ပွဲအခြေအနေနှင့် ပတ်သက်၍လည်း ဇူလိုင်လ ၁ ရက်မှ ၁၆ ရက်နေ့ထိ တိုက်ပွဲ အကြိမ် ၆၅ ကြိမ်ဖြစ်ပွားခဲ့ပြီး ဖြစ်သည်ဟု ဦးလနန်က ပြောသည်။
ဇွန်လ ၂ဝ ရက်နေ့က တရုတ်နယ်စပ် မိုင်ဂျာယန်မြို့တွင် မီးရထားဝန်ကြီး ဦးအောင်မင်း ဦးဆောင်သော အစိုးရ ငြိမ်းချမ်းရေး ကိုယ်စားလှယ် အဖွဲ့နှင့် နောက်ဆုံး တွေ့ဆုံခဲ့၍ အစိုးရ ဘက်မှ တပ်ရုပ်သိမ်းပေးရေး အတွက် နှစ်ဖက် စစ်ဖက်ဆိုင်ရာ အရာရှိများ ထပ်မံ ဆွေးနွေးရန် သဘောတူခဲ့သော်လည်း ယနေ့ထိ တွေ့ဆုံမည့် နေရာ ညှိနိုင်းနေဆဲ ဖြစ်သည်။
Ref: မဇ္ဈိမ
Tuesday, July 17, 2012
မထူး - မခြားတဲ့ ပုတ်သင်ညို လွှတ်တော်
ကျင်းပနေဆဲ ပထမအကြိမ်လွှတ်တော် စတုတ္ထပုံမှန် အစည်းအဝေးတွေက ဆယ်ရက် ခရီးရောက်ရှိလာ ပြီ ဖြစ်ပြီး အဆို တင်ခြင်းနှင့်မေးခွန်းတွေ ၄၀၀ လောက် တန်းစီပြီး ရှိနေတယ်လို့ ကြားသိ ရပါတယ်။ မတ်လက ပြဋ္ဌာန်းခဲ့တဲ့ လယ်ယာမြေ ဥပဒေကိုပြန်သုံးသပ်ပြီး ဥပဒေတွေ ပြန်လည်ပြင်ဆင် ပြဋ္ဌာန်းဖို့ ရှိတယ်၊ နိုင်ငံခြား ရင်းနှီးမြှုပ်နှံမှု ဥပဒေမူကြမ်း တင်ပြဖို့ရှိတယ် - စတဲ့ ပြည်သူ လူထု တစ်ရပ်လုံး အတွက် အင်မတန် အရေးကြီး တဲ့ ဥပဒေဆွေးနွေးမှုတွေက ဘယ်ဆီနေမှန်း မသိ ဖြစ်နေပြီး အားကစားကွင်း ကိစ္စ၊ လမ်းပြင်ပေးဖို့ ကိစ္စတွေနဲ့ အချိန် အတော်ကုန်နေတာ သတိပြုမိပါတယ်။
ဒီကြားထဲမှာ တနှစ်ကို ရှစ်လလောက် လွှတ်တော် ကျင်းပ သွားနိုင်ဖွယ် ရှိတယ်လို့ သူရ ဦးရွှေမန်းရဲ့ စကား ကြောင့် လွှတ်တော် အမတ်တွေ အနေနဲ့ သက်ဆိုင်ရာ မဲဆန္ဒနယ်မြေက လူထုနဲ့ ထိတွေ့ဖို့၊ လူထု အမှန်တကယ် ကြုံတွေ့နေရတဲ့ နေ့စဉ် လူမှုဘဝ ဒုက္ခတွေကို ကူညီဖြေရှင်းဆောင်ရွက်ဖို့တွေ အတွက် အချိန် မရှိတော့ဘဲ လွှတ်တော်အမတ် လစာ သုံးသိန်းယူ၊ လွှတ်တော် တက်တဲ့နေ့တွက် စားရိတ် ယူပြီး အချိန်တွေ ကုန်ရမှာကို စိတ်ပူ လာကြပါတယ်။
ဥပဒေပြုရေးမဏ္ဍိုင်ဖြစ်တဲ့လွှတ်တော်တွေမှာ တနိုင်ငံလုံးနဲ့ ဆိုင်တဲ့ အမျိုးသား အကျိုးစီးပွား မူဝါဒတွေ၊ ဥပဒေ တွေကို ဆောင်ရွက်နိုင်ဖို့ လွှတ်တော်နှစ်ရပ်ပေါင်း ဥပဒေ မူကြမ်းရေးဆွဲရေးကော်မတီ အပြင် ရေးရာကော်မတီ တွေ ၂၃ ခုလောက် ဖွဲ့ထား ပါလျှက်နဲ့ လွှတ်တော် လုပ်ငန်းတွေ မြန်ဆန်ချောမွေ့ရမယ့် အစား စစ်သင်တန်း ကျောင်းမှာ စခန်းသွင်းလေ့ကျင့် သလို လုပ်နေရင်တော့ မြန်မာ့နည်းမြန်မာ့ဟန် လွှတ်တော်တွေဟာ ခုတ်ရာ တခြား ရှရာတလွဲ - ဖြစ်နေတော့မှာကို မြင်ယောင် မိပါတယ်။
ဒီတကြိမ်လွှတ်တော်တွေမှာ လူအများ စိတ်ဝင်စားနေတဲ့ စစ်ဗိုလ် အမတ်တွေက ရွေးချယ် ပေးလိုက်တဲ့ ဒု - သမ္မတ လောင်းကို ပြည်ထောင်စု လွှတ်တော် နာယက-က ထုတ်ပြန်ကြေညာပြီး လွှတ်တော်က အတည်ပြုပေးရမယ့် ကိစ္စ အပြင် ဇူလိုင်လ ၁၃ ရက်က အရေးကြီး အဆိုလို့ခေါင်းစဉ် တပ်ပြီး လွှတ်တော်ကို ကြားဖြတ် တင်သွင်းခဲ့တဲ့ “ ခေတ်မီဖွံ့ဖြိုး တိုးတက်၍ စည်းကမ်းရှိသော ဒီမိုကရေစီနိုင်ငံတော် အဖြစ် ဖေါ်ဆောင်လျှက် ရှိသည့် မြန်မာနိုင်ငံအပေါ် ချမှတ်ထားသည့် စီးပွားရေး ပိတ်ဆို့မှု အဟန့်အတားများကို ဆောင်ရွက်နိုင်သူ မည်သူမဆို မည်သည့် နည်းလမ်းမဆို အသုံးပြု၍ ညှိနှိုင်းဆောင်ရွက်ပေးရန် ” ကိစ္စက ပြည်သူ့ လွှတ်တော်ထဲမှာ အုတ်အော် သောင်းနင်း အခြေအနေ ဖြစ်စေခဲ့ပါတယ်။ ဒီကြားဖြတ် အဆိုကို တင်သွင်းသူက ရှမ်းပြည်နယ် ကွန်ဟိန်း မဲဆန္ဒ နယ်က ပြည်သူ့ လွှတ်တော်အမတ် နန်းဝါနုဖြစ်ပြီး သူမရဲ့ မိခင်ပါတီ အဖွဲ့အစည်းက ရှမ်းတိုင်းရင်းသားများ ဒီမိုကရက်တစ် ပါတီ SNDP ဖြစ်ပါတယ်။
စီးပွားရေးပိတ်ဆို့မှုတွေနဲ့ ပတ်သက်ပြီး ဆွေးနွေးချက် အမျိုးမျိုး၊ အမြင် ရှုထောင့် အဖုံဖုံနဲ့ အရင်တုန်း ကလည်း ရှိခဲ့ဖူးပေမယ့် အခုတခေါက် ထူးခြားတာက လွှတ်တော်မှာ ကြားဖြတ် အဆိုတင်တာ၊ တင်ပြတဲ့ အမတ်က ရှမ်း ပါတီက တိုင်းရင်းသူ အမျိုးသမီး ကိုယ်စားလှယ်ဖြစ်နေတာ၊ စကားလုံး သုံးတာက အစ - စစ်အုပ်စုရဲ့ တောက် လျှောက် လက်သုံးစကား ခေတ်မီ ဖွံ့ဖြိုး စည်းကမ်းပြည့်ဝ ဆိုတာကို အတိအကျ သုံးထားတာ၊ ကမ္ဘောဒီးယား နိုင်ငံ ဆီရမ်ရိမြို့မှာ ကျင်းပနေတဲ့ အမေရိကန် - အာဆီယံ စီးပွားရေး ဖိုရမ်မှာ သမ္မတ ဦးသိန်းစိန်က မြန်မာပြည်ဆိုင် ရာ မိန့်ခွန်းပြောတဲ့ အချိန်နဲ့ တထပ်တည်းဖြစ်နေတာ၊ အမေရိကန် ကွန်ဂရက်ရဲ့ မြန်မာပြည် ဆိုင်ရာ စီးပွားရေး ဒဏ်ခတ် အရေးယူမှု သက်တမ်း နောက်သုံးနှစ် ထပ်တိုးရေးဆွေးနွေးမယ့် ဇူလိုင်လ ၂၆ ရက် မတိုင်မီ မြန်မာ့ လွှတ်တော်ရဲ့ သဘောထားဆိုပြီး ဆုံးဖြတ်ချက် တခုခု ရယူချင်တာ - တွေဟာ သာမန် တိုက်ဆိုင်မှု မဟုတ် ဘဲ စီမံချက်ချ စံနစ်တကျ လုပ်ဆောင်တယ် ဆိုတာ ထင်ရှားပါတယ်။
- ဒီဇတ်လမ်း၊ ဇတ်ညွှန်းအတိုင်း အသုံးချခံရတဲ့ ပထမ သားကောင် ကတော့ ရှမ်း တိုင်းရင်းသားများ ကိုယ်စားပြု ထားတဲ့ ကျားဖြူ ပါတီက နန်းဝါနုဖြစ်ပြီး သူမကိုယ်တိုင် Sanction နဲ့ ပတ်သက်လို့ ဘယ်လို ယုံကြည် ခံယူထားတယ် ဆိုတာ မသိရပေမဲ့ တင်သွင်းတဲ့ စကားရပ်တွေဟာ စစ်အုပ်စုတောက်လျှောက် ဝါဒဖြန့်ခဲ့တဲ့ အမေရိကန် ရဲ့ စီးပွားရေး ပိတ်ဆို့ ဒဏ်ခတ်မှုကြောင့် ပြည်သူလူထု ဆင်းရဲမွဲတေ ဒုက္ခရောက်ရတယ် ဆိုတာမျိုးတွေ တွေ့ရလို့ စစ်အုပ်စုရဲ့ ဝါဒမှိုင်း မိနေတဲ့ အမတ်တွေ လွှတ်တော်ထဲမှာ ဘယ်လောက် များနေပြီလဲ တွေးမိပါတယ်။ ရှမ်းပြည် အပါအဝင် တောင်ပေါ်ဒေသနေ တိုင်းရင်းသားပြည်သူ အများ ဆင်းရဲ ဒုက္ခရောက်ရ တာဟာ အမေရိကန်ရဲ့ အရေးယူ ပိတ်ဆို့ ဒဏ်ခတ်မှုကြောင့်လား၊ ပြည်တွင်းစစ်ကြောင့်လား၊ ပြည်တွင်းစစ် တရားခံ စစ်အာဏာရှင် စံနစ်ကလည်း ဘာကြောင့် ဒီတိုင်းပြည်မှာ အမြစ်တွယ်နေရ သလဲ- ဆိုတဲ့ ပြဿနာ ဇစ်မြစ်တွေကို သိသိကြီးနဲ့ ရှမ်းတိုင်းရင်းသူ နန်းဝါနုက လွှတ်တော် ဥက္ကဋ္ဌ သူရ ဦးရွှေမန်းနဲ့ ဇတ်တိုက်ပြီး လွှတ်တော်ထဲ ရောက်နေတဲ့ နိုင်ငံ ရေး ပါတီတွေ အားလုံး၊ အထူးသဖြင့် NLD နဲ့ ဒေါ်အောင်ဆန်းစုကြည် တို့ကို ချောင်ပိတ်ပြီး စီးပွားရေး ပိတ်ဆို့မှု တွေ ရုတ်သိမ်းဖို့ ထောက်ခံလား၊ ကန့်ကွက်လား- အဖြေတောင်းတဲ့ ပုံစံမျိုးကတော့ လွှတ်တော် လုပ်ပိုင်ခွင့် တွေကို အာဏာ အထက်စီး ( Power Over ) လုပ်ရာ ကျပါတယ်။
ဇူလိုင်လ ၁၃ ရက် လွှတ်တော်စည်းဝေး ပြီးပြီးချင်းမှာ သူရ ဦးရွှေမန်းက ဒေါ်အောင်ဆန်းစုကြည်ကို သီး သန့် ခေါ်တွေ့ပြီး မိနစ် ၅၀ လောက် စကားပြောတဲ့ အချိန်မှာလည်း နန်းဝါနုက အတူ ရှိနေခဲ့ပြန်လို့ ဒီကြားဖြတ် အဆို ဟာ နိုင်ငံရေး အရ စီမံချက်ချ လုပ်ကိုင်တဲ့ ဇတ်ညွှန်း တကွက်သာဖြစ်ကြောင်း ပိုထင်ရှားစေပါတယ်။ ၂၀၀၇ ခုနှစ် ရွှေဝါရောင် သံဃာ့ လှုပ်ရှားမှုကြီးကို စစ်အုပ်စုက အကြမ်းဖက်နှိပ်ကွပ်လို့ ကုလသမဂ္ဂ အထူး ကိုယ်စား လှယ် မစ္စတာ ဂမ်ဘာရီ မြန်မာပြည်ရောက်လာပြီး ဗိုလ်သန်းရွှေနဲ့တွေ့တဲ့ အခါ “ ဒေါ်အောင်ဆန်းစုကြည်က စီးပွားရေး ပိတ်ဆို့မှုတွေ လုပ်ထားလို့ ဒါကို သူမကိုယ်တိုင် ရုတ်သိမ်းပေးဖို့ ပြောရင် သူကိုယ်တိုင် ဒေါ်အောင် ဆန်းစုကြည်နဲ့ တွေ့ဆုံဆွေးနွေး စကားပြောမယ် ” ဆိုပြီး ကိုယ့်အပြစ်တွေ အကုန် သူတပါးဆီကို လွှဲချ၊ လူထုနဲ့ ရန်တိုက်ပေးတဲ့ လုပ်ရပ်မျိုး လုပ်ခဲ့ပြီးပါပြီ။
ဒီတစ်ခါတော့ လွှတ်တော်နည်းနဲ့ အမေရိကန်ကို မျက်စပစ်တဲ့ နည်းလမ်း အသစ်ကို သုံးကြည့် တာသာ ဖြစ်ပါ တယ်။ သူရ ဦးရွှေမန်း အနေနဲ့ လိပ်ပြာ သန့်တယ် ဆိုရင် ဒီကြားဖြတ် အဆိုကို အရေးကြီး အဆိုအဖြစ် လက်ခံ တင်သွင်းစေတယ် ဆိုပြီး လွှတ်တော် ဥက္ကဋ္ဌရဲ့ ပါဝါ အာဏာနဲ့ ဆွေးနွေး အတည်ပြုချက် ယူပြီးမှ ဒေါ် အောင်ဆန်း စုကြည်ကို သီးသန့်ခေါ်ယူဆွေးနွေးနေစရာ မလိုဘူးလို့ မြင်မိပါတယ်။ မြန်မာ့ လွှတ်တော်တွေကို မောင်ပိုင် စီးထားတဲ့ စစ်ဗိုလ်ချုပ်ကြီးဟောင်းများက သူတို့ စစ်အုပ်စု အာဏာ သက်ဆိုးရှည်စေဖို့ အကြောင်း ကိစ္စရပ် မှန်သမျှ တိုင်းရင်းသား အမတ်တွေကို အသုံးချပြီး အရေးကြီး အဆိုအဖြစ် လွှတ်တော်ကို ကြားဖြတ် တင်ခိုင်းတဲ့ ပုတ်သင်ညို လွှတ်တော် ပုံစံမျိုး တွေ ရှေ့လျှောက်တွေ့လာရတော့မှာ မြင်ယောင်နေမိပါတယ်။
မင်းဝဏ်
Monday, July 16, 2012
စစ်ဖက်အရပ်ဖက် ဆက်ဆံရေးနဲ့ မြန်မာ့ခေတ်မီ တပ်မတော်
တပ်မတော်တွင်းက အဆင့်မြင့် အရာရှိကြီးတွေကို လက်ရှိခေတ်သစ်နိုင်ငံတော် အစိုးရ အဖွဲ့အတွင်း အရပ်ဖက် စစ်ဖက်နှစ်ဖက် ညီမျှပြီး ဒီမိုကရေစီ လူ့ဘောင်နဲ့ အံဝင် ဂွင်ကျဖြစ်လာနိုင်စေမယ့် သင်တန်း တခု အကြောင်းကို ဒီ တပါတ် ခေတ်မီ တပ်မတော် တရပ်ရဲ့ ရှေ့ခရီး အစီအစဉ်ကနေ မိတ်ဆက် တင်ပြပေးသွားမှာပါ။
အမိန့်၊ ထိန်းချုပ်ကွပ်ကဲမှု၊ ဆက်သွယ်ရေးနဲ့ ထောက်လှမ်းရေး ကဏ္ဍတွေကို ယေဘူယျ အားဖြင် အင်္ဂလိပ်လို( C 3 I ) လို့ အတိုကောက်ခေါ်ပါတယ်။ ဒီအချက်တွေကို တပ်မတော် အဆင်မြင့် အရာရှိတိုင်း သင်ကြားရပြီး လိုက်နာ ကျင့်သုံးလေ့ ရှိပါတယ်။ ဒီကနေ့မှာတော့ သမရိုးကျ စစ်ပွဲ၊ ပြောက်ကျား စစ်ပွဲများမှ ဘက်စုံစစ်ပွဲ (Multi-dimensional Warfare) ဗျူဟာတွေ အထိ စစ်သေနင်္ဂ ဗျူဟာများ တိုးတက် လာခဲ့သလို C 3 I အစား C 5 I S R အဖြစ် ကွန်ပြူတာ၊ တိုက်ပွဲဝင်စနစ်၊ ကြိုတင်စောင့်ကြပ်ခြင်း၊ ဝေဟင်ထောက်လှမ်းမှု၊ တို့ကိုပါ ထပ်မံ တိုးချဲ့ ကျင့် သုံး ကြရပြန်ပါတယ်။
ဒီလိုအဖက်ဖက်က ခေတ်မီလာတဲ့ စစ်ရေးကဏ္ဍမှာ သာမန် စစ်သေနင်္ဂ ဗျူဟာများ သာမက နောင် တိုင်းပြည် အုပ်ချုပ်ရေး ကဏ္ဍအတွက် စစ်ဖက် အရပ်ဖက် ဆက်ဆံရေး ကိစ္စများအတွက် သင်တန်းများ ကလည်း မရှိမဖြစ် ပါပဲ။ မြင်သာပြီးအောင်မြင် ထင်ရှားလှတဲ့ သင်တန်း တခုကတော့ အမေရိကန်က IMET လို့ခေါ်တဲ့ နိုင်ငံတကာ စစ် ပညာပေးနဲ့ လေ့ကျင့် သင်တန်းကျောင်း(သို့) စစ်ဖက်အရပ်ဖက် ဆက်ဆံရေး သင်တန်းပါ။
အဲဒီသင်တန်းကနေပြီး လစ်ဘရယ်ဒီမိုကရက်တစ် အစဉ်အလာတွေကို ရင်းနှီး ကျင့်သုံးစေဖို့ စစ်ဘက်က အရာ ရှိကြီးများ အတွက် စီမံခန့်ခွဲမှု၊ တရားစီရင်ရေး၊ ကိုယ်ကျင့် သိက္ခာနဲ့ လူ့အခွင့်အရေး စတဲ့ ကိစ္စ အ၀၀ကို သင်ကြား ပေးပါတယ်၊ အမေရိကန်တွင် သာမက ကမ္ဘာ အရပ်ရပ် နိုင်ငံများရဲ့ စစ်တပ်ခေါင်းဆောင် အတော်များများလည်း တက်ရောက် သင်ကြားလေ့ရှိပြီး စစ်ခေါင်းဆောင်တွေကို အရပ်ဖက် ဒီမိုကရေစီ ကျင့်စဉ်များနဲ့ ဆက်စပ်ပေးကာ လူ့အခွင့်အရေး ချိုးဖေါက်မှုတွေ နည်းပါးလာစေဖို့ ရည်ရွယ်ပါတယ်။
အမေရိကန် နိုင်ငံခြားရေးပေါ်လစီအရ ဒီသင်တန်းတွေဟာ ၁၉၇၆ ခုနှစ်က စတင် သန္ဓေ တည်ခဲ့ပြီး ၁၉၉၁ ခုနှစ်မှာ အောင်မြင်စွာ အသက်ဝင် လှုပ်ရှား လာနိုင်ခဲ့တာပါ။ ၂၀၀၅ ခုနှစ်အတွင်း အမေရိကန်က နိုင်ငံပေါင်း ၁၅၀ သို့ ပေး တဲ့ ပြည်ပ စစ်ဖက် အကူညီငွေဟာ ဒေါ်လာသန်း (၂၂၀၂.၂) သန်း ရှိပါတယ်။ ဒီထဲမှာ IMET အရပေးခဲ့တာ ဒေါ်လာ(၈၉) သန်း ဖြစ်ပါတယ်။ ကမ္ဘာ့နိုင်ငံပေါင်း (၁၄၀)ကျော်က သင်တန်းသားပေါင်း တစ်သိန်း တစ်သောင်း ကျော်လောက်ကို လေ့ကျင့်ပေးခဲ့ပြီး ၁၉၈၅ ခုနှစ်က စပြီး လေ့ကျင့်ပေးခဲ့တဲ့ ပြည်ပ အဆင့်မြင့်စစ်ခေါင်းဆောင် သင် တန်းသား (၄၇၁) ဦး အနက် ၂၅ ယောက်ဟာ တိုင်းပြည်ခေါင်းဆောင်တွေ ကာကွယ်ရေး ၀န်ကြီး၊ သံတမန် ကြီးနဲ့ ကုလသမဂ္ဂ ထိပ် တန်း တာဝန်ခံတွေဖြစ်လို့ နေကြပါပြီ။
၁၉၈၈ ခုနှစ်တုံးက ကျနော်တို့ အိမ်နီးချင်း ဘင်္ဂလားဒေ့မှာ IMET သင်တန်းတွေပေးဖို့ အမေရိကန်ဒေါ်လာ ၃ သိန်း သုံးစွဲခဲ့ကြောင်း သိရပါတယ်။ ထိုင်းနိုင်ငံရဲ့ စစ်ဖက် အရပ်ဖက် ဖွံ့ဖြိုး တိုးတက်ရေး သင်တန်းတွေကိုလည်း အမေရိ ကန် IMET ရန်ပုံငွေ ထဲကထောက်ပံ့ ခဲ့သလို ၂၀၀၆ခုနှစ် ထိုင်းမှာ စစ်တပ်က အာဏာသိမ်းတော့ အမေရိကန်တို့ ပေးထားတဲ့ များစွာသော စစ်ရေး အထောက်ကူပြု သင်တန်း ရန်ပုံငွေတွေ ဖြတ် တောက်ပြစ်မယ်လို့ ဆိုပြီး ထိုင်း စစ်အာသိမ်းမှုကို ဟန့်တားပေးနိုင်ခဲ့ကြောင်း သိရပါတယ်။
အလားတူ အရှေ့အလယ်ပိုင်းနဲ့ အာဖရိကနိုင်ငံများက စစ်တပ် အာဏာသိမ်းမှု လူ့အခွင့်အရေး ချိုးဖေါက်မှုတွေ ဖြစ်ပေါ် လာတိုင်း IMET ကပေးထားတဲ့ သင်တန်း အကူညီငွေများ ပြန်ရုပ်သိမ်းလေ့ ရှိပါတယ်။
အယ်ဘေးနီးယား ကြည်းတပ် စစ်ဦးစီးချုပ် ကိုယ်တိုင် ဒီလို သင်တန်းမျိုးကို တက်ရောက် ခဲ့ပြီးနောက် ဒီလို သင်တန်းတွေကို သူ့နိုင်ငံ တွင်းမှာ ပြန်လည် ဖွင့်လှစ်နိုင်ခဲ့လို့ အယ်ဘေးနီးယား စစ်ခေါင်းဆောင်တွေရဲ့ စစ်အရည် အသွေး မြင့်တက် လာခဲ့သလို အရပ်ဖက်နိုင်ငံရေးခေါင်းဆောင်တွေရဲ့ ဦးဆောင်မှုကို လက်ခံနိုင်စွမ်း ပိုမြင့်မား လာခဲ့ကြောင်း အရပ်ဖက် စစ်ဖက် ဆက်ဆံရေး ပိုမိုပြေပြစ်ပြီး တိုင်းပြည် ဖွံ့ဖြိုးခဲ့တဲ့ အကြောင်း နမူနာ အဖြစ် လေ့ လာ တွေ့ရှိရပါတယ်။
အရင်တုံးက လက်တင် အမေရိက နိုင်ငံတွေမှာ အရပ်သား အစိုးရတွေက စီးပွားရေးဖေါ်ဆောင် ကြရာမှာ မ အောင် မမြင်ဖြစ် တိုင်းပြည် မငြိမ်မသက်ဖြစ်တဲ့ အချိန် စစ်တပ်ကိုခေါ် အာဏာသိမ်းခိုင်းလေ့ ရှိပြီး ဒီကနေ့လို စီး ပွားရေး ဖွံ့ဖြိုး တိုးတက်လာချိန် လူ့ အခွင့်အရေးတွေမြင့်မား လာချိန်မှာတော့ နိုင်ငံရေး နယ်ပါယ်ထဲ စစ်တပ်ရဲ့ ပါ ၀င်ပတ်သက်မှုကို ပြန်လည် စမ်းစစ်နေကြပါပြီ။
အစဉ်အဆက် စစ်တပ်သာလျှင် အခရာလို့ ယုံမှတ်ခဲ့တဲ့ ကျနော်တို့မြန်မာ့တပ်မတော် ဗိုလ်ချုပ်များလည်း စစ် တပ်က တိုင်းပြည်ကို စီမံခန့်ခွဲခဲ့ကြတဲ့ သမိုင်း သင်ခန်းစာတွေကို ပြန်ပြီး သုံးသပ်ကြည့်ချိန် တန်ပါပြီ။
ဂျပန်တို့ရဲ့ စစ်ရေးစွမ်းရည် အင်္ဂလိပ် စစ်တပ်ရဲ့ အုပ်ချုပ်မှုနဲ့ စည်းကမ်းများ အရ မြန်မာ့ တပ်မတော်ကြီးကို ပေါင်း စပ် တည်ဆောက် ခဲ့ကြသလို လွတ်လပ်ရေး ရပြီးနောက် ကာလ တချို့အထိလည်း အင်္ဂလိပ်တို့ရဲ့ လေ့ကျင့်ပေးမှု တွေနဲ့ မကင်းခဲ့ကြပါဘူး။ သာမန် စစ်သားလေ့ကျင့်ရေး မှသည် တပ်စု၊ တပ်ခွဲ၊ တပ်ရင်း အဆင့် လေ့ကျင့်ရေးများ သာမက ဗျူဟာမှုး အဆင့်သို့ ရောက်ရှိလာသူတိုင်း အတွက် နောင် တပ်မတော်ရဲ့ အရေးကြီး တာဝန်တွေ ထမ်း ဆောင်နိုင်ဖို့ လေ့ကျင့်ပေးတဲ့ စစ် အကယ်ဒမီကျောင်း တခုကို ၁၉၅၄ ခုနှစ် အတွင်း ဖွင့်လှစ်ပေးခဲ့ကြောင်း သိရပါ တယ်။ နောင်မှာ ဒီ စစ်အကယ်ဒမီကျောင်းကိုပဲ နိုင်ငံတော် ကာကွယ်ရေး တက္ကသိုလ် အဖြစ် တိုးမြှင့်ခဲ့ပါတယ်။ နှစ် စဉ် တပ်ရင်းမှူး အထက် ဗျူဟာ အဆင့်ရှိ ဗိုလ်မှူးကြီး ၃၀ မှ ၅၀ ဦးတက်ရောက် သင်ကြား ရပါတယ်။ ဒီနိုင်ငံ တော်ကာကွယ်ရေး တက္ကသိုလ် အမှတ်စဉ် (၁) ကျောင်းဆင်းတဲ့ အသုတ်ထဲက လက်ရှိ ပြည်သူ့လွှတ်တော် ဥက္ကဋ္ဌကြီး ဦးသူရရွှေမန်း၊ ပြီးခဲ့တဲ့ ရက်ပိုင်းကလေးကမှ ဒုတိယ သမ္မတ ဟောင်းဖြစ်သွားခဲ့သူ သီဟသူရ ဦးတင် အောင်မြင့်ဦး တို့ဟာ ဒီကနေ့ မြန်မာ့နိုင်ငံမှာ အုပ်ချုပ်ရေးပိုင်းက ရောက်ရှိလာတဲ့သူတွေ ဖြစ်နေကြပါတယ်။
အစောပိုင်းမှာ နိုင်ငံတော်ကာကွယ်ရေး တက္ကသိုလ်ကို တက်ရောက်ခွင့် ရတဲ့ သူတွေတိုင်း တိုင်းမှူး တပ်မမှူး များ အဖြစ် ဆက်လက် တာဝန် ထမ်းဆောင်ခွင့် ရခဲ့ကြပေမယ့် နောင်မှာ သင်တန်းသား (၁၃၀)လောက် အထိ တိုးပြီး ခေါ်ယူ ခဲ့တာမို့ ဗိုလ်ချုပ် အဆင့်ပိုင်းဖေါင်းပွမှုဖြစ်ကာ နိုင်ငံတော် ကာကွယ်ရေး တက္ကသိုလ် ဆင်းတိုင်း တိုင်းမှူး တပ်မမှူးဖြစ်ခွင့် သိပ်မရကြတော့ဘဲ အရပ်ဖက် ညွှန်ချုပ်များ အဖြစ်သာ သင့်သလို နေရာချထားခြင်းကို ပေးခြင်း ခံရပါတော့တယ်။
ဒါကြောင့်မို့ လက်ရှိနိုင်ငံတော် ဌာနဆိုင်ရာ ယန္တရား တိုင်းမှာ စစ်တပ်က လာသူတွေနဲ့ ပြည့်နေသလို လွှတ်တော် နဲ့ အစိုးရ အဖွဲ့ထဲမှာလည်း ၊ စစ်ဘောင်းဘီဝတ်နဲ့ အရပ်သားဝတ် စစ်ဗိုလ်ချုပ်တွေသာ အများစုပါ။ ဒီအကျိုး သက်ရောက်မှုဟာ လွန်ခဲ့တဲ့ အနှစ် (၂၀)ကျော် အတွင်း သိပ်မမြင်သာပေမယ့် ဒီကနေ့လို ဖွဲ့စည်းပုံနဲ့ အညီ ရွေး ကောက်ခံ အရပ်သား ဒီမိုကရေစီ စနစ် တိုင်းပြည် တခုကို ထူထောင်ကြတဲ့ အခါမှာတော့ သမ္မတကြီး ဦးသိန်းစိန်နဲ့ လွှတ်တော် ဥက္ကဋ္ဌကြီး ဦးရွှေမန်းတို့က ရှေ့က အသွင်ပြောင်းရေး ကြိုးပမ်းနေသလောက် နောက်ဆွယ်က စစ် ဖက်၊ အရပ်ဖက်နဲ့ အစိုးရ လွှတ်တော်တွင်းရှိ စစ်ဗိုလ်ချုပ်တွေက ထင်ရာ စိုင်းနေကြဆဲမို့ ဘက်ပေါင်းစုံမှာ အခက် အခဲ တွေဖြစ်ပေါ်လို့ လာနေရသလားလို့ တွေးစရာတွေ ဖြစ်လာပါတယ်။
အပစ်ရပ်တယ် လို့ဆိုတဲ့ ကချင်ပြည်နယ်အတွင်း သမ္မတနဲ့ ငြိမ်းချမ်းရေး ဖေါ်ဆောင်မှု ကော်မရှင်က စီစဉ်သလို စေ့စပ်ဆွေးနွေး ကြသလို မဖြစ် မြန်မာ စစ်တပ်ဖက်ကနေ ၁၂၀ မမ လက်နက်ကြီးကျည်တွေ နေ့စဉ်ရာနဲ့ချီ ပစ် ခတ်လို့သာ နေကြပါတယ်။ ပြီးတော့လည်း မငြိမ်မသက်ဖြစ် ဆူပူနေတဲ့ ရခိုင်ပြည်နယ်က ဘင်္ဂါလီ အရေး မှာလည်း လုံခြုံရေး ထိန်းသိမ်း သူတွေဟာ နည်းပါးတဲ့ စစ်သည် အင်အားနဲ့ လေ့ကျင့်ရေး ကျည်ဆံတွေကို သုံးပြီး ပစ် ခတ် ထိန်းသိမ်း တာတောင် တည့်တည့် မပစ်ဝံ့တဲ့ အနေအထားရောက်လို့ နေပြန်ပါတယ်။
လက်ရှိအစိုးရသစ်သက်တမ်း တနှစ်လွန်ကာလ အထိ အရပ်ဖက်စစ်ဖက် ဆက်ဆံရေး အာဏာ ထိန်းညှိ ယူကြ ရာမှာ လူများပေမဲ့ ပွဲက မစည် ဆိုသလို စစ်ဖက်နဲ့ အရပ်ဖက်ကြား အာဏာ ခွဲဝေရေးကို မနည်းကြီး အဆင်ပြေ အောင် လုပ်နေရတဲ့ အနေအထားမှာ ပဲ ရှိနေသေးတာ ပြည်သူတိုင်း အသိပါ။ လက်ရှိအနေအထား ကနေပြီး နောက်ကြောင်း မပြန်လှည့်ဖို့ ဆိုတာကလည်း သိပ်မရေရာလှသေးသလိုပါပဲ။
အထက်မှာပြောခဲ့သလို မြန်မာ့ တပ်မတော်ရဲ့ အဆင့်မြင့် စစ်ဖက် အရာရှိကြီးများ ဗိုလ်မှူးကြီးနဲ့ ဗိုလ်ချုပ်များကို လေ့ကျင့် သင်ကြားပေးခဲ့တဲ့ နိုင်ငံတော် ကာကွယ်ရေးတက္ကသိုလ် သင်ခန်းစာတွေ ထဲမှာ နိုင်ငံတော် ဖွံ့ဖြိုးတိုး တက်ဖို့ အခြေခံ တရပ်ဖြစ်တဲ့ အရပ်ဖက်စစ်ဖက် ဆက်ဆံရေး သင်ခန်းစာတွေ ပြီးပြည့်စုံစွာ ပါရှိဟန် မတူပါဘူး။ ဒီလို မြန်မာ့ တပ်မတော် အရာရှိကြီးများ အတွက် အရပ်ဖက် စစ်ဖက် ဆက်ဆံရေးကို အလေးထားတဲ့ သင်တန်း ကောင်းတွေ မရှိဘဲနဲ့တော့ မြန်မာ့ ဒီမိုကရေစီရေး ရှေ့တဆင့် တက်မလှမ်းနိုင်သလို နောက်ကြောင်း မပြန်ရေး ဆိုတဲ့ အာမခံချက်တွေလည်း ရှိနိုင်ဦးမှာ မဟုတ်သေးတဲ့ အကြောင်း မျှဝေ လိုက်ရပါတယ်။
ဟန်လင်း
အာဇာနည်နေ့ နိုင်ငံတော် အခမ်းအနား NLD ပါတီ တက်ရောက်မည်
2012-07-15
အစိုးရက ဒီနှစ်ကျင်းပမယ့် ဇူလိုင် (၁၉) ရက် ၆၅ နှစ်မြောက် အာဇာနည်နေ့ အထိမ်းအမှတ် နိုင်ငံတော် အခမ်းအနားကို အမျိုးသား ဒီမိုကရေစီ အဖွဲ့ချုပ်က တက်ရောက်ဖို့ ရှိတယ်လို့ ပါတီ တာဝန်ရှိသူတွေက RFA ကို ဒီကနေ့ ပြောကြားပါတယ်။
ဒါဟာ ပါတီဥက္ကဋ္ဌ ဒေါ်အောင်ဆန်းစုကြည်ကို ၂၀၁၀ ပြည့်နှစ် နိုဝင်ဘာလမှာ နေအိမ် အကျယ်ချုပ်က လွှတ်ပေး လိုက်ပြီးတဲ့နောက် သက်ဆိုင်ရာ အာဏာပိုင်တွေက NLD ပါတီကို အာဇာနည်နေ့ အခမ်းအနားကို တက်ရောက်ဖို့ ပထမဦးဆုံး အကြိမ် တရားဝင် ဖိတ်ကြားတာ ဖြစ်တယ်လို့ ပါတီ နာယကအဖွဲ့ဝင် ဦးတင်ဦးက ပြောပါတယ်။
"မနှစ်ကတုံးက ကျနော်တုိ့က အဖွဲ့ရယ်လို့မှ အသိအမှတ်ပြု မခံရသေးပဲ။ သို့သော်လည်းဘဲ သမ္မတကြီး ဦးသိန်းစိန်နဲ့ တွေ့ပြီးတဲ့ နောက်ပိုင်းမှာ လိုက်လိုက်လျောလျော ရှိလာတော့၊ ဒေါ်အောင်ဆန်းစုကြည်က သူ့ဟာသူပဲ မနက်ပိုင်းမှာ ခါတိုင်းလိုပဲ သွားတာ ရှိတယ်ပေါ့နော်။ အဲဒါနဲ့ အတူတကွပဲလား။ ဒါမှမဟုတ် ဒေါ်အောင်ဆန်းစုကြည်တို့ ပြီးတော့မှပဲ နောက်ပိုင်းမှ တဖွဲ့စီ ပန်းခွေ ချတာပဲ ဖြစ်မလား ဆိုတာတော့ မသိသေးဘူး ခင်ဗျ။ ဒါပေမဲ့ တက်ဖို့ ၅ ယောက်တော့ စာရင်းပေးလိုက်ပြီ။"
အာဇာနည်နေ့ အခမ်းအနားကို ပါတီကိုယ်စားပြု တက်ရောက်မယ့် ငါးဦးကတော့ ဦးတင်ဦး၊ ဦးဟံသာမြင့်၊ ဦးစိုးဝင်း၊ ဒေါ်မြင့်မြင့်စိန်၊ ကိုမျိုးညွန့်တို့ ဖြစ်ပါတယ်။
ပျဉ်းမနား နေပြည်တော်မှာ ကျင်းပနေတဲ့ လွှတ်တော် အစည်းအဝေး တက်ရောက်နေတဲ့ ဒေါ်အောင်ဆန်းစုကြည် ကိုယ်တိုင်လည်း အာဇာနည်နေ့ အခမ်းအနား အတွက် ဇူလိုင် (၁၈) ရက်နေ့မှာ ရန်ကုန်မြို့ကို ခေတ္တခဏ ပြန်လာမယ်လို့ ဆိုပါတယ်။
မြန်မာ့လွတ်လပ်ရေး ခေါင်းဆောင် ဗိုလ်ချုပ်အောင်ဆန်းနဲ့ တကွ အာဇာနည် ပုဂ္ဂိုလ်ကြီးတွေ လုပ်ကြံ သတ်ဖြတ် ခံရပြီး ကျဆုံး သွားတဲ့နေ့ကို အောက်မေ့တဲ့ အနေနဲ့ NLD ဌာနချုပ် မှာလည်း အရင်နှစ်တွေ လိုပဲ အခမ်းအနား ကျင်းပပြီး အာဇာနည် ဗိမာန်ကို သွားရောက် အလေးပြုဖို့ ရှိတယ်လို့ ပါတီတာဝန်ရှိသူတွေက RFA ကို ပြောပါတယ်။
Ref: RFA News
လယ်သမားများ ဥပဒေနဲ့အညီ ဆန္ဒထုတ်ဖော်
မအေးအေးမာ
တနင်္ဂနွေ, 15 ဇူလိုင် 2012
တရားဝင် ဆန္ဒပြခွင့် ဥပဒေ ထွက်လာပြီးတဲ့ နောက်မှာတော့ နှစ်ပေါင်း ၄၀ ကျော် အတွင်း ပထမဆုံး အကြိမ် အဖြစ် တရားဝင် ငြိမ်းချမ်းစွာ စုဝေးခြင်းနဲ့ စီတန်းလှည့်လည်ခွင့် ရခဲ့ကြပါတယ်။ ဒါကြောင့် မင်္ဂလာဒုံနဲ့ ရွှေပြည်သာ မြို့နယ်တွေက သိမ်းဆည်း ခံရတဲ့ လယ်ဧက ၄,၀၀၀ လောက် အတွက် ကိုယ်စားပြုတဲ့ လယ်သမား ၂၀၀ ခန့်က ဆန္ဒ ထုတ်ဖော်ထုတ် ခဲ့ကြပါတယ်။ ဒီအကြောင်းကို မအေးအေးမာက တင်ပြ ထားပါတယ်။
ရွှေပြည်သာ မြို့နယ်နဲ့ မင်္ဂလာဒုံမြိုနယ် တွင်းမှာ စစ်တပ်၊ ရဲ တပ်ရင်းနဲ့ ကုမ္ပဏီတွေက သိမ်းဆည်း ခံထားရတဲ့ လယ်ဧက ၄,၀၀၀ လောက်အတွက် လယ်သမားတွေက စီတန်း လမ်းလျှောက်ပြီး ဆန္ဒ ထုတ်ဖော်ပွဲ လုပ်ခဲ့ကြတာပါ။ အခုလို ဆန္ဒ ထုတ်ဖော်နိုင်ခဲ့တဲ့ အတွက် ကျေနပ်မှု ရှိခဲ့တဲ့ အကြောင်းကိုတော့ လယ်သမားရေး ကူညီပေးနေသူ မတူကွဲပြားခြင်းနှင့် ငြိမ်းချမ်းရေးပါတီ ဥက္ကဋ္ဌ ဦးနေမျိုးဝေက ပြောပါတယ်။
“ကျနော်တို့ကတော့ နှစ်ပေါင်း ၄၀ ကျော်လောက်ကို ဒီလို တရားဥပဒေနဲ့အညီ လုံခြုံရေး အစောင့် အရှောက်တွေ လိုက်ပါပြီးတော့ ဆန္ဒပြခွင့်ရတာ ပထမဆုံး အကြိမ် ဖြစ်တဲ့အတွက် ကျနော်တို့ အချိန်တွေ၊ လူဦးရေတွေ ကန့်သတ်ခြင်း ခံရသော်လည်း ကျေနပ်မှုတော့ ရှိပါတယ်။ ဘာဖြစ်လို့ ကျေနပ်မှု ရှိလဲလို့ ပြောနိုင်လဲဆိုတော့ ဒီမှုခင်းတွေနဲ့ ပတ်သက်လို့ သေသေချာချာ မီဒီယာတွေရဲ့ ရှေ့မှာ ဖွင့်ထုတ် ဖော်ပြနိုင်ပါတယ်ခင်ဗျ။ စက်မှုဇုံ (၁) က တောင်သူ လယ်သမားတွေ ဆိုရင် လျှပ်တပြတ် ဂျာနယ်မှာ ရေးထားတာက အကုန်လုံး ဇုံ (၁)၊ (၂)၊ (၃) ကို လျှော်ကြေးတွေ ပေးပြီးသွားပြီလို့ ရေးထားတော့ တောင်သူ လယ်သမားတွေက လယ်သမား ၁၀၀ ကျော် လက်မှတ်ထိုးပြီးတော့ အဲဒီစာတွေကိုပါ မီဒီယာတွေကို ပေးလိုက်နိုင်ပါတယ်ခင်ဗျ။ မှုခင်းတွေကတော့ ရွှေနံ့သာ ရော၊ မင်္ဂလာဒုံ စက်မှုဇုံ (၁)၊ (၂)၊ (၃)၊ သင်္ကန်းကျွန်းကြီး ရွာသားတွေ အမှုရော၊ ၀ါးတရာ အမှုရော၊ ၀ါးတရာမှာဆိုရင်လည်း အဲဒီလိုပေါ့ဗျာ၊ မူလပိုင်တဲ့ လယ်သမားရဲ့နေရာကို ရပ်ကွက်အုပ်ချုပ်ရေးမှူးတွေနဲ့ ပေါင်းပြီးတော့ တခြားသူတွေက ၀င် ရောင်းစားလိုက်တဲ့ ဟာမျိုးပေါ့။ နောက်တခါ တပ်မတော်က သိမ်းပြီးတော့ သူဌေးတယောက်ကို ပြန်ရောင်းစားလိုက်တဲ့ စာမျိုးပေါ့။ နောက် ရဲတပ်ရင်းက သိမ်းပြီးတော့ ကုလားသူဌေးကို ရောင်းစားလိုက်တဲ့ ဟာမျိုးပေါ့။ အဲဒီလို မှုခင်းတွေကို ကျနော်တို့က တခုချင်းစီ ဖော်ထုတ်ပါတယ်ခင်ဗျ။”
ဆန္ဒပြ လယ်သမားတွေဟာ မတူကွဲပြားခြင်းနှင့် ငြိမ်းချမ်းရေးပါတီ ရုံးချုပ်ရှိရာ လမ်းသစ်လမ်းကနေ စတင် ချီတက်ခဲ့ကြပြီး အဲဒီကနေ ထောက်ကြံ့လမ်းဆုံကို ဆက်လက် ချီတက်ခဲ့ပြီးတဲ့နောက် ရန်ကုန်-ပဲခူး လမ်းမကြီးပေါ်မှာရှိတဲ့ မြနန္ဒာပန်းခြံမှာ သွားရောက် စုဝေးကြပြီး သူတို့ဆန္ဒတွေကို ထုတ်ဖော်ခဲ့ကြတာပါ။ မိရိုးဖလာ ဘိုးဘွားစဉ်ဆက် လုပ်ကိုင်ခဲ့တဲ့လယ်မြေတွေမှာ ပြန်လည် လုပ်ကိုင်ခွင့် ရဖို့အတွက် ဆန္ဒပြ လယ်သမားတွေက တောင်းဆိုနေခဲ့တာပါ။ သူတို့လယ်တွေ ပြန်ရဖို့အတွက် လုပ်ဆောင်ရာမှာ မြို့နယ် အုပ်ချုပ်ရေးမှူးရုံးကနေ မြေယာမှုခင်း အယူခံကို လက်ခံမပေးတဲ့အတွက် သူတို့အနေနဲ့ ဆန္ဒပြရတာလို့လည်း ပြောပါတယ်။
“မြေကမ္ဘာ ကုမ္ပဏီနဲ့ တောင်သူ လယ်သမားတွေက အငြင်းအခုံ ဖြစ်နေတယ်။ ပြည်သူ ပြည်သူချင်း အငြင်းအခုံ ဖြစ်တဲ့အခါမှာ အုပ်ချုပ်ရေးပိုင်းကို ကျနော်တို့က ငှားရမ်းထားတာ။ ကျနော်တို့က ပြည်သူလူထုက လစာပေးပြီးတော့ ခန့်ထားတာ။ အဲဒါသည် ဒိုင်လူကြီးသဖွယ် ပြည်သူပြည်သူချင်း အငြင်းပွားမှုမှာ တရားသဖြင့် ဖြစ်အောင် လုပ်ပေးဖို့ အဲဒီမှာ မြို့နယ် အုပ်ချုပ်ရေးမှူးက မြေယာမှုခင်း အယူခံကို လက်မခံဘူး။ အဲဒီအတွက်ကို ကျနော်တို့က ဆန္ဒပြတာဗျ၊ လက်မခံဘဲ အိုးအိမ်ကို သွားပါ။ စည်ပင်ကို သွားပါ ဆိုတဲ့စာကို ထုတ်တယ်။ အဲဒီတော့ အိုးအိမ်မှာလဲ သီးစား ချထားရေးနဲ့ ပတ်သက်တဲ့ ဥပဒေတွေ မရှိဘူး။ သီးစားချထားပိုင်ခွင့် မရှိဘူး။ စည်ပင်မှာလည်း လယ်ယာမြေကို သီးစားချထားပိုင်ခွင့် မရှိဘူး။ မြို့နယ် မြေယာကော်မတီက နည်းဥပဒေ (၁၅) အရ သီးစားချထားတဲ့ အယူခံတွေ လက်ခံစစ်ဆေးလို့ ရတယ်ဗျ။ အဲဒါကို လက်မခံတဲ့အတွက် ကျနော်တို့က ဆန္ဒပြတာပါ။”
မြန်မာနိုင်ငံ လူဦးရေရဲ့ ၇၅ ရာခိုင်နှုန်းကျော်ဟာ လယ်သမားတွေ ဖြစ်ပါတယ်။ လယ်သမားအမျိုးစုကတော့ လက်ရှိ အခြေအနေမှာ လယ်သိမ်း ယာသိမ်းခံရတာတွေကြောင့် အခက်အခဲတွေကို ရင်ဆိုင်နေရတာပါ။ ပြီးခဲ့တဲ့လတွေကစပြီး လယ်သမားတွေဟာ အိုးအိမ်ဦးစီးဌာန ရုံးရှေ့တွေမှာ ဆန္ဒပြမှုတွေ လုပ်ခဲ့ပါတယ်။ ဒါ့အပြင် ကုမ္ပဏီတွေကိုလည်း လယ်တွေကို အတင်းအကျပ် သိမ်းယူတယ်ဆိုပြီး တရားစွဲဆို ခဲ့သလို ရန်ကုန်တိုင်း၊ ပဲခူးတိုင်း၊ မန္တလေးတိုင်းတွေမှာလည်း ထွန်တုံး တိုက်ပွဲဆိုပြီး လယ်တွေကို ကိုယ့်ဖာသာပြန်ပြီး ထွန်ယက်တာတွေ လုပ်ခဲ့ပါတယ်။ ဒီအတွက် အာဏာပိုင်တွေရဲ့ ခြိမ်းခြောက်ခြင်း၊ ခေါ်ယူသတိပေးခြင်း၊ တရားစွဲဆိုခြင်းတွေ ကိုလည်း ခံနေရတာတွေလည်း ရှိပါတယ်။ ဇူလိုင်လ ၁၅ ရက်နေ့မှာတော့ လယ်သမာတွေအနေနဲ့ တရားဝင်အရ ပထမဦးဆုံးအကြိမ် အဖြစ် ဆန္ဒထုတ်ဖော်ခွင့် ရတာလည်း ဖြစ်ပါတယ်။
Ref: VOA News
ပြည်သူ့စစ်အသွင်ပြောင်းရမည့် အစီအစဉ် လက်ခံရေး ဝ' တပ်ဖွဲ့ စဉ်းစား
သောကြာနေ့၊ ဇူလိုင်လ ၁၃ ရက် ၂၀၁၂
မဇ္ဈိမသတင်းဌာန ။ ။ မြန်မာနိုင်ငံတွင် အင်အားအတောင့်တင်းဆုံး တိုင်းရင်းသား လက်နက်ကိုင် တပ်ဖွဲ့ဖြစ်သည့် ဝပြည်သွေးစည်း ညီညွတ်ရေး တပ်မတော် (UWSA) အနေဖြင့် ၄င်း၏ လွတ်လပ်သည့် အနေ အထားကို စွန့်လွှတ်ကာ မြန်မာ စစ်တပ်မှ ဦးဆောင်သည့် ပြည်သူ့စစ် တပ်ဖွဲ့ (PMF) အသွင်သို့ ပြောင်းလဲရေးကို လက်ခံ စဉ်းစားဖွယ်ရာ ရှိသည်ဟု သတင်းများက ဆိုကြောင်း သျှမ်းသံတော်ဆင့် သတင်းအေဂျင်စီ ၏ သောကြာနေ့ သတင်းဆောင်းပါး တပုဒ်တွင် ရေးသား ထားသည်။
ဝပြည် သွေးစည်းညီညွတ်ရေးတပ်မတော် (UWSA) အနေဖြင့် ၂ဝဝ၉ ခုနှစ်က နယ်ခြားစောင့် တပ် (BGF) အသွင် ပြောင်းလဲရေး အစိုးရ၏ ကမ်းလှမ်းချက်ကို ပယ်ချခဲ့ပြီး ဝပြည်သွေးစည်း ညီညွတ်ရေး တပ်မတော် ကဲ့သို့ပင် အခြား အဓိက တိုင်းရင်းသား လက်နက်ကိုင် အင်အားစု များကလည်း ပယ်ချ ခဲ့ကြသည်။
မြန်မာစစ်အရာရှိများ ဦးစီးသည့် နယ်ခြားစောင့် တပ်ဖွဲ့ (BGF) နှင့် ပြည့်သူ့စစ် တပ်ဖွဲ့ (PMF) တို့ မတူညီသည့် အချက်မှာ (PMF) ကို ဒေသခံ အရာရှိများက ဦးစီး အမိန့်ပေးခြင်း ဖြစ်သည်။ နယ်ခြားစောင့် တပ်ဖွဲ့ (BGF) နှင့် ပြည့်သူ့စစ် တပ်ဖွဲ့ (PMF) အား မြန်မာ စစ်တပ်၏ BGF နှင့် PMF ဦးစီးဌာနများက စီမံခန့်ခွဲ ညွှန်ကြားမည် ဖြစ်သည်။
ဝပြည် သွေးစည်းညီညွတ်ရေး တပ်မတော်တွင် ခန့်မှန်းခြေ တပ်သား ၃ဝ,ဝဝဝ ခန့်နှင့် အရန် တပ်သား ၁ဝ,ဝဝဝ ခန့် ရှိသည်ဟု ခန့်မှန်း ကြသည်။
“ကျနော်တို့ အဲဒါကို ဆွေးနွေးနေပါတယ်။ ဒါပေမဲ့ ကျနော်တို့ ခုထိ နောက်ဆုံး ဆုံးဖြတ်ချက်ကို မချရသေးပါဘူး” ဟု အရာရှိ တဦး၏ စကားကို ကိုးကား၍ သျှမ်းသံတော်ဆင့်က ဖော်ပြခဲ့သည်။
အကယ်၍ ထိုပြောင်းလဲမှုမျိုး ဖြစ်ပေါ်လာပါက ပြောင်းလဲမှုသည် ဝ လက်နက်ကိုင် အင်အားစု ၏ လှုပ်ရှားမှုနှင့် နယ်မြေ ထိန်းချုပ်ရေး အပေါ်တို့တွင် အကျိုး သက်ရောက်မည့်ပုံ မရှိသော်လည်း လက်ရှိ အစိုးရ အတွက် အကျိုးကျေးဇူး ရှိလိမ့်မည်ဟု လေ့လာသူများက ဆိုကြသည်။ ဝပြည်သွေးစည်း ညီညွတ်ရေး တပ်မတော်နှင့် ပါတီအား မည်ကဲ့သို့ အကျိုးရှိစေမည်ကိုမူ ရှင်းလင်းစွာ မသိရသေးပေ။
ဝ တပ်ဖွဲ့အား မြန်မာနိုင်ငံတွင် စွမ်းအား အပြည့်ဆုံး တိုင်းရင်းသား လက်နက်ကိုင် တပ်ဖွဲ့ အဖြစ် သိခဲ့ကြသည်။ ထိုအဖွဲ့ အနေဖြင့် ဘိန်းဖြူနှင့် တရားမဝင် စိတ်ကြွဆေးပြား ရောင်းဝယ်ရေး တို့တွင် အဓိက လှုပ်ရှားသူ ဖြစ်နေခဲ့ပြီး တရုတ်၊ ထိုင်းနှင့် အချို့နေရာများသို့ မူးယစ်ဆေးဝါးများ တင်ပို့ခြင်းနှင့် ပတ်သတ်၍လည်း တာဝန်ရှိသည်ဟု သိရသည်။
အမေရိကန် အစိုးရက UWSA ဝ တပ်ဖွဲ့အား မူးယစ်ဆေးဝါး ကူးသန်းရောင်းဝယ်နေသော အဖွဲ့အစည်း အဖြစ် ၂ဝဝ၃ ခုနှစ် မေလ ၂၉ ရက်နေ့တွင် ကြေညာခဲ့သည်။
ဝတပ်ဖွဲ့အနေဖြင့် တပ်ဖွဲ့အား လက်နက်စွန့်ကာ ၂ဝ၁ဝ ရွေးကောက်ပွဲတွင် ပါဝင် ခိုင်းသည့် ယခင် စစ်အစိုးရ၏ တောင်းဆိုချက် ကို အန်တုခဲ့ပြီး ထိုအစား ထိုနယ်မြေအား ၄င်းတို့ ထိန်းချုပ်ရာ အထူး ကိုယ်ပိုင် အုပ်ချုပ်ခွင့် ဒေသတခု အဖြစ် ကြေညာပေးရန် တောင်းဆို ခဲ့သည်။
၂ဝဝ၈ ခုနှစ် အခြေခံ ဥပဒေ အရ မြို့နယ်ခြောက်မြို့နယ်အား ဝ ကိုယ်ပိုင် အုပ်ချုပ်ခွင့်ရ တိုင်း အဖြစ် သတ်မှတ်ပေးထား သည်။
Jane’s Information Group ၏ ၂ဝဝ၈ ခုနှစ် ဒီဇင်ဘာတွင် ထုတ်ပြန်ခဲ့သည့် အစီရင်ခံစာ တခုတွင် ဝ တပ်ဖွဲ့ အနေဖြင့် ၎င်းတို့၏ ဝင်ငွေ ရရှိရေးကို မူးယစ်ဆေးဝါး ကူးသန်းရောင်းဝယ်ခြင်းကို မှီခိုနေရာမှ လက်နက် ထုတ်လုပ်ခြင်း ဆီသို့ ပြောင်းလဲ လာပြီး အေကေ ၄၇ ကဲ့သို့သော အသေးစား လက်နက် ထုတ်လုပ်မှုမျိုးကို လုပ်ကိုင် လာကြောင်း ဖော်ပြ ထားသည်။
ဝပြည်သွေးစည်း ညီညွတ်ရေး တပ်မတော် (UWSA) မှာ ဝပြည်သွေးစည်း ညီညွတ်ရေး ပါတီ (UWSP) ၏ စစ်ဘက် ဆိုင်ရာ အဖွဲ့အစည်း ဖြစ်ပြီး ဗမာပြည် ကွန်မြူနစ်ပါတီ ၁၉၈၉ ခုနှစ်တွင် ပြိုကွဲ သွားစဉ်က ဖွဲ့စည်းခဲ့ခြင်း ဖြစ်သည်။
ဝပြည်သွေးစည်း ညီညွတ်ရေး တပ်မတော်၏ လုပ်ငန်းခွင် ဘာသာ စကားမှာ တရုတ် ဘာသာစကား ဖြစ်သည်။ ဝပြည် သွေးစည်း ညီညွတ်ရေး တပ်မတော် UWSA အနေဖြင့် ၄င်း၏ နယ်မြေအား ဝပြည်နယ် အစိုးရ အထူး အုပ်ချုပ်ရေး ဒေသ အဖြစ် ၂ဝဝ၉ ခုနှစ် ဇန်နဝါရီတွင် ကြေညာခဲ့သည်။
Ref: မဇ္ဈိမ
ပညာရေး ကျန်းမာရေး ပြုပြင်ဖို့ လွှတ်တော်မှာ ဒေါ်စု အဆိုတင်ပြနိုင်ဖွယ်ရှိ
ကိုရဲကျော်အောင်
တနင်္ဂနွေ, 15 ဇူလိုင် 2012
ပြည်သူ့လွှတ်တော် ကိုယ်စားလှယ် ဒေါ်အောင်ဆန်းစုကြည်ဟာ အခု ကျင်းပ နေတဲ့ စတုတ္ထအကြိမ် လွှတ်တော် ပုံမှန် အစည်အဝေးမှာ ပညာရေး၊ ကျန်းမာရေး ဆိုင်ရာ အဆိုတွေကို တင်ပြသွားနိုင်ဖွယ် ရှိနေပါတယ်။ မနက်ဖြန် ကျင်းပမယ့် လွှတ်တော် အစည်အဝေးမှာ အမျိုးသား ဒီမိုကရေစီ အဖွဲ့ချုပ်က လွှတ်တော် ကိုယ်စားလှယ် ၂ ဦး ၀င်ရောက် ဆွေးနွေးဖို့ ရှိတယ်လို့လည်း သိရပါတယ်။ ဒါနဲ့ ပတ်သက်ပြီး ရန်ကုန် အခြေစိုက် ဗွီအိုအေ သတင်းထောက် ကိုရဲကျော်အောင်က သတင်း ပေးပို့ထားပါတယ်။
ပြည်သူ့လွှတ်တော် ကိုယ်စားလှယ် ဒေါ်အောင်ဆန်းစုကြည်ဟာ အခု ကျင်းပနေတဲ့ စတုတ္ထအကြိမ် လွှတ်တော် အစည်အဝေးမှာ ပညာရေး၊ ကျန်းမာရေး ဆိုင်ရာ အဆိုတွေကို တင်ပြကောင်း တင်ပြနိုင်တယ်လို့ သူမရဲ့ လွှတ်တော် ကိုယ်ရေးအရာရှိ ဦးဇေယျာသော်က ပြောပါတယ်။
သူမအနေနဲ့ ပညာရေး၊ ကျန်းမာရေးဆိုင်ရာ အဆိုတွေကို တင်ပြသွားဖို့ ရှိပေမဲ့ လက်ရှိ လွှတ်တော်အစည်းအဝေး ကျင်းပနေချိန်မှာ အဆိုနဲ့ မေးခွန်းပေါင်း ၄၀၀ ကျော် ရှိနေတာကြောင့် ဆွေးနွေးမေးမြန်းမှုတွေ ဘယ်တော့ ဖြစ်မယ်ဆိုတာကိုတော့ မသိရသေးဘူးလို့ ဦးဇေယျာသော်က ဗွီအိုအေ မြန်မာပိုင်းကို အခုလို ပြောပြပါတယ်။
“ကျနော်တို့ အဆိုတွေ၊ မေးခွန်းတွေကိုတော့ တင်ဖို့ အစီအစဉ် ရှိပါတယ်။ ဘာဖြစ်လို့လဲ ဆိုတော့ ဒေါ်အောင်ဆန်းစုကြည်က ပညာရေး၊ ကျန်းမာရေး ကိစ္စတွေ ဆိုတဲ့နေရာမှာ အင်မတန်မှ စိတ်ဝင်စားတယ် ဆိုတာ အားလုံးပဲ သိပြီးသား ဖြစ်မှာပါ။ ဒါပေမဲ့ အခု လောလောဆယ် အခြေအနေမှာတော့ ပြင်ဆင်ဆဲ အခြေအနေလို့ပဲ ပြောလို့ရပါသေးတယ်။”
လွှတ်တော်အတွင်း ရောက်ရှိနေတဲ့ အမျိုးသား ဒီမိုကရေစီအဖွဲ့ချုပ် ကိုယ်စားလှယ်တွေဟာ တပတ်တကြိမ် တနင်္လာနေ့တိုင်း နေပြည်တော်မှာ အစည်းအဝေး လုပ်ပြီး တပတ်အတွင်း လွှတ်တော်တွင်း ပြော ဆိုဖို့တွေကို ပြင်ဆင်တယ်လို့ ဦးဇေယျာသော်က ပြောပါတယ်။
“အမေစု အနေနဲ့ သီးသန့် သီးခြား ပြင်ထားတဲ့ အစီအစဉ်မျိုးတွေ မရှိပါဘူးခင်ဗျ။ ကျနော်တို့တွေက လွှတ်တော်ကိုယ်စားလှယ် အားလုံး တနင်္လာနေ့တိုင်း အစည်းအဝေး ထိုင်ပါတယ်။ တပတ် တပတ် အတွင်းမှာ ဘာတွေ လုပ်နိုင်ကြမလဲ ဆိုတာကို အစည်းအဝေး ထိုင်ကြပါတယ်။ အဲဒီတော့ မနက်ဖြန်ကျမှ တနင်္လာနေ့ ကျရင်တော့ မနက်ဖြန်ည အစည်းအဝေး ထိုင်ပြီးတော့မှ တပတ်စာကို ကျနော်တို့က ဆုံးဖြတ်ကြမှာပါခင်ဗျ။”
မနက်ဖြန် ပြန်လည် ကျင်းပမယ့် လွှတ်တော်အစည်အဝေးမှာ အမျိုးသား ဒီမိုကရေစီ အဖွဲ့ချုပ်က ကိုယ်စားလှယ် ၂ ဦး ၀င်ရောက် ဆွေးနွေးဖို့ရှိတယ်လို့ ပြည်သူ့လွှတ်တော် ကိုယ်စားလှယ် ဦးအုန်းကြိုင်က ပြောပြပါတယ်။
“လွှတ်တော် အစည်းအဝေး အစီအစဉ်ကို သောကြာနေ့က နည်းနည်း ကြိုပြီးတော့ပေါ့၊ အဲဒါက tentative ပေါ့ သူတို့ ပေးထားတယ်။ အဲဒီအထဲမှာ ကျနော်တို့ဆီက ဆွေးနွေးဖို့ စာရင်းပေးထားတဲ့ အကြောင်းအရာ တခု နှစ်ခုလောက် ပါတယ်။ အဲဒီကိစ္စတွေ အတွက် ကျနော်တို့ဆီက ဆွေးနွေးဖို့ စာရင်းတင်ထားတဲ့ ပုဂ္ဂိုလ်များက လိုအပ်တဲ့ ပြင်ဆင်မှုတွေ လုပ်နေပါတယ်။ ဒါပေမဲ့ အဲဒါတွေက လွှတ်တော်စည်းကမ်းအရ ကြိုသိသွားအောင် ပြောလို့မရပါဘူး။ ဒါကြောင့်မိုလို့ ဆွေးနွေးဖို့ကတော့ ကျနော်တို့တွေလည်း ပြင်ဆင်နေကြတယ် ဆိုတဲ့အကြောင်း၊ အဲဒီလောက်ပဲ ပြောနိုင်ပါတယ်။”
သောကြာနေ့က ကျင်းပခဲ့တဲ့ ပြည်သူ့လွှတ်တော် အစည်းအဝေးမှာတော့ စီးပွားရေး ပိတ်ဆို့မှုနဲ့ ပတ်သက်ပြီး ကွမ်းဟိန်း မဲ ဆန္ဒနယ်က ဒေါ်နန်းဝါနု ရဲ့ အဆိုတခု တင်ပြခဲ့ပါတယ်။ ဒီအဆိုနဲ့ပတ်သက်ပြီးတော့ လွှတ်တော်က ဘာတွေဆက်လက် လုပ်ဆောင်မလဲ ဆိုတာကို စောင့်ကြည့်ရမယ်လို့ NLD ကိုယ်စားလှယ်တွေနဲ့ တွေ့ဆုံစဉ် ဒေါ်အောင်ဆန်းစုကြည်က ပြောကြားခဲ့ပါတယ်။
Ref: VOA News
Posts
