ပြည်တွင်းငြိမ်းချမ်းရေး လုပ်ငန်းစဉ် နှင့် ကချင်ဒေသ စစ်ပွဲများ အပိုင်း - ၂

မောင်ထက်မွန်

သြဂုတ်လ ၂၁ ရက် ၂၀၁၂ ခုနှစ်

အမေရိကန်ပြည်ထောင်စုကို ရောက်ရှိနေတဲ့ မြန်မာအစိုးရ သမတရုံးဝန်ကြီး ဦးအောင်မင်းနဲ့ ၀ါရှင်တန်မှာ နေထိုင်ကြတဲ့ မြန်မာနိုင်ငံသားတွေဟာ မေရီလန်းပြည်နယ် ရော့ဘေးမြို့က ခန်းမ တခုမှာ ၁၉ ရက်နေ့ ညပိုင်းက တွေ့ဆုံ ခဲ့ကြပါတယ်။

ဝန်ကြီး ဦးအောင်မင်းက မြန်မာနိုင်ငံမှ သမတ ဦးသိန်းစိန် ဦးဆောင်တဲ့ အစိုးရ အဖွဲ့အတွင်း အပြန် အလှန် နားလည်မှု မရှိ၊ ပူးပေါင်းဆောင်ရွက်မှု မရှိတာကြောင့် လုပ်ရ ကိုင်ရ ခက်ခဲရတဲ့ အခြေအနေတွေကို ပြောပြ သွားခဲ့ပါတယ်။

“ ကျနော်တို့တွေ ဒီပွဲ သိပ် ကြည့်မကောင်းဘူး။ ဒီ Team Work ဒီ Team ရဲ့ ဒီဘောလုံး အသင်းကြီးနဲ့၊ မကောင်းတဲ့ အသင်းကြီးနဲ့ ဘော်လုံး ဆက်ကန်ရင်တော့ ရှုံးဖို့ဘဲ များတယ်။ ဆိုတော့ ကျနော်တို့ကို Team ကို ပြောင်းပေးပါ။ ဒါမှ မဟုတ်ရင်လည်း ကျနော်တို့ ထွက်မယ်။ ဒီလိုဘဲ ပြောတော။့ သမတကြီးက မဟုတ်ဘူး။ မင်းတို့ ထွက်တာတော့ ငါတို့ ခွင့်မပြုဘူး။ မင်းတို့ ငါတို့ကို ၀ိုင်းလုပ်ပေးရမယ်။ ဘာလုပ်ရမယ် ဆိုတာလဲ မင်းတို့က သေချာ အစီအစဉ်ဆွဲ၊ ဆွဲပြီးတော့ လုပ်ကြရအောင် ဆိုပြီးတော့၊ ကျနော်တို့ အဲ့ဒီ့က စပြီးတော့ ကျနော်တို့ လုပ်ကြတယ်။

ကျနော်က ထွက်စာ သုံးကြိမ်တင်ပြီးပြီဗျ။ အဲ့ဒီ့ သုံးကြိမ်တင်တဲ့အခါမှာ သမတကြီးက ငါထွက်မှ မင်းတို့ ထွက်ရမယ် ဆိုတဲ့ အခါကြတော့လည်း ဆက်နေတဲ့ သဘောဘဲ။ တချို့ကလည်းပြောတယ် ကျနော်တို့ကိုလေ။ ဟာ မင်းတို့ သမတရုံး ရောက်သွားပြီ၊ လုပ်ပိုင်ခွင့် မရှိတော့ဘူး။ လိုအပ်တာ ရှိရင် ငါတို့ကို ပြောပါ။ ငါတို့ ၀ိုင်းလုပ်ပေးမယ်။ ဆိုပြီးတော့လည်း တချို့ သူငယ်ချင်းတွေက ကျနော်တို့ကို သနားလို့ ပြောကြတယ်။” လို့ ဦးအောင်မင်းက ဆိုပါတယ်။

သမတရုံးဝန်ကြီးဌာန ဝန်ကြီးတဦးလည်း ဖြစ်ပြီး၊ ပြည်ထောင်စုအဆင့် ငြိမ်းချမ်းရေး ဖော်ဆောင်ရေး လုပ်ငန်းကော်မတီ ဒု ဥက္ကဋ္ဌလည်း ဖြစ်သူ ဦးအောင်မင်း ကို မကြာသေးမီ ရက်ပိုင်း အတွင်းက နေပြည်တော်မှာ ဧရာဝတီ မဂ္ဂဇင်းက တွေ့ဆုံမေးမြန်းရာမှာလည်း ငြိမ်းချမ်းရေး လုပ်ငန်းစဉ်နဲ့ ပတ်သက်ပြီး ဦးအောင်မင်း က အခုလို ပြောခဲ့ပါသေးတယ်။

“ ဒီ Peace Process လုပ်တဲ့အခါမှာ အချက် ၆ ချက်နဲ့ ကိုက်ညီဖို့ လိုတယ်။
နံပါတ် (၁) အချက်က နိုင်ငံတော်ကို ခေါင်းဆောင်တဲ့ သမ္မတကြီး ကိုယ်တိုင်က ဒါကို လိုလို လားလားနဲ့ လုပ်ချင်တဲ့စိတ် ရှိဖို့ လိုတယ်။ နံပါတ် (၂) ပြည်သူလူထု သန်း ၆၀ ကလည်း ဒါကို လိုလိုလားလား ရှိရမယ်။ လွှတ်တော်လည်း ပါတယ်။ နံပါတ် (၃) တိုင်းရင်းသားတွေ ကိုယ်တိုင် ကလည်း ငြိမ်းချမ်းရေး လိုချင်တဲ့စိတ် ရှိရမယ်။ နံပါတ် (၄) သူတို့နဲ့ ရင်ဆိုင်နေတဲ့ တပ်ကလည်း ငြိမ်းချမ်းရေးကို လိုလိုလားလားနဲ့ လိုချင်တဲ့စိတ် ရှိရမယ်။ နံပါတ် (၅) နိုင်ငံတကာကလည်း ထောက်ခံအားပေးမှု လိုအပ်တယ်။ နံပါတ် (၆) Player တွေ ကောင်းဖို့ လိုတယ်။ Player တွေကတော့ ကျနော်တို့ပေါ့ဗျာ။ ” လို့ ပြောဆို သွားခဲ့ပါတယ်။

အခုလို ဦးအောင်မင်းရဲ့ ပြောဆိုမှုတွေကို သုံးသပ်ကြည့်ရင် သမတ ဦးသိန်းစိန် ဦးဆောင်တဲ့ အစိုးရ အဖွဲ့ အတွင်း ပူးပေါင်းဆောင်ရွက်မှု မရှိတာကြောင့် ဟန်ချက်ပျက်နေတဲ့ အခြေအနေတွေ ဖြစ်ပေါ်နေတာကို ထင်ထင် ရှားရှား မြင်တွေ့နိုင်သလို။ တပ်မတော် အနေနဲ့ ငြိမ်းချမ်းရေးကို လိုလိုလားလား ရှိဖို့နဲ့ ၂၀၁၁ အောက်တိုဘာ (၁၀) ရက်နေ့က သမတ ဦးသိန်းစိန် ညွှန်ကြားတဲ့ အမိန့်ကို တိတိကျကျ လိုက်နာပြီး ကချင်ဒေသမှာ ဖြစ်ပွါးနေတဲ့ တပ်မတော်ရဲ့ ထိုးစစ်တွေကို ချက်ချင်း ရပ်ဆိုင်းပစ်ဖို့ လိုကြောင်း တွေ့ရမှာ ဖြစ်ပါတယ်။

“ အပြည်ပြည်ဆိုင်ရာ ငြိမ်းချမ်းရေးနေ့” ဖြစ်တဲ့ ဒီကနေ့ စက်တင်ဘာ ၂၁ ရက်နေ့မှာ တနိုင်ငံလုံး အတိုင်းအတာနဲ့ အရပ်ဖက် လူမှုအဖွဲ့အစည်းတွေက “တနိုင်ငံလုံး စစ်ပွဲရပ်” ဆိုတဲ့ လှုပ်ရှားမှုကို ပြည်တွင်းစစ် ရပ်တန့်ပြီး၊ လူ့အခွင့်အရေး အပြည့်အဝ ရရှိရေး၊ ငြိမ်းချမ်းရေးကို လက်တွေ့ အကောင်အထည် ဖော်ရေးတို့အတွက် ပြုလုပ်သွားမယ်လို့ သိရပါတယ်။ ဒီနေ့ခေတ်ရဲ့ လူငယ်တွေ အပါအ၀င် ပြည်သူလူထုကြီးဟာ ငြိမ်းချမ်းရေး ဆာလောင်နေကြပြီ ဖြစ်ပါတယ်။

မြန်မာနိုင်ငံ ပြည်တွင်းစစ် မီးလျှံအောက် ကျရောက်နေခဲ့တာ နှစ်ပေါင်း(၆၄) နှစ် ကျော်ခဲ့ပြီ ဖြစ်ပါတယ်။ မြန်မာနိုင်ငံမှာ ပြည်တွင်း ငြိမ်းချမ်းရေး ရရှိဖို့အတွက် ဆရာကြီး သခင်ကိုယ်တော်မှိုင်း ဦးဆောင်တဲ့ ငြိမ်းချမ်းရေး ကြိုးပမ်းမှုတွေ ပေါ်ပေါက် ခဲ့ဖူးပါတယ်။ သမိုင်းဆိုင်ရာ အချက် အလက်တွေကို ပြန်လေ့လာကြည့်တဲ့ အခါ ဆရာကြီးဦးဆောင်တဲ့ ပထမ ပြည်တွင်း ငြိမ်းချမ်းရေး အဖွဲ့ (၈) ဦးကော်မတီ အနေနဲ့ မြန်မာပြည် အရပ်ရပ်ကို လှည့်လည် စည်းရုံးကြရာမှာ တနိုင်ငံလုံး ချိမ့်ချမ့်သဲ ငြိမ်းချမ်းရေး ဆန္ဒတွေနဲ့ တုန်ဟီးစေခဲ့ ပါတယ်။ ၁၉၅၇ -၅၈ ခုနှစ်တို့မှာ တိုင်းပြည်အနှံ့ ပြည်တွင်းငြိမ်းချမ်းရေးလှုပ်ရှားမှုကြီး ကြီးထွား အုံကြွလာပါတယ်။ အထူးခြားဆုံးမှာ (၁၈. ၃. ၅၈) ရက်နေ့မှာတော့ တနေ့တည်း၊ တရက်တည်း၊ တချိန်တည်းမှာ တပြိုင်နက်တည်း တပြည်လုံးရှိ ခရိုင်၊ မြို့နယ် အသီးသီးမှာ ကျင်းပပြုလုပ်ကြတဲ့ ပြည်တွင်း ငြိမ်းချမ်းရေး ဆန္ဒပြပွဲကြီးပင် ဖြစ်ပါတယ်။ တတိုင်းပြည်လုံးရှိ လူထုရဲ့ ပြည်တွင်း ငြိမ်းချမ်းရေး တောင်းဆိုသံတွေ ဘ၀ဂ်ညံခဲ့တယ်လို့ ဆိုရပါမယ်။

၁၉၅၈ ခုနှစ်၊ အောက်တိုဘာလမှာ ဗိုလ်နေ၀င်း ဦးဆောင်တဲ့ ပထမ အကြိမ် စစ်အာဏာ သိမ်းမှုကြီး ပေါ်ပေါက် လာခဲ့ပြီး နောက်မှာတော့ ငြိမ်းချမ်းရေးအတွက် လှုပ်ရှားမှုများ ခက်ခဲလာပြီး၊ ၁၉၅၉ ခုနှစ်မှာ ပြည်တွင်းငြိမ်းချမ်းရေးအဖွဲ့ (၈) ဦးကော်မတီကို ဖျက်သိမ်းပစ်ခဲ့ရပါတယ်။

“ ဆရာ မသေခင် တိုင်းပြည်မှာ ငြိမ်းချမ်းရေး ရတာ မြင်သွားချင်တယ် ” လို့ အကြိမ်ကြိမ် မြွက်ကြားခဲ့တဲ့ ဆရာကြီး ခမျာ၊ ၁၉၆၄ ခုနှစ်မှာ ဆုံးပါးသွားချိန် အထိ မြန်မာနိုင်ငံမှာ စစ်မှန်တဲ့ ငြိမ်းချမ်းရေးရဲ့ အရိပ်အယောင်ကိုတောင် မြင်မသွားခဲ့ရ ရှာတဲ့ အဖြစ်ဟာ တိုင်းပြည်နဲ့ တမျိုးသားလုံးအတွက် ကျေကွဲစရာ ဖြစ်ရပ်တခု ပါဘဲ။

သွားလေသူ ဗိုလ်ချုပ်မှူးကြီး သန်းရွှေ ထားရစ်ခဲ့တဲ့ ကတိစကားတွေကြောင့် ကချင်ဒေသတွင်းက တရုပ် စီးပွါးရေးလုပ်ငန်းတွေရဲ့ လုံခြုံမှု အာမခံချက် တခုတည်းအတွက် ကချင်ဒေသမှာ အောက်ခြေ တပ်မတော်သားတွေရဲ့ အသက်တွေ စတေးပြီး၊ ကာချုပ် ဖြစ်သူ ဒုတိယ ဗိုလ်ချုပ်မှူးကြီး မင်းအောင်လှိုင် အနေနဲ့ ရင်ဆိုင်နေတဲ့ စစ်ပွဲတွေကို အခုလို တတိုင်းပြည်လုံး ငြိမ်းချမ်းရေး လိုလားတောင့်တ နေချိန်မှာ ရပ်ဆဲသင့်ပြီ ဖြစ်ကြောင်း တင်ပြလိုက်ပါတယ်။

အပိုင်း (၁) ဖတ်ရန်

Read More...

Collapse...

ငြိမ်းချမ်းရေးနေ့ ဆန္ဒပြလိုသူများ ဟန့်တားခံရ

လင်းကိုကိုထက်
သောကြာနေ့၊ စက်တင်ဘာလ ၂၁ ရက် ၂၀၁၂

ရန်ကုန် (မဇ္ဈိမ)။ ။ အပြည်ပြည်ဆိုင်ရာ ငြိမ်းချမ်းရေးနေ့ အထိန်းအမှတ် အဖြစ် ပြည်တွင်း စစ်ပွဲများ ရပ်တန့်ရန် အတွက် နေပြည်တော်သို့ သွားရောက်ပြီး ငြိမ်းချမ်းစွာ ဆန္ဒဖော်ထုတ်မည့် သူများအား သက်ဆိုင်ရာက ခွင့်ပြုချက် မပေးသောကြောင့် ခရီးစဉ် ပျက်ပြယ် ခဲ့ရသည်။

သောကြာနေ့ နံနက် ၄ နာရီခန့်ကတည်းက ထွက်ခွာမည့်ကားများ အဆင်သင့် ရှိနေကြသော်လည်း ရဲများက အဆိုပါ မော်တော်ယဉ် လိုင်းကို ဖိအားပေးခဲ့ခြင်းကြောင့် ကားများထွက်ခွာခြင်း မရှိခဲ့ပေ။

ထို့ကြောင့် ကချင်ငြိမ်းချမ်းရေးကွန်ရက်မှ အဖွဲ့ဝင် ၁၀၀ ကျော်ခန့်အနေဖြင့် ပြည်သူ့ရင်ပြင်ဘက်သို့ သွားရောက်ကာ စီတန်း လှည့်လည်မှုပြုလုပ်ရန် ထွက်ခွာ ခဲ့သော်လည်း စမ်းချောင်းမြို့နယ် ရဲစခန်းမှ စခန်းမှူး ဦးအောင်သိန်း က ၎င်းပိုင်နယ် အတွင်း စီတန်း လှည့်လည်မှု မပြုလုပ်ရန် ဟန့်တားမှုများ ပြုလုပ်ခဲ့သည်။

“နယူးမန္တလာထွန်းက ကား ငါးစီးလုံး ပြန်လှည့်သွားကြတယ်။ နေပြည်တော်အတွက်ပဲ စီတန်း လှည့်လည်ဖို့ စာတင် ထားတာဆိုတော့ ပြည်သူ့ ရင်ပြင်ရှေ့မှာ ဆက်ပြီး လမ်းလျှောက်ကြဖို့ကို ရဲတွေက ခွင့်မပြုဘူး။ အခုတော့ ပြည်သူ့ ရင်ပြင်ရှေ့က ကားမှတ်တိုင်မှာပဲ ငြိမ်းချမ်းရေးကွန်ယက်က လူတွေရော၊ သတင်းထောက်တွေရော ရှိနေတယ်” ဟု အဆိုပါနေရာသို့ ရောက်ရှိနေသော သတင်းထောက် တဦးက မဇ္ဈိမ ကိုပြောသည်။

ငြိမ်းချမ်းရေး ကွန်ယက်အဖွဲ့ဝင်များအနေဖြင့် ပြည်သူ့ရင်ပြင် ကားမှတ်တိုင်တွင် စုဝေးနေကြရပြီး ဒဂုံမြို့နယ် ရဲတပ်ဖွဲ့မှ တပ်ဖွဲ့ဝင် ၂၀ ခန့်က ဆက်လက် သွားခွင့် မပြုတော့သောကြောင့် အဆိုပါနေရာ၌ပင် ရပ်တန့်လျက် ရှိနေကြသည်။

ရဲများက လူစုခွဲခိုင်းနေသော်လည်း အဖွဲ့ဝင် ၅၀ ကျော်ခန့်က နံနက်ပိုင်းအထိ ထိုနေရာမှ ထွက်ခွာသွားခြင်း မရှိ သေးပေ။

Ref: မဇ္ဈိမ

Read More...

Collapse...

မြန်မာတိုင်းရင်းသားများ အပြန်အလှန် နားလည်လေးစားမှုရှိဖို့ ဒေါ်အောင်ဆန်းစုကြည် ပြောကြား

2012-09-20

မြန်မာနိုင်ငံ ငြိမ်းချမ်းသာယာမှု ရရှိစေဖို့အတွက် တိုင်းရင်းသားတွေကြားမှာ အပြန်အလှန် နားလည်မှုနဲ့ အပြန်အလှန် လေးစားမှု ရှိကြရမယ်လို့ ဒေါ်အောင်ဆန်းစုကြည်က ပြောကြား လိုက်ပါတယ်။

အမေရိကန်ပြည်ထောင်စု ၀ါရှင်တန်ဒီစီမြို့တော်မှာ ရှိတဲ့ American University အမေရိကန် တက္ကသိုလ်မှာ ကျင်းပပြုလုပ်တဲ့ ဒေါ်အောင်ဆန်းစုကြည်နဲ့ မြန်မာ တိုင်းရင်းသား မိသားစုများ တွေ့ဆုံပွဲမှာ အဲဒီလို ပြောကြား လိုက်တာပါ။

ဒါပေမဲ့ တိုင်းရင်းသားဒေသတွေနဲ့ ပတ်သက်လို့ အပြည့်အ၀ ကျေနပ်နိုင်လောက်တဲ့ အခြေအနေ တစ်ရပ်မှာ မရှိသေးဘူး လို့လည်း ဒေါ်အောင်ဆန်းစုကြည်က ပြောပါတယ်။

"အားလုံးသိတဲ့အတိုင်း ပဋိပက္ခတွေ ဆိုတာလည်း အားလုံး ငြိမ်းသွားသေးတာ မဟုတ်ပါဘူး။ နောက်ပြီးတော့ ကျွန်မ တို့ရဲ့ တိုင်းရင်းသား ဒေသတွေမှာ ဖွံ့ဖြိုးရေး လိုအပ်ချက်တွေ အများကြီး ရှိနေပါတယ်။ မြန်မာနိုင်ငံ တစ်နိုင်ငံလုံးမှာ ဖွံ့ဖြိုးရေး လိုအပ်ချက်တွေ ရှိနေပါတယ်။ ဒါပေမဲ့ တိုင်းရင်းသား ဒေသတချို့ရဲ့ လိုအပ်ချက်တွေဟာ ပိုပြီးတော့ တခြားဒေသထက် များတယ်ဆိုတာ ကျွန်မတို့ သတိပြုဖို့လိုပါတယ်"

တိုင်းရင်းသားအရေး ကိစ္စအပြင် ညီညွတ်ရေး၊ ပြည်ပရောက်နေသူတွေ မြန်မာနိုင်ငံကို တတ်နိုင်တဲ့ ဘက်က ပံ့ပိုးကူညီရေး၊ တရား ဥပဒေ စိုးမိုးရေး၊ အရည်အချင်း မြှင့်တင်ရေး၊ အမျိုးသား ရင်ကြားစေ့ရေး စတာတွေကိုလည်း ထည့်သွင်းပြောကြား သွားပါတယ်။

အခုတွေ့ဆုံပွဲ ကျင်းပတဲ့ အမေရိကန် တက္ကသိုလ်ကနေ ဒေါ်အောင်ဆန်းစုကြည်ကို ၁၉၉၇ ခုနှစ်မှာ ချီးမြှင့်တဲ့ ဥပဒေရေးရာ ဂုဏ်ထူးဆောင် ပါရဂူဘွဲ့ကို အခုအခမ်းအနားမှာ တက္ကသိုလ် အဓိပတိ Dr. Cornelius Kerwin က ဘွဲ့လက်မှတ် အပ်နှင်းပါတယ်။

ဒေါ်အောင်ဆန်းစုကြည်နဲ့ မြန်မာတိုင်းရင်းသား၊ မိသားစုများ တွေ့ဆုံပွဲကို ၀ါရှင်တန် ဒီစီနဲ့ တဆက်ထဲ ရှိကြတဲ့ Maryland, Virginia ပြည်နယ်တွေက မြန်မာတွေ သာမက အမေရိကန် အရှေ့ခြမ်း နယူးယောက်နဲ့ ဖလော်ရီဒါ ပြည်နယ်က အစ အနောက်ဘက်ခြမ်း ကယ်လီဖိုးနီးယား ပြည်နယ် အဆုံး ပြည်နယ်ပေါင်းစုံက မြန်မာ တိုင်းရင်းသားတွေ အများအပြား တက်ရောက်ကြပါတယ်။

ဒေါ်အောင်ဆန်းစုကြည်ဟာ မနေ့က ညနေပိုင်းမှာတော့ National Endowment for Democracy (NED) အဖွဲ့ရဲ့ ၂၀၁၂ ခုနှစ် ဆုပေးပွဲ အခမ်းအနားကို တက်ရောက်ခဲ့ပါတယ်။

အဲဒီဆုပေးပွဲမှာ ရှမ်းတိုင်းရင်းသား ခေါင်းဆောင် ဦးခွန်ထွန်းဦး၊ နာရေးကူညီမှုအသင်း ဥက္ကဋ္ဌ ဦးကျော်သူ၊ ထိုင်း-မြန်မာနယ်စပ် မယ်တော်ဆေးခန်း တာဝန်ခံ ဒေါက်တာ စင်သီယာမောင်နဲ့ အမေရိကန် အခြေစိုက် US Campaign for Burma အဖွဲ့ ဦးအောင်ဒင်တို့က ဆုလက်ခံ ရယူခဲ့ကြပါတယ်။ ၈၈ မျိုးဆက် ကျောင်းသားခေါင်းဆောင် ကိုမင်းကိုနိုင်ကို ဆုလက်ခံရယူဖို့ ဖိတ်ကြားခဲ့ပေမဲ့ ဒီအခမ်းအနားကို တက်ရောက်နိုင်ခြင်း မရှိပါဘူး။

Ref: RFA News

Read More...

Collapse...

မြန်မာ့ပြုပြင်ပြောင်းလဲမှု အမေရိကန်အစိုးရ ကူညီမည်

2012-09-20

မနေ့က အမေရိကန် လွှတ်တော်မှာ ပြောကြားတဲ့ မိန့်ခွန်းမှာ ဒေါ်အောင်ဆန်းစုကြည်က အမေရိကန် ပြည်သူတွေနဲ့ လွှတ်တော်အမတ်တွေကို ကျေးဇူး တင်ရှိကြောင်း ပြောခဲ့ပါတယ်။

မြန်မာပြည်သူတွေ တောင့်တနေကြတဲ့ ဒီမိုကရေစီ အရေးအတွက် တည်ကြည်ခိုင်မာတဲ့ လုံ့လနဲ့ ကူညီခဲ့တဲ့ အမေရိကန်လွှတ်တော် အမတ်တွေကို ကျေးဇူးအထူးတင်ရှိကြောင်း ပြောလိုပါတယ်လို့ ပြောခဲ့တာပါ။

အမှောင်ချထားခံရတဲ့ နှစ်ပေါင်းများစွာ အတွင်း လွတ်လပ်မှုနဲ့ တရားမျှတမှုဟာ မြန်မာပြည်သူတွေအတွက် အလှမ်းကွာဝေး နေချိန်မှာ မိမိတို့ရဲ့ ကြိုးပမ်းမှုတွေကို အမြဲတမ်း စိတ်ထဲ နှလုံးသားထဲ ထည့်ပေးထားခဲ့တဲ့ အမေရိကန်ပြည်သူတွေကို လှိုက်လှိုက်လှဲလှဲ ကျေးဇူး ဥပကာရ တင်ရှိပါကြောင်းလည်း ဒေါ်အောင်ဆန်းစုကြည်က ပြောခဲ့တာပါ။

အဲဒီ အခမ်းအနားမှာပဲ အမေရိကန် နိုင်ငံခြားရေးဝန်ကြီး Hillary Clinton ကလည်း မြန်မာနိုင်ငံ ဒီမိုကရေစီ အသွင်ကူးပြောင်းရေးအတွက် ကြိုးပမ်းနေကြတဲ့ ပြုပြင်ပြောင်းလဲရေး လိုလားသူ အားလုံးကို ချီးကျူးဂုဏ်ပြု ပြောဆိုခဲ့ပါတယ်။

အမေရိကန် အစိုးရအနေနဲ့ သမ္မတ ဦးသိန်းစိန် အပါအ၀င် အုပ်ချုပ်ရေး၊ ဥပဒေပြုရေး ကဏ္ဍအသီးသီးက ပြုပြင်ပြောင်းလဲရေး လိုလားသူ ခေါင်းဆောင်တွေ၊ ဒီမိုကရေစီအရေး တက်ကြွ လှုပ်ရှားသူတွေနဲ့ လူမှုအဖွဲ့အစည်းအားလုံးနဲ့ လက်တွဲကြိုးပမ်းသွား မှာ ဖြစ်ကြောင်း ပြောခဲ့တာပါ။

ဒေါ်အောင်ဆန်းစုကြည်ဟာ မနေ့ နေ့လည်ပိုင်းက အမေရိကန်သမ္မတ အိုဘားမားနဲ့အိမ်ဖြူတော်မှာ တွေ့ဆုံ ဆွေးနွေးခဲ့ပါတယ်။ မြန်မာနိုင်ငံက နိုင်ငံရေး၊ စီးပွားရေး၊ လူ့အခွင့်အရေး ပြုပြင်ပြောင်းလဲမှု အားလုံးကို အမေရိကန် အစိုးရအနေနဲ့ ကူညီသွားမှာဖြစ်ကြောင်း အမေရိကန်သမ္မတက ပြောကြားတယ်လို့ အေပီသတင်းမှာ ရေးသားပါတယ်။ နှစ်ဖက် ဆွေးနွေးမှုကိုတော့ သတင်းထုတ်ပြန်ခြင်း မရှိပါဘူး။

Ref: RFA News

Read More...

Collapse...

ဖမ်းဆီးထားသော ရှမ်းတပ်ဖွဲ့ဝင်များ “၀” ပြန်လွှတ်

သန်းထိုက်ဦး
September 20, 2012

“ဝ”ပြည် သွေးစည်း ညီညွှတ်ရေး တပ်မတော် (UWSA) တပ်က နယ်မြေ ကျူးကျော်မှုဖြင့် ဖမ်းဆီး ထားသော ရှမ်းပြည် တပ်မတော် တောင်ပိုင်း (SSA-S) တပ်ဖွဲ့ဝင် ၂၀ ခန့်ကို မကြာသေးခင် ရက်ပိုင်းက ပြန်လွှတ်ပေးလိုက်သည်။

ပြီးခဲ့သည့် တပတ် တနင်္ဂနွေနေ့က ရှမ်းပြည်နယ် အရှေ့ပိုင်း မိုင်းတုံမြို့နယ် UWSA ထိန်းချုပ် ဒေသ အမှတ် ၇၇၅ တပ်ရင်း၌ နှစ် ဘက် တပ်ခေါင်းဆောင်များ တွေ့ဆုံဆွေးနွေးပြီး နောက်တနေ့တွင် ပြန်လွှတ်ပေးခြင်း ဖြစ်ကြောင်း SSA တောင်ပိုင်း ပြော ရေးဆို ခွင့်ရှိသူ ဗိုလ်မှူး စိုင်းလောင်ဆိုင်းက ဧရာဝတီသို့ ပြောသည်။

အဆိုပါ SSA တောင်ပိုင်း တပ်ဖွဲ့ဝင်များ လွတ်မြောက်လာရေး အတွက် SSA တောင်ပိုင်းမှ အဆင့်မြင့် အရာရှိ ၃ ဦးတို့က ဦးဆောင် ၍ UWSA ဘက်မှ တာဝန်ရှိသူများကို သွားရောက် တွေ့ဆုံဆွေးနွေးခဲ့ခြင်း ဖြစ်ကြောင်း ၎င်းက ဆိုသည်။

“ပြဿနာ ဖြစ်ပြီးတဲ့နောက်ပိုင်း ကျနော်တို့ အပြန်အလှန် အဆက်အသွယ် ပြုလုပ်တာတွေ ရှိတယ်၊ ဒီကိစ္စနဲ့ ပတ်သက်ပြီး ပြီးပြတ် အောင် ဆိုပြီးတော့ ကျနော်တို့ဘက်က ကိုယ်စားလှယ်တွေ သူတို့ဆီမှာ သွားရောက် ဆွေးနွေးပါတယ်”ဟု ဗိုလ်မှူး စိုင်းလောင် ဆိုင်း က ဆက်ပြောသည်။

ဇူလိုင်လ ၃၁ ရက်နေ့က မိုင်းတုံမြို့နယ် UWSA ထိန်းချုပ်ရာ နယ်မြေ အတွင်း ၀င်ရောက်ကျူးကျော်မှုဖြင့် SSA တောင်ပိုင်း တပ်ဖွဲ့ ၀င်များကို UWSA တပ်ဖွဲ့က ဖမ်းဆီး ထိန်းသိမ်းခဲ့ခြင်း ဖြစ်သည်။

ဖမ်းဆီးခံထားရသူများထဲတွင် SSA တောင်ပိုင်းမှ အရာရှိ ၂ ဦး ပါဝင်ပြီး အားလုံးကို UWSA တပ်ဖွဲ့ဝင်များက အကျယ်ချုပ် သဘော ဖြင့် ထိန်းသိမ်းထားခြင်း ဖြစ်ကြောင်း သိရသည်။

နယ်မြေ ကျူးကျော်မှုများ ထပ်မံ မဖြစ်ပွားရန် အတွက် နှစ်ဘက်တပ်များ နားလည်မှုယူ၍ သွားလာလှုပ်ရှားရေး စသည့် နယ်မြေ ပြဿနာများကို ဆက်လက် တွေ့ဆုံ ညှိနှိုင်းသွားမည် ဖြစ်ကြောင်း ဗိုလ်မှူး စိုင်းလောင်ဆိုင်းက ရှင်းပြသည်။

“နယ်မြေ ပြဿနာနဲ့ ဒီနယ်မြေ အတွင်းထဲမှာ ရှိနေတဲ့ ကျနော်တို့ လုပ်ဆောင်ချင်တဲ့ မူးယစ်ဆေးဝါး ပပျောက်ရေးနဲ့ ပတ်သက်ပြီး တော့ အစားထိုး သီးနှံတွေကို သူတို့နဲ့ တွဲပြီးတော့ လုပ်နိုင်ရင် ကောင်းမလားလို့၊ သူတို့ကလည်း အဲဒီလို တင်ပြတာတွေလည်း ရှိပါ တယ်”ဟု ၎င်းက ဆိုသည်။

ယခုနှစ် ဇွန်လလယ်ပိုင်းကလည်း UWSA ထိန်းချုပ်ရာ ဒေသအတွင်း SSA တောင်ပိုင်း တပ်ဖွဲ့များ ကျူးကျော်ဝင်ရောက် လာသည် ဟု ဆိုကာ ရှမ်းပြည်နယ် အရှေ့ပိုင်း မိုင်းဆတ်မြို့နယ် အတွင်းရှိ SSA တောင်ပိုင်း လွယ်ကော်ဝမ်း တပ်စခန်းကို UWSA တပ်ဖွဲ့ဝင် များက သွားရောက် ၀ိုင်းထားသောကြောင့် စစ်ရေးတင်းမာမှုများ ဖြစ်ပွားခဲ့သေးသည်။

UWSA တပ်ဖွဲ့သည် ၁၉၈၉ ခုနှစ်တွင် ဗမာပြည် ကွန်မြူနစ်ပါတီမှ ခွဲထွက်ပြီး ယခင် စစ်အစိုးရနှင့် အပစ်အခတ်ရပ်စဲရေး သဘောတူ ညီချက် ရယူခဲ့သည်။

အစိုးရ၏ ၂၀၀၈ အခြေခံ ဥပဒေတွင် UWSA ကို ကိုယ်ပိုင်အုပ်ချုပ်ခွင့်ရ ဒေသအဖြစ် ထည့်သွင်းပြဋ္ဌာန်းထာပြီး အထူးဒေသ အမှတ် (၂)အဖြစ် သတ်မှတ်ပေးသော ရှမ်းပြည်နယ် အရှေ့ပိုင်း ဒေသတွင် UWSA တပ်ဖွဲ့များ လှုပ်ရှားနေသည်။

ယင်း အခြေခံဥပဒေတွင် ရှမ်းပြည်နယ်ရှိ ဟိုပန်၊ မိုင်းမော၊ ပန်ဝိုင်၊ နားဖန်း၊ မက်မန်း၊ ပန်ဆန်း စသည့် မြို့နယ်များကို ခရိုင် ၂ ခရိုင် ဖွဲ့ပြီး “ဝ” ကိုယ်ပိုင် အုပ်ချုပ်ခွင့်ရတိုင်း အဖြစ် ဖော်ပြထားသည်။

ပြီးခဲ့သည် ၂၀၁၁ ခုနှစ် စက်တင်ဘာလနှင့် အောက်တို ဘာလတို့ တွင် အစိုးရ ကိုယ်စားလှယ် ဟောင်း ဦးအောင်သောင်းနှင့် တွေ့ဆုံ ခဲ့ပြီးနောက်ပိုင်း ငြိမ်းချမ်းရေး သဘော တူညီချက်များ လက်မှတ်ရေးထိုးခဲ့သည်။ UWSA သည် တိုင်းရင်းသား လက်နက် ကိုင် တပ်ဖွဲ့များ အနက် အင်အား အတောင့်တင်းဆုံး ဖြစ်သည်။

Ref: ဧရာဝတီ

Read More...

Collapse...

ရခိုင်ဒေသလုံးဆိုင်ရာ လူထုအစည်းအဝေး အာဏာပိုင် ကန့်သတ်

2012-09-20

ရခိုင်ပြည်နယ် ရသေ့တောင်မြို့ပေါ်မှာ လာမယ့် စက်တင်ဘာလ ၂၅ ရက်နေ့မှာ စတင် ကျင်းပပြုလုပ်မယ့် ရခိုင်ဒေသလုံး ဆိုင်ရာ လူထု အစည်းအဝေးနဲ့ ပတ်သက်ပြီး ဒေသ အာဏာပိုင်တွေဘက်က ဒီကနေ့မှာ ကန့်သတ်မှုတွေ ပြုလုပ် လိုက်တယ်လို့ သိရပါတယ်။

ရခိုင်ဒေသလုံးဆိုင်ရာ လူထုအစည်းအဝေး ပင်မကော်မတီက တာဝန်ရှိသူတွေကို ဒီကနေ့မနက် ၈ နာရီလောက်မှာ အာဏာပိုင်တွေက လာရောက်ခေါ်ယူပြီး အဲဒီလို ကန့်သတ်လိုက်တာ ဖြစ်တယ်လို့ ပင်မကော်မတီမှာ ပါဝင်တဲ့ ကိုတေးနွယ်အောင်က RFA ကို ပြောပြပါတယ်။

"၂၅၊ ၂၆ နှစ်ရက်တင်တဲ့ ဥစ္စာမှာ ကျွန်တော်တို့ကို (၁) ရက်ပဲ ခွင့်ပြုမယ်ဆိုပြီးတော့ မြို့နယ် အုပ်ချုပ်ရေးမှူးရယ်၊ ရဲမြို့နယ် မှူးရယ်၊ ပြီးတော့ ဗျူဟာမှူး တစ်ယောက်လည်း ခေါ်ပြောပါတယ်"

လူထုအစည်းအဝေးကို လူအင်အား ၆၀၀ ကျော်နဲ့ စာတမ်းဖတ်ကြားဖို့ လူ ၂၈ ဦးကို ခွင့်ပြုကြောင်း ပြီးခဲ့တဲ့ စက်တင်ဘာလ ၁၁ ရက်နေ့က လူထု အစည်းအဝေး ဖြစ်မြောက်ရေး ကော်မတီနဲ့ အာဏာပိုင်တွေ သဘော တူညီချက် ရှိခဲ့ပေမယ့် ဒီကနေ့မှာတော့ လူအင်အား ၂၀၀ နဲ့ စာတမ်း ဖတ်ကြားမယ့်သူ ၁၀ ဦးကိုသာ အာဏာပိုင်တွေက ခွင့်ပြုခဲ့တယ် လို့လည်း သိရပါတယ်။

ဒါ့အပြင် အစည်းအဝေး ကျင်းပမယ့် အချိန်ကို မနက် ၈ နာရီက ညနေ ၅ နာရီအထိ ခွင့်ပြုထားတာ ကိုလည်း နေ့လည် ၁ နာရီအထိ ကန့်သတ် လိုက်တယ်လို့လည်း ဆိုပါတယ်။

ရသေ့တောင်မြို့ပေါ်မှာ ကျင်းပမယ့် ရခိုင်ပြည်နယ်လုံးဆိုင်ရာ လူထု အစည်းအဝေးကို တက်ရောက်ဖို့ အတွက် ရခိုင်ပြည်နယ် ၁၇ မြို့နယ်နဲ့ ချင်းပြည်နယ် ပလက်ဝမြို့က လူထု ကိုယ်စားလှယ်တွေ၊ လူမှုအဖွဲ့အစည်းတွေ၊ မြို့မိမြို့ဖတွေ၊ တတ်သိပညာရှင် တွေကို ဖိတ်ကြား ထားတယ်လို့လည်း သိရပါတယ်။

ဒီအစည်းအဝေးပွဲဟာ မကြာသေးခင်က ရခိုင်ပြည်နယ်အတွင်းမှာ ဒေသခံ ရခိုင် တိုင်းရင်းသားတွေနဲ့ ရိုဟင်ဂျာတွေ အကြား ဖြစ်ပွားခဲ့တဲ့ ပဋိပက္ခတွေနဲ့ ပတ်သက်ပြီး ရခိုင်ပြည်နယ် အတွင်းမှာ ရခိုင်လူမျိုးတွေ ကာလကြာရှည်စွာ နေထိုင်နိုင်ရေး အတွက် အဖြေရှာဖို့ ဖြစ်တယ်လို့လည်း ဆိုပါတယ်။

Ref: RFA News

Read More...

Collapse...

တရုတ်သင်္ဘောသား ၁၃ ဦး သတ်ဖြတ်မှု တရားရုံးတွင် နော်ခမ်း ငြင်းဆို

ကြာသပတေးနေ့၊ စက်တင်ဘာလ ၂၀ ရက် ၂၀၁၂

နယူးဒေလီ (မဇ္ဈိမ) ။ ။ လွန်ခဲ့သောနှစ်က မဲခေါင်မြစ်အတွင်း တရုတ် ကုန်တင်သင်္ဘော နှစ်စင်းအား ပစ်ခတ် တိုက်ခိုက်မှုနှင့် တရုတ်နိုင်ငံသား ၁၃ ဦးအား သတ်ဖြတ်မှုတို့ဖြင့် စွပ်စွဲ ဖမ်းဆီး၍ ရုံးတင် စစ်ဆေး ခံနေရသော မူးယစ်ရာဇာ နော်ခမ်း က ၎င်းအနေဖြင့် ထို တိုက်ခိုက်မှုအား စီစဉ်ခဲ့ခြင်း မရှိကြောင်း ငြင်းချက် ထွက်ဆို လိုက်သည်။

ကြာသပတေးနေ့က တရုတ်နိုင်ငံ၊ ယူနန်ပြည်နယ်၊ ကူမင်း တရားရုံး၌ ရုံးထုတ် စစ်ဆေးစဉ် စွပ်စွဲခံရသူ ခြောက်ဦး အနက် ခေါင်းဆောင် နော်ခမ်းက ထိုသို့ငြင်းဆို လိုက်ခြင်း ဖြစ်ကြောင်း ဆင်ဟွာ သတင်း တရပ်တွင် ရေးသား ပါရှိသည်။

“အဲဒီအချိန်တုန်းက အဲဒီအကြောင်းကို ကျနော် မသိပါဘူး။ သူတို့ ကျနော့်ကို မပြောပါဘူး။ နောက်ကျမှသာ ကျနော် သိရတာပါ” ဟု နော်ခမ်း က ထွက်ဆိုခဲ့သည်။

ရုံးမထုတ်မီက မီဒီယာများနှင့် တွေ့ဆုံစဉ်က ထိုတိုက်ခိုက်မှုနှင့် ပတ်သက်၍ ဝန်ခံ ပြောဆို ခဲ့သော်လည်း တရားရုံး တွင်မှု ပြောင်းပြန် ထွက်ဆို လိုက်ခြင်း ဖြစ်သည်။

၎င်းတို့ ခြောက်ဦးအား နိုင်ငံတကာ လူသတ်မှု၊ မူယစ်ဆေးဝါးမှု၊ ပြန်ပေးဆွဲမှုနှင့် သင်္ဘော အပိုင်စီးမှု တို့ဖြင့် စွဲဆို ထားခြင်း ဖြစ်သည်။

၂ဝ၁၁ ခုနှစ်၊ အောက်တိုဘာ ၅ ရက်နေ့က မြန်မာ-လာအိုနှင့်ထိုင် သုံးနိုင်ငံ ဆုံသည့် ရွှေတြိဂံ နယ်မြေရှိ မဲခေါင်မြစ်ပေါ် တွင် တရုတ် အလံတင် သင်္ဘော နှစ်စင်းအား ထိုင်း ပါမောင်း အထူး တပ်ဖွဲ့မှ ရပ်တန့်စေရာမှ အပြန်အလှန် ပစ်ခတ်မှု
ဖြစ်ပွားခဲ့သည်။ ပစ်ခတ်မှုအတွင်း သင်္ဘောပေါ်ပါ တဦး သေဆုံးခဲ့သော်လည်း တရုတ်နိုင်ငံသား ၁၃ ဦး၏ အလောင်း များကို မြစ်အတွင်းမှ ဆည်ယူရရှိခဲ့သည်။

ထိုင်းအထူးတပ်ဖွဲ့ တပ်မှူး ဗိုလ်မှူးချုပ် ပရာခန် ချွန်လာယွတ် Prakarn Chonlayuth ၏ အဆိုအရ အဆိုပါ သင်္ဘော
နှစ်စင်းမှာ ပြန်ပေးဆွဲ ခံခဲ့ရခြင်းဖြစ်ပြီး ပြန်ပေး အဖွဲ့မှာ ရှမ်းလူမျိုး နော်ခမ်း ဦးစီးသော ဂိုဏ်းဖြစ်နိုင်ကြောင်း “အဲဒီဂိုဏ်းက
မြစ်ပေါ်မှာ သွားလာနေတဲ့ သင်္ဘောတွေကို ပြန်ပေးဆွဲလေ့ ရှိပြီး ဆက်ကြေးတောင်းတယ်။ မပေးရင် သင်္ဘောသားတွေကို သတ်ပြီး မြန်မာနိုင်ငံက မူးယစ်ဆေးတွေကို ထိုင်းနိုင်ငံထဲ သွင်းဖို့ လှေကို ယူကြတယ်” ဟု ထိုစဉ်က ဘန်ကောက်ပို့စ် သတင်းစာတွင် ရေးသားပါရှိသည်။

နောက်ပိုင်းတွင် ထိုတိုက်ခိုက် သတ်ဖြတ်မှုနှင့် ဆက်စပ်နေသူ ပါမောင်း အထူးတပ်ဖွဲ့ဝင် အရာရှိ ကိုးဦးကို ထိုင်းရဲက ဖမ်းဆီးခဲ့ပြီး လူသတ်မှုဖြင့် တရား စွဲဆိုခဲ့သည်။

သေဆုံးသူ တရုတ်များမှာ ‘Hua Ping’ နှင့် ‘Yu Xing 8 Hao’ အမည်ရှိ တရုတ်သင်္ဘော နှစ်စီးမှ ဖြစ်ပြီး Hua Ping ပေါ်မှ စိတ်ကြွဆေး ၅၂ဝ,ဝဝဝ ပြားနှင့် Yu Xing 8 Hao မှ ၄ဝဝ,ဝဝဝ ပြား မိခဲ့ခြင်းဖြစ်သည်။ ဖမ်းမိသည့် မူးယစ်ဆေးဝါး တန်ဖိုးမှာ ဘတ်ငွေ သန်း ၁ဝဝ ခန့်ရှိသည်ဟု ခန့်မှန်းထားသည်။

ထိုတိုက်ခိုက်မှု ဖြစ်ပွားပြီး မဲခေါင်မြစ်ကြောင်းအတွင်း သွားလာမှုကို လုံခြုံရေး နှစ်လကျော်ကြာ ရပ်နား ထားခဲ့ရသည်။

မြန်မာစစ်တပ်အရာရှိကြီးများနှင့် နီးစပ်သူ စိုင်းနော်ခမ်းသည် ဘိန်းဘုရင် ခွန်ဆာ၏ MTA အဖွဲ့တွင် အုပ်ချုပ်ရေး အရာရှိ တဦး ဖြစ်ခဲ့ဖူးကာ ခွန်ဆာ လက်နက်ချသွားပြီးနောက် တာချီလိတ်မြို့တွင် နေထိုင် ခဲ့သေးသည်။

၂ဝဝ၆ ခုနှစ်တွင် လက်နက်နှင့် စိတ်ကြွဆေးပြား သန်းနှင့်ချီ တွေ့ပြီးနောက် တာချီလိတ်တွင် မနေတော့ဘဲ မဲခေါင်မြစ် တွင်း သင်္ဘောများ ထံမှ ဆက်ကြေးကောက်နေကြောင်း ဒေသခံများနှင့် လေ့လာသူများက ပြောသည်။

နော်ခမ်းနှင့်အတူ ငါးဦးအား ယခုနှစ်အစောပိုင်းက တရုတ်၊ လာအို၊ မြန်မာနှင့် ထိုင်း လေးနိုင်ငံ ပူးတွဲ စစ်ဆင်ရေးဖြင့် ဧပြီလ ၂၅ ရက်နေ့က လာအိုနိုင်ငံတွင် ဖမ်းဆီး ရမိခဲ့ပြီး တရုတ်နိုင်ငံသို့ မေလ ၁ဝ ရက်နေ့တွင် လွှဲပြောင်းပေးအပ် ခဲ့သည်။

မဲခေါင်မြစ်အတွင်း လုံခြုံရေးနှင့် ဥပဒေစိုးမိုးရေးအတွက် ပူးပေါင်းဆောင်ရွက်ရန် ပီကင်းမြို့တော်တွင် မြန်မာပြည်ထဲရေး ဝန်ကြီး ဒု-ဗိုလ်ချုပ်ကြီး ကိုကို တက်ရောက်သည့် တရုတ်၊ လာအို၊ ထိုင်း၊ လေးနိုင်ငံ အစည်းအဝေးမှ ၂ဝ၁၁ ခုနှစ်၊ အောက်တိုဘာ ၃၁ တွင် သဘောတူခဲ့ကြသည်။

မိုင်ပေါင်း ၃,၁ဝဝ ကျော် ရှည်လျားသည့် မဲခေါင်မြစ်သည် တရုတ်ပြည်နှင့် လာအိ်ု၊ မြန်မာနှင့် ထိုင်းနိုင်ငံတို့ ရေကြောင်း ကုန်သွယ်မှုတွင် အရေးပါသော မြစ်တစင်း ဖြစ်သည်။

Ref: မဇ္ဈိမ

Read More...

Collapse...

ကွန်ဂရက် ရွှေတံဆိပ်ဆုနှင့် ဒေါ်အောင်ဆန်းစုကြည် မိန့်ခွန်း

မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်အား အမေရိကန် ကွန်ဂရက် လွှတ်တော်၏ အရပ်သားများ အတွက် အမြင့်ဆုံး ကွန်ဂရက်ရွှေ တံဆိပ်ဆု အခမ်းအနား မြင်ကွင်းနဲ့ မိန့်ခွန်း ဖြစ်ပါတယ်။

ဒေါ်အောင်ဆန်းစုကြည်ရဲ့ မိန့်ခွန်း ကို မြန်မာလို ဖော်ပြပေးလိုက်ပါတယ်။ VOA မြန်မာပိုင်းက ဘာသာပြန် ကို တင်ပြပေးလိုက်ပါတယ်။

ဒီနေ့ဟာ ကျမဘ၀မှာ စိတ်လှုပ်ရှားဖွယ်အကောင်းဆုံး နေ့တနေ့ပါပဲ။ ပါတီစွဲ မခွဲပဲ ညီညီ ညွတ်ညွတ်နဲ့ အဝေးက လာတဲ့ ကျမလို သူစိမ်း တယောက်ကို အမေရိကန် ကွန်ဂရက် လွှတ်တော်ကြီးက ကြိုဆိုတဲ့ အတွက် ကျေးဇူးတင်ပါ တယ်။ တကယ်တမ်း မှာတော့ ဒီမှာရှိတဲ့သူ တော်တော်များများဟာ ကျမနဲ့ သူစိမ်းပြင်ပြင်တော့ မဟုတ်ပါဘူး။ ဒီနေရာမှာ တွေ့ဖူးနေကျ မျက်နှာတွေတော်တော်များများ ရှိသလို၊ ကျမတို့နိုင်ငံ ကျမတို့ရဲ့ အကျိုးအတွက် ဆောင်ရွက်ပေးမှုတွေကြောင့် နာမည်တွေ နဲ့ တကွ ရင်းနှီး ကျွမ်းဝင်ပြီးသား သူ တွေလည်း ရှိနေတာမို့ပါ။

ဒီအချိန်ကိုစောင့်ခဲ့ရတာ နှစ်အတော်ကြာခဲ့ပါပြီ။ တချို့ဆိုရင် ကျမ နေအိမ်မှာ အကျယ်ချုပ် အချခံထား စဉ် ကတည်းက တွေ့ဖူးခဲ့တဲ့ သူတွေဖြစ်တဲ့ အပြင်၊ တချို့ဆိုလည်း လွတ်လာပြီးနောက်ပိုင်း မှာ တွေ့ခဲ့ရ သူတွေပါ။ ကျမ ဖြတ်သန်း ခဲ့ရတဲ့ ဘ၀ တလျှောက်မှာ နေရာတိုင်းမှာ မိတ်ဆွေတွေ ရှိခဲ့ပါတယ်။ ဒါ့ကြောင့်ပဲ ဒါဟာ စောင့်ရကျိုးနပ် တယ်လို့ပဲ ပြောရပါလိမ့်မယ်။

ဒီကနေ့ ကျမကိုဂုဏ်ပြုချီးမြှင့်လိုက်တဲ့ ဆုဟာ ကျမတို့ပြည်သူတွေရဲ့ ဒီမိုကရေစီရေး မျှော်မှန်းမှုတွေကို အမေရိကန်ပြည်ထောင်စု ကွန်ဂရက်စ်က ထာဝရရှေ့တန်းကနေပြီး မားမားမတ်မတ်ထောက်ခံ သွားမယ် ဆိုတာကို ပြသ လိုက်တာပါပဲ။ အဲဒီတော့ အမေရိကန်ပြည်သူတွေ နဲ့အတူ ကွန်ဂရက်စ် လွှတ်တော် ရဲ့ ကိုယ်စားလှယ်တော်ကြီးတွေ အားလုံးကို ကျမ အသည်းနှလုံး ထဲက နှစ်နှစ်ကာကာ ကျေးဇူး တင်ကြောင်း ပြောပါရစေ။ လွတ်လပ်မှု နဲ့ မျှတမှုဆိုတာကို လက်လှမ်း မမီခဲ့တဲ့ ကျမတို့ဘ၀ အမှောင် ကျနေတဲ့ နှစ်ကာလတွေမှာ ကျမတို့အတွက် မေတ္တာထားဆောင်ရွက်ပေးခဲ့ တာတွေကို ကျေးဇူးတင် ပါတယ်။

ကျမတို့ အကျိုးအတွက် ဆောင်ရွက်ပေးခဲ့သူတွေ အများအပြားရှိခဲ့တဲ့ အတွက် လူတွေအားလုံးရဲ့ နာမည်တွေကို အမည်ဖော်ထုတ်ပြီး ကျေးဇူးတင် စကားပြောနေရ မယ် ဆိုရင် ဒီတနေ့လည်ခင်း နဲ့ မလုံလောက်နိုင်ပါဘူး။ ဒါပေမယ့်လည်း ကျမ အနေနဲ့ ဒီနေ့၊ ဒီနေရာမှာ ကျမနဲ့အတူ ရှိနေစေချင်တဲ့ သူတယောက်ရဲ့ အမည်ကိုတော့ ဖော် ပြပါရစေ။ သူကတော့ လွှတ်တော်အမတ် Tom Lantos ပါ။ (ကွယ်လွန်သွားပြီမို့) သူရှိနေချိန်မှာ ကျမ အရောက် မလာနိုင်ခဲ့တဲ့ အတွက် ၀မ်းနည်းပါတယ်။

သူ့ကိုလက်ဆွဲ နှုတ်ဆက်ပြီး ကျမတို့အတွက် လုပ်ပေးသမျှတွေကို ကျေးဇူး တင်ပါတယ်လို့ ပြောခွင့် မရလိုက်တဲ့ အတွက်လည်း ၀မ်းနည်း ပါတယ်။ ကျမ သူနဲ့ တခါမှ ဆုံတွေ့ခွင့် မရလိုက် ပါဘူး။ ဒါပေမယ့် လည်း သူ့ရဲ့ နွေးထွေးမှုတွေ နဲ့ ကျေးဇူး တရားတွေကို ကျမအမြဲ သတိရနေမှာပါ။

ကျမတို့နိုင်ငံကို ငြိမ်းချမ်းသာယာဝပြောပြီး အခြေခံလူ့အခွင့်အရေးစောင့်ရှောက်နိုင်မယ့်၊ တရား ဥပဒေ စိုးမိုးမယ့် နိုင်ငံတော် တခု ဖြစ်စေရေး ထူထောင်သွားကြရမယ့် ကျမ တို့ရဲ့ ရှေ့လုပ်ငန်းစဉ်မှာ တစိုက် မတ်မတ် ကူညီသွားကြမယ့် မိတ်ဆွေရင်းချာတွေ ကြားမှာ ကျမ အခုရောက်ရှိနေတာပါ။ ကျမတို့ရဲ့ ဒီနိုင်ငံတော် ထူထောင်ရေး လုပ်ငန်းစဉ် တွေဟာ သမ္မတကြီး ဦးသိန်းစိန် ဦးဆောင်ခဲ့တဲ့ ပြုပြင်ပြောင်း လဲရေး လုပ်ငန်းစဉ်တွေကြောင့် ဖြစ်ပေါ်လာရတာပါ။ သမ္မတကြီး နဲ့အတူ အခုသက်တမ်းနုနယ်သေးပေ မယ့် အလျင်အမြန် ရင့်ကျက်လာနေပြီဖြစ်တဲ့ ပြည်ထောင်စု လွှတ်တော်၊ ဒါ့အပြင် ဒီမိုကရေစီ တန်ဖိုးတွေ ကို တစိုက်မတ်မတ် တန်ဖိုးထားကြတဲ့ လူထုကြီး တရပ်လုံးဟာ ကျမတို့ လိုလားသ လို ခေတ်သစ် ကမ္ဘာကြီးထဲမှာ ကျမတို့နိုင်ငံတော်ကို နေရာမှန် ရစေဖို့အတွက် အားအင်အပြည့်နဲ့ ရှေ့တိုးဆောင်ရွက် သွားစေနိုင်မှာဖြစ်ပါတယ်။ မြန်မာနိုင်ငံထဲမှာ ငြိမ်းချမ်းရေးဆွေးနွေးမှုတွေကို ဦးစီးဆောင်ရွက်နေတဲ့ ၀န်ကြီး ဦးအောင်မင်း ကိုယ်တိုင်လည်း အခု လာရောက်ခဲ့တဲ့ အတွက် ကျမ သိပ်ကို အားတက်မိပါ တယ်။ ပြုပြင်ပြောင်း လဲရေးနဲ့ အမျိုးသား ရင်ကြားစေ့ရေး အနာဂတ်အပေါ် ကျမရဲ့ ယုံကြည်မှုတွေ ကိုလည်း ပိုပြီး တိုးပွား လာစေပါတယ်။ ရှေ့မှာ အခက်အခဲတွေ အများကြီးတော့ ရှိနေဦးမှာပါ။

ရှေ့ဆက်အခက်အခဲတွေအများကြီးရှိဦးမယ်ဆိုပေမယ့် ဒီအခက်အခဲ အတား အဆီးတွေ အားလုံးကို မိတ်ဆွေတွေရဲ့ ကူညီ ပံ့ပိုးမှုတွေ နဲ့ ကျော်လွှားနိုင်မယ် ဆိုတာ ကျမ ယုံကြည်ပါတယ်။ ကမ္ဘာပေါ်က သြဇာအရှိဆုံး ဒီမိုကရေစီနိုင်ငံကြီးက ကိုယ်စားလှယ်တော်တွေ နဲ့ မြန်မာ့ ဒီမိုကရေစီမြတ်နိုးသူတွေ အကြား တည်ဆောက်နိုင်ခဲ့တဲ့ ရင်းနှီးမှု နဲ့ နားလည်မှုတွေဟာ ပြီးခဲ့တဲ့ ဆယ်စုနှစ်တွေ နဲ့ ချီပြီး ကျမတို့ ခံစား နာကျင်ခဲ့ရ တာတွေကို ကြေပျက် သွားစေခဲ့ပါပြီ။ အားလုံးယုံကြည်တဲ့ ပန်းတိုင်တွေဆီကိုရောက်ဖို့ အတူတကွ ဆက်လက်ဆောင်ရွက်နေကြတာနဲ့ အမျှ ဒီရင်းနှီးမှုနှောင်ကြိုးတွေဟာ ပိုပြီး ခိုင်မာလာမှာပါ။

ဒီနေ့ ဒီနေရာကိုလာရောက်ရတာဟာ ကျမအတွက် အခွင့်ထူးတရပ်ပါပဲ။ ဒါပေမယ့် ဒီလိုမျိုး အခွင့်ထူးတွေ မခံစား ရသေးတဲ့သူတွေ အများကြီးရှိသေးတယ်ဆိုတာ ကျမတို့ သတိရကြရပါလိမ့်မယ်။ ကျမတို့ တနိုင်ငံတည်းတင်မဟုတ်ပါဘူး။ လွတ်လပ်မှုဆိုတာကို အိမ်မက်တောင် မမက်နိုင်သေး တဲ့ နေရာတွေ ကမ္ဘာပေါ်မှာ အများကြီးရှိနေပါသေး တယ်။

ကျမတယောက်တည်းအတွက်တင်မက ကျမရဲ့ မိတ်ဆွေရောင်းရင်းတွေ၊ ပြည်သူတွေ အားလုံး ကိုယ်စား ကျမယုံယုံကြည်ကြည် နဲ့ ပြောလိုတာကတော့ ဒီနေ့ဟာ ပေါင်းစည်းညီညွတ်မှု၊ လုံခြုံမှုနဲ့ လွတ်လပ်မှုတွေကိုလိုလားတဲ့ အမေရိကန်ပြည်ထောင်စုနဲ့ မြန်မာနိုင်ငံ က ပြည်သူပြည်သားတွေ အပြင် ကမ္ဘာ့ပြည်သူတွေအားလုံးရဲ့ ဆန္ဒတွေကို ဖြည့်ဆည်းပေးနိုင်မယ့် ရက်ပေါင်းများစွာ၊ နှစ်ပေါင်းများစွာရဲ့ အစပျိုးနေ့ပဲဖြစ်ပါလိမ့်မယ်။

ကျမတို့အားလုံးအတွက် ဘ၀လုံခြုံမှုနဲ့ လွတ်လပ်မှုအကြား အကောင်းဆုံးချိန်ခွင်လျှာညှိပေးနေတာဟာ ဒီမိုကရေစီလမ်းစဉ်ပဲဖြစ်တယ်ဆိုတာ ကျမအမြဲယုံကြည်ပါတယ်။ လူသားဘ၀ရပ်တည်မှုအတွက် လုံခြုံမှု နဲ့ လွတ်လပ်မှု နှစ်ခုစလုံးလိုအပ်ပါတယ်။ လုံခြုံမှုမရှိလျှင် ကမ္ဘာလောကကြီးရဲ့ လှပမှု နဲ့ ငြိမ်းချမ်းမှုတွေ ကို အပြည့်အ၀ ရှာဖွေ ခံစားနိုင်မှာမဟုတ် သလို၊ လွတ်လပ်မှုမရှိဘူးဆိုလျှင်လည်း ကျမတို့ဟာ လူသား ပိုပြီး ဆန်သထက် ဆန်လာနိုင်မယ့် အခွင့်အရေးတွေ ဆုံးရှုံးကြရမှာပါ။ ဒါ့ကြောင့်ပဲ ဒီမိုကရေစီရဲ့ အခြေခံ နဲ့ တန်ဖိုးတွေကို ကျမတို့ မပြတ်စွဲကိုင်ထားကြရတာပါ။ ဒါပြီးပြည့်စုံတယ်လို့တော့ မဆိုနိုင် တာ သေချာပါတယ်။ အမှားအယွင်းမကင်းတဲ့ လူသားတွေရဲ့ ဘ၀မှာ ပြီးပြည်စုံတဲ့ စံနစ်တရပ်ဆိုတာ မရှိခဲ့သေးပါဘူး။ ဒီလိုမပြည့်စုံမှုတွေကြားကပဲ ဒီမိုကရေစီဆိုတာ ကျမတို့ အားလုံး မျှော်လင့်ချက်တွေ ရဲ့ ရှေ့ဆောင် လမ်းပြဖြစ်နေပါတယ်။

ဒီမိုကရေစီကို ယုံကြည်သက်ဝင်တဲ့အတွက် ကမ္ဘာတ၀ှမ်း ကျမတို့ အားလုံးညီညွတ် လာခဲ့ကြရပါ တယ်။ မြန်မာပြည်သူပြည်သားတွေ နဲ့အတူ အားလုံးငြိမ်းငြိမ်းချမ်းချမ်း အတူတကွ ယှဉ်တွဲနေထိုင်နိုင် မယ့် စစ်မှန်တဲ့ဒီမိုကရက်တစ် လူ့ဘောင်ကို တည်ဆောက်နိုင်ဖို့ ခက်ခဲတဲ့ခရီးလမ်းကို လှမ်းကြတဲ့နေရာ မှာ ကျမတို့အားလုံး ငြိမ်းချမ်း ညီညွတ်စွာ လုပ်ဆောင်သွားနိုင်မယ်လို့ ယုံကြည်ပါတယ်။ မြန်မာနိုင်ငံဟာ တိုင်းရင်းသားလူမျိုးပေါင်းစုံ မှီတင်းနေထိုင်တဲ့ နိုင်ငံတခုပါ။ ဒီလို ငြိမ်းချမ်းညီညွတ်စွာ လုပ်ဆောင် ခြင်း အားဖြင့် အားလုံးရဲ့ လှပတဲ့ အိမ်မက်တွေအကောင်အထည်ပေါ်လာနိုင်မယ့် ပန်းတိုင်နေရာတခု ကို ရောက်ရှိနိုင်ပြီး ကူညီတဲ့မိတ်ဆွေတွေအားလုံးအတွက်လည်း ကျေနပ်မှုတွေရစေလိမ့်မယ်လို့လည်း ကျမယုံကြည်ပါတယ်။ ကျေးဇူးပါ။

(တိုက်ရိုက်ပြောသည့် မိန့်ခွန်းမှ ဆီလျော်အောင် ဘာသာပြန်ထားပါသည်။)

Ref: ဧရာဝတီ

Read More...

Collapse...

၈၈ မျိုးဆက်ကျောင်းသား ၁၉ ဦး နိုင်ငံကူး လက်မှတ်ရရှိ

2012-09-19

၂၀၁၂ မတ်လအတွင်းက လျှောက်ထားတဲ့ ၈၈ မျိုးဆက်ကျောင်းသား ၁၉ ဦးရဲ့ နိုင်ငံကူးလက်မှတ်တွေ ဒီကနေ့ ရရှိပြီလို့ သိရပါတယ်။ ဒီကနေ့ နေ့လည်မှာ နိုင်ငံကူး လက်မှတ်ရုံးက ကိုမြအေးဆီ ဖုန်းဆက်ပြီး နိုင်ငံကူး လက်မှတ်တွေ ရရှိပြီဖြစ်ကြောင်း အကြောင်းကြားလာတာ ဖြစ်တယ်လို့ ၈၈ မျိုးဆက် ကျောင်းသား တစ်ဦးဖြစ်တဲ့ ကိုစိုးထွန်းက RFA ကိုပြောပါတယ်။

"ဒီနေ့ ပတ်စ်ပို့ ရုံးကနေ လှမ်းအကြောင်းကြားတာပါ။ ရဲမှူးကြီး စိုးထွန်းအောင်နဲ့ တွေ့လိုက်ပါ ဆိုပြီးတော့ သတင်း တပ်ဖွဲ့မှူး ကိုဝင်းနိုင်ထွန်း ကနေ ကိုမြအေးကို လှမ်းအကြောင်းကြားတယ်။ အဲတာကြောင့် ကျွန်တော်တို့ ရဲမှူးကြီး စိုးထွန်းအောင်နဲ့ သွားတွေ့တာပေါ့နော်"

အခုလို ပထမအသုတ် အနေနဲ့ ၈၈ မျိုးဆက်ကျောင်းသား ၁၉ ဦးကို နိုင်ငံကူး လက်မှတ် ချပေးလိုက်တဲ့ အပေါ် ၀မ်းသာ ကြိုဆိုကြောင်း ၈၈ မျိုးဆက် ကျောင်းသားခေါင်းဆောင် ကိုကိုကြီးက RFA ကို ပြောပါတယ်။

"ပုံမှန် နိုင်ငံသားတစ်ယောက်ကို ၂၁ ရက်အတွင်းမှာ နိုင်ငံကူးလက်မှတ် ရစေရမယ်လို့ တိုင်းသိပြည်သိ ကြေညာ ထားပြီးတော့ နိုင်ငံရေး အကျဉ်းသားဟောင်းတွေ အထူးသဖြင့် ကျောင်းသား လူငယ်တွေ နိုင်ငံကူး လက်မှတ် ပိတ်ခံ ထားရတယ် ဆိုတာက ဒါဘယ်လိုမှ မဖြစ်သင့်တဲ့ ကိစ္စလေ။ အဲတော့ ကျွန်တော်တို့ ပထမတစ်သုတ် တင်လိုက်တာ အယောက် ၂၀ နီးပါး ကျလာတယ်လို့ ကြားရတော့ ဘာပဲပြောပြော ကျွန်တော်တို့ ဝမ်းသာပါတယ်။ ကျွန်တော်တို့ မင်းကိုနိုင်တို့က စပြီးတော့ သူတို့တွေပါ ဒီနိုင်ငံကူလက်မှတ် ရပြီ ဆိုတဲ့ အချိန်မှာ ကျန်တဲ့ အငယ်တွေ ဥပမာ ကျောင်းသွားတက်ချင်တာ ရှိမယ်။ လေ့လာရေး သွားချင်တာ ရှိမယ်။ အဲဒီလူတွေရဲ့ ဗဟုသုတ ရှာဖွေ ဆည်းပူးတဲ့မျိုးမှာ ဒါအပိတ်အပင် အဟန့်အတား တစ်ခု ဖြစ်မနေသင့်ဘူးပေါ့။ ပြည်ပက လူတွေတောင်မှ အခု လာလည်နေကြပြီ။ ပြန်သွားကြမယ်။ အဲဒီလောက် ဖြစ်နေတဲ့အချိန်မှာ ကျန်တဲ့ နိုင်ငံရေး အကျဉ်းသားတွေ အားလုံးကိုလည်း တပြေးညီပေါ့။ ပုံစံတစ်ခု သတ်မှတ်ပြီးတော့ နိုင်ငံကူး လက်မှတ်နဲ့ ပတ်သက်တဲ့ဟာကို စီစဉ်ပေးသင့်တယ်လို့ မြင်တယ်"

ဒီကနေ့ နိုင်ငံကူးလက်မှတ်ရရှိတဲ့ ၈၈ မျိုးဆက် ကျောင်းသားတွေကတော့ ကိုမင်းဇေယျ၊ ကိုဌေးကြွယ်၊ ကိုစိုးထွန်း၊ ကိုပဏ္ဍိတ်ထွန်း၊ ကိုထွန်းမြင့်အောင်၊ ကိုအံ့ဘွယ်ကျော်၊ ကိုဇော်သက်ထွေး၊ ကိုပြုံးချို၊ ကိုသက်ဇော်၊ ကိုလှမျိုးနောင်၊ ကိုရဲဝင်း၊ ကိုမျိုးမင်းထိုက်၊ ကိုမျိုးအောင်ထွေး၊ မမီးမီး ခေါ် မသင်းသင်းထွေး၊ မယဉ်ယဉ်ဝိုင်း၊ မသရဖီ သိန်းမြင့်ထွန်းတို့ ဖြစ်ပါတယ်။

၈၈ မျိုးဆက် ကျောင်းသား ၁၉ ဦးဟာ မတ်လအတွင်းက တပြိုင်နက်ထဲ နိုင်ငံကူးလက်မှတ် လျှောက်ထားရာမှာ လွန်ခဲ့တဲ့ သီတင်းပတ်အတွင်း ကိုကိုကြီး၊ ကိုမင်းကိုနိုင်နဲ့ ကိုမြအေးတို့ ၃ ဦး ကိုသာ နိုင်ငံကူး လက်မှတ် ချပေးခဲ့တဲ့အတွက် တပြေးညီ မရှိဘူးဆိုပြီး ကိုမင်းကိုနိုင်က NED အဖွဲ့ကပေးမယ့် ဆုလက်ခံယူဖို့ အမေရိကန် ခရီးစဉ်ကို ဖျက်သိမ်းခဲ့ပါတယ်။

Ref: RFA News

Read More...

Collapse...

ဒေါ်အောင်ဆန်းစုကြည် သမ္မတအိုဘားမားနဲ့တွေ့ဆုံ

19.09.2012

အမေရိကန် ပြည်ထောင်စုမှာ သီတင်း ၃ ပတ် နီးပါးကြာ ခရီးစဉ်အဖြစ် ရောက်ရှိနေတဲ့ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်း စုကြည်ဟာ ဗုဒ္ဓဟူးနေ့မှာတော့ သမ္မတ ဘရက်ခ် အိုဘားမားနဲ့ တွေ့ဆုံခဲ့ပါတယ်။ တွေ့ဆုံမှု အသေးစိတ်နဲ့ ပတ်သက်လို့တော့ တစုံတရာ ထုတ်ပြန်ခဲ့တာမျိုး မရှိပါဘူး။

အိမ်ဖြူတော် ပြောခွင့်ရသူ Jay Carney ကတော့ မြန်မာနိုင်ငံမှာ တရားမျှတပြီး ပွင့်လင်းမြင်သာမှု ရှိတဲ့ ဒီမိုကရေစီ အစိုးရတရပ် ပေါ်ထွန်းရေး အတွက် ဒေါ်အောင်ဆန်းစုကြည် နဲ့ မြန်မာ လူထုရဲ့ လှုပ်ရှားမှုတွေ အပေါ် အမေရိကန် ပြည်ထောင်စုက နှစ်ပေါင်းများစွာ အားပေး ထောက်ခံမှုတွေကို ထပ်မံ အတည်ပြု ပေးနိုင်မယ့် အခွင့် အလမ်း တရပ်အဖြစ် ရည်ညွန်း ပြောဆိုသွားပါတယ်။

ဗုဒ္ဓဟူးနေ့ အစောပိုင်းမှာတော့ မြန်မာနိုင်ငံမှာ ဒီမိုကရေစီရေးအတွက် စွမ်းစွမ်းတမံ ကြိုးပမ်းမှုတွေ အတွက် ချီးမြှင့်တဲ့ အမေရိကန် ကွန်ဂရက် လွှတ်တော်ရဲ့ ဂုဏ်ပြုဆုကို ၀ါရှင်တန်ဒီစီ ဒေသစံတော်ချိန် မွန်းလွဲပိုင်းမှာ ဒေါ်အောင်ဆန်းစုကြည် လက်ခံ ရယူပါတယ်။ စစ်အစိုးရ လက်ထက် နေအိမ် အကျယ်ချုပ် နဲ့ ဖမ်းဆီးခံထားရချိန် ၂၀၀၈ ခုနှစ်မှာတုန်းက ချီးမြှင့်ထားတဲ့ ကွန်ဂရက် လွှတ်တော်ရဲ့ အရပ်သားတွေ ကို ပေးအပ်တဲ့ အမြင့်ဆုံး ရွှေတံဆိပ်ဆုကို လက်ခံ ရယူခဲ့တာပါ။

ဆုလက်ခံ ရယူချိန်မှာတော့ မြန်မာနိုင်ငံက ဒီမိုကရေစီရေး လှုပ်ရှားမှုတွေကို နှစ်ပေါင်းများစွာ အားပေး ခဲ့တဲ့အပေါ် ဒေါ်အောင်ဆန်းစုကြည် က ကျေးဇူးတင်စကား ပြောဆိုသွားခဲ့သလို မြန်မာနိုင်ငံမှာ လွတ်လပ်ခွင့်နဲ့ ဒီမိုကရေစီရေးအတွက် ပန်းတိုင်ကို မရောက်သေးတဲ့ အကြောင်းကိုလည်း ပြော ဆိုသွားပါတယ်။

Ref: VOA News

Read More...

Collapse...

ဒေါ်အောင်ဆန်းစုကြည် အမေရိကန်လွှတ်တော်မှာ ဂုဏ်ပြုဆုလက်ခံ

ကိုသိန်းထိုက်ဦး
19.09.2012

ဒေါ်အောင်ဆန်းစုကြည်ဟာ အမေရိကန်ကွန်ဂရက်စ်လွှတ်တော်က အရပ်သားတွေကို ဂုဏ်ပြုပေး အပ်တဲ့ ဆုတွေထဲမှာ အမြင့်ဆုံးဖြစ်တဲ့ Congressional Gold Medal ဆုကို ဗုဒ္ဓဟူးနေ့တုန်းက လက်ခံ ရယူခဲ့ပါတယ်။ Capitol Hill လွှတ်တော် အဆောက်အအုံမှာ လုပ်ခဲ့တဲ့ ဆုပေးပွဲ အခမ်းအနား ကို အမေရိကန်ပြည်ထောင်စုရဲ့ ထိပ်တန်း လွှတ်တော် အမတ်တွေ အပြင် အမေရိကန်နိုင်ငံခြားရေး ဝန်ကြီး ဟီလာရီ ကလင်တန် သမ္မတဟောင်း ကတော် လော်ရာဘုရှ် တို့ကလည်း တက်ရောက်ပြီးတော့ ချီးကျူး ဂုဏ်ပြုစကားတွေကို ပြောခဲ့ကြပါတယ်။ ဒီ ကွန်ဂရက်စ် လွှတ်တော် အကြောင်း အပြည့်အစုံ ကိုတော့ ကိုယ်တိုင် တက်ရောက် သတင်းယူခဲ့တဲ့ ကိုသိန်းထိုက်ဦးက တင်ပြပေး ထားပါတယ်။

မြန်မာနိုင်ငံ ဒီမိုကရေစီနိုင်ငံ ထူထောင်ရေး လုပ်ငန်းစဉ်တွေဟာ သမ္မတ ဦးသိန်းစိန် ဦးဆောင်တဲ့ပြုပြင်ပြောင်းလဲရေး လုပ်ငန်းစဉ်တွေကြောင့် ဆိုပြီး အခမ်းအနားမှာ ဒေါ်အောင်ဆန်းစုကြည်က ချီးကျူး ပြောဆို သွားပါတယ်။

တချိန်တည်းမှာ ပြုပြင်ပြောင်းလဲရေးနဲ့ အမျိုးသားရင်ကြားစေ့ရေးလုပ်ငန်းတွေ အခက် အခဲတွေ အများကြီး ရှိနေသေး တယ်လို့လည်း သူက ဆိုပါတယ်။

ကွန်ဂရက်စ်လွှတ်တော်ရဲ့ရွှေတံဆိပ်ဆုပေးပွဲအခမ်းအနားမှာ အမေရိကန် နိုင်ငံခြား ရေးဝန်ကြီး ဟီလာရီ ကလင်တန်၊ အောက်လွှတ်တော် သဘာပတိ John Bohner၊ ရီပတ်ဗလစ်ကန် ဆီးနိတ် လွှတ်တော် အမတ် John McCain၊ ဒီမိုကရက် အထက် လွှတ်တော် အမတ် Dinne Feinstein၊ သမ္မတကတော်ဟောင်း Laura Bush နဲ့ ဒီဆုကို ချီးမြှင့်ဖို့ အဆိုပြုခဲ့တဲ့ ရီပတ်ဗလစ် ကန် ခေါင်းဆောင် အထက်လွှတ်တော် Mitch McConnell တို့ ဒေါ်အောင် ဆန်းစုကြည်နဲ့အတူ စဉ်မြင့်ပေါ်မှာ ရှိခဲ့ပါတယ်။

မြန်မာ့အရေးကို အမေရိကန်ပြည်ထောင်စု လွှတ်တော်အတွင်းမှာ ပါတီကြီးနှစ်ခုလုံး က ခေါင်းဆောင်တွေ ထောက်ခံတယ် ဆိုတာ ပြသလိုက်တဲ့ အခမ်းအနားလည်း ဖြစ်နေပါတယ်။

ဒီအခမ်းအနား မှာ မြန်မာအစိုးရ သမ္မတရုံးဝန်ကြီး ဦးအောင်မင်းနဲ့ အမေရိကန်ဆိုင်ရာ အမေရိကန် သံအမတ်ကြီး ဦးသန်းဆွေ တို့လည်း တက်ရောက်ခဲ့တဲ့ အတွက် ဒေါ်အောင်ဆန်းစုကြည် ကိုယ်တိုင် က မြန်မာ့နိုင်ငံရေးပြုပြင်ပြောင်းလဲ မှုနဲ့ အမျိုးသား ရင်ကြားစေ့ရေး အနာဂတ်အတွက် အထူးတလည် အားတက်မိကြောင်း ပြောကြား ခဲ့ပါတယ်။

အမေရိကန် နိုင်ငံခြားရေး ၀န်ကြီး ကလင်တန်ကလည်း ဒါကို ကြိုဆိုခဲ့ပါတယ်။

နိုင်ငံခြားရေး ၀န်ကြီး ဟီလာရီကလင်က အခမ်းအနား တက်ရောက်လာတဲ့ ၀န်ကြီးချုပ်ရုံး ၀န်ကြီး ဦးအောင်မင်းနဲ့ မြန်မာ သံအမတ်ကြီး တို့ကို ကြိုဆို တဲ့အကြောင်း ပြောဆိုသွားပါတယ်။

ဒေါ်အောင်ဆန်းစုကြည်ဟာ ဒီမိုကရေစီနဲ့ လွှတ်တော်ခေါင်းဆောင် တယောက်အဖြစ်နဲ့ သာမကပဲ အခုလို အမေရိကန်ပြည် ထောင်စု ဒီမိုကရေစီရဲ့ ဗဟို လွှတ်တော် အဆောက်အအုံ ကြီးရဲ့ ပေါင်းမိုး ခမ်းမဆောင်မှာ ဒီလို အခမ်းအနား တက်ရောက် လာနိုင်တာကို သူ့အနေနဲ့ မယုံနိုင်လောက်အောင် ဝမ်းသာမိတဲ့ အကြောင်း ဟီလာရီကလင်တန်က ပြောဆိုသွားပါတယ်။

ကွန်ဂရက်စ်လွှတ်တော်က ချီးမြှင့်တဲ့ဆုကိုတော့ အောက်လွှတ်တော် သဘာပတိ John Bohner ကိုယ်တိုင် ပေးအပ်ခဲ့တာဖြစ်ပါတယ်။

မြန်မာ့အရေးကို တစိုက်မတ်မတ် အားပေးထောက်ခံခဲ့တဲ့ နယူးယောက်မြို့နယ်က ဒီမိုက ရက် အောက်လွှတ်တော် အမတ် Joseph Crowley က လွန်ခဲ့တဲ့နှစ်နှစ်အတွင်း မြန်မာနိုင်ငံမှာ တိုးတက်ဖြစ်ထွန်းမှုတွေ အများကြီးတွေ့ရတဲ့ အကြောင်း၊ ဒီလို အပြောင်း အလဲတွေပေါ် လာအောင် ဆောင်ရွက်နိုင်ခဲ့တဲ့ သူတွေကို ချီးကျူးရမှာဖြစ်ပြီး အဲဒီအထဲမှာ လက်ရှိ အစိုးရ ခေါင်းဆောင်တွေကိုလည်း ထည့်သွင်းရမှာဖြစ်တယ်လို့ ထည့်သွင်း ပြောဆိုသွားပါတယ်။

မြန်မာနိုင်ငံသားတွေပေးဆပ်အနစ်နာခံခဲ့တဲ့ ဒီမိုကရေစီနဲ့ လူ့အခွင့်အရေး အတွက် ပြုပြင်ပြောင်း လဲရေး လုပ်ငန်းတွေ မပြီးပြတ်သေးတာ မို့လို့ လည်း ရှေ့ဆက် မျက်ခြေမပြတ်စောင့်ကြည့်ဖို့ လိုမယ် ဆိုပြီး အောက်လွှတ်တော် အမတ် ဂျိုးဇက် ခရော်လီက ပြောပါတယ်။

အရီဇိုးနားပြည်နယ်အထက်လွှတ်တော်အမတ် ဂျွန်မက်ကိန်းက မြန်မာပြည်သူတွေအတွက် ဂုဏ်သိ က္ခာ၊ တရား မျှတမှုနဲ့ မျှော်လင့်ချက်တွေပေးနိုင်ဖို့ အနစ်နာခံ စွန့်လွှတ်ခဲ့တဲ့ စံနမူနာ ထားရမယ့် သူ့ရဲ့ သူရဲကောင်း တစ်ယောက် အဖြစ် ဒေါ်အောင်ဆန်းစုကြည်ကို ချီးကျူးပြောဆို သွားခဲ့ပါတယ်။

သမ္မတဟောင်းကတော် လော်ရာဘွတ်ရ်ှကတော့ - ဒီနေ့ဟာ မြန်မာပြည်ရဲ့ မိခင်လို့ ပြောရမယ့် အမျိုးသမီး တစ်ယောက် ကို ဂုဏ်ပြုတဲ့နေ့ပါ ဆိုပြီး အခမ်းအနားမှာ ပြောဆို သွားပါတယ်။

မြန်မာပြည်ရဲ့ ပြုပြင်ပြောင်းလဲရေးနဲ့ ပြန်လည်သင့်မြတ်ရေး လုပ်ငန်းတွေ ရှေ့ဆက် လုပ်ကိုင်နိုင်ရေး အတွက် ဒေါ်အောင်ဆန်းစုကြည်ရဲ့ ရဲစွမ်းသတ္တိ၊ အမြော်အမြင် နဲ့ ဦးဆောင်မှုတွေ လိုအပ်တဲ့ အကြောင်းကိုလည်း သမ္မတဟောင်း ကတော် လောရာဘွတ်ရ်ှက ပြောဆိုပါတယ်။ ဒေါ်အောင်ဆန်းစုကြည်ကတော့ ဆုပေးပွဲမှာ အခုလို မိန့်ခွန်းပြောဆို သွားပါတယ်။

“ ဒီနေ့ ကျမကို ဂုဏ်ပြုချီးမြှင့်လိုက်တဲ့ဆုဟာ ကျမတို့ပြည်သူတွေရဲ့ ဒီမိုကရေစီရေး မျှော်မှန်းမှုတွေကို အမေရိကန်ပြည် ထောင်စု လွှတ်တော်က ထာဝရရှေ့တန်းကနေပြီးတော့ မားမားမတ်မတ် ထောက် ခံသွားမယ် ဆိုတာကို ပြသလိုက်တာပါပဲ ။ အဲဒီတော့ အမေရိကန်ပြည်သူတွေနဲ့ အတူ ကွန်ဂရက် လွှတ်တော်ရဲ့ ကိုယ်စားလှယ်တော်ကြီးတွေအားလုံးကို ကျမ အသည်းနှလုံး ထဲက နှစ်နှစ် ကာကာ ကျေးဇူးတင်ကြောင်းပြောပါရစေ။ လွတ်လပ်မှုနဲ့ မျှတမှုဆိုတာကို လက်လှမ်းမမှီ ခဲ့တဲ့ ကျမတို့ဘ၀ အမှောင်ကျနေတဲ့ နှစ်ကာလတွေမှာ ကျမတို့အတွက် မေတ္တာထား ဆောင်ရွက်ပေး ခဲ့တာတွေကို ကျေးဇူးတင်ပါတယ်။

“ကျမတို့နိုင်ငံကို ငြိမ်းချမ်းသာယာဝပြောပြီး အခြေခံလူ့အခွင့်အရေးစောင့်ရှောက်နိုင်မယ့် တရား ဥပဒေ စိုးမိုးမယ့် နိုင်ငံတော် တခုဖြစ်စေရေး ထူထောင် သွားကြမယ့် ကျမတို့ရဲ့ ရှေ့လုပ်ငန်းစဉ်မှာ တစိုက်မတ်မတ် ကူညီသွားကြမယ့် မိတ်ဆွေရင်းချာတွေကြားမှာ ကျမ အခုရောက်နေတာပါ။

“ကျမတို့ရဲ့ ဒီနိုင်ငံတော် ထူထောင်ရေးလုပ်ငန်းစဉ်တွေဟာ သမ္မတကြီး ဦးသိန်းစိန်ဦးဆောင်နေ တဲ့ ပြုပြင်ပြောင်းလဲရေး လုပ်ငန်းစဉ်တွေကြောင့် ဖြစ်ပေါ်လာတာပါ။ သမ္မတကြီးနဲ့ အတူ အခု သက်တမ်းနုနယ်သေးပေမယ့် အလျှင်အမြန် ရင့်ကျက် လာကြပြီဖြစ်တဲ့ ပြည်ထောင်စု လွှတ်တော် ၊ ဒါ့အပြင် ဒီမိုကရေစီ တန်ဖိုးတွေကို တစိုက်မတ်မတ် တန်ဖိုးထားကြတဲ့ လူထုကြီး တရပ်လုံးဟာ ကျမတို့ လိုလားသလို ခေတ်သစ် ကမ္ဘာကြီးထဲမှာ ကျမတို့နိုင်ငံတော်ကို နေရာမှန်ရစေဖို့ အတွက် အင်အား အပြည်နဲ့ ရှေ့တိုးဆောင်ရွက်သွားစေနိုင်မှာဖြစ်ပါတယ်။”

ဒေါ်အောင်ဆန်းစုကြည်ဟာ ညနေပိုင်းမှာတော့ သမ္မတအိမ်ဖြူတော်ကိုသွားပြီး သမ္မတ အိုဘားမား နဲ့တွေ့ဆုံပါတယ်။ ဒါပေမဲ့လည်း တွေ့ဆုံပွဲနဲ့ ပတ်သက်လို့တော့ သတင်းဌာနတွေကို ပြော ဆိုခြင်းတော့ မရှိပါဘူး။ အိမ်ဖြူတော် ပြောရေး ဆိုခွင့်ရှိသူ ဂျေးကာနီကတော့ တရားမျှတပြီး ပွင့်လင်းမှုရှိတဲ့ ဒီမိုကရေစီ အစိုးရပေါ်ထွန်းရေး အတွက် ဒေါ်အောင်ဆန်း စုကြည်နဲ့ မြန်မာပြည်သူတွေ ရဲ့ လှုပ်ရှားမှုအပေါ် အမေရိကန်ပြည်ထောင်စုက ကာလရှည်ကြာထောက်ခံ လာမှုတွေကို ထပ်မံ အတည်ပြုနိုင်မယ့် အခွင့်အရေး တစ်ရပ်ဖြစ်တယ် ဆိုပြီး ပြောဆို ထားပါတယ်ခင်ဗျာ။

Ref: VOA News

Read More...

Collapse...

ကချင်အရေး ဒေါ်အောင်ဆန်းစုကြည် နှုတ်ပိတ်နေခြင်း မဟုတ်ကြောင်း ဦးဝင်းတင် ငြင်းဆို

လင်းသန့်
September 19, 2012

မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်သည် ကချင်ပြည်နယ်တွင် ဖြစ်ပွားနေသည့် စစ်ပွဲများနှင့် ပတ်သက်သည့် အရေး နှုတ်ပိတ်နေသည်ဟူသော ပြောဆိုမှုများကို မှားယွင်းကြောင်း အမျိုးသား ဒီမိုကရေစီ အဖွဲ့ချုပ် ပါတီ (NLD) ပါတီခေါင်းဆောင် တဦးဖြစ်သူ ဦးဝင်းတင်က ဧရာဝတီကို ပြောသည်။

“ဒေါ်စု ကတော့ ငြိမ်းချမ်းရေးနဲ့ ပတ်သက်လာရင်၊ ဒီမိုကရေစီရေးနဲ့ ပတ်သက်လာရင် ဘာမှ နှုတ်ပိတ်တယ်လို့ မရှိဘူး။ ဒေါ်စု ပြောနေတဲ့ အကြောင်းက ပထမဆုံး အပစ်အခတ်တွေ ရပ်စဲဖုိ့ လိုတယ်၊ ပစ်နေခတ်နေကြရင် ဆွေးနွေးပွဲ ဆိုတာ မဖြစ်နိုင်ဘူး၊ နောက်တချက်က တိုင်းရင်းသား အရေးနဲ့ ပတ်သက်လာရင် တိုင်းရင်းသားတွေရဲ့ တောင်းဆိုချက်ဖြစ်တဲ့ ကိုယ့်ကြမ္မာ ကိုယ်ဖန်တီးရေး၊ တန်းတူ အခွင့်အရေး ဆိုတဲ့ အချက် ၂ ချက်ကို ကြည့်ပြီး စစ်မှန်သည့် ဒီမိုကရေစီ ပြည် ထောင်စု ဆိုတာဖြစ်ဖို့ ညှိနှိုင်း ဆွေးနွေးကြပါ ဆိုတာ ပြောနေတာ” ဟု သူက ဆိုသည်။

တချိန်တည်းတွင် ယခုလက်ရှိ အမေရိကန် ပြည်ထောင်စုကို ရောက်ရှိနေသည့် ဒေါ်အောင်ဆန်းစုကြည်အား ချီးမြှင့် သည့် ဆု လက်ခံ ရရှိခြင်းကို ဂုဏ်ယူမိကြောင်း၊ သို့သော် အဆိုပါ အခမ်းအနားကို ကချင် တိုင်းရင်းသားများ အနေဖြင့် ပါဝင်နိုင်ခြင်း မရှိကြောင်း အမေရိကန်နိုင်ငံ ကချင် မဟာမိတ် (Kachin Alliance – KA) က ဒေါ်အောင်ဆန်းစုကြည် ထံသို့ စက်တင်ဘာ ၁၆ ရက်နေ့ နေ့စွဲဖြင့် စာပို့ထားသည်။

“ဒေါ်အောင်ဆန်းစုကြည်က တချိန်မှာ အမျိုးသား ခေါင်းဆောင်ဖြစ်ခဲ့ပေမယ့် အခုအချိန်မှာ မြန်မာအစိုးရ ပါတီ ခေါင်းဆောင် တယောက် ဖြစ်နေတယ်။ အဲဒီ ပါတီကလည်း အစိုးရထဲ ပါတဲ့ ပါတီဖြစ်တယ်။ လွှတ်တော်ကလည်း အစိုးရကို ထောက်ခံနေတယ်လေ” ဟု အမေရိကန်နိုင်ငံ ကချင် မဟာမိတ်၏ တာဝန်ခံ ဖြစ်သူ Nsang Gum San က ပြောဆိုကြောင်း ကချင်သတင်းဌာန က သတင်းရေးသား ထားသည်။

လက်ရှိ ကာလ ကချင်ပြည်နယ်တွင် နေ့စဉ် ရက်ဆက် ဖြစ်ပွားနေသော စစ်မက်ဘေးဒဏ်ကြောင့် မိမိတို့၏ ဆွေမျိုး သားချင်းများ လျစ်လျူရှု ခံနေရကြောင်း၊ ၎င်းတို့ ဆင်းရဲ ဒုက္ခများနှင့် ၀မ်းနည်း ပူဆွေးသောကများ ဖိစီးမှုဖြင့် ကြေကွဲနေချိန်၊ ကချင် တိုင်းရင်းသားများ သောင်းနှင့်ချီ၍ နေရပ်စွန့်ခွာ ပြောင်းရွှေ့ခံနေရသည့် အချိန် စသည့် အခြေအနေ များတွင် မိမိတို့ အနေဖြင့် ၀မ်းမြောက်ပျော်ရွှင်ရန် မည်သို့မျှ ဆီလျှော် အပ်စပ်ခြင်း မရှိကြောင်း သူက ဆက်ပြောသည်။

ဒေါ်အောင်ဆန်စုကြည် နေအိမ်အကျယ်ချုပ်မှ လွတ်မြောက်လာစဉ် ကတည်းက သတင်း မီဒီယာများနှင့် ပြောဆိုမှုများ၊ ကြေညာချက် များက ထုတ်ဖော်ပြသလျှက်ကြောင်း၊ လွန်ခဲ့သည့် ဇူလိုင်လက ထုတ်ပြန်ခဲ့သည့် ငြိမ်းချမ်းရေး အတွက် အိတ်ဖွင့်ပေးစာ တွင်လည်း ငြိမ်းချမ်းရေး အတွက် စစ်ရေး တိုက်ခိုက်မှုများအစား နိုင်ငံရေး နည်းလမ်း အရ တွေ့ဆုံ ဆွေးနွေးရေး နည်းလမ်းဖြင့် လုပ်ဆောင် သွားကြရန် သမ္မတ ဦးသိန်းစိန်နှင့် တိုင်းရင်းသား လက်နက်ကိုင် အဖွဲ့ ၄ ဖွဲ့ တို့ကို အိတ်ဖွင့်စာပေးပို့ မေတ္တာရပ်ခံ ကမ်းလှမ်းခဲ့ကြောင်း ဦးဝင်းတင်က ပြောသည်။

ဒေါ်အောင်ဆန်းစုကြည်သည် ထိုစဉ်က တိုင်းရင်းသား လက်နက်ကိုင် အင်အားစုများနှင့် အစိုးရ အကြား စွန့်စားပြီး ၀င်ရပ်မည် ဟု ပြောဆိုခဲ့ကြောင်း၊ အဆိုပါ ကိစ္စ လုပ်ဆောင် မပေးနိုင်ပါက ကြားညပ်ကာ အန္တရာယ်ကြီးသည့် ကိစ္စဖြစ် ကြောင်း သိလျှက် ရပ်တည် ခဲ့ကြောင်း သူက ဆက်ပြောသည်။

“ဒီကိစ္စနဲ့ပတ်သက်ပြီး ကျမတို့တော့ ကြားဝင်ရပ်ပေးမှဖြစ်မယ်၊ မလုပ်ရင်တော့ ပိုဆိုးလိမ့်မယ် ဆိုပြီး ဒေါ်စု ပြောတဲ့ စကား ကျနော် မှတ်မိနေသေးတယ်” ဟု ဦးဝင်းတင်က ဆိုသည်။

ထိုစဉ်က ဒေါ်အောင်ဆန်းစုကြည်၏ ငြိမ်းချမ်းရေး ဆိုင်ရာ တတ်စွမ်းသမျှ ကူညီပေးသွားမည် ဟု ပြောဆို ကမ်းလှမ်းမှု တွင် တိုင်းရင်းသား အဖွဲ့များက ကြိုဆိုခဲ့ကြသည်။ သို့သော် အစိုးရဘက်က မည်သို့မျှ မတုံ့ပြန်ခဲ့ဟု သိရသည်။

“သဘောကတော့ ဒေါ်စုရဲ့ ကြားဝင်ပေးဖို့ ကမ်းလှမ်းချက်ကို အစိုးရဘက်ကလည်း ဘာမှ မတုံ့ပြန်ခဲ့ဘူး။ ကချင်ဘက် ကလည်း ဘာမှ မတုံ့ပြန်ခဲ့ဘူး” ဟု ဦးဝင်းတင်က ဆိုသည်။

သို့သော် မကြာသေးမီက ဧရာဝတီ သတင်းဌာန အယ်ဒီတာနှင့် အစိုးရ၏ ငြိမ်းချမ်းရေး ကိုယ်စားလှယ် ဦးအောင်မင်း တို့ တွေ့ဆုံရာတွင် ကချင်ပြည်နယ်အရေး အပါအ၀င် ပြည်တွင်း ငြိမ်းချမ်းရေး လုပ်ငန်းစဉ်တွင် ဒေါ်အောင်ဆန်းစုကြည် ၏ အခန်းကဏ္ဍနှင့် ပတ်သက်ပြီး အတိအလင်း အစိုးရဘက်က တုံ့ပြန်ပြောကြားလာခဲ့သည်။

“ဒေါ်အောင်ဆန်းစုကြည်လည်း ၀ိုင်းကူမယ်လို့ ကတိပေးထားပြီးသားပါ။ လိုအပ်တာကိုပြောပါ၊ ၀ိုင်းကူမယ်လို့ ပြောထားပြီးသား။ အဲဒီတော့ ဒေါ်အောင်ဆန်းစုကြည် ကလည်း အခု လွှတ်တော် တက်နေရတာပေါ့ဗျာ။ လွှတ်တော် တက်နေရတော့ သူ မအားလပ်ဘူး။ အားလပ်တဲ့ နောက်ပိုင်း ကာလတွေမှာ သူ ကျနော်နဲ့ လိုက်မှာပေါ့ဗျာ။ ခင်ဗျားတို့ အဲဒါ စောင့်ကြည့်လိုက်ပေါ့” ဟု ဦးအောင်မင်း ကလည်း ပြောထားသည်။

NLD ပါတီသည် အာဏာရပါတီမဟုတ်ကြောင်း၊ ညှိနှိုင်းဆွေးနွေးရေးနှင့် ပတ်သက်၍ ၂ ဘက်စလုံးကို တိုက်တွန်း၍ အပစ်အခတ် ရပ်စဲရေး မေတ္တာရပ်ခံသည့် အဆင့်သာ လုပ်နိုင်ပြီး တကယ် ငြိမ်းချမ်းရေး ပြောဆိုရေးမှာ အစိုးရနှင့် ကချင်ပြည်နယ် လွတ်မြောက်ရေး အဖွဲ့ (KIO) တို့သာဖြစ်ကြောင်း ဦးဝင်းတင်က ဆိုသည်။

တဖက်တွင်လည်း KIO က မြန်မာအစိုးရ ငြိမ်းချမ်းရေး ကိုယ်စားလှယ်၏ ငြိမ်းချမ်းရေး စကားပြောရန် နေပြည်တော်သို့ ဖိတ်ခေါ်မှုကို ပယ်ချလိုက်ပြီဖြစ်သည်။

“စစ်ရေး တင်းမာတဲ့အချိန်မှာ အစိုးရ ထိမ်းချုပ်ထားတဲ့နေရာကို သွားပြီးတော့ တွေ့ဆုံဆွေးနွေးဖို့ အဖြစ်ဘူးဆိုတဲ့ အကြောင်း အရင် ကတည်းက ပြောပြီးသားရှိတယ်။ အမှန်တော့ သမ္မတကြီး ခေါ်တာ မဟုတ်ပါဘူး။ ဦးအောင်မင်းက တွေ့ဆုံဖို့ နေရာကို နေပြည်တော်မှာ လုပ်ရအောင်ဆိုပြီး ပြောတာပါ၊ ကျနော်တို့ မလာနိုင်တဲ့ အကြောင်းလည်း သူတို့ကို အကြောင်း ပြန်ကြားခဲ့ပြီးပါပြီ” ဟု KIO ပြောခွင့်ရပုဂ္ဂိုလ် ဦးလနန်က ဧရာဝတီကို ပြောသည်။

သြဂုတ်လ၂၅ ရက်နေ့က အစိုးရနှင့် KIO တို့ ငြိမ်းချမ်းရေး စကားပြောရန် အစိုးရ ကိုယ်စားလှယ် ဦးအောင်မင်းက ပထမ မူဆယ် မြို့တွင် ပြောဆိုနိုင်ရေး အတွက် ကမ်းလှမ်းခဲ့ရာ မူဆယ်သို့ မလာနိုင်ကြောင်းပြောခဲ့၍ နေပြည်တော်သို့ လာရောက်ရန် ပြောဆို ခဲ့ခြင်းသာဖြစ်ကြောင်း သူက ဆက်ပြောသည်။

သို့သော် စစ်ပွဲများ ဖြစ်ပွားနေသော ကချင်ပြည်နယ်တွင် ငြိမ်းချမ်းရေး ခြေလှမ်းများ စတင် အကောင်အထည်ဖော်ရန် အတွက် ကြားခံ ဆက်သွယ်ရေး ရုံးဖြစ်သည့် Justice and Negotiation Center တခုကို လွိုင်ဂျယ်ရှိ ဖရန်ငွန်ရွာတွင် ယမန်နေ့က ဖွင့်လှစ်နိုင်ခဲ့ကြောင်း သိရသည်။

“အဓိက ရည်ရွယ်တာကတော့ ကျနော်တို့ KIO အဖွဲ့နဲ့ အစိုးရ ကိုယ်စားလှယ်အဖွဲ့တွေ တွေ့ဆုံဖို့ပေါ့၊ အနီးကပ် စောင့် ကြည့် လေ့လာဖုိ့ ရယ်၊ လိုအပ်တဲ့ အကြံပေးချင်တဲ့ ပုဂ္ဂိုလ်တွေ အဲဒီရုံးမှာ လာပြီးမှ အကြံဉာဏ် ပေးနိုင်ဖို့ရယ် အတွက် ဖွင့်ဖြစ်တာပါ” ဟု ဦးလနန်က ပြောသည်။

ယခု ဖွင့်လှစ်လိုက်သည့် နေရာကို အစိုးရ ကိုယ်စားလှယ် ဦးအောင်မင်းနှင့် ၂ ဘက် သဘောတူ ဆွေးနွေးမှု အရ KIO ထိမ်းချုပ်နယ်မြေလည်း မဟုတ်၊ အစိုးရ စစ်တပ် စစ်စခန်း ချရာနေရာလည်း မဟုတ်သည့် ၂ ဘက် သွားလာရေး ကြား ကျသည့် နေရာကို ရွေးချယ် ခဲ့ခြင်းဖြစ်ကြောင်း၊ အစိုးရနှင့် KIO ၂ ဘက် တွေ့ဆုံမှု အသေးစိပ် မှတ်တမ်းများကို အများ သိရှိလေ့လာနိုင်ရန် ယခု ရုံးတွင် ထားရှိမည်ဖြစ်ကြောင်းသူက ဆက်ပြောသည်။

မြန်မာအစိုးရနှင့် KIO တို့မှာ ၁၇ နှစ်ကြာ အပစ်အခတ်ရပ်စဲရေးများ လုပ်လာခဲ့ပြီး ယမန် နှစ် ဇွန်လမှ စတင်ကာ သဘောတူညီမှုများ ပျက်ကာ တိုက်ပွဲများ ဆက်တိုက်ဖြစ်ပွားခဲ့၍ ဒုက္ခသည် ၉ သောင်း ကျော်ခန့်တို့ အိုးအိမ်များ စွန့်ခွာ ထွက်ပြေးကြရသည်။

ကချင်ပြည်နယ်တွင်း စစ်ပွဲများကြောင့် စစ်ပြေးဒုက္ခသည်များ အရေး၊ အမြန်ဆုံး စစ်ပွဲများ ရပ်စဲပြီး ငြိမ်းချမ်းရေး ရရှိရေး အတွက် ပြည်တွင်း ပြည်ပတို့မှ စိုးရိမ်မှုများ မြင့်တက်နေပြီး ငြိမ်းချမ်းရေး လိုလားသူများကလည်း ပုံသဏ္ဍန် အမျိုးမျိုး ဖြင့် လှုံ့ဆော်မှုများရှိကြသည်။ ဒုက္ခသည်များကိုလည်း ကူညီပေးမှုများ၊ အားပေးနှစ်သိမ့်မှုများ အဆက်မပြတ် လုပ်ဆောင်နေကြသည်။

စက်တင်ဘာလ ၂၁ ရက်နေ့တွင်လည်း ငြိမ်းချမ်းရေး လိုလားသူများက ကချင်ပြည်နယ် စစ်ပွဲများ ရပ်စဲရေးအတွက် ငြိမ်းချမ်းရေး လမ်းလျှောက်ပွဲတခုကို နိုင်ငံအနှံ့ လုပ်ဆောင်ရန် လှုံ့ဆော်ထားသည်။

Ref: ဧရာဝတီ

Read More...

Collapse...

ကြံ့ခိုင်ရေးပါတီ ညီလာခံ ခေါ်ယူမည်

နန်းဆိုင်နွမ်
September 20, 2012

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ခိုင်ရေးပါတီ) ၏ ပထမဆုံးအကြိမ် ပါတီ ညီလာခံကို အောက်တိုဘာလ ၁၁ ရက်တွင် နေပြည်တော်ရှိ ဗဟို ဌာနချုပ် ရုံး၌ ကျင်းပမည်ဟု သိရသည်။

အဆိုပါ ပါတီညီလာခံကို ပြည်သူ့လွှတ်တော် ဥက္ကဋ္ဌလည်းဖြစ် ကြံ့ခိုင်ရေးပါတီ ဒု ဥက္ကဋ္ဌလည်းဖြစ်သူ သူရ ဦးရွှေမန်းက ဦးဆောင်ကာ ကျင်းပမည်ဖြစ်ကြောင်း ပါတီဝင် ဦးအောင်သိန်းလင်းက ဧရာဝတီသို့ ပြောသည်။

“ကျနော်တို့ ညီလာခံကျင်းပဖို့ ကော်မရှင်တွေဖွဲ့၊ ပါတီကော်မတီတွေ ဖွဲ့ပါတယ်။ မြို့နယ်က ပါတီဝင် လူထုတွေက ကိုယ်စားလှယ်ကို ရွေးချယ် တာပါ။ ပါတီအဖွဲ့ဝင်တွေ ဆန္ဒပြတာတွေ၊ နားလည်မှုလွဲတာတွေ မရှိပါဘူး” ဟု ၄င်းက ဆိုသည်။

ညီလာခံတက်ရောက်ရန် မြို့နယ် ကိုယ်စားလှယ်များ၊ တိုင်းကိုယ်စားလှယ်များအား စက်တင်ဘာလ ၂၃ ရက်နေ့ တိုင်းဒေသကြီး လွှတ်တော် မတိုင်မီ အပြီး ရွေးချယ်သွားမည်ဖြစ်ကြောင်း၊ ထို့သို့ ရွေးချယ်ပြီး ရရှိလာသည့် ကိုယ်စားလှယ်များနှင့် ဗဟိုဌာနချုပ် ရုံးတွင် ညီလာခံ ကျင်းပသွားမည်ဟု သိရသည်။

ညီလာခံကျင်းပရခြင်း၏ ရည်ရွယ်ချက်မှာ ပါတီမှ ဗဟိုအလုပ်မှုဆောင် ဗဟိုကော်မတီများ၊ ဥက္ကဋ္ဌများကို ပြန်လည်ရွေးချယ်ကာ ပါတီကို အသစ်ပြန်လည် ဖွဲ့စည်းရန်ဖြစ်ကြောင်း သိရှိရသည်။

ကြံ့ခိုင်ရေးပါတီသည် ၂၀၁၀ ပြည့်နှစ် ဧပြီလ ၂၉ ရက်နေ့တွင် ပြည်ထောင်စု ရွေးကောက်ပွဲ ကော်မရှင် ထံ၌ တည်ထောင်ခွင့် လျှောက်ထားခဲ့ပြီး မေလ ၄ ရက်နေ့တွင် တည်ထောင်ခွင့် ရရှိခဲ့သည်။ ယင်းနောက် ထိုနှစ် ဇွန်လ ၁ ရက်နေ့တွင် ပါတီ မှတ်ပုံတင်ခွင့် လျှောက်ထားပြီး ဇွန်လ ၈ ရက်နေ့တွင် ပါတီမှတ်ပုံတင်ခွင့် ရရှိခဲ့သည်။

၂၀၁၀ ရွေးကောက်ပွဲတွင် နေရာအများစု အနိုင် ရရှိခဲ့သော ကြံ့ခိုင်ရေး ပါတီ အနေဖြင့် ၂၀၁၂ ကြားဖြတ်ရွေးကောက်ပွဲ တွင် နေရာအများစု အနိုင်ရရှိမည်ဟု မူလက မျှော်လင့်ခဲ့သော်လည်း ဝင်ရောက် ရွေးချယ်ခံခဲ့သည့် မဲဆန္ဒနယ် ၄၅ နေရာအနက် အမျိုးသား ဒီမိုကရေစီ အဖွဲ့ချုပ် (NLD) ယှဉ်ပြိုင်ခွင့် မရသည့် တနေရာ၌သာ အနိုင်ရရှိခဲ့ပြီး ဒေါ်အောင်ဆန်းစုကြည် ဦးဆောင်သော NLD ပါတီက ၄၃ နေရာ အနိုင်ရရှိခဲ့သည်။

NLD ပါတီသည်လည်း ညီလာခံခေါ်ယူနိုင်ရန် ပြည်နယ်နှင့် တိုင်းအလိုက် ကိုယ်စားလှယ်ရွေးချယ် မှုများ ပြုလုပ်လျက် ရှိကြောင်း သိရသည်။

Ref: ဧရာဝတီ

Read More...

Collapse...

သမ္မတနှင့် လွှတ်တော်ဥက္ကဋ္ဌ အမေရိကန်တားမြစ်စာရင်းက ပယ်ဖျက်

2012-09-19

မြန်မာသမ္မတ ဦးသိန်းစိန်နဲ့ ပြည်သူ့လွှတ်တော် ဥက္ကဋ္ဌ သူရ ဦးရွှေမန်းတို့အပေါ် ချမှတ်ထားတဲ့ အရေးယူ ပိတ်ဆို့ မှုတွေကို အမေရိကန် ဘဏ္ဍာရေး ဌာနက မနေ့က ပယ်ဖျက် လိုက်ပါတယ်။ တချိန်က စစ်အစိုးရ အဖွဲ့ဝင်တွေ ဖြစ်ခဲ့တဲ့ ဦးသိန်းစိန်နဲ့ သူရ ဦးရွှေမန်းတို့ကို အထူးတလည် အရေးယူဖို့ သတ်မှတ်ထားတဲ့ နိုင်ငံသားများ စာရင်းကနေ ပယ်ဖျက်လိုက်တယ်လို့ ဆိုပါတယ်။

စစ်တပ်က အာဏာစွန့်လိုက်ပြီးချိန်ကစလို့ ၁၈ လအတွင်း ပြုပြင် ပြောင်းလဲရေးတွေ တွန်းအားပေး လုပ်ဆောင်တဲ့ အတွက် နိုင်ငံတကာက ချီးကျူးသူနှစ်ဦးကို စာရင်းက ပယ်ဖျက် လိုက်တာလည်း ဖြစ်ပါတယ်။

အတိုက်အခံ ခေါင်းဆောင် ငြိမ်းချမ်းရေး နိုဘယ်လ်ဆုရှင် ဒေါ်အောင်ဆန်းစုကြည် အမေရိကန် ပြည်ထောင်စု ၀ါရှင်တန် ဒီစီမှာ ရောက်ရှိနေပြီး မြန်မာ စံတော်ချိန် စက်တင်ဘာ ၂၀ ရက်မှာ သမ္မတ အိုဘားမားနဲ့ တွေ့ဆုံပါမယ်။

ကွန်ဂရက် လွှတ်တော် ရွှေတံဆိပ်ဆုကို ဒေါ်အောင်ဆန်းစုကြည် မနေ့က လက်ခံရယူချိန်မှာ ဒီဆုံးဖြတ်ချက် ထွက်ပေါ် လာတာလည်း ဖြစ်ပါတယ်။ ဒါ့အပြင် ကုလသမဂ္ဂ အထွေထွေ ညီလာခံကို တက်ရောက်ဖို့ သမ္မတ ဦးသိန်းစိန် နယူးယောက်မြို့ကို လာမယ့် သီတင်းပတ်မှာ ရောက်မလာခင်မှာ ခုလို ပယ်ဖျက်တာပါ။

ဦးသိန်းစိန်ဟာ အမေရိကန် အထက်တန်း တာဝန်ရှိသူတွေနဲ့ တွေ့ဆုံဖို့ရှိပါတယ်။ အခုစာရင်းက ပယ်ဖျက်လိုက်တဲ့ အမေရိကန်က ချမှတ်တဲ့ အရေးယူ ပိတ်ဆို့မှုဟာ အမေရိကန် ကုမ္ပဏီတွေနဲ့ လုပ်ငန်းလုပ်ကိုင်ခွင့်ကို တားမြစ်ထားတာ ဖြစ်ပါတယ်။

Ref: RFA News

Read More...

Collapse...

ကျဆုံးအာဇာနည်ကျောင်းသူ၊ ကျောင်းသားများအတွက် ဆွမ်းကပ် လှူဒါန်း

2012-09-19

၈၈ ဒီမိုကရေစီ အရေးတော်ပုံမှာ မ၀င်းမော်ဦးနဲ့တကွ ကျဆုံးသွားခဲ့တဲ့ မောင်တင်ထွန်း၊ မောင်သန်းဌေး စတဲ့ အာဇာနည်ကျောင်းသူ၊ ကျောင်းသားတွေ အတွက် (၂၄) နှစ်ပြည့် အထိမ်းအမှတ် ဂုဏ်ပြုအောက်မေ့ဖွယ် ဆွမ်းဆက်ကပ် လှူဒါန်းပွဲကို ဒီကနေ့နံနက် ၇ နာရီက ရန်ကုန် ကြည့်မြင်တိုင်မြို့နယ် ပန်းပင်ကြီး လမ်းမှာရှိတဲ့ ဘုရားငါးဆူ တန်ဆောင်းမှာ ကျင်းပခဲ့ပါတယ်။

မ၀င်းမော်ဦးက မြန်မာပြည် ဒီမိုကရေစီ မရမချင်း သူ့အတွက် အမျှအတန်း aပးဝေခြင်းမပြုဖို့ သူမရဲ့ဖခင်ကို မှာထားခဲ့ချက် အရ စစ်မှန်တဲ့ ဒီမိုကရေစီ အခုအချိန်အထိ မရသေးတာကြောင့် အမျှမဝေသေးဘူးလို့ မ၀င်းမော်ဦးရဲ့ မိခင်ဖြစ်သူ ဒေါ်ခင်ဌေးဝင်းက RFA ကို ပြောပါတယ်။

"အခုချိန်မှာကတော့ သိပ်ပြီးတော့ လွတ်လွတ်လပ်လပ် မရှိသေးတဲ့အတွက် တောင်းထားတဲ့ ဒီမိုကရေစီ ပန်းတိုင်ကလည်း မရောက်သေးတဲ့ အတွက် အန်တီကတော့ လုံးဝ သူ့အတွက်ကို အမျှ မဝေပေးသေးဘူး။ အန်တီသမီးက တိုင်းပြည်အတွက် အလုပ် လုပ်သွားတဲ့ အတွက် အန်တီ့ ရင်ထဲမှာ အမြဲတမ်း ဂုဏ်ယူပါတယ်"

ဒီအခမ်းအနားကို ကချင်ပြည်နယ်မှာ ရောက်ရှိနေတဲ့ ကိုမင်းကိုနိုင်က လူကိုယ်တိုင် မတက်ရောက်နိုင်ခဲ့ပေမယ့် ၁၉၈၈ ဒီမိုကရေစီ အရေးတော်ပုံကြီးမှာ အသက်ပေး ကျဆုံးသွားခဲ့တဲ့ သူရဲကောင်းတွေ ကိုယ်စား မ၀င်းမော်ဦး အတွက် ဂုဏ်ပြုရေးသား ပေးပို့လိုက်တဲ့ ကဗျာ တစ်ပုဒ်ကို ၈၈ မျိုးဆက်ကျောင်းသား ကိုဇော်မင်းက ရွတ်ဆို ဂုဏ်ပြုခဲ့ပါတယ်။

ဒီအခမ်းအနားကို ၈၈ မျိုးဆက် ကျောင်းသားတွေဖြစ်တဲ့ ကိုထွန်းမြင့်အောင်၊ ကိုဇော်မင်းတို့ တက်ရောက် ခဲ့ပြီး ဗကသကျောင်းသားတွေ၊ နိုင်ငံရေးပါတီ အဖွဲ့အစည်းတွေက ပုဂ္ဂိုလ်တွေ တက်ရောက် ခဲ့ကြပါတယ်။ လာမယ့် စက်တင်ဘာ ၂၅ ရက် နေ့မှာလည်း မ၀င်းမော်ဦး အတွက် ဆွမ်းကျွေး တရားနာပွဲတစ်ခုကို မိဘတွေရဲ့ နေအိမ်မှာ ကျင်းပပြုလုပ်မယ်လို့ သိရပါတယ်။

Ref: RFA News

Read More...

Collapse...

စစ်ဆန့်ကျင်ရေး ဆန္ဒပြလိုသူများ ခွင့်ပြုမိန့် မရ

သိင်္ဂီထွန်း
ဗုဒ္ဓဟူးနေ့၊ စက်တင်ဘာလ ၁၉ ရက် ၂၀၁၂

ရန်ကုန်၊ မဇ္ဈိမ။ ။ တပ်မတော် ကာကွယ်ရေး ဦးစီးချုပ်ရုံးရှေ့ အပါအဝင် လွှတ်တော်၊ သမ္မတရုံး၊ ရန်ကုန်နှင့် ကျောက်မဲ မြို့တို့တွင် အပြည်ပြည်ဆိုင်ရာ ငြိမ်းချမ်းရေးနေ့ ဖြစ်သော စက်တင်ဘာလ ၂၁ ရက်နေ့၌ ဆန္ဒပြုခွင့်ပြု ပါရန် ခွင့်ပြုမိန့် လျှောက်ထားရာ ငြင်းပယ် ခံရကြောင်း ဆန္ဒပြလိုသူများထဲမှ တဦးဖြစ်သည့် မခင်စန္ဒာညွန့်ကြည် က ပြောသည်။

“ခွင့်ပြုမိန့် ကျကျ မကျကျ ကျမတို့ ဆက်လှုပ်ရှားသွားမှာပါ” ဟု ဗုဒ္ဓဟူးနေ့က မဇ္ဈိမကို ပြောသည်။

အဆိုပါဆန္ဒပြုပွဲအတွက် နေပြည်တော်၊ ဥတ္တရသီရိမြို့နယ် ရဲစခန်းသို့ စက်တင်ဘာလ ၁၄ ရက်နေ့က စာတင်ခဲ့သည်။ သို့သော် ဥတ္တရသီရိမြို့နယ် အတွင်း ငြိမ်းချမ်းစွာ စုဝေးခွင့်နှင့် ငြိမ်းချမ်းစွာ စီတန်း လှည့်လည်ခွင့် ဆိုင်ရာ ဥပဒေအရ ထုတ်ထားသော ခွင့်ပြုမိန့် အပြင် မြို့နယ်၏ လိုအပ်ချက်အရ သတ်မှတ်သော စည်းကမ်းချက်များနှင့် ငြိစွန်းနေ၍ဟု ဆိုကာ ထိုရဲစခန်းမှပင် ၁၆ ရက်နေ့က ငြင်းပယ်လိုက်သည်ဟု သိရသည်။

ဥတ္တရသီရိမြို့နယ်ရှိ သမ္မတရုံး၊ လွှတ်တော်နှင့် ကာကွယ်ရေးဦးစီးချုပ်ရုံးများရှေ့တွင် တပြိုင်တည်း ဆန္ဒပြခွင့် ငြင်းပယ် ခံရ ပြီးနောက် တနင်္လာနေ့တွင် ထပ်မံ၍ အယူခံ ဝင်ထားကြောင်းလည်း ကချင်ငြိမ်းချမ်းရေး ကွန်ယက်မှ ကိုဂျော်ဂွန်း က ပြောသည်။

တနေ့တည်းတွင်ပင် ရန်ကုန်မြို့၌ နံနက် ၁ဝ နာရီတွင် လမ်းလျှောက်ပွဲ ပြုလုပ်မည်ဖြစ်ပြီး ညနေ ၃ နာရီတွင် အင်းလျား ကန်ဘောင်၌ လူစုကာ ၄ နာရီတိတိတွင် ၅ မိနစ်ကြာ ဆုတောင်းပြီး ငြိမ်းချမ်းရေး ကျောက်တိုင် စိုက်ထူရန် ဆန္ဒပြလိုသူတို့က စီစဉ်ထားသည်။

ရန်ကုန်မြို့တွင် ဆန္ဒပြခွင့်နှင့် ပတ်သက်၍ စမ်းချောင်းရဲစခန်း၊ မင်္ဂလာတောင်ညွန့် ရဲစခန်းနှင့် ကျောက်တံတား ရဲစခန်း တို့တွင် လျှောက်ထားသော်လည်း လျှောက်ထားသည့် ရှစ်မြို့နယ်လုံးအား ခွင့်ပြုမိန့် မပေးနိုင်ကြောင်း အင်္ဂါနေ့တွင် အနောက်ပိုင်း ရဲတပ်ဖွဲ့မှူးရုံးမှ ပြန်ကြားခဲ့သည်။

ဆန္ဒပြမှုက ယာဉ်ကြောပိတ်ဆို့နိုင်ကြောင်းနှင့် သွားမည့် လမ်းကြောင်း ရှည်လျားလွန်း၍ အများပြည်သူအား အနှောင့် အယှက် ဖြစ်စေနိုင်သည်ဟု အာဏာပိုင်များက အကြောင်းပြခဲ့သည်။

ရှမ်းပြည်နယ်မြောက်ပိုင်း၊ ကျောက်မဲမြို့နယ်တွင်လည်း အလားတူ ငြိမ်းချမ်းရေး ဆုတောင်းပွဲနှင့် ဟောပြောပွဲများ အတွက် ခွင့်ပြုမိန့် လျှောက်ထားခဲ့ရာ လျှောက်ထားသူများ အသက်အရွယ် ငယ်လွန်းသောကြောင့် ခွင့်ပြုမိန့် မပေးကြောင်း မခင်စန္ဒာညွန့်ကြည် က ပြန်လည်ပြောပြသည်။ လျှောက်ထားသူများမှာ အသက် ၂၅ နှစ်ဝန်းကျင်ရှိ လူငယ်များ ဖြစ်ကြသည်။

အခြားမြို့အတွက် တင်ထားသော ခွင့်ပြုမိန့်နှင့် ပတ်သက်၍ ရလဒ် တစုံတရာ မသိရှိရသေးကြောင်း မခင်စန္ဒာညွန့်ကြည် က ပြောသည်။

စစ်ရပ်စဲရေး ကြိုးပမ်းလိုသူများက ရန်ကုန်၊ နေပြည်တော်၊ မန္တလေး၊ မော်လမြိုင်၊ ကျောက်မဲ၊ တောင်ကြီး၊ အင်းလေး၊ ဟိုပုန်း၊ ဆီဆိုင်၊ လားရှိုး၊ သံဖြူဇရပ်၊ ပြည်၊ တောင်ငူ၊ သံတောင်ကြီး၊ ရွှေဘို၊ ပေါင်းတည်၊ ပခုက္ကူမြို့များအပြင် ကချင်နှင့် ရှမ်းပြည်နယ်တွင်းရှိ ဒုက္ခသည်စခန်းများတွင် ‘တနိုင်ငံလုံး စစ်ပွဲရပ်’ ဆောင်ပုဒ်နှင့် လမ်းလျှောက်ပွဲများ၊ ဆုတောင်းပွဲများ၊ စွန်လွှတ်ပွဲများ၊ ဖျော်ဖြေပွဲများ ပြုလုပ်ရန် စီစဉ်ထားကြသည်။

အဆိုပါ အပြည်ပြည်ဆိုင်ရာ ငြိမ်းချမ်းရေးနေ့ လှုပ်ရှားမှုများကို ကချင်ငြိမ်ချမ်းရေးကွန်ရက်၊ ငြိမ်းချမ်းရေး ကွန်ယက်၊ အဖြူရောင် တွဲလက်များ၊ ကရင်အမျိုးသမီးများ လှုပ်ရှားမှုအဖွဲ့၊ ပန်းရဲ့လမ်း လူမှုရေးအဖွဲ့၊ စိမ်းရောင်စို လူမှုကူညီရေး အဖွဲ့၊ Youth For Social Change Myanmar၊r ၊ နှောင်ကြိုးမဲ့ လူမှုဖွံ့ဖြိုးရေး ကွန်ယက် (မန္တလေး)၊ ရန်ကုန်အခြေစိုက် ပရဟိတ လူငယ်များ ကွန်ယက်၊ ကျောက်မဲ လူငယ်ကွန်ယက် (ရှမ်း-မြောက်)၊ Open Network – မွန်၊ ကာတွန်းဆရာ များ အဖွဲ့၊ ရန်ကုန် ဂီတလူငယ်များ၊ ကဗျာဆရာများ သမဂ္ဂ၊ Youth Art Network၊ New Zero Art Space၊ Myanmar Ink Gallery၊ ရန်ကုန် ပြည်သူ့အကျိုးဆောင်ကွန်ရက် စသည့် လူမှုရေးအဖွဲ့ ၁၉ ဖွဲ့က ဦးဆောင် လှုပ်ရှားကြမည်
ဖြစ်သည်။

"Stop Civil War"၊ "တနိုင်ငံလုံး စစ်ပွဲရပ်" စာတန်းများသုံးပြီး လက်မောင်းစီး (သို့မဟုတ်) ခေါင်းစီးကို အပြာရောင် အသုံးပြု သွားမည် ဖြစ်သည်။

Ref: မဇ္ဈိမ

Read More...

Collapse...

ဒေါ်စုနဲ့ ဗွီအိုအေ သီးသန့်တွေ့ဆုံ မေးမြန်းခန်း

19.09.2012

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ဟာ အမေရိကန်အသံ ရုံးချုပ်ကို အင်္ဂါနေ့က လာရောက် ပြီးတော့ ဗွီအိုအေ (မြန်မာပိုင်း) မိသားစုတွေနဲ့ တရင်းတနှီးတွေ့ဆုံ ပြီးတော့ သြဝါဒ စကားတွေလည်း ပြောဆို ခဲ့ပါတယ်။ နိုဘဲလ်ငြိမ်းချမ်းရေး ဆုရှင် ဒေါ်အောင်ဆန်းစုကြည်ကို ဗွီအိုအေ (မြန်မာပိုင်း) အကြီးတန်း အယ်ဒီတာ ဦးကျော်ဇံသာက သီးသန့် တွေ့ဆုံမေးမြန်း ခွင့်လည်း ရခဲ့ပါတယ်။ ဒီတွေ့ဆုံမေးမြန်းခန်းကို အပြည့်အစုံ တင်ပြပေးထားပါတယ်။

ဦးကျော်ဇံသာ။ ။ ဒေါ်အောင်ဆန်းစုကြည်ခင်ဗျား။ အခုလို ကျန်းကျန်းမာမာတွေ့ရလို့ အထူး ဝမ်းသာ ပါတယ်။ ကျနော်တို့ ဗွီအိုအေကို တွေ့ဆုံမေးမြန်းခွင့် ပေးတဲ့ အတွက်လည်း အထူး ကျေးဇူး တင်ပါတယ်။ ပထမဦး ဆုံးမေးချင်တဲ့မေးခွန်းကတော့ လူတိုင်း စိတ်ဝင်စားတဲ့ မြန်မာနိုင်ငံ ပြုပြင် ပြောင်းလဲရေးနဲ့ ပတ်သက်တဲ့မေးခွန်းပါ။ ပြုပြင်ပြောင်းလဲရေး ဆိုတာ အသံသာ ကြားနေရတယ်။ တကယ်တန်း ပြောင်းလဲသွားတာ ဘာမှ မတွေ့ရသေးဘူးလို့ လူတွေက ပြောကြပါတယ်။ တချို့ကလည်း စာနယ်ဇင်း လွတ်လပ်မှုတွေ နည်းနည်းပါးပါး ရှိလာတယ်၊ လူတွေ ပြောရဲ ဆိုရဲ ရှိလာတယ် ဆိုပြီးတော့လည်း ပြောကြပါတယ်။ ..ဆိုတော့ ဒီ ပြုပြင်ပြောင်းလဲမှု အခြေအနေနဲ့ ပတ်သက်ပြီးတော့ ဒေါ်အောင်ဆန်းစုကြည်ရဲ့ သဘောထားကို ကြားပါရစေခင်ဗျ။

ဒေါ်အောင်ဆန်းစုကြည်။ ။ ပြုပြင်ပြောင်းလဲရေး လုံးဝ မရှိဘူးဆိုတာ မဟုတ်ပါဘူး။ ပြုပြင်ပြောင်း လဲရေး ရှိပါတယ်။ ဒါပေမဲ့လည်း ပြည်သူတွေ အတွက် အများကြီးတော့ ထပ်ပြီးတော့ လိုသေးတာပေါ့ နော်။ ကျမတို့နိုင်ငံဟာ တကယ်ပဲ ဒီမိုကရေစီနိုင်ငံ တခုဖြစ်ဖို့၊ ဒီမိုကရေစီ လူ့အဖွဲ့အစည်း တခု ဖြစ်ဖို့ ဆိုလို့ ရှိရင်တော့ ထပ်လုပ်စရာတွေ ရှိသေးတာပေါ့။ ဒါပေမဲ့ ပြုပြင်ပြောင်းလဲရေး လုံးဝ မရှိဘူး ဆိုတာတော့ မဟုတ်ပါဘူး။ ဒါတော့ နည်းနည်း တဘက်စောင်းနင်း အမြင်လို့ ကျမ ထင်ပါတယ်။

ဦးကျော်ဇံသာ။ ။ ပြည်သူလူထုထဲကို ပြုပြင်ပြောင်းလဲရေး ရောက်လာဖို့ အတွက် အဓိက ဘာတွေ လုပ်ဖို့ လိုနေပါလဲ ခင်ဗျ။ လောလောဆယ်မှာ။

ဒေါ်အောင်ဆန်းစုကြည်။ ။ လိုတာတွေကတော့ အများကြီးပဲ၊ အဓိက ကတော့ ကျမတို့ ပြည်သူ တွေက ဆင်းရဲနေတဲ့ အခြေအနေကို ပိုပြီးတော့ ကောင်းလာအောင် လုပ်ရမယ်။ လက်တွေ့ကျကျ ပြောရမယ် ဆိုလို့ရှိရင် ကျမရဲ့ ကော့မှူးမြို့နယ်မှာ ဆင်းပြီး လေ့လာတဲ့ အခါကျတော့ သိပ်ပြီး အရေးကြီးနေတာ ဘာလဲဆိုတော့ လမ်းပန်း ဆက်သွယ်ရေးရယ်၊ အလုပ် ရရှိရေးရယ်၊ ရေရရှိရေး- ရေရရှိရေးတောင်မှ ကျမတို့နိုင်ငံ အနေနဲ့က နေရာ အတော်များများမှာ အခက်အခဲ တခုပါပဲ။ နောက်ပြီးတော့ ကျန်းမာရေး၊ ပညာရေးပေါ့။

ဦးကျော်ဇံသာ။ ။ နောက်တခါ- ဥပဒေပြု အာဏာပိုင် အဖွဲ့ဖြစ်တဲ့ လွှတ်တော်ပေါ့ခင်ဗျာ။ အစ တုန်းကတော့ ruber stamp လို့ အင်္ဂလိပ်လို ပြောကြတယ်။ လက်ညှိုးထောင်၊ ခေါင်းငြိမ့် ပါလီမန်သာ ဖြစ်တယ်၊ အခု အဲဒီထက် တိုးတက်မယ့် အရိပ်အယောင် နည်းနည်းများ တွေ့လာ ရပါပြီလား။ တလောတုန်းက သူတို့က ဖွဲ့စည်းပုံ ခုံရုံးကို သူတို့ရဲ့ဆန္ဒနဲ့ ဖယ်ရှားနိုင်ခဲ့တယ် ဆိုတော့ - ဒါပေမဲ့လည်း တချို့က Executi နဲ့ ရဲ့ legislature နဲ့ ပုဂ္ဂိုလ်ရေး ပြိုင်ဆိုင်မှုသာ ဖြစ်တယ်လို့လည်း သုံးသပ်ကြပါတယ်။

ဒေါ်အောင်ဆန်းစုကြည်။ ။ ကျမတော့ ဒီလိုလို့ မထင်ပါဘူး။ ဒါဟာ ဖွဲ့စည်းပုံ အခြေခံ ဥပဒေ အရ လုပ်ပိုင်ခွင့်နဲ့ ဆိုင်တဲ့ ဟာပဲ။ ဒါလည်း ပြောတဲ့ မိန့်ခွန်းတွေကို ဦးကျော်ဇံသာ သေသေချာချာ နားထောင်ကြည့်မယ် ဆိုရင် ဥပဒေပိုင်းဆိုင်ရာ ကျမတို့ အမျိုးသား ဒီမိုကရေစီ အဖွဲ့ချုပ် ကိုယ်စားလှယ်တွေကလည်း ဝင်ပြီးတော့ ပြောတာရှိပါတယ်။ ဥပဒေကြောင်း အရ ဘယ်လို ဘယ်လို ဖြစ်ခဲ့တယ် ဆိုတာကို။ အဲဒီတော့ လက်ညှိုးထောင် ခေါင်းငြိမ့် ဆိုတာကတော့ ဘယ်ဟုတ်နိုင်မလဲ။ ဘာဖြစ်လို့လဲ ဆိုတော့ ကျမတို့ NLD ရှိနေတယ်လေ။ ကျမတို့က လက်ညှိုးထောင်၊ ခေါင်းငြိမ့်မှ မလုပ်ဘဲ။ အဲလိုမလုပ်တဲ့ တခြား ကိုယ်စားလှယ်တွေလည်း ရှိပါတယ်။

ဦးကျော်ဇံသာ။ ။ ဆိုတော့ အုပ်ချုပ်ရေး အကြီးအကဲတန်းပေါ့လေ။ လွှတ်တော် ဥက္ကဋ္ဌနဲ့ ပြိုင်ဆိုင်မှု ရှိတယ်ဆိုတာကရော အလားအလာ ကောင်းပါသလား။ နိုင်ငံတခုရဲ့ နိုင်ငံရေးစံနစ်အတွက် Healthy ဖြစ်ပါသလား။

ဒေါ်အောင်ဆန်းစုကြည်။ ။ ဒီဟာကတော့ ပုဂ္ဂိုလ်ရေးအမြင်နဲ့ ဝိုင်းမြင်တာ မကောင်းပါဘူး။ တကယ်ဆိုလို့ရှိရင် ဒီလို အုပ်ချုပ်ရေးပိုင်းဆိုင်ရာနဲ့ ဥပဒေပြုပိုင်းဆိုင်ရာကြားထဲမှာ ပြောရတာ၊ ဆိုရတာ ငြင်းရတာ၊ ခုန်ရတာ ဖြစ်တယ်ဆိုတာ - ဒါ ဒီမိုကရေစီနိုင်ငံတွေမှာ ဖြစ်လေ့ဖြစ်ထ ရှိတာပဲ။ အခု ဒီ အမေရိကန် ပြည်ထောင်စုမှာတောင်မှ ဘတ်ဂျက်နဲ့ပတ်သက်လို့ အုပ်ချုပ်ပိုင်းဆိုင်ရာနဲ့ ဥပဒေပြုပိုင်း ဆိုင်ရာမှာ ငြင်းကြ၊ ခုန်ကြနဲ့ တချိန်တခါတုန်းက ဆိုလို့ရှိရင် ဝန်ထမ်းတွေတောင်မှ လခမပေးတာအထိ ဖြစ်သွားတယ်မို့လား။ ..ဆိုတော့ အဲဒါမျိုးကတော့ ဖြစ်လေ့ဖြစ်ထပဲ။ တခုတော့ ရှိတာပေါ့၊ ကျမတို့နိုင်ငံအတွက် ဒီမိုကရေစီ လုပ်ပုံလုပ်နည်းတွေက သိပ်ပြီးတော့ စိမ်းနေသေးတဲ့အခါကျတော့ ဒီဟာတွေကို အစိုးရိမ်လွန်တဲ့ဟာတွေလည်း ရှိတယ်။ နောက်ပြီးတော့ ဘေးကလည်း ဝိုင်းပြီးတော့ ပုဂ္ဂိုလ်ရေးပြဿနာလို့ ဖြစ်ပေါ်အောင်လို့ မြင်ကြလို့ပဲလား၊ အဲလိုဖြစ်အောင်လို့ တိုက်တွန်းကြလို့ပဲလား။ ဒါမျိုးလေးတွေကတော့ ရှိတာပေါ့။

ဦးကျော်ဇံသာ။ ။ နောက်တခုက ဒေါ်အောင်ဆန်းစုကြည် ရွေးကောက်ပွဲဝင်တုန်းက အဓိက ရည်ရွယ်ချက် သုံးခုဖြစ်တဲ့ ဖွဲ့စည်းပုံကို ပြင်မယ်၊ စစ်တပ်ရဲ့ပါဝင်မှုကို တဖြည်းဖြည်း ဖယ်ရှားနိုင်အောင် ကြိုးစားမယ်၊ နောက်ပြီးတော့ ပြည်တွင်း ငြိမ်းချမ်းရေး ရနိုင်အောင် ကြိုးစားမယ်ဆိုတာ၊ အဲဒီကိစ္စတွေကို ဆောင်ရွက်နိုင်အောင် ကြိုးစားဖို့ ကိစ္စရော အတော် ခရီးဝေးပါ သေးသလား။

ဒေါ်အောင်ဆန်းစုကြည်။ ။ ကျမတို့ နည်းနည်း ပြန်ပြင်ရမယ်။ ကျမတို့ ပထမဦးဆုံးက တရား ဥပဒေ စိုးမိုးရေးလို့ ပြောပါတယ်။ နောက်ပြီးတော့မှ ပြည်တွင်း ငြိမ်းချမ်းရေး၊ ပြီးတော့ ဖွဲ့စည်းပုံ အခြေခံ ဥပဒေ စိုးမိုးရေး။ အဲဒီမှာ ကျမတို့က အဓိက က ဖွဲ့စည်းပုံ အခြေခံဥပဒေ စိုးမိုးရေး- ပြုပြင်ရေးပေါ့နော်။ ပြုပြင်ရေးမှာ တပ်ကို ဖယ်ရှားမယ် ဆိုတာဟာ အဓိက မဟုတ်ပါဘူး။ ဖွဲ့စည်းပုံ အခြေခံဥပဒေဟာ ဒီမိုကရေစီ စံနှုန်း စံထားတွေနဲ့ ကိုက်ညီအောင်လုပ်ဖို့ ပါပဲ။ အဲလို လုပ်တဲ့နေရာမှာ ကျမတို့ဟာ တပ်မတော်နဲ့ ပူးပေါင်း ဆောင်ရွက် သွားချင်တယ် ဆိုတာကို ရှင်းရှင်းလင်းလင်း ပြောထားပြီးပါပြီ။ ပြောထားပြီးသား ဖြစ်ပါတယ်။

ဦးကျော်ဇံသာ။ ။ ..ဆိုတော့ အဲဒီဟာတွေကို ဆောင်ရွက်ဖို့ အလား အလာ-တရား ဥပဒေ စိုးမိုးရေး ဆောင်ရွက်မယ့် ကိစ္စတို့၊ ငြိမ်းချမ်းရေး ကိစ္စတို့ရော တော်တော်လေး ခရီးရောက်ပါပြီလား။

ဒေါ်အောင်ဆန်းစုကြည်။ ။ တရားဥပဒေစိုးမိုးရေးကို ကျမတို့ ပထမထားတဲ့ အကြောင်းရင်းက ဘာလဲ ဆိုတော့ တရားဥပဒေ မရှိဘဲနဲ့ ပြည်တွင်း ငြိမ်းချမ်းရေး ဆိုတာ မဖြစ်နိုင်ဘူးလို့ ယူဆလို့ပါ။ ပြည်တွင်း ငြိမ်းချမ်းရေးကို တန်ဖိုး မထားလို့ မဟုတ်ပါဘူး။ အဲဒီတော့ တရားဥပဒေ စိုးမိုးရေး ရရှိဖို့ ဆိုတော့ အခု ကျမက တရားဥပဒေ စိုးမိုးရေး ကော်မီတီ ဥက္ကဋ္ဌ ဆိုတော့ ဒါ- အလားအလာကောင်း တယ်လို့ ပြောရမှာပေါ့။

ဦးကျော်ဇံသာ။ ။ နောက်တခုက ဒီနေ့ နေ့လည်က ဒေါ်အောင်ဆန်းစုကြည် ပြောတာလည်း ကြားလိုက် ရပါတယ်။ ဒေါ်အောင်ဆန်းစုကြည်တို့ဟာ အစိုးရ မဟုတ်ဘူး။ အစိုးရ လိုအပ်တဲ့ အကူအညီကို ငြိမ်းချမ်းရေး အတွက် ဆောင်ရွက်ပေးမယ် ဆိုတာ ဒီနေ့ ပြောသွားပါတယ်။ တိုင်းရင်းသားတွေ အတော် များများက ဒေါ်အောင်ဆန်းစုကြည် ပါဝင်ပြီး စေ့စပ်ပေးရင် ပိုပြီးတော့ ခရီးရောက်မယ်၊ သူတို့ရဲ့ တိုင်းရင်းသားပြဿနာဖြေရှင်းရေးမှာ တကယ်ပဲ ယုံကြည်ကြပါတယ်။ အဲဒီတော့ ဒေါ်အောင်ဆန်း စုကြည်ရဲ့ သဘောထားကော ဘယ်လိုများ ရှိပါသလဲ။ အဲဒီကိစ္စမှာ ဝင်ရောက် ဖြေရှင်းပေးနိုင်မယ့် အခြေအနေ ရှိပါသလား။

ဒေါ်အောင်ဆန်းစုကြည်။ ။ ကျမကလည်း လုပ်ပေးနိုင်သမျှ လုပ်ပေးချင်တာပဲ။ ဒါပေမဲ့ ဒီဟာ-ဟာ တိုင်းရင်းသားတွေနဲ့ အစိုးရကြားမှာ ဆုံးဖြတ်ရမယ့် ကိစ္စဖြစ်တယ်။ မနက်ကလည်း ကျမ ပြောခဲ့ပါတယ်။ ကျမတို့ အနေနဲ့ ဒီလို အခြေအနေမှာ နိုင်ငံရေး အမြတ် မထုတ်ချင်ဘူး။ အရေးကြီးတာက ကျမတို့ နိုင်ငံမှာ ပြည်တွင်းငြိမ်းချမ်းရေး ရဖို့၊ ဒီလို ပြည်တွင်း ငြိမ်းချမ်းရေးရဖို့ ကျမတို့ တကယ်ကို ကူညီနိုင်ဖို့ ဆိုလို့ရှိရင် တိုင်းရင်းသားတွေရော၊ အစိုးရ ဘက်ကရော လိုလားရမယ်။ အဲဒါမှ ကျမတို့က ဝင်ပြီးတော့ ကူညီနိုင်မှာ။ ကျမတို့အဖွဲ့ နိုင်ငံရေး အမြတ်ထုတ်ဖို့ ကျမတို့သာ လုပ်ပေးမှဖြစ်မယ် ဆိုတဲ့ သဘောနဲ့ ကျမတို့ မလုပ်ချင် ဘူး။ နောက်ပြီးတော့လည်း တကယ်ပဲ ကြိုးပမ်းမှုတွေ ရှိနေလို့ရှိရင် အဲဒီကြိုးပမ်းမှုတွေကို ထိခိုက်တဲ့ အလုပ်မျိုးလည်း ကျမတို့ မလုပ်ချင်ဘူး။ ဒါပေမဲ့ အချိန်မရွေး အဆင်သင့်ပဲ၊ ကျမတို့ကို သုံးချင်တယ် ဆိုရင် သုံးပါ။ ဒါပေမဲ့ နိုင်ငံအတွက် သုံးတယ်ဆိုတာ လိုလိုချင်ချင်နဲ့ လက်ခံရမယ့် ကိစ္စပါ။

ဦးကျော်ဇံသာ။ ။ သမ္မတဦးသိန်းစိန် အပါအဝင် အစိုးရအဖွဲ့ဝင်တွေက အစတုန်းက ပြောတာက တိုင်းရင်းသားပြဿနာ ဖြေရှင်းရေး အတွက် တွေ့ဆုံဆွေးနွေးမယ့် ရင်ပြင်ဟာ လွှတ်တော်ဖြစ်တယ်၊ လွှတ်တော်က တဆင့်သာ ဆွေးနွေးနိုင်မယ်လို့ ကြားရပါတယ်။ တိုင်းရင်းသားတွေ ကတော့ အဲလို မဟုတ်ဘဲနဲ့ မျက်နှာ စုံညီတွေ့ချင်တယ်၊ သုံးပွင့်ဆိုင်တွေ့ချင်တယ်၊ ဒုတိယ ပင်လုံဆိုပြီးတော့ အသံထွက် လာပါတယ်။ ဆိုတော့ ဘယ်လမ်းဟာ ပိုပြီးမှန်ကန်မယ်၊ လွှတ်တော်မှာ ဖြေရှင်းနိုင်မယ့် အလားအလာ ရော ရှိပါသလား။

ဒေါ်အောင်ဆန်းစုကြည်။ ။ အဲဒီဟာက လွှတ်တော်ထဲမှာ တိုင်းရင်းသား ကိုယ်စားလှယ်တွေ အများကြီး ရှိပါတယ်။ လွှတ်တော်ထဲမှာ တိုင်းရင်းသား ကိုယ်စားလှယ်တွေနဲ့ တိုင်းရင်းသား ကိစ္စတွေကို ဆွေးနွေးတာတွေ၊ ဘာတွေလည်း ရှိလည်း ရှိခဲ့ပါတယ်။ တင်လည်း တင်ပြတာတွေလည်း ရှိပါတယ်။ လွှတ်တော် ထဲမှာတော့ လွှတ်တော်နည်း လွှတ်တော်ဟန်နဲ့ တိုင်းရင်းသား ကိစ္စတွေကို ကိုင်တွယ် နေပါတယ်။ ဒါပေမဲ့ ခုနက ပြောသလိုပေ့ါနော်။ တချို့က အုပ်ချုပ်ရေး ဘက်ကနေပြီးတော့ လွှတ်တော် အတွင်းမှာသာ ဖြေရှင်းရမယ်ပြောတယ်။ ဒါပေမဲ့ တိုင်းရင်းသားတွေက အပြင်မှာ စပြီးဖြေရှင်းရမယ်-စသဖြင့်- အဲဒါမျိုးတွေ ကျတော့ ညှိယူရမယ်။ အပေးအယူ လုပ်ရမယ်။

ကျမ ခဏခဏပြောပါတယ်။ ကျမတို့ မြန်မာနိုင်ငံရေးမှာဆိုလို့ရှိရင် negotiated compromise ပေါ့နော်။ ညှိနှိုင်းဆွေးနွေးပြီးတော့ အပေးအယူ အလျှော့အတင်း လုပ်တဲ့ ယဉ်ကျေးမှုက အင်မတန်မှ အားနည်း တယ်။ အဲဒီယဉ်ကျေးမှုကို တည်ဆောက်ရမယ်။ ပဋိပက္ခဖြစ်နေတဲ့ အဖွဲ့အစည်းတွေ၊ ပုဂ္ဂိုလ်တွေ ဆိုလို့ ရှိရင် နှစ်ဘက်လုံးက နားလည်ရမှာက ကိုယ်လိုချင်တာ ၁၀၀% ရမှ လုပ်မယ် ဆိုလို့ရှိရင် မဖြစ်နိုင်ဘူး။ အပေးအယူ လုပ်ရမယ်။ အပေးအယူလုပ်ဖို့ ပထမဦးဆုံး ဆွေးနွေး ညှိနှိုင်းရမယ်၊ တိုင်ပင်ရမယ်။ အဲဒီပုံစံနဲ့ပဲ သွားရမှာပဲ။ ဒါ ဒီမိုကရေစီပဲ။

ဦးကျော်ဇံသာ။ ။ နောက်တခုက အခု အမေရိကန်ပြည်ထောင်စုကို လာတဲ့ ရည်ရွယ်ချက်မှာ အမေရိကန်ပြည်သူတွေ၊ အမေရိကန် အစိုးရကို ဒေါ်အောင်ဆန်းစုကြည် အနေနဲ့ ပေးချင်တဲ့၊ ပြောချင်တဲ့ message စကားက ဘာပါလဲခင်ဗျ။

ဒေါ်အောင်ဆန်းစုကြည်။ ။ အဓိကပြောချင်တဲ့စကားကတော့ ကျမတို့ဟာ ဒီမိုကရေစီ အပြည့်အဝတော့ မရသေးဘူး။ ကျမတို့ဟာ ဒီမိုကရေစီ လမ်းကို စပြီးတော့ လျှောက်နေပြီ။ ကျမတို့ နိုင်ငံဟာ တကယ့်ကို ဒီမိုကရေစီကို အခြေခံတဲ့ လူ့အဖွဲ့အစည်း တခု ဖြစ်ချင်လို့ရှိရင် ဒီမိုကရေစီ အဆောက်အအုံနဲ့ ခိုင်မာချင်လို့ရှိရင် လုပ်စရာတွေ အများကြီး ရှိသေးတယ်။ အဲဒီတော့ အဲဒီလုပ်ငန်း တွေမှာ အမေရိကန်ပြည်ထောင်စုက မိတ်ဆွေကောင်း တဦးအနေနဲ့ ကျမတို့နဲ့ ဝိုင်းဝန်းပြီးတော့ ဆောင်ရွက်တာကို လိုလားတယ်။ နောက်တခုကလည်း ကျမတို့ လျှောက်ခဲ့ရတဲ့ ကြမ်းတမ်းတဲ့ ဒီမိုကရေစီ လှုပ်ရှားရေး ခရီးမှာ ကျမတို့ ဒီမိုကရေစီ အတွက် လှုပ်ရှားခဲ့တဲ့ အဖွဲ့အစည်းတွေကို ကူညီ ပေးခဲ့တဲ့အတွက်၊ ထောက်ခံပေးခဲ့တဲ့ အတွက်လည်း အမေရိကန်ပြည်ထောင်စု အစိုးရရော၊ ပြည်သူတွေရော ကျေးဇူးတင်တယ် ဆိုတာ ကျမ လာပြောဖို့ ဖြစ်ပါတယ်။

ဦးကျော်ဇံသာ။ ။ အမေရိကန်ပြည်ထောင်စုက မြန်မာနိုင်ငံမှာ လာပြီး ရင်းနှီးမြှုပ်နှံ ချင်တယ်၊ မြန်မာနိုင်ငံနဲ့သင့်မြတ်အောင် ဆက်ဆံချင်တယ် ဆိုတဲ့ ဆန္ဒဟာ သူတို့နိုင်ငံရဲ့ အကျိုးစီးပွား အတွက် အဓိကအားဖြင့် တရုတ်ကို ကာကွယ်ချင်လို့ ဆိုပြီးတော့ သုံးသပ်တာတွေ ရှိတာပေါ့လေ။… ဆိုတော့ သူတို့ဆန္ဒနဲ့များ သိပ်ပြီးတော့ ဆန္ဒစောနေကြသလား၊ အဲဒါကြောင့်များ ဒေါ်အောင်ဆန်းစုကြည်က သိပ်ပြီးတော့ ဆန္ဒမစောကြ ပါနဲ့လို့ တောင်းနေရသလား ဆိုတာ စဉ်းစားမိပါတယ်။

ဒေါ်အောင်ဆန်းစုကြည်။ ။ ဘယ်လိုပဲပြောပြောပေါ့နော်။ ကျမတို့နိုင်ငံရဲ့ အနေအထား- နိုင်ငံ နှစ်နိုင်ငံရဲ့ ဆက်ဆံရေး ဆိုတာဟာ Geo Politics ပေါ့နော်။ ပထဝီနိုင်ငံရေး ကလည်း ဘယ်လိုမှ လွတ်ကင်းလို့ မရဘူး။ နောက်ပြီး အရင် အစဉ်အလာတွေ ကလည်း လွတ်ကင်းလို့ မရဘူး။ အဲဒီအခါ ကျတော့ ကျမတို့ မြန်မာနိုင်ငံဟာ အိန္ဒိယနဲ့ တရုတ်နဲ့ နောက်- အရှေ့တောင် အာရှ ကြားမှာရှိတဲ့ နိုင်ငံဖြစ်နေတယ်။ အဲဒီလို ဆက်ဆံနေရတဲ့နိုင်ငံမှာ ပတ်ဝန်းကျင်က အင်အားကြီးတဲ့ နိုင်ငံတွေရဲ့ အနေအထားကို ထည့်တွက်တယ် ဆိုတာ ဒါ သဘာဝ ကျပါတယ်။ ဒီလို တရုတ်နိုင်ငံရဲ့ အနေအထားကို ထည့်မတွက်ဘဲနဲ့ မြန်မာနိုင်ငံနဲ့ ဆက်ဆံရမယ် ဆိုရင်တော့ အဲလိုတောင်းဆိုခြင်းဟာ ဘယ်လိုမှ သဘာဝ မကျပါဘူး။ ဒါပေမဲ့ အဲဒီဟာကို ထည့်တွက်လို့ ကျမတို့ကို ထိခိုက်စေတယ်လို့လည်း သုံးသပ်စရာ အကြောင်း မရှိပါဘူး။

ကျမတို့ကိုယ်တိုင်ကလည်း ကျမတို့ရဲ့ အိမ်နီးနားချင်းနိုင်ငံတွေနဲ့ အဆင်ပြေစေချင်တယ်။ အဆင်ပြေပြေ လည်း နေချင်တယ်။ ဒီတော့ အမေရိကန်ပြည်ထောင်စု အနေနဲ့လည်း တရုတ်ပြည်ထောင်စုနိုင်ငံတို့၊ အိန္ဒိယနိုင်ငံ တို့နဲ့ အဆင်ပြေပြီးတော့ ကောင်းကောင်းမွန်မွန် ဆက်ဆံရေး တည်ဆောက်ချင်တယ်လို့ ယုံကြည်တယ်။ အဲဒါကြောင့်မို့လို့ ကျမတို့က အားလုံးအတွက် အကျိုးရှိမယ့် နိုင်ငံရေးမူတွေကို ချမှတ်ပြီးတော့ သွားရမှာ ပဲ။ ဟိုလူနဲ့တည့်လို့၊ ဒီလူနဲ့မတည့်လို့ - ဒါမျိုးဟာ အင်မတန်မှ သေးသိမ်တဲ့ အမြင်တွေပဲလို့ ကျမ ထင်ပါတယ်။

ဦးကျော်ဇံသာ။ ။ ကျနော် နောက်ဆုံးတခု မေးခွင့်ပြုပါ။ အဲဒါက ရခိုင်ပြည်နယ်မှာ ဖြစ်ခဲ့တဲ့ Communal Violence လူအုပ်စုချင်း အကြမ်းဖက် ပဋိပက္ခတွေ ဖြစ်ခဲ့တာနဲ့ ပတ်သက်ပြီးတော့ လူ့အခွင့်အရေး အဖွဲ့ဆိုတဲ့ အဖွဲ့ တချို့က ဒေါ်အောင်ဆန်းစုကြည် ကို ဝေဖန်ကြပါတယ်။ ဒီကိစ္စမှာ ဒေါ်အောင်ဆန်းစုကြည် တက်တက်ကြွကြွ မပြောပါလား ဆိုပြီး။

ဒေါ်အောင်ဆန်းစုကြည်။ ။ တက်တက်ကြွကြွ မပြောပါလား- ဆိုတာက ဘာကို အခြေခံပြီး ပြောတာလဲတော့ မသိဘူးပေါ့နော်။ ကျမ ဆိုလို့ရှိရင် ပရော်ဖက်ဆာ ကင်တားနားနဲ့လည်း တွေ့ခဲ့တယ်။ ဟိုတလော ဆိုရင်လည်း တူရကီနိုင်ငံရေး ဝန်ကြီးနဲ့တွေ့တယ်။ ဒီကိစ္စတွေကို သေသေချာချာ ဆွေးနွေးကြတယ်။ လူ့အခွင့်အရေး ဘယ်လောက် အရေးကြီးတယ် ဆိုတာ ပြောတယ်။ ကျမတို့ရဲ့မူက လူ့အခွင့်အရေးနဲ့ တရားဥပဒေ စိုးမိုးရေး ဆိုတာ ခွဲခြားလို့ မရဘူး။ လူ့အခွင့်အရေး ကြေညာစာတမ်း နိဒါန်းမှာကို ပါပြီးသား၊ လူ့အခွင့်အရေးကို တရားဥပဒေ စိုးမိုးခြင်းနဲ့ ကာကွယ်ရမယ်၊ စောင့်ရှောက်ရမယ်ဆိုတာ ပါပြီးသားပဲ။ ဒါပေမဲ့ ကျမတို့ကနေပြီးတော့ အခုအချိန်ခါမှာ ငြိမ်းချမ်းရေး ရအောင်လို့ ပဋိက္ခတွေငြိမ်းအောင်လို့ လုပ်နေတာဟာ အစိုးရ အဖွဲ့အစည်းက လုပ်နေတာ။ အုပ်ချုပ်ရေး အဖွဲ့က လုပ်နေတာ။ အဲဒီအုပ်ချုပ်ရေး အဖွဲ့က လုပ်နေတဲ့ ကိစ္စတွေကိုလည်း ကျမတို့က ထိခိုက်အောင် မလုပ်ချင်ဘူး။ တကယ်ပဲ တခုခု လုပ်နိုင်လို့ ရှိလို့ရှိရင် ကျမတို့ လုပ်ပေးမယ်။ ဒါပေမဲ့ ကိုယ်က မလုပ်နိုင်ဘဲနဲ့ သက်သက်ဝေဖန်တဲ့ အလုပ်တွေလည်း ကျမတို့ မလုပ်ချင်ဘူး။ နောက်ပြီးတော့လည်း တဘက်နဲ့တဘက် ပဋိပက္ခ ပိုပြီးတော့ ကြီးပွားစေမဲ့ အမျက် မုန်းတီးမှုတွေ ပိုပြီးတော့ ထောင်လွှားစေမယ့် အပြောတွေလည်း ကျမတို့ မပြောချင်ဘူး။

ဒီလို မပြောလို့ ဘက်လိုက်ပြီးတော့ မပြောလို့ ကျမတို့ကို မကျေနပ်ဘူး ဆိုရင်တော့လည်း ကျမတို့ ခံရမှာပဲ။ ကျမ လန်ဒန်မှာ တုန်းကပေါ့နော်။ အဲဒါကတော့ ကချင်ပြည်နယ်မှာ ဖြစ်နေတဲ့ ကိစ္စနဲ့ ပတ်သက်လို့ပါ။ ကချင် လူငယ်တယောက်က ကျမကို ထပြီးတော့ ဝေဖန်ပါတယ်။ ကျမက ဘာဖြစ်လို့ တပ်ကို Condemnation ပေါ့နော်။ သူက အဲဒီလိုသုံးတယ်။ ဘာဖြစ်လို့ မရှုတ်ချ သလဲပေါ့နော်။ ကျမက ပြောတယ်။ ကျမတို့က Condemnation အလုပ် လုပ်ချင်တာ မဟုတ်ဘူး။ Reconciliation အလုပ်ကို လုပ်ချင်တာ။ ပြန်လည် ရင်ကြားစေ့ရေး အလုပ်ကို လုပ်ချင်တာ။ ဘယ်သူ့ကိုမှ ရှုတ်ချပြီးတော့ တိုက်ခိုက်တဲ့ အလုပ်ကို လုပ်ချင်တာ မဟုတ်ဘူး။ ဒီလို လုပ်ခြင်းအားဖြင့် ပြန်လည် ရင်ကြားစေ့ရေး ဆိုတာ မဖြစ်နိုင်ဘူး။ ဒီအတိုင်းပဲ ကျမတို့ကနေ နှစ်ဘက်စလုံးကို ကြည့်တဲ့နေရာမှာ လူ့အခွင့်အရေးနဲ့ တရားဥပဒေ စိုးမိုးရေးကို အခြေခံပြီးတော့ ကျမတို့ကြည့်မယ်။

ဘယ်ဘက်ကိုမှ ကိုယ့်ရဲ့ နိုင်ငံရေး အကျိုးအမြတ်ထွက်ရေး အတွက် ဘက်လိုက်ပြီးတော့ ပြောတာမျိုး ကျမတို့ မလုပ်ဘူး။ ဒီလို ဘက်လိုက်ပြီး ပြောတာဟာ ပဋိပက္ခတွေကို ပြေငြိမ်းသွားစေမှာ မဟုတ်ဘူး။ နောက်ပြီးတော့လည်း အခု အုပ်ချုပ်ရေး ဘက်ကနေ ကြိုးစားနေတဲ့ ကိစ္စတွေကိုလည်း မပြီးမြောက်သေးခင်ကို ကျမတို့ အနေနဲ့ ပျက်စီးအောင်လို့၊ အခက်အခဲဖြစ်အောင်လို့ လုပ်ဖို့ ကျမတို့ ရည်ရွယ်ချက် မရှိဘူး။ ကျမတို့ ဘာလုပ်ပေးနိုင်တာရှိလဲ။ လုပ်ပေးနိုင်တာရှိရင် ကျမတို့ လုပ်ပေးမယ်။ ဒုက္ခသည်တွေကို ကျမတို့ တတ်နိုင်သမျှ ကူညီပါတယ်။ NLD က သိတဲ့ အတိုင်းပဲ။ သိပ်ပြီး ချမ်းသာတဲ့ အဖွဲ့အစည်းတော့ မဟုတ်ပါဘူး။ ဒါပေမဲ့ ဒုက္ခသည်တွေကို တတ်နိုင်သမျှ ကျမတို့ အကူအညီတွေ ပေးတယ်။ ဟိုဘက် ဒီဘက် မခွဲခြားဘဲနဲ့ ကျမတို့ အကူအညီပေးတယ်။ ကျမတို့ရဲ့ အကူအညီကို အုပ်ချုပ်ရေး ဘက်ကပဲ တောင်းတောင်း၊ တခြား အကူအညီတောင်းနိုင်ဘက်က တောင်းလို့ ကျမတို့မှာ ပေးနိုင်တဲ့ အနေအထားမှာ ရှိရင်တော့ ကျမတို့က အဆင်သင့်ပါပဲ။

Ref: VOA News

Read More...

Collapse...

နိုင်ငံရေး အာဏာလုပွဲ အလားအလာများ

မင်းဝဏ်

၂၀၁၂ ခုနှစ် စက်တင်ဘာလ ၁၈ ရက်၊ အင်္ဂါနေ့၊


စက်တင်ဘာလ ၁၅ ရက်နေ့မှာကျရောက်တဲ့ အပြည်ပြည် ဆိုင်ရာ ဒီမိုကရေစီနေ့ကို လွှတ်တော် ဝန်းသဘင် ဆောင်မှာ ဒုတိယ အကြိမ်အဖြစ် ကျင်းပခဲ့တယ်လို့ ကြားသိရပါတယ်။ အစိုးရသစ် လက်ထက်မှာ မနှစ်ကပြုလုပ်ခဲ့တဲ့ အပြည်ပြည်ဆိုင်ရာ ဒီမိုကရေစီနေ့ အခမ်း အနား မှာတော့ ပြည်သူ့ လွှတ်တော် ဥက္ကဌ သူရဦးရွှေမန်းက “ကျွန်တော်ဒီမိုကရေစီ ဘက်တော်သား” လို့ ကြွေးကြော် ခဲ့ဖူးပါတယ်။

- အခုလည်း ပြည်ထောင်စုလွှတ်တော်နာယကရာထူးကို ၂ နှစ်ခွဲ ထမ်းဆောင်နေတဲ့ အမျိုးသား လွှတ်တော် ဥက္ကဌ ဦးခင်အောင်မြင့်က “ပြည်သူ့ကိုယ်စား တာဝန်ထမ်းဆောင် နေကြတဲ့ ဥပဒေပြုရေး၊ အုပ်ချုပ်ရေး၊ တရားစီ ရင်ရေးဆိုင်ရာ မဏ္ဍိုင် အသီးသီးမှ ပုဂ္ဂိုလ်များဟာ ပွင့်လင်း မြင်သာဖို့ လိုကြောင်း၊ ဒီမိုကရေစီနေ့ ဆောင်ပုဒ်ဖြစ်တဲ့ အားလုံးပါဝင် ဆွေးနွေးလျက် - ဒီမိုကရေစီ ဗဟိုချက် အရ နိုင်ငံသား အားလုံး ပါဝင် ဆောင်ရွက်နိုင်ရေး အတွက် ပြည်သူ့ကိုယ်စား တာဝန်ယူ ဆောင်ရွက်ရသူ အသီးသီးက ပွင့်လင်း မြင်သာ ဆောင်ရွက်ကြဖို့ ” ပြောခဲ့ပြီး၊ သူရ ဦးရွှေမန်း ကတော့ “ ပြည်သူ့ဆန္ဒ သဘောထား မပါတဲ့ အမိန့် ညွှန်ကြားချက်နဲ့ ဥပဒေများဟာ ဒီမိုကရေစီ မဟုတ်၊ အာဏာရှင်ဆန်တဲ့ စံနစ် ဖြစ်သွားလိမ့်မယ် ” လို့ ပြောဆို ခဲ့ပါတယ်။

အရင် စစ်အစိုးရ လက်ထက်က စိတ်ဓာတ် စစ်ဆင်ရေး ဌာနမှာ ညွှန်ကြားရေးမှူး ရာထူးအထိ တာဝန် ထမ်းဆောင်ဖူးခဲ့တဲ့ ဗိုလ်မှူးချုပ်ဟောင်း ဦးခင်အောင်မြင့်နဲ့ ကြည်း၊ ရေ၊ လေ ညှိနှိုင်း ကွပ်ကဲရေးမှူး ရာထူးအထိ ထမ်းဆောင်ခဲ့တဲ့ ဗိုလ်ချုပ်ကြီးဟောင်း သူရဦးရွှေမန်း တို့ရဲ့ “ ဒီမိုကရေစီ၊ ပြည်သူ့ဆန္ဒ၊ ပြည်သူ့အသံ၊ ပြည်သူ့ဝန်ထမ်း ” စတဲ့ စကားလုံးတွေကို အဲဒီနေ့ အခမ်း အနားမှာ အတော်လေး ဖေါဖေါသီသီ ကြားခဲ့ရပါတယ်။

- လွှတ်တော်ဥက္ကဌတွေက ကြီးမှူး ကျင်းပတဲ့ အပြည်ပြည် ဆိုင်ရာ ဒီမိုကရေစီ နေ့မှာ နိုင်ငံသား တဦးရဲ့ မူလအ ခွင့်အရေး၊ လွတ်လပ်စွာ ထုတ်ဖေါ်ပြောဆိုခွင့်၊ စုဝေးခွင့် ကိစ္စတွေကို အသားပေး ပြောဆိုနေချိန်မှာ လက်ပံ တောင်းတောင် မုံရွာကြေးနီ စီမံကိန်းကို ကန့်ကွက် ဆန္ဒပြသူတွေ၊ လယ်ယာမြေ မတရား သိမ်းဆည်းခံရလို့ ဆန္ဒထုတ်ဖေါ် သူတွေကို အာဏာပိုင်တွေက ဖမ်းဆီး စစ်ကြော နှိပ်ကွပ်မှုတွေ လုပ်နေတာကလည်း ဒီမိုကရေစီ ပန်းတိုင်ဆီ ချီတက်နေတယ် ဆိုတာနဲ့ သဟဇာတ မဖြစ်တဲ့ ကိစ္စတွေပါပဲ။

- ၂၀၁၁ ခုနှစ် ဇန်နဝါရီလ ၃၁ ရက်က စတင် ကျင်းပခဲ့တဲ့ ပထမ အကြိမ် လွှတ်တော် ပထမ ပုံမှန်အစည်း အဝေးကနေ ၂၀၁၂ ခုနှစ် စက်တင်ဘာလ ၇ ရက်မှာ ပြီးဆုံးခဲ့တဲ့ စတုတ္ထ ပုံမှန် အစည်းအဝေး အထိ ပြည်ထောင်စု လွှတ်တော် ၁၈ လတာ သက်တမ်း ကာလအတွင်း ဥပဒေသစ် ၂၈ ခုသာ ပြဌာန်း နိုင်ခဲ့ပြီး ခေတ်နဲ့ မလျော်ညီတဲ့၊ အာဏာရှင် စံနစ်ကို အထောက်အပံ့ ပေးပြီး ပြည်သူလူထုရဲ့နိုင်ငံသား အခွင့်အရေးတွေကို ပိတ်ပင် ကန့်သတ်ထားတဲ့ ဥပဒေတွေ အများကြီး ကျန်ရှိနေသေးတာ တွေ့ရပါတယ်။ အသစ်ပြဌာန်းတဲ့ ဥပဒေတွေမှာ လည်း သက်ဆိုင်ရာ ဝန်ကြီးဌာနတွေက နည်းဥပဒေတွေ ဆက်လက် ထုတ်ပြန်ဖို့ လိုတာထက် ပိုပြီး အချိန်ကြာ တာ၊ အချို့ ဥပဒေတွေ ဆိုရင် နည်းဥပဒေ ထုတ်ပြန်နိုင်ဖို့ တနှစ်ကျော် ကြာနေတာမျိုးတွေ ရှိနေပါတယ်။

- လွှတ်တော်ကိုယ်စားလှယ်များအတွက် ထောက်ပံ့လစာ၊ လွှတ်တော် အစည်းအဝေး ၄ ကြိမ် အတွက် ကုန်ကျ စားရိတ်များနဲ့ ကြည့်မယ်ဆိုရင် ပြည်သူလူထု အနေနဲ့ ဒီမိုကရေစီ အခွင့်အရေးတွေ ခံစားနိုင်ဖို့၊ ဘဝနေထိုင်မှု လုံခြုံရေးနဲ့ သက်သာ ချောင်ချိမှုတွေ ဖြစ်စေဖို့ ဥပဒေများ ပေါ်ထွက်လာတဲ့ ရလဒ်က အတော် နည်းပါသေးတယ်။ “ ပြည်သူ့အသံ လွှတ်တော်အသံ ” ၊ “ ပြည်သူ့ဆန္ဒ လွှတ်တော်ဆန္ဒ ” ဆိုပြီး ရှေးဟောင်း ကြွေးကြော်သံတွေနဲ့ အချိန် ဆွဲနေမယ့် အစား ပြုပြင်ပြောင်းလဲရေး တကယ်လိုလားရင် နိုင်ငံတော် ဘဏ္ဍာငွေတွေ ကုန်ကျမှုနဲ့ ထိုက်ထိုက် တန်တန် ဖြစ်အောင် လုပ်သွားသင့်ပြီလို့ ဝေဖန်သံတွေ ထွက်လာပြီ ဖြစ်ပါတယ်။ ဒီမိုကရေစီ မြေစမ်း ခရမ်းပျိုး ကာလမှာ မုဆိုးစိုင်သင်- သွားနေရပါတယ် ဆိုတဲ့ ဆင်ခြေမျိုး အစား ဒီမိုကရေစီရေး၊ လူ့အခွင့်အရေး တလုံး တပါဒမျှ မပြော၊ မလုပ်ခဲ့ပဲ လွှတ်တော်ထဲ ရောက်နေ သူတွေလည်း ဒီမိုကရက်တစ် အမတ်တွေအဖြစ် ကိုယ့်ကိုကိုယ် အပြောင်းအလဲ လုပ်ယူကြမှသာ ဥပဒေပြု လွှတ်တော်တွေက အရွေ့ တကယ်ရှိလာမှာ ဖြစ်ပါတယ်။

- ပထမအကြိမ်လွှတ်တော် စတုတ္ထပုံမှန်အစည်းအဝေး နောက်ဆုံး ရက်တွေမှာ သမ္မတ ဦးသိန်းစိန်က ပြည်ထောင်စု ဝန်ကြီး အဖွဲ့ အပြောင်းအလဲနဲ့ ပတ်သက်ပြီး လွှတ်တော်ကို အကြောင်းကြား ခဲ့ပါတယ်။ ၂၀၀၈ ဖွဲ့စည်း ပုံမှာ နိုင်ငံတော် သမ္မတ၏ တာဝန်နှင့် လုပ်ပိုင်ခွင့် ဖေါ်ပြချက်ဖြစ်တဲ့ ပုဒ်မ ၂၀၂ (က) (ခ) တို့အရ “ ပြည်ထောင်စု အစိုးရ ဝန်ကြီးဌာန များကို လိုအပ်သလို သတ်မှတ်နိုင်သည်၊ ထို့အပြင် ဝန်ကြီးဌာနများကို ပြင်ဆင် သတ်မှတ်ခြင်း၊ ဖြည့်စွက်ခြင်း ပြုနိုင်သည်။ ပြည်ထောင်စုဝန်ကြီး ဦးရေကို လိုအပ်သလို သတ်မှတ်နိုင်သည်။ ထို့ပြင် သတ်မှတ် ဦးရေကို တိုးခြင်း၊ လျှော့ခြင်း ပြုနိုင်သည် ” လို့ ဖေါ်ပြထားတဲ့ အတွက် ၂၀၁၁ ခုနှစ် မတ်လ ၃၀ ရက်မှာ ကျမ်းကျိန်ခဲ့တဲ့ ပြည်ထောင်စု အစိုးရအဖွဲ့ကို ၁၈ လ အတွင်း လိုအပ်သလို အပြောင်းအလဲ လုပ်ခဲ့တယ် လို့ဆိုရမှာပါ။ လျှပ်စစ် ၁ ဝန်ကြီး ဦးဇော်မင်းနဲ့ ဆောက်လုပ်ရေး ဝန်ကြီး ဦးခင်မောင်မြင့်တို့ နှုတ်ထွက်တာ၊ ရှိနေတဲ့ ဝန်ကြီးတွေကို ဌာနရွှေ့တာ၊ မြန်မာ့ စက်မှု ဖွံ့ဖြိုးရေး ဝန်ကြီးဌာနကို ဖြုတ်တာ၊ လျှပ်စစ် ၁ နဲ့ ၂ ကို တဌာနထဲ အဖြစ် ပေါင်းတာ၊ ဒု-ဝန်ကြီးတချို့ ဝန်ကြီးဖြစ်လာတာ၊ ဒု-ဝန်ကြီး အသစ် ၁၅ ဦးခန့်တာ၊ သမ္မတရုံး ဝန်ကြီးဌာနမှာ ဝန်ကြီး ၆ ဦး ထားလိုက်တာတွေ ဖြစ်ပါတယ်။

- ပြည်နယ်နဲ့တိုင်းဒေသကြီး အစိုးရ အဖွဲ့က ဝန်ကြီးချုပ်နဲ့ ဝန်ကြီးတွေ၊ တနိုင်ငံလုံးမှာ ရှိတဲ့ တိုင်းရင်းသား ရေးရာဝန်ကြီး ၂၉ ဦး အနေနဲ့ အလုပ်အကိုင် မယ်မယ်ရရ မရှိချိန်၊ ဘတ်ဂျက် ခွဲဝေပေးနိုင်မှု ဘယ်ဆီနေမှန်း မသိ ဖြစ်နေချိန်မှာ ဦးသိန်းစိန်က ပြည်ထောင်စု အဆင့် ဝန်ကြီးအဖွဲ့ကို သူ့စိတ်တိုင်းကျ ပြင်လိုက်တာပါ။ ဗဟိုချုပ် ကိုင်မှုလျော့ချရေး၊ ဖွဲ့စည်းပုံနဲ့ အညီ ပြည်နယ်နဲ့တိုင်း ဒေသကြီး အစိုးရတွေကို လုပ်ပိုင်ခွင့် အာဏာ ခွဲဝေပေးရေး တွေက ၂၀၀၈ ဖွဲ့စည်းပုံ စာအုပ်ထဲမှာသာ ဖြစ်နေပြီး လက်ရှိ အခင်းအကျင်းမှာ သမ္မတရဲ့ အာဏာပါဝါ တည်ဆောက်ရေးကို စတင် အရှိန်ယူ လုပ်ဆောင်လာတာ တွေ့ရပါတယ်။ ဝန်ကြီးဌာန ၃၄ ခုမှာ ဝန်ကြီး ၃၀ ဦး နဲ့ အစိုးရ အဖွဲ့ကို စတင် ဖွဲ့စည်းခဲ့ပေမယ့် အခုချိန်မှာ ဝန်ကြီးဌာန ၃၁ ခုကို ဝန်ကြီး ၃၆ ဦးက ကိုင်တွယ်စီမံပြီး အစိုးရ ယန္တယား လည်ပတ် သွားမယ့် သဘောဖြစ်ပါတယ်။ ခေတ်ပြောင်း စံနစ်ပြောင်းမှာ အပြောင်း အလဲတွေ သိသာထင်ရှားစွာ ထွက်ပေါ်လာဖို့ အတွက် အစိုးရအဖွဲ့ကို အပြောင်းအလဲ လုပ်ရတာပါ လို့ သမ္မတ ဦးသိန်းစိန်က စက်တင်ဘာလ ၁၀ ရက်နေ့ ဒု-ဝန်ကြီးတွေ ကတိသစ္စာ ပြုပွဲမှာ ပြောခဲ့ပေမယ့် ဗိုလ်သန်းရွှေ ဖွဲ့ပေးခဲ့တဲ့ အစိုးရ အဖွဲ့ကို ခုမှ စပြင်ခွင့် ရတယ်ဆိုတာ ကိုတော့ မြန်မာ့ နိုင်ငံရေး လေ့လာသူတွေက သတိထား မိကြပါတယ်။

- စင်္ကာပူမှာနှစ်စဉ်ပြုလုပ်တဲ့ အာရှလုံခြုံရေး ဆိုင်ရာ - ရှန်ဂရီလာ ဆွေးနွေးပွဲကို တက်ရောက် ခဲ့တဲ့ ကာကွယ် ရေးဝန်ကြီး ဒု-ဗိုလ်ချုပ်ကြီး လှမင်းက သမ္မတ ဦးသိန်းစိန် အစိုးရရဲ့ ဒီမိုကရက်တစ် ပြုပြင် ပြောင်းလဲရေး လုပ်ဆောင်နေမှုများ အပေါ် တပ်မတော်က ရာနှုန်းပြည့် ထောက်ခံပြီး အရပ်သား အစိုးရရဲ့ ညွှန်ကြားမှုတွေကို လိုက်နာ လုပ်ဆောင် သွားမယ်လို့ ဇွန်လ ၂ ရက်က ပြောခဲ့ ဖူးပါတယ်။ သူ့နေရာမှာ ဒု-ဗိုလ်ချုပ်ကြီး ဝေလွင်ကို ပြောင်းလဲ တာဝန် ပေးလိုက်ပြီး တပ်မတော် ကာကွယ်ရေး ဦးစီးချုပ် ဒု-ဗိုလ်ချုပ်မှူးကြီး မင်းအောင်လှိုင်က ဒု-ဗိုလ်ချုပ်ကြီး လှမင်းကို စစ်ဖက် မူလ တာဝန်တွေ ထမ်းဆောင်ဖို့ ကက (ကြည်း) ကို ပြန်ခေါ် လိုက်တာဟာလည်း ပြည်ထောင်စု အစိုးရ အပြောင်းအလဲ ထဲက ထူးခြားချက် တခုပါပဲ။

- လွှတ်တော်မှာရှိတဲ့ တပ်မတော်သားကိုယ်စားလှယ် ၂၅ ရာခိုင်နှုန်းကို သင့်တော်တဲ့ အချိန်မှာ လျှော့ချသွားမယ် လို့ပြောခဲ့ တာလည်း ဒု-ဗိုလ်ချုပ်ကြီး လှမင်းပဲ ဖြစ်ပါတယ်။ စစ်ဗိုလ် အမတ်တွေ လွှတ်တော် တွေထဲက ဘယ်အချိန် ထွက်သွားကြမယ် မသိပေမယ့် မြောက်ပိုင်းတိုင်း စစ်ဌာနချုပ် တိုင်းမှူး ဗိုလ်ချုပ် ဇေယျာ အောင်က ရထား ပို့ဆောင်ရေး ဝန်ကြီး ဖြစ်လာတာ တွေ့ရတာမို့ အစိုးရ အဖွဲ့ထဲမှာ ကာကွယ်ရေး၊ ပြည်ထဲရေးနဲ့ နယ်စပ်ရေးရာ ဝန်ကြီးတွေ အပြင် စစ်တပ် ယူနီဖေါင်းနဲ့ နောက်တဦး ထပ်တိုး လာတာ တွေ့ရပါတယ်။ ၂၀၀၈ ဖွဲ့စည်းပုံ သဘောအရတော့ သမ္မတနဲ့ ကာကွယ်ရေး ဦးစီးချုပ်အကြား သဘော မျှကြတယ် ဆိုရင် စစ်ဗိုလ်တွေကို ဝန်ကြီး လုပ်ခိုင်းလိုက်၊ စစ်တပ် ပြန်ပို့လိုက် - လုပ်လို့ရတာမို့ စစ်နည်း ဗျူဟာထဲက ပြောင်းလွယ် ပြင်လွယ် ရှိမှုကို ဦးသိန်းစိန်နဲ့ ဗိုလ်ချုပ် မင်းအောင်လှိုင်တို့ အဆင်ပြေသလို သုံးနေကြတာလည်း ဖြစ်နိုင်ပါတယ်။

- လွှတ်တော်ဥက္ကဌ ဗိုလ်ချုပ်ဟောင်းများ ကလည်း ဒီမိုကရေစီကို အာပေါက်အောင် ပြောနေတဲ့ အချိန်၊ သမ္မတ လုပ်တဲ့ ဗိုလ်ချုပ်ဟောင်းကလည်း ပြည်သူတွေက ကျွန်တော်တို့ကို ယုံယုံကြည်ကြည် ရွေးကောက် တင်မြှောက် လိုက်တာမို့ ပြည်သူ့ အစိုးရ ဆိုပြီး ကိုယ့်ကိုကိုယ် ရဲဆေးတင်၊ နိုင်ငံတကာ ထွက်ပြနေတဲ့ အချိန်မျိုးတွေမှာ တရားစီရင်ရေး ပိုင်းက နိုင်ငံတော် ဖွဲ့စည်းပုံ အခြေခံ ဥပဒေဆိုင်ရာ ခုံရုံးဥက္ကဌ ဗိုလ်ချုပ်ဟောင်း ဦးသိန်းစိုးနဲ့ ၂၀၀၈ ဖွဲ့စည်းပုံ ရေးဆွဲရာမှာ အဓိက အခန်းကဏ္ဍတွေကနေ ပါဝင်ခဲ့ကြသူ တချို့နဲ့ ဖွဲ့စည်းထားတဲ့ ခုံရုံးအဖွဲ့ဝင် ၉ ဦး ကတော့ စတေး ခံလိုက်ရပြီ ဖြစ်ပါတယ်။ စစ်အုပ်စုရဲ့ ဇတ်ညွှန်းနဲ့ ဒါရိုက်တာကြီး ဗိုလ်သန်းရွှေ အလွန် ၁၈ လမှာ သမ္မတကလည်း သူ့ပါဝါကို အားဖြည့် တည်ဆောက် လာပြီမို့ သာမန်ပွတ်တိုက်မှုမျိုး မဟုတ်တဲ့ နိုင်ငံရေး အာဏာ လုပွဲတွေကို မြင်ယောင်မိကြောင်း တင်ပြ လိုက်ရပါတယ်။

Read More...

Collapse...

ဒေါ်အောင်ဆန်းစုကြည် ဝါရှင်တန်ဒီစီကို ဆိုက်ရောက်

မခင်ဖြူထွေး
17.09.2012

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ဟာ အမေရိကန် ပြည်ထောင်စု ဝါရှင်တန် ဒီစီကို ဒီကနေ့ မနက် ၁၁ နာရီလောက်မှာ ရောက်ရှိလာပြီဖြစ်ကြောင်း အမေရိကန် နိုင်ငံခြားရေး ဝန်ကြီးဌာနက ဗွီအိုအေ မြန်မာပိုင်းကို အတည်ပြု ပြောကြား ပါတယ်။

ဒေါ်အောင်ဆန်းစုကြည်ရဲ့ အခု အမေရိကန် ခရီးစဉ်ဟာ NLD ပါတီ အတွက် သာမက နိုင်ငံတခုလုံး အတွက် နိုင်ငံရေး အရ အကျိုးရှိတဲ့ ခရီးစဉ် တရပ်ဖြစ်ပြီး ရှေ့လျှောက် မြန်မာနဲ့ အမေရိကန် ဆက်ဆံရေးမှာ အခြေအနေကောင်းတွေ မြင်တွေ့ရဖို့ မျှော်လင့်နိုင်လိမ့်မယ်လို့ အမျိုးသား ဒီမိုကရေစီ အဖွဲ့ချုပ် NLD ပါတီ ရဲ့ နာယကပုဂ္ဂိုလ် တဦးဖြစ်တဲ့ ဦးတင်ဦးက ပြောဆိုလိုက်ပါတယ်။ အပြည့်အစုံကို ဦးတင်ဦးကို ဆက်သွယ်မေးမြန်းထားတဲ့ မခင်ဖြူထွေးက ပြောပြပေးပါမယ်။

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ဟာ အမေရိကန် ပြည်ထောင်စု ၀ါရှင်တန်မြို့တော် အနီးက ဒဲလက်စ် နိုင်ငံတကာ လေဆိပ်ကနေ ရောက်ရှိလာပြီ ဖြစ်ပါတယ်။ မြန်မာနိုင်ငံဆိုင်ရာ အမေရိကန် သံအမတ် ဒဲရက်မစ်ချဲလ် လည်း ဒေါ်အောင်ဆန်းစုကြည် နဲ့အတူ ဒီကနေ့ အမေရိကန် ပြည်ထောင်စုကို ရောက်လာမှာဖြစ်ပါတယ်။

သီတင်းနှစ်ပတ်ကျော်လောက် ကြာမယ့် အခု ခရီးစဉ်အတွင်း ဒေါ်အောင်ဆန်းစုကြည် ဟာ အမေရိကန် အစိုးရ တာဝန်ရှိသူတွေ၊ လွှတ်တော် အမတ်တွေနဲ့ တွေ့ဆုံဖို့ ရှိသလို အမေရိကန် ပြည်ထောင်စုက ပေးအပ်တဲ့ ဂုဏ်ထူးဆောင် ဘွဲ့တွေကို လက်ခံ ရယူမှာဖြစ်ပါတယ်။ အမေရိကန်မှာရောက်နေကြတဲ့ မြန်မာ မိသားစုတွေနဲ့လည်း တွေ့ဆုံဖို့ စီစဉ်ထားတာပါ။

မြန်မာ့ဒီမိုကရေစီရေးအတွက် အားပေး ကူညီခဲ့တဲ့ နိုင်ငံတွေထဲက တစ်ခုဖြစ်တဲ့ အမေရိကန် ပြည်ထောင်စု ကို ဒေါ်အောင်ဆန်းစုကြည် အနေနဲ့ ကိုယ်တိုင် ခုလို လာရောက်ပြီးတော့ ကျေးဇူးတင်စကား ပြောနိုင်မှာ ဖြစ်သလို ဒီခရီးစဉ်ဟာ NLD ပါတီ အတွက် သာမက အစိုးရနဲ့ တိုင်းပြည် တခုလုံးအတွက် နိုင်ငံရေးအရ အကျိုးရှိတဲ့ ခရီးစဉ် တရပ်ဖြစ်တယ်လို့ NLD ပါတီ နယက အဖွဲ့ဝင် ဦးတင်ဦးက ပြောပါတယ်။

“အခုဟာက သူသွားတာကတော့ Political Significant ရှိတာပေါ့ဗျာ။ ဘာဖြစ်လို့လဲ ဆိုတော့ ဒီနိုင်ငံတော် တင်သာမက ကမ္ဘာမှာ ဖြစ်နေတဲ့ လွတ်လပ်ရေး၊ ဒီမိုကရေစီရေး၊ လူ့အခွင့်အရေး၊ ငြိမ်းချမ်းရေး စသဖြင့်ပေါ့။ အဲ့တာတွေမှာ အဓိက လုပ်နိုင်စွမ်းရှိတဲ့ ပြည်သူ တရပ်လုံး နိုင်ငံတကာက ဒီမိုကရေစီအင်အားစုတွေက ထောက်ခံတဲ့ ခေါင်းဆောင် ဆိုတော့ကာ သွားတဲ့ အတွက်ကတော့ နိုင်ငံရေး အကျိုးအမြတ် အများကြီး ရှိတာပေါ့ဗျာ။ အထူးသဖြင့်ကတော့ ကျနော်တို့ ပါတီတခုတည်းတင် ဘယ်ကမလဲ။

ပြည်သူလူထုတရပ်လုံး၊ တိုင်းရင်းသားတရပ်လုံး အားလုံးအတွက်ပေါ့။ စစ်တပ် အပါအဝင်ပေါ့။ အံဝင် သွားပြီပေါ့ဗျာ။ အခု အစိ်ုးရ လုပ်နေတဲ့ ပုဂ္ဂိုလ်တွေ အကုန် အပါအဝင်ပေါ့ဗျာ။ နိုင်ငံဆိုတဲ့ ဂုဏ်သိက္ခာ အနေနဲ့ကတော့ ကြီးမြတ်တာပေါ့။ သူက ကျေးဇူး တင်သူတွေကို သွားပြီးတော့ ကျေးဇူး တင်စကားပြောတယ်။ နောက်ပြီးတော့ ကင်းကွာနေတဲ့ မြန်မာတွေကို သွားပြီးတော့ တွေ့တယ်။ နိုင်ငံရေး လူပ်ရှားမူကတော့ တိုးတက်တာပေါ့။”

ဒေါ်အောင်ဆန်းစုကြည်ရဲ့ အမေရိကန်ခရီးစဉ်နဲ့ မရှေးမနှောင်းဆိုသလိုပဲ မြန်မာ သမ္မတ ဦးသိန်းစိန် ဟာလည်း နယူးယောက်မြို့ ကုလသမဂ္ဂ ရုံးချုပ်မှာ ကျင်းပမယ့် အထွေထွေ ညီလာခံကို တက်ရောက်ဖို့ အမေရိကန် ပြည်ထောင်စုကို ဒီရက်ပိုင်း ရောက်လာဖို့ ရှိနေပါတယ်။

ခုလိုမျိုး မြန်မာနိုင်ငံက ခေါင်းဆောင်နှစ်ဦးရဲ့ အမေရိကန် ခရီးစဉ်အတွင်းမှာ မြန်မာနိုင်ငံ အပေါ် ချမှတ်ထားတဲ့ အမေရိကန်ရဲ့ အရေးယူ ဒဏ်ခတ်မှုတွေကို ထပ်ပြီး လျှော့ပေါ့မှုတွေ လုပ်ကောင်း လုပ်လာနိုင်တယ်လို့ အကဲခတ်တချို့က သုံးသပ် ပြောဆိုနေကြ တာတွေလည်း ရှိပါတယ်။ ချက်ချင်း မြန်မြန်ဆန်ဆန်ကြီး မဖြစ်နိုင်ပေမဲ့လို့ အပြောင်းအလဲတွေ ကတော့ တဖြည်းဖြည်းချင်းတော့ ဖြစ်လာနိုင်တယ်လို့ ဦးတင်ဦးက ပြောပါတယ်။

“ဒီလိုပြောရမယ်ဗျ။ အခုကတော့ Economic Sanctions က တနှစ်လျှော့ပေးလိုက်တဲ့ သဘောလေ။ ဟိုတုန်းက ဒီလို တနှစ်လျှော့ပေး လိုက်တယ် ဆိုရင်တော့ နောက်ထပ် ဆက်လက် လုပ်သင့်လုပ်ထိုက် တာရှိတဲ့ အပေါ်မှာ အခုလို ထူးထူးခြားခြားလေးတွေ တိုးတိုး တက်တက် ဖြစ်လာရင်တော့ တခုပြီး တခု ဒီလိုပဲ လျှော့သွားစရာ အကြောင်း ရှိပါတယ်။ ဒီလိုသဘောတော့ မှန်းလို့ရတာပေါ့။

တခါတည်း ဝုန်းခနဲ ဒိုင်းခနဲ အကုန်လုံး ဒီလိုတော့လည်း ကျနော်တို့ ပြောလို့ဆိုလို့ မရသေးဘူး ထင်တယ် ခင်ဗျ။ အမေရိကန် ကလည်း ကွန်ကရက် ရှိသေးတာကိုးဗျ။ ကွန်ကရက် ဆိုတာက ပြည်သူလူထုရဲ့ သဘောထား ဆန္ဒနဲ့ အများကြီး ပါသေးတာကိုး။

ဒါတွေကလည်းပဲ သမ္မတကြီး အာဏာတခုတည်းနဲ့တော့ မဟုတ်ဘူးလေ။ သမ္မတကနေ တဆင့် ကွန်ကရက်ကနေ လုပ်တာ ဆိုတော့ ကွန်ကရက်ရဲ့ သဘော သဘာဝတွေလည်း လိုသေးတာကိုးဗျ။ ဒါပေမယ့် အခြေအနေကောင်းတွေ ကတော့ အရင်ကထက် စာရင် ပိုပြီးတော့ တိုးတက်ကောင်းမွန် လာတယ်လို့ ဒီလိုတော့ တွက်လို့ ရပါတယ်ခင်ဗျာ။ ”

အမျိုးသား ဒီမိုကရေစီအဖွဲ့ချုပ် ဥက္ကဋ္ဌ၊ နိုဘဲလ်ငြိမ်းချမ်းရေး ဆုရှင် ဒေါ်အောင်ဆန်းစုကြည်ဟာ အမေရိကန် ကွန်ဂရက်စ် လွှတ်တော်က အရပ်သားတွေကို ပေးအပ်တဲ့ အမြင့်ဆုံးသော ဂုဏ်ထူးဆောင် ရွှေတံဆိပ်ဆု အပါအ၀င် Asia Society အဖွဲ့က ချီးမြှင့်မယ့် ဂုဏ်ထူးဆောင်ဆု၊ Atlantic Council ရဲ့ ကမ္ဘာ့နိုင်ငံသား ဆုတွေကို ဒီခရီးစဉ်အတွင်း လက်ခံရယူသွားမှာ ဖြစ်ပါတယ်။

Yale, Harvard နဲ့ Kentucky ပြည်နယ် Louisville တက္ကသိုလ်တွေကို သွားရောက် စကားပြောဖို့လည်း ရှိပါတယ်။ ဒေါ်အောင်ဆန်းစုကြည်ရဲ့ အခု တကြိမ် အမေရိကန် ခရီးစဉ်ဟာ မြန်မာနိုင်ငံမှာ ၈ လေးလုံး အရေးတော်ပုံကြီး ဖြစ်ပွား ခဲ့ပြီးနောက်ပိုင်း ဒီမိုကရေစီရေး ကြိုးပမ်းမှုတွေကြောင့် ဆယ်စုနှစ် တခုကျော်ကြာ နေအိမ် အကျယ်ချုပ် ကျခံခဲ့ရပြီးတဲ့နောက် ပထမဆုံး အကြိမ် အမေရိကန်ပြည်ထောင်စုကို လာရောက်တဲ့ ခရီးစဉ်လည်း ဖြစ်ပါတယ်။

Ref: VOA News

Read More...

Collapse...

ကာချုပ်ရုံးရှေ့တွင်ပါ စစ်ရပ်စဲရေး ဆန္ဒပြမည်

သိင်္ဂီထွန်း
တနင်္လာနေ့၊ စက်တင်ဘာလ ၁၇ ရက် ၂၀၁၂

ရန်ကုန် (မဇ္ဈိမ) ။ ။ တနိုင်ငံလုံး အပစ်အခတ် ရပ်စဲရေးအတွက် စက်တင်ဘာလ ၂၁ ရက်နေ့တွင် ကျရောက်မည့် အပြည်ပြည် ဆိုင်ရာ ငြိမ်းချမ်းရေးနေ့တွင် ပြည်တွင်းရှိ လူမှု အဖွဲ့စည်း ၁၉ ဖွဲ့က နေပြည်တော်ရှိ သမ္မတရုံး၊ လွှတ်တော် များရှေ့နှင့် ကာကွယ်ရေး ဦးစီးချုပ် ရုံးရှေ့တို့တွင် ဆန္ဒပြုပွဲများ ပြုလုပ် သွားမည်ဟု ကချင်ငြိမ်းချမ်းရေး ကွန်ယက်မှ ကိုဂျော်ဂွန်းက မဇ္ဈိမကို ပြောသည်။

“စာတင်ထားတယ်။ ခွင့်ပြုသည်ဖြစ်စေ ခွင့်မပြုသည်ဖြစ်စေ ကျနော်တို့ လုပ်မှာ” ဟု ကိုဂျော်ဂွန်း ကပြောသည်။

ထိုနေရာများအား ရွေးချယ်ဆန္ဒပြရခြင်းနှင့်ပတ်သက်၍လည်း “ကချင်စစ်ရဲ့ နောက်ကွယ်မှာ ရှိတဲ့ ရပ်တန့်အောင် လုပ်နိုင်တဲ့ တာဝန်ရှိတဲ့ သူတွေ၊ ပထမဆုံး နိုင်ငံတော် သမ္မတကို ရည်ရွယ်တယ်။ ပြီးလို့ရှိရင် ဒီမိုကရေစီ ကျင့်သုံးတဲ့ နိုင်ငံမှာ ဆိုရင် စစ်ပွဲတပွဲဟာ လွှတ်တော်ကနေ ခွင့်ပြုချက် မရရင် တိုက်လို့မရဘူး ဆိုတဲ့အတွက် လွှတ်တော်ရှေ့ကို သွားဖို့ ရည်ရွယ်တာပါ။ ဒုတိယ တချက်ကတော့ ကာကွယ်ရေး ဦးစီးချုပ်ရုံးရှေ့ပါ။ ကျနော်တို့က ရန်တိုက်ပေးခြင်း လည်း မဟုတ်ပါဘူး။ စစ်ပွဲတပွဲ အတွက် မြန်မာနိုင်ငံမှာ အခရာ ကျတာက ကာကွယ်ရေး ဦးစီးချုပ်ပါ” ဟု ကိုဂျော်ဂွန်း က ဆိုသည်။

ငြိမ်းချမ်းရေးနေ့တွင် ကချင်ငြိမ်းချမ်းရေးကွန်ယက် နှင့်အတူ အခြားလူမှုရေး အဖွဲ့များ၊ အသင်းဖွဲ့များ၊ ကျောင်းသားများ
နှင့် အခြား စိတ်ပါဝင်စားသူ ၂၅ဝ ခန့် ပါဝင်မည်ဟု ဆိုသည်။

ထိုနေ့ မနက်ပိုင်းတွင် ရန်ကုန်မှ ကား ငါးစီးဖြင့် နေပြည်တော်သို့ ထွက်ခွာမည်ဖြစ်ပြီး နေ့လည်ပိုင်းတွင် သတ်မှတ် နေရာ များရှေ့၌ ဆန္ဒပြုကြမည်ဖြစ်သည်။ ညနေ ၄ နာရီတိတိတွင် ရောက်ရာနေရာမှ ငါးမိနစ် ငြိမ်သက်စွာ ဆုတောင်းကြမည်ဟု စီစဉ်ထားကြောင်း သိရသည်။

ဦးတည်ဆန္ဒပြရန် သတ်မှတ်ထားသည့် လွှတ်တော်ဝင်းသည် ဥတ္တရသီရိမြို့နယ်၊ ဇေယျာ သိဒ္ဓိ ရပ်ကွက်တွင် တည်ရှိ သည်။ ရုံးအမှတ် ၂၄ ဖြစ်သည့် ကာကွယ်ရေး ရုံးနှင့် ရုံးအမှတ် ၁၈ ဖြစ်သည့် သမ္မတရုံး တို့သည် ဥတ္တရသီရိမြို့နယ်တွင် တည်ရှိသည်။

ရန်ကုန်မြို့တွင်လည်း ငြိမ်းချမ်းရေးကွန်ယက်မှ ဦးဆောင်ကာ လမ်းလျှောက်ပွဲတခုကို လူ ၃ဝဝ ခန့်ဖြင့် နေပြည်တော် နှင့် တပြိုင်တည်း ပြုလုပ်မှာဖြစ်သည်။ ညနေ ၃ နာရီတွင် အင်ယားကန်ဘောင်တွင် ‘ပန်းရဲ့လမ်း’ လူမှုရေး အဖွဲ့မှ တေးဂီတဖြင့် ဖျော်ဖြေမှာဖြစ်ပြီး ညနေပိုင်းတွင် အင်းယားကန်ဘောင်တွင် ငြိမ်းချမ်းရေးကျောက်တိုင် စိုက်ထူမှာ
ဖြစ်သည်။

“စကျင်ကျောက်လေးတွေနဲ့ ငြိမ်းချမ်းရေး ကျောက်တိုင်ဆောက်ဖို့ ရှိတယ်။ သူတို့က ခွင့်မပြုဘူးပြီး ဘူဒိုဇာနဲ့ ထိုးသွားရင်
တော့ မတတ်နိုင်ဘူးပေါ့” ဟု ပန်းရဲ့လမ်းအဖွဲ့မှ မခင်စန္ဒာညွန့်ကြည်က ပြောသည်။

အဆိုပါ ငြိမ်းချမ်းရေးနေ့ နေပြည်တော်နှင့်ရန်ကုန်ဆန္ဒပြပွဲများတွင် ညနေ ၄ နာရီတိတိ အချိန်၌ ရောက်ရာ အရပ်မှနေ၍ ငါးမိနစ်ကြာ ငြိမ်သက်စွာ စစ်ရပ်စဲရေး ဆုတောင်းကြမည်လည်း ဖြစ်သည်။

အဆိုပါ အပြည်ပြည်ဆိုင်ရာ ငြိမ်းချမ်းရေးနေ့ လှုပ်ရှားမှုများကို ကချင်ငြိမ်ချမ်းရေးကွန်ရက်၊ ငြိမ်းချမ်းရေး ကွန်ယက်၊ အဖြူရောင် တွဲလက်များ၊ ကရင် အမျိုးသမီးများ လှုပ်ရှားမှုအဖွဲ့၊ ပန်းရဲ့လမ်း လူမှုရေးအဖွဲ့၊ စိမ်းရောင်စို လူမှုကူညီရေး အဖွဲ့၊ Youth For Social Change Myanmar၊r ၊ နှောင်ကြိုးမဲ့ လူမှုဖွံ့ဖြိုးရေး ကွန်ယက် (မန္တလေး)၊ ရန်ကုန်အခြေစိုက် ပရဟိတ လူငယ်များ ကွန်ယက်၊ ကျောက်မဲ လူငယ်ကွန်ယက် (ရှမ်း-မြောက်)၊ Open Network – မွန်၊ ကာတွန်းဆရာ များ အဖွဲ့၊ ရန်ကုန် ဂီတလူငယ်များ၊ ကဗျာဆရာများ သမဂ္ဂ၊ Youth Art Network၊ New Zero Art Space၊ Myanmar Ink Gallery၊ ရန်ကုန် ပြည်သူ့ အကျိုးဆောင် ကွန်ရက် စသည့် လူမှုရေးအဖွဲ့ ၁၉ ဖွဲ့က ဦးဆောင် လှုပ်ရှားကြမည် ဖြစ်သည်။

"Stop Civil War"၊ "တနိုင်ငံလုံး စစ်ပွဲရပ်" စာတန်းများသုံးပြီး လက်မောင်းစီး (သို့မဟုတ်) ခေါင်းစီးကို အပြာရောင် အသုံးပြု သွားမည် ဖြစ်သည်။

“ပြည်တွင်းစစ် ချက်ချင်းရပ်ဖို့ကို အဓိက ရည်ရွယ်ပါတယ်။ အခု ၂၁ ရက်နေ့မှာ လုပ်တဲ့အခါမှာ ထိုးစစ်တွေက ဆိုးရွားနေတယ် ဆိုရင် ထပ်ပြီး အရှိန်မြှင့်ဖို့ တနိုင်ငံလုံး ငြိမ်းချမ်းရေး အင်အားစုကြီး အနေနဲ့ ထပ်လုပ်ဖို့ ရှိပါတယ်။ ဒီဟာက သက်ရောက်မှု မရှိဘူး ဆိုရင် ကျမတို့ နောက်ဆုတ်သွားမှာ မဟုတ်ဘူး” ဟု မခင်စန္ဒာညွန့်ကြည် က မဇ္ဈိမကို ပြောကြားသွားသည်။

တနိုင်ငံလုံး ထိုးစစ်များကို ရပ်တန့်ရန်အတွက် နိုင်ငံတော်သမ္မတမှ ကာကွယ်ရေး ဦးစီးချုပ်ရုံးသို့ ၂ဝ၁၁ ခုနှစ်၊ ဒီဇင်္ဘာလ ၁ဝ ရက်နေ့က ညွှန်ကြားချက် ပေးပို့ထားသော်လည်း ကချင်ပြည်နယ်တွင် အစိုးရ တပ်များနှင့် ကချင် လွတ်လပ်ရေးတပ် KIA တို့အကြား တိုက်ပွဲများ ဆက်လက်ဖြစ်ပွားနေဆဲဖြစ်သည်။ ထို တနှစ်ကျော်ကြာ စစ်ပွဲများကြောင့် အိုးအိမ်များကို စွန့်ခွါ ထွက်ပြေးနေကြရသည့် စစ်ပြေး ဒုက္ခသည်ပေါင်း ၇ဝ,ဝဝဝ ကျော် ရှိနေသည်။

ရှမ်းပြည်နယ်တွင်လည်း အပစ်အခတ်ရပ်စဲပြီး ရှမ်းလက်နက်ကိုင်တပ်များနှင့် အစိုးရ တပ်များ အကြား တိုက်ပွဲငယ်များ ၃ဝ ကျော် ဖြစ်ပွား ခဲ့ပြီးဖြစ်သည်။

Ref: မဇ္ဈိမ

Read More...

Collapse...

ရခိုင်နှင့် မူဆလင်ခေါင်းဆောင်များ လူမျိုးစုနှင့် ပဋိပက္ခ အရေး အလေးထား ဆွေးနွေး

2012-09-17

ရန်ကုန်မြို့ ချက်ထရီယံဟိုတယ်မှာ ပြုလုပ်တဲ့ (၂၁) ရာစု မြန်မာနိုင်ငံရဲ့ အမျိုးသားရေး လက္ခဏာနဲ့ နိုင်ငံသားဖြစ်ခွင့် ဆိုင်ရာ ဆွေးနွေးပွဲ နောက်ဆုံးနေ့မှာ (၈၈)မျိုးဆက် ကျောင်းသားခေါင်းဆောင် ဦးကိုကိုကြီး အပါအဝင် ရခိုင်နဲ့ မူဆလင် ခေါင်းဆောင်တွေက ရခိုင်ပြည်နယ်က တိုင်းရင်းသား လူမျိုးစု အရေးနဲ့ ပဋိပက္ခအရေး အတွက် အလေးထား ဆွေးနွေး ခဲ့ကြပါတယ်။

(၈၈)မျိုးဆက် ကျောင်းသားခေါင်းဆောင် ဦးကိုကိုကြီးက ရခိုင်ဒေသမှာ ဖြစ်ပွားခဲ့တဲ့ ပဋိပက္ခဟာ အမျိုးသား လက္ခဏာ ကပ်ဆိုက်မှုဖြစ်ပြီး ဒီကိစ္စတွေကို ဖြေရှင်းဖို့ အတွက် အများပါဝင်တဲ့ ဘုံအဖြေတစ်ခု ရှာဖွေ တည်ဆောက်ဖို့ လိုအပ်တယ်လို့ ဆွေးနွေးပွဲမှာ ပြောကြား ခဲ့ပါတယ်။

"လူမျိုးရေး ဘာသာရေးဆန်ဆန် ပဋိပက္ခဖြစ်နေတာတွေဟာ တကယ်တော့ Identity crisis လို့ပြောလို့ ရပါတယ်။ ကျွန်တော်တို့ အားလုံးက Citizen rights ဆိုတာကို အခြေခံ အကျဆုံး ကျွန်တော်တို့ရဲ့ Common ground အဖြစ်နဲ့ ရှာပြီးတော့ National identity, ကျွန်တော်တို့ရဲ့ common character ကိုကျွန်တော်တို့ ရှာဖွေ တည်ဆောက်နိုင်မယ် ဆိုရင် ကျွန်တော်တို့ရဲ့ Nation building ဟာ ချောချောမွေ့မွေ့နဲ့ အဆင်ပြေလာ လိမ့်မယ်လို့ ယုံကြည်ပါတယ်"

ရခိုင်ဒီမိုကရေစီအဖွဲ့ချုပ် ဥက္ကဋ္ဌ ဦးအေးသာအောင်က ရခိုင် အမျိုးသားတွေရဲ့ သဘောထား အမြင်တွေကို တင်ပြ ခဲ့သလို မူဆလင် ခေါင်းဆောင်တွေဖြစ်တဲ့ ဒေါက်တာမြင့်သိန်းနဲ့ ဦးကျော်ဝင်း တို့ကလည်း မူဆလင် ဘာသာဝင်တွေရဲ့ သဘောထား အမြင်တွေကို ဆွေးနွေး တင်ပြကြပါတယ်။

ဦးဆောင် ဆွေးနွေးသူ တစ်ဦးဖြစ်တဲ့ ဦးသူရ (ခေါ်) အနုပညာရှင် ဇာဂနာ ကလည်း မြန်မာ လူမျိုးတွေရဲ့ အမျိုးသားရေး လက္ခဏာ ကိစ္စတွေကို အလေးထားဆွေးနွေး ခဲ့တယ်လို့ RFA ကို ပြောပါတယ်။

"နမူနာပြောတာပေါ့။ နိုင်ငံသားကတ်မှာ ဗမာမူဆလင်လို့ ရေးတာမျိုး၊ တချို့ဆိုရင် ရခိုင် ခရစ်ယာန်လို့ရေးတာမျိုး၊ ကရင် ခရစ်ယာန် လို့ရေးတာမျိုး ဒါတွေ လိုသလား။ ဒါတွေက ခွဲခြားနေသလိုပဲ။ နိုင်ငံသား ဆိုတာ နိုင်ငံသားပဲ။ သူ့ကိုမွေးတဲ့ဒေသလို့ ပါလာရင် တော်ပြီပေါ့။ အဲဒီလိုမျိုးဖြစ်တဲ့ ကိစ္စတွေကို ကျွန်တော် အဓိကထား ဆွေးနွေးတာပါ။ ဒါဟာနိုင်ငံသားဖြစ်တဲ့ ကတ်မှာကိုက ပြဿနာဖြစ်နေပြီလေ။ ဆိုတော့ ကျွန်တော်တို့က National Identity ဆိုတာကို ချစ်ပါတယ်။ လိုလည်း လိုချင်ပါတယ်။ ဒီဟာမျိုးတွေက အရေးကြီးပြီ။ ပြန်ဖော်ထုတ်ဖို့ လိုပြီ။ သို့မဟုတ် ပျောက်နေရင် ပြန်ဖော် ထုတ်ရမယ်။ မရှိသေးရင် ရှိတာတွေကို ညှိယူရမယ်။ တိုင်းရင်းသား အားလုံးနဲ့ ဆိုတာမျိုးကို ကျွန်တော်တို့ ပြောရ ဆိုရ ဆွေးနွေးရ ငြင်းလည်း ငြင်းရတယ်ဗျ။ ပျော်စရာကောင်းပါတယ်။ တစ်ခုတော့ အဖြေထွက် လာလိမ့်မယ်လို့ ထင်ပါတယ်"

ဒီဆွေးနွေးပွဲကို သမ္မတရုံးဝန်ကြီး ဦးအောင်မင်းလည်း တက်ရောက်ခဲ့ပြီး၊ စာရေးဆရာ ဦးကျော်ဝင်း၊ ကယန်းပြည်သူ့ ပါတီ ဥက္ကဋ္ဌ ဦးစောထွန်းအောင်မြင့်၊ ရခိုင် အမျိုးသား ဖွံ့ဖြိုး တိုးတက်ရေး ပါတီ ဥက္ကဋ္ဌ အမျိုးသား လွှတ်တော် ကိုယ်စားလှယ် ဒေါက်တာအေးမောင်နဲ့ လူမှုရေးရေးရာ ကိစ္စတွေ ပါဝင်ဆောင်ရွက်နေသူ ဦးအောင်ကိုကို တို့လည်း ပါဝင်ဆွေးနွေး ခဲ့ကြပါတယ်။

Ref: RFA News

Read More...

Collapse...

အမိမြေငြိမ်းချမ်းရေးအဖွဲ့ မြောက်ပိုင်းကျဆုံး ကျောင်းသားများ အမှတ်တရ ဂူဗိမာန်တွင် ဂါရ၀ပြု

2012-09-17

ABSDF ကျောင်းသားတပ်မတော် ဥက္ကဋ္ဌဟောင်းတွေဖြစ်တဲ့ ကိုထွန်းအောင်ကျော်၊ ကိုမိုးသီးဇွန် ခေါင်းဆောင်တဲ့ အဖွဲ့ဟာ မန္တလေးမြို့ ပြည်ကြီးတံခွန် မြို့နယ် ၆၂ လမ်းနဲ့ မြ၀တီမင်းကြီး လမ်းက မြ၀တီမင်းကြီးကျောင်းတိုက်မှာ တည်ဆောက်ထားတဲ့ မြောက်ပိုင်း ကျဆုံးကျောင်းသား ရဲဘော်များ အမှတ်တရ ဂူဗိမာန်မှာ ဦးညွှတ် ဂါရ၀ပြုတဲ့ပွဲ တစ်ခုကို ဒီနေ့ နေ့လည် ၁၂ နာရီက ကျင်းပခဲ့ကြတယ်။

အဲဒီအခမ်းအနား ကျင်းပရတာနဲ့ပတ်သက်လို့ ABSDF ရဲ့ ပထမဆုံးဥက္ကဋ္ဌ တာဝန်ယူခဲ့တဲ့ ကိုထွန်းအောင်ကျော်က RFA ကို အခုလိုပြောပါတယ်။

"ဒီမိုကရေစီရေးမှာ တိုက်ပွဲဝင်ရင်း ကျဆုံးသွားတဲ့ ကျောင်းသားတွေဟာ ဒီမိုကရေစီ သူရဲကောင်းတွေ ဖြစ်တယ်။ သူတို့ဟာ အစိုးရ သူလျှိုတွေ မဟုတ်ဘူး။ နောက်ပြီးတော့ ဒီလို လူ့အခွင့်အရေးကို တန်ဖိုးထား တိုက်ပွဲဝင်တဲ့ ABSDF ဟာ ဒီမိုကရေစီရေး အရ ကြိုးစားနေတဲ့ ရဲဘော်တွေကို ဘယ်တော့မှ မမေ့ဘူး။ အမြဲ တန်ဖိုးထားတယ် ဆိုတာကို ကမ္ဘာသိအောင်၊ မြန်မာပြည်က ပြည်သူတွေ၊ အနာဂတ် မျိုးဆက်တွေ သိအောင် ကျွန်တော်တို့က နမူနာအနေနဲ့ တန်ဖိုး ထားတယ်ဆိုတာ ပြတာ။ ကျွန်တော်တို့ ABSDF ခေါင်းဆောင်တွေဟာ ကိုယ့်ရဲဘော်တွေကို မပြောနဲ့ ရန်သူတွေကိုတောင် ဒီလိုလုပ်ရပ်မျိုး မလုပ်သင့်ဘူး ဆိုတာကို ကျွန်တော်တို့က ပြောချင်တဲ့ အတွက် ဒီအခမ်းအနား လုပ်တာ။ နောင်လာ နောက်သားတွေ မှတ်သားဖွယ် ရဖို့ပါ"

ဒီအခမ်းအနားမှာ မြ၀တီမင်းကြီးကျောင်းဆရာတော်၊ ရွှေဝါရောင် တော်လှန်ရေးမှာ ပါဝင်ခဲ့တဲ့ ဦးပဉ္စင်း ဂျောင်းဂျောင်း စတဲ့ သံဃာတော်တွေကို နေ့ဆွမ်း ဆက်ကပ်တာ၊ မြောက်ပိုင်းကျောင်းသား တပ်မတော်က ရဲဘော်ဟောင်းတွေနဲ့ မိတ်ဆက်ပြီး ရှေ့ဆက် အတူတကွ ပူးပေါင်း လုပ်ဆောင်သွားနိုင်မယ့် ကိစ္စရပ်တွေကို ဆွေးနွေး ခဲ့ကြတယ်လို့ သိရပါတယ်။

အမိမြေငြိမ်းချမ်းရေးမစ်ရှင် ခရီးစဉ်အဖြစ် အင်အား ၄၀ ကျော်ပါဝင်တဲ့ ကိုမိုးသီးဇွန်တို့ အဖွဲ့ဟာ မန္တလေးမြို့ကို မနက်ပိုင်းမှာ ရောက်ရှိ ခဲ့ပြီး မဟာမုနိဘုရားကြီး၊ မြ၀တီကျောင်းတိုက် ဆရာတော်၊ ဘုရားကြီး အလယ်တိုက် ဆရာတော်၊ မစိုးရိမ်တိုက်သစ် ဆရာတော်တွေ အပြင် ရွှေဝါရောင် တော်လှန်ရေးမှာ ပါဝင်ခဲ့တဲ့ ဆရာတော်တွေကို သွားရောက် ဂါရ၀ပြုခဲ့တယ်လို့ သိရပါတယ်။

Ref: RFA News

Read More...

Collapse...

သမ္မတ လွတ်ငြိမ်းချမ်းသာခွင့် အမိန့်မှာ နိုင်ငံရေး အကျဉ်းသား တချို့ပါ

2012-09-17

နိုင်ငံတော်တည်ငြိမ်ရေးနှင့် ထာဝရငြိမ်းချမ်းရေး ဖော်ဆောင်ရေးအတွက် မြန်မာနိုင်ငံ အကျဉ်းထောင် အသီးသီးက အကျဉ်းသား ၅၁၄ ဦးကို လွတ်ငြိမ်းချမ်းသာ ခွင့်ပြုကြောင်း နိုင်ငံတော် သမ္မတရုံးက ဒီကနေ့ ကြေညာ လိုက်ပါတယ်။

ဒီလွတ်ငြိမ်းချမ်းသာခွင့်မှာ အကျဉ်းသား ၅၀၀ ကျော် လွှတ်ပေးတယ်ဆိုပေမဲ့ နိုင်ငံရေး အကျဉ်းသား ဘယ်နှစ်ဦး ပါမလဲ ဆိုတာ သေသေချာချာ မသိရသေးပါဘူး။

အာအက်ဖ်အေက စုံစမ်းရရှိတဲ့ အရေအတွက်အရ အင်းစိန်ထောင်က လွှတ်လာတဲ့ အကျဉ်းသား ၁၁ ယောက် ထဲမှာ နိုင်ငံရေး အကျဉ်းသား ၇ ယောက် ပါတယ်လို့ သိရပါတယ်။

သူတို့အမည်တွေကတော့ Sonny (ခ) စံရှား၊ ကိုမျိုးမြတ်ထွန်း (ခ) ကိုမျိုး၊ ကိုထွန်းဝင်း၊ ကိုကျော်ကျော်လှိုင်(ခ) ကိုထွန်းထွန်းနိုင်၊ ကိုအောင်ဇော်လင်း၊ ကိုအောင်ကိုဝင်းနဲ့ ကိုချမ်းသာတို့ ဖြစ်ပါတယ်။သူတို့ ၇ ဦးစလုံးရဲ့ အမှုတွေဟာ တရားမ၀င် အသင်းအပင်း ဖွဲ့စည်းမှုအပြင် နယ်စပ်ဖြတ်ကျော်မှုတွေနဲ့ ထောင်ဒဏ် ချမှတ်ခံရသူတွေ များတယ်လို့လည်း သိရပါတယ်။

အလားတူ တောင်ကြီးထောင်က နိုင်ငံရေးအကျဉ်းသား ဦးရွှေထူးနဲ့ ကိုဆန်နီ အပြင် သာယာဝတီ ထောင်က လွှတ်လာတဲ့ အထဲမှာ နိုင်ငံရေး အကျဉ်းသား ၃ ဦး ပါတယ်လို့ သိရပါတယ်။

အမျိုးသားဒီမိုကရေစီ အဖွဲ့ချုပ် NLD အဖွဲ့ရဲ့ စာရင်းတွေအရ အကျဉ်းထောင်များမှာ ကျန်နေသေးတဲ့ နိုင်ငံရေး အကျဉ်းသား ၃၃၀ ရှိနေတယ်လို့ သိရပါတယ်။

ထိုင်းနိုင်ငံ အခြေစိုက် နိုင်ငံရေးအကျဉ်းသား ကူညီစောင့်ရှောက်ရေး အသင်း AAPP အဖွဲ့ အဆို အရ လတ်တလော လွှတ်မြောက် လာတဲ့ နိုင်ငံရေး အကျဉ်းသား အရေအတွက်ကို မသိရသေးဘူးလို့ ပြောပါတယ်။ AAPP အဖွဲ့ စာရင်းများအရ နိုင်ငံရေး အကျဉ်းသား ၄၅၀ ခန့် ရှိတယ်လို့ သိရပါတယ်။

ထောင်ဒဏ် (၄၂) နှစ် ချမှတ်ခံထားရတဲ့ နိုင်ငံရေး အကျဉ်းသား ဦးရွှေထူးကို ဒီကနေ့ ညမှာ တောင်ကြီးထောင် ကနေ လွှတ်ပေး လိုက်တယ်လို့ ထောင်အာဏာပိုင်တွေ ပြောကြောင်း သားဖြစ်သူ ကိုရွှေသွေးက ပြောပါတယ်။

ဦးရွှေထူး (ခ) ဦးအောင်ဇေယျဟာ အထက (၁) မန္တလေးမြို့ရဲ့ အထက်တန်းပြ ကျောင်းဆရာဟောင်း တစ်ဦး ဖြစ်ပါတယ်။ သူ့ကို မြန်မာ့ တပ်မတော် တပ်မဟာ (၁၃) တပ်မင်းကြီး ဇေယျကျော်ထင် ဗိုလ်မှူးကြီးဘဖြူ (ငြိမ်း) နိုင်ငံ့ဂုဏ်ရည် ပထမ အဆင့်နှင့် ဒေါ်မြသွေးတို့မှ နိုဝင်ဘာလ (၂၀) ရက် ၁၉၄၄ ခုနှစ်မှာ မွေးဖွားခဲ့ပါတယ်။

၁၉၈၈ ရှစ်လေးလုံး လူထုလှုပ်ရှားမှုမှာ ပါဝင်ခဲ့ပြီး ၁၉၉၃ ခုနှစ်မှာ ထောင်ဒဏ် (၃) နှစ် ချမှတ် ခံခဲ့ရပါတယ်။ ၁၉၉၆ ခုနှစ်မှာ အကျဉ်းထောင်မှ လွှတ်မြောက် လာပြီးနောက် နိုင်ငံရေး လှုပ်ရှားမှုတွေမှာ တက်တက်ကြွကြွ ပါဝင်ခဲ့ပြီး ၁၉၉၈ ခုနှစ်မှာ ပြန်လည် အဖမ်းခံခဲ့ရပြီး ထောင်ဒဏ် စုစုပေါင်း (၄၂) နှစ် ချမှတ် ခံခဲ့ရပါတယ်။

အဲဒီနောက် ၂၀၀၀ ခုနှစ်မှာ မန္တလေးအိုးဘို အကျဉ်းထောင်ကနေ တောင်ကြီး အကျဉ်းထောင်ကို ပြောင်းရွှေ့ခံခဲ့ ရပါတယ်။

Ref: RFA News

Read More...

Collapse...

တောင်ကြီးမြို့ ထင်းရှူးမြိုင် ဘုန်းကြီးကျောင်း ပြောင်းရွှေ့ရန် ဖိအားပေး ခံရ

ကျော်ဖုန်းကျော်
တနင်္လာနေ့၊ စက်တင်ဘာလ ၁၇ ရက် ၂၀၁၂

ရန်ကုန် (မဇ္ဈိမ) ။ ။ ရှမ်းပြည်နယ်၊ တောင်ကြီးမြို့အထွက်တွင် တည်ရှိသော ထင်းရှုးမြိုင် ဘုန်းကြီးကျောင်းအား ပြည်နယ် သံဃာ့ နာယကမှ ဖျက်သိမ်းရန် ဖိအားပေးခဲ့ပြီး သံဃာ့ နာယကမှ သံဃာများနှင့် အတူ လိုက်ပါလာသော မီးသတ်နှင့် အရပ်သား စုစုပေါင်း ဦးရေ ၁၀၀ ကျော်က ဘုန်းကြီးကျောင်းဝင်း အတွင်း စက်တင်ဘာလ ၁၂ ရက်နေ့က ဝင်ဖျက် ခဲ့ကြသည်ဟု ကျောင်းထိုင် ဆရာတော် ဦးကုဝိစာရက မဇ္ဈိမကို အမိန့်ရှိသည်။

“ဘုန်းကြီးတို့ တည်းခိုနေတဲ့ တဲ ခြောက်ကျောင်းကို ဖျက်သွားတယ်။ နောက် ဆွမ်းစားဆောင်က နံရံတွေ ကိုလည် ဖျက်သွားတယ်” ဟု မိန့်သည်။

အဆိုပါ ဘုန်းကြီးကျောင်း တည်ရှိရာ နေရာမှာ ကမ္ဘောဇ ဘောလုံး အသင်း၏ လေ့ကျင့်ရေးကွင်း တည်ဆောက်မည့် နေရာ ဖြစ်နေသောကြောင့် သံဃာ ၂၂ ပါး သီတင်း သုံးလျက်ရှိသည့် ကျောင်းကို ဤကဲ့သို့ ဖိအားပေးခြင်း၊ ဖျက်သိမ်း
ခြင်း ဖြစ်သည်ဟု ဆရာတော် ဦးကုဝိစာရက ယုံကြည်လျက်ရှိသည်။

ပေ ၃ဝဝ x ပေ ၆ဝဝ ခန့် ကျယ်ဝန်းသော ယင်းဘုန်းကြီးကျောင်းခြံဝင်းသည် ကမ္ဘောဇ ဘောလုံးအသင်း လေ့ကျင့်ရေး ကွင်း တည်ဆောက်မည့် မြေနေရာတွင် တစိတ်တပိုင်း ပါဝင်လျက် ရှိသဖြင့် အခြားနေရာသို့ ရွှေ့ပြောင်းပေးပါရန် ကမ္ဘောဇ အသင်းက လွန်ခဲ့သော နှစ်နှစ်ကတည်းက လာရောက် လျှောက်ထားခဲ့သည်ဟု ဦးကုဝိစာရက မိန့်သည်။

ထို့ပြင် ဘောလုံးအသင်းပိုင်ရှင် ဦးအောင်ကိုဝင်း က ဘုန်းကြီး ကျောင်းတခု ပြန်လည် စီစဉ်ပေးမည့် အကြောင်း အသင်းမှ တာဝန်ရှိသူ များက လာရောက် ပြောဆိုမှုများ ရှိခဲ့သည်ဟုလည်း ဆရာတော်က မိန့်သည်။

ကမ္ဘောဇ ဘောလုံးအသင်း၏ အုပ်ချုပ်ရေးမှူး ဦးမိုးဆန်းအောင် ကမူ ဘုန်းကြီးကျောင်းကို ဖျက်သိမ်းရန် စေခိုင်းမှုသည် ၎င်းတို့ဘောလုံး အသင်းနှင့် သက်ဆိုင်ခြင်း မရှိဘဲ တောင်ကြီးမြို့၏ သံဃာ့နာယက အဖွဲ့က မြို့ပေါ်ရှိ ကျူးကျော် မြေနေရာ များတွင် ရှိသော ဘုန်းကြီးကျောင်း များကို ရှင်းထုတ်သည့် စီမံချက်ကြောင့်သာ ဖြစ်သည်ဟု ဆိုသည်။

“ဒီကိစ္စက ကျနော်တို့နဲ့ မဆိုင်ပါဘူး။ မြို့နယ်သံဃာ့နာယက က ကျူးကျော်နေထိုင်သည့် ဘုန်းကြီးကျောင်းတွေကို ဖျက်တာပါ” ဟု ဆိုသည်။

ပြည်နယ် သာသနာရေး ဦးစီးဌာနက အဆိုပါ ဘုန်းကြီးကျောင်းကို စက်တင်ဘာလ ၁၁ ရက်နေ့ နောက်ဆုံး ထား၍ ရွှေ့ပြောင်းပေးရန် သြဂုတ်လ အတွင်းက ညွှန်ကြားချက် ထုတ်ပြန်ခဲ့သော်လည်း ကိုယ်တော်တို့ အနေဖြင့် အခြား သီတင်း သုံးရန် နေရာ မရှိသဖြင့် ပြောင်းရွှေ့နိုင်ခြင်း မရှိခဲ့ကြောင်း “ဘယ်ကို ပြေးရမှန်းတောင် မသိပါဘူး” ဟု ဆရာတော်က အမိန့်ရှိသည်။

သံဃာတော်များ သီတင်းသုံးရာ ကျောင်းဆောင်ငယ် ခြောက်ကျောင်းနှင့် ဆွမ်းစားဆောင် တို့၏ အကာများကို ဖျက်ဆီး ခဲ့သဖြင့် လက်ရှိတွင် သံဃာတော် များသည် အကာမရှိသော ကျောင်းသင်္ခန်းများ၌ ဆက်လက် သီတင်းသုံး နေရပြီး ဒေသ ရာသီဥတုသည် အေးသောကြောင့် အခက်အခဲ ရှိနေသည်ဟု ဦးကုဝိစာရက မဇ္ဈိမကို မိန့်ကြားသွား သည်။

Ref: မဇ္ဈိမ

Read More...

Collapse...

မုံရွာမြို့နယ်မှူးကို သပိတ်သမများ တရားစွဲမည်

မန်းသားလေး
September 17, 2012

မုံရွာမြို့ လက်ပန်းတောင်းတောင် ကြေးနီစီမံကိန်း အရေးတွင် အဖမ်း ခံခဲ့ရပြီး ပြန်လည် လွတ်မြောက် လာသည့် အမျိုးသမီး ၃ ဦးက မုံရွာမြို့နယ်မှူးကို တရားစွဲဆို သွားမည်ဖြစ်ကြောင်း သိရသည်။

ဖမ်းဆီးခဲ့မှုတွင် အပြစ်တစုံတရာ ဖော်ပြနိုင်ခြင်း မရှိဘဲ အမျိုးသမီး များအား အကြမ်းဖက် နှိပ်ကွပ်ခြင်း အပေါ် မကျေနပ် သဖြင့် မုံရွာမြို့နယ်မှူးကို နားလည် တတ်ကျွမ်းသည့် အဖွဲ့စည်းများနှင့် တိုင်ပင်ပြီး တရားစွဲဆို သွားမည် ဖြစ်ကြောင်း စက်တင်ဘာလ ၁၄ ရက်နေ့ ညနေက ပြန်လည် လွတ်မြောက်လာသည့် မသွဲ့သွဲ့ဝင်းက ပြောသည်။

‘‘မြို့နယ်မှူးက ကျမကို စခန်းထဲကနေ အတင်းဆွဲထုတ် ခိုင်းတယ်။ ရဲတွေက စခန်းရဲ့ အပေါ် အချုပ်ထဲကနေ လှေကား အတိုင်း ကျမကို တရွတ်တိုက် ဆွဲခေါ်လာတယ်။ ကျမ ထမီ ကွင်းလုံး ကျွတ်ကျတယ်။ အဲဒီနေရာမှာ မြို့နယ်မှူး အပါအ၀င် ရဲအင်အား ငါးရာကျော်လောက် ရှိတယ်။ အဲဒီလို ကျမအရှက်ကို ခွဲတဲ့အတွက် မကျေနပ်ဘူး။ မြို့နယ်မှူးကို တရားပြန်စွဲမယ်။ မဖြစ်ဖြစ်တဲ့ နည်းနဲ့ ပြန်စွဲမှာ။ ကျမတို့မှာ ဘာအပြစ်မှ မရှိဘဲ ကုတ်ဖဲ့ပြီး ကားပေါ်ကို ဆွဲတင်ခဲ့တာ။ ကျမတို့က ကားပေါ်ကို အသာတကြည် တက်ပါမယ်လို့ ပြောတာတောင် မရဘူး” ဟု မသွဲ့သွဲ့ဝင်းက ဆိုသည်။

စက်တင်ဘာလ ၁၀ ရက်နေ့ စစ်ကိုင်းတိုင်း မုံရွာခရိုင် ဆားလင်းကြီးမြို့နယ် လက်ပံတောင်းတောင် ကြေးနီ စီမံကိန်း မြေယာ သိမ်းထားမှု များကြောင့် အမျိုးသမီး ၁၂ ဦးတို့က မုံရွာမြို့ ဆုတောင်းပြည့် ဘုရားသို့ လာရောက်ဝတ်ပြု ဆုတောင်းကြရာ အာဏာပိုင်များက အကြောင်းမဲ့ ဖမ်းဆီးပြီး အကြမ်းဖက်မှုများ ပြုလုပ်ခဲ့ခြင်း ဖြစ်သည်။

‘‘ကျမတို့ ညီအစ်မတွေ အေးအေးဆေးဆေး ဘုရားဖူးတာပါ။ ကျမတို့မှာ ဘာအပြစ်မှ မရှိဘဲ မြို့နယ်မှူးက ဖမ်းဆီးတာတွေ လုပ်ခဲ့ပါတယ်။ အချုပ်ထဲမှာလည်း မြို့နယ်မှူး ကိုယ်တိုင် ကျမတို့ ဆံပင်တွေကို ဆွဲတယ်။ လက်တွေဖိပြီး ဆွဲလားရမ်းလား လုပ်ခဲ့ပါတယ်။ ရဲနဲ့ ရဲမေတွေက ကျမတို့ကို အတင်းဝင်လုံးလို့ ကျမတို့ အဝတ်တွေ ကျွတ်ခဲ့ရပါတယ်။ ထမီကျွတ်ရက်ကြီး ပါလာတဲ့ အတွက် ထမီပြင်ဝတ်ဖို့ တောင်းပန်တာတောင် ပြင်ဝတ်ခွင့် မပေးခဲ့ပါဘူး” ဟု ပြန်လွတ်လာခဲ့သည့် မအေးနက်က ဆိုသည်။

ယင်းသို့ အကြမ်းဖက်မှုများ ပြုလုပ်ခဲ့သည့်အတွက် မြို့နယ်မှူးကို သက်ဆိုင်ရာ တရားရုံးမှ တရားစွဲဆို သွားမည် ဖြစ်ကြောင်း လွတ်မြောက် လာသည့် စက်တင်ဘာလ ၁၄ ရက်နေ့တွင် ၎င်းက ပြောပြခြင်း ဖြစ်သည်။

‘‘ကျမတို့က မြန်မာလူမျိုး မိန်းမပျိုတွေပါ။ အရှက်တရားနဲ့ လူလုပ်နေတာပါ။ တောသူ တောင်သားလည်း ဖြစ်တယ်။ ကျမတို့က အတင်း ထွက်ပြေးနေတာလည်း မဟုတ်ပါဘူး။ ဒီလိုကျွတ်ကျတဲ့ ထမီလေးတောင်ပြန်ပြီး ပြင်ဝတ်ခွင့် မပေးတာ ကျမတော့ တော်တော်လေးကို ၀မ်းနည်းလို့ မဆုံးပါဘူး၊ ရှက်လို့လည်း မဆုံးဘူး။ လူတွေ ပြောပြောနေတဲ့ ဒီမိုကရေစီဆိုတာ ဒီလို ထမီလေးတောင် ပြင်ဝတ်ခွင့် မရှိပါလားဆိုပြီး ကျွန်မတော့ အဲဒီလိုမြင်ပါတယ်” ဟု မအေးနက်က ဆိုသည်။

ယင်းမြို့နယ်မှူးသည် ၂၀၁၀ ပြည့်နှစ်ဝက်မှစပြီး မုံရွာမြို့သို့ ပြောင်းလာခြင်း ဖြစ်ကာ ယခင် ၎င်းတာဝန် ထမ်းဆောင် ခဲ့သည့် မကွေးမြို့ တွင်လည်း Weekely Eleven ဂျာနယ်မှ သတင်းထောက်ကို မကွေးမြို့ ရေကြီးသည့် ဓာတ်ပုံများ ရိုက်ကူးသည်ဟု ဆိုပြီး ပုဒ်မ အမျိုးမျိုး တပ်၍ ဖမ်းဆီးခဲ့သူဖြစ်ကြောင်း သိရသည်။

မုံရွာမြို့နယ်မှူးနှင့် အမှတ် ၁ ရဲစခန်းမှ အာဏာပိုင် အရာရှိများသည် လက်ပန်းတောင်းတောင် ကြေးနီစီမံကိန်း ဆန္ဒပြမှု များကို ကိုင်တွယ်ဖြေရှင်း ရာတွင် အကြမ်းဖက်သည့် နည်းလမ်းများ အသုံးပြုခဲ့ကြောင်း သိရသည်။

ဆန္ဒပြသည့် စက်တင်ဘာလ ၁၀ ရက်နေ့တွင်ပင် အဆိုပါမြို့နယ်မှူးက စာတန်းများ ကိုင်ဆောင်ပြီး လမ်းလျှောက် ချီတက် ဆန္ဒပြနေကြသည့် လူအုပ်ကြားထဲ ဝင်ရောက်ကာ ဆန္ဒပြသူများ ကိုင်ဆောင်လာသည့် စာရွက်များကို ၀င်ရောက် လုယူ ဆွဲဖြဲခြင်း၊ ဆဲဆို ကြိမ်းမောင်းခြင်းများ ပြုလုပ်ခဲ့သည်ဟု မြင်တွေ့ခဲ့သူများက ပြောသည်။

ထို့အပြင် စက်တင်ဘာလ ၁၁ ရက်နေ့ကလည်း ယာဉ်ထိန်းရဲ ဦးမြသောင်း ကိုယ်တိုင် ဆန္ဒပြသည့် လူအုပ်ထဲသို့ ကားဖြင့် အတင်းမောင်းနှင် ၀င်ရောက် ခဲ့မှုကြောင့် ဆန္ဒပြသည့် အထဲတွင် ပါဝင်သည့် အမျိုးသမီးတဦး ထိခိုက်ဒဏ်ရာ ရရှိခဲ့သည်ဟု မုံရွာ ဒေသခံများက ပြောဆိုကြသည်။

မုံရွာ အမှတ် ၁ ရဲစခန်းတွင် အမျိုးသမီး ၁၂ ဦး ဖမ်းဆီးချုပ်နှောင် ခံထားရစဉ် အချိန်အတွင်း စခန်းအတွင်းရှိ ရဲများနှင့် ရဲမေများက မြို့နယ်မှူး အမိန့်ဖြင့် အဆိုပါ အမျိုးသမီးများကို ဆံပင်များ ဆွဲရမ်းခြင်း ပြုလုပ်ခဲ့သည့်အပြင် စခန်းအပြင်မှ အမျိုးသမီးကြီး တဦး စခန်းတွင်း ဝင်ရောက်လာကာ အဖမ်းဆီး ခံထားရသည့် အမျိုးသမီးများကို ကြိမ်းမောင်းခြင်း၊ ဥပဒေမဲ့ ပြုမူခြင်းများ လုပ်ဆောင်ခဲ့သည်ဟု သိရသည်။

အမှတ် ၁ ရဲစခန်းမှ ရဲမေများက ယခုကဲ့သို့ အကြမ်းဖက်ရန် သမ္မတက စေခိုင်းခြင်း ဖြစ်ကြောင်း၊ မှတ်သား သွားစေရန် ဆုံးမခြင်း ဖြစ်ကြောင်း အချုပ်ခန်းတွင် ပြောဆိုခဲ့သည်ဟု အဖမ်းဆီး ခံခဲ့ရပြီး ပြန်လည် လွတ်မြောက် လာသည့် အမျိုးသမီး ၃ ဦးက ရှင်းပြသည်။

လက်ပန်းတောင်းတောင် ကြေးနီစီမံကိန်း လုပ်ငန်းများ ဆက်လက်တိုးချဲ့ လုပ်ကိုင်ရန် အတွက် အနီးအနားရှိ ကျေးရွာ ၄ ရွာကို ရွှေ့ပြောင်းခိုင်းခြင်းမှ အစပြုကာ ယခုကဲ့သို့ ပြဿနာများ ကြီးထွား လာခဲ့ခြင်း ဖြစ်သည်။ ပြောင်းရွှေ့ရန် ကျန်ရှိနေသည့် ရွာ ၄ ရွာမှ အမျိုးသမီး ၁၂ ဦးသည် စက်တင်ဘာလ ၁၀ ရက်နေ့က လက်ပန်းတောင်းတောင် ရပ်တန့်ရေး စာတန်းများ ပါသည့် တီရှပ်များ ၀တ်ဆင်ကာ မုံရွာမြို့သို့ ဘုရားသွားဖူး ချိန်တွင် အာဏာပိုင်များက ဖမ်းဆီးခဲ့ခြင်းဖြစ်သည်။ ယင်းနေ့က အမျိုးသမီး ၉ ဦးကို ပြန်လည် လွှတ်ပေးခဲ့သော်လည်း ခေါင်းဆောင်ဟု ယူဆသည့် ၃ ဦးကို ဆက်လက် ထိန်းသိမ်းထားရာမှ ဒေသခံများနှင့် အသင်း အဖွဲ့များက ၀ိုင်းဝန်း ကန့်ကွက် ဆန္ဒပြသည့်အတွက် ဆူပူမှုများ ပိုမိုဖြစ်ပေါ်ခဲ့သည်။

ဆန္ဒပြသူများကို ညအိပ်လက်ခံခဲ့သည့် မုံရွာမြို့မ ဂါတ်ဘုန်းကြီးကျောင်းကို အမှတ် ၁ ရဲစခန်းတွင် နေထိုင်သည့် ၀န်ထမ်းများနှင့် မိသားစုများ အနေဖြင့် ဆွမ်းချိုင့်မပို့ရဟု အမိန့် ထုတ်ပြန်ထားကြောင်း ကြားသိရသည်။

‘‘ဆန္ဒပြတာ ဦးဇင်းတို့ ကျောင်းရှေ့မှာလေ။ ညပိုင်းကြတော့ ဆန္ဒပြတဲ့လူတွေ ပြန်ဖို့ ခက်ခဲတဲ့ အတွက် ဦးဇင်းတို့ကျောင်းမှာ တည်းခွင့် ပေးခဲ့တာပါ။ ဦးဇင်းတို့ကို အရင် အမှတ် ၁ ရဲစခန်းက တနေ့ကို ဆွမ်းချိုင့် ၅ ချိုင့်ပို့တယ်။ ဆန္ဒပြပြီး နောက်တရက် ဆွမ်းချိုင့်လည်း သွားပို့ရော ချိုင့်ထဲမှာ ဆွမ်းတွေ မပါဘဲ ဗလာကြီးဖြစ်နေတယ်။ ဆွမ်းချိုင့်ပို့တဲ့ ကိုရင်က ဘာဖြစ်လို့လဲ မေးတော့ အထက်က ဆွမ်းမလောင်းရဘူး၊ လောင်းရင် ဖမ်းမယ်ဆိုလို့ ဆွမ်းမထည့် တာပါလို့ ပြောတယ်” ဟု ယင်းကျောင်း တွင် သီတင်း သုံးနေသည့် ဆရာတော် ဦးရာဇဓမ္မက မိန့်သည်။

ဝက်မှေးကျေးရွာရှိ ရွာဦးဘုန်းကြီးကျောင်းကိုလည်း အာဏာပိုင်များက ချိတ်ပိတ်ကာ အတွင်းရှိ ဘုရား ဆင်းတုတော် များနှင့် သာသနာပိုင် ပစ္စည်းများကို ဖျက်ဆီးနေကြောင်း ၀က်မှေးကျေးရွာ ဒေသခံများက ပြောသည်။

လက်ပံတောင်းတောင်တွင် ဦးပိုင်လီမိတက်နှင့် တရုတ်ကုမ္ပဏီ ၀မ်ပေါင်တို့ ပူးပေါင်းကာ ကြေးနီရှာဖွေသည့် လုပ်ငန်းများ လုပ်ဆောင်လျှက် ရှိသည်။ ကြေးနီ တူးဖော်ရှာဖွေရာတွင် စွန့်ပစ်မြေများကို လယ်ယာမြေများတွင် သွားရောက် စုပုံခြင်းကြောင့် တောင်သူလယ်သမားများ၏ လယ်မြေများ ပျက်စီးခဲ့ခြင်းမှ အစပြုကာ ကြေးနီတောင် စီမံကိန်း ရပ်တန့်ပေးရန် အထိ တောင်းဆို ဆန္ဒပြမှုများ ဆက်တိုက် ဖြစ်ပွားခဲ့ခြင်း ဖြစ်သည်။

ကြေးနီထုတ်လုပ်မှု စီမံကိန်းကို ၁၉၆၂ ခုနှစ် တော်လှန်ရေးကောင်စီ တက်ပြီးချိန်မှ စတင်ပြီး ဂျပန်နိုင်ငံနှင့် ပူးပေါင်း လုပ်ဆောင်ခဲ့ရာ ထုတ်လုပ်မှု မအောင်မြင်သောကြောင့် ၁၉၇၄ ခုနှစ် ယူဂိုဆလားဗီးယား နိုင်ငံနှင့် ပူးပေါင်း လုပ်ဆောင် ခဲ့သေးသည်။

၁၉၇၈ ခုနှစ်တွင် ကြေးစင်တောင်နှင့် စံပယ်တောင် အနီးအနားရှိ ကျေးရွာများမှ လယ်မြေများကို သိမ်းဆည်းကာ ကြေးနီ ထုတ်လုပ်သည့် စက်ရုံများ တည်ထောင်ခဲ့ပြီး ကြေးနီထုတ်လုပ်မှုအပိုင်းကို တိုးမြှင့်ခဲ့သည်ဟု ယင်းတောင်ခြေတွင် နေထိုင်သည့် ကံကုန်းကျေးရွာမှ အသက် ၆၃ နှစ်ရှိပြီဖြစ်သော ဦးဘိုသန်းက ပြောသည်။

‘‘ကြေးနီထုတ်လုပ်တဲ့ စက်ရုံတည်ထောင်ပြီးကတည်းက ကျနော်တို့ ရွာတွေမှာ သူတို့ စွန့်ပစ်တဲ့ ရေတွေနဲ့ အနံ့အသက် ဆိုးတဲ့ လေထု ဒဏ်ကို အလူးအလဲ ခံခဲ့ရတာပါ။ လယ်မြေတွေလည်း ပျက်စီး၊ ကျေးရွာမြေတွေလည်း ပျက်ကုန်တယ်။ ကျေးရွာထဲ မှာတောင် သောက်စရာ ရေမရှိ၊ ရေတွင်းတွေ ခန်းကုန်တယ်။ အဲဒီဒဏ်ကို အခုထိ ကျနော်တို့ ခံနေရတုန်းပါ” ဟု ၎င်းက ရှင်းပြသည်။

၂၀၀၃ ခုနှစ်မှ စတင်ကာ တရုတ်နိုင်ငံနှင့် ပူးပေါင်း၍ ကြေးနီစီမံကိန်းလုပ်ငန်းများကို လုပ်ကိုင်ခြင်းဖြစ်ပြီး လက်ပန်းတောင်း တောင် ၃၃ လုံးကို သတ္တုသိုက် ရှာဖွေရေး စီမံကိန်းကြီးအဖြစ်သတ်မှတ်၍ ကြေးနီ၊ ရွှေ၊ ပလက်တီနမ်များ ထုတ်လုပ်သွားမည် ဟု သိရသည်။

ယင်းစီမံကိန်း အကြီးကျယ်လုပ်ဆောင်လျှက် ရှိသော်လည်း အနီးအနားရှိ ဒေသခံများကို အလုပ်အကိုင် အခွင့်အလမ်းများ ပေးမှု နည်းပါးခြင်း၊ ကျေးလက်နေ တောင်သူများ လုပ်ကိုင်သည့် လယ်မြေများပျက်စီးမှုအတွက် တစုံတရာ ဖြေရှင်းမပေးခြင်း အပြင် သောက်ရေသုံးရေများ ပြတ်တောက်မှုကြောင့် ဒေသခံများမှာ ဒုက္ခရောက်လျှက် ရှိသည်။

ထို့ကြောင့် လက်ပန်းတောင်းတောင် အနီးအနားတွင် နေထိုင်ကြသည့် ကျေးရွာ ၂၆ ရွာမှ ဒေသခံများမှာ ကြေးစင်တောင်နှင့် စံပယ်တောင်ကို နမူနာယူပြီး ယခုကဲ့သို့ ကန့်ကွက်ဆန္ဒပြခြင်းများ ပြုလုပ်နေခြင်း ဖြစ်သည်။

လက်ပံတောင်းတောင် ကြေးနီစီမံကိန်းသည် ချင်းတွင်းမြစ်အား ညစ်ညမ်းစေနိုင်ခြင်း၊ သာသနာ့ အောင်မြေအား ဖျက်ဆီး နေခြင်း၊ လက်ပံတောင်းတောင် ဒေသ ပတ်ဝန်းကျင် ပျက်စီးဆုံးရှုံးနိုင်ခြင်း၊ မုံရွာမြို့ ပတ်ဝန်းကျင်တွင် ညစ်ညမ်းမှု ဖြစ်ပေါ် နိုင်ခြင်း တို့ကြောင့် ကြေးနီစီမံကိန်း လုံးဝမလုပ်ဘဲ အပြီးတိုင် ဖျက်သိမ်းရေးကို ကျေးရွာ ၂၆ ရွာမှ ဒေသခံများနှင့် မုံရွာ ဒေသခံများ ပူးပေါင်းကာ စီမံကိန်း ရပ်တန့်သွားသည်အထိ ဆန္ဒထုတ်ဖော်သွားမည် ဖြစ်ကြောင်း သိရသည်။

Ref: ဧရာဝတီ

Read More...

Collapse...