..............................

Wednesday, August 1, 2012

အစိုးရ အဖွဲ့ဝင်များ၏ ပိုင်ဆိုင်မှုများ သမ္မတထံ တင်ပြရမည်

မျိုးသန့် | အင်္ဂါနေ့၊ ဇူလိုင်လ ၃၁ ရက် ၂၀၁၂

ရန်ကုန် (မဇ္ဈိမ) ။ ။ ပြည်ထောင်စု ဝန်ကြီးများ အပါအဝင်၊ သမ္မတက ခန့်အပ်ထားသော ပုဂ္ဂိုလ် ၇ မျိုး၏ ပိုင်ဆိုင်မှုများကို တန်ဖိုးနှင့် အတူ စာရင်းပြုစု၍ ဗုဒ္ဓဟူးနေ့တွင် သမ္မတထံ ပေးပို့ကြရန် နိုင်ငံတော်သမ္မတရုံးက ဇူလိုင်လ ၂၆ ရက်နေ့တွင် ညွှန်ကြားချက်တရပ် ထုတ်ပြန် လိုက်သည်ဟု သမ္မတရုံး အကြီးတန်း အရာရှိတဦးက မဇ္ဈိမကို ပြော သည်။

“ဟုတ်ပါတယ်။ ပြည်ထောင်စု အစိုးရအဖွဲ့ဥပဒေ ၁၀၁ အရ စာရင်းပြုစုပြီး ပေးပို့ပေးဖို့ ညွှန်ကြားတာပါ” ဟု အဆိုပါ အရာရှိက ပြောသည်။

၂ဝ၁ဝ ခုနှစ်၊ အောက်တိုဘာလအတွင်းက ပြဋ္ဌာန်းခဲ့သည့် ပြည်ထောင်စု အစိုးရအဖွဲ့ ဥပဒေ ပုဒ်မ ၁၀၁ တွင် “လွှတ်တော်၏ အတည်ပြုချက်ဖြင့် နိုင်ငံတော် သမ္မတက ခန့်အပ်သော ပုဂ္ဂိုလ်များသည် တစီးပွားတည်းဖြစ်သော စီးပွားရေး လုပ်ငန်းနှင့် ပိုင်ဆိုင်မှုများကို တန်ဖိုးနှင့်တကွ စာရင်းပြုစုပြီး နိုင်ငံတော် သမ္မတထံ ပေးပို့ရမည်” ဟု ဖေါ်ပြပါရှိသည်။

သမ္မတက ခန့်အပ်သော ပုဂ္ဂိုလ်များမှာ ပြည်ထောင်စုတရားသူကြီးချုပ်နှင့် ပြည်ထောင်စု လွှတ်တော်ချုပ် တရားသူကြီး များ၊ နိုင်ငံတော် ဖွဲ့စည်းပုံ အခြေခံဥပဒေဆိုင်ရာ ခုံရုံး ဥက္ကဋ္ဌနှင့် အဖွဲ့ဝင်များ၊ ပြည်ထောင်စု ဝန်ကြီးများ၊ ပြည်ထောင်စု ရှေ့နေချုပ်၊ ပြည်ထောင်စု စာရင်းစစ်ချုပ်၊ တိုင်းဒေသကြီး သို့မဟုတ် ပြည်နယ် အစိုးရအဖွဲ့ ဝန်ကြီးချုပ်နှင့် ဝန်ကြီးများ၊ တိုင်းဒေသကြီး သို့မဟုတ် ပြည်နယ် ဥပဒေချုပ်များ တရားသူကြီးချုပ်များ တရားသူကြီးများ စသည့် ပုဂ္ဂိုလ် ၇ မျိုး ပါဝင်သည်။

အစိုးရအဖွဲ့ဝင်များ၏ ပိုင်ဆိုင်မှုစာရင်းကို မှတ်တမ်းတင်ထားရန် ပြည်သူ့လွှတ်တော် အမတ် ဦးဝင်းမြင့်က ဇူလိုင်လ ၂၄ ရက်နေ့တွင် လွှတ်တော်သို့ တင်သွင်းခဲ့သေးသည်။

“Good Governance (ကောင်းမွန်သော အုပ်ချုပ်ရေး)၊ Clean Government (သန့်ရှင်းသော အစိုးရ) ဖြစ်ပေါ်စေရေး အတွက် ပြည်ထောင်စု အစိုးရ အဖွဲ့ဝင်များ၊ တိုင်းဒေသကြီး အစိုးရအဖွဲ့ဝင်များ၊ ပြည်နယ်အစိုးရ အဖွဲ့ဝင်များအဖြစ် တာဝန်ပေးအပ် ခံရသူများသည် ၎င်းတို့၏ ရွှေ့ပြောင်းနိုင်သော ပစ္စည်း၊ မရွှေ့ပြောင်း နိုင်သော ပစ္စည်းနှင့် အကျိုးစီးပွား များကို ထုတ်ဖော် ကြေညာပြီး မှတ်တမ်းတင်ထားရန်” ဟု ဦးဝင်းမြင့်က သူ၏ အဆိုအတွင်း ထည့်သွင်းဆွေးနွေး ခဲ့သည်။

အဆိုကို မြေပုံမဲဆန္ဒနယ်မှ ဦးဖေသန်း ထောက်ခံခဲ့ပြီး ဆက်လက်ဆွေးနွေးရန် လွှတ်တော်မှ သဘောတူခဲ့သည်။

“နိုင်ငံတော် သမ္မတနှင့် ဒု-သမ္မတများသည် မိမိတို့ဦးစီးသည့် တစီးပွားတည်းဖြစ်သော မိသားစုပိုင်မြေ၊ အိမ်၊ အဆောက် အအုံ၊ စီးပွားရေး လုပ်ငန်း၊ စုငွေနှင့် အခြား အဖိုးတန်ပစ္စည်းများကို တန်ဖိုးနှင့်တကွ စာရင်းပြုစုပြီး ပြည်ထောင်စု လွှတ်တော် အကြီး အမှူးထံ ပေးပို့ရမည်” ဟူ၍လည်း အခြေခံဥပဒေ ပုဒ်မ ၆၈ တွင် ဖော်ပြပါရှိသည်။


Ref: မဇ္ဈိမ

Read More...

တောင်ဒဂုံ စက်မှုဇုန် ၁ ရှိ ပီနန်အိတ်စက်ရုံ လုပ်သားများ ဆန္ဒပြ

ကျော်ဖုန်းကျော်
အင်္ဂါနေ့၊ ဇူလိုင်လ ၃၁ ရက် ၂၀၁၂

ရန်ကုန် (မဇ္ဈိမ) ။ ။ ရန်ကုန်တိုင်း၊ တောင်ဒဂုံ စက်မှုဇုန် ၁ ရှိ TE SEL ပီနန်အိတ် စက်ရုံမှ လုပ်သားများသည် လစာ တိုးမြှင့်ပေးမှု နှုန်းထားများ မညီမျှမှုကို မကျေနပ်၍ အင်္ဂါနေ့ နံနက် ၁ဝ နာရီခန့်မှ စတင် ဆန္ဒပြလျက်ရှိသည်။

အဆိုပါ စက်ရုံက ဝန်ထမ်းအသစ်များကို FEC ၁၅ ဒေါ်လာ (ငွေကျပ် ၁၃,ဝဝဝ နီးပါး) ခန့် တိုးမြှင့်ပေးလိုက်သော်လည်း လုပ်သက်ရင့် ဝန်ထမ်းများကိုမူ လုံးဝ တိုးမပေးသည် ရှိသလို အများဆုံး FEC ၄ ဒေါ်လာ (ငွေကျပ် ၃,၅ဝဝ)ခန့်သာ တိုးမြှင့်ပေးသဖြင့် မကျေနပ်ကြခြင်း ဖြစ်သည်။ လုပ်သက်ရင့် ဝန်ထမ်းများက ကျပ်ငွေ ၁၅,ဝဝဝ ခန့် တိုးမြှင့်ရရှိလို ကြသည်။

“ဒီလ လစာကတည်းက တိုးလိုချင်တယ်” ဟု ဆန္ဒပြ အလုပ်သမားတဦးက ပြောသည်။

ထို့ပြင် “ကျနော်တို့ကိုတော့ လစာကို မြန်မာငွေ ထောင်ဂဏန်း လောက်ပဲ တိုးပေးတော့ ကျနော်တို့ ဒီစက်ရုံမှာ လုပ်သက် အများကြီး ရင်းထားရတာ အလကားပဲပေ့ါ” ဟု လုပ်သက် ၁ဝ နှစ်နီးပါး ရှိသည့် လုပ်သားတဦးက ပြောသည်။

ဆန္ဒပြမှုကို တောင်ဒဂုံမြို့နယ် အလုပ်သမားဦးစီးဌာနမှ အရာရှိများက ဝင်ရောက် ညှိနှိုင်း ဖြန်ဖြေမှုများ ပြုလုပ်ပေး နေသော်လည်း ညနေ ၄ နာရီ အချိန်အထိ ပြေလည်မှု မရရှိသေးပေ။

ထိုစက်ရုံမှ အလုပ်သင် ဝန်ထမ်းတဦးသည် ပုံမှန်အားဖြင့် လစာငွေ ကျပ် ၃၂,ဝဝဝ ရရှိပြီး လုပ်သက် ကိုးနှစ်ရှိ ဝန်ထမ်း တဦးလျှင် အချိန်ပိုလုပ်ခများနှင့် လစာရင်း နှစ်ခုပေါင်း ငွေကျပ် ခြောက်သောင်းခန့် ရရှိသည်ဟု သိရသည်။

ဝန်ထမ်း ၄ဝဝ ကျော် ရှိသည့် အဆိုပါစက်ရုံသည် ၈ နာရီဆိုင်း သုံးဆိုင်းဖြင့် ၂၄ နာရီ လည်ပတ်နေသည်။ လုပ်သက် အရင့်ဆုံး ဝန်ထမ်းမှာ ၁၆ နှစ်ကြာလုပ်ခဲ့သူဖြစ်ပြီး လုပ်သက် ၄ နှစ်၊ ၈ နှစ် နှင့် ၁ဝ နှစ်ရှိ ဝန်ထမ်းများလည်း ရှိသည်။

လစာများ ညီမျှစွာ တိုးမြှင့်မပေးမချင်း ဆန္ဒပြခြင်းကို ရပ်တန့်မည်မဟုတ်ဟုလည်း အလုပ်သမားများက ဆိုသည်။

ဤကဲ့သို့ စက်ရုံလုပ်သားများ ဆန္ဒပြမှုအပေါ် စက်ရုံ စီမံမန်နေဂျာ ကိုကျော်နိုင်ဦး က တစုံတရာ မှတ်ချက်မပြုလိုဟု ဆိုသည်။

Ref: မဇ္ဈိမ

Read More...

မောင်တောမှာ ကင်တာနာကို ဆန္ဒပြ

လင်းသန့်
July 31, 2012

ရခိုင်ပြည်နယ် မောင်တောမြို့သို့ ယနေ့နေ့လယ်က ရောက်ရှိလာသော ကုလသမဂ္ဂ၏ မြန်မာနိုင်ငံဆိုင်ရာ လူ့ အခွင့် အရေး အထူး စုံစမ်းစစ်ဆေးရေးမှူး မစ္စတာ သောမတ်စ် အိုဟေး ကင်တာနာကို ဒေသခံ ရခိုင် တိုင်းရင်းသား ၂၀၀ ခန့် က ငြိမ်းချမ်းစွာ ဆန္ဒဖော်ထုတ်ပြသခဲ့ကြောင်း သတင်း ရရှိသည်။

“နိုင်ငံတော် သမ္မတကြီး၏ ဆုံးဖြတ်ချက်ကို လေးစားပါ”၊ “မြန်မာနိုင်ငံ၏ အချုပ်အချာ အာဏာကို လေးစားပါ”၊ “တိုင်း ရင်းသားတို့၏ လူ့အခွင့်အရေးကို လေးစားပါ”၊ “မျှမျှတတ ဆက် ဆံပါ” ဟူသော တောင်းဆိုချက် ဆိုင်းဘုတ်များ ကိုင်ဆောင်ထားသူများက ကင်တာနာ၏ ယဉ်တန်း ဘေးဝဲယာမှ ငြိမ်းချမ်းစွာ ဆန္ဒဖော်ထုတ်ကြခြင်း ဖြစ်သည်။

“မစ္စတာ ကင်တာနာ ဒီကို ၁ နာရီလောက်မှာ ရောက်တော့ ရခိုင်နဲ့ တိုင်းရင်းသား ၂၀၀ လောက် ရှိမယ်ခင်ဗျ။ ဆိုင်းဘုတ်တွေ ကိုင်ထားကြတယ်။ အလံတွေ ကိုင်ထားကြတယ်။ အပြင်က ရပ်ကြည့်နေတဲ့ သူတွေနဲ့ ဆိုရင်တော့ လေးငါးရာလောက် ရှိမယ်ခင်ဗျ”ဟု ဒေသခံ မျက်မြင်သက်သေ တဦးဖြစ်သည့် ကိုကျော်အေးမောင်က ဧရာဝတီကို ပြောသည်။

မစ္စတာ ကင်တာနာနှင့် အဖွဲ့သည် မောင်းတောမြို့သို့ ရဟတ်ယာဉ် ၂ စီးဖြင့် ယနေ့ နေ့လယ် ၁ နာရီခန့်က ရောက်လာကြောင်း၊ မစ္စတာ ကင်တာနာ၏ ယာဉ်တန်းအား သဇင် တည်းခိုခန်းရှေ့လမ်းဘေး ၀ဲယာတွင် ဆန္ဒဖော်ထုတ် ကြခြင်းဖြစ်ကြောင်း သိရသည်။ မစ္စတာ ကင်တာနာက ယာဉ်တန်းပေါ်မှ အဆိုပါ ငြိမ်းချမ်းစွာ ဆန္ဒဖော်ထုတ် သူများကို ဓာတ်ပုံနှင့် ဗွီဒီယို မှတ်တမ်း တင်မှုများ ပြုလုပ်ကြောင်း၊ ယာဉ်တန်း ခရိုင် အုပ်ချုပ်ရေးမှူး ရုံးရှိရာသို့ ဆက်လက် ထွက်ခွာ သွားပြီးနောက် ဆန္ဒဖော်ထုတ် သူများ အေးအေး ဆေးဆေး လူစု ခွဲသွားကြကြောင်း သိရသည်။

မစ္စတာ ကင်တာနာနှင့် အဖွဲ့သည် မောင်းတောရှိ ဒုက္ခသည် စခန်းများသို့ သွားရောက်လေ့လာခြင်း၊ သက်ဆိုင်ရာ အုပ်ချုပ်ရေးနှင့် လုံခြုံရေး တာဝန်ရှိသူ များနှင့်လည်း အခြေအနေကို မေးမြန်း စုံစမ်းမှုများ လုပ်ဆောင်ခဲ့သည်။

မောင်တော ဒေသတွင် ယခုအခါ လုံခြုံရေး တင်ကျပ်စွာ ချထားပြီး ဆန္ဒဖော်ထုတ် သူများဘက်ကလည်း မလိုလား အပ်သော ပြဿနာများ မပေါ်ပေါက်ရေး ထိန်းထိန်း သိမ်းသိမ်း ရှိခဲ့ကြောင်း၊ သို့သော် မောင်းတော မြို့ပေါ် ရပ်ကွက်များတွင် UN (ကုလသမဂ္ဂ) အလိုမရှိ ဟူသော အကျီများ ၀တ်ဆင်ထားသူ တချို့ကို မြင်တွေ့ရကြောင်း ကိုကျော်အေးမောင်က ဆိုသည်။

မောင်းတော ဒေသတခွင် ငြိမ်ဝပ်ပိပြားရေးရှိနေပြီဖြစ်သော်လည်း ဒုက္ခသည် စခန်းများနှင့် ဒေသခံများမှာ အပြန်အလှန် မယုံကြည်မှုများ၊ စိုးရိမ်မှုများ ကြီးစိုးနေဆဲဖြစ်ပြီး အပြင်ထွက်ကာ အလုပ် မလုပ်နိုင်ကြသေးကြောင်း၊ ရိက္ခာအတွက် ဆန်ကို အဓိက လိုအပ်လျှက် ရှိကြောင်း ကူညီ ကယ်ဆယ်ရေး သမားများက ဆိုသည်။

ကမ္ဘာ့ စားနပ်ရိက္ခာအဖွဲ့ အပါအ၀င် ကူညီကယ်ဆယ်ရေး အသင်း အဖွဲ့များက လာရောက် လှူဒါန်းမှုများ ရှိကြောင်း သိရသည်။

Ref: ဧရာဝတီ

Read More...

ပြည်တွင်း သတင်းဂျာနယ်နှစ်စောင် အပိတ်ခံရ

ကိုရဲကျော်အောင်
31.07.2012

စာနယ်ဇင်း လွတ်လပ်ခွင့်အပါအဝင် အပြောင်းအလဲတွေ လုပ်မယ်လို့ အစိုးရက ကတိပြု ထားချိန်မှာပဲ ပြည် တွင်းထုတ် အပတ်စဉ် သတင်း ဂျာနယ်နှစ်စောင်ကို အာဏာပိုင်တွေက ထုတ်ဝေခွင့် ပိတ်ပင်လိုက် ပါတယ်။ လွတ်လပ်ခွင့်ပေးမယ့် မီဒီယာ ဥပဒေကို လွှတ်တော်ထဲ ဆွေးနွေးဖို့ ရှိနေချိန်မှာ စာပေစိစစ်ရေးနဲ့ မှတ်ပုံတင် ဌာနရုံးက ဒီ သတင်းဂျာနယ် တစ်စောင်ရဲ့ ထုတ်ဝေခွင့် ပိတ်လိုက်တာပါ။ ဒီအခြေအနေကို အသေးစိတ် သိရအောင် ရန်ကုန်မှာ ရှိနေတဲ့ ဗွီအိုအေ သတင်းထောက် ကိုရဲကျော်အောင်က အပြည့်အစုံ ပြောပြပေး မှာ ဖြစ်ပါတယ်။

ဒီမိုကရေစီ ဖော်ဆောင်ရေးနဲ့ အသွင်ကူးပြောင်းရေး ကာလမှာ မိဓီယာရဲ့ အခန်းဏ္ဍဟာ အရေးကြီး ပါတယ် ဆိုပြီး ပြောကြား ခဲ့ဖူးတဲ့ နိုင်ငံတော်သမ္မတ ဦးသိန်းစိန်ရဲ့ လက်ထက်မှာ သက်ဆိုင်ရာ အာဏာပိုင် အစိုးရ ရဲ့ ပြန်ကြားရေး ၀န်ကြီး ဌာနကနေ အပတ်စဉ်ထုတ် သတင်း ဂျာနယ် နှစ်စောင်ကို အကန့် အသတ်မရှိ ထုတ်ဝေ ခွင့် ရပ်ဆိုင်းလိုက်ပြီး အပတ်စဉ်ထုတ် သတင်းဂျာနယ် နောက်တစ်စောင် ကိုတော့ စာပေစိစစ်ရေး က စည်းကမ်းတွေကို လိုက်နာပြီး ဆောင်ရွက်ဖိ်ု့ ပြင်းထန်စွာ သတိပေး လိုက်ပါတယ်။

ထုတ်ဝေခွင့် ယာယီရပ်ဆိုင်းခံခဲ့ရတဲ့ အပတ်စဉ်ထုတ် သတင်းဂျာနယ် နှစ်စောင်ကတော့ သောကြာနေ့ ထုတ် THE VOICE ဂျာနယ်နဲ့ အင်္ဂါနေ့ထုတ် ENVOY ဂျာနယ်တို့ ဖြစ်ပြီး ပြင်းထန်စွာ သတိပေး ခံခဲ့ ရတဲ့ နောက် ဂျာနယ် တစ်စောင်ကတော့ ကြာသာပတေးနေ့ ထုတ်ဝေ တဲ့ THE MYANMAR POST GLOBAL ဂျာနယ်တို့ပဲ ဖြစ်ပါတယ်။

ဒီ သတင်းဂျာနယ် ၃ စောင်ဟာ ပြန်ကြားရေး ၀န်ကြီးဌာန လက်အောက် စာပေစိစစ်ရေးက ချမှတ်ထားတဲ့ စည်းကမ်းတွေကို လိုက်နာခြင်း မရှိတာရယ်၊ စာပေစိစစ်က ခွင့်ပြုချက် မပေးတဲ့ ၈ လေးလုံး အရေးတော်ပုံ ၂၄ နှစ်ပြည့် ကျင်းပတဲ့ သတင်းနဲ့ ပြည်ထောင်စု ၀န်ကြီးတွေ ရာထူး အပြောင်းအလဲ ရှိနိုင်တယ် ဆိုတဲ့ သတင်းတွေ ကို ပုံနှိပ် ထုတ်ဝေတာကြောင့် ခေါ်ယူ သတိပေး ခံရတာတွေနဲ့ ထုတ်ဝေခွင့် အကန့်အသတ် မရှိ ပိတ်သိမ်း ခံရတာတွေ ကြုံတွေ့ ခဲ့ရတာပါလို့ အဲဒီ သတင်းဂျာနယ်တွေက အယ်ဒီတာချုပ်တွေ က ပြောပါတယ်။

“ပြန်ကြားရေးဌာနနဲ့ မီဒီယာတွေကြားမှာ ယုံကြည်မှု လျော့ဆင်း လာတယ်ပေါ့နော်။ အဲဒီတော့ ဒါ မီဒီယာ သမားတွေနဲ့ ပြန်ကြားရေး ဝန်ကြီးဌာနနဲ့ ကြားမှာယုံကြည်မှု ကျဆင်းလာတယ် ဆိုလို့ရှိရင် အစိုးရအဖွဲ့ အပေါ်မှာ မီဒီယာသမားတွေ ယုံကြည်မှု ကျဆင်း လာတယ်လို့ အဓိပ္ပာယ်ကောက်လို့ ရသွားနိုင်တယ်။” ထုတ်ဝေခွင့် ယာယီ ရပ်ဆိုင်းခံခဲ့ ရတဲ့ THE VOICE ဂျာနယ် ကိုကျော်မင်းဆွေက ပြောကြား သွားခဲ့တာပါ။

အစိုးရ လက်ထက်မှာ သတင်းအချက်အလက်တွေ ပွင့်လင်း မြင်သာရှိဖို့နဲ့ စတုတ္ထမဏ္ဍိုင်တွေကို အုပ်ချုပ်ရေး ယန္တရားပိုင်း ကရော လွှတ်တော်ပိုင်း ကပါ နေရာပေးလာပေမဲ့လည်း ပြည်တွင်းက ဂျာနယ်တွေ ထုတ်ဝေခွင့် ရပ်နားခံရတာဟာ အစိုးရအသစ် လက်ထက်မှာ ဒါနဲ့ဆို ၃ ကြိမ် ရှိပါပြီ။

ပြီးခဲ့တဲ့ ဇွန်လအတွင်းကလည်း ရခိုင်ပြည်နယ်မှာ ဖြစ်ပွားခဲ့တဲ့ အရေးကိစ္စတွေ ပါရှိတဲ့ သတင်းတွေကို အာဏာပိုင်တွေကို ကြိုတင် တင်ပြခြင်း မရှိဘဲ ပုံနှိပ်ခဲ့တာကြောင့် အပတ်စဉ်ထုတ် သတင်းဂျာနယ် တစ်စောင်ဖြစ်တဲ့ လျှပ်တစ်ပြက် ဂျာနယ်ကိုလည်း ထုတ်ဝေခွင့် ရပ်နားခဲ့တာကို အခုထိ ပြန်လည် ထုတ်ဝေခွင့် မပေးသေးပါဘူး။

အသွင်ပြောင်းလဲရေးနဲ့ ဒီမိုကရေစီကို အာဏာရှင် အစိုးရလက်ထက်ကနေ အရပ်သား အသွင်ပြောင်းလာတဲ့ ဦးသိန်းစိန် အစိုးရ လက်ထက်မှာ အရေးယူမှုတွေ စိပ်လာတာနဲ့ ပတ်သက်ပြီး ၀ါရင့် သတင်းစာဆရာ တစ်ဦး ဖြစ်တဲ့ ဆရာမောင်ဝံသ က ဗွီအိုအေကို အခုလို ပြောပါတယ်။

“အပတ်စဉ်ထုတ် ဂျာနယ်တွေနဲ့ ပတ်သက်ပြီးတော့ သတိပေးတာတွေ၊ အရေးယူတာတွေ နည်းနည်းလေး ပိုပြီးတော့ စိတ်လာတယ်လို့ တွေ့ရတယ်။ ကျနော်တို့ အနေနဲ့ကတော့ မီဒီယာသမား အချင်းချင်း ဒီလိုဖြစ် တာကို ပထမဦးဆုံး ကျနော့် ထင်မြင်ချက် ပြောရမယ်ဆိုရင် ဒါ အင်မတန်မှ စိတ်မကောင်းစရာ ဖြစ်တယ်။ ဒီလို အဖြစ်မျိုးတွေကို ဘယ်လို ရှောင်နိုင်မလဲ၊ ဘယ်လို ညှိနှိုင်းပြီးတော့ ဖြေရှင်းနိုင်မလဲ အဲဒါကို စဉ်းစားသင့်တယ်လို့ ထင်ပါတယ်။”

ဇူလိုင်လကုန်ရင် စာပေစိစစ်ရေးဟာ လုပ်ငန်းစဉ်တွေကို လုံးဝ ရုပ်သိမ်း သွားမယ်လို့ အဲဒီ ဌာနရဲ့ ဌာန အကြီးအကဲ ဒု ညွန်ချုပ် ဦးတင့်ဆွေနဲ့ ပြန်/ဆက် ညွှန်ချုပ် ဦးရဲထွဋ်တို့က မီဒီယာတွေရှေ့မှာ အတိအလင်း ပြောကြား ထားပေမဲ့လည်း အခု ဒီ စာပေစိစစ်ဟာ ဆက်ရှိနေပြီး အရေးယူမှုတွေလည်း ပို ပြင်းထန် လာတယ် လို့ ပြည်တွင်း ဂျာနယ်တွေမှာ တာဝန်ယူ လုပ်ကိုင်နေကြတဲ့ အယ်ဒီတာတွေ ကလည်း ပြောကြပါတယ်။

ပြည်တွင်းမှာ အလုပ်လုပ်ကိုင်နေရတဲ့ မီဒီယာသမားတွေကတော့ ဒါဟာ သဘောထား တင်းမာတဲ့ အာဏာပိုင်တွေနဲ့ မီဒီယာ သမားတွေကြားက ပြဿနာ တစ်ရပ်ဖြစ်ပြီး ကိုယ့်အလှည့် ဘယ်တော့လဲ ဆိုတာ စောင့်ဆိုင်းနေရ တယ်လို့ ပြည်တွင်း ဂျာနယ်တစ်ခုက အယ်ဒီတာ တစ်ဦးက ပြောပါတယ်။

“ခေတ်က IT ခေတ်၊ ဒီလောက် မြန်ဆန်တဲ့ခေတ်ကြီးမှာ အခုထက်ထိ သတင်းတိုင်းကို တိုးကာ၊ ပို့ကာ-ထိကာဆိုတော့ စဉ်းစားကြည့်လေ။ ကျနော်ပြောနေတာက စာပေ စိစစ်ရေးကို ပြောနေတာ မဟုတ်ဘူး။ ဒါက စာပေ စိစစ်ရေးနဲ့ မီဒီယာ ပြဿနာ မဟုတ်ဘူး။ ဒါက သဘောထား တင်းမာသူတွေနဲ့ မီဒီယာတွေ ကြားထဲက ပြဿနာ၊”

ဒီကနေ့ ဂျာနယ်နှစ်စောင်ကို ထုတ်ဝေခွင့် ရပ်နားခဲ့အပြီးမှာတော့ နေ့လည် တစ်နာရီ မှာ စာပေစိစစ်ရေး အဆောက် အအုံမှာ သက်ဆိုင်ရာ ဂျာနယ်တွေက တာဝန်ခံတွေကို ခေါ်ပြီး ထုတ်ဝေခွင့် ရပ်နားခံရတဲ့ ဂျာနယ်တွေကို ကြည့်ပြီး မိမိဂျာနယ်တွေ ကိုလည်း ဂရုစိုက်ကြပြီး စာပေစိစစ်ရေးက ချမှတ်ထားတဲ့မူ အတိုင်း လိုက်နာကြဖို့ ဒု ညွန်ချုပ် ဦးတင့်ဆွေနဲ့ ညွှန်မှူး ဦးမျိုးမြင့်မောင်တို့က သတိပေး ခဲ့ပါသေးတယ်။ ဒီကနေ့ ညနေ ပိုင်းမှာတော့ ပြည်တွင်း ဂျာနယ်တွေမှာ အလုပ် လုပ်ကိုင်နေကြတဲ့ ဂျာနယ်လစ်စ်တွေ စုဖွဲ့ထား တဲ့ မြန်မာ ဂျာနယ်လစ် ကွန်ရက်ကလည်း အစည်းအ၀းတစ်ခု လုပ်ပြီး ထုတ်ဝေခွင့် ရပ်နားခံခဲ့ရတဲ့ ဂျာနယ်တွေ ထုတ်ဝေ ခွင့် ပြန်ပေးဖို့ သက်ဆိုင်ရာ ဝန်ကြီး ဌာနနဲ့ စာပေစိစစ်ကို တောင်းဆို သွားမယ်လို့ မြန်မာဂျာနယ်လစ် ကွန်ရက် က တာဝန်ခံ ကိုဇော်ထိုက်က ပြောခဲ့ပါတယ် ခင်ဗျား။

Ref: VOA News

Read More...

ဒု သမ္မတသစ် ခန့်ရေး ကြန့်ကြာမှု ဝေဖန်ပြောဆိုနေ

ရန်ပိုင်
July 31, 2012

လစ်လပ်နေသည့် ဒု သမ္မတ ရာထူးအတွက် အတည်ပြုခန့်အပ်ရန် ကြန့်ကြာနေခြင်းနှင့် ပတ်သက်ပြီး လွှတ်တော် ကိုယ်စားလှယ်များ အကြား ဝေဖန်ပြောဆိုမှုများ ဖြစ်ပေါ်နေသည်။

အမျိုးသား ဒီမိုကရေစီသစ် ပါတီမှ အမျိုးသားလွှတ်တော် ကိုယ်စားလှယ် ဦးဖုန်းမြင့်အောင်က“ဒု သမ္မတလောင်း တယောက်တည်း ကို ဒီလောက်ကြာအောင် သုံးသပ် စိစစ်စရာ မလိုဘူးထင်တယ်၊ ပထမ အကြိမ်တုန်းက သုံးရက်လောက်ပဲ ကြာတယ်”ဟု ဆိုသည်။

ရခိုင်တိုင်းရင်းသားများ တိုးတက်ရေးပါတီ(RNDP)မှ အမျိုးသား လွှတ်တော် ကိုယ်စားလှယ် ဒေါက်တာအေးမောင် ကလည်း ဒု သမ္မတ ရွေးကောက် တင်မြှောက်မှုမှာ လိုအပ်သည်ထက် ပိုမိုကြာမြင့်နေသည်ဟု ထင်ကြောင်း၊ သို့သော် မည်သို့သော အကြောင်းများကြောင့် ကြာမြှင့်နေသည်ကိုမူ သုံးသပ်ပြောဆိုရန် ငြင်းဆိုသည်။

၂၀၀၈ ဖွဲ့စည်းပုံ အခြေခံဥပဒေအရ နိုင်ငံတော်သမ္မတ၏ အကြောင်းကြားစာ ရသည့်နေ့မှ စတင်ကာ ၂၁ ရက် အတွင်း ပြည်ထောင်စု လွှတ်တော် အစည်းအဝေးကို ခေါ်ယူရမည်၊ ထို့နောက် သက်ဆိုင်ရာ လွှတ်တော် ကိုယ်စားလှယ်များ အဖွဲ့က ဒု သမ္မတ တဦး ရွေး ချယ် တင်မြှောက်ရေးကို ဆက်လက် ဆောင်ရွက်ရမည်ဟု ပါရှိသည်။

သို့သော် မည်သည့်အချိန်ကာလတွင် စိစစ်ပြီး အပြီးသတ်ရွေးချယ် တင်မြှောက် ရမည်ဟု ကာလ သတ်မှတ်ချက် ဖွဲ့စည်းပုံ အခြေခံ ဥပဒေနှင့် နည်းဥပဒေများတွင် မပါရှိပေ။

ထိုသို့ အချိန်ကာလ သတ်မှတ်ချက် မပါရှိခြင်းကြောင့် ဒု သမ္မတ ရွေးချယ် တင်မြှောက်ရေး ကြန့်ကြာနေခြင်းဖြစ်ကြောင်း၊ ထိုအချက် သည် ၂၀၀၈ ဖွဲ့စည်းပုံ အခြေခံဥပဒေ၏ အားနည်းချက် ဟုလည်း ဆိုနိုင်ကြောင်း RNDP ပါတီမှ ပြည်သူ့ လွှတ်တော် ကိုယ်စားလှယ် ဦးဘရှိန် ကလည်း ထောက်ပြသည်။

“အဲဒီလို အချိန်ကာလကန့်သတ်ချက်တွေ မရှိလို့ ကြံ့ခိုင်ရေး ပါတီက သူတို့ လုပ်ချင်သလို လုပ်လို့ ရတာပေါ့၊ အခုတော့ လွှတ်တော် ကိုယ်စားလှယ်တွေလည်း ဘေးကပဲ ရပ်ကြည့်နေရတယ်”ဟု ၎င်းက ဆိုသည်။

ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ(ကြံ့ခိုင်ရေးပါတီ)နှင့် စစ်တပ် ၂၅ ရာခိုင်နှုန်း တို့သာ ကြီးစိုးနေသည့် လွှတ်တော်တွင် ဖွဲ့စည်းပုံ အခြေခံ ဥပဒေ၏ အားနည်းချက်များကို ပြင်ဆင်ရန် အတွက် လက်တွေ့အခြေအနေ အရ မလွယ်ကူကြောင်း ဦးဘရှိန်က ပြော ဆိုသည်။

ထို့အပြင် ရန်ကုန်တိုင်း ဒေသကြီး ၀န်ကြီးချုပ် ဦးမြင့်ဆွေအား ဒု သမ္မတလောင်း အဖြစ် တပ်မတော်သား လွှတ်တော် ကိုယ်စားလှယ် များမှ သမ္မတ အရည်အချင်းစစ် ကော်မတီသို့ တင်သွင်းသည်ဟု ပြည်တွင်းပြည်ပ မီဒီယာများတွင် ရေးသားနေသော်လည်း မိမိတို့ လွှတ်တော် ကိုယ်စားများအား တရားဝင် ပြောဆိုခြင်း မရှိကြောင်း ဦးဘရှိန်က ဆက်ပြောသည်။

ယင်းသို့ ဒု သမ္မတ ရွေးချယ်တင်မြှောက်ရေး ကြန့်ကြာနေခြင်းမှာ အစိုးရ အဖွဲ့ အတွင်း ပြုပြင်ပြောင်းလဲရေး လုပ်ဆောင်မှုများနှင့် ပတ်သက်နေကြောင်း နေပြည်တော်နှင့် နီးစပ်သည့် သတင်းရပ်ကွက်က ပြောဆိုသည်။

ပြီးခဲ့သည့် ဇူလိုင် ၄ ရက်နေ့က ဒု သမ္မတ ဦးတင်အောင်မြင့်ဦး နုတ်ထွက်ကြောင်း သမ္မတ ဦးသိန်းစိန်က လွှတ်တော်သို့ အကြောင်း ကြားခဲ့ပြီးနောက် ဇူလိုင် ၁၀ ရက်နေ့တွင် တပ်မတော်သား လွှတ်တော်ကိုယ်စားလှယ်များက ရန်ကုန်တိုင်း ဒေသကြီး ၀န်ကြီးချုပ် ဦးမြင့်ဆွေကို အမည်စာရင်း တင်သွင်းကြောင်း တပ်မတော်သားကိုယ်စားတချို့ကို ကိုးကားပြီး ပြည်တွင်းပြည်ပ မီဒီယာများ ကရေး သားခဲ့သည်။

အဆိုတင်သွင်းထားသည့် ဒု သမ္မတလောင်း အရည်အချင်းပြည့်မီမှု ရှိမရှိကို စစ်ဆေးရန်အတွက် ပြည်သူ့လွှတ်တော် ဥက္ကဋ္ဌ နှင့် ဒု ဥက္ကဋ္ဌ နှစ်ဦး၊ အမျိုးသားလွှတ်တော် ဥက္ကဋ္ဌ နှင့် ဒု ဥက္ကဋ္ဌ နှစ်ဦး၊ အမျိုးသားလွှတ်တော်မှ ဦးဇော်မြင့်ဖေ၊ ပြည်သူ့လွှတ်တော်မှ ဦးဌေးဦး နှင့် တပ်မတော်သား အမျိုးသားလွှတ်တော် ကိုယ်စားလှယ်အဖွဲ့မှ ဗိုလ်မှူးချုပ် ကျော်လွင်ဦးတို့ ပါဝင်သည့် ဒု သမ္မတ လောင်း အရည်အချင်းစစ် ကော်မတီက စစ်ဆေးနေကြောင်း သိရသည်။

Ref: ဧရာဝတီ

Read More...

ကုလ အထူးကိုယ်စားလှယ် ကယ်ဆယ်ရေး စခန်းတွေကို သွားရောက် ကြည့်ရှု

2012-07-31

မြန်မာနိုင်ငံဆိုင်ရာ ကုလသမဂ္ဂလူ့အခွင့်အရေး အထူးကိုယ်စားလှယ် မစ္စတာ ကင်တားနားဟာ မနေ့ မနက်က စစ်တွေနဲ့ မောင်တော မြို့နယ်တွေမှာ ရှိတဲ့ ကယ်ဆယ်ရေး စခန်းတွေကို သွားရောက် ကြည့်ရှုခဲ့ပါတယ်။

မနက်ပိုင်းမှာ စစ်တွေမြို့က ဘုန်းကြီးကျောင်းတွေမှာ ခိုလှုံနေတဲ့ တိုင်းရင်းသား ဒုက္ခသည်တွေကို သွားရောက် ကြည့်ရှုခဲ့ပြီး မွတ်စလင် ဘာသာဝင်တွေ ခိုလှုံနေတဲ့ စခန်းတချို့ကိုလည်း သွားရောက် ခဲ့တယ်လို့ သိရပါတယ်။

မစ္စတာ ကင်တားနားဟာ မောင်တောမြို့မှာ မွတ်စလင် ဘာသာဝင် (၅) ဦးကို တွေ့ဆုံမေးမြန်း ခဲ့ပြီးတဲ့နောက် အလိုတော်ပြည့် ဘုန်းကြီးကျောင်းမှာ ခိုလှုံနေတဲ့ ဒုက္ခသည်တွေ ကိုလည်း တွေ့ဆုံ မေးမြန်း သွားတယ်လို့ မစ္စတာ ကင်တားနားနဲ့ တွေ့ခွင့် ရလိုက်တဲ့ ဒေါ်လှသန်းဝေက RFA ကိုပြောပါတယ်။ မစ္စတာ ကင်တားနားဟာ မောင်တောမြို့ကနေ စစ်တွေကို မနေ့ညနေပိုင်းက ပြန်လည် ထွက်ခွာ သွားခဲ့ပါတယ်။

အခု ခရီးစဉ်ဟာ ရခိုင်ပြည်နယ်အတွင်း ဖြစ်ပွားခဲ့တဲ့ ပဋိပက္ခနဲ့ ပတ်သက်ပြီး စုံစမ်းဖို့ အဓိကဖြစ်ကြောင်း မစ္စတာ ကင်တားနားက ပြောဆို ခဲ့ပါတယ်။ မြန်မာနိုင်ငံမှာ လတ်တလော အနေနဲ့ နိုင်ငံရေး အပြောင်းအလဲတွေ ပေါ်ပေါက်နေပေမဲ့ ရခိုင်ပြည်နယ် တွင်းက အကြမ်းဖက် ပဋိပက္ခတွေဟာ မြန်မာပြည် ရင်ဆိုင်နေရတဲ့ စိန်ခေါ်မှုတွေထဲက တစ်ခုဖြစ်ကြောင်း မြန်မာနိုင်ငံကို ထွက်မလာခင်မှာ ပြောဆို ခဲ့ပါတယ်။

ဒါပေမဲ့ ရခိုင်ပြည်နယ် စစ်တွေနဲ့ မောင်တောကို သွားရောက် ကြည့်ရှုခဲ့အပြီး တွေ့မြင် ခဲ့ရတာတွေကို သတင်းထောက်တွေက မေးမြန်းတဲ့ အခါ မစ္စတာ ကင်တားနားက ဖြေဆိုဖို့ ငြင်းဆန်ခဲ့ကြောင်း အေပီသတင်းက ဖော်ပြပါတယ်။

ဒီအတွင်း အဖွဲ့ဝင်နိုင်ငံ (၅၇) နိုင်ငံ ပါဝင်တဲ့ OIC ခေါ် အစ္စလာမ် ပူးပေါင်း ဆောင်ရွက်ရေး အဖွဲ့က မြန်မာနိုင်ငံ ရခိုင်ပြည်နယ်က မွတ်စလင် ဘာသာဝင် ဒုက္ခသည်တွေ အတွက် နိုင်ငံရေး၊ ဘာသာရေးနဲ့ လူသာချင်း စာနာတဲ့ အကူအညီတွေ ပံ့ပိုးဆောင်ရွက် ကြဖို့ နိုင်ငံတကာ မွတ်စလင် အသိုင်းအ၀ိုင်းကို မနေ့က တိုက်တွန်း လိုက်ပါတယ်။

OIC အဖွဲ့ အတွင်းရေးမှူးချုပ်က ပြောဆိုရာမှာ - နိုင်ငံရေး အကူအညီ ဆိုတာ မွတ်စလင် ဘာသာဝင် ဒုက္ခသည်တွေ ကိုယ်စား သံရေး တမန်ရေး အရ မြန်မာအစိုးရနဲ့ ဆက်သွယ် ဆောင်ရွက်မှုတွေ ပါဝင်ကြောင်း၊ မြန်မာနိုင်ငံမှာ သံရုံးရှိတဲ့ OIC အဖွဲ့ဝင် နိုင်ငံတွေ အနေနဲ့လည်း မွတ်စလင် ဒုက္ခသည်တွေ အပေါ် ဆက်ဆံပြုမူမှုတွေ တိုးတက် ကောင်းမွန်လာအောင် မြန်မာ အစိုးရကို တိုက်တွန်းကြဖို့ ဆော်သြ ထားကြောင်း ပြောဆိုပါတယ်။

ဒါ့ပြင် သြဂုတ်လ (၁၄) ရက် မက္ကာမှာ ကျင်းပမယ့် OIC အထူး ညီလာခံမှာလည်း ရခိုင်ပြည်နယ်ကိစ္စ ဆွေးနွေးဖို့ စီစဉ် ထားတယ်လို့ ဆိုပါတယ်။

Ref: RFA News

Read More...

စစ်တပ်၊ အစိုးရနှင့် NLD တွင်ပါ ရှေးရိုးစွဲများရှိဟု သမ္မတပြော

မျိုးသန့်
အင်္ဂါနေ့၊ ဇူလိုင်လ ၃၁ ရက် ၂၀၁၂

ရန်ကုန် (မဇ္ဈိမ) ။ ။ တပ်မတော်နှင့် အစိုးရတွင်သာမက အမျိုးသား ဒီမိုကရေစီ အဖွဲ့ချုပ် NLD တွင်လည်း ရှေးရိုးစွဲ အမြင်ရှိသူများ ရှိနေသည်ဟု စင်္ကာပူ အခြေစိုက် ရုပ်သံလွှင့် သတင်းဌာန တခု ဖြစ်သည့် CNA က တွေ့ဆုံမေးမြန်း ရာတွင် သမ္မတ ဦးသိန်းစိန်က ပြောဆိုသွားသည်။

ဇူလိုင်လ နောက်ဆုံးပတ်အတွင်း ထိုင်းနိုင်ငံသို့ သမ္မတ ဦးသိန်းစိန် သွားရောက်စဉ် CNA ၏ မေးမြန်းမှုကို မြန်မာ သမ္မတ ပြန်လည်ဖြေကြား ခဲ့မှုအား တနင်္လာနေ့ ညနေပိုင်းတွင် ထုတ်လွှင့်ပြသ သွားခြင်း ဖြစ်သည်။

“ဒေါ်အောင်ဆန်းစုကြည်ဘက်မှ ရှေးရိုးစွဲ ပုဂ္ဂိုလ်တွေလည်း ရှိပါတယ်။ နောက်ပြီးတော့ တိုးတက်တဲ့ အမြင်ရှိတဲ့ လူငယ်တွေလည်း ရှိပါတယ်။ တပ်မတော် ထဲမှာလည်း အလားတူ ရှိမှာ ဖြစ်ပါတယ်။ ကျနော်တို့ရဲ့ အစိုးရ အဖွဲ့ထဲမှာ လည်းရှိမှာ ဖြစ်ပါတယ်။” ဟု သမ္မတ ဦးသိန်းစိန်က ပြောကြား သွားသည်။

ထို ရှေးရိုးစွဲများ ရှိနေခြင်းသည် တိုင်းပြည်ဖွံ့ဖြိုး တိုးတက်မှုပေါ်တွင်သာ မူတည်ပြီး တိုင်းပြည် ဖွံ့ဖြိုး တိုးတက်အောင် လုပ်ပြခြင်းဖြင့် “ဆန့်ကျင် သဘောထား အမြင်ရှိတဲ့ သူတွေ နောက်က အလိုလို လိုက်ပါလာမှာ ဖြစ်ပါတယ်။” ဟုလည်း သမ္မတ က ထည့်သွင်း ပြောသွားသည်။

ထို့အပြင် ဒေါ်အောင်ဆန်းစုကြည်နှင့် အစိုးရတို့ကြား အမေရိကန်နှင့်၊ ဥရောပနိုင်ငံ အချို့တို့၏ စီးပွားရေး ပိတ်ဆို့ အရေးယူမှုနှင့် ပတ်သက်၍ သဘောထား ကွဲလွဲမှုများ ရှိနေသည်ဟု သမ္မတ ဦးသိန်းစိန်က ပြောကြား သွားသေးသည်။

“မတူတာကတော့ ကျနော်တို့က နိုင်ငံကို စီးပွားရေး ဖွံ့ဖြိုး တိုးတက်အောင် လုပ်ချင်တယ်။ စီးပွားရေး ဖွံ့ဖြိုး တိုးတက်အောင် လုပ်ဖို့ အတွက် ပိတ်ဆို့ တားဆီး ထားတာတွေကို ကျနော်တို့က ဖြေလျှော့ပေးစေချင်တယ်။ လုံးဝ ရုတ်သိမ်း ပေးစေချင်တယ်။ ဒေါ်အောင်ဆန်းစုကြည် ကမ္ဘာကိုလှည့်ပြီး ပြောတဲ့ တွေ့တဲ့ အထဲမှာတော့ ရင်းနှီး မြှုပ်နှံမှုတွေကို ချက်ချင်း မလာဖို့၊ စဉ်းစဉ်းစားစားနဲ့ လုပ်ဖို့ ဆိုတာတွေက ဒီအချက်တွေကတော့ ကွဲပြားခြားနားမှု ရှိပါတယ်” ဟု ပြောကြား သွားခဲ့သည်။

တိုင်းရင်းသား လက်နက်ကိုင်များနှင့် ငြိမ်းချမ်းရေး တည်ဆောက်နိုင်ရန် ကိုလည်း ဦးစားပေး လုပ်ဆောင်နေကြောင်း “နိုင်ငံရေး တည်ငြိမ်ဖို့ အတွက် ဆိုတာမှာလည်း ဒေါ်အောင်ဆန်းစုကြည်ကို ဝိုင်းရံနေတဲ့ အင်အားစုတွေနဲ့ အဆင်ပြေ ဖို့အတွက် ဒေါ်အောင်ဆန်းစုကြည် အပါအဝင် သူ့အင်အားစုတွေဟာ နိုင်ငံရေး လုပ်ငန်းစဉ်တွေမှာ ပါဝင်ဖုိ့အတွက် ဒါ အရေးအကြီးဆုံးဖြစ်ပါတယ်။ ဒီအချက်ကိုလည်း ကျနော်တို့ ဦးစားပေးပြီး လုပ်ပါတယ်” ဟု ဦးသိန်းစိန်က ပြောကြား သွားသည်။

အသက်အရွယ်နှင့် ကျန်းမာရေးအရ သမ္မတ သက်တမ်းတခုသာ တာဝန်ယူမည့် ဦးသိန်းစိန်က မြန်မာ့ အနာဂတ် အတွက် “ဘာပဲဖြစ်ဖြစ် မြန်မာနိုင်ငံကို နိုင်ငံရေး အရ တည်တည်ငြိမ်ငြိမ် ဖြစ်အောင် လုပ်နိုင်မယ့် လူမျိုးတွေ၊ စီးပွားရေး အရ ဖွံ့ဖြိုး တိုးတက်အောင် လုပ်နိုင်မယ့် မျိုးဆက်မျိုးတွေ၊ ဒီမျိုးဆက်မျိုးက ဆက်ပြီးတော့ တာဝန် ယူသွားစေချင်ပါတယ်” ဟု CNA ၏ တွေ့ဆုံမေးမြန်းမှုတွင် ဖြေကြား သွားခဲ့သည်။

Ref: မဇ္ဈိမ

Read More...

Tuesday, July 31, 2012

မြန်မာ့စီးပွါးရေး ပြုပြင်ပြောင်းလဲရေး၏ နိုင်ငံရေး အကြောင်း အစီရင်ခံစာ

တနင်္လာနေ့၊ ဇူလိုင်လ ၃၀ ရက် ၂၀၁၂

မြန်မာ့နိုင်ငံရေး အသွင်ကူးပြောင်းရေး လုပ်ငန်းနှင့် စီးပွါးရေး ပြန်လည် တည်ဆောက်မှု လုပ်ငန်းတို့မှာ နက်နက် ရှိုင်းရှိုင်း ဆက်နွယ်နေသည်။ လက်ရှိ လုပ်ဆောင်လျက် ရှိသော မြန်ဆန်လှသည့် ပြုပြင်ပြောင်းလဲရေး လုပ်ငန်းများ အောင်မြင် ရန်မှာ အစိုးရ၊ နိုင်ငံတွင်းမှ ရေပေါ်ဆီ လူ့မလိုင် လူတန်းစားနှင့် နိုင်ငံတကာ အသိုင်းအဝိုင်းတို့ လက်တွဲ လုပ်ဆောင်မှသာ ဖြစ်မည်ဟု နိုင်ငံတကာ ပဋိပက္ခ လေ့လာရေး အဖွဲ့ကြီး (ICG) မှ ထုတ်ပြန်လိုက်သော အစီရင်ခံစာ တစောင်တွင်
ဖော်ပြ ထားသည်။

ယခင် သီတင်းပတ်က ထုတ်ပြန်လိုက်သော “မြန်မာနိုင်ငံမှ စီးပွါးရေးပြုပြင်ပြောင်းလဲမှု ၏ နိုင်ငံရေး” ဆိုသည့် အစီရင် ခံစာတွင် သမ္မတ ဦးသိန်းစိန်နှင့် သူ့အစိုးရ အဖွဲ့က ဆောင်ရွက်လျက်ရှိသော ရည်မှန်းချက် ကြီးမားလှသည့် စီးပွါးရေး ပြောင်းလဲမှု လုပ်ငန်းများ၏ စိန်ခေါ်မှုများနှင့် အကျိုးကျေးဇူးများကို စေ့ငုလေ့လာ တင်ပြထားသည်။

အိမ်နီးချင်း နိုင်ငံများကို အမီလိုက်၍ လျင်မြန်စွာ ကြီးထွားလာသော စီးပွါးရေးတရပ်ကို တည်ဆောက်ရန် အတွက် အစိုးရသည် ယခင် စီးပွါးရေး စနစ်ဟောင်းက တည်ရှိခဲ့သော ကန့်သတ် တားဆီး ထားမှုများနှင့် အခွင့်ထူးခံမှုများကို ဖယ်ရှားလိုသည်ဟု အစီရင်ခံစာက သူတို့၏ တွေ့ရှိချက် အကျဉ်းတွင် ရေးသားဖော်ပြ ထားသည်။ စီးပွါးရေး စနစ်ဟောင်းက စစ်တပ်၊ ပါတီအထက်လွှာနှင့် လက်ရင်းတပည့် ခရိုနီ စီးပွါးရေးသမားများ ကိုသာ အကျိုးဖြစ်ထွန်း စေခဲ့သည်။

“ပြုပြင်ပြောင်းလဲရေး လုပ်ငန်းကို တကယ်ကောင်းအောင် လုပ်မည် ဆိုပါက နိုင်ငံ တဝှမ်းမှ အများစုသော ပြည်သူများ အတွက် အကျိုး ရှိစေမည် ဖြစ်သည်။ သို့သော် အစိုးရဟောင်း လက်ထက် ကန့်သတ် ပိတ်ပင်မှုများနှင့် အခွင့်ထူး ခံစားခွင့်များကြောင့် လက်ဝါးကြီးအုပ် လုပ်ကိုင်ခွင့် ရရှိကာ အကျိုးအမြတ် ကြီးကြီးမားမား ရခဲ့သူများကမူ ထိုအခွင့်ထူး များ လက်လွတ် ဆုံးရှုံး ကြရလိမ့်မည် ဖြစ်သည်။ ခရိုနီ စီးပွါးရေး သမားများ၊ စစ်တပ်နှင့်ပါတီ ယန္တရားမှ ထိပ်တန်း ပုဂ္ဂိုလ်များကမူ ဆက်လက် အခြေအနေ ကောင်းနေဆဲဖြစ်ပြီး သူတို့ အနေဖြင့် စည်းမျဉ်း သစ်များနှင့် အညီ စီးပွါးရေး လုပ်ကိုင်ကြရန်လိုကာ အခွန်အကောက်များလည်း ပေးဆောင်ဘို့ လိုသည်။ ပြည်တွင်းနှင့် နိုင်ငံ ရပ်ခြားမှ လုပ်ငန်းများနှင့် ပြိုင်ဆိုင် လုပ်ကိုင် ကြရန်လည်း လိုသည်” ဟု ICG ၏ အရှေ့တောင် အာရှ ပရောဂျက် ဒါရိုက်တာ Jim Della-Giacoma က ပြောသည်။

စီးပွါးရေး ပြုပြင်ပြောင်းလဲမှု လုပ်ငန်းများသည် အကြီးအကျယ် ပြောင်းလဲမှုများကို ဆောင်ကြဉ်း လာမည် ဖြစ်သော်လည်း၊ အထူးသဖြင့် အစိုးရဟောင်း၏ အဓိက ဒေါက်တိုင်များကို ပြောင်းလဲစေမည် ဖြစ်သော်လည်း ဤစီမံကိန်းကို တားဆီး နှောင့်ယှက်မည့် ကြိုးပမ်းမှု အနည်းငယ်သာ ရှိခဲ့သည်။ ယခင်က အခွင့်ထူး ခံစားခဲ့ရသော စီးပွါးရေး သမားများသည် ပြိုင်ဆိုင်မှုရှိပြီး ကြီးထွား လာနေသည့် ကမ္ဘာ့စီးပွါးရေးတွင် ဝင်ရောက်ယှဉ်ပြိုင် လုပ်ကိုင်လျှင် ရရှိမည့် အကျိုးကျေးဇူးများ ကို သိရှိကြသည်။ ထို့ကြောင့် စီးပွါးရေးပြုပြင် ပြောင်းလဲမှု လုပ်ငန်းများကို နောက်ပြန် တွန်းကြမည့် အစား ယခုတိုင် အခွင့်ထူး ခံစားနေရဆဲဖြစ်သော ရေပေါ်ဆီ စီးပွါးရေး သမားများသည် ယခင် အခွင့်ထူး ခံစားခဲ့ရသော အတိတ်ဟောင်းနှင့် အဆက်ဖြတ်ကာ စီးပွါးရေးသစ်တွင် အပြည့်အဝ ပါဝင် လုပ်ကိုင် လိုလာကြသည်။ ထို့ပြင် စီးပွါးရေး ပြုပြင် တည်ဆောက်မှု လုပ်ငန်းတွင် အတားအဆီး တရပ် ဖြစ်နေသည်ဟု ယူဆ ထားကြသော ဒု-သမ္မတ သီဟသူရ ဦးတင်အောင်မြင့်ဦး မကြာမီက နုတ်ထွက်သွားခြင်းကလည်း ပြုပြင်ပြောင်းလဲရေး လုပ်ငန်းကို အထောက်အကူ ပြုလိမ့်မည်ဟု အစီရင်ခံစာက ဆိုထားသည်။

သို့သော် သမ္မတ ဦးသိန်းစိန်အတွက်မူ စိန်ခေါ်မှုများစွာကို ရင်ဆိုင်နေရဆဲ ဖြစ်သည်။ အစိုးရ၏ အကန့် အသတ်နှင့်သာ ရှိသော အတွေ့ အကြုံနှင့် အတတ်ပညာ ကျွမ်းကျင် ပိုင်နိုင်မှုသည် စီးပွါးရေး ပြုပြင်ပြောင်းလဲရေး လုပ်ငန်း၏ အရှိန်နှင့် ထိရောက်မှုကို အတားအဆီး ဖြစ်နေသည်။ ယင်းကြောင့် အမြစ်ကစ ပြောင်းလဲရမည့် မူဝါဒသစ်များ အကောင်အထည် ဖော်ရေးကို မလုပ်နိုင် ဖြစ်နေရသည်။ ဤ ချို့ယွင်းချက်သည် မူဝါဒများကို လျင်လျင်မြန်မြန် ထိန်းညှိ လုပ်ကိုင်ရမည့် အခါမျိုးတွင် သိသာ လာလိမ့်မည်ဟု ICG အစီရင်ခံစာက ဆိုသည်။

နိုင်ငံရေး တည်ငြိမ်မှုအတွက် အာမခံချက် မရှိပါက စီးပွါးရေး ပြုပြင်ပြောင်းလဲမှု လုပ်ငန်းသည် မအောင်မြင်နိုင်ပါဟု လည်း အစီရင်ခံစာ က ပြောထားသည်။ အလားတူပင် စီးပွါးရေး တိုးတက်မှုနှင့် တန်းတူညီမျှမှု မရှိပါကလည်း အစိုးရ စနစ် အသွင် ကူးပြောင်းရေး လုပ်ငန်းသည် မအောင်မြင်နိုင်ပါဟုလည်း ဆိုထားသည်။ အများစုသော ပြည်သူ လူထုအပေါ် လက်တွေ့ကျကျ ကြီးကြီးမားမား အကျိုး သက်ရောက်မှုရှိသည့် လုပ်ငန်းများဖြစ်သော လျှပ်စစ်မီး ရရှိရေး၊ မြေယာ ဥပဒေ ပြုပြင်ပြောင်းလဲရေး လုပ်ငန်းများ၊ ပိုမိုကောင်းမွန်သည့် ပြည်သူ့ သယ်ယူပို့ဆောင်ရေးစနစ်၊ ဈေးသက်သာသော ဆက်သွယ်ရေး ဝန်ဆောင်မှုများ၊ ပညာရေးနှင့် ကျန်းမာရေးတွင် တရားမဝင် ပေးဆောင်နေရသည့် အခကြေးငွေများမှ သက်သာရေး စသည့် လုပ်ငန်းများလည်း အထက်ပါ စီးပွါးရေး တိုးတက်မှုနှင့် တန်းတူညီမျှရေးတွင် အကြုံးဝင်သည်။

တခုနှင့်တခု ခွဲခြားမရနိုင်သော စီးပွါးရေးနှင့် နိုင်ငံရေး ပြုပြင်ပြောင်းလဲမှု လုပ်ငန်းများ အောင်မြင်လာပြီး တိုင်းပြည်၏ အသွင်ကူးပြောင်းရေး လုပ်ငန်းများမှ အကျိုးအမြတ် သိသိသာသာ ရရှိလာပါက မြန်မာအစိုးရ၊ စစ်တပ်၊ ရေပေါ်ဆီ လူ့မလိုင် စီးပွါးရေးသမားများနှင့် ပြည်သူလူထုသည် ထိုလုပ်ငန်းများကို ကြိုဆိုကြမည်သာဖြစ်ပြီး ယင်းလုပ်ငန်းများ အကောင်အထည် ဖော်ရေးတွင်လည်း ဝင်ရောက်လုပ်ကိုင်ကြမည်သာ ဖြစ်သည်ဟု အစီရင်ခံစာတွင် ရေးသား ထားသည်။

သို့သော် နိုင်ငံတကာ အသိုင်းအဝိုင်းအနေနှင့်လည်း ယခင် စစ်အစိုးရဟောင်းအပေါ် ချမှတ်ထားသော ပိတ်ဆို့ အရေးယူမှုများကို ဖယ်ရှားပေးရေး အပါအဝင် ထောက်ခံကူညီရေး လုပ်ငန်းများကို ဆက်လက် လုပ်ဆောင်ပေးရန်မှာ အရေးကြီးသည်။ အထက်လွှတ်တော် ကော်မတီတရပ်က ယခုလအတွင်း ထောက်ခံတင်ပြလိုက်သကဲ့သို့ မြန်မာပြည်မှ သွင်းကုန်များကို အမေရိကန်နိုင်ငံက ဆက်လက် ပိတ်ဆို့ထားမည်ဆိုပါက ဆန့်ကျင်ဘက် အကျိုးရလဒ်ကိုသာ ဆိုးဆိုးရွားရွား ရရှိစေလိမ့်မည် ဖြစ်သည်ဟုလည်း ICG အစီရင်ခံစာတွင် ရေးသားထားသည်။

“စီးပွါးရေး ပြုပြင်ပြောင်းလဲမှု လုပ်ငန်းများ အောင်မြင်စေရန်အတွက် နိုင်ငံရေး ပြုပြင်ပြောင်းလဲမှု များလည်း ချောချော
မွေ့မွေ့ ရှိဘို့ လိုပါသည်။ နိုင်ငံရေး တည်ငြိမ်မှုအတွက် အာမခံချက်ရှိမှလည်း ယခင် အာဏာရှင်ဟောင်း ပုံစံ အုပ်ချုပ်ရေး ကို အစိုးရသစ်က ပြောင်းလဲဆောင်ရွက်နိုင်ပါလိမ့်မည်။ ယင်းနှစ်ခုလုံးသည် မြန်မာနိုင်ငံ တိုးတက်ပြောင်းလဲရေး အတွက် အရေးပါသည်” ဟု ICG ၏ အာရှ ပရိုဂရမ် ဒါရိုက်တာ Paul Quinn-Judge က ပြောဆိုသွားသည်။

Ref: မဇ္ဈိမ

Read More...

ဦးအောင်သိန်းလင်းကို အမတ်အဖြစ်မှ ရုတ်သိမ်းရေး နှိုးဆော်မှုများ ရှိနေ

သိင်္ဂီထွန်း
တနင်္လာနေ့၊ ဇူလိုင်လ ၃၀ ရက် ၂၀၁၂

ရန်ကုန် (မဇ္ဈိမ) ။ ။ ရန်ကုန်တိုင်း၊ တောင်ဥက္ကလာပ မဲဆန္ဒရှင်များက ပြည်သူ့ လွှတ်တော် ကိုယ်စားလှယ် ဦးအောင်သိန်းလင်းကို လွှတ်တော် ကိုယ်စားလှယ် အဖြစ်မှ ရုတ်သိမ်းပေးရေး စုပေါင်း လက်မှတ်ရေးထိုးကာ ပြည်ထောင်စု ရွေးကောက်ပွဲ ကော်မရှင်သို့ တင်ပြရန် နှိုးဆော်မှုများ ရှိနေသည်။

ဦးအောင်သိန်းလင်း၏ Southern Weekend China သတင်းစာသို့ ဖြေဆိုခဲ့သည့် စကားများနှင့် ပတ်သက်ပြီး ဒေါသ ထွက်နေသော ဒေသခံ အချို့က ၎င်းအား လွှတ်တော် ကိုယ်စားလှယ် အဖြစ်မှ ပယ်ဖျက်ရန် ကြိုးစားလာခြင်း ဖြစ်သည်ဟု တနင်္ဂနွေနေ့မှ စတင်ခဲ့သော လက်မှတ်ရေးထိုးမှုကို ဦးဆောင်သူ တောင်ဥက္ကလာပ မြို့နယ် ၅ ရပ်ကွက်မှ ဦးမင်းအောင် က ဆိုသည်။

သဘောတူ လက်မှတ်ထိုးသူ ၂ဝဝ ခန့် ရှိပြီဖြစ်ပြီး ၂ဝဝဝ ခန့် ကောက်ခံရန် ရှိနေသည် ဟုလည်း သိရသည်။

တောင်ဥက္ကလာပ မဲဆန္ဒနယ်တွင် ၂ဝ၁ဝ ခုနှစ်၊ ရွေးကောက်ပွဲအတွင်း မဲပေးခွင့်ရှိသူ ၈ဝ,ဝဝဝ ကျော် ရှိသည်။ ဖွဲ့စည်းပုံ အခြေခံ ဥပဒေပုဒ်မ ၃၉၆ ပုဒ်မခွဲ (ခ)အရ လွှတ်တော် ကိုယ်စားလှယ် တဦးကို တာဝန်မှ ပြန်လည် ရုပ်သိမ်း လိုပါက သက်ဆိုင်ရာ မဲဆန္ဒနယ်မှ မဲဆန္ဒရှင် ၁ ရာခိုင်နှုန်း လက်မှတ်ရေးထိုး ရမည် ဖြစ်သည်။

အခြေခံဥပဒေ ပြဋ္ဌာန်းချက်ကို ဖောက်ဖျက် ကျူးလွန်ခြင်း၊ နိုင်ငံတော် ကျေးဇူးသစ္စာ ဖောက်ဖျက်ခြင်း၊ ကိုယ်ကျင့် သိက္ခာ ပျက်ပြားခြင်း၊ ဥပဒေအရ ပေးအပ်သော တာဝန်များကို ကျေပွန်စွာ မဆောင်ရွက်ခြင်းနှင့် အမတ်ဖြစ်ထိုက်သော အရည် အချင်း ပျက်ယွင်းခြင်း တို့သည် လွှတ်တော် အမတ်တဦးကို တာဝန်မှ ပြန်လည် ရုတ်သိမ်းနိုင်သော အကြောင်းတရားများ ဖြစ်သည်ဟု အခြေခံဥပဒေတွင် ပြဋ္ဌာန်းထားသည်။

ဦးအောင်သိန်းလင်း၏ ပြောကြားချက်များအား သတင်းစာက တရုတ် ဘာသာဖြင့် ဖော်ပြချက်ကို Burmanet က အင်္ဂလိပ် ဘာသာသို့ ပြန်ဆို ထားချက်အရ ဧရာဝတီ မြစ်ဆုံဆည် စီမံကိန်း ရပ်ဆိုင်းခြင်းကို သူ့အနေဖြင့် သဘောမတူဘဲ သမ္မတ တဦးတည်း ကသာ ဆုံးဖြတ် လုပ်ဆောင် သွားခြင်းဖြစ်ကြောင်း၊ ကြားဖြတ်ရွေးကောက် ပွဲတွင် NLD သို့ မဲပေးခဲ့ သော မဲဆန္ဒရှင်များကို "They are crazy" ဟု အပြစ်ဖို့ ပြောကြားချက်များ ပါရှိသည်။

တရုတ်နိုင်ငံပိုင် CPI ကုမ္ဗဏီက တည်ဆောက်ခဲ့သော အငြင်းပွားဖွယ်ရာ မြစ်ဆုံဆည် စီမံကိန်းကို ပြည်သူ အများက အုတ်အော်သောင်းတင်း ကန့်ကွက် ခဲ့ကြသည်။

လက်မှတ်ထိုးရေး နှိုးဆော်သူတဦးဖြစ်သော တောင်ဥက္ကလာဒေသခံ ဦးမင်းအောင် က “ဦးတို့ရဲ့ ကိုယ်စားလှယ် အဖြစ် ဦးတို့က သူတို့ကို တင်ပေးထားပြီးပြီ။ တင်ပေးထားတဲ့ အချိန်မှာ ကိုယ်စားလှယ်တွေက ဦးတို့ကိုယ်စား ကောင်းရာ ကောင်းကြောင်းတွေ ပြောရမယ် ဆိုရမယ်၊ လုပ်ရမယ်လေ။ အဲတော့ မဲဆန္ဒရှင်တွေရဲ့ ဆန္ဒကို ဆန့်ကျင်ပြီးတော့ လုပ်တယ်ဆိုတာကတော့ ဒါတို့ ကိုယ်စားလှယ် မဖြစ်ထိုက်တော့ဘူးပေါ့။ ပုဂ္ဂိုလ်ရေးအရ မုန်းတီးလို့လုပ်တာ မဟုတ်ဘူး” ဟု ပြောသည်။

၂ဝ၁ဝ ခုနှစ်၊ ရွေးကောက်ပွဲတွင် ဦးအောင်သိန်းလင်းကို မဲပေးခဲ့သူ တောင်ဥက္ကလာပ ၁ဝ ရပ်ကွက်မှ ဦးနိုင်ကိုလင်း ကလည်း “ကိုယ့်ပြည်သူကို ကာကွယ်ရမယ့်နေရာမှာ မကာကွယ်ဘဲနဲ့ ဒီလိုမျိုးကြီး ပြောတယ်ဆိုတေ့ာ ခေါင်းဆောင်က အဲလိုမျိုးကြီးလား ဆိုတဲ့ အတွေးမျိုး ဝင်လာတဲ့အခါ ဘယ်လိုမှ မခံစားနိုင်ဘူး” ဟု ပြောသည်။

ဝေဖန်မှုများ ထွက်ပေါ်လာပြီးနောက် ဦးအောင်သိန်းလင်းက တရုတ်သတင်းစာအား သူ၏ ဖြေကြားမှု များမှာ ဘာသာပြန် မှားယွင်းကြောင်း ပြည်တွင်း ဂျာနယ်များသို့ ပြန်လည် ဖြေရှင်းခဲ့သည်။ သို့သော်လည်း မယုံကြည်နိုင်ကြသူ များကလည်း ရှိနေသေးသည်။

တောင်ဥက္ကလာပမြို့နယ် ၇ ရပ်ကွက်မှ မဲဆန္ဒရှင်တဦးဖြစ်သူ ဒေါက်တာစောနိုင်က “Cat ဆိုတာ ကြောင်ကို ခွေးလို့မှ ဘာသာပြန်လို့ မရတာ။ တခုတော့ ရှိတာပေါ့ တောကြောင် ဖြစ်ရင် ဖြစ်မယ်။ အိမ်မှာနေတဲ့ကြောင် ဖြစ်ချင်ဖြစ်မယ်ပေါ့” ဟု မဇ္ဈိမကို ပြောသည်။

ဦးအောင်သိန်းလင်း၏ ဖြေကြားမှုများနှင့် ပတ်သက်၍ ၎င်း၏ပါတီ ကြံ့ခိုင်ရေးပါတီက စိစစ်လျက် ရှိနေပြီး သူ၏ ဖြေကြားမှုများ မှန်ကန်ပါက ပါတီ၏ စည်းမျဉ်း စည်းကမ်းများ အရ အရေးယူ ဆောင်ရွက်သွားမည်ဟု ဇူလိုင်လ ၂၈ ရက်နေ့တွင် ထုတ်ပြန်ကြေညာ ခဲ့သည်။

“ဦးအောင်သိန်းလင်း အမှန်တကယ် ပြောကြားခဲ့မှုများဖြစ်ပါက ဦးအောင်သိန်းလင်း ၏ ပုဂ္ဂလိက ပြောဆိုချက် များသာ ဖြစ်ပြီး ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ၏ သဘောထားများ မဟုတ်ပါ” ဟုလည်း ကြေညာချက် ထဲတွင် ဖေါ်ပြထားသည်။

Ref: မဇ္ဈိမ

Read More...

သမ္မတနှင့် တိုင်းရင်းသား ပါတီများတွေ့ဆုံမည့် အစီအစဉ် ရွှေ့ဆိုင်း

နေမျိုး
တနင်္လာနေ့၊ ဇူလိုင်လ ၃၀ ရက် ၂၀၁၂

နယူးဒေလီ (မဇ္ဈိမ) ။ ။ တိုင်းရင်းသား ပါတီများအား သမ္မတ ဦးသိန်းစိန် မှ တွေ့ဆုံမည့် အစီ အစဉ်အား ရက်ရွှေ့ဆိုင်း ထားကြောင်း သိရသည်။

သမ္မတ အနေဖြင့် ဒီမိုကရေစီ မိတ်ဆွေပါတီ ၁၀ ပါတီနှင့် ဇူလိုင်လ ၁၈ ရက်နေ့က တွေ့ဆုံပြီးနောက် ကျန် တိုင်းရင်းသား ၁၄ ပါတီနှင့် တွေ့ဆုံရန် စီစဉ်ထားမှုအား ရက်ရွှေ့ဆိုင်းလိုက်ခြင်း ဖြစ်ကြောင်း ကရင်ပြည်သူ့ပါတီ KPP ဥက္ကဋ္ဌ ဦးထွန်းအောင်မြင့် က ပြောသည်။

“အဲဒီကိစ္စရွှေ့ဆိုင်းထားတယ်။ ဘာကြောင့်ရွှေ့ဆိုင်းထားလလည်း ကျနော်လည်း မသိဘူး။ အဲလိုပဲ ဖုန်း ဝင်လာတယ်။ ရွှေ့ဆိုင်း ထားတယ်လို့” ဟု မဇ္ဈိမကို ပြောသည်။

နိုင်ငံအဝှမ်း ပြုပြင်ပြောင်းလဲရေး အစီအမံနှင့် ပါတ်သက်ပြီး ဆွေနွေးရန်ဖြစ်ကြောင်း “သိပ်မကြာခင်ပေါ့။ နေ့ မသိသေး ဘူး။ ကျနော် သိသလောက် ၁၄ ပါတီပဲ။ ဒီမိုကရေစီမိတ်ဆွေ ၁ဝ ပါတီထဲမှာ မပါတဲ့ တိုင်းရင်းသား ပါတီတွေပဲပေါ့ဗျာ” ဟု KPP ခေါင်းဆောင် တဦးက ပြောသည်။

ထိုတွေ့ဆုံပွဲကို မည်သည့်အတွက်ကြောင့် ရက်ရွှေ့ဆိုင်းထားသည်ကို မသိရှိရသော်လည်း ၁၀ ရက် အတွင်း သမ္မတနှင့် တွေ့ဆုံနိုင်လိမ့်မည် ဖြစ်ကြောင်း အခြား တိုင်းရင်းသား ပါတီ တခုမှ စုံစမ်း သိရှိရသည်။

နိုင်ငံအတွင်းရှိ နိုင်ငံရေးပါတီများ၊ တိုင်းရင်းသား ပါတီများအား အစိုးရမှ တွေ့ဆုံဆွေးနွေးမည့် အစီ အစဉ်များ ရှိကြောင်း သိရသည်။

ဇူလိုင်လ ၂၂ ရက်နေ့က ကျင်းပခဲ့သည့် လွှတ်တော် အစည်းအဝေးတွင် နိုင်ငံရေး ပါတီများ၊ နိုင်ငံရေး အဖွဲ့ အစည်းများ ငြိမ်းချမ်းရေး တည်ဆောက်မှု လုပ်ငန်းစဉ်တွင် ပါဝင်နိုင်ရေး ဆွေးနွေးခဲ့ကြသည်။

Ref: မဇ္ဈိမ

Read More...

လယ်သမားတွေ ဆန္ဒပြမှာကို စိုးရိမ်ပြီး ပုဒ်မ ၁၄၄ ထုတ်ပြန်

2012-07-30

မန္တလေးတိုင်း သပိတ်ကျင်းမြို့နယ် ကျောက်လှဲဘိန်းရွာမှာ ဒေသခံ လယ်သမားတွေ ဆန္ဒပြမှာကို စိုးရိမ်ပြီး ဒေသခံ ခြေမြန် တပ်ရင်း ၁၄၈ က ပြီးခဲ့တဲ့ ၂၆ ရက်နေ့ကစပြီး အပြင်မထွက်ရ အမိန့်  ထုတ်ပြန် ထားတယ်လို့ သိရပါတယ်။

တောင်သူ လယ်သမားတွေရဲ့ အခက်အခဲကို လိုက်ပါကူညီ ဆောင်ရွက်ပေးနေတဲ့ သပိတ်ကျင်း မြို့နယ် အမျိုးသား ဒီမိုကရေစီ အဖွဲ့  တာဝန်ခံတွေက အဲဒီ ခမရ ၁၄၈ က မြေသိမ်းယူ ခံထားရတဲ့ လယ်ပိုင်ရှင် ဒေသခံ လယ်သမားတွေနဲ့ တွေဆုံဆွေးနွေးတဲ့ နေ့မှာပဲ အခုလို ထုတ်ပြန် လိုက်တာလို့  ကျောက်လှဲဘိန်းရွာက လယ်သမားကြီး ဦးဝင်းကြိုင်က ပြောပါတယ် ။

"ကျွန်တော်တို့ ကျောက်လှဲဘိန်းရွာမှာ ၁၄၄ ကို ၂၆ ရက်နေ့က ထုတ်ပါတယ်ခင်ဗျ။ သူတို့ ပိတ်ထားတဲ့ လယ်တွေ ကျွန်တော်တို့က လုပ်မလို့ လုပ်တဲ့အခါကျတော့ ၁၄၄ အမိန့်ထုတ်တယ်။ တောထဲကို နေ့လည်နေ့ခင်း မြစ်မချိုးရဘူး။ ဝါးမခုတ်ရဘူး။ အဲတာတွေ ပိတ်ပင်တားမြစ်တယ်ဗျ။ သူတို့က ပစ်မယ်၊ ခတ်မယ်ပေါ့။ အဲဒီလိုမျိုး။ ကျွန်တော်တို့ရဲ့ စားဝတ်နေရေး အခက်အခဲတွေ ဖြစ်နေတယ်ခင်ဗျ"

ကျောက်လှဲဘိန်းရွာ လယ်သမားတွေ ဘိုးဘွားလက်ထက် ကတည်းက လုပ်ကိုင် လာခဲ့တဲ့ လယ်ယာမြေ ဧက ၃၀၀ ကျော်ကို ခမရ ၁၄၈ က ပြီးခဲ့တဲ့ ၂၀၀၆ ခုနှစ်မှာ သိမ်းယူ ခဲ့တယ်လို့ ပြောပါတယ်။ အဲဒီနောက် ဒေသခံတောင်သူတွေကို တစ်ဧကကို စပါး ၁၄ တင်းနှုန်းနဲ့ သီးစားပြန်ချပေးခဲ့တဲ့ အတွက် လယ်သမားတွေက သီးစားခနဲ့  မိမိတို့ လယ်တွေမှာ ဆက်လက် လုပ်ကိုင်ခဲ့တယ်လို့  ဆိုပါတယ်။

ဒါပေမဲ့ ဒီနှစ် မိုးရာသီမှာတော့ တပ်က လုံးဝ လုပ်ကိုင်ခွင့် မပေးတော့ဘူးလို့ လယ်သမားတွေ အရေး လိုက်ပါ ကူညီပေးနေတဲ့ သပိတ်ကျင်း NLD အဖွဲ့ ဝင် ကိုအေးသိန်းက ပြောပါတယ်။

"၂၆ ရက်နေ့က ကျွန်တော်တို့ ကျောက်လှဲဘိန်းရွာကို သွားကြပါတယ်။ အဲတာ တရား ဥပဒေနဲ့ အညီ တင်မယ်။ သက်ဆိုင်ရာ အာဏာပိုင်တွေကို တိုင်မယ် ဆိုပြီးတော့မှ လက်မှတ်တွေ ထိုးကြတယ်။ ၅ နာရီခွဲ အချိန်မှာ ခမရ ၁၄၈ ကနေပြီးတော့မှ ၁၄၄ အမိန့် ထုတ်လိုက်ပါတယ်။ လယ်တွေ၊ ယာတွေ၊ မြေတွေ အသိမ်းခံလိုက်ရပြီးတော့မှ လယ်မဲ့ ယာမဲ့ ဖြစ်နေတဲ့ လယ်သမားကြီးတွေက အခု မြစ်ချိုးစားရတယ်ဗျာ။ ဝါးခုတ်စားရတယ်ဗျာ။ အဲဒီ ၁၄၄ အမိန့်ထဲမှာ နေ့လည်ခင်းကြီးတောင်မှ၊ မြင်သာထင်သာ ရှိတဲ့ အချိန်တောင်မှ ဝါးမခုတ်ရ၊ မြစ်မချိုးရ ဆိုတဲ့ အမိန့် ထုတ်လိုက်တဲ့ အခါမှာ တစ်ရွာလုံးက ထမင်းချက်ဖို့ တောင် ခက်သလို ဖြစ်နေပြီ အခုဟာက"

ဒီကိစ္စနဲ့ ပတ်သက်ပြီး သက်ဆိုင်ရာ အာဏာပိုင်အဆင့်ဆင့်နဲ့ အစိုးရ ၀န်ကြီးအဖွဲ့ နဲ့ ILO နိုင်ငံတကာ အလုပ်သမား အဖွဲ့ အစည်းထံကို တင်ပြမယ်လို့ ပြောပါတယ်။

Ref: RFA News

Read More...

မြန်မာနိုင်ငံမှာ ရိုဟင်ဂျာမရှိလို့ ဝန်ကြီး ဦးခင်ရီပြောကြား

2012-07-30

မြန်မာနိုင်ငံက တိုင်းရင်းသား (၁၃၅) မျိုးထဲမှာ ရိုဟင်ဂျာဟာ ဘယ်တုန်းကမှ မပါဝင်ခဲ့ဘူး သလို မြန်မာနိုင်ငံမှာ ရိုဟင်ဂျာ လူမျိုး ဆိုတာလည်း မရှိဘူးလို့ လူဝင်မှု ကြီးကြပ်ရေးနဲ့ ပြည်သူအင်အား ၀န်ကြီးဌာန ပြည်ထောင်စု ၀န်ကြီး ဦးခင်ရီက ဒီကနေ့ ပြောကြား လိုက်ပါတယ်။

ကိုလိုနီ အင်္ဂလိပ်အစိုးရ လက်ထက်က စလို့ ၁၉၇၃ ခုနှစ်နဲ့ ၁၉၈၃ ခုနှစ်တွေမှာ ကောက်ယူခဲ့တဲ့ သန်းခေါင်း စာရင်းတွေ အရ ရိုဟင်ဂျာ လူမျိုးဆိုတာ ဘယ်တုန်းကမှ မရှိခဲ့ဘူးလို့ ရန်ကုန်မြို့ နိုင်ငံခြားရေး ၀န်ကြီးဌာန အဆောက် အဦးဟောင်းမှာ ဒီကနေ့ ကျင်းပတဲ့ ရခိုင်ဒေသ အရေးနဲ့ ပတ်သက်တဲ့ သတင်းစာ ရှင်းလင်းပွဲမှာ ၀န်ကြီး ဦးခင်ရီက အခုလို ပြောကြားခဲ့တာပါ။

ရိုဟင်ဂျာဟာ မြန်မာတိုင်းရင်းသား လူမျိုးမဟုတ်ဘူး ဆိုတာ သမ္မတ ဦးသိန်းစိန်လည်း အခိုင်အမာ ပြောဆို ထားပြီး ဖြစ်တယ်လို့ ဦးခင်ရီက ပြောပါတယ်။ ပထမ အင်္ဂလိပ်-မြန်မာ စစ်ပွဲ ဖြစ်ပွားခဲ့တဲ့ ၁၈၂၄ ခုနှစ် နောက်ပိုင်း ရခိုင်ဒေသဟာ အင်္ဂလိပ် ကိုလိုနီဘ၀ လက်အောက်ကို ရောက်ရှိသွားပြီး လယ်ယာ လုပ်သား လိုအပ်ချက်ကို ဖြည့်တင်းနိုင်ဖို့ တဖက်နိုင်ငံကနေ ဘင်္ဂါလီ လူမျိုးတွေကို ခေါ်ယူ ခဲ့ရခြင်းသာ ဖြစ်တယ်လို့လည်း ဦးခင်ရီက ပြောပါတယ်။

ရခိုင်ပြည်နယ်မှာ ဖြစ်ပွားခဲ့တဲ့ ပဋိပက္ခတွေနဲ့ ပတ်သက်ပြီး မြန်မာနိုင်ငံ ဆိုင်ရာ ကုလသမဂ္ဂ လူ့အခွင့်အရေး ကိုယ်စားလှယ် မစ္စတာ ကင်တားနားနဲ့ ပြည်ထောင်စု ၀န်ကြီး ငါးဦးတို့ ဒီကနေ့ နေ့လည်ပိုင်းက ရန်ကုန်မြို့မှာ တွေ့ဆုံပြီး သတင်းစာ ရှင်းလင်းပွဲတ စ်ရပ် ကျင်းပခဲ့ပါတယ်။

သတင်းစာရှင်းလင်းပွဲမှာ နယ်စပ်ရေးရာ ၀န်ကြီးဌာန ပြည်ထောင်စု ၀န်ကြီး ဒုတိယ ဗိုလ်ချုပ်ကြီး သိန်းဌေးက- ရခိုင်ပြည်နယ်က ပဋိပက္ခနဲ့ ပတ်သက်ပြီး သေဆုံးသူ ၇၇ ဦး ရှိကြောင်း၊ ရခိုင်လူမျိုး ၃၁ ဦး၊ ဘင်္ဂါလီလူမျိုး ၄၆ ဦးဖြစ်ကြောင်း၊ လက်ရှိ ဒုက္ခသည်ဦးရေ စုစုပေါင်း ၆ သောင်းကျော် ရှိပြီး ရခိုင် တိုင်းရင်းသား လူမျိုး ၈ ထောင်ကျော်၊နဲ့ ဘင်္ဂါလီလူမျိုး ၅ သောင်းကျော် ရှိကြောင်း ထုတ်ပြန် ပြောကြား ခဲ့ပါတယ်။

အဆိုပါ အရေးအခင်းတွေမှာ ပါဝင်ပတ်သက်မှုအတွက် အစိုးရ မဟုတ်သော နိုင်ငံတကာ အဖွဲ့အစည်း (INGO) များမှ ၀န်ထမ်း ၁၀ ဦးကို ဖမ်းဆီး အရေးယူခဲ့ပြီး တစ်ဦးကို စစ်ဆေးပြီးနောက် ပြန်လည် လွှတ်ပေးလိုက်ကြောင်း၊ ပဋိပက္ခတွင် ပါဝင် ပတ်သက်၍ ဖမ်းဆီး ခံရသော INGO များမှာ UNHCR မှ ငါးဦး၊ AZG မှတစ်ဦးနှင့် WFP မှတစ်ဦးတို့ ဖြစ်ကြောင်း AZG မှဝန်ထမ်းကို ဖမ်းဆီး စစ်ဆေးပြီးနောက် ပြန်လွှတ်ပေးလိုက်ပြီ ဖြစ်ကြောင်းလည်း ပြောပါတယ်။

ရခိုင်ပြည်နယ်တွင် ပဋိပက္ခများတွင် INGO များမှ တချို့ပါဝင် ပတ်သက်မှုများ ရှိခြင်းကြောင့် ဖမ်းဆီးမှုများ ရှိသည်ဟု သတင်းများ ထွက်ပေါ် ခဲ့သော်လည်း အစိုးရက ယခုသတင်းစာ ရှင်းလင်းပွဲတွင်မှ တရားဝင် ထုတ်ဖော် ပြောကြားခဲ့ခြင်း ဖြစ်ပါတယ်။

ပါကစ္စတန် အခြေစိုက် တာလီဘန်အဖွဲ့က မြန်မာနိုင်ငံကို ခြိမ်းခြောက် ခဲ့မှုများ ပြည်ပ မီဒီယာများတွင် ဖော်ပြခဲ့ပြီး ပြည်သူများက စိုးရိမ် ပူပန်မှုများ ရှိနေတာကြောင့် နယ်စပ်နှင့် ပြည်တွင်း လုံခြုံရေးနှင့် ပတ်သက်၍ နယ်စပ်ရေးရာနှင့် မြန်မာ့ စက်မှု ဖွံ့ဖြိုးရေး ၀န်ကြီးဌာန ၀န်ကြီး ဒုတိယ ဗိုလ်ချုပ်ကြီး သိန်းဌေးကို မေးမြန်းရာ “လုံခြုံရေး အပြည့်အ၀ ရှိပါတယ်”ဟု ဖြေကြားကြောင်းလည်း သိရပါတယ်။

ဒီနေ့ပြုလုပ်တဲ့ သတင်းစာ ရှင်းလင်းပွဲကို ပြည်ထောင်စု ဝန်ကြီး ဦးခင်ရီနဲ့ အတူ နယ်စပ်ရေးရာ ဝန်ကြီး ဒုတိယ ဗိုလ်ချုပ်ကြီး သိန်းဌေး၊ လူမှုဝန်ထမ်း ကယ်ဆယ်ရေးနဲ့ ပြန်လည် နေရာချထားရေး ဝန်ကြီး ဦးအောင်ကြည်၊ နိုင်ငံခြားရေး ဝန်ကြီး ဦးဝဏ္ဏမောင်လွင်တို့ တက်ရောက်ခဲ့ပြီး မြန်မာနိုင်ငံ အခြေစိုက် ကုလသမဂ္ဂ အဖွဲ့အစည်းများ၊ နိုင်ငံတကာ သံရုံးများမှ တာဝန်ရှိသူများလည်း တက်ရောက် ခဲ့ကြပါတယ်။

Ref: RFA News

Read More...

ရခိုင်ပြည်နယ်အနှံ့ နိုင်ငံတော်အလံ လွှင့်ထူ၍ သမ္မတကို ဂုဏ်ပြု

ခင်ဦးသာ
July 30, 2012

ရခိုင်ပြည်နယ် တ၀န်း၌ သမ္မတ ဦးသိန်းစိန်ကို ထောက်ခံသည့် အထိမ်းအမှတ် အဖြစ် နိုင်ငံတော် အလံကို ဂုဏ်ပြု လွှင့်ထူ ကြိုဆို နေကြကြောင်း သိရသည်။

မြန်မာနိုင်ငံတော်အလံကို စစ်တွေ၊ မြောက်ဦး၊ မင်းပြား၊ မောင်တော၊ ဘူးသီးတောင်၊ ပေါက်တော စသည့် မြို့နယ်များတွင် ဇူလိုင် ၂၁ ရက်နေ့မှ စတင် လွှင့်ထူခဲ့ပြီး တောင်ကုတ်မြို့တွင် ပြီးခဲ့သည့် နှစ်ရက် ခန့်က စတင် လွှင့်ထူထားကြောင်း၊ ကျောက်ဖြူ၊ ရမ်းဗြဲ၊ မာန်အောင် စသည့် မြို့နယ်များ တွင်လည်း လွှင့်ထူရန် ပြင်ဆင်နေကြကြောင်း ရခိုင်ဒေသခံများက ပြောသည်။

သမ္မတ ဦးသိန်းစိန်သည် ကုလသမဂ္ဂ ဒုက္ခသည် များဆိုင်ရာ မဟာမင်းကြီး Mr. Antonio Guterres နှင့် ဇူလိုင်လ ၁၁ ရက်နေ့ က တွေ့ဆုံစဉ် ရိုဟင်ဂျာ အမည်ခံ ဘင်္ဂါလီ လူမျိုးများသည် မြန်မာ တိုင်းရင်းသားများ မဟုတ်ဘဲ ခိုးဝင် လာသူများ ဖြစ်ကြောင်း၊ ထို့ကြောင့် ၎င်းတို့အား လက်ခံရန် မဖြစ်နိုင်ကြောင်း၊ UNHCR သို့ အပ်နှံ၍ ဒုက္ခသည် စခန်းများ ဆောက်ပေးပြီး တတိယ နိုင်ငံ က လက်ခံလျင် ပို့ဆောင်ပေး မည်ဖြစ်ကြောင်း ပြောခဲ့သည်။

မြန်မာအစိုးရ အနေဖြင့် တိုင်းရင်းသား လူမျိုးများကို တာဝန်ယူမည်ဖြစ်ပြီး တိုင်းရင်းသား မဟုတ်ဘဲ ခိုးဝင် လာသည့် ဘင်္ဂါလီ ရိုဟင်ဂျာများကို လက်ခံရန် မည်သို့မျှ မဖြစ်နိုင်ကြောင်း သမ္မတက ပြောခဲ့သော်လည်း UNHCR အကြီး အကဲက ရန်ကုန်မြို့၌ သတင်းစာ ရှင်းလင်းပွဲ ပြုလုပ်စဉ် သမ္မတ၏ ပြောဆိုချက်ကို ပယ်ချခဲ့သည်။

နိုင်ငံတော်အလံကို မော်တော်ကား၊ ဆိုင်ကယ်၊ ဆိုက်ကား၊ စက်ဘီး စသည့် ယာဉ်များနှင့် နေအိမ်များ၌ ဇူလိုင် ၂၂ ရက်နေ့က စတင် လွှင့်ထူ ထားကြကြောင်း၊ အလံလွှင့်ထူခြင်း ကိစ္စကို မည်သည့် နိုင်ငံရေးပါတီ၊ အဖွဲ့အစည်း များကမှ စည်းရုံးခြင်း မဟုတ်ဘဲ ရပ်မိ၊ ရပ်ဘ များ၏ တိုက်တွန်းမှုနှင့် ပြည်သူတို့က မိမိတို့ အသိ စိတ်ဓာတ်ဖြင့် လွှင့်ထူခြင်း ဖြစ်ကြောင်း မြောက်ဦး မြို့ခံ ဦးထွန်းလှိုင်က ပြောသည်။

“သမ္မတကြီးက ကိုယ့်တိုင်းရင်းသားတွေ ဘက်က ရပ်တည်ပေးတဲ့ အတွက် ကျေးဇူးတင် ဂုဏ်ပြုတဲ့ အထိန်း အမှတ်ရယ်၊ ကျနော်တို့ ရခိုင်ပြည်သူတွေ ကလည်းပဲ သမ္မတကြီးနဲ့ တထပ်တည်း ရှိတယ် ဆိုတာရယ် ပြသတဲ့ အနေနဲ့ နိုင်ငံတော် အလံကို ၉ ရက် တိတိ လွှင့်ထူ ကြတာပါ” ဟု ၎င်းက ဆိုသည်။

စစ်တွေမြို့၌ နိုင်ငံတော်အလံကို ဇူလိုင်လ၂၁ ရက်နေ့တွင် စတင်လွှင့်ထူ ထားကြောင်း၊ ပြည်သူ တရပ်လုံးက ပူးပေါင်း ပါဝင်မှု ရှိသည် ကိုတွေ့ရကြောင်း၊ သမ္မတ၏ ပြောဆိုချက်ကို အစိုးရ အနေဖြင့်လည်း တရားဝင် ကြေညာချက် ထုတ်ပြန်ပေး သင့်သည်ဟု ရခိုင်ပြည်သူများနှင့် နိုင်ငံရေး အသိုင်းအ၀န်းက လိုလားနေကြကြောင်း သိရသည်။

“သမ္မတ ပြောသလိုပဲ နိုင်ငံတော်အနေနဲ့လည်း ကြေညာချက် တခု အနေနဲ့ ထုတ်ပြန်ရင် ပိုပြီးတော့ ကောင်းမယ် ဆိုတဲ့ အသံတွေကို နိုင်ငံရေး အဖွဲ့အစည်းတွေ၊ လူမှုရေး အဖွဲ့အစည်းတွေ ဆီက ကြားနေရပါတယ်” ဟု ၀ံလက် ကျေးလက် ဒေသ ဖွံ့ဖြိုးရေး ဖောင်ဒေးရှင်း အဖွဲ့ တာဝန်ခံ ဦးခိုင်ကောင်းစံက ပြောသည်။

ရသေ့တောင် မြို့နယ်တွင် အလံလွှင့်ထူမှု မရှိသေးကြောင်း၊ သို့သော် သမ္မတ၏ ပြောဆိုချက်ကို ထောက်ခံသည့် စာများ ရေးသားထားသည့် စာရွက်၊ စာတမ်းများကို ရပ်မိ၊ ရပ်ဘများ၊ လူငယ်များက ပြည်သူများထံ ဖြန့်ဝေ နေသည်ကို တွေ့ရကြောင်း ရခိုင်တိုင်း ရင်းသားများ တိုးတက်ရေးပါတီ (RNDP) ၏ ရသေ့တောင်မြို့နယ် ဥက္ကဋ္ဌ ဦးလှမြင့်က ရှင်းပြသည်။

ရခိုင်ဒေသ အကြမ်းဖက်မှု စတင်ခဲ့သည့် မောင်တောမြို့နှင့် ဘူးသီးတောင် မြို့တို့တွင်လည်း နိုင်ငံတော် အလံလွှင့်ထူခြင်းကို ဇူလိုင် ၂၁ ရက်နေ့က စတင်ခဲ့ကြောင်း၊ ထိုဒေသများ၌ ယခုအခါ တည်ငြိမ်စ ပြုနေပြီ ဖြစ်သည့်တိုင် စာသင်ကျောင်းများ ဖွင့်လှစ်နိုင်ခြင်း မရှိသေးကြောင်း ဘူးသီတောင် မြို့ခံ ဦးထွန်းအောင်သိန်းက ပြောသည်။

“ကျောင်းတွေ ပိတ်ထားတာ ၂ လ ပြည့်တော့မယ် ဆိုတော့ သြဂုတ်လ ထဲမှာ ပြန်ဖွင့်နိုင်အောင် အာဏာပိုင်တွေနဲ့ ညှိနှိုင်း နေပါတယ်၊ ဆရာ ဆရာမတွေနဲ့ ကျောင်းသားတွေ လုံခြုံရေး အပြည့်အ၀ ရရှိရေး အတွက်ပါ” ဟု ၎င်းက ဆိုသည်။

မောင်တောနှင့် ဘူးသီးတောင် မြို့တို့ရှိ စာသင်ကျောင်းများ အားလုံးကို ဇွန်လဆန်းမှ စတင်ပိတ်ထားခြင်း ဖြစ်ပြီး ဆရာ၊ ဆရာမ များသည် လုံခြုံရေး စိတ်မချရသည့် အတွက် ထိုဒေသ၌ တာဝန်ထမ်းဆောင်ရန် စိုးရိမ်နေဆဲ ဖြစ်ကြောင်း သိရသည်။

စစ်တွေမြို့ရှိ စာသင်ကျောင်း အများစုမှာ ပြန်လည် ဖွင့်လှစ် သင်ကြားနေပြီ ဖြစ်ကြောင်း၊ နည်းပညာ တက္ကသိုလ်၊ ကွန်ပျူတာ
တက္ကသိုလ်တို့လည်း ပြန်လည် ဖွင့်လှစ်နေပြီ ဖြစ်ကြောင်း၊ ကျောင်းကားများတွင် လုံခြုံရေးများ လိုက်ပါပေးနေကြောင်း၊ စစ်တွေတက္ကသိုလ်ကို သြဂုတ်လ ၃ ရက်နေ့တွင် ဖွင့်လှစ်နိုင် စီစဉ်နေကြောင်း ရခိုင်ဒေသ ပဋိပက္ခများနှင့် ပတ်သက်၍ ဖွဲ့ စည်း ထားသော ပြန်ကြားရေးအဖွဲ့ တာဝန်ခံ ဦးဝင်းမြိုင်က ပြောသည်။

ရခိုင်ပြည်နယ် ပဋိပက္ခများကြောင့် ဒုက္ခသည် စုစုပေါင်း ၆ သောင်းကျော် ရှိနေရာ အရေးပေါ် အကူအညီနှင့် ပြန်လည် ထူထောင်ရေး အကူအညီများ လိုအပ်လျှက်ရှိကြောင်း နယ်စပ်ရေးရာ ၀န်ကြီးဌာနနှင့် မြန်မာ့စက်မှု ဖွံ့ဖြိုးရေး ၀န်ကြီးဌာန ပြည်ထောင်စု ၀န်ကြီး ဒုတိယ ဗိုလ်ချုပ်ကြီးသိန်းဌေးက ယနေ့ နေ့လယ်တွင် ကျင်းပခဲ့သည့် သတင်းစာ ရှင်းလင်းပွဲတွင် ပြောဆိုခဲ့သည်။

အဆိုပါ သတင်းစာ ရှင်းလင်းပွဲကို ရန်ကုန် ပြည်လမ်းရှိ နိုင်ငံခြားရေး ၀န်ကြီးရုံအဆောက်အအုံတွင် ကျင်းပပြီး ကုလသမဂ္ဂ ဆိုင်ရာ လူ့အခွင့်အရေး ကိုယ်စားလှယ် မစ္စတာ ကင်တာနား၊ ရန်ကုန်အခြေစိုက် နိုင်ငံတကာ သံရုံးများ၊ကုလသမဂ္ဂ အဖွဲ့အစည်း များနှင့် အပြည်ပြည်ဆိုင်ရာအဖွဲ့အစည်းများမှ အကြီးအကဲများ တက်ရောက်ခဲ့ပြီး သတင်းစာရှင်းလင်းပွဲတွင် ဒုတိယဗိုလ်ချုပ်ကြီးသိန်းဌေးက ပဋိပက္ခများသည် ဘာသာရေး အစွန်းရောက်များ၏ လှုံ့ဆော်မှုများကြောင့် ဖြစ်ပြီး ရခိုင်နှင့် ဘင်္ဂါလီ လူ့အဖွဲ့အစည်း နှစ်ခုစလုံးသည် ငြိမ်းချမ်းစွာ နေလိုကြကြောင်း ပြောဆိုခဲ့သည်ဟု သိရသည်။

မောင်တောဒေသ ပဋိပက္ခများကြောင့် နေအိမ်များ မီးလောင်ကျွမ်းခဲ့ရသည့် ဒေသခံ တိုင်းရင်းသားများသည် မြို့ပေါ်ရှိ ဘုန်း ကြီးကျောင်းများနှင့် အလယ်သံကျော် ဘုန်းကြီးကျောင်း တို့တွင် ကူညီစောင့်ရှောက် ပေးထားကြောင်း၊ ၎င်းတို့အတွက် စားနပ် ရိက္ခာ လိုအပ်နေကြောင်း ဒုက္ခသည်အရေး ကူညီဆောင်ရွက်ပေးသူ ဦးခိုင်ကောင်းစံက ဆိုသည်။

အ၀တ်အထည်၊ စောင်၊ ခြင်ထောင်၊ ဆန် စသည့် ပစ္စည်းများ အတိုင်းအတာတခုအထိ လုံလောက်မှု ရှိနေပြီ ဖြစ်ကြောင်း၊ အသီးအရွက်၊ ငါးခြောက် စသည့် စားသောက်ကုန်များနှင့် အိပ်စရာ အခင်းများ လိုအပ်နေသေးကြောင်း ၎င်းက ဆက်ပြောသည်။

ရခိုင်ဒေသတွင်း ပဋိပက္ခများကြောင့် လူ ၈၀ ၀န်းကျင် သေဆုံးခဲ့ပြီး ရာဂဏန်း ထိခိုက်ဒဏ်ရာရကာ သောင်းချီ၍ အိုးမဲ့ အိမ်မဲ့ ဖြစ်ခဲ့ကြောင်း သိရသည်။ ထိုပဋိပက္ခများ၊ အကြမ်းဖက်မှုများကြောင့် စစ်တွေ၊ ဘူးသီးတောင်၊ မောင်တော၊ ကျောက်ဖြူ၊ ရမ်းဗြဲ၊ သံတွဲ စသည့် မြို့နယ်များတွင် ညမထွက်ရ အမိန့် ပုဒ်မ ၁၄၄ ကို သမ္မတ ဦးသိန်းစိန် က ဇွန်လ ၁၀ ရက်နေ့တွင် ကြေညာ ခဲ့သည်။ ရခိုင်ပြည်နယ်ကို ထိုနေ့မှ စ၍ အရေးပေါ် အခြေအနေလည်း ထပ်ဆင့် ကြေညာခဲ့သည်။

ရခိုင်ဒေသ ပဋိပက္ခ တလ ပြည့်မြောက်သည့် ဇူလိုင် ၈ ရက်နေ့တွင် စစ်တွေမြို့အပါအ၀င် ရခိုင်ဒေသ တ၀န်းလုံး၌ သေဆုံးခဲ့ ရသူ များအတွက် ၀မ်းနည်းခြင်းနှင့် ငြိမ်းချမ်းရေး အထိမ်းအမှတ် အဖြစ် သာသနာ့ အလံများလွှင့်တင်၍ ဂုဏ်ပြု ခဲ့ကြ သေးသည်။

Ref: ဧရာဝတီ

Read More...

ဘင်္ဂါလီ ၁၂၀၀ ကျော် မြန်မာဘက် ပြန်ပို့ဟု ဘင်္ဂလားဒေ့ရှ် ပြော

ငြိမ်းချမ်း
July 30, 2012

ရခိုင်ပြည်နယ်အတွင်း မကြာသေးခင်က ဖြစ်ပွားခဲ့သော အကြမ်းဖက် မှုများကြောင့် ဘင်္ဂလားဒေ့ရ်ှနိုင်ငံ ဘက်သို့ ၀င်ရောက်လာ၍ မြန်မာနိုင်ငံဘက် ပြန်ပို့ခဲ့ရာ ဘင်္ဂါလီ ဒုက္ခသည် ယနေ့အထိ ၁၂၀၀ ကျော်ရှိပြီး ဆက်လက် ၀င်ရောက် လာနေဆဲလည်း ဖြစ်ကြောင်း ဘင်္ဂလားဒေ့ရှ် အာဏာပိုင်များ၏ ပြောကြားချက်အရ သိရှိရသည်။

ယင်းဘင်္ဂါလီများကို ဘင်္ဂလားဒေ့ရှ် နယ်ခြားစောင့်တပ်၊ ကမ်းခြေစောင့် တပ်နှင့် ရဲတပ်ဖွဲ့ ဝင်များက ပြန်လည် ပို့ဆောင်ခြင်းဖြစ်ရာ ပြီး ခဲ့သည့် ဇူလိုင်လ ၂၆ ရက်ကလည်း ဘင်္ဂါလီ ၁၁ ဦးကို ပြန်ပို့ ခဲ့သေးသည်ဟု တာခ်နာ အခြေစိုက် အမှတ် ၄၂ နယ်ခြားစောင့် တပ် (BGB) က ဗိုလ်မှူး ဇျာဟိဒ် ဟာဆန်းက ပြောကြားကြောင်း ကောက်စ်ဘဇားမြို့ သတင်းစာများက ဖော်ပြသည်။

“စုစုပေါင်း ၁၁ ဦးကို BGB ကင်းလှည့် တပ်ဖွဲ့က နေ့လယ် ၂ နာရီမှာ ဖမ်းဆီးခဲ့ပြီး ၃ နာရီမှာတော့ လူသားချင်း စာနာ ထောက်ထား မှုနဲ့ အစား အသောက်တွေ ပေးပြီး နေရပ်ပြန်လွှတ် လိုက်တယ်”ဟု ဗိုလ်မှူး ဇျာဟိဒ် ဟာဆန်းက ပြောဆိုသည်။

အမည်မဖော်လိုသော တာခ်နာ အခြေစိုက် ဘင်္ဂလားဒေ့ရှ် ထောက်လှမ်းရေး တဦးကလည်း ဖမ်းမိသူများကို ပြန်ပို့ရာတွင် မြန်မာ နယ်စပ်ဒေသ လုံခြုံရေးနှင့် ကွပ်ကဲရေး(နစက) အဖွဲ့ကို အကြောင်းကြား၍ တရားဝင်ပြန်ပို့ခြင်း မဟုတ်ဘဲ လာလမ်းအတိုင်း လှေပေါ်တင်ပြီး ပြန်လွှတ် လိုက်ခြင်းဖြစ်ကြောင်း၊ ထပ်မံ လာရောက်နေသူများလည်း ရှိကြောင်း ပြောသည်။

“သူတို့လာတဲ့ လှေပေါ်ကို ပြန်တင်ပြီး ပင်လယ်ကို ပြန်လွှတ်လိုက်တယ်။ လက်ရှိ အခြေအနေမှာတော့ မြန်မာဘက်က လူတွေ အရင်ထက် ပိုဝင်လာနေတယ်။ မိန်းမတွေတော့ မဟုတ်ဘူး။ ယောက်ျားတွေ အများကြီး လာနေတယ်”ဟုလည်း ၎င်းက ဆိုသည်။

ပြန်လွှတ်လိုက်သူ တချို့သည် သက်ဆိုင်ရာ ဒေသများသို့ မပြန်ဘဲ ဘင်္ဂလားဒေ့ရှ် နိုင်ငံတွင်းသို့ တနည်းနည်းဖြင့် ပြန်လည် ၀င်ရောက်ကြကြောင်း၊ စစ်တကောင်း၊ ဒါကာ အစရှိသည့် နေရာများတွင် အလုပ် လုပ်ကိုင်နေကြသူများပင် ရှိကြောင်း တာခ်နာ အခြေစိုက် ဘင်္ဂလားဒေ့ရှ် ထောက်လှမ်းရေး က ဆက်ပြောသည်။

ဘင်္ဂလားဒေ့ရ်ှနိုင်ငံတွင်း ရောက်နေသည့် ဘင်္ဂါလီများကို BGB များက လမ်းမပေါ်၊ ကားပေါ်များ အထိ လိုက်လံ ဖမ်းဆီးမှုများ ရှိသည် ဟု တာခ်နာ မြို့ခံ တဦးကလည်း ပြောသည်။

ထိုသို့ မြန်မာနိုင်ငံဘက်မှ ဘင်္ဂလားဒေ့ရှ် နိုင်ငံဘက်သို့ ၀င်ရောက်ရန် ကြိုးစားနေ သူများတွင် အကြမ်းဖက် အဖွဲ့များနှင့် ဆက်နွယ် သူများလည်း ပါဝင်နိုင်သည့် အတွက် စိုးရိမ်မှု ရှိကြောင်း ပြီးခဲ့သည့် စနေနေ့က ဘင်္ဂလားဒေ့ရှ် ၀န်ကြီးချုပ် ရှိတ်ဟာဆီနာက ပြောဆို ထားသည်။

ရှိတ်ဟာဆီနာသည် ဗြိတိန်နိုင်ငံ လန်ဒန်မြို့တွင် ကျင်းပနေသော အိုလံပစ် အားကစား ပွဲတော် ဖွင့်ပွဲ အခမ်းအနား တက်ရောက်စဉ် Sunday Express သတင်းစာ၏ မေးမြန်းမှုကို ဖြေကြားရာ၌ ထိုသို့ ထည့်သွင်း ပြောဆိုခဲ့ခြင်းဖြစ်သည်။

ရခိုင်ပြည်နယ်တွင်း ပဋိပက္ခများကြောင့် ဘင်္ဂလားဒေ့ရှ် နိုင်ငံဘက် ထွက်ပြေး လာသူများကို ပြန်မပို့ရန် ကုလသမဂ္ဂနှင့် အမေရိကန် က တိုက်တွန်း ထားသည်။

ဘင်္ဂလားဒေ့ရ်ှနှင့် နယ်စပ်ခြင်း ထိစပ်လျက်ရှိသော ရခိုင်ပြည်နယ်အတွင်း လွန်ခဲ့သည့် ဇွန်လ ၈ ရက်နေ့မှစ၍ ပဋိပက္ခ အကြမ်းဖက် မှုများ ဖြစ်ပွားခဲ့ရာ အနည်းဆုံး လူ ၇၈ ဦး သေဆုံးခဲ့ပြီး အိုးအိန်စွန့်ခွာ တိမ်းရှောင်ရသူပေါင်း သောင်းနှင့်ချီ ရှိကြောင်း တရားဝင် စာရင်း များအရ သိရသည်။

Ref: ဧရာဝတီ

Read More...

တာလီဘန် ခြိမ်းခြောက်မှု မြန်မာ မွတ်စလင်များ ဆန့်ကျင်

ကျော်ခ
July 30, 2012

မြန်မာနိုင်ငံကို ပါကစ္စတန် နိုင်ငံအခြေစိုက် တာလီဘန် အကြမ်းဖက်အဖွဲ့ Tehreek-e – Taliban (TTP) က ခြိမ်းခြောက်မှု အပေါ် နိုင်ငံအတွင်း နေထိုင်သူ အစ္စလမ် ဘာသာရေး ခေါင်းဆောင်များနှင့် နိုင်ငံရေး ပါတီ ခေါင်းဆောင်များက ဆန့်ကျင်ကြောင်း ပြောဆိုသည်။

TTP အဖွဲ့က ပါကစ္စတန်နိုင်ငံ အနေဖြင့် အစ္စလမ်မာဘတ် မြို့ရှိ မြန်မာ သံရုံးကို ပိတ်ပစ်၍ မြန်မာနိုင်ငံနှင့် ဆက်ဆံရေး ဖြတ်တောက်ရမည် ဖြစ်ကြောင်း၊ ရခိုင်ပြည်နယ် အတွင်း ဖြစ်ပွားခဲ့မှုများနှင့် ပတ်သက်၍လည်း “သွေးနှင့် လက်စားချေမည်” ဖြစ်ကြောင်း ဇူလိုင် ၂၆ ရက်နေ့က ထုတ်ပြန်ခဲ့ခြင်းကို မြန်မာ ပြည်တွင်းနေ အစ္စလမ် ဘာသာဝင်များက တုံ့ပြန် ပြောဆိုလိုက်ခြင်း ဖြစ်သည်။

“အဲဒီ တာလီဘန်ဆိုတဲ့ အကြမ်းဖက် အုပ်စုတွေကို ကျနော်တို့ လက်မခံဘူး။ သူတို့ကြောင့် သူတို့ရဲ့ လုပ်ဆောင်မှု အပေါ် ဒီမှာ ဖြစ်မယ့် ကိစ္စတွေကိုလည်း အဖြစ်မခံနိုင်ဘူး။ ဒီမှာရှိတဲ့ မွတ်စလင်တွေ ကလည်း သူတို့နဲ့ ဘာမှ မပတ်သက်ဘူး” ဟု မြန်မာ နိုင်ငံလုံး ဆိုင်ရာ အစ္စလမ် ဘာသာရေး အဖွဲ့ကြီး၏ အတွင်းရေးမှူးချုပ် ဦးကျော်စိုးက ပြောသည်။

မြန်မာနိုင်ငံလုံးဆိုင်ရာ အစ္စလမ် ဘာသာရေး အဖွဲ့ကြီးသည် မြန်မာနိုင်ငံအတွင်းရှိ အစ္စလမ် ဘာသာရေး အဖွဲ့ ၅ ဖွဲ့ဖြင့် စုစည်းထားသော အဖွဲ့ဖြစ်သည်။

ပြည်တွင်းရှိ မွတ်စလင် အဖွဲ့များအနေဖြင့် အကြမ်းဖက်မှုကို ရှုတ်ချသကဲ့သို့ ထိုသို့ အကြမ်းဖက်လိုသော အဖွဲ့အစည်း များနှင့်လည်း ပတ်သက်မှု မရှိကြောင်း၊ အလားတူ ရခိုင်ပြည်နယ်အတွင်း ဖြစ်ပျက်ခဲ့သည့် ပဋိပက္ခများနှင့် ပတ်သက်၍ စိစစ်မှု မရှိသော အချက်အလက်များနှင့် ပြည်ပနိုင်ငံများတွင် ဆန္ဒပြ တောင်းဆိုနေခြင်းကိုလည်း မလိုလားကြောင်း ဦးကျော်စိုးက ပြောသည်။

“ဆန္ဒပြတယ်၊ ဆိုင်းဘုတ်ထောင် တောင်းဆိုတယ်ဆိုတာက သူတို့ တောင်းဆိုချက်တွေ မှန်ချင်မှန်မယ်၊ မှားချင်မှားမယ်။ ဒါပေမယ့် အဲဒါတွေကို ကျနော်တို့ မလိုလားဘူး၊ ပြည်တွင်းကိစ္စကို ပြည်တွင်းမှာပဲ ကျနော်တို့ ရှင်းမှာပါ။ လောလောဆယ် တာဝန် အရှိဆုံးက အစိုးရပါ၊ အစိုးရလည်း လုပ်နေပါတယ်” ဟု သူကဆက်ပြောသည်။

အစ္စလမ် ဘာသာဝင် များနှင့် စုဖွဲ့ထားသော အမျိုးသား ဖွံ့ဖြိုးတိုးတက်ရေး ဒီမိုကရက်တစ် ပါတီ (NDPD) ဥက္ကဋ္ဌ ဦးလှသိန်း ကလည်း “သူတို့ဘာသာ သူတို့ ခြိမ်းခြောက်တာ ကျနော်တို့ကို ထိခိုက်မှုမရှိပါဘူး၊ ကျနော်တို့က စိတ်မဝင်စားဘူး” ဟု ပြောသည်။

ပြည်သူအများ ဒုက္ခသောက ရောက်စေမည့် မည်သည့် ခြိမ်းခြောက်မှုမျိုးကိုမှ ၎င်းတို့အနေဖြင့် လက်ခံနိုင်မည် မဟုတ်ကြောင်း မြန်မာ မွတ်စလင် အိုလမာ အဖွဲ့ချုပ်ကလည်း ဆိုသည်။

“ကျနော်တို့ ကတော့ ကိုယ့်ပြည်သူတွေ သောကရောက်မှာကို မလိုလားဘူး” ဟု မြန်မာ မွတ်စလင် အိုလမာ အဖွဲ့ချုပ်မှ တာဝန်ရှိသူ တဦးဖြစ်သည့် ဦးရဲနောင်သိန်း က ဧရာဝတီသို့ ပြောသည်။

ရခိုင်ပြည်နယ် တောင်ကုတ်မြို့တွင် အကြမ်းဖက်သူများ၏ သတ်ဖြတ်ခြင်း ခံခဲ့ရသော မွတ်စလင် ၁၀ ဦး၏ ဖြစ်ရပ်နှင့် ပတ်သက်၍ ပြည်ထောင်စုအဆင့် ပြည်ထဲရေး ဒု ၀န်ကြီး ဗိုလ်မှူးချုပ် ကျော်ဇံမြင့် အပါအဝင် အာဏာပိုင်အဖွဲ့များ စုပေါင်း၍ ဇွန်လ ၆ ရက်နေ့က စုံစမ်းစစ်ဆေးရေး ကော်မရှင်ဖွဲ့ခဲ့ခြင်းအပေါ် အစ္စလမ် ဘာသာရေး အဖွဲ့များက ကြိုဆိုခဲ့ကြသည်။

သို့သော်လည်း ထိုသို့ ဖွဲ့စည်းပြီး ဒုတိယမြောက်နေ့တွင် မောင်တောမြို့၌ အစွန်းရောက် မွတ်စလင်များ၏ သွေးဆူ အကြမ်းဖက်ခဲ့မှုကြောင့် မလိုလားအပ်သော ပြဿနာများ ထပ်မံဖြစ်ပွားခဲ့ကြောင်း၊ ထိုပဋိပက္ခ များနှင့် ပတ်သက်၍လည်း အစိုးရက အဓိက ကိုင်တွယ် ဆောင်ရွက်နေကြောင်း ဦးရဲနောင်သိမ်းက ဆက်ပြောသည်။

“တဘက်မှာ အစိုးရက ဖော်ထုတ်ဖို့ စီစဉ်နေတဲ့ အချိန်မှာ ကိုယ်က အစွန်းမရောက်တာ ကောင်းတာပေါ့။ အစွန်းမရောက်ဘဲ သွားပြီး မလုပ်ခဲ့ရင် အဲဒီအဖြေက တော်တော် လှလှပပ ထွက်လာမှာပါ။ အခုတော့ သူတို့က အစွန်းရောက်ပြီး ကလဲ့စားချေတဲ့ ပုံစံ သွားလုပ်တော့ အသတ်ခံရတဲ့ ကိစ္စ ဇွန်လပိုင်းကုန်မှာ ထွက်မယ်ဆိုတဲ့ အဖြေက အခုထိ မသိရှိရဘူး ဖြစ်သွားတယ်” ဟု ဦးရဲနောင်သိမ်းက ဆိုသည်။

ရခိုင်ပြည်နယ် ပဋိပက္ခများကြောင့် ဒုက္ခသည် စုစုပေါင်း ၆ သောင်းကျော် ရှိနေရာ အရေးပေါ် အကူအညီနှင့် ပြန်လည် ထူထောင်ရေး အကူအညီများ လိုအပ်လျက်ရှိကြောင်း နယ်စပ်ရေးရာ ၀န်ကြီးဌာနနှင့် မြန်မာ့စက်မှု ဖွံ့ဖြိုးရေး ၀န်ကြီးဌာန ပြည်ထောင်စု ၀န်ကြီး ဒုတိယ ဗိုလ်ချုပ်ကြီး သိန်းဌေးက ယနေ့ နေ့လယ်တွင် ကျင်းပခဲ့သည့် သတင်းစာ ရှင်းလင်းပွဲ၌ ပြောဆိုခဲ့သည်။

အဆိုပါ သတင်းစာ ရှင်းလင်းပွဲကို ရန်ကုန် ပြည်လမ်းရှိ နိုင်ငံခြားရေး ၀န်ကြီးရုံးအဆောက်အအုံတွင် ကျင်းပပြီး ကုလသမဂ္ဂ ဆိုင်ရာ လူ့အခွင့်အရေး ကိုယ်စားလှယ် မစ္စတာ ကင်တာနာ၊ ရန်ကုန်အခြေစိုက် နိုင်ငံတကာ သံရုံးများ၊ကုလသမဂ္ဂ အဖွဲ့အစည်း များနှင့် အပြည်ပြည်ဆိုင်ရာအဖွဲ့အစည်းများမှ အကြီးအကဲများ တက်ရောက်ခဲ့သည်။

သတင်းစာ ရှင်းလင်းပွဲတွင် ဒုတိယဗိုလ်ချုပ်ကြီး သိန်းဌေးက ပဋိပက္ခများသည် ဘာသာရေး အစွန်းရောက်များ၏ လှုံ့ဆော်မှု များကြောင့် ဖြစ်ပြီး ရခိုင်နှင့် ဘင်္ဂါလီ လူ့အဖွဲ့အစည်း နှစ်ခုစလုံးသည် ငြိမ်းချမ်းစွာ နေလိုကြကြောင်း ပြောဆိုခဲ့သည်ဟု သိရသည်။

Ref: ဧရာဝတီ

Read More...

Monday, July 30, 2012

အရောင်တွေနဲ့ လွှတ်တော်

ကျော်စွာမိုး
July 28, 2012

ဒီလမ်းမကြီးကတော့ မြန်မာပြည်မှာ အကျယ်ဆုံးနဲ့ အပြေပြစ်ဆုံး လမ်းမကြီးလို့ ယူဆ ရပါတယ်။ ကားလည်းမရှုပ်၊ ရှောင်စရာ ချိုင့်လည်း တခုတောင် မရှိသေးတဲ့ ဒီလမ်းမကြီးပေါ်မှာ လက်တဆုပ်စာ SUV နဲ့ ဆီဒင်ကားတွေပဲသွားလာကြပြီး မနက်တိုင်း ဂိတ်ဝကြီး တခုဆီ ရောက်လာနေကြ တာပါ။ ခပ်လှမ်းလှမ်းက ကြည့်လိုက်မယ် ဆိုရင် အဲ့ဒီကားတွေဟာ ဝှိုက်ဘုတ် အကြီးကြီး တချပ်ပေါ်မှာ ပုရွက်ဆိတ်တွေ ဟိုဖက်ကနေဒီဖက် အသော့နှင်နေ သလိုပါပဲ။ ဒါကတော့ မြန်မာ့ လွှတ်တော်ကြီးရဲ့ အဝင်လမ်းပေါ့။

လွှတ်တော်အမတ်တွေရဲ့ ကားတွေကိုပဲ ဒီလမ်းပေါ်ကနေ လွှတ်တော် အဆောက်အအုံတွေ ရှိရာဆီ မောင်းခွင့်ပြုတာဖြစ်ပါတယ်။ လမ်းက ကျယ်လွန်း အားကြီးတာမို့ “ဒီနေရာမှာ လေယာဉ်တောင် ဆင်းလို့ရတယ်” လို့ သတင်းထောက် တယောက်က မှတ်ချက် ပေးပါတယ်။

ဂိတ်ဝမှာ ကားတွေအားလုံး ကားအောက်ကြည့် ရှာဖွေရေး မှန်တွေနဲ့ စေ့စေ့စပ်စပ် ကြည့်ရှု စစ်ဆေး ခံရပါတယ်။ နေရောင်ကာ ကားမှန်တွေကို စူးစိုက်ကြည့်လိုက်မယ် ဆိုရင် ခေါင်းပေါင်းပေါင်းထားတဲ့ လွှတ်တော် အမတ်တွေကို လေအေးပေးစက် တပ်ထားတဲ့ ကားတွေထဲမှာ အစောင့်အရှောက်နဲ့ ငြိမ့်ငြိမ့်ညောင်းညောင်း ရှိနေတာ တွေ့ရမှာပါ။ သေချာတာကတော့ လွှတ်တော်အမတ် အားလုံးမှာ ကိုယ်ပိုင်ကား မရှိကြပါဘူး၊ တချို့ဆိုရင် အများသုံး ဗင်ကားတွေနဲ့ ရောက်လာကြတာ ဖြစ်ပါတယ်။

လွှတ်တော်ဝင်းထဲမှာတော့ စုလစ်မွမ်းချွန်တွေ ထိုးထိုးထောင်ထောင် ထွက်နေပြီး ကြီးကျယ် ခန်းနား လှတဲ့ လွှတ်တော် အဆောက် အအုံကြီးတွေကို တွေ့ရပါတယ်။ နေပြည်တော်ဆိုတဲ့ မြို့တော် အမည်နဲ့ သဟဇာတဖြစ်အောင် ဒီ အဆောက်အအုံ ကြီးတွေကို တော်ဝင် ဗိသုကာပုံစံနဲ့ အသေအချာ တည်ဆောက် ထားတာပါ။

ဒါပေမယ့် ဒီ “တော်ဝင်” မြို့ကြီးရဲ့ ဝိညာဉ်လို့ပဲ ပြောရမလား ဒါမှမဟုတ် အနှစ်သာရ လို့ပဲ ဆိုရမလား အဲ့ဒီ အရာကို ရှာဖို့တော့ ခက်လှပါတယ်။ ဘာလဲ ဒီမြို့ရဲ့ သမိုင်းကြောင်း၊ ဘယ်မှာလည်း ဒီမြို့ ရဲ့ ယဉ်ကျေးမှု။

ဒါတွေတခုမှ မတွေ့ရပါဘူး၊ တခြား မြို့ကြီးတွေနဲ့ ဝေးရာဖြစ်ပြီး မြို့တော်ဟောင်း ရန်ကုန်နဲ့ ကီလိုမီတာ ၃၂၀ အဝေးက လူမရှိသူမရှိ နေရာမှာ ဒီမြို့ကို စစ်အစိုးရက၂၀၀၅ ခုနှစ်မှာမှ ရုတ်တရက် တည်ခဲ့တာကိုး။ လှိုက်လှဲပျူဌာမှု (Homely) ဆိုတာ နေပြည်တော်နဲ့ သက်ဆိုင်တဲ့ စကားလုံးမဟုတ်ပါဘူး။ လွှတ်တော်အဆောက်အအုံကလည်း အလားတူပါပဲ၊ အလွန်ကြီးတယ်၊ သစ်လွင်တယ်၊ ဒါ ပေမယ့် မြို့ရဲ့ဝိညာဉ်ကတော့ ကင်းမဲ့နေပါတယ်။

“ဒါက Royal Prison (တော်ဝင်ထောင်) လေ” လို့ အမျိုးသား ဒီမိုကရေစီ အဖွဲ့ချုပ် (NLD) ထိပ်တန်း အဖွဲဝင် တဦးလည်းဖြစ်၊ NLD ရဲ့ လွှတ်တော် အမတ်လည်းဖြစ်တဲ့ ဦးဝင်းထိန်က ပြည်သူ့ လွှတ်တော် အဆောက်အအုံ လှေခါးထစ် ထိပ်မှာ ပြက်လုံး ထုတ်ပါတယ်။ သူရယ်၊ ကျနော်ရယ်၊ ပြီးတော့ တခြား NLD လွှတ်တော် အမတ်တွေနဲ့ သတင်းထောက်ပေါင်းစုံဟာ ပထမဆုံး အကြိမ် ဒေါ်အောင်ဆန်းစုကြည် ဒီလွှတ်တော် အဆောက်အအုံထဲ ဝင်အလာကို စောင့်နေကြတာဖြစ်ပါတယ်။

လွှတ်တော်အမတ်တွေ နေပြည်တော်မှာ ဘယ်နေရာမှ သွားစရာမရှိဘူးလို့လည်း နိုင်ငံရေး အကျဉ်းသားဖြစ်ခဲ့ ဖူးတဲ့ ဦးဝင်းထိန်က ပြောပါသေးတယ်။ သူတို့ အားလုံးက အခု ကျင်းပနေတဲ့ လွှတ်တော် အစည်းအဝေးတွေ ပြီးတဲ့အထိ နေပြည်တော် မှာပဲ လနဲ့ ချီပြီး နေကြရမှာလေ။

အပြစ်အနာအဆာတွေ ဘယ်လိုပဲရှိရှိ ဒီလွှတ်တော်ကတော့ သမိုင်းဝင် လွှတ်တော်တရပ်ဖြစ်လာမှာလို့ ပြောလို့ရပါတယ်။ ရာစုနှစ် ထက်ဝက်အတွင်း ပထမဆုံးပေါ်ပေါက်ခဲ့တဲ့ ဒီလွှတ်တော်ဟာ နိုင်ငံရေးအရ ပါဝင်မှုအရှိဆုံးဖြစ်ပြီး အတော်လေး ဒီမိုကရေစီနည်း ကျတယ်လို့ ပြောနိုင်ပါတယ်။

ဗိုလ်ချုပ်ကြီးနေဝင်း အုပ်ချုပ်တဲ့ ၁၉၆၂-၁၉၈၈ ကာလတွေတုန်းက မြန်မာနိုင်ငံမှာ အတု အယောင် လွှတ်တော် တရပ် ရှိခဲ့ပါတယ်။ ဒါပေမယ့် ၁၉၈၈-၂၀၁၁ ကာလ မှာတော့ စစ်အာဏာရှင်တွေက အဲ့ဒီလို လွှတ်တော် ပုံစံမျိုးတောင် မရှိဘဲ နိုင်ငံကို အုပ်ချုပ် ခဲ့ကြတာပါ။

ဇူလိုင်လ ၉ ရက်နေ့ဟာ ဒီမိုကရေစီခေါင်းဆောင် ဒေါ်အောင်ဆန်းစုကြည် ပထမဆုံး လွှတ်တော် အစည်းအဝေး တက်တဲ့နေ့ဖြစ်တာ မို့ သမိုင်းဝင်နေ့ရက်ဖြစ်ပါတယ်။ သူ အစည်းအဝေး တက်တာဟာ စစ်တပ်ကြီးစိုးတဲ့ အုပ်ချုပ်မှု အပေါ် တရားဝင်မှု တစုံတရာ ပေးအပ် လိုက်တာလည်း ဖြစ်တာမို့ တိုင်းပြည်ရဲ့ နိုင်ငံရေး အနေအထားကို သိသိသာသာ ပြောင်းလဲစေခဲ့တာဖြစ်ပါတယ်။

စစ်တပ်ကိုယ်စားလှယ်တွေ ရှိနေတာဟာ ဒီလွှတ်တော်ရဲ့ ဒီမိုကရေစီအနှစ်သာရကို သိသိသာ ယုတ်လျော့စေတာ အမှန်ပါပဲ။ ဒါပေမယ့် အရောင်အသွေးစုံတဲ့ လွှတ်တော်လို့တော့ ပြောရမှာပါ။

လွှတ်တော်ထဲမှာ NLD အမတ်တွေနဲ့ သူတို့ရဲ့မဟာမိတ်တွေက ပင်နီတိုက်ပုံဝတ်ပြီး USDP အမတ်တွေကတော့ အဖြူရောင် တိုက်ပုံဝတ်ကြပါတယ်။ ကျားဖြူပါတီလို့ လူသိများတဲ့ ရှမ်းအမျိုးသားများ ဒီမိုကရေစီပါတီ (SNDP) လွှတ်တော်အမတ်တွေကလည်း ရှမ်းရိုးရာ ပင်နီဝတ်စုံ ဝတ်ဆင်ကြပြီး အခြား တိုင်းရင်းသားအမတ်တွေကတော့ သူတို့ရိုးရာဝတ်စုံတွေ ဝတ်ကြပါတယ်။ အရောင်တွေကတော့ မျိုးစုံပေါ့။

ဒီဝတ်စုံတွေထဲမှာ လွှတ်တော်နဲ့ မအပ်စပ်ဆုံး ဒါမှမဟုတ်လည်း ရုပ်အဆိုးဆုံးလို့ ပြောရမယ့်အရောင်ကတော့ စစ်စိမ်းရောင်ပါပဲ။ လွှတ်တော်ခန်းမထဲမှာ အမတ်တွေထိုင်ဖို့ (ထိုင်ခုံတွေကိုတောင် ၄ ပုံပုံထားသလားမသိ) ဒေါင်လိုက် ခုံတန်း ၄ တန်းရှိပြီး ညာဖက် အစွန်ဆုံးကော်လံကို စစ်စိမ်းရောင်တွေ ဖုံးအုပ်ထားတာပါ။ ဒီအရောင်တွေ လွှတ်တော်ထဲမှာ ပျောက်သွားဖို့ လုပ်နိုင်တာကတော့ ပြည်တွင်းပြည်ပက ကျယ်ကျယ်ပြန့်ပြန့် ရှုတ်ချခဲ့ကြတဲ့ ၂၀၀၈ ဖွဲ့စည်းပုံ အခြေခံဥပဒေကို ပြင်ဆင်ဖို့ပါပဲ။

စစ်တပ်ကိုယ်စားလှယ်တွေထိုင်ကြတဲ့ ခုံတန်း ၈ တန်းက ၇ တန်းမှာ ဗိုလ်မှူးချုပ်၊ ဗိုလ်မှူးကြီးကနေ ဗိုလ်ကြီးအထိ ရာထူးအလိုက် အရှေ့အနောက် ထိုင်ကြပြီး နောက်ဆုံးတန်းမှာတော့ လေတပ်နဲ့ ရေတပ်က အရာရှိတွေ ထိုင်ကြတာပါ။

လွှတ်တော်အမတ်တွေဟာ လွှတ်တော်ထဲမှာ စစ်တပ်ကိုယ်စားလှယ်တွေ ရှိနေတဲ့ကိစ္စကို လောလောဆယ်ကိုင်တွယ်ဖို့ ခက်တယ်လို့ ယူဆနေပုံ ပေါ်ပါတယ်။ ဒေါ်အောင်ဆန်းစုကြည်ကတော့ သူလွှတ်တော်တက်တဲ့ ရည်ရွယ်ချက်တခုက ဖွဲ့စည်းပုံအခြေခံဥပဒေထဲက (လွှတ်တော်နေရာမှာ စစ်တပ်အတွက် ၂၅ ရာခိုင်နှုန်း အာမခံချက်လိုမျိုး) ဒီမိုကရေစီနည်းမကျတဲ့ ပြဌာန်းချက်တွေကို ပြင်ဖို့ဖြစ်တယ်လို့ လွှတ်တော်မတက်ခင်မှာ ထပ်တလဲလဲ ပြောခဲ့ပါတယ်။

ဒါပေမယ့် အခုအချိန်မှာ အဲ့ဒီကိစ္စကို ကိုင်တွယ်ဖို့ အချိန်မရောက်သေးဘူးလို့ သူ ယူဆနေနိုင်ပါတယ်။ “ကျမတို့ ဒီကိုလာတာဟာ ပူးပေါင်းဆောင်ရွက်ဖို့ဖြစ်တယ်၊ ဆန့်ကျင်ဖို့မဟုတ်ဘူး” လို့ လွှတ်တော်အစည်းအဝေး ပထမနေ့တက်ပြီးတဲ့အခါ သူက သူ့ရဲ့ NLD အမတ်တွေကို ပြောတယ်လို့ ကြားရပါတယ်။

USDP အထွေထွေအတွင်းရေးမှူး ဦးဌေးဦးကတော့ “လွှတ်တော်ထဲမှာ အခြားပါတီက ကိုယ်စားလှယ်တွေကို အတိုက်အခံလို့ ကျနော်မမြင်ပါဘူး။ အတိုက်အခံဆိုတာကို အဓိပ္ပါယ်ဖွင့်ရတာဟာလည်း ခက်လှပါတယ်။ ကျနော်တို့အားလုံး ဒီမှာရှိနေတာဟာ ပြည်သူလူထုနဲ့ တိုင်းပြည်အတွက် အလုပ်အတူလုပ်ကြဖို့လို့ ကျနော်ထင်ပါတယ်” လို့ လွှတ်တော်ခန်းမ အဝင်မှာ ကျနော့်ကို ပြောပါတယ်။

သတင်းဌာနတွေနဲ့ တွေတဲ့အခါမှာ လွှတ်တော်အမတ်တွေ (အထူးသဖြင့် USDP ထဲက စစ်တပ်အရာရှိဟောင်းတွေ) က ပါးရည်နပ်ရည်ရှိပြီး အများလက်ခံနိုင်တဲ့ ဘာသာစကားကို ပိုသုံးနိုင်လာကြတာကတော့ အမှန်ပါပဲ။ ဒါပေမယ့် သူတို့ပြော တာတွေကတော့ အားလုံး မှန်ချင်မှလည်းမှန်မယ်၊ အဓိပ္ပါယ်ရှိချင်မှလည်း ရှိမှာပေါ့။

ဒေါ်အောင်ဆန်းစုကြည်နဲ့ NLD လွှတ်တော်ထဲရောက်လာပြီးတဲ့နောက် လွှတ်တော်ရဲ့ အနေအထားက ဘယ်လောက် လှုပ်ရှားသက်ဝင်လာသလဲလို့ ဦးဌေးဦးကို ကျနော် မေးကြည့်တော့ သူက “လူပိုများလာတာပေါ့ဗျာ။ အခုဆိုရင် ထိုင်ခုံလွတ် တောင် မရှိတော့ဘူးလေ” တဲ့။

လွှတ်တော်တက်ဝတ်စုံတွေက တောင့်တောင့်ကြီး ဖြစ်မနေဘူးလား ဗျာလို့ မေးလိုက်တဲ့ အခါမှာတော့ သူက ခဏလေး မှင်သက် သွားပါတယ်။ ပြီးတော့မှ ပြုံးပြီး (သူ့ခေါင်းပေါင်းကို လက်ညှိုးထိုးလို့) “အခုဆို ကျနော်လည်း ခေါင်းပေါင်း ဝတ်ရတာ ကျင့်သားရပါပြီ၊ ဝတ်ခါစကတော့ အကျင့် မရဘူးပေါ့” လို့ ဆိုပါတယ်။ “ဒါက ကျနော်တို့ရဲ့ ဂုဏ်သိက္ခာလေ။ လွှတ်တော် ကို မြက်ခင်းပေါ်မှာလည်း ကျင်းပလို့ ရတာပဲ။ ဒီမှာ ကျင်းပတယ် ဆိုတာက ဂုဏ်သိက္ခာနဲ့ ဆိုင်တယ်လေ” လို့လည်း သူက ပြောပါတယ်။

လွှတ်တော်အစည်းအဝေးတွေထဲမှာ ဆွေးနွေးမှုတွေ လွတ်လွတ်လပ်လပ် ရှိပုံပေါ်တာကတော့ အသေအချာပါပဲ။ လွှတ်တော်အမတ် တွေအနေနဲ့ လမ်းပေါ်က ချိုင့်တွေကိုပြင်တာကအစ နိုင်ငံရေးအကျဉ်းသားတွေလွှတ်ပေးဖို့ကိစ္စ၊ တိုင်းရင်းသားပဋိပက္ခနဲ့ မြေယာ သိမ်းတဲ့ ကိစ္စတွေအထိ လက်တွေ့ကျကျ တင်ပြဆွေးနွေးနိုင်ကြပါတယ်။

“လုပ်ရိုးလုပ်စဉ်နဲ့ ပုံစံကတော့ မြန်မာ့ဆိုရှယ်လစ်လမ်းစဉ်ပါတီခေတ်ကနဲ့ ဆင်ပါတယ်၊ ဒါပေမယ့် ဒီလွှတ်တော်မှာတော့ ပိုလွတ်လပ် ခွင့်ရှိတယ်” လို့ အစည်းအဝေးခဏနားတဲ့အချိန်မှာ NLD လွှတ်တော်အမတ် ဦးအုန်းကြိုင်က ကျနော့်ကို ပြောပြပါတယ်။ သူက သတင်းသမားတယောက် ဖြစ်ခဲ့တာမို့ အတိုက်အခံ လုံးဝမရှိတဲ့ အရင်အာဏာရှင်ရဲ့ လွှတ်တော်ကို မျက်မြေကိုယ်တွေ့ ကြုံခဲ့ရသူပါ။

အခုလွှတ်တော်သစ်ကတော့ အရင်ကနဲ့ လုံးဝမတူပါဘူး။ မီဒီယာက လူတွေကို “စတုတ္ထ မဏ္ဍိုင် (Fourth Estate)” အဖြစ်နဲ့ လွှတ်တော်ရဲ့ လုပ်ပုံလုပ်နည်းတွေကို စောင့်ကြည့်ခွင့်ပြုပါတယ်။ လွှတ်တော်ထဲမှာ သူတို့ရှိတဲ့နေရာက ခန်းမရဲ့ အထက်မှာဆိုပေ မယ့် သူတို့က လွှတ်တော်အမတ်တွေ ဘာလုပ်ကြတယ်၊ ဘာတွေဆွေးနွေးကြတယ်ဆိုတာကို မျက်စေ့ဒေါက်ထောက် ကြည့်နေကြ တာပါ။

ပြီးတော့ ဒေါ်အောင်ဆန်းစုကြည်၊ ပြည်သူ့ လွှတ်တော် ဥက္ကဌနဲ့ လွှတ်တော် အမတ်ဖြစ်လာတဲ့ သန်းကြွယ် သူဌေးကြီးတွေ အပါအဝင် ထင်ရှားတဲ့ လွှတ်တော် အမတ်တွေကိုလည်း ဓာတ်ပုံ တဖြတ်ဖြတ် ရိုက်ကြတာပေါ့။

ကျနော်တို့ နေ့လည်စာစားအပြီး လွှတ်တော်ဥက္ကဌ သူရဦးရွှေမန်းနဲ့ လွှတ်တော်စင်္ကြန်လမ်းမှာ တွေ့တဲ့အခါမှာ သူက မီဒီယာသမားတွေကို ရင်းရင်းနှီးနှီး နှုတ်ဆက်ပါတယ်။ “မီဒီယာသမားတွေအနေနဲ့ ကျနော်တို့လွှတ်တော်ကို အခုလိုလာပြီး အားပေးကြတဲ့အပေါ် ကျနော် အရမ်းဝမ်းသာပါတယ်” လို့ သူက ပြောပါတယ်။ “အခုတော့ ဘာမှ မမေးပါနဲ့အုံး” လို့ မပြောခင်မှာ အဲ့ဒီလို နှုတ်ဆက်တာပါ။ အနိမ့်ဆုံးတော့ သတင်းထောက်တွေက သူ့ကို ဓာတ်ပုံရိုက်ခွင့် ရလိုက်ပါတယ်။

လွှတ်တော်ထဲမှာ မီဒီယာကလည်း သြဇာရှိတာ အမှန်ပါပဲ။ အနိမ့်ဆုံးတော့ လွှတ်တော်အမတ်တချို့ အိပ်မငိုက်ရဲကြဘူးပေါ့။ “တီဗွီကင်မရာတွေက တချိန်လုံးရိုက်နေတော့ ကျနော်လည်း မငိုက်ရဲဘူးလေ” လို့ ဦးဝင်းထိန်က အရွှမ်း ဖောက်ပါတယ်။ “ကျနော်ငိုက်နေတာကို ကျနော့်မဲဆန္ဒရှင်တွေ တွေ့သွားရင် ကျနော့်ကို ထုတ်ပစ်ကြလိမ်ပမယ်” လို့လည်း သူက ပြောပါသေး တယ်။

ဒါပေမယ့် လွှတ်တော်အမတ်တွေရဲ့ တင်ပြပုံတွေနဲ့ ကိစ္စတွေရပ်တွေအပေါ် ဆွေးနွေးငြင်းခုံကြပုံတွေက မီဒီယာသမားတွေရှိနေ တယ်ဆိုတာကို လျစ်လျူရှုထားပုံရပါတယ်။ ဘယ်လိုပဲဖြစ်ဖြစ် အမတ်တွေ အိပ်နေတဲ့ပုံတွေနဲ့ iPad သုံးနေတဲ့ပုံတွေကတော့ ဖေ့စ် ဘွတ်နဲ့ တခြား လူမှုကွန်ရက်တွေမှာ ပြန့်လို့နေပါပြီ။ တနေကုန် ထိုင်ပြီးတဲ့အခါ သူတို့အတော်များများက (ကျောင်းက သူတို့ ကလေးတွေလိုပဲ) တနေ့တာ မြန်မြန်ကုန်ပါစေတော့လို့ တောင့်တမိကြပုံ ရပါတယ်။

အစည်းအဝေးပြီးလို့ အမတ်တွေ ပြန်ကြတဲ့အခါမှာ သတင်းထောက်တွေက စစ်တပ် ကိုယ်စားလှယ် ဗိုလ်မှူးကြီး လှမြင့်စိုးကို ဗင်ကားပေါ် မတက်ခင် ဝိုင်းအုံပြီး တပ်က ဘာတွေ အဆိုပြု မလဲလို့ မေးကြပါတယ်။ ၂၀၀၇ ရွှေဝါရောင်တော်လှန်ရေးကို တပ်က ရက်ရက် စက်စက် ဖြိုခွဲတဲ့ အခါမှာ သူက အဓိက အခန်း ကဏ္ဍကနေ ပါခဲ့တယ်လို့ သိထား ကြတာကိုး။

ဗိုလ်မှူးကြီး လှမြင့်စိုးကတော့ ဖော်ဖော်ရွေရွေနဲ့ မေးခွန်းတွေကို ပြန်ဖြေပါတယ်။ သတင်းထောက်တွေ ကလည်း မေးခွန်းတွေ ဆက်တိုက်မေးကြ ပါတယ်။ ဒါပေမယ့် အခြားအရာရှိ တယောက်က “ကျနော်တို့မှာ လုပ်စရာတွေ ရှိသေးတယ်” လို့ ပြတ် တောင်းတောင်းနဲ့ ရုတ်တရက် ဝင်ပြောပြီး သူ့ကို လက်မောင်းကနေ ခပ်ကြမ်းကြမ်း ဆွဲခေါ် သွားလိုက်ပါတယ်။

စစ်စိမ်းရောင်လွှမ်းမိုးတဲ့ လွှတ်တော်ရဲ့ သရုပ်သကန်ကို ဒီမြင်ကွင်းက လှစ်ပြလိုက်သလို ကျနော်ခံစားမိပါတယ်။

Ref: ဧရာဝတီ

Read More...

မန္တလေးလူမှုရေးလုပ်ငန်း ၈၈ ကျောင်းသားများ သွားရောက် လှူဒါန်း

2012-07-29

မန္တလေးမြို့ကို ရောက်ရှိနေတဲ့ ၈၈ မျိုးဆက်ကျောင်းသားအဖွဲ့ ခေါင်းဆောင်တွေဟာ ဒေသခံ လူမှုရေး လုပ်ငန်းတွေ အတွက် ဒီကနေ့ သွားရောက် လှူဒါန်း ခဲ့ကြပါတယ်။ ၈၈ မျိုးဆက် ကျောင်းသားများ အဖွဲ အနေနဲ့ ဒေသခံပြည်သူတွေရဲ့ လိုအပ်ချက်တွေကို ၀ိုင်းဝန်း ဖြည့်ဆည်းပေးမယ်ဆိုတဲ့ မူလုပ်ငန်းစဉ်အရ ရောက်ရှိတဲ့ဒေသတွေမှာ သွားရောက် လှူဒါန်းတာ ဖြစ်တယ်လို့ ၈၈ မျိုးဆက်ကျောင်းသား ခေါင်းဆောင် ကိုပြုံးချိုက ပြောပါတယ်။

"ကျနော်တို့က ဒေသတော်တော်များများကို ရောက်တဲ့ အခါမှာ ဒေသခံတွေနဲ့ လူမှုရေး အဖွဲ့ အစည်းတွေရဲ့ စွမ်းဆောင် ချက်တွေ၊ နောက်ပြီးတော့ သူတို့လု ပ်နေတဲ့ လုပ်ငန်းတွေမှာ လိုအပ်ချက်တွေကို တွေ့ဆုံပြီး စကားပြောတဲ့အခါမှာ အဲဒီအချက်အလက်တွေကို တွေ့ရတယ်။ တိုင်းပြည်မှာ တကယ့်ကို ပညာရေးနဲ့ ကျန်းမာရေး ကိစ္စတွေမှာ အစိုးရကနေပြီးတော့ ၀င်ရောက် အားဖြည့်နိုင်မှုတွေ ဘယ်လောက် လျော့နည်းနေလဲ ဆိုတာလည်း ပေါ်လွင်သွားတယ်။ နောက်တချက်က ဒေသခံ အရပ်ဘက် အဖွဲ့အစည်းတွေက နေပြီးတော့ မိမိတို့ ၀န်းကျင်မှာ ရှိတဲ့ ပြည်သူလူထု အကျိုးစီးပွားအတွက် လုပ်ငန်းတွေ လုပ်ဆောင်နေရာမှာ အရှိန်ရအောင်လည်း ကျနော်တို့ ၈၈ မျိုးဆက်ကျောင်းသားတွေ အနေနဲ့ တတ်နိုင်သလောက် ကျနော်တို့ ရုံးကို လာရောက် ဆက်သွယ်လာတဲ့ အလှူရှင်တွေနဲ့ ကျနော်တို့က သဘောထားတွေ ရှင်းပြပြီးတော့ လိုအပ်ချက်တွေကို သတင်းအချက်အလက်တွေ ပေးပြီးတဲ့အခါမှာ သူတို့ရဲ့ လုပ်ငန်းတွေ အဆင်ပြေ ချောမွေ့အောင် ဆောင်ရွက်ပေးလိုက်တယ်။"

အောင်မြေသာစံမြို့နယ်က ပင်လယ်တိုက်၊ ရွှေမန်းအုတ်ကျောင်း၊ နှလုံးလှပင်လယ် ကုသိုလ်ဖြစ် ဆေးခန်းနဲ့ ဘုန်းတော်ကြီးသင် အခမဲ့ ပညာဒါန စာသင်ကျောင်းမှာ ဆေးခန်းသုံးနဲ့ ကျောင်းသုံးပစ္စည်းတွေကို သွားရောက်လှူဒါန်းခဲ့တယ်လို့ ကိုပြုံးချိုက ပြောပါတယ်။

ဒါအပြင် ၈၈ မျိုးဆက် ကျောင်းသားခေါင်းဆောင်တွေဟာ အမျိုးသား ဒီမိုကရေစီ အဖွဲ့ချုပ် မြို့နယ်ရုံးကိုလည်း သွားရောက်ပြီး အဖွဲ့ဝင်တွေနဲ့ တွေ့ဆုံခဲ့ကြပါတယ်။

Ref: RFA News

Read More...

တောင်ဥက္ကလာ ပြည်သူများ ဦးအောင်သိန်းလင်းကို ကန့်ကွက်

အောင်သက်ဝိုင်း
July 30, 2012

ပြည်သူ့လွှတ်တော် ကိုယ်စားလှယ် ဦးအောင်သိန်းလင်းကို တောင်ဥက္ကလာပ မဲဆန္ဒရှင် ပြည်သူများက ဖွဲ့စည်းပုံ အခြေခံ ဥပဒေနှင့် အညီ လွှတ်တော် ကိုယ်စားလှယ် အဖြစ်မှ ရပ်စဲပေးရန် လက်မှတ်ရေးထိုးသော လှုပ်ရှားမှု တရပ် စတင်ပြီ ဖြစ်ကြောင်း သတင်းရရှိသည်။

တရုတ်နိုင်ငံထုတ် Southern Weekend သတင်းစာနှင့် တွေ့ဆုံမေးမြန်းခန်းတွင် ရန်ကုန်တိုင်း တောင်ဥက္ကလာပ မြို့နယ် ကိုယ်စားလှယ် ပြည်သူ့ လွှတ်တော် အမတ် ဦးအောင်သိန်းလင်းက ကုလသမဂ္ဂနှင့် ကုလသမဂ္ဂ အထွေထွေ အတွင်းရေးမှူးချုပ် မစ္စတာ ဘန်ကီမွန်း၊ အမေရိကန် နိုင်ငံခြားရေး ဝန်ကြီး ဟီလာရီ ကလင်တန် တို့ကို မြန်မာ့ပြည်တွင်းရေး ဝင်ရောက်နှောင့်ယှက် သူများ ဖြစ်သဖြင့် အယုံအကြည် မရှိကြောင်း၊ အမျိုးသား ဒီမိုကရေစီ အဖွဲ့ချုပ် (NLD) ဥက္ကဋ္ဌ ဒေါ်အောင်ဆန်းစုကြည်သည် ဖခင် အရှိန်အဝါဖြင့် ကျော်ကြား နေသူဖြစ်ပြီး NLD ကို ထောက်ခံသူများ သည်လည်း အရူးများသာ ဖြစ်ကြောင်း ဖြေဆိုထားခဲ့သည့် အတွက် တောင်ဥက္ကလာပ မဲဆန္ဒရှင်များက အထက်ပါ လှုပ်ရှားမှုကို စတင်လိုက်ခြင်း ဖြစ်သည်။

ိုထို့အပြင် ဦးအောင်သိန်းလင်းက အများတောင်းဆို မှုကြောင့် သမ္မတ ဦးသိန်းစိန်၏ အမိန့်ဖြင့် ရပ်ဆိုင်းထားသော မြစ်ဆုံဆည်
စီမံကိန်းကြီးကို မဖြစ်မနေ ပြန်စရန်လိုကြောင်း စသည့် အငြင်းပွားဖွယ်အမြင်များကိုလည်း တွေ့ဆုံမေးမြန်းခန်းတွင် ပြောဆိုခဲ့ သေးသည်။

ဦးအောင်သိန်းလင်း၏ ဖြေဆိုချက်များကို တောင်ဥက္ကလာပ မဲဆန္ဒရှင်များက ပြည်တွင်း ဂျာနယ်များမှ တဆင့် ဖတ်ရကြောင်း၊ ယင်းပြောဆိုချက် များသည် မဲဆန္ဒရှင် ပြည်သူများကို စိတ်ပျက်စေသဖြင့် လွှတ်တော် ကိုယ်စားလှယ်အဖြစ်မှ ရုပ်သိမ်းရန်
ဝိုင်းဝန်း လှုပ်ရှားခြင်း ဖြစ်ကြောင်း၊ ယင်းလှုပ်ရှားမှုကို ဖွဲ့စည်းပုံ အခြေခံဥပေဒနှင့် အညီ ဆောင်ရွက်ခြင်း ဖြစ်ကြောင်း လက်မှတ်ရေးထိုး လှုပ်ရှားမှုကိုဦးဆောင်သူ တောင်ဥက္ကလာပ မြို့နယ်မှ ဦးမင်းအောင်က ဧရာဝတီသို့ ပြောသည်။

ဦးမင်းအောင်သည် ၂၀၁၀ ရွေးကောက်ပွဲတွင် အမျိုးသားဒီမိုကရေစီ အင်အားစု (NDF) ပါတီ၏ ဗိုလ်တထောင် မြို့နယ် ပြည်သူ့လွှတ်တော် ကိုယ်စားလှယ်လောင်း အဖြစ် ယှဉ်ပြိုင်ခဲ့သူဖြစ်ပြီး ယခုအခါ NDF မှ နုတ်ထွက်၍ လယ်သမား အရေးတွင် တက်ကြွစွာ ဆောင်ရွက်နေသူ တဦးဖြစ်သည်။

ဖွဲ့စည်းပုံ အခြေခံဥပဒေ အခန်း ၉၊ ပုဒ်မ ၃၉၆ (ခ) တွင် သက်ဆိုင်ရာ မဲဆန္ဒနယ်၏ မူလ မဲဆန္ဒရှင်များ အနက် အနည်းဆုံး “တစ်” ရာခိုင်နှုန်းက ရွေးကောက် တင်မြှောက်ထားသော လွှတ်တော် ကိုယ်စားလှယ်ကို တာဝန်မှ ပြန်လည် ရုပ်သိမ်းလိုလျှင် လွှတ်တော် ကိုယ်စားလှယ်နှင့် ပတ်သက်သည့် တိုင်တန်းချက်ကို ပြည်ထောင်စု ရွေးကောက်ပွဲကော်မရှင်ထံ တင်ပြရမည်ဟု
အတိအလင်း ပြဋ္ဌာန်းထားကြောင်း ဦးမင်းအောင်က ထောက်ပြသည်။

“ဦးအောင်သိန်းလင်းက မြစ်ဆုံဆည် စီမံကိန်း ပြန်စမယ်၊ သမ္မတက သူ့ဘာသာသူ ရပ်ဆိုင်းတာလို့ ပြောတယ်။ ပြည်သူတွေကို အရူးတွေလို့လည်း ပြောတယ်။ အဲဒီလို ပြောတာကိုတော့ ဘယ်လိုမှ လက်မခံနိုင်ဘူး။ အဲဒါကြောင့် မဲဆန္ဒရှင်တွေ စုပေါင်း
လက်မှတ်ထိုးပြီး ပြည်ထောင်စု ရွေးကောက်ပွဲကော်မရှင်ကို တင်ပြမှာပါ” ဟု သူက ရှင်းပြသည်။

ဖွဲ့စည်းပုံအခြေခံဥပဒေတွင် မဲဆန္ဒရှင် အနည်းဆုံး “တစ်” ရာခိုင်နှုန်းက တာဝန်မှ ပြန်လည် ရုပ်သိမ်း လိုသော လွှတ်တော် ကိုယ်စားလှယ်နှင့် ပတ်သက်သည့် တိုင်တန်းချက်များကို ပြည်ထောင်စု ရွေးကောက်ပွဲ ကော်မရှင်က ဥပဒေနှင့်အညီ စုံစမ်းစစ်ဆေး ရမည်ဖြစ်ပြီး စွပ်စွဲချက် မှန်ကန်လျှင် စွပ်စွဲခံရသူသည် လွှတ်တော် ကိုယ်စားလှယ် အဖြစ် ဆက်လက် ထမ်းရွက်စေရန် မသင့်ကြောင်း၊ ပြည်ထောင်စု ရွေးကောက်ပွဲကော်မရှင်သည် ဥပဒေနှင့်အညီ ဆောင်ရွက်ရမည် ဖြစ်ကြောင်း ဖော်ပြ ပါရှိသည်။

လက်မှတ်များကို ဇူလိုင်လ ၂၈ ရက်နေ့တွင် စတင် ကောက်ခံနေပြီး တောင်ဥက္ကလာ မဲဆန္ဒရှင်များ၏ လက်မှတ်ပေါင်း တထောင်ကျော် ရရှိသည်နှင့် နေပြည်တော်ရှိ ပြည်ထောင်စုရွေးကောက်ပွဲ ကော်မရှင်ထံသို့ တင်ပြသွားမည်ဟု သိရသည်။

“လက်မှတ် တထောင်ကျော်ရရင် နေပြည်တော်ကို တင်မယ်။ အခုတော့ လက်မှတ် ရာချီပြီး စရနေပြီ” ဟု လက်မှတ်ရေးထိုး လှုပ်ရှားမှု ဦးဆောင်သူ တောင်ဥက္ကလာပ မြို့နယ်မှ တက္ကသိုလ်ကျောင်းသား တဦးက ပြောသည်။

၂၀၁၀ ရွေးကောက်ပွဲကာလက တောင်ဥက္ကလာ ၇ ရပ်ကွက်ရှိ ဗုဒ္ဓဘာသာ ၀င်များ၏ ကန့်ကွက်မှုကြောင့် ရပ်ဆိုင်း ထားသော တောင်ဥက္ကလာပ ဗလီကြီးကို မွတ်ဆလင် ဘာသာဝင်များ ထံမှ ကြိုတင် ဆန္ဒမဲများ ရရှိလိုသဖြင့် ဦးအောင်သိန်းလင်းက ပြန်လည် ဆောက်လုပ်ခွင့် ပေးခဲ့ကြောင်း၊ ယင်းနောက် ဆွမ်းလောင်း အသင်းများက ၀ိုင်းဝန်း ကန့်ကွက်သည့် အတွက် ဗလီဆောက်လုပ်မှုကို ရပ်တန့်ပေးခဲ့ကြောင်း၊ ယင်းကိစ္စနှင့် ပတ်သက်ပြီး ဗုဒ္ဓဘာသာဝင် တောင်ဥက္ကလာပ ဒေသခံများအကြား ဦးအောင်သိန်းလင်းကို မကျေမနပ်ဖြစ်ခဲ့ကြကြောင်း သိရသည်။

“ဦးအောင်သိန်းလင်းက ရွေးကောက်ပွဲမှာ နိုင်သာ နိုင်သွားတာ။ တကယ်တော့ ဗလီ ကိစ္စမှာ ကတည်းက မကျေနပ်တာ။ အခု လက်မှတ်ရေးထိုး လှုပ်ရှားမှုမှာ ၀င်ပြီး လက်မှတ် ထိုးလိုက်ပြီ” ဟု တောင်ဥက္ကလာပ ၇ ရပ်ကွက်သား တဦးက ဆိုသည်။

ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီကလည်း ဦးအောင်သိန်းလင်းနှင့် ပတ်သက်ပြီး ဇူလိုင် ၂၈ ရက်နေ့က ကြေညာချက် တစောင် ထုတ်ပြန်လိုက်ပြီး ယင်းကြေညာချက်တွင် တရုတ် သတင်းစာသို့ ဦးအောင်သိန်းလင်းက အထက်ပါအတိုင်း ပြောဆိုခြင်းရှိ၊ မရှိ စိစစ်မည်ဖြစ်ကြောင်း၊ အမှန်တကယ်ပြောဆိုလျှင် ပါတီစည်းမျဉ်းများ အရ အရေးယူသွားမည် ဖြစ်ကြောင်း ပါရှိသည်။

ဦးအောင်သိန်းလင်းကလည်း တရုတ်နိုင်ငံထုတ် Southern Weekend China သတင်းစာ အနေဖြင့် ၎င်း၏ ဖြေဆိုမှုကို ဘာသာပြန် လွဲမှားစွာ ဖော်ပြခဲ့ကြောင်း၊ ယင်းကိစ္စနှင့် ပတ်သက်၍ မိခင်ပါတီ အနေဖြင့် အပြစ်ပေးပါက ခံယူသွားမည် ဖြစ်ကြောင်း ပြောဆိုသည်ဟု သိရသည်။

Ref: ဧရာဝတီ

Read More...

ကုလလူ့အခွင့်အရေး ကိုယ်စားလှယ် မြန်မာနိုင်ငံရောက်

29.07.2012

မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ် Tomas Ojea Quintana ဟာ ရန်ကုန်မြို့ကို တနင်္ဂနွေနေ့ ညနေပိုင်းက ရောက်ရှိ ခဲ့ပါတယ်။ ရခိုင်ပြည်နယ်မှာ လူမျိုးရေး အကြမ်းဖက်မှုတွေ စတင်ဖြစ်ပွား ခဲ့တဲ့ ဇွန်လနောက်ပိုင်း မစ္စတာ ကင်တားနား အနေနဲ့ မြန်မာနိုင်ငံကို ပထမဆုံး အကြိမ် လာရောက်တာ ဖြစ်ပါတယ်။

မြန်မာပြည်တွင်း လူ့အခွင့်အရေး အခြေအနေ အရပ်ရပ်ကို အကဲခတ် ဆန်းစစ်ဖို့ အတွက် သီတင်း တပတ်ကြာမယ့် မစ္စတာ ကင်တားနားရဲ့ ဒီခရီးစဉ် အတွင်း သမ္မတဦးသိန်းစိန်နဲ့ အစိုးရ တာဝန်ရှိသူတွေ၊ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်၊ ပရဟိတ အကျိုးဆောင် လူမှုအဖွဲ့အစည်း ကိုယ်စားလှယ်တွေနဲ့ တွေ့ဆုံဖို့ ရှိပါတယ်။

မစ္စတာကင်တားနား ဟာ ရန်ကုန်ဆင်ခြေဖုံးရှိ အင်းစိန်ထောင်ကို သွားရောက်မှာဖြစ်သလို လူမျိုးရေး ပဋိပက္ခကြောင့် အနည်းဆုံ ၇၈ ယောက် သေဆုံးပြီး ၇ သောင်းကျော် အိုးမဲ့ အိမ်မဲ့ဖြစ်ခဲ့ရတဲ့ ရခိုင်ပြည်နယ် ကိုလည်း သွားရောက် အကဲခတ် လေ့လာမှာဖြစ်ပါတယ်။ ရခိုင် ပြည်နယ်မှာ လုံခြုံရေး တပ်ဖွဲ့တွေက ရိုဟင်ဂျာ မူစလင်တွေကို ပစ်မှတ်ထား နှိပ်ကွပ်နေ တယ်ဆိုတဲ့ သတင်းတွေနဲ့ ပတ်သက်ပြီး လူ့အခွင့်အရေး ဆိုင်ရာ ကုလသမဂ္ဂ မဟာမင်းကြီး Navi Pillay က စုံစမ်းစစ် ဆေးပေးဖို့ သောကြာနေ့က တောင်းဆို လိုက်ပြီးနောက် မစ္စတာ ကင်တားနား ရန်ကုန်မြို့ကို ရောက်ရှိ လာခဲ့တာလည်း ဖြစ်ပါတယ်။

သမ္မတဦးသိန်းစိန် လက်ထက်မှာ ပြုပြင်ပြောင်းလဲရေး လုပ်ငန်းစဉ် ထူးထူးကဲကဲ တိုးတက်လာတာ တွေ့ရပေမဲ့ လူ့အခွင့်အရေးနဲ့ ပတ်သက်လို့တော့ ပြဿနာတွေနဲ့ ရင်ဆိုင်နေရ ဆဲပဲလို့ မစ္စတာကင်တားနားက မှတ်ချက် ချပါတယ်။ ရိုဟင်ဂျာတွေကို ဒုက္ခသည် စခန်းတွေမှာ ထားဖို့ ဒါမှမဟုတ် တတိယနိုင်ငံတွေကို ပို့ဖို့အတွက် ကုလသမဂ္ဂက တာဝန်ယူပါရန် သမ္မတ ဦးသိန်းစိန်က ပန်ကြား လိုက်တယ်လို့ မြန်မာ သမ္မတရုံး အင်တာနက် စာမျက်နှာမှာ ဖော်ပြ ထားပါတယ်။


Ref: VOA News

Read More...

လယ်သိမ်း မြေသိမ်း စုံစမ်းရေး ကော်မရှင် လွတ်လပ်မှု ရှိရန်လိုအပ်

ခင်ဦးသာ
July 28, 2012

လယ်ယာမြေ အဓမ္မသိမ်းယူ ခံထားရခြင်းနှင့် ပတ်သက်၍ ဖွဲ့စည်းမည့် စုံစမ်းရေးကော် မရှင်ကို လွတ်လပ်စွာ စုံစမ်းဖော်ထုတ်နိုင် သော အဖွဲ့တခု ဖြစ်စေလိုကြောင်း လယ်သမား အရေး ဆောင်ရွက်သူများ က ပြောသည်။

“ဒီကော်မရှင်ဟာ လွတ်လပ်တဲ့ အဖွဲ့ ဖြစ်ပြီးတော့ ပြည်သူ့ အကျိူးကို လက်တွေ့ လုပ်ပြဖို့၊ တတ်နိုင်သမျှ မြန်မြန် လုပ်ကြဖို့ မျှော် လင့်ပါတယ်”ဟု မတူကွဲပြားခြင်းနှင့် ငြိမ်းချမ်းရေး ပါတီ ဥက္ကဋ္ဌ နှင့် လယ်သမား အရေး ဆောင်ရွက်ပေးသူ ဦးနေမျိုးဝေက ဆို သည်။

တောင်သူ လယ်သမားများ၏ ဘ၀ဆင်း ရဲကျပ်တည်းခြင်း မဖြစ်စေရန် အလေးထား ဆောင်ရွက်၍ ၎င်းတို့၏ အလုပ် အကိုင်အခွင့် အလမ်းများ ပြန်လည် ရရှိရေး အတွက် သိမ်းယူခံထား ရသည့် လယ်မြေများ ပြန်လည်ရရှိရေး၊ နစ်နာမှု မရှိစေရန် လုပ်ဆောင် ပေး နိုင်ရေး အတွက် စုံစမ်းဖော်ထုတ်ရေး ကော်မရှင်တရပ် ဖွဲ့စည်းရန် ယမန်နေ့က ကျင်းပသည့် ပြည်ထောင်စု လွှတ်တော်အစည်း အဝေးက အတည်ပြုခဲ့သည်။

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ ပြည်သူ့လွှတ်တော် ကိုယ်စားလှယ် ဦးတင်ထွဋ် တင်သွင်းသည့်“လယ်ယာမြေများ သိမ်းဆည်း ခံရခြင်းများအား စုံစမ်းလေ့လာ ဖော်ထုတ်ပြီး တောင်သူ လယ်သမားများ နစ်နာမှု မရှိစေရေး တရားမျှတ စွာဖြေရှင်း
ဆောင်ရွက်ပေးရန်”အဆိုနှင့် ပတ်သက်၍ ကိုယ်စားလှယ် ၄၅ ဦး ဆွေးနွေးပြီး မဲခွဲဆုံးဖြတ် အနိုင်ရခဲ့ခြင်း ဖြစ်သည်။

စုံစမ်းဖော်ထုတ်ရေး ကော်မရှင်ဖွဲ့စည်းခြင်းကုို ကြိုဆိုကြောင်း၊ သို့သော် လယ်သမားများ၏ လယ်ယာမြေများ ပြန်လည် ရရှိရေးနှင့် လယ်သမား အကျိုး အမှန်တကယ် ဖော်ဆောင်ပေးနိုင်သည့် လွတ်လပ်သော အဖွဲ့ဖြစ်စေလိုကြောင်းလည်း ဦးနေမျိုးဝေ က ပြောသည်။

ထိုကော်မရှင်၌ လွှတ်တော် ကိုယ်စားလှယ်များ၊ အစိုးရအဖွဲ့ဝင်များ၊ ဥပဒေ ပညာရှင်များနှင့်လူမှု အဖွဲ့အစည်းများမှ ပုဂ္ဂိုလ်များ
ပါဝင်နိုင်ရေး ဆောင်ရွက်သွားမည်ဟု သိရပြီး မည်သည့် အချိန်တွင် ဖွဲ့စည်း မည်ဆိုသည်ကိုမူ မသိရသေးပေ။

လွှတ်တော်ကိုယ်စားပြုထားသည့် ကော်မတီ တချို့သည် ကိုယ်တိုင် ကွင်းဆင်းပြီး လယ်သမားများနှင့် တွေ့ဆုံမေးမြန်း စုံစမ်း
ခြင်းများ ရှိကြောင်း၊ သို့သော် ၎င်းတို့၏ စုံစမ်းလေ့လာမှုများသည် အမှန်တကယ် ဖြစ်ပျက်နေသည့် ဖြစ်ရပ်မှန်များ မဟုတ်
ကြောင်း၊ ထို့ကြောင့် ယခုဖွဲ့စည်းမည့် စုံစမ်းရေး ကော်မရှင်သည်လည်း လယ်မြေသိမ်းခံထားရမှု ကိစ္စကို ဖြေရှင်းနိုင်ရန် ကြာဦး မည်ဟု ယူဆကြောင်း လယ်သမားအရေး ကူညီပေးနေသည့် ရှေ့နေ ကိုဖိုးဖြူ က ပြောဆိုသည်။

“လွှတ်တော်ရဲ့ ရှေ့ပြေး ကော်မတီတချို့က မှတ်တမ်းလုပ်နေတာတွေ ရှိပါတယ်၊ ဒါပေမယ့် သူတို့က အပေါ်ယံ မှတ်တမ်း မှတ် ရာတွေပဲ ရကြတယ်၊ ကော်မရှင် ဆိုတာလည်း အဲဒီလိုပဲ လုပ်မယ်ဆိုရင် လယ်သမားတွေ အတွက် ဘာမှ ထူးလာမှာ မဟုတ် ဘူး” ဟု ၎င်းက ဆက်ပြောသည်။

လယ်ယာမြေ သိမ်းယူမှုများနှင့်ပတ်သက်၍ ဖြေရှင်းသည့်အခါလည်း မှတ်တမ်း မှတ်ရာ၊ စာရွက် စာတမ်းများနှင့် ပတ်သက်၍ ပွင့်လင်း မြင်သာမှု မရှိကြောင်း၊ လယ်ယာမြေ ပြဿနာများ ဖြေရှင်း ရာတွင်လည်း ခေါ်ယူစစ်ဆေးသည့် အဆင့်သာ ရှိပြီး ခိုင်လုံ သည့် အထောက်အထား ပြသမှု မရှိကြောင်း၊ ထို့ကြောင့် ကော်မရှင် အနေဖြင့် ထိုကိစ္စ များကိုကျော်လွှားနိုင်ရန် လိုအပ်နေသေး ကြောင်းလည်း ကိုဖိုးဖြူ က ပြော သည်။

လယ်ယာမြေ၊ နွားစားကျက်မြေ၊ မြေလွတ်မြေရိုင်း၊ တောင်ယာမြေ စသည့် သိမ်းယူ ထားသည့် မြေဧက စုစုပေါင်းသည် သောင်း သိန်း ချီ၍ ရှိကြောင်း၊ ထို စာရင်းသည် လယ်သမားအရေး၊ သဘာဝ ပတ်ဝန်းကျင် ထိန်းသိမ်းသူများ၊ ဌာန ဆိုင်ရာများ၊ ကုမ္ပဏီ များ စသည့် အဖွဲ့အစည်း များ၏ စာရင်းဇယားများဖြစ်ကြောင်း ကိုဖိုးဖြူ က ဆိုသည်။

လယ်မြေ သိမ်းယူမှုသည် ခေတ်အဆင့်ဆင့် က ရှိခဲ့သော်လည်း အုပ်ချုပ်ရေး စနစ်ကြောင့် ထိရောက်သည့် အရေးယူ ကိုင်တွယ် နိုင်ခြင်း မရှိခဲ့ကြောင်း၊ ယခုအခါ လွှတ်တော်၌ အတိုင်းအတာတခုအထိ ပြောဆိုနိုင်ပြီ ဖြစ်၍ လယ်သမားအရေး ကိစ္စ အတွက် ကောင်းမွန်သည့် အဖြေတခုရရှိ လာမည်ဟု မျှော်လင့်ကြောင်း လယ်မြေသိမ်းမှု ကိစ္စ ပါဝင် ဆွေးနွေးခဲ့သူ ပြည်သူ့ လွှတ်တော် ကိုယ်စားလှယ် ဦးဖေသန်း က ပြောသည်။

လယ်မြေ သိမ်းယူသူများသည် စစ်တပ် ထိပ်ပိုင်း ခေါင်းဆောင်များ၊ အစိုးရအဖွဲ့နှင့် နီးစပ်သည့် စီးပွားရေး လုပ်ငန်းရှင်များ၊ ကု မ္ပဏီများ က သိမ်းယူထားခြင်း ဖြစ်၍ ထိရောက်စွာ အရေးယူနိုင်ခြင်း မရှိခဲ့ကြောင်း၊ ယခု ဖွဲ့စည်းမည့် စုံစမ်းရေး ကော်မရှင် သည် လွတ်လပ်သည့် သီးခြားအဖွဲ့တခုအဖြစ် ဆောင်ရွက်နိုင်ပါက ပြေလည်နိုင်မည် ဖြစ်ကြောင်းလည်း ၎င်းကဆိုသည်။

အစိုးရ ဌာနများ ၏ စာရင်းများ၊ သီးစားချထားခွင့်၊ စာရွက် စာတမ်း၊ အထောက်အထားများ အပေါ် အခြေခံ၍ လုပ်ဆောင်မည် ဆိုပါက ကောင်းမွန်သည့် အဖြေ မရနိုင်ဟု ဦးဖေသန်းက ပြောသည်။

၎င်းက“ဓားမဦးချ လုပ်လာတဲ့ ဘိုးဘွားပိုင် မြေတွေများတယ်၊ တောသူ တောင်သား အများစုမှာ မှတ်တမ်းတွေ မလုပ်ထားကြ ဘူး၊ အဲဒီမြေတွေပဲ အသိမ်းခံထားရကြတယ်၊ ဒါတွေကို တရားမျှတစွာ ဖြေရှင်းနိုင်ဖို့ လိုပါတယ်”ဟု ဆိုသည်။

လယ်ယာမြေများအား စီမံကိန်းနယ်မြေ၊ တပ်ပိုင်နယ်မြေ မကျူးကျော်ရ ဟု ဆိုင်းဘုတ်များ စိုက်ထူထားသော်လည်း မည်သည့် စီမံကိန်းမှ လုပ်ဆောင်ခြင်း မရှိသေးသော နေရာများရှိနေသည်ဟု သိရသည်။

လက်ရှိ အစိုးရသည်လည်း ပြည်သူနှင့်နိုင်ငံအကျိုးစီးပွားအတွက် မြေများသိမ်းဆည်းပြီး စီမံကိန်းများ၊ လုပ်ငန်းများကို ဆက် လက်ဆောင်ရွက် နေရဦးမည်ဖြစ်ကြောင်း၊ စိတ်ကောင်း စေတနာနှင့် တရားနည်းလမ်းကျစွာ ဆောင်ရွက်မှုများဖြင့် ပြည်သူ့ အကျိုး၊ နိုင်ငံ အကျိုး၊ ပြည်ထောင်စု အကျိုး ပြုလုပ်သွားကြမည်ဟု ပြည်သူ့လွှတ်တော် ဥက္ကဋ္ဌ သူရ ဦးရွှေမန်း က ဦးတင်ထွဋ် ၏ အဆိုအား ထောက်ခံ ဆွေးနွေးစဉ် ထည့်သွင်း ပြောဆိုထားသည်။

Ref: ဧရာဝတီ

Read More...

လျှပ်တစ်ပြက် ဂျာနယ်ကို အသရေဖျက်မှုနဲ့ စွဲဆိုမှု မြို့နယ် တရားရုံး လက်ခံ

2012-07-29

ကသာမြို့ ရွှေမေတ္တာလမ်းရှိ ဗယ်လဲင်တိုင်း (Valentine) ကာရာအိုကေ လုပ်ငန်းရှင် ဦးမြင့်မောင်က လျှပ်တစ်ပြက် ဂျာနယ်ကို အတွဲ သုံး အမှတ် ၈၄ နဲ့ ၈၈ ပါ ရေးသားချက် များနဲ့ ပတ်သက်လို့  အသရေဖျက်မှု နဲ့ တရား စွဲဆိုခဲ့ရာမှာ အမှုကို တရားသူကြီးက ပြစ်မှုဆိုင်ရာ အမှုကြီး ၄၈၇/၁၂ နဲ့ လက်ခံလိုက်လို့ ဇူလိုင်လ ၃၀ ရက်နေ့မှာ စတင်ကြားနာမဲ့ အကြောင်း တရားလို ဦးမြင့်မောင်ရဲ့ ဇနီးဖြစ်သူ ဒေါ်မြင့်မြင့်ဆွေ ကပြောပြပါတယ်။

"ပြစ်မှုဆိုင်ရာ ဥပဒေပုဒ်မ ၅၀၀ အရ အသရေဖျက်မှုနဲ့ အရေး ယူပေးပါရန်ဆိုပြီး ဦးတိုက်လျှောက်လိုက်တာ ဇူလိုင်လ ၁၆ ရက်နေ့က မြို့နယ် တရားသူကြီးက အမှုကို လက်ခံ လိုက်ပြီပေါ့နော်။ လက်ခံ လိုက်ပြီးတော့ ၃၀ ရက်နေ့မှာ ချိန်းပါတယ်။"

ဒါ့အပြင် လျှပ်တစ်ပြက် ဂျာနယ် အယ်ဒီတာချုပ် ဦးမြတ်ခိုင်နဲ့ ဆောင်းပါးရှင် ဟာဂျူလီ (ကသာ) တို့ ကိုလည်း တရားမကြောင်းနဲ့ စွဲဆို ထားတယ်လို့ သိရပါတယ်။

လျှပ်တစ်ပြက် ဂျာနယ် ဥပဒေ အကျိုးဆောင် ဖြစ်သူ ဦးသိန်းသန်းဦးက ဒီအမှု ကိစ္စနဲ့ ပတ်သက်လို့ အခုလို အတည်ပြုပြောဆို ပါတယ်

"ဟာဂျူလီ (ကသာ) တယောက်ထဲကို ပြစ်မှုဆိုင်ရာ တရားရုံးမှာ ပုဒ်မ ၅၀၀ နဲ့ စွဲတယ်။ ဦးတိုက်လျှောက်ထား တာပေါ့ဗျာ။ အဲဒါကို လက်ခံ လိုက်တယ်။ အဲဒါကို ဟာဂျူလီကတော့ ဖြေရှင်း ရတော့မှာပေါ့။ နောက် ကုိုမြတ်ခိုင်နဲ့ ဟာဂျူလီ နှစ်ယောက်ပေါင်းပြီးတော့ ဗယ်လဲင်တိုင်း (Valentine) ကာရာအိုကေ က နစ်နာကြေး ငွေ သိန်း ၅ ထောင် ရလိုမှု ဆိုပြီးတော့ ကသာခရိုင် တရားရုံးမှာ စွဲတာ။ အဲဒါကတော့ တရားမ မှုပေါ့ဗျာ။"

နစ်နာကြေးငွေ သိန်းငါးထောင် ရလိုမှုနဲ့ စွဲဆိုတဲ့ တရားမမှုကို သြဂုတ်လ ကိုးရက်နေ့ ကသာခရိုင် တရားရုံးမှာ စတင် စစ်ဆေး မယ်လို့ သိရပါတယ်။

Ref: RFA News

Read More...

မည်သည့် ခြိမ်းခြောက်မှုမျှ မကြောက်ဟု ရခိုင်ပါတီ ပြော

နေမျိုး
စနေနေ့၊ ဇူလိုင်လ ၂၈ ရက် ၂၀၁၂

နယူးဒေလီ (မဇ္ဈိမ)။ ။ မည်သည့် ဘာသာရေး အစွန်းရောက်များ၏ ခြိမ်းခြောက်မှု ကိုမျှ ကြောက်စရာ မလိုကြောင်း ရခိုင် တိုင်းရင်းသားများ တိုးတက်ရေး ပါတီ RNDP ဥက္ကဋ္ဌ ဒေါက်တာအေးမောင် က ပြောကြားသည်။

ဇူလိုင်လ ၂၆ ရက်နေ့က ထုတ်ပြန်လိုက်သည့် ပါကစ္စတန် အခြေစိုက် တာလီဘန် အကြမ်းဖက် အဖွဲ့ တခုဖြစ်သည့် TTP ၏ ရခိုင်ပြည်နယ် ရိုဟင်ဂျာ မူဆလင် အရေးနှင့် ပတ်သက်၍ မြန်မာနိုင်ငံ အပေါ် ခြိမ်းခြောက် ပြောဆိုမှုများကို ပြန်လည် တုန့်ပြန်လိုက်ခြင်း ဖြစ်သည်။

“ကျနော်ပြောမယ်။ တာလီဘန် မကလို့ ဘာပဲဖြစ်ဖြစ်၊ ကျနော်တို့က လုံးဝ မကြောက်ဘူး။ ကျနော်တို့မှာ ရှိတဲ့ လက်နက်နဲ့၊ ရှိတဲ့ စိတ်ဓါတ်နဲ့ ခုခံမယ်။ မည်သည့် ဘာသာရေး အစွန်းရောက်တဲ့ ပုဂ္ဂိုလ်တွေရဲ့ မည်သည့် ခြိမ်းခြောက်မှုမှ ကျနော်တို့ လက်မခံဘူး။ ကျနော်တို့မှာ အသက် ရှိနေသမျှ ကာလပါတ်လုံး ခုခံမှာပဲ။ ဒါပဲ။ ဒါဟာ ကျနော်တို့ လူမျိုး တခုလုံးရဲ့စိတ်ဓါတ်ကို ပြောတာ” ဟု မဇ္ဈိမကို ပြောသည်။

TTP ၏ ခြိမ်းခြောက်စာတွင် ပါကစ္စတန်နိုင်ငံ မြို့တော် အစ္စလာမ်မာဘတ်ရှိ မြန်မာ သံရုံးကိုလည်း ပိတ်ပစ်ရန်နှင့် ပိတ်မပစ် ပါက မြန်မာ့ အကျိုးစီးပွား မှန်သမျှ ဖျက်ဆီးပစ်မည်ဟု ပါရှိသည်။

“ပါကစ္စတန်ရဲ့ တာဝန်ပဲလေ။ သံရုံး တရုံး ဆိုတာ နိုင်ငံတခုကို ကိုယ်စားပြုတယ်။ သံအမတ်ကြီး ခန့်အပ်လွာကို နိုင်ငံတကာ သံခင်း တမန်ခင်း ထုံးတမ်းစဉ်လာအရ သက်ဆိုင်ရာ နိုင်ငံ ကိုယ်စားပြုတဲ့ နယ်မြေအဖြစ် ခန့်အပ်ခြင်း ခံရတဲ့ နိုင်ငံကို အသိအမှတ် ပြုပေး ရတာကိုး။ အဲဒီနိုင်ငံမှာရှိတဲ့ သံရုံး လုံခြုံရေးကို တာဝန်ခံရမယ့် သူက အဲဒီ သက်ဆိုင်ရာ နိုင်ငံက တာဝန်ရှိတဲ့ လက်ရှိ အစိုးရပါပဲ” ဟု ဒေါက်တာအေးမောင် က ဆိုသည်။

၎င်းတို့ တောင်းဆိုသည့်အတိုင်း မလိုက်လျောပါက မြန်မာနိုင်ငံ အတွင်း ရိုဟင်ဂျာများ သတ်ဖြတ် ခံခဲ့ရသည် တို့ကို ပြန်လည် ဂလဲ့စားချေ တိုက်ခိုက်မှုများ ပြုလုပ် သွားမည်ဟု TTP အဖွဲ့က ဆိုသည်။ ၎င်းတို့က မြန်မာနိုင်ငံရှိ ရိုဟင်ဂျာ မူဆလင်များအား “သင်တို့ကျခဲ့ရတဲ့ သွေးတွေ အတွက် ကျွန်ုပ်တို့ လက်စားချေမည်” ဟု ဆိုခဲ့ခြင်း ဖြစ်သည်။

မကြာသေးမီက ဖြစ်ပွါးခဲ့သည့် ဗုဒ္ဓဘာသာ ရခိုင်များနှင့် မူဆလင် ရိုဟင်ဂျာများ၏ ပဋိပက္ခများကြောင့် ဘက်နှစ်ဖက်မှ စုစုပေါင်း လူ ၇၇ ဦး အသက် ဆုံးရှုံးခဲ့ရပြီး သောင်းနှင့်ချီ၍ အိုးမဲ့ အိမ်မဲ့ ဖြစ်ခဲ့ရသည်ဟု မြန်အစိုးရ အာဏာပိုင်များက တရားဝင်ပြောဆိုသည်။ သို့သော် ပြည်ပရှိ မွတ်ဆလင် ကမ္ဘာကမူ ထိုပဋိပက္ခ အတွင်းနှင့် ဖြစ်ပြီးနောက်ပိုင်းတွင် ရိုဟင်ဂျာ ဒါဇင်ပေါင်းများစွာ အသတ် ခံခဲ့ရသည်ဟု ဆိုကြသည်။

ထို့ပြင် ရိုဟင်ဂျာ အများအပြား နေထိုင်သည့် ဒေသများတွင် နယ်မြေရှင်းလင်းရေး အတွင်း အမျိုးသား ကြီးများနှင့် ငယ်ရွယ်သူကောင်လေး အများစု ပါဝင်သည့် ရာပေါင်း များစွာသော လူများအား ဖမ်းဆီး အကျဉ်းချ ထားသည်ဟု ဆိုခဲ့ပြီး ထိုလူ အားလုံးအား ထီးတည်း တည်ရှိနေသည့် နေရာများတွင် အကျဉ်း ချထားကာ မမျှမတ ဆက်ဆံခဲ့သည်ဟု အပြည်ပြည်ဆိုင်ရာ လွတ်ငြိမ်း ချမ်းသာခွင့် အဖွဲ့ (AI) က ပြောဆိုထားသည်။

ရခိုင် ဗုဒ္ဓဘာသာများနှင့် လုံခြုံရေး တပ်ဖွဲ့များက ပြုလုပ်ခဲ့သည့် မုဒိမ်းမှု၊ ပစ္စည်းဥစ္စာ ဖျက်ဆီးမှုနှင့် ဥပဒေမဲ့ သတ်ဖြတ်မှုများ အပါအဝင် နိုင့်ထက် စီးနင်းမှုများနှင့် ပတ်သက်၍ ယုံကြည် စိတ်ချ ရလောက်သော အစီရင်ခံစာများ ရရှိထားသည်ဟု AI က ဆိုသည်။

ရခိုင်ပြည်နယ်တွင်း ဖြစ်ပွားခဲ့သည့် ထိုပဋိပက္ခများကို လေ့လာကြည့်ပါက ဘာသာရေး ပြဿနာ မဟုတ်ကြောင်း ဒေါက်တာအေးမောင် က သုံးသပ်သည်။

“ဖြစ်ပျက်နေတာ အကုန်လုံးဟာ ဗုဒ္ဓဘာသာနဲ့ အစ္စလာမ်ဘာသာ ဖြစ်တာမျိုး မဟုတ်ဘူး။ အစ္စလာမ် ဘာသာကလည်း
ငြိမ်းချမ်းမှုကို လိုလားတယ်။ ဗုဒ္ဓဘာသာ ကလည်း လိုလားတယ်။ ဖြစ်နေတာက တိုင်းရင်းသား အခွင့်အရေးကို လိုချင်တဲ့၊ တိုင်းရင်းသား ဖြစ်ချင်တဲ့ ပုဂ္ဂိုလ်တွေက၊ တိုင်းရင်းသား မဟုတ်ပါဘဲလျက် အဆင့်ကျော်ပြီး လုပ်တဲ့ ဇာတ်လမ်းလေးတွေပါ။ အခု ကိစ္စက ဘာသာရေးကို ခုတုံး လုပ်ပြီးကာမှ ဘာသာရေးကို အကြောင်းပြပြီး ကာမှ ဒီဘက်မှာနေတဲ့ လူများစုကြီးက ပြင်ပက လာတဲ့ လူမျိုးနည်းစုတွေကို ဖိနှိပ်တယ်၊ သတ်ဖြတ်တယ်၊ မတော်မတရား လုပ်တယ် ဆိုပြီးတော့ ထင်ယောင်ထင်မှား ဖြစ်အောင် လုပ်တာ” ဟု မဇ္ဈိမကို ပြောသည်။

သူက ဆက်လက်၍ “အပြင်မှာရှိတဲ့ အုပ်စုက အပြင်က လာတဲ့ ပုံစံအတိုင်း နှစ်ပေါင်း ဘယ်လောက် ကြာပြီ၊ ဒီဘက်နိုင်ငံမှာ ရှိတဲ့ နိုင်ငံသား အခွင့်အရေးတွေကို အဆင့်ဆင့်ပေါ့ဗျာ၊ တရားဥပဒေကြောင်း အရ တောင်းတယ် ဆိုရင် ပြည်ထောင်စု သားတွေက လက်ခံနိုင်ဖွယ် ရှိတယ်။ ဒါပေမယ့်လို့ ဒီဘက်မှာရှိတဲ့ လူမျိုးစုတစု ပုံသဏ္ဍာန်မျိုးနဲ့ နှစ်ပေါင်းများစွာက သမိုင်း အရနဲ့ နေလာခဲ့တယ် ဆိုပြီး ဇာတ်ကြောင်း ထပ်နေတဲ့ လိမ်ထားတဲ့ ဟာတွေကိုတော့ သမိုင်းကို ပြုပြင် ဖန်တီးပြီး လုပ်တာမျိုးကို ဒီဘက်က လူတွေကလည်း လက်မခံဘူး” ဟု RNDP ဥက္ကဋ္ဌ၊ အမျိုးသား လွှတ်တော် ကိုယ်စားလှယ် ဒေါက်တာအေးမောင် က ပြောဆိုသွားသည်။

မြန်မာနိုင်ငံတွင် ရိုဟင်ဂျာ ရှစ်သိန်းခန့်ရှိမည်ဟု ကုလသမဂ္ဂအဖွဲ့များက ခန့်မှန်း ထားသော်လည်း မြန်မာ အစိုးရကမူ ၎င်းတို့အား နိုင်ငံသား အဖြစ် အသိအမှတ် မပြုခဲ့ပေ။ ၂၀၁၅ ခုနှစ်တွင် ထွက်ပေါ်လာမည့် သန်းခေါင် စာရင်းတွင်လည်း ၎င်းတို့အား ထည့်သွင်းကောက်ခံမှု ပြု/မပြု ရေရာစွာ မသိရှိရသေးပေ။

ရခိုင်တိုင်းရင်းသားများနှင့် ရိုဟင်ဂျာ ခေါ် မူဆလင်များအကြား မေလ ၂၈ ရက်နေ့မှ ပြန်လည် ဖြစ်ပေါ်ခဲ့သည့် ပဋိပက္ခ များတွင် သေဆုံးသူ ၇၇ ဦး၊ ဒဏ်ရာရရှိသူ ၁၁၁ ဦး၊ မီးရှို့ဖျက်ဆီးခံရသည့် အိမ်မြေ ၄,၈၂၂ လုံး၊ ဒုက္ခသည် ခုနှစ်သောင်း ခန့်နှင့် ပြစ်မှုဆိုင်ရာ ဥပဒေ ပုဒ်မ ၁၈၈ အရ ညမထွက်ရ အမိန့်ကို ကျူးလွန်၍ ဖမ်းဆီး ထိန်းသိမ်း ထားသူ ၈၇၂ ဦး ရှိကြောင်း ပြည်နယ် ဥပဒေချုပ် ဦးလှသိန်း က မဇ္ဈိမကို ပြောဆိုထားသည်။

Ref: မဇ္ဈိမ

Read More...

အစိုးရတပ်များ တိုးချဲ့ရန် အထက်ညွှန်ကြားချက် ထွက်လာကြောင်း KIO ပြော

ဟင်္သာနီ (မွန်မြေ)
စနေနေ့၊ ဇူလိုင်လ ၂၈ ရက် ၂၀၁၂

စံခလပူရီ (မဇ္ဈိမ)။ ။ ကချင်ဒေသသို့ အစိုးရတပ်များ တိုးချဲ့နေရာ ယူထားကြရန် ဇူလိုင်လ ၂၆ ရက်နေ့က စစ်တိုင်းဒေသများ ကွပ်ကဲရေး ဆိုင်ရာ အလွတ်သဘော ထိပ်သီး အစည်းအဝေး၌ ဒုတိယ ဗိုလ်ချုပ်ကြီး မြင့်စိုး က လမ်းညွှန်ချက် ပေးခဲ့ပြီး ဆိုင်ရာတပ် အသီးသီးသို့ ညွှန်ကြားချက် ပေးခဲ့ကြောင်း ကချင် လွတ်လပ်ရေး အဖွဲ့ KIO အတွင်းရေးမှူး ဦးလနန်မှ မဇ္ဈိမကို ပြောကြား သွားသည်။

“အဲဒီ အစည်းအဝေးမှာ ဒေသ စစ်ဗျူဟာမှူးတွေလည်း ခေါ်ထားတယ်။ ကချင်ဒေသကို တပ်တွေ တိုးချဲ့နေရာ ယူထား ကြဖို့ ညွှန်ကြား ထားတယ်လို့ သိရတယ်။ ကျနော်တို့ ဗဟိုဌာနချုပ် အနီးတဝိုက်မှာလည်း တပ်ဖွဲ့တွေ တိုးချဲ့ချထားတာ တွေ့ရ ပါတယ်။ တိုင်းမှူးကနေ ဗျူဟာမှူးတွေကို အဆင့်ဆင့် ဆက်လက် ညွှန်ကြားနေတယ်လို့ ထပ်သိရတယ်” ဟု ဦးလနန် က ပြောသည်။

အဆိုပါ စစ်တိုင်းဒေသများ ကွပ်ကဲရေးဆိုင်ရာ အလွတ်သဘော ထိပ်သီး အစည်းအဝေးကို မြစ်ကြီးနား မြို့ရှိ မြောက်ပိုင်းတိုင်း စစ်ဌာနချုပ်ရှိ စစ်ရုံး တခု၌ ပြုလုပ်ခဲ့ခြင်း ဖြစ်သည်ဟု ဆိုသည်။

ဒုတိယ ဗိုလ်ချုပ်ကြီး မြင့်စိုးမှာ ယခု၌ ကချင်ဒေသသို့ စစ်ဆင်နေသည့် တပ်များ အပါအဝင် မြောက်ပိုင်းတိုင်း၊ အနောက် မြောက်တိုင်း၊ အရှေ့ မြောက်တိုင်းတို့ အပါအဝင် စစ်တိုင်း သုံးတိုင်းအား တာဝန်ယူနေသည့် တပ်မတော် ကာကွယ်ရေးဌာန စစ်ဆင်ရေး အထူးအဖွဲ့မှူး (ကစထ) မှူး တဦး ဖြစ်သည်ဟု ဆိုသည်။

ထိုတပ်ဖွဲ့များ တိုးချဲ့နေရာယူမှုသည် ကချင်ဒေသသို့ တိုးမြှင့် စစ်ဆင်ရေး ပြုရန် ဖြစ်နိုင်ဖွယ် ရှိသော်လည်း ရှေ့တန်း စစ်မျက်နှာတွင် ရောက်ရှိနေသည့် တပ်များမှာ တိုက်ခိုက်လိုဟန် သဘောထား ပြင်းထန်မှု မရှိကြောင်း ဦးလနန်မှ သုံးသပ် ပြောဆိုသည်။

“သူတို့တွေလည်း ရှေ့တန်းတွေမှာ ဒုက္ခတွေ အများကြီး ကြုံတွေ့ရတယ်။ နောက် ကျနော်တို့ သိထားရတာက မရှိတဲ့ တိုက်ပွဲတွေ ကိုလည်း အစိုးရ တပ်တွေက အထက်ကို သတင်း တင်နေတယ်လို့ ကျနော်တို့ ကြားရတယ်။ ဒါပေမယ့်လို့ ကျနော်တို့ ဘေးပတ်ဝန်းကျင်မှာ သူတို့ တပ်တွေ တော်တော်များများ ဖြည့်တင်းထားတယ်။ စစ်ရေးအရ တင်းမာနေပေမယ့် တိုက်ပွဲကတော့ ပြင်းထန်မှု မရှိသေးဘူး။ နှစ်ဖက် တပ်တွေအကြား ပစ်ခတ်မှုတွေတော့ နေ့စဉ် ရှိနေပါတယ်” ဟု မဇ္ဈိမကို ပြောသည်။

သို့သော်လည်း လာမည့် ဇူလိုင်လ ၃၀ ရက်မှ သြဂုတ်လ ၄ ရက်နေ့အထိ မြန်မာနိုင်ငံ ဆိုင်ရာ ကုလသမဂ္ဂ လူ့အခွင့်အရေး အထူးစုံစမ်း စစ်ဆေးရေးမှူး Tomas Ojea Quintana မြန်မာနိုင်ငံသို့ လာရောက်ရန် ရှိပြီး ကချင်ဒေသသို့လည်း သွားရောက်ရန် အစီအစဉ် ရှိသဖြင့် စစ်ဆင်ရေး လျော့နည်းနိုင်ဖွယ် ရှိသည်ဟု နယ်စပ် အခြေစိုက် နိုင်ငံရေး သမားများနှင့် စစ်ရေး အကဲခတ်များက သုံးသပ် နေကြသည်။

ထိုအချက်အား ဦးလနန်က “ သူလာ ရင်လည်း မြစ်ကြီးနားလောက်ပဲ ရောက်မှာပါ။ ကျနော်တို့ ရှေ့တန်း စစ်မျက်နှာနဲ့ ဌာနချုပ် လိုင်ဇာထိ လာနိုင်မယ် မထင်ပါဘူး။ ဒီတော့ စစ်ဆင်ရေးတွေ လျော့သွားမယ် ဆိုတာတော့ မဟုတ်နိုင်လောက်ပါဘူး” ဟု ဆိုသည်။

KIO နှင့် အစိုးရတပ်တို့ ပစ်ခတ်မှုများ ပြန်လည်ဖြစ်ပွားခဲ့သည့် တနှစ်ကျော် ကာလအတွင်း KIO ထံတွင် အစိုးရတပ်မှ သုံပန်း ၄၀ နီးပါးခန့် ရှိပြီဟု သိရှိရသည်။

နှစ်ဖက် တပ်များ အကျအဆုံး နှင့် အဖမ်းအဆီး သုံ့ပန်း စာရင်းများကို ဒေသတည်ငြိမ်မှု မရှိသေးသဖြင့် အချက်အလက် အပြည့်အစုံဖြင့် တိတိကျကျ မစုဆောင်း နိုင်သေးပေ။ KIO ဘက်မှ လက်လှမ်း မီသလောက် ပြုစုထားသည့် စာရင်း များကိုလည်း သင့်တော်သည့် အချိန်တွင် ထုတ်ပြန် သွားမည်ဟု ဦးလနန် က ဆိုသည်။ တိုက်ပွဲ အရေအတွက်နှင့် ပတ်သက်၍မူ ဇူလိုင်လ ၁ ရက်နေ့မှ ၂၇ ရက်နေ့ အထိ တိုက်ပွဲပေါင်း ၉၀ ကျော် ဖြစ်ပွားခဲ့ပြီး ဖြစ်သည်ဟု ၎င်းက ပြောသည်။

စစ်မှန်သည့် နိုင်ငံရေး တွေ့ဆုံခြင်း နည်းလမ်းဖြင့် ဖြေရှင်းကြမှသာ ယခု ဖြစ်ပွားနေသည့် ကချင် ပြည်တွင်းစစ် အပါအဝင် တိုင်းရင်းသား အပစ်ရပ် များ၏ ရေရှည် ပြည်တွင်း ငြိမ်းချမ်းရေး လုပ်ငန်းစဉ်များကို အာမခံချက် ပေးနိုင်မည် ဖြစ်ကြောင်း KIO ဘက်မှ သုံးသပ်ထားသည်။

ပြည်တွင်း ငြိမ်းချမ်းရေး လုပ်ငန်းစဉ် ဖော်ဆောင်နိုင်ရေးနှင့် ပတ်သက်၍ ကချင်အရေးကို အစိုးမှ မည်သို့ ကိုယ်တွယ် မည်မှာ အခရာ ကျသည့် အချက် ဖြစ်သည်ဟု နော်ဝေး အစိုးရမှ ကျောက်ထောက် နောက်ခံပြု၍ ဖွဲ့စည်းပေးထားသည့် Myanmar Peace Support Initiative (MPSI) မှ Ashley South က ပြောသည်။

“ကျနော်တို့ အနောက်ကမ္ဘာက မီဒီယာတွေမှာ အစိုးရနဲ့ တိုင်းရင်းသားတွေ ဆွေးနွေးတာ ဖော်ပြလေ့ ရှိပါတယ်။ ဆိုတော့ အနောက်နိုင်ငံသားတွေ ဘာမြင်လဲ ဆိုတော့ မြန်မာ့ နိုင်ငံအရေး ပဋိပက္ခ ငြိမ်းချမ်းပြီလို့ ထင်နေကြတယ်။ ကျနော် မြင်တာကတော့ ဒီအပစ်အခတ် ရပ်စဲရေး တည်ဆောက်မှုဟာ အစိုးရနဲ့ တိုင်းရင်းသားတွေကြား ယုံကြည်မှု တည်ဆောက်ရေးရဲ့ အစပဲ ရှိပါသေးတယ်။ ပြည်တွင်း ငြိမ်းချမ်းရေးရဲ့ အစပဲ ရှိပါသေးတယ်။ တိုင်းရင်းသားတွေ လိုချင်တာက ဥပဒေအရ အာမခံချက် ရှိတဲ့ စစ်မှန်တဲ့ ကိုယ်ပိုင် ပြဋ္ဌာန်းခွင့်နဲ့ ဖက်ဒရယ် ပြည်ထောင်စုကို တည်ဆောက်ဖို့ပါ။ ဒါကို နိုင်ငံရေး နည်းလမ်းအရ အစိုးရနဲ့ ဆွေးနွေးကြတာပါ” ဟု Ashley South ပြောသည်။

ဇူလိုင်လ ၂၇ ရက်နေ့က ထိုင်း-မြန်မာ နယ်စပ် တနေရာ၌ ပြုလုပ်သည့် ပြည်တွင်း ငြိမ်းချမ်းရေး လုပ်ငန်းစဉ်များ အကြောင်း ဆွေးနွေးပွဲ၌ မဇ္ဈိမကို ပြောကြားသွားခြင်း ဖြစ်သည်။

Ref: မဇ္ဈိမ

Read More...

အပေါ်သို့