2012-05-03
အမျိုးသားဒီမိုကရေစီ အဖွဲ့ချုပ် အနေနဲ့ လွှတ်တော်တွင်း အမြင်မတူတာတွေကို ညှိနှိုင်းပြီး ပူးပေါင်း ဆောင်ရွက်မှာ ဖြစ်တယ်လို့ ဒေါ်အောင်ဆန်းစုကြည်က ဒီကနေ့ ပြောကြား လိုက်ပါတယ်။
လွတ်တော်တွင်း ပါတီအဖွဲ့အစည်းတွေက ကိုယ်စားလှယ်တွေဟာ အမျိုးသား ဒီမိုကရေစီ အဖွဲ့ချုပ်နဲ့ ပူးပေါင်း ဆောင်ရွက်ချင်တဲ့ ဆန္ဒတွေကို ဖော်ပြတာ တွေ့ရတယ်လို့ ဆိုပါတယ်။
"ကျွန်မတို့ လွှတ်တော်ထဲ ရောက်ပြီးသားဖြစ်နေတဲ့ ပါတီ အဖွဲ့အစည်းတော်တော်များများက ကိုယ်စားလှယ်တွေက လှိုက်လှိုက်လှဲလှဲနဲ့ ကြိုဆိုကြပါတယ်။ လှိုက်လှိုက် လှဲလှဲ နွေးနွေးထွေးထွေးနဲ့ ကြိုဆိုပြီးတော့ အားလုံး ပူးပေါင်းဆောင်ရွက်ချင်တဲ့ ဆန္ဒတွေကို ဖော်ပြကြပါတယ်။ အဲတာကတော့ ကျွန်မတို့ နိုင်ငံအတွက် အင်မတန်မှ ကောင်းတဲ့ အလားအလာလို့ ကျွန်မ ထင်ပါတယ်"
ဒီကနေ့ ကြည့်မြင်တိုင်မြို့နယ်၊ အထက် ကြည့်မြင်တိုင်ရပ်ကွက်၊ ဘောဂလမ်းက NLD ရုံးခန်း ဖွင့်ပွဲ အခမ်းအနား မိန့်ခွန်းပြောကြားစဉ်မှာ ဒေါ်အောင်ဆန်းစုကြည်က အခုလို ပြောကြား ခဲ့တာပါ။
ဒီကနေ့ အခမ်းအနားမှာ ဒေါ်အောင်ဆန်းစုကြည်က ပညာရေး၊ ကျန်းမာရေးနဲ့ ဆင်းရဲမွဲတေမှု ပပျောက်ရေးနဲ့ ပတ်သက်ပြီး လူထုကို ပြောကြားခဲ့ပါတယ်။ ပညာရေးနဲ့ ပတ်သက်ပြီး အသက်မွေးဝမ်းကျောင်း ပညာတွေ သင်ကြားပေးဖို့ အရေးကြီးကြောင်း၊ ဆင်းရဲမွဲတေမှု ပပျောက်ရေးနဲ့ ပတ်သက်ပြီး အဓိက လိုအပ်ချက်ဟာ အလုပ်အကိုင် ဖန်တီးပေးဖို့ ဖြစ်ကြောင်း၊ ဒီကိစ္စကို အမျိုးသားဒီမိုကရေစီ အဖွဲ့ချုပ် အနေနဲ့ ဦးစားပေး ဆောင်ရွက်သွားမှာ ဖြစ်တယ်လို့ ပြောပါတယ်။
ဒီကနေ့ ရုံးခန်းဖွင့်ပွဲ အခမ်းအနားကို ဒေါ်အောင်ဆန်းစုကြည်နဲ့ အတူ NLD သဘာပတိအဖွဲ့နာယက ဦးတင်ဦး၊ သဘာပတိ အဖွဲ့ဝင် ဦးဝင်းတင်နဲ့ ပြည်သူ့လွှတ်တော် ကိုယ်စားလှယ် ဦးအုန်းကြိုင်တို့ တက်ရောက်ခဲ့ကြပါတယ်။
ဒီကနေ့ ရုံးခန်းဖွင့်ပွဲကို ပရိသတ် သောင်းနဲ့ချီ တက်ရောက်ခဲ့တယ်လို့ သိရပါတယ်။
Ref: RFA News
Friday, May 4, 2012
အမြင်မတူတာတွေကို ညှိနှိုင်းဆောင်ရွက်မယ်လို့ ဒေါ်အောင်ဆန်းစုကြည် ပြောကြား
NF ငြိမ်းအဖွဲ့ ချင်းပြည်သူတွေနဲ့ တွေ့ဆုံဆွေးနွေး
2012-05-03
ချင်းပြည်နယ်အစိုးရနဲ့ ပြည်နယ်အဆင့် ငြိမ်းချမ်းရေး သဘောတူညီချက်အရ ချင်းအမျိုးသားတပ်ဦး CNF ငြိမ်းချမ်းရေး ကိုယ်စားလှယ် အဖွဲ့ဟာ သူတို့ ဆက်ဆံရေးရုံး ထားရှိမယ့် ချင်းပြည်နယ် တောင်ပိုင်း မတူပီမြို့ ဘုံတလာ ခန်းမဆောင်မှာ ဒေသခံလူထု သုံးထောင်လောက်နဲ့ ပထမဦးဆုံး အကြိမ် တွေ့ဆုံဆွေးနွေး ခဲ့ပါတယ်။
အဲဒီတွေ့ဆုံပွဲမှာ CNF ငြိမ်းချမ်းရေး ကိုယ်စားလှယ် ခေါင်းဆောင် ဒေါက်တာရွှေခါးက တက်ရောက်လာကြတဲ့ ပြည်သူတွေကို အစိုးရနဲ့ ငြိမ်းချမ်းရေး ဆွေးနွေးရတဲ့ အကြောင်းရင်းနဲ့ ပတ်သက်ပြီး အခုလို ရှင်းလင်းပြောဆိုခဲ့ပါတယ်။
" အစိုးရသစ် တက်လာပြီးတဲ့နောက် နိုင်ငံရေးကိစ္စကို ဒီဆွေးနွေးပွဲမှာ ဆွေးနွေးရအောင် ဆိုတဲ့ဟာကို သူတို့ဘက်ကည်း လက်ခံတယ်။ အားလုံးသိတဲ့ အတိုင်းပဲ ပထမ အကြိမ် တွေ့ဆုံဆွေးနွေးပွဲကို လုပ်နိုင်ခဲ့တယ်။ တော်တော်များများ လူတွေကပြောကြတယ်။ အခုအစိုးရသစ်က အရင်တုန်းက အစိုးရခေတ်က လူတွေပဲ၊ ဘာဖြစ်လို့ အခုမှ သူတို့ဒီလို ပြောင်းလဲလာသလဲ။ ကျွန်တော်တို့ ဘက်ကကော ယုံကြည်နိုင်စရာ ရှိသလား ဆိုတဲ့ဟာက တော်တော်များများ မေးကြတယ်။ တခါတလေကျလို့ရှိရင် သံသယစိတ်က နှစ်ဦးနှစ်ဘက်မှာ ရှိပါတယ်။ ငြိမ်းချမ်းရေး လိုချင်တော့ ဒီသံသယတွေကို ခဏလေး ထားဦး။ အချင်းချင်း စကားပြောကြမယ်။ အဲဒါကြောင့် ကျွန်တော်တို့ဘက်ကလည်း ဟုတ်ပြီ ဒါဆို စကားပြောတာပေါ့ ဆိုပြီးတော့ ကျွန်တော်တို့ စကားပြောခြင်းဖြစ်တယ်"
ဒီလိုအစိုးရနဲ့ ငြိမ်းချမ်းရေး ဆွေးနွေးတဲ့အခါမှာလည်း ချင်းအမျိုးသားတပ်ဦးရဲ့ ရပ်တည်ချက်ဖြစ်တဲ့ ကိုယ်ပိုင်ပြဋ္ဌာန်းခွင့်၊ ဖက်ဒရယ် ပြည်ထောင်စု တည်ဆောက်ရေးနဲ့ ဒီမိုကရေစီ ထွန်းကားရေး ဆိုတဲ့ အချက် (၃) ချက်ကို ကိုင်စွဲပြီး ဆွေးနွေးနေတာ ဖြစ်တယ်လို့လည်း ဒေါက်တာရွှေခါးက ပြည်သူလူထုကို ပြောဆိုပါတယ်။
မတူပီမြို့နယ်ဟာ CNF ဆက်ဆံရေးရုံးတွေ ထားရှိမယ့် မြို့နယ် (၃) ခုထဲက တစ်နေရာဖြစ်ပါတယ်။ ချင်းအမျိုးသားတပ်ဦး ငြိမ်းချမ်းရေး ကိုယ်စားလှယ်အဖွဲ့ဝင် (၁၇) ဦးတို့ဟာ မေလ (၇) ရက် နဲ့ (၈) ရက်နေ့မှာ ပြည်ထောင်စုအဆင့် ငြိမ်းချမ်းရေး တွေ့ဆုံ ဆွေးနွေးကြမယ်လို့ သိရပါတယ်။
Ref: RFA News
စစ်ပြေးဒုက္ခသည်များကို ကုလကူညီမည့်အပေါ် KIO ကြိုဆို
ခင်သြ
May 3, 2012
ကချင်ပြည်နယ်အတွင်း ဖြစ်ပွားနေသော တိုက်ပွဲများကြောင့် ထွက်ပြေးတိမ်းရှောင်နေရသော စစ်ပြေးဒုက္ခသည်များကို ကုလသမဂ္ဂက အကူ အညီများ ဆက်လက် ပေးမည် ဆိုသည့် ကုလသမဂ္ဂ အထွေထွေ အတွင်းရေးမှူးချုပ် ဘန်ကီမွန်း၏ ပြောဆိုချက်အား ကချင်လွတ်လပ်ရေး အဖွဲ့ (KIO) က ကြိုဆိုလိုက်သည်။
စစ်ပြေး ဒုက္ခသည်များကို ပြန်လည်နေရာချထားပေးခြင်းနှင့် လူ့သားချင်း စာနာထောက်ထားမှုဆိုင်ရာ အကူအညီများ ဆက်လက်ပေးသွားရန် ရှိကြောင်း မေလ ၁ ရက်နေ့က ရန်ကုန်မြို့တွင် ကျင်းပသည့် သတင်းစာ ရှင်းလင်းပွဲတွင် မစ္စတာ ဘန်ကီမွန်းက ပြောကြားခဲ့သည်။
“အရင်က ပြောခဲ့ဖူးသလိုပါပဲ၊ ငြိမ်းချမ်းရေးဖြစ်စဉ် အလျင်အမြန် အကောင်အထည် ဖော်နိုင်ဖို့အတွက် ငွေကြေးနဲ့တခြား လိုအပ်တဲ့ အရာတွေ အားလုံး အကူအညီ ဆက်ပေး သွားပါမယ်” ဟု မစ္စတာ ဘန်ကီမွန်းက ဆိုသည်။
KIO တွဲဖက်အတွင်းရေးမှူး ဦးလနန်က “ကုလသမဂ္ဂ အဖွဲ့အစည်းကနေပြီးတော့ လူ့သားချင်း စာနာထောက်ထားမှုဆိုင်ရာ အကူအညီအတွက် လုပ်နေကြပါပြီ၊ ဆက်ပြီတော့ ကူညီပေးမယ် ဆိုတော့ ကချင် တိုင်းရင်းသားတွေသာ မကပါဘူး၊ စစ်ဘေးကြောင့် ဒီမှာ ဒုက္ခရောက်နေတဲ့ တိုင်းရင်းသားတွေ အတွက် အများကြီး အထောက်အကူ ဖြစ်မှာပါ” ဟု ဧရာဝတီသို့ ပြောသည်။
ပြီးခဲ့သည့် မတ်လကလည်း ကချင်ပြည်နယ် အတွင်းရှိ စစ်ပြေး ဒုက္ခသည်စခန်းများသို့ ကုလသမဂ္ဂလက်အောက်ခံ အဖွဲ့အစည်းများက ဆန်၊ သောက်ရေသန့်၊ အမိုးအကာ စသည့်ပစ္စည်းများ လာရောက် ကူညီခဲ့ကြောင်း ၎င်းက ဆိုသည်။
ကချင် စစ်ပြေးဒုက္ခသည်များအတွက် ရန်ကုန်အခြေစိုက် ကုလသမဂ္ဂအဖွဲ့တချို့က ကချင်လွတ်လပ်ရေး တပ်မတော် (KIA) ထိန်းချုပ်ရာ လိုင်ဇာဒေသသို့ ယမန်နှစ် ဒီဇင်ဘာလတွင် ပထမဆုံး အကြိမ် စတင်၍ အိမ်သုံး ပစ္စည်းများနှင့် စားသောက်ကုန်များ ထောက်ပံ့ပေးခဲ့ကြောင်း သိရသည်။
ဧပြီလ ၃၀ ရက်နေ့က သမ္မတ ဦးသိန်းစိန်နှင့် ပြည်ထောင်စု ငြိမ်းချမ်းရေးဖော်ဆောင်ရေး အဖွဲ့ဝင်များ တွေ့ဆုံ၍ ကချင်ပြည်နယ် ငြိမ်းချမ်းရေး ကိစ္စများကို ဆွေးနွေး ခဲ့ကြသည်။
မစ္စတာ ဘန်ကီမွန်းက “ဒီငြိမ်းချမ်းရေး ဖော်ဆောင်မှုလုပ်ငန်း အထမြောက်ဖို့က တွေ့ဆုံဆွေးနွေးရုံတင် မကဘူး၊ တွေ့ဆုံဆွေးနွေးပြီးတဲ့အခါ တဖက်နဲ့တဖက် အပြန်အလှန် နားလည်မှု တည်ဆောက်ရမှာ ဖြစ်တယ်။ မြန်မာနိုင်ငံတော် အစိုးရနဲ့ အနီးကပ်ဆုံး ပူးပေါင်းဆောင်ရွက်သွားမယ်” ဟု သတင်းစာ ရှင်းလင်းပွဲတွင် ပြောသည်။
ယမန်နေ့က လိုင်ဇာဌာနချုပ်ဒေသအတွင်း အစိုးရတပ်နှင့် KIA တပ်ဖွဲ့များ ၂ နာရီ အကြာ တိုက်ပွဲ ဖြစ်ပွားခဲ့သေးကြောင်း ဦးလနန်က ပြောသည်။
ပြီးခဲ့သည့်နှစ် ဇွန်လ ၉ ရက်နေ့က စတင်၍ တရုတ်-မြန်မာနယ်စပ် တာပိန်မြစ်ပေါ်တွင် တည်ဆောက်မည့် ရေကာတာအနီး တပ်စွဲ ထားသည့် KIA တပ်ဖွဲ့များကို အစိုးရတပ်က ဖယ်ရှား ခိုင်းရာမှ နှစ်ဖက် တိုက်ပွဲများ စတင်ဖြစ်ပွားခဲ့သည်။
တိုက်ပွဲဖြစ်ပွားမှုများကြောင့် လိုင်ဇာမြို့၊ မိုးမောက်မြို့စသည့် KIA ထိန်းချုပ်ဒေသများတွင် စစ်ပြေးဒုက္ခသည် ၂ သောင်းခွဲခန့် ရှိကြောင်း သိရသည်။
KIO သည် ၁၉၉၄ ခုနှစ်တွင် အစိုးရနှင့် အပစ်အခတ်ရပ်စဲရေး လက်မှတ်ထိုးထားသည့် တိုင်းရင်းသား လက်နက်ကိုင် အဖွဲ့ဖြစ်ပြီး ၂၀၁၁ ခုနှစ် ဇွန်လတွင် တိုက်ပွဲများ ပြန်လည် ဖြစ်ပွားခဲ့ပြီးနောက် အပစ်အခတ် ရပ်စဲရေးလည်း ပျက်ပြားခဲ့သည်။
Ref: ဧရာဝတီ
ပဲခူး တရားသူကြီး ဇနီးကို အမှုဖွင့်၊ တရားခံပျောက်ဆုံးနေဟု ရဲကပြော
ကျော်ခ
May 3, 2012
အိမ်အကူအလုပ်သမ မအေးယုအောင်အား မီးပူဖြင့် လက်ရောက် ကျူးလွန်ခဲ့သည်ဟု စွပ်စွဲခံထားရသော ပဲခူးမြို့ ဒုတိယ မြို့နယ် တရားသူကြီး၏ ဇနီး ဒေါ်ဖြူဝင်းသက်ကို ကာယကံရှင်များက အမှုဖွင့် တိုင်ကြား ထားသော်လည်း တရားခံမှာ ပျောက်ဆုံး နေကြောင်း ရဲကပြောသည်။
အသက် ၁၅ နှစ်အရွယ် မအေးယုအောင်က ၎င်းအား မီးပူဖြင့်ကပ်သည်ဟု ဆိုကာ အိမ်ရှင် တရားသူကြီး ဦးအောင်ဖုန်းဝင်း၏ ဇနီးကို ပဲခူးမြို့ နယ်မြေခံ အမှတ် ၃ ရဲစခန်းတွင် အင်္ဂါနေ့က အမှုဖွင့် တိုင်ကြားခဲ့သည်။
သို့သော် စစ်ဆေး မေးမြန်းမှုများ ပြုလုပ်ရန် တရားခံဖြစ်သူ ဒေါ်ဖြူဝင်းသက်ကို ရှာမတွေ့တော့ကြောင်း အမှတ် ၃ ရဲစခန်းမှူး ဦးသိန်းဦး က ဧရာဝတီကို ပြောသည်။
“ကာယကံရှင် အေးယုအောင်ကတော့ ကျနော်တို့ဆီမှာ လာပြီး အမှုဖွင့်ထားပါတယ်။ ကျနော်တို့လည်း အရေးယူဆောင်ရွက်မှုတွေ လုပ်နေပါတယ်။ သက်သေ တချို့ကိုလည်း စစ်ဆေးနေပါတယ်။ တရားခံကတော့ လက်ရှိနေရပ် လိပ်စာမှာ မရှိတော့ဘူး။ ဘယ် ပြောင်းသွားတယ် ဆိုတာကိုလည်း မသိတော့ ကျနော်တို့ လိုက်လံ စုံစမ်းနေပါတယ်”ဟု စခန်းမှူး ဦးသိန်းဦး က ပြောသည်။
အမှုဖွင့်ထားပြီးနောက် အရေးယူဆောင်ရွက်မှုများပြုလုပ်ရန် ဦးအောင်ဖုန်းဝင်း၊ ဒေါ်ဖြူဝင်းသက်တို့ မူလနေထိုင်သော ပဲခူးမြို့ ဥဿာမြို့သစ် ရပ်ကွက်ရှိ အိမ်သို့ ရဲစခန်း တာဝန်ရှိသူများက သွားရောက် စုံစမ်းရာတွင် နေအိမ်နှင့် ခြံဝန်းအား သော့ခတ်ထားကြောင်း၊ ပြောင်းရွှေ့သွားသော နေရာသစ်အား စုံစမ်းနေဆဲဖြစ်ပြီး အမှုနှင့် ဆက်နွယ်နေသူ များကိုလည်း စုံစမ်း စစ်ဆေးမှုများ ပြုလုပ်နေကြောင်း ဦးသိန်းဦး က ဆက်ပြောသည်။
ယခုနှစ် မတ်လ ၂၅ ရက်နေ့က အိမ်ရှင် ဒေါ်ဖြူဝင်းသက်က ၎င်း၏အိမ်တွင် အိမ်အကူလုပ်နေသော မအေးယုအောင်အား မီးပူဖြင့် ထိုးကပ်ခဲ့သဖြင့် လည်ပင်းနှင့် ရင်ဘတ်တို့တွင် အရေပြားလွှာများ ပျက်စီးသည်ထိ ဒဏ်ရာများ ရရှိထားကြောင်း၊ ထို့အပြင် မိဘထံ ပြန် မပို့ဘဲ ဒဏ်ရာများပျောက်ကင်းသည်ထိ ထိန်းချုပ်ထားခြင်းနှင့် ယင်းဖြစ်စဉ်အား ဖျောက်ဖျက်ရန်ကြိုးစားမှုကို ကျေနပ်မှု မရှိကြောင်း မအေးယုအောင်၏ မိခင် ဒေါ်ကြူကြူ က ပြောပြသည်။
လတ်တလောတွင် လက်ရောက်ကျူးလွန်သူ ဒေါ်ဖြူဝင်းသက်ကို အမှုဖွင့်တိုင်ကြားထားသကဲ့သို့ ယင်းဖြစ်စဉ်အား ဖျောက်ဖျက်ရန် ကြိုးစားခဲ့သော ခင်ပွန်းဖြစ်သူ တရားသူကြီး ဦးအောင်ဖုန်းဝင်း နှင့် အမှတ် ၃ ရဲစခန်းမှူး ဦးသိန်းဦးကိုလည်း ပဲခူးမြို့ လမ်းပြကြယ် အဖွဲ့၏ အကူအညီကိုယူကာ ဆက်တိုက် တရားစွဲဆိုသွားမည်ဟု သိရသည်။
ဦးအောင်ဖုန်းဝင်းက အမှုဖြစ်စဉ်အားဖျောက်ဖျက်ရန် ကြိုးစားရာတွင် ဝိုင်းဝန်းကူညီခဲ့ကြသော မအေးယုအောင်၏ ဇာတိ ပဲခူးတိုင်း ကျောက်ကြီးမြို့နယ်မှ မြို့နယ် အုပ်ချုပ်ရေးမှူး ဦးမြင့်ခိုင်၊ အမျိုးသမီးရေးရာ အဖွဲ့နှင့် ယင်းမြို့နယ် တရားသူကြီး ဦးသက်ထွန်း တို့ကိုလည်း စစ်ဆေးရန် တိုင်ကြားထားကြောင်း လမ်းပြကြယ်အဖွဲ့ ခေါင်းဆောင် ဦးအေးမြင့် ကလည်း ပြောသည်။
“ဦးအောင်ဖုန်းဝင်းက ကောင်မလေး မီးပူနဲ့ထိတာဟာ သူ့မိန်းမ လုပ်တာမဟုတ်ပါဘူးလို့ပြောတာကို ဝိုင်းပြီးဖျောက်ဖျက်ပေးဖို့ ကြိုးစားပေးတဲ့လူတွေ။ ကျောက်ကြီး မယက ဥက္ကဌနဲ့အဖွဲ့၊ သူတို့ကို အားပေးကူညီမှုနဲ့ ပေါ်လာအောင် ရဲကိုစစ်ခိုင်းထားတယ်။ ဒီတပတ် အတွင်းမှာ ရဲကဆင်းပြီးစစ်နေပြီ”ဟု ဦးအေးမြင့်က ဧရာဝတီသို့ ပြောသည်။
အမှုဖွင့်တိုင်ကြားရခြင်းနှင့် ပတ်သက်၍ ရဲကစစ်ဆေးမေးမြန်းရာ၌် မအေးယုအောင် ၏ ထွက်ဆိုချက်များကို ကြားသိပြီးနောက် ဒေါ်ဖြူဝင်းသက်သည် ၎င်း၏သမီးအပေါ် စာနာထောက်ထားမှုမဲ့စွာဖြင့် အခြားသော နှိပ်စက်မှုများလည်းရှိခဲ့ကြောင်း ဒေါ်ကြူကြူ က ပြော ဆိုသည်။
“ကလေးက သူ့ရှေ့တည့်တည့်မှာထိုင်နေတာကို မီးပူနဲ့ မျက်နှာကိုလှမ်းထိုးလိုက်တာ ကလေးက ရှောင်လိုက်တော့ လည်ပင်းနဲ့ ရင် ဘတ်က ညှပ်ရိုးကိုထိသွားတာတဲ့၊ ရင်ဘတ်မှာကလည်း ဓား ဒဏ်ရာရှိတယ်။ အရင်က ကြက်သွန်လှီးဓားကို မပြတ်ဘူးဆိုပြီး ကလေးရင်ဘတ်ကို ခုတ်ထားတာ၊ ခေါင်းမှာလည်း ဟင်းချက်တာ ပေါ့လို့ဆိုပြီး ပုလင်းနဲ့ ရိုက်ထားတာတဲ့ ဒဏ်ရာအကြီးကြီးပဲ၊ ကျမ လည်း အစကမသိဘူး၊ ကလေးက ရဲတွေကို ဖွင့်ပြောပြမှသိလိုက်တာ”ဟု ဒေါ်ကြူကြူ က ပြောသည်။
ကာယကံရှင်ဖြစ်သူ မအေးယုအောင် ကလည်း“အနာတွေက အကုန်ကျက်သွားပြီ။ အမာရွတ်ပဲကျန်နေတော့တာ။ ဒဏ်ရာတွေက မီးပူနဲ့ ကပ်ခံထိတာလေ။ ဒေါ်ဖြူဝင်းသက်က သမီးကိုကပ်တာ”ဟု သူက ဧရာဝတီက ဆက်သွယ်မေးမြန်းရာတွင် ပြောပြသည်။
တရားလိုများဘက်မှ အမှုဖွင့်တိုင်ကြားထားမှုနှင့် ပတ်သက်၍ ဦးအောင်ဖုန်းဝင်းနှင့် ဒေါ်ဖြူဝင်းသက်တို့ကို တယ်လီဖုန်းဖြင့် ဆက် သွယ်မေးမြန်းသော်လည်း ပြန်လည်ဖြေကြားခြင်း မရှိပေ။
Ref: ဧရာဝတီ
မြန်မာသတင်းလွတ်လပ်ခွင့် အားရစရာ မရှိသေး
ကိုကျော်ကျော်သိန်း
ကြာသပတေး, 03 မေ 2012
ကမ္ဘာ့စာနယ်ဇင်း လွတ်လပ်ခွင့်နေ့ အထိမ်းအမှတ် သီးခြား အခမ်းအနားတွေကို ရန်ကုန်နဲ့ မန္တလေးမြို့တို့မှာ ကျင်းပ ခဲ့ကြပါတယ်။ စာနယ်ဇင်း သမားတွေ၊ စာပေလောက သားတွေ စုပေါင်းပြီးတော့ ကိုယ့် အစီအစဉ်နဲ့ကိုယ် လွတ်လွတ်လပ်လပ် ကျင်းပ ခဲ့ကြတာပါ။ ဒီလို လုပ်နိုင်တဲ့အပေါ် အားတက် ၀မ်းသာ ရှိကြတာနဲ့ တချိန်ထဲမှာပဲ မြန်မာနိုင်ငံက စာနယ်ဇင်း လွတ်လပ်ခွင့် အခြေအနေဟာ တိုးတက် လာနေပြီ ဆိုတဲ့ အမြင်မျိုးနဲ့အတူ အားရကျေနပ်စရာ အဆင့်ထိတော့ မရောက်သေးဘူးဆိုတဲ့ အမြင်ကလည်း တွဲနေပါတယ်။ အပြည့်အစုံကို ဘန်ကောက်ကနေ ဆက်သွယ်မေးမြန်းထားတဲ့ ကိုကျော်ကျော်သိန်းက သတင်းပေးပို့ထား ပါတယ်။
စာနယ်ဇင်း လွတ်လပ်ခွင့်ဆိုတဲ့ ခေါင်းစဉ်ကို တရားဝင်အသုံးပြုပြီး မေလ ၃ ရက်နေ့မှာ ကျရောက်တဲ့ ကမ္ဘာ့စာနယ်ဇင်း လွတ်လပ်ခွင့်နေ့ အခမ်း အနားတွေကို လွတ်လွတ်လပ် ကျင်းပခွင့် ရတာဟာဖြင့် မြန်မာ့ စာနယ်ဇင်းသမိုင်းမှာ ပထမဆုံးဖြစ်ပါတယ်။ ဒီနေ့ကို ကုလသမဂ္ဂ ပညာရေး၊ သိပ္ပံနဲ့ ယဉ်ကျေးမှုအဖွဲ့ (UNESCO) က ၁၉၉၃ ခုနှစ်ကတည်းက စတင် သတ်မှတ်ခဲ့တာပါ။ ရန်ကုန်မြို့ Central ဟော်တယ်မှာ ကျင်းပတဲ့ အခမ်းအနားကို မြန်မာနိုင်ငံ သတင်းစာဆရာအသင်း ဖြစ်မြောက်ရေးကော်မတီ (MJA) က ဦးစီးကျင်းပတာ ဖြစ်ပါတယ်။
စာနုယ်ဇင်းသမားတွေ ကိုယ်တိုင် ဦးစီးကျင်းပတဲ့ ဒီအခမ်းအနားနဲ့ ပတ်သက်ပြီး MJA ရဲ့ အတွင်းရေးမှူး ဦးဖိုးနိုင်လင်းက ဗွီအိုအေကို အခုလိုရှင်းပြပါတယ်။
"ကျနော်တို့အနေနဲ့ ဒီ သတင်းစာ ဆရာများအသင်းကိုလည်း ဖြစ်မြောက်စေချင်တယ်ဗျာ။ တကယ်တန်းတော့ ဒီမတိုင်ခင်မှာ ကျနော်တို့ အစည်းဝေးတခု လုပ်ဖို့ အစီအစဉ် ရှိတယ်ဗျ။ ဒါပေမယ့်လို့ ကျနော်တို့က ဒီ အစည်းအဝေး လုပ်မယ့်ရက်နဲ့ ဒီ World Press Freedom Day နဲ့က တိုက်ဆိုင်နေတဲ့ အခါမှာ ဒီပွဲလေးကို အထိမ်းအမှတ်လည်း ဖြစ်သွားအောင် စာနယ်ဇင်း လွှတ်လပ်ခွင့်နေ့ အထိမ်းအမှတ် အခမ်းအနားကို လုပ်ဖြစ်တာပါ။ ကျနော်တို့ အကုန်လုံး တက်တက်ကြွကြွ ရှိပါတယ်။ ကျနော်တို့ရော၊ လူကြီးတွေဖြစ်တဲ့ ဆရာ မောင်ဝံသတို့၊ ဆရာ ဦးသီဟစောတို့၊ ဆရာ ဦးအောင်လှထွန်းတို့လည်း အကုန် တက်တက်ကြွကြွ ပါဝင်ကြပါတယ်ဗျ။"
စာနယ်ဇင်းလွတ်လပ်ခွင့် နှစ် ၅၀ နီးပါးလောက် မှေးမှိန် ဆိတ်သုဉ်းခဲ့ပြီးတဲ့နောက် အခု ပြန်ပေါ်လာတာဟာ ထူးခြားတယ်လို့ မြင်သူကတော့ ၀ါရင့် သတင်းစာဆရာ တဦးဖြစ်သူ မောင်ဝံသပါ။ ဒီမိုကရေစီနိုင်ငံ တည်ဆောက်နေပြီး ဒီမိုကရေစီပန်းတိုင်ဆီ သွားနေပြီဆိုရင် စာနယ်ဇင်းလွတ်လပ်ခွင့်ဟာ မလွဲမသွေ ရှိရမှာဖြစ်ပြီး မြှင့်တင်ပေးရမယ်ဆိုတဲ့ ခံယူချက်ရှိဖို့ လိုတယ်လို့ သူက ဆိုပါတယ်။
"စာနယ်ဇင်း လွှတ်လပ်ခွင့် မရှိခြင်းသည် စာနယ်ဇင်း လွှတ်လပ်ခွင့်ကို ကန့်သတ် ချုပ်ချယ်၊ ထိန်းချုပ်ထားတဲ့ ဥပဒေတွေကြောင့် ဖြစ်တာ။ အဲဒီလို စည်းမျဉ်း စည်းကမ်းတွေကြောင့် ဖြစ်တာ။ အဲဒါကြောင့် စာနယ်ဇင်း လွှတ်လပ်ခွင့်ကို ကန့်သတ် ချုပ်ချယ်၊ ထိန်းချုပ်ထားတဲ့ စည်းမျဉ်း စည်းကမ်းတွေ၊ ဥပဒေတွေကို တဖြည်းဖြည်းနဲ့ ဖြေလျော့ပေးမယ်၊ ပယ်ဖျက်ပေးမယ်၊ ရုပ်သိမ်းပေးမယ်ဆိုရင် ကျနော်တို့က စာနယ်ဇင်း လွှတ်လပ်ခွင့်ကို ကျင့်သုံးခွင့်ရမယ်လို့ အဲဒီလို ယုံကြည်ပါတယ်။"
မန္တလေးမှာလည်း လူငယ်စာနယ်ဇင်းသမား နှစ်ဦးက ဦးစီးပြီးတော့ စာနယ်ဇင်း လွတ်လပ်ခွင့်နေ့ အခမ်းအနား တခုကို မနက် ၉ နာရီက ဆင်ဖြူတော် စားသောက်ဆိုင်မှာ ကျင်းပခဲ့ပြီး မန္တလေးနဲ့ အနီးအနား ဒေသတွေက စာနယ်ဇင်းသမားတွေ၊ ကဗျာဆရာ၊ စာရေးဆရာတွေ တက်ရောက်ခဲ့ကြပါတယ်။ ဒါဟာလည်းပဲ မန္တလေးမှာ ပထမဆုံးကျင်းပတဲ့ ကမ္ဘာ့စာနယ်ဇင်း လွတ်လပ်ခွင့်နေ့ အခမ်းအနား ဖြစ်တာကြောင့် ၀မ်းသာပြီး နှစ်တိုင်း ကျင်းပနိုင်ဖို့ ကောင်းပါတယ်လို့ အခမ်းအနား တက်ရောက်ခဲ့တဲ့ စာရေးဆရာ ညီပုလေးက ပြောပါတယ်။
အခုဆိုရင် ပြောခွင့် ဆိုခွင့် ရေးသားခွင့်လေးတွေ ပိုရလာနေပြီ ဖြစ်ပေမဲ့ အဲဒီအခြေအနေက ဆက်တိုက် ဖြစ်မှာလားဆိုတာကိုတော့ စောင့်ကြည့်ရမယ်လို့ သူကဆိုပါတယ်။ လက်ရှိ မြန်မာနိုင်ငံရဲ့ စာနယ်ဇင်း လွတ်လပ်ခွင့် အနေအထား နဲ့ပတ်သက်လို့တော့ စာရေးဆရာညီပုလေးရဲ့ အမြင်က -
"ကျနော်ကတော့ အားမရသေးဘူးဗျ။ စာပေ စိစစ်ရေးဆိုတာ ရှိနေသေးတယ်ဗျ။ နောက် စာနယ်ဇင်း လွှတ်လပ်ခွင့်ရယ်၊ ရေးသားနေကြတဲ့ စာနယ်ဇင်းသမားတွေရဲ့ ဘ၀ အာမခံချက်ပေါ့နော်၊ အဲဒါမျိုးတွေလည်း ဥပဒေတွေ ဘာတွေနဲ့ ကာကွယ်မယ့် အဖွဲ့အစည်းတွေ ဘာတွေ ရှိဖို့၊ ပေါ်ပေါက်ဖို့ လိုသေးတယ်ဗျ။"
မန္တလေးမြို့က စာရေးဆရာ ညီပုလေးပါ။
သတင်းစာဆရာ၊ စာရေးဆရာ မောင်ဝံသကတော့ စာနယ်ဇင်း လွတ်လပ်ခွင့် အခြေအနေက အားရစရာ ဆိုတာထက် တိုးတက်မှု ရှိတယ်လို့တော့ ဆိုနိုင်ကြောင်း ၀ါရင့် သတင်းစာဆရာကြီး တဦးဖြစ်တဲ့ ဟံသာဝတီ ဦးဝင်းတင်ရဲ့ ပြောဆိုချက်ကို ကိုးကားပြီးတော့ ပြန်ပြောပြခဲ့ပါတယ်။
"ဥပမာအနေနဲ့ ကျနော် ပြောမယ်ဆိုရင်ဗျာ၊ ဒီနေ့ထုတ်တဲ့ မြန်မာ တိုင်းမ်စ် (Myanmar Times) ဂျာနယ်မှာ၊ ဆရာကြီး ဟံသာဝတီ ဦးဝင်းတင်ရဲ့ အင်တာဗြူး ပါတယ်။ ဦးဝင်းတင်ကို အဲဒီလို မေးခွန်း၊ ခုနက ဆရာတို့မေးတဲ့ မေးခွန်းမျိုးကိုပဲ မြန်မာတိုင်းမ်စ်က မေးတဲ့အခါကျတော့ ဆရာဦးဝင်းတင်က - တိုးတက်မှု ရှိတယ်လို့ ကျနော် ပြောနိုင်တယ်။ ဘာဖြစ်လို့လည်းဆိုရင်၊ အရင်တုန်းကဆိုရင် ဦးဝင်းတင်ဆိုတဲ့ နံမည်လည်း မသုံးရဘူး၊ ဦးဝင်တင်ရဲ့ ကလောင်နံမည်လည်း မသုံးရဘူး၊ ဦးဝင်းတင် ရေးတဲ့စာတော့ ဝေလာဝေးပေါ့။ အဲ အခုဆိုရင် ဦးဝင်းတင် အင်တာဗြူးတွေ ထည့်လို့ရတယ်၊ ဦးဝင်းတင်ရေးတဲ့ ဆောင်းပါးတွေ ထည့်လို့ရတယ်၊ ဦးဝင်းတင် စာအုပ်တွေ ထုတ်လို့ရတယ်။ ဒါကြောင့်မို့ ဒါကတော့ ဘာဘဲပြောပြော တိုးတက်တယ်လို့ ပြောနိုင်ပါတယ်လို့၊ အဲဒီလို သူပြောပါတယ်။"
သတင်းစာဆရာ၊ စာရေးဆရာ မောင်ဝံသပါ။
မြန်မာအစိုးရ ပြန်ကြားရေးဝန်ကြီးဌာနက အခုအခါမှာ စာနယ်ဇင်းဆိုင်ရာ ဥပဒေ မူကြမ်း တရပ်ကို ရေးဆွဲ ပြုစုနေပြီး မြန်မာ့ မီဒီယာ လောက ဖွံ့ဖြိုး တိုးတက်စေဖို့ ဆိုပြီးတော့ ဆွေးနွေး ပွဲတွေလည်း လုပ်ခဲ့ပါတယ်။ အဲဒီဥပဒေဟာ စာနယ်ဇင်း လွတ်လပ်ခွင့်ကို ထိန်းချုပ်ဖို့ မဟုတ်ပါဘူးဆိုပြီး ပြန်ကြားရေးဝန်ကြီး ကိုယ်တိုင်ကလည်း ပြောထားဖူးပါတယ်။ စာပေ စိစစ်ရေး အဖွဲ့ဆိုတာ တချိန်မှာ ရှိတော့မှာမဟုတ်ဘူး ဆိုပြီးတော့လည်း အဖွဲ့ရဲ့ ထိပ်တန်းတာဝန်ရှိသူ တဦးကိုယ်တိုင်က ပြောခဲ့ဖူးပါတယ်။
ဒါပေမဲ့လည်း လက်ရှိအချိန်ထိတော့ ၁၉၆၂ ခုနှစ် ပုံနှိပ်ထုတ်ဝေရေး အက်ဥပဒေက အသက်ဝင်နေဆဲ ဖြစ်ပြီး အဲဒီဥပဒေနဲ့ မညီလို့ ဆိုပြီးတော့ စာပေစိစစ်ရေးအဖွဲ့က ခေါ်ယူ သတိပေးတာတွေကိုလည်း မကြာခနဆိုသလို ကြားနေရဆဲပါ။
အဲဒါကြောင့်လည်း သတင်းလွတ်လပ်ခွင့်ဆိုင်ရာ စောင့်ကြည့်တဲ့ အမေရိကန်အခြေစိုက် စာနယ်ဇင်းသမားများ ကာကွယ်စောင့် ရှောက်ရေးကော်မတီ CPJ က ကမ္ဘာပေါ်မှာ ဆင်ဆာတည်းဖြတ်မှု အများဆုံး (၁၀) နိုင်ငံစာရင်းထဲ အဆင့် (၇) မှာ မြန်မာနိုင်ငံကို ထည့်သွင်း သတ်မှတ်ထားဆဲရှိပါတယ်။
Ref: VOA News
Thursday, May 3, 2012
NLD လွှတ်တော်အမတ်တွေ မူလရပ်တည်ချက် ဆက်လက်ဆုပ်ကိုင် သွားမည်။
ကိုကျော်ကျော်သိန်း
ဗုဒ္ဓဟူး, 02 မေ 2012
အခြေခံဥပဒေကို ထိန်းသိမ်းကာကွယ်စောင့်ရှောက်ပါမည်ဆိုတဲ့ စာသားအတိုင်း ကျမ်းသစ္စာကျိန်ဆို ခဲ့ကြပေမဲ့ လည်း အမျိုးသား ဒီမိုကရေစီ အဖွဲ့ချုပ် NLD ပါတီရဲ့ မူလ ရပ်တည်ချက်တွေ အတိုင်း ဆက်လက် လုပ်ဆောင် သွားကြမယ်လို့ NLD လွှတ်တော် ကိုယ်စားလှယ်တွေက ပြောပါတယ်။ ဒီကနေ့ ကျမ်းသစ္စာ ကျိန်ဆိုခဲ့ကြပြီး တဲ့နောက် NLD ပါတီက လွှတ်တော် ကိုယ်စားလှယ်နှစ်ဦးကို ဗွီအိုအေက ဆက်သွယ်မေးမြန်းတာမှာ အဲဒီလိုပြောခဲ့ကြတာပါ။ ရှေ့မှာ လုပ်ဆောင်စရာတွေ အများကြီး ရှိနေတယ် ဆိုတာကိုလည်း အသိအမှတ်ပြု ပြောဆိုကြပါတယ်။ အပြည့်အစုံကို ဘန်ကောက်ကနေ ဆက်သွယ်မေးမြန်းထားတဲ့ ကိုကျော်ကျော်သိန်းက တင်ပြပေးထားပါတယ်။
NLD လွှတ်တော်ကိုယ်စားလှယ်တွေဟာ ကျမ်းသစ္စာကျိန်ဆိုတဲ့စာသားကို မပြောင်းလဲဘဲ ကျမ်းသစ္စာ ကျိန်ဆိုခဲ့ ကြပေမဲ့ မူလ ရည်တည်ချက်ဖြစ်တဲ့ လေးစား လိုက်နာပါမည် ဆိုတဲ့ သဘောထားကတော့ မပြောင်းလဲဘဲ ဆက်ပြီး ကိုင်စွဲ သွားကြမယ်လို့ ဗွီအိုအေကို ပြောခဲ့ကြတာပါ။
မဲဆန္ဒရှင်လူထုနဲ့ လူမျိုးစုတိုင်းရင်းသားပါတီတွေရဲ့ ဆန္ဒသဘောထားတွေကို အသိအမှတ်ပြု လေးစားတဲ့ အနေနဲ့ ကျမ်းသစ္စာ ကျိန်ဆိုတာမှာ ပါဝင်တဲ့ စာသားကို ပြင်ဆင်ဖို့ ကြိုးစားနေတာ အဆုံးသတ်ပြီး လိုက်လျော ခဲ့တာဖြစ်ပေမဲ့ မူလ ရပ်တည်ချက် အတိုင်း ဆက်လုပ်သွားပါမယ်လို့ မန္တလေးတိုင်း၊ မဟာအောင်မြေမြို့နယ် က ပြည်သူ့ လွှတ်တော် ကိုယ်စားလှယ် ဦးအုန်းကြိုင်က ဗွီအိုအေကိုပြောပါတယ်။
“အဖွဲ့ချုပ်ရဲ့ ရပ်တည်ချက် ဖြစ်တဲ့ လေးစားလိုက်နာပါ့မယ်ဆိုတဲ့ စကားရပ်နဲ့ အဲဒီသဘောထား ကိုတော့ ပြင်မှာမဟုတ်ပါဘူး။ လုပ်စရာ ရှိတာတွေကို ဆက်ပြီးတော့ ဆောင်ရွက်သွားမယ့် သဘော ရှိပါတယ်။”
နိုင်ငံရေးမှာ ငြင်သာပျော့ပျောင်းရမယ်ဆိုတာကို NLD က အမြဲလက်ခံထားကြောင်း ဒေါ်အောင်ဆန်းစု ကြည်ကိုယ်တိုင်ကလည်း ပြောထားဖူးပါတယ်။ လွှတ်တော်တက်တော့မယ့် အချိန်ကျမှ ပြုနိုင်ပြင်နိုင်တဲ့ ထုံးကို လက်ကိုင် ထားလိုက်တာ မဟုတ်ဘဲ လွန်ခဲ့တဲ့ ၂၃ နှစ်ကျော်ကာလ တလျှောက်လုံး အဲဒီနည်းကို ပဲ နိုင်ငံရေး နည်းနာတခုအဖြစ်နဲ့ သုံးလာခဲ့တာဖြစ်တယ်လို့လည်း ရှင်းထားပါတယ်။
အဲဒီသဘောထားကို ထင်ဟပ်ပြီး ပြောဆိုသူက ရန်ကုန်တိုင်း၊ မင်္ဂလာတောင်ညွန့်မြို့နယ်က ပြည်သူ့ လွှတ်တော် ကိုယ်စားလှယ် ဒေါ်ဖြူဖြူသင်းဖြစ်ပါတယ်။
“ကျမ်းကျိန်တာနဲ့ ပတ်သက်လို့ကတော့ တကဏ္ဍစီ ထားလိုက်တယ်ဆိုတဲ့ ပုံစံမျိုးပေါ့နော်။ ကိုယ်လုပ်မယ့် ကိစ္စတွေနဲ့ ပါတီက ဆုံးဖြတ်ထားတဲ့ ကိစ္စတွေကတော့ ဆက်ပြီးတော့ လုပ်ဆောင်သွားဖို့ ရှိပါတယ်။ အဲဒီ အတွက်ကြောင့်မို့လို့ ဒါကိုတော့ ကျမတို့က တကဏ္ဍစီ ထားပြီးတော့ ကိုယ်လုပ်သင့်လုပ်ထိုက်တာ ကိုယ့်ရဲ့ ရပ်တည်ချက် ဒီကနေ ပြောင်းလဲရမယ့် ဥပဒေ နည်းဥပဒေတွေနဲ့ ပတ်သက်တာ တဏ္ဍပေါ့နော်။ အဲဒါနဲ့ ပတ်သက်လို့ကတော့ ပါတီရဲ့ ရပ်တည်ချက် အတိုင်း ဆက်ပြီးလုပ်ဆောင်သွားမယ်။”
စစ်တပ်ကကိုယ်စားလှယ်တွေနဲ့ ပြည်ခိုင်ဖြိုးပါတီကကိုယ်စားလှယ်တွေ လွှမ်းမိုးထားတဲ့ လွှတ်တော်တွေထဲ မှာ ဒေါ်အောင်ဆန်းစုကြည်ဦးဆောင်တဲ့ လွှတ်တော် ကိုယ်စားလှယ်တွေ ရည်ရွယ်တဲ့ အတိုင်း လုပ်ဆောင်နိုင်ပါ့ မလားဆိုပြီး မေးခွန်း ထုတ်တာတွေ ရှိနေပါတယ်။ တဘက်မှာလည်း ဒေါ်အောင် ဆန်းစုကြည်ရဲ့ သြဇာ အရှိန် အ၀ါ၊ သူ့အပေါ် ပြည်တွင်းပြည်ပက ထောက်ခံမှုတွေကို လျှော့မတွက်သင့် ဘူးဆိုတဲ့ အမြင်ကလည်း ရှိပါတယ်။ NLD လွှတ်တော် ကိုယ်စားလှယ်တွေအနေနဲ့ လွှတ်တော်တွေထဲမှာ လူနည်းစုဖြစ်နေပေမဲ့လည်း သူတို့ရဲ့ လုပ်ဆောင်နိုင်စွမ်း အပေါ်မှာတော့ ယုံကြည်ချက်အပြည့် ရှိနေကြပုံရ ပါတယ်။
“ကျနော်တို့က နိုင်ငံရေးဆိုတာ တခါ တခါကျတော့ လိုက်လျောတာကလည်း ဒါ နိုင်ငံရေး တခုပါပဲ။ လိုက်လျောပြီးတော့ ညှိနှိုင်းတယ်။ ပြေလည်အောင် အခက်အခဲတခုကို ကျော်လွှားအောင် လုပ်နိုင်တယ် ဆိုတာကလည်း ဒါလည်းနိုင်ငံရေး တခု ဖြစ်ပါတယ်။ ဒါကလည်း ကိုယ်ဆုံးဖြတ်ပြီးရင် ဆုံးဖြတ်ချက် အတိုင်းပေါ့လေ ကျနော်တို့က ဆောင်ရွက်နိုင်သလား ဆိုတဲ့ အပေါ်မှာပဲ နိုင်ငံရေးဆိုတာ တည်မယ်လို့ ကျနော် ထင်ပါတယ်။ ”
“ကျမ်းသစ္စာ ကျိန်ဆိုလိုက်တယ်ဆိုတာကတော့ ပြည်သူ့ရဲ့ တာဝန်တွေကို ပိုပြီးတော့ ထမ်းဆောင်ရတော့ မယ်။ ဒီထဲမှာလည်း ပါပါတယ်။ သူတို့ ပထမ ကျမတို့ သဘော မတူတဲ့ဟာက တပိုင်းပေါ့နော်။ ဒီထဲမှာ လည်း ပြည်သူ လူထုရဲ့ တာဝန်ကို ထမ်းဆောင်မယ် ဆိုတဲ့ဟာက ပါတဲ့အခါကျတော့ ကျမတို့ ကျိန်ဆိုတဲ့ အချိန်မှာပဲ ပိုပြီးတော့ကို တာဝန်ပိုရှိသွားတယ်။ နောက်ပြီးတော့ ကျမတို့ အများကြီး လုပ်ရအုံးမယ်။ အလုပ်တွေ အများကြီး ဆက်လုပ်ရအုံးမယ် ဆိုတဲ့ ဟာမျိုးပေါ့ ရင်ထဲမှာတော့ ခံစားလိုက်ရတာပေါ့လေ။”
NLD ပါတီက ပြည်သူ့လွှတ်တော်ကိုယ်စားလှယ်တွေဖြစ်ကြတဲ့ ဦးအုန်းကြိုင်နဲ့ ဒေါ်ဖြူဖြူသင်းတို့ ပြောသွား တာပါ။
NLD လွှတ်တော်ကိုယ်စားလှယ်တွေဘက်က အားကြိုးမာန်တက် ရှိနေကြသလို မဲဆန္ဒရှင်လူထုက လည်း ဒေါ်အောင်ဆန်းစုကြည် ဦးဆောင်တဲ့ NLD ကိုယ်စားလှယ်တွေပေါ်မှာ မျှော်လင့်ချက်တွေ ကြီးကြီးမားမားကို ရှိနေကြတာပါ။ ဒါပေမဲ့လည်း နုနယ်လှသေး တဲ့ ဒီမိုကရေစီခရီးဟာ အခုမှအစပဲ ရှိသေးပြီး ရှေ့ဆက်ရမယ့် ခရီးတလျှောက် အနိမ့်အမြင့်အတက်အကျအမျိုးမျိုး၊ စိန်ခေါ်မှု အမျိုးမျိုးနဲ့ ရင်ဆိုင်ရမှာက အသေအချာပါပဲ။ ဒီအချက်ကိုပဲ ကုလသမဂ္ဂအတွင်းရေးမှူးချုပ်အပါအ၀င် မြန်မာနိုင်ငံဆီ လာသွားခဲ့ကြတဲ့ နိုင်ငံတကာအဖွဲ့အစည်းတွေက ခေါင်းဆောင်တွေ၊ နိုင်ငံတကာအစိုးရတွေရဲ့ ထိပ်တန်းခေါင်းဆောင်တွေ အားလုံးလိုလိုက အထူး အလေးထား ပြောဆိုခဲ့ကြတာပါခင်ဗျား။
Ref: VOA News
ဒေသဖွံ့ဖြိုးရေးအတွက် တိုင်းရင်းသားပါတီများနှင့် NLD ဆွေးနွေးလို
မျိုးသန့်
ဗုဒ္ဓဟူးနေ့၊ မေလ ၀၂ ရက် ၂၀၁၂
ချင်းမိုင် (မဇ္ဈိမ) ။ ။ တိုင်းရင်းသားဒေသများ ဖွံ့ဖြိုးရေးအတွက် အမျိုးသား ဒီမိုကရေစီအဖွဲ့ချုပ် NLD အနေနှင့် တိုင်းရင်းသား ပါတီများ ဆွေးနွေး လုပ်ဆောင်သွားရန် NLD ဥက္ကဋ္ဌ ဒေါ်အောင်ဆန်းစုကြည်က ဗုဒ္ဓဟူးနေ့တွင် ပြောဆို ခဲ့သည်ဟု ရခိုင်တိုင်းရင်းသားများ တိုးတက်ရေး ပါတီမှ ဒေါက်တာအေးမောင်က မဇ္ဈိမကို ပြောသည်။
“တိုင်းရင်းသား ဒေသတွေမှာ ဖွံ့ဖြိုးရေးတွေ လုပ်ဖို့ ညှိနှိုင်း တိုင်ပင်ချင်ပါတယ်။ ဟိုဒေသ ဒီဒေသ အကုန်လုံးပေါ့။ အဲဒါကို အမျိုးသား ဒီမိုကရေစီ အဖွဲ့ချုပ်က ဆွေးနွေး တိုင်ပင် သွားလိုပါတယ်။ ပူးပေါင်း ဆောင်ရွက်ပြီးမှ ဖွံ့ဖြိုးမှု အဆင့်တခုခုကို ရောက်အောင်သွားနိုင်ဖို့ တိုင်ပင်ချင်တယ်။ ဆွေးနွေးချင်တယ်လို့ ပြောပါတယ်” ဟု ဒေါက်တာ အေးမောင်က မဇ္ဈိမကို ပြောသည်။
NLD အမတ်များ လွှတ်တော်အတွင်း ဝင်ရောက်ရေးအတွက် မေတ္တာရပ်ခံ ပန်ကြားခဲ့ကြသည့် တိုင်းရင်းသားပါတီများမှ လွှတ်တော် အမတ်များကို NLD မှ နံနက်စာဖြင့် ဧည့်ခံစဉ် NLD ဥက္ကဋ္ဌက ပြောကြားသွားခြင်းဖြစ်သည်ဟု ဒေါက်တာ အေးမောင်က ပြောသည်။
ဧည့်ခံပွဲသို့ ရခိုင်တိုင်းရင်းသားများ တိုးတက်ရေးပါတီ၊ ရှမ်းတိုင်းရင်းသားများ ဒီမိုကရက်တစ်ပါတီ၊ ပအိုဝ့် အမျိုးသား အဖွဲ့ချုပ်၊ တအာင်း အမျိုးသား ပါတီ၊ ချင်း တိုးတက်ရေး ပါတီ၊ ကရင် ပြည်သူ့ပါတီ၊ ဖလုံစဝေါ်ပါတီ၊ ကရင်ပြည်နယ် ဒီမိုကရေစီနှင့် ဖွံ့ဖြိုး တိုးတက်ရေးပါတီ၊ အမျိုးသား ဒီမိုကရေစီ အင်အားစုပါတီ တို့မှ ပြည်သူ့လွှတ်တော်နှင့် အမျိုးသားလွှတ်တော် အမတ် ၇ဝ ဦးခန့် တက်ရောက်ခဲ့ကြသည်။
“NLD နဲ့ တိုင်းရင်းသားပါတီတွေ ရှေ့ဆက်ပြီးတော့ လက်တွဲသွားကြပါမယ်။ ရှေ့ဆက်ပြီး ပူးပေါင်းသွားဖို့ တိုင်းရင်းသား ပါတီတွေက အဆင်သင့် ဖြစ်နေကြလောက်ပါပြီ။ ကျနော်တို့ လက်တွဲ ခိုင်ခိုင်တွဲနိုင်မယ်ဆိုရင် ကျနော်တို့ မဟာမိတ် ပြုမှုဟာ သမိုင်းမှာ တွင်ကျန်ရစ်ခဲ့မှာပါ” ဟုလည်း ဒေါက်တာအေးမောင် က ပြောသည်။
NLD သည် “တိုင်းရင်းသား ညီအစ်ကိုများ၏ မေတတ္တာရပ်ခံချက်ကို လေးစားတန်ဖိုးထား တုန့်ပြန်လိုသောကြောင့် လွှတ်တော်သို့ တက်ရောက်ရန် ဆုံးဖြတ်ခြင်း ဖြစ်ပါသည်” ဟု ဧပြီလ ၃ဝ ရက်နေ့တွင် ကြေညာချက် ထုတ်ပြန်ခဲ့သည်။
“ကျနော်တို့လည်း ကြိုဆိုပါတယ်၊ နွေးနွေးထွေးထွေး ကြိုဆိုပါတယ်။ ကျနော်တို့ ကိုယ်၌ကိုက အင်အားတခု ရလာ သလိုပဲ။ ကျနော်တို့ ခန္ဓာကိုယ်မှာ အနွေးထည်ကြီး တခုကို စွတ်လိုက် ရသလိုပဲ ကျနော်တို့ နွေးထွေး သွားပါတယ်။ အင်မတန်မှလည်း အားရှိပါတယ်” ဟုလည်း ဒေါက်တာ အေးမောင်က မဇ္ဈိမကိုပြောသည်။
မေတ္တာရပ်ခံရာတွင် ပါဝင်ခဲ့သူတဦးဖြစ်သည့် အမျိုးသားဒီမိုကရေစီ အင်အားစုပါတီ၏ လွှတ်တော်အမတ် ဦးခိုင်မောင်ရည်က “ကျနော်တို့က ဘာပဲပြောပြော NLD ကို မျှော်နေတာ။ ပထမအဆင့် လုပ်ငန်း တခုကတော့
အောင်မြင်သွားပြီပေါ့” ဟု မဇ္ဈိမကို ပြောသည်။
ဇူလိုင်လအတွင်း ပြန်လည်ကျင်းပရန်ရှိသည့် လွှတ်တော်အစည်းအဝေးတွင် NLD အမတ်များကို ကြိုဆိုပွဲလုပ်ရန် ဦးခိုင်မောင်ရည်တို့က စီစဉ်ထားမှုကို ဒေါ်အောင်ဆန်းစုကြည်ကို အသိပေးရာ ထိုဧည့်ခံပွဲသို့ တပ်မတော်သား အမတ်များကိုလည်း ဖိတ်ကြားစေလိုကြောင်း ပြောသည်ဟုဆိုသည်။
“ဒေါ်အောင်ဆန်းစုကြည်က ရယ်စရာအဖြစ် ပြောလိုက်ပေမယ့် အဲဒီစကားလေးက တော်တော်လေး ကောင်းတဲ့ စကားလေးတခုပါ။ သူက အဲဒီလိုဆိုရင် တပ်မတော်သား ကိုယ်စားလှယ်တွေလည်း ရအောင် ဖိတ်ပေးလေတဲ့။ သူ တပ်မတော်သား ကိုယ်စားလှယ်တွေကို တကယ်ပဲ လှိုက်လှိုက်လှဲလှဲ ခင်ခင်မင်မင်နဲ့ ရင်းရင်းနှီးနှီး ဆက်ဆံလိုတဲ့ ဆန္ဒရှိတယ်ဆိုတာ ငြင်းစရာ မရှိပါဘူး” ဟု ဦးခိုင်မောင်ရည်က ပြောသည်။
ဗုဒ္ဓဟူးနေ့တွင် ပြည်သူ့လွှတ်တော်သို့ တက်ရောက်လာသည့် ဒေါ်အောင်ဆန်းစုကြည်အား ကြံ့ခိုင်ရေးပါတီ အထွေထွေ အတွင်းရေးမှူး ဦးဋ္ဌေးဦးက တွေ့ဆုံနှုတ်ဆက် ခဲ့သေးသည်။
“ရွေးကောက်ပွဲလမ်းကြောင်းအရကော လွှတ်တော်လမ်းကြောင်းအရကော ပါဝင်လာတဲ့သူတွေ အားလုံးကို ကျနော် ကြိုဆိုမှာပဲ။ ဒေါ်အောင်ဆန်းစုကြည်လည်း ကျနော် ကြိုဆိုတယ်။ တခြားလူတွေလည်း ကျနော် ကြိုဆိုတယ်။ ဒီနေ့ လည်း သူတို့ ဝင်ရောက်လာတာ ဖြစ်တဲ့အတွက် ကျနော်ကိုယ်တိုင်ပဲ ဒေါ်အောင်ဆန်းစုကြည်ကို သွားပြီး နှုတ်ဆက်ပါတယ်။ ဒီကို ရောက်လာတဲ့ အတွက် ကြိုဆိုပါတယ်” ဟု ဦးဋ္ဌေးဦး က ပြောသည်။
Ref: မဇ္ဈိမ
ကြွေးဟောင်းကျေမှ မြန်မာကို ADB ငွေချေးမည်
ဒေါ်လှလှသန်း
ဗုဒ္ဓဟူး, 02 မေ 2012
မြန်မာနိုင်ငံမှာ ဆင်းရဲမွဲတေမှု ပပျောက်ရေးနဲ့ အခြေခံယန္တရား အဆောက်အအုံတွေ တည်ဆောက်ဖို့အတွက် လိုအပ်နေတဲ့ အကူအညီတွေကို ပေးဖို့ အစိုးရက နိုင်ငံတကာကို မေတ္တာ ရပ်ခံနေချိန်မှာပဲ ဖိလစ်ပိုင် အခြေစိုက် ADB လို့ခေါ်တဲ့ အာရှ ဖွံ့ဖြိုးရေးဘဏ်က မြန်မာနိုင်ငံကို အကူအညီ ပေးဖို့အတွက် အဆင်သင့် ရှိပေမယ့်လို့ ဆပ်စရာ ရှိတဲ့ ကြွေးမြီ ဒေါ်လာသန်း ၄၉၀ ကို အရင်ပြန်ဆပ်မှ နောက်ထပ် ငွေချေးနိုင်မယ်လို့ ADB ဥက္ကဋ္ဌက မနေ့ကပဲ ပြောလိုက်ပါတယ်။ အကြောင်းစုံကိုတော့ ရိုက်တာစ်သတင်းရဲ့ ဖော်ပြချက်ကို အခြေခံပြီး ဒေါ်လှလှသန်းက တင်ပြပေးထားပါတယ်။
မြန်မာနိုင်ငံကို ADB ခေါ် အာရှ ဖွံ့ဖြိုးရေးဘဏ်က ငွေကြေး အထောက်အကူမပေးခဲ့တာ ၂၄ နှစ်ရှိသွားခဲ့ သလို နောက်ထပ်ပေးဖို့လည်း အခု အခြေအနေမှာ မဖြစ်နိုင်သေးဘူးလို့ ဆိုပါတယ်။ မြန်မာနိုင်ငံက ADB ကို ပေးဆပ်စရာ ရှိတဲ့ ကြွေးမြီကို ပြန်ဆပ်နိုင်မှ နောက်ထပ်ချေးငွေအသစ်ကို ထုတ်ပေးနိုင်မှာဖြစ်တယ်လို့ Haruhiko Kuroda က အခုလို ပြောခဲ့ပါတယ်။
"မြန်မာနိုင်ငံအနေနဲ့ ကြွေးမြီတွေ အတော်လေး တင်နေတာ ဖြစ်ပါတယ်။ မြန်မာ နိုင်ငံဘက်က ပေးဆပ် စရာကြွေးတွေကို ပထမဆုံး အရင်မရှင်းနိုင်မချင်းတော့ ADB ဘဏ်အနေနဲ့ ငွေရေးကြေးရေး အထောက် အကူတွေကို ပေးလို့ မရနိုင်ပါဘူး။"
အာရှဖွံ့ဖြိုးရေးဘဏ် အုပ်ချုပ်ရေးမှူးတွေရဲ့ဘုတ်အဖွဲ့ ၄၅ ကြိမ်မြောက် နှစ်ပတ်လည် ညီလာခံမှာ ADB ဥက္ကဋ္ဌက မနေ့က ပြောကြားခဲ့တာဖြစ်ပါတယ်။ အဲဒီလေးရက်ကြာ ညီလာခံအတွင်းမှာ အဖွဲ့ဝင် ၆၇ နိုင်ငံက ကိုယ်စားလှယ်တွေ တက်ရောက်ခဲ့တဲ့အပြင် ပေါ်လစီရေး ချမှတ်သူပေါင်း လေးထောင်ကျော်လည်း တက်ရောက်ခဲ့ပါတယ်။ မြန်မာအစိုးရအနေနဲ့ ADB ကို ပေးဆပ်စရာအကြွေးပေါင်း ဒေါ်လာသန်း ၄၉၀ ပေးစရာရှိတာဖြစ်ပါတယ်။ ADB ဥက္ကဋ္ဌ မစ္စတာ Kuroda က အာရှဖွံ့ဖြိုးရေးဘဏ်ကြီး အနေ နဲ့ နိုင်ငံပေါင်းစုံကို ငွေထုတ်ချေးနေတဲ့ အတွက်ကြောင့်လည်း မြန်မာနိုင်ငံရဲ့ ကြွေးမြီကို လျှော်ပစ်လို့ မဖြစ်နိုင်ဘူးလို့ ပြောခဲ့ပါတယ်။
အဖွဲ့ဝင် ၆၇ နိုင်ငံပါတဲ့ ADB ဘဏ်မှာ အာရှဒေသတွင်းက ၄၈ နိုင်ငံနဲ့ ကျန်ကမ္ဘာက ၁၉ နိုင်ငံတို့ ပါဝင်ကြပြီး အဖွဲ့ဝင်နိုင်ငံတွေရဲ့ ဖွံ့ဖြိုးတိုးတက်မှုနဲ့ အာရှ-ပစိဖိတ်ဒေသမှာ ဆင်းရဲမွဲတေမှု ပပျောက်ရေး အတွက် ပေါ်လစီရေးချမှတ်ရာမှာ၊ ရင်းနှီးမြှုပ်နှံရာမှာနဲ့ နည်းပညာနဲ့ ငွေကြေးအထောက်အကူတွေကို ဘဏ်ကြီးက ထုတ်ပေးတာ ဖြစ်ပါတယ်။ ၁၉၇၃ ခုနှစ်က အဖွဲ့ဝင် နိုင်ငံဖြစ်ခဲ့တဲ့ မြန်မာနိုင်ငံကို ADB က ၁၉၈၆ နဲ့ ၈၇ ခုကတည်းက နောက်ဆုံးထားပြီး နည်းပညာနဲ့ ငွေကြေးအထောက်အကူတွေကို ပေးခဲ့ တာဖြစ်ပါတယ်။
အခုလို ဖွံ့ဖြိုးမှု စီမံကိန်းတွေအတွက် မြန်မာနိုင်ငံအပေါ် ငွေထပ်မချေးနိုင်ပေမယ့်လို့လည်း ပေါ်လစီပိုင်း ဆိုင်ရာ ဆွေးနွေးမှုနဲ့ နည်းပညာပိုင်းဆိုင်ရာ အထောက်အကူတွေ ပေးဖို့အတွက် မြန်မာနိုင်ငံနဲ့ ထိတွေ့ ဆက်ဆံသွားမှာ ဖြစ်တယ်လို့ ADB ဥက္ကဋ္ဌက ပြောခဲ့ပါတယ်။
"တဘက်မှာတော့ နည်းပညာအထောက်အကူ အပြင် ပေါ်လစီပိုင်းဆိုင်ရာ အကြံပေးမှု၊ လူ့စွမ်းအား အရင်းအမြစ်တွေနဲ့ အခြေခံ အဆောက်အအုံတည်ဆောက်မှုမှာ အထောက်အကူ ပေးနိုင်ပါတယ်။ ဒါပေမယ့် ပထမဆုံးကတော့ ADB ဘဏ်အနေနဲ့ မြန်မာနိုင်ငံနဲ့ အထူးသဖြင့် ပေါ်လစီပိုင်းမှာ အခြေအတင် ဆွေးနွေး သွားရမှာ ဖြစ်ပါတယ်။"
မြန်မာနိုင်ငံမှာ အပြုသဘောဆောင်တဲ့ နိုင်ငံရေးပြုပြင်ပြောင်းလဲမှုတွေကြောင့် အမေရိကနဲ့ ဥရောပ အပါ အဝင် အနောက်နိုင်ငံတွေက ဒဏ်ခတ်ပိတ်ဆို့မှုတွေကို ဆိုင်းငံ့ပေးခဲ့ပြီးဂျပန်ကလည်း မြန်မာနိုင်ငံက ပေး ဆပ်စရာရှိတဲ့ ကြွေးမြီ ဒေါ်လာ ၃.၇ ဘီလီယံကို ဧပြီလက လျှော်ပစ်ပေးခဲ့ချိန်မှာ အခုလို ADB ရဲ့ ကောက်ချက်ချ ပြောကြားမှု ထွက်ပေါ်လာခဲ့တာလည်း ဖြစ်ပါတယ်။ နိုင်ငံတကာဘဏ်ကြီးဖြစ်တဲ့ ကမ္ဘာ့ဘဏ်ကတော့ မြန်မာနိုင်ငံမှာ ဇွန်လကျရင် ရုံးခန်းခွဲဖွင့်ပြီး မြန်မာနိုင်ငံသားတွေ ဆင်းရဲမွဲတေမှု ပပျောက်ရေးအတွက် အထောက်အကူဖြစ်စေမယ့် စီးပွားရေး စာရင်းဇယားတွေ ကောက်ခံဖို့နဲ့ မြန်မာနိုင်ငံ က ပေးဆပ်စရာရှိတဲ့ နိုင်ငံတကာကြွေးမြီတွေကို ကိုင်တွယ်ဖြေရှင်းရေးမှာ အဓိကအကူအညီပေးဖို့ ဖြစ်တယ် လို့ ပြောခဲ့ပါတယ်။
Ref: VOA News
ဆုငွေထုတ်မှု နယ်စပ်တည်ငြိမ်ရေး ထိခိုက်နိုင်ဟု ဗိုလ်နှုတ်ခမ်းမွေး ပြော
သန်းထိုက်ဦး
May 2, 2012
မူးယစ်ဆေးဝါးနှင့် ပတ်သက်၍ ဆုငွေ ထုတ်ထားသည့် ကိစ္စအား ထိုင်းအာဏာပိုင်များ ဖြေရှင်းခြင်း မပြုလုပ်ပါက နှစ်နိုင်ငံနယ်စပ် တည်ငြိမ် အေးချမ်းမှုကို ထိခိုက် လိမ့်မည်ဟု တိုးတက်သော ဗုဒ္ဓဘာသာ ကရင် အမျိုးသား တပ်မတော် (DKBA) တပ်ဖွဲ့မှ ဗိုလ်နှုတ်ခမ်းမွေး (ခေါ်) ဗိုလ်မှူးချုပ် စောလားပွယ်က ပြောဆို လိုက်သည်။
ဧပြီလ ၂၀ ရက်နေ့က ထိုင်းနိုင်ငံရှိ မူးယစ်ဆေး ထိန်းချုပ်ရေး ဘုတ်အဖွဲ့ရုံး (ONCB) က ဗိုလ်မှူးချုပ် စောလားပွယ်ကို မူးယစ်ဆေးဝါးနှင့် ပတ်သက်၍ ဖမ်းဆီးရန် ဆုငွေ ထိုင်းဘတ် ၁ သန်း (ဒေါ်လာ ၃,၂၀၀၀ ခန့်) ထုတ်ပြန်ခဲ့သည်။
အဆိုပါ စွပ်စွဲခံရမှုအကြောင်းကို ထိုင်း-မြန်မာနယ်စပ် ကရင်ပြည်နယ် မြ၀တီခရိုင်အတွင်းရှိ DKBA ဌာနချုပ်တွင် ယမန်နေ့က သတင်းစာရှင်းလင်းပွဲ ပြုလုပ်၍ ဗိုလ်မှူးချုပ် စောလားပွယ်က တုံ့ပြန်လိုက်ခြင်း ဖြစ်သည်။ ယင်း သတင်းစာ ရှင်းလင်းပွဲသို့ မြန်မာနှင့် ထိုင်း သတင်းထောက်တချို့ တက်ရောက်ခဲ့ကြောင်း သိရသည်။
“ဒီလို အခြေအမြစ် မရှိတဲ့ကိစ္စကို ထိုင်းဒုဝန်ကြီးချုပ်က တာဝန်ယူ ဖြေရှင်းတာ မလုပ်ဘူးဆိုရင် နှစ်နိုင်ငံနယ်စပ် တည်ငြိမ်အေးချမ်းမှုကို ထိခိုက်နိုင်တယ်” ဟု ဗိုလ်မှူးချုပ် စောလားပွယ်က ပြောသည်။
ထိုင်း ဒု ၀န်ကြီးချုပ် ချလုံ ယူဘမ်ပရုန်းသည် ONCB ၏ အကြီးအကဲဖြစ်သည်။
အခြေအနေ အမှန်ကို သိရှိနိုင်ရန် ထိုင်းအစိုးရဘက်မှ ကိုယ်စားလှယ်အဖွဲ့များ စေလွှတ်၍ လာရောက် စစ်ဆေးနိုင်ကြောင်း၊ စွပ်စွဲသည့်အတိုင်း ဟုတ်မှန်ပါက နိုင်ငံတကာ ခုံရုံးအထိ တက်မည်ဟု ဗိုလ်မှူးချုပ် စောလားပွယ်က ပြောသည်။
ထိုင်း ဒု ၀န်ကြီးချုပ် ချလုံ ယူဘမ်ပရုန်းက စောလားပွယ် အနေနှင့် ထိုင်းနိုင်ငံအတွင်း လာရောက် အဖမ်းခံခြင်းမှလွဲ၍ တခြား နည်းလမ်းမရှိဟု ပြောကြောင်း ထိုင်းသတင်းဌာနများ၏ ဖော်ပြထားချက်အရ သိရှိရသည်။
ဤအတောအတွင်း ထိုင်း-မြန်မာနယ်စပ် ဖုတ်ဖရဒေသတွင် ထိုင်း လုံခြုံရေတပ်များအား တင်ကျပ်စွာ ချထားပြီး စစ်ကားများနှင့် ကင်းလှည့်နေကြောင်း သိရသည်။
လတ်တလော DKBA ထိန်းချုပ် ဒေသအတွင်းရှိ နယ်စပ်ဂိတ်များကို ဖွင့်ပေးထားသော်လည်း မကြာမီ ရက်ပိုင်းအတွင်း ပိတ်ရန်စီစဉ်ထားကြောင်း DKBA တပ်ဖွဲ့မှ ဗိုလ်မှူး စန်းအောင်က ဧရာဝတီသို့ ပြောသည်။
“ဟိုဘက် ဒီဘက် ကုန်သည်တွေကို ပိတ်ထားတယ်။ ကုန်သည်တွေသွားတဲ့ လမ်းမကြီးကိုတော့ လာမယ့် တရက် နှစ်ရက် အဖြေပေါ်မယ်။ ပိတ်ဖို့ အစိုးရကို တရားဝင် ပြောခိုင်းထားပြီး အစိုးရ မပိတ်ခိုင်းရင် ကျနော်တို့ ကိုယ်တိုင် ပိတ်ခိုင်းမယ်” ဟု ၎င်းက ဆိုသည်။
မဲဆောက်-မြ၀တီ ချစ်ကြည်ရေး တံတားကိုလည်း ပိတ်ရန်အတွက် ခရိုင်မှတဆင့် ပြည်နယ်နှင့် တိုင်းဝန်ကြီးထံ စာတင်ထားကြောင်း ဗိုလ်မှူး စန်းအောင်က ဆက်ပြောသည်။
မူးယစ်းဆေးဝါးနှင့် ပတ်သက်၍ ဆုငွေထုတ်ထားသည့် ၂၅ ဦးထဲတွင် ထိုင်းနိုင်ငံသားများနှင့် မြန်မာနိုင်ငံမှ ၃ ဦး ပါဝင်ပြီး ဓာတ်ပုံများနှင့် အတူ ONCB ၏ အင်တာနက် ၀က်ဘ်ဆိုက်နှင့် Facebook တို့တွင် ကြေညာထားသည်။
မြန်မာနိုင်ငံမှ မူးယစ်ရာဇာ နော်ခမ်းကို ဘတ်ငွေ ၂ သန်း၊ ယင်ဆေးနှင့် ဗိုလ်နှုတ်ခမ်းမွေးတို့ကို ဘတ် ၁ သန်းစီ ဆုငွေ ထုတ်ပြန် ထားသည်။
နော်ခမ်းကို ဧပြီလ ၂၆ ရက်နေ့က လာအိုစစ်တပ်က ပစ်ခတ်ဖမ်းဆီးလိုက်ကြောင်း ထိုင်းသတင်းဌာနများက ကြေညာသော်လည်း ဆက်လက် အရေးယူရေးနှင့် ပတ်သက်၍ မည်သို့ဆောင်ရွက်မည်ကို အသေးစိတ် မသိရသေးပေ။ နော်ခမ်းကို တရုတ်၊ ထိုင်း၊ လာအိုနှင့် မြန်မာတို့က ဖမ်းဆီးရန် ဆုငွေထုတ်ထားခြင်း ဖြစ်သည်။
Ref: ဧရာဝတီ
Wednesday, May 2, 2012
NLD လွှတ်တော် တက်ရောက်ဖို့ ဆုံးဖြတ်ချက်ကို လေးစားကြောင်း ဘန်ကီမွန်း ပြောဆို
2012-05-01
NLD ကိုယ်စားလှယ်တွေ လွှတ်တော် တက်ရောက်ဖို့ ဆုံးဖြတ်ချက်ဟာ မြန်မာနိုင်ငံရဲ့ ဒီမိုကရေစီ ပြုပြင်ပြောင်းလဲရေး လုပ်ငန်းစဉ်မှာ ကြုံတွေ့နေရတဲ့ အခက်အခဲကို အပျော့ပြောင်းဆုံး နည်းလမ်းနဲ့ ဖြေရှင်းလိုက်တာ ဖြစ်တယ်လို့ ကုလသမဂ္ဂ အတွင်းရေးမှူးချုပ် မစ္စတာ ဘန်ကီမွန်းက ပြောကြားလိုက်ပါတယ်။
ဒီဆုံးဖြတ်ချက်ဟာ ခက်ခက်ခဲခဲ ချလိုက်ရတဲ့ ဆုံးဖြတ်ချက်ဆိုတာ နားလည် သဘောပေါက်ပါတယ် လို့လည်း ပြောဆိုပါတယ်။
NLD အမျိုးသားဒီမိုကရေစီ အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်နဲ့ တွေ့ဆုံအပြီး ပြုလုပ်တဲ့ သတင်းစာ ရှင်းလင်းပွဲမှာ မစ္စတာ ဘန်ကီမွန်းက - ဒေါ်အောင်ဆန်းစုကြည်ဟာ မြန်မာနိုင်ငံ အတွက် စစ်မှန်ခိုင်မာတဲ့ democracy ခေါင်းဆောင်တဦး ဖြစ်ကြောင်း၊ သူ့အနေနဲ့ ဒေါ်အောင်ဆန်းစုကြည်ရဲ့ ဆုံးဖြတ်ချက်ကို လေးစား တန်ဖိုးထားပါကြောင်း မစ္စတာ ဘန်ကီမွန်းက ပြောသွားပါတယ်။
ဒေါ်အောင်ဆန်းစုကြည်သာ လွှတ်တော်ထဲ ရောက်သွားမယ် ဆိုရင် အရေးပါပြီး အပြု သဘောဆောင်တဲ့ အခန်းကဏ္ဍ ကနေ ပါဝင်လာနိုင်မှာ ဖြစ်သလို မြန်မာနိုင်ငံ အတွက် အကောင်းဆုံး လုပ်ငန်းစဉ်တွေကို စတင်နိုင်မှာ ဖြစ်တယ်လို့လည်း မစ္စတာ ဘန်ကီမွန်းက ပြောဆိုပါတယ်။
Ref: RFA News
ဒေါ်အောင်ဆန်းစုကြည် ဆုံးဖြတ်ချက် အမေရိကန်ကြိုဆို
2012-05-01
လွှတ်တော်တက်ရောက်ဖို့ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည် ဆုံးဖြတ်လိုက်တဲ့ အပေါ် အမေရိကန် ပြည်ထောင်စုက ကြိုဆို လိုက်ပါတယ်။
မနေ့ က ကျင်းပတဲ့ အမေရိကန်နိုင်ငံခြားရေးဌာန ပုံမှန်သတင်းစာ ရှင်းလင်းပွဲမှာ ပြောခွင့်ရပုဂ္ဂိုလ် Mr. Mark Toner က -
NLD နဲ့ အစိုးရတို့ဟာ လက်ရှိ ဒီမိုကရေစီ ပြုပြင်ပြောင်းလဲရေး လုပ်ငန်းစဉ်တွေကို အတူတကွ ဆက်လက် ဆောင်ရွက်သွားကြလိမ့်မယ်လို့ မျှော်လင့်နိုင်တဲ့ လက္ခဏာတစ်ရပ် အဖြစ် မိမိတို့ ရှုမြင်နိုင်တယ်လို့ ယူဆပါတယ်၊ အသစ်ရွေးကောက် တင်မြှောက်ခံရတဲ့ လွှတ်တော် ကိုယ်စားလှယ်တွေကို လွှတ်တော်ထဲမှာ ရှိနေတာ တွေ့ချင်ပါတယ်၊ အစိုးရနဲ့အတူ လက်တွဲ တည်ဆောက်နေကြတာကို မြင်ချင်ပါတယ်၊ တိုးတက်မှုတွေ ဆက်လက် ပေါ်ပေါက်နေတာကို တွေ့မြင်ချင်ပါတယ် လို့ Mr. Mark Toner က ပြောဆိုခဲ့တာပါ။
မြန်မာနိုင်ငံဆိုင်ရာ အမေရိကန် သံအမတ်ခန့်အပ်မယ့် ကိစ္စ မသိရသေးကြောင်း၊ နိုင်ငံခြားရေး ၀န်ကြီး ဟီလာရီ ကလင်တန်ရဲ့ တရုတ်၊ အိန္ဒိယ၊ ဘင်္ဂလားဒေ့ရှ် ခရီးစဉ်တွေမှာ မြန်မာနိုင်ငံနဲ့ ပတ်သက်ပြီး ဆွေးနွေးမယ် ဆိုတာ ခန့်မှန်းလို့ ရပါကြောင်းလည်း ပြောခွင့်ရပုဂ္ဂိုလ် Mr. Mark Toner က ဆိုပါတယ်။
အလားတူ ဒေါ်အောင်ဆန်းစုကြည်နဲ့ တွေ့ဆုံခဲ့တဲ့ ဥရောပသမဂ္ဂ မူဝါဒရေးရာ အကြီးအကဲ ကက်သရင်း အက်ရ်ှတန် ကလည်း အမျိုးသားဒီမိုကရေစီ အဖွဲ့ချုပ်ရဲ့ ဆုံးဖြတ်ချက်ကို ကြိုဆိုကြောင်း၊ အခုအခါ NLD ဟာ တိုင်းပြည်ရဲ့ ပြဿနာတွေကို ဖြေရှင်း ဆောင်ရွက်နိုင်တော့မှာ ဖြစ်ကြောင်း မနေ့က ကျင်းပတဲ့ ဘန်ကောက်မြို့ သတင်းစာ ရှင်းလင်းပွဲမှာ ပြောဆိုခဲ့ပါတယ်။
သူက မြန်မာနိုင်ငံမှာ တိုးတက်မှုတွေ တွေ့ခဲ့ရပါတယ်၊ ဒါပေမဲ့ ရှေ့ဆက် ဆောင်ရွက်ရမှာတွေ ကလည်း အများကြီး ရှိပါတယ်၊ မိမိတို့ အမြင်အရ ဒေါ်အောင်ဆန်းစုကြည်နဲ့ NLD လွှတ်တော် ကိုယ်စားလှယ်တွေ လွှတ်တော်ထဲ ရောက်လာတာဟာ အရေးကြီးတဲ့ ကိစ္စဖြစ်ပါတယ် လို့ ပြောကြားခဲ့ပါတယ်။
Ref: RFA News
နိုင်ငံရေးပြဿနာ မဖြစ်လို၍ ကျမ်းကျိန်စာသားကို NLD လိုက်လျော ကျိန်ဆိုမည်
ဖနိဒါ၊ ကိုပေါက်
တနင်္လာနေ့၊ ဧပြီလ ၃၀ ရက် ၂၀၁၂
ချင်းမိုင်၊ နယူးဒေလီ (မဇ္ဈိမ) ။ ။ လွှတ်တော်ကိုယ်စားလှယ်များ ကျမ်းသစ္စာကျိန်ဆိုချက် စာသား ပြင်ဆင်ပေးရန် တင်ပြထားသော်လည်း အမျိုးသားဒီမိုကရေစီအဖွဲ့ချုပ် NLD မှ အလျှော့ပေး လိုက်လျော၍ လက်ရှိ အခြေခံဥပဒေပါ အတိုင်း ဆောလျင်စွာ ကျမ်းသစ္စာ ကျိန်ဆိုကြမည် ဖြစ်ကြောင်း ပါတီဥက္ကဋ္ဌ ဒေါ်အောင်ဆန်းစုကြည် က ပြောသည်။
ကြားဖြတ်ရွေးကောက်ပွဲတွင် ပါတီအား မဲပေးလိုက်ကြည်သည့် ပြည်သူ့ဆန္ဒနှင့် လွှတ်တော်တွင်း မဟာမိတ်များ၏ ဆန္ဒအား လိုက်လျောသည့်အနေဖြင့် တနင်္လာနေ့ က ဆုံးဖြတ်လိုက်ခြင်းဖြစ်ကြောင်း ဥက္ကဋ္ဌ က သတင်းထောက်များ အား ပြောဆိုလိုက်သည်။
“အလျှော့ပေးတယ်လို့ မြင်ချင်ရင်လည်း မြင်နိုင်ပါတယ်။ ကျမတို့ ပြည်သူ့ဆန္ဒကို အလျှော့ပေးတယ်။ မဟာမိတ်တွေရဲ့ ဆန္ဒကို ကျမတို့ အလျှော့ပေးတယ်။ ကြားဖြတ်ရွေးကောက်ပွဲမှာ အောင်နိုင်ထားတဲ့ အဖွဲ့ချုပ်မို့လို့ သဘောထားကြီးဖို့ ဆိုတာလည်း အင်မတန်မှ လိုပါတယ်။ အဲဒါကြောင့် ကျမတို့အနေနဲ့ လိုက်လျောမယ်။ လွှတ်တော်တက်တဲ့ကိစ္စကို အမြန်ဆုံးလုပ်လိုက်မယ်” ဟု ဗဟိုအလုပ်အမှုဆောင် အစည်းအဝေးအပြီး သတင်းစာ ရှင်းလင်းပွဲတွင် ဒေါ်အောင်ဆန်းစုကြည်က ပြောဆိုလိုက်သည်။
အခြေခံ ဥပေဒပါ လွှတ်တော် ကိုယ်စားလှယ်များ ကျမ်းသစ္စာဆိုချက် စာသားတွင် အခြေခံဥပဒေကို ‘ထိန်းသိမ်း ကာကွယ်စောင့်ရှောက်’ မည်ဟူသည့် အသုံးအနှုန်းအစား ‘လေးစားလိုက်နာ’ မည်ဟူသည့် အသုံးအနှုန်း ပြင်ဆင်ပေးရန် ကြိုးပမ်းအကြံပြုချက်အား အလျှော့ပေးလိုက်ခြင်း ဖြစ်သည်။
တနင်္ဂနွေနေ့တွင် ရခိုင်တိုင်းရင်းသားများ တိုးတက်ရေးပါတီ RNDP ဥက္ကဋ္ဌ အမျိုးသားလွှတ်တော် ဒေါက်တာအေးမောင်နှင့် အတူ လွှတ်တော် ကိုယ်စားလှယ် ၁၈ ဦးတို့က ဒေါ်အောင်ဆန်းစုကြည်၏ နေအိမ်တွင် လာရောက်တွေ့ဆုံ၍ NLD လွှတ်တော် တက်ရောက်ရန် မေတ္တာ ရပ်ခံခဲ့ပြီး နောက်တရက်တွင် ယခုကဲ့သို့ ဆုံးဖြတ်လိုက်ခြင်းလည်း ဖြစ်သည်။
NLD လွှတ်တော်ကိုယ်စားလှယ်များ ကျမ်းသစ္စာကျိန်ဆိုရန်အတွက် မေလ ၁ ရက်နေ့တွင် နေပြည်တော်သို့ သွားရောက်ကြမည်ဖြစ်ပြီး ပါတီဥက္ကဋ္ဌလည်း မေလ ၂ ရက်နေ့တွင် သွားရောက်ကျိန်ဆို သစ္စာ ပြုမည်ဖြစ်သည်။
ပါတီပြန်လည်မှတ်ပုံတင်ရန်အတွက် ၂ဝ၁ဝ နိုင်ငံရေးပါတီများမှတ်ပုံတင်ခြင်းဥပဒေပါ စာသားအချို့အား ပြင်ဆင်ပေးရန် တောင်းဆိုစဉ်က အဆိုပါ ကျမ်းကျိန်စာသား အရေးအား “ကိုင်တွယ်ဖို့ ကျမအနေနဲ့ လစ်ဟင်းခဲ့ပါတယ်။ အဲတော့ ဒါကို ကျမ တာဝန်ယူတယ်။ ကျမရဲ့ လစ်ဟင်းချက် တခုကြောင့်မို့လို့ ပြည်သူရဲ့ ဆန္ဒနဲ့ ကျမတို့ရဲ့ မဟာ မိတ်ဆွေဆန္ဒကို ထိပါးတယ် ဆိုရင် ကျမ လုံးဝ မဖြစ်စေချင်ဘူး” ဟု ဥက္ကဋ္ဌ က ပြောသည်။
ယခု ကျမ်းကျိန်စာသား ပြင်ရေးကိစ္စမှာ ဥပဒေရေးရာကိစ္စတရပ်အဖြစ်သာ ကိုင်တွယ်နေခြင်းဖြစ်၍ နိုင်ငံရေး ပြဿနာရပ် အဖြစ် မရောက်စေလို၍ လိုက်လျောခဲ့ခြင်းလည်း ဖြစ်သည်ဟုဆိုသည်။
“ဟိုဘက်ဒီဘက် ပူးပေါင်းဆောင်ရွက်ခြင်းအားဖြင့်၊ အပေးအယူ လုပ်ခြင်းအားဖြင့် ပြဿနာတွေကို ကျော်လွှားနိုင်တယ် ဆိုတာလည်း ကျမတို့ လက်တွေ့ကျကျ ဒီအချိန်မှာ ပြဖို့လိုတယ်” ဟု ဒေါ်အောင်ဆန်းစုကြည် က ပြောကြားသွားသည်။
သို့သော် ကြားဖြတ် ရွေးကောက်ပွဲတွင် ပြည်သူလူထုအား ကတိပေးခဲ့သည့် တရားဥပဒေ စိုးမိုးရေး၊ ပြည်တွင်း ငြိမ်းချမ်းရေးနှင့် အခြေခံဥပဒေ ပြင်ဆင်ရေး ကိစ္စရပ်များအား ပြင်ဆင်မှု မရှိကြောင်း ပါတီပြောခွင့်ရ ဦးအုန်းကြိုင် က မဇ္ဈိမကို ပြောသည်။
“မြန်မာနိုင်ငံရဲ့ နိုင်ငံရေးပြဿနာတွေကို ပြေပြေလည်လည် တဖက်နဲ့တဖက် ဖြေရှင်းတာ အကောင်းဆုံးဘဲလို့ ယူဆတဲ့အလျောက် လွှတ်တော်ကို တက်မယ်လို့ အဖွဲ့ချုပ်က ဆုံးဖြတ် လိုက်တာပါ။ NLD အဖွဲ့ချုပ်ရဲ့ ရပ်တည်ချက်က ပြင်ဆင်မှု မရှိပါဘူး။ ဒါပေမယ့် ဒီကျမ်းကျိန်ရာမှာတော့ သူတို့ ဆန္ဒအတိုင်း ကျမ်းကျိန်လိုက်မှာ ဖြစ်ပါတယ်” ဟု ဦးအုန်းကြိုင်က ပြောသည်။
ဧပြီလ ၂၅ ရက်နေ့ကလည်း ကျန်းကျိန် ကတိသစ္စာပြုချက် စကားရပ် ပြုပြင်ရေးအတွက် ကြံ့ခိုင်ဖွံ့ဖြိုးရေးပါတီမှ ဦးဆောင် ဖြေရှင်းပေးရန် လွှတ်တော် တက်ရောက်နေသော နိုင်ငံရေးပါတီ ၁၆ ခုတို့က ကြံ့ခိုင်ရေး ပါတီ ဒု-ဥက္ကဋ္ဌ ဦးသူရရွှေမန်းထံ မေတ္တာ ရပ်ခံခဲ့သေးသည်။
Ref: မဇ္ဈိမ
ဆထုံး သတ်ဖြတ်မှု စွပ်စွဲချက် KIO ငြင်းဆို
နေမျိုး
တနင်္လာနေ့၊ ဧပြီလ ၃၀ ရက် ၂၀၁၂
နယူးဒေလီ (မဇ္ဈိမ) ။ ။ ဝိုင်းမော်မြို့နယ်ရှိ ဆဒုံးမြို့နယ်ခွဲ အထွေထွေ အုပ်ချုပ်ရေးမှုး အပါအဝင် ဝန်ထမ်းလေးဦး သတ်ဖြတ်မှုမှာ ၎င်းတို့နှင့် မသက်ဆိုင်ကြောင်း ကချင် လွတ်လပ်ရေး အဖွဲ့ KIO မှ ငြင်းဆို လိုက်ပြီး အဆိုပါ ကိစ္စနှင့် ပတ်သက်၍ စုံစမ်းလျက် ရှိကြောင်း ပြောသည်။
‘ဧပြီလ ၂၈ ရက်နေ့ နံနက် ၁ နာရီခွဲခန့်တွင် KIA လက်နက်ကိုင်အဖွဲ့က သေနတ်ဖြင့် ပစ်ခတ်သတ်ဖြတ်ခဲ့သဖြင့်’ ဝန်ထမ်းလေးဦး သေဆုံးပြီး သုံးဦး ပျောက်ဆုံးနေကြောင်း ဧပြီလ ၂၉ ရက်နေ့ထုတ် နိုင်ငံပိုင် မြန်မာ့ အလင်း သတင်းစာပါ ရေးသားချက်အား KIO ပြောခွင့်ရပုဂ္ဂိုလ် ဦးလနန် က တုန့်ပြန် ပြောဆိုလိုက်ခြင်း ဖြစ်သည်။
“မြန်မာအစိုးရက အဲဒီလိုပဲ အမြဲစွပ်စွဲတယ်။ ဘာဖြစ်လိုက်ဖြစ်လိုက် KIA ပဲ။ ဘယ်သူလုပ် တယ်ဆိုတာ မသိရသေးဘူး။ ကျနော်တို့ တပ်မဟာကို အဲဒီကိစ္စ စုံစမ်းဖို့ ညွှန်ကြားထားတယ်။ ကျနော်တို့ KIA က လုပ်တယ်ဆိုတာ မဟုတ်ဘူးဗျ။ ကျနော်တို့ အမိန့်ပေးထားတာ မရှိဘူး” ဟု မဇ္ဈိမကို ပြောသည်။
“အုပ်ချုပ်ရေး ဦးစီးမှုးအပါအဝင် လေးယောက်ကို သတ်သွားတယ်။ ကျန်တဲ့လူတွေကတော့ ဒဏ်ရာရတယ်။ ဒါပေမယ့် ကျနော်ထင်တာတော့ အုပ်ချုပ်ရေးမှုးတွေက မှားတဲ့အချက်လေးတွေ ရှိမယ်။ ဒီဘက်နယ်ရောက်လာတဲ့ အချို့ အစိုးရ ဝန်ထမ်းတွေဟာ မောက်မာတာတွေ ရှိတယ်။ စီးပွားရေးကိစ္စတွေလည်း ပါနိုင်တယ်” ဟု ဆထုံး ဒေသခံ အမျိုးသား တဦးက မဇ္ဈိမကို ပြောသည်။
ဝိုင်းမော်ဒေသမှ KIA ဌာနချုပ်ရှိရာ လိုင်ဇာဘက်သို့ ကုန်တင်ကားများ ကူးသန်းရာတွင် ဆထုံးဒေသအား ဖြတ်သန်းရ၍ မြို့နယ်ထွေ/အုပ်မှူးမှာ သြဇာ ရှိလှကြောင်း အဆိုပါ ဒေသခံက ပြောသည်။
ဧပြီလ ၂၉ ရက်နေ့က မန္တလေး-မြစ်ကြီးနား အမှတ် ၃၃ အဆန်ရထား မိုင်းကွဲမှုမှာလည်း KIA မှ မိုင်းထောင် ဖောက်ခွဲမှု ဖြစ်ကြောင်း မြန်မာ့အလင်း သတင်းစာက စွပ်စွဲထားသည်။
၂၀၁၁ ခုနှစ် ဧပြီလအတွင်း KIA ထိန်းချုပ်ရာ နယ်မြေများအတွင်း အစိုးရတပ်များနှင့် တိုက်ပွဲပေါင်း ၁၃၀ နီးပါး ဖြစ်ပွားခဲ့ သည်။
ယခုအခါ KIA ဌာနချုပ်တည်ရှိရာ လိုက်ဇာအနီးသို့ မြန်မာအစိုးရတပ်များ အင်အားတိုးချဲ့ ချဉ်းကပ်လာနေပြီး စုစုပေါင်း အစိုးရတပ်အင်အား ၂,၀၀၀ ခန့် ရှိလာပြီ ဖြစ်ကြောင်း ဦးလနန်က မဇ္စျိမကို ပြောသည်။
Ref: မဇ္ဈိမ
ဆွေးနွေးပွဲ ပြန်စရန် KIO ကမ်းလှမ်း
သန်းထိုက်ဦး
April 30, 2012
ကချင် လွတ်လပ်ရေးအဖွဲ့ (KIO) နှင့် မြန်မာ အစိုးရတပ်များအကြား စစ်ရေးတင်းမာနေစဉ် အပစ်အခတ် ရပ်စဲရေးအတွက် ထပ်မံ တွေ့ဆုံဆွေးနွေးရန် KIO ဘက်က ပြန်လည် ကမ်းလှမ်း လိုက်သည်။
နှစ်ဖက် ကိုယ်စားလှယ်များ သွားရောက်နိုင်မည့် ကချင်ပြည်နယ် လွယ်ဂျယ်မြို့နယ်ခွဲရှိ ပရန်ငေါန်ကျေးရွာတွင် တွေ့ဆုံရန် အစိုးရ ပြည်ထောင်စု အဆင့် ငြိမ်းချမ်းရေး ဖော်ဆောင်ရေး အဖွဲ့ ခေါင်းဆောင် တဦး ဖြစ်သည့် ဦးအောင်သောင်းထံ စာရေး ပို့လိုက်ကြောင်း KIO တွဲဖက် အတွင်းရေးမှူး ဦးလနန်က ဧရာဝတီသို့ ပြောသည်။
ယခုလ ၂၀ ရက်နေ့ကလည်း အစိုးရက မြစ်ကြီးနားမြို့ပေါ်နှင့် ဗန်မော်မြို့နယ်တို့တွင် တွေ့ဆုံဆွေးနွေးရန် ကမ်းလှမ်းထားပြီး KIO ဘက်က စစ်ရေး တင်းမာနေချိန် အတောအတွင်း ထိုနေရာများ၌ တွေ့ဆုံ ဆွေးနွေးရန် အဆင် မပြေနိုင်ကြောင်း ပြန်လည် အကြောင်းကြားခဲ့သည်ဟု ၎င်းက ဆိုသည်။
“စစ်ရေးအရှိန်က ပြင်းထန်နေတဲ့အချိန်မှာ အဲဒီမှာ သွားပြီတော့ ဆွေးနွေးဖို့ မဖြစ်နိုင်ဘူးလို့ အကြောင်းပြန်ထားတယ်။ သူတို့ ပြည်တွင်းတနေရာမှာ ပြောဆိုထားတဲ့အတွက်ကြောင့်မို့ ကျနော်တို့ဘက်က အဆိုပြုထားတဲ့ လွယ်ဂျယ်မြို့နယ်အထဲက ပရန်ငေါန်ကျေးရွာကို ရွေးချယ်လိုက်တယ်” ဟု ဦးလနန်က ဆက်ပြောသည်။
အစိုးရအနေဖြင့် လက်ခံတွေ့ဆုံမည်ဆိုပါက KIO ဘက်က အဓိက နှစ်ဖက်တင်းမာနေသော စစ်ရေးကိစ္စများကို ဆွေးနွေးရန် စီစဉ်ထားကြောင်း ၎င်းက ဆိုသည်။ သို့သော် KIO ဘက်က ကမ်းလှမ်းထားသည့် စာနှင့်ပတ်သက်၍ အစိုးရ ငြိမ်းချမ်းရေးအဖွဲ့က ယနေ့အထိ အကြောင်း ပြန်ကြားခြင်း မရှိသေးပေ။
စစ်ရေးတင်းမာမှုကြောင့် KIO နှင့် အစိုးရတပ်အကြား တိုက်ပွဲများ ဆက်တိုက်ဖြစ်ပွားနေပြီး ဧပြီလဆန်းပိုင်းမှ ယနေ့အထိ ကချင်ပြည်နယ်အတွင်း တိုက်ပွဲပေါင်း အကြိမ် ၁၃၀ ခန့် ရှိ်ပြီဖြစ်ကြောင်း ဦးလနန်က ပြောသည်။
လတ်တလော တိုက်ပွဲများသည် လိုင်ဇာဌာနချုပ် ဒေသအတွင်း ဖြစ်ပွားလျက်ရှိပြီး အစိုးရတပ်များကလည်း အဝေးပစ် ၁၂၀ နှင့် ၈၀ မမ လက်နက်ကြီးများ အသုံးပြု၍ ၀ိုင်းထားကြောင်း၊ KIO ဘက်ကလည်း ပြင်ဆင်မှုများ ပြုလုပ်ထားကြောင်း ၎င်းက ဆိုသည်။
ဧပြီ ၂၈ ရက်နေ့က ကချင်ပြည်နယ် ပန်ဝါဒေသတွင် KIO နှင့် ဦးဇခုန်တိန်ယိန်း ခေါင်းဆောင်သော ကချင်ပြည်သစ် တပ်မတော် (NDAK) တပ်ဖွဲ့ဝင်တချို့နှင့် တိုက်ပွဲများ ဖြစ်ပွားခဲ့ကြောင်း သိရသည်။ NDAK သည် စစ်အစိုးရ၏ နယ်ခြားစောင့်တပ်ဖွဲ့ ဖွဲ့စည်းရေးကို လက်ခံထားသော အဖွဲ့ဖြစ်သည်။
ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့ ခေါင်းဆောင်တဦးဖြစ်သည့် မီးရထားဝန်ကြီး ဦးအောင်မင်းကမူ KIO လိုင်ဇာဌာနချုပ်ကို သိမ်းပိုက်ရန် လုံးဝ အစီအစဉ်မရှိကြောင်း ယမန်နေ့က နေပြည်တော်၌ သတင်းထောက်များနှင့် တွေ့ဆုံစဉ် ပြောကြားခဲ့သည်။
ယနေ့ထုတ် အစိုးရသတင်းစာများတွင် မန္တလေး-မြစ်ကြီးနား ပြေးဆွဲသည့် အထူး အိပ်စင်ရထား ယမန်နေ့ နံနက်ပိုင်းက အတွဲ ၈ တွဲ လမ်းချော်၍ လူ ၂ ဦး ထိခိုက်ရရှိသည့် မိုင်းခွဲမှုသည် ကချင်လွတ်လပ်ရေး တပ်မတော် (KIA) လက်ချက်ဖြစ်ကြောင်း ဖော်ပြထားသည်။ ယင်းကိစ္စနှင့် ပတ်သက်၍ KIA က ၎င်းတို့ တပ်ဖွဲ့ဝင်များ၏ လက်ချက်မဟုတ်ကြောင်း ငြင်းဆိုသည်။
KIO သည် ၁၉၉၄ ခုနှစ်တွင် အစိုးရနှင့် အပစ်အခတ်ရပ်စဲရေး လက်မှတ်ထိုးထားသည့် တိုင်းရင်းသား လက်နက်ကိုင် အဖွဲ့ဖြစ်ပြီး ၂၀၁၁ ခုနှစ် ဇွန်လတွင် တိုက်ပွဲများ ပြန်လည် ဖြစ်ပွားခဲ့ပြီးနောက် အပစ်အခတ် ရပ်စဲရေးလည်း ပျက်ပြားခဲ့သည်။
ယင်း တိုက်ပွဲများကြောင့် အစိုးရနှင့် KIO ကြား ငြိမ်းချမ်းရေး ပြန်လည် တည်ဆောက်ရန် ၂၀၁၁ ခုနှစ် နိုဝင်ဘာလမှ စတင်၍ ၂၀ ၁၂ ခုနှစ် မတ်လ အကြား ၃ ကြိမ်ခန့် တွေ့ဆုံခဲ့ကြသော်လည်း ရေရာသည့် သဘောတူညီချက် တစုံတရာ မရရှိသေးဘဲ ရှိနေသည်။
Ref: ဧရာဝတီ
ဦးအောင်သောင်း ငြိမ်းချမ်းရေး အဖွဲ့သစ်မှာ မပါဝင်တော့ကြောင်း ပြော
မင်းသက်၊ ဖနိဒါ
တနင်္လာနေ့၊ ဧပြီလ ၃၀ ရက် ၂၀၁၂
ချင်းမိုင်(မဇ္ဈိမ) ။ ။ အစိုးရ၏ ပြည်ထောင်စုအဆင့် ငြိမ်းချမ်းရေး ဖော်ဆောင်ရေးအဖွဲ့သစ် ပြန်လည် ဖွဲ့စည်းရာတွင် ကြံ့ခိုင်ဖွံ့ဖြိုးရေးပါတီ အတွင်းရေးမှူး ၁ ဦးအောင်သောင်း ပါဝင်တော့မည် မဟုတ်ကြောင်း ကာယကံရှင်က တနလာင်္နေ့ တွင် ပြောကြားလိုက်သည်။
“ပြန်ပြီးတော့ ဖွဲ့မယ်ဆိုတာ ဟုတ်တယ်။ ဒါပေမယ့် ကျနော် မပါတော့ဘူးလို့ပဲ ပြောချင်ပါတယ်။ ကျနော်က အသက်အရွယ်အရရော၊ မိသားစု ကျန်းမာရေး အရပါ အခုလို ဆုံးဖြတ် လိုက်တာပါ”ဟု ပြည်ထောင်စု လွှတ်တော် အစည်းအဝေး မစတင်မီ သတင်းထောက်များ၏ မေးမြန်းချက်ကို ဦးအောင်သောင်း က ဖြေကြားလိုက်ခြင်း ဖြစ်သည်။
အစိုးရအနေဖြင့် လက်နက်ကိုင် အဖွဲ့အစည်းပေါင်း ၁၁ ဖွဲ့မှ ၁ဝ ဖွဲ့နှင့် အပစ်အခတ် ရပ်စဲရေး သဘောတူလက်မှတ် ရေးထိုးထားပြီး ဖြစ်သော်လည်း ကချင် လွတ်လပ်ရေး တပ်မတော် KIA တပ်ဖွဲ့နှင့်သာ အပစ်အခတ် ရပ်စဲရေး သဘောတူညီမှု မရသေးကြောင်းနှင့် တိုက်ပွဲများ ဆက်လက် ဖြစ်ပွားနေဆဲ ဖြစ်သည်ဟု ဦးအောင်သောင်းက ပြောသည်။
“KIA က ပန်ဝါဒေသကို တိုက်မယ်လို့ လုပ်နေတာကို အစိုးရဘက်က သိလို့ စစ်တပ်က ကြိုစောင့်ပြီး ပစ်ကြခတ်ကြ ဖြစ်ပါတယ်။ ဒါတွေကို ကျနော်တို့လည်း မဖြစ်ချင်တော့ပေမယ့် ဆွေးနွေးမယ့် နေရာတွေ ချိန်းဆိုမှုက ပြဿနာ ရှိနေပါတယ်။ သူတို့ ချိန်းတဲ့နေရာကို သွားဖို့ ကျပြန်တော့လည်း အန္တရာယ် ရှိပါတယ်။ ဒါကြောင့် အခက်အခဲ ရှိနေပါတယ်။ ကျနော်ကတော့ သူတို့နဲ့ ပုဂ္ဂိုလ်ရေး ရင်းနှီးပြီးသားပါ”ဟု ဦးအောင်သောင်း က ပြောဆိုသွားသည်။
ပြည်ထောင်စုအဆင့် ငြိမ်းချမ်းရေး ဖော်ဆောင်ရေးအဖွဲ့ နှစ်ခုရှိရာ ရထားဝန်ကြီး ဦးအောင်မင်း ဦးဆောင်သော အဖွဲ့နှင့် ပြည်သူ့လွှတ်တော် ကိုယ်စားလှယ် ဦးအောင်သောင်း ဦးဆောင်သော အဖွဲ့တို့ ရှိနေသည်။
ဦးအောင်သောင်း ဦးဆောင်သော အစိုးရငြိမ်းချမ်းရေး ဖော်ဆောင်ရေးအဖွဲ့နှင့် KIO တို့ တရုတ်နိုင်ငံ ရွှေလီမြို့တွင် သုံးကြိမ်တိုင် ဆွေးနွေးခဲ့စဉ် စစ်ရေး အရှိန်များ ထိန်းသိမ်း သွားရန်နှင့် ပြဿနာ ဖြစ်ပွားနေသည့် ဒေသများတွင် နှစ်ဖက်ညှိနှိုင်း လုပ်ဆောင်သွားရန် သဘောတူညီခဲ့သော်လည်း ယခုထိ အကောင်အထည်ဖော်သည့် တုံ့ပြန်မှု မတွေ့ရသေးကြောင်း KIO က ဆိုသည်။
ပြန်လည်ဖွဲ့စည်းမည့် အစိုးရ ငြိမ်းချမ်းရေး အဖွဲ့သစ်တွင် ဒု-သမ္မတ တဦးလည်း ပါဝင်လာမည် ဖြစ်ပြီး လွှတ်တော် ကိုယ်စားလှယ်များ၊ အစိုးရအဖွဲ့ ဝန်ကြီးများ၊ နယ်မြေခံ တပ်ရင်းတပ်ဖွဲ့ ဌာနချုပ်မှ တပ်မတော်သားများ ပါဝင်မည် ဖြစ်ကြောင်း ဧပြီလ ၂၉ ရက်က မီးရထားဝန်ကြီး ဦးအောင်မင်းက သတင်းထောက်များအား ပြောဆိုခဲ့သည်။
လိုင်ဇာဌာနချုပ်ကို သိမ်းပိုက်ရန် မရှိကြောင်း သမ္မတ ဦးသိန်းစိန်က ပြောဆိုထားပြီး ဖြစ်ကြောင်း ဦးအော်မင်း က ပြောဆိုခဲ့သည်။
အဆိုပါ ငြိမ်းချမ်းရေးအဖွဲ့သစ် ဖွဲ့စည်းမှုနှင့် ပတ်သက်၍ မသိရှိရသေးကြောင်း KIO က ပြောသည်။ ထို့ပြင် ဝန်ကြီး ဦးအောင်မင်း၏ ပြောဆိုချက်နှင့် ကချင်ပြည်နယ် လိုင်ဇာဌာနချုပ် အနီးတဝိုက် အစိုးရ စစ်တပ်ဖွဲ့၏ လှုပ်ရှား နေမှုများနှင့် ကွဲလွဲမှုများ ရှိနေကြောင်း KIO ပြောရေး ဆိုခွင့်ရှိသူ ဦးလနန်က ပြောသည်။
“ဒါပေမယ့် စစ်တပ်က လုပ်နေတာက လိုင်ဇာကို ချေမှုန်းဖို့ လုပ်နေတယ်။ ဒါကြောင့် ဦးအောင်မင်း ပြောတာက သိလျက်နဲ့ လိမ်ညာပြီးပြောတာလား။ နိုင်ငံတကာ မျက်နှာ ရအောင်လုပ်တာပဲ၊ ဘန်ကီမွန်း ရောက်နေလို့ ပြောတာဘဲ။ ဒါပေမယ့် ဒီမှာက စစ်တပ်ကနေပြီးတော့ အကုန်လုံး အဆင်သင့် လုပ်ထားပြီ။ သူတို့က လက်နက်ကြီးနဲ့ ဦးစားပေး ပစ်နေတယ်။ ဒါကြောင့်မလို့ ဦးအောင်မင်း ပြောတာက လှအောင်ပြောတာပဲ”ဟု မဇ္ဈိမကို ပြောသည်။
လက်နက်ကြီးနှင့် ပစ်ခတ်ရန် ပြင်ဆင်ထားသဖြင့် လိုင်ဇာမြို့မှ ၇ မိုင်အကွာရှိ ဒေါ့ဖုန်းယန်မြို့နယ်ခွဲ လဂျားယန်ကျေးရွာ အခြေစိုက်ထားသည့် တပ်ဖွဲ့၊ ရဲ၊ စရဖ တပ်ဖွဲ့များကို ဧပြီလ ၂၆ ရက်နေ့က ရုပ်သိမ်း သွားပြီ ဖြစ်ကြောင်း ဦးလနန်က ပြောသည်။
ဧပြီလကုန်ပိုင်းအတွင်း ဒေါ့ဖုန်းယန်မြို့နယ်ခွဲ ခမ်းဂိုင်တောင်မှ အစိုးရ၏ ၁ဝ၅ မမ လက်နက်ကြီးနှင့် ပတ်ခတ်ခဲ့သဖြင့် KIO နယ်မြေ လိုင်ဇာမြို့မှ ၄ မိုက်အကွာ ကားနှင့် ၁ဝ မိနစ်ခန့် အကြာ ရောက်သည့် လဝါးယန် ကျေးရွာတွင် ကျရောက် ခဲ့သည်ဟု ဆိုသည်။
ထို့ပြင် မြစ်ကြီးနား-ဗန်းမော်ကားလမ်းပေါ်ရှိ ဂန်ဒေါင်ယန်ကျေးရွာမှ လက်နက်ကြီးဖြင့် လိုင်ဇာမြို့ကို ပစ်ခတ်ရန် မမီသဖြင့် ထိုမှ နီးစပ်သည့် အင်ပွန်ကျေးရွာဘက် သယ်ဆောင် ထားမှုများ ရှိသလို၊ လိုင်ဇာမြို့မှ ၁ဝ မိုင်ခန့်အကွာရှိ ရှဒါန်ပါဒေသဆိုသည့် ရာဘာခြံတွင်လည်း လက်နက်ကြီးဖြင့် ပစ်ခတ်မှုများ ရှိသည်ဟု သိရသည်။
အစိုးရဘက်မှ ၈၁ မမ၊ ၁၂ဝ မမ၊ ၁ဝ၅ မမ လက်နက်ကြီးများနှင့် ပစ်ခတ်နေပြီး နေ့စဉ်ဆိုသလို တိုက်ပွဲများ ဖြစ်ပွားနေပြီး လိုင်ဇာ ဌာနချုပ်ကို သိမ်းမည်ဟု သတင်းများ ထွက်ပေါ်နေခြင်းကြောင့် KIA ဗဟိုကလည်း အောက်ခြေ တပ်သားများကို ညွန်ကြားထားပြီး ဖြစ်၍ တိုက်ပွဲများမှု ပိုမို များပြား လာနိုင်သည်ဟု ဦးလနန်က ပြောသည်။
ဧပြီလအတွင်း အစိုးရတပ်ဖွဲ့နှင့် KIA တပ်ဖွဲ့များအကြား တိုက်ပွဲပေါင်း ၁၃ဝ ကြိမ် ရှိသွားပြီ ဖြစ်ကြောင်း သိရသည်။
Ref: မဇ္ဈိမ
ဗိုလ်မှူးချုပ် စောလဘွယ် သတင်းစာရှင်းလင်း
2012-05-01
မူးယစ်ရာဇာ အဖြစ် မိမိအပေါ် စွပ်စွဲချက်တွေကို သက်သေပြနိုင်မယ်ဆိုရင် ပေးတဲ့ ပစ်ဒဏ်ကို ရဲဝင့်စွာ ခံယူမှာဖြစ်တယ်လို့ ကလိုထူးဖေါ အဖွဲ့ ခေါင်းဆောင်ဖြစ်တဲ့ ဗိုလ်မှူးချုပ် စောလဘွယ်ခေါ် ဗိုလ်နှုတ်ခမ်းမွှေး က ဒီကနေ့ ကြေညာချက် ထုတ်ပြန်လိုက်ပါတယ်။
ဗိုလ်မှူးချုပ်စောလဘွယ်ကို ဧပြီလ ၂၀ရက်နေ့က ထိုင်းအစိုးရက မူးယစ်ရာဇာအဖြစ် စွတ်စွဲပြီး ဆုငွေ ထုတ်ပြန်ထားခဲ့ပါတယ်။ ဒီကိစ္စနဲ့ ပတ်သက်ပြီး သတင်းစာ ရှင်းလင်းပွဲကို ဒီကနေ့ မနက်ပိုင်းက ကလိုထူးဖေါ စစ်ဌာနချုပ်ရှိရာ ထိုင်းမြန်မာ နယ်စပ် ကရင်ပြည်နယ် ကော်သုံးဘွယ်ခီး ဒေသမှာ ပြုလုပ်ပါတယ်။ သတင်းစာရှင်းပွဲနဲ့ ပတ်သက်ပြီး ကလိုထူးဖေါ ကရင်အမျိုးသား အစည်းအရုံး အတွင်းရေးမှူး စောဂုဏ်အောင်က ပြောပါတယ်။
"၃၀ ရက်နေ့ နောက်ဆုံးထားပြီးတော့ ကျွန်တော်တို့ဆမှာ လာပြီးတော့ ရှာဖွေလို့ ရတယ်။ ၃၀ ရက်နေ့ မှာ မလာတဲ့အတွက်ကြောင့် ကျွန်တော်တို့က သတင်းစာ ရှင်းလင်းပွဲလုပ်တာ။ ဗိုလ်ချုပ်စောလဘွယ်က ဒီမူးယစ်ဆေးဝါးရောင်းဝယ်တဲ့ဟာကို သူကိုယ်တိုင်လည်း မလုပ်ဖူးဘူး။ သူများကိုလည်း ညွှန်ကြားချက် တစုံတရာမရှိဘူး။ အဲလို ငြင်းလိုက်ပါတယ်။ တကယ်လို့ စွတ်စွဲတဲ့ဘက်က စွပ်စွဲချက်တွေကို သက်သေအထောက်အထား အခိုင်အမာနဲ့ ပြနိုင်မယ်ဆိုရင် နိုင်ငံတကာ ခုံရုံးမှာ တက်ပြီးတော့ တရားရင်ဆိုင်မယ်။ ပေးတဲ့ အပစ်ဒဏ်ကို ခံယူမယ်လို့ သူက အဲဒီလို ကြေညာခဲ့ပါတယ်။ "
သတင်းစာရှင်းပွဲ ပြုလုပ်မယ်ဆိုတဲ့ သတင်းထွက်ပေါ်နေတာကြောင့် ထိုင်းနိုင်ငံဘက်ကနေ မြန်မာပြည်ဘက်ကို ကူးသန်းတဲ့ လမ်းကို ထိုင်းစစ်တပ်က ဒီကနေ့ ပိတ်ထားတာကြောင့် ထိုင်းနိုင်ငံသား သတင်းထောက် လေးဦးပဲ လာရောက်နိုင်တယ်လို့ သိရပါတယ်။ မေလ ၁၀ရက်နေ့မှာလည်း မြန်မာပြည်တွင်း သတင်းထောက်တွေနဲ့ အပြည်ပြည်ဆိုင်ရာ သတင်းထောက်တွေကို ဒုတိယအကြိမ် သတင်းစာရှင်းပွဲ ပြုလုပ်ဖို့ စီစဉ်ထားတယ်လို့ ကလိုထူးဖေါ အဖွဲ့က ပြောပါတယ်။
Ref: RFA News
Monday, April 30, 2012
ကုလအတွင်းရေးမှူးချုပ် မြန်မာနိုင်ငံရောက်
သားညွန့်ဦး
တနင်္ဂနွေ, 29 ဧပြီ 2012
မြန်မာနိုင်ငံကို သုံးရက်ကြာခရီးစဉ်အဖြစ် မနေ့ကစပြီး ရောက်ရှိနေတဲ့ ကုလသမဂ္ဂအတွင်းရေးမှူးချုပ် ဘန်ကီမွန်းဟာ ဒီကနေ့ တနင်္လာနေ့ နေပြည်တော်မှာ နိုင်ငံတော် သမ္မတနဲ့ တွေဖို့ရှိသလို ပြည်ထောင်စု လွှတ်တော်မှာ မိန့်ခွန်း ပြောကြားဖို့လည်း ရှိနေပါတယ်။ မြန်မာနိုင်ငံမှာ လက်ရှိတွေ့နေရတဲ့ အပြောင်းအလဲ တွေဟာ အစကနဦး အဆင့်ပဲ ရှိသေးပြီး ရှေ့ဆက်လုပ်စရာတွေ ကျန်သေးတယ်လို့ မစ္စတာဘန်က ပြောပါ တယ်။ မစ္စတာဘန်ရဲ့ ခရီးစဉ် အကြောင်း ကိုသားညွန့်ဦးက စုစည်း တင်ပြပေးမှာပါ။
ပြီးခဲ့တဲ့ တနှစ်အတွင်းက ဆောင်ရွက်လာတဲ့ မြန်မာနိုင်ငံတွင်း နိုင်ငံရေးနဲ့ စီးပွားရေးပြုပြင်ပြောင်းလဲမှုတွေ အရှိန်နည်းနည်းပြန်ကျနေတဲ့အချိန် အရေးကြီး ကာလမှာ အတွင်းရေးမှူးချုပ် ဘန်ကီမွန်း မြန်မာနိုင်ငံကို ရောက်ရှိ လာတာဖြစ်ပါတယ်။ အထူးသဖြင့် အမျိုးသားဒီမိုကရေစီ အဖွဲ့ချုပ်နဲ့ အာဏာပိုင်တွေအကြား လွှတ်တော်ဝင်ရေး ကိစ္စ အတန်ငယ် တင်းမာနေတဲ့အချိန်၊ ကချင်ပြည်နယ် ဘက်မှာ မြန်မာစစ်တပ်နဲ့ ကချင် လက်နက်ကိုင် တပ်တွေအကြား တိုက်ပွဲတွေ ပြန်တွေ့နေရတဲ့ အချိန်မှာ ကုလသမဂ္ဂ အတွင်းရေးမှူးချုပ် ရောက် ရှိလာတာမို့ လူ့အခွင့်အရေး အဖွဲ့တွေကတော့ မစ္စတာဘန် အနေနဲ့ မြန်မာ အာဏာပိုင်တွေကို ပြုပြင်ပြောင်း လဲရေးကိစ္စ ဖိအားပေးဖို့ လိုလားနေကြပါတယ်။ အတွင်းရေးမှူးချုပ် ဘန်ကီမွန်းဟာ ဒီကနေ့ နေပြည်တော် သွားပြီး သမ္မတဦးသိန်းစိန်အပါအ၀င် အာဏာပိုင်တွေနဲ့တွေဆုံဖို့ရှိပါတယ်။ လက်ရှိ မြန်မာနိုင်ငံ အခြေအနေ ဟာ မသေချာ မရေရာသေးဘဲ စိန်ခေါ် အကဲစမ်းမှုတွေ ရှိနေတယ်လို့ မစ္စတာဘန်က ပြောပါတယ်။
“မြန်မာနိုင်ငံရဲ့ အသွင်ကူးပြောင်းမှုဟာ အခုမှ အစပဲ ရှိပါသေးတယ်။ ရှေ့ဆက် စိန်ခေါ်အကဲစမ်းချက်တွေ အများကြီးရှိပါတယ်။ စိုးရိမ်ပူပင်စရာ အခြေအနေ အတော်များများကိုလည်း ဖြေရှင်းရဦးမှာပါ။ မြန်မာနိုင်ငံ အနာဂတ် ပိုပြီးကောင်းမွန်လာဖို့ ကူညီရေးအတွက် မကြုံစဖူး အခွင့်အလမ်းကောင်း ရှိနေပြီလို့တော့ ကျနော် ယူဆ ထားပါတယ်။”
မစ္စတာဘန်ရဲ့ ဒီနေ့ ခရီးစဉ်နဲ့ပတ်သက်လို့တော့ ရန်ကုန်က သတင်းထောက်တဦးက အခုလို ပြောပါတယ်။
“မနက်ဖြန်ကျရင်တော့ မနက် ၉ နာရီမှာ သမ္မတကြီးနဲ့ တွေ့မယ်။ ၁၀ နာရီမှာ ပြည်သူ့ လွှတ်တော်ဥက္ကဋ္ဌသူရ ဦးရွှေမန်းနဲ့ တွေ့မယ်။ ၁၀ နာရီ ၄၀ မှာ အမျိုးသားလွှတ်တော် ဥက္ကဋ္ဌ ဦးခင်အောင်မြင့်နဲ့ တွေ့မယ်။ ၁၁ နာရီ ၂၀ မှာ ပြည်ထောင်စု လွှတ်တော်မှာ မိန့်ခွန်းပြောမယ်။ ဒေါ်စုနဲ့တွေ့မယ့် အချိန်ကျတော့ ရေးမထားဘူး။ သူတို့ UN ကနေ ဘယ်အချိန်ပေးမလဲ မသိဘူး။ မေလ ၁ ရက်နေ့တော့ တွေ့မယ်ထင်တယ်။ တစ်ရက်နေ့မှာတော့ သူတို့ UN အဖွဲ့တွေနဲ့တွေ့ပြီး ဒေါ်စုနဲ့ တွေ့မှာပါ။ ဒီကနေ့ကတော့ မတွေ့ဘူး။"”
မြန်မာ့ဒိမိုကရေစီခေါင်းဆောင် ဒေါ်အောင်ဆန်းစုကြည်နဲ့ကတော့ အင်္ဂါနေ့မှာ တွေ့မယ်လို့ မျှော်လင့်ရပါ တယ်။ လတ်တလောအခြေအနေမှာ ကြားဖြတ်မှာ အနိုင်ရခဲ့တဲ့ အဖွဲ့ချုပ် ကိုယ်စားလှယ်တွေ လွှတ်တော် တက်ရေး အာဏာပိုင်တွေနဲ့ တင်းမာနေတဲ့ကိစ္စရပ်နဲ့ ပတ်သက်လို့တော့ ဒါဟာ မကြာခင် အလျှင်အမြန် ဖြေရှင်းနိုင်မယ်လို့ မျှော်လင့်တဲ့အကြောင်း မစ္စတာဘန်က ပြောပါတယ်။
ကချင်နဲ့ဖြစ်နေတဲ့ကိစ္စကိုလည်း အတွင်းရေးမှူးချုပ်အနေနဲ့ ၀င်ရောက်ဖြေရှင်းဖို့ လူ့အခွင့်အရေးအဖွဲ့အချို့က လိုလားပါတယ်။ ဒေသတွင်းက Altsean-Burma လူ့အခွင့်အရေးအဖွဲ့ရဲ့ ပြောခွင့်ရသူ Debbie Stothard ကတော့ မြန်မာပြည်မှာ ဥပဒေ ပြုရေးပိုင်းရော မူဝါဒဆိုင်ရာကိစ္စတွေမှာပါ ပြုပြင်ပြောင်းလဲစရာတွေ အတော်ကျန်နေတာကို အတွင်းရေးမှူးချုပ် အနေနဲ့ထောက်ပြဖို့လိုမယ်လို့ ပြောပါတယ်။
“မစ္စတာဘန်ကီမွန်းအနေနဲ့ စိတ်ကူးယဉ်စရာကမ္ဘာထဲပဲ နေနေမယ့်အစား၊ တကယ့်လက်တွေ့ အခြေအနေကို ကြည့်ဖို့ အလွန်အရေးကြီးပါတယ်။ မြန်မာနိုင်ငံထဲမှာ ပြုပြင်ပြောင်းလဲမှုတွေ တကယ်ဖြစ်နေပြီလား၊ ဘာတွေ လုပ်ဆောင်ဖို့ လိုအပ်နေသလဲ ဆိုတာတွေကို မှန်မှန်ကန်ကုန်နဲ့ အတော်လေး ချင့်ချိန်သုံးသပ် ရှုမြင်ဖို့ လိုပါ တယ်။ မြန်မာအာဏာပိုင်တွေအနေနဲ့ အစတော့ ကောင်းနေပြီ၊ ဒါပေမယ့် အလျှင်အမြန်လုပ်ဆောင်စရာတွေ အတော်လေး ကျန်နေသေးတယ်လို့ ပြောဖို့ လိုပါတယ်။”
မစ္စတာဘန်ကီမွန်းဟာ မနေ့တုန်းကတော့ ရန်ကုန်မှာရှိတဲ့ ကုလသမဂ္ဂ အတွင်းရေးမှူးချုပ်ဟောင်း ဦးသန့် အုတ်ဂူကို သွားရောက်ဂါရ၀ပြုခဲ့ပါတယ်။ ဦးသန့်ဟာ အာရှကနေ ပထမဆုံးဖြစ်တဲ့ ကုလသမဂ္ဂ အတွင်းရေးမှူး ချုပ်ဖြစ်ပါတယ်။
“ကျနော်ရှေ့ အတွင်းရေးမှူးချုပ်တာဝန်တွေ ယူခဲ့သူတွေဆီက စိတ်ခွန်အားတွေရဖို့အတွက် အမြဲကြိုးစားနေ ပါတယ်။ ဒီအထဲမှာတော့ အတွင်းရေးမှူးချုပ်ဟောင်း ဦးသန့်ဟာ ကျနော့်အတွက် တကယ့် အထူး ပုဂ္ဂိုလ်ကြီးပါ။”
အထူးသဖြင့် စစ်အေးကာလက အတွင်းရေးမှုးချုပ် ဦးသန့်ရဲ့ အတွေးအမြင်တွေဟာ အခုအချိန် အထိ ခေတ်မီ နေဆဲလို့ မစ္စတာဘန်က ပြောသွားပါတယ်။
“စစ်အေးကာလ အရှိန်မြင့်နေတုန်းက One World အားလုံးဟာ တကမ္ဘာတည်းပါ ဆိုတဲ့ သူ့ရဲ့ အယူအဆဟာ အခု ကျနော်တို့ ကြိုးပမ်းနေကြတဲ့ အခြေအနေ အတိအကျပါပဲ။ ကမ္ဘာကြီးဟာ တခုနဲ့တခု အပြန်အလှန် အမှီသဟဲ ပြုနေရပါပြီ။ ”
မစ္စတာဘန် မြန်မာနိုင်ငံကိုရောက်နေတဲ့အချိန်မှာပဲ ဥရောပသမဂ္ဂ နိုင်ငံခြားရေး မူဝါဒဆိုင်ရာ အကြီးအကဲ ကတ်သရင်း အက်ရ်ှသွန်လည်း မြန်မာနိုင်ငံ ရောက်နေတာမို့ သူတို့နှစ်ဦးလည်း မြန်မာနိုင်ငံမှာ သီးခြား တွေ့ဆုံဖို့ စီစဉ်ထားပါတယ်။ မစ္စတာဘန်ကီမွန်းဟာ ရှမ်းပြည်နယ်ဘက်ကိုသွားရောက်ဖို့ အစီအစဉ်ရှိပြီး အဲဒီမှာတော့ ကုလသမဂ္ဂရဲ့ ဘိန်းစိုက်ပျိုးမှုပပျောက်ရေးအစီအစဉ်တွေကို လေ့လာဖို့ရှိပါတယ်။
Ref: VOA News
သတင်းရေးသူကို The Voice ဖော်ထုတ်ပေးမည် မဟုတ်
မျိုးသန့်
သောကြာနေ့၊ ဧပြီလ ၂၇ ရက် ၂၀၁၂
ချင်းမိုင် (မဇ္ဈိမ) ။ ။ သတ္တုတွင်း ဝန်ကြီးဌာန အပါအဝင် ဝန်ကြီးဌာနအချို့၌ ငွေကြေး အလွဲသုံးစား ပြုမှုများ ရှိနေသည်ဟု The Voice ဂျာနယ်ပါ သတင်း ရေးသားသူကို ဖေါ်ထုတ်ပေးရန် သတ္တုတွင်း ဝန်ကြီးဌာနက သောကြာနေ့ တရားရုံးချိန်းတွင် ထပ်မံ လျှောက်ထားသော်လည်း ဂျာနယ် အယ်ဒီတာချုပ်က ဦးကျော်မင်းဆွေက ဖေါ်ထုတ်မည် မဟုတ်ကြောင်း ပြောသည်။
“ဒီကိစ္စက ရှင်းနေတာပဲဗျ။ သတင်းထောက်နာမည်က ဖေါ်စရာကို အကြောင်းမရှိဘူး။ ဒီကိစ္စမှာ အဓိက တာဝန်ရှိသူက သတင်းထောက် မဟုတ်ဘူး။ အဓိက က အယ်ဒီတာချုပ်ရယ်၊ ထုတ်ဝေသူရယ်ပဲ။ အယ်ဒီတာက ထည့်ပါဆိုမှ ဒီသတင်းက ပါမှာ။ ဒါဟာ ကျင့်ဝတ်ကိစ္စဖြစ်တဲ့အတွက် ကျနော်တို့ဘက်က လုံးဝ ဖေါ်မှာ မဟုတ်ဘူး” ဟု ဦးကျော်မင်းဆွေ က မဇ္ဈိမကို ပြောသည်။
ဧပြီလ ၉ ရက်နေ့ကလည်း သတင်းထောက်အား ဖော်ထုတ်ပေးရန် ဝန်ကြီးဌာနက တရားရုံးတွင် လျှောက်ထားခဲ့ရာ The Voice ဘက်မှ ထုတ်ဖေါ်မည်မဟုတ်ကြောင်း ပြန်လည် လျှောက်ထားခဲ့ပြီးဖြစ်သည်။ သို့သော် သတင်းထောက် အား ဖေါ်ထုတ်ပေးရန်မှာ အယ်တီတာချုပ်တွင် တာဝန်ရှိကြောင်း ထပ်မံ လျှောက်ထားလာခြင်း ဖြစ်သည်။
၁၉၃၅ ခုနှစ်အတွင်းက အိုးဝေမဂ္ဂဇင်းတွင် ပါရှိလာသည့် “ငရဲခွေးကြီး လွတ်နေပြီ” ဆောင်းပါးနှင့် ပတ်သက်၍ ဗြိတိသျှ အစိုးရမှ ထိုဆောင်းပါး ရေးသားသူကို ဖေါ်ထုတ်ပေးရန် တောင်းဆိုသော်လည်း တရာရုံးမှ သတင်း ရေးသားသူကို ဖေါ်ထုတ်ရန် မသင့်ဟု ဆုံးဖြတ်ပေးခဲ့ခြင်းကို ကိုးကား၍ ဧပြီ ၉ ရက်နေ့က လျှောက်ထား ခဲ့ပြီးဟုလည်း ဂျာနယ်၏ တရားလွှတ်တော် ရှေ့နေ ဦးဝင်းရွှေက ပြောသည်။
“ဒါကတော့ စီရင်ထုံးတွေလည်း ရှိပြီးသားပဲ။ သတင်းရေးသူကို ဖေါ်ထုတ်ခွင့် မရှိဘူး” ဟု ဦးဝင်းရွှေက ပြောသည်။
တရားရုံးမှ မေလ ၁၁ ရက်နေ့ကို ထပ်မံချိန်းဆိုလိုက်ပြီး ထိုနေ့တွင် သတင်း ရေးသားသူကို ဖေါ်ထုတ်ရန် အမိန့်ချမည် ဆိုပါကလည်း “သတင်းရေးသားသူကို ဖေါ်ထုတ်ပေးဖို့ အမိန့် ချမယ်ဆိုရင် ကျနော်တို့ ဘက်က အဲဒီအမိန့်နဲ့ ပတ်သက်ပြီးတော့ ဒီ့ထက် အဆင့်မြင်တဲ့ သက်ဆိုင်ရာ ရုံးကို တက်မှာပါ” ဟု မဇ္ဈိမကို ပြောသည်။
ဒဂုံမြို့နယ် တရားရုံးတွင်ပြုလုပ်သည့် သောကြာနေ့ ကြားနာစစ်ဆေးမှုတွင် The Voice ဂျာနယ်မှ ထုတ်ဝေသူ ဒေါ်ခင်ကြွယ်ဦး၊ အယ်ဒီတာချုပ် ဦးကျော်မင်းဆွေနှင့် ရှေ့နေ ဦးဝင်းရွှေတို့ တက်ရောက်ခဲ့ပြီး သတ္တုတွင်းဝန်ကြီး ဌာနမှ ဦးဇော်ကိုကိုတို့ တက်ရောက်ခဲ့ကြသည်။
မတ်လ ၁၂ ရက်နေ့ထုတ် The Voice ဂျာနယ်တွင် အမှတ် (၁) သတ္တုတွင်းဝန်ကြီးဌာန ပိုင်ဆိုင်သည့် မုံရွာကြေးနီ စီမံကိန်း၏ အစုရှယ်ယာ ၅ဝ ရာခိုင်နှုန်းကို မြန်မာ့စီးပွားရေး ဦးပိုင် လီမိတက်သို့ ရောင်းချခဲ့ရာ ငွေပေးချေမှု၌ ဦးပိုင် လီမိတက်က ပေးချေရမည့်အစား နိုင်ငံခြား ကုမ္ပဏီတခုက ပေးချေသည်ဟု ရေးသားခဲ့ရာမှ သတ္တုတွင်း ဝန်ကြီးဌာန၏ တရားစွဲဆိုမှု ခံနေရခြင်း ဖြစ်သည်။
Ref: မဇ္ဈိမ
အစိုးရ ငြိမ်းချမ်းရေးအဖွဲ့သစ်မှာ ဒု သမ္မတ ဦးဆောင်မည်
2012-04-29
တိုင်းရင်းသား လက်နက်ကိုင်အဖွဲ့တွေနဲ့ ငြိမ်းချမ်းရေး ဆွေးနွေးနေတဲ့ လက်ရှိ ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့ နှစ်ဖွဲ့ကို တစ်ဖွဲ့တည်း ဖြစ်အောင် ပြန်လည် ဖွဲ့စည်းရာမှာ အကြီးတန်း တပ်မတော် အရာရှိကြီးတွေ၊ လွှတ်တော် ကိုယ်စားလှယ်တွေနဲ့ ပြည်နယ် ၀န်ကြီးချုပ်တွေ ပါဝင်ကြမှာဖြစ်ပြီး ဒု သမ္မတ တစ်ဦးက ဦးဆောင်မှာဖြစ်ကြောင်း၊ အစိုးရ ငြိမ်းချမ်းရေး ဆောင်ရွက်မှုတွေနဲ့ နီးစပ်တဲ့ အမည် မဖော်လိုသူ တစ်ဦးက ပြောဆိုကြောင်း ရိုက်တာ သတင်းက ဖော်ပြပါတယ်။
ကချင်ပြည်နယ်မှာ ငြိမ်းချမ်းရေး ဆွေးနွေးပွဲ (၆) ကြိမ်တိုင်ခဲ့ပေမဲ့ မအောင်မြင်တာကြောင့် ငြိမ်းချမ်းရေး ဖော်ဆောင်ရေး အဖွဲ့ နှစ်ဖွဲ့ကို ပြင်ဆင် ဖွဲ့စည်းဖို့ သမ္မတ ဦးသိန်းစိန်က အမိန့် ပေးခဲ့တယ်လို့ ဆိုပါတယ်။
ငြိမ်းချမ်းရေး ဖော်ဆောင်ရေးအဖွဲ့တစ်ဖွဲ့မှာ ပါဝင်တဲ့ မီးရထားဝန်ကြီး ဦးအောင်မင်းကလည်း အဖွဲ့နှစ်ဖွဲ့ကို တစ်ဖွဲ့တည်းဖြစ်အောင် ပြင်ဆင် ဖွဲ့စည်းဖို့ စီစဉ်နေကြောင်း မနေ့မနက်က သတင်းထောက် တွေနဲ့ တွေ့ဆုံပွဲမှာ ပြောကြား ခဲ့ပါတယ်။
အသေးစိတ် ထုတ်ဖော်မပြောဆိုခဲ့ပေမဲ့ ဒီပြောဆိုချက်ဟာ ပြည်ထောင်စု တိုင်းရင်းသား ဖယ်ဒရယ်ကောင်စီ UNFC ရဲ့တောင်းဆိုချက်အရ စီစဉ်တာ ဖြစ်နိုင်တယ်လို့ တွေ့ဆုံပွဲ တက်ရောက်ခဲ့တဲ့ သတင်းထောက် တစ်ဦးက ပြောပါတယ်။
ပြီးခဲ့တဲ့နှစ် ဇွန်လကစပြီး ကချင်ပြည်နယ်မှာ KIO နဲ့ အစိုးတပ်တွေကြား ပစ်ခတ်မှုတွေ ပြန်လည်ဖြစ်ပွားခဲ့တဲ့အတွက် ဒေသခံပြည်သူ (၅) သောင်းကျော် အိုးအိမ်စွန့် ထွက်ပြေး ခဲ့ရပါတယ်။
ပြည်တွင်း တည်ငြိမ်ရေးနဲ့ စီးပွားရေး တိုးတက်ဖွံ့ဖြိုးရေးအတွက် ထာဝရငြိမ်းချမ်းရေး ရရှိအောင် နိုင်ငံရေးအရ ဆွေးနွေးညှိနှိုင်း အဖြေရှာဖို့လိုကြောင်း အနောက်နိုင်ငံတွေကလည်း မြန်မာ အစိုးရကို တိုက်တွန်း နေကြပါတယ်။
Ref: RFA News
မြစ်ကြီးနား - မန္တလေးရထား မိုင်းဗုံးထိ
မိုးဇော်
တနင်္ဂနွေ, 29 ဧပြီ 2012
မန္တလေးမြို့ကထွက်လာတဲ့ အမှတ် ၃၃ အဆန် အိပ်စင်ရထားဟာ ဒီကနေ့မနက် အစောပိုင်းမှာ ကချင်ပြည်နယ် နန်းစီးအောင်နဲ့ မော်ဟန်အကြား မိုင်းဗုံး ထိတာကြောင့် ရထားတွဲ ၈ တွဲ တိမ်းချော်သွားပြီး အနည်းဆုံး လူ ၂ ယောက် ထိခိုက်ဒဏ်ရာ ရခဲ့ပါတယ်။ လောလောဆည်မှာတော့ မီးရထားဌာနက လမ်းကြောင်း ရှင်းလင်းရေးကို ဆောင်ရွက်နေပြီး ဒီကနေ့ ထွက်မယ့် မြစ်ကြီးနား - မန္တလေး အစုန်အဆန် ရထားတွေ အားလုံး ရပ်နား ထားရပါတယ်။ အပြည့်အစုံကို ထိုင်းအခြေစိုက် သတင်းထောက် ကိုမိုးဇော်က တင်ပြမှာ ဖြစ်ပါတယ်။
အမှတ် ၃၃ အဆန် ဒေသအခေါ် အိပ်စင်ရထားဟာ မန္တလေးမြို့က မနေ့ နေ့ခင်း ၁နာရီလောက်က ထွက်လာပြီး ကချင်ပြည်နယ် မိုးညှင်းမြို့နယ် နန်းစီအောင်အကျော် မော်ဟန် ဘူတာကို ရောက်ဖို့ ၁ မိုင် လောက် အလို တံတားငယ် တခု အ၀င်မှာ မိုင်းဗုံး ထိခဲ့တာဖြစ်ပါတယ်။ ရထားမိုင်းထိတဲ့ အခြေအနေကို ဒေသခံ တယောက်က အခုလို ပြောပြပါတယ်။
"မန္တလေးမြစ်ကြီးနား အဆန်ရထားပေါ့။ အမှတ်၃၃ အိပ်စင်ရထား မိုင်တိုင်အမှတ် ၆၁၆/ ၁ နဲ့ ၂ ကြား၊ တံတားအမှတ်က ၅၃၄။ အချိန်က မနက် ၁နာရီခွဲအချိန်မှာ ဖြစ်သွားတာ ပေါ့နော်။ အဲဒီမှာ ရထား လာတဲ့ အချိန်မှာ စက်ခေါင်း အနောက်က ၃တွဲမြောက်မှာ ထောင်ထားတဲ့မိုင်းက စပေါက်ကွဲတာပေါ့။ မိုင်းထိတဲ့ တွဲကတော့ ကြမ်းပြင် ပေါက်ထွက်သွားတယ်။ နောက်တွဲတွေကတော့ လမ်းချော်သွားတယ်။ မချော်ဘဲကျန်ထားတာ သံလမ်းပေါ်မှာကတော့ ဂတ်တွဲတတွဲပဲ ကျန်တယ်ပေါ့ဗျာ။"
မိုင်းပေါက်ကွဲတာကြောင့် တတိယတွဲမှာ လိုက်ပါလာတဲ့ ဦးမျိုးမင်းထိုက်ဟာ ခြေထောက်ကျိုးသွားပြီး အသက် ၁၃ နှစ်အရွယ် ကိုရင် စန္ဒောဘာသဟာ ညာဖက်ခြေမျက်စေ့ ကွဲသွားကြောင်း၊ သူတို့တွေကို မိုးညှင်းမြို့နယ် ဆေးရုံမှာ ဆေးကုသ ပေးထားကြောင်းနဲ့ အသေအပျောက် မကြားသိရကြောင်း ပြောပါတယ်။
အခြားဒေသခံတယောက်ကတော့ ၃ ယောက်ဒဏ်ရာရကြောင်း ပြောဆိုပါတယ်။ မိုးညှင်းပြည်သူ့ ဆေးရုံကို ဆက်သွယ်ပေမဲ့ တာဝန်ရှိဆရာဝန်တွေ မအားလပ်ကြောင်း တုံပြန်ပါတယ်။ မြစ်ကြီးနားမြို့က မီးရထားဌာနနဲ့ နီးစပ်သူ တယောက်ကတော့ ရထားတွဲ ၈ တွဲ လမ်းချော်သွားတာကြောင့် လောလောဆည် ရထား ပြေးဆွဲတာတွေ ရပ်ဆိုင်းထားရတယ်လို့ ပြောပါတယ်။
"မိုင်းကွဲတဲ့အခါကျတော့ ၈ တွဲက derail ဖြစ်တယ်။ မီးရထားအခေါ်ကတော့ သံလမ်းကနေပြီး ချော်သွားတာပဲပေါ့။ ဘီးတွေ အောက်ကျသွားတာပေါ့ဗျာ။ ခရီးသည်တွေကတော့ မော်ဟန်ဘက်ကို လမ်းလျှောက် လာရတာပေါ့နော်။ မြစ်ကြီးနားကနေပြီးတော့ တရုတ်ရထား ခေါ်တယ်လေ။ အဲဒီရထားက မော်ဟန်မှာ ရှိတဲ့ ခရီးသည်တွေကို သွားကြိုဖို့လို့ ဆင်းသွားပြီ။ နောက်ရထားတွေ ပြေးဖို့ ဆွဲဖုိ့ကတော့ မြစ်ကြီးနားက ရထားတွေ မထွက်ဘူး၊ မန္တလေးကလည်း မထွက်ဘူး။ ဒီလမ်းပိုင်းကို ရှင်းပြီးတဲ့ အချိန်ကျမှ ထွက်ဖို့ အစီအစဉ်ရှိတယ်။ မနက်ဖြန်လောက်ဆိုရင်တော့ ပြီးနိုင်မယ်လို့တော့ မီးရထားဘက်က ခန့်မှန်း ထားတာပဲလေ။"
မန္တလေး မီးရထားဌာနကို ဆက်သွယ်မေးမြန်းရာမှာ ဒီကနေ့ ရထားခရီးစဉ်တွေအားလုံး ရပ်ဆိုင်းထားပြီး ဘယ်အချိန် ပြန်ထွက်မယ်ဆိုတာကို ဒီညနေလောက်မှ သိနိုင်မှာဖြစ်ကြောင်း။ ရပ်ဆိုင်းထားတဲ့ ခရီးစဉ် အတွက် လက်မှတ် ၀ယ်ယူထားသူတွေကိုလည်း ငွေပြန်အမ်းပေးနေကြောင်း တာဝန်ကျ ၀န်ထမ်းက ပြောပါတယ်။
လောလောဆည်မှာတော့ ဒီဗုံးပေါက်ကွဲမှုနဲ့ပတ်သက်ပြီး အစိုးရဘက်က ဘယ်သူ့လက်ချက်ဖြစ်ကြောင်း တရားဝင် ထုတ်ပြန်တာ မရှိသေးဘူးလို့ ဒေသခံတွေက ပြောကြပါတယ်။
ကချင်ပြည်နယ်အတွင်းမှာတော့ ကချင် လွတ်လပ်ရေးတပ်မတော် KIA နဲ့ မြန်မာအစိုးရ တပ်တွေအကြားမှာ ပြီးခဲ့တဲ့နှစ် ဇွန်လကစပြီး တိုက်ပွဲတွေ ပြန်လည် စတင်ခဲ့တဲ့နောက် ကချင်ပြည်နယ်အတွင်းမှာ အခုလို ဗုံးပေါက်ကွဲတာတွေ မကြာခန ဖြစ်ခဲ့ပါတယ်။
ဧပြီလ ၁၄ ရက်နေ့ ညပိုင်းမှာလည်း မြစ်ကြီးနားမြို့အထွက် မီးရထားသံလမ်းမှာ ဗုံးတလုံး ပေါက်ကွဲခဲ့ပါတယ်။ ဒီပေါက်ကွဲမှုမှာ ဇလီဖားတုံး ၄ တုံးလောက် ပျက်ဆီးသွားပေမဲ့ ထိခိုက်ဒဏ်ရာရတာ မရှိခဲ့ပါဘူး။ ဒီလ ၂၅ ရက်နေ့ မနက် ကချင်ပြည်နယ် လွှတ်တော်ရုံးအနီး ပေါက်ကွဲမှုမှာတော့ လူ ၃ ယောက် ဒဏ်ရာ ရခဲ့ပါတယ်။
ဒီရက်ပိုင်းတွေ အတွင်းမှာတော့ အစိုးရ စစ်တပ်တွေက KIA ဌာနချုပ် လိုင်ဇာမြို့ကို လက်နက်ကြီးတွေနဲ့ ပစ်ခတ် တိုက်ခိုက်နေသလို KIA ကလည်း ၀ိုင်းမော်မြို့နယ် ဆဒုံးမြို့နယ်ခွဲက အုပ်ချုပ်ရေးမှုးရုံးကို စီးနင်း တိုက်ခိုက်မှုမှာ အုပ်ချုပ်ရေးမှုး အပါအ၀င် လူ ၂ ယောက်သေဆုံးခဲ့ကြောင်း ဒေသခံတွေက ပြောပါတယ်။ မနေ့ကတော ပန်ဝါမြို့အနီးက လုပီခေါ် နယ်ခြားစောင့် စခန်းတခုကို KIA ဘက်က ၀င်ရောက် တိုက်ခိုက်တာကြောင့် အစိုးရဘက်က ရဟတ်ယာဉ်တွေနဲ့ စစ်ကူတွေ ပို့ဆောင်နေကြောင်း မြစ်ကြီးနား မြို့ခံတွေက ပြောပါတယ်။
KIA နဲ့ မြန်မာအစိုးရတပ်တွေအကြား တိုက်ပွဲ ဖြစ်ပွားနေတာဟာ အခုဆိုရင် ၁၁ နီးပါးကြာမြင့်လာပြီး ဒီတိုက်ပွဲတွေကြောင့် ဒေသခံ ပြည်သူ ၆ သောင်း ကျော်လောက်ဟာ နေရပ်စွန့်ခွာ ထွက်ပြေး နေကြရပါတယ်။ ကချင်လွတ်လပ်ရေးအဖွဲ့ KIO ကိုယ်စားလှယ်တွေနဲ့ အစိုးရရဲ့ ပြည်ထောင်စုအဆင့် ငြိမ်းချမ်းရေး ဆွေးနွေးရေး အဖွဲ့အကြား ငြိမ်းချမ်းရေး ပြန်လည် တည်ဆောက်နိုင်ဖို့ ၃ ကြိမ်တိုင် တွေ့ဆုံ ဆွေးနွေးခဲ့ပေမဲ့ အခုချိန်ထိတော့ နှစ်ဘက် တပ်တွေအကြားမှာ တိုက်ခိုက်တာတွေ ပြင်းထန်နေဆဲ ဖြစ်ပါတယ်။
Ref: VOA News
အစိုးရတပ်က ကေအိုင်အို ဗဟိုကို လက်နက်ကြီးနဲ့ တိုက်
2012-04-28
အစိုးရတပ်က ကေအိုင်အို ဗဟိုဌာနချုပ်ကို အခုရက်ပိုင်း အတွင်း လက်နက်ကြီးတွေနဲ့ ပစ်ခတ်နေတဲ့အပြင် တိုက်ပွဲတွေလည်း အဆက်မပြတ် ဖြစ်ပွါး နေတာကြောင့် ဗဟိုဌာနချုပ် လုံခြုံရေး အတွက် စိုးရိမ်စရာ ဖြစ်နေတယ်လို့ ကေအိုင်အို အရာရှိတွေ က ပြောပါတယ်။
ဒီနေ့ဆိုရင် လက်နက်ကြီးတွေနဲ့ မနက်စောစော ပစ်ခတ်ခဲ့ကြောင်း ကေအိုင်အို ပြောရေးဆိုခွင့်ရှိသူ ဦးလနန်က အခုလို ပြောပြပါတယ်။
"ဒီနေ့မနက် အစောကြီး တနာရီပတ်ဝန်းကျင်မှာ ၁၀၅ မမ ဟောင်ဝင်ဇာ အမြောက်နဲ့ ပစ်တုံးပဲ။ ကျနော်တို့ရဲ့ ဗဟိုဌာနချုပ်ရဲ့ နယ်မြေအတွင်း ကျရောက်တာတွေ ရှိတယ်။ ၂၇ ရက်နေ့ မနက် အစောကြီး ၃ နာရီ လောက်မှာလည်း ပစ်တယ။် ဗဟိုဌာနချုပ်ရဲ့ တပ်နယ်မြေလို့ ပြောလို့ရတယ်။ ဗဟိုဌာနချုပ်ရဲ့ အထက်ဖက် တောင်ကုန်းပေါ်မှာ ကျတယ်။ ဒါပေမဲ့ ၂၆ ရက်နေ့တုံးက ဂန်ဒေါ်ယန်ဘက်ကနေ ၁၀၅ မမ ဟောင်ဝစ်ဇာနဲ့ ပစ်တယ်။ ကျနော်တို့ရဲ့ ဗဟိုဌာနချုပ် ဒေသ ဖွံ့ဖြိုးရေးမိုင်ဆတ်ပါ ကျေးရွာမှာ ကျတယ်။"
ကေအိုင်အို လိုင်ဇာဌာနချုပ် အနီးဝန်းကျင် တစ်ဝိုက်မှာလည်း တိုက်ပွဲတွေ အဆက်မပြတ် ဖြစ်ပွါးနေပြီး အစိုးရတပ်က စစ်အင်အားတွေ တိုးချဲ့နေတာကြောင့် ဗဟို လုံခြုံရေး အတွက် စိုးရိမ်စရာ ဖြစ်နေတယ်လို့ သူက ဆက်ပြောပါတယ်။
"နေ့တိုက်ပွဲဖြစ်တဲ့ ပုံစံမျိုး မဟုတ်ဘဲနဲ့ ညအချိန်ပုံစံ လုပ်လာတဲ့အခါကျတော့ ဗဟိုလုံခြုံရေး အတွက် စိုးရိမ်စရာဖြစ်လာတာပေါ့။ ကေအိုင်အို တပ်တွေကလည်း နယ်မြေအနှံ့ လှုပ်ရှားမှုတော့ လုပ်ရတော့မှာပဲ။ ဒါကြောင့် တိုက်ပွဲတွေကလည်း နယ်မြေအနှံ့မှာ ဖြစ်လာတဲ့သဘောလို့ ပြောလို့ရတယ်ခင်ဗျ။ မျက်နှာစာအားလုံးမှာ သူတို့တပ်တွေက အင်နဲ့အားနဲ့ ချထားတာမျိုး ရှိတယ်။"
လိုင်ဇာဌာနချုပ် ကားလမ်းအနောက်ဖက်ခြမ်းရှိ တာလောကြီးဒေသ၊ ဂန်ဒေါ်ယန် ဒေသနဲ့ လိုင်စင် ဗဟိုဌာနချုပ် အဟောင်းနဲ့ လိုင်ဇာ အကြားရှိ နားဖော့စခန်းမှာ အစိုးရ တပ်အင်အား ဖြည့်ထားတာ အားလုံး ထောင်ဂဏန်းလောက် ရှိတယ်လို့ သိရပါတယ်။
ကေအိုင်အို နဲ့ အစိုးရကိုယ်စားလှယ်တွေ တရုတ်နိုင်ငံရွှေလီမြို့မှာ ပြည်ထောင်စုအဆင့် ဆွေးနွေးပွဲတွေ သုံးကြိမ် ဖြစ်ခဲ့ပါတယ်။ နောက်ထပ်တွေ့ဆုံ ဆွေးနွေးဖို့ အတွက် အစိုးရက မြစ်ကြီးနားမှာ တွေ့ဆုံ ဆွေးနွေးဖို့ ဧပြီလ ၁၇ ရက်နေ့က ကမ်းလှမ်းထားတာကို ကေအိုင်အိုက စစ်ရေးအရ တိုက်ခိုက်နေတဲ့ အခုလို အချိန်မျိုးမှာ အဲဒီမှာ တွေ့ဆုံဖို့ မဖြစ်နိုင်တဲ့ အကြောင်း ဧပြီ ၂၀ ရက်နေ့က အကြောင်း ပြန်ခဲ့တယ်လို့ သိရပါတယ်။
Ref: RFA News
Posts
