အောက်တိုဘာ ၂၀၊ ၂၀၁၁
သင်္ခါရတရားတွေကို မသိခဲ့လို့ ၁၉၆၂ ခုနှစ်မှာ အာဏာသိမ်းခဲ့မိတယ်လို့ ဗိုလ်ချုပ်ကြီးဟောင်း နေ၀င်းက ပြောဆိုတဲ့ အကြောင်း ကိုကိုမောင်ကြီး (ဦးချစ်လှိုင်)ရဲ့ ကျွန်တော်သိသော တစ်ရံရော အခါများ စာအုပ်မှာ ရေးထားပါတယ်။
၁၉၉၅ ဇူလိုင်လမှာ ဦးနေ၀င်းက သူ့ဆီသွားတဲ့ ဦးချစ်လှိုင်၊ မဆလခေတ် ပြည်သူ့တရားသူကြီး အဖွဲ့ ဥက္ကဋ္ဌဟောင်း ဦးတင်အောင်ဟိန်း တို့ကို ပြောလိုက်တာပါ တဲ့။
"ကိုယ်လူတွေနဲ့ ကြုံတုန်း ပြောလိုက်ရဦးမယ် .... ကိုယ့်အနေနဲ့ ဒီသံသရာ တရားတွေ သင်္ခါရတရားတွေ အနိစ္စ .... အနတ္တ တရားတွေကို ဒီနေ့ သိမြင်သလိုများ ဟိုတုန်းက သိခဲ့မယ် ဆိုရင် ၁၉၆၂ ခုနှစ်၊ မတ်လက ကိစ္စကို ကိုယ်မလုပ်ခဲ့ပါဘူး .... ဟုတ်တယ် .... အဲဒီတုန်း ကသာ ဒီတရားတွေကို သိနေခဲ့ရင် ၁၉၆၂ က လုပ်ခဲ့တဲ့ အလုပ်မျိုးကို ကိုယ်မလုပ်ခဲ့ဘူး" (စာ-၇၆၂)
ဦးချစ်လှိုင်က ဒါကို ကြားရတော့ "ဟယ်" ခနဲ ဖြစ်သွားပါတော့တယ် လို့ ဆိုပါတယ်။
ဦးနေ၀င်းကို တွေ့ရတာ ရွှင်ရွှင်လန်းလန်း ကျန်းကျန်းမာမာရှိတယ်၊ "အာနာပါနကမ္မဋ္ဌာန်းကို လေ့ကျင့်ပြီးနောက် ၀ိပဿနာ၏ အလုပ်ဖြစ်သော လက္ခဏာရေး သုံးပါးကို ရှုမှတ်ပွားများ လေ့ကျင့်မှု ပြုနေသည်" လို့ ဆိုပါတယ်။
ကုန်းဘောင်ဆက်
ဦးနေ၀င်း နဲ့ ဦးချစ်လှိုင် ၁၉၈၇ နိုဝင်ဘာလမှာ တွေ့တုန်းက ပြောကြတာတွေကလည်း စိတ်ဝင်စားစရာ ကောင်းပါတယ်။
"ဟေ့ကောင် ဖိုးချစ်လှိုင် destiny (ဒက်စတီနီ) ဆိုတာကို မင်းယုံရဲ့လား"
"ဟုတ်ကဲ့ .... ကျွန်တော် ယုံပါတယ် .... ဒက်စတီနီ ဆိုတာ ကံပန်းတိုင်ပေါ့ခင်ဗျာ"
"အေး .... ကံပဲ ပြောပြော ဘာပဲပြောပြော destiny ရှိတာတော့ အမှန်ပဲကွ၊ တခြားပြောချင်တာ မဟုတ်ပါဘူး။ ငါ့အကြောင်းပါ။ ငါ့ဦးလေး သခင်ညီ၊ ဦးလေး ဆိုပေမယ့်လို့ အသက်ချင်းကွာတာ မဟုတ်လို့ ငါ့အစ်ကိုပဲ ဆိုပါစို့။ အေး .... သူ နေမကောင်းတာနဲ့ သူ့အစား ဂျပန်ပြည်ကို သွားမယ့် သင်္ဘောပေါ်ကို တခြားအဖော်တွေနဲ့အတူ ငါလိုက်သွားရတယ်။ အဲဒီအချိန်က စပြီး ငါ့ဘ၀ဟာ တစ်ခါတည်းပြောင်းသွားတာပဲ။ Turning-point ပေါ့ကွာ။ ငါသာ အဲဒီလို လိုက်မသွားဖြစ်ခဲ့ရင် ငါဟာ ဗိုလ်နေ၀င်း ဖြစ်လာမှာ မဟုတ်ဘူးကွ။ အဲဒါကို Destiny ပဲလို့။ ဒါပြောချင်တာပဲ"
"ဦးညိုမြရေးတဲ့ ကုန်းဘောင်ရှာပုံတော် စာအုပ်ထဲမှာ ဗိုလ်ချုပ်နဲ့ပတ်သက်လို့ ဗိုလ်ချုပ်ဟာ ဘိုးတော်ဘုရားမင်းရဲ့ အဆက်အနွယ်က ဆင်းသက်လာတဲ့သဘောမျိုး ရေးထားပါတယ်"
"မင်းက ကုန်းဘောင်မင်းမျိုးတွေကို အထင်ကြီးနေတယ်ထင်တယ် .... ကုန်းဘောင်မင်းဆက်တွေ ညံ့ဖျင်းလို့ တို့နိုင်ငံ ကျွန်ဖြစ်ခဲ့ရတာပဲကွ။ ဒါကို မင်းတို့ငြင်းနိုင်မလား။ .... တစ်ခုတော့ ရှိတယ်။ ငါက ရွှေဘို မုဆိုးချုံ ဗိုလ်တွန်က ဆင်းသက်လာတာတော့ မှန်တယ်" (စာ-၈၄၃)
မုဆိုးချုံ ဗိုလ်တွန်ရဲ့ သမီးကို ပဒုံမင်း(အမရပူရမြို့တည်နန်းတည်မင်း) က မိဖုရားအရာ တင်မြှောက်ခဲ့တယ်၊ ဒါပေမယ့် ဦးနေ၀င်းဟာ သူ ပဒုံမင်းက ဆင်းသက်တာကို တိုက်ရိုက်ပြောချင်ပုံမရဘူး လို့ ဦးချစ်လှိုင်က သုံးသပ်ထားပါတယ်။
Ref: ဧရာဝတီဘလော့
Friday, October 21, 2011
ဦးနေ၀င်း၊ သင်္ခါရ နဲ့ ကုန်းဘောင်ဆက်
ဗိုလ်ကြီးဟောင်း နေမျိုးဇင် ဆေးကုသခွင့် မရ
2011-10-20
နိုင်ငံရေးအကျဉ်းသား ဗိုလ်ကြီးဟောင်း ဦးနေမျိုးဇင်ကို ထောင်အာဏာပိုင်တွေက ဆေးကုသခွင့် ငြင်းပယ် ထားကြောင်း အင်းစိန်ထောင်မှာ ဒီကနေ့ ထောင်ဝင်စာ တွေ့ခွင့်ရခဲ့တဲ့ ဇနီးဖြစ်သူ မဇင်မျိုးမော်က ပြောပါတယ်။
ထောင်ဝင်စာ တွေ့ချိန်မှာ လမ်းလျှောက်လို့ မရတဲ့အတွက် ဦးနေမျိုးဇင်ကို လူနာတင်တဲ့ စဉ်နဲ့ တင်ခေါ်လာကြောင်း၊ လှဲနေချိန်မှာ ပင်လျှင် နာကျင် နေကြောင်း၊ ခွဲစိတ် ကုသခွင့်ရရင် သက်သာပျောက်ကင်းမယ်လို့ ယူဆပေမယ့် သူ့ကို အပြင်ထွက်ပြီး ဆေးကုသခွင့် ပိတ်ထားကြောင်း ဦးနေမျိုးဇင်က ပြောပြတယ်လို့ သိရပါတယ်။
သွေးအကူအညီပေးရေး အပါအ၀င် လူမှုရေး လုပ်ငန်းတွေ လုပ်ဆောင်နေတဲ့ ဦးနေမျိုးဇင်ကို ၂၀၁၁ခုနှစ် မတ်လ အတွင်းက အာဏာပိုင်တွေက ဖမ်းဆီးခဲ့ပြီး သြဂုတ်လ ၂၈ ရက်နေ့က အီလက်ထရောနစ် ပုဒ်မနဲ့ ထောင်ဒဏ် (၁၀) နှစ် ချမှတ် လိုက်တာပါ။ ဦးနေမျိုးဇင်ကို အမှု စစ်ဆေးနေချိန် အင်းစိန် ထောင်တွင်းမှာ ချော်လဲပြီး ဒဏ်ရာရခဲ့တာ ဖြစ်ပါတယ်။
ထောင်တွင်း ဆရာဝန်တွေရဲ့ စစ်ဆေးချက်အရ ဦးနေမျိုးဇင်ရဲ့ ဝေဒနာကို ထောင်ပြင်မှာ ဆေးကုသဖို့ လိုအပ်ကြောင်း ပြောထား တာကြောင့် တင်ပြတောင်းခံခဲ့ရာ တရားရုံးက စီရင်ချက်မချခင် တကြိမ် အရိုးကု အထူးကုဆေးရုံကို ပြသခွင့်ပြုခဲ့ပြီး၊ စီရင်ချက် ချပြီးချိန်မှာတော့ ခွင့်ပြုချက် ထပ်မပေးဘူးလို့ သိရပါတယ်။
ဦးနေမျိုးဇင်ကို သင့်တော်တဲ့ ဆေးကုသခွင့် ပေးဖို့ ထိုင်းမြန်မာ နယ်စပ် အခြေစိုက် AAPP နိုင်ငံရေး အကျဉ်းသားများ ကူညီ စောင့်ရှောက်ရေး အသင်းက မြန်မာ အာဏာပိုင်တွေကို ဒီကနေ့ တောင်းဆို လိုက်ပါတယ်။
Ref: RFA News
တိုင်းရင်းသားဝန်ကြီးများ အခွင့်အရေး ဥပဒေကြမ်း
2011-10-20
တိုင်းရင်းသားရေးရာ ၀န်ကြီးတွေကို တိုင်းဒေသကြီး၊ ပြည်နယ် ၀န်ကြီးများရဲ့ ခံစားခွင့်တွေ အတိုင်း တပြေးညီ ရရှိရေး အတွက် အဆောင် အယောင် ဆိုင်ရာ ဥပဒေကို ရေးဆွဲပြီး ပြည်ထောင်စု လွှတ်တော်ကို တင်သွင်းဖို့ အဆိုကို အမျိုးသား လွှတ်တော်မှာ မနေ့က အတည်ပြု လိုက်ကြောင်း သိရပါတယ်။
ဒီအဆိုကို ရခိုင်တိုင်းရင်းသားများ တိုးတက်ရေး ပါတီက မနေ့က ကျင်းပတဲ့ အမျိုးသား လွှတ်တော် အစည်းအဝေးမှာ တင်ပြခဲ့တာ ဖြစ်ပါတယ်။
တိုင်းနဲ့ပြည်နယ် အသီးသီးက တိုင်းရင်းသားရေးရာ ၀န်ကြီးတွေ အနေနဲ့ တိုင်းရင်းသား အရေးတွေ ဆောင်ရွက်ဖို့ အခွင့်အလမ်း မရရှိတဲ့ အတွက် တင်သွင်းတာ ဖြစ်ကြောင်း ဒေါက်တာ အေးမောင်က RFA ကို ပြောပါတယ်။
ဒီအဆိုကို တပ်မတော်သား ကိုယ်စားလှယ်တွေ အားလုံး အပါအ၀င် ကိုယ်စားလှယ် (၁၀၃) ဦးက ကန့်ကွက် ခဲ့ပေမဲ့ (၁၀၇) ဦးက ထောက်ခံခဲ့တဲ့ အတွက် အတည်ပြုလိုက်တာ ဖြစ်တယ်လို့ ဒေါက်တာ အေးမောင်က ပြောပါတယ်။
တိုင်းရင်းသားရေးရာ ၀န်ကြီးတွေရဲ့ အဆောင်အယောင်ဆိုင်ရာနဲ့ ပတ်သက်တဲ့ ဥပဒေကြမ်းကို ရေးဆွဲဖို့ အမျိုးသား လွှတ်တော် ဥက္ကဌက အမျိုးသား လွှတ်တော် အမတ် ဒေါက်တာ အေးမောင်ကို တာဝန် အပ်နှင်း လိုက်ကြောင်းလည်း သိရပါတယ်။
သူ့အနေနဲ့ ဒီဥပဒေကြမ်းကို အမျိုးသား လွှတ်တော်ဆိုင်ရာ ဥပဒေကြမ်း ကော်မတီကို တင်သွင်းရမှာဖြစ်ပြီး ဥပဒေကြမ်း ကော်မတီက ခွင့်ပြုပြီးရင် ပြည်ထောင်စု လွှတ်တော်က မဲခွဲ ဆုံးဖြတ်မှာ ဖြစ်တယ်လို့ ဒေါက်တာ အေးမောင်က ပြောပါတယ်။
မကြာသေးခင်က ရန်ကုန်တိုင်း ဒေသကြီး ရခိုင် တိုင်းရင်းသားရေးရာ ၀န်ကြီး ဦးဇော်အေးမောင် က တိုင်းရင်းသား ၀န်ကြီးတွေဟာ အခွင့် အရေးတွေ ဆုံးရှုံးနေကြောင်း၊ သူ့အနေနဲ့ (၆) လ သက်တမ်းအတွင်း တာဝန်နဲ့ လုပ်ပိုင်ခွင့်တွေ မရရှိဘူးဆိုရင် ၀န်ကြီး အဖြစ်မှ နှုတ်ထွက်မှာ ဖြစ်ကြောင်း RFA ကို ပြောဆိုခဲ့ပါတယ်။
Ref: RFA News
ကျောက်ဆည်ရေဘေး လူတစ်ထောင်ကျော် နေရာရွှေ့ပြောင်းရ
2011-10-20
မန္တလေးတိုင်း ကျောက်ဆည်မြို့မှာ ဒီရက်ပိုင်း အတွင်း မိုးသည်းထန်နေပြီး ဆည်ရေ ဖေါက်ချ လိုက်တာကြောင့် တမြို့လုံးနီးပါး ရေလွှမ်းကာ မြို့ခံ (၁၃၀၀) ကျော် အိုးအိမ်စွန့်ပြီး ရှောင်တိမ်း ခဲ့ရကြောင်း လူမှုကူညီရေး ဆောင်ရွက်နေတဲ့ မြို့ခံတဦးက RFA ကို ပြောပါတယ်။
အတည်မပြုနိုင်သေးတဲ့ နောက်ဆုံးရ သတင်းတွေအရ လူအသေအပျောက် ရှိတယ်လို့ သိရပါတယ်။
အောက်တိုဘာ လဆန်းပိုင်းကလည်း ဇော်ဂျီမြစ်နဲ့ မြစ်ငယ်မြစ် ရေကြီးလာတာကြောင့် ကျောက်ဆည်မြို့ ရေလွှမ်း သွားခဲ့ရပြီး သောက်သုံးရေ အပါအ၀င်၊ ဆေးဝါးနဲ့ စားနပ်ရိက္ခာ အကူအညီတွေ အရေးပေါ် လိုအပ်ခဲ့ ပါတယ်။
လတ်တလော ဖြစ်ပေါ်နေတဲ့ ကျောက်ဆည် ရေဘေးသင့် ပြည်သူတွေ အတွက် မန္တလေးမြို့ခံတွေက တတ်နိုင်တဲ့ အကူအညီတွေ ပေးပို့ နေတယ်လို့ သိရပါတယ်။
Ref: RFA News
နိုင်ငံရေးအကျဉ်းသားတွေကို ဓားစာခံမလုပ်ဖို့ ကင်တားနား တိုက်တွန်း
ခင်မျိုးသက်
ကြာသပတေး, 20 အောက်တိုဘာ 2011
မြန်မာနိုင်ငံမှာ နိုင်ငံရေးအကျဉ်းသားအားလုံးကို ဒီနှစ်မကုန်ခင်မှာ ကျင်းပဖို့ မျှော်လင့်ရတဲ့ ကြားဖြတ် ရွေးကောက်ပွဲ မတိုင်ခင် ပြန်ပြီးတော့ လွှတ်ပေးဖို့ ကုလသမဂ္ဂရဲ့ မြန်မာနိုင်ငံ လူ့အခွင့်အရေးဆိုင်ရာ စုံစမ်း စစ်ဆေးရေးမှူး သောမတ်၊ အိုဟေး ကင်တားနားက တောင်းဆို လိုက်ပါတယ်။ မြန်မာ့သမိုင်းမှာ အရေးပါတဲ့ ကဏ္ဍက ပါဝင်နေတဲ့ ဒီနိုင်ငံရေး အကျဉ်းသားတွေကို နိုင်ငံတကာ တောင်းဆိုမှုတွေ အတွက် အပေးအယူ လုပ်ဖို့ ဓားစာခံတွေလို မထားသင့်ဘူး လို့လည်း ကြာသာပတေး နေ့မှာ ကုလသမဂ္ဂမှာ ပြုလုပ်တဲ့ သတင်းစာ ရှင်းလင်းပွဲမှာ ပြောကြား ခဲ့ပါတယ်။ ဒီအကြောင်းကိုတော့ ဒေါ်ခင်မျိုးသက်က အပြည့်အစုံ တင်ပြထားပါတယ်။
မြန်မာနိုင်ငံမှာ နိုင်ငံရေးအကျဉ်းသား အားလုံးကို ဒီနှစ်မကုန်ခင် ကျင်းပမယ်လို့ မျှော်လင့်ရတဲ့ ကြားဖြတ် ရွေးကောက်ပွဲ မတိုင်ခင် ပြန်ပြီး လွှတ်ပေးဖို့ ကုလသမဂ္ဂရဲ့ မြန်မာနိုင်ငံ လူ့အခွင့်ရေး ဆိုင်ရာ စုံစမ်း စစ်ဆေးရေးမှူး သောမတ် အိုဟေး ကင်တားနားက တောင်းဆို လိုက်ပါတယ်။
မြန်မာ့သမိုင်းမှာ အရေးပါတဲ့ကဏ္ဍက ပါဝင်နေတဲ့ ဒီနိုင်ငံရေး အကျဉ်းသားတွေကို နိုင်ငံတကာ တောင်းဆိုမှုတွေ အတွက် အပေးအယူ လုပ်ဖို့ ဓားစာခံတွေလို မထားသင့်ဘူးလို့လည်း ကြာသပတေးနေ့ ကုလသမဂ္ဂမှာ ပြုလုပ်တဲ့ သတင်းစာ ရှင်းလင်းပွဲမှာ ပြောကြား ခဲ့ပါတယ်။
အပြည့်အစုံကို ဒေါ်ခင်မျိုးသက်က တင်ပြ ပေးထားပါတယ်။
ကုလသမဂ္ဂ အထွေထွေ ညီလာခံမှာ ဗုဒ္ဓဟူးနေ့က မြန်မာနိုင်ငံ လူ့အခွင့်အရေးဆိုင်ရာ အစီရင်ခံစာ တင်သွင်းခဲ့တဲ့ မစ္စတာ ကင်တားနားက ကြာသပတေးနေ့ သတင်းစာ ရှင်းလင်းပွဲမှာ မြန်မာနိုင်ငံတွင်း လူ့အခွင့်အရေး ချိုးဖောက်မှု အခြေအနေဟာ စိုးရိမ်စရာ ရှိနေ သေးတယ်လို့ ပြောကြား ခဲ့ပါတယ်။ ဒါ့အပြင် မြန်မာ အစိုးရဟာ မကြာသေးခင်က နိုင်ငံရေး အကျဉ်းသား ၂၀၀ ကျော် လွှတ်ပေး ခဲ့ပေမယ့် အကျဉ်းထောင်ထဲမှာ နိုင်ငံရေး အကျဉ်းသားတွေ ရှိနေသေးတာမို့ သူတို့ အားလုံးကို ပြန်လွှတ်ပေးဖို့ မစ္စတာ ကင်တားနားက တောင်းဆို ခဲ့ပါတယ်။
“ ကျန်နိုင်ငံရေး အကျဉ်းသားအားလုံးကို ဒီနှစ်မကုန်ခင် အမြန်ဆုံး ပြန်ပြီးလွှတ်ပေးဖို့ မြန်မာ အစိုးရကို ကျွန်တော် တွန်းအား ပေးနေပါတယ်။ အစိုးရက တချို့ကို လွှတ်ပေးပါတယ်။ ဒါပေမယ့် မြန်မာ့ သမိုင်းမှာ တကယ် အရေးပါတဲ့ အခန်း ကဏ္ဍကနေ ပါနေတဲ့ ထင်ရှားတဲ့ ခေါင်းဆောင်တွေကို အခုထိ လွှတ်မပေးသေးပါဘူး။ ၈၈ မျိုးဆက် ကျောင်းသား ခေါင်းဆောင်တွေ၊ ၂၀၀၇ ရွှေဝါရောင် တော်လှန်ရေးက ခေါင်းဆောင်တွေ အပြင် တိုင်းရင်းသား ခေါင်းဆောင်တွေပါ။ ဦးဂမ္ဘီရ၊ ဦးခွန်ထွန်းဦးနဲ့ တချို့ကို ထောင်ထဲမှာ ကျွန်တော် တွေ့ခဲ့ရပါတယ်။ သူတို့လို လူတွေဟာ တကယ် ပညာတတ်တွေ ဖြစ်ပြီး မြန်မာ့ သမိုင်းမှာ အရေးပါတဲ့ အခန်းက ပါခဲ့သူတွေပါ။ ဒီလိုလူတွေ အခု အသစ် ရေးတော့မယ့် မြန်မာ့သမိုင်းမှာ ပါဝင်ခွင့်ရစေဖို့ လိုပါတယ်။
အစိုးရအနေနဲ့ နိုင်ငံတကာရဲ့ တောင်းဆိုမှုတွေအတွက် ဒီနိုင်ငံရေး အကျဉ်းသားတွေကို ဓားစာခံတွေလို မလုပ်သင့်ပါဘူး။ သူတို့ အားလုံးကို ဒီနှစ်မကုန်ခင် ကျင်းပမယ့် ကြားဖြတ် ရွေးကောက်ပွဲ မတိုင်ခင် ပြန်လွှတ်ပေးဖို့ တောင်းဆိုပါတယ်”
နိုင်ငံရေး အကျဉ်းသားတွေထဲမှာ လူထု ကြည်ညိုလေးစားတဲ့ ခေါင်းဆောင်တွေပါ ပါနေတာမို့ သူတို့ကို လွှတ်ပေးလိုက်ရင် နိုင်ငံကို ငြိမ်သက်အောင် မထိန်းနိုင်မှာ မြန်မာ အာဏာပိုင်တွေက စိုးရိမ်နေတာ တွေ့ရတယ်လို့ ဆိုပါတယ်။ ဒါပေမယ့် သူတို့ဟာ မြန်မာ အစိုးရထင်သလို မဟုတ်ကြောင်း မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်က ပြသနေတယ်လို့ ဆိုပါတယ်။
“ဒေါ်အောင်ဆန်းစုကြည် ကိုယ်တိုင် နှစ်ပေါင်းများစွာ နိုင်ငံရေး အကျဉ်းသားအဖြစ်နဲ့ နေခဲ့ရသူပါ။ သူလွတ်လာ ခဲ့တဲ့ နောက်မှာ မြန်မာနိုင်ငံရဲ့ အပြောင်းအလဲ တွေနဲ့ ပတ်သက်ပြီး နားလည်အောင် သူဘယ်လို ကြိုးစားတယ် ဆိုတာ ကျွန်တော်တို့ ကိုယ်တွေ့ပါ။ မြန်မာ အာဏာပိုင်တွေနဲ့ ဆက်သွယ်နိုင်ဖို့ ကြိုးစားခဲ့ပြီး မြန်မာနိုင်ငံမှာ လူ့အခွင့်ရေး အခြေနေ တိုးတက်လာဖို့နဲ့ ကောင်းမွန်တဲ့ မြန်မာနိုင်ငံ ဒီမိုကရေစီရေး အပြောင်းအလဲတွေ ရဖို့ နည်းလမ်းတွေ ရှာနေတာ တွေ့ရပါတယ်။ ဒါဟာ မြန်မာနိုင်ငံမှာ နိုင်ငံရေး အကျဉ်းသားကို လွှတ်ပေးလိုက်ရင် သူတို့ ဘယ်လို လုပ်ဆောင်တယ်ဆိုတာ ပြတာပါ။ အစိုးရက သူတို့ကို လွှတ်ပေးလိုက်ရင် လမ်းပေါ်ထွက်ပြီး ဆန္ဒပြကြမှာကို စိုးရိမ်နေတာမို့ သူတို့ လို လူတွေဟာ မြန်မာနိုင်ငံ ဘယ်လိုကောင်းအောင် လုပ်မယ် ဆိုတာကိုပဲ ခေါင်းထဲ ထားတယ်ဆိုတာ ပြနေပါတယ်”
မြန်မာနိုင်ငံမှာ ပြုပြင်ပြောင်းလဲမှုတွေ ရှိလာတာ မြင်နေရပေမယ့် တိုင်းရင်းသား ဒေသတွေမှာ တိုက်ပွဲတွေ ဆက်ဖြစ်နေပြီး လူ့အခွင့်ရေး ချိုးဖောက်မှုတွေ ကြီးကြီးမားမား ဖြစ်နေဆဲမို့ အခုလို အရေးကြီးတဲ့ အနေထား ရောက်နေချိန်မှာ ဒါတွေကို အရေးယူ ဖြေရှင်းဖို့ လိုနေတယ် လို့လည်း ပြောပါတယ်။
“အခုအချိန်ဟာ မြန်မာ့သမိုင်းမှာ အရေးအကြီးဆုံးအချိန်လို့ ကျွန်တော်ယုံကြည်ပါတယ်။ ဒီအချိန်ဟာ လူ့အခွင့် အရေး အခြေအနေတွေ တိုးတက် လာဖို့အတွက် အဓိပ္ပာယ်ရှိတဲ့၊ အပြုသဘောဆောင်တဲ့ လုပ်ရပ်တွေ လုပ်ရမယ့် အခွင့်လမ်းကောင်း တရပ် ဖြစ်သလို၊ ဒီမိုကရေစီရေး အသွင်ကို နက်နက်ရှိုင်းရှိုင်း ကူးပြောင်းရမယ့် အချိန်ပါ။ တချိန်တည်းမှာပဲ ဆိုးဝါးတဲ့ လူ့အခွင့်ရေး ပြဿနာတွေ၊ နိုင်ငံရေး၊ စီးပွါးရေးနဲ့ လူမှုရေး ရပိုင်ခွင့် ချိုးဖေါက်မှုတွေအတွက် တကယ်တန်း ပြောဆိုရမယ့် အချိန်လည်း ဖြစ်ပါတယ်”
လူ့အခွင့်အရေး အခြေနေဟာ သိသိသာသာ ပြောင်းလဲ တိုးတက်မှု မရှိသေးတဲ့ အတွက် ကုလသမဂ္ဂ အထွေထွေ ညီလာခံမှာ အဖွဲ့ဝင် နိုင်ငံတွေက စိုးရိမ်မကင်း ဖြစ်မှုတွေကို ထုတ်ဖေါ် ပြောဆိုခဲ့သလို အခုထိလည်း လူ့အခွင့်အရေး ချိုးဖေါက်မှုဆိုင်ရာ တိုင်ကြားမှုတွေ ရနေဆဲမို့ မြန်မာ အာဏာပိုင်တွေ ဘက်က ဒါကို ဦးစားပေး လုပ်ဆောင်သင့်တယ် လို့လည်း ပြောပါတယ်။
“မြန်မာနိုင်ငံတွင်း လူ့အခွင့်ရေး ချိုးဖေါက်မှုတွေ အတွက် အများယုံကြည်မှု ရှိတဲ့၊ သီးခြား လွတ်လပ်တဲ့ စုံစမ်း ဖော်ထုတ် စစ်ဆေးမှုတွေ လုပ်ဖို့ လိုအပ်နေတယ်ဆိုတာ အလေးအနက် ပြောပါရစေ။ ဒါနဲ့ပတ်သက်ပြီး မကြာခင်ကမှ ဖွဲ့စည်းလိုက်တဲ့ မြန်မာ အစိုးရရဲ့ လူ့အခွင့်ရေး ကော်မရှင်ဟာ ဒီစုံစမ်း စစ်ဆေးမှုတွေ အတွက် သင့်တော်မတော်၊ ကျွန်တော့်အနေနဲ့ ကနဦး လေ့လာမှုတွေ အတတ်နိုင်ဆုံး အမြန်လုပ်ဖို့ ရှိပါတယ်။ အခု အချိန်မှာတော့ ဒီအဖွဲ့ရဲ့ လုပ်ဆောင်နေမှုတွေ ထိရောက်မှုရှိမရှိ၊ သီးခြားလွတ်လပ်မှု ရှိမရှိက မေးခွန်း ထုတ်စရာ ရှိနေပါတယ်”
မြန်မာနိုင်ငံရဲ့ လူ့အခွင့်အရေး အခြေအနေဆိုင်ရာ အစီရင်ခံစာအသစ်ကို ၂၀၁၂ ခုနှစ် မတ်လထဲမှာ ကုလ သမဂ္ဂ လူ့အခွင့်ရေး ကောင်စီမှာ ပြန်လည် တင်သွင်းဖို့ ရှိတာမို့ ဒီမတိုင်ခင် မြန်မာနိုင်ငံကို သွားရောက် စစ်ဆေးခွင့်ရဖို့ မျှော်လင့် ထားတယ်လို့လည်း မစ္စတာ ကင်တားနားက ပြောကြားခဲ့ပါတယ်။
Ref: VOA News
ကဒါဖီ အာဏာသက် ၄၂ နှစ်
ကြာသပတေး, 20 အောက်တိုဘာ 2011
လစ်ဗျားခေါင်းဆောင်ဟောင်း မိုမာ ကဒါဖီဟာ ၂၇ နှစ်အရွယ် ၁၉၆၉ ခုနှစ်က ဘုရင် Idris ကို ဖြုတ်ချပြီး အမျိုးသား အသွင် ကူးပြောင်းရေးကောင်စီ NTC တပ်တွေ သူ့အိမ်ကို သြဂုတ်လတုန်းက ၀င်ရောက် သိမ်းပိုက်တဲ့ အချိန်အထိ တိုင်းပြည် အာဏာကို ရယူ ထားခဲ့တာပါ။
ဗိုလ်မှူးကြီး ကဒါဖီဟာ အစွန်းရောက်သမား၊ တောက်ပတဲ့ ရောင်စုံတွေပါတဲ့ ၀တ်ရုံတွေနဲ့ သားကောင်တွေရဲ့ သားရေတွေကို ၀တ်ဆင်တတ်သူ၊ အမျိုးသမီး ကိုယ်ရံတော်တပ်ဖွဲ့ ထားသူ စသဖြင့် ဂုဏ်သတင်း ကြော်ကြားသူလည်း ဖြစ်ပါတယ်။ သူ့အနေနဲ့ အများ လက်မခံနိုင်တဲ့ နိုင်ငံရေးဆုံးဖြတ်ချက်တွေ ချမှတ်တတ်လေ့ ရှိတာကြောင့် ကဒါဖီဟာ အရှေ့အလယ်ပိုင်းရဲ့ ခွေးရူး တကောင် ဖြစ်တယ်လို့ ကွယ်လွန်သူ အမေရိကန် သမ္မတဟောင်း Ronald Reagan က တင်စား ခေါ်ဝေါ်ခဲ့ပါတယ်။
သူဟာ ချက်နဲ့ အီရန်အပါအ၀င် ကမ္ဘာ့တလွှားက တော်လှန်ရေး အတော်များများကိုလည်း ထောက်ခံ အားပေး ခဲ့သူဖြစ်သလို အစ္စလာမ် အစွန်းရောက် စစ်သွေးကြွတွေကို သူ့တိုင်းပြည်အတွင်း နေထိုင်ခွင့် ပြုထားခဲ့သူလည်း ဖြစ်ပါတယ်။
နိုင်ငံတကာ ကြမ်းဖက်မှုတွေမှာ ပါဝင်တဲ့အတွက်ဆိုပြီး အမေရိကန်သမ္မတ ရေဂင်က ၁၉၈၆ ခုနှစ်မှာ လစ်ဗျားနိုင်ငံကို ဗုံးကျဲ တိုက်ခိုက်ခဲ့ ဖူးပါတယ်။ နောက် ၂ နှစ်အကြာမှာတော့ အမေရိကန်ပိုင် Pan Am လေကြောင်းလိုင်းက လေယာဉ် စကော့တလန်နယ် Lockerbie မြို့ပေါ်က ပျံသန်းနေတဲ့ အချိန် သူ့ရဲ့ အမိန့်နဲ့ ဗုံးခွဲ တိုက်ခိုက်ခဲ့တဲ့ အတွက် လူပေါင်း ၂၇၀ ကျော် သေဆုံး ခဲ့ရပါတယ်။ ၁၉၄၂ ခုနှစ်က လစ်ဗျား သဲကန္တာရအတွင်း Bedoin မိသားစုက မွေးဖွားခဲ့တဲ့ မစ္စတာ ကဒါဖီဟာ လစ်ဗျား တက္ကသိုလ်က ဘွဲ့ရရှိပြီးတော့ စစ်တပ် အရာရှိတဦး ဖြစ်လာခဲ့ပါတယ်။
Ref: VOA News
ကဒါဖီသေဆုံးမှု နိုင်ငံသားတွေ ပျော်ရွှင်
ကြာသပတေး, 20 အောက်တိုဘာ 2011
လစ်ဗျား ခေါင်းဆောင်ဟောင်း မိုမာကဒါဖီကတော့ လစ်ဗျားကြားဖြတ်အစိုးရ တပ်ဖွဲ့တွေရဲ့လက်ချက်နဲ့ သူ့ရဲ့ဇာတိ ဆာ့တ် မြို့မှာပဲ မနေ့က သေဆုံး သွားခဲ့ပါပြီ။ သူသေဆုံးသွားလို့ လစ်ဗျားတနိုင်ငံလုံး ပျော်ရွှင်နေကြပါတယ်။ ကဒါဖီ သေဆုံးချိန်မှာ အသက် ၆၉ နှစ်ရှိပါပြီ။
ကဒါဖီဟာ နှစ်ပေါင်း ၄၀ ကျော် တိုင်းပြည်ကို အုပ်ချုပ်ခဲ့တာပါ။ ပြီးခဲ့တဲ့ ဖေဖော်ဝါရီလကစလို့ နိုင်ငံအရှေ့ပိုင်းမှာ သူပုန်တွေက ကဒါဖီကို ဆန့်ကျင် တိုက်ခိုက်ခဲ့ကြပြီး ကဒါဖီရှိတဲ့ မြို့တော် ထရီပိုလီကို သြဂုတ်လမှာ သူပုန်တွေ ၀င်ရောက် ခဲ့ကြတဲ့အထိ ကဒါဖီက လစ်ဗျားကို အုပ်ချုပ်ခဲ့တာပါ။ အခုအချိန်ဟာ လစ်ဗျား ပြည်သူတွေအားလုံး က ညီညွတ်တဲ့ လစ်ဗျား နိုင်ငံသစ်ကို ထူထောင်ရမယ့် အချိန်ဖြစ်တယ်လို့ လစ်ဗျား ကြားဖြတ် အစိုးရ NTC ရဲ့ ၀န်ကြီးချုပ် မာမွတ် ဂျီဘရေး Mahmoud Jibril က ထရီပိုလီမှာ ကျင်းပတဲ့ သတင်းစာ ရှင်းလင်းပွဲမှာ ပြောခဲ့ပါတယ်။
လစ်ဗျားနိုင်ငံမှာ ၆ လကြာ လေကြောင်း စစ်ဆင်ရေးတွေ လုပ်ခဲ့တဲ့ နေတိုးတပ်ဖွဲ့ကလည်း သူတို့ရဲ့ လစ်ဗျား စစ်ဆင်ရေးကို အဆုံးသတ်ဖို့ ဘယ်လ်ဂျီယန် နိုင်ငံ၊ ဘရာဆဲလ်စ်မြို့မှာ ဒီကနေ့ ဆွေးနွေးကြဖို့ ရှိတယ်လို့ နေတိုး သံတမန်တွေက ပြောပါတယ်။ နေတိုး တပ်ဖွဲ့တွေဟာ မိုမာကဒါဖီကို သစ္စာခံတဲ့ တပ်ဖွဲ့တွေက လစ်ဗျားပြည်သူတွေကို တိုက်ခိုက် နေတာတွေကနေ ကာကွယ်ဖို့ လစ်ဗျား စစ်ဆင်ရေးကို စခဲ့ကြတာပါ။
မနေ့တုန်းက ကဒါဖီ လိုက်ပါလာတဲ့ ယာဉ်တန်းကို တိုက်ခိုက်ခဲ့တဲ့ အစီအစဉ်မှာ နေတိုးတပ်ဖွဲ့တွေ ဘက်က ပြင်သစ် စစ်လေယာဉ် တစီးလည်း ပါဝင်ခဲ့တယ်လို့ ပြင်သစ် ကာကွယ်ရေးဝန်ကြီးက ပြောပါတယ်။ ကဒါဖီနဲ့ သူ့ရဲ့လက်ကျန် အဖွဲ့သားတွေဟာ သူတို့ရဲ့ နောက်ဆုံး ခံတပ်ဖြစ်တဲ့ ဆာ့တ်မြို့ကနေ ထွက်ပြေးဖို့ ကြိုးစားနေကြတုန်း မနေ့က တိုက်ခိုက် ခံခဲ့ရလို့ ကဒါဖီ သေဆုံးခဲ့တာပါ။
ကဒါဖီရဲ့ယာဉ်တန်းကို အမေရိကန်ရဲ့ အဝေးထိန်းဒုံးယာဉ်တခု ကလည်း ပစ်ခပ် တိုက်ခိုက်ခဲ့တယ်လို့ အမေရိကန် ကာကွယ်ရေး အရာရှိတွေက ပြောကြပါတယ်။ NTC ကြားဖြတ် အစိုးရရဲ့ မြေပြင် တပ်ဖွဲ့တွေနဲ့ ကဒါဖီရဲ့ယာဉ်တန်းမှာပါတဲ့ ကဒါဖီ သစ္စာခံတွေ အပြန်အလှန် ပစ်ခတ်ကြပြီး မကြာခင်မှာပဲ ကဒါဖီကို ရှာတွေ့ခဲ့ကြတာပါ။ ကမ္ဘာတ၀ှန်းမှာ ထုတ်လွှင့်ပြသခဲ့တဲ့ ဗွီဒီယိုထဲမှာတော့ ဒဏ်ရာရပြီး သွေးတွေ စွန်းပေနေတဲ့ ကဒါဖီကို NTC တပ်ဖွဲ့ဝင်တွေက ဆွဲလာတဲ့ပုံကို မြင်ရပါတယ်။ အဲဒီနောက်မှာ ကဒါဖီ သေဆုံးသွားတာပါ။ ဘယ်လို သေဆုံးရတယ် ဆိုတာကတော့ ရှင်းရှင်းလင်းလင်း မသိရသေးပါဘူး။
Ref: VOA News
လိုင်ဇာအနီး အစိုးရတပ်များ တိုးမြှင့်ချထား
ဖနိဒါ
ကြာသပတေးနေ့၊ အောက်တိုဘာလ ၂၀ ရက် ၂၀၁၁
ချင်းမိုင်(မဇ္ဈိမ) ။ ။ ကချင်လွတ်မြောက်ရေးအဖွဲ့ KIO ၏ ဗဟိုဌာနချုပ်ရှိရာ လိုင်ဇာမြို့ အနီး တဝိုက်တွင် မြန်မာ အစိုးရ၏ တပ်ရင်း အနည်းဆုံး ၁၆ ရင်းအထိ တိုးမြှင့်လာပြီး တိုက်ပွဲများ ပိုမိုလာသည်ဟု KIO ပြောရေး ဆိုခွင့် ရှိသူ ဦးလနန်က ပြောသည်။
မြန်မာ-တရုတ်နယ်စပ်မြို့ဖြစ်သော လိုင်ဇာနှင့် ၁၅ မိုင် အကွာအတွင်း အင်အား ၁ဝဝဝ ကျော်ခန့်ရှိ မြောက် ပိုင်းတိုင်း စစ်ဌာနချုပ် လက်အောက်ခံ တပ်ရင်း ခလရ ၄ဝ၊ ခမရ ၁၂၁၊ ခလရ ၁၄၁၊ ၁၄၂၊ ခမရ ၃၈၁၊ ၃၈၃၊ ၃၈၄၊ ၃၈၈၊ ၄၃၈၊ ခလရ ၂၆ဝ၊ ၃၇၊ ၂၁၊ ခမရ ၃၉ဝ၊ ၃၈၉၊ ၃၈၆ တို့ ထိုးစစ်ဆင်လာမှု ရှိနေသည်ဟု သိရသည်။
ဗုဒ္ဓဟူးနေ့က နမ့်ဆန်ယန်၊ အောင်ဂျာကျေးရွာနှင့် အနီးတဝိုက် နှစ်ဘက်တပ်များ ထိတွေ့မှု ၁ဝ ကြိမ် ဖြစ်ပွား ခဲ့သလို ရှမ်းပြည် နယ် ကွတ်ခိုင်မြို့နယ် အတွင်းတွင်လည်း အလားတူ တိုက်ပွဲများ ဖြစ်ခဲ့သည်ဟု ဆိုသည်။
ထို့အပြင် အစိုးရတပ်အတွက် စစ်ကူများ ထပ်မံ ရောက်ရှိ လာနေရာ ဗန်းမော်မြို့မှ ရေလမ်းခရီးဖြင့် အင်အား ၅ဝဝ ခန့်နှင့် မြစ်ကြီးနား မြို့မှ မီးရထားဖြင့် အင်အား ၁ဝဝ ကျော် ဗုဒ္ဓဟူးနေ့က ရောက်လာခဲ့သည်ဟု KIO စစ်ဘက် သတင်း များက ပြောသည်။
“ကျနော်တို့ဘက်က ထူးထူးခြားခြား စိုးရိမ်စရာ မရှိပါဘူး။ ကျနော်တို့က နေရာတခု၊ ဒေသတခုကို ခံတပ်အနေ နဲ့ တိုက်နေတာ မဟုတ်ပါဘူး။ ကျနော်တို့က ကချင်ပြည်နယ်၊ ရှမ်းပြည်နယ် မြောက်ပိုင်း ကချင်ဒေသ အားလုံး မှာ ကျနော်တို့ တပ်ဖွဲ့တွေ ရှိပါတယ်” ဟု ဦးလနန်က ပြောသည်။
“ကေအိုင်အိုကို အမြစ်ဖြတ်ချေမှုန်းဖို့ကတော့ မဖြစ်နိုင်တဲ့ကိစ္စပါ။ ကျနော်တို့ဘက်က ဘာမှ စိုးရိမ်ပူပန်မှု မရှိပါ ဘူး။ ဝင်လာတဲ့ စစ်ကြောင်း တွေကို ဖြစ်တဲ့နည်းနဲ့ တိုက်ထုတ်သွားမှာပါ”
ထို့အပြင် အစိုးရတပ်က ဒေါ့ဖုန်းယန်မြို့နယ်သို့ သံချပ်ကာကားများကို အဆင်သင့်ရွှေ့ပြောင်းချထားပြီး ၁၂၀ မမ၊ ၁၅ဝ မမ အမြောက်ကြီးများ သယ်ဆောင် လာခဲ့သည်ဟု ဆိုသည်။
Ref: မဇ္ဈိမ
စစ်တွေ လေဆင်နှာမောင်း ပျက်စီးမှု အချို့ရှိ
သဲသဲ
ကြာသပတေးနေ့၊ အောက်တိုဘာလ ၂၀ ရက် ၂၀၁၁
နယူးဒေလီ(မဇ္ဈိမ) ။ ။ ရခိုင်ပြည်နယ် မြောက်စွန်းအနီး ဖြတ်သန်း တိုက်ခက်ခဲ့သည့် O2B မုန်တိုင်း အရှိန်ကြောင့် စစ်တွေမြို့ အတွင်း လေဆင်နှာမောင်း တိုက်ခက်ခဲ့ကာ စာသင်ကျောင်း နှစ်ကျောင်းနှင့် စစ်တွေ မြို့ဈေးကြီးမှ ဆိုင်ခန်းတချို့ ပျက်စီးခဲ့သည်။
O2B မုန်တိုင်းမှာ ရခိုင်ပြည်နယ်မြောက်စွန်းနှင့် ဘင်္ဂလားဒေ့ရှ် နိုင်ငံကြား ဖြတ်သန်း သွားခြင်းဖြစ်ကာ ယင်းအရှိန်ကြောင့် စစ်တွေမြို့ အိုးတန်း၊ ကျေးပင်ကြီးနှင့် ကျောင်းတက်လမ်း ရပ်ကွက်များတွင် အောက်တိုဘာလ ၁၉ ရက်က လေဆင်နှာမောင်း တိုက်ခက်ခဲ့ခြင်း ဖြစ်သည်။
“တိုက်တာ ၁၅ မိနစ်လောက်ပဲကြာတယ်။ စာသင်ကျောင်းထဲက ကျွန်းပင်ကြီးတွေ ကျိုးကျ ကုန်တယ်။ ကျောင်း ခေါင်မိုးတွေ လေနဲ့ ပါသွားတယ်။ ဈေးမှာလည်း ခေါင်မိုးတွေ လေနဲ့ ပါသွားတယ်” ဟု မြို့ခံ တဦးက မဇ္ဈိမကို ပြောသည်။
လေဆင်နှာမောင်းမှာ ညနေ ၆ နာရီခန့်နှင့် ည ၁၂ ခန့်တို့တွင် နှစ်ကြိမ် တိုက်ခက်ခဲ့ခြင်း ဖြစ်သည်။ ပထမ အကြိမ် တိုက်ခက်စဉ်က စစ်တွေဈေးကြီး အတွင်းမှ ဆိုင်ခန်းအချို့ ပျက်စီး ခဲ့ခြင်းဖြစ်ပြီး ဒုတိယအကြိမ် တိုက်ခက်ရာတွင် စာသင်ကျောင်း နှစ်ကျောင်းပါ ပျက်စီးခဲ့ခြင်း ဖြစ်သည်။
ဘင်္ဂလား ပင်လယ်အော် အတွင်း ဖြစ်ပေါ်ခဲ့သည့် ယင်းအပူပိုင်းမုန်တိုင်းမှာ တနာရီလျှင် မိုင် ၆၀ မှ ၇၀ အထိ ပြင်းအား ရှိပြီး ရခိုင်ပြည်နယ် မောင်တောမြို့နှင့် ဘင်္ဂလားဒေ့ရ်ှနိုင်ငံ ကော့ဘဇားမြို့ အကြား ဖြတ်သန်းမည် ဟု မြန်မာနိုင်ငံ မိုးလေဝသနှင့် ဇလဗေဒ ဌာနက ဗုဒ္ဓဟူးနေ့ နေ့လယ်ပိုင်းမှစ၍ သတိပေးချက် ထုတ်ပြန်ခဲ့သည်။
ယင်းအပြင် မုန်တိုင်းဝင်ရောက်ချိန်တွင် ပင်လယ်ရေမှာ ခြောက်ပေမှ ရှစ်ပေအထိ မြင့်တက်နိုင်သဖြင့် ဘေးကင်း ရာသို့ ရှောင်ရှား ကြရန်လည်း နိုင်ငံပိုင် ရေဒီယိုနှင့် ရုပ်မြင်သံကြားမှ တဆင့် ကြေညာခဲ့သည်။
“ရေတက်မယ်လို့ ကြေငြာထားတော့ ပစ္စည်းတွေ အပေါ်တင်ထားတယ်။ အိမ်ထဲတော့ ရေမဝင်ဘူး၊ လမ်းမပေါ် လောက်ပဲ တက်လာတယ်”ဟု စစ်တွေမြို့ခံက ပြောသည်။ ယနေ့ နံနက်တွင်လည်း လေတိုက်နှုန်း ငြိမ်သွားပြီ ဖြစ်သော်လည်း ပင်လယ်သို့ သင်္ဘောများ မထွက်ကြဟုလည်း သိရသည်။
မုန်တိုင်းဖြတ်သန်းမည်ဟု ကြေညာခဲ့သည့် မောင်တောမြို့တွင်မူ ဆိုးဆိုးဝါးဝါး ထိခိုက်မှုမရှိခဲ့သော်လည်း ခရိုင် အုပ်ချုပ်ရေးမှူး ရုံးမှာမူ သစ်ပင် ကျိုးကျမှုကြောင့် အနည်းငယ် ပျက်စီး သွားသည်ဟု သိရသည်။
“ရွာဘက်တွေမှာတော့ ဘယ်လောက်ထိသလဲ ကျနော်တို့ မသိရသေးဘူး။ မောင်တောမြို့ပေါ်မှာတော့ ခယက ရုံးလောက်ပဲ သစ်ပင်ပိလို့ နည်းနည်း ထိသွားတယ်။ ကျန်တာ ဘာမှမဖြစ်ဘူး နည်းနည်းပါးပါးပဲ။ အခုက လေတိုက် တာ ရပ်သွားပြီ” ဟု မောင်တော မြို့ပေါ်ရှိ ဒေသခံတဦးက မဇ္ဈိမကို ပြောသည်။
ယခုအခါ မုန်ုတိုင်းမှာ အားပျော့နေပြီဖြစ်ကာ ယနေ့နံနက်တွင် အိန္ဒိယ-မြန်မာနယ်စပ် ချင်းပြည်နယ်ဘက်သို့ ရွေ့လျားလျက် ရှိကာ မုန်တိုင်း အရှိန်ကြောင့် ရခိုင်နှင့် ချင်းပြည်နယ်၊ စစ်ကိုင်းနှင့် မကွေးတိုင်းတို့တွင် မိုးကြီးနိုင် မည်ဟု မိုး/ဇလမှ ယနေ့ နံနက်တွင် ကြေညာချက် ထုတ်ထားသည်။
“ကုန်းတွင်းရောက်သွားတော့ မကွေးဘက်ထိ မိုးရွာနိုင်တယ်။ အဲဒီမှာ လျှပ်တပြက် ရေကြီးတာတို့၊ အန္တရာယ် ရှိနိုင် တာပေါ့” ဟု မိုး/ဇလ ညွှန်ကြားရေးမှူးချုပ် ဦးချစ်ကျော်က ဆိုသည်။ ရေကြီးရေလျှံမှု ကာကွယ်နိုင်ရန် အတွက်လည်း ဒေသ အာဏာပိုင်များသို့ အကြောင်းကြား ထားည်ဟု သိရသည်။
မုန်တိုင်းမိုးကြောင့် စစ်တွေမြို့တွင် ၇.၆၊ မောင်တောတွင် ၆.၆၉၊ စစ်ကိုင်းတိုင်း မော်လိုက်မြို့တွင် ၂.၂၈ နှင့် ချင်းပြည်နယ် ဟားခါး တို့တွင် ၁.၅ဝ လက်မအထိ တရက်အတွင်း ရွာသွန်းမြဲထက် ပိုမိုရွာသွန်းခဲ့သည်။
မိုးရွာသွန်းမှုကြောင့် လာမယ့် ၄၈ နာရီအတွင်း ချင်းတွင်းမြစ်ရေမှာ မုံရွာမြို့၏ စိုးရိမ်ရေမှတ်သို့ ရောက်ရှိ နိုင်ပြီး စစ်တောင်း မြစ်ရေမှာမူ တောင်ငူမြို့တွင် စိုးရိမ်ရေမှတ် အထက် တပေ ကျော်လွန်နေပြီ ဖြစ်သည်။
မုန်တိုင်းမှာ လက်ရှိတွင် တနာရီ ၄ဝ မှ ၄၅ မိုင် ပြင်းအားရှိ လေဖိအားနည်းရပ်ဝန်း အဖြစ် ဆက်လက် ရွေ့လျား လျက်ရှိသည်။
Ref: မဇ္ဈိမ
Thursday, October 20, 2011
ဝန်ကြီးများရုံး ဟိုတယ်လုပ်ရန် ဦးခင်ရွှေ ကမ်းလှမ်း
ထွန်းထွန်း
ဗုဒ္ဓဟူးနေ့၊ အောက်တိုဘာလ ၁၉ ရက် ၂၀၁၁
နယူးဒေလီ (မဇ္ဈိမ) ။ ။ ဗိုလ်ချုပ်အောင်ဆန်း အပါအဝင် အာဇာနည် ခေါင်းဆောင်ကြီးများ လုပ်ကြံခံ ခဲ့ရသည့် နှစ်ပေါင်း ၁၂၀ သက်တမ်းရှိ ဝန်ကြီးများ ရုံးအဆောက်အအုံကို ဟိုတယ် လုပ်ငန်း လုပ်ကိုင်ချင်သူများ ရှိပါက ကူညီပေး သွားမည် ဖြစ်ကြောင်း မြန်မာ့ ခရီးသွား လုပ်ငန်း ဘုတ်အဖွဲ့ MTB ဥက္ကဋ္ဌ ဦးခင်ရွှေက ပြောဆိုသည်။
ရန်ကုန်မြို့ ကျောက်တံတားမြို့နယ် ဗိုလ်အောင်ကျော်လမ်းရှိ ရုံးမှာ အင်္ဂလိပ်တို့က အုပ်ချုပ်ရေး ဗဟိုဌာနအဖြစ် ၁၈၉၀ ပြည့်နှစ်က ဆောက်လုပ်ခဲ့ခြင်း ဖြစ်သည်။ အင်္ဂလိပ်ခေတ် အုပ်ချုပ်ရေး ယန္တရား၏ အမြင့်ဆုံးဖြစ်ပြီး အတွင်း ဝန်ချုပ်နှင့် အတွင်းဝန်များ ရုံးစိုက်ရာ နေရာ ဖြစ်သည်။
“လုပ်ဦးမယ်ရယ်လို့ မဟုတ်သေးဘူး။ Proposal ဝိုင်းတင်ကြ။ အဆောက် အဦး အများကြီးပေါ့ဗျာ။ အများကြီးထဲမှာ ဝန်ကြီးချုပ် ရုံးလည်း ပါတာပေါ့ဗျာ။ အဆောက်အဦးတွေ အများကြီး ရှိတယ်၊ နိုင်ငံတော်ပိုင် အဆောက် အဦးတွေ။ အဲဒီ အများကြီးထဲက ကိုယ်ကြိုက်တဲ့ကောင်ကို ဝိုင်းပြီးတော့ ဝိုင်းတင် ကြ။ ဒါပါပဲ” ဟု MTB ဥက္ကဋ္ဌ ဦးခင်ရွှေက မဇ္ဈိမကို ပြောသည်။
နိုင်ငံတော်အနေဖြင့် ခရီးသွားလုပ်ငန်း တိုးမြှင့်ရေး အတွက် လိုလားမှုရှိနေပြီး ၂၀၀၉ ခုနှစ်အထိ ဝန်ကြီးများရုံး အဖြစ် အသုံးပြုခဲ့သော အဆောက်အအုံ ကဲ့သို့ပင် ရန်ကုန်မြို့၊ ဒဂုံမြို့နယ် အလံပြဘုရားလမ်းရှိ စစ်ရုံးချုပ်နေရာ အပါအဝင် အစိုးရပိုင် အဆောက်အအုံ များကိုလည်း စိတ်ဝင်စားပါက ကူညီပေးသွားမည် ဖြစ်သည်ဟု ဆိုသည်။
“နိုင်ငံတော် အနေနဲ့က အခုဟာက ဟိုတယ်တွေက ရန်ကုန်မှာ တော်တော်လေး လိုတယ်လေ။ လိုနေတဲ့အခါ ကျတော့ အမြန်
ဖြည့်ဆည်းဖို့က နိုင်ငံတော် အဆောက်အဦးတွေကို လုပ်ဖို့ရှိတယ်။ လုပ်ပေးရမယ့် အပိုင်းမှာမှ အဲဒီ အဆောက် အဦးတွေ အကုန် ပါတာပေါ့ဗျာ” ဟု ဦးခင်ရွှေက ဆိုသည်။
သို့သော် MBT အနေဖြင့် လုပ်ပိုင်ခွင့်ရမည်၊ မရမည်ကိုမူ အာမခံမည် မဟုတ်သော်လည်း နိုင်ငံတော်သို့ တင်ပြရန် အတွက်သာ ကူညီခြင်း ဖြစ်သည်။ လုပ်ကိုင်လိုသူများ အနေဖြင့် ဟိုတယ်နှင့် ခရီးသွားလုပ်ငန်း ဝန်ကြီးဌာနမှ တဆင့် နိုင်ငံတော်သို့ တင်ပြရမည် ဖြစ်သည်။
“တကယ်လို့ စိတ်ဝင်စားမယ်ဆိုရင် Proposal တင်၊ MTB ကနေ ဝိုင်းဝန်းဆောင်ရွက်ပေးမယ် ဆိုတာပါ။ MTB က ဘာမှ ဆုံးဖြတ် ပိုင်ခွင့် ရှိတာ မဟုတ်ဘူး။ နိုင်ငံတော်က ပေးမယ်၊ မပေးဘူး ဆိုတာကတော့ ဘယ်သူမှ အာမခံလို့ မရသေးဘူး” ဟု ဦးခင်ရွှေက ဆိုသည်။
သို့သော် သမိုင်းဝန် အတွင်းဝန်ရုံးကဲ့သို့သော အဆောက်အအုံအား ငှားရမ်းမည်ဆိုပါက လွှတ်တော်တွင်း ကန့်ကွက် သွားမည် ဖြစ်ကြောင်း ရွေးကောက်ပွဲဝင် ပါတီများက ပြောဆိုသည်။
“သေးသိမ်အောင်တော့ လုပ်ဖို့တော့ ကျနော်တို့မှာ ဆန္ဒမရှိဘူး။ သေးသိမ်တဲ့ အဖြစ်မျိုး ရောက်အောင်လည်း ကျနော်တို့ မခံလိုဘူးပေါ့ဗျာ။ ဒီအတွက် ကျနော်တို့ ဝိုင်းဝန်းပြီးတော့ ကာကွယ်ဖို့ ကြိုးပမ်း ကြရမှာပဲလေ။ အဲဒီတော့ သူတို့မှာ ဘယ်လိုပဲ အိုင်ဒီယာ ရှိရှိ အဲဒီအိုင်ဒီယာ တက်လာရင် ကျနော်တို့က ချေဖျက်မှာပဲ” ဟု အမျိုးသား ဒီမိုကရေစီ အင်အား စုပါတီ - NDF ခေါင်းဆောင် ဦးခင်မောင်ဆွေက မဇ္ဈိမကို ပြောသည်။
၁၉၃၈ ခုနှစ် ဒီဇင်ဘာလ အတွင်းက ကိုလိုနီ ဗြိတိသျှအစိုးရကို တက္ကသိုလ်ကျောင်းသားများက ဆန့်ကျင် ဆန္ဒပြရာတွင် ပုလိပ်များက ရိုက်နှက်၍ ကျောင်းသား ခေါင်းဆောင် ကိုအောင်ကျော် သေဆုံးခဲ့သည်မှာ အတွင်းဝန်ရုံး ရှေ့တွင် ဖြစ်သည်။ မြန်မာ့ လွတ်လပ်ရေး ဗိသုကာ ဖြစ်သော ဗိုလ်ချုပ်အောင်ဆန်းနှင့် သူ၏ ကက်ဘိနက် အဖွဲ့ဝင်များကို ပြိုင်ဘက် နိုင်ငံရေးသမား ဦးစော၏ လက်ပါးစေများက လုပ်ကြံ သတ်ဖြတ်ခဲ့သော နေရာလည်းဖြစ်ကာ ပထမဆုံးသော လွတ်လပ်သော မြန်မာနိုင်ငံ၏ အလံ လွှင့်တင်သော အခမ်းအနား ကျင်းပရာလည်း ဖြစ်သည်။
“သမိုင်းကြောင်းအရ ထင်ရှားတဲ့ ဒီလို အဆောက်အအုံမျိုးတွေတော့ နောင်လာနောင်သား ပေါ့ဗျာ။ အစဉ်အဆက် ပြောပြ၊ ဆိုပြနိုင်အောင် ပေါ့လေ။ ဒီအဆောက်အဦးက ပြောတဲ့ သမိုင်းကြောင်း တွေကို ပြန်ပြီးတော့ ပြောနိုင်ဆိုနိုင်ဖို့ အတွက် ကတော့ ယဉ်ကျေးမှု ဝန်ကြီးဌာန အနေနဲ့ကပဲ ထိန်းသိမ်း စောင့်ရှောက်ထား သင့်တယ်” ဟု တိုင်းရင်းသား စည်းလုံး ညီညွတ်ရေး ပါတီ - တစည ပြောခွင့်ရ ဦးဟန်ရွှေက ဆိုသည်။
၂၀၁၀ ခုနှစ် အစောပိုင်းက အထည်ချုပ်၊ စားသောက်ကုန်၊ အိမ်သုံးကုန်၊ လျှပ်စစ်ပစ္စည်းနှင့် ရုပ်ရှင်ရုံ၊ အဆောက် အဦးများ ပါသော နိုင်ငံပိုင်လုပ်ငန်း ၁၁၀ ကျော်ကို ပုဂ္ဂလိကပိုင်အဖြစ် လွှဲပြောင်းခဲ့ကြောင်း ပုဂ္ဂလိကပိုင် ပြုလုပ်ရေး ကော်မရှင်က ထုတ်ပြန်ခဲ့သည်။ ထို့ပြင် ၂ဝဝ၉ အတွင်း နိုင်ငံပိုင် အဆောက်အဦး၊ မြေယာနှင့် လုပ်ငန်းပေါင်း ၂၆၀ ကို ပုဂ္ဂလိကသို့ ရောင်းချခဲ့သည်။
Ref: မဇ္ဈိမ
နိုင်ငံရေးဘ၀တွေ ပြန်လည်ထူထောင်ကြဖို့ အချိန်ရောက်ပြီ
ဟုတ်တယ်။ ကမ္ဘာကလည်း မျှော်လင့်တယ်။ မြန်မာပြည်သူတွေကလည်း မျှော်လင့်တယ်။ နိုင်ငံရေး အကျဉ်းသားမိသားစု တွေကလည်း မျှော်လင့် နေကြတဲ့အချိန်မှာ လူဦးရေ ၂၀၀ လောက်ပဲ လွတ်မြောက်လာတယ် ဆိုတော့ အများက မျှော်လင့်သလို မဟုတ်တဲ့ အတွက် စိတ်ပျက်ကြတယ်။ ကျနော်တို့က တဆင့်တက် ပြောရရင်တော့ ကျေနပ်ဖွယ်ရာ မရှိဘူးလို့လည်း ပြောချင်တယ်။
အဲသည်လိုမျိူး ကျနော်တို့ ပတ်ဝန်းကျင်မှာ ပြောဆိုသံတွေ ကြားနေရတယ်။ အခုလက်ရှိ အစိုးရ ဆိုသူတွေ ကလည်း အရင် အစိုးရက လူတွေ၊ စစ်ဗိုလ်ချူပ်တွေပဲ ဆိုတော့၊ သမ္မတ ကိုယ်တိုင်ကလည်း အရင်အစိုးရ လက်ထက်မှာ ကတည်းက ၀န်ကြီးချုပ် ဖြစ်ခဲ့တဲ့ သူတွေ ဖြစ်နေတော့ ဒီလူတွေရဲ့ စိတ်ထဲမှာ အရင် အတိတ်က အကြောင်းအရာ တွေကနေ ကင်းကင်း လွတ်လွတ် ရှိနိုင်ရဲ့လားလို့ မေးစရာ ဖြစ်လာတယ်။
နိုင်ငံတကာက အစိုးတွေ၊ အဖွဲ့တွေ၊ အမေရိကန်၊ ဥရောပသမဂ္ဂ၊ အာရှ သာမက ကုလသမဂ္ဂတွေနဲ့ တွေ့ဆုံတဲ့ အကြိမ်တိုင်းမှာ လက်ရှိ အစိုးရက နိုင်ငံရေး အကျဉ်းသားတွေ ကိစ္စကို သူတို့ကိုယ်တိုင် ပြောဆို ဆွေးနွေးတာတွေ လုပ်ခဲ့ပြီးကာမှ အခုလို နိုင်ငံရေး အကျဉ်းသား အနည်းငယ်သာ လွတ်မြောက်လာတဲ့ အတွက် နိုင်ငံတကာမှာလည်း မျက်နှာ ပျက်စရာ ဖြစ်တယ်လို့ ပြောကြတယ် ဆရာ။
လူတိုင်းလူတိုင်းက၊ နိုင်ငံတကာက အစိုးရတွေ၊ အဖွဲ့အစည်းတွေကလည်း သည်လောက် အကြိမ်ကြိမ် တောင်းဆို နေတဲ့ကြားက သည်လောက်ပဲ လွှတ်ပေး လိုက်တယ်ဆိုတော့ ဘယ်လိုပဲ စိတ်ပျက်ပျက်၊ မကျေနပ်ဖူးလို့ ဆိုဆို သို့သော်လည်း လွှတ်ပေးတဲ့ အတွက် ၀မ်းသာတဲ့ အကြောင်း၊ နောက်လည်းပဲ လွှတ်ပေးပါဦးလို့ ပြောနေရတဲ့ အဖြစ် ဆိုက်နေတာပေါ့။
နိုင်ငံရေးအကျဉ်းသားတွေ အားလုံးလွှတ်ပေးလိုက်ရင် နိုင်ငံမှာ ဆူပူမှုတွေ ငြိမ်းချမ်းရေး ပျက်ပြားမှုတွေ ဖြစ်လာမှာ စိုးရိမ်လို့ ဆိုပြီး အစိုးရဖက်က လူတွေက အကြိမ်ကြိမ် ပြောနေကြတာလည်း ရှိတယ်လေ ဆရာ။
အခုအချိန်မှာ ပြန်လည်လွတ်မြောက်လာတဲ့ နိုင်ငံရေးအကျဉ်းသားတွေ ကိုယ်တိုင်မှာ ဖြေရှင်းရမယ့် ပြသနာတွေ ကိုယ်စီ ပါလာတယ်။ သူတို့တွေက ဆူပူဖို့ ငြိမ်းချမ်းရေးကို ပျက်ဆီးအောင်လုပ်ဖို့ မပြောနဲ့ဦး နိုင်ငံရေး အကျဉ်းသားတွေနဲ့ မိသားစုတွေ ကိုယ်တိုင်မှာ အခက်အခဲတွေ၊ အကြပ်အတည်းတွေ၊ ပြန်လည် ထူထောင်ရမယ့် အရေးကိစ္စတွေ အများကြီးနဲ့ အပြင်လောကကို ထွက်လာတာ ဖြစ်တယ်။ သည်လိုမျိူး မြင်ကြည့် စေချင်တယ်။ မိသားစုအရေး၊ ပညာရေး၊ လူမှုရေး၊ စားဝတ်နေရေး၊ ကျန်းမာရေး ပြသနာတွေ ဖြေရှင်းရမှာ ပြန်လည် ထူထောင်ရမယ့် အရေးတွေ အများကြီး ပါလာတယ်။ ဒါတွေက ဖမ်းဆီး ချုပ်နှောင်တုန်းက ဖမ်းဆီးခဲ့ပြီးတော့ အခုလို လွှတ်ပေးလိုက်ရုံနဲ့ ပြေလည်သွားတာမျိူး မဟုတ်ဘူး။ သူတို့ဆုံးရှုံးသွားတဲ့ အထွေထွေ အခြေအနေတွေကို ပြန်လည် ထူထောင်ကြဖို့ လုပ်ကြရမယ်။ အဲဒါတွေနဲ့ ထပ်တူ အရေးကြီးတာ ကတော့ လွတ်မြောက်လာတဲ့ နိုင်ငံရေး အကျဉ်းသားတွေ အားလုံးရဲ့ နိုင်ငံရေးဘ၀တွေ လွတ်လပ်စွာ ပြန်လည် ထူထောင်ခွင့် ရရှိဖို့ ဖြစ်တယ်။
သူတို့ရဲ့ နိုင်ငံရေးဘ၀တွေ ပြန်လည် ထူထောင်ဖို့ဆိုတာက ဘာတွေလဲ ဆရာ။
လွတ်မြောက်လာတဲ့ နိုင်ငံရေးသမားတွေဟာ သူတို့ယုံကြည်တည်ဆောက် ရပ်တည်ထားတဲ့ နိုင်ငံရေး ဘ၀ အသီးသီး တွေကို သူတို့ဆန္ဒ သဘောထားတွေနဲ့ အညီ လွတ်လွတ်လပ်လပ် ထူထောင်ခွင့် တည်ဆောက်ခွင့် ရှိဖို့ အရေးကြီးတယ်။ သူတို့ရဲ့ နိုင်ငံရေး သဘောထားတွေကို ပြန်လည် သုံးသပ်ကြမယ်၊ ပြောဆိုဆွေးနွေး ညှိနှိုင်း သုံးသပ်တာတွေ လုပ်ကြရမယ်။ တဦးချင်း ခံစားချက်၊ လေ့လာချက်၊ ဆွေးနွေးချက်တွေကို လုပ်ပိုင်ခွင့်တွေ ရှိသလို အများကလည်း ၀ိုင်းဝန်း အားပေး ကူညီမှုတွေ ပြုကြရမယ်လို့ ပြောချင်တယ်။ သူတို့တွေကို နိုင်ငံရေး ဘ၀တွေ ပြန်လည် ထူထောင်မှုတွေ လုပ်နိုင်အောင်လို့ ကျနော်တို့က ပြည်သူတွေက မိသားစုတွေ၊ မိတ်ဆွေတွေက ၀ိုင်းဝန်း ကူညီတာတွေ၊ ပံ့ပိုးတာတွေ လုပ်ပေးကြရမယ်၊ ကူညီကြရမယ်လို့ ကျနော်က တလောက ပြုလုပ်တဲ့ တော်ဝင်နှင်းဆီခန်းမ ကန်တော့ပွဲမှာလည်း ပြောခဲ့တာ ဖြစ်တယ်။ ပြင်ပက လူတွေကလည်း လက်ရှိ တိုင်းပြည်နဲ့ နိုင်ငံတကာ အခြေအနေတွေ အပြောင်းအလဲတွေကို တင်ပြ ပြောဆို ဝေမျှတာတွေ လုပ်ကြရမယ်။
လွတ်မြောက်လာတဲ့ နိုင်ငံရေး အကျဉ်းသားတွေနဲ့ မိသားစုတွေရဲ့ နိုင်ငံရေးဘ၀တွေ သာမက အထွေထွေ ဘ၀တွေ ပြန်လည် ထူထောင်ဖို့ ဆရာတို့က ဘယ်လို လုပ်ကြမှာလဲ ဆရာ။
ကျနော်တို့တွေက သူတို့ အကျဉ်းကျနေချိန်မှာ တတ်စွမ်းနိုင်သလောက် ကူညီအားပေးဖို့ ကြိုးစား သလိုမျိူးပဲ လွတ်မြောက် လာတဲ့ သူတွေနဲ့ တွေ့ဆုံပြီး ဆွေးနွေးဖို့ ကူညီဖို့ ကြိုးစားကြမယ်။ နိုင်ငံရေး အကျဉ်းသားတွေနဲ့ မိသားစုတွေကလည်း မိတ်ဆွေတွေနဲ့ တွေဆုံဆွေးနွေး ကြပါ။ လိုအပ်ချက်တွေ မေးခွန်းတွေ အခြေအနေ တွေကို မသိဘဲ မစုံစမ်းဘဲနဲ့ ရမ်းသန်းပြီး ကူညီလို့တော့ မရဘူး။ လေ့လာ ကြရမယ်။ သူတို့တွေရဲ့ အတွေးအမြင်တွေရဲ့ နောက်ခံနဲ့ အပြောင်းအလဲတွေ ဘယ်လိုဖြစ်လာသလဲ။ ကျနော်တို့ တွေကလည်း သိရှိနားလည် စာနာနိုင်အောင် ကြိုးစားရမယ်။
နိုင်ငံရေးအကျဉ်းသား မိသားစုတွေကို အားပေးကူညီတဲ့ ကွန်ယက် လှုပ်ရှားမှုတွေတင် သာမက လက်ရှိ အစိုးရ ကိုယ်တိုင်ကလည်း အခုလို နိုင်ငံရေး အကျဉ်းသားတွေ ဖမ်းဆီး ထားခဲ့မှုတွေ အတွက် တာဝန်ယူ ဖြေရှင်းပေးဖို့ မလိုအပ်ဘူးလား ဆရာ။ သူတို့တွေဟာ အာဏာပိုင်တွေနဲ့ သဘောထားချင်း မတူညီလို့ ဆန့်ကျင်လို့ဆိုပြီး အမှုအမျိူးမျိူးနဲ့ ဖမ်းဆီးထောင်ချခြင်း ခံစား ထားရတာဖြစ်တယ်။ သူတို့တွေက ရာဇ၀တ်မှုတွေ၊ စာရိတ္တတွေ ပျက်စီးလို့၊ သူတပါးကို ဖျက်ဆီး သတ်ဖြတ်လို့ အကျဉ်းချ ခံထားရတဲ့သူတွေ မဟုတ်ဘူး။ သူတုို့တွေအတွက် အစိုးရတွေက တာဝန်ယူ ဖြေရှင်းပေးဖို့ မသင့်ဘူးလား။
ကျနော် ကြားဖူးတာက ဥရောပက နိုင်ငံအချို့မှာ နိုင်ငံရေး အကျဉ်းသားတွေကို လျော်ကြေးတွေ၊ ထောက်ပံ့ကြေးတွေ ပေးတာမျိူး ရှိတယ်လို့ ကြားဖူးတယ်။ အဲသလိုမျိူး လက်ရှိအစိုးရမှာ တာဝန် ၀တ္တရား ရှိတယ်လို့ မြင်တယ်။ လက်ရှိ အစိုးရ ကိုယ်တိုင်ကလည်း စစ်တပိုင်း အစိုးရပဲ။ ရှေ့က စစ်အစိုးရ အဆက်ဆက်နဲ့ ဆက်စပ် ပတ်သက်တဲ့ သူတွေချည်းပဲ။ သူတို့တွေကိုယ်တိုင်က ဖမ်းချင်တုန်းက ဖမ်းခဲ့ပြီးမှ အခု လွှတ်ပေးလိုက်တော့လည်း သူတို့တွေလည်း အခု လွတ်မြောက်လာတဲ့ နိုင်ငံရေး အကျဉ်းသားတွေရဲ့ နစ်နာ ဆုံးရှုံးမှုတွေ အတွက် စဉ်းစားတာ စီစဉ်တာတွေ လုပ်ပေး သင့်တယ်လို့ မြင်ပါတယ်။
နိုင်ငံရေးအကျဉ်းသားလား၊ ယုံကြည်ချက်ကြောင့် အကျဉ်းကျနေရသူတွေလား၊ ဘယ်စကားလုံးက ပိုပြီး ကျယ်ပြန်တဲ့ သဘော၊ အားလုံးနဲ့ ဆိုင်တဲ့ သဘော ရှိသလဲဆရာ။
အခုဟာက လက်ရှိအစိုးရကိုယ်တိုင်က နိုင်ငံရေးအကျဉ်းသားမရှိဘူးလို့ကို ငြင်းနေတာ။ သူတို့ဖက်က တစိတ်တပိုင်း ပြောဆို နေတာက ယုံကြည်ချက်ကြောင့် အကျဉ်းကျ ခံနေရသူလို့ အသုံးအနှုံးကို သုံးနေတယ်။ ဒါက မကောင်းဘူး။ ကျနော်ကတော့ နိုင်ငံရေး အကျဉ်းသားလို့ပဲ သုံးနှုံးလိုတယ်။ နိုင်ငံရေးနဲ့ ဆက်စပ်နေတဲ့ အလုပ်တွေ လုပ်တဲ့သူတွေ အားလုံး အကျူံးဝင်တယ်။ ယုံကြည်ချက်ကြောင့် အကျဉ်းကျ နေရသူဆိုတော့ ဥပမာ အကြမ်းဖက်သမား ဆိုပြီး အစွဲ ခံရသူတွေ မပါတော့ဘူး၊ နယ်စပ် ဖြတ်ကျော်တွေ မပါတော့ဘူး။ အီလက်ထရွန်နစ် အက်က သူတွေကိုလည်း ချန်ထား ခဲ့လို့ရတယ်။ ၁၇(၁)လို အမှုတွေ၊ ဟိုအမှုတွေ ဒီအမှုတွေ မပါဘူးလို့ လုပ်လို့ရတယ်။ နိုင်ငံရေး အကျဉ်းသားလို့ သုံးစွဲလိုက်တာက အားလုံးကို ကိုယ်စားပြုတယ်။ ယုံကြည်ချက်ကြောင့် အကျဉ်းချ ခံထားရသူလို့ ဆိုလိုက်တော့ စစ်အစိုးရက အမှုအ မျိူးမျူိုးဆင်ပြီး ထောင်သွင်း အကျဉ်းချ ခံထားရသူတွေကို မပါဝင်အောင် ကန့်သတ်လိုက်သလို ဖြစ်သွားနိုင်တယ်။
နိုင်ငံရေးအရ ပွင့်လင်းမှုတွေ မရှိသေးဘူးဆိုတော့ အင်န်အယ်ဒီပါတီက လက်ရှိအ စိုးရဆီမှာ ပါတီ မှတ်ပုံတင်ဖို့က နီးစပ်လာပြီလား ဆရာ။
ကျနော် ရှေ့ကအင်တာဗျူးတွေမှာ ပြောခဲ့သလိုပါပဲ။ အင်န်အယ်ဒီပါတီက မြေအောက်အဖွဲ့ မဟုတ်ဘူး၊ လက်နက်ကိုင် အဖွဲ့ အစည်းလည်း မဟုတ်ဘူး။ နိုင်ငံရေးပါတီ တရပ် ဖြစ်တယ်။ ဒါကိုလည်း နိုင်ငံရေး အင်အားစုတွေ၊ တိုင်းရင်းသား အဖွဲ့အစည်းတွေ၊ ၈၈ မျိူးဆက်တွေ၊ မျိူးဆက်သစ် လူငယ်ကျောင်းသားတွေ ကိုယ်တိုင်က လက်ခံ အသိအမှတ် ပြုထားပြီး ဖြစ်တယ်။ ဒါကြောင့် ပါတီကို မှတ်ပုံတင်တဲ့ နေရာမှာ လက်ရှိရွေးကောက်ပွဲ ဥပဒေမှာ ပါတဲ့ ကန့်သတ်ချက်တွေ၊ ၂၀၀၈ အခြေခံဥပဒေကို သစ္စာခံရမယ် ဆိုတာတွေကို ပြောင်းလဲမှု မရှိသေးဘဲ နဲ့တော့ မှတ်ပုံတင်မှာ မဟုတ်ဘူး ဆိုတာကတော့ သေချာတယ်။ ဒီပြောင်းလဲမှုတွေ ပေါ်မူ တည်ပြီးတော့ မှတ်ပုံတင်ခြင်း မတင်ခြင်းတွေက ပေါ်လာတော့မှာ ဖြစ်တယ်။
ဆိုတော့ ဒီမိုကရေစီနည်းကျ နိုင်ငံရေးပါတီ တရပ်အနေနဲ့ မှတ်ပုံတင်ခြင်းဆိုတာကို လက်ခံတယ်။ သို့သော် လက်ရှိ အစိုးရဆီမှာ ရွေးကောက်ပွဲ ဥပဒေအရ တကယ် မှတ်ပုံတင်နိုင်တဲ့ အခြေအနေရှိခြင်း မရှိခြင်း၊ လက်ခံနိုင်ခြင်း မရှိခြင်း ဆိုတာကို ခွဲခြား ဆုံးဖြတ်မယ် ဆိုတဲ့ သဘောပေါ့။ ဒါဆိုရင် လက်ရှိ ပြဋ္ဌာန်းချက်တွေ ဥပဒေတွေနဲ့အညီ ရွေးကောက်ပွဲဝင်ခြင်း မ၀င်ခြင်းကိုကော ဘယ်လို သဘောထားသလဲ ဆရာ။
ပါတီမှတ်ပုံတင်ခြင်း မတင်ခြင်းကို အခြေအနေအပေါ်မှာ မူတည်ပြီး စဉ်းစားသလို၊ ရွေးကောက်ပွဲ ၀င်ခြင်း မ၀င်ခြင်း ဆိုတာ ကိုလည်း သီးခြား ထပ်စဉ်းစားမှာ ဖြစ်တယ်။ ရွေးကောက်ပွဲဝင်ခြင်းဟာ ဒီမိုကရေစီ ရည်မှန်းချက်များနဲ့ ဆန့်ကျင်မှု ရှိမရှိဆိုတာတွေကို ကြည့်ပြီး ဆုံးဖြတ်ရမှာ ဖြစ်တယ်။ ရွေးကောက်ပွဲဝင်တယ် ဆိုတာနဲ့ ၂၀၀၈ အခြေခံဥပဒေကို လက်ခံတဲ့ သဘောဖြစ်သွားတယ်။ ဒါတွေကြောင့် ပါတီ မှတ်ပုံတင်ပြီးတဲ့နောက်ပိုင်း အများကြီး စဉ်းစားစရာတွေ ဆွေးနွေးစရာတွေ ပေါ်ထွန်း လာလိမ့်မယ်လို့ ပြောနိုင်တယ်။ နောက်တပိုင်း ကတော့ ပါတီကို မှတ်ပုံတင်ပြီးတော့ ရွေးကောက်ပွဲကို မ၀င်နိုင်ဘူး ဆိုပြီးတော့ လွှတ်တော်ပြင်ပမှာ နိုင်ငံရေး ပါတီ တရပ်အနေနဲ့ လွတ်လပ်စွာ လှုပ်ရှားမယ်။ စည်းရုံးရေး လုပ်နိုင်မယ်။ အင်အားတွေ ဖြစ်လာမယ်။ နောက်တခု အနေနဲ့ ၂၀၀၈ အခြေခံ ဥပဒေကို ပြုပြင် ရေးဆွဲနိုင်ရေး လှုပ်ရှားမှုတွေ လုပ်လာနိုင်မယ်လို့ ပြောနိုင်တယ်။
ဒါဆိုရင် လက်ရှိ လွတ်မြောက်လာတဲ့ နိုင်ငံရေးအကျဉ်းသားတွေ၊ လက်ရှိ လှုပ်ရှားနေတဲ့ ပါတီမဟုတ်တဲ့ နိုင်ငံရေး အင်အားစုတွေ၊ တက်ကြွ လှုပ်ရှားသူတွေ (Activist and Activism) တွေအတွက်ကတော့ သူတို့ လက်ခံ ယုံကြည်တဲ့ နိုင်ငံရေး ဘ၀တွေကို အသီးသီး ထူထောင်ပြီး လွတ်လွတ်လပ်လပ် လှုပ်ရှား လာနိုင်ဖို့ကိုလည်း တပြိုင်နက်တည်း အားပေးနေရမယ်လို့ ပြောရင် ရမလား ဆရာ။
ရပါတယ်။ နိုင်ငံရေးဘ၀တွေ ပြန်လည်ထူထောင်လာကြပြီးတော့ နိုင်ငံရေးလှုပ်ရှားသူတွေ၊ အင်အားအစု အဖွဲ့တွေ ပေါ်ပေါက် လာကြမယ်။ လွတ်လွတ်လပ်လပ်နဲ့ ပြောရေး ဆိုခွင့် လှုပ်ရှားခွင့်တွေ သန်ရာ သန်ရာ လုပ်လာကြဖို့ လိုတယ်။ နိုင်ငံရေး အကျဉ်းသား တွေကူညီတဲ့ ကွန်ယက်တွေလိုမျိူး၊ ဧရာဝတီကို ကာကွယ်ဖို့ လှုပ်ရှားကြတဲ့ အလုပ်တွေလုပ်နေကြသလိုမျိူးပေါ့။ တုိုင်းပြည်အတွက် လိုအပ်တဲ့ အရေးကိစ္စတွေမှာ သူတို့တွေဟာ သူတို့ရဲ့ အင်အားတွေ သြဇာတွေနဲ့ ၀င်ရောက်လုပ်ကိုင်လာဖို့လိုတယ်။ အဲသည်လို အခြေအနေတွေ ထူထောင်ပေးရမယ်။ ကျနော်တို့က အကျဉ်းထောင် အသီးသီးက လွတ်မြောက်လာတဲ့ သူတွေကို အားပေး လက်တွဲပြီးတော့ တူရာ သန်ရာ ဆက်စပ်ပေးရမယ်။ နားလည်မှုတွေ တည်ဆောက်ကြရမယ်လို့ ပြောချင်ပါတယ်။
ကျေးဇူးတင်ပါတယ်ဆရာ။
Ref: မိုးမခ
မြန်မာနိုင်ငံ လူ့အခွင့်အရေး စိုးရိမ်ရဆဲ
သားညွန့်ဦး
ဗုဒ္ဓဟူး, 19 အောက်တိုဘာ 2011
မြန်မာနိုင်ငံတွင်းမှာ နိုင်ငံရေးပြုပြင်ပြောင်းလဲမှုတွေ ရှိလာတာကို အသိအမှတ်ပြုပေမယ့် လူ့အခွင့်အရေးနဲ့ ပတ်သက်လို့ လုပ်ဆောင်စရာတွေ အတော် ကျန်နေ သေးတယ်လို့ မြန်မာနိုင်ငံ ဆိုင်ရာ ကုလသမဂ္ဂ လူ့အခွင့်အရေး ကိုယ်စားလှယ်က ပြောပါတယ်။ တိုင်းရင်းသား ဒေသတွေမှာ စစ်တပ်က ကျူးလွန်ခဲ့တာတွေ အပါအ၀င် နိုင်ငံတွင်း လူ့အခွင့်အရေး ချိုးဖောက်မှုတွေကို စုံစမ်း ဖော်ထုတ်ဖို့ မြန်မာနိုင်ငံ အနေနဲ့ မလုပ်ဆောင်ဘူး ဆိုရင် နိုင်ငံတကာ အနေနဲ့ ဆောင်ရွက်ဖို့ တာဝန် ရှိနေတယ်လို့ လူ့အခွင့်အရေး ကိုယ်စားလှယ်က ကုလသမဂ္ဂ၊ အထွေထွေ ညီလာခံကို တိုက်တွန်း သွားပါတယ်။ အသေးစိတ်ကိုတော့ ကိုသားညွန့်ဦးက တင်ပြထားပါတယ်။
မြန်မာနိုင်ငံတွင်းမှာ ပြုပြင်ပြောင်းလဲမှုတွေ ရှိနေပေမယ့် လူ့အခွင့်အရေးနဲ့ပတ်သက်လို့ စိုးရိမ်စရာတွေ ကျန်နေ တုန်းပဲလို့ မြန်မာနိုင်ငံ ဆိုင်ရာ ကုလသမဂ္ဂ၊ လူ့အခွင့်အရေး ကိုယ်စားလှယ် သောမတ် အိုဟေး ကင်တာနားက ကုလသမဂ္ဂ အထွေထွေ ညီလာခံကို တင်ပြသွားခဲ့တာပါ။ အထွေထွေ ညီလာခံရဲ့ တတိယ ကော်မတီ အစည်းအဝေးမှာ မြန်မာ့ လူ့အခွင့်အရေး ကိစ္စကို မနေ့က ဆွေးနွေးကြရာမှာ နိုင်ငံရေး အသွင်ကူးပြောင်းမှု တရပ်မှာ အတိတ်တုန်းက ဖြစ်ခဲ့တဲ့ လူ့အခွင့်အရေး ချိုးဖောက်မှုတွေရော၊ အခုလက်ရှိဖြစ်တဲ့ လူ့အခွင့်အရေး ချိုးဖောက်မှုတွေကိုပါ အာဏာပိုင်တွေ အနေနဲ့ ဖြေရှင်းကိုင်တွယ်ဖို့ လိုအပ်မယ် ဆိုတဲ့ အချက်ကို မစ္စတာ ကင်တာနားက အလေးပေး ထောက်ပြခဲ့ပါတယ်။ မြန်မာနိုင်ငံတွင်း လူ့အခွင့်အရေး ချိုးဖောက်မှုတွေ ရှိနေတယ် ဆိုတဲ့ တိုင်ကြားမှုတွေ ဆက်လက် ခံရနေတုန်းပဲလို့လည်း မစ္စတာ ကင်တာနားက ပြောပါတယ်။
“လူ့အခွင့်အရေးချိုးဖောက်မှုတွေကို စုံစမ်းစစ်ဆေးပြီး အရေးယူမှုတွေကို သီးခြားလွတ်လပ်စွာ ရပ်တည်ပြီး ဘက်မလိုက်တဲ့၊ ယုံကြည် ကိုးစားလောက်တဲ့ အဖွဲ့အစည်း တရပ်ကနေ ပြုလုပ်ပေးသင့် ပါတယ်။ အခုလို လုပ်ဆောင်ရာမှာ အဆင့်ဆင့် ပြုပြင်ပြောင်းလဲမှုတွေ၊ နစ်နာကြေးတွေ၊ ပြန်လည် ပျိုးထောင်ပေးနိုင်ဖို့ အစီအစဉ်တွေကို ဖော်ဆောင်ပေးဖို့ လိုပါတယ်။ စုံစမ်းစစ်ဆေးပြီး အပြစ်ရှိတဲ့ သူတွေကို နိုင်ငံတကာ လူ့အခွင့်အရေး ချိုးဖောက်မှု ဥပဒေတွေအရ ပြစ်ဒဏ်ချမှတ်ရမှာ ဖြစ်ပါတယ်။ ဒါမှလည်း အခုလို ဥပဒေ ချိုးဖောက်မှုတွေ ထပ်မဖြစ်ရအောင် ဟန့်တားနိုင်မှာ ဖြစ်ပါတယ်။ ဥပဒေ ချိုးဖောက်ခံရတဲ့ သူတွေကိုလည်း ထိုက်သင့်သလို နစ်နာကြေးတွေ ပေးရမှာဖြစ်ပါတယ်။ အခုလိုမျိုး အရေးယူ ဆောင်ရွက်မှုတွေကို အစိုးရက တာဝန်ယူ လုပ်ဆောင်ပေးနိုင်ခြင်း မရှိရင် နိုင်ငံတကာက ဆက်လက် တာဝန် ယူသွားရမှာ ဖြစ်ပါတယ်”
မြန်မာအစိုးရအနေနဲ့ အမျိုးသား လူ့အခွင့်အရေး ကော်မရှင်ဖွဲ့စည်းလိုက်တာကို ကြိုဆိုလိုက်ပေမယ့် ဒီကော်မတီကို ဖွဲ့စည်းမှု၊ လုပ်ထုံး လုပ်နည်း စတာတွေမှာ နိုင်ငံတကာ စံနှုန်းနဲ့ ကိုက်ညီ မညီဆိုတဲ့ နေရာမှာတော့ မစ္စတာကင်တာနားက သံသယ ရှိတာ တွေ့ရပါတယ်။ ဒါကြောင့်လည်း ဒီ ကော်မရှင်အနေနဲ့ အထွေထွေ ညီလာခံက အတည်ပြုထားတဲ့ principal ပဲရစ် အခြေခံဥပဒေသ အတိုင်း အမျိုးသား လူ့အခွင့်အရေး ကော်မရှင်တရပ် အနေနဲ့ ရှိသင့်ရှိထိုက် လုပ်သင့် လုပ်ထိုက်ရမယ့် သတ်မှတ်ချက်တွေ အတိုင်း ဖြစ်ဖို့ လိုအပ်မယ်လို့ မစ္စတာ ကင်တာနားက အကြံပြုပါတယ်။
တရားရေးပိုင်းဆိုင်ရာ ပြုပြင်ပြောင်းလဲမှုတွေ သိသိသာသာမတွေ့ရတဲ့အပေါ်မှာလည်း စိုးရိမ်စရာ ဖြစ်ရတယ်လို့ မစ္စတာ ကင်တာနားက မှတ်ချက်ပြုပါတယ်။ အထူးသဖြင့်တော့ တရားရေးပိုင်း ဆိုင်ရာကို အုပ်ချုပ်ရေးပိုင်းက ၀င်ရောက် စွက်ဖက်တာ၊ တရားရေး လွတ်လပ်ခွင့် ကင်းမဲ့တဲ့ အချက်တွေကို ပြင်ဖို့ လိုမယ်လို့ ထောက်ပါတယ်။
“တရားရေးစနစ်ဟာ လွတ်လပ်မှုမရှိသလို ဘက်လိုက်မှုလည်းရှိနေတယ်လို့ ကျနော်ယုံကြည်ပါတယ်။ ဒါ့အပြင် တရားရေး စနစ်ကို ပီပြင်အောင် ဖော်ဆောင်နိုင်မယ့် အခြေခံ စွမ်းအင်လည်း မရှိပါဘူး။ ရာဇ၀တ် မှုခင်းတွေကို တခါးပိတ် စစ်ဆေးနေဆဲ ရှိတယ်ဆိုတဲ့ သတင်းတွေကြောင့် ကျနော် စိုးရိမ်မိပါတယ်။ ဒါ့အပြင် နိုင်ငံရေးကြောင့် ဖမ်းဆီး ခံရသူတွေ ကိုယ်စား ရှေ့နေ လိုက်ပေး ကြသူတွေကိုလည်း ကျိုးကြောင်းမဲ့ လိုင်စင်သိမ်းခြင်း ခံခဲ့ကြရပါတယ်။ ဒီဖြစ်ရပ်တွေနဲ့ ပတ်သက်လို့ ပြန်လည် သုံးသပ်ပေးဖို့ မြန်မာ အစိုးရကို ကျနော် တိုက်တွန်းလိုတာက တရားခံတွေ ရှေ့နေ ကိုယ်စားပြုခွင့် ရရှိစေဖို့နဲ့ ရှေ့နေတွေကိုလည်း သူတို့ရဲ့ လုပ်ငန်းတွေမှာ လွတ်လပ်စွာ လုပ်ကိုင်ခွင့်ပြုဖို့ ဖြစ်ပါတယ်။ ဒါ့အပြင် ကျနော် အရင်က တင်ပြပြီးဖြစ်တဲ့ တရားစီရင်ရေး စနစ်မှာ သီးခြား လွတ်လပ်ခွင့်ရှိဖို့ ဘက်မလိုက်ဖို့ ကိုလည်း ထပ်မံ တိုက်တွန်းလိုပါတယ်။ အခုလို လုပ်ဆောင်နိုင်ဖို့ တရား စီရင်ရာမှာ တရားခံတွေရဲ့ အခွင့်အရေးတွေကို လေးစားပါ။ နိုင်ငံရေး အကျဉ်းသားတွေရဲ့အမှုတွေကို စစ်ဆေးရာမှာ တခါးပိတ် မစစ်ဆေးဖို့တို့ ပါဝင်ပါတယ်”
ဒါပေမယ့်လည်း မကြာမီလပိုင်းအတွင်းမှာ မြန်မာအစိုးရရဲ့ လူ့အခွင့်အရေးနဲ့ပတ်သက်လို့ အလေးထား ဆောင်ရွက် လာမှုတွေကိုလည်း မစ္စတာ ကင်တာနားက အသိအမှတ် ပြုပါတယ်။
“မြန်မာအစိုးရက ပြုပြင်ပြောင်းလဲဖို့နဲ့ သမ္မတဦးသိန်းစိန် လျာထားတဲ့ ဦးစားပေးမှုတွေ အတွက် ကျနော် အားတက် မိပါတယ်။ အဲဒီအထဲမှာ အခြေခံ လူ့အခွင့်အရေးတွေကို ကာကွယ်ပေးဖို့၊ တရားဥပဒေ စိုးမိုးရေးကို လေးစားဖို့၊ သီးခြား ဘက်မလိုက်တဲ့ တရားစီရင်ရေး စနစ်ကို ဖော်ဆောင်ဖို့ စသဖြင့် ပါဝင်ပါတယ်။ မကြာသေးခင်က သမ္မတ ဦးသိန်းစိန်ကနေ လွတ်ငြိမ်း ချမ်းသာခွင့် ပေးခဲ့ပြီး လွှတ်ပေးခဲ့တဲ့ အကျဉ်းသားတွေ ထဲမှာ ယုံကြည်ချက်ကြောင့် အကျဉ်းကျ ခံနေရသူတွေ ပါဝင်ပါတယ်။ ”
လာမယ့် ကြားဖြတ်ရွေးကောက်ပွဲဟာ အစိုးရသစ်အတွက် စမ်းသပ်ချက်တခုဖြစ်လိမ့်မယ်လို့ မစ္စတာ ကင်တာနားက ပြောပါတယ်။ အထူးသဖြင့် ဒီကြားဖြတ် ရွေးကောက်ပွဲ လွတ်လပ် မျှတဖို့ အစုအဖွဲ့ အားလုံး ပါဝင်ခွင့်ရဖို့ လိုသလို ဒီရွေးကောက်ပွဲ မတိုင်ခင်မှာ နိုင်ငံရေး အကျဉ်းသားတွေ လုံးဝ မရှိဖို့ လိုမယ်လို့ မစ္စတာကင်တာနားက ပြောပါတယ်။
“မြန်မာနိုင်ငံမှာ ယုံကြည်ချက်ကြောင့် အကျဉ်းချခံနေရသူတွေ အများအပြားရှိနေဆဲ ဖြစ်တယ်ဆိုတဲ့ အချက်က ကျနော့် အတွက်ရော၊ နိုင်ငံတကာ အတွက်ပါ အဓိက စိုးရိမ်မကင်း ဖြစ်မှုပါပဲ။ နိုင်ငံရေး အကျဉ်းသား အားလုံးကို ချက်ခြင်း ခြွင်းချက်မရှိ ပြန်လွှတ်ပေးဖို့ အရေးကြီးပါတယ်။ လာမယ့် ကြားဖြတ် ရွေးကောက်ပွဲ ကျင်းပချိန်မှာ နိုင်ငံရေး အကျဉ်းသားတွေ အားလုံး ထောင်တွေထဲမှာ မရှိသင့်တော့ပါဘူး”
အခုလို ပြည်တွင်းမှာ နိုင်ငံရေးပြုပြင်ပြောင်းလဲမှုတွေ လုပ်နေတဲ့အချိန်မှာ နယ်စပ် တိုင်းရင်းသား ဒေသတွေမှာ လူ့အခွင့်အရေး ချိုးဖောက်မှုတွေ ရှိလာနေတာကြောင့် ဒီအချက်တွေ ကြည့်မယ်ဆိုရင် လူ့အခွင့်အရေးနဲ့ ပတ်သက်လို့ မြန်မာ အစိုးရမှာ လုပ်စရာတွေ အများကြီး ကျန်သေးတယ်လို့ မစ္စတာ ကင်တာနားက ယူဆပါတယ်။ အစိုးရသစ် လက်ထက် တိုင်းရင်းသား ဒေသ တိုက်ပွဲတွေကြောင့် ဆိုးဝါးတဲ့ လူ့အခွင့်အရေး ချိုးဖောက်မှုတွေ ရှိနေတယ်လို့ မစ္စတာ ကင်တာနားက ပြောပါတယ်။
“နယ်စပ်ဒေသတွေမှာ၊ တိုင်းရင်းသားတွေနဲ့ ပဋိပက္ခဖြစ်ပွားနေတဲ့ နေရာတွေမှာ လူ့အခွင့်အရေး ချိုးဖောက်မှုတွေ ဆက်လက် ဖြစ်ပွားနေပါတယ်။ အရပ်သားတွေကို တိုက်ခိုက်တာ၊ တရားဥပဒေမဲ့ သတ်ဖြတ်တာ၊ လိင်ပိုင်းဆိုင်ရာ အကြမ်းဖက်တာ၊ တရားဥပဒေမဲ့ ဖမ်းဆီးမှုတွေ၊ လူတွေ အိုးမဲ့အိမ်မဲ့ ထွက်ပြေးရတာတွေ၊ မြေယာတွေကို အတင်းအဓမ္မ သိမ်းပိုက်တာတွေ၊ ကလေး စစ်သားတွေ အတင်းအဓမ္မ စုဆောင်းတာမျိုး၊ အတင်းအဓမ္မ လုပ်အားပေး ခိုင်းစေတာ၊ ပေါ်တာဆွဲတာတွေ စသဖြင့် ပါဝင်ပါတယ်။ ဒါ့အပြင် မြေမြှုပ်မိုင်းတွေကို မြန်မာ အစိုးရစစ်တပ်ကရော အစိုးရမဟုတ်တဲ့ တပ်တွေကပါ သုံးနေကြတယ် ဆိုတဲ့သတင်းတွေ ကျနော်တို့ ဆက်ရရှိနေပြီး သေဆုံး ဒဏ်ရာရသူတွေလည်း အများအပြား ရှိတယ်လို့ သိရပါတယ်”
မစ္စတာကင်တာနားအနေနဲ့ လာမယ့် မတ်လ ကုလသမဂ္ဂလူ့အခွင့်အရေးကောင်စီမှာ မြန်မာနိုင်ငံ လူ့အခွင့်အရေးနဲ့ ပတ်သက်ပြီးတော့ အစီရင်ခံစာသစ် ပြန်လည် တင်သွင်းမှာ ဖြစ်ပါတယ်။ ဒါကြောင့် ဒီမတိုင်ခင် သူ့အနေနဲ့ မြန်မာပြည်ကို ထပ်ပြီး သွားရောက် စစ်ဆေးခွင့် ရဖို့ မျှော်လင့်တဲ့ အကြောင်းလည်း ပြောပါတယ်။
Ref: VOA News
မြစ်ဆုံဆည် စီမံကိန်း ရပ်ဆိုင်းတဲ့ အပေါ် ကုလကိုယ်စားလှယ် ကြိုဆိုချက် တရုတ် မကျေနပ်
2011-10-19
မြန်မာနိုင်ငံဆိုင်ရာ လူ့အခွင့်အရေး အထူး ကိုယ်စားလှယ် Tomas Ojea Quintana ရဲ့ အစီရင်ခံစာမှာ သမ္မတ ဦးသိန်းစိန်က တရုတ်နဲ့ ဖက်စပ် လုပ်ကိုင်နေတဲ့ မြစ်ဆုံဆည် စီမံကိန်း ရပ်ဆိုင်း ထားလိုက်တာဟာ ပြည်သူ အများဆန္ဒကို နားထောင်တာ ဖြစ်လို့ ကြိုဆိုတဲ့ အကြောင်း ဖေါ်ပြခဲ့တဲ့ အပေါ် တရုတ် ကိုယ်စားလှယ်က ကန့်ကွက် ပြောဆိုခဲ့ပါတယ်။
"တရုတ် အစိုးရ အနေနဲ့ မမှန်ကန်တဲ့ အချက်အလက်ပေါ်မှာ မကျေနပ်ဘူး ဆိုတာ ပြောချင်ပါတယ်။ တရုတ်ပြည် အနေနဲ့ မြန်မာနိုင်ငံ အပါအ၀င် အခြားနိုင်ငံတွေနဲ့ ဖက်စပ် လုပ်ကိုင်နေတဲ့ တရုတ် ကုမ္ပဏီတွေကို အစဉ်တစိုက် ပံ့ပိုး အကာအကွယ် ပေးနေပါတယ်။ ဒီမြစ်ဆုံ ဆည် စီမံကိန်းဟာ မြန်မာ ပြည်သူတွေ အတွက် အကျိူးရှိစေ ပါတယ်။ ဒါ့အပြင် ဒီစံမံကိန်း အတွက် အပြန်အလှန် လေ့လာ သုံးသပ်ပြီးမှ လွန်ခဲ့တဲ့နှစ်တွေ ကတည်းက စတင် အကောင်အထည် ဖေါ်ခဲ့တာပါ။ တရုတ်နဲ့ မြန်မာ နှစ်နိုင်ငံ အကျိူးစီးပွား အတွက် အခြား နေရာတွေမှာ ဆက်ပြီး ပူးပေါင်း ဖက်စပ် ဆောင်ရွက်သွားမှာ ဖြစ်ပါတယ်" လို့ တရုတ် ကိုယ်စားလှယ်က ပြောသွားတာပါ။
တရုတ် အစိုးရအနေနဲ့ မြန်မာနိုင်ငံက အပြောင်းအလဲတွေကို သိသာ ထင်ရှားတဲ့ ပြုပြင် ပြောင်းလဲမှုတွေ အဖြစ် ကြိုဆိုကြောင်းလည်း တရုတ် ကိုယ်စားလှယ်က ပြောဆိုခဲ့ပါတယ်။
Ref: RFA News
မြန်မာဘက်က တိဘက်ကို လက်နက်မှောင်ခို တင်သွင်းသူ တရုတ် ဖမ်းဆီး
2011-10-19
တရုတ်နိုင်ငံ တိဘက်ဒေသကို မြန်မာနိုင်ငံဘက်ကနေ လက်နက် ခိုးသွင်းသူ ၁၇ ဦးကို တရုတ် အာဏာပိုင် တွေက ဖမ်းဆီး လိုက်တယ်လို့ တရုတ် အစိုးရပိုင် ဆင်ဝါ သတင်းဌာနက ဖေါ်ပြပါတယ်။
ဆင်ဝါသတင်းဌာန အဆိုအရ လက်နက်ခိုးသွင်းသူတွေဟာ မြန်မာနယ်စပ် တလျှောက်မှာ ရှိတဲ့ အစိုးရကို ဆန့်ကျင်သူတွေနဲ့ မူးယစ်ဆေးဝါး ရာဇာတွေ ဖြစ်တယ်လို့ ဆိုပါတယ်။
ဒီကိစ္စနဲ့ ပတ်သက်ပြီး ဖမ်းဆီးလိုက်သူ ၁၇ ဦးဟာ မြန်မာနဲ့ နယ်ချင်း စပ်နေတဲ့ ယူနန်ပြည်နယ်က ဖြစ်ပြီး သူတို့ ဟာ တိဘက်ပြည်နယ် ဆီချောင်းကို လက်နက် သယ်ယူသူတွေရှိတယ်လို့ ဆိုပါတယ်။
ဖမ်းထားသူတွေနဲ့ ပတ်သက်ပြီး တိတိကျကျဖေါ်ပြတာ မရှိပေမယ့် သူတို့ ဟာ မြန်မာနိုင်ငံဘက်က လက်နက်တွေကို ၂၀၀၉ ခုနှစ်လောက် ကတည်းက တိဘက်ကို သွင်းနေကြောင်း ၀န်ခံတယ်လို့ ဆိုပါတယ်။
ဖမ်းမိတဲ့ လက်နက်ပစ္စည်းတွေထဲမှာ ပစ္စတိုသေနတ် ၈ လက်၊ ရိုင်ဖယ် ၁ လက်နဲ့ ကျည် ၂၆၇ တောင့် ဖြစ်ပါတယ်။ ဒီအတော အတွင်း မြန်မာနိုင်ငံ အတွင်း အစိုးရတပ် တွေနဲ့ ကချင် KIO အဖွဲ့တွေ တိုက်ပွဲ ဖြစ်နေတဲ့ ဒေသအနီး နယ်စပ်မှာ တရုတ် စစ်တပ်တွေ တိုးပြီး ချထားတယ်လို့ ဒေသခံတွေ အဆိုအရ သိရပါတယ်။
Ref: RFA News
ကြားဖြတ် ရွေးကောက်ပွဲ မတိုင်ခင် နိုင်ငံရေး အကျဉ်းသား အားလုံး လွှတ်ပေးဖို့ ကင်တားနား တောင်းဆို
2011-10-19
နယူးယောက်မြို့ ကုလသမဂ္ဂ ဌာနချုပ်မှာ ကျင်းပနေတဲ့ (၆၆) ကြိမ်မြောက် အထွေထွေ ညီလာခံမှာ မြန်မာနိုင်ငံ ဆိုင်ရာ လူ့အခွင့်အရေး အထူး ကိုယ်စားလှယ် Tomas Ojea Quintana က သူရဲ့ အစီရင်ခံစာကို မနေ့က တင်သွင်းခဲ့ပါတယ်။
လက်ရှိ မြန်မာနိုင်ငံရဲ့ အခြေအနေဟာ အရင်ကထက် စာရင် အပြောင်းအလဲတွေ ဖြစ်လာတယ် ဆိုတာကို ကြိုဆိုပေမဲ့၊ မြန်မာ အစိုးရ အနေနဲ့ တာဝန်ယူ ဖြေရှင်းရမယ့် လူ့အခွင့်အရေး ချိူးဖောက်မှုတွေ ရှိနေဆဲ ဖြစ်တယ်လို့ မစ္စတာ ကင်တားနားက ပြောပါတယ်။
ဒါ့အပြင် သမ္မတ ဦးသိန်းစိန် အစိုးရ အနေနဲ့ မကြာသေးခင်က နိုင်ငံရေး အကျဉ်းသား ၂၀၀ လောက် လွှတ်ပေးတာဟာ ကြိုဆိုစရာ ကိစ္စ ဖြစ်ပေမဲ့၊ နိုင်ငံရေး အကျဉ်းသား အရေအတွက် အမြောက်အမြား ကျန်ရှိနေသေးတာကို သူအပါအ၀င် နိုင်ငံတကာ အသိုင်း အ၀ိုင်းက စိုးရိမ်နေတယ်လို့ ပြောသွားပါတယ်။ ဒါကြောင့် ဒီနှစ် အကုန်ပိုင်းလောက်မှာ ကျင်းပဖို့ ရှိတဲ့ ကြားဖြတ် ရွေးကောက်ပွဲ မတိုင်ခင် အကျဉ်းသား အားလုံး လွှတ်ပေးဖို့ မစ္စတာ ကင်တားနား က မြန်မာအစိုးရကို တိုက်တွန်း ခဲ့ပါတယ်။
နိုင်ငံရေး အကျဉ်းသား အားလုံး ချွင်းချက်မရှိ အစိုးရ အနေနဲ့ အမြန်ဆုံးလွှတ်ပေးဖို့ ဆိုတဲ့အချက် အရေး ကြီးပါတယ်။ ကြားဖြတ် ရွေးကောက်ပွဲ ကျင်းပတဲ့အချိန်မှာ နိုင်ငံရေး အကျဉ်းသားတွေ ထိန်းသိမ်းထားတယ် ဆိုတာ လုံးဝ မဖြစ်သင့်တော့ပါ ဘူးလို့ မစ္စတာ ကင်တားနားက ပြောသွားပါတယ်။
သူ့ရဲ့အစီရင်ခံစာမှာ မြန်မာနိုင်ငံက လူ့အခွင့်အရေး ချိူးဖောက်မှုတွေ စနစ်တကျ ကျူးလွန်နေတာကို စုံစမ်း စစ်ဆေးဖို့ လွတ်လပ်တဲ့ ကော်မရှင် တစ်ရပ် အမြန်ဆုံး ဖွဲ့စည်း အကောင်အထည် ဖေါ်ပြီး၊ ဆုံးရှုံး နစ်နာသူတွေရဲ့ ဘ၀ ပြန်လည် တည်ဆောက်ရေး တွေမှာ ကူညီ ဆောင်ရွက်ပေးဖို့ အဆိုပြု ထားပါတယ်။
Ref: RFA News
Wednesday, October 19, 2011
ရွှေတံခါးကြီးဖွင့်နိုင်ဖို့
စာတွေရေးနေတာ နှစ်ပရိစ္ဆေဒ မနည်းတော့ဘူး။ ကိုယ့်အလုပ်မို့သာ ၀တ္တရားမပျက် လုပ်နေတာ။ ရာနှုန်းပြည့် အားရ ကျေနပ်တယ် လို့တော့ ဘယ်အခါမှ မရှိခဲ့ဘူး။ ဘာကြောင့်လဲ ဆိုတော့ ဘယ်လောက်ပဲ ရေးရေး ဘာမှ အရာရောက်တယ်လို့ မခံစားရလို့ပဲ။
အတိုင်းအဆမရှိ မေတ္တာတွေကြောင့်
တစ်ခါတလေ စိတ်ပျက်လက်ပျက်နဲ့ 'ဟောရင်းသာပျံတော်မူလိမ့်မယ်' လို့တောင် ရေးမိသွားတယ်။ နှစ်ပေါင်း နှစ်ဆယ်ကျော် အတွင်း ရေးခဲ့တဲ့ စာတွေ နည်းတာ မဟုတ်ဘူး။ စုပြီးထုတ်တဲ့ စာအုပ်တွေတောင် လေးဆယ်ကျော် ငါးဆယ်နီးပါး ရှိနေပြီ။ ရေးရကျိုး နပ်တယ်လို့ ကျေနပ် အားရဖြစ်ရတာမျိုး မရှိဖူးဘူး။ အတိုင်းအဆ မရှိ ကြီးမားတဲ့ စာဖတ်ပရိသတ် ပြည်သူလူထုရဲ့မေတ္တာကို ရရှိ ခံစားနေရတာလေး တစ်ခုကြောင့်ပဲ အဆက်မပြတ် ရေးဖြစ်နေတာ။ အမှန်ပြောရရင် အချိန်မရွေး ကြုံတွေ့ရနိုင်တဲ့ အန္တရာယ် အသွယ်သွယ်ကို စဉ်းစားလိုက်တဲ့ အခါ ရေးသင့်တယ် လို့တောင် မထင်မိပါဘူး။
ထင်းခုတ်စားတောင်ရပါတယ်
စာတွေအများကြီးရေးတော့ပိုက် ဆံတွေအများကြီး ရနေတယ် မဟုတ်လားလို့ မေးစရာရှိတယ်။ မှန်ပါတယ်။ အများကြီး မဟုတ်ပေမယ့် အသင့်အတင့် ရပါတယ်။ ဒါပေမဲ့ ဒါလောက် ငွေကြေးကတော့ မြန်မာပြည်မှာ ဆရာကြီး သခင်ကိုယ်တော်မှိုင်း ပြောခဲ့သလို ''ထမင်းတစ်လုတ်တော့ ထင်းခုတ် စားရင်တောင် ရပါတယ်'' လို့ပြောရမှာပါ။ ရှမ်းပြည်နယ် တက်ပြီး ကော်ဖီလေး စိုက်လိုက်၊ လိမ္မော်လေး စိုက်လိုက် လုပ်နေတာက အန္တရာယ်ကင်း ဘေးကင်း ဖြစ်ရုံမက ကျန်းမာ ရေးအတွက်ပါ အလွန် ကောင်းတာပေါ့။ အဲဒီလို နေချင်စိတ် အခုထိရှိ နေသေးတယ်။ ဒါပေမဲ့ အတိတ်က ၀ဋ်ကြွေးတွေက မကုန်သေးတော့ စာရေးတဲ့ အလုပ်ကို မစွန့်နိုင်ဘူး။ ရန်ကုန်ဟာ ကိုယ့်အတွက် ပဋိရူပဒေသ မဟုတ်ပေမယ့် မခွာနိုင်ဘူး။ တွယ်ကပ်ပြီး နေနေရဆဲ ဖြစ်တယ်။
ရုတ်တရက်ပြောင်းသွား
ကိုယ့်ဟာကိုယ်ပခုံးပေါ်တင်ပြီး ထမ်းထားတဲ့တာဝန်မို့ မညည်းမညူ လုပ်ကိုင်နေပေမယ့် အားတက်သရော မရှိလှတာတော့ အမှန်ပဲ။ ဒါပေမဲ့ အခုနှစ်လ၊ သုံးလ အတွင်းမှာ အခြေအနေတွေ ရုတ်တရက် ပြောင်းသွားတယ်။ နှစ်ပေါင်း ငါးဆယ်လောက် အတွင်း ဘယ်တုန်းကမှ မကြားဖူးတဲ့ 'ပြည်သူလူထု' ဆိုတဲ့အသံတွေ ညံနေအောင် ကြားလာရပြီး၊ အရင်က ထုတ်ဝေခွင့် အကြိမ်ကြိမ် ပယ်ချခံရတဲ့ ကိုယ့် စာအုပ်တွေ ထုတ်ဝေခွင့် ပြန်ရလာတယ်။ နေ့စဉ်ရေးနေတဲ့ စာမူတွေလည်း ပရိသတ် လက်ထဲ မြန်မြန်ဆန်ဆန် ရောက်လာတယ်။ ပုဂ္ဂလိက ကြေးမုံ သတင်းစာတို့၊ လူထု သတင်းစာတို့ ခေတ်ကတည်းက အတူ လက်တွဲလာခဲ့တဲ့ သွေးသောက်ကြီး ဦးဝင်းတင်ရဲ့ စာအုပ်တွေလည်း ထုတ်ဝေခွင့် ရလို့ တစ်အုပ်ပြီး တစ်အုပ် ပြန်ထွက်လာတာ ၀မ်းသာစရာ တွေ့ရတယ်။
တံခါးဖွင့်ထားတယ်
အဲဒီနောက် ဒေါ်အောင်ဆန်းစုကြည်နဲ့ ၀န်ကြီးဦးအောင်ကြည်နဲ့ တွေ့တယ်။ ဒေါ်အောင်ဆန်းစုကြည်ရဲ့ သတင်းနဲ့ ဓာတ်ပုံတွေ ဂျာနယ်တွေမှာ ဖော်ပြခွင့် ရလာတယ်။ ပြီးတော့ နိုင်ငံတော် သမ္မတ ဦးသိန်းစိန်နဲ့ ဒေါ်အောင်ဆန်းစုကြည် တွေ့ကြတယ်။ သမ္မတကြီး ဦးသိန်းစိန်က ပြည်သူတွေ လိုချင်တဲ့ ဒီမိုကရေစီ စနစ်ကို မဖြစ်မနေ အကောင်အထည် ဖော်မယ်။ ပြည်သူက ရွေးကောက် တင်မြှောက် ထားသူများဖြစ်လို့ ပြည်သူ့ဆန္ဒကို လေးစားမယ်။ ပြည်တွင်း ငြိမ်းချမ်းရေး ရအောင် အမြန်ဆုံး ဆောင်ရွက်မယ်။ ဒီမိုကရေစီ လိုလားသူ အားလုံးနဲ့ ပူးပေါင်း ဆောင်ရွက်နိုင်အောင် နည်းလမ်း တွေရှာကြံမယ်။ မတူတာတွေ အသာထားပြီး တူတာတွေကို အတူ ပူးပေါင်း လုပ်ဆောင်မယ်။ ဖွဲ့စည်းပုံအခြေခံ ဥပဒေကို လက်မခံနိုင် သေးသူများနဲ့ပါ လက်တွဲ ဆောင်ရွက်နိုင်အောင် ညှိနှိုင်း ဆွေးနွေးဖို့ တံခါး ဖွင့်ထားတယ်ဆိုတဲ့ စကားတွေ ပြောကြား လာခဲ့တယ်။
ပေါ်လစီဆောင်းပါး
အဲဒီအချိန်မှာ ဧရာဝတီမြစ်ဆုံဒေသမှာ တရုတ်ကုမ္ပဏီက ဧရာမရေကာတာကြီး တစ်ခု တည်ဆောက်မယ့် ကိစ္စကို ပြည်သူလူထု တစ်ရပ်လုံးက မလိုလားတဲ့ အကြောင်း ပုံစံအမျိုးမျိုးနဲ့ တင်ပြမှုတွေ ကျယ်ကျယ်ပြန့်ပြန့် ဖြစ်လာတယ်။ ဒီအသံတွေကို ချေဖျက်ဖို့ အစိုးရ သတင်းစာတွေမှာ ထုံးစံအတိုင်း 'ပေါ်လစီဆောင်းပါး' တစ်ပုဒ် ထည့်လိုက်တယ်။ လျှပ်စစ်ဝန်ထမ်း တစ်ဦး အမည်ခံပြီး ထည့်တဲ့ ဆောင်းပါးမှာ မြစ်ဆုံရေကာတာ ဆောက်လုပ်တဲ့ အတွက် အကျိုးအ မြတ်တွေ ဘယ်လို ရရှိမယ်ဆိုတဲ့ အချက်တွေကို ပေါ်လစီ ဆောင်းပါးများ ထုံးစံအတိုင်း ရွှန်းရွှန်းဝေအောင် ရေးသား ထားတာ တွေ့ရတယ်။
ဈေးဦးပေါက်ခွင့်ပြု
အဲဒီဆောင်းပါးပါလာတဲ့နေ့မှာ ပဲ Weekly Eleven ရဲ့ စီအီးအိုက အွန်လိုင်းဂျာနယ်မှာ ဒီဆောင်းပါးကို ကန့်ကွက်ကြောင်း၊ အချက် အလက် အခိုင်အမာနဲ့ ပြန်လည် ရေးသားလိုက်တယ်။ ပုံနှိပ် ဂျာနယ်ထဲမှာလည်း အပြည့်အစုံ ဖော်ပြခဲ့တယ်။ ဒါဟာ နှစ်ငါးဆယ် အတွင်း မြန်မာစာနယ် ဇင်းလောကရဲ့ မှတ်တိုင်တစ်ခု ဖြစ်သွားတယ်။ အစိုးရ သတင်းစာမှာပါတဲ့ ဆောင်းပါးကို ပြန်လည် ဝေဖန်ချေပတဲ့ စာမျိုး ဘယ်တုန်း ဘယ်အခါကမှ မရေးဖူးခဲ့ဘူး။ စာပေ စိစစ်ရေးကလည်း ဘယ်တော့မှ ခွင့်မပြုခဲ့ဘူး။ ဒီတစ်ခါ ဈေးဦးပေါက် ခွင့်ပြုတာ ဖြစ်တယ်။
မကြုံဖူးတဲ့ပေါင်းစည်းမှု
အဲဒီကန့်ကွက်ဝေဖန်ချက် ပါလာပြီးတဲ့နောက် ဧရာဝတီကယ်တင်ရေးအသံတွေ ပိုညံလာတယ်။ ပြည် သူလူ ထုကြီး တစ်ရပ်လုံး မကြုံဖူးတဲ့ စည်းလုံးမှုမျိုးနဲ့ ညီညွတ် ပေါင်းစည်းသွားတယ်။ တကယ်ကို အံ့သြစရာ ပေါင်းစည်း ညီညွတ်မှုကြီး ဖြစ်တယ်။ ထုံးစံအတိုင်း နိုင်ငံရေး ပါတီတွေနဲ့ နိုင်ငံရေး သမားတွေက ပြည်သူ လူထုကြီးရဲ့နောက်က လိုက်လာကြပြီး လွှတ်တော်ထဲ အထိ ဂယက်တွေ ရောက်သွားတယ်။ နောက်တော့ မြစ်ဆုံရေကာတာ ဆောက်လုပ်ရေးကို သူ့အစိုးရ လက်ထက်မှာ ဆက်မလုပ်တော့ဘဲ ရပ်စဲ ထားမယ်ဆိုတဲ့ သမ္မတကြီးရဲ့ လွှတ်တော်ကို ပေးပို့တဲ့ သ၀ဏ်လွှာ ရုတ်တရက် ပေါ်ထွက်လာခဲ့တယ်။
နတ်လူသာဓုခေါ်
လုံးဝမျှော်လင့်မထားတဲ့ ကြေညာချက်ဖြစ်တာကြောင့် လူတွေအားလုံး မယုံနိုင်အောင် ဖြစ်သွားကြပြီး နီးစပ်ရာ မိတ်သင်္ဂဟ တွေဆီ ဖုန်းဆက် မေးလိုက်ကြတာ အဲဒီနေ့ကတော့ ဖုန်းလိုင်းတွေ အားတယ်လို့ကို ရှိမှာ မဟုတ်တော့ဘူး။ အိမ်ကဖုန်းလည်း ဆက်တိုက် မြည်နေတော့တယ်။ တချို့ဖုန်းဆက် ရင်းမျက်ရည်တောင် ကျရှာကြတယ်။ ၀မ်းသာတယ် ဆိုတာထက် ပိုလိမ့်မယ်။ ပြည်သူတွေရဲ့ လိုအင်ဆန္ဒကို ဘယ်တုန်းကများ ဖြည့်ဆည်း ပေးဖူးတယ် ရှိလို့လဲ။ သမ္မတကြီးကို သာဓုခေါ်ကြတယ်။ နတ်လူ သာဓု ခေါ်ကြတယ် လို့တောင် ပြောရလိမ့်မယ် ထင်မိတယ်။
ဆန့်ကျင်ဘက်ကရပ်ခဲ့တာ
သာမန်ပြည်သူတွေဆိုတာထား နှစ်ပေါင်းငါးဆယ်လုံးလုံး တက်လာသမျှ အစိုးရတိုင်းကို တစ်ကြိမ် တစ်ခါတောင် အကောင်း မပြောဖူးတဲ့ မိမိ ကိုယ်တိုင်တောင် မေးလာသမျှ မီဒီယာတိုင်းကို ကြိုဆိုကြောင်း၊ ၀မ်းသာကြောင်း၊ ကျေးဇူး တင်ကြောင်း ပြောတဲ့အထိ ဖြစ်သွားတယ်။ တကယ်ပါ။ နှစ်ပေါင်းငါးဆယ် လုံးလုံး ဆန့်ကျင်ဘက်က ရပ်ခဲ့တာပါ။ တော်လှန်ရေး ကောင်စီ အစိုးရကို မထောက်ခံသလို၊ မြန်မာ့ ဆိုရှယ်လစ် အစိုးရကိုလည်း မထောက်ခံဘူး။ ၁၉၈၈ နောက်ပိုင်း အစိုးရတွေကိုလည်း မထောက်ခံဘူး။ အမျိုးသား ညီလာခံကို မထောက်ခံသလို၊ ဖွဲ့စည်းပုံ အခြေခံဥပဒေကိုလည်း လက်မခံဘူး။ ရွေးကောက်ပွဲကို မထောက်ခံသလို ပေါ်ထွက်လာတဲ့ လွှတ်တော်တို့၊ အစိုးရတို့ကိုလည်း မထောက်ခံဘူး။ နိုင်ငံတော် သမ္မတကြီးနဲ့ တခြားထိပ်ပိုင်း ပုဂ္ဂိုလ်တွေက ဒီမိုကရေစီ စနစ်ကို မဖြစ်မနေ အကောင်အထည် ဖော်မယ်လို့ အကြိမ်ကြိမ် ပြောနေလည်း မယုံသေးဘူး။ စောင့်ကြည့်ဦးမယ် လို့ပဲ ဆုံးဖြတ် ထားခဲ့တယ်။
မနာယူဘဲ မနေနိုင်
ဒီလိုလူတောင် ဧရာဝတီကိစ္စကျတော့ သတင်းသမားရဲ့ ၀ိညာဉ် (Conscience) က သတိပေး လာတာကို မနာယူဘဲ မနေနိုင် တော့ဘူး။ သတင်းသမား ဆိုတာ ကောင်းတာတွေ့ရင် ကောင်းတယ် ရေးရမယ်။ မှန်တာတွေ့ရင် မှန်တယ် ရေးရမယ်လို့ တစ်သက်လုံး နာယူ မှတ်သားခဲ့ရတာ မဟုတ်လား။ ပြည်သူ့မျက်နှာကလွဲပြီး ဘယ်သူ့မျက်နှာမှ မကြည့်ရဘူးလို့ ကိုယ်တိုင် အပ်ကြောင်း ထပ်အောင် ရေးနေတာပဲ။ ဒီတော့ အပြောနဲ့အဟော ညီရမှာပေါ့။ ပြည်သူ တစ်ရပ်လုံး လှိုက်လှိုက်လှဲလှဲကြီး ၀မ်းသာ ကြိုဆိုနေကြတာကို ဘာကြောင့် မကြိုဆိုဘဲ နေရမှာလဲ။ ၀မ်းသာတယ်။ ကြိုဆိုချင်တယ်။ ကျေးဇူးတင်လို့ရေးရင် ပိုပြီးလေးနက်စေချင်လို့ အရင်က မထောက်ခံခဲ့ဘူး ဆိုတာတွေပါ ထည့်ရေး လိုက်တယ်။ အံ့သြစရာမှ တ ကယ့်အံ့သြစရာ။ စာပေ စိစစ်ရေးက အဲဒီ မထောက်ခံဘူး ဆိုတာတွေကို ထည့်ခွင့် ပေးလိုက်တယ်။
ထောက်ခံမဲတစ်မဲပေးလိုက်ပြီ
အဲဒါတွေပါတဲ့ 'ခဏကြီး မ ဟုတ်ပါဘူး။ ခဏလေးပါ' ဆိုတဲ့ ဆောင်းပါးမှာ သမ္မတ ဦးသိန်းစိန်နဲ့ ဒေါ်အောင်ဆန်းစုကြည် တို့ကို အချိန်နည်းနည်း ပေးလိုက်ပါ။ တကယ်ကို ခဏလေးပါလို့ ရေးလိုက်တယ်။ ပြီးတော့ သမ္မတ ဦးသိန်းစိန် အစိုးရကို 'စံသုံးခု' နဲ့ စောင့်ကြည့် အကဲခတ်နေမယ် လို့လည်း ရေးလိုက်တယ်။
၁။ နိုင်ငံရေးအကျဉ်းသားများ လွှတ်၊ မလွှတ်ဆိုတဲ့ စံ။
၂။ ပြည်တွင်းစစ်ရပ်စဲရေး အမြန် လုပ်၊ မလုပ်ဆိုတဲ့ စံ။
၃။ မြစ်ဆုံရေကာတာဆောက်လုပ်ရေး ရပ်၊ မရပ်ဆိုတဲ့ စံ။
အဲဒီသုံးချက်ထဲက မြစ်ဆုံရေကာတာကိစ္စ အဖြေပေါ်သွားပြီ။ အစိုးရက ပြည်သူ့ဆန္ဒကို အမှန် လေးစား လိုက်နာကြောင်း ပြလိုက်ပြီ။ ထောက်ခံမဲ တစ်မဲ ပေးလိုက်ပြီ။
လွတ်ငြိမ်းချမ်းသာခွင့်
သီတင်းကျွတ်လဆန်း ၁၄ ရက် (အဖိတ်နေ့) မွန်းလွဲပိုင်းလောက်မှာ သမ္မတဦးသိန်းစိန် လက်မှတ် ရေးထိုး ထားတဲ့ လွတ်ငြိမ်း ချမ်းသာခွင့် အမိန့် ထွက်လာတယ်။ အမျှော်ကြီး မျှော်ရင်း နှစ်ပေါင်းများစွာ 'မျှော်မျှော် သူမောရရှာတယ်' ဖြစ်နေကြရတဲ့ မိဘ ဆွေမျိုးတွေ ဧရာဝတီ တုန်းကလိုပဲ ၀မ်းသာ ရွှင်မြူး သွားကြတယ်။ ဧရာဝတီ ကိစ္စမှာ ပြည်သူ တစ်ရပ်လုံး စိတ်ချမ်းသာအောင် ဆောင်ရွက်ခဲ့တဲ့ သမ္မတကြီးကို အပြည့်အ၀ ယုံကြည်ပြီး အရင်အကြိမ်တွေလိုတော့ ဖြစ်မှာ မဟုတ်ပါဘူးလို့ သေချာပေါက် တွက်ဆ ထားကြတယ်။ တစ်ညလုံး အိပ်မပျော်နိုင်ကြဘဲ မိုးလင်းအောင် မနည်းကြီး သည်းခံ စောင့်ဆိုင်း နေကြရတယ်။ တချို့က မအောင့်နိုင်တော့ဘဲ မိုးမလင်းခင်က ထောင်ဗူးဝက သွားစောင့်ကြတယ်။
ရောင်နီလာပြီ။ ပြီးတော့ မိုးစင်စင်လင်းပြီ။ ထောင်တံခါးကြီးပွင့်ပြီ။ အချိန်တန်တော့ သူတို့ ပြန်လာကြပြီ။ ဒါပေမဲ့ သူတို့ထဲမှာ သူတို့ ပါမလာဘူး။ အရင်အကြိမ်တွေ လိုပဲ မျှော်မျှော်သူ မောရရှာတယ် ဖြစ်ရပြန်ပြီ။ ဘာကြောင့်လဲ။ ဒီမိုကရေစီ စနစ်ကို ကူးပြောင်းဖို့ ဆိုတာ ခေါင်းဆောင် နှစ်ယောက်တည်း အားနဲ့ မရနိုင်ဘူး။ ပါတီ အဖွဲ့အစည်း နှစ်ခုတည်းလည်း မဆောင်ရွက်နိုင်ဘူး။ ပြည်သူလူထု အများစုကြီးရဲ့ ပေါင်းစည်း အင်အားနဲ့ ၀ိုင်းဝန်း လုပ်ဆောင်ဖို့ လိုတယ်။ အထူးသဖြင့် နှစ်ပေါင်း ခြောက်ဆယ်ကျော် ပြည်တွင်းစစ် တိုက်ခိုက်နေရတဲ့ တိုင်းပြည်တစ်ပြည် အဖို့၊ တိုင်းရင်းသား အားလုံးနဲ့ လက်တွဲနိုင်ဖို့ အင်မတန် အရေးကြီးတယ်။ မဖြစ်မနေကို ရအောင် လုပ်ဖို့ လိုတယ်။
ရွှေပြည်တော်ဂိတ်တံခါး
အထဲမှာကျန်ရှိနေရစ်တဲ့ ၈၈ မျိုးဆက်တွေနဲ့ တိုင်းရင်းသားခေါင်းဆောင်တွေဟာ အမျိုးသား ပြန်လည် ရင်ကြားစေ့ရေး၊ ပြည်တွင်း ငြိမ်းချမ်းရေးနဲ့ ဒီမိုကရေစီ တည်ဆောက်ရေး အတွက် အရေးကြီးဆုံး သော့တစ် ချောင်းကိုယ်စီ ကိုင်ဆောင် ထားသူတွေ ဖြစ်တယ်။ ရွှေပြည်တော် ဂိတ်တံခါးက သော့လေး ချက်ခတ်ထားတယ်။ တစ်ချောင်းက ဒေါ်အောင်ဆန်းစုကြည် ဆီမှာ ရှိပြီး၊ နောက်တစ်ချောင်းက သမ္မတ ဦးသိန်းစိန်ကို ရှေ့တန်း တင်ထားတဲ့ တပ်မတော် လက်ထဲမှာ ရှိတယ်။ ဒီနေ့ တပ်မတော် ခေါင်းဆောင် အားလုံးလိုလိုဟာ လူငယ်တွေဖြစ်တယ်။ အထဲမှာရှိနေတဲ့ ၈၈ မျိုးဆက်တွေနဲ့ အရွယ်ချင်း မတိမ်းမယိမ်း တွေလို့ ဆိုနိုင်တယ်။
မော်ကွန်းတင်နိုင်တဲ့အချိန်
သူတို့ရွယ်တူတန်းတူ လူငယ်တွေချင်း အတွေးအခေါ်တွေ သိပ်ခြားနားကြမှာ မဟုတ်ပါဘူး။ အရှေ့တောင် အာရှ ဒေသမှာ အချမ်းသာဆုံး ဖြစ်တဲ့ မြန်မာနိုင်ငံကို ဆင်းရဲတွင်းကြီး ထဲက ဆွဲထုတ်ပြီး ထိုက်တန်တဲ့ နေရာကို အမြန်ဆုံး ပြန်လည်ရရှိ အောင် လုပ်ဆောင် ချင်စိတ်တွေ လူငယ်တိုင်းမှာ ရှိပါတယ်။ စစ်မြေပြင်မှာ လုံခြုံရေး ဦးစားပေး လုပ်ဆောင်ရတာ သဘာဝ ကျတယ်။ ဒါပေမဲ့ နိုင်ငံရေး ကိစ္စမှာတော့ နိုင်ငံရေးကိုသာ ဦးစားပေး စဉ်းစားရပါတယ်။ ဒီအချိန်ဟာ သမိုင်းမှာ အလှည့်အပြောင်းကြီး တစ်ခု အဖြစ် မော်ကွန်း တင်နိုင်တဲ့ အချိန်ဖြစ်တယ်။ တပ်မတော်နဲ့ ပြည်သူ ကြည်ဖြူ လက်တွဲမှု ဖြစ်ပေါ်လာနိုင်တဲ့ အချိန်ဖြစ်တယ်။ ဒီအခွင့်အရေးကို လက်လွတ် မခံသင့်ဘူး။ အမိအရ၊ ရ အောင်ယူကြပါလို့ တိုက်တွန်း နှိုးဆော် လိုက်ရပါတယ်။
Ref: EMG News
ဒေါ်စု အမျိုးသမီးသတ္တိရှင် Oxi DAy ဆု ချီးမြှင့်ခံရ
ခင်မျိုးသက်
အင်္ဂါ, 18 အောက်တိုဘာ 2011
မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ကို ၀ါရှင်တန်ဒီစီ အခြေစိုက် Oxi Day အဖွဲ့ကြီးက နေပြီးတော့ ပထမဦးဆုံး Oxi Day Crete တိုက်ပွဲဆု ချီးမြှင့် လိုက်ပါတယ်။ ဒုတိယ ကမ္ဘာစစ်အတွင်းက ဟစ်တလာနဲ့ မူဆိုလိုနီ တို့လို အင်အားကြီးတဲ့ အာဏာရှင် တွေကို ဂရိ နိုင်ငံငယ်ကလေးက No လို့ အဓိပ္ဗာယ်ရတဲ့ Oxi ဆိုတဲ့ ဝေါဟာရကို သုံးပြီးတော့ အာခံခဲ့ကြတာမှာ အမျိုးသမီးတွေ ပါဝင်ခဲ့တဲ့ အခန်းကဏ္ဍကို ဒီဆုက ဂုဏ်ပြု ချီးမြှင့်တာ ဖြစ်ပါတယ်။ ဒေါ်အောင်ဆန်းစုကြည် ကိုလည်း မြန်မာ့ ဒီမိုကရေစီ ရရှိရေးနဲ့ လွတ်လပ်မှု အတွက် သတ္တိရှင် အမျိုးသမီး တဦး အနေနဲ့ အခုလို ဆုချီးမြှင့်တာ ဖြစ်ပါတယ်။ အကြောင်းစုံကို ဒေါ်ခင်မျိုးသက်က တင်ပြ ထားပါတယ်။
ဒုတိယကမ္ဘာစစ်အတွင်းက ဂျာမနီနဲ့ အီတလီ ၀င်ရိုးစွန်းတပ်တွေကို တွန်းလှန်ရာမှာ ဂရိနိုင်ငံ၊ ခရိကျွန်းမှာ ဖြစ်ပွား ခဲ့တဲ့ ခရိတိုက်ပွဲမှာ အမျိုးသမီးထုရဲ့ အခန်းကဏ္ဍဟာ လွတ်လပ်မှုနဲ့ ဒီမိုကရေစီ အတွက် သတ္တိ ပြောင်မြောက်စွာ တွန်းလှန် နိုင်ကြသူတွေ အဖြစ်နဲ့ မှတ်တမ်း အတင်ခံ ခဲ့ကြရပါတယ်။ ဒီလို သတ္တိ ပြောင်မြောက်သူ တွေကို မှတ်တမ်း တင်နိုင်ဖို့ အတွက် ၀ါရှင်တန် အခြေစိုက်၊ Oxi Day အဖွဲ့ကြီးက Oxi Day Crete တိုက်ပွဲဆု ချီးမြှင့်ဖို့ ဆုံးဖြတ်ခဲ့ပြီး ပထမဦးဆုံး အဖြစ်နဲ့ ဒေါ်အောင်ဆန်းစုကြည်ကို ပေးအပ်ဖို့ ရွေးချယ် လိုက်တယ်လို့ Oxi Day အဖွဲ့ ဥက္ကဋ္ဌ အဲန်ဒရူး၊ မွန်နားတို့စ်က ဗွီအိုအေကို ပြောကြားခဲ့ပါတယ်။
“သူ့ကို ကျနော်တို့ သိပ်ကို လေးစားမြတ်နိုးသလို သူဟာ အားကျ အတုယူစရာ တယောက်ပါ။ မြန်မာနိုင်ငံ အတွက်သာ မကပါဘူး။ တကမ္ဘာလုံး အတွက်ပါ အားကျစေတဲ့ စံနမူနာပါ။ ဒုတိယ ကမ္ဘာစစ်ကြီးမှာ ၀င်ရိုးစွန်း နာဇီ အာဏာရှင်ကို ဂရိနိုင်ငံက တွန်းလှန်ပြီး ဒီမိုကရေစီနဲ့ လွတ်လပ်မှုအတွက် မီးရှူးတန်ဆောင်ကို လက်ဆင့်ကမ်း သယ်ဆောင်ခဲ့သလို ဒေါ်အောင်ဆန်းစုကြည်ကို ဒီကနေ့ခေတ် ဒီမိုကရေစီနဲ့ လွတ်လပ်မှု မီးရှူးတန်ဆောင် ဆောင်ကျဉ်းနေသူ အဖြစ် ကမ္ဘာတ၀ှမ်းက သတ်မှတ်ကြပါတယ်။ သူ့ရဲ့ စွန့်လွှတ် အနစ်နာခံမှုနဲ့ သတ္တိပြောင်မြောက်မှု အတွက် မှတ်တမ်းတင်နိုင်ဖို့ အခုလို ဂုဏ်ပြုဆု ချီးမြှင့်လိုက်တာပါ”
လွန်ခဲ့တဲ့ ၂၁ နှစ်တာ ကာလအတွင်း ၁၅ နှစ်တာ အဖမ်းဆီးခံခဲ့ရတဲ့ကြားကပဲ ဒေါ်အောင်ဆန်းစုကြည်ဟာ မြန်မာနိုင်ငံသား ၅၅ သန်း အတွက် အင်အားတရပ် ဖြစ်နေသလို မျှော်လင့်ချက် အထိမ်းအမှတ်လည်း ဖြစ်ခဲ့သူပါ။ ဒါ့အပြင် လွတ်လပ်မှု အတွက် ရဲရဲဝံ့ဝံ့ တွန်းလှန်သူ အဖြစ်နဲ့ တကမ္ဘာလုံးက လေးစား မြတ်နိုးတဲ့ ဒေါ်အောင်ဆန်းစုကြည်ကို ဒီဆု ပေးအပ်ဖို့ အရင် အောက်လွှတ်တော် ဒီမိုကရက်ခေါင်းဆောင် နန်စီ ပေါ်လိုစီက (Nancy Pelosi) နာမည် စာရင်း တင်သွင်းခဲ့တာ ဖြစ်ပါတယ်။ ဂရိ-အမေရိကန် အဖွဲ့ကြီး ဖြစ်တဲ့ Oxi Day အဖွဲ့ဟာ နှစ်ပတ်လည်နေ့ အထိမ်းအမှတ်ကို ကျင်းပဖို့ရှိပြီး ဒီနှစ်အတွက် အထိမ်းအမှတ် မှာတော့ ဆု ၂ ခုပေးဖို့ ရှိပါတယ်။ အမျိုးသားအတွက် Oxi Day ဆုကို မကြာသေးခင်ကမှ အာရပ် ကမ္ဘာရဲ့ ဒီမိုကရေစီ လှုပ်ရှားမှုကို စတင်ခဲ့တဲ့ တူနီးရှား နိုင်ငံက လူ့အခွင့်အရေး လှုပ်ရှားသူ Jamel Bettaieb ကို ပေးအပ်မှာ ဖြစ်ပြီး အမျိုးသမီးအတွက် ပထမဆုံး Oxi Day ခရိ စစ်ပွဲဆုကို ဒေါ်အောင်ဆန်းစုကြည်ကို ချီးမြှင့်မှာ ဖြစ်ပါတယ်။
“အမျိုးသမီးတွေ အတွက် ပေးတဲ့ ဆုကတော့ Battle of Crete ဆုပါ။ ဒုတိယ ကမ္ဘာစစ်ကြီး အတွင်းက ဂရိနိုင်ငံ ခရိကျွန်းမှာ နာဇီ ဂျာမဏီ တပ်တွေရဲ့ ရန်ကို တွန်းလှန်ခဲ့တုန်းက အမျိုးသမီးထုက သက်ကြီး ရွယ်အိုတွေ၊ ကလေးတွေကို ဦးဆောင်ပြီး ရွပ်ရွပ်ချွန်ချွန် တိုက်ခိုက် ခဲ့တာကို ရည်ရွယ်ပြီး ပေးတာပါ။ လွတ်လပ်မှုနဲ့ ဒီမိုကရေစီ ရဖို့ အင်အားကြီးတဲ့ သူကို အံတုဝံ့တဲ့ သတ္တိရှိသူကို ကမ္ဘာတ၀ှမ်း လိုက်ရှာတဲ့ အခါမှာတော့ ဒေါ်အောင်ဆန်းစုကြည်ကို ကျွန်တော်တို့ အဖွဲ့က တွေ့ပါတယ်”
လေထီးနဲ့ ဆင်းပြီး ခရိကျွန်းကို သိမ်းပိုက်ဖို့ ကျိုးစားတဲ့ နာဇီတပ်သား အသေအပျောက် အများဆုံး အဖြစ် မှတ်တမ်း တင်ခဲ့ရတဲ့ ခရိတိုက်ပွဲမှာ ပါဝင်ဆင်နွှဲခဲ့တဲ့ အမျိုးသမီးတွေကို ရောမပုံပြင်ထဲက ဘီလူးကြီး ဂိုလိုင်းရတ် Goliath ကို လောက်လေးဂွနဲ့ တွန်းလှန်ခဲ့တဲ့ ဒေးဗစ် ရဲ့ ရဲစွမ်းသတ္တိ ရှိသူလို့ တင်စားကြပါတယ်။ ဒီလို အစွမ်းသတ္တိရှိတဲ့ ဒေါ်အောင်ဆန်းစုကြည်ကို အောက်တိုဘာလ ၂၇ ရက်နေ့ ၀ါရှင်တန် ဒီစီမှာ ကျင်းပမယ့် အောက်ဆီဒေး နှစ်ပတ်လည် အခမ်းအနားမှာ ဆုပေးဖို့ စီစဉ်ထားပါတယ်။
ဒီဆုကို အမေရိကန်အခြေစိုက် မြန်မာ့အရေးလှုပ်ရှားတဲ့ Burma Campaign အဖွဲ့ တာဝန်ခံ ဦးအောင်ဒင်က ဒေါ်အောင်ဆန်းစုကြည် ကိုယ်စား လက်ခံ ရယူမှာဖြစ်ပြီး ဒေါ်အောင်ဆန်းစုကြည်က ဒီအခမ်းအနား အတွက် ဗီဒီယိုမိန့်ခွန်း ပေးပို့ဖို့ ရှိတယ်လို့လည်း အောက်ဆီဒေး အဖွဲ့က ပြောပါတယ်။
Ref: VOA News
ယာယီပတ်စပို့စ် သက်တမ်းတိုးခငွေ လျှော့ချ
2011-10-18
ထိုင်းနိုင်ငံရောက် မြန်မာရွှေ့ပြောင်း အလုပ်သမားတွေရဲ့ ယာယီပတ်စပို့စ် သက်တမ်း တိုးခငွေကို လျှော့ချ လိုက်ပြီး ယခင် ဘတ် ၄၅၀ ကနေ ယခု ဘတ် ၁၅၀ သာ သတ်မှတ် လိုက်တယ်လို့ ထိုင်းနိုင်ငံ ဘန်ကောက်ရှိ မြန်မာသံရုံးက ပြောပါတယ်။
၂၀၀၉ ခုနှစ်က စတင်ထုတ်ပေးခဲ့တဲ့ မြန်မာရွှေ့ပြောင်းအလုပ်သမားတွေရဲ့ ယာယီပတ်စပို့ သက်တန်း ကာလ ပြည့်တော့မှာ ဖြစ်တဲ့ အတွက် ထပ်မံ သက်တန်း တိုးနိုင်ဖို့ ပတ်စပို့ သက်တန်း တိုးခကို အခုလို လျှော့ပေး လိုက်တာ ဖြစ်တယ်လို့ ဘန်ကောက် မြန်မာ သံရုံးက မြန်မာရွှေ့ပြောင်း အလုပ်သမား အရေး ကိုင်တွယ် ဆောင်ရွက်ပေးနေတဲ့ အရာရှိ ဦးနိုင်ထွန်းက အာအက်ဖ်အေကို ပြောပါတယ်။
“ကျနော်တို့က အခ ပတ်စပို့စ် သက်တမ်းတိုးတာ ၃နေရာပေါ့၊ လုပ်ပေးနေတယ်ပေါ့ တာချီလိတ်ရယ်၊ ရနောင်းရယ်၊ ဘန်ကောက်ရယ် ပေါ့နော်၊ အဲဒီမှာအခု ကျနော်တို့ ဒုဝန်ကြီး ဦးမြင့်သိန်း လာသွားပြီးတဲ့ နောက်ပိုင်းမှာ ဒီဟာကိုအားလုံး ထိုင်းဘက်နဲ့ ညှိတယ်၊ သံအမတ်ကြီး တို့နဲ့ ညှိပြီးမှ ဒီပတ်စပို့စ် သက်တိုးတာကို ဘတ် ၁၅၀ နှုန်းလျှော့ချမယ်။ ၄၅၀ ကနေ ၁၅၀ လျှော့ချမယ် ၊ လောလော ဆယ်တော့ အခု ဒီဟာတွေကို တချို့ပွဲစား တွေကနေ လာတာတွေ ရှိတယ်။ အဲဒီတော့ ၁၅၀နဲ့ အားလုံး သိသွားအောင် ဆိုပြီး ကျနော်တို့ ခဏ ရပ်ထားပေးတယ်။ အဲဒီသတင်းကိုလည်း ကျနော်တို့ စပြီးတော့ ကြေညာ ပေးနေတယ်” လို့ ဦးနိုင်ထွန်းက အာအက်ဖ်အေကို ပြောပါတယ်။
အခုရက်ပိုင်းအတွင် အရေးပေါ် လိုအပ်မှုကလွဲပြီး ခေတ္တ ပိတ်ထားခဲ့ရာက လာမယ့်သောကြာ နေ့မှာ ယာယီ ပတ်စပို့ သက်တန်း တိုးမှုကို ပြန်ဖွင့်ပေး သွားမယ်လို့ လည်း သူက ပြောပါတယ်။
ဘန်ကောက် သံရုံးနဲ့အတူ တပြိုင်တည်း တာချီလိတ်၊ ရနောင်းတို့မှာလည်း ပတ်စပို့ သက်တန်းတိုးခကို ဘတ် ၁၅၀ နှုန်းနဲ့ လုပ်ဆောင် သွားမယ်လို့ ဦးနိုင်ထွန်းက ပြောပါတယ်။
“လောလောဆယ် ကျနော်တို့ သံရုံးတော့ လုပ်မယ်၊ ဒီ ရနောင်းနဲ့ တာချီလိတ် မှာတော့ ကျနော်တို့ contact လုပ်နေတယ်။ သူတို့က ဘတ် ၄၅၀ နှုန်းနဲ့ ဆက်ပြီးတော့ ထုတ်ပေး နေတယ်လို့ ပြောတယ်။ ကျနော်တို့ ၁၅၀ ဆိုရင် သူတို့ ဘက်ကလည်း ၁၅၀ ဖြစ်လိမ့်မယ်။ ဘာလို့လည်း ဆိုတော့ သူတို့ဘက်က ပိုကောက်ရင် သူတို့ဘက်ကို ဘယ်သူမှ သွားတော့မှာ မဟုတ်ဘူး” လို့ ဦးနိုင်ထွန်းက ပြောပါတယ်။
ဒါ့အပြင် တရားမဝင် မြန်မာရွှေ့ပြောင်း အလုပ်သမားတွေကို ထပ်မံ မှတ်ပုံတင်ခွင့် ပြုဖို့ နဲ့ အလုပ်သမား တွေရဲ့ မှီခိုသူ မိသားစုတွေကို ထိုင်းနိုင်ငံ အတွင်း ဝင်ရောက်ခွင့် ပြုဖို့ အတွက်လည်း ထိုင်းအလုပ်သမား ဝန်ကြီး ဖဒန်ချိုင်း ဆာစွန်ဆပ်နဲ့ အောက်တိုဘာလ ၁၂ ရက်နေ့က ထိုင်းနိုင်ငံမှာ လာရောက် ဆွေးနွေးခဲ့တဲ့ မြန်မာ ဒုတိယ အလုပ်သမားဝန်ကြီး ဦးမြင့်သိန်းက တိုက်တွန်း ခဲ့တယ်လို့လည်း ထိုင်းအစိုးရက သတင်းထုတ်ပြန် ထားပါတယ်။
မြန်မာရွေ့ပြောင်း အလုပ်သမားတွေအတွက် ပြီးခဲ့တဲ့ဇွန်လက ပြုလုပ်ခဲ့တဲ့ တရားဝင် မှတ်ပုံတင်ခွင့် အစီအစဉ်ဟာ တိုတောင်းပြီး မှတ်ပုံ မတင်နိုင်ဘဲ ကျန်နေသူတွေ အတွက် မြန်မာဘက်က အခုလိုထပ်မံ မှတ်ပုံတင်ခွင့် တောင်းခံရတာ ဖြစ်တယ်လို့ ထိုင်း အလုပ်သမား ဝန်ကြီးဌာန အမြဲတမ်း အတွင်းဝန် ဆံဂ သနာဆန်ဂူဝေါင် က အတည်ပြု ပြောဆိုပါတယ်။
ထိုင်းနိုင်ငံအတွင်း နေရာ ၅နေရာမှာ ယာယီပတ်စပို့စ် ထုတ်ပေးမယ်လို့လည်းသိရပါတယ်။
ထိုင်းနိုင်ငံမှာ တရားဝင် မှတ်ပုံတင်ထားတဲ့ မြန်မာရွှေ့ပြောင်း အလုပ်သမား ၁ သန်းခွဲခန့် ရှိတယ်လို့ ထိုင်း အလုပ်သမား ဝန်ကြီးဌာန စာရင်းဇယားတွေ အရ သိရပြီး ယာယီပတ်စပို့စ် ကိုင်ဆောင်တဲ့ အလုပ်သမားက ၆ သိန်းခွဲကျော် ရှိပြီး မှတ်ပုံ မတင်သေးတဲ့ မြန်မာရွှေ့ပြောင်း အလုပ်သမားက ၅ သိန်း ဝန်းကျင်ခန့် ရှိမယ်လို့ အလုပ်သမားရေး အဖွဲ့တွေက ပြောဆို နေကြပါတယ်။
Ref: RFA News
ကချင်ပြည်နယ်မှာ အစိုးရရဲ့ လူ့အခွင့်အရေးချိုးဖောက်မှု ကြီးမား HRW စိုးရိမ်
သားညွန့်ဦး
အင်္ဂါ, 18 အောက်တိုဘာ 2011
မြန်မာနိုင်ငံမြောက်ပိုင်း ကချင်ပြည်နယ်အတွင်း ဒီနှစ်ထဲ တိုက်ပွဲတွေပြန်ဖြစ်လာတာမှာ မြန်မာ စစ်တပ်က အရပ်သား ပြည်သူတွေ အပေါ် လူ့အခွင့်အရေး ချိုးဖောက်မှုတွေကို ဆိုးဆိုးဝါးဝါး ကျူးလွန် ခဲ့ကြတယ် ဆိုပြီး နယူးယောက် အခြေစိုက် HRW လူ့အခွင့်အရေး စောင့်ကြပ်မှု အဖွဲ့က အပြစ်တင် လိုက်ပါတယ်။ သူတို့ သတင်းသွားရောက် ရယူခဲ့တဲ့ မှတ်တမ်းတွေ အရ အပြစ်မဲ့ အရပ်သား အချို့ အထူးသဖြင့် အမျိုးသမီးနဲ့ ကလေးငယ်တွေကို မြန်မာ စစ်တပ်က ပစ်ခတ် သတ်ဖြတ်မှုတွေပါ ရှိခဲ့တယ်လို့ HRW က ပြောပါတယ်။ HRW ပြောခွင့်ရသူကို ကိုသားညွန့်ဦးက ဆက်သွယ် မေးမြန်းထားပါတယ်။
ကချင်ပြည်နယ်အတွင်း ဒီနှစ် ဇွန်လကစခဲ့တဲ့ KIA ကချင်လွတ်လပ်ရေး တပ်ဖွဲ့နဲ့ မြန်မာအစိုးရတပ် တိုက်ပွဲတွေ အကြား ကချင်လူမျိုး ဒေသခံ အရပ်သားတွေ အပေါ် လူ့အခွင့်အရေး ချိုးဖောက်မှုတွေ ရှိတယ်ဆိုတဲ့ သတင်းတွေကြောင့် နယူးယောက် အခြေစိုက် Human Rights Watch လူ့အခွင့်အရေး စောင့်ကြပ်မှု အဖွဲ့အနေနဲ့ ကချင်ပြည်နယ် အတွင်းကို ကိုယ်တိုင်ဆင်းပြီး အခြေအနေတွေကို လေ့လာ ခဲ့တယ်လို့ HRW က ပြောပါတယ်။
ဇူလိုင်နဲ့ သြဂုတ်လတွေအတွင်းမှာ HRW စုံစမ်းရေး အဖွဲ့ဟာ ကချင်ပြည်နယ် အတွင်းက အရပ်သားတွေ စွန့်ပစ်ခဲ့တဲ့ ကျေးရွာ ဟောင်းတွေနဲ့ တောထဲမှာ လှည့်လည် ပုန်းအောင်း နေထိုင်နေကြတဲ့ ဒုက္ခသည် စခန်းတွေကို သွားရောက် လေ့လာခဲ့တယ်လို့ ဆိုပါတယ်။ အဲဒီကနေ အသေအချာ မှတ်တမ်းပြုပြီး တွေ့ရှိချက်တွေ အရ မြန်မာ အစိုးရတပ်ဟာ အရပ်သားတွေ အပေါ် လူ့အခွင့်အရေး ချိုးဖောက်မှုတွေ ရှိနေတယ်ဆိုတာကို ကောက်ချက် ဆွဲခဲ့တာလို့ HRW ရဲ့ အာရှရေးရာ လက်ထောက် ညွန်ကြားရေးမှူး Elaine Pearson က ဗွီအိုအေကို ပြောပါတယ်။
“တိုက်ပွဲတွေပြန်ဖြစ်တဲ့ လွန်ခဲ့တဲ့ ငါးလကတည်းက အဲဒီဒေသတွင်းမှာ မြန်မာ စစ်တပ် အနေနဲ့ လူ့အခွင့်အရေး ချိုးဖောက်မှုတွေ ကျူးလွန် နေတယ်ဆိုတဲ့ သတင်းတွေရ ပါတယ်။ HRW လူ့အခွင့်အရေး စောင့်ကြပ်မှု အဖွဲ့အနေနဲ့ ဒါတွေ တကယ် ဖြစ်ခဲ့သလား အတည်ပြုဖို့ လိုလာပါတယ်။ ဒါကြောင့် အဲဒီကို သွားရောက်ပြီး မြန်မာ စစ်တပ်ကနေ အရပ်သားတွေ အပေါ် တိုက်ခိုက်မှုတွေ၊ သတ်ဖြတ်မှုတွေ၊ အတင်းအဓမ္မ လုပ်အားပေး ခိုင်းစေမှုတွေ၊ ကျေးရွာတွေ ဖျက်ဆီး ခံရမှုတွေကို အသေအချာ လေ့လာ မှတ်တမ်း ပြုစုခဲ့ပါတယ်။”
ကချင်ပြည်နယ်အတွင်းမှာ အခု လပိုင်းတွေအတွင်းဖြစ်ခဲ့တဲ့ သတ်ဖြတ်မှုတွေ၊ အရပ်သားတွေကို တိုက်ခိုက်မှု တွေမှာ မြန်မာ စစ်တပ် အပေါ် တာဝန်ရှိတယ်လို့ HRW က ထောက်ပြပါတယ်။ သူတို့ ခန့်မှန်းချက် အရ ကချင်အရပ်သား ၃၀,၀၀၀ ခန့်မှန်းခြေဟာ တိုက်ပွဲတွေကြောင့် တောတောင်တွေထဲ လှည့်လည် ပုန်းအောင်း နေရတယ်လို့ ပြောပါတယ်။ အခု ဖြစ်နေတဲ့ တိုက်ပွဲတွေကြောင့် အရပ်သားတွေ အပေါ်မှာ အတော်လေးကို ဆိုးဆိုးဝါးဝါး သက်ရောက်မှုတွေ ရှိနေတယ်လို့ Elaine Pearson က ပြောပါတယ်။
“တိုက်ပွဲတွေ ပြန်ဖြစ်လာတာကြောင့် အရပ်သားတွေအပေါ် ထိခိုက်မှုတွေက အတော်လေး ဆိုးဝါး ပါတယ်။ သောင်းနဲ့ချီတဲ့ အရပ်သား တွေဟာ မိမိတို့ ကျေးရွာတွေကို စွန့်ခွာပြီး တောတွေထဲကို ထွက်ပြေး တိမ်းရှောင် ကြရပါတယ်။ ဖြစ်ရပ် အများစုမှာတော့ အဲဒီ ဒုက္ခသည်တွေဟာ လူသားချင်း စာနာကူညီမှုတွေ အထောက်အပံ့တွေ မရကြပါဘူး။ စစ်တပ်ကနေ အရပ်သား တွေကို အတင်းအဓမ္မ လုပ်အား ခိုင်းစေတာတွေ ရှိခဲ့ပါတယ်။ အချို့ အခြေအနေတွေမှာ အဲဒီက ထွက်ပြေးတဲ့ အရပ်သားတွေဟာ တိုက်ခိုက် သတ်ဖြတ် ခံရတာတွေ ရှိပါတယ်။ အထောက်အထား ရှိတဲ့ ဥပမာ တခုမှာတော့ အဘွား လုပ်သူနဲ့ မြေးဖြစ်သူဟာ ကျေးရွာကနေ ထွက်ပြေးဖို့ ကြိုးစားနေတုန်း ပစ်သတ်တာ ခံခဲ့ကြရပါတယ်။”
အရပ်သားတွေကို လူ့အခွင့်အရေးချိုးဖောက်မှုတွေ ကျူးလွန်တဲ့ အမှုအတော်များများကို HRW အနေနဲ့ အသေအချာ မှတ်တမ်း ပြုစုထား ပါတယ်။ မြန်မာနိုင်ငံတွင်း လူ့အခွင့်အရေး ချိုးဖောက်မှုတွေကို ဖော်ထုတ်ဖို့ ကုလသမဂ္ဂ စုံစမ်းရေး ကော်မရှင် ဖွဲ့စည်းရေးဟာ အင်မတန် အရေးကြီး နေပြီဆိုတာ ဒီအဖြစ်အပျက်တွေ အရ ပိုပြီး ထင်ရှားစေတယ် လို့လည်း HRW က ပြောပါတယ်။ အခု သူတို့ရထားတဲ့ မှတ်တမ်းတွေ အရ ကချင်ပြည်နယ် အတွင်း ဖြစ်ရပ်တွေမှာ အဆိုးဆုံးကတော့ အရပ်သားတွေကို မြန်မာ စစ်တပ်က ပစ်ခတ် သတ်ဖြတ်တာတွေ ဖြစ်တယ်လို့ Elaine Pearson က ပြောပါတယ်။
“အဆိုးဆုံးဖြစ်ရပ်တချို့ကတော့ ကျေးရွာက လူငယ်တွေဟာ KIA အဖွဲ့ဝင်တွေလို့ စွတ်စွဲခံရပြီး မြန်မာ စစ်သားတွေက သူတို့ကို သတ်ဖြတ် ပစ်ခဲ့တာပါ။ ဖြစ်ရပ်တခုမှာတော့ ကျေးရွာကနေ ထွက်ပြေးဖို့ ကြိုးစားနေတဲ့ အမျိုးသမီးတဦးနဲ့ လေးနှစ်သား အရွယ် မြေးဖြစ်သူတို့ကို မြန်မာစစ်သားတွေက ပစ်သတ် ခဲ့တာမျိုးပါ။ နောက်ဖြစ်ရပ် တခုမှာတော့ မြန်မာ စစ်သားတွေက ၆၂ နှစ် အရွယ် အမျိုးသမီးကြီး တဦးနဲ့ သူ့မြေးဖြစ်သူ ကျေးရွာက ထွက်ပြေးတာကို ပစ်သတ်တာပါ။ ဒါမျိုးဖြစ်ရပ်တွေ အတော်များများကို မှတ်တမ်း ယူထားပါတယ်။ ဒီလို ကျူးလွန် ခံခဲ့ရသူတွေဟာ အမျိုးသမီးတွေနဲ့ ကလေးငယ်တွေ၊ တကယ့် အရပ်သားတွေ ဖြစ်ကြပါတယ်”
ကချင်ပြည်နယ်အတွင်း အရပ်သားတွေအပေါ်မှာ မြန်မာစစ်တပ်က လူ့အခွင့်အရေး ချိုးဖောက်မှုတွေ ရှိတယ်လို့ HRW က မှတ်တမ်းတွေ ထုတ်ဖော် လိုက်ချိန်မှာပဲ ဒီရက်ပိုင်းအတွင်း ကုလသမဂ္ဂ အထွေထွေ ညီလာခံမှာ မြန်မာ့ လူ့အခွင့်အရေး အခြေအနေကို အပြန်အလှန် ဆွေးနွေး ကြဖို့လည်း ရှိနေပါတယ်။ မြန်မာနိုင်ငံထဲမှာ နိုင်ငံရေး ပြုပြင်ပြောင်းလဲမှုတွေ ရှိနေတယ် ဆိုပေမယ့် နိုင်ငံရေး အကျဉ်းသားတွေ ရှိနေသေးတဲ့ ကိစ္စ၊ နောက် တိုင်းရင်းသား ဒေသတွေမှာ အစိုးရဘက်ကနေ စစ်ဆင်ရေးတွေ တိုးမြှင့်လာတဲ့ အခြေအနေ တွေပေါ်မှာ မြန်မာ အစိုးရကို နိုင်ငံတကာက ဝေဖန် ပစ်တင်မှုတွေ ရှိနေတုန်းပါ။ မနေ့တုန်းကလည်း အမေရိကန် ပြည်ထောင်စုရဲ့ မြန်မာနိုင်ငံ ဆိုင်ရာ မူဝါဒ ညှိနှိုင်းရေးမှူး Derek Mitchell က မြန်မာနိုင်ငံထဲမှာ အားရ ကျေနပ်လောက်စရာ အပြောင်း အလဲတွေ မြင်လာရပေမယ့် လုံးလုံး မပြောင်းလဲသေးတဲ့ အခြေအနေတွေ ရှိနေသေးတယ် ဆိုပြီးတော့ ထောက်ပြ ခဲ့ပါတယ်။ ဒီထဲမှာတော့ တိုင်းရင်းသား လူနည်းစုတွေနဲ့ အစိုးရကြား ဆက်ဆံရေးဟာ ပြောင်းလဲ တိုးတက်တာ မတွေ့ရတဲ့ အပြင် တိုင်းရင်းသား ဒေသတွေမှာ အမျိုးသမီးနဲ့ ကလေးငယ်တွေ အပါအ၀င် အရပ်သားတွေအပေါ် လူ့အခွင့်အရေး ချိုးဖောက်မှုတွေ၊ အကြမ်းဖက်မှုတွေ ဆက်ပြီးတော့ ဖြစ်နေတုန်း၊ ရှိနေတုန်းပဲ ဆိုပြီးတော့ သူက ပြောသွားခဲ့ပါတယ်။
Ref: VOA News
နေပြည်တော် စီမံကိန်းကုန်ကျမှု အစိုးရဘတ်ဂျက်တွင် မဖော်ပြ
မျိုးသန့်
အင်္ဂါနေ့၊ အောက်တိုဘာလ ၁၈ ရက် ၂၀၁၁
ချင်းမိုင် (မဇ္ဈိမ) ။ ။ ယခုနှစ် ဇူလိုင်လမှစ၍ တည်ဆောက်ရေး လုပ်ငန်းများ ရပ်နားထားရသည့် နေပြည်တော် အထူးခရိုင် တည်ဆောက်ရေး လုပ်ငန်းများ အတွက် ကုန်ကျငွေသည် အစိုးရ၏ ဘဏ္ဍာငွေစာရင်းတွင် မပါဝင်ဟု နေပြည်တော်တွင် အင်္ဂါနေ့က ပြုလုပ်သည့် ဘဏ္ဍာရေးဆိုင်ရာ ဆွေးနွေးပွဲတွင် အဆင့်မြင့်ပညာ ဦးစီးဌာန ဘဏ္ဍာရေးမှူးချုပ် (ငြိမ်း) ဦးကြည်ယုံမှ ပြောကြား သွားသည်ဟု ဆွေးနွေးပွဲတက် လွှတ်တော် အမတ်များက ဆိုသည်။
ဘဏ္ဍာရေး အခွန်ဝန်ကြီးဌာနမှ ရေးဆွဲထားသည့် ၂ဝ၁၁- ၂ဝ၁၂ ဘဏ္ဍာရေး နှစ်အတွက် အစိုးရတရပ်၏ ဘဏ္ဍာရေး လည်ပတ်မှု ပုံစံကို ဦးကြည်ယုံမှ လွှတ်တော် အမတ်များကို ရှင်းလင်း တင်ပြရာတွင် ဗဟို အစိုးရ၏ ငွေလုံး ငွေရင်း အသုံးစရိတ်များ ခေါင်းစဉ် အောက်တွင် လုပ်ငန်း ဆောင်ရွက်ခြင်း အသုံးစရိတ်၊ ဆောက်ရွက်ဆဲ စီမံကိန်းများ အသုံးစရိတ်၊ စီမံကိန်း အသစ်များ အသုံးစရိတ်တို့ ပါရှိသည်။
သို့သော် မှတ်ချက်အနေဖြင့် နေပြည်တော် တည်ဆောက်ရေး စီမံကိန်းများသည် ပြည်ထောင်စု အစိုးရ၏ ဘဏ္ဍာရေး စာရင်းတွင် မပါဝင်ဝင်ဟု ဦးကြည်ယုံ၏ ကွန်ပျူတာ ပါဝါပွိုင့်ဖြင့် ရှင်းပြသည့် ရှင်းလင်းချက်တွင် ပါရှိသည်ဟု လွှတ်တော် အမတ်များက ဆိုသည်။
နေပြည်တော် စီမံကိန်း တည်ဆောက်မှုနှင့် ပတ်သက်၍ ဦးကြည်ယုံမှ နှုတ်ဖြင့် ဆက်လက် ရှင်းပြရာတွင် “ပါးစပ်နဲ့က ဘယ်လို ပြောသွားလဲ ဆိုတော့ သူ့ဟာသူ ရပ်တည်တယ်လို့ ပြောသွားတယ်။” ဟု အမျိုးသား ဒီမိုကရေစီ အင်အားစု ပါတီမှ လွှတ်တော်အမတ် ဦးခိုင်မောင်ရည်က မဇ္ဈိမကို ပြောသည်။
စီမံကိန်းနှင့် ပတ်သက်၍ တည်ဆောက်မှု ကုန်ကျစရိတ်၊ မည်သည့် ဝန်ကြီးဌာနမှ ဘဏ္ဍာငွေ ထုတ်ပေးသည် စသည် တို့ကို မေးမြန်းမည့်သူ မရှိဟု သိရသည်။ အကြောင်းမှာ အစိုးရ၏ ဘဏ္ဍာရေးစနစ် လည်ပတ်မှုကို လာရောက် ရှင်းလင်းသူမှာ အစိုးရ အဖွဲ့ဝင် မဟုတ်ခြင်းကြောင့်ဟု လွှတ်တော်အမတ်များက ဆိုသည်။
“မေးမယ့်သူ ရှိပါသေးလား ခင်ဗျာဆိုတော့ ဘယ်သူမှလည်း မရှိဘူး။ ဖြေမယ့်လူကလည်း အငြိမ်းစား၊ မေးလည်း အဖြေရမှာ မဟုတ်ဘူး။” ဟု ဦးခိုင်မောင်ရည်က ဆိုသည်။
၂ဝဝ၅ ခုနှစ် နိုဝင်ဘာလတွင် အစိုးရဟောင်းမှ မန္တလေးတိုင်း အတွင်းရှိ ဇေယျာသီရိမြို့နယ်၊ ပုဗ္ဗသီရိမြို့နယ်၊ ဥတ္တရသီရိမြို့နယ်၊ ဇမ္ဗူသီရိမြို့နယ်၊ ဒက္ခိဏသီရိမြို့နယ် တို့ကို နေပြည်တော် အထူးခရိုင်များ အဖြစ် သတ်မှတ်ကာ မြန်မာ နိုင်ငံ၏ မြို့တော် အဖြစ် ပြောင်းလဲခဲ့ပြီး တည်ဆောက်ရေး လုပ်ငန်းများ လုပ်ကိုင်ခဲ့ခြင်း ဖြစ်သည်။ ၂၀၀၅ ခုနှစ်မှ စတင်ခဲ့သည့် အဆိုပါ တည်ဆောက်ရေး လုပ်ငန်းများသည် ယခုနှစ် ဇူလိုင်လအတွင်းမှ စတင်ကာ ရပ်နား ထားရသည်။
ဦးကြည်ယုံ ရှင်းလင်းတင်ပြသည့် အစိုးရ၏ သာမန်အသုံးစရိတ်တွင် ထုတ်လုပ်မှုအသုံးစရိတ်၊ စီမံခန့်ခွဲမှု အသုံးစရိတ်၊
ရောင်းချ ဖြန့်ဖြူးမှု အသုံးစရိတ်၊ သုတေသနပြုခြင်း အသုံးစရိတ်၊ ပြည်ပတင်ပို့မှု အသုံးစရိတ်၊ ထောက်ပံ့ငွေများ အသုံးစရိတ်တို့ ပါဝင်သည်ဟုလည်း လွှတ်တော် အမတ်များကပြောသည်။
လွှတ်တော်အမတ်များမှ အစိုးရ၏ ဘဏ္ဍာရေး အသုံးစရိတ်များကို လာမည့် လွှတ်တော်များ အတွင်း ဆွေးနွေးနိုင်ရန် ရည်ရွယ်သည့် ဘဏ္ဍာရေးဆိုင်ရာ ဆွေးနွေးပွဲများကို စီးပွားရေး တက္ကသိုလ်များမှ အငြိမ်းစား ပါမောက္ခများက နေပြည်တော် လွှတ်တော် အဆောက်အအုံ၊ သဘင်ခန်းမဆောင်တွင် သောကြာနေ့ အထိ ရှင်းလင်း ဟောပြောမည် ဖြစ်သည်။
အထက်လွှတ်တော်နှင့် အောက်လွှတ်တော် ဆွေးနွေးပွဲများကို အင်္ဂါနေ့မှ သောကြာနေ့အထိ နံနက် ၁ဝ နာရီမှ နေ့လည် ၁၂ နာရီ အထိသာ ကျင်းပမည် ဖြစ်ပြီး မွန်းလွဲ တနာရီမှ ညနေ ငါးနာရီအထိ အဆိုပါ ဘဏ္ဍာရေး ဆိုင်ရာ
ဆွေးနွေးပွဲများသို့ လွှတ်တော် အမတ်များ တက်ရောက်ရမည် ဖြစ်သည်။
Ref: မဇ္ဈိမ
မြန်မာတွင် လယ်ယာနှင့် စွမ်းအင် ရင်းနှီးမြှုတ်နှံရန် အိန္ဒိယသားတို့ စိတ်ဝင်စားဟုဆို
သဲသဲ
အင်္ဂါနေ့၊ အောက်တိုဘာလ ၁၈ ရက် ၂၀၁၁
နယူးဒေလီ (မဇ္ဈိမ) ။ ။ အိန္ဒိယ- မြန်မာ နှစ်နိုင်ငံ ရင်းနှီးမြှုတ်နှံမှုတွင် အိန္ဒိယဘက်မှ စွမ်းအင် ကဏ္ဍနှင့် ပတ်သက် ၍ ရင်းနှီး မြှုတ်နှံရန် စိတ်ဝင်စားမှု ရှိနေကြောင်း သမ္မတ ဦးသိန်းစိန်၏ အိန္ဒိယ ခရီးစဉ်တွင် ပါဝင်ခဲ့သူ ပဲလုပ်ငန်းရှင်များ အသင်းဥက္ကဋ္ဌ ဦးထွန်းလွင်က ပြောဆိုသည်။
သမ္မတ၏ ခရီးစဉ်အတွင်း အစိုးရအဖွဲ့ဝင် ဝန်ကြီးများအပြင် စီးပွားရေး လုပ်ငန်းရှင်များလည်း ပါဝင်ကာ နှစ်နိုင်ငံ ကုန်သွယ်ရေးနှင့် ပတ်သက်၍ အိန္ဒိယ စီးပွားရေး လုပ်ငန်းရှင်များနှင့် အပြန်အလှန် ဆွေးနွေးမှုများ ပြုလုပ်ခဲ့သည်။
အိန္ဒိယ လုပ်ငန်းရှင်များ အနေဖြင့် စိုက်ပျိုးရေး လုပ်ငန်းနှင့် လေကြောင်း လုပ်ငန်းများတွင် ရင်းနှီးမြှုတ်နှံရန် စိတ်ဝင် စားမှုများ ရှိနေပြီး မြန်မာဘက်ကမူ ပြည်တွင်းသို့ လာရောက် ရင်းနှီးမြှုတ်နှံကြရန် အတွက်သာ ဆွေးနွေးခဲ့သည်ဟု ဦးထွန်းလွင်က ဆိုသည်။
အိန္ဒိယနိုင်ငံသည် လက်ရှိတွင် မြန်မာနိုင်ငံ၏ ပဉ္စမမြောက် ကုန်သွယ်ဖက်နိုင်ငံဖြစ်ပြီး အဓိကအားဖြင့် ပဲမျိုးစုံကို တနှစ်လျှင် တန်ချိန် တသန်းကျော် တင်ပို့နေရသည်ဟု ပဲလုပ်ငန်းရှင်များ အသင်း၏ ကိန်းဂဏန်းများအရ သိရသည်။
နှစ်နိုင်ငံ ရင်းနှီးမြှုတ်နှံမှု အားနည်းရခြင်းမှာ လမ်းပန်း ဆက်သွယ်ရေး မကောင်းမွန်ခြင်းကြောင့် ဖြစ်သည့် အပြင် နယ်စပ် ကုန်သွယ်ရေး လမ်းကြောင်းတွင်လည်း လုံခြုံရေး မတည်ငြိမ်ခြင်းကြောင့် ဟု ဦးထွန်းလွင်က ပြောသည်။
သမ္မတ၏ အိန္ဒိယ ခရီးစဉ်အတွင်း နှစ်နိုင်ငံ စီးပွားရေး လုပ်ငန်းရှင်များ ဆွေးနွေးခဲ့မှုများ၊ နှစ်နိုင်ငံ ကုန်သွယ်ရေး အခက်အခဲများ၊ နှစ်နိုင်ငံ ကုန်သွယ်မှု အလားအလာများနှင့် ပတ်သက်၍ ဦးထွန်းလွင်ကို မဇ္ဈိမ သတင်းထောက် သဲသဲက ဆက်သွယ် မေးမြန်း ထားသည်။
သမ္မတ ဦးသိန်းစိန်ရဲ့ ခရီးစဉ်အတွင်းမှာ မြန်မာဘက် လုပ်ငန်းရှင်တွေနဲ့ အိန္ဒိယနဲ့ ဘာတွေများ ဆွေးနွေး ခဲ့လဲ။
“အိန္ဒိယကတော့ ကျနော်တို့ရဲ့ ၇၀ ရာခိုင်နှုန်းကျော် ဝယ်တဲ့နိုင်ငံလည်း ဖြစ်တယ်ဆိုတော့ ပဲမျိုးတွေနဲ့ နည်းပညာ ဆိုင်ရာတွေ၊ စိုက်ပျိုးမှုပိုင်းမှာ ကျွမ်းကျင်တဲ့ သူတွေနဲ့ ပူးပေါင်းပြီး ကျနော်တို့ဆီက လူတွေကို ပညာသင်ပေးဖို့။ အဲဒီ အချက်တွေ ဆွေးနွေးခဲ့တာပေါ့ ပဲနဲ့ ပတ်သတ်ပြီး ဒီလောက်ပါပဲ။”
နှစ်ဘက်ဆွေးနွေးကြတုန်းက ဘယ်သူတွေပါကြလဲ။ အိန္ဒိယကရော ဘယ်ကုမ္မဏီတွေ လာကြလဲ။
“ကဏ္ဍပေါင်းစုံက အကုန်ပါပါတယ်။ ကျနော်တို့ဘက်က ပါလာတဲ့ ဥက္ကဋ္ဌကြီး ဦးဝင်းအောင်ဆိုလည်း အားလုံးကို ကိုယ်စားပြု လိုက်လာတာပေါ့။ နောက်ပြီး ဆန်စပါးအသင်းက ဥက္ကဋ္ဌ ဦးချစ်ခိုင်၊ ပဲအသင်းက ကျနော်ပေါ့၊ နောက်ပြီး ဆောက်လုပ်ရေး လုပ်ငန်းရှင်ထဲကဆိုရင် ရွှေသံလွင်တို့ အောင်ချမ်းသာ၊ ငါးလုပ်ငန်းတို့က ပါတယ်ပေါ့။”
“ဟိုဘက်က တက်တဲ့သူတွေကလည်း လုပ်ငန်းအစုံပါပဲ။ ပို့ဆောင်ရေးတို့ ဆောက်လုပ်ရေးတို့၊ ပဲနဲ့ ဆန်တို့ အဖွဲ့တွေ လာကြတယ်။ ခန့်မှန်းခြေ လေးငါးဆယ်လောက် ရှိမယ်ထင်တယ်။ စိုက်ပျိုးရေးရော စွမ်းအင် ဘက်ရော အဘက်ဘက် က အပါအဝင်ပေါ့ ကဏ္ဍပေါင်းစုံတော့ ဖြစ်မှာပါ။ ဒီဘက်ကလည်း ဖိတ်ခေါ်ခဲ့တယ်။ သူတို့လည်း စိတ်ဝင်တစား ရှိတော့ရှေ့ လျှောက်တိုးတက်ဖို့ပဲ ရှိပါတယ်။”
အိန္ဒိယကရော မြန်မာပြည်မှာ စီးပွားရေးလုပ်ဖို့ ဘာလုပ်ငန်းတွေမှာ စိတ်ဝင်တစား မေးကြလဲ။
“သူတို့ ဒီမှာဖြစ်နိုင်ရင် မြေဝယ်ပြီး လာပြီး စိုက်ချင်တယ် ကန်ထရိုက် Farming ပေါ့။ အဲဒါမျိုးတွေကို စိတ်ဝင်တစား မေးပြီး ဆွေးနွေး ဖြစ်ကြပါတယ်။”
မြန်မာကရော အိန္ဒိယဘက်နေ ဘယ်လို စီးပွားရေး လုပ်ငန်းတွေ လုပ်ကိုင်ဖို့ ရင်းနှီးမြှုတ်နှံဖို့ ဘာလုပ်ငန်းတွေ စိတ်ဝင်စားလဲ။
“အဓိက ကတော့ အိန္ဒိယမှာ သွားမြှုတ်နှံဖို့ထက် စာရင် ကျနော်တို့ဆီလာပြီး မြှုတ်နှံဖို့ကိုပဲ ဆွေးနွေး ခဲ့ကြတာပါ။ ကျနော်တို့က အိန္ဒိယမှာ မြှုတ်နှံဖို့ကိုတော့ မဆွေးနွေးခဲ့ကြပါဘူး။ ကျနော်တို့ဆီမှာ ရင်းနှီး မြှုတ်နှံဖို့ပဲ ဖိတ်ခေါ်ခဲ့တာပေါ့။”
အိန္ဒိယဘက်က ဘယ်ကဏ္ဍတွေမှာ ပိုရင်းနှီးမြှုတ်နှံဖို့ စိတ်ဝင်စားတာတွေ့ရလဲ။
“ကျနော်ထင်တယ် စွမ်းအင်ဘက်မှာ သူတို့ ပိုစိတ်ဝင်စားပါတယ်။”
စွမ်းအင် ကဏ္ဍမှာရော ရင်းနှီးမြှုတ်နှံဖို့ ကုမ္မဏီတွေက ကမ်းလှမ်းပြောဆိုတာ ရှိလား။
“အဲဒါတွေကတော့ နောက်ပိုင်းမှာ ကျနော်တို့ ဘက်က ဝန်ကြီးဌာနတွေက တာဝန်ရှိတဲ့ ဝန်ကြီးတွေလည်း အားလုံး ဖိတ်ခေါ်ခဲ့ပါတယ်။ စီးပွားရေး အခွင့်အလမ်းတွေလည်း ဖွင့်ထား ပြီးသွားပြီ။ ဖိတ်ခေါ်ထားခဲ့တာ ဆိုတော့ သူတို့ လာကြမှာပါ။”
တခြား ဘယ်လို စီးပွားရေး လုပ်ငန်းတွေမှာ လုပ်ကိုင်ဖို့ အိန္ဒိယ ကုမ္ဗဏီတွေဘက်က စိတ်ဝင်တစား
ဆွေးနွေးကြလဲ။
“သူတို့ဘက်တော့ ပစ္စည်းအများကြီး ရှိပေမယ့် တခြားနိုင်ငံတွေနဲ့ ယှဉ်ကြည့်ရင် မကိုက်ကြဘူး။ သူတို့မှာ သံတို့ တခြား စက်ယန္တရားတွေလည်း ရှိကြတာပဲလေ။ သယ်ယူပို့ဆောင်ရေး လမ်းကြောင်းရော၊ Quality (အရည်အသွေး) အရရော ကျနော်တို့စီက တချို့ပစ္စည်းတွေက ထိုင်းတို့ တရုတ်တို့ တခြားနိုင်ငံက ဝယ်ကြတာပေါ့။ ကုန်သွယ်းရေး တိုးမြှင့် ဖို့ ဆွေးနွေးကြပေမယ့် ဈေးနှုန်း ကိုက်ညီတဲ့ ပစ္စည်းလောက်ပဲ သွင်းကြတာပေါ့။”
သယ်ပို့ဆောင်ရေးကိစ္စတွေမှာ အိန္ဒိယဘက်က ဘယ်လိုမျိုးတွေလုပ်ဖို့ မေးမြန်တာရှိလဲ။
“မေးတဲ့အထဲမှာ လေကြောင်းနဲ့ ပတ်သတ်တာ မေးပါတယ်။ လေကြောင်းလိုင်းတွေ ထပ်ချဲ့ဖို့ပေါ့။ ကျနော်တို့က ဆွေးနွေးတာ ကတော့ အဓိက ဆွေးနွေးခဲ့တာတော့ လေကြောင်းလိုင်း ကလည်း တခုပေါ့။ နောက်တခုက သင်္ဘောနဲ့ သယ်တဲ့ ကိစ္စ တိုးချဲ့သင့်တယ် ဆိုတာတွေလည်း ကျနော်တို့ ဥက္ကဋ္ဌကြီးက ပြန်ဆွေး နွေးခဲ့တာပေါ့။”
မြန်မာဘက်ကရော အိန္ဒိယမှာ စီးပွားရေး လုပ်မယ်ဆိုရင် ဘယ်လို စီးပွားရေး လုပ်ငန်းမျိုးတွေ လုပ်နိုင်မယ် လို့ တွေ့ရလဲ။
“နိုင်ငံအလိုက် ပြောမယ် ဆိုရင် Export ဘက်မှာတော့ ပဲက အများဆုံး ဖြစ်တယ်။ အိန္ဒိယကနေ မြန်မာပြည် ပြန်သွင်းတာ ကတော့ နံပါတ်တစ်ကတော့ ဆေးပေါ့။ ကျန်တာတော့ လျှပ်စစ် ပစ္စည်းတွေနဲ့ သံပြားတို့၊ ဆောက်လုပ်ရေး ပစ္စည်းတွေပေါ့၊ တခြားနိုင်ငံကနေလည်း သွင်းတာရှိတော့ အဲဒီအထဲကနေ စီးပွားရေး လုပ်ငန်းရှင်တွေက အဆင်ပြေ တဲ့ ဈေးနဲ့ ကိုက်ညီတာရှိရင် သွင်းကြတာပေါ့။”
နှစ်ဘက် ကုန်သွယ်ကြတဲ့ အထဲမှာ ဘယ်စီးပွားလုပ်ငန်းက အကောင်းဆုံးလဲ။
“အဓိကတော့ ပဲ တင်ပို့တာကတော့ အကောင်းဆုံး ဖြစ်နေတာပေါ့။ ပဲကတော့ မြန်မာနိုင်ငံက ဒုတိယသီးနှံ အနေနဲ့ အများဆုံး စိုက်ကြတယ်။ အိန္ဒိယကလည်း တနှစ်ကို တန် တသန်းကျော် ဝယ်နေတာဆိုတော့ ပဲကတော့ အဓိကပေါ့။ မတ်ပဲ၊ ပဲတီစိမ်း၊ ပဲစင်းငုံတို့ အဓိကပေါ့။”
အိမ်နီးချင်း နိုင်ငံတွေထဲမှာ ယှဉ်ကြည့်ရင် အိန္ဒိယက Import, Export လုပ်တဲ့နေရာမှာ အမျိုးအရေ အတွက် နည်းသလားလို့။
“နည်းတယ် ဆိုတာက ထိုင်းတို့ တရုတ်တို့နဲ့ နီးစပ်တာကိုး။ သယ်ယူပို့ဆောင်ရေး လမ်းကြောင်းမှာ အဲဒီဘက်တွေက သာတာပေါ့။ အိန္ဒိယကျတော့ တခါတလေကျတော့ ဝေးတာတွေရှိတော့ သယ်ယူ ပို့ဆောင်ရေးမှာ အားနည်းချက် ရှိတာပေါ့။ နယ်စပ်ဆိုလည်း နယ်စပ်မှာလည်း ဟိုဘက်က အာသံ သူပုန်တွေရှိတော့ မငြိမ်သက်တော့ နယ်စပ် ဆို လည်း ကုန်သွယ်ရေးကို ထိထိမိမိလုပ်ဖို့က အဟန့်အတားတခု ရှိမယ်လို့ တွေ့ရတယ်လေ။”
အိန္ဒိယနဲ့ ရင်းနှီးမြှုတ်နှံမှုတွေ တိုးလုပ်ဖို့ ဘာတွေ လိုအပ်မယ်ထင်လဲ။
“တခါတလေကျရင်တော့ ငွေရေးကြေးရေး ပေးချေမှု အပိုင်းတွေပေါ့။ ဘဏ်ပိုင်းဆိုင်ရာမှာ တိုက်ရိုက် လုပ်နေတဲ့ အခါ အခက်အခဲ ရှိနေတာပေါ့။ နိုင်ငံတကာ sanction ရှိနေတော့လေ။ တချို့အပိုင်းတွေမှာ အခက်အခဲ ရှိတာပေါ့ အဲလောက်ပါပဲ။”
ငွေရေးကြေးရေး ပေးချေတဲ့အခါ ဘယ်လို အခက်အခဲ ဆိုတာကို နမူနာနဲ့ ရှင်းပြပေးပါလား။
“ဥပမာ အမေရိကန်ဒေါ်လာနဲ့ LC ဖွင့်ဝယ်တာတို့ CC လုပ်တဲ့အခါ အိန္ဒိယဘဏ်တွေနဲ့ တိုက်ရိုက် ချိတ်ဆက်လို့ မရ ဘူးလေ။ အဲဒီအခက်အခဲလေးရှိတာပေါ့။ တခြားနိုင်ငံတွေကနေ ပတ်သွားရတော့ မလိုအပ်ဘဲ စရိတ်တွေမြင့်တာ၊ ငွေပေးချေမှုမှာ Sanction ရှိတဲ့အတွက် အခက်အခဲလေးတွေ ရှိတာပေါ့။ ကျန်တာတော့ မရှိပါဘူး။”
Ref: မဇ္ဈိမ
ထိုင်းရေဘေးကြုံ မြန်မာများ အကူညီ လိုအပ်နေ
မဇ္ဈိမသတင်းဌာန
အင်္ဂါနေ့၊ အောက်တိုဘာလ ၁၈ ရက် ၂၀၁၁
ချင်းမိုင် (မဇ္ဈိမ) ။ ။ ထိုင်းနိုင်ငံ၏ ရေကြီးမှု အန္တရာယ်ကို ရင်ဆိုင်နေရသည့် အထဲတွင် ပါဝင်နေသော မြန်မာ ရွှေ့ပြောင်း အလုပ်သမားများ၊ စားဝတ်နေရေးနှင့် သွားလာရေး အဆက်အသွယ် ပြတ်တောက်နေ သဖြင့် အကူအညီ များ လိုအပ်နေကြောင်း စုံစမ်း သိရှိရသည်။
ရေကြီးမှုကြောင့် အောက်တိုဘာလ ၆ ရက်နေ့က စက်ရုံ လည်ပတ်မှု ရပ်ဆိုင်းလိုက်သော ထိုင်းနိုင်ငံ တောင်ပိုင်း အယုဒ္ဓယမြို့ရှိ Beyonics technology - CD စက်ရုံ ဝန်ထမ်း မြန်မာ အလုပ်သမား ၁၅၀ ကျော်မှာ အလုပ်လက်မဲ့ ဖြစ်ကာ၊ ရေမြင့်တက်မှုကြောင့် အထပ်မြင့် တိုက်ခန်းတွင် သီတင်း နှစ်ပတ်ခန့် ခိုလှုံနေရပြီး စားဝတ်နေရေး အကူအညီများ လိုအပ်နေကြောင်း အလုပ် သမားများက ပြောသည်။
“ခြောက်ရက်နေ့ ကတည်းက စက်ရုံ ပိတ်ထားတာ။ ခု ငှားနေတဲ့ တိုက်ခန်းမှာနေတယ်။ အောက်လည်း ဆင်းလို့မရ ဘူး။ ရေက လေး-ငါး ပေ လောက် ရှိတယ်။ အောက်ဆင်း လို့လည်း မရ။ ဘယ်မှသွားလို့ မရဘူး။ ကူညီပါဦးဗျာ။”ဟု စက်ရုံ အလုပ်သမား ကိုတိုးကြီး က မဇ္ဈိမကို တယ်လီဖုန်းမှ တဆင့် ပြောသည်။
နိုင်ငံအတွင်းရှိ ခရိုင်ပေါင်း ၇၀ ကျော်အနက်မှ နိုင်ငံ၏ အရှေ့မြောက်ပိုင်း၊ မြောက်ပိုင်းနှင့် အလယ်ပိုင်း ဒေသများရှိ ခရိုင် ၅၀ ကျော် ရေလွမ်းမိုးမှု ကြုံတွေ့ နေရကြောင်း ထိုင်း သတင်းဌာနများက ထုတ်ပြန် ထားသည်။ အဆိုးဆုံး ရင်ဆိုင် နေရသည့် ပသုန်ဌာနီ၊ အယုဒ္ဓယနှင့် နော့ခွန်စဝမ် တို့ရှိ စက်ရုံ၊ ဆောက်လုပ်ရေး၊ စားသောက်ဆိုင်၊ ဈေးများနှင့် ရာဘာခြံ လုပ်ငန်းများကို ရေကြီးမှုကြောင့် ရပ်ဆိုင်း ထားရကြောင်း သိရသည်။
အလုပ်သမားဦးရေ ၃၀၀ ကျော်ဖြင့် လည်ပတ်နေသည့် Beyonics technology -CD စက်ရုံတွင် မြန်မာ အလုပ်သမား ၁၅၀ ကျော် အပါအဝင် ထိုင်းနှင့် ကမ္ဘောဒီယား အလုပ် သမားများမှာလည်း အလုပ်လက်မဲ့ ဖြစ်သွားကြသည်။
တရက်လျှင် လုပ်အားခ ဘတ် ၂၀၀ ခန့် ရှိနေသည့် စက်ရုံ အလုပ်သမားများက ပိုင်ရှင်ထံ အလုပ်ပျက်ခများ တောင်းဆို ထားကြသော်လည်း အကြောင်းပြန်ကြား လာခြင်း မရှိသေးဟု အလုပ်သမားများ ထံမှသိရသည်။
ရေလွှမ်းမိုးမှုကြောင့် သွားလာရေး အဆက်အသွယ် ပြတ်တောက်နေသည့် Beyonics technology - CD စက်ရုံ ဝန်ထမ်း မြန်မာ အလုပ်သမားများကို ထိုင်းနိုင်ငံ၏ Channel 7 ရုပ်သံ သတင်းဌာနက ၃ ရက်စာ အဖြစ် ဆန်၊ ဆီ၊ ဆား၊ ငါးသေတ္တာ၊ ခေါက်ဆွဲခြောက်၊ ဆေးနှင့် အဝတ်အထည်များ လာရောက် ပေးသွားခဲ့ကြောင်း အလုပ်သမားများ က ပြောသည်။
အယုဒ္ဓယ မြို့မှ မြန်မာ အလုပ်သမားများကို ကူညီရန်အတွက် ဘန်ကောက် မြို့ ဖာစီကျလိန် မြို့နယ်ရှိ ဝပ်တလုံး ဘုန်းကြီးကျောင်းမှ စာသင် မြန်မာ သံဃာတော်များ သယ်ဆောင်လာသည့် ဆန်၊ ခေါက်ဆွဲခြောက်၊ အဝတ်အထည်နှင့် ဆေးဝါးများ တင်ဆောင်လာသည့် ရိက္ခာတင် ကားမှာလည်း ရေတက်လာသဖြင့် လမ်းတဝက်၌ပင် ရပ်တန့်နေကြောင်း ဦးဆောင် ဆရာတော်တပါး ဖြစ်သည့် ဦးတေဇ က မိန့်သည်။
“ဦးဇင်းတို့ ပစ္စည်းတွေ သယ်လာတဲ့ကားက ရေတက်လာတယ် ဆိုပြီး ဆက်မလိုက်တော့ဘူး ပြောနေလို့။ ဦးဇင်းတို့ လည်း လမ်းခုလတ်မှာပဲ။ ကားထပ်ငှားဖို့ ပြင်နေတယ်။ ရေက တော်တော်လေး ကြီးနေတယ်လေ။ ဟိုမှာကလည်း မြန်မာပြည်သားတွေ တော်တော်လေး ဒုက္ခကြုံနေတော့ ဦးဇင်းတို့ အနေနဲ့ ရောက်အောင် သွားပို့နိုင်ဖို့ နည်းလမ်း ရှာနေတယ်” ဟု ဦးဇင်း တေဇ က မဇ္ဈိမကို မိန့်သည်။
အလားတူ ချုံဘူရီမြို့တွင်လည်း ၁၈ ရက်နေ့မှစ၍ ရေတက်နိုင်ဖွယ် ရှိကြောင်း အာဏာပိုင်များက ကြေညာ ထားသဖြင့် မြို့ပေါ်ရှိ ဂုံနီအိတ် စက်ရုံတွင် လုပ်ကိုင်နေကြသော မြန်မာ အလုပ်သမား ၃၀၀ ကျော်မှာလည်း ရေဘေး ကြုံတွေ့မည် ကို စိုးရိမ် နေကြကြောင်း ယင်းစက်ရုံ အလုပ်သမားများက ပြောသည်။
“ကျမတို့တွေကတော့ ကြောက်နေတာပေါ့။ ရေတက်ရင် ဘယ်မှာ သွားနေရမှန်း မသိဘူးလေ။ သူဌေးကတော့ အလုပ် ဆက်လုပ်ဖို့ ပြောတယ်။ အလုပ်လုပ်လို့ မရအောင် ရေမြုတ်မှ စက်ရုံရပ်မယ်တဲ့။ ဒီကြားထဲမှာ အလုပ် မဆင်းတဲ့ လူကို အလုပ်အာမခံ မပေးတော့ဘူး ပြောတယ်။ ခုတော့ စက်ရုံထဲ ရေမဝင်အောင် အကာတွေတော့ လုပ်ထားတယ်”ဟု စက်ရုံ ဝန်ထမ်း မပုတု က မဇ္ဈိမကို ပြောသည်။
ဇူလိုင်လ၂၅ ရက်နေ့က ထိုင်းနိုင်ငံအတွင်း တိုက်ခတ်ခဲ့သည့် အပူပိုင်း မုန်တိုင်း “နော့ခ်တန်း” ဝင်ရောက် တိုက်ခတ် ခဲ့ပြီးနောက် စံချိန်တင် မိုးရွာသွန်းမှုများ ဖြစ်ကာ ထိုင်းနိုင်ငံ၏ နေရာ တဝက်ကျော် ရေကြီး ရေလျှံမှုဖြင့် ရင်ဆိုင်ခဲ့ရခြင်း ဖြစ်သည်။
ယင်းရေကြီးမှုကြောင့် အောက်တိုဘာ လလယ်ပိုင်းထိ လူဦးရေ ၃၀၀ ကျော်သေဆုံးကာ ခရိုင်ပေါင်း ၆၀ ရှိ လူဦးရေ ၈၂ သိန်း ရေဘေး ဒုက္ခ ကြုံတွေ့ခဲ့ရသလို စီးပွားရေး အရ အမေရိကန်ဒေါ်လာ ၂ ဘီလီယံခန့် ဆုံးရှုံးရကြောင်း ထိုင်းအစိုးရက ထုတ်ပြန် ထားသည်။
Ref: မဇ္ဈိမ
“ကျင့်တဲ့တရားပဲ အရေးကြီးတယ်” ဟု မင်းကိုနိုင် မွေးနေ့ အမှာစကားပြော
ဇွဲခန့်
အင်္ဂါနေ့၊ အောက်တိုဘာလ ၁၈ ရက် ၂၀၁၁
နယူးဒေလီ (မဇ္စျိမ) ။ ။ “လူဆိုတာ ရောက်တဲ့နေရာ အရေးမကြီးဘူး၊ ကျင့်တဲ့ တရားပဲ အရေးကြီးတယ်” ဟူ၍ ကျိုင်းတုံ ထောင်တွင်း ထောင်ဒဏ် ၆၅ နှစ် ကျခံနေရသည့် ၈၈ ကျောင်းသားခေါင်းဆောင် မင်းကိုနိုင်က မွေးနေ့ အမှာစကား အဖြစ် ပြောဆို လိုက်သည်။
အင်္ဂါနေ့တွင် ကျရောက်သည့် အသက် ၄၉ နှစ်ပြည့် မွေးနေ့ အထိမ်းအမှတ်အဖြစ် အင်းစိန်မြို့နယ် သမိုင်း မြို့မ ပရိယတ္တိ စာသင်တိုက်တွင် ကျင်းပခဲ့ရာ ယင်းကဲ့သို့ ထောင်တွင်းမှ အမှာစကား ပေးပို့ ပြောဆိုခဲ့ခြင်း ဖြစ်သည်။
“သူက အမှတ်တရနေနဲ့ ရေးပေး လိုက်တာပေါ့နော်။ ဘယ်နေရာ ရောက်ရောက် ရောက်တဲ့နေရာက အရေး မကြီးဘူး ပေါ့နော်။ ကိုယ့်ရဲ့ ကျင့်ကြံမှု၊ ကိုယ့်ရဲ့ နေထိုင်မှု ဒါကို ရည်ညွန်း ချင်တယ်လို့ ကျမ ထင်တာပေါ့နော်” ဟု ညီမဖြစ်သူ မမီမီလွင်က မဇ္ဈိမကို ပြောသည်။
ကိုမင်းကိုနိုင်မှာ ၂ဝဝ၇ ခုနှစ် လောင်စာဆီဈေးနှုန်း ကျဆင်းရေး လှုပ်ရှားမှုတွင် ပါဝင်ခဲ့မှုဖြင့် ယင်းနှစ် သြဂုတ်လ ၂၁ ရက်နေ့က ဖမ်းဆီး ခံရကာ ထောင်ကျခံနေရခြင်း ဖြစ်ပြီး မကြာသေးခင်က သမ္မတ ဦးသိန်းစိန်၏ လွတ်ငြိမ်း ချမ်းသာခွင့် တွင်လည်း လစ်လျူရှု ခံထားရသူ တဦး ဖြစ်သည်။
နံနက် ၈ နာရီမှစတင်ခဲ့သည့် မွေးနေ့ပွဲသို့ လူထုခေါင်းဆောင် ဒေါ်အောင်ဆန်းစုကြည် အပါအဝင် အမျိုးသား ဒီမိုကရေစီ အဖွဲ့ချုပ် NLD မှ ဒုဥက္ကဋ္ဌ ဦးတင်ဦး၊ ဦးဝင်းတင် အပါအဝင် မကြာမီက ပြန်လည် လွတ်မြောက်လာသည့် လူရွှင်တော် ဇာဂနာနှင့် အလုပ်သမား အခွင့်အရေး လှုပ်ရှားသူ မစုစုနွေးတို့လည်း တက်ရောက်ခဲ့သည်။ ပြင်သစ်၊ ဗြိတိန်၊ အမေရိကန် သံရုံးမှ သံအမတ်များလည်း တက်ရောက်ခဲ့ပြီး တိုင်းရင်းသား ခေါင်းဆောင်များ၊ ရွေးကောက်ပွဲဝင် ပါတီများ၊ မျိုးဆက်သစ် လူငယ်များ စုစုပေါင်း လူဦးရေ ၂၀၀၀ ခန့် တက်ရောက်ခဲ့သည်။
“အမြဲတမ်း ဒီလိုမျိုး မွေးနေ့ရှင် မပါဘဲနဲ့ ကျင်းပနေရတဲ့ မွေးနေ့ပေါင်းများစွာ အတွက်တော့ ကျမတို့စိတ်ထဲမှာ ခံစားမှု ကတော့ ပြောမပြတတ်အောင် ဖြစ်နေရတာပေါ့ရှင်။ လာမယ့်နှစ်မှာတော့ သူနဲ့အတူတူ ကျင်းပ ချင်တာပေါ့နော်။ ဒါပေမဲ့ နှစ်တိုင်း နှစ်တိုင်းတော့ မျှော်ကြတာပေါ့။ မရှိတော့လဲ မရှိသလို ကျင်းပနေရတာပါပဲရှင်” ဟု မမီမီလွင်က ဆိုသည်။
“ကိုယ်တကိုယ်တည်း အတွက် လုပ်တဲ့ပွဲ မဖြစ်စေချင်ဘူး၊ အားလုံးအတွက် အမှတ်တရ ဖြစ်စေချင်တယ်” ဟုလည်း ကိုမင်းကိုနိုင်က မွေးနေ့စကား လက်ဆောင် ပါးလိုက်သေးကြောင်း သိရသည်။
ကိုမင်းကိုနိုင်မှာ ၁၉၈၈ လူထု အရေးတော်ပုံတွင် ဗမာနိုင်ငံလုံးဆိုင်ရာ ကျောင်းသားသမဂ္ဂ - ဗကသ ဥက္ကဋ္ဌ အဖြစ် ရွေးချယ် ခံရကာ ဒီမိုကရေစီ လှုပ်ရှားမှုကြောင့် ၁၉၈၉ ခုနှစ် မတ်လအတွင်း ဖမ်းဆီးခံရကာ ၂၀၀၄ ခုနှစ်တွင်ပြန် လည် လွတ်မြောက် လာခဲ့သည်။
ယင်းနောက် ၂၀၀၆ ခုနှစ် စက်တင်ဘာလတွင် ထပ်မံ ထိန်းသိမ်းခံရကာ ၂ဝဝ၇ ခုနှစ် ဇန်နဝါရီတွင် ပြန်လည် လွတ်မြောက် လာခဲ့ပြီး လောင်စာဆီဈေးနှုန်း ကျဆင်းရေး လှုပ်ရှားမှုကြောင့် ထပ်မံ အဖမ်း ခံခဲ့ရခြင်း ဖြစ်သည်။
အကျဉ်းကျခံ ကျောင်းသားခေါင်းဆောင်၏ မွေးနေ့ အထိမ်းအမှတ်အဖြစ် မိုးပျံပူပေါင်းနှင့် ချိုးငှက်များ လွှတ်ကာ အကျဉ်းသား အားလုံး လွတ်မြောက်လာရေး အတွက် ဆုတောင်းခဲ့ပြီး လူထုခေါင်းဆောင် ဒေါ်အောင်ဆန်းစုကြည်၊ စွယ်စုံ အနုပညာရှင် ကိုဇာဂနာနှင့် ၈၈ မျိုးဆက် ကျောင်းသူ မဖြိုးဖြိုးအောင်တို့က အမှတ်တရ စကားများ ပြောကြား ခဲ့သည်။
ဒေါ်အောင်ဆန်းစုကြည်က နိုင်ငံရေး အကျဉ်းသား အားလုံး လွတ်မြောက်ရေးအတွက် ဆန္ဒပြုကြောင်းနှင့် “အဂတိ လေးပါးကနေ ကင်းလွတ်ပြီးတော့မှ လုပ်ဆောင်ကြမယ် ဆိုရင် အကောင်းဆုံး ဖြစ်မယ်”ဟု ပြောဆိုခဲ့ကြောင်း မွေးနေ့ပွဲ ဖြစ်မြောက်ရေး တာဝန်ခံ ၈၈ မျိုးဆက် ကျောင်းသား ကိုမြတ်သူက ပြောသည်။
ယင်းအပြင် ယုံကြည်ချက်ကြောင့် အကျဉ်းကျခံနေရသူများ၏ မိသားစုများက မကြာခင်က လွတ်မြောက်လာပြီး မွေးနေ့ပွဲ တက်ရောက်လာသူ နိုင်ငံရေး အကျဉ်းသား ၁ဝဝ ကျော်ကိုလည်း တယောက်လျှင် ၅,ဝဝဝ နှုန်း ဖြင့် ကူညီ ပေးခဲ့သည်။ ပွဲတွင် မွေးနေ့ဂုဏ်ပြု တေးသီချင်း သီဆိုခြင်းနှင့် ကဗျာရွတ် ပြိုင်ပွဲများလည်း ထည့်သွင်း ကျင်းပခဲ့သည်။
“အကျဉ်းထောင်တွေကို စာကြည့်တိုက် သဘောမျိုး လုပ်ဖို့ အတွက်ပေါ့နော်။ စာအုပ်တိုက် ၄၂ တိုက်က နေပြီးတော့မှ လှူဒါန်းထားတဲ့ စာအုပ်တွေကို ထောင် ၄၂ ထောင်ကို ခွဲပြီးတော့မှ လှူဒါန်းပေးတဲ့ အစီအစဉ်လဲ ပါတယ်” ဟု ကိုမြတ်သူက ပြောသည်။ ယင်းစာအုပ်များမှာ တန်ဖိုးအားဖြင့် ၂၇ သိန်း ကျော်ဖိုး ရှိသည်။
မွေးနေ့ပွဲတွင် ကိုမင်းကိုနိုင် ပုံတူ ပန်းချီကား ၂၀ ကျော်ကိုလည်း ပြသခဲ့ပြီး ပွဲပြီးချိန်တွင် ပွဲတက်ရောက်သူများ ယူဆောင် သွားမှုကြောင့် သုံးချပ်သာ ပြန်ရ လိုက်သည်ဟု သိရသည်။
“အပြန်မှာ အဲဒီပန်ချီကား သုံးချပ်ပဲ ပြန်ရတော့တယ်။ ယူသွားကြတဲ့ သူတွေက ကိုမင်းကိုနိုင်ကို ချစ်လို့ပါ ဆိုပြီးတော့ တောင်းယူ သွားကြတာ။ ကျနော့်ကိုတော့ မဟုတ်ဘူး။ နီးစပ်ရာ တောင်းယူ သွားကြတာပေါ့။ ကျနော် အတော်နှမြော တယ်ဗျာ” ဟု ပန်းချီဆွဲထားသူ ကိုမျိုးရန်နောင်သိန်းက ပြန်ပြောပြသည်။
၂ဝဝ၇ ခုနှစ်တွင် ပြန်လည် ဖွဲ့စည်းခဲ့သည့် ဗကသများ အဖွဲ့ချုပ်မှလည်း မွေးနေ့ပွဲသို့ မွေးနေ့ သဝဏ်လွှာ ပေးပို့ခဲ့ကာ “ယနေ့အချိန်ထိ ရှင်သန် လှုပ်ရှားနေသော ဗကသများ အဖွဲ့ချုပ်၏ သမိုင်းတခေတ်ကို ပြန်လည် ဖွင့်လှစ်ပေးခဲ့သည့် ကိုမင်းကိုနိုင်အား မိမိတို့ ကျောင်းသူ၊ ကျောင်းသားများက လေးလေးနက်နက် ဂုဏ်ပြု ဦးညွတ်ပါသည်” ဟု သဝဏ်လွှာတွင် ပါရှိသည်။
အလားတူ မွေးနေ့ အထိမ်းအမှတ်ပွဲများကို ရန်ကုန်တွင် သာမက ကချင်နှင့် ကရင်ပြည်နယ်၊ စစ်ကိုင်း၊ မန္တလေးနှင့် မကွေးတိုင်း ချောက်နှင့် ရေနံချောင်းမြို့နယ် တို့တွင်လည်း NLD ကွန်ယက် အဖွဲ့ဝင်များက ပြုလုပ်ခဲ့ကြသည်ဟု သိရသည်။
“ကျနော်တို့ ကြားတဲ့ သတင်းအရ အကျဉ်းကျခံနေရတဲ့ နိုင်ငံရေး အကျဉ်းသား လွတ်မြောက်မှုက သုံးကြိမ် ရှိမယ်ပေါ့။ ပထမဦးဆုံး အကြိမ် လွတ်မြောက်မှုမှာ ကိုမင်းကိုနိုင် ပါမလာဘူး၊ ကိုဇာဂနာတို့ ပါလာတယ်။ ကိုမင်းကိုနိုင် တို့ကိုတော့ နောက်ဆုံး အကြိမ်မှာ ပါလာမယ်လို့ ကျနော် ကြားထားတာ ရှိတယ်။ ဆိုတော့ လွတ်စေချင်တာပေါ့ဗျာ” ဟု ၈၈ မျိုးဆက် ကျောင်းသားတဦး ဖြစ်သူ ကိုမျိုးရန်နောင်သိန်းက ဆိုသည်။
အိန္ဒိယနိုင်ငံ နယူးဒေလီရောက် ဒီမိုကရေစီ အင်အားစုများ ကလည်း ကိုမင်းကိုနိုင် မွေးနေ့ အထိမ်းအမှတ် အဖြစ် အောက်တိုဘာလ ၁၈ ရက်နေ့က ပြုလုပ်ခဲ့ကြသည်။ မြန်မာနိုင်ငံ အမျိုးသမီးရေးရာနှင့် အခွင့်အရေးများ ဆိုင်ရာ အဖွဲ့ (WRWAB) ရုံး၌ ပြုလုပ်ရာတွင် သံဃာတော်များအား ဆွမ်းကပ်ခြင်းနှင့် နိုင်ငံရေး အကျဉ်းသား အားလုံး လွတ်မြောက်ရေး အတွက် ဘာသာစုံ ဝတ်ပြု ဆုတောင်းပွဲ ပြုလုပ်ခဲ့ကြသည်။
Ref: မဇ္ဈိမ
ကိုမင်းကိုနိုင်ကို မွေးနေ့တွင် ပြန်လွှတ်ပေးရန် တောင်းဆို
ရန်ပိုင်
October 18, 2011
၈၈ မျိုးဆက် ကျောင်းသား ခေါင်းဆောင် ကိုမင်းကိုနိုင်၏ ၄၉ နှစ်မြောက်မွေးနေ့ လက်ဆောင်အဖြစ် ယနေ့ ပြန်လွှတ်ပေးရန် နိုင်ငံတော် သမ္မတ ဦးသိန်းစိန်အား လူရွှင်တော် ကိုဇာဂနာက တောင်းဆို လိုက်သည်။
မရမ်းကုန်းမြို့နယ် သမိုင်းဘူတာရုံလမ်း မြို့မပရိယတ္တိ စာသင်တိုက်တွင် ယနေ့နံနက် ကျင်းပပြုလုပ်သည့် မွေးနေ့ပွဲကို မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်လည်း တက်ရောက်ခဲ့ပြီး လူရွှင်တော် ကိုဇာဂနာက ကိုမင်းကိုနိုင် စပ်ဆို ရေးသားသည့် ကဗျာတပုဒ်ကို ရွတ်ဆိုကာ သီချင်းသံပြိုင်ပိုဒ်ကို သီဆိုခဲ့ကြောင်း တက်ရောက်ခဲ့သည့် NLD အဖွဲ့ဝင် တဦးကပြောသည်။
“သမ္မတကြီး ခင်ဗျား ကိုမင်းကိုနိုင်ကို မွေးနေ့လက်ဆောင် ပေးတဲ့အနေနဲ့ ဒီနေ့ပဲ လွှတ်ပေးလိုက်ပါ ခင်ဗျားလို့ တောင်းလိုက်တယ်” ဟု ၎င်းကဆိုသည်။
အဆိုပါမွေးနေ့ကို အမျိုးသားဒီမိုကရေစီ အဖွဲ့ချုပ် (NLD) ခေါင်းဆောင်များဖြစ်သည့် သူရဦးတင်ဦး၊ ဦးဝင်းတင်၊ ၀ါရင့် နိုင်ငံရေး သမားကြီးများ၊ ပြည်သူ့လွှတ်တော် ကိုယ်စားပြု ကော်မတီ (CRPP) အဖွဲ့ဝင်များ၊ ဒီမိုကရက်တစ်ပါတီ (မြန်မာ) မှ ဒေါ်ချိုချိုကျော်ငြိမ်း၊ ဒေါ်နေရီဗဆွေတို့ အပြင် အနုပညာရှင်များ ဖြစ်သည့် ကိုဇာဂနာ၊ ကိုရဲလွင်၊ ကိုနေဝင်း၊ ဇေယျာသော်၊ ဆောင်းဦးလှိုင်တို့ တက်ရောက်ကြောင်း သိရသည်။
မြန်မာ့ဒီမိုကရေစီ ခေါင်းဆောင် ဒေါ်အေင်ဆန်းစုကြည်က အကျဉ်းချမထား သင့်သူများကို အကျဉ်း ချထားခြင်းသည် မလုပ် သင့်သော လုပ်ရပ်ဖြစ်ကြောင်း၊ လူတိုင်း၏ လွတ်လပ်ခွင့်နှင့် ထူထောင်ခွင့် အတွက် ဒီမိုကရေစီ လှုပ်ရှားမှု အတွင်းသို့ ၀င်ရောက် လာသူများဖြစ်ကြောင်း ပြောဆိုသည်။
ထို့အပြင် ကိုမင်းကိုနိုင်နှင့် တကွ နိုင်ငံရေးအကျဉ်းသားများ အားလုံး လွတ်မြောက်စေရန် ဆုတောင်း ပေးကြောင်း သိရသည်။
ကိုမင်းကိုနိုင်၏ အစ်မဖြစ်သူ ဒေါ်ကြည်ကြည်ညွန့်ကလည်း “အခုလို စုစုစည်းစည်းနဲ့ တောင်းဆိုပေးတာ အားလုံးကို ကျေးဇူး တင်ပါတယ်။ မောင်လေးနဲ့ အတူ နိုင်ငံရေး အကျဉ်းသားတွေ အားလုံး လွတ်စေချင်ပါတယ်” ဟု ဆိုသည်။
ယနေ့ကျင်းပသည့် မွေးနေ့ပွဲသို့ လာရောက်သူ များပြားလွန်းသောကြောင့် ဘုန်းကြီးကျောင်း အထပ် ၄ ထပ်စလုံး လူများနှင့် ပြည့်သွားသည့် အပြင် ကျောင်းပြင်ပ တွင်လည်း လူအများ ရှိနေသောကြောင့် ဒေါ်အောင်ဆန်းစုကြည်နှင့် ကိုဇာဂနာတို့က ပြူတင်းပေါက်မှ နေ၍ နှုတ်ဆက်ရကြောင်း သိရသည်။
သီတင်းကျွတ်လပြည့်နေ့ (အဘိဓမ္မာ အခါတော်နေ့) က သမ္မတ ဦးသိန်းစိန်၏ အမိန့်ဖြင့် အကျဉ်းသား ၆၃၅၉ ဦးကို လွှတ်ပေးခဲ့ သော်လည်း ကိုမင်းကိုနိုင် အပါအ၀င် ၈၈ မျိုးဆက် ကျောင်းသား ခေါင်းဆောင်များ ပါဝင်ခြင်း မရှိပေ။
ရှမ်းပြည်နယ်အရှေ့ပိုင်း ကျိုင်းတုံထောင်၌ ထောင်ဒဏ် ၆၅ နှစ် ကျခံနေရသည့် ကိုမင်းကိုနိုင်အား အစ်မ ဖြစ်သူ ဒေါ်ကြည်ကြည်ညွန့်က ပြီးခဲ့သည့် အောက်တိုဘာ ၁၃ ရက်နေ့တွင် ထောင်ဝင်စာ သွားရောက် တွေ့ဆုံ ခဲ့သေးသည်။
ယခုလက်ရှိတွင် ကိုမင်းကိုနိုင်သည် အရိုးကျီးပေါင်း တက်ခြင်း၊ သွေးတိုးခြင်း၊ နှလုံးတုန်ခြင်း စသည့် ရောဂါများကို ခံစားနေရ ကြောင်း ၎င်း၏ အစ်မက ရှင်းပြသည်။
ကိုမင်းကိုနိုင်ကို ပန်းချီဆရာကြီး ဦးသက်ညွန့်နှင့် ဒေါ်လှကြည်တို့က ၁၉၆၂ ခုနှစ် အောက်တိုဘာ ၁၈ ရက်နေ့တွင် မွေးဖွားခဲ့ပြီး မွေးချင်းများတွင် တတိယမြောက် သားဖြစ်သည်။
ရန်ကုန် တက္ကသိုလ်တွင် သတ္တဗေဒ ပညာရပ်ဖြင့် ပညာဆည်းပူးခဲ့ပြီး ၁၉၈၈ ခုနှစ်အတွင်း ဖြစ်ပွားခဲ့သည့် ကျောင်းသား လှုပ်ရှားမှု များကို ဗမာနိုင်ငံလုံး ဆိုင်ရာ ကျောင်းသား သမဂ္ဂ (ဗကသ) ဥက္ကဋ္ဌ အဖြစ် တာဝန်ယူ ဦးဆောင်ခဲ့ရာ ၁၉၈၉ ခုနှစ်တွင် ဖမ်းဆီး ထိန်းသိမ်း ခံရပြီး ၂၀၀၄ ခုနှစ်တွင် ပြန်လည် လွတ်မြောက်လာခဲ့သည်။
ကိုမင်းကိုနိုင်၏ ၄၇ နှစ်မြောက် မွေးနေ့အထိမ်းအမှတ် အဖြစ် ၎င်းကိုယ်တိုင် ရေးသားသည့် ၁၉၈၈ အရေးတော်ပုံ သမိုင်း နောက်ခံ ထားသော “နောက်ကြည့်မှန်” အမည်ရှိ လုံးခြင်းဝတ္ထု စာအုပ်ကို နိုင်ငံရေး အကျဉ်းသားများ ကူညီစောင့်ရှောက်ရေး အသင်း (AAPP) က ဖြန်ချိ ထုတ်ဝေခဲ့သည်။
Ref: ဧရာဝတီ
မွန်ပြည်သူ့စစ်ခေါင်းဆောင် လုပ်ကြံခံရ
ကွန်းချမ်း
အင်္ဂါနေ့၊ အောက်တိုဘာလ ၁၈ ရက် ၂၀၁၁
ချင်းမိုင် (မဇ္ဈိမ) ။ ။ မွန်ပြည်သစ်ပါတီ (NMSP) မှ ခွဲထွက်ပြီး အစိုးရထံ လက်နက်ချကာ ဒေသ ပြည်သူ့စစ် အသွင်ဖြင့် လှုပ်ရှား နေသည့် မြိတ်ခရိုင် ချောင်ချီ အထူးဒေသမှ မွန်ငြိမ်းချမ်းရေး အဖွဲ့ ခေါင်းဆောင် တဦး သောကြာနေ့က ချောင်းမြောင်း ပစ်ခံရပြီး သေဆုံးခဲ့သည်။
အသက် ၅၀ ဝန်းကျင်ရှိ သေဆုံးသူ နိုင်အောင်မှာ ထိုင်းနယ်စပ် မြိတ်မြို့နယ် အောင်မွန်သာယာ ရွာတွင် အောက်တိုဘာ လ ၁၄ ရက်၊ ညနေ ၆ နာရီကျော်တွင် အပစ်ခံရကာ ပွဲချင်းပြီး သေဆုံးခဲ့သည်ဟု မြိတ်ဒေသ ပြန်လည် စည်းရုံးရေး အဖွဲ့မှ ခေါင်းဆောင်တဦး ဖြစ်သူ ဗိုလ်မှူး တမော့ချမ်းက ပြောသည်။
“အကောက်ခွန်ဂိတ်က ပြန်လာပြီး မိုးချုပ်စအချိန် ရွာလယ်မှာပဲ ပစ်သတ်ခံရတယ်” ဟု ဗိုလ်မှူးတမော့ချမ်းက မဇ္ဇျိမကို ပြောသည်။
၁၉၉၇ ခု နှစ်ကုန်ပိုင်းတွင် လူအင်အား ၂၀၀ ကျော်၊ လက်နက် အင်အား ၃၀၀ ကျော်နှင့်အတူ ကမ်းရိုးတန်းတိုင်း စစ်ဌာနချုပ်တွင် လက်နက် ချခဲ့သော အဖွဲ့၏ ခေါင်းဆောင် နိုင်အောင်နှင့် အတူ ပစ်ခတ်ခံရသူ အောင်မွန်သာယာ ရွာသူကြီးလည်း ဒဏ်ရာ ရသွားခဲ့သည်။ မည်သည့် အဖွဲ့ကမှ မိမိတို့ လက်ချက်ဖြစ်ကြောင်း ထုတ်ဖော် ပြောဆိုခြင်း မပြုသေးသလို လက်သည် မပေါ်သေးဘဲ ဖြစ်နေသည်။
မိကွန်းမီး၏ ခင်ပွန်း၊ သမီး ၃ ဦးနှင့် သားတဦး၏ ဖခင် နိုင်အောင်၏ ရုပ်အလောင်းကို စနေနေ့က အောင်မွန်သာယာ ရွာ သုဿာန်တွင် မြေမြှပ် သင်္ဂြိုလ် ပြီးကြောင်း ရွာခံတဦးက ပြောသည်။
NMSP နှင့် စစ်အစိုးရတို့ ၁၉၉၅ ခုနှစ် အပစ်အခတ် ရပ်စဲရေး သဘောတူချက် အရ တနှစ်တာအတွင်း မြိတ်ခရိုင်ရှိ NMSP ၏ မွန်အမျိုးသား လွတ်မြောက်ရေး တပ်မတော် (MNLA) ကို ပြန်လည် ရုပ်သိမ်းရန် သဘော တူခဲ့ကြသည်။
ထိုသဘောတူချက်ကို လက်မခံသည့် မြိတ်ခရိုင် ဒု-တပ်ရင်းမှူး ဗိုလ်မှူးအောင်သိုက်ဟင်းနှင့် ဗိုလ်ကြီး နိုင်အောင်တို့က ၁၉၉၆ ခုနှစ်တွင် မွန်ပြည်သစ် ပါတီမှ ခွဲထွက်ခဲ့သည်။
Ref: မဇ္ဈိမ
KNLA ကို အစိုးရတပ် ထိုင်းနယ်ဘက်က ၀င်တိုက်
October 18, 2011
ကရင် အမျိုးသား လွတ်မြောက်ရေး တပ်မတော် (KNLA) တပ်မဟာ ၇ အခြေစိုက်စခန်း တခု ဖြစ်သည့် မယ်ပေါ်ထာ့ စခန်းကို အစိုးရ စစ်တပ်က ယနေ့ ထိုင်းနိုင်ငံဘက်မှ ၀င်ရောက် တိုက်ခိုက်ခဲ့သည်ဟု KNLA ကရင် တပ်မှူးတဦးက ပြောသည်။
ကရင်ပြည်နယ် လှိုင်းဘွဲမြို့နယ်အတွင်း တည်ရှိသည့် မယ်ပေါ်ထာ့ စခန်းကို ယနေ့နံနက် ၆ နာရီခန့်က လှိုင်းဘွဲ အခြေစိုက် အစိုးရတပ် ခြေမြန် တပ်ရင်း (ခမရ) ၃၃၉ နှင့် နယ်ခြားစောင့်တပ် အမှတ် ၁၀၁၂ ပူးပေါင်း အင်အား ၄၀ ခန့်က ၀င်ရောက် တိုက်ခိုက် ခဲ့ခြင်းဖြစ်သည်။
KNLA တပ်မဟာ ၇ အခြေစိုက် မယ်ပေါ်ထာ့စခန်းသည် ထိုင်းနိုင်ငံ တာ့ခ်ခရိုင် ထာ့ဆောင်ရမ်းမြို့နယ်ရှိ နယ်ခြား သောင်ရင်းမြစ် ၏ မြန်မာ နိုင်ငံဘက်တွင် တည်ရှိသည်။
KNLA တပ်မဟာ ၇ နှင့် ပူးတွဲတိုက်ပွဲဝင်နေသည့် တိုးတက်သော ဗုဒ္ဓဘာသာ ကရင် အမျိုးသား တပ်မတော် (DKBA) ကလို့ထူးလား စစ်ဗျူဟာမှ ဗိုလ်မှူး တာ့ကော် က“ဒီမနက် ၆ နာရီ ၂၀ မှာ သူတို့ ထိုင်းနိုင်ငံ မဲ့သဝေါ ရွာဘက်ကနေ လှေနဲ့ ကူးလာပြီး ကျနော်တို့ စခန်းကို လာတိုက်တယ်၊ ကျနော်တို့ဘက်က ပြန်တိုက်တာ ၁၀ မိနစ် လောက်ပဲ ကြာတယ်၊ သူတို့ ပြန်ဆုတ်သွားတယ်” ဟု ဧရာဝတီသို့ ပြောသည်။
ကရင်ပူးပေါင်းတပ်ဖွဲ့မှ ဖမ်းယူရရှိသည့် ကြားဖြတ်ဆက်သွယ်ရေး ကြေးနန်း အရ တိုက်ခိုက်မှုတွင် မြန်မာ ပူးပေါင်း တပ်ဖွဲ့မှ စစ်သည် ၂ ဦး ဒဏ်ရာ ရရှိသွားသည် ဟုလည်း ဗိုလ်မှူးတာ့ကော် က ဆိုသည်။
တိုက်ပွဲဖြစ်ပွားသည့် လှိုင်းဘွဲမြို့နယ်၏ နယ်စပ်သောင်ရင်းမြစ်၏ မြန်မာဘက် ကမ်းနား တလျှောက်၌ KNLA ၊ DKBA နှင့် အစိုးရ စစ်တပ်များက စစ်အခြေစိုက် စခန်းများ ဖွင့်လှစ် ထားသည်။
တပ်မဟာ ၇ ဌာနချုပ်ကို ၁၉၈၀ ပြည့်နှစ်ဝန်းကျင် ကာလကလည်း အစိုးရတပ်များက ၀င်ရောက် တိုက်ခိုက်ခဲ့ရာတွင် ထိုင်းနိုင်ငံ ဘက်မှ အင်အား အလုံးအရင်းနှင့် ၀င်ရောက် တိုက်ခိုက်မှုများ ရှိခဲ့သည်ဟု တိုက်ပွဲတွင် ပါဝင်ခဲ့သည့် ကရင် တပ်မှူးဟောင်း တဦးက ပြောပြသည်။
ယနေ့ အစိုးစစ်တပ်က ကရင်အမျိုးသား အစည်းအရုံး(KNU) လက်အောက်ခံ KNLAတပ်မဟာ ၇ ဒေသကို ထိုင်းနိုင်ငံ ဘက်မှ ၀င်ရောက် တိုက်ခိုက်မှုနှင့် ပတ်သက်၍ သီးခြား အတည်ပြုချက် ရယူနိုင်ခြင်း မရှိသေးပါ။
KNU သည် မြန်မာ အစိုးရကို ဆန့်ကျင်တိုက်ပွဲဝင်နေသည်မှာ နှစ်ပေါင်း ၆၀ ကျော်ရှိပြီ ဖြစ်သည်။
Ref: ဧရာဝတီ
အစိုးရက KIA ကို ဆက်၍ ထိုးစစ်ဆင်နေ
ဘကောင်း
October 18, 2011
ကချင်ပြည်နယ်နှင့် ရှမ်းပြည်နယ်တွင် အစိုးရ စစ်တပ်နှင့် ကချင်ပြည်လွတ်လပ်ရေး တပ်မတော် (KIA) တပ်ဖွဲ့ ၀င်များ အကြား တိုက်ပွဲများ ဆက်လက် ဖြစ်ပွားနေပြီး အစိုးရဘက်က လတ်တလော ထိုးစစ် ဆင်နေမှုများသည် ၎င်းတို့ အမာခံ နယ်မြေများကို သိမ်းယူရန် အတွက် ဖြစ်သည်ဟု KIA ကပြောသည်။
ပြီးခဲ့သည့် ကြာသပတေးနေ့ကစတင်သည့် တိုက်ပွဲများအတွင်း KIA စစ်ဌာနချုပ် လိုင်ဇာနှင့် ပါဂျောင်သို့ သွားရာ လမ်းတလျှောက်ရှိ KIA ခြေကုတ် စခန်းများကို အစိုးရ တပ်များက တိုက်ခိုက်ခဲ့ကြောင်း သိရသည်။
ပါဂျောင်သို့ သွားရာလမ်းရှိ ၀ိုင်းမော်မြို့နယ်အနီး Lung Zep Kong တောင်ကုန်း၊ နမ်ဆန်ရန်ရွာနှင့် ရှမ်းပြည်နယ် ကွတ်ခိုင် မြို့နယ် အနီး တာမိုးညဲ ဒေသများတွင်လည်း တိုက်ပွဲများ ကြိုးကြား ကြိုးကြား ဖြစ်နေသည်ဟု KIA ကပြောသည်။
“အစိုးရတပ်တွေက သောကြာနေ့ကတည်းက အဓိက နေရာ သုံးခုကို သဲသဲမဲမဲတိုက်နေတာ၊ တပ် အင်အား ၆၀၀ လောက် ထပ်ပြီး ပို့နေတယ်လို့လည်း အခုနောက်ဆုံး သိရတယ်”ဟု KIA မှ ဗိုလ်မှူးကြီး ဇောရော် က ဧရာဝတီ သို့ ပြော သည်။
“အခုစစ်ဆင်ရေးဟာ ပါဂျောင် ကို သိမ်းဖို့ လုပ်တာလို့ ယုံကြည်ရတယ်”ဟုလည်း ၎င်းက ဆိုသည်။
အဆိုပါနယ်မြေများ၌ ယမန်နေ့ကအထိ တိုက်ပွဲများ ဆက်လက်ဖြစ်ပွားနေပြီး အစိုးရဘက်က ဒဏ်ရာ ပြင်းပြင်း ထန်ထန် ရရှိမှုများ ရှိကြောင်း၊ KIA တပ်သားများက ယင်း Lung Zep Kong တောင်ကုန်းကို ထိန်းထား နိုင်ခဲ့ကြောင်း ကချင် လွတ်လပ်ရေး အဖွဲ့ (KIO) ပြောခွင့်ရ ဦးလနန်က ပြောသည်။
KIA တပ်သားများက Lung Zep Kong တောင်ကုန်းပေါ်မှ အစိုးရ တပ်သားများကို ပစ်ချ နိုင်ခဲ့ကြောင်း၊ ပြန့်ကျဲနေသော အစိုးရ တပ်သား အလောင်း ၃၀ ခန့်ကို ပြီးခဲ့သည့်ရက် တိုက်ပွဲ အပြီးတွင် တွေ့ရှိရ ကြောင်းလည်း ၎င်းက ဆို သည်။
တရုတ်နိုင်ငံက ဆောက်လုပ်နေသည့် ဗန်းမော်မြို့နယ်ရှိ ရေအားလျှပ်စစ် စီမံကိန်းအနီး ပြီးခဲ့သည့် ဇွန်လက စတင် ဖြစ်ပွား ခဲ့သော တိုက်ပွဲပေါင်းမှာ အနည်းဆုံး ၈၂ ကြိမ်ခန့် ရှိပြီး လွန်ခဲ့သော ၁၇ နှစ်က အစိုးရနှင့် ပြုလုပ်ခဲ့သည့် အပစ် အခတ် ရပ်စဲရေးလည်း ပျက်ပြားခဲ့ရသည်။
အစိုးရက နယ်ခြားစောင့် တပ်ဖွဲ့ရန် တောင်းဆိုမှုအား KIA က ငြင်းဆန်ခဲ့ရာမှ ယခုကဲ့သို့ အစိုးရနှင့် KIA အကြား တင်းမာမှုများ တိုးပွား လာခဲ့ခြင်းဖြစ်သည်။
KIA နှင့် အစိုးရသည် ငြိမ်းချမ်းရေးအတွက် ၂ ကြိမ်တွေ့ဆုံခဲ့သည်။ အစိုးရဘက်က ၁၉၉၄ ခုနှစ်က ပြုလုပ်ခဲ့သည့် အပစ် အခတ် ရပ်စဲရေးကို ပြန်လည်အသက်သွင်းရန် ကမ်းလှမ်း ခဲ့သော်လည်း KIA က ငြင်းဆန်ခဲ့ပြီး တိုင်းရင်းသား လက်နက်ကိုင် အဖွဲ့ အားလုံးနှင့် နေပြည်တော်၌ နိုင်ငံရေးအရ တွေ့ဆုံ ဆွေးနွေးရေး ပြုလုပ်ရန် အစိုးရကို တောင်းဆို ခဲ့သည်။
ပြီးခဲ့သည့် စက်တင်ဘာ လဆန်းပိုင်းက ရှမ်းပြည်နယ် ကျိုင်းတုံမြို့၌ ၀ ပြည်သွေးစည်း ညီညွတ်ရေး အဖွဲ့ (UWSA) နှင့် မိုင်းလား အခြေစိုက် အမျိုးသား ဒီမိုကရေစီ မဟာမိတ် တပ်မတော် (NDAA) အဖွဲ့တို့နှင့် ပဏာမ ငြိမ်းချမ်းရေး သဘော တူညီချက် ယူရာတွင်မူ အစိုးရက နယ်ခြားစောင့်တပ် ဖွဲ့စည်းရေးကို ထည့်သွင်း ဆွေးနွေးခြင်း မရှိခဲ့ပေ။ UWSA သည် တပ်အင်အား ၂၀၀၀၀ ခန့် ရှိကြောင်း သိရသည်။
အစိုးရက UWSA နှင့် ငြိမ်းချမ်းရေး သဘောတူချက် ယူသကဲ့သို့ အဘယ်ကြောင့် မပြုလုပ်နိုင် သလဲဟု မေးရာတွင် KIA အနေဖြင့် ယာယီ အပတ်အခတ် ရပ်စဲရေးအတွက် မပြုလုပ် လိုကြောင်း၊ နိုင်ငံရေး နည်းဖြင့်သာ ထာဝရ ငြိမ်းချမ်းရေး အတွက် ပြုလုပ် သွားလိုကြောင်း ဦးလနန် က ပြောဆိုသည်။
လက်ရှိအခြေအနေအရKIA နှင့် အစိုးရ တိုက်ပွဲများကြောင့် စစ်ပြေးဒုက္ခသည်များ တရုတ်ပြည်ဘက်သို့ ထပ်မံ ရောက်ရှိ လာမည်ကို စိုးရိမ်၍ ရာချီသော တရုတ် စစ်သားများကို တရုတ်-မြန်မာ နယ်စပ်၌ လုံခြုံရေး ချထားကြောင်း သိရသည်။
Ref: ဧရာဝတီ
Tuesday, October 18, 2011
ပိုင်ရှင် အလိုရှိသည်
ကျော်သူ
တနင်္လာနေ့၊ အောက်တိုဘာလ ၁၇ ရက် ၂၀၁၁
လွန်ခဲ့သော ၂၀၀၉ ခုနှစ်၊ မတ်လ ၂၀ ရက်နေ့တွင် ကျွန်ုပ်၏ လုပ်ဖော်ကိုင်ဖက်၊ ရဲဘော် ရဲဖက်၊ လက်တွဲဖော် လက်တွဲဖက် ထူးခြားသော မိတ်ဆွေကြီး တဦး၏ မိခင်ဖြစ်သူ ဒေါ်လှကြည် (ခ) စာရေးဆရာမ ဒေါ်ကြည်ဦး အသက် ၈၄ နှစ်သည် ကမ္ဘာမြေပြင်မှ ထွက်ခွာသွားပါသဖြင့် ကျွန်ုပ်တို့ နာရေး ကူညီမှု အသင်း(ရန်ကုန်) မှ အင်တိုက်အားတိုက် စည်းလုံး ညီညွတ်စွာဖြင့် နောက်ဆုံး ခရီးအား အဆင်ပြေ ချောမွေ့စွာ၊ စည်ကား သိုက်မြိုက်စွာ ပို့ဆောင်ကူညီ သဂြုင်္ိဟ် ပေးခဲ့ရသည်။
အမေ ဒေါ်ကြည်ဦး၏ သားဖြစ်သူ ကျွန်ုပ်၏ ထူးခြားသော မိတ်ဆွေကြီးမှာ ပြင်ပလောကနှင့် ဝေးကွာ အဆက်ပြတ် နေကာ မြစ်ကြီးနား အကျဉ်းထောင်တွင် လူမှုရေး လုပ်ငန်းများကို လုပ်ကိုင်ဆောင်ရွက် ပေးမှုကြောင့် ပြစ်ဒဏ် ၃၅ နှစ် အကျဉ်းကျ ခံနေရသူ ဖြစ်သည်။ ထို့ကြောင့် ထူးခြားသော မိတ်ဆွေကြီးမှာ မိခင်ဖြစ်သူ၏ နောက်ဆုံး ခရီးအား လိုက်ပါပို့ဆောင်ခွင့် မရခဲ့ချေ။
ထိုစဉ်က ထူးခြားသော မိတ်ဆွေကြီးနှင့် အလားတူ ကျွန်ုပ်တို့ မြန်မာနိုင်ငံ၏ လူထုခေါင်းဆောင် ဖြစ်သူ ဒေါ်အောင်ဆန်း စုကြည် သည်လည်း နေအိမ် အကျယ်ချုပ်ဖြင့် ပြင်ပလောကသို့ ထွက်ခွာခွင့် မရရှိသေးချေ။ သို့သော် အမေစုသည် လူမှုရေး စိတ်ဓါတ် ပြည့်ဝစွာ၊ လူသားချင်း စာနာစိတ်ဖြင့် ကျွန်ုပ်၏ ထူးခြားသော မိတ်ဆွေကြီး၏ မိခင် ဈာပန အခမ်းအနားတွင် “ကျန်ရစ်သူ မိသားစုနှင့် ထပ်တူထပ်မျှ ဝမ်းနည်းကြေကွဲ ရပါကြောင်း” စာတမ်းပါ နှင်းဆီ ပန်းခြင်းအား ဖဲကြိုး အနက်ရောင်ဖြင့် ကျွန်ုပ်ထံသို့ လူကြုံ တဦးဖြင့် မရောက် ရောက်အောင် ပို့ဆောင်ပေးခဲ့သည်။
ထို့ပြင် ထိုလူကြုံမှ ကျွန်ုပ်အား “အမေက မှာလိုက်တယ်။ ဒီပန်းခြင်းကို ကာယကံရှင်ထံ အရောက် ပို့ပေးပါ” တဲ့။ ကာယကံရှင်မှာ ကျန်ရစ်သူ ထူးခြားသော မိတ်ဆွေကြီး၏ ဖခင်နှင့် အကိုများသာ ရှိတော့သည်။ ကျွန်ုပ်ယုံကြည်မှု တခုရှိသည်။ ကျွန်ုပ်မသေခင် ကျွန်ုပ်၏ ထူးခြားသော မိတ်ဆွေကြီးသည် အကြောင်း အမျိုးမျိုးကြောင့် ပြင်ပသို့ ပြန်လည် ရောက်ရှိကာ ကျွန်ုပ်နှင့် ပြန်လည် တွေ့ဆုံလိမ့်မည်ဟု ယုံကြည် ထားသည်။ အမေဆိုလိုသော ကာယကံရှင်ဟု ဆိုရာ၌ ကျွန်ုပ်၏ ထူးခြားသော မိတ်ဆွေကြီးသာ ဖြစ်တော့သည်။ ထို့ကြောင့် အမေ့၏ မှာကြားချက်အား တာဝန် ကျေစွာ ထမ်းဆောင်နိုင်ရန် အတွက် ကျွန်ုပ် ဆုံးဖြတ်လိုက်သည်။
ဤတွင် မိခင်ကြီး ဒေါ်ကြည်ဦး၏ ဈာပန အခမ်းအနားသို့ ကျွန်ုပ်ကိုယ်တိုင် နိဗ္ဗာန် မော်တော်ယာဉ်ပေါ် တင်ဆောင်၍ ရေဝေး သုဿန်တွင် ဈာပန အခမ်းအနား ပြီးဆုံးသည့် အချိန်အထိ ကျွန်ုပ်၏ လက်မှ အောက်သို့ မချဘဲ ကိုင်ဆောင် ထားခဲ့သည်။ အခမ်းအနား ပြီးဆုံးသည်နှင့် ကျွန်ုပ်သည် ဤလွမ်းသူ ပန်းခြင်းအား ကျွန်ုပ်၏ နေအိမ်သို့ သယ်ဆောင် ထားခဲ့သည်မှာ ယခုဆိုလျှင် နှစ်နှစ်နှင့် ခုနှစ်လခန့် ရှိခဲ့ပြီ ဖြစ်သည်။
ယခု အချိန်တွင် ထူးခြားသော မိတ်ဆွေကြီးသည်လည်း လွတ်ငြိမ်း ချမ်းသာခွင့်ဖြင့် ပြင်ပသို့ လွတ်မြောက် လာပြီ ဖြစ်သည်။ သို့သော် ယခုအချိန်အထိ ထူးခြားသော မိတ်ဆွေကြီးနှင့် တွေ့ဆုံခွင့် မရသေး။ ကျွန်ုပ် တယ်လီဖုန်းဖြင့် အကြိမ်ကြိမ် ဆက်သွယ် ခဲ့သော်လည်း နှစ်ကြိမ်ခန့် လေလှိုင်းထဲမှ စကားပြောခွင့်သာ ရခဲ့သည်။ လူကိုယ်တိုင် တွေ့ဆုံခွင့် ကား မရသေးချေ။
ကျွန်ုပ်တို့၏ နာရေးကူညီမှု အသင်း(ရန်ကုန်) သည် တရားဝင် မှတ်ပုံတင် မကျသေး၍ ကျွန်ုပ်တို့၏ အသင်းသို့ ထူးခြားသော မိတ်ဆွေကြီး မလာရောက်ခြင်းတော့ မဖြစ်နိုင်။ ထူးခြားသော မိတ်ဆွေကြီးမှာ အလုပ်အလွန် များပြားလွန်း လှသောကြောင့်ပင် ဖြစ်မည်ဟု ကျွန်ုပ် ယုံကြည်သည်။ ထို့ကြောင့် ဤစာကို ထူးခြားသော မိတ်ဆွေကြီး ဖတ်မိသည့် အချိန်၌ ကျွန်ုပ်ထံသို့ အလျင်အမြန် ရောက်ရှိလာမည်ဟု မျှော်လင့် မိပါသည်။
၂ဝဝ၉ ခုနှစ်၊ မတ်လ ၂ဝ ရက်နေ့မှစ၍ ကိုးရက်တိုင်တိုင် မတ်လ ၂၉ ရက်နေ့ အထိ
နှင်းဆီပန်း ပွင့်များသည် ညှိုးနွမ်းသွားခြင်း လုံးဝမရှိ။ ယနေ့တိုင် ညှိုးနွမ်း သွားသော
နှင်းဆီပန်းခြောက်များသည် ကြွေကျသွားခြင်း လုံးဝ မရှိ။
(ယခုစာကို နာရေးကူညီမှုအသင်း (ရန်ကုန်)၏ ဥက္ကဋ္ဌဖြစ်သူရုပ်ရှင်သရုပ်ဆောင် ကျော်သူမှ ရေးသား ပေးပို့ ခဲ့ခြင်း ဖြစ်သည်။)
Ref: မဇ္ဈိမ
Posts
