2013-04-10
အစိုးရအနေနဲ့ စီးပွားရေးအောင်မြင်အောင် ဆောင်ရွက်မပေးနိုင် ရင် ပြုပြင်ပြောင်းလဲရေး လုပ်ငန်းတွေအပေါ် ပြည် သူတွေက ယုံကြည်မှု နည်းပါး လာနိုင်ကြောင်း ပြည်သူ့ လွှတ်တော် ဥက္ကဌ သူရ ဦးရွှေမန်းက ဒီနေ့မှာပြောကြား လိုက်ပါတယ်။
ရန်ကုန်မြို့၊ မင်းရဲကျော်စွာလမ်းမှာရှိတဲ့ မြန်မာနိုင်ငံ ကုန်သည် များနှင့် စက်မှုလက်မှု လုပ်ငန်းရှင်းများ အသင်းချုပ်ရုံး UMFCCI မှာကျင်းပတဲ့ တောင်သူ လယ်သမားအရေးဆွေးနွေးပွဲမှာ သူရဦးရွှေမန်းက အခုလို ပြောခဲ့တာပါ။
"ဒီနေ့ ဒီမိုကရေစီစနစ် ပြောင်းလဲလာတဲ့နေရာမှာ စီးပွားရေးကို အောင်မြင်အောင် မလုပ်နိုင်သေးဘူး ဆိုရင် ကျွန်တော်တို့ရဲ့ နိုင်ငံရေးပြုပြုင်ပြောင်းလဲမှု အပေါ် ကျွန်တော်တို့အပေါ် ပြည်သူတွေ ယုံကြည်မှုနည်းရင် ကျွန်တော်တို့ သွားမယ့်လမ်းမှာ အနှောင့်အယှက်ဖြစ်မယ်၊ ဒီစနစ်ကို ထူထောင်ချင်တယ် ဆိုရင် ဆင်းရဲနေတဲ့ ပြည်သူတွေကို ချမ်းသာအောင်ထက် လောလောဆယ် စားဝတ်နေရေး အဆင်ပြေမှုဖြစ်အာင် လုပ်ပေးဖို့လိုပါလိမ့်မယ်"
ဒါ့အပြင် မြန်မာနိုင်ငံမှာရှိတဲ့ တောင်သူ လယ်သမား အများစုဟာ ဆင်းရဲလွန်းတဲ့အတွက် သူတို့တွေရဲ့ စားဝတ်နေရေး ပြေလည်အောင် ဆောင်ရွက်ပေးဖို့ လိုအပ်တယ်လို့လည်း ပြောကြားခဲ့ပါတယ်။
ဒီနေ့ဆွေးနွေးပွဲကို လယ်သမား အခွင့်အရေး ဥပဒေကြမ်းရေးဆွဲရေး ကော်မတီအဖွဲ့ဝင်တွေ၊ မြန်မာနိုင်ငံ ဆန်စပါးလုပ်ငန်းရှင်များအသင်းက တာဝန်ရှိသူတွေနဲ့ လွှတ်တော်ကိုယ်စားလှယ်တွေ တက်ရောက်ခဲ့ကြပြီး၊ လယ်သမားတွေအတွက် လုံလောက်တဲ့ ချေးငွေတွေရရှိဖို့၊ အကြောင်းပြချက်မရှိပဲ လယ်ယာမြေ သိမ်းယူတာတွေမပြုလုပ်ဖို့နဲ့ စိုက်ပျိုးရေးနဲ့ မွေးမြူရေးဆိုင်ရာ ပညာရပ်တွေကို တိတိကျကျနဲ့ လက်တွေ့ ကူညီဆောင်ရွက်ပေးဖို့စတဲ့ ကိစ္စရပ်တွေကို ဆွေးနွေးခဲ့ကြပါတယ်။
Ref: RFA News
Thursday, April 11, 2013
လယ်သမားတွေဘ၀ တိုးတက်အောင် ၀ိုင်းဝန်း ကြိုးပမ်းဖို့ လွှတ်တော် ဥက္ကဌပြော
မြန်မာနိုင်ငံမှာ တာဝန်သိရင်းနှီးမြုပ်နှံမှု G8 မှာဆွေးနွေးမည်
မခင်ဖြူထွေး
10.04.2013
ဗြိတိန်နိုင်ငံ လန်ဒန်မြို့မှာ ကျင်းပနေတဲ့ G8 စက်မှုထိပ်သီး ၈ နိုင်ငံရဲ့ နိုင်ငံခြားရေး ၀န်ကြီများဆွေးနွေးပွဲမှာ မြန်မာနိုင်ငံ နဲ့ပတ်သက်လို့ လူ့အခွင့်အရေး ကိစ္စထက် ကုန်သွယ်ရေးနဲ့ ရင်းနှီးမြှုပ်နှံမှု ကိစ္စတွေကို ဦးစားပေး ဆွေးနွေးဖို့ရှိတဲ့ အပေါ်မှာ စိုးရိမ် မိတယ်လို့ ဗြိတိန် အခြေစိုက် မြန်မာ့အရေး လှုပ်ရှားမှုအဖွဲ့ Burma Campaign UK က ပြောဆိုလိုက်ပါတယ်။
လက်ရှိ မြန်မာအစိုးရ လက်ထက်မှာ မြန်မာနိုင်ငံတွင်း လူ့အခွင့်အရေး ချိုးဖောက်မှုတွေဟာ လျော့နည်းသွားခြင်း မရှိဘဲ ပိုလို့တောင် များလာသေးတယ် ဆိုတာကို လူ့အခွင့်အရေး အဖွဲ့တွေရဲ့ မှတ်တမ်းတွေက ထောက်ပြနေတယ်လို့လည်း ဆိုပါတယ်။ အပြည့်အစုံကို မခင်ဖြူထွေး က တင်ပြထားပါတယ်။
ဧပြီလ ၁၀ ရက်နဲ့ ၁၁ ရက်နေ့တွေမှာ ကျင်းပတဲ့ G8 စက်မှုထိပ်သီး ၈ နိုင်ငံ နိုင်ငံခြားရေး ၀န်ကြီးတွေရဲ့ ဆွေးနွေးပွဲမှာ မြန်မာနိုင်ငံတွင်း တာဝန်သိ နိုင်ငံခြား ရင်းနှီးမြှုပ်နှံမှု ကိစ္စတွေနဲ့ ပတ်သက်ပြီး ဦးစားပေး အကြောင်းအရာ တခုအနေနဲ့ ဆွေးနွေးဖို့ ရှိတဲ့အကြောင်း ဗြိတိန်နိုင်ငံခြားရေး ဌာနက အစောပိုင်းကတည်းက သတင်းထုတ်ပြန် ပြောဆိုထားတာ ဖြစ်ပါတယ်။
ဒီနှစ် G8 အစည်းအဝေးမှာ နောက်ထပ် ဦးစားပေး အကြောင်းအရာတခု အဖြစ် ဆွေးနွေးဖို့ ရှိတဲ့ ကမ္ဘာပေါ်က ပဋိပက္ခ ဖြစ်ပွားရာဒေသတွေမှာ လိင်ပိုင်းဆိုင်ရာ အကြမ်းဖက်မှုတွေ မဖြစ်အောင် ဟန့်တားရေး ကိစ္စမှာတော့ ဒီကိစ္စ ထည့်သွင်းဆွေးနွေးမယ့် နိုင်ငံတွေထဲမှာ မြန်မာနိုင်ငံ မပါဝင်ပါဘူး။
မြန်မာနိုင်ငံမှာ အစိုးရစစ်တပ်က ကျူးလွန်တဲ့ လိင်ပိုင်းဆိုင်ရာ အကြမ်းဖက်မှုတွေနဲ့ လူ့အခွင့်အရေး ချိုးဖောက်မှုတွေ ကျယ်ကျယ်ပြန့်ပြန့် ရှိနေသေးပေမဲ့လို့ ဒီကိစ္စ ဆွေးနွေးမှုတွေမှာတော့ မြန်မာနိုင်ငံကို ထည့်သွင်းထားခြင်းမရှိဘဲ မြန်မာနိုင်ငံ တွင်း ရင်းနှီးမြှုပ်နှံမှုနဲ့ ကုန်သွယ်မှု ကိစ္စတွေကို ဦးစားပေး ဆွေးနွေးမယ့်အပေါ်မှာ အထူး စိုးရိမ်တဲ့အကြောင်း ဗြိတိန်နိုင်ငံအခြေစိုက် မြန်မာ့အရေး လှုပ်ရှားမှုအဖွဲ့ Burma Campaign UK ရဲ့ ညွှန်ကြားရေးမှူး မခ့် ဖာမနာ (Mark Farmaner) က ပြောပါတယ်။
“ကျနော်တို့ စိုးရိမ်တာက G8 စက်မှုထိပ်သီး နိုင်ငံတွေက နိုင်ငံခြားရေး ၀န်ကြီးတွေရဲ့ ဆွေးနွေးပွဲမှာ ကမ္ဘာပေါ်က ပဋိပက္ခ ဖြစ်ပွားရာဒေသတွေမှာ လိင်ပိုင်းဆိုင်ရာ အကြမ်းဖက်မှုတွေ မဖြစ်အောင် ဟန့်တားရေး ကြိုးပမ်းဆောင်ရွက်ဖို့ကိစ္စကို ဦးစားပေး ဆွေးနွေးမယ့် အကြောင်းအရာတခုအဖြစ် ထည့်သွင်းထားပေမဲ့လို့ ဒီအထဲမှာ မြန်မာနိုင်ငံကို ထည့်သွင်းမထားတဲ့ ကိစ္စပါ။ မြန်မာနိုင်ငံမှာ ပြီးခဲ့တဲ့ ၂ နှစ်အတွင်း အစိုးရ တပ်ဖွဲ့တွေက ကျူးလွန်တဲ့ မုဒိန်းကျင့်မှုတွေနဲ့ လိင်ပိုင်းဆိုင်ရာ အကြမ်းဖက်မှုတွေက ပိုပြီးတော့တောင် များလာပါသေးတယ်။”
“ဒါပေမဲ့ ဒီလိုအကြောင်းအရာတွေကို ဆွေးနွေးမယ့်အစား မြန်မာနိုင်ငံတွင်း တာဝန်သိ ရင်းနှီးမြှုပ်နှံမှုနဲ့ စီးပွားရေးလုပ်ငန်းတွေ ဘယ်လို လုပ်ကိုင်ဆောင်ရွက်နိုင်မလဲ ဆိုတဲ့ အပေါ်မှာ မြန်မာအစိုးရဘက်က ဆွေးနွေးတင်ပြမှုတွေကို နားထောင်ဖို့တော့ စီစဉ်ထားပါတယ်။ ဒါကြောင့် အခု G8 ထိပ်သီးစည်းဝေးပွဲမှာ မြန်မာနိုင်ငံရဲ့ လူ့အခွင့်အရေး အခြေအနေထက် ကုန်သွယ်ရေးနဲ့ ရင်းနှီးမြှုပ်နှံမှုဆိုင်ရာ ကိစ္စတွေကိုပဲ ဦးစားပေး ဆွေးနွေးကြမယ့်အပေါ်မှာ ကျနော်တို့ စိုးရိမ်မှုဖြစ်ရတာပါ။”
မြန်မာနိုင်ငံရဲ့ လက်ရှိ နိုင်ငံရေး ပြုပြင်ပြောင်းလဲမှုတွေကို ဗြိတိန်အစိုးရက အားပေးသလို မြန်မာနိုင်ငံတွင်း တာဝန်သိ နိုင်ငံခြား ရင်းနှီးမြှုပ်နှံမှုတွေ ဖြစ်ဖို့ မြန်မာ အစိုးရက ကြိုးစားနေတဲ့အပေါ်မှာလည်း အားပေးကူညီသွားမယ့် အကြောင်းနဲ့ ဒါနဲ့ပတ်သက်လို့ G8 စက်မှု ထိပ်သီးနိုင်ငံတွေက ကိုယ်စားလှယ်တွေနဲ့ တွေ့ဆုံတဲ့အခါ ဆွေးနွေးသွားမယ့်အကြောင်း ဗြိတိန် နိုင်ငံခြားရေးဝန်ကြီး ၀ီလျံ ဟိတ် (William Hague) ကလည်း ပြောဆိုထားပါတယ်။
ပြီးခဲ့တဲ့ နှစ်ကုန်ပိုင်းက ဗြိတိန်ဝန်ကြီးချုပ် ဒေးဗစ် ကင်မရွန်း (David Cameron) နဲ့ အမေရိကန် သမ္မတတို့ တွေ့ဆုံခဲ့ချိန်ကလည်း မြန်မာနိုင်ငံနဲ့ပတ်သက်လို့ မြန်မာနိုင်ငံမှာ တာဝန်သိ ရင်းနှီးမြှုပ်နှံမှုတွေ ရှိလာအောင် အားပေးဆောင်ရွက်ဖို့ ကိစ္စတွေကို ဆွေးနွေးခဲ့ကြသလို၊ အခု ဒီကိစ္စ G8 ခေါင်းဆောင်တွေကြား ဆွေးနွေးဖို့ အထိ ဖြစ်လာအောင် ဗြိတိန်အစိုးရက ဦးဆောင်ကြိုးပမ်းခဲ့တာ ဖြစ်တယ်လို့လည်း မခ် ဖာမနာ (Mark Farmaner) က ပြောပါတယ်။
ဒါကြောင့် ဒီနှစ် G8 အစည်းအဝေးမှာ မြန်မာနိုင်ငံအနေနဲ့ တာဝန်သိ ရင်းနှီးမြှုပ်နှံမှုတွေ ဖြစ်လာဖို့ ဘယ်လို ကြိုးပမ်းနေတယ်ဆိုတာကို ဆွေးနွေးတင်ပြဖို့အတွက်လည်း မြန်မာအစိုးရကို ဖိတ်ခေါ်ခဲ့တယ်လို့ ဆိုပါတယ်။ တကယ်တော့ ဒီကိစ္စတွေက မြန်မာနိုင်ငံမှာ ရင်းနှီးမြှုပ်နှံဖို့ စိတ်အားထက်သန်နေကြတဲ့ G8 အဖွဲ့ဝင် နိုင်ငံတွေက ကုမ္ပဏီတွေအပေါ် အများအမြင်ကောင်းအောင် လုပ်ပြတဲ့ သဘောမျိုး သက်သက်သာ ဖြစ်တယ်လို့လည်း မာ့ခ် ဖာမနာ (Mark Farmaner) က ပြောပါတယ်။
“G8 ရဲ့ အခုကြိုးပမ်းမှုက အနောက်နိုင်ငံ ကုမ္ပဏီတွေကို အကာအကွယ် ပေးနိုင်ဖို့အတွက် ဆိုတဲ့သဘော ပိုဆောင်နေပါတယ်။ သူတို့ ကုမ္ပဏီတွေအနေနဲ့ မြန်မာနိုင်ငံမှာ ရင်းနှီးလုပ်ကိုင်တဲ့အတွက် ဝေဖန်ခံရတာမျိုး မဖြစ်အောင်၊ တာဝန်သိ ရင်းနှီးမြှုပ်နှံမှုတွေ ဖြစ်ရေး ကြိုးပမ်းမှုတွေမှာ သူတို့ အားပေး ဆောင်ရွက်ခဲ့တယ် ဆိုတာမျိုး ပြောနိုင်အောင် လုပ်ပြတဲ့သဘောပါပဲ။ တကယ်တမ်းကတော့ မြန်မာနိုင်ငံတွင်း ရင်းနှီးမြှုပ်နှံမှုတွေ လူ့အခွင့်အရေးကို လေးစားလိုက်နာတဲ့ လုပ်ငန်းတွေဖြစ်ဖို့ အလေးထားတယ်ဆိုတာထက် သူတို့ကိုယ်သူတို့ ကာကွယ်ဖို့ကသာ အဓိကဖြစ်နေတာပါ။”
ဗြိတိန်၊ အမေရိကန်၊ ရုရှား၊ ဂျပန်၊ ကနေဒါ၊ ပြင်သစ်၊ ဂျာမနီနဲ့ အီတလီနိုင်ငံတို့ ပါဝင်တဲ့ ဒီ G8 စက်မှုထိပ်သီး ၈ နိုင်ငံ နိုင်ငံခြားရေး ၀န်ကြီးတွေရဲ့ ဆွေးနွေးပွဲမှာ မြန်မာနိုင်ငံတွင်း တာဝန်သိ ရင်းနှီးမြှုပ်နှံမှုကိစ္စအပြင် ကမ္ဘာပေါ်က ပဋိပက္ခ ဖြစ်ပွားရာ ဒေသတွေမှာ လိင်ပိုင်းဆိုင်ရာ အကြမ်းဖက်မှုတွေ မဖြစ်အောင် ဟန့်တားရေးကိစ္စ၊ ဆိုမားလီးယား နိုင်ငံအရေး၊ အင်တာနက် Cyber လုံခြုံရေးဆိုင်ရာကိစ္စ၊ အာရပ်နွေဦး လှုပ်ရှားမှုတွေနောက်ပိုင်း အာရပ်နိုင်ငံတွေရဲ့ ပြုပြင်ပြောင်းလဲမှု လုပ်ငန်းတွေမှာ အားပေးကူညီဖို့ ကိစ္စတွေကိုလည်း အလေးပေး ဆွေးနွေးနေတာ ဖြစ်ပါတယ်။
ဆီးရီးယား ပြည်တွင်းစစ် ကိစ္စနဲ့ပတ်သက်လို့လည်း အာဆဒ်အစိုးရကို လက်နက်ကိုင် ပုန်ကန်နေတဲ့ ဆီးရီးယား အတိုက်အခံတွေကို လက်နက်ထောက်ပံ့ရေးအတွက် ဗြိတိန်နဲ့ ပြင်သစ်နိုင်ငံတွေက ဆက်ပြီး တွန်းအားပေးသွားဖွယ်လည်း ရှိနေပါတယ်။
မြောက်ကိုရီးယားရဲ့ စစ်ရေးခြိမ်းခြောက်မှုကလည်း ဒီထိပ်သီးအစည်းအဝေးမှာ ထိပ်တန်း ဦးစားပေး ကိစ္စတခုအဖြစ် ပါဝင်နေတာဖြစ်ပါတယ်။
Ref: VOA News
ဘုန်းကြီးတပါး လူကုန်ကူးမှုဖြင့် အမ်းမြို့တွင် ဖမ်းဆီးခံရ
ခင်ဦးသာ
April 10, 2013
ရခိုင်ပြည်နယ် အမ်းမြို့နယ် ရဲစခန်းတွင် ဗုဒ္ဓဘာသာ ဘုန်းကြီးတပါးကို လူကုန်ကူးမှုဖြင့် အမှုဖွင့်၍ ဖမ်းဆီး အရေးယူ ထားကြောင်း သိရသည်။
ဖမ်းဆီးခံထားရသည့် ဘုန်းကြီးသည် သက်တော် ၄၀ ၀န်းကျင် ၀ါတော် ၁၈ ၀ါ ရှိ ဦးကောသိယ ဘွဲ့အမည်ရှိပြီး မွန်ပြည်နယ် ကျိုက်ထိုမြို့နယ် ဇဗ္ဗူအေး ကျောင်းတိုက်၏ ကျောင်းထိုင်ဟု သိရသည်။ ရခိုင်ပြည်နယ် ကျောက်တော်မြို့နယ်မှ မှတ်ပုံတင် အထောက်အထား မရှိသူ ၈ ဦးအား သင်္ကန်းစည်းပေးပြီး အခကြေးငွေယူ၍ ရန်ကုန်သို့ ပို့ဆောင်ရန် ခေါ်လာစဉ် အမ်းမြို့၌ ဧပြီလ ၅ ရက်နေ့က ဖမ်းဆီးမိခဲ့ကြောင်း အမ်းမြို့နယ် ရဲစခန်းက ဧရာဝတီကို ပြောသည်။
“ပုဒ်မ ၃၆၇ တရားမ၀င် လူကုန်ကူးမှုနဲ့ တရားစွဲဆိုဖို့ ယမန်ယူထားပါတယ်၊ ကားဒရိုင်ဘာလည်း ပါတယ်”ဟု ရဲစခန်း တာဝန်ရှိသူ က ဆိုသည်။
ဦးကောသိယအား အမ်းမြို့နယ် သံဃာ့မဟာနာယက အဖွဲ့ ဥက္ကဋ္ဌ ကိုယ်စား ဒု ဥက္ကဋ္ဌ ကို ပင့်ဖိတ်၍ မြို့နယ် သံဃမဟာနာယက အဖွဲ့ဝင် ဆရာတော်များ ရှေ့မှောက်တွင် ၀ိနည်းတော်နှင့်အညီ သိက္ခာချ လူဝတ်လဲပြီးမှသာ ထိန်းသိမ်း အရေးယူထားခြင်း ဖြစ်ကြောင်း သိရသည်။
ဦးကောသိယသည် မှတ်ပုံတင် မရှိသူများကို ရန်ကုန်ဘက်သို့ ပို့ဆောင်နေသည်မှာ ယခုအကြိမ်သည် ၃ ကြိမ်မြောက်ဖြစ်ကြောင်း အမ်းမြို့ ရဲစခန်းက ပြောသည်။
“ကားမှာ မြို့နယ် သံဃာ့နာယက ဆရာတော်လို့ ဆိုင်းဘုတ်ကပ်ထားတော့ စစ်ဆေးရေးဂိတ်တွေကလည်း မစစ်ဆေးကြတော့ မဖမ်းမိခဲ့ဘူးပေါ့၊ အခုအကြိမ်မှာ သံသယဖြစ်စရာ တချို့သတင်းရလို့ စစ်ဆေးတော့မှ လူကုန်ကူးတာ ဖြစ်နေတယ်”ဟု အမည်မဖော်လိုသူ ရဲအရာရှိက ပြောသည်။
မှတ်ပုံတင် မရှိသူများကိုလည်း လူဝင်မှုကြီးကြပ်ရေး ဌာနက ဥပဒေ ပုဒ်မ ၆၂/၆၃ တို့ဖြင့် မကြာမီ တရား စွဲဆိုသွားမည်ဖြစ်ကြောင်း၊ ဦးကောသိယ နှင့် ဒရိုင်ဘာ တို့ကို ရဲစခန်းက အရေးယူ ဆောင်ရွက်သွားမည်ဖြစ်ကြောင်း သိရသည်။
မှတ်ပုံတင်မရှိဘဲ ဖမ်းဆီးခံရသူများမှာ မြန်မာမွတ်စလင် သို့မဟုတ် ဘင်္ဂလာဒေ့ရှ် နိုင်ငံမှ ခိုးဝင်လာသူများ ဟူသည်ကို ဧရာဝတီက အတိအကျ ခွဲခြား မသိသေးပါ။
Ref: ဧရာဝတီ
ဆန္ဒပြ မိုးထိမိုးမိရွှေလုပ်သားတချို့ ယာယီအချုပ်ခံရ
မအေးအေးမာ
10.04.2013
ဆူပူလှုံ့ဆော်မှုတွေနဲ့ တရားစွဲဆိုခံရပြီးတဲ့နောက် ထောင်ဒဏ် ကျခံထားရတဲ့ မိုးထိမိုးမိ ရွှေလုပ်သားခေါင်းဆောင်တွေနဲ့ အပြင်က အမှု ရင်ဆိုင်ဖို့လာတဲ့ မန္တလေးတိုင်း ရမည်းသင်း မြို့နယ်ထဲက မိုးထိမိုးမိ ရွှေလုပ်သားတွေကို အမျိုးသား ကြီးပွား တိုးတက်ရေး ကုမ္ပဏီက ခြိမ်းခြောက်မှု၊ ပိုက်နက် ကျူးလွန်မှုတွေနဲ့ တရား စွဲဆိုခဲ့ပါတယ်။ အဲ့ဒီနောက် ရမည်းမြို့နယ် တရားရုံးကနေ ရမည်းသင်းထောင် အချုပ်မှာ ယာယီ ထိန်းသိမ်းတဲ့ အနေနဲ့ အချုပ် ချထားလိုက်ပါတယ်။ အပြည့်အစုံကိုတော့ မအေးအေးမာ က သတင်းပေးပို့ထားပါတယ်။
ရမည်းသင်းမြို့နယ် မိုးထိမိုးမိဒေသမှာ နှစ်ရှည်လများ တနိုင်တပိုင် လုပ်ကိုင်ခဲ့ကြတဲ့ ရွှေလုပ်သားတွေနဲ့ ၂၀၁၁ ခုနှစ်က လေလံလုပ်ပိုင်ခွင့်ရလာတဲ့ အမျိုးသား ကြီးပွားတိုးတက်ရေး ကုမ္ပဏီတို့ကြားမှာ လုပ်ကိုင်စားသောက်ဖို့ ရရှိရေးအတွက် ဆန္ဒပြတောင်းဆိုရာကနေ အခုလိုမျိုး တရာစွဲဆိုခံရမှုတွေ၊ ပြစ်ဒဏ်ကျမှုတွေ ဖြစ်လာခဲ့ရတာပါ။
ဖမ်းဆီးခံထားရတဲ့ ရွှေလုပ်သား ကိုရဲရင့်ထွန်းရဲ့ ဇနီးဖြစ်သူက လွတ်ရက်စေ့ခါနီး သူရဲ့ ခင်ပွန်း အပါအ၀င် လူ ၁၄ ဦးဟာ နောက်ထပ်ပုဒ်မတွေနဲ့ ချုပ်နှောင်ခံခဲ့ရတယ်လို့ အခုလို ပြောပြပါတယ်။
“တောင်ငူထောင်ကနေ ၅ ရက်နေ့က ရွှေ့ခဲ့တယ်ရှင့်။ ၈ ရက်နေ့က ရုံးတင်တယ်ဆိုပြီးတော့မှ ကိုရဲရင့်ထွန်း အပါအ၀င် အားလုံး ၁၄ ယောက်ကိုပေါ့နော် ဆင့်စာတွေနဲ့ ရောက်လာတယ်။ အပြင်က လူကကျတော့ ၁၁ ယောက်၊ အထဲမှာကျတော့ ကိုရဲရင့်ထွန်းရယ်၊ ကိုနိုင်ဝင်းရယ်က ၅၀၅ (ခ) နဲ့ ကျပြီးသား လူနှစ်ယောက်၊ ကိုဖိုးဇော်ဆိုတာက ရမည်းသင်းထောင်မှာ ကျပြီးသား လူတယောက်ပေါ့နော် အထဲက အချုပ်သားက ၃ ယောက် အပြင်က ၁၁ ယောက်နဲ့ပေါ့နော် သူတို့တွေ အကုန်လုံး တရားရင်ဆိုင်ရမယ်ဆိုပြီး အဲ့ဒီနေ့က တရားရင်ဆိုင်ဖို့အတွက်ကို လာကြတယ်။ လာတဲ့လူတွေ အကုန်လုံးကို နေပူထဲမှာ ထားထားတယ်ပေ့ါ အမရယ်၊ တနေကုန် ဘာမှလည်း မပြောဘူး။ ရုံးတင်မယ်၊ ရုံးတင်မယ် ဒါပေမဲ့လို့တော့ တရားခံထုတ်ဖို့က တရားသူကြီးက လက်မှတ်မထိုးပေးသေးဘူးဆိုပြီးတော့မှ ရဲဘက်ကနေ ကျမတို့ကို ပြောတာပေါ့။”
“အဲ့ဒါနဲ့ ကျမတို့ကလည်း စောင့်နေတာ။ ဒုတိယမြို့နယ် တရားသူကြီးရုံးမှာ စစ်တာရှင့်။ ၅ နာရီခွဲပြီဆိုတော့မှ ကျမတို့ကို ရုံးတင်တယ်။ ရုံးတင်တဲ့အခါကျတော့ တရားသူကြီးက ဒီအမှုကို သူ လက်ခံတယ်ပေါ့။ ဘယ်သူတွေလာတယ်၊ ဘယ်သူ လာတွေဆိုပြီးတော့ နာမည်တွေ ခေါ်ပြီးတဲ့အခါကျတော့ အချိန်အခါ နှောင်းသွားပြီဖြစ်တဲ့အတွက် ဒီအမှုကို သူတို့ မစစ်တော့ပါဘူးတဲ့။ အပြင်က ၁၁ ယောက်ကိုလည်း ယာယီထိန်းသိမ်းထားပါ မယ်ဆိုပြီးတော့ အကုန်လုံးကို အချုပ်ချလိုက်တယ်ရှင့်။ အဲ့တော့ အပြင်က လူက ၁၁ ယောက်၊ အထဲကလူက ၃ ယောက်နဲ့ဆိုတော့ ၁၄ ယောက်ပေါ့ရှင့် အခုလောလောဆယ် ရမည်းသင်းအကျဉ်းထောင်ထဲမှာ ရှိနေပါတယ်။”
အမျိုးသား ကြီးပွားတိုးတက်ရေး ကုမ္ပဏီက ၂၀၁၁ ခုနှစ်ကစပြီး မိုးထိမိုးမိတောင်မှာ ဧကပေါင်း ၆၁၀၅ ဧကကို လေလံရခဲ့ပြီး ရွှေတူးဖော်ရေးကို လုပ်ကိုင်ခဲ့ပြီးတဲ့ နောက်ပိုင်းမှာတော့ ဒေသခံတွေ တနိုင်တပိုင်လုပ်တဲ့ ရွှေလုပ်သားတွေနဲ့ ပြသာနာတွေ တက်ခဲ့ပါတယ်။ ဒေသခံရွှေလုပ်သား အမျိုးသမီး ပြောတာက -
“သူတို့ပိုင်တယ်ဆိုတဲ့ ၆၁၀၅ ဧက က နိုင်ငံတော်နဲ့ တရားဝင်လွှဲထားတဲ့အတွက် သူတို့ပိုင်နက် ဆိုပြီးတော့မှ သူတို့က ပိုင်နက်ကျူးလွန်မှုလို့ လုပ်တာပေါ့နော်။ ကျမတို့ကလည်း ကျမတို့ နေခဲ့တဲ့ဟာကလည်း မိုးထိမိုးမိ ရွှေတောင်ကြီး စပေါ်ပြီး ဆိုကတည်းက ကျမတို့က လုပ်စားခဲ့ကြသူတွေလေ။ သူတို့က ၂၀၁၁ ခုနှစ်တုန်း ကမှ နိုင်ငံတော်နဲ့ လေလံအောင်ပြီး ၀င်လာခဲ့တဲ့ ကုမ္ပဏီပါ အမ။”
ပြီးခဲ့တဲ့ ၂၀၁၂ ခုနှစ်တုန်းက ပုဒ်မ ၅၀၅ (ခ) နဲ့ ထောင်ဒဏ် ၆ လ ကျခံခဲ့ရတဲ့ ရွှေလုပ်သားတွေဟာ ဧပြီလ ၁၁ ရက်နေ့မှာ လွတ်ရက်စေ့ပြီ ဖြစ်ပါတယ်။ လွတ်ရက်စေ့ခါနီးမှာ တခြားပုဒ်မတွေနဲ့ ထပ်မံ တရား စွဲဆို ခံခဲ့ရတာဖြစ်ပါတယ်။
ပြီးခဲ့တဲ့ ၂၀၁၁ ခုနှစ်မှာတော့ သောင်းနဲ့ချီရှိတဲ့ ရွှေလုပ်သားတွေဟာ သူတို့ကို မိုးထိမိုးမိ တောင်မှာ တနိုင်တပိုင် ရွှေးတူးဖော် လုပ်ကိုင် စားသောက်ခွင့်တွေ ပြန်ပေးဖို့ ဆန္ဒပြ တောင်းဆို ခဲ့ပါတယ်။
၂၀၁၁ ခုနှစ်တုန်းကတော့ နေပြည်တော်ထိ ချီတက်ဆန္ဒပြ လမ်းလျှောက်စဉ်ကတော့ ကုမ္ပဏီဘက်က ညှိနှိုင်းမူလုပ်ပြီး ရွှေလုပ်သားတွေ၊ လိုလားချက်တွေကို လိုက်လျောမှုတွေ လုပ်မယ်ဆိုတာကြောင့် ဆန္ဒပြမှုတွေ ရုပ်သိမ်းပေးခဲ့ပါတယ်။
နောက်ပိုင်းမှာတော့ ပြေလည်မှုမရှိခဲ့တဲ့အတွက် ၂၀၁၂ ထဲမှာ မိုးထိမိုးမိ ရွှေလုပ်သားတွေဟာ ရန်ကုန်မှာရှိတဲ့ အမျိုသား ကြီးပွားတိုးတက်ရေး ကုမ္ပဏီထိ သွားရောက်ပြီး ဆန္ဒပြခဲ့ပါတယ်။ ဒီလိုဆန္ဒပြ ထုတ်ဖော်မှုမှာ ပါဝင်တဲ့ ရွှေလုပ်သား တွေထဲက ၂၉ ဦးဟာ တရားစွဲဆိုခံထားရပြီး အခုလက်ရှိ ၁၄ ဦးဟာ အမှုကို ရင်ဆိုင်ခဲ့ကြတာပါ။
တရားစွဲဆိုမှုလုပ်ထားတဲ့ အမျိုးသား ကြီးပွားတိုးတက်ရေး ကုမ္ပဏီဘက်ကို ဆက်သွယ်မေးမြန်းဖို့ ကြိုးစာခဲ့ပေမဲ့ ဆက်သွယ်လို့ မရခဲ့ပါဘူး။ လက်ရှိမှာတော့ တရားစွဲဆိုခံထားရတဲ့ ရွှေလုပ်သားတွေဟာ ရမည်းသင်း ထောင်ကြီး အချုပ်မှာပဲ ရှိနေကြပြီး အာမခံရရှိဖို့အတွက် မိသားစုဝင်တွေက ကြိုးစားနေဆဲပဲလို့ ဆိုပါတယ်။
Ref: VOA News
မိတ္ထီလာမီး ကွန်မြူနစ်များ မွှေးဟု ဦးအောင်သောင်း ပြော
ကျော်ဖြိုးသာ
April 10, 2013
အာဏာရ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၏ ထိပ်တန်းခေါင်းဆောင်တဦးဖြစ်ပြီး ယခင် အာဏာရှင် ဗိုလ်ချုပ်မှုးကြီး သန်းရွှေ၏ ညာလက်ရုံး အဖြစ် လူသိများသူ ၀န်ကြီးဟောင်း ဦးအောင်သောင်းက လွန်ခဲ့သောလ အတွင်း မြန်မာနိုင်ငံ အလယ်ပိုင်းတွင် ဖြစ်ပွားခဲ့သော မူဆလင် ဆန့်ကျင်ရေး ပဋိပက္ခများတွင် ကွန်မြူနစ်များ ပါဝင်ပတ်သက်မှု ရှိနိုင်ကြောင်း ထုတ်ဖေါ်ပြောကြားသည်။
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ ဗဟိုအကြံပေး အဖွဲ့ဝင်ဖြစ်သူ ဦးအောင်သောင်းက မြန်မာနိုင်ငံဆိုင်ရာ အမေရိကန် သံအမတ်ကြီး မစ္စတာ ဒဲရစ်မစ်ချယ်နှင့် မိထ္တီလာမြို့နယ်တွင်ဖြစ်ပွားခဲ့သော မငြိမ်သက်မှုများနှင့် ပတ်သက်၍ ဆွေးနွေးကြစဉ် ယင်းသို့ပြောကြားလိုက်ခြင်းဖြစ်ကြောင်း အပတ်စဉ်ထုတ် သတင်းဂျာနယ် မြန်မာသံတော်ဆင့်တွင် ဖော်ပြပါရှိခဲ့သည်။
ယခုလ ၉ ရက်နေ့တွင် ဧရာဝတီမှ ဆက်သွယ်မေးမြန်းရာတွင်လည်း ဦးအောင်သောင်းက သူ၏ပြောကြားချက်နှင့် ပတ်သက်၍ ထပ်မံ အတည်ပြုခဲ့ပြီး ဗုဒ္ဓ ဘာသာဝင်များနှင့် အစ္စလမ် ဘာသာဝင်များကြား ဖြစ်ပွားခဲ့သော ပဋိပက္ခများ ကို ကွန်မြူနစ်များက စတင်လှုံ့ဆော်ခဲ့ကြောင်း ပြောကြားသည်။
ယခုဖြစ်ရပ်များ၏ နောက်ကွယ်တွင် မြန်မာပြည်ကွန်မြူနစ်ပါတီ ရှိနေပါသလားဆိုသော မေးခွန်းကိုဖြေကြားရာတွင် “သူတို့ (ကွန်မြူနစ်ပါတီ) ပါဝင်မှုရှိမရှိ ဆိုတာ ကျနော် မသိပါဘူး။ ကျနော်တို့မှာ ခိုင်မာတဲ့သက်သေ အထောက်အထား မရှိပါဘူး။ ကျနော်က ဒီ ပဋိပက္ခဖြစ်စဉ်တွေကိုအခြေခံပြီးတော့ မှတ်ချက်ပေးခဲ့တာပါ” ဟု ဆိုသည်။
“ကွန်မြူနစ်ပါတီ နောက်ကွယ်မှာ ရှိနေတယ်လို့ ကျနော်မပြောပါဘူး။ ဆူပူမှုတွေနဲ့ နောက်ကွယ်မှာ ကွန်မြူနစ်ဝါဒကို ယုံကြည် သက်ဝင်သူတွေ ရှိနေတယ်လို့ပဲ ကျနော် ဆိုလိုခဲ့တာပါ” ဟု ဦးအောင်သောင်းက ထပ်ပြောသည်။
ပဋိပက္ခများသည် မြန်မာနိုင်ငံအလယ်ပိုင်း ဒေသများတလျှောက်ပြန့်ပွားသွားခဲ့ပြီး မတ်လ ၂၁ ရက်မှ ၂၈ ရက်အတွင်း မြို့နယ်ပေါင်း ၁၁ မြို့နယ်မှ ပြည်သူများ ထိခိုက်ခံစားခဲ့၏။ စတင်ဖြစ်ပေါ်ခဲ့သော မိတ္ထီလာမြို့တွင် ၄၃ ဦး သေဆုံးခဲ့ ပြီး ဆေးရုံတက်ရောက် ကုသ ခံခဲ့ရသူပေါင်းမှာ ၉၃ ဦး အထိရှိခဲ့သည်။
အမေရိကန်အခြေစိုက် လူ့အခွင့်အရေး ဆရာဝန်များအဖွဲ့၏အဆို မိတ္ထီလာ အစ္စလမ်စာသင်ကျောင်းရှိ ကျောင်းသား ၃၂ ဦး ပျောက်ဆုံးဆဲ ဟုသိရသောကြောင့် သေဆုံးသူ အများစုမှာ အဆိုပါ ကျောင်းသားများ ဖြစ်နိုင်ဖွယ်ရှိသည်။
ဖြစ်ရပ်များအတွင်း အဓိကအနေဖြင့် အမျိုးသားရေးဝါဒီ ဗုဒ္ဓဘာသာဘုန်းကြီးများနှင့် အမည်မသိလူတစု ပါဝင် ပတ်သက်ခဲ့သည်ဟု သတင်းများတွင် ဖော်ပြကြသည်။ အချို့ကမူ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီအတွင်းမှ လက်ရှိအစိုးရ၏ ပြုပြင်ပြောင်းလဲရေးလုပ်ရပ်များကို လက်မခံလိုသူများက အကြမ်းဖက်သမားများကို အသုံးချ၍ ပဋိပက္ခကို ဖန်တီးခဲ့သည်ဟု ပြောဆိုသည်။
သို့ရာတွင် ဦးအောင်သောင်းက မြန်မာသံတော်ဆင့်ဂျာနယ်တွင် အကြမ်းဖက်မှု ကျူးလွန်သူများတွင် တချို့က ထောင်မှ လောလောလတ်လတ် လွတ်လာသူတွေဖြစ်ကြောင်း၊ တချို့က ဘုန်းကြီးများ၊ တချို့က မြေအောက်လှုပ်ရှားရေးသမားများ၊ တချို့က ကွန်မြူနစ်ထောက်ခံသူများဟု ပြောခဲ့သည်။
ဦးအောင်သောင်းသည် ပါတီအပေါ် သြဇာညောင်းပြီး ပါတီတွင်းမှ ရှေးရိုးစွဲ ခေါင်းမာသော အဖွဲ့ဝင် တယောက်ဟု အများက ထင်မြင်ယူဆထားကြသည်။ ဗိုလ်ချုပ်မှူးကြီးသန်းရွှေ အာဏာရှိစဉ်က ညာလက်ရုံးသဖွယ် အားကိုးခံခဲ့ရသူ ဖြစ်ပြီး ဒီပဲရင်းအရေးအခင်းဟု လူသိများသည့် ၂၀၀၃ခုနှစ်တွင်ဖြစ်ပွားခဲ့သော အတိုက်အခံခေါင်းဆောင်ဒေါ်အောင်ဆန်းစုကြည် နှင့် အဖွဲ့ဝင်များကို အကြမ်းဖက်တိုက်ခိုက်ခဲ့သည့် ဖြစ်ရပ်တွင် အခါတော်ပေး ကြိုးကိုင်ခဲ့သူအဖြစ်လည်း ထင်မှတ်စွပ်စွဲခံရ သူဖြစ်သည်။ ဒီပဲရင်းဖြစ်ရပ်တွင် ဒေါ်အောင်ဆန်းစုကြည်ကို ထောက်ခံသူ အမြောက်အများ သေဆုံးခဲ့ရသည်။
ဦးအောင်သောင်း၏ ဖြေရှင်းချက်သည် ပြီးခဲ့သော ဆူပူမှုများကို ပြေငြိမ်းအောင် မစွမ်းဆောင်နိုင်ခဲ့သည့် အစိုးရ၏ အားနည်းချက်ကို ကာကွယ်ရန်အတွက် ရမယ်ရှာ ပြောကြားခြင်း သက်သက် သာဖြစ်ကြောင်း မြန်မာပြည် ကွန်မြူနစ်ပါတီ၏ ပြောရေးဆိုခွင့်ရှိသူ ရဲဘော်သံချောင်းက ဆိုသည်။
“ဖြစ်ခဲ့တာတွေအတွက် သူတို့မှာ လုံးလုံးတာဝန်ရှိနေပြီဆိုတာ သူတို့ သိနေပြီလေ။ ဒါကြောင့် အမေရိကန်သံအမတ်နဲ့ ဘယ်သူတွေပါတယ်ဆိုတာ ဆွေးနွေးကြတော့ သက်သေပြစရာလည်း မရှိဘဲနဲ့ ရမ်းပြီးစွပ်စွဲလိုက်တာ”ဟု ရဲဘော်သံချောင်းက ဧရာဝတီသို့ တရုတ်နိုင်ငံတွင်းမှ တယ်လီဖုန်းဖြင့် ပြောကြားလိုက်သည်။
“ကျနော်တို့ကို ထောက်ခံတဲ့သူတွေ အတွက်တော့ စိတ်ပူတယ်” ဟု သူက ထပ်ပြောသည်။
မြန်မာပြည်ကွန်မြူနစ်ပါတီသည် အစိုးရကို ၁၉၈၉ အထိ ဆယ်စုနှစ်ပေါင်းများစွာ တော်လှန်တိုက်ခိုက်ခဲ့သည်။ ၁၉၈၈ ဒီမိုကရေစီအုံကြွမှုကို အကြောင်းပြု၍ အစိုးရက ကွန်မြူနစ်ပါတီကို ပြင်းထန်စွာ နှိပ်ကွပ်လာသည့်အခါ ပါတီဝင်များနှင့် ပါတီကိုထောက်ခံသူများ ဖမ်းဆီးခြင်းခံခဲ့ရပြီး ၁၉၉၀ နှစ်များတွင် ပါတီတွင်းအာဏာသိမ်းသဖြင့် တရုတ်နိုင်ငံအတွင်းသို့ ပါတီဝင်အမြောက်အများ ပြောင်းရွှေ့ခဲ့ကြရသည်။
ဦးအောင်သောင်း၏ ကွန်မြူနစ်ပါတီနှင့် ပတ်သက်သော စွပ်စွဲချက်များသည် လုံးဝ အဓိပ္ပါယ်မရှိကြောင်း ၁၉၈၈ ကျောင်းသား ကလပ်စည်း အတွင်းရေးမှူးနှင့် မြန်မာပြည် ကွန်မြူနစ်ပါတီဝင်ဟောင်း ဒေါက်တာဇော်မင်းက ပြောသည်။ ပါတီဝင်အများစုသည် အသက်အရွယ် ကြီးရင့်နေကြပြီဖြစ်ပြီး နိုင်ငံရေးလည်း မလုပ်နိုင်တော့ကြောင်းနှင့် မြန်မာနိုင်ငံ၏ ဒီမိုကရေစီရေး ပြောင်းလဲမှုများကို ထောက်ခံကြကြောင်း သူကဆိုသည်။
“ကျနော် ပြောနိုင်သလောက် ပြောရမယ်ဆိုရင် ဒီကိစ္စတွေက ကျနော်တို့နဲ့ လုံးဝ မပတ်သက်ပါဘူး၊ အစိုးရက တရားခံ ရှာနေတဲ့ အချိန်မှာ ကျနော်တို့ကို လွယ်လွယ်ကူကူ လက်ညိုးထိုးလိုက်တာပါပဲ” ဟု ကွန်မြူနစ်ပါတီဝင်ဟောင်း ဒေါက်တာဇော်မင်းက ဧရာဝတီသို့ ပြောကြားခဲ့သည်။
Ref: ဧရာဝတီ
ရေကျော် ဗလီမီး ရှို့မီးမဟုတ်ဟု အစီရင်ခံစာအရ ဝန်ကြီးချုပ် အတည်ပြု
စောဇင်ညီ
ဗုဒ္ဓဟူးနေ့၊ ဧပြီလ ၁၀ ရက် ၂၀၁၃
ရန်ကုန် (မဇ္ဈိမ)။ ။ ရန်ကုန်တိုင်း၊ ဗိုလ်တထောင်မြို့နယ်၊ ၄၈ လမ်းရှိ ရေကျော်ဗလီ မီးလောင်မှုသည် ရှို့ မီးမဟုတ်ဘဲ ပေါ့ဆမှုကြောင့်သာ လောင်ကျွမ်းသည့်မီး ဖြစ်ကြောင်း စုံစမ်းရေး အစီရင် ခံစာအား ကိုးကား၍ ရန်ကုန်တိုင်း အစိုးရ ဝန်ကြီးချုပ်က ပြောဆိုလိုက်သည်။
“အပြင်မှာ ကောလာဟလတွေ ထွက်သလို ဘယ်ဘာသာကမှ လာရှို့တာ မဟုတ်ဘူး။ မီးအားမြှင့်စက် အပူလွန်ကဲလို့ လောင်တာပါ” ဟု ဦးမြင့်ဆွေ က ယတိပြတ် ပြောသည်။
ဧပြီလ ၂ ရက်နေ့ နံနက် ၃ နာရီခန့်က အစ္စလာမ် ဘာသာဝင် တို့၏ ဗလီ ဝတ်ကျောင်း မီးလောင်မှု ဆိုင်ရာ စုံစမ်း စစ်ဆေးရေး အဖွဲ့ အစီရင်ခံစာနှင့် ပတ်သက်၍ ဝန်ကြီးချုပ် ဦးမြင့်ဆွေနှင့် မီဒီယာများ ဧပြီလ ၁၀ ရက်နေ့ ညနေက အစိုးရ အဖွဲ့ရုံးတွင် တွေ့ဆုံခဲ့သည်။
မီးလောင်စဉ် ဗလီ တာဝန်ရှိသော ဆရာမှာ မီးသတ်ရန်သာ အာရုံရှိနေပြီး ကလေးများအား ကယ်ရန် မေ့လျော့ခဲ့၍ ကျောင်းသား ၁၃ ဦး သေဆုံး ခဲ့ရခြင်း ဖြစ်ကြောင်း စုံးစမ်း စစ်ဆေးမှုက ဆိုသည်။ စုံစမ်း စစ်ဆေးရေးခုံရုံး၏ အဆိုပါ အစီရင်ခံစာအား အစ္စလာမ် အဖွဲ့အစည်းကြီး ငါးခုကို ချပြရာတွင် ထိုအဖွဲ့များက ယုံကြည်ကြောင်းလည်း ဦးမြင့်ဆွေ က မီဒီယာများကို ပြောသည်။
မီးလောင်ခံရသည့် ဗလီအား မြို့တော်စည်ပင်ထံ စာတင်၍ ပြန်လည် တည်ဆောက်ကာ ဗလီအဖြစ် ဆက်လက် ပြုလုပ်ခွင့် ရှိကြောင်း အစိုးရအဖွဲမှ တာဝန်ရှိသူများက ပြောသည်။
Ref: မဇ္ဈိမ
Wednesday, April 10, 2013
မင်းကိုနိုင်နှင့် ပဋိပက္ခ ဖြေရှင်းနည်း
မြတ်သူပန်
အင်္ဂါနေ့၊ ဧပြီလ ၀၉ ရက် ၂၀၁၃
မတ်လ ၁၄ ရက်နေ့က ဒေါ်အောင်ဆန်းစုကြည် လက်ပံတောင်းတောင် ကြေးနီစီမံကိန်း ကော်မရှင် ဥက္ကဋ္ဌ အနေနဲ့ ဆန္ဒပြနေတဲ့ လယ်သမားတွေ ဆီကို သွားပြီး ကော်မရှင်ရဲ့ လေ့လာ တွေ့ရှိချက်တွေကို တင်ပြခဲ့ရာမှ ဒေါ်စုရဲ့ နိုင်ငံရေး သက်တမ်းတလျှောက် တခါမှ မကြုံဖူးတဲ့ တောင်သူလယ်သမားတွေရဲ့ ကန့်ကွက်ဆန္ဒပြမှု ကို ခံခဲ့ရတာဟာ တွေးတောစရာ ဖြစ်လာပါတယ်။
ဒါမျိုးကိစ္စတွေဟာ နိုင်ငံရေးလောက ဖြစ်ရိုးဖြစ်စဉ်တွေ ဆိုတာတော့ မှန်ပါတယ်။ သို့သော် စဉ်းစားစရာကတော့ ဒေါ်စုသာ တောင်သူ လယ်သမားတွေရဲ့ အခြေအနေ၊ ခံယူချက်တွေပါ ထည့်တွက်မယ် ဆိုရင် ခုလို ရုပ်ပျက်ဆင်းပျက် ဖြစ်စရာ အကြောင်းမရှိဘူးလို့ ယူဆပါတယ်။
တောင်သူလယ်သမားများဟာ စုံစမ်းရေး ကော်မရှင်ရဲ့ သဘောသဘာဝကို နားမလည်ရှာ ကြပါ။ အဲဒီမှာ ဒေါ်စုနဲ့ Communication gap ဆိုတဲ့ ဆက်သွယ်မှု ချွတ်ချော် သွားတာသာ ဖြစ်ပါတယ်။ ဒါလည်း အဆန်းတော့ မဟုတ်ပါ။ နေရာတိုင်းမှာ ဖြစ်နေကျပါပဲ။
စိတ်ဝင်စားဖို့ အလွန်ကောင်းတဲ့ နောက်ဆက်တွဲ ဖြစ်ရပ်ကတော့ နောက်တနေ့ (မတ် ၁၅ ရက်နေ့) မှာ မင်းကိုနိုင် က RFA ကို ပြောခဲ့တဲ့ စကားစုပါ။ ဒေါ်စု (မနေ့က) တောင်သူတွေကို ပြောခဲ့တဲ့ ကိစ္စမှာ ဒေါ်စုရဲ့ ဆက်သွယ်ရေး ဟာကွက် (Communication gap) တွေ ချက်ချင်း ဖြည့်ပေးခဲ့တာ တွေ့ခဲ့ရပါတယ်။
ကော်မရှင်ဟာ အကြံပေးတာလောက်ပဲ ရှိတယ်၊ ဒါဟာ အစိုးရက အတည်ယူချင်မှ ယူမယ် ဆိုတာတွေကို ရှင်းပြခဲ့တယ်။ လယ်သမားတွေရဲ့ နစ်နာကြေးတွေကိုလည်း ညှိယူလို့ ရကြောင်းတွေ ပြောဆိုရှင်းပြသွားတဲ့ အပြင် အရေးအကြီးဆုံးဖြစ်တဲ့ ဒီလိုပဋိပက္ခများကို ဘယ်လိုဖြေရှင်းနိုင်တယ် ဆိုတဲ့ ပဋိပက္ခ ဖြေရှင်းနည်း (Conflict resolution methodology) ကို တိတိပပ ရှင်းရှင်းလေး တင်ပြသွားတာ တွေ့ရပါတယ်။
သူပြောတဲ့ ပဋိပက္ခ ဖြေရှင်းဖို့ အဓိက အကျဆုံး အချက် (Key element) ကတော့ ပဋိပက္ခ ဖြစ်နေတာတွေကို စိန်ခေါ်မှု (Challenge) လို့ မမြင်ဘဲ Problem solving ခေါ်တဲ့ ပြဿနာရဲ့ အဖြေကို ရှာတဲ့အသွင် အတွေးအခေါ်ကို ပြောင်းဖို့ ပြောသွားပါတယ်။
ဝါကျ တခုတည်းနဲ့ အလွန် ခက်ခဲရှုတ် ထွေးနိုင်တဲ့ အခြေအနေကို တမုဟုတ် ချင်း ပြောင်းပစ်နိုင်တဲ့ သော့ချက်ကို ထိထိမိမိ ပြတ်သားစွာ ပြောသွားတာဟာ အနောက်နိုင်ငံမှာ ဆိုရင် သူ့ကို Nothing short of brilliant လို့ မှတ်ချက်ချကြမှာပဲ။ ဒါကတော့ မင်းကိုနိုင်ရဲ့ စကားဆက်သွယ်မှု (Communicaion skill) ဟာ အလွန်ထက်မြတ် ထူးခြားတဲ့ အရည်အချင်းပါ။ အထက်က ဝါကျ တခုတည်းနဲ့ အလွန် ခက်ခဲရှုတ်ထွေးနိုင်တဲ့ အခြေအနေကို တမုဟုတ်ချင်း ပြောင်းပစ်နိုင်တဲ့ သော့ချက်ကို ထိထိမိမိ ပြတ်သားစွာ ပြောသွားတာဟာ အနောက်နိုင်ငံမှာ ဆိုရင် သူ့ကို Nothing short of brilliant လို့ မှတ်ချက်ချကြ မှာပဲ။
ပြီးတော့ ပဋိပက္ခနဲ့ ပတ်သက်ပြီး အုပ်စုတွေ တခုနဲ့တခု၊ တဦးနဲ့တဦး မျက်နှာချင်းဆိုင် မိမိတို့ရဲ့ လိုအပ်ချက် တွေကို ပွင့်ပွင့်လင်းလင်း ချဆွေးနွေးတင်ပြဖို့၊ မကျေနပ်တာတွေကို စားပွဲဝိုင်းမှာ ချဆွေးနွေးပြီး တူညီတဲ့ ရလဒ်ကို ရှာဖို့ ပဋိပက္ခ ဖြေရှင်းနည်း Strategy (မဟာဗျူဟာ) ကိုလည်း ပြည့်စုံစွာ တင်ပြသွားပါတယ်။
မင်းကိုနိုင်ဟာ တင်ပြသွားတဲ့ Conflict resolution model စံနမူနာ နည်းနာဟာ အနောက်နိုင်ငံတွေမှာ Management (စီမံအုပ်ချုပ်မှု) ပညာရှင်တွေ နှစ်ပေါင်းများစွာ အမျိုးမျိုး အဖုံဖုံ စမ်းသပ်တီထွင်ကြံဆပြီး စနစ်တခု (Methodology) အနေနဲ့ ဖန်တီးခဲ့ကြပြီး ကြီးကျယ်ခမ်းနားတဲ့ ပညာရပ်အဖြစ် ခုချိန်မှာ ထွန်းကားလျက် ရှိပါတယ်။
တက္ကသိုလ်တွေမှာရော သင်တန်းတွေ ပို့ချကြပါတယ်။ ကုမ္ပဏီ ကြီးငယ်တွေကလည်း Conflict resolution ပညာရှင်တွေကို ငှါးရမ်းပြီး ကုမ္ပဏီတွင်းမှာရော၊ တခြား ကုမ္ပဏီတွေနဲ့ ကြုံတွေ့ရတဲ့ ပြဿနာတွေကို ဖြေရှင်းဖို့ အဲဒီပညာရှင်တွေကို ကြေးကြီးပေးပြီး ငှါးကြရတယ်။ ဒီပညာရှင်တွေကလည်း Consulting Company တွေထောင်ပြီး စီးပွားဖြစ် လုပ်လာကြတယ်။ စာအုပ်တွေ ရေးပြီးလည်း ဖြန့်ဝေကြတယ်။ ဗီဒီယို၊ ဒီဗီဒီတွေ ထုတ်ပြီးတော့ အလုပ်ရုံ Workshop တွေလည်း အခကြေးငွေယူပြီး သင်ကြားပို့ချပေးကြတယ်။ တိုတိုပြောရရင် ဒီနည်းပညာဟာ စီးပွားရေးလုပ်ငန်း (Industry) တခုလို ဖြစ်ပေါ်နေပါတယ်။
မင်းကိုနိုင်ဟာ တက္ကသိုလ်ကျောင်းလည်း မပြီးခဲ့ပါဘူး။ ထောင်ထဲမှာ ကိုယ်နှိုက်က Solitary confinement လို့ခေါ်တဲ့ တကိုယ်တည်း သီးသန့် (တိုက်ပိတ်) ကျခံခဲ့ရတယ်။ အပြင်မှာ နေရတာ သုံးလေးနှစ်ပဲ ရှိပါလိမ့်မယ်။ ဒီပညာရှင်ကြီးတွေရဲ့ စာအုပ်ကြီးတွေ၊ စာတမ်းတွေ၊ ဒီဗီဒီတွေကို လေ့လာခွင့် ရမယ်လို့တော့ မထင်ပါ။ သူလို နိုင်ငံရေးသမား တယောက်ဟာ ဘယ်လို ၈၈ ခေါင်းဆောင် အယောက် ၂၀ လောက်ကို တပြေးညီ၊ ပြီးတော့ အတွေးလိုက်ပြီး သူနဲ့ တပါတည်း ခေါင်းဆောင်အရည်အချင်း ပြီးပြည့်စုံအောင် ဘယ်လို ပံ့ပိုးဖန်တီးခဲ့တယ်ဆိုတာ မင်းကိုနိုင် ၂၀၁၂ ထောင်က ထွက်လာပြီးကတည်းက စားရေးသူအနေနဲ့ အလွန်စိတ်ဝင်စား ခဲ့ပါတယ်။
Consensus building ခေါ်တဲ့ အတွေးအခေါ်အမြင်တွေ အားလုံးနီးပါး တူညီတဲ့အထိ အချင်းချင်း ဆွေးနွေး ယိုင်းပင်းခဲ့ကြလို့ ဒီလောက် ညီညွတ်တဲ့ ခေါင်းဆောင်ထုကြီးကို ပုံဖော်နိုင်လိမ့်မယ်လို့ ယူဆခဲ့လို့လည်း မင်းကိုနိုင်ကို တွေ့ရှိခဲ့စဉ်က အကြမ်းဖျဉ်း လေ့လာမိခဲ့ပါတယ်။
နောက်ထပ် အသေးစိတ် လေ့လာဖို့ ကြံရွယ်ကာရှိသေးတယ် မင်းကိုနိုင်က ကြေးနီစီမံကိန်းကိစ္စမှာ တိုင်းပြည်ကို သူ့ရဲ့ ပဋိပက္ခ ဖြေရှင်းနည်း နိဿယကို တင်ပြလိုက်တော့ စာရေးသူရဲ့ ရင်ထဲမှာ “အာဂလူပဲ” လို့ မြည်ဟည်းမိပါတယ်။
မင်းကိုနိုင် ဒီလို နိုင်ငံကို သူ့ရဲ့ အတွေးအခေါ်၊ သူ့ရပ် လုပ်ရပ်တွေ၊ ကိုယ်တွေ့တွေကနေ ရလာတဲ့ ခံယူချက် နည်းပညာတွေကို ထုတ်ဖော်ပြောဆိုတာကို အလွန်ပဲ ဝမ်းမြောက်သွားရမိပါတယ်။
မြန်မာလူမျိုးများဟာ ယေဘူယျအားဖြင့် Consensus building မှာ အလွန်အားနည်းပြီး ထစ်ကနဲရှိ မကျေနပ်ကြ၊ ကွဲကြ ပြဲကြဆိုတာ အထူးပြောနေစရာ မလိုပါ။ အဲဒီလို မြန်မာ့လူမှုရေးပုံစံ အချိုးမပြေတဲ့ ကြားထဲက ထောင်နန်းစံ မင်းသားလေး မင်းကိုနိုင် က မြန်မာတို့ရဲ့ ဆန့်ကျင်ဘက်ဖြစ်တဲ့ အတွေးအခေါ် လူမှုရေးပုံစံ (Model) တခုကို လက်တွေ့ပုံဖော်ခဲ့ပြီး ခုတော့ သူ့နည်းပညာဟာ စံအဖြစ် မြန်မာ့နိုင်ငံရေး လောကကို ထိုးထွင်းဝင်နိုင်ပါစေလို့လည်း မျှော်လင့်မိပါတယ်။
အခုချိန်မှာ ၈၈ ခေါင်းဆောင်တချို့ ကိုကိုကြီး၊ ကိုဌေးကြွယ်၊ ကိုမင်းဇေယျာတို့ နိုင်ငံရေးပါတီ တည်ထောင်ဖို့ စဉ်းစားနေကြတာဟာ အလွန်ဝမ်းသာအားရဖို့ ကောင်းပါတယ်။ သို့သော် ၈၈ ရဲ့ ခေါင်သူကြီးဖြစ်တဲ့ မင်းကိုနိုင်က ပါတီထဲ ဝင်ဖို့ မစဉ်းစားဘဲ အနုပညာနဲ့ပဲ ပြင်ပကနေပြီး Civil society ကိစ္စတွေ လုပ်ဆောင်ဖို့ အာသီသရှိကြောင်း မီဒီယာကနေ သိရပါတယ်။
မင်းကိုနိုင်ဟာ ပါတီထဲ မဝင်ဘဲနေရင် ဒီမိုကရေစီလမ်းကြောင်း လမ်းထွင်နေတဲ့ကာလမှာ နိုင်ငံအတွက် အလွန့်အလွန် နစ်နာမှာ ဖြစ်ပါတယ်။
မင်းကိုနိုင်လို လူမျိုးတယောက် ပါလီမန်ထဲမှာ အထူးပဲ လိုအပ်ပါလိမ့်မယ်။ သူဟာ နိုင်ငံရေး ကျွမ်းကျင်သူ ခေါင်းဆောင်ကောင်း တယောက်လည်း ဖြစ်ပါတယ်။ နိုင်ငံရေးသမားတွေထဲမှာ အလွန့်အလွန် ရှားပါးတဲ့ Management expert, Organisational skill ပြီးတော့ Conflict resolution expert ဆိုတဲ့ ကျွမ်းကျင်မှု တွေဟာ သုံးလေးမျက်နှာမှာတောင် ဖြည့်ဆည်းပေးနိုင်တဲ့ နိုင်ငံရေးသမားဟာ လွှတ်တော်ထဲ၊ အစိုးရထဲမှာ ပါဝင်ပြီး သူ့ရဲ့ ထူးခြားတဲ့ အရည်အချင်းတွေကို အများဆုံး အသုံးချသင့်ပါတယ်။
မင်းကိုနိုင်ဟာ ၈၈ ကတည်းက ရဲရဲတောက် ကျောင်းသားခေါင်းဆောင်အဖြစ်၊ ခုနောက်ပိုင်းမှာ နိုင်ငံရေး ဦးဆောင်သူ၊ အနုပညာသမား၊ စာရေးဆရာ၊ ကဗျာဆရာ၊ ပန်းချီဆရာ၊ သီချင်းရေးဆရာ၊ သံချပ်ဆရာ စတဲ့ သူ့ရဲ့ နိုင်ငံရေးနဲ့အနုပညာ အရည်အချင်းတွေကို ပြည်သူလူထုက သိရှိပြီးသား ဖြစ်ပါတယ်။
သို့သော် သူ့အကြောင်းတွေထဲမှာ ပြည်သူလူထုကြီး မသိသေးတဲ့ အကြောင်းအရာကတော့ နိုင်ငံတကာနဲ့ ယှဉ်ပြိုင်နိုင်တဲ့ ပဋိပက္ခ ဖြေရှင်းရေးဆိုတဲ့ နည်းပညာပိုင်ရှင်တဦးဆိုတာ ပြည်သူလူထုတွေ အပ်ကျမတ်ကျ သိမှာ မဟုတ်သေးဘူးလို့ စာရေးသူ ထင်မြင်မိလို့ ဒီဆောင်းပါးနဲ့ပဲ ပြည်သူလူထုကို မိတ်ဆက်ဖော်ပြလိုက် ရခြင်း ဖြစ်ပါတယ်။
Ref: မဇ္ဈိမ
နိုင်ငံခြားသားတွေအတွက် မြောက်ကိုရီးယား သတိပေးချက် တောင်ပိုင်း ဂရုမစိုက်
09.04.2013
စစ်ရေးပဋိပက္ခ ဖြစ်နိုင်ချေကြောင့် တောင် ကိုရီးယား ကနေ နိုင်ငံခြားသားတွေ ထွက်ခွာသွားဖို့ မြောက်ကိုရီးယားက တိုက်တွန်းနေပါတယ်။ ဒါပေမဲ့လည်း အခုလို မြောက်ကိုရီးယား ခြိမ်းခြောက်မှုကြောင့် တောင်ကိုရီးယား ဘက်မှာ ကြီးကြီးကျယ်ကျယ် လှုပ်လှုပ်ရှားရှားတော့ မရှိခဲ့ပါဘူး။
နျူကလီးယားစစ် ဖြစ်နိုင်ချေ အန္တရာယ်ကြောင့် လုံခြုံရေးအတွက် ခရီးသွား ဧည့်သည်တွေနဲ့ စီးပွားရေး လုပ်ငန်းတွေ ဆိုးလ်မြို့ ကနေ ရှောင်ခွာကြဖို့ မြောက်ကိုရီးယား ရုပ်မြင်သံကြား ကနေ အင်္ဂါနေ့တုန်းက ကြေညာသွားတာပါ။
ဒါပေမဲ့လည်း တောင်ကိုရီးယားဘက်က စီးပွားရေးလုပ်ငန်းတွေကတော့ ပုံမှန်အတိုင်း လည်ပတ်ခဲ့သလို၊ ဆိုးလ်မြို့တော်မှာလည်း ပုံမှန်အခြေအနေတွေပဲ ရှိခဲ့ပါတယ်။ ပြီးခဲ့တဲ့ သီတင်းပတ်တုန်းကလည်း မြောက်ကိုရီးယားမှာရှိတဲ့ နိုင်ငံခြားသံရုံးက သံတမန်တွေကို အခု ဗုဒ္ဓဟူးနေ့ နောက်ဆုံးထားပြီး ထွက်ခွာကြဖို့ မြောက်ကိုရီးယားဘက်က ပြီးခဲ့တဲ့ သီတင်းပတ်အတွင်းက သတိပေးချက် ထုတ်ခဲ့ပါတယ်။
ဒါပေမဲ့လည်း ဘယ်သံရုံးကမှ ပြုံယမ်းကနေ သူတို့ သံဝန်ထမ်းတွေကို အရေးပေါ် ထွက်ခွာစေတာမျိုး မကြားရသေးပါဘူး။ အခုလို မြောက်ကိုရီးယားရဲ့ ခြိမ်းခြောက်မှုတွေဟာ မြောက်ကိုရီးယားကို ပိုပြီး အထီးကျန်ဖြစ်စေလိမ့်မယ်လို့ အမေရိကန် သမ္မတ အိမ်ဖြူတော် ပြောခွင့်ရသူ ဂျေး ကာနေး (Jay Carney) က တုံ့ပြန်ပါတယ်။
ကုလသမဂ္ဂ အတွင်းရေးမှူးချုပ် ဘန်ကီမွန်းကတော့ ကိုရီးယားကျွန်းဆွယ် တင်းမာမှုဟာ အတော့်ကို အန္တရာယ် ကြီးမားလာတဲ့ အခြေအနေကို ရောက်နေပြီလို့ သူ့ရဲ့ စိုးရိမ်ချက်ကို ထုတ်ပြောပါတယ်။
ပစိဖိတ်ဒေသက အမေရိကန် တပ်ဖွဲ့တွေကို ကြီးကြပ်ရတဲ့ ရေတပ်ဗိုလ်ချုပ်ကြီး စမ်မျူရယ် လော့ခ်လား (Samuel Locklear) ကတော့ မြောက်ကိုရီးယားဘက်က စစ်ရေး ရန်စမှု လုပ်လာရင်တော့ ပြန်လည် တုံ့ပြန်ဖို့အတွက် အမေရိကန်တပ်တွေနဲ့ တောင်ကိုရီးယားတပ်တွေ အဆင်သင့်ရှိတယ်လို့ ပြောပါတယ်။
မြောက်ကိုရီးယားဟာ မကြာခင်ရက်ပိုင်းအတွင်း ဒုံးကျည်စမ်းသပ်မှု လုပ်လာမယ့်ပုံ ရှိတယ်လို့ အစိုးရတာဝန်ရှိတွေ ပြောတာကို ကိုးကားပြီး တောင်ကိုရီးယား သတင်းတွေမှာတော့ ဖော်ပြနေပါတယ်။
Ref: VOA News
မြန်မာ့ဒီမိုကရေစီရေး ၂၀၁၅ ရွေးကောက်ပွဲနဲ့ အကဲဖြတ်မည်
ကိုသားညွန့်ဦး
09.04.2013
မြန်မာနိုင်ငံတွင်း ဒီမိုကရေစီ အသွင်ကူးပြောင်းရေး အောင်မြင်မှု ရှိမရှိဆိုတာကို လာမယ့် ၂၀၁၅ ခုနှစ် ရွေးကောက်ပွဲ အခြေအနေနဲ့ တိုင်းတာ ရလိမ့်မယ်လို့ မကြာခင်က မြန်မာနိုင်ငံကို သွားခဲ့တဲ့ Carter Center ညွန်ကြားရေးမှူး ဒေါက်တာ ဒေးဗစ် ကာရိုးလ် (Dr.David Carroll) က ပြောပါတယ်။ မြန်မာ့နိုင်ငံရေးမှာ အစုအဖွဲ့ အားလုံး ကျယ်ကျယ်ပြန့်ပြန့် ပါဝင်ဆောင်ရွက် လာဖို့အတွက် ဒီကြားထဲ အကောင်အထည်ဖော် ဆောင်ရွက်ဖို့ လိုမယ်လို့ ဆိုပါတယ်။ ဒေါက်တာ ကာရိုးလ် ကို ဆက်သွယ် မေးမြန်းထားတဲ့ ကိုသားညွန့်ဦး တင်ပြထားပါတယ်။
သမ္မတ ကာတာ (Carter) ကိုယ်တိုင် ဦးဆောင်တဲ့ Carter Center အဖွဲ့ဟာ မြန်မာနိုင်ငံမှာ သမ္မတ ဦးသိန်းစိန် အပါအ၀င် အစိုးရ အာဏာပိုင်တွေကိုရော၊ ဒေါ်အောင်ဆန်းစုကြည်နဲ့ အတိုက်အခံ ပါတီခေါင်းဆောင်တွေ အရပ်ဘက် လူမှုအဖွဲ့အစည်း အသီးသီးက ကိုယ်စားလှယ်တွေကိုပါ တွေ့ဆုံခဲ့တာပါ။
မြန်မာနိုင်ငံတွင်းက အသွင်ကူးပြောင်းရေး လုပ်ငန်းစဉ်တွေနဲ့ ငြိမ်းချမ်းရေး ဖော်ဆောင်မှု လုပ်ငန်းစဉ်တွေကို လေ့လာခဲ့ကြပြီး၊ ဒီလုပ်ငန်းတချို့မှာ Carter Center က အကူအညီတွေ ပေးသွားနိုင်ဖို့လည်း ကမ်းလှမ်းခဲ့တယ်လို့ သိရပါတယ်။
Carter Center ဟာ ကမ္ဘာ့နိုင်ငံအတော်များများက ရွေးကောက်ပွဲကို လွတ်လပ်မျှတမှု ရှိ မရှိနဲ့ ရွေးကောက်ပွဲ စနစ်တွေကို စောင့်ကြည့် အထောက်အပံ့ ပေးနေတာနဲ့အညီ၊ မြန်မာနိုင်ငံမှာ လာမယ့် ၂၀၁၅ ရွေးကောက်ပွဲကိုလည်း စိတ်ဝင်စားမှု ရှိတာ တွေ့ရပါတယ်။ ဒီ ၂၀၁၅ ရွေးကောက်ပွဲဟာ အသွင်ကူးပြောင်းရေး လုပ်ငန်းစဉ်ရဲ့ အခရာကျတဲ့ အခြေအနေတခု ဖြစ်တယ်လို့ Carter Center ရဲ့ ဒီမိုကရေစီ အစီအစဉ်ဆိုင်ရာ ညွှန်ကြားရေးမှူး ဒေါက်တာ ဒေးဗစ် ကာရိုးလ် (Dr.David Carroll) က ရှုမြင်ပါတယ်။
“အသွင်ကူးပြောင်းရေးဆိုတာ ရေရှည်သွားရတဲ့ လုပ်ငန်းစဉ်ပါ။ အောင်မြင်မှု ရှိ မရှိဆိုတာကိုတော့ လာမယ့် ၂၀၁၅ ခုနှစ် ရွေးကောက်ပွဲနဲ့ တိုင်းတာ ရပါလိမ့်မယ်။ ဒီ့မတိုင်ခင် အချိန်မှာတော့ မြန်မာ့နိုင်ငံရေး လုပ်ငန်းစဉ်ထဲမှာ အစုအဖွဲ့အားလုံး ကျယ်ကျယ်ပြန့်ပြန့် ပါဝင်လာနိုင်အောင် လုပ်ဆောင်စရာတွေ အတော်များများ ရှိနေပါတယ်။ နိုင်ငံရေးလုပ်ငန်းစဉ်မှာ အစုအဖွဲ့အားလုံး ပါဝင်နိုင်ဖို့၊ သူတို့ရဲ့ သဘောထားတွေ အမြင်တွေကို ထုတ်ပြောနိုင်ဖို့ လိုပါတယ်။”
၂၀၁၅ ရွေးကောက်ပွဲနဲ့ အကြိုပြင်ဆင်မှု ကာလတွေမှာလည်း Carter Center အနေနဲ့ အကူအညီ ပေးချင်တယ်ဆိုတာကိုလည်း ကမ်းလှမ်း ထားတဲ့ အကြောင်း သိရပါတယ်။
“၂၀၁၅ ရွေးကောက်ပွဲနဲ့ ဒီ့မတိုင်ခင် ပြင်ဆင်ဆောင်ရွက်မှုတွေနဲ့ပတ်သက်လို့ ကျနော်တို့အနေနဲ့ အထူးပဲ စိတ်ဝင်စားတယ်ဆိုတာကို ကျနော်တို့နဲ့ တွေ့ခဲ့တဲ့ အရေးကြီးတဲ့ ပုဂ္ဂိုလ် အားလုံးကို ပြောခဲ့ပါတယ်။ ရွေးကောက်ပွဲကို လေ့လာစောင့်ကြည့်ဖို့ တရားဝင် ဖိတ်ခေါ်ချက် ရရင်တော့၊ ကျနော်တို့အနေနဲ့ ဒီအခန်းကဏ္ဍမှာ လိုလိုလားလားနဲ့ ဆောင်ရွက်ချင်ပါတယ်။”
သူတို့ တွေ့ဆုံခဲ့တဲ့ နိုင်ငံရေးပါတီတွေနဲ့ နိုင်ငံရေး အစုအဖွဲ့တွေဟာလည်း လာမယ့် ၂၀၁၅ အတွက် ပြင်ဆင်မှုတွေ စလုပ်နေတာ တွေ့ရတယ်လို့ ဒေါက်တာ ကာရိုးလ် က ပြောပါတယ်။ အထူးသဖြင့်တော့ ရွေးကောက်ပွဲစနစ်ပါ။
“နိုင်ငံရေးပါတီအားလုံးဟာ လာမယ့် ၂၀၁၅ ရွေးကောက်ပွဲကို အသွင်ကူးပြောင်းရေးအတွက် အရေးကြီးတဲ့ အခြေအနေတရပ်အနေနဲ့ မျှော်လင့် စောင့်စားနေကြ ပါတယ်။ အရေးအကြီးဆုံး ကတော့ ရွေးကောက်ပွဲ စနစ်ပါ။ ရွေးကောက်ပွဲစနစ်နဲ့ ပတ်သက်လို့ ဒီနှစ်ထဲမှာ အပြောင်းအလဲတွေ ထွက်လာမလား မျှော်နေကြပါတယ်။ ရွေးကောက်ပွဲ စနစ်သစ်တခု ဖြစ်လာပြီဆိုရင်တော့ အာဏာပိုင်တွေအနေနဲ့ ဒါကို အကောင်အထည်ဖော်မယ့် လုပ်ငန်းစဉ်တွေ ရေးဆွဲရမှာပါ။ ဒါကြောင့် နိုင်ငံရေးခေါင်းဆောင်တွေ၊ ပါတီခေါင်းဆောင်တွေကြားမှာ ဒီနှစ်ထဲ ရွေးကောက်ပွဲစနစ် အပြောင်းအလဲကိစ္စကို ပြင်းပြင်းထန်ထန် ဆွေးနွေးနေတာရှိပါတယ်။”
ပါတီကြီးတွေ လွှမ်းမိုးတဲ့စနစ်ထက်၊ အချိုးကျ ကိုယ်စားပြုမှုနဲ့ ရွေးကောက်တဲ့ ရွေးကောက်ပွဲစနစ် သွားဖို့ နိုင်ငံရေးပါတီတွေအကြား ဆွေးနွေးတိုင်ပင်မှုတွေ ကျယ်ကျယ်ပြန့်ပြန့် ရှိနေပါတယ်။ ရွေးကောက်ပွဲ ကျင်းပချိန်အပြင် မကျင်းပမှီ ပြင်ဆင်မှုတွေ ညှိနှိုင်းမှုတွေဟာလည်း အသွင်ကူးပြောင်းရေးအတွက် အရေးပါတယ်လို့ ဒေါက်တာ ကာရိုးလ် က ပြောပါတယ်။
တချိန်တည်းမှာတော့ အသွင်ကူးပြောင်းရေးအတွက် တိုင်းရင်းသား လူနည်းစုတွေအားလုံးနဲ့ ငြိမ်ချမ်းရေး သဘောတူညီချက်ယူပြီး၊ လက်တွေ့ အကောင်အထည်ဖော်ဖို့လည်း လိုမယ်လို့ ပြောပါတယ်။ တိုင်းရင်းသား လူမျိုးစုံပါဝင်တဲ့ မြန်မာနိုင်ငံမှာ လူနည်းစု တိုင်းရင်းသားတွေအားလုံး နိုင်ငံရေးလုပ်ငန်းစဉ်ထဲမှာ ကျယ်ကျယ်ပြန့်ပြန့် ပါဝင်လာဖို့ လိုမယ်လို့ ထောက်ပြပါတယ်။ တချိန်တည်းမှာတော့ လူ့အခွင့်အရေးနဲ့ ပတ်သက်လို့ စိုးရိမ်စရာ အခြေအနေတွေလည်း ရှိနေသေးတယ်လို့ ဒေါက်တာ ကာရိုးလ် က ပြောပါတယ်။
“စိုးရိမ်မကင်းဖြစ်စရာ အခြေအနေတချို့၊ အထူးသဖြင့်တော့ မကြာသေးခင်တုန်းက လူမျိုးရေး အဓိကရုဏ်းတွေ ဖြစ်ခဲ့တာတွေနဲ့ ရခိုင်ပြည်နယ်တွင်းက အခြေအနေတွေ၊ နောက် ပဋိပက္ခတွေကြောင့် အိုးမဲ့အိမ်မဲ့ ထွက်ပြေးကြရတဲ့ ဒုက္ခသည်တွေ အခြေအနေတွေ ရှိနေပါတယ်။ ဒါကိုလည်း သမ္မတ ကာတာအနေနဲ့ သူ့မိန့်ခွန်းမှာ ပြောခဲ့ပြီးပါပြီ။ မြန်မာအာဏာပိုင်တွေအနေနဲ့ ဒီပြဿနာရပ်တွေကို အလျင်အမြန် ကိုင်တွယ်ဖြေရှင်းလိမ့်မယ်လို့ မျှော်လင့်ပါတယ်။”
သမ္မတ ကာတာနဲ့ Carter Center အဖွဲ့ရဲ့ ၄ ရက်ကြာ မြန်မာနိုင်ငံ ခရီးစဉ်အတွင်းမှာ ရန်ကုန်အပြင် နေပြည်တော်မှာ အစိုးရထိပ်ပိုင်း တာဝန်ရှိသူတွေ၊ လွှတ်တော်ပိုင်းက တာဝန်ရှိသူတွေနဲ့ တွေ့ခဲ့ပါတယ်။
Carter Center အနေနဲ့ မြန်မာနိုင်ငံရဲ့ အသွင်ကူးပြောင်းရေး လုပ်ငန်းတွေမှာ အကူအညီပေးနိုင်ဖို့ ကမ်းလှမ်းထားရာမှာ၊ အစိုးရဘက်က ခွင့်ပြုချက် ရမယ်ဆိုရင်တော့ သူတို့အနေနဲ့ မြန်မာနိုင်ငံမှာ ရုံးဖွင့်ပြီး ရွေးကောက်ပွဲ စောင့်ကြည့်ရေးလုပ်ငန်းတွေကို ပြင်ဆင် ဆောင်ရွက်သွားဖို့ စီစဉ်ထားတယ်လို့ သိရပါတယ်။
Ref: VOA News
အခွန်မဆောင်ခြင်းကြောင့် ပြည်သူများ ဆုံးရှုံးမှုဖြစ် ဟု ပြည်သူ့လွှတ်တော် ဥက္ကဌဆို
စောဇင်ညီ
အင်္ဂါနေ့၊ ဧပြီလ ၀၉ ရက် ၂၀၁၃
ရန်ကုန်(မဇ္ဈိမ)။ ။ မြန်မာနိုင်ငံတွင် စီးပွားရေး လုပ်ငန်းရှင်ကြီးများနှင့် ဝန်ထမ်းများ အခွန်မဆောင် ကြခြင်းသည် နိုင်ငံတော် ဆုံးရှုံးမှု မဟုတ်ပဲ ပြည်သူများ အတွက် ဆုံးရှုံးမှုသာ ဖြစ်ကြောင်း ယနေ့ ပြည်ထောင်စု မြန်မာနိုင်ငံတော် ကုန်သည်များနှင့် စက်မှု လက်မှု လုပ်ငန်းရှင်များ အသင်းချူပ် (UMFCCI) တွင် ပြုလုပ်သည့် တွေ့ဆုံပွဲတွင် ပြည်သူ့လွှတ်တော် ဥက္ကဌ သူရဦးရွှေမန်းက ပြောခဲ့သည်။
ထိုသို့ ပြောကြားခြင်းမှာ အခွန်ဆောင်နိုင်သူများမှာ အခွန်မဆောင်၍ ကျန်အခွန် မဆောင်ရသော ပြည်သူများ အတွက် ထောက်ပံ့မှုများ နိုင်ငံတော်မှ မလုပ်နိုင်ခြင်းကြောင့် ဖြစ်ကြောင်း ၎င်းက ဆိုသည်။
သူရဦးရွှေမန်းက “ဘယ်သူတွေကို အခွန်ကောက်ရမယ် မကောက်ရဘူးလဲ ဆိုတာ စာရင်းတွေရှိဖို့ လိုတယ်။ ကောက်ရမဲ့လူတွေကို မှတ်သားပြီးတော့ ကောက်သင့်တယ်။ ဒါမှ နိုင်ငံတော်က ပြည်သူတွေကို
ထောက်ပံ့မှုတွေ ပေးနိုင်မယ်” ဟု ရှင်းပြခဲ့သည်။
စီးပွားရေး လုပ်ငန်းရှင် ပြည်သူများ အနေဖြင့် တလလျှင် ၁၄.၄ သိန်း ရရှိပါက အခွန်ထမ်း ရမည်ဖြစ်ပြီး အောက်ခြေ ဝန်ထမ်း ပြည်သူတဦး အနေဖြင့် ၁.၂ သိန်း ရရှိပါက အခွန်ထမ်းရမည် ဖြစ်ကြောင်း လွှတ်တော် ဥက္ကဌ၏ ပြောကြားချက်အရ သိရသည်။
အဆိုပါ ကောက်ခံမည် အကောက်အခွန်များအနေဖြင့် အများပြည်သူမှ လက်ခံနိုင်စရာ အခြေအနေ တစ်ရပ်ဖြစ်သင့်ကြောင်း အမျိုးသား ဒီမိုကရေစီ အဖွဲချုပ် ဥက္ကဌ ဒေါ်အောင်ဆန်းစုကြည်ကပြောသည်။
"ကျွန်မတို့နိုင်ငံမှာ အခွန်ကောက်တယ် ဆိုတာက ပြည်သူ့အကျိုး အတွက်လည်း ပါတယ် ဆိုတာ သိဖို့လိုပါတယ်။ တဖက်တည်း စဉ်းစားလို့ရတာ မဟုတ်ဘူး။ အခွန်ကောက် ၀န်ထမ်းတွေက လည်း အခွန်အကြောင်းကို ပြည်သူတွေ သိဖို့ ပြောကြားဖို့ လိုတယ်။" ပာု ဒေါ်အောင်ဆန်းစုကြည် ကပြောသည်။
မြန်မာနိုင်ငံတွင် ယခင်စစ်အစိုးရလက်ထက်က မြန်မာပြည်၏ ထိပ်သီး စီးပွားရေး လုပ်ငန်းကြီးများမှ အခွန်ရှောင်ခဲ့ရာ အစိုးရသစ် တက်လာပြီး ယခုနှစ်မှသာ အခွန်ဆောင်ရန် ဘဏ္ဍာရေးနှင့် အခွန်ဝန်ကြီးဌာနမှ အသိပေး ပြောကြားခဲ့ကြောင်း သတင်းအချက်အလက်များမှ သိရသည်။
အခွန်ထမ်းရမည့် ပြည်သူများအနေဖြင့် အခွန်အခနှုန်းထားများအား ပေးဆောင်ရန် စားဝတ်နေရေး အဆင်ပြေသည့် အချိန်အတိုင်းအတာ လိုအပ်ကြောင်း ထိုမှသာ အခွန်ပေးဆောင် နိုင်ကြမည် ဖြစ်ကြောင်း ရွှေလင်ပန်း စက်မှုဇုန်ရှိ ကေဇာမြန်မာ ကုမ္ပဏီပိုင်ရှင် ကိုဝင်းကိုမျိူးက ပြောသည်။
၎င်းက “ နိုင်ငံအတွက် အခွန်က အရေးကြီးပါတယ်။ လူတွေအတွက်လဲ စားဝတ်နေရေး ဖူလုံဖို့က အရေးကြီး တယ်။ ဖူလုံမှ အခွန်ပေးနိုင်မှာ။ ဒီလိုဖြစ်မှပဲ အပြန်အလှန် အဆင်ပြေမှာပါ ” ဟု ဆိုသည်။
ပြည်ထောင်စု မြန်မာနိုင်ငံတော် ကုန်သည်များနှင့် စက်မှု လက်မှု လုပ်ငန်းရှင်များ အသင်းချူပ် (UMFCCI) တွင် ပြည်သူ့လွှတ်တော် ဥက္ကဌ သူရ ဦးရွှေမန်းနှင့် နယ်ပယ် အသီးသီးမှ လုပ်ငန်းရှင်များနှင့် အသင်း အဖွဲ့များ ယနေ့ တွေ့ဆုံခဲ့ကြသည်။
Ref: မဇ္ဈိမ
ရွေးကောက်ပွဲ မဲအချိုးကျစနစ် ပါတီများ သဘောထားကွဲ
ထက်နိုင်ဇော်
April 9, 2013
၂၀၁၅ ခုနှစ် ပါတီစုံ အထွေထွေ ရွှေးကောက်ပွဲ တွင် ပြည်သူလူထု၏ ထောက်ခံမဲ ရရှိမှုပေါ် မူတည်ပြီး လွှတ်တော် ကိုယ်စားလှယ် အချိုးကျ ရရှိသည့်စနစ် (Propotional Representative) ကျင့်သုံးရေး ကြိုးပမ်းမှု အပေါ် နိုင်ငံရေး ပါတီများအကြား သဘောထား ကွဲလွဲနေကြောင်း သိရှိရသည်။
အမျိုးသားဒီမိုကရေစီအင်အားစုပါတီနှင့် တိုင်းရင်းသားစည်းလုံးညီညွတ်ရေး ပါတီတို့က လာမည့် ၂၀၁၅ ခုနှစ် ရွေးကောက်ပွဲတွင် လက်ရှိ ကျင့်သုံးနေသည့် မဲအများဆုံး ရရှိသူက အနိုင်ရသည့် စနစ်အစား ပြည်သူလူထု၏ ထောက်ခံသော မဲအရေအတွက် အပေါ်မူတည်ပြီး လွှတ်တော် ကိုယ်စားလှယ် အချိုးကျ ရရှိသည့်စနစ် (Proportional Representative) ပြောင်းလဲ ကျင့်သုံးရန် ပြည်ထောင်စုရွေးကောက်ပွဲကော်မရှင်ထံ တင်ပြချက်အပေါ် နိုင်ငံရေး ပါတီအချို့ ကန့်ကွက်လျက်ရှိပြီး အချို့နိုင်ငံရေး ပါတီများ ထောက်ခံကြခြင်းဖြင့် သဘောထား ကွဲလွဲမှုများ သိသိသာသာ ဖြစ်ပေါ်လျက်ရှိကြောင်း သိရှိရသည်။
မဲအချိုးကျ ကိုယ်စားပြု (Proportional Representative) စနစ်မှာ မဲဆန္ဒနယ် တခုတွင် မဲအများဆုံးရရှိသူက အနိုင်ရရှိသည့်ပုံစံ မဟုတ်ဘဲ ထောက်ခံမဲ မဲအချိုးကျပေါ် မူတည်ပြီး လွှတ်တော် ကိုယ်စားလှယ် ရရှိသည့် ပုံစံဖြစ်သည်။
နေပြည်တော်တွင် မတ်လ ၈ ရက်နေ့က ပြည်ထောင်စု ရွှေးကောက်ပွဲကော်မရှင်နှင့် နိုင်ငံရေးပါတီများ ၂၀၁၅ ခုနှစ် ရွေးကောက်ပွဲ ကျင်းပရေး ကိစ္စ တွေ့ဆုံခဲ့ကြရာ နိုင်ငံရေးပါတီ ၅၃ ခု တက်ရောက်ခဲ့ပြီး မဲအချိုးကျ ကိုယ်စားပြု စနစ် (Proportional Representative) ကျင့်သုံးရန် တင်ပြထောက်ခံသောနိုင်ငံရေး ပါတီ ၇ ခု၊ ကန့်ကွက်သောနိုင်ငံရေးပါတီ ၅ ခုရှိခဲ့ပြီး အချိန်ယူ၍ ဆောင်ရွက်သင့်သည် ဟု စဉ်စားပါတီ ၄ ခုရှိခဲ့ကြောင်း၊ နိုင်ငံရေးပါတီ အများစုမှာ ၀င်ရောက်ဆွေးနွေးခြင်း မရှိခဲ့ကြောင်းသိရှိရသည်။
PR စနစ်ကျင့်သုံးရန်တင်ပြထောက်ခံသည် နိုင်ငံရေးပါတီ ၇ ခုတွင် တိုင်းရင်းသား စည်းလုံးညီညွတ်ရေး ပါတီ ၊ ဒီမိုကရက် တစ်ပါတီ (မြန်မာ) ၊အမျိုးသား ဒီမိုကရေစီ အင်အားစု ပါတီ၊ ဒီမိုကရေစီနှင့် ငြိမ်းချမ်းရေးပါတီ တို့ ပါဝင်ကြောင်း၊ အမျိုးသားဒီမိုကရေစီအဖွဲ့ချုပ်၊ တိုင်းရင်းသားပါတီအချို့အပါအ၀င် နိုင်ငံရေးပါတီ ၅ ခုကမူ PR စနစ်ကြောင့် ဆိုးကျိုးများရှိလိမ့်မည်ဟု ဆိုကာ ကန့်ကွက်ဆွေးနွေးခဲ့ကြသည်ဟု သိရှိရသည်။
PR စနစ်ကို ထောက်ခံသော အမျိုးသားဒီမိုကရေစီအင်အားစု ပါတီမှ အတွင်းရေးမှူး ၁ ဦးကြည်သန်း က “အခု လုပ်နေတဲ့ နိုင်သူ အကုန်ယူ စနစ်အရ ဆိုရင် မဲဆန္ဒရှင် အားလုံးရဲ့ဆန္ဒကို လွှတ်တော်မှာ ကိုယ်စားပြုပြီး ပြောမယ့် ဆိုမယ့် သူ မရဘူးပေါ့ဗျာ။ ပြည်သူ့ဆန္ဒမဲရာခိုင်နှုန်းမှာ နိုင်ငံရေးပါတီတခုက ၅၁ ရာခိုင်နှုန်းရပြီး အခြားနိုင်ငံရေးပါတီတခုက ၄၉ ရာခိုင်နှုန်းရလို့ ၅၁ ရာခိုင်နှုန်း ရတဲ့သူက နိုင်သွားလို့ ရှိရင် ၄၉ ရာခိုင်နှုန်းမဲတွေရထားသူက ဘာမှလုပ်လို့ မရတော့ဘူးလေ။ အဲဒါကြောင့် ပြောရေးဆိုခွင့် ရအောင် ရတဲ့ မဲအချိုးပေါ်မှာ မူတည်ပြီးတော့ ရတဲ့ မဲနဲ့ လွှတ်တော်ထဲရောက်သွားရင်ပြောရေး ဆိုခွင့်ရှိ အောင် တင်ပြတာပါ”ဟု ရှင်းပြသည်။
၁၉၉၀ ပြည့်နှစ်ရွေးကောက်ပွဲ အမျိုးသားဒီမိုကရေစီအဖွဲ့ချုပ်က မဲဆန္ဒနယ်အားလုံးနီးပါး အနိုင်ရခဲ့သော်လည်း စစ်အာဏာရှင် စနစ်၏ အသိအမှတ် မပြုခဲ့သောကြောင့် အနိုင်ရရှိမှု အလကားဖြစ်ခဲ့ရကြောင်း၊ PR စနစ် ကျင့်သုံးမည် ဆိုပါက ပါတီတခုတည်းက ရွေးကောက်ပွဲတွင် အနိုင်ရရှိမှုမျိုးရှိတော့မည်မဟုတ်ဟု ဦးကြည်သန်းက ဆက်လက်ပြောသည်။
”၁၉၉၀ ရွှေးကောက်ပွဲမှာ ဆိုရင် ပါတီတစ်ခုကအကုန်နိုင်တယ်ဗျာ။ အဲဒီရွေးကောက်ပွဲ ရလဒ် အဟောသိကံ ဖြစ်သွားရတယ်။ အဲဒါမျိုး နောင်မဖြစ်ရအောင် ရည်ရွယ်တာပါ”ဟု ဦးကြည်သန်းက ဆိုသည်။
တိုင်းရင်းသားစည်းလုံးညီညွတ်ရေးပါတီကလည်း PR စနစ်ကို ကျင့်သုံးရန် ကြိုးပမ်းရခြင်းမှာ ပြည်သူများ၏ ထောက်ခံဆန္ဒမဲအားလုံး အကျိုးရှိ စေရန် ရည်ရွယ်တင်ပြထားခြင်း ဖြစ်ကြောင်း တိုင်းရင်းသားစည်းလုံးညီညွတ်ရေးပါတီ၏ ရန်ကုန်တိုင်း ဒေသကြီးအနောက်ပိုင်းခရိုင် ဥက္ကဋ္ဌ ဦးခင်စိုးက ဧရာဝတီသို့ ပြောသည်။
PR စနစ်ကို ကန့်ကွက်သော အမျိုသားဒီမိုကရေစီအဖွဲ့ချုပ်မှ ပုသိမ်မြို့နယ်လွှတ်တော်ကိုယ်စားလှယ်ဦးဝင်းမြင့်က ”ဒီ PR စနစ်ကို ကျင့်သုံးမယ် ဆိုရင် လူမျိုးစွဲ၊ ၀ါဒစွဲ၊ အစွန်းရောက် ပါတီတွေက အချိုးကျစနစ်နဲ့ မဲရလာနိုင်တယ်။ အဲဒီလိုဖြစ် လာရင် တိုင်းပြည်ရဲ့ကံကြမ္မာ စိုးရိမ်ရတဲ့ အခြေအနေ ရောက်သွားလိမ့်မယ်။ ဂျာမနီနိုင်ငံမှာ PR စနစ်ကျင့်သုံးခဲ့လို့ နာဇီတွေ နေရာရလာပြီး အာဏာရှင် ဟစ်တလာ တက်လာတာကိုကျနော် ဥပမာပေး ထောက်ပြခဲ့တယ်။ ဂျာမန် ဒီမိုကရေစီ ပျက်စီးရခြင်းဟာ PR စနစ်ကြောင့်လို့ ပြောစမှတ်တွင်သွားတယ်။အခုဒီက ဒီမိုကရေစီစနစ်က အပင်ပေါက်လေး ပဲရှိသေးတယ်။ သင်းသတ်တဲ့ ပုံစံမျိုး တော့ အဖြစ်မခံနိုင်ဘူး”ဟု ပြောသည်။
အာဏာရ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ဒုတိယဥက္ကဋ္ဌလည်းဖြစ် ဟင်္သတမြို့နယ်ပြည်သူ့လွှတ်တော် ကိုယ်စားလှယ် လည်းဖြစ်သူ ဦးဌေးဦးကမူ ရွေးကောက်ပွဲတွင် မည်သို့သော မဲပေးစနစ် အသုံးပြုစေကာမူ ပြည်သူလူထု နားလည်လွယ်သော စနစ်ဖြစ်ရေးသည်သာ အဓိကဖြစ်ကြောင်း၊ ၂၀၁၅ ရွေးကောက်ပွဲတွင် PR စနစ် အသုံးပြုရေး မဖြစ်နိုင်သေးကြောင်း ဧရာဝတီသို့ ပြောဆိုသည်။
”အဓိက က မဲထည့်မယ့် ပြည်သူတွေ အဆင်ပြေဖို့လိုတယ်။ မဲပေးသူတွေ ရှင်းရှင်းလင်းလင်း သဘောမပေါက်ဘူးဆိုရင် သူတို့ပေးချင်တဲ့သူကို ပေးနိုင်မှာ မဟုတ်ဘူး။ အခု အမှား အမှန်ခြစ်တဲ့ ကိစ္စမှာတောင် လူတွေ ဒီလောက် ဇဝေဇ၀ါ ဖြစ်နေတာ။ PR စနစ် ဆိုရင် လည်း ပြည်သူတွေ လိုက်ပါလာနိုင်ဖို့ လိုတာပေါ့။ ပြည်သူတွေ နားလည်မှ ဒီစနစ် အောင်မြင် လိမ့်မယ်”ဟု ဦးဌေးဦးက သုံးသပ်သည်။
တိုင်းရင်းသားနိုင်ငံရေးပါတီများကမူ ရွေးကောက်ပွဲတွင် PR စနစ် အသုံးပြုရေး စောလွန်းနေသေးပြီး အခက်အခဲများစွာ ရှိလိမ့်မည်ဟု ဆိုကြသည်။
”တိုင်းရင်းသား ဒေသမှာဆိုရင် စာတတ်မှုနှုန်းက တော်တော်နည်းတယ်။ Voter Education တွေအများကြီးလုပ်ရဦးမယ်။ PR စနစ် ကောင်းတာ မကောင်းတာထက် လူထုရဲ့ ပညာရေး ရေချိန်ပေါ်မှာ မူတည်ပြီးတော့ အချိန်ယူ တည်ဆောက်ရမယ်လို့မြင်တယ်”ဟု ချင်းအမျိုးသားပါတီ အထွေထွေအတွင်းရေးမှူး ဦးဆလိုင်းဒေးဗစ်ထွန်းက ပြောသည်။
ရှမ်းအမျိုးသားဒီမိုကရေစီအဖွဲ့ချုပ်ဥက္ကဋ္ဌ ဦးခွန်ထွန်းဦးက PR စနစ်ထက် ၂၀၀၈ ခုနှစ်ဖွဲ့စည်းပုံအခြေခံဥပဒေပြင်ဆင်ရေးကို အလေးပေးပြောလိုကြောင်း ပြောဆိုသည်။
”အခြေခံ ဥပဒေပြင်ပေးပါ။ တိုင်းရင်းသားပြသနာ အရင်ရှင်းပါ။ ပြီးမှရွေးကောက်ပွဲကို တရားမျှတအောင် လုပ်ပါ။ ကျနော်ကတော့ နိုင်ငံရေးနည်းကိုပဲ ပြောချင်တယ်”ဟု ဦးခွန်ထွန်းဦးက သုံးသပ်သည်။
PR စနစ်ကြောင့် အစွန်းရောက်လူနည်းစုများ ပါတီထောင်ပြီး နိုင်ငံရေးတွင် ပါဝင်ခြေရှုပ်လာမည်ကို စိုးရိမ်သည့်အတွက် ကန့်ကွက်ကြောင်း ရခိုင်တိုင်းရင်းသားတိုးတက်ရေးပါတီဥက္ကဋ္ဌလည်းဖြစ် အမျိုးသားလွှတ်တော်ကိုယ်စားလှယ်လည်း ဖြစ်သူ ဒေါက်တာအေးမောင်က ပြောသည်။
”ကျနော်တို့က PR စနစ်ကို လက်မခံဘူး။ ဒုတိယအင်အားကြီး ပါတီဝင်မှာကြောက်လို့။ ပြီးတော့ အစွန်းရောက်တွေလည်း ပါတီထောင်လာနိုင်တယ်။ ရွေးကောက်ပွဲမှာ ရှုံးပေမယ့် လည်း အချောင်ရတဲ့ပါတီခေါင်းဆောင်တွေ ပါလာနိုင်တယ်။သူတို့ ၂၀၁၀ ရွေးကောက်ပွဲမှာ ရှုံး ခဲ့ပြီး၂၀၁၅ မှာ ရှုံး နိုင်တဲ့ အတွေးလေးဝင်တာနဲ့ အခုလို ပုံစံပြောင်းချင်တာ”ဟု ဒေါက်တာ အေးမောင်က ပြောသည်။
ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးတင်အေးကမူ ၂၀၁၅ ခုနှစ်ရွေးကောက်ပွဲတွင် PR စနစ် အသုံးပြုရေး လာမည့် ဇွန်လတွင် ကျင်းပမည့် ပြည်ထောင်စုလွှတ်တော်အစည်းအဝေးသို့ တင်ပြကာ အဆုံးအဖြတ် ရယူမည်ဖြစ်ကြောင်း၊ ၂၀၁၅ ရွေးကောက်ပွဲကို သန့်ရှင်းမျှတသော ရွေးကောက်ပွဲဖြစ်စေရေး ဆောင်ရွက်ပေး သွားမည်ဖြစ်ကြောင်း ကတိပြုပြောဆိုခဲ့သည်။
Ref: ဧရာဝတီ
သံတွဲတွင် ညမထွက်ရအမိန့် ထုတ်သင့် မသင့် အငြင်းပွားလျက်ရှိ
သိန်းလှိုင်
အင်္ဂါနေ့၊ ဧပြီလ ၀၉ ရက် ၂၀၁၃
စစ်တွေ(မဇ္ဈိမ)။ ။ သံတွဲမြို့တွင် လက်ရှိအနေအထားအရ ညမထွက်ရ အမိန့် ထုတ်သင့် မသင့် အငြင်းပွား နေကြကြောင်း ဒေသခံများက ဆိုသည်။
ဧပြီလ ၆ ရက်နေ့က သံတွဲခရိုင် အုပ်ချုပ်ရေးမှူးရုံးတွင် နိုင်ငံရေးပါတီများ၊ မြို့မိမြို့ဖများ၊ ဟိုတယ် လုပ်ငန်းရှင်များ၊ ကျော့ပိုက် လုပ်ငန်းရှင်များ၊ ဌာနဆိုင်ရာများ တွေ့ဆုံဆွေးနွေးရာတွင် မန္တလေးတိုင်း အောက်ပိုင်းနှင့် ပဲခူးတိုင်းမှာ ကဲ့သို့ သံတွဲမြို့ တွင်လည်း အကြမ်းဖက်မှုများ ဖြစ်လာဖွယ် ကောလာဟလများ ထွက်ပေါ်နေ၍ စိုးရိမ်ကာ အစည်းအဝေး တက်ရောက်သူ အများစုက ပုဒ်မ ၁၄၄ ထုတ်ပြန်ထားရန် အကြံပြု ဆုံးဖြတ်ကြသည်။
သို့သော် အစည်းအဝေး တက်ရောက်ခဲ့သည့် အမျိုးသား ဒီမိုကရေစီအဖွဲ့ချုပ် သံတွဲခရိုင် ဥက္ကဋ္ဌ ဦးဝင်းနိုင်ကမူ ထိုသို့ မာရှယ်လော ထုတ်မည့်အစား ဖြစ်လာချေ ပြဿနာများကို ညှိနှိုင်းဖြေရှင်းသင့်ကြောင်း သဘောထား ရှိသည်။
“ပုဒ်မ ၁၄၄ ထုတ်တာဟာ ပြည်သူတွေကို စိတ်ဖိစီးမှု များစေတယ်ဗျာ။ တခါထုတ်ရင် အနည်းဆုံး နှစ်လလောက် ဒါနဲ့ သွားရမယ်။ ၁၄၄ ထုတ်မယ့်အစား မပြေလည်ဖြစ်နိုင်တာတွေကို နှစ်ဦးနှစ်ဖက် တွေ့ဆုံဆွေးနွေး အဖြေရှာသင့်တယ်လို့မြင်တယ်” ဟု အကြံပြုသည်။
အစည်းအဝေး ဆုံးဖြတ်ချက်အား ပြည်နယ်အစိုးရအဖွဲ့သို့ တင်ပြထားပြီး သံတွဲမြို့မှ တက်ကြွလှုပ်ရှားသူများက ညမထွက်ရအမိန့် မထုတ်ရေး လက်မှတ်ထိုး လှုပ်ရှားမှုများကို ဆောင်ရွက်လျက်ရှိသည်။
“လက်ရှိသံတွဲဟာ အေးချမ်းတည်ငြိမ်နေပြီးတော့ ငပလီခရီးသွား လုပ်ငန်းလည်း အောင်မြင်နေတယ်။ ငါးလုပ်ငန်း လုပ်ကိုင်သူတွေလည်း ဒီရာသီမှာ စီးပွားရေးအရ တွက်ခြေကိုက်နေတယ်။ ဘာပြဿနာမှမရှိတဲ့ အနေအထားမှာ ညမထွက်ရအမိန့်ကို ထုတ်လိုက်ရင် အများပြည်သူ စားဝတ်နေရေးကို အကြီးအကျယ် ထိခိုက်သွားနိုင်တာမို့ ကျနော်တို့ ကန့်ကွက်နေရတာပါ” ဟု လက်မှတ်ထိုး လှုပ်ရှားမှု ခေါင်းဆောင်တဦးက ပြောသည်။
ကောက်ယူရရှိထားသောလက်မှတ် ၅၀၀ ခန့်ကို ပြည်နယ်ဝန်ကြီးချုပ်သို့ အင်္ဂါနေ့ ညနေတွင် ပေးပို့သွားမှာ ဖြစ်ပြီး သံတွဲတမြို့နယ်လုံး၌ ဆက်လက် ကောက်ခံသွားမည်ဟု ၎င်းက ဆိုသည်။
မည်သည့်ပြဿနာမှ မရှိဘဲနှင့် ရခိုင်ပြည်နယ်အစိုးရက သံတွဲကို ပုဒ်မ ၁၄၄ ထုတ်ပြန်ခိုင်းလိမ့်မည် မဟုတ်ဟု မြို့တွင်း တာဝန်ကျ လုံခြုံရေး တပ်ဖွဲ့ဝင် တဦးကလည်း မှတ်ချက်ပြုသည်။
ယမန်နှစ် ဇွန်လကလည်း ရခိုင်ဒေသ ပဋိပက္ခများကြောင့် သံတွဲ၌ ပုဒ်မ ၁၄၄ ထုတ်ပြန်ခဲ့ပြီး အောက်တိုဘာ ၁၀ ရက်နေ့တွင် ပြန်လည် ရုပ်သိမ်းပေးထား ခဲ့သည်။
Ref: မဇ္ဈိမ
ငြိမ်းချမ်းရေးဆွေးနွေးမယ့် KIO နဲ့ အစိုးရတပ် တိုက်ပွဲတွေ ဆက်ဖြစ်
ကိုမိုးဇော်
09.04.2013
ကချင်လွတ်မြောက်ရေးအဖွဲ့ KIO နဲ့ အစိုးရဲ့ ငြိမ်းချမ်းရေး ဆွေးနွေးရေး အဖွဲ့တို့ တွေ့ဆုံဆွေးနွေးဖို့ ရှိနေ ချိန်မှာပဲ နှစ်ဘက် တပ်တွေ အကြား တိုက်ပွဲတွေ ဆက်လက်ဖြစ်ပွား နေဆဲဖြစ်ပါတယ်။ ဒီလို တိုက်ပွဲတွေ ဆက်လက်ဖြစ်ပွားနေတာဟာ အစိုးရ တပ်တွေဘက်က စစ်ရေးလှုပ်ရှားမှုတွေ ဆက်ရှိနေတာကြောင့် ဖြစ်တယ်လို့ KIO ဘက်က ပြောဆိုပါတယ်။ အပြည့်အစုံကိုတော့ ကိုမိုးဇော် က တင်ပြထားပါတယ်။
KIO နဲ့ အစိုးရရဲ့ ငြိမ်းချမ်းရေး ဆွေးနွေးရေးအဖွဲ့တို့ဟာ ဖေဖော်ဝါရီလဆန်းက တရုတ်နိုင်ငံ ရွှေလီမြို့မှာ စစ်ရေးအရှိန် လျှော့ချဖို့ သဘော တူညီခဲ့ပေမဲ့ တိုက်ပွဲတွေ ကတော့ ကြိုးကြား ကြိုးကြား ဆက်လက် ဖြစ်ပွားနေတာ ဖြစ်ပါတယ်။ ဒီရက်ပိုင်းတွေ အတွင်းမှာတော့ ရှမ်းပြည်နယ် မြောက်ပိုင်းဒေသမှာ တိုက်ပွဲတွေဟာ နေ့စဉ်ဆိုသလို ဖြစ်ပွားနေတယ်လို့ KIO ပြောခွင့်ရပုဂ္ဂိုလ် ဦးလနန်က ပြောပါတယ်။
“ဒီရက်ပိုင်းမှာ အဖြစ်များတာတော့ ခပ်စိပ်စိပ်ဖြစ်နေတာကတော့ ရှမ်းပြည်မြောက်ပိုင်း တပ်မဟာ ၄ ဒေသမှာ ပိုဖြစ်တယ်။ ၈ ရက်နေ့ကလည်း ကျနော်တို့ တပ်ရင်း ၂ ဘက်မှာ သူတို့လာပြီး တိုက်ခိုက်တာတွေ လုပ်ပါတယ်။ အဲ့လို ဟာမျိုးတွေ တပ်ရင်း ၉ တို့၊ တပ်ရင်း ၈ တို့၊ တပ်ရင်း ၁၇ တို့၊ တပ်ရင်း ၂ တွေကတော့ တပ်မဟာ ၄ လက်အောက်ခံ တပ်ရင်းတွေပါ။ အဲ့ဒီဒေသမှာ တိုက်ပွဲတွေကတော့ တရက်ခြား ပုံစံပေါ့။ အဲ့လို ဟာမျိုးတွေ ဖြစ်တယ်ခင်ဗျ။ မနေ့က ဒီတပ်ရင်း ၂ ရယ်၊ တပ်ရင်း ၃၆ ရယ်၊ အဲ့ဒီနေရာ ၂ နေရာမှာ တိုက်ပွဲတွေ ဖြစ်ပွားတယ်။” ဒီလို တိုက်ပွဲတွေဖြစ်ရတဲ့ အဓိက အကြောင်းကိုတော့ ဦးလနန်က အခုလို ပြောပါတယ်။
“ဖြစ်တဲ့ဖြစ်စဉ်အားလုံးကတော့ အစိုးရစစ်တပ်ရဲ့ စစ်ကြောင်းလှုပ်ရှားမှုတွေကြောင့်ပါ။ သူတို့ရဲ့ ရှေ့တန်းတွေမှာ ညွှန်ကြားနေတဲ့ အချက်တွေက ဘာလဲဆိုတော့ KIA တပ်စခန်းတွေနဲ့ အနီးကပ်ဆုံး နေရာယူထားရမယ်ဆိုတဲ့ ညွှန်ကြားချက်ရှိတယ်ခင်ဗျ။ တချို့ဆိုရင် ကျနော်တို့ KIA လှုပ်ရှားနေတဲ့ တပ်ဖွဲ့တွေကို နောက်ကနေပြီးတော့ အမြဲတစေ လိုက်ပြီးတော့ အကွက်ချောင်းတဲ့ ပုံစံမျိုးပေါ့ဗျာ။ သူ အဆင်ပြေရင် ပြေသလို၊ ပစ်ခတ်ချေမှုန်းရေး လုပ်မယ့်ပုံစံနဲ့၊ လိုက်လံချဉ်းကပ်ရင်းနဲ့ တိုက်ပွဲတွေ ဖြစ်တာများ တယ်ခင်ဗျ။ တချို့နေရာမှာဆိုရင် ကျနော်တို့ KIA တပ်စခန်းတွေနဲ့ ကိုက် ၄၀၊ ၅၀ အထိ သူတို့လာပြီးတော့ ကတုတ်ကျင်းတူးပြီးတော့ နေရာဝင်ယူကြတယ်။ တကယ်လို့များ ကျနော်တို့ဘက်က သည်းခံစိတ်မရှိဘဲ ပစ်ခတ်မယ်ဆိုရင် တိုက်ပွဲတွေ ကြီးကြီးမား မား ပြန်ဖြစ်သွားနိုင်တယ်။ ဒီလိုဟာမျိုး ပုံစံတွေကတော့ နေရာတကာ အနှံ့မှာ ရှိတယ်ခင်ဗျ။”
ဒီလိုတိုက်ပွဲတွေဆက်လက်ဖြစ်ပွားနေပေမဲ့ တွေ့ဆုံဆွေးနွေးရေးကိုတော့ ဆက်လက်လုပ်ဆောင်သွားမှာ ဖြစ်တယ်လို့ ဦးလနန်က ဆက်ပြောပါတယ်။
“အခုဖြစ်တဲ့ တိုက်ပွဲတွေကြောင့်တော့ ဆွေးနွေးပွဲက နှစ်ဘက်ဆန္ဒရှိမယ်ဆိုရင်တော့ ဘာမှ အဟန့်အတားဖြစ်မယ်လို့ မထင်ပါဘူး။ တကယ်လို့ ဆွေးနွေးဖြစ်မယ်ဆိုရင်လည်း ဒီကိစ္စအပေါ်မှာတော့ ဆွေးနွေးစရာ ရှိတယ်ခင်ဗျ။ ဒီကိစ္စတွေက ဒီလို ဆွေးနွေးရင်းနဲ့ပဲ တိုက်ပွဲတွေ လျော့ပါးသွားအောင် လုပ်ဆောင်ကြဖို့ဆိုတဲ့ ရည်မှန်းချက်လည်း ရှိပါတယ်။ ဒါကြောင့် တွေ့ဆုံမှုကတော့ ဒီတိုက်ပွဲတွေ ဖြစ်တဲ့အတွက်ကြောင့် ဟန့်တားတာမျိုး၊ ဆွေးနွေးပွဲ ဟန့်တားတာမျိုး မဖြစ်စေနိုင်ပါဘူးခင်ဗျ။”
KIO ပြောရေးဆိုခွင့်ရှိသူရဲ့ အစိုးရစစ်တပ်အပေါ် ပြောဆိုချက်နဲ့ပတ်သက်ပြီး ကာကွယ်ရေးဝန်ကြီးဌာနကို ဆက်သွယ်မေးမြန်းရာမှာတော့ စစ်ဆင်ရေး အခြေအနေတွေကို ကကကြည်းက သတင်း အချက်အလက် ပေးပို့ထားတာ မရှိကြောင်း ပြောဆိုပါတယ်။
KIO နဲ့ အစိုးရ ငြိမ်းချမ်းရေး ဆွေးနွေးရေးအဖွဲ့ဟာ ဒီလ ၁၀ ရက်နေ့မတိုင်ခင် ဆွေးနွေး ဖို့အတွက် သဘောတူညီထားပေမဲ့ နိုင်ငံတကာ လေ့လာသူတွေ မတက်ရောက်နိုင် တာကြောင့် ဆွေးနွေးပွဲကို သင်္ကြန်နောက်ပိုင်း ကာလ အထိ ရွှေ့ဆိုင်းထားပါတယ်။
ငြိမ်းချမ်းရေး သဘောတူညီချက်တွေ အပြည့်အ၀ မရနိုင်သေးတာကြောင့် လက်နက်ကိုင် ပဋိပက္ခတွေ ကြားကနေ ထွက်ပြေးနေရတဲ့ ဒုက္ခသည် အများအပြားဟာလည်း နေရပ် မပြန်နိုင်သေးဘဲ ဖြစ်နေကြပါတယ်။
လောလောဆယ်မှာတော့ ကုလသမဂ္ဂ လက်အောက်ခံ ဌာနတွေက မိုးမောက်မြို့ နယ်အတွင်းက မိုင်ဂျာယန်ဒေသဘက်ကို ကူညီထောက်ပံ့ရေး ပစ္စည်းတွေ ပေးပို့ဖို့ သွားရောက်နေပါတယ်။ ဒါပေမဲ့ ထောက်ပံ့ရေး ပစ္စည်းတွေသယ်ယူလာတဲ့ ယာဉ်တန်းဟာ လမ်းခရီးမှာ ကြန့်ကြာနေတယ်လို့လည်း KIO ရဲ့ ဒုက္ခသည်ရေးရာ တာဝန်ခံ ဦးဒွဲပီဆာ က ပြောပါတယ်။
“ဒီနေ့လာမယ်လို့ သူတို့ဘက်က အကြောင်းကြားထားတာ ရှိပါတယ်။ ဒါပေမဲ့ မနေ့ညက သူတို့ ပြန်ပြောတာက နိုင်ငံခြားသားတယောက်ပါတယ်ဆိုတော့ ခွင့်ပြုချက် မရသေးဘူးတဲ့။ ဒါကြောင့် မရောက်သေးပါဘူးလို့ သတင်းပြန်ကြားပါတယ်။”
ဒီထောက်ပံ့ရေးယာဉ်တန်းဟာ ဘယ်နေ့ ရောက်လာမယ်ဆိုတာတော့ အသေအချာ မသိရကြောင်းလည်း ပြောပါတယ်။
KIOနဲ့ အစိုးရတပ်တွေအကြား ဖြစ်ပွားနေတဲ့ ၂ နှစ်နီးပါးကြာ စစ်ပွဲကာလအတွင်း မှာ ဒေသခံပြည်သူ ၁ သိန်းကျော်ဟာ ကချင်ပြည်နယ်က မြို့ကြီးတွေနဲ့ KIO ထိန်းချုပ်ရာ တရုတ-်မြန်မာနယ်စပ် ဒေသတွေကို ထွက်ပြေးတိမ်းရှောင်နေကြရပါတယ်။
ကုလသမဂ္ဂ အပါအ၀င် လူမှုကယ်ဆယ်ရေး အသင်းအဖွဲ့တွေဟာ နယ်စပ်ဒေသ ကို ရောက်ရှိနေတဲ့ ဒုက္ခသည်တွေဆီ သွားရောက်ဖို့ အခက်အခဲတွေ ရှိနေတာလည်း ဖြစ်ပါတယ်။
Ref: VOA News
Tuesday, April 9, 2013
ကော်မတီ ၇ ခုဖွဲ့ပြီး ပါတီ လုပ်ငန်းစဉ်တွေ ဆောင်ရွက်မည်
2013-04-08
ပါတီလုပ်ငန်းစဉ်တွေ အကောင်အထည်ဖေါ်ဖို့အတွက် ကော်မတီ ၇ ခု ဖွဲ့စည်းသွားမယ်လို့ အမျိုးသားဒီမိုကရေစီ အဖွဲ့ချုပ် NLD ပါတီရဲ့ ပထမဆုံးအကြိမ် ဗဟို အလုပ်အမှုဆောင် အစည်းအဝေးမှာ ဆုံးဖြတ် ခဲ့တယ်လို့ NLD ပါတီ ဗဟိုကော်မတီဝင် ဦးဥာဏ်ဝင်းက RFA ကို ပြောပါတယ်။
အဲဒီကော်မတီတွေထဲက လူငယ်ရေးရာကော်မတီကို အမျိုးသား ဒီမိုကရေစီ အဖွဲ့ချုပ် ဥက္ကဌ ဒေါ်အောင်ဆန်းစုကြည် ကိုယ်တိုင် ဦးဆောင် သွားမယ်လို့ ဦးဥာဏ်ဝင်းက ပြောပါတယ်။
ပြီးခဲ့တဲ့ မတ်လဆန်းပိုင်းက ကျင်းပခဲ့တဲ့ပါတီရဲ့ ပထမဆုံးအကြိမ် နိုင်ငံလုံးဆိုင်ရာ ညီလာခံကနေ အသစ် ဖွဲ့စည်းလိုက်တဲ့ ဗဟို အလုပ်အမှုဆောင် အဖွဲ့ရဲ့ ပထမဆုံး အကြိမ် အစည်းအဝေး ကျင်းပပြီး ဆုံးဖြတ် ခဲ့တာဖြစ်ပါတယ်။
ဖွဲ့စည်းမယ့်ကော်မတီတွေ ကတော့ တောင်သူ လယ်သမားရေးရာ ကော်မတီ၊ စည်းကမ်း ထိန်းသိမ်းရေး ကော်မတီ၊ အလုပ်သမားရေးရာ ကော်မတီ၊ တိုင်းရင်းသားရေးရာ အပါအ၀င် နိုင်ငံရေး ပါတီတွေနဲ့ ဆက်ဆံရေးကော်မတီတွေ ဖြစ်တယ်လို့ သိရပါတယ်။
Ref: RFA News
ကချင်ပြည်နယ်မှာ ကုလသမဂ္ဂ ယာဉ်တန်း ခရီးစဉ် ဆိုင်းငံ့ခံရ
2013-04-09
ကချင်ပြည်နယ်က စစ်ပြေးဒုက္ခသည်တွေအတွက် ထောက်ပံ့ ကူညီရေး ပစ္စည်းတွေဝေငှဖို့ ဗန်းမော်မြို့ကနေ လိုင်ဇာမြို့ကို လာရောက်တဲ့ ကုလသမဂ္ဂ မော်တော်ယာဉ် တန်းကို အစိုးရ တပ်က သွားလာခွင့် ဆိုင်းငံ့ ထားတယ်လို့ သတင်း ရရှိပါတယ်။
အဲဒီယာဉ်တန်းမှာ နိုင်ငံခြားသားတစ်ဦး လိုက်ပါလာမယ်လို့ သိရတာကြောင့် ဆိုင်းငံ့ ထားတာဖြစ်ကြောင်း သိရပါတယ်။
ကုလသမဂ္ဂအဖွဲ့(၄) ဖွဲ့ရဲ့ မော်တော်ယာဉ် (၇) စီးပါ ယာဉ်တန်းဟာ ဧပြီလ (၉) ရက်နေ့မှာ လိုင်ဇာကိုရောက်ရှိမှာဖြစ်ပေမယ့်၊ လိုင်ဇာမြို့အနီး မိုင်ဂျာယန်မှာ တပ်စွဲထားတဲ့ အစိုးရစစ်တပ်က နိုင်ငံခြားသား ဖြတ်သန်းခွင့်အတွက် အထက်ကိုပြန်လည်တင်ပြဖို့ရှိတယ်ဆိုပြီး တားဆီးတာဖြစ်ပါတယ်။
ဒီကိစ္စနဲ့ပတ်သက်ပြီး လိုင်ဇာမြို့အနီး ဒုက္ခသည်စခန်းကော်မတီ ဥက္ကဌ ဦးတွဲတီဆာက အခုလို ပြောပြပါတယ်။
"သူတို့က ဧပြီ ၉ ရက်မှာ ဗန်းမော်ကနေ မိုင်ဂျာယန်အထိလာဖို့ ကမ်းလှမ်းထားတယ်၊ ညနေပိုင်းရောက်တော့ နိုင်ငံခြားသား မိုင်ဂျာယန်သွားခွင့်ကို ပြန်တင်ပြမယ်"
အခုလာရောက်တဲ့ ယာဉ်တန်းဟာ UNOCHA ကုလသမဂ္ဂ လူသားချင်းစာနာထောက်ထားမှု အကူအညီပေးရေးအဖွဲ့ကဦးစီးပြီး ကုလသမဂ္ဂကလေးများ ရံပုံငွေအဖွဲ့၊ ဒုက္ခသည်များဆိုင်ရာ မဟာမင်းကြီးရုံးနဲ့ ကမ္ဘာစားနပ်ရိက္ခာအဖွဲ့တို့ပူးပေါင်းပြီး အကူအညီပေးဖို့ ရောက်ရှိလာခဲ့ကြတာ ဖြစ်ပါတယ်။
ကချင်ဒုက္ခသည်တွေအတွက် ၂၀၁၂ ခုနှစ် ဇူလိုင်လက ပစ္စည်းနဲ့ ရိက္ခာတွေ လာရောက်ပေးခဲ့ပြီး အခုဒုတိယအကြိမ် အဖြစ်လာရောက်တာ ဖြစ်ပါတယ်။
ကချင်ဒေသနဲ့ ရှမ်းပြည်နယ်အတွင်းက ဒုက္ခသည်တွေအတွက် ပြည်တွင်းပြည်ပ NGO အဖွဲ့အစည်းတွေက အကူအညီတွေ ပေးပို့နေရာမှာ KIO ထိန်းချုပ်နယ်မြေအတွင်းက ဒုက္ခသည်စခန်းတွေဆီကို နိုင်ငံတကာ အကူညီပေးရေးအဖွဲ့တွေ သွားရောက်ရေးမှာ အခက်အခဲတွေရှိနေတယ်လို့ ကူညီစောင်ရှောက်ရေးအဖွဲ့တွေက ပြောပါတယ်။
Ref: RFA News
မြန်မာ အိမ်အကူ အမျိုးသမီးများကို နှိပ်စက်သည့် ထိုင်းမိသားစု ဖမ်းဆီးခံရ
ဘစောတင်
April 9, 2013
မြန်မာ အိမ်အကူ အမျိုးသမီးငယ် ၃ ဦးကို ညှဉ်းပန်းနှိပ်စက်ပြီး လခမပေးဘဲ ခိုင်းစေသည့် ထိုင်းမိသားစုအား လူမှောင်ခိုမှု တိုက်ဖျက်ရေး ဌာနမှ ထိုင်းရဲများက ဧပြီလ ၅ ရက်နေ့တွင် ဖမ်းဆီး လိုက်ကြောင်း သတင်းရရှိသည်။
ထိုင်းနိုင်ငံ၊ ဘန်ကောက်မြို့ ဘန့်ဘွန်ရပ်၊ ဧကချိုင် လမ်းကြီး၊ လမ်းသွယ် ၆၉/၂ တွင် နေထိုင်သော အသက် ၅၀ ခန့်ရှိ နိုင်ဒေပါနုနှင့် ၎င်း၏ မိသားစုအား စစ်အရာရှိ အယောင်ဆောင်မှု၊ တရားမဝင် လက်နက်ကိုင်ဆောင်မှု၊ မုဒိမ်းမှု၊ အဓမ္မအလုပ်ခိုင်းစေမှု စသည့် အမှုများဖြင့် ဖမ်းဆီးခြင်းဖြစ်ကြောင်း မြန်မာ မိန်းကလေးများ လွတ်မြောက်ရေးအတွက် အကူအညီပေးပြီး စကားပြန်လည်း လုပ်ပေးသူ ဒေါ်မာလီက ဧရာဝတီသို့ ပြောသည်။
“ဒီလူက လမ်းထဲမှာ သူ့ကိုယ်သူ စစ်အရာရှိကြီးဆိုပြီး ခပ်တည်တည် နေနေတယ်။ တကယ်တော့ သူက ဘာအရာရှိမှ မဟုတ်ဘူးလေ။ ဗိုလ်တုပဲ။ စာရွက်စာတမ်း အတုတွေရယ်၊ တပ်မတော်က အထူးအရာရှိဝတ်စုံနဲ့ ရိုက်ထားတဲ့ ဓာတ်ပုံကိုလည်း ခပ်တည်တည် သူ့အိမ်မှာ ထားထားတယ်” ဟု ဒေါ်မာလီက ပြောသည်။
၎င်းက ဆက်လက်၍ “ဒီလူက ကျမတို့ မြန်မာ မိန်းကလေးတွေကို လုပ်ခမပေးဘဲ အလုပ်ခိုင်းတဲ့ အပြင် မုဒိမ်းလည်းကျင့်တယ်။ မုဒိမ်းကျင့်ရာမှာ ကိုယ်တင် ကျင့်တာမဟုတ်ဘူး။ သူ့သားကိုလည်း ကျင့်ခိုင်းတယ်။ ပြီးတော့ သူ့အိမ်မှာ အလုပ်လာတဲ့ လာအိုလူမျိုးကို ထပ်ကျင့်ခိုင်းတယ်။ သူ့ဆီက လက်နက်လည်း ဖမ်းမိတယ်။ ကလေးမလေးတွေကို သော့ခတ်ပြီးချည်တဲ့ သံကြိုးတွေရော၊ လက်ထိပ်တွေ ဘာတွေရော သူ့အိမ်ထဲမှာ မိတယ်။ ဒီအမှုတွေနဲ့ ပတ်သက်သို့ စစ်ဗိုလ်တု နိုင်ဒေပါနုနဲ့ ဇနီးရယ်၊ သားနဲ့ သမီးရယ်၊ မုဒိန်းကျင့်တဲ့ လာအိုနိုင်ငံသား အလုပ်သမား တယောက် စုစုပေါင်း ၅ ယောက်ကို ဖမ်းဆီးခဲ့ပါတယ်” ဟု ပြောသည်။
နိုင်ဒေပါနု၏ အိမ်တွင် အလုပ်လုပ်ကြသည့် မြန်မာ အမျိုးသမီးငယ်များမှာ တနင်္သာရီတိုင်း သရက်ချောင်း မြို့နယ်မှ ဖြစ်ကြပြီး တဦးက အသက် ၁၈ နှစ်နှင့် ကျန် နှစ်ဦးမှာ အသက် ၁၅ နှစ်စီ ရှိကြကြောင်း၊ အလုပ်လုပ်နေကြသည်မှာ ၃ လခန့် ရှိပြီဖြစ်ကြောင်း သိရသည်။
ထို ၃ လအတွက် လုပ်ခလစာလည်းမရ၊ ညှဉ်းပန်းနှိပ်စက်မှုလည်း ခံနေရသောကြောင့် ဧပြီလ ၂ ရက်နေ့က နိုင်ဒေပါနု၏ အိမ်မှ ထွက်ပြေးကြရာ အသက် ၁၈ နှစ်အရွယ် အမျိုးသမီးငယ်ကို အိမ်ရှင်က ပြန်ဖမ်းမိသွားပြီး ကျန် နှစ်ယောက် လွတ်မြောက်ခဲ့ကြောင်း ဒေါ်မာလီက ပြောသည်။
“ထွက်ပြေးလာတဲ့အထဲက ကောင်မလေးက ကျမဆီကို အကြောင်းကြားလာတယ်။ အဒေါ်ရယ် ကျန်ခဲ့တဲ့ ကောင်မလေးတော့ သေလား ရှင်လား မသိဘူး၊ ကယ်ပါဦးဆိုပြီး အကြောင်းကြားလာတယ်။ ဒါကြောင့် ကျမလည်း သတင်းဌာနတွေရယ်နဲ့ အခြား အကြောင်းကြားသင့်တဲ့ နေရာတွေကို အကြောင်းကြားပြီး အထောက်အထား ခိုင်လုံတာနဲ့ ဒီ ပေါ်ခေါ်မော် (လူမှောင်ခိုမှု တိုက်ဖျက်ရေးဌာနမှ ထိုင်းရဲ) အဖွဲ့ရဲ့ အကူအညီနဲ့ အခုလို လိုက်ပါကူညီ ကယ်ထုတ်နိုင်ခဲ့တာ ဖြစ်ပါတယ်” ဟု ဒေါ်မာလီက ဆိုသည်။
ဧပြီလ ၂ ရက်နေ့တွင် အယောင်ဆောင် စစ်ဗိုလ် နိုင်ဒေပါနုက မိန်းကလေးတဦးအား ပြန်လည် ဖမ်းဆီး ခေါ်ဆောင်သွားပုံနှင့် ပတ်သက်၍ အဆိုပါလမ်းထဲတွင် နေထိုင်သူ ဒေါ်အေးအေးငယ်က ယခုကဲ့သို့ ပြောပြသည်။
“အဲဒီနေ့က ဒီလူဟာ ကလေးမလေးကို လည်ပင်းညှစ်ပြီး ဒရွတ်တိုက် ဆွဲခေါ်လာတာ။ ကလေးရဲ့ အဖြစ်ကို မြင်ရတာ သိပ်သနားစရာ ကောင်းတယ်။ ဒီလူက တော်တော် အာဏာရှိတယ်လို့ ပြောကြတယ်။ တော်ရုံပုလိပ်က မဖမ်းနိုင်ဘူးတဲ့။ ဒီလူ လုပ်ပုံက တော်တော် လူမဆန်တာပဲ။ ကလေးမလေး တယောက်ကို ကျွဲနွားဆက်ဆံသလို အနိုင်ကျင့်တာကို မြင်ရတော့ မခံနိုင်ဘူး။ စိတ်ထဲမှာ တော်တော်လေးလည်း ခံပြင်းတယ်။ အနားက ထိုင်းတွေလည်း တော်တော် ဒေါသထွက်ကြတယ်” ဟု ဒေါ်အေးအေးငယ်က ပြောသည်။
ယင်းစစ်ဗိုလ်အတုသည် ယခင်ကလည်း မြန်မာ အိမ်အကူ မိန်းကလေးများအား ညှဉ်းပန်း နှိပ်စက်ခဲ့ဖူးကြောင်း အဆိုပါလမ်းထဲရှိ အထည်ချုပ်စက်ရုံမှ မြန်မာအလုပ်သမား ကိုမိုးက ဆိုသည်။
“အရင်ကလည်း ဒီလူဟာ အိမ်မှာ အလုပ်လာလုပ်တဲ့ ကရင်မလေးတွေကို ခုလိုပဲ မတရား ညှဉ်းပန်းတယ်။ မုဒိမ်းကျင့်တယ်။ လစာလည်း မမေးဘူး။ ကလေးမလေးတွေကို သေနတ်နဲ့ ခြိမ်းခြောက်တယ်။ ဒါကြောင့် သူ့အိမ်က မိန်းကလေးတွေ ထွက်ပြေးဖို့ ကျနော် ကူညီ ခိုးထုတ်ပေးဖူးတယ်” ဟု ကိုမိုးက ပြောသည်။
ယခုအခါ မြန်မာ အလုပ်သများအတွက် ယာယီ နိုင်ငံကူးလက်မှတ် ပြုလုပ်ပေးနေပြီး တရားဝင် အလုပ်လုပ်ခွင့် ရနေပြီ ဖြစ်သဖြင့် ပွဲစားများနှင့် ဆက်သွယ်ကာ တရားမဝင် အလုပ်လုပ်ခြင်းကို ဆင်ခြင်သင့်ကြောင်း ထိုင်း-မြန်မာ မဟာမိတ် ဖောင်ဒေးရှင်းမှ လက်ထောက် ဒါရိုက်တာ ဦးမြင့်ဝေက ဆိုသည်။
“ဒီလိုမျိုး အိမ်ရှင်တယောက်က အနိုင်ကျင့်ခွင့်ရအောင် အလုပ်သွင်းပေးတဲ့ တရားမ၀င် မြန်မာပြည်သား ပွဲစားတွေပေါ့ဗျာ။ အလုပ်သွင်းပေးနေကြတဲ့ သူတွေပေါ့ဗျာ။ လူလိုလို့ အလုပ်သမား ရှာခိုင်းတယ်ဆိုရင် အဲဒီလူတွေက ဘယ်လိုလူမျိုးတွေလဲ ဆိုတာကို နောက်ကြောင်း ဘာရှိတယ်ဆိုတာကိုလဲ ထည့်စဉ်းစားသင့်တာပေါ့ဗျာ။ အားလုံးက ပတ်စ်ပို့နဲ့ ၀ါ့ခ်ပါမစ်နဲ့ တရားဝင်ဖြစ်နေတဲ့ အခုလို ကာလမှာတောင်မှ ဘာလို့ ဒီအဖြစ်မျိုး ကြုံတွေ့နေကြရသလဲ ဆိုတာကို ထောက်ပြချင်တယ်” ဟု ၎င်းက ပြောသည်။
ထိုင်းတွင် ယာယီနိုင်ငံကူးလက်မှတ် ကိုင်ဆောင်ပြီး အလုပ်လုပ်နေသူ မြန်မာ အလုပ်သမား ၁ သန်းခန့် ရှိပြီး တရားမဝင် အလုပ်လုပ်ကိုင်နေသူများမှာ နောက်ထပ် ၁ သန်းခန့် ရှိနိုင်ကြောင်း ထိုင်းနှင့် မြန်မာ အာဏာပိုင်များ၏ ထုတ်ပြန်ချက်များအရ သိရသည်။
Ref: ဧရာဝတီ
မြန်မာ့ မိုဘိုင်းဈေးကွက်အတွင်း လုပ်ကိုင်ခွင့်ရဖို့ ကုမ္ပဏီကြီးနှစ်ခုတို့ ပူးပေါင်း
Rosie Gogan-Keogh
အင်္ဂါနေ့၊ ဧပြီလ ၀၉ ရက် ၂၀၁၃
ရန်ကုန် (မဇ္ဈိမ)။ ။ မြန်မာနိုင်ငံ ဆက်သွယ်ရေး လုပ်ငန်းတွင် လုပ်ကိုင်ခွင့် နှစ်နေရာ အတွက် လိုင်စင် လျှောက်ထားခြင်းအား ကြိုတင် အရည်အချင်း စစ်ဆေးခြင်း နောက်ဆုံး အချိန်တွင် အင်အားကြီး နိုင်ငံတကာ ကုမ္ပဏီနှစ်ခုတို့ ပူးပေါင်းကာ ဖက်စပ်ကုမ္ပဏီတခု ထူထောင် လိုက်ခြင်းဖြင့် ပြိုင်ဆိုင်မှု အရှိန် မြင့်တက် လာခဲ့သည်။
ကမ္ဘာ့အကြီးဆုံး မိုဘိုင်း ကုမ္ပဏီကြီး နှစ်ခုဖြစ်သည့် Vodafone နှင့်China Mobile တို့ ပူးပေါင်းကာ ဖက်စပ် ကုမ္ပဏီတခု တည်ထောင်ခြင်းဖြင့် မြန်မာ့ ဆက်သွယ်ရေး ဈေးကွက်အတွင်း ဝင်ရောက်ခွင့် ရရန် ကြိုးစား လိုက်ကြသည်။
မြန်မာ့ ဆက်သွယ်ရေးလုပ်ငန်း ဈေးကွက်ကို ၂၀၀၈ ခုနှစ်ကတည်းက စိတ်ဝင်စားနေသည့် အိုင်ယာလန် ကုမ္ပဏီတခု ဖြစ်သော Digicel ကုမ္ပဏီက ဆာ့ဂ်ျပန်း၏ မြန်မာနိုင်ငံမှ Yoma Holdings ကုမ္ပဏီ၊ ဘီလျံနာ သူဌေး ဂျော့ဆိုးရော့စ်၏ Quantum Strategic Partners Ltd တို့နှင့် တချိန်တည်းမှာပင် ပူးပေါင်းခဲ့ကြသည်။
“မကြာသေးခင်က ဖြေလျှော့မှုတွေပေးခဲ့ပြီး ကမ္ဘာပေါ်မှာ တယ်လီဖုန်း သိပ်သည်းဆ အရမ်းနည်းနေတဲ့ နိုင်ငံတနိုင်ငံ ဖြစ်တဲ့ မြန်မာ့ဈေးကွက်ထဲကို ဝင်ရောက်ရာမှာ Digicel က အောင်မြင်မှု ရှိထားပါတယ်” ဟု ကုမ္ပဏီပိုင်ရှင် ဒင်းနစ် အိုဘရိုင်ရန် က ကြေညာချက်တခုတွင် ပြောကြားသည်။
“မြန်မာနိုင်ငံမှာ လက်ရှိ မိုဘိုင်းသုံးစွဲနှုန်းက ၁၀ ရာခိုင်နှုန်းအောက်မှာပဲ ရှိပါတယ်။ ကမ္ဘာ့အဆင့်ဝင် တယ်လီဖုန်း ကွန်ယက်တခုထွက်ပေါ်လာဖို့ ကျနော်တို့မှာ တာဝန်ရှိတယ်လို့ ခံစားရပါတယ်” ဟု ၎င်းက ဆက်လက်ပြောကြားသည်။
မြန်မာနိုင်ငံတွင် ဆက်သွယ်ရေးဈေးကွက် ဖြေလျှော့ပေးမှုသည် တိုင်းပြည်၏ စီးပွားရေးကို နိုးထ လာစေလိမ့်မည်ဟု ဆိုးရော့စ် က ဆိုသည်။ ဆက်သွယ်ရေး လုပ်ငန်း လုပ်ကိုင်ခွင့် လိုင်စင်ကို ဇွန်လတွင် ကြေညာမည်
ဖြစ်ပြီး လိုင်စင်ရရှိပါက မြန်နိုင်ငံ၌ မိုဘိုင်း ကွန်ယက် တည်ဆောက်ကာ လုပ်ငန်းလုပ်ခွင့် ၁၅ နှစ် ရရှိမည် ဖြစ်သည်။
“လုပ်ခွင့်လိုင်စင် ပေးတာက မိုဘိုင်းဝန်ဆောင်မှု ဈေးကွက်ကြီး ဖြစ်ပေါ်ပြီး မြန်မာ့လူမှုရေးနဲ့ စီးပွားရေး ဖွံ့ဖြိုးမှု အရှိန်ကောင်းဖို့ အခွင့်အရေးတရပ်ပါပဲ” ဟု Vodafone နှင့် China Mobile တို့၏ ပူးတွဲ ကြေညာချက်တွင် ဖေါ်ပြခဲ့သည်။
Ref: မဇ္ဈိမ
မြန်မာနိုင်ငံသား ၈ ဦးသေဆုံးမှု အရေးယူပေးရန် မြန်မာ အစိုးရ တောင်းဆို
2013-04-06
အင်ဒိုနီးရှားနိုင်ငံ ဆူမားတြားကျွန်းမှာရှိတဲ့ လူဝင်မှုကြီးကြပ်ရေး အကျဉ်းစခန်းမှာ မြန်မာနိုင်ငံသား ရှစ်ဦး အသတ် ခံရတာနဲ့ ပတ်သက်ပြီး ပြစ်မှု ကျူးလွန်သူတွေကို အမြန်ဆုံးဖော်ထုတ်ပေးပြီး အင်ဒိုနီးရှားရဲ့ တည်ဆဲ ဥပဒေနဲ့ အညီ အရေးယူပေးဖို့ မြန်မာ အစိုးရက အင်ဒိုနီးရှား အစိုးရကို တောင်းဆိုသွားမယ်လို့ သိရပါတယ်။
အင်ဒိုနီးရှားအစိုးရကို တောင်းဆိုသွားမယ့် အချက်သုံးချက်နဲ့ ပတ်သက်ပြီး သမ္မတရုံး ညွှန်ကြားရေးမှူး ဦးဇော်ဌေးက RFA ကို အခုလို ပြောပါတယ်။
"၃ ချက်ရှိပါတယ်၊ နံပါတ် (၁) ဒီဖြစ်စဉ်နဲ့ ပတ်သက်ပြီးတော့ ဖြစ်ရပ်မှန်ပေါ့နော်၊ ဥပမာ ဓားနဲ့ ခုတ်တယ်ဆိုရင် အဲဒီဓားတွေ ဘာလို့ ထိန်းသိမ်းရေး အကျဉ်းစခန်းထဲရောက်နေလဲ၊ ဘေးမှာ လုံခြုံရေးတွေ ရှိနေတဲ့ကြားမှာ ဘယ်လိုဖြစ်သွားလဲ၊ ဘာကြောင့်ဖြစ်သွာားလဲ၊ အဲဒီဖြစ်ရပ်မှန်ကို ဖော်ထုတ်ဖို့၊ နံပါတ် (၂) က အဲ့ဒီဖော်ထုတ်လို့ ရပြီ ဆိုတာနဲ့ အထဲမှာ ပါဝင်ပတ်သက်တဲ့ ပြစ်မှု အကြောင်းအရာ၊ ဥပဒေ အကြောင်းအရာ၊ ပြစ်မှု ကျူးလွန်တယ်၊ အပြစ် ကျူးလွန်ထားတဲ့ လူတွေရှိတယ်ဆိုရင် သူတို့ အင်ဒိုနီးရှားရဲ့တည်ဆဲ ဥပဒေနဲ့ အရေးယူပေးဖို့၊ နံပါတ် (၃) က အင်ဒိုနီးရှားရောက် မြန်မာနိုင်ငံသားတွေကို ပစ်မှတ်ထားပြီး ဆောင်ရွက်တာမျိုးတွေကို အလားတူဖြစ်ရပ်မျိုး ဖြစ်မလာအောင် ကျနော်တို့ နိုင်ငံသားတွေကို လုံခြုံရေး အကာအကွယ်ပေးဖို့၊ အဲ့ ၃ ချက်ပါ၊ "
ဆူမားတြားကျွန်းက ဘီလာဝီဆိပ်ကမ်း အကျဉ်းထောင်မှာ ဧပြီလ ၅ ရက်နေ့က ဗုဒ္ဓဘာသာဝင် မြန်မာနိုင်ငံသားတွေကို မူဆလင် ရိုဟင်ဂျာ အုပ်စုက ထောင်တွင်းအုပ်စုဖွဲ့ ရိုက်နှက်တာကြောင့် ၈ ဦး သေဆုံးခဲ့ပါတယ်။
မိတ္ထီလာမြို့က အဓိကရုဏ်းဖြစ်စဉ် ဓါတ်ပုံတွေကို အဲဒီ လ၀ကအကျဉ်းစခန်းမှာရှိတဲ့ မူဆလင်ရိုဟင်ဂျာတွေက ကြည့်ရှုရပြီး၊ ရန်စရာက ၀ိုင်းဝန်းရိုက်နှက်တဲ့အထိဖြစ်ခဲ့တာလို့ အင်ဒိုနီးရှား ရဲအရာရှိတွေကို ကိုးကားပြီး အေအက်ဖ်ပီနဲ့ အေပီ သတင်းဌာနတွေမှာ ဖေါ်ပြပါတယ်။
အစိုးရအနေနဲ့ တခြားနိုင်ငံတွေကို ရောက်ရှိနေတဲ့ မြန်မာနိုင်ငံသားတွေ အလားတူဖြစ်ရပ်တွေ မရင်ဆိုင်ရအောင် အကာအကွယ်ပေးဖို့ သက်ဆိုင်ရာအစိုးရတွေကို မြန်မာသံရုံးတွေကတဆင့် ဆက်သွယ်ပြီးပြောဆိုဖို့ စီစဉ်နေတယ်လို့လည်း ဦးဇော်ဌေးက ပြောပါတယ်။
Ref: RFA News
ငြိမ်းချမ်းရေးဆွေးနွေးပွဲ အမြန်လုပ်ဖို့ ကချင်ဒေသခံတွေလိုလား
မဆုမွန်
08.04.2013
ကချင်လွတ်မြောက်ရေးအဖွဲ့ KIO နဲ့ မြန်မာအစိုးရ ငြိမ်းချမ်းရေး ကိုယ်စားလှယ်တွေ တွေ့ဆုံဆွေးနွေးဖို့ တိတိကျကျ ရက်သတ်မှတ်နိုင်ခြင်း မရှိသေးတဲ့အပေါ် နယ်မြေ မငြိမ်သက်မှုကြောင့် ဒုက္ခရောက်နေရတဲ့ ကချင်ပြည်သူ လူထုက ငြိမ်းချမ်းရေး ဆွေးနွေးပွဲတွေ အမြန်ဆုံးဖြစ်ပေါ်ဖို့ တောင်းဆိုနေကြပါတယ်။ မိုးရာသီ နီးလာပြီဖြစ်တဲ့ အတွက် ဒုက္ခသည်စခန်းတွေမှာ ထွက်ပြေးခိုလှုံနေရတဲ့ ကချင်စစ်ပြေး ဒုက္ခသည်တွေအတွက်လည်း နေစရာ အခက်အခဲနဲ့ လူသားချင်း စာနာမှုဆိုင်ရာ အရေးပေါ် အကူအညီတွေ အရေးတကြီး လိုအပ်နေချိန်လည်း ဖြစ်ပါတယ်။ အပြည့်အစုံကို မဆုမွန်က တင်ပြပေးထားပါတယ်။
မြန်မာနိုင်ငံမြောက်ပိုင်း ကချင်ပြည်နယ်တွင်းက တိုက်ပွဲတွေ ရပ်စဲနိုင်ဖို့ အရေး ငြိမ်းချမ်းရေး တွေ့ဆုံဆွေးနွေး ကြဖို့ ပထမဆုံး အကြိမ် KIO ထိန်းချုပ် နယ်မြေဖြစ်တဲ့ ကချင်ပြည်နယ် မြစ်ကြီးနားမြို့မှာ တွေ့ဆုံကြဖို့ စီစဉ်နေကြတာ ဖြစ်ပါတယ်။
အရင်ငြိမ်းချမ်းရေး ဆွေးနွေးပွဲတွေတုန်းကတော့ တရုတ်အစိုးရရဲ့ စီစဉ်မှုနဲ့ တရုတ်ပြည်နယ် ရွှေလီမြို့မှာ ပြုလုပ်ခဲ့ပေမဲ့ ပြည်တွင်းမှာ ငြိမ်းချမ်းရေးဆွေးနွေးဖို့ စီစဉ်တာကတော့ ဒါပထမဆုံးအကြိမ်လည်း ဖြစ်ပါတယ်။ ဒါပေမဲ့လည်း အခုအချိန်အထိ ငြိမ်းချမ်းရေး ဆွေးနွေးပွဲတွေ ပြုလုပ်နိုင်ဖို့ နှစ်ဘက်စလုံးက ရက်အတိအကျ မသတ်မှတ်နိုင်သေးတဲ့အပေါ် ကချင်အရေး လှုပ်ရှားသူတွေနဲ့ ဒေသခံ ကချင်ပြည်သူလူထုက စိုးရိမ်မှုတွေ ရှိနေပါတယ်။ ဒါကြောင့်မို့လို့ ပြည်သူလူထုကို သက်သေထားတဲ့ ငြိမ်းချမ်းရေး ဆွေးနွေးပွဲတွေ အမြန်ဆုံး ဖြစ်ပေါ်စေချင်ပါတယ်လို့ ကချင်ပြည်သူ့လွှတ်တော် ကိုယ်စားလှယ် ဒေါ်ဒွဲဘူ က ဗွီအိုအေ မြန်မာပိုင်းကို ပြောပါတယ်။
“လွန်ခဲ့တဲ့ ၆ ရက်နေ့ စနေနေ့မှာ ဆွေးနွေးဖို့ လုပ်ထားတာပေါ့နော်။ ဒါပေမဲ့ အဲ့ဒီနေ့ကတော့ မဆွေးနွေးဖြစ်ဘူး။ ကြားနေမယ့် သက်သေတွေ မရောက်လို့လို့ ပြောပါတယ်။ ကျမအနေနဲ့ကတော့ ဘာပဲပြောပြော KIA အနေနဲ့လည်း အရင် တပ်မတော်နဲ့ တုန်းက တိုက်ခိုက်ခဲ့ တုန်းကလည်း ဘယ်သူမှ ပါဝင်ခဲ့တာမရှိဘူး။ ဘယ်နိုင်ငံကမှ ကူညီခဲ့တာ မရှိဘူး။ ကိုယ့်ဟာကိုယ်ပဲ ဆောင်ရွက်ခဲ့တယ်။ အခု တွေ့ဆုံဆွေးနွေးပွဲတွေလည်း ဘာပဲပြောပြော ပြည်သူလူထုကို သက်သေထားပြီးမှ ဆောင်ရွက်ရင် ပိုပြီးမှ ကောင်းမယ်လို့ ကျမကတော့ မြင်ပါတယ်။ တခြားနိုင်ငံတကာက လာရောက်ပြီး နားထောင်မယ်ဆိုတာလည်း ကောင်းပါတယ်။ ဒါပေမဲ့ သူတို့ မရောက်လို့ ကျမတို့ရဲ့ ဆွေးနွေးပွဲ မလုပ်နိုင်ဘူးဆိုတာကတော့ ပြည်သူလူထုနဲ့ ကျမတို့ ဒုက္ခသည်တွေအတွက် အင်မတန် နစ်နာပါတယ်။ ဘာလို့လဲဆိုတော့ လူထုကလည်း ဒီငြိမ်းချမ်းရေး ဆွေးနွေးပွဲကို အမြန်ဆုံး ဖြစ်စေချင်ပါတယ်။ အဲ့ဒီမှာ မဖြစ်တော့ဘူးဆိုတော့ ကျမတို့အစ ပြည်သူလူထုအားလုံးက စိတ်အားလျော့သွားရှိပါတယ်။ ကျမတို့ ပြည်သူလူထုတရပ်လုံးကို သက်သေထားပြီးမှ ဆွေးနွေးစေချင်ပါတယ်။ ဒါကတော့ နှစ်ဘက်စလုံးကို တိုက်တွန်းတာပါ။”
ကချင်အဖွဲ့တွေနဲ့ ငြိမ်းချမ်းရေး ကိုယ်စားလှယ်တွေ တွေ့ဆုံဆွေးနွေးကြတဲ့အခါ စစ်မှန်တဲ့ငြိမ်းချမ်းရေး၊ လုံးဝအပစ်အခတ် ရပ်ဆဲနိုင်ရေးအပါအဝင် ဒုက္ခသည်တွေအတွက် အရေးအတကြီး လိုအပ်နေတဲ့ အခက်အခဲတွေ စိတ်ပိုင်းဆိုင်ရာ ပြန်လည် ထူထောင်ရေးအပါအဝင် မိမိတိုရဲ့ နေအိမ်တွေကို စိတ်ချလုံခြုံစွာ ပြန်ပြီးတော့ နေထိုင်ရေးနဲ့ လိုအပ်တဲ့ ကျန်းမာရေး စောင့်ရှောက်မှုတွေနဲ့အတူ ပညာရေး၊ စီးပွားရေး ပြန်ပြီးတော့ လုပ်ကိုင်နိုင်ဖို့ အလုပ်အကိုင် ဖန်တီးပေးနိုင်ဖို့ အကူအညီတွေကို အဓိကဆွေးနွေးစေချင်တယ်လို့လည်း ကချင်လွှတ်တော်အမတ် ဒေါ်ဒွဲဘူ က ပြောပါတယ်။
“KIA KIO နဲ့ အစိုးရအဖွဲ့တို့ ဆွေးနွေးတဲ့အခါ အဓိက ကတော့ ဒီဒုက္ခသည် ကိစ္စတွေလည်း စဉ်းစားပေးဖို့ လိုအပ် တာပေါ့နော်။ သူတို့က အခုအချိန်ထိ နေရပ်ဆီ မပြန်နိုင်ဘူးဆိုတာ အပစ်အခတ် ရပ်ဆိုင်းရေး လက်မှတ်မထိုးသေးတဲ့အတွက် ဖြစ်တယ်။ အဲ့တော့ အပစ်အခတ် ရပ်ဆိုင်းရေး လက်မှတ်ရေးထိုးပြီးဆိုရင်တော့ မိသားစုအားလုံး ကိုယ့်ရွာကိုယ် ပြန်နိုင်တော့ရင် ဒါ အကောင်းဆုံးပါပဲ။”
အခုအချိန်မှာ ကချင်ပြည်နယ်ထဲက တိုက်ပွဲတွေကြောင့် နယ်မြေ မအေးချမ်းသေးတဲ့အတွက် အိုးအိမ်စွန့်ခွာ ထွက်ပြေးခဲ့ရတဲ့ ကချင်ပြည်သူလူထုအနေနဲ့ မိုးရာသီကာလမှာ နေစရာ အခက်အခဲများစွာ ကြုံနေရပြီး ကလေးတွေအတွက် ကျမ်းမာရေး စောင့်ရှောက်မှုနဲ့ ဒုက္ခသည်တွေအတွက် လူသားချင်းစာနာမှု အကူအညီတွေ အရေးတကြီး လိုအပ်နေတယ်လို့ မြစ်ကြီးနားဒေသခံ ကချင်အမျိုးသမီးကြီးဖြစ်တဲ့ ဒေါ်ဂျာအောင်က ပြောပါတယ်။
“ပန်ဝါဘက် နယ်စွန်နယ်ဖျားဘက်တွေမှာ အစိုးရတပ်တွေက KIA စခန်းတွေကို ရွှေ့ပြီးမှ သူတို့စခန်းတွေကို သိမ်းပိုက်တာတွေ အဲ့ဒါတွေ ကြားတယ်လေ။ လိုအပ်တာကတော့ အကုန်လုံး လိုအပ်တာပဲလေ။ စားဝတ်နေရေးတွေ အကုန်လုံး လိုတာပေါ့။ သူတို့က အများအားဖြင့်တော့ အစားအသောက်တွေ၊ အ၀တ်တွေ လိုမှာပေါ့လေ။ ဘုရားရှိခိုးကျောင်းမှာဆိုရင်တော့ အသင်းတော်မှာဆိုရင်တော့ အ၀တ်အစားတွေ ပြောကြတယ်လေ။ ကလေးတွေက အ၀တ်အစားတွေ အများအားဖြင့် လိုအပ်တာပေါ့။”
အခုအချိန်အခါမှာတော့ ကချင်ဒုက္ခသည်တွေအတွက် ကချင်အရေးလှုပ်ရှားသူတွေနဲ့ ပြည်တွင်းအလှူရှင်တွေ ပူးပေါင်း ကူညီဆောင်ရွက်နေကြပြီး ဒုက္ခသည်တွေအတွက် မိုးတွင်းကာလမှာ နေစရာအခက်အခဲတွေနဲ့ ရင်ဆိုင်နေရတယ်လို့ ဒေါ်ဒွဲဘူ က ဆိုပါတယ်။
“မိုးတွင်းရောက်လာရင်တော့ တော်တော်လေး ခက်ခဲမှာပေါ့နော်။ နေတာထိုင်တာရော၊ စားတာသောက်တာရော၊ အမိုးအကာတွေ မလုံနိုင်ဘူးပေါ့။ ဒုက္ခသည်တွေ ဒီမိုးတွင်းမှာတော့ လုံခြုံတဲ့နေရာမှာဖြစ်ဖြစ် ဒါမှမဟုတ် ကိုယ့်နေရပ်ဆီ ပြန်နိုင်တဲ့အထိ လုပ်ပေးနိုင်ရင်တော့ ပိုကောင်းမယ်လို့ ကျမ အဲ့လိုပဲ မျှော်လင့်ပါတယ်။”
KIO နဲ့ မြန်မာစစ်တပ်တို့ တိုက်ပွဲတွေဖြစ်ပွားနေတာကြောင့် တရုတ်-မြန်မာနယ်စပ်အပါအဝင် ကချင်ပြည်နယ်တွင်း ကချင်လက်နက်ကိုင်တွေ ထိန်းချုပ်ရာနယ်မြေနဲ့ အစိုးရထိန်းချုပ်ရာ နယ်မြေတွေက ဒုက္ခသည်စခန်းတွေမှာ စစ်ပြေးဒုက္ခသည်ဦးရေဟာ တစ်သိန်းကျော်ရှိနေပြီဖြစ်ပြီး၊ အခုလို နှစ်ဘက် တွေ့ဆုံမှုတွေလုပ်ဖို့ ပြင်ဆင်နေကြချိန်မှာဘဲ ပြီးခဲ့တဲ့ မတ်လလယ်ပိုင်းတုန်းက ကချင်တပ်တွေနဲ့ အစိုးရတပ်တွေကြား ကချင်ပြည်နယ် ပန်ဝါဒေသနဲ့ ရှမ်းပြည်နယ်မြောက်ပိုင်းဘက်မှာ တိုက်ပွဲတွေ ပြန်ဖြစ်ပွားခဲ့ပြီး နယ်မြေ လုံခြုံရေးအခြေအနေဟာ တည်ငြိမ်မှု မရှိသေးဘူးလို့လည်း ဒေသခံတွေက ပြောပါတယ်။
Ref: VOA News
Posts
