ရော်နီညိမ်း
တနင်္ဂနွေ, 14 နိုဝင်ဘာ 2010
တပ်မှူးတပ်သား ပြောစကား (၀၃၄)
မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ဟာ နေအိမ်မှာ အကျယ်ချုပ်နဲ့ အကျဉ်းကျ နေရာက နိုဝင်ဘာ (၁၃) ရက် နေ့မှာ ပြန်လည် လွတ်မြောက် လာခဲ့ပါပြီ။ ဒီနှစ်ထဲမှာပဲ ကသာ အကျဉ်းထောင်ကနေ ပြန်လည် လွတ်မြောက် လာခဲ့သူဟာ ဒေါ်အောင်ဆန်းစုကြည်ရဲ့ လက်ထောက် တစ်ဦး ဖြစ်ခဲ့သူ ဗိုလ်ကြီးဟောင်း ဦးဝင်းထိန်ပါ။ သူ့ရဲ့ခေါင်းဆောင် ဒေါ်အောင်ဆန်းစုကြည်နဲ့ ပတ်သက်ပြီး ဦးဝင်းထိန်ရဲ့ ရှုမြင် သုံးသပ်ထားတဲ့ အမြင် သဘောထားတွေကို ဒီတပတ် “တပ်မှူးတပ်သား ပြောစကား” အပတ်စဉ် ကဏ္ဍမှာ “မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် နှင့် အောင်စစ်သည်ဆုရ ဗိုလ်ကြီးဟောင်း ဦးဝင်းထိန်” ခေါင်းစဉ်နဲ့ ဦးရော်နီညိမ်း က စီစဉ် တင်ဆက် ထားပါတယ်။
ဦးရော်နီညိမ်း။ ။ စစ်အစိုးရက ချမှတ်ခဲ့တဲ့ ထောင်ဒဏ်(၁၄) နှစ်ကို လျှော့ရက်မရှိ အပြည့်အ၀ ကျခံခဲ့ရ ပြီးတော့၊ ပြီးခဲ့တဲ့ ဇူလိုင်လ(၁၅) ရက်နေ့က ကသာ ထောင်ကနေ ပြန်ပြီး လွတ်မြောက်လာသူကတော့ အမျိုးသား ဒီမိုကရေစီ အဖွဲ့ချုပ်က ဗိုလ်ကြီးဟောင်း ဦးဝင်းထိန် ဖြစ်ပါတယ်။ ပြည်ပ သတင်းမီဒီယာတွေကို သတင်းမှားတွေ ပေးပို့တယ် ဆိုတဲ့ စွပ်စွဲချက်နဲ့ ၁၉၉၆ ခုနှစ်မှာ ဦးဝင်းထိန်ဟာ ဒုတိယ အကြိမ် ဖမ်းဆီးခံရပြီး ထောင် ဒဏ်(၁၄)နှစ် ကျခံခဲ့ရတာ ဖြစ်ပါတယ်။ ၁၉၈၉ ခုနှစ်ကလည်း ဇူလိုင်လ(၂၀) ရက်နေ့မှာ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ အတူ အထိန်းသိမ်း ခံခဲ့ရပြီး ပထမအကြိမ် ထောင်ဒဏ် (၆) နှစ် ကျခံခဲ့ရပါတယ်။ ၁၉၉၅ ခုနှစ်မှာ ပြန်ပြီး လွတ်လာခဲ့ပါတယ်။ ဒေါ်အောင်ဆန်းစုကြည် ရဲ့ အနီးကပ် လက်ထောက် တစ်ဦး ဖြစ်လာခဲ့ပုံကို ဦးဝင်းထိန်က အခုလို ရှင်းပြခဲ့ပါတယ်။
ဦးဝင်းထိန်။ ။ စစချင်းကတော့ ကျနော်က ဦးတင်ဦး အနားမှာပဲ ရှိတယ်လေ။ ဒေါ်အောင်ဆန်းစုကြည် ကနေပြီးတော့ တစ်နိုင်ငံလုံး စည်းရုံးရေး ခရီးထွက်မယ်၊ ထွက်တဲ့အခါ မြို့တွေမှာ ရင်ဆိုင်ရမယ့် ကိစ္စတွေကို ဒိုင်ခံ ဖြေရှင်းနိုင်မယ့် လူတစ်ယောက် ပေးပါ ဆိုပြီးတော့၊ ဒေါ်အောင် ဆန်းစုကြည်က ဦးတင်ဦးဆီကို ပြောတဲ့အခါမှာ ကျနော်က ပါသွားတယ်။ စစချင်း အထက် မြန်မာပြည်ပေါ့၊ ပြည်တို့ မကွေးတို့ တောင်တွင်းကြီး တို့ အစရှိတဲ့ နေရာတွေ သွားတဲ့အခါမှာ အဲဒီကတည်းက သူတို့က အန်အယ်လ်ဒီကို စနစ်တကျ နှိပ်ကွပ်ရမယ် ဆိုတာ ညွှန်ကြားချက် ရှိထား တယ်နဲ့ တူတယ်။ ရောက်တဲ့ နေရာတွေမှာ ပြဿနာ ရှာတယ်။ ပြဿနာ ရှာတဲ့ အခါကျတော့ မ၀တ ဥက္ကဌတွေက များသောအား ဖြင့်ကလည်း စစ်တပ်ကလူတွေ ဆိုတဲ့ အခါကျတော့၊ ကျနော်က ပြောရ ဆိုရတာ လွယ်တယ်။ သာယာညှင်းပြောင်း ပြောမယ်၊ သို့မဟုတ်လည်း တခါတလေ ကျရင် ဆွေးနွေးမယ်၊ တခါတလေ ကျရင်လည်း နည်းနည်း တင်းတင်း မာမာ ပြောမယ်နဲ့ ပြဿနာတွေကို ဖြေရှင်းလာတော့၊ နောက်ဆုံးမှာ ပြန်လာတဲ့အခါမှာ ကျနော့်ကို ဒေါ်စုရုံးမှာ ထားပေးပါလို့ မေတ္တာ ရပ်ခံတော့ ကျနော်ကလည်း လိုလိုလားလားနဲ့ ရောက်သွားတယ်။ ရောက်သွားတဲ့ အခါမှာတော့ ဒေါ်စုရဲ့ ရုံးကိစ္စတွေ အစည်းဝေး ကိစ္စတွေ၊ စာတွေ ဖတ်တယ်၊ ပြင်တယ် လုပ်တဲ့အခါမှာ၊ သူများတွေက ကျနော့်ကို မျိုးစုံပြောတာပေါ့၊ ဒေါ်စုရဲ့ ပီအေ၊ ဒေါ်စုရဲ့ ပီအက်စ်အို၊ ဒေါ်စုရဲ့ ရုံးအဖွဲ့မှူး ဘာညာ။ ကျနော်ကတော့ ကိုယ့်ကိုယ်ကို ရာထူးရယ်လို့ သတ်မှတ်ထားတာကို မရှိဘူး။ ဒေါ်စု အထွေထွေ အတွင်းရေးမှူးရဲ့ ရုံးကိစ္စတွေ လုပ်ပေးတဲ့ လူတစ်ယောက် အဖြစ်ပဲ ကိုယ့်ကိုယ်ကို သတ်မှတ် ထားတယ်။ ဒါ တစ်ချက်။ နောက်တစ်ချက်က ဒေါ်အောင်ဆန်းစုကြည် ကလည်း ကျနော့်ထက် ငယ်တာကိုး။ ငယ်တော့ ကျနော့်ကို သူ့ရဲ့ လက်ထောက် အနေနဲ့ ပြောရမှာ ပါးစပ်က သူနှုတ်တွန့်နေဟန် တူတယ်။ အားနာနေဟန် တူတယ်။ ဒါကြောင့် ကျနော့်ရဲ့ ရာထူးကို သီးခြားဘာမှ ကျနော်တို့ နှစ်ယောက်ကြားမှာ သတ်မှတ်ထားတာ မရှိဘဲနဲ့ သူများ ပြောရင်လည်း ရုံးအဖွဲ့မှူး ဆိုလည်း ‘ဟုတ်တာပေါ့’၊ ဒေါ်စုလက်ထောက် ဆိုလည်း ‘သြော် ဟုတ်တယ်’၊ ဒေါ်စု ရဲ့ပီအေ ဆိုလည်း ‘ထားလိုက်ပါတော့’။ အဲ…အဲဒီလိုမျိုးနဲ့ ဖြစ်လာတာပါ။
ဦးရော်နီညိမ်း။ ။ ပြီးခဲ့တဲ့(၂၂) နှစ် အတွင်း ထောင်ထဲမှာ စုစုပေါင်း နှစ် (၂၀) လောက် နေခဲ့ရသူ ဦးဝင်းထိန်ဟာ ၁၉၆၃ ခုနှစ် စစ်တက္ကသိုလ် ဗိုလ်သင်တန်း အပတ်စဉ် (၅) ရဲ့ အောင်စစ်သည် ဆုနဲ့ စာပေ ထူးချွန်ဆု၊ ဆုနှစ်ဆုကို ရပြီး ကျောင်းဆင်းခဲ့သူ ဖြစ်ပါတယ်။ မြန်မာ့ တပ်မတော် (ကြည်း)မှာ အရာရှိ ဖြစ်လာခဲ့သူ ဗိုလ်ကြီး ၀င်းထိန်ဟာ ၁၉၇၆ ခုနှစ်မှာတော့ ကာကွယ်ရေး ဦးစီးချုပ် ဗိုလ်ချုပ်ကြီး သူရကျော်ထင်ရဲ့ ကိုယ်ရေးအရာ ရှိ ဗိုလ်ကြီး အုန်းကျော်မြင့်ရဲ့ မြန်မာ့ ဆိုရှယ်လစ်လမ်းစဉ် ပါတီ ထိပ်တန်း ခေါင်းဆောင်တွေကို လုပ်ကြံမယ့် အစီအစဉ်မှာ ပတ်သက်မှု ရှိခဲ့တယ်ဆိုတဲ့ စွပ်စွဲချက်နဲ့ တပ်မတော်ကနေ ထုတ်ပယ်ခြင်း ခံခဲ့ရပါတယ်။ ဦးဝင်းထိန်ဟာ ၁၉၈၈ ခုနှစ်လူထု အုံကြွမှု အရေးတော်ပုံ ကာလအထိ နိုင်ငံခြားကုမ္ပဏီ တွေရဲ့ ဌာနေ ကိုယ်စားလှယ် အဖြစ်၊ အဲဒီခေတ်က အောင်မြင်တဲ့ ကိုယ်ပိုင် စီးပွါးရေး လုပ်ငန်းကို လုပ်ကိုင်ခဲ့သူ တစ်ဦးဖြစ်ပါတယ်။ ရှစ်လေးလုံး အရေးတော်ပုံကြီး ကာလမှာ ဦးဝင်းထိန်ဟာ “မျိုးချစ် ရဲဘော်ဟောင်းများ” အဖွဲ့ဝင်တစ်ဦး ဖြစ်ခဲ့ပြီးတော့၊ အမျိုးသား ဒီမိုကရေစီ အဖွဲ့ချုပ်ကို ဖွဲ့စည်း တည်ထောင် ခဲ့ရာမှာ အငြိမ်းစားဗိုလ်ချုပ်ကြီး သူရဦးတင်ဦးရဲ့ လက်ထောက်တွေထဲက တစ်ဦး အဖြစ်နဲ့ အန်အယ်လ်ဒီ ပါတီထဲကို ရောက်ရှိလာခဲ့ ပါတယ်။ ဒီလို ဒေါ်အောင်ဆန်းစုကြည်ရဲ့ ယုံကြည်စိတ်ချစွာ တာဝန်တွေ ပေးအပ်ခြင်း ခံရသူ ဖြစ်လာတဲ့ အခါမှာ။ ကိုယ့်ရဲ့ခေါင်းဆောင် အပေါ် ပထမဆုံး သူ့ရဲ့ ရှုမြင် သုံးသပ်ခဲ့မှုကို ဦးဝင်းထိန်က အခုလို ပြောပါတယ်။
ဦးဝင်းထိန်။ ။ ပွင့်ပွင့်လင်းလင်း ပြောရမယ်ဆိုရင်တော့ ဒေါ်အောင်ဆန်းစုကြည် ဆိုတာ နံမည်ပဲ ကြားဖူးတာ ကိုး။ နံမည်ပဲ ကြားဖူးတဲ့ အခါကျတော့ သူ့ အရည်အချင်းလည်း ကျနော် မသိဘူး။ ကျနော်ထက်လည်း ငယ်တယ်။ နောက်ပြီးတော့ နိုင်ငံခြားမှာလည်း သွားနေတယ် ဆိုတော့၊ ကျနော် သိပ်ပြီးတော့ လေးလေးနက်နက် မရှိမိဘူး။ သို့သော် ခရီးသွားရင်းနဲ့ တွေ့တဲ့အခါမှာ၊ ပြည်သူလူထုနဲ့ ဆက်ဆံတာတွေ နောက် သူ့ရဲ့ ပြောဆိုတာတွေ၊ နှစ်ယောက်ချင်း အချိန်ရလို့ ပြောတာဆိုတာတွေ ရှိတဲ့အခါမှာ သူဟာ ကျနော့်ထက် ငယ်သော်လည်းပဲ၊ နိုင်ငံရေး အရည် အချင်းကတော့ ကျနော့်ထက် အများကြီး မြင့်တယ် ဆိုတာ သိလိုက်ရတဲ့ အတွက်၊ ဒါက တစ်ကြောင်း။ နောက်တစ်ကြောင်းက သူ့ရဲ့ စေတနာ၊ ဘာ စေတနာလဲ ဆိုရင် နိုင်ငံရေး လုပ်တဲ့အခါမှာ ဒီနိုင်ငံရဲ့ အာဏာ အပြောင်းအလဲကို သွေးထွက်သံယို မရှိဘဲနဲ့လုပ်တဲ့ ထုံးတမ်း စဉ်လာတစ်ခု တည်ဆောက်မယ် ဆိုတဲ့ သူ့ရဲ့စေတနာကို ကျနော်က လေးစားပြီးတော့မှ သူ့ဆီ မှာ လုပ်ဖို့ သဘောတူခဲ့တာ။
ဦးရော်နီညိမ်း။ ။ ၁၉၈၉ ခုနှစ် အာဇာနည်နေ့မှာ စစ်အစိုးရက အန်အယ်လ်ဒီပါတီ အနေနဲ့ လူထုကို ဦးဆောင်ပြီး အာဇာနည် ဗိမာန်ကို ချီတက်ပွဲ ပြုလုပ်ရင်၊ ပစ်ခတ် နှိမ်နင်းမယ်လို့ ရာဇသံ ပေးထားခဲ့တဲ့ အပေါ် ဒေါ်အောင်ဆန်းစုကြည် အနေနဲ့ အရေးကြီးတဲ့ ဆုံးဖြတ်ချက်ကို ချတာ မှာ၊ အနီးကပ် လက်ထောက်ဖြစ်နေသူ ဦးဝင်းထိန်အနေနဲ့ သူကြုံတွေ့ခဲ့ရ တဲ့ အတွေ့အကြုံကို အခုလို ပြောပါတယ်။
ဦးဝင်းထိန်။ ။ အာဇာနည်နေ့ ကိစ္စကတော့ ဒါ န၀တ အစိုးရ ထောင်ဖမ်းတဲ့ သဘောပေါ့။ ဘယ်လို ထောင်ဖမ်း သလဲ ဆိုရင်၊ အာဇာနည် ကုန်းကို ချီတက်တဲ့နေ့မှာ ဘယ်နှစ်ယောက်ပဲ လာရမယ်တို့ ဘယ်နှစ်ယောက်ပဲ အလေးပြုခွင့် ရှိတယ်တို့ သတ်မှတ်လိုက်တယ် ဆိုတာ ဒါ တမင် သက်သက် နိုင်ငံရေး ဆင်ကွက်ကိုး။ အဲဒါကို ဒေါ်စုက လက်မခံဘဲနဲ့ ပထမ သူတို့ အမိန့်ကို မနာခံဘဲ ချီတက်မယ် ဆိုပြီးတော့၊ ညကျမှ လူကြီးတွေ နဲ့ တိုင်ပင်ပြီးတော့ နောက်တစ်နေ့ မချီ တက်တော့ဘူးဆိုတဲ့ သဘော ဖြစ်တဲ့အခါ၊ ဒါပေမယ့် အဲလို လုပ်တဲ့အခါမှာ နောက်ကျသွားပြီ။ သူတို့က နှိပ်ကွပ်ဖို့ ဆုံးဖြတ်လိုက်တဲ့ အခါမှာ၊ ကျနော် အပါအ၀င် ဒေါ်စုခြံထဲမှာ ရှိတဲ့ လူတွေ အကုန်လုံးကို ထောင်ထဲ ပို့လိုက်တာပေါ့။ ဒေါ်အောင်ဆန်းစု ကြည်ကတော့ သူက နိုင်ငံတကာ အတွေ့ အကြုံကော၊ ပြည်တွင်းမှာ ၁၉၈၉ခုနှစ် ဇူလိုင်လအထိ လှုပ်ရှားခဲ့တာကော၊ နည်းတာမဟုတ်ဘူး။ နောက်ပြီးတော့ အရေးကြီးတဲ့ ဆုံးဖြတ်ချက်တွေ ချမယ် ဆိုလို့ရှိရင် ဒီ CEC (Central Executive Committee – ဗဟို အလုပ်အမှုဆောင် ကော်မီတီ) ပေါ့၊ ဦးကြည်မောင်တို့ ဦးအောင်ရွှေတို့ ဗိုလ်ချုပ်ကြီးတင်ဦးတို့ နဲ့ တိုင်ပင်သလို ကျနော်တို့နဲ့လည်း သီးသန့် တိုင်ပင်တာတွေ ရှိတယ်။ တိုင်ပင်တဲ့ အခါမှာ ကျနော်တို့က ကိုယ့်အမြင်ကို ပွင့်ပွင့်လင်းလင်း ပြောတဲ့အခါမှာ တခါတလေကျ သူ လက်ခံတာလည်း ရှိတယ်။ လက်မခံတာ လည်း ရှိတယ်။ သူ လက်မခံတဲ့ ဟာတွေလည်း ကျနော်တို့က နားလည်တယ်။ အဲဒီလိုပေါ့၊ တဘက်သတ် န၀တ စွပ်စွဲသလို အာဏာကို သုံးပြီး တော့မှ သူ့အရှိန်အ၀ါနဲ့ လူကြီးတွေကော လူငယ်တွေကော ဒရွတ်တိုက်ပြီး ခေါ်သွားတယ် ဆိုတဲ့ဟာ မဟုတ်ပါဘူး။
ဦးရော်နီညိမ်း။ ။ ပထမအကြိမ် ဖမ်းဆီးခြင်းခံခဲ့ရပြီး (၆)နှစ်အကြာ ၁၉၉၅ ခုနှစ်မှာ ဦးဝင်းထိန်ဟာ ဒေါ်အောင်ဆန်း စုကြည်ထက် လ အနည်းငယ်စောပြီး လွတ်မြောက် လာခဲ့ပါတယ်။ ဒေါ်အောင်ဆန်းစုကြည် အကျဉ်းကျ နေစဉ်မှာ စစ်အစိုးရရဲ့ ဖိအားပေးမှုနဲ့ ဒေါ်အောင်ဆန်းစုကြည် ကို အန်အယ်လ်ဒီကနေ ထုတ်ပယ်ခဲ့ရတယ် ဆိုတဲ့ ကိစ္စနဲ့ ပတ်သက်ပြီး ဒေါ်အောင်ဆန်းစုကြည်က ဒီကိစ္စ အပေါ်မှာ ရပ်တည်ခဲ့ပုံကို ဦးဝင်းထိန် က အခုလိုပြောပြပါတယ်။
ဦးဝင်းထိန်။ ။ ၁၉၉၅ ခုနှစ်မှာ ကျနော်က ဖေဖော်ဝါရီလ (၅) ရက်နေ့မှာ လွတ်တယ်။ ဒေါ်စုက ဇူလိုင်လ (၁၀) ရက်နေ့မှာ လွတ်တယ် ဆိုတော့၊ (၅) လလောက် ကွာတာပေါ့။ အဲဒီတုန်းက န၀တရဲ့ ဖိအားပေးမှုကြောင့် ဒေါ်အောင်ဆန်းစုကြည်နဲ့ ဦးတင်ဦးကို အန်အယ်လ်ဒီက ထုတ်ထားပြီးပြီ။ အဲဒီတော့ နယ်တွေမှာလည်း အဲဒီလို ထုတ်ထားလို့ မကျေနပ်တဲ့ ကိစ္စနဲ့ ပတ်သက်ပြီး အသီးသီး တကွဲတပြား ဖြစ်နေကြပြီ။ အဲလိုဆိုတော့ …အင်း ..ဒေါ်စု လွတ်ရင်တော့ ဘယ်လိုများ နေမလဲမသိဘူး ဆိုပြီး၊ ကျနော် အတွေးတွေ ဝေနေတာပေါ့။ တကယ်လည်း ဇူလိုင် လ(၁၀)ရက်နေ့ လွတ်တဲ့ အခါကျတော့၊ အပြင်က လူအုပ်ကြီးတွေ အများကြီး ပေါ့လေ။ နိုင်ငံခြား သံရုံးတွေ နိုင်ငံခြား သတင်းထောက်တွေပါ အကုန်လုံး ရောက်လာတဲ့ အချိန်မှာ ပထမဦးဆုံး မေးတဲ့ မေးခွန်းက ဘာလဲဆိုရင်၊ ‘ဒေါ်အောင်ဆန်းစုကြည်က ဦးအောင်ရွှေအပေါ်မှာ ဘယ်လို သဘော ထားသလဲ ဆိုတာ။ အဲဒီမေးခွန်းက သိပ်အရေးကြီးတယ်။ ကျနော်လည်း လုံးဝ မမျှော်လင့်ထားဘူး။ ဦးအောင်ရွှေတို့ ဦးလွင်တို့ ဆိုတာက အန် အယ်လ်ဒီကနေ ဒေါ်စုကို ထုတ်ထားတဲ့ ပုဂ္ဂိုလ်တွေ။ အဲဒီအချိန်မှာ ထိုင်နေတာက ညာဘက်မှာ ဦးအောင်ရွှေနဲ့ ဦးလွင်၊ ဘယ်ဘက်မှာ ဦးတင်ဦး နဲ့ ဦးကြည်မောင်၊ ကျနော်က မှတ်တမ်းတင်ပေါ့။ အဲဒီတော့ ဒေါ်စုရဲ့အဖြေက ဘယ်လောက်အထိ အချက်ကျသလဲ ဆိုလို့ရှိရင် “ကျမတို့ အခု ဒီလို အတူတူ ထိုင်နေကြတာပဲ ကြည့်ကြပါ။ ဒီလို အတူတူ ညီညီညွတ်ညွတ် ထိုင်နေကြသလို နောင်ဆိုရင်လည်း ဒီလိုပဲ ညီညီညွတ်ညွတ် လုပ်သွားကြမယ်” ဆိုတဲ့ အဖြေတစ်ခုနဲ့တင် အရင်တုန်းက န၀တ ဆင်ထားတဲ့ ဆင်ကွက်ကြီးက အကုန်လုံး ပျက်သွားတယ်။ သူတို့ ဆင်တာက ဘယ်လိုလဲ ဆိုတော့ ဦးအောင်ရွှေနဲ့ ဦးလွင်ကတော့ ဒေါ်စုကို ထုတ်လိုက်ပြီ။ ဒေါ်စုက မာနကြီးတယ်။ စိတ်ထက်တယ်။ ဒေါ်စုကတော့ ခံမှာ မဟုတ်ဘူး။ ဦးအောင်ရွှေနဲ့ ဦးလွင်ကို ဆော်ကြမှာပဲ။ အန်အယ်လ်ဒီ နှစ်ခြမ်းကွဲမှာပဲ ဆိုတဲ့ ပုံစံမျိုးနဲ့လုပ်တဲ့ ခွင်ကြီးဟာ၊ အဲဒီ အဖြေတစ်ခုတည်းနဲ့ ကိစ္စပြီးသွားပြီ လို့ ကျနော်က ဘေးကနေရင်းနဲ့ သဘော ပေါက်လိုက်တယ်။
ဦးရော်နီညိမ်း။ ။ ပြီးခဲ့တဲ့ ရွေးကောက်ပွဲမှာ ဦးဝင်းတင်က ပြောပါတယ်။ “ဒီရွေးကောက်ပွဲ ဒီလိုပဲ ဖြစ်လိမ့်မယ်။ ဒီလိုတွေပဲ ကြုံရမယ်” ဆိုတာ သိနေတဲ့ ဒေါ်အောင်ဆန်းစုကြည်က ဒီရွေးကောက်ပွဲကို အန်အယ်လ်ဒီ အနေနဲ့ မ၀င်ဖို့ ဆုံးဖြတ်ချက်ချမှုက ခိုင်မာတယ်၊ ဒီဆုံးဖြတ်ချက် ပေါ် မူတည်ပြီးတော့ “ပြည်သူလူထုကလည်း ကိုယ်မဲ မပေးချင်တဲ့ ပါတီကို မဲမပေးဘဲ နေလို့ရတယ်” ဆိုတဲ့ ဒေါ်အောင်ဆန်းစုကြည်ရဲ့ ပြည်သူကို သတင်းပေးချက်ကလည်း အောင်မြင် ပေါက်ရောက်တယ်၊ ဒါတွေ အတွက်ကြောင့်မို့လို့ “ဒီရွေးကောက်ပွဲမှာ ဒေါ်အောင်ဆန်းစုကြည် နိုင်တယ်” လို့ ဦးဝင်းတင်က ပြောပါတယ်။ အဲဒီအပေါ်မှာကော ဦးဝင်းထိန် အနေနဲ့ ဘယ်လိုများ မှတ်ချက်ပေးချင်ပါသလဲ ခင်ဗျာ။
ဦးဝင်းထိန်။ ။ ကျနော်က အခု သွားတာလာတာတွေက ဘတ် (စ်) ကားနဲ့ သွားနေတယ်။ ဘာ့ကြောင့်လဲ ဆိုရင် ဘတ်(စ်)ကားထဲမှာ လူ တွေ ပြောတဲ့ ဆိုတဲ့ အသံကို နားထောင်ချင်လို့။ အခု ရွေးကောက်ပွဲလည်း ပြီးလို့ မနေ့ကကော တမြန်နေ့ ကကော ဘတ်စ်ကားပေါ်မှာ “ ဟာ အန်အယ်လ်ဒီ လုပ်တာ မှန်တာပေါ့၊ ဒေါ်စုလုပ်တာ မှန်တာပေါ့” ဆိုတာမျိုးတွေ ကြားရတယ်။ အဲဒီလိုတွေ ဖြစ်လာတယ်။ ပြောရရင်တော့ ပါဠိ စကား ပေါ့ဗျာ။ ဗဟိဒ္ဓ နဲ့ အဇ္ဇျတ ၊ ဗဟိဒ္ဓ ဆိုတာ ‘အပြင်’ ပေါ့။ ‘အဇ္ဇျတ’ ဆိုတာ အတွင်းသားပေ့ါ။ ဗဟိဒ္ဓ အားဖြင့်ဆိုရင် သတင်းစာထဲမှာ ကြည့် လိုက်။ အမတ်တွေဟာ ပြည်ခိုင်ဖြိုး၊ ပြည်ခိုင်ဖြိုး၊ ပြည်ခိုင်ဖြိုး၊ ပြည်ခိုင်ဖြိုး အကုန်လုံးပဲ။ ဒါ ဗဟိဒ္ဓအားဖြင့် သူတို့ နိုင်တယ်ဆိုတဲ့ သဘောပေါ်တာ ပေါ့။ သို့သော်လည်း အဇ္ဇျတ အားဖြင့်ဆိုရင် အရပ်ထဲမှာ သွားကြည့်၊ ဈေးထဲမှာ သွားကြည့်၊ ဘတ်စ်ကားပေါ်မှာ သွားကြည့်၊ လူတွေက ဒီရွေး ကောက်ပွဲကြီးကို ဟာသ လုပ်နေကြတယ်။ အပြစ် ပြောနေကြတယ်။ ဟာ..ရိုက်စားကြီးပါကွာ ပေါ့။ အဲဒီတော့ အဇ္ဇျတ အားဖြင့်ဆိုရင် ဒေါ်အောင် ဆန်းစုကြည်ပြောတဲ့ အနှစ်သာရဟာ မှန်ကန်တယ်။ အမှန်အတိုင်း သုံးသပ်ကြည့်ရမယ် ဆိုရင်တော့ ကျနော်တို့ အန်အယ်လ်ဒီ ဟာ၊ တကယ့် ဒေါင်ဒေါင်မြည်တွေပဲ ကျန်တယ်။ နောက်ပြီးတော့ ယောယိယောရာ informer (စစ်အစိုးရကို သတင်းပေးသူများ) တွေကလည်း အများကြီးပဲ။ ကျနော် သတိ ထားမိတယ်။ နောက် ဒေါ်စုအနေနဲ့ ဘာ program ချမလဲ ဆိုတာလည်း ကျနော်တို့ မျှော်လင့်နေတယ်။ အခုတလော ခင်ဗျားတို့ လည်း ကြားမှာပေါ့။ “ဒုတိယ ပင်လုံညီလာခံ” ခေါ်မယ့် ကိစ္စ။ အဲဒီကြေညာချက် ထုတ်တုန်းက ကျနော် ဒုလဘ္ဘ ရဟန်းဝတ်နေလို့ မကြားမိဘူး။ အပြင် ထွက်လာတဲ့ အခါကျမှ ကြားတဲ့ အခါကျတော့ စဉ်းစားကြည့်တာမှာ ဒီအယူအဆဟာ တော်တော်တော့ အဓိပ္ပါယ် ရှိတယ်လို့။ ဘာလို့လဲ ဆိုရင် ကျနော်တို့ တိုင်းပြည်မှာ အခုထက်ထိ တိုင်းရင်းသား အချင်းချင်း ညီညီညွတ်ညွတ်နဲ့ စစ်မှန်တဲ့ ငြိမ်းချမ်းရေး မရနိုင်သေးဘူး။ တကယ့် စစ်မှန်တဲ့ တိုင်းရင်းသား စည်းလုံးညီညွတ်မှု မရနိုင်သေးတဲ့ အတွက် ရအောင်လုပ်ဖို့၊ ဒုတိယအကြိမ် ပင်လုံညီလာခံ လုပ်တာဟာ အင်မတန် အဓိပ္ပါယ်ရှိတယ်လို့ ကျနော် သဘောပေါက်တယ်။ ကိုယ့်ဘာသာ စဉ်းစားပြီးတော့ ဒါကို သိပ်သဘောကျနေတာ။
ဦးရော်နီညိမ်း။ ။ ဒေါ်အောင်ဆန်းစုကြည် ပြန်လည်လွတ်မြောက်လာတဲ့အခါမှာ ဦးဝင်းထိန်အနေနဲ့ ကိုယ့်ရင်ထဲက လာတဲ့ ရဲဘော်ရဲဘက် စကားမျိုး ဘယ်လိုများ ပြောဖို့ စဉ်းစား ထားပါသလဲလို့ နောက်ဆုံး မေးပါရစေ ခင်ဗျာ။
ဦးဝင်းထိန်။ ။ ကျနော်တို့ နှစ်ပေါင်း (၂၀) အန်အယ်လ်ဒီမှာ လှုပ်ရှားပါဝင်တဲ့ အခါမှာ၊ ဒေါ်စုက စပြီး ဟိုးအောက်ခြေက အန်အယ်လ်ဒီ ပါတီဝင်တွေ အထိဟာ ဆုံးရှုံးမှုတွေ၊ နစ်နာမှုတွေ၊ ပေးဆပ်မှုတွေ အသက်တောင် သေသွားပြီး အသက်စွန့်တဲ့ လူတွေ အများကြီး ရှိခဲ့တယ်။ ရှိခဲ့တော့၊ အဲဒီလို လူတွေ ရှိတဲ့အတွက်ကြောင့် ကျနော့်မှာ ဆုံးရှုံးရချည်ရဲ့လို့ ပြောရမှာ ရှက်တယ်။ အဲဒီတော့ ကိုယ့်ယုံကြည်ချက် ကလည်း ရှိနေတဲ့ အတွက်ကြောင့်မို့ ဒေါ်စုလုပ်တဲ့ အတိုင်း ကျနော် ဆက်ပြီးတော့ လုပ်ရလိမ့်မယ်။ ဆက်ပြီးတော့လည်း သူ ကျနော့်ကို ဘယ်မှာ ထားမလဲ၊ သူ့နားမှာ ထားချင်လည်းထား၊ မထားချင်လည်း မြို့နယ် ပို့မလား၊ တိုင်း ပို့မလား၊ ကြိုက်တဲ့နေရာပို့။ လုပ်မယ်လို့ ကျနော် ဆုံးဖြတ်ပြီးပြီ။ ကျနော်တို့ ၁၉၉၀ ခုနှစ် ရွေးကောက်ပွဲကြီး တစ်ခုလုံးမှာ အန်အယ်လ်ဒီက ပြတ်ပြတ်သားသား နိုင်ခဲ့တဲ့ အတွက်ကြောင့်မို့ အခုရွေးကောက်ပွဲက လည်း သူတို့က တရားဝင် မကြေညာဘဲနဲ့ အာဏာ ပြန်သိမ်းတာပဲ။ သဘောကတော့ ဒီအတိုင်း ပဲ။ ပြည်သူလူထုတွေကို မေးကြည့်လိုက်ရင် မကျေနပ်တဲ့လူက အများကြီး။ ဒါပေမယ့် အကြောက်တရား ရှိနေကြတယ်။ အဲဒီ အကြောက်တရား ကိုတော့ ကိုယ့်ကိုယ်ကို ဆင်ခြင်ပြီးတော့မှ မတရားတာကို နည်းမျိုးစုံနဲ့ တတ်နိုင်သမျှ ဆန့်ကျင်ပေးကြပါ။ အထူးသဖြင့် ဒေါ်အောင်ဆန်းစုကြည်လို ပုဂ္ဂိုလ်တွေကို ပိုပြီးတော့ ထောက်ခံပေး ကြပါလို့ မေတ္တာရပ်ခံချင်တယ်။ ဒါပါပဲဗျာ။
Ref: VOA News
Read More...
Collapse...
Thursday, 18 November 2010
မြန်မာ့ ဒီမိုကရေစီ ခေါင်းဆောင် နိုဗဲလ် ငြိမ်းချမ်းရေးဆုရှင် ဒေါ်အောင်ဆန်းစုကြည်သည် စစ်အစိုးရ၏ နေအိမ် အကျယ်ချုပ်မှ နိုဝင်ဘာ ၁၃ ရက်နေ့တွင် ပြန်လည် လွတ်မြောက် လာခဲ့သည်။
ဒေါ်အောင်ဆန်းစုကြည်၏ စစ်အစိုးရအပေါ်သဘောထား၊ ၎င်း ဆက်လက် ဆောင်ရွက်မည့် နိုင်ငံရေး ရှေ့လုပ်ငန်းစဉ် များနှင့် ရွေးကောက်ပွဲ အပြီး နိုင်ငံရေး အခင်းအကျင်း အပေါ် အမြင် စတာတွေကို ဧရာဝတီမဂ္ဂဇင်း အယ်ဒီတာ အောင်ဇော်က ဆက်သွယ် မေးမြန်းထားသည်။
မေး။ ။ အခုဆိုရင် နေအိမ်မှာ ၇ နှစ်ကျော် အကျဉ်းကျခဲ့တာ ပြန်လွတ်လာပြီ၊ လွန်ခဲ့တဲ့ ၂ ရက် ၃ ရက်အတွင်းမှာ လူထုကို စကား ပြောခဲ့တယ်၊ အပြင်ကိုလည်း ထွက်ကြည့်ခွင့်ရတယ်။ မြန်မာ လူမျိုးတွေကလည်း အပြင်မှာရော အထဲမှာရော ဒေါ်အောင်ဆန်းစုကြည် လွတ်လာတာကို ဝမ်းမြောက် ဝမ်းသာဖြစ်ကြတယ်။ ဘာတွေ ပြောင်း သွားတယ်လို့ မြင်ပါသလဲ။
ဖြေ။ ။ ပထမ ဦးဆုံးကတော့ အန်တီ့ကို လာပြီး ကြိုတဲ့ လူအုပ်စုထဲမှာ လူငယ်တွေ ပိုများလာတာတော့ သတိ ထားမိတယ်။ နောက်ပြီးတော့ cell phone လေးတွေ သုံးတာပေါ့နော်။ cell phone လေးတွေနဲ့၊ hand phone လေးတွေနဲ့ ဓာတ်ပုံ ရိုက်တာတွေ ဘာတွေပေါ့။ အဲဒါတွေက အရင်တုန်းက မကြုံဖူးဘူးလေ။ ၁၀ နှစ် လောက်က မရှိဘူး။ အဲဒါတွေက တော်တော်များများ ပျံ့နေတာဟာ၊ ဘာပဲပြောပြော ဆက်သွယ်ရေး လမ်းကြောင်းကတော့ အရင်ထက်စာလို့ ရှိရင် လမ်းကြောင်းတွေ ပိုများ လာတယ်လို့ မြင်တာပေါ့နော်။ အဲဒါကတော့ အရေးကြီးတဲ့ ကိစ္စပေါ့နော်။ နောက်ပြီးတော့ မြို့ထဲမှာတော့လေ သိပ်ထူးထူးခြားခြား အပြောင်းအလဲကြီးတော့ မမြင်ဘူး။ တကယ်တော့ အန်တီလည်း လျှောက်ပြီး သွားတဲ့လူ မဟုတ်တော့ နေရာ မနှံ့လို့လားတော့ မသိဘူး။ သိပ်ပြီး ထူးထူးခြားခြား ဘာမှ ပြောင်းလဲမှု မရှိဘူး။
မေး။ ။ မြန်မာလူမျိုးတွေက အရမ်း နွမ်းသွားလား။
ဖြေ။ ။ အဲဒီဟာ ကြည့်ရတာတော့နော် နွမ်းပါးနေပေမယ့်။ အန်တီ့ကို လာကြိုတဲ့ လူတွေကတော့ အရမ်းကို ပြုံးပြုံးရွှင်ရွှင်နဲ့ အားပေးတာ၊ အဲဒါကိုတော့ တော်တော်လေး ကျေးဇူးလည်း တင်တယ်။ ဒီလို သူတို့ သဘောထား သိပ်ကြီးတယ်ပေါ့နော်။ နွေးထွေးတယ်။ အဲဒီလိုပဲ ခံစားရတယ်။
မေး။ ။ အန်တီ အခုလွတ်လာတာကို ထောင်သေးသေးထဲကနေ ထောင်ကြီးကြီးထဲကို လွတ်လာတာလို့ တချို့က ရေးကြ သုံးသပ် ကြတာတွေ တွေ့ရတယ်။ အဲဒီလိုမျိုး အန်တီ ခံစားရလား။
ဖြေ။ ။ အန်တီက အဲဒီလိုမမြင်ဘူး။ ပြောင်းပြန်မြင်တယ်။ အစတုန်းကလည်း အန်တီက လွတ်လပ် နေတယ်လို့ အန်တီ့ကိုယ် အန်တီ သတ်မှတ်တယ်။ ဘာဖြစ်လို့လဲ ဆိုတော့ အန်တီ့ စိတ်လွတ်လပ်တယ်။ အန်တီ့ အတွေးအခေါ်နဲ့၊ အန်တီ့ ယုံကြည်ချက်နဲ့ အန်တီရွေးတဲ့လမ်း အန်တီ လျှောက်နေတာ။ ပြီးတော့ စိတ်ထဲမှာ မလွတ်လပ်ဘူးလို့ မခံစားရဘူး။ အခု ဒီလို ထွက်လာတော့လည်း အန်တီ မလွတ်လပ်ဘူးလို့ မခံစားရဘူး။ အခုကတော့ ပိုပြီး အလုပ်များတာ ပေါ့နော်။ လက်တွေ့ကျကျ အပြောင်းအလဲတွေပဲ မြင်ရတယ်၊ တွေ့ရတယ်၊ ခံစားရတယ်။ တကယ်တော့ ကိုယ့် အတွင်းစိတ်ကတော့ ဒီ အတိုင်းပဲ။
မေး။ ။ ဟုတ်ကဲ့။ တချို့ နိုင်ငံရေး သုံးသပ်သူတွေပေါ့။ ကျနော်တို့အပါအဝင် အပြင်မှာရော၊ အထဲမှာရော ပြောကြတာ၊ ရေးကြတာ ဘာတွေလဲ ဆိုတော့ မြန်မာ နအဖ စစ်အစိုးရ အနေနဲ့ အန်တီ့ကို ရွေးကောက်ပွဲပြီး တပတ်မှာ လွှတ်တာက ရွေးကောက်ပွဲကို အာရုံ လွှဲတယ်လို့ပဲ မြင်ကြတယ်။ အန်တီ ဘယ်လိုထင်သလဲ။
ဖြေ။ ။ အဲဒါကတော့ အန်တီပြောလို့မရဘူး။ ဟုတ်ရင်လည်း ဟုတ်နိုင်တယ်လေ။ ဒါပေမယ့် ရွေးကောက်ပွဲက ပြီးသွားပြီ ဆိုတော့လည်း ရွေးကောက်ပွဲကို အာရုံ သိပ်ပြီးပြုဖို့ မလိုတော့ အန်တီ့ကို ပိုပြီးတော့ အာရုံ စိုက်တာပေါ့နော်။
မေး။ ။ ဒေါ်အောင်ဆန်းစုကြည် လွတ်လွတ်ခြင်းပဲ စစ်အစိုးရ ခေါင်းဆောင်တွေနဲ့ အန်တီက တွေ့ဆုံ စကားပြောချင်တယ်၊ အမျိုးသား ရင်ကြားစေ့ရေး ပြန်လည် ဖော်ဆောင်ချင်တယ်လို့ ပြောတယ်လေ။ အများစုက အန်တီ့ အပေါ်မှာ သံသယ မရှိပေမယ့် ဟိုဘက်ကတော့ ပြောချင်ပုံ မရဘူးပေါ့လေ။ အန်တီ နိုင်ငံရေးကို စဝင်ကတည်းက၊ ၁၉၈၈ ကတည်းက၊ မြန်မာ နအဖ၊ အဲဒီတုန်းက နဝတ ပေါ့ သူတို့ဘက်က နေပြီးတော့ အန်တီ့ကို မလိုလားဘူးဆိုတဲ့ ဟာကို အကြိမ်ကြိမ် ပြောခဲ့ပြီးပြီဖြစ်တယ်။ ဘာကြောင့် အခုထိ ၂၂ နှစ်ရှိပြီ၊ အန်တီ့ ဘက်ကနေပြီးတော့ အမျိုးမျိုး ကမ်းလှမ်းခဲ့သော်လည်း ဘာလို့ သူတို့ဘက်က မပြောချင်တာလဲ၊ ဘာကြောင့်လို့ အန်တီထင်သလဲ။
ဖြေ။ ။ စကားပြောတယ် ဆိုတဲ့ အဓိက ရည်ရွယ်ချက်အနေနဲ့ စကားပြောတဲ့ တကယ့် အနှစ်သာရ အဓိပ္ပာယ်ကို အန်တီတို့ နားလည်တာခြင်းဟာ မတူဘူးလို့ ထင်တယ်။ ဘာဖြစ်လို့လဲ ဆိုတော့ အန်တီ့အမြင်မှာ ဒီလို စကား ပြောတယ် ဆိုတာဟာ စကားရည်လုပွဲ မဟုတ်ပါဘူး။ အန်တီ ခဏခဏ ပြောတယ်။ တဘက်က ရှုံးစေ၊ တဘက်က နိုင်စေ ပြောတာ မဟုတ်ဘူး။ တဘက်ကလည်း ကိုယ့် အမြင်ကို ပြောရမယ်၊ နောက်တဘက်ကလည်း ကိုယ့်အမြင်ကို ပြောမယ်၊ သဘောမတူတာတွေ ရှိရင်လည်း ညှိယူမယ် ပေါ့နော်။ ၂ ဘက် စလုံးအတွက် အောင်နိုင်မှု ဖြစ်ရမယ်။ အဲဒါမျိုး ကိုပြောပေမယ့်လည်းပဲ နည်းနည်းမှ သဘော မပေါက်ဘူး။ မယုံတာလား၊ သဘော မပေါက်တာလား။ ဒါမှမဟုတ် တပ်မတော် အသိုင်းအဝန်းမှာ ဒီလိုပေါ့နော် … အခြေအတင် စကား ပြောပြီးတော့ ညှိနှိုင်းယူတဲ့ အလေ့ အထ မရှိလို့လား၊ အဲဒါတွေက အများကြီးကို စဉ်းစားစရာ ဖြစ်တယ်။
မေး။ ။ အဲဒီလို ဆိုရင် ၉၄၊ ၉၅ ပြီးတော့ ၂၀၀၀ ဝန်းကျင်မှာ အန်တီနဲ့ တကယ့် ထိပ်တန်း ခေါင်းဆောင်တွေ ဗိုလ်ချုပ်မှူးကြီး သန်းရွှေ အပါအဝင်၊ ဗိုလ်ချုပ်ခင်ညွန့် အပါအဝင် တွေ့ခဲ့တာတွေရှိတယ်။ အဲဒီတုန်းက ပြောခဲ့တာ တွေကကော တကယ့် အနှစ်သာရ ရှိတာတွေလား၊ တကယ့် အခြေအတင် တွေလား။
ဖြေ။ ။ တွေ့ကြတယ်ပေါ့နော်။ ဒါပေမယ့် တကယ် ဆွေးနွေးတယ်လို့ ပြောလို့ မရပါဘူး။ တကယ် ဆွေးနွေး တယ်လို့ ပြောလို့ ရတာက၊ ဒီပဲယင်းပြီးတော့ တွေ့ဆုံခဲ့တဲ့ ဗိုလ်မှူးကြီး တင်လှိုင်တို့၊ ဗိုလ်ချုပ် ကျော်ဝင်းတို့၊ ဗိုလ်မှူးချုပ် သန်းထွန်း တို့နဲ့ တွေ့ဆုံပြီးတော့ ပြောခဲ့တာပဲ၊ အဲဒါတွေကတော့ တကယ် ဆွေးနွေးခဲ့တာပဲ။ ဒါပေမယ့် အဲဒါတွေကလည်း တကယ်တော့ အကောင်အထည် မဖော်ခဲ့ဘူး။
မေး။ ။ သူတို့တွေလည်း မရှိတော့ဘူး။ ဗိုလ်ချုပ်ကြီးခင်ညွှန့်လည်း မရှိတော့ဘူး၊ တချို့ နှစ်ရှည်လများ ထောင်ကျ နေကြတာ ဆိုတော့ သူတို့ အပေါ်မှာရော အန်တီ ဘယ်လိုမြင်သလဲ။ တကယ်ပဲ အန်တီနဲ့ တပ်မတော်ကြားထဲမှာ တံတား ထိုးပေးနိုင်မယ့် သူတွေလို့ အန်တီ နောက်ပိုင်းမှာ ယူဆမိတာ ရှိလား။ နောက်ပိုင်းမှာ ပြန်တွေ့ဖို့ ရှိလား။
ဖြေ။ ။ အန်တီထင်တာကတော့ သူတို့တွေကတော့ သူတို့ကို တာဝန်ပေးချက် အရ လုပ်နေပေမယ့် သူတို့ တတ်နိုင်သလောက် အကောင်းဆုံး လုပ်တယ် လို့တော့ အန်တီက မြင်တာပဲ။ ဒါပေမယ့် သူတုိ့ကလည်း ခိုင်းတဲ့ အတိုင်းပဲ လုပ်ရတာပေါ့။ အန်တီက ဒီလိုလူတွေနဲ့ ဆွေးနွေး ပြောဆိုတဲ့ အခါမှာ သူတို့ရဲ့ ကောင်းတဲ့ အချက် ရှိတယ်ဆိုတာ အမြဲ မြင်ပါတယ်။ ဒါကြောင့်မို့လို့ ကိုယ့်ဘက်ကချည်းပဲ မှန်တယ်လို့လည်း ထင်တာ မဟုတ်ပါဘူး။ သူတို့နဲ့က သူပြောကိုယ်ပြော ပေါ့နော်။ နောက်ပြီးတော့လည်း နည်းနည်း ချဉ်သွားတာပေါ့နော်၊ နည်းနည်း ပြောဟယ် ဆိုဟယ် ဆိုတော့လည်း ချဉ်သွားတဲ့ ကိစ္စလေးတော့ ရှိတာပေါ့နော်။ အဲဒါလည်း အန်တီ့ဘက်က ရှိတာပေါ့နော်။ သူတို့ဘက်ကတော့ ရှိလား မရှိလားတော့ မသိဘူး။
မေး။ ။ အန်တီ့အပေါ်မှာတောင် အရမ်း လေးစားသွားတာတွေ ရှိတယ်လို့ ကျနော် ကြားတယ်။ အဲဒီလိုမျိုး ရှိလား။
ဖြေ။ ။ အဲဒီလောက်တော့ မသိဘူး။ ဒါပေမယ့် အန်တီကိုတော့ သူတို့ကောင်းကောင်း ဆက်ဆံပါတယ်။ အခု နောက်ပိုင်းမှာလည်း လုံခြုံရေး တာဝန်ယူရတဲ့ အရာရှိတွေ ကလည်း သူတို့နဲ့ တွေ့တဲ့အခါ၊ ဆက်ဆံရတဲ့အခါ ကောင်းကောင်း မွန်မွန်ပါပဲ။ အန်တီကလည်း သူတို့အပေါ်မှာ ခင်ချင်တဲ့စိတ် ရှိပါတယ်။ သူတို့ အတွင်းစိတ်က ဘယ်လိုရှိလဲ ဆိုတာတော့ ပြောလို့မရဘူး။ အန်တီ့ ဘက်ကပဲ အန်တီ ပြောနိုင်တာ သူတို့ ကောင်းကောင်း မွန်မွန်ပဲ ဆက်ဆံတာကို အန်တီက ကျေးဇူးလည်း တင်တယ်၊ သူတို့အပေါ်မှာ ခင်မင် ရင်းနှီးချင်တဲ့ စိတ်လည်း ရှိတယ်။ နောက် တနင်္ဂနွေ နေ့တုန်းကလို ပေါ့လေ။ ရုံးအရှေ့မှာ ပြောသလိုပေါ့လေ။ ပြည်သူ အားလုံးကို သူတို့ ဒီလိုပဲဆက်ဆံ စေချင်တယ်။
မေး။ ။ အန်တီ တခါတလေများ သိပ်မဝေးတော့တဲ့ ကာလတခုမှာ နေပြည်တော်ကို သွားပြီးတော့ ဗိုလ်ချုပ်မှူးကြီးနဲ့ တွေ့လို့ရမယ့် အစီအစဉ်များ ရှိမယ်လို့ ထင်မိသလား။ ယုံကြည်သလား။
ဖြေ။ ။ အန်တီကတော့ အဲဒီလိုမစဉ်းစားဘူး။ အန်တီကတော့ ဘယ်လိုဖြစ်အောင် လုပ်ရမလဲ ပေါ့နော်။ ကိုအောင်ဇော်တို့ ကြားဖူး မလားတော့ မသိဘူး။ ဂန္ဓီကြီးက ဟိန္ဒူဘာသာဝင် ဆိုပေမယ့် ခရစ်ယာန် ဓမ္မသီချင်း တပုဒ်ကို သိပ်ပြီးတော့ သဘောကျတယ် ဆိုတာလေ။ အဲဒီ သီချင်းဟာ Lead Kindly Light ဆိုတာ သူပြောထားတာတော့ အရှည် အဝေးကြီး မဟုတ်ဘူးပေါ့နော်။ တလှမ်းချင်း တလှမ်းချင်းသာ မြင်ခွင့် ပေးပါဆိုတာ၊ အဲဒါကို ဂန္ဓီကြီးက ယုံသလို အဲဒီဟာကို အန်တီလည်း ယုံတယ်။ တလှမ်းချင်း တလှမ်းချင်းသာ မှန်အောင် လှမ်းနိုင်အောင်လို့ ကိုယ့်ကိုကိုယ် ကြိုးစားပြီး သွားမယ်၊ တလှမ်းချင်း တလှမ်းချင်းသာ မှန်လို့ရှိရင်တော့ လမ်းမှန်ပေါ်ကနေ နေရာမှန်ကို ရောက်မှာ ပေါ့လေ။ အဝေးကြီး စိတ်ကူး မယဉ်စေချင်ဘူး။ နောက်ပြီးတော့ အန်တီက စိတ်ကူးယဉ် မျှော်လင့်ချက်ကို သိပ် အယုံအကြည် မရှိဘူး။ မျှော်လင့်ချက်ဆိုတာ ကြိုးစားချင်မှု။ ကိုယ်ကြိုးစား သလောက်ပဲ မျှော်လင့်ပိုင်ခွင့် ရှိတယ်လို့ အဲဒီလိုပဲ အယုံအကြည် ရှိရှိနဲ့ ကြိုးစားသွားမှာပဲ။
မေး။ ။ အဲဒီလိုမျိုး အန်တီနဲ့ တပ်မတော် ထိပ်တန်းခေါင်းဆောင်တွေကြားမှာ အဲဒီလိုမျိုး တကယ့်ကို စေ့စပ် ဆွေးနွေးဖို့ အလားအလာ ရောက်တော့မယ် ဆိုပြီးတော့ စိတ်ကူးယဉ်ပြီးတော့ ပြောတာတွေ ရေးတာတွေ အပြင်မှာ ရော၊ အထဲမှာရော၊ ကုလသမဂ္ဂဆိုရင် ပြောခဲ့ဖူးတာ တွေလည်း ရှိခဲ့ဖူးတော့ အန်တီ ဘယ်လိုမြင်သလဲ။
ဖြေ။ ။ အဲဒီလို မျှော်မှန်းကြည့်တာတော့ မမှားပါဘူး။ အန်တီတို့လည်း မျှော်မှန်းကြည့်တာ ပါပဲ။ တကယ်လို့ တွေ့ခဲ့ရင် ဘယ်လို ဘာပြောချင်လဲ ဆိုတာ စဉ်းစားကြည့်တယ်။ တခါတခါတော့ စဉ်းစားကြည့် တာပေါ့။ ခဏခဏတော့ မဟုတ်ပါဘူး။ ကိုယ့်ဘက်ကတော့ အဆင်သင့် ရှိရမယ်လေ။ ဘာလဲဆိုတော့ ဟို တဘက်ကနေ စကားပြောပါ၊ စကားပြောပါ ဆိုပြီး ကဲ လာ ပြောတော့ဆိုရင် ဘာပြောရမှန်း မသိဘူးဆိုရင် နည်းနည်း မကောင်းဘူးပေါ့လေ။ အဲဒီတော့ အပြင်ကလူတွေ ကလည်း ဒီလို ခန့်မှန်းကြည့်တဲ့ ဟာကို ဘာမှ အပြစ် မမြင်ပါဘူး။ တခါတလေတော့ နည်းနည်း ရယ်ချင်တယ်။ သူတို့ ခန့်မှန်းချက်တွေက ရယ်စရာလေးတွေပဲ၊ ဟုတ်တယ် ဟာသလိုပဲ။
မေး။ ။ အန်တီမှတ်မိလား ဘယ်ဟာလဲ၊ ဘယ်အချက်ကို ရယ်ချင်တာလဲ။
ဖြေ။ ။ မပြောတော့ပါဘူး။ ဒါပေမယ့် တချို့လူတွေရဲ့ ခန့်မှန်းချက်တွေ ကတော့ နည်းနည်းလေး ဟာသ ဆန်တာပေါ့။ နည်းနည်းလေး စိတ်ကူးယဉ်လွန်းအား ကြီးလွန်းတယ်ပေ့ါ။ ဒါပေမယ့် အဲဒါကို အပြစ်ကြီးလို့ မမြင်ပါဘူး။ တချို့ကလည်း အကောင်း ဖြစ်စေချင်လို့ပေါ့။ တချို့ကလည်း အကောင်းမြင်ဝါဒ မဟုတ်ဘူး။ ပြောင်းပြန်ပေါ့၊ အဆိုးမြင်ဝါဒလည်း ရှိပါတယ်။ အဲဒါတွေကလည်း နည်းနည်း အစွန်းရောက်တဲ့ အဆိုးမြင် ဝါဒတွေ ရှိတယ်။ ဘယ်လိုမှ မကောင်းနိုင်ဘူးပေါ့။ ဘယ်လိုမှ မဖြစ်နိုင်ဘူးပေါ့။ အဲဒါတော့ အစွန်း နှစ်ဘက်ပေါ့။ ဒါက တကယ်တော့လည်း တဘက်က လုပ်ချင်သည် ဖြစ်စေ၊ မလုပ်ချင်သည်ဖြစ်စေ အခြေအနေတွေက ခန့်မှန်းတဲ့ အတိုင်း ဖြစ်တာ မဟုတ်ဘူး။ ဗုဒ္ဓဘာသာ စကားနဲ့ ပြောရရင် အနတ္တပေါ့နော်။ အစိုးမရခြင်းပေါ့။ ကိုယ်မှန်းသလိုလည်း ဖြစ်တာ မဟုတ်ဘူး၊ သူ မှန်းသလိုလည်း အမြဲဖြစ်တာ မဟုတ်ဘူး။ အမြဲတမ်းတော့ ကိုယ်က အဆင်သင့် ရှိနေရမှာပေါ့။ ကိုယ့်ကိုယ်ကိုယ် ပြင်ဆင် ထားရမှာပေါ့။
မေး။ ။ အဲဒီလို ပြင်ဆင်ထားတယ်ဆိုရင် တကယ်လို့များ နောက်တခေါက် ထပ်ပြီးတွေ့ကြပြီး ဗိုလ်ချုပ်မှူးကြီးနဲ့ တွေ့ကြပြီ ဆိုရင် အန်တီ ဘာတွေ ပြောချင်လဲ။
ဖြေ။ ။ အခြေအနေပေါ်မှာ တည်တယ်လေ။ ဘယ်လို အခြေအနေမျိုးမှာ တွေ့ကြမှာလဲ။ ဘာကြောင့် တွေ့ကြ မှာလဲ။ အဲဒီတော့ အဲဒါတွေအပေါ်မှာ အခြေခံပြီးတော့ ပြောရမှာပေါ့နော်။
မေး။ ။ မြန်မာနိုင်ငံမှာ စစ်တပ်ဟာ နိုင်ငံရေးက ဖယ်ထုတ်လို့ မရဘူးလို့ တချို့က မြင်ကြ ရေးကြ ပြောကြတယ်။ အခြေခံ ဥပဒေသစ်မှာ ဆိုလည်း တပ်မတော်က နိုင်ငံရေးအခန်း ကဏ္ဍမှာ ဆက်ပြီးရှိမယ်၊ သွားမယ်၊ ထိန်းချုပ် ထားမယ် ဆိုပြီးတော့ သိရပါတယ်။ စစ်တပ်နဲ့ နိုင်ငံရေး အခန်းကဏ္ဍကို အန်တီ ဘယ်လိုမြင်သလဲ။
ဖြေ။ ။ နိုင်ငံရေးဆိုတာ ဘယ်သူ့ဆီက ဘယ်အသိုင်းအဝန်းကမှ ဖယ်ထုတ်လို့ မရဘူး။ နိုင်ငံရေးကို ဖယ်ထုတ်လို့ မရဘူး။ အားလုံးက နိုင်ငံရေးနဲ့ပဲ ဆက်စပ် နေတာပဲ။ ဒါပေမယ့် ဒီ ဆက်စပ်မှုဟာ မှန်ကန်တဲ့ ဆက်စပ်မှုတော့ ဖြစ်ဖို့ အရေးကြီးတာပေါ့။
မေး။ ။ တပ်မတော်ထဲမှာ ဒေါ်အောင်ဆန်းစုကြည်နဲ့ ဒီမိုကရေစီ ရေးကို လိုလားတဲ့လူတွေ ရှိတယ်လို့ ကျနော်တို့ သိရပါတယ်။ တကယ်လည်း ရှိတယ်လို့ ကျနော်တို့ ယုံကြည်ပါတယ်။ အန်ကယ်လ် ဦးတင်ဦးကို ကြည့်မယ် ဆိုရင် လည်း အန်တီနဲ့ နောက်ကနေ အမြဲတမ်း ပါဝင်တဲ့၊ တိုက်ပွဲဝင်ခဲ့တဲ့ လူထဲမှာ ပါပါတယ်။ ဆိုတော့ တပ်မတော်ထဲက အရာရှိတွေရယ်၊ မိသားစုတွေရယ်၊ အပြောင်းအလဲ မြင်ချင် လိုချင်ကြတဲ့ လူတွေကို အန်တီပြောချင်တဲ့ သတင်းစကားက ဘာလဲ။
ဖြေ။ ။ အပြောင်းအလဲလိုချင်ရင်တော့ အပြောင်းအလဲ ဖြစ်အောင်လို့ လုပ်ရမှာပေါ့။ အန်တီက စောစာက ပြောသလိုပေါ့။ အန်တီက ဒီလိုပဲ မျှော်လင့်နေတဲ့ ဟာမျိုးကို အယုံအကြည် မရှိဘူး။ မျှော်လင့်တယ် ဆိုရင် မျှော်လင့်တဲ့ဟာကို ရဖို့ ကြိုးစားမှု ထုတ်ရမယ်။
မေး။ ။ ရွေးကောက်ပွဲလည်း ကျင်းပပြီးပြီ အန်တီရယ်။ Free and Fair မဖြစ်ဘူး၊ ပြည်ခိုင်ဖြိုး ပါတီက နိုင်တာကို တွေ့ရတယ်။ တရားဝင် ကြေညာတာတော့ မရှိသေးဘူး ပေါ့နော်။ ဒါပေမယ့် လောလောဆယ် လက္ခဏာတွေ ကြည့်မယ်ဆိုရင် သူတို့နိုင်တယ် ဆိုတာ အသေအချာပဲပေါ့လေ။ မကြာခင်မှာ ပါလီမန် လွှတ်တော် ခေါ်မယ် အစိုးရ ဖွဲ့မယ်။ ဒါကို အခင်းအကျင်း အသစ်လို့ နိုင်ငံတကာက မြင်တယ်၊ ပြောကြတယ်ပေါ့လေ။ အဲဒီတော့ ဒေါ်အောင်ဆန်း စုကြည်က ဒီအခင်းအကျင်း သစ်ကို ဘယ်လို ရင်ဆိုင်မလဲ။
ဖြေ။ ။ တကယ်ပဲ အခင်းအကျင်းအသစ်လား။ အဲဒါက အန်တီက မေးပိုင်ခွင့် ရှိတယ်လေ။
မေး။ ။ အဲဒါကြောင့် ကျနော်မေးတာ၊ အခင်းအကျင်းသစ်လား၊ အဲဒီ အခင်းအကျင်းသစ် ဆိုရင်ကော အန်တီ ဘယ်လို ရင်ဆိုင်မလဲ။ ဘယ်လို ဖြတ်ကျော်မလဲ။
ဖြေ။ ။ အခုဟာကလေ အခင်းအကျင်းသစ်ဆိုတာ ဘာကိုပြောမှန်းကို မသိဘူး။ ပါလီမန် ရှိတာကို ပြောတာလား။ ပါလီမန်ရှိတာပဲ ပြောတာ ဆိုလို့ရှိရင်တော့ နိုင်ငံရေးဆိုတာ ပါလီမန် အတွင်း နိုင်ငံရေး၊ ပါလီမန်အပြင် နိုင်ငံရေး ဆိုတာ အမြဲ ရှိတာချည်းပဲ။ အဲဒီတော့ အန်တီတို့က ပါလီမန်အပြင် နိုင်ငံရေး လုပ်တဲ့လူတွေ ဖြစ်မှာပေါ့။ အဲဒီတော့ အန်တီတို့ ပါလီမန် နိုင်ငံရေး အပြင်ဘက်မှာ လုပ်တဲ့လူတွေ ဆိုတာလည်း အန်တီတို့က သူတို့ နိုင်ငံရေး လုပ်ပုံလုပ်နည်းတွေ အမျိုးမျိုးနဲ့ ရင်ဆိုင်ခဲ့ရပြီ ဆိုတော့ ပုံစံအမျိုးမျိုးနဲ့ ဆက်လုပ်သွားမှာပဲ။
မေး။ ။ နိုင်ငံတကာက ဆိုရင်လည်း ရွေးကောက်ပွဲ မတိုင်ခင်မှာ အမြင် အမျိုးမျိုးရှိတယ်။ တချို့က ရွေးစရာလမ်း မရှိတော့ဘူးလို့ ပြောကြတယ်။ ဥရောပ နိုင်ငံတချို့ ဆိုရင်လည်း ထောက်ခံတဲ့ ပုံစံမျိုးတွေ ပြောကြတာ တွေ့တယ်။ အထဲနဲ့ အပြင်နဲ့ သဘောထား ကွဲတဲ့ ပုံစံတွေ ဖြစ်ကုန်တယ်။ အန်တီ ဘီဘီစီမှာလည်း ဖြေသွားတာ ကြားပါတယ်။ ဆိုတော့ အခု ရွေးကောက်ပွဲ ပြီးသွားပြီ။ တချို့လည်း မျက်စိမျက်နှာ ပျက်သွားကြတယ်။ အရှက်တွေ ကွဲကြတယ်။ သူတို့ ထင်သလို မှန်းချက်နဲ့ နှမ်းထွက် မကိုက်ဘူး ပေါ့လေ။ အန်တီ ဘာပြောချင်လဲ သူတို့ကို။
ဖြေ။ ။ အဲဒါကို ကောင်းကောင်းလေး သင်ခန်းစာ ယူပါလို့ ပြောချင်တယ်။
မေး။ ။ နိုင်ငံတကာက ဒေါ်စု လွတ်လာတာ ကြိုဆိုတယ်၊ ဝမ်းသာတယ်ပေါ့လေ။ စီးပွားရေး ပိတ်ဆို့မှုတွေ ဆက်လုပ်မယ်လို့ ပြောတယ်။ အမေရိကန်ကလည်း တိုက်ရိုက် သဘော ဆက်ဆံမယ် ပြောတယ်၊ ပေါ်လစီ ဆက်ထားမယ်လို့ ပြောတယ်။ မကြာခင်မှာ Meeting တွေလုပ်ဦးမယ်လို့ ပြောတယ်။ အဲဒီတော့ နိုင်ငံတကာက ဘယ်လို ဖိအားပေးမှုတွေ၊ လက်တွေ့ကျကျ ဆက်ဆံမှုတွေ၊ အပြုသဘော ဆောင်တာတွေ လုပ်စေချင်သလဲ။ နောက်တခုက အာဆီယံနဲ့ တရုတ် အပေါ်မှာရော အန်တီဘာပြောချင်လဲ။
ဖြေ။ ။ အာဆီယံနဲ့ တရုတ်တို့ကို နီးနီးကပ်ကပ် ဆက်ဆံစေချင်တယ်။ အန်တီတို့နဲ့ ဆက်ဆံ စေချင်တယ်။ အန်တီတို့က မဆက်ဆံသင့်တဲ့ လူမျိုးများ မဟုတ်ပါဘူး ဆိုတာကို သေသေချာချာ သိစေချင်တယ်။ ပြီးတော့ ခုနက ပြောသလို ပိတ်ဆို့မှုတွေ ဘာတွေ အဲဒါတွေလည်း မဖြုတ်သေးဘူး ဘာဘူးလို့ ပြောတာဟာလည်း ခုနက ကိုအောင်ဇော် ပြောတာနဲ့ ဆက်စပ် နေတာပေါ့လေ။ တကယ်ပဲ အခင်းအကျင်းသစ် ဟုတ်လို့လား။ ဒါလည်း သူတို့က ကြည့်နေတယ်လို့ ထင်တယ်။
မေး။ ။ အပြင်မှာ ဆိုရင်လည်း Exile Community အကြီးကြီး ဖြစ်နေပြီး Illegal ရွှေ့ပြောင်း ထွက်လာကြတာ တွေလည်း အများကြီးပဲ၊ သိန်းနဲ့ သန်းနဲ့ချီပြီး ထွက်လာကြတာ လူငယ်တွေက အများကြီးပဲ။ အန်တီကလည်း လူငယ်နဲ့ ပညာရေးကို အရမ်းကို ဦးစားပေး ပြောလေ့ရှိတယ်။ အပြင်က လူငယ်တွေ၊ အထဲက လူငယ်တွေ။ ပညာရေး ကိစ္စတွေ အန်တီ ဘာတွေ လုပ်မလဲ၊ ဘာတွေ စီစဉ်ထားလဲ။ အန်တီ ဘာတွေပြောချင်သလဲ၊ ဘာမက်ဆေ့ခ်ျတွေ ပေးချင်လဲ။
ဖြေ။ ။ အန်တီက အပြင်က လူငယ်တွေနဲ့ အဆက်အသွယ် ရှိချင်တယ် ဆိုတာ အဲဒါတွေကြောင့်။ အထူးသဖြင့် အနောက် နိုင်ငံတွေမှာ ရောက်သွားတဲ့ လူငယ်တွေ ဆိုရင် ပညာရေးနဲ့ ပတ်သက်လို့ အများကြီး အခွင့်အရေး ရတယ်။ အန်တီတို့ ပြည်တွင်းထဲက လူငယ်တွေ ထက်ပေါ့။ ဒါကြောင့်မို့လို့ အန်တီက ပြည်တွင်းက လူငယ်တွေနဲ့ ပြည်ပက လူငယ်တွေကို ဆက်စပ်မှု ရှိစေချင်တယ်။ ပြည်ပ ရောက်သွားတဲ့ လူငယ်တွေက ပြည်တွင်းမှာ ကျန်ခဲ့တဲ့ ကိုယ့်ရဲ့ လုပ်ဖော်ကိုင်ဖက်တွေ၊ ကိုယ့်ရဲ့သက်တူ ရွယ်တူတွေကို မမေ့စေချင်ဘူး။ မေ့လည်း မမေ့ဘူးလို့ အန်တီထင်တယ်။ အခု တော်တော်များများက ဘလောဂ့်ဆိုက်တွေ လုပ်တာတို့၊ အင်တာနက်မှာ ဆက်နွှယ်တာတို့ ဘာတို့ လုပ်နေတယ် ဆိုတော့ ပြည်တွင်းကို မမေ့ဘူးလို့ ထင်တယ်။ အဲဒါကို အင်အား တခုအနေနဲ့ ယုံယုံကြည်ကြည်နဲ့ ဆက်ပြီးတော့ ရပ်တည် ပေးမယ်လို့ ထင်တယ်။
မေး။ ။ အရင်ကနဲ့မတူဘူး အန်တီ၊ အရင်တုန်းက လွတ်တုန်းက ဆိုရင် တိုင်းရင်းသားတွေက ငြိမ်နေတယ်။ အခု အန်တီ့ကို အရမ်းကို ထောက်ခံတာတွေ တွေ့ရတယ်။ အန်တီကလည်း ဒုတိယ ပင်လုံညီလာခံ လုပ်မယ်ဆိုတော့ အန်တီ ဘယ်လောက် အားရလဲ။
ဖြေ။ ။ အားရပါတယ်။ အားရတယ် ဆိုတာလေ။ အန်တီ ညီညွတ်မှုကို အားရတာပါ။ အန်တီ့ကို ထောက်ခံလို့ရယ် မဟုတ်ဘူး။ ဒီလို ညီညွတ်မှုကို ဦးတည်လာတဲ့ လက္ခဏဖြစ်လို့ အားရတာပါ။ ။
Ref: ဧရာဝတီ်
Read More...
Collapse...
ကိုဝိုင်း
ကြာသပတေးနေ့၊ နိုဝင်ဘာလ ၁၈ ရက် ၂၀၁၀
ချင်းမိုင် (မဇ္ဈိမ) ။ ။ ကြံ့ခိုင်ဖွံ့ဖြိုးရေးပါတီက လွှတ်တော် ၃ ရပ်လုံးတွင် စုစုပေါင်း ၇၆ ရာခိုင်နှုန်းကျော် နေရာ အများဆုံး ရသည်ဟု ရွေးကောက်ပွဲ ကော်မရှင်က မနေ့က ထုတ်ပြန်ကြောင်း တရုတ်အစိုးရ ဆင်ဟွာ သတင်းဌာနက ဖော်ပြသည်။
လွှတ်တော် ၃ ရပ် ၁,၁၅၄ နေရာတွင် ၇၆ ဒသမ ၅ ရာခိုင်နှုန်း နိုင်ခဲ့သည်ဟု စစ်အစိုးရ ပြည်ထောင်စု ရွေးကောက်ပွဲ ကော်မရှင်ကို ကိုးကား၍ ဆင်ဟွာက ယနေ့ ရေးသားသည်။
စစ်အစိုးရက ရွေးကောက်ပွဲရလဒ်များကို ရွေးကောက်ပွဲဝင်ပါတီများပင် အလွယ်တကူ သိနိုင်အောင် ဆောင်ရွက် မပေးရုံမက ကော်မရှင်ရုံးခွဲ တာဝန်ရှိသူများပင် အချိန်မီ မသိရကြောင်း တွေ့ရသည်။
“ကျနော်တို့ဆီတော့ မဝင်သေးဘူး ခင်ဗျ” ဟု ရန်ကုန် အရှေ့ပိုင်းခရိုင် ကော်မရှင်ရုံး တာဝန်ရှိသူတဦးက မဇ္ဈိမအား ပြန်ဖြေကြားခဲ့သည်။
တိုင်းရင်းသားစည်းလုံးညီညွတ်ရေးပါတီက ၆၃ နေရာဖြင့် ဒုတိယလိုက်ပြီး ရှမ်းတိုင်းရင်းသားများ ဒီမိုကရက်တစ် ပါတီ SNDP က ၅၇ နေရာ၊ ရခိုင်တိုင်းရင်းသားများ တိုးတက်ရေး ပါတီ RNDP က ၃၅ နေရာ၊ NDF နှင့် မွန်ဒေသလုံးဆိုင်ရာ ဒီမိုကရေစီ ပါတီ AMRDP တို့က ၁၆ နေရာစီရကြောင်း သိရှိရသည်။
အနိုင်ရအမတ်စာရင်းအား SNDP ပါတီသို့ သက်ဆိုင်ရာက တရားဝင် အကြောင်းမကြား သေးသော်လည်း ၅၇ နေရာ ရသည် ဆိုသည်မှာ မှန်ကန်ကြောင်း ဥက္ကဋ္ဌ ဦးစိုင်းအိုက်ပေါင်းက မဇ္ဈိမကို ပြောသည်။ စုစုပေါင်း အမတ်လောင်း ၁၅၆ ဦး ဝင်ပြိုင်ခဲ့သည်။
“သူတို့အများဆုံးရမှာပဲဆိုတာ သိနေတာပဲ ” ဟု သူက ပြောသည်။
တိုင်းနှင့်ပြည်နယ် ၁၄ ခုတွင် တိုင်းရင်းသား ကိုယ်စားလှယ်များလည်း သတ်မှတ်ထားသည်။
ရှမ်းပြည်နယ်လွှတ်တော်အတွက် ဗမာ၊ ကချင်၊ လီဆူး၊ လားဟူ၊ အင်းသား၊ အာခါနှင့် ကယန်း (ခေါ်) ပဒေါင်။ ကချင်ပြည်နယ်တွင် ဗမာ၊ ရှမ်း၊ လီဆူးနှင့် ရဝမ်။ ကရင်ပြည်နယ်တွင် ဗမာ၊ မွန်နှင့် ပအိုဝ်း။ ရန်ကုန်နှင့် ဧရာဝတီတိုင်းတို့တွင် ကရင်နှင့် ရခိုင်။ စစ်ကိုင်းတိုင်းတွင် ရှမ်းနှင့် ချင်း။ ကယားပြည်နယ်တွင် ဗမာ။ ရခိုင်ပြည်နယ်နှင့် မကွေးတိုင်းတွင် ချင်း။ ပဲခူးနှင့် တနင်္သာရီတိုင်းတွင် ကရင်။ မန္တလေးတိုင်းတွင် ရှမ်းစသည်ဖြင့် အသီးသီး သတ်မှတ်ထားသည်။
ရွေးကောက်ပွဲရလဒ်များ တရားမျှတမှုမရှိသဖြင့် လက်မခံနိုင်ကြောင်း ပြောဆိုမှုနေကြသကဲ့သို့ အငြင်းပွားသည့် နေရာများတွင် ရွေးကောက်ပွဲ အသစ် ပြန်လုပ်ပေးရန် ထုတ်ပြန်တောင်းဆိုနေသည့် ပါတီများလည်း ရှိနေသည်။ ကုလသမဂ္ဂ အပါအဝင် အမေရိကန်၊ ဗြိတိန်၊ ပြင်သစ်၊ ကနေဒါ၊ သြစတြေးလျ၊ ဥရောပသမဂ္ဂ စသည့် အနောက်နိုင်ငံများကလည်း ရွေးကောက်ပွဲ တရားမျှမှု မရှိကြောင်း၊ နိုင်ငံတကာ၏ အနိမ့်ဆုံး စံချိန်စံညွှန်းကိုပင် မမီကြောင်း ထုတ်ဖော် ပြောဆိုနေကြသည်။
ရွေးကောက်ပွဲရလဒ်များနှင့်ပတ်သက်၍ ကြိုတင်မဲ၊ ပယ်မဲ၊ ပျောက်မဲ စသည့်ခေါင်းစဉ်ခွဲများဖြင့် မဲမသမာမှုများ ရှိကြောင်း ပါတီများက ပြည်ပ သတင်းဌာနများနှင့် ပြည်တွင်း ဂျာနယ် စာစောင်များသို့ ထုတ်ဖော် ပြောဆိုနေသည်မှာ “ဥပဒေမဲ့” ဖြစ်ပြီး ထောင်ဒဏ်နှင့် ငွေဒဏ်များ ကျခံရနိုင်သည်ဟု စစ်အစိုးရက သတိပေးထားသည်။
Ref: မဇ္ဈိမ
Read More...
Collapse...
ကြာသပတေး, 18 နိုဝင်ဘာ 2010
မြန်မာစစ်အစိုးရက ဒီလဆန်းကပဲ ကျင်းပပြီးစီးသွားတဲ့ ရွေးကောက်ပွဲဟာ လွတ်လပ်ပြီး တရားမျှတမှု မရှိသလို ပွင့်လင်း မြင်သာမှု မရှိဘူးလို့ ကုလသမဂ္ဂ လူ့အခွင့်အရေး ကော်မတီက ရှုတ်ချလိုက်ပါတယ်။
လူ့အခွင့်အရေး ကော်မတီက မြန်မာနိုင်ငံဆိုင်ရာ ဒီအဆိုပြုချက်ကိုတော့ ကြာသပတေးနေ့မှာပဲ ထောက်ခံမဲ ၉၆ မဲ၊ ကန့်ကွက်မဲ ၂၈ မဲနဲ့ ဆုံးဖြတ်ချက် ချမှတ်လိုက်တာပါ။
ဆုံးဖြတ်ချက်က မြန်မာနိုင်ငံမှာ ဖမ်းဆီးထားတဲ့ နိုင်ငံရေး အကျဉ်းသား ၂,၀၀၀ ကျော်ကို ပြန်လွှတ်ပေးဖို့လည်း တောင်းဆိုခဲ့ပါတယ်။
ကြာသပတေးနေ့ကပဲ မြန်မာနိုင်ငံက နောက်ဆုံး အခြေအနေတွေနဲ့ ပတ်သက်လို့ ကုလသမဂ္ဂရဲ့ လုံခြုံရေး ကောင်စီမှာ တံခါးပိတ် ဆွေးနွေးမှုတွေ လုပ်ဆောင် ခဲ့ပါတယ်။
ကုလသမဂ္ဂ အတွင်းရေးမှူးချုပ်ရဲ့ အထူး အကြံပေးပုဂ္ဂိုလ် ဘီဂျေး နမ်ဘီယာက မြန်မာနိုင်ငံက နောက်ဆုံး အခြေအနေတွေကို လုံခြုံရေး ကောင်စီကို တင်ပြပြီး အဖွဲ့ဝင် နိုင်ငံတွေကြား ဆွေးနွေးကြတာ ဖြစ်ပေမဲ့ အသေးစိတ် အချက်အလက် တွေတော့ တိတိကျကျ မသိရပါဘူး။
တချိန်တည်းမှာပဲ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ရဲ့ ရဲစွမ်းသတ္တိနဲ့ ဂုဏ်သိက္ခာဟာ ကမ္ဘာ တ၀န်းမှာရှိတဲ့ လူသန်းပေါင်း များစွာအတွက် စိတ်ဓာတ်ခွန်အားတွေ ဖြစ်စေတဲ့အတွက် လေးစား ကြည်ညိုကြောင်း ပြောဆိုထားတဲ့ ကုလသမဂ္ဂ အတွင်းရေးမှူးချုပ် ဘန်ကီမွန်း (Ban Ki-moon) က ဒေါ်အောင်ဆန်းစုကြည်ကို ကြာသပတေးနေ့မှာ တယ်လီဖုန်းက တဆင့် တိုက်ရိုက် စကား ပြောဆိုခဲ့ပါတယ်။
နွေးထွေးတဲ့ ဆွေးနွေးမှုတွေမှာ မြန်မာနိုင်ငံမှာ ရင်ဆိုင်နေရတဲ့ စိန်ခေါ်မှုတွေကို အာရုံစိုက် ပြောဆိုခဲ့တယ် လို့လည်း အတွင်းရေးမှူး ချုပ်ရဲ့ ရုံးက ပြောပါတယ်။
Ref: VOA News
Read More...
Collapse...
ဖနိဒါ
ကြာသပတေးနေ့၊ နိုဝင်ဘာလ ၁၈ ရက် ၂၀၁၀
ချင်းမိုင်(မဇ္စျိမ)။ ။ NDF နိုင်ငံရေးဦးဆောင်အဖွဲ့ ဒုတိယ ခေါင်းဆောင် သင်္ကန်းကျွန်း ပြည်သူ့ လွှတ်တော် ကိုယ်စားလှယ် ဦးသိန်းညွန့်ကို ပါတီတာဝန် ကျေပွန်ခြင်း မရှိသည့်အပြင် အတွင်းရေးများကို မီဒီယာများတွင် တာဝန်မဲ့စွာ ပြောဆိုသည် ဟူသော စွပ်စွဲချက်ဖြင့် ပါတီမှ ထုတ်ပယ်လိုက်ကြောင်း ပါတီ၏ နိုင်ငံရေး ခေါင်းဆောင် ဦးခင်မောင်ဆွေက ပြောသည်။
“ပါတီက ပိုက်ဆံတွေ ယူထားတယ်။ နိုင်ငံခြားငွေ သုံးတယ်ပေါ့။ မဟုတ်မမှန် စွတ်စွဲတယ်လေ။ ကျနော်တို့ နိုင်ငံခြားငွေ သုံးထားတာ မရှိဘူး။ ပြည်တွင်းက မီဒီယာ ၃၊ ၄၊ ၅ စောင်မှာလဲ အဲဒီလို ပုဂ္ဂိုလ်နာမည်တွေ တပ်ပြီးတော့ တရားစွဲမယ်တို့ ကော်မရှင်ကို တိုင်မယ်တို့ ပြောတယ်။ ရွေးကောက်ပွဲ မတိုင်ခင် အဲဒီလို အင်တာဗျူးတွေ လုပ်တဲ့ အတွက်ကြောင့်”ဟု သူက မဇ္စျိမကို ပြောသည်။
စည်းလုံးညီညွတ်ရေးနှင့် ပါတီစည်းမျဉ်းစည်းကမ်းများကို ထိခိုက်စေသဖြင့် ဦးသိန်းညွန့်အား အရေးယူရန် မနေ့က ရန်ကုန်၊ မန္တလေးနှင့် တနင်္သာရီတိုင်း ပါတီခေါင်းဆောင် ၁၅ ဦးဆွေးနွေးခဲ့ရာ ၁၂ ဦးမဲခွဲသည်ဟု ဆိုသည်။
“ပါတီအတွင်းကိစ္စကို အတွင်းမှာ ကျေလည်အောင် မဖြေရှင်းဘဲ အပြင်မှာ ဖြေရှင်းရင် အရေးယူရမယ် ဆိုတဲ့ စည်းကမ်းဟာ ပါတီ မူဝါဒထဲမှာ ပါပါတယ်။ ဂျာနယ်တွေမှာ စိတ်ရှိတိုင်း ပြောရုံမကဘူး အပြင်ဘက်မှာ လျှောက်ပြောနေတယ်။ ဒါကြောင့် ကော်မရှင်ကို တင်ပြထားတဲ့ စည်းမျဉ်း စည်းကမ်းတွေအရ သူ့ကို အရေးယူပြီး ဖယ်ထုတ်လိုက်ပါပြီ”ဟု ဦးခင်မောင်ဆွေက ပြောသည်။
ရွေးကောက်ပွဲ မတိုင်မီကလည်း ဦးသိန်းညွန့်အား ပါတီ ဒုဥက္ကဋ္ဌ နှင့် အတွင်းရေးမှူးတို့က ပါတီအတွင်းရေး အပြင်သို့ မပြောရန် သတိ ပေးခဲ့သော်လည်း ပါတီစည်းမျဉ်းများ ဆက်ဖောက်နေခြင်းကြောင့် ထုတ်ပယ် လိုက်ကြောင်း သူက ဆက်ပြောသည်။
ဦးသိန်းညွန့်ကတော့ စည်းကမ်းမချိုးဖောက်ဟု ငြင်းဆိုလိုက်သည်။
“ကျနော် မချိုးဖောက်ပါဘူး။ ဒါ ဒီမိုကရေစီပဲ။ သတင်းမီဒီယာကို ပြောရတာဘဲ။ အချက် ၃ ချက်ပေါ့။ ရွေးကောက်ပွဲ မတိုင်ခင် ကထဲက သူတို့ ငွေကြေး မရှင်းမလင်းလုပ်တဲ့ ကိစ္စတွေကို ကျနော်တို့ ရွေးကောက်ပွဲပြီးရင် ရှင်းမယ်လို့ ပြောထားတာကိုး၊ ကျနော်က ရွေးကောက်ပွဲ နိုင်ထားတော့ မနာလိုတာ ဖြစ်မှာပေါ့၊ တတိယ အချက်က ကော်မရှင် မတိုင်ခင် သူတို့က ကျနော်ကို လက်ဦးအောင် လုပ်တာပေါ့”ဟု ဦးသိန်းညွန့်က မဇ္စျိမကို ပြောသည်။
ထို့ပြင် ဦးခင်မောင်ဆွေ၊ ဦးသန်းငြိမ်း၊ ဒေါက်တာ မြတ်ဥာဏစိုး၊ ဦးစိန်ဝင်းတို့ ၄ ဦး ပါတီရန်ပုံငွေများကို စာရင်း မပြနိုင်ဘဲ ထင်သလို သုံးစွဲနေသည်ဟု သူက ပြန်လည် စွပ်စွဲလိုက်သည်။
အဆိုပါ ကိစ္စနှင့် ပတ်သက်၍ ပြည်ထောင်စု ရွေးကောက်ပွဲ ကော်မရှင်ထံ တင်ပြသွားမည်ဖြစ်ပြီး ကော်မရှင်က မထုတ်သ၍ NDF ပါတီ တာဝန်ကို ဆက်လက် ထမ်းဆောင်မည်ဖြစ်ကြောင်း သူက ဆိုသည်။
ယခင်လအတွင်းကလည်း NDF အမတ်လောင်းအချို့က စီးပွားရေးလုပ်ငန်းရှင် တဦးထံမှ အလှူငွေ လက်ခံခဲ့သည် ဆိုကာ ၆ ပါတီ မဟာမိတ် အဖွဲ့အတွင်း အငြင်းပွားမှုများ ဖြစ်ပေါ်ခဲ့ပြီး အဖွဲ့ဝင် အဖြစ်မှ နှုတ်ထွက်၊ ခေတ္တ ရပ်ဆိုင်းမှုများ ဖြစ်ပေါ်ခဲ့သည်။
ကွဲထွက်သွားသော မဟာမိတ်၏ အဖွဲ့ဝင်များမှာ NDF ၊ ဒီငြိမ်း၊ ချင်းအမျိုးသားပါတီ၊ ရခိုင်ပါတီ RNDP၊ ပြည်ထောင်စု ဒီမိုကရေစီပါတီ UDP၊ ရှမ်းတိုင်းရင်းသားများ ဒီမိုကရက်တစ်ပါတီ SNDP တို့ ဖြစ်သည်။
Ref: မဇ္ဈိမ
Read More...
Collapse...
ကြာသပတေး, 18 နိုဝင်ဘာ 2010
မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် သွားရောက်တွေ့ဆုံခဲ့တဲ့ HIV/AIDS ရောဂါသည် တချို့ကို သူတို့ လက်ရှိ နေထိုင်ပြီး ဆေးကုသမှု ခံယူနေတဲ့ စေတနာ့ဝန်ထမ်း ဆေးခန်းက မောင်းထုတ် လိုက်မယ်လို့ အာဏာပိုင်တွေက ခြိမ်းခြောက်တဲ့ ကိစ္စကို အမေရိကန် အခြေစိုက် USCB ခေါ် မြန်မာ့အရေး လှုပ်ရှားမှုအဖွဲ့က ရှုတ်ချ လိုက်ပါတယ်။
ဒီလူနာတွေကို ဒေါ်အောင်ဆန်းစုကြည် သွားရောက်တွေ့ဆုံ အားပေးခဲ့ပြီးနောက် ညဘက်မှာ လူနာတွေကို စောင့်ရှောက်နေတဲ့ စေတနာ့ ၀န်ထမ်း တဦးကို ဆေးခန်းရှိရာ ဒဂုံမြို့သစ် (တောင်ပိုင်း) ရဲ့ အာဏာပိုင်တွေက ဆင့်ခေါ်ပြီး အဲဒီဆေးခန်းက လူနာ ၁၂၀ ကို နေထိုင်ခွင့် ဆက်ပြီး ထုတ်ပေးတော့မှာ မဟုတ်ဘူးလို့ ပြောကြား လိုက်တယ်လို့ ဆိုပါတယ်။
အခုလက်ရှိ နေထိုင်ခွင့်ဟာ နိုဝင်ဘာလ ၂၄ ရက်နေ့မှာ ကုန်ဆုံးတော့မှာ ဖြစ်ပါတယ်။
အာဏာပိုင်တွေရဲ့ လုပ်ရပ်ဟာ ခိုကိုးရာမဲ့ HIV လူနာတွေအပေါ် အကြင်နာတရား ကင်းမဲ့တဲ့ လုပ်ရပ်လို့ USCB ရဲ့ ကြေညာချက်မှာ ဖော်ပြ ထားပါတယ်။
Ref: VOA News
Read More...
Collapse...
Monday, 08 November 2010
မတူညီသော ပါတီလေးခုမှ အမတ်လောင်း လေးဦး လက်ဖက်ရည်ဆိုင် တစ်ဆိုင်တွင် တစ်စားပွဲတည်း ထိုင်မိပြီးနောက် ၎င်းတို့ အနီးသို့ စားပွဲထိုး ရောက်လာသည်။
စားပွဲထိုး ။ ။ ဘာများ သုံးဆောင်ကြမလဲ ခင်ဗျာ။
အမတ်လောင်း(၁) ။ ။ တို့ပါတီ ကသာ တူညီ မျှကောင်းစားရေး လုပ်မှာကွ။ ပုံမှန် တစ်ခွက်ပေး။
အမတ်လောင်း(၂) ။ ။ တို့ပါတီ ကတော့ လုပ်သင့်တာတွေကို ခပ်ပြတ်ပြတ် လုပ်မယ်ဟေ့။ ပုံမှန်ပဲ ညီလေး။
အမတ်လောင်း(၃) ။ ။ တို့ပါတီ ဘာလုပ်မလဲ ဆိုတာတွေ ပြောရရင် နှစ်နာရီ မက ကြာသွားလိမ့်မယ်။ ဒါပေမဲ့ တို့က လစ်ဘရယ်နော်။
စားပွဲထိုး ။ ။ လစ်ပ်တန်တီးလား ဆရာ။
အမတ်လောင်း(၃) ။ ။ လစ်ဘရယ်ကွ။ ခက်တဲ့ ကောင်ပဲ။ ပုံမှန် တစ်ခွက်ပဲ။
အမတ်လောင်း(၄) ။ ။ ကိုယ်တို့ ကတော့ လိုအပ်တဲ့ ဥပဒေသစ်တွေ ကျကျ နန ပြဋ္ဌာန်း မှာကွ။ ပီပြင်တဲ့ ဈေးကွက် စီးပွားရေး ဖြစ်ရစေမယ်။ လက်ဖက်ရည် ကတော့ ပုံမှန်ပဲလုပ်။
စားပွဲထိုးက အဖျော်ကောင်တာသို့ လှည့်ထွက်သွားသည်။ အဖျော် ဆရာကို လှမ်းပြောသည်။
“ဝေ့နေ၀ိုက်နေကြတယ်ဆရာရေ။ လိုရင်းကတော့ ပုံမှန်လေးခွက်ပဲ။”
Ref: ရိုးရာလေး
Read More...
Collapse...
Thursday, 11 November 2010
ရွေးကောက်ပွဲ ကျင်းပနေစဉ် မဲပေးသူ တစ်ဦးက ပြောသည်။ သဘောထား ကွဲလွဲ မှုကြောင့် ယောက္ခမ ဖြစ်သူ က သမက်အား အိမ်ပေါ်မှ နှင်ချ လိုက်ကြောင်း သိရသည်။ ဧရာဝတီတိုင်း ဒေသကြီး လေးမျက်နှာမြို့နယ် ထိန်တောကြီး ကျေးရွာအုပ်စု ထောင့်ကြီးရွာတွင် နေထိုင်သည့် ယောက္ခမ ဖြစ်သူ ဦးထွန်းကြိုင်က ၎င်း အိမ်ဝိုင်းထဲတွင် နေထိုင်သူ သမက်ဖြစ်သည့် ကိုနိုင်စိုး အား ရွေးကောက်ပွဲ ကိစ္စကြောင့် စကားများရာ အိမ်ပေါ်မှ နှင်ချလိုက်ကြောင်း ဒေသခံ တစ်ဦးကပြောသည်။ ““ကိုယ့်မြို့နယ် တိုးတက်ရာ တိုးတက်ဖို့ နယ်မြေ၌ လုပ်ပေးနေတဲ့ လူတွေကို ကူညီသင့်တယ်။ ငါ့စကား နားမထောင်ရင် ငါ့အိမ်ဝိုင်းက ထွက်သွား”” ဟု ယောက္ခမက သမက်အား နှင်ချလိုက်ကြောင်း တစ်ရွာတည်းနေသူ ဒေသခံတစ်ဦးက ပြောသည်။ အဆိုပါ ကျေးရွာ အုပ်စုတွင် မဲရုံ သုံးရုံရှိပြီး ဆန္ဒမဲ ပေးခွင့်ရှိသူ ၈၅၇ ဦးရှိကာ ပြည်သူ့ လွှတ်တော် မဲဆန္ဒနယ်မြေတွင် တစ်သီးပုဂ္ဂလ ကိုယ်စားလှယ်လောင်း ဒေါက်တာ စိုးလွင်နှင့် အမှတ်(၁) မဲဆန္ဒ နယ်မြေ၌ ဦးဇော်ဝင်းတို့ ၀င်ရောက် ယှဉ်ပြိုင်နေသည်။
ယောက္ခမဖြစ်သူမှာ အထက်ပါ တစ်သီးပုဂ္ဂလ ကိုယ်စားလှယ်လောင်းများ အားအားပေးသူ ဖြစ်ပြီး သမက်မှာ နိုင်ငံ တစ်ဝန်းလုံးတွင် ၀င်ရောက် ယှဉ်ပြိုင်နေသော ပါတီကြီး တစ်ခုအား အားပေးသူဖြစ်သည်။
Ref: ရိုးရာလေး
Read More...
Collapse...
ဗုဒ္ဓဟူးနေ့၊ နိုဝင်ဘာလ ၁၇ ရက် ၂၀၁၀
၇ နှစ်ကြာ နေအိမ်အချုပ်မှ နိုဝင်ဘာ ၁၃ ရက်နေ့က လွတ်မြောက်လာခဲ့သော မြန်မာ့ဒီမိုကရေစီ ခေါင်းဆောင် ဒေါ်အောင်ဆန်း စုကြည်ကို အိန္ဒိယ၏ မြန်မာနိုင်ငံ အပေါ်ထားရှိသော မူဝါဒ၊ အင်တာနက်နှင့် မီဒီယာသစ် သုံးစွဲမှု၊ တိုင်းရင်းသား အရေး၊ ဂျွန်ယက်ထောကို ဘယ်သူလွှတ်လဲ၊ လူငယ်နှင့် အမျိုးသမီးကဏ္ဍ၊ လုံခြုံရေး အကြောင်းများ မဇ္ဈိမသတင်းဌာန စီမံခန့်ခွဲမှု အယ်ဒီတာ ကိုစိန်ဝင်းက တယ်လီဖုန်းဖြင့် မေးမြန်းထားသည်။
ကျနော် ပထမဆုံး အိန္ဒိယနဲ့ ပတ်သက်တဲ့ မေးခွန်းမေးချင်တယ်ခင်ဗျ၊ အိန္ဒိယလူထု အနေနဲ့ မြန်မာ့ ဒီမိုကရေစီ အရေးအတွက် ဘာများ လုပ်ပေးနိုင်တယ် အန်တီ ထင်လဲခင်ဗျ။
အန်တီတို့ နိုင်ငံ ၂ နိုင်ငံဟာ လွတ်လပ်ရေး ကြိုးပမ်းတဲ့ ကာလကနေစပြီး မိတ်ဆွေတွေလို ရဲဘော် ရဲဘက်တွေလို လုပ်ခဲ့ကြတာ၊ အခု နောက်ပိုင်းမှာတော့ အိန္ဒိယ ပြည်သူတွေက သိသင့်သလောက် မသိဘူးလို့ အန်တီထင်တယ်၊ အဲဒါ ပိုပြီးတော့ သိနိုင်ရင် ပထမဆုံး ခြေလှမ်းပဲ။
အိန္ဒိယ ပါလီမန်၊ အစိုးရက ဘာတွေလုပ်နိုင်တယ် ဘာတွေဖြစ်သင့်တယ်လို့ အန်တီပြောချင်လဲ။
အိန္ဒိယနိုင်ငံက ဒီမိုကရေစီနိုင်ငံ ဆိုတော့ အခုမေးလိုက်တဲ့ မေးခွန်းနဲ့ ခုနတုန်းက ပြောလိုက်တဲ့ ကိစ္စနဲ့ ဆက်နွယ်နေတယ်၊ ဒီမိုကရေစီ နိုင်ငံဆိုတော့ ပြည်သူလူထုက နိုးကြား တက်ကြွပြီးတော့ မြန်မာနိုင်ငံ ဒီမိုကရေစီ အရေးအတွက် လုပ်ဆောင်ပေးချင်တဲ့ စိတ်ဓာတ်တွေ ရှိရင် ပါလီမန်နဲ့ အစိုးရကလဲ လျစ်လျူရှုထားလို့ ရမှာမဟုတ်ဘူး၊ အဲဒါကြောင့်မလို့ ပထမဆုံး ခြေလှမ်းက အိန္ဒိယ ပြည်သူလူထု အနေနဲ့ အန်တီတို့ ဒီမိုကရေစီ လှုပ်ရှားမှု အကြောင်းကို ပိုပြီး သိဖို့၊ ထောက်ခံလာဖို့ လိုတယ်။
အိန္ဒိယဘက်က ပြောလေ့ပြောထရှိတာက တရုတ်က မြန်မာပြည်ထဲကို လွှမ်းမိုးလာတယ်၊ နောက်တခုက မြန်မာပြည်မှာ ဒီမိုကရေစီကို ဖြည်းဖြည်းချင်း ပြောင်းလဲ ဖြစ်ထွန်းလာတာက ပိုကောင်းတယ်ဆိုတဲ့ အယူအဆတွေ ရှိတယ်၊ အဲဒီအယူအဆနဲ့ ပတ်သက်ပြီးတော့ အန်တီ့ အမြင်ကကော ဘယ်လိုလဲခင်ဗျ။
အဲဒါမျိုးဆိုရင် တရုတ်နဲ့ဆက်ဆံရေးကိုပဲ အဓိက စဉ်းစားနေသလို ဖြစ်နေဘူးလား၊ မြန်မာပြည်ရဲ့ အခြေအနေကို စဉ်းစားတာထက်။ အဲဒီတော့ မြန်မာပြည်ရဲ့ အခြေအနေကို စဉ်းစားတဲ့ နေရာမှာ တကယ်ပဲ မြန်မာပြည် အခြေအနေကို စဉ်းစား နေတာလား၊ တရုတ်နဲ့ အိန္ဒိယ ဆက်ဆံရေးကို စဉ်းစားနေတာလား ဆိုတာ ပိုပြီးတော့ ပွင့်ပွင့်လင်းလင်း ကွက်ကွက်ကွင်းကွင်း သိအောင် လုပ်ဖို့ လိုပါတယ်။ နောက်ပြီးတော့ ဖြည်းဖြည်းချင်း ဖြစ်လာတဲ့ ဒီမိုကရေစီသာ မြန်မာပြည်နဲ့ ကိုက်ညီတယ်၊ မကိုက်ညီဘူး ဆိုတာက အန်တီတို့ မြန်မာတွေ ဆုံးဖြတ်ရမယ့် ကိစ္စပါ။
တချို့အနောက်နိုင်ငံတွေ ယူဆတာကလဲ မြန်မာအစိုးရ ပြောတာနဲ့ သွားတူတယ်နဲ့ တူတယ်၊ ဖြည်းဖြည်းချင်း ပေါ့လေ၊ အဲဒီပုံစံက ပိုကိုက်တယ် ဆိုပြီးပြောကြတော့ အဲဒီအပေါ်မှာကော အန်တီ့အမြင်က ဘယ်လိုရှိလဲ။
တဆင့်ချင်းသွားတဲ့ ပုံစံကို ပိုကိုက်တယ် ဆိုတဲ့ အယူအဆကို ခိုင်မာတဲ့ အတွေးအခေါ်တွေနဲ့ ပြနိုင်ဖို့ လိုပါလိမ့်မယ်၊ ဘာဖြစ်လို့လဲ ဆိုတော့ မြန်မာပြည်မှာ လူမျိုးရေး ပဋိပက္ခတွေ ဖြစ်ခဲ့တာကြာလို့ ဖြည်းဖြည်းလေး ဒီမိုကရေစီဆီ သွားရမယ် ဆိုတဲ့ဟာက ပြောင်းပြန် ပြောလို့လဲ ရတာပဲ၊ စစ်မှန်တဲ့ ဒီမိုကရေစီ မရှိလို့ ဒီလူမျိုးရေး ပဋိပက္ခတွေက ပိုပြီးတော့ ဖြစ်နေသေးတယ် ဆိုပြီးတော့လဲ ပြောလို့ရတာပဲ၊ ဒါက ကိုယ်ကြိုက်သလို ကိုယ်ဆွဲပြီးတော့ ပြောလို့ရတာပဲ။ ဒါပေမဲ့ တကယ် အဓိက စဉ်းစားရမှာက အခု အခြေအနေတွေဟာ ပြည်သူလူထုကို ဘယ်လောက်အထိ အကျိုးပေးနေသလဲ၊ အကျိုးပေးအောင်လို့ ဘယ်လို လုပ်ရင်ရမလဲ ဒါကို စဉ်းစားရမှာပါ။
အန်တီ့ ကျန်းမာရေး အခြေအနေကော ဘယ်လိုရှိလဲခင်ဗျ။
ကျန်းမာရေးကတော့ ကောင်းပါတယ်၊ အလုပ်ကတော့ ရှုပ်တာပေါ့၊ အသက်ရှုဖို့ အချိန်တောင် နည်းနည်း, နည်းနေသလိုပဲ။
သားနဲ့ ဖုန်းပြောဖြစ်တယ်လို့ ကြားတယ်၊ သားကော ပြည်ဝင်ခွင့်ဗီဇာ ရပြီလားခင်ဗျ။
အဲဒါကလေ ပေးမယ်လဲ မပြောဘူး၊ မပေးမယ်လဲ မပြောဘူး၊ ဒီလိုပဲ စောင့်နေရတော့မှာပေါ့။
မိခင်တယောက်အနေနဲ့ ဆုံးဖြတ်ရတဲ့အခါကျတော့ ဒီလိုမျိုးစိတ်ဓာတ် ခိုင်ခိုင်မာမာနဲ့ အန်တီ ဘယ်လို ဖြတ်သန်းလဲ။
ဒါပေမယ့်လဲ အန်တီ့ထက် ပိုခက်ခဲတဲ့ အခြေအနေတွေ ရင်ဆိုင်နေရတဲ့ လူတွေ အများကြီးလေ၊ ဘာပဲပြောပြော အန်တီ့ရဲ့ သားတွေက မတောင့်မတ မကြောင့်မကြနဲ့ နေနိုင်တဲ့ အနေအထား ပေါ့နော်၊ လူ့အခွင့်အရေး အပြည့်အဝ ရတဲ့ နိုင်ငံတွေမှာ နေရတယ်၊ စားရေး သောက်ရေး နေရေး ထိုင်ရေး အတွက် ပူပင်စရာ မလိုဘူး၊ တခြားကလေးတွေ အများကြီးဟာ တနေ့နဲ့တနေ့ ဘယ်လို စားရမယ်၊ သောက်ရမယ်၊ နေရမယ်၊ ထိုင်ရမယ်ဆိုတာ မသိတဲ့ အခြေအနေမှာ ရှိနေပါတယ်၊ သူ့တို့ မိဘတွေကလဲ သူတို့ ကလေးတွေကို မကူနိုင်တဲ့ အနေအထားမှာ ရှိတယ်၊ အဲဒီတော့ အန်တီ့အနေနဲ့ ဆိုးတယ် ပြောရအောင် တခြား မိဘတွေကို ဘယ်လို မျက်နှာနဲ့ သွားပြီးတော့ ကြည့်မှာလဲ။
အန်တီ့လုံခြုံရေးအတွက် စိုးရိမ်ကြတယ်လို့ ပြောကြတယ်၊ အဲဒီအပေါ်မှာ တယောက်ယောက် အနှောက် အယှက် ပေးလိမ့်မယ်လို့ အန်တီ ထင်လား။
ဒါကတော့ အရင်တုန်းက အနှောက်အယှက်ပေးခဲ့တာတွေ ရှိခဲ့ဖူးတော့ မလုပ်ဘူးလို့လဲ ပြောလို့ မရဘူးပေါ့၊ ဒါပေမဲ့ ဒါအနှောက်အယှက် ပေးမှာပဲလို့ ဒါကိုပဲ ရှေ့တန်းတင်ပြီးတော့ ကိုယ့်ရဲ့ လုပ်တာ ကိုင်တာတွေကို အဲဒီအပေါ်မှာ အခြေခံပြီးတော့ လုပ်လို့လဲ မဖြစ်ဘူးလေ။ လူငယ်တွေကော၊ လူကြီးတွေကော အန်တီ့ကို တော်တော်လေး ဂရု စိုက်ကြပါတယ်၊ သူတို့ တတ်နိုင်သလောက် ကာကွယ် စောင့်ရှောက်ပါတယ်၊ လုံခြုံရေး အတွက်လဲ တတ်နိုင်သလောက် အစီအစဉ်တွေ လုပ်ပြီးတော့ ဆင်ဆင်ခြင်ခြင် နေကြပါတယ်။
မစ္စတာ ယက်ထော လာခဲ့တဲ့အပေါ်မှာကော လူတွေက အမျိုးမျိုး ပြောကြတယ်ခင်ဗျ၊ အန်တီ ဘယ်လို ထင်လဲ၊ စစ်တပ်က အကွက်ချ လိုက်တယ်လို့ ထင်လားခင်ဗျ။
အန်တီကတော့ အဲဒါကို တကယ်ပဲ ဖြေလို့မရဘူး၊ အန်တီ မသိဘူး၊ ဘယ်ဘက်ကိုမှ အန်တီ မယိမ်းဘူး၊ ဒါ စစ်တပ်က လွှတ်လိုက်တယ် ဆိုတာလဲ အမှန်အတိုင်း ပြောရရင် အန်တီ မထင်ဘူး၊ ဒါပေမယ့်လဲ တကယ့်ကို လွှတ်လိုက်တာ မဟုတ်ဘူးလို့လဲ တိတိကျကျကြီး ၁ဝဝ ရာခိုင်နှုန်းတော့ ပြောလို့မရဘူး၊ အန်တီ့ အနေနဲ့တော့ မထင်ဘူးလို့ပဲ ပြောရမှာပဲ။
အန်တီ့ ဟောပြောပွဲကို လူငယ်တွေလည်း အတော်လာကြတယ်၊ အန်တီအနေနဲ့ လူငယ်တွေ အမျိုးသမီးတွေကို ဘာပြောချင်လဲ၊ ဘာလုပ်ပေးချင်လဲ။
အန်တီမြင်ရတဲ့ အင်အားတွေကိုလေ တကယ်ပဲ သေသေချာချာ ထိရောက်အောင် လုပ်စေချင်တယ်၊ အင်အားတွေ ကတော့ ရှိတယ်၊ စွမ်းရည်တွေ ကတော့ ရှိတယ်၊ ဒါပေမဲ့လို့ ဒီအင်အား စွမ်းရည်တွေကို မှန်မှန်ကန်ကန် ထိထိရောက်ရောက်နဲ့ တိုင်းပြည် ကောင်းကျိုးအတွက် အများကောင်းကျိုး အတွက် အဲဒါလဲ သူတို့ရဲ့ တိုးတက်ရာ တိုးတက်ကြောင်းပေါ့နော်၊ အတ္တဟိတ၊ ပရဟိတ္တ နှစ်ခုလုံး အတွက် ဖြစ်အောင်လို့ မှန်မှန်ကန်ကန် စနစ်တကျ သုံးနိုင်ဖို့ အန်တီ အားပေးချင်တယ်၊ တတ်နိုင်သမျှ အကူအညီ ပေးချင်တယ်။
ဟုတ်ကဲ့ မှန်မှန်ကန်ကန်ဆိုတာ သူတို့အနေနဲ့ နိုင်ငံရေးထဲမှာ ပါဝင်လာရမယ်လို့ ဆိုလို တာလား ခင်ဗျ။
အဲဒီလိုတော့ မဟုတ်ဘူး၊ အဟောသိကံ မဖြစ်သွားအောင် လို့ပေါ့၊ အင်အားတွေကို အတ္တဟိတ သဘောနဲ့ ကိုယ့်အတွက်ပဲ ကိုယ်သုံးမယ် ဆိုရင်၊ ရေရှည်မှာ ကိုယ်လဲ အကျိုးမပေးဘူး၊ ဘာဖြစ်လို့လဲ ဆိုတော့ ကိုယ့်ပတ်ဝန်းကျင်ကို ကောင်းအောင် မလုပ်နိုင်လို့ ရှိရင် ကိုယ်တယောက်ထဲ ကောင်းနိုင်ဖို့ ဆိုတာ မဖြစ်နိုင်ဘူး၊ ပြီးတော့ နိုင်ငံရေးလို့ပဲ ပြောပြော၊ လူမှုရေးလို့ပဲ ပြောပြော၊ အန်တီ့ရဲ့ အယူအဆကတော့ နိုင်ငံရေးနဲ့ လူမှုရေးဆိုတာ ခွဲခြားလို့ မရပါဘူး၊ ဒီလို စိတ်ဓာတ်တွေကတော့ ရှိရမယ်၊ နိုင်ငံသား တယောက် ထားသင့်တဲ့ စိတ်ဓာတ်ပေါ့နော်၊ အန်တီတို့ ခေတ်တုန်းကတော့ ပြည်သူ့နီတိ ဆိုပြီးတော့ သင်ရတယ်၊ အဲလို စိတ်ဓာတ် မျိုးတွေပေါ့။
လက်နက်ကိုင်တိုင်းရင်းသားတွေနဲ့ အခုတလော စစ်ပွဲတွေ ပြန်ဖြစ်လာတယ်၊ အဲဒီ တင်းမာမှုတွေကို ဘယ်လို လုပ်ပေးနိုင်ရင် ပြေလည်မယ်လို့ ထင်လဲ။
အဲဒါက အန်တီစောစောတုန်းက ပြောသလိုပေါ့နော်၊ ဆွေးနွေးလို့ မရဘူးလား ဆိုတော့ နိုင်ငံရေး ပြဿနာတွေကို ဆွေးနွေးပြီးတော့ အေးအေးချမ်းချမ်း အကြမ်းမဖက်တဲ့ နည်းတွေနဲ့ ဖြေရှင်းတဲ့ နိုင်ငံရေး အစဉ်အလာတွေ အန်တီတို့မှာ မရှိသေးဘူး၊ အဲဒါကို အန်တီက သိပ်ဖြစ်စေချင်တယ်၊ ဒါကြောင့်မလို့လဲ အန်တီက အကြမ်းမဖက်တဲ့ လမ်းကို သွားတယ်ဆိုတာ ဒါပဲ၊ အကြမ်းမဖက်တဲ့ နည်းလမ်းနဲ့ ဒီတိုင်းပြည်ဟာ နိုင်ငံရေး ပြဿနာတွေဟာ နိုင်ငံရေးနည်းနဲ့ အေးအေးချမ်းချမ်း ဆွေးနွေးပြီးတော့ ဖြေရှင်းနိုင်တဲ့ အခြေအနေမျိုး ဖြစ်အောင်လို့ အန်တီတို့ ဖန်တီးယူရမယ်၊ အဲဒါကတော့ လွယ်တာလဲ မဟုတ်ဘူးပေါ့နော်၊ တိုးလိုက် ဆုတ်လိုက်လဲ ရှိမှာပေါ့၊ အခြေအနေက ဖြေရှင်းဖို့လဲ လွယ်တဲ့ အခြေအနေ ရှိချင်ရှိမယ်၊ တခါတလေတော့လဲ ပိုပြီး ခက်တဲ့ အခြေအနေ ဖြစ်မယ်၊ ဒါပေမယ့်လဲ အဲဒီလို အစဉ်အလာတခု ဖြစ်အောင်တော့ ကြိုးစားရမှာပဲ၊ မကြိုးစားရင်တော့ အဲဒီ ပဋိပက္ခတွေက ပျောက်သွားမှာ မဟုတ်ဘူး။
အန်တီက ဆက်သွယ်ရေး နည်းလမ်းတွေသုံးပြီးတော့ ဒုတိယ ပင်လုံညီလာကို လုပ်ချင်တယ် ဆိုတဲ့ သဘောပေါ့နော်၊ ဒီနေ့ သတင်းတွေ ထဲမှာ တွေ့ရပါတယ်။ Twitter သုံးမယ်လို့လဲ အန်တီ ပြောထားတယ်၊ ဘယ်တော့လောက် သုံးမလဲဆိုတာ စိတ်ဝင်စား နေကြတယ်ခင်ဗျ။
အဲဒါ ဒီနေ့ပဲ အင်တာနက်တွေဘာတွေ သုံးဖို့ လျှောက်လွှာတွေ ဘာတွေ ကြည့်နေတယ်၊ နိုင်ငံရေး ကင်းရှင်းကြောင်း ထောက်ခံစာ ပါရမယ် ဆိုတော့ အန်တီကတော့ လျှောက်တော့ လျှောက်မှာပဲ၊ ဒါပေမဲ့ နိုင်ငံရေး မကင်းရှင်းပါဘူး ဆိုတာလဲ အမှန်အတိုင်းတော့ ပြောရမှာပဲ၊ ဒါက ကင်းမှ မကင်းရှင်းပဲ ဘယ်လို ပြောရမလဲ၊ လျှောက်တော့ လျှောက်မယ်၊ မှန်မှန်ကန်ကန်ပဲ ပြောပြီးတော့ လျှောက်မှာပဲ။
အန်တီ အင်တာနက် သုံးလို့မရဘူးဆိုရင် တခြားနည်းလမ်းနဲ့ ပေါ့လေ Tele Conference လို ဟာမျိုးတွေပေါ့နော် ဘယ်လိုနည်းလမ်းတွေ ရှိနိုင်သေးတယ်လို့ အန်တီ ထင်လဲ။
အဲဒါကတော့ ရှာရမှာပေါ့လေ၊ ဒါကြောင့်မလို့ အန်တီက ပြောတာ၊ ၂၁ ရာစုနဲ့ ကိုက်ညီတဲ့ ပုံစံမျိုးနဲ့ လုပ်ရမယ် ဆိုတာ၊ ဒုတိယ ပင်လုံညီလာခံ ဆိုတာကလဲ အန်တီ အထဲမှာ ရှိနေတုန်း ထွက်လာတာလေ၊ ရေဒီယိုကနေ ကြားရတာ၊ အဲဒီတည်းက အန်တီ စဉ်းစားနေတယ်၊ ၂၁ ရာစုပုံစံနဲ့ လုပ်ရင် ပိုပြီးတော့ အဆင်ပြေမယ် ပေါ့နော်၊ နည်းလမ်းတွေ ဘာတွေကတော့ အန်တီတို့ လူငယ်တွေက ရှာရမှာပေါ့၊ ကိုစိန်ဝင်းတို့လဲ ဝိုင်းပြီးတော့ အကြံဉာဏ်တွေ ပေးကြပေါ့။
ဟိုနေ့က မိုဘိုင်းဖုန်းသုံးရတာ တစိမ်းဆန်တယ် ပေါ့နော်၊ အခုအင်တာနက် ကျတော့ကော ဘယ်လို ရှိလဲခင်ဗျ။
အန်တီက အင်တာနက် မသုံးဖူးဘူးလေ၊ ဒါပေမဲ့ ကွန်ပျူတာတော့ အတော်အတန် လုပ်တတ် ပါတယ်။ ကွန်ပျူတာနဲ့ နည်းနည်း ရင်းနှီးနေပြီဆိုရင် အင်တာနက်တွေ ဘာတွေ သုံးဖို့က မခက်ပါဘူး။
နယ်ကို ခရီးထွက်ဖို့ တိုင်းရင်းသား အဖွဲ့အစည်းတွေနဲ့ တွေ့ဖို့ အစီအစဉ် ရှိလားခင်ဗျ။
လောလောဆယ်တော့ မရှိသေးပါဘူး၊ ရန်ကုန်မှာတောင် အလုပ်တွေ မပြီးသေးဘူး။
ရွေးကောက်ပွဲဝင်တဲ့ နိုင်ငံရေးပါတီတွေကို NLD နဲ့ မဟာမိတ် ဖွဲ့ချင်တယ် ဆိုရင် အဲဒီပေါ်မှာ အန်တီ ဘယ်လို သဘောထားလဲ။
အန်တီကတော့လေ ထွက်လာတဲ့နေ့ထဲက ပြောတယ်ပေါ့နော်၊ ပြည်သူတွေက ပြည်သူ့ အတွက် ဒီမိုကရေစီ ကွန်ယက်ကြီး တခု ဆောက်စေချင်တယ်၊ အဲဒီတော့ အဲဒီမှာဆိုရင် မဟာမိတ်တွေ အများကြီး ရှိရမှာပေါ့၊ လူတိုင်းနဲ့ လက်တွဲနိုင်တာ မဟုတ်ဘူး ဆိုရင်တောင် ကိုယ်နဲ့ အဓိကကျတဲ့ ရည်ရွယ်ချက် တူတဲ့ လူတွေနဲ့ တွဲပြီးတော့ လုပ်နိုင်တဲ့ အခြေအနေ ဖြစ်အောင်လို့ အန်တီ လုပ်ချင်တယ်။ အန်တီ ပြောထားပြီးပါပြီ၊ ရွေးကောက်ပွဲကို ဝင်တဲ့ ၃၇ ပါတီထဲက ဘယ်ပါတီပဲ ဖြစ်ဖြစ် တကယ်ပဲ အန်တီတို့နဲ့ ရည်ရွယ်ချက် တူပြီးတော့ ဒီမိုကရေစီ အတွက် ပူးပေါင်း ဆောင်ရွက်ချင်တယ် ဆိုရင် အန်တီတို့ကလဲ ပူးပေါင်း ဆောင်ရွက်ဖို့ အဆင်သင့်ပါပဲ။
မဇ္ဈိမ ဝိုင်းတော်သားတွေကို အန်တီပြောချင်တဲ့ စကားက ဘာများဖြစ်မလဲ ခင်ဗျ။
ပြောရမယ်ဆိုရင်တော့လေ သတင်းသမားတွေရဲ့ ကဏ္ဍက အခုအချိန်မှာ အင်မတန်မှ အရေးကြီး ပါတယ်၊ အခုခေတ်မှာ အင်မတန်မှ အရေးပါ ပါတယ်၊ အဲဒီတော့ သတင်းသမားတွေရဲ့ သြဇာကလည်း မနည်းဘူး၊ အဲဒီတော့ ဒီသြဇာကို အကောင်းအတွက် သုံးပါလို့ အန်တီ သတိပေးချင်တယ်။ တချို့ သတင်းသမားတွေက ကိုယ်သတင်း ထူးဖို့ သတင်းဦးဖို့ အဲဒါကို အဓိက ထားကြတယ်၊ သတင်းထူးတာ သတင်းဦးတာလဲ ကောင်းပါတယ်၊ ဒါတင်မကသေးဘူး သတင်းနဲ့ ပတ်သက်လို့ လုပ်တဲ့နေရာမှာ တိုင်းပြည်ရဲ့ အကျိုးကို ဘယ်လောက် ဆောင်ရွက် ပေးနိုင်သလဲ ဆိုတာ စဉ်းစား ပေးစေချင်တယ်။ နောက်ပြီးတော့ အန်တီ စောစောက ပြောဖြစ်လားတော့ မသိဘူး၊ ထွက်လာတဲ့ အချိန်မှာ ဆက်သွယ်ရေး ကဏ္ဍက ပိုပြီးတော့ ကျယ်ပြန့်လာတယ်၊ ဆဲလ်ဖုန်းလေးတွေ ပေါ့နော် လူတိုင်းမှာ ရှိတယ်၊ အဲဒီတော့ သတင်းတွေဟာ သိပ်ပြီးတော့ အရေးကြီး ပါတယ်လို့၊ အဲဒီ အရေးကြီးတာကို မမေ့ပါနဲ့လို့၊ ကိုယ်ဟာ အရေးကြီးတဲ့ နေရာမှာ ရှိနေပါတယ်၊ ဒါကြောင့်မလို့ အဲဒီနေရာမှာ မှန်မှန်ကန်ကန်နဲ့ အန်တီတို့ အများစု ကောင်းကျိုးအတွက် လုပ်ပေးပါလို့ပဲ မေတ္တာရပ်ခံ ချင်ပါတယ်။ တာဝန်သိတဲ့ စိတ်နဲ့ လုပ်သင့်ပါတယ်။
Ref: မဇ္ဈိမ
Read More...
Collapse...
မြင့်မောင်
ဗုဒ္ဓဟူးနေ့၊ နိုဝင်ဘာလ ၁၇ ရက် ၂၀၁၀
နယူးဒေလီ (မဇ္ဈိမ)။ ။ တိုင်းရင်းသားများအကြား ခိုင်မာသော သဘောတူညီမှု တည်ဆောက်နိုင်ရေး အတွက် အစည်းအဝေး တရပ်ကို ခေတ်မီ ဆက်သွယ်ရေး သုံး၍ ပြည်တွင်းပြည်ပ အင်အားစုများ အကြား ပြုလုပ်လိုကြောင်း ဒေါ်အောင်ဆန်းစုကြည် ပြောကြားခဲ့သည်ဟု တိုင်းရင်းသား ပါတီ ခေါင်းဆောင်များက ဆိုသည်။
အမျိုးသား ဒီမိုကရေစီအဖွဲ့ချုပ် (အန်အယ်ဒီ) ခေါင်းဆောင် ၅ ဦးနှင့် ၉ဝ ခုနှစ် ရွေးကောက်ပွဲဝင် တိုင်းရင်းသား ပါတီ ခေါင်းဆောင် ၇ ဦးက အန်အယ်ဒီ ရုံးချုပ်၌ ယမန်နေ့တွင် ဆွေးနွေးပွဲ ကျင်းပရာ တန်းတူရေးနှင့် ကိုယ်ပိုင်ပြဋ္ဌာန်းခွင့် အတွက် ဒုတိယ ပင်လုံ ညီလာခံ ကျင်းပရေး သဘောတူခဲ့ပြီး၊ အနှောင့်အယှက် ကင်းစေရန် ခေတ်မီ ဆက်သွယ်ရေး နည်းပညာ အသုံးပြုလိုကြောင်း ဒေါ်အောင်ဆန်းစုကြည်က ပြောဆိုခဲ့ခြင်း ဖြစ်သည်။
“အစည်းအဝေး ခေါ်တာတောင် ခွင့်ပြုချက်တွေ တောင်းရတယ် ဆိုတော့ အဲဒါမျိုးတွေ မလိုဘဲနဲ့ ခေတ်မီ ပညာတွေနဲ့ အခု အမေရိကန်မှာ ရှိတဲ့ သူတွေ၊ သြစတြေးလျမှာ ရှိတဲ့ သူတွေနဲ့ မြန်မာပြည်မှာ ရှိတဲ့ သူတွေ တနေရာမှာ ထိုင်ပြီးတော့၊ ဆက်သွယ်ပြီးတော့ ညီလာခံလုပ်လို့ ရတဲ့ပုံစံမျိုး ဖြစ်နိုင်တယ်ဆိုတဲ့ ဟာမျိုး ပြောတယ်” ဟု ဇိုမီးအမျိုးသား ကွန်ကရက် ZNC ဥက္ကဋ္ဌ ပူးကျင့် ရှင်းထန်က မဇ္ဈိမကို ပြောသည်။
သမားရိုးကျ အခမ်းအနားဖြင့် စုဝေးကျင်းပလျှင် စစ်အစိုးရက တားမြစ်မည့်အရေးကို ကျော်လွှားရန်နှင့် အလျင်အမြန် အကောင်အထည် ဖော်နိုင်ရန် အတွက် ဆက်သွယ်ရေး စနစ်သုံး စည်းဝေးလိုနေကြခြင်း ဖြစ်သည်။
ရခိုင်ဒီမိုကရေစီ အဖွဲ့ချုပ် ALD ဥက္ကဋ္ဌ ဦးသာဘန်းက “ မီဒီယာလောကရဲ့ တိုးတက်လာတဲ့ အနေအထားအရ ခင်ဗျားတို့ လုပ်နေကြတဲ့ တိုက်ရိုက် လွှင့်နေတဲ့ ပုံစံမျိုးပေါ့။ ” ဟု ပြောဆိုသည်။
မည်သည့် ဆက်သွယ်ရေး နည်းလမ်းကို အသုံးပြုမည်ကို ရှင်းလင်းစွာ မသိရသေးသော်လည်း လူမှု ဆက်သွယ်ရေး ကွန်ယက် twitter ကို အသုံးပြုလိုသည်ဟု ဒေါ်အောင်ဆန်းစုကြည်က နေအိမ်အချုပ်မှ မလွတ်မီ သူမ၏ ရှေ့နေမှတဆင့် ပြောကြားဖူးသည်။
သို့သော်လည်း ထောင်တွင်းအကျဉ်းချခံခဲ့ရသော နိုင်ငံရေး ခေါင်းဆောင်အများစုမှာ အင်တာနက်နှင့် အလှမ်း ဝေးနေဆဲ ဖြစ်သည်။
“ကွန်ပြူတာဆိုကလည်း သူတို့တတွေ ထောင်ထဲရောက်နေကြတဲ့ အချိန်မှာပေါ်တာ ဆိုတော့ အင်တာနက်တို့၊ အီးမေးတို့ ဖေ့စ်ဘွတ်တို့၊ တွစ်တာတို့ ဆိုတာတွေကို သူတို့အနေနဲ့ မသိဘူး။ အဲဒီကိစ္စတွေ ကတော့ အများဆုံး ဆုံးဖြတ်မှာက ဒေါ်စုဖြစ်မယ် ထင်ပါတယ်” ဟု အန်အယ်ဒီ သတင်းရပ်ကွက် တခုက ပြောသည်။
ယမန်နေ့ အစည်းအဝေးသို့ အန်အယ်ဒီမှ ဦးတင်ဦး၊ ဒေါ်အောင်ဆန်းစုကြည်၊ ဦးဝင်းတင်၊ ဦးသန်းထွန်းနှင့် ဦးလှဖေ၊ ဇိုမီး အမျိုးသား ကွန်ကရက် ဥက္ကဋ္ဌ ပူးကျင့်ရှင်းထန်၊ ပြည်ထောင်စု တိုင်းရင်းသားများ ဒီမိုကရေစီ အဖွဲ့ချုပ် UNLD မှ ဦးထောင်ကိုထန်း၊ မွန်အမျိုးသား ဒီမိုကရေစီ တပ်ဦးမှ နိုင်ငွေသိမ်း၊ နိုင်ထွန်းသိမ်း၊ ရှမ်းအမျိုးသား ဒီမိုကရေစီ အဖွဲ့ချုပ် SNLD မှ ဦးရွှေကြိုး၊ ဦးစိုင်းတင်လှိုင်နှင့် ရခိုင်အမျိုးသား ဒီမိုကရေစီ အဖွဲ့ချုပ် ALD မှ ဦးသာဘန်းတို့က ယနေ့ နေ့လည် ၁ နာရီမှစ၍ မိနစ် ၃ဝ ကြာ ဆွေးနွေးခဲ့ကြခြင်း ဖြစ်သည်။
ပြီးခဲ့သည့်လ ၂၄ ရက်နေ့တွင် ZNC ထူထောင်သည့် ၂၂ နှစ်မြောက် အခမ်းအနားကို စစ်ကိုင်းတိုင်း ကလေးမြို့၌ ကျင်းပရာ အမျိုးသား ပြန်လည် ရင်ကြားစေ့ရေးနှင့် ပြည်ထောင်စု တည်ဆောက်ရေး အတွက် တွေ့ဆုံ ဆွေးနွေးရန် ဒုတိယ ပင်လုံညီလာခံ ခေါ်ယူရေး “ကလေးမြို့ ကြေညာစာတမ်း” ကို ထုတ်ပြန်ခဲ့သည်။
အန်အယ်ဒီ ဒုဥက္ကဋ္ဌ ဦးတင်ဦးနှင့် ဗဟိုအလုပ်အမှုဆောင်ဝင် ဦးဝင်းတင်၊ လွှတ်တော် ကိုယ်စားပြု ကော်မတီ CRPP အတွင်းရေးမှူး ဦးအေးသာအောင်၊ မွန်အမျိုး သားခေါင်းဆောင် နိုင်ငွေသိန်း၊ နိုင်ထွန်းသိန်းနှင့် ဝါရင့်နိုင်ငံရေး သမားကြီး သခင်သိန်းမောင်၊ ဦးအုန်းမောင်၊ ဦးညွန့်သိန်းနှင့် ကျောင်းသားလူငယ် ခေါင်းဆောင်များ အပါအဝင် လူဦးရေ ၅ဝ ကျော်က သဘောတူ လက်မှတ် ရေးထိုးခဲ့သည်။
ပြည်မနှင့်တောင်တန်းဒေသများ ပူးပေါင်းပါမည်ဆိုသော သဘောတူညီချက်အတွက် ဗိုလ်ချုပ်အောင်ဆန်းနှင့် ကချင်၊ ချင်း၊ ရှမ်း ခေါင်းဆောင်များက ၁၉၄၇ ခုနှစ် ဖေဖော်ဝါရီလ ၁၂ ရက်နေ့တွင် ရှမ်းပြည်နယ် ပင်လုံမြို့တွင် စည်းဝေးခဲ့ကြရာက ပင်လုံ ညီလာခံဟု ခေါ်တွင်ခဲ့သည်။ သို့သော်လည်း ၁၉၄၈ ခုနှစ် လွတ်လပ်ရေးရ အပြီး သဘောတူညီမှု ပျက်ပြားကာ ပြည်တွင်းစစ် ဖြစ်လာခဲ့သည်။
၁၉၈၈ ခုနှစ်နောက်ပိုင်း စစ်အစိုးရက လက်နက်ကိုင် တိုင်းရင်းသားအဖွဲ့များ အပစ်ခတ်ရပ်စဲ၍ ငြိမ်းချမ်းရေး ရပြီဟု ပြောလေ့ ရှိသော်လည်း တိုင်းရင်းသား အဖွဲ့များက နိုင်ငံရေး သဘောတူညီချက် မပါကြောင်း ငြင်းဆို ထားကြသည်။
ခန့်မှန်းခြေ စုစုပေါင်း ၄ သောင်းဝန်းကျင်ရှိ အပစ်ရပ်တိုင်းရင်းသား လက်နက်ကိုင် အင်အားကို ကာကွယ်ရေး ဦးစီးချုပ်အောက် သွတ်သွင်းမည့် နယ်ခြားစောင့်တပ် အဖြစ် မပြောင်းလဲသေးနိုင်သလို၊ အပစ်ခတ် မရပ်ဘဲ ဆက်လက် တိုက်နေသော တိုင်းရင်းသား အဖွဲ့များလည်း ရှိနေသေးသည်။
Ref: မဇ္ဈိမ
Read More...
Collapse...
Wednesday, 17 November 2010
မြန်မာနိုင်ငံတွင် ဖြစ်ပေါ်နေသည့် အခြေအနေများနှင့် ပတ်သက်၍ မနက်ဖြန် ကျင်းပမည့် ကုလသမဂ္ဂ လုံခြုံရေး ကောင်စီ အစည်း အဝေးတွင် ဆွေးနွေးလိမ့်မည်ဟု ခန့်မှန်း ပြောဆိုမှုများ ရှိနေသည်။
အစည်းအဝေး မတိုင်မီ ကုလသမဂ္ဂ လုံခြုံရေးကောင်စီ အဖွဲ့ဝင် နိုင်ငံများအကြား အလွတ်သဘော ဆွေးနွေးရာ ဒီမိုကရေစီ ခေါင်းဆောင် ဒေါ်အောင်ဆန်းစုကြည် လွတ်မြောက် လာမှုကို ကြိုဆိုကြောင်း၊ မကြာမီက ကျင်းပခဲ့သည့် ရွေးကောက်ပွဲနှင့် ပတ်သက်၍ စိုးရိမ်ကြောင်း၊ မြန်မာနိုင်ငံ အကျဉ်းထောင် အသီးသီးရှိ နိုင်ငံရေး အကျဉ်းသားများကို လွှတ်ပေးရန် စစ်အစိုးရကို တိုက်တွန်း ကြောင်း စသည့် သဘော တူညီချက်များ ရရှိသည်ဟု သိရသည်။
ကမ္ဘာ့ ကုလသမဂ္ဂ အထွေထွေ အတွင်းရေးမှူးချုပ် မစ္စတာ ဘန်ကီမွန်းကလည်း ဒေါ်အောင်ဆန်းစုကြည် လွတ်မြောက်မှုကို ကြိုဆို လိုက်ပြီး နိုင်ငံရေး အကျဉ်းသား အားလုံး လွှတ်ပေးရန် စစ်အစိုးရကို တိုက်တွန်းကြောင်း နိုဝင်ဘာ ၁၃ ရက်နေ့က ကုလ သမဂ္ဂ သတင်း ထုတ်ပြန်ချက်တွင် ပါရှိသည်။
အဖွဲ့ဝင် ၁၅ နိုင်ငံ ပါရှိသည့် လုံခြုံရေး ကောင်စီတွင် မြန်မာ့အရေးနှင့် ပတ်သက်၍ လပေါင်းများစွာ အကြာ ပြောဆို ဆွေးနွေးမှု မပြုလုပ်ဘဲ ရှိနေရာမှ ယခု ပထမ ဆုံး အကြိမ် ပြန်လည် ဆွေးနွေးရန် ပြုလုပ်ခြင်း ဖြစ်သည်။ လက်ရှိ လုံခြုံရေး ကောင်စီ၏ အလှည့်ကျ ဥက္ကဋ္ဌ မှာ ဗြိတိန်နိုင်ငံ ဖြစ်သည်။
မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် လွတ်မြောက်လာမှုနှင့် ပတ်သက်၍ အမေရိကန်၊ ဗြိတိန်၊ ဂျပန် စသည့် နိုင်ငံများ အပါအ၀င် နိုင်ငံများစွာက ကြိုဆိုခဲ့ကြပြီး တရုတ်နိုင်ငံကမူ မည်သည့် ပြောဆိုမှုမျိုးမှ မပြုလုပ်ခဲ့ပေ။
တရုတ် နိုင်ငံသည် မြန်မာ့ အရေး ကိစ္စရပ်များနှင့် ပတ်သက်၍ ကုလသမဂ္ဂ လုံခြုံရေးကောင်စီတွင် အကာအကွယ် ပေးလေ့ရှိသည်။
Ref: ဧရာဝတီ်
Read More...
Collapse...
ရန်ပိုင်
Wednesday, 17 November 2010
ဒေါ်အောင်ဆန်းစုကြည်က ရန်ကုန်တိုင်း တောင်ဒဂုံ မြို့နယ်ရှိ အမျိုးသား ဒီမိုကရေစီ အဖွဲ့ချုပ် (NLD) လူမှု အထောက် အကူပြုအဖွဲ့မှ စောင့်ရှောက် ထားသည့် HIV/AIDS ဝေဒနာရှင်များကို ယနေ့ နေ့လယ်၂ နာရီခန့်တွင် သွားရောက် တွေ့ဆုံ အားပေးကြောင်း သတင်းရသည်။
ဝေဒနာရှင်များ၏ ဆေးဝါး ကုသမှု အခြေအနေ၊ စားဝတ်နေရေး အခြေအနေများ၊ စိတ်ပိုင်းဆိုင်ရာ၊ ရုပ်ပိုင်းဆိုင်ရာ အခြေအနေ များကို ဒေါ်အောင်ဆန်းစုကြည်က မေးမြန်းအားပေးကြောင်း ဝေဒနာရှင်တဦး ဖြစ်သည့် မသီသီအေး က ဧရာဝတီသို့ ပြောပြ သည်။
“အမေစုကို တွေ့ရလို့ အရမ်းဝမ်းသာတယ်၊ တွေ့ရမယ်လို့ ထင်လည်း ထင်မထားဘူး၊ မျက်ရည်တောင် ကျတယ်”ဟု ၎င်းကပြော သည်။
လူနာရှင်များအနေဖြင့် ဒေါ်အောင်ဆန်းစုကြည်နှင့် တွေ့ဆုံခွင့်ရသည့် အတွက် မျော်လင့်ချက် ကုန်နေသည့် ဘ၀တွင် ခွန်အားများ ဖြစ်လာကြောင်း၊ ဘ၀သက်တမ်း တလျှောက်တွင် ယခုကဲ့သို့ တွေ့ဆုံရမည်ဟု မထင်ကြောင်း မသီသီအေးက ဆိုသည်။
ဒေါ်အောင်ဆန်းစုကြည်က ပျော်ပျော်ရွှင်ရွှင်နှင့် ဆေးကုသခံယူရင်း ဘ၀ကို ဖြတ်သန်းရန် ပြောဆို သွားကြောင်းလည်း ၎င်းကဆက် လက်ပြောပြသည်။
လူနာရှင် မသီသီအေးသည် ရန်ကုန်ဇာတိဖြစ်ပြီး အသက်၂၈ နှစ် ရှိပြီဖြစ်ကြောင်း ပြီးခဲ့သည့် နှစ်ကမှ ၎င်းတွင် ရောဂါ ရှိနေကြောင်း သိရသည်ဟု ပြောသည်။
အဆိုပါ ရောဂါကို ၎င်း၏ အမျိုးသားထံမှ ကူးစက်ခဲ့ခြင်း ဖြစ်ပြီး အမျိုးသား တိမ်းပါးသွားပြီးနောက် တောင်ဒဂုံ မြို့နယ်ရှိ NLD လူမှု အထောက်အကူပြု အဖွဲ့၏ ဂေဟာတွင် ဆေးကုသမှု ခံယူရင်း နေထိုင်လျက် ရှိကြောင်းလည်း ၎င်းကဆိုသည်။
NLD လူမှုအထောက်အကူပြုအဖွဲ့သည် HIV/AIDS ဝေဒနာ ရှင်များကို ပြုစု စောင့်ရှောက်မှု ပေးရန် ရန်ကုန်တိုင်း အတွင်း ဂေဟာ သုံးခု တည်ထောင်ထားကြောင်း၊ ယခု တောင်ဒဂုံမြို့နယ် ဂေဟာတွင် လူနာပေါင်း ၁၀၀ ကျော် နေထိုင်ကြောင်း သိရသည်။
ယင်း လူနာများ ပြုစုစောင့်ရှောက်ရေးကို လူမှုအထောက်အကူပြု အဖွဲ့မှ မဖြူဖြူသင်း ဦးဆောင်သည့် NLD လူငယ်များက ဦးစီး ဆောင်ရွက် နေခြင်းဖြစ်သည်။
ဝေဒနာရှင် တဦးဖြစ်သည့် မ၀င်းဝင်းနိုင်ကလည်း “အမေစုက ပြောတယ်၊ ရောဂါ အတွက် စိတ်ဓာတ် မကျဖို့၊ ဆေးဝါး တွေကို တတ်နိုင်သမျှ ကူညီပေးမယ် ပြောတယ်”ဟု ဆိုသည်။
ဝေဒနာရှင်များ အားလုံးအနေဖြင့် ဒေါ်အောင်ဆန်းစုကြည်၏ လာရောက် အားပေးမှုကြောင့် ပျော်ရွင်နေကြောင်း မ၀င်းဝင်းနိုင်က ဆက်လက် ပြောသည်။
ယခုကဲ့သို့ HIV/AIDS ဝေဒနာရှင်များ စောင့်ရှောက်ပေးသည့် လုပ်ငန်းအား ယခင်ကတည်းက NLD လူငယ်များကို စနစ် တကျ လုပ်ကိုင်ရန် ဒေါ်အောင်ဆန်းစုကြည် စီစဉ်ပေးခဲ့ကြောင်း၊ ယင်းလုပ်ငန်းများသည် တိုင်းပြည် အတွက် မရှိမဖြစ် လိုအပ်နေသည့် လုပ်ငန်းများ ဖြစ်သည့် အတွက် ဆက်လက် လုပ်ဆောင်သွားရန် သံန္နိဋ္ဌာန် ချထားကြောင်း မဖြူဖြူသင်းက ပြောသည်။
NLD လူမှု အထောက်အကူပြု အဖွဲ့သည် ၂၀၀၂ ခုနှစ်မှ စတင်ပြီး HIV/AIDS ဝေဒနာရှင်များ စောင့်ရှောက်ရေး လုပ်ငန်းများကို စတင် လုပ်ဆောင် ခဲ့ခြင်းဖြစ်သည်။
မြန်မာနိုင်ငံတွင် HIV/AIDS ဝေဒနာရှင်ပေါင်း ၃၃၉၀၀၀ ခန့်ရှိသည်ဟု ကမ္ဘာ့ကျန်းမာရေး အဖွဲ့၏ ၂၀၀၇ ခုနှစ်ထုတ် အစီရင်ခံ စာအရ သိရသည်။
Ref: ဧရာဝတီ်
Read More...
Collapse...
ဦးဇော်ဝင်းလှိုင်
အင်္ဂါ, 16 နိုဝင်ဘာ 2010
ဒေါ်အောင်ဆန်းစုကြည် လွတ်မြောက်လာပြီးနောက် ပြည်သူတွေရဲ့ အခက်အခဲတွေကို ကူညီ ဖြေရှင်း ပေးနိုင်လိမ့်မယ်လို့ မျှော်လင့်ကြတဲ့ အထဲမှာ နေပြည်တော်က အစိုးရ ၀န်ထမ်းတွေလည်း ပါဝင်ပါတယ်။ သူတို့ရဲ့ မပြေလည်တဲ့ လက်ရှိဘ၀တွေ အပေါ် မကျေမနပ် ဖြစ်နေတဲ့အချိန် ဒေါ်အောင်ဆန်းစုကြည် လွတ်မြောက် လာတဲ့အတွက် သူတို့ဘ၀တွေ အပြောင်းအလဲ ဖြစ်လာတော့မယ် ဆိုတော့ မျှော်လင့်ချက်တွေ ရှိလာကြတယ်လို့ နေပြည်တော် ဒေသခံတွေက ပြောပြပါတယ်။ အပြည့်အစုံကို ကိုဇော်ဝင်းလှိုင်က တင်ပြ ပေးထားပါတယ်။
ဒေါ်အောင်ဆန်းစုကြည် လွတ်လာမယ်လို့ သတင်းတွေ စထွက်ကတည်းက ရန်ကုန်မြို့က သူမ နေအိမ်နဲ့ NLD ရုံးချုပ် ရှေ့မှာ လူတွေ ထောင်နဲ့ချီ ကြိုဆို နေကြသလိုပဲ နေပြည်တော်မှာ ရှိတဲ့ စစ်အစိုးရ ၀န်ထမ်းတွေ ကြားမှာလည်း ဒေါ်စုလွတ်မယ့် သတင်းကို ၀မ်းပန်း တသာနဲ့ စောင့်ပြီး နားထောင်တာတွေ တွေ့ရတယ်လို့ ဒေသခံတွေက ပြောပါတယ်။
သူတို့ရဲ့ လက်ရှိ စားဝတ်နေရေး၊ အစစ အဆင်မပြေ ဖြစ်နေတဲ့အချိန် ဒေါ်အောင်ဆန်းစုကြည် လွတ်လာတဲ့ အတွက် နေပြည်တော်ကို ရောက်နေကြတဲ့ စစ်အစိုးရ ၀န်ထမ်းတွေဟာ သူတို့ ဘ၀တွေမှာ ပြောင်းလဲမှု ရှိလာတော့မယ် ဆိုတဲ့ မျှော်လင့်ချက်တွေ ထွက်ပေါ် လာတဲ့အကြောင်း နေပြည်တော် ဒေသခံတဦးက ပြောပြပါတယ်။
“ဒီမှာ အမေစု လွတ်လာတယ်ဆိုတော့ ကျနော်တို့ လူငယ်တွေရော လက်ဖက်ရည် ဆိုင်တွေမှာ ပြောကြ ဆိုကြနဲ့ တော်တော် နှစ်ထောင်း အားရတဲ့ ပုံစံနဲ့ပေါ့။ ကျနော်က ဘုန်းကြီးကျောင်းတွေ ဘာတွေနဲ့လည်း အဆက်အသွယ် ရှိတော့ သံဃာတော်တွေ အနေနဲ့လည်း တော်တော်လေး အားရကျေနပ် ပျော်ရွှင် နေကြတာပေါ့။ မျှော်လင့်ချက်လေး တခု ရလာတယ်လို့ပဲ ပြောရမလား မသိဘူး၊ အကုန်လုံးတော့ ၀မ်းသာ နေကြတာပါပဲ။
“ဒီမှာက သူတို့အတွက် အစစ အရာရာ အဆင်မပြေနိုင်ဘူး။ ရုံးတွေနဲ့ သူတို့ ၀န်ထမ်းအိမ်ရာနဲ့ ကလည်း အဝေးကြီးတွေ၊ အဲတော့ အစစ အရာရာ ရာသီဥတု ဘာညာရော သူတို့ ဒီမှာတော့ မပျော်ကြဘူးဗျ။ အပြောင်းအလဲလေး တခု ဖြစ်လာမယ်ဆိုရင် သူတို့လည်း တော်တော် ကျေနပ်မယ် ထင်တာပဲ။ အခု ဒီမှာတော့ သူတို့အတွက် အစစ အရာရာ အဆင် မပြေဘူးဗျ။ ဒီမှာ အဆင်ပြေတယ် ဆိုတဲ့လူတွေက ရုံးမှာ တော်တော် ရာထူးကြီးတဲ့လူ၊ ရုံးကားရှိတဲ့ လူတွေကတော့ အဆင်ပြေရင် ပြေမှာ။ သာမန် ၀န်ထမ်းတွေကတော့ အစစ အရာရာ စီးပွားရေးရော၊ ကလေးတွေရဲ့ ပညာရေးက အစ အခက်အခဲတွေ ရှိတော့ သူတို့လည်း စိတ်မချမ်းသာဘူးပေါ့။”
ဝန်ထမ်းတွေဟာ တခြားထွက်ပေါက် မရှိတဲ့အချိန် ဒေါ်အောင်ဆန်းစုကြည်ဟာ သူတို့အတွက် အားကိုးစရာ တခု ဖြစ်လာတယ်လို့ တခြား နေပြည်တော် ဒေသခံ တဦးကလည်း အခုလို ပြောပြပါတယ်။
“လတ်တလောက ဘာမှ ထွက်ပေါက်မရှိ ပိတ်နေကြတဲ့ အခါကြတော့ အားကိုးရှာကြတာပေါ့၊ ဒါပဲ။ ဒါပေမဲ့ တခုရှိတာက နေပြည်တော်က ၀န်ထမ်းတွေ ဖြစ်တဲ့ အတွက်ကြောင့် သူတို့က ဒေါ်စု ဘာလုပ်ပေးမလဲ၊ ဘာလုပ်မလဲ၊ ဒါပဲ အားကိုးရှာတာ။ သူတို့ ဘာလုပ်မလဲ ဆိုတာကတော့ မရှိဘူးနော်၊ လောလောဆယ် မှာလေ။ သူတို့မှာ ရှေ့ကနေ ဘယ်လို ဦးဆောင်ရင် ဘာလုပ်လိုက်မယ် ဆိုတဲ့ စိတ်မျိုးတော့ အခုထိ သိပ်မရှိသေးဘူး။ အဲဒါမျိုးကတော့ ကျနော်ထင်တယ်၊ ဒေါ်စုကိုယ်တိုင်က ပျိုးထောင်ပေးမှ ရမယ်။ သူတို့မှာ ထွက်ပေါက် ပိတ်နေကြတဲ့ အပေါ်မှာ အားကိုးရာတခု အနေနဲ့ အားကိုးနေကြတာ။
“ဒါပေမဲ့ ဒေါ်စုကလည်း သူ့မိန့်ခွန်းမှာ ပါပါတယ်၊ ပြည်သူလူထုကြီးကလည်း ပါဝင်ဆောင်ရွက်မှ၊ ပြည်သူ လူထုကြီးရဲ့ ပံ့ပိုးမှု လိုပါတယ်လို့ ပြောတယ်။ အဲဒီလို ပံ့ပိုးမှု အပိုင်းမှာတော့ ပါဝင်ဆောင်ရွက်မှု နည်းနည်း အားနည်း နေလိမ့်ဦးမယ်၊ ကျနော်တို့ နယ်မှာတော့၊ တက်တက်ကြွကြွ၊ ရဲရဲရင့်ရင့်ပေါ့။ ကျနော်တို့ ပျဉ်းမနားက နေပြည်တော် ဖြစ်လာပြီးတဲ့ နောက်မှာ တော်တော်လေး အကြောက်တရား ကြီးသွားတယ်ဗျ။ ကြီးသွားတော့ ဒီဘက် နဂို ပျဉ်းမနားဆိုတဲ့မြို့ပဲဖြစ်ဖြစ်၊ အခု အသစ်ဖြစ်နေတဲ့ နေပြည်တော် ဆိုတဲ့ ဧရိယာမှာဖြစ်ဖြစ်၊ အဲဒီကတော့ ပိုဆိုးတာပေါ့ ၀န်ထမ်းတွေ ချည်းပဲဆိုတော့၊ အကြောက်တရားတော့ ပိုကြီးကြပါတယ်။ ရန်ကုန် လူထုလိုတော့ ရွှင်ရွှင်လန်းလန်း တက်တက်ကြွကြွ အပြည့်အ၀ မပြနိုင်ကြဘူးပေါ့ဗျာ။”
ဒေါ်အောင်ဆန်းစုကြည် လွတ်မြောက်လာတဲ့အပေါ် ပျဉ်းမနား၊ နေပြည်တော် ကြပ်ပြေးဒေသမှာ ရှိတဲ့ စစ်အစိုးရ ၀န်ထမ်းတွေ အကြား တုံ့ပြန် ပြောဆိုမှုတွေနဲ့ ပတ်သက်ပြီး ဒေသခံတွေ ပြောပြသွားတာ ဖြစ်ပါတယ်။
ဒေါ်အောင်ဆန်းစုကြည် လွတ်မြောက်လာတဲ့အတွက် သူမကို ထောက်ခံ အားပေးသူတွေတင် မကပါဘူး၊ နေပြည်တော်မှာ ရှိတဲ့ စစ်အစိုးရ ၀န်ထမ်းတွေကပါ အဆင်မပြေတဲ့ သူတို့ဘ၀တွေကို ပြောင်းလဲမှု ဖော်ဆောင် ပေးနိုင်လိမ့်မယ် ဆိုတဲ့ မျှော်လင့်ချက်နဲ့ ၀မ်းပန်းတသာ ဖြစ်နေကြတယ်လို့ ဆိုပါတယ်။
Ref: VOA News
Read More...
Collapse...
17 November 2010
ကြားလား
ဝလာလိုက်တာ။ ( ပရိသတ်တစ်ယောက်ကို လက်ညှိးထိုး၍)
ဒီလို ကျွန်မတို့ကို လာထောက်ခံတဲ့အတွက် ကျေးဇူးတင်တဲ့ စကားနဲ့ပဲ စ,ပါရစေ။ ပထမဦးဆုံး အနေနဲ့ ပြောရမှာက အားလုံးကို ကျေးဇူး တင်ပါတယ်လို့ ပြောပါရစေ။
တစ်ယောက် တစ်ယောက်ကို မတွေ့ရတာ တော်တော် ကြာပါပြီ ---- ဒါပေမယ့် ဘယ်လောက်ပဲ မတွေ့ရတာ ကြာကြာ ကျွန်မ အပေါ်မှာ ပြည်သူတွေရဲ့ ထားတဲ့ မေတ္တာနဲ့ ယုံကြည်ချက် အရ ကျွန်မတို့ ခိုင်ခိုင်မာမာ ရှိတယ်ဆိုတာ တွေ့ရလို့ အင်မတန်မှ စိတ်ချမ်းသာပါတယ်၊ အင်မတန်မှ အားတက် ရပါတယ်။ ကျွန်မတို့ လုပ်ချင်တဲ့ အလုပ်ကို လုပ်ဖို့ဆိုရင် ပြည်သူတွေက ဘာလိုချင်လဲ ဆိုတာ ကျွန်မတို့ သိပါတယ်။ သိတယ်လို့ ထင်တယ်နော် ဘာလိုချင်လဲဆိုတာ..
(သိပါတယ် ----ဒီမိုကရေစီ--------- ပြည်သူများ)
လိုချင်တာတော့ သိပြီ လိုချင်တဲ့ ဟာကို ရအောင် ဘယ်လို လုပ်မလဲ ဆိုတာ သိဖို့ ပိုပြီးတော့ အရေးကြီးတယ်။ ကျွန်မ အမြင်မှာတော့ နိုင်ငံရေး ဆိုတာ သင်ယူရေးပဲ *သင်ယူရမယ်* ကျွန်မ ခဏ၊ ခဏ ပြောဖူးပါတယ်။ ကျွန်မတို့ လူငယ်တွေနဲ့ စကား ပြောတဲ့အခါ ကျရင် လူကောင်းရယ်လို့၊ လူဆိုးရယ်လို့ အဲဒီလို မယုံဘူး၊ အယုံ အကြည် မရှိဘူး၊ လူတော် ရယ်လို့ လူညံ့ ရယ်လို့ အယုံ အကြည် မရှိဘူး။
သင်လို့ ရတဲ့သူနဲ့ သင်လို့ မရတဲ့သူလို့ ကျွန်မမြင်ပါတယ် ကျွန်မတို့ ပြည်သူတွေ သင်လို့ရတယ်လို့ ကျွန်မတို့ ယုံကြည်ပါတယ်။ လိုချင်ရုံနဲ့ မဖြစ်သေးဘူး၊ ကိုယ်လိုချင်တာ ရအောင် ဘယ်လို လုပ်ရမလဲ။ လုပ်တဲ့အခါ မှန်ကန်တဲ့နည်းနဲ့ လုပ်စေ လိုပါတယ်။ အဲလို ကျွန်မ ပြောတာဟာ မှန်ကန်တဲ့ နည်းနဲ့ လုပ်ဖို့ ဘာဖြစ်လို့ လိုသလဲဆိုရင် သိပ်ပြီးတော့ ကိုယ့်ကိုယ်ကို သူတော်ကောင်းကြီး၊ ဘာကြီး ဒီလိုပုံစံ ထွက်ချင်လို့ မဟုတ်ဘူး။ ကျွန်မရဲ့ အတွေ့အကြုံအရ မှန်ကန်တဲ့ နည်းလမ်းနဲ့ မလုပ်လို့ရှိရင် ကိုယ့်ပန်းတိုင်က ဘယ်လောက်ပဲ ကောင်းပါစေ ပန်းတိုင်ပါ နောက်ကျတော့ ကွေ့ကောက်ပြီးတော့ ပျက်စီး သွားရတယ်။
အဲဒါကြောင့် မို့လို့ မှန်ကန်တဲ့ နည်းလမ်းနဲ့ ကိုယ်လိုချင်တာ ရအောင်လို့ ကျွန်မတို့ လုပ်ရမယ်။ ဒီတော့ တစ်ချို့က ကျွန်မကို မေးချင်တဲ့ မေးခွန်းတွေ အများကြီး ရှိတယ်ဆိုတာ ကျွန်မသိပါတယ်။ ကျွန်မကလည်း ပြည်သူရဲ့ အသံကို နားထောင်ချင် ပါတယ်။ ခက်တာက အားလုံးဝိုင်းအော် နေတော့ ဘာတွေ ပြောကြမှန်း ကျွန်မမသိဘူး။ ပြည်သူတွေရဲ့ အသံတွေကို အခု နားထောင်ပိုင်ခွင့် ရမယ်လို့ ကျွန်မ မျှော်လင့်ပါတယ်။ ဒီလို အထိန်းသိမ်းခံ နေရတဲ့ အချိန်တွေမှာလည်း ကျွန်မ အသံလွင့် ဌာနတွေကို သေချာ နားထောင်ပြီးတော့ ပြည်သူ တွေက ဘာပြောနေကြလည်း ဘာလိုချင်ကြလဲ၊ ဘာလိုချင်ကြလဲ ဆိုတာ နေ့တိုင်း၊ နေ့တိုင်း လေ့လာနေပါတယ်။ တစ်နေ့ ငါးနာရီ၊ ခြောက်နာရီလောက် နားထောင်နေရတော့ ဘယ်လောက် ငြီးငွေ့စရာ ကောင်းသလဲလို့။ ဒါပေမယ့် ပြည်သူ့မျက်နှာနဲ့ နားထောင်နေတာ။
အထိန်းသိမ်းခံ နေရတဲ့ အချိန်တွေမှာလည်း ကျွန်မ အသံလွင့် ဌာနတွေကို သေချာ နားထောင်ပြီးတော့ ပြည်သူ တွေက ဘာပြောနေကြလည်း ဘာလိုချင်ကြလဲ၊ ဘာလိုချင်ကြလဲ ဆိုတာ နေ့တိုင်း၊ နေ့တိုင်း လေ့လာနေပါတယ်။
ပြည်သူတွေ ဘာလိုချင်လဲ ဆိုတာ ကျွန်မ အတိုင်းအတာ တစ်ခုအထိတော့ သိတယ်လို့ ထင်ပါတယ်။ လုံးစေ့ ပေါက်စေ့ သိတယ်လို့ ကျွန်မ မဆိုလိုပါဘူး အဲဒီလောက်ထိလည်း ကျွန်မ မသိနိုင်ပါဘူး။ ကျွန်မတို့ ပြည်သူတွေ ကလည်း ကိုယ်ရဲ့ အသံတွေကို ကျွန်မတို့ ကြားလောက်အောင် ပြောကြပေါ့။ ဒါမှလည်း ကျွန်မတို့ ဘာလုပ်ပေးနိုင်မလဲ ပိုစဉ်းစားနိုင်မယ်။ အရေးကြီးဆုံးက ကျွန်မတို့ --- နောက်က မကြားရလို့ အော်နေကြတာလား-- အော်လေ မကြားလေဘဲ နည်းနည်းလေး ငြိမ်ငြိမ်နဲ့ နားထောင်ပေး။ ကိစ္စမရှိဘူး မကြားရရင် ဆိုင်းဘုတ်ထောင်ပြီး ပြမယ်။
(ဆိုင်းဘုတ်တွင် ရေးထားသည့်စာ - ကျွန်မကလဲ ပြည်သူတွေချစ်ပါတယ် (အမှန်ခြစ်ပုံ) အောင်ဆန်းစုကြည်)
ကျွန်မတို့ အခု ပြည်သူတွေမှာ ပြည်သူတွေ မပါဘဲနဲ့ ဘာကိစ္စမှ မပြီးမြောက်နိုင်၊ မပြီးပြတ်နိုင်ဘူး ဆိုတာ အခု နားလည်နိုင်ပြီလို့ ကျွန်မ ထင်ပါတယ်။ ပြည်သူတွေ ပါမှပဲ ဘယ်ကိစ္စမဆို ပြီးပျောက်နိုင်တာမို့လို့ ကျွန်မတို့ တစ်တွေ ကျွန်မ စိတ်ကူးထဲမှာ ပြည်သူတွေ ကနေပြီးတော့ ပြည်သူတွေအတွက် ပြည်သူတို့ရဲ့ ဒီမိုကရေစီ ဆိုတဲ့နည်းတစ်ခုကို မြန်မာနိုင်ငံတင်မက တကမ္ဘာလုံး မှာတောင် ထပ်ပြီး ကြိုးစား ကြည့်မှာပါ။ အဲဒီလို စိတ်ဓာတ်နဲ့ ကျွန်မတို့ ကြိုးစားသွားမှာပါ။ ကျွန်မတို့ လိုချင်တဲ့ ပန်းတိုင်ကို အေးအေးဆေးဆေး မှန်မှန် ကန်ကန်နဲ့ ရောက်နိုင်မယ်လို့ ကျွန်မ ယုံကြည်တယ်။ အဲဒါ ခပ်တိုတို ပြောရရင် အလုပ်တွေ အများကြီး လုပ်ရမယ်။ အလုပ် မလုပ်ဘဲနဲ့ ဘာမှမရဘူး။ ကျွန်မတို့ ဗမာတွေက ကံပဲ ကံပဲလို့ ပြောလေ့ရှိတယ်။ အဲဒါကြောင့်ပဲ ကျွန်မတို့ လူငယ်တွေကို ထပ်တလဲလဲ ပြောရတယ်။ ကံဆိုတဲ့ အဓိပ္ပါယ်ကို သိရဲ့လား ကံဆိုတာ ပြုလုပ်ခြင်းပဲ။ အဲတော့ ကံပဲ၊ ကံပဲဆိုတာ ခပ်တိုတို ပြောရရင် ကိုယ်လုပ်သလိုဖြစ်မှာပဲ အဲဒီတော့ ကိုယ်လုပ်တဲ့ အတိုင်းပဲ ဖြစ်မှာပဲ။ လိုချင်တာရှိရင် လိုချင်တာကို ရအောင်လို့ လုပ်ယူရမယ်။ ကျွန်မတို့က မဖြစ်နိုင်တဲ့ ကိစ္စတွေကို လုပ်ပေးပါ့မယ်လို့ လွယ်လွယ်နဲ့တော့ အဲဒီလို လာဘ်ပေးပြီးတော့ ကျွန်မတို့ ပြည်သူတွေကို မစည်းရုံးနိုင်ပါဘူး။ ကျွန်မတို့ ကြိုးစားမယ်။ ပြည်သူတွေ လိုချင်တဲ့ လမ်းကို အားလုံး အတူတူခင်းပြီးတော့ အားလုံး အတူတူ လျှောက်သွားနိုင်ဖို့ ကြိုးစားမယ်။
အဲဒီလို ထောက်ပြခြင်းအားဖြင့် ကျွန်မတို့ကိုလည်း ပြည်သူတွေက ကိုယ်လိုချင်တဲ့ ကိစ္စတွေ ဖြစ်မြောက် အောင်လို့ ကူညီရာရောက်ပါတယ်။ ကျွန်မ ပြည်သူတွေကို မေတ္တာရပ်ခံ ပါရစေ။ ကျွန်မတို့နဲ့ ဆက်ဆံတဲ့ အခါမှာ ပွင့်ပွင့်လင်းလင်း သတ္တိရှိရှိ ပြောဆို ဆက်ဆံကြပါ။ ကျွန်မတို့ကို ဟိုဟာ ပြောရကောင်းလား၊ ဒီဟာ ပြောရ ကောင်းလားဆိုပြီး။ ကျွန်မတို့ ဘာမှမလုပ်ပါဘူး။ ပြောစရာရှိတာကို ပြောပါ။ သဘောမတူ လို့ရှိရင် သဘော မတူဘူး ဆိုတာကိုတော့ ပြန်ပြောမှာပါ။ ဒါကတော့ ဒီမိုကရေစီရဲ့ အခြေခံလေ။ လွတ်လပ်စွာ ပြောဆိုပိုင်ခွင့် လွတ်လပ်စွာ ပြောဆိုပိုင်ခွင့် ဆိုတာ လွတ်လပ်စွာ ဆဲဆိုပိုင်ခွင့်နဲ့ မတူဘူးလေ။ တစ်ခါတစ်လေတော့ ကြိမ်းမောင်း တာလေးတော့ ပါချင်ပါမှာပေါ့။ တစ်ယောက်နဲ့ တစ်ယောက် နားလည်အောင် ပြောဆိုဖို့ အင်မတန်မှ အရေးကြီး ပါတယ်။ တစ်ယောက်နဲ့ တစ်ယောက် အမြင်ခြင်း ဖလှယ်ဖို့ အတွက်ကတော့ ကျွန်မတို့ လေ့ကျင့်ယူရ ပါမယ်။ လေ့ကျင့်ယူရင်းနဲ့ ကျွန်မတို့ ပိုပြီး တတ်လာမှာပါ။ အခု ကျွန်မထွက်လာတဲ့ အချိန်မှာ အဓိက ပြောင်းလဲချက် အဖြစ် ဘာတွေ့ရလဲ ဆိုတော့ တစ်ခြားဟာတွေ သိပ်မတွေ့သေးဘူး။ တွေ့မိတာကတော့ ဖုန်းလေးတွေ အများကြီးပဲ။ ဟိုနားကြည့်လဲ ကင်မရာဖုန်းလေး၊ ဒီနားကြည့်လဲ ကင်မရာဖုန်းလေး။ အဲဒါ ဘာကိုပြလဲဆိုတော့ ဆက်သွယ်ရေး ဘက်မှာတော့ ကျွန်မတို့ အများကြီး တိုးတက် လာပါတယ်။ ဒီတိုးတက်မှုကို အများကောင်းကျိုး အတွက် တတ်နိုင်တဲ့ နည်းနဲ့ သုံးကြပါ။ ဆက်သွယ်ရေး အားဖြင့် ကျွန်မတို့ အချင်းချင်းမှာ နားလည်မှရအောင် ကျွန်မတို့ အချင်းချင်း ညီညွတ်မှ ရအောင် သုံးကြပါလို့ ပြောချင်တယ်။ ဖုန်းတွေ ပါလာရင် ထောင်ပြပေးကြပါ။ ဘယ်လောက် အများကြီး ရှိလဲ သိရအောင်။
(ဖုန်းပါလာသူများက ဖုန်းများ မြှောက်ပြကြသည်။) တော်တော်များတာပဲ။ ကျွန်မ မနေ့ကမှ ပထမဦးဆုံး အကြိမ် အဲဒီလိုဖုန်းလေး သုံးဖူးတယ်။ အရင် ၉၆ ခုနှစ်တုန်းက ဒါတွေ ဒီမှာမရှိသေးဘူး။ သုံးတဲ့အခါကြတော့ ပါးစပ် ဘယ်မှာ ထားရမှန်း မသိဘူး။ မကြားရဘူး ဆိုတဲ့သူတွေကို စာသားနဲ့ ထောင်ပြမယ်။
(ဆိုင်းဘုတ်တွင် ရေးထားသည့်စာ - ကျွန်မကလဲ ပြည်သူတွေချစ်ပါတယ် အမှန်ခြစ် အောင်ဆန်းစုကြည်)
ချစ်နေရုံနဲ့ မပြီးသေးဘူး။ အလုပ်လုပ်ရမှာ။ ကျွန်မ စဉ်းစားတယ်။ ချစ်တယ် ဆိုတာ ဘာလဲ။ ချစ်တယ်ဆိုတာ တစ်ဦးပေါ် တစ်ဦး စိတ်ချမ်းသာအောင် လုပ်ပေးချင်တဲ့ ဆန္ဒရှိပြီး အဲဒီ ဆန္ဒအရလုပ်မှ တကယ်ချစ်ရာ ရောက်ပါတယ်။ ပါးစပ်နဲ့ ချစ်ပါတယ်၊ ချစ်ပါတယ်။ ချစ်ပါတယ် ပြောလို့ကတော့ အရေခွံသာ ချစ်လိုက်တာမျိုးကတော့ ကျွန်မတို့က ကြက်ခြေခတ်ပဲ။
(မှန်လိုက်တာကွ - ပရိတ်သတ်ထဲမှ အသံ)
ပန်းကပေးရင်လည်း ပေးလိုက်လေ ဘာလို့ ကိုင်ထားတာလဲ။
ကျွန်မတို့ အခု ပြည်သူတွေကို မေတ္တာရပ်ခံ ချင်တာကတော့ စောစောက ကျွန်မ ပြောသလိုပဲပေါ့ ကိုယ်စိတ် ထဲမှာ ရှိတာတွေကို ကျွန်မတို့ကို အသိပေးပါ။ စာရေးပြီးတော့ ပို့လို့လည်း ရပါတယ်။ စာတိုက်ကို စိတ်မချရရင် ဒီမှာပဲ လာပေးပါ။
ပြည်သူတွေ ဘာတွေ စိတ်ထဲမှာ ရှိသလဲ ဆိုတာ ကျွန်မသိချင်တယ်။ ဘာဖြစ်လို့လဲ ဆိုတော့ ကျွန်မတို့ ပြည်သူ တွေရဲ့ စိတ်ထဲမှာ လူတွေရဲ့ စိတ်ထဲမှာ ဘာတွေဖြစ်နေမလဲ။ ဘယ်လိုဖြစ်နေမလဲ။ စိတ်ထဲမှာ ဘယ်လိုပြောင်း သွားသလဲ ဆိုတာ ကျွန်မသေသေချာချာ မသိလို့မရဘူး ချက်ခြင်းသိဖို့ဆိုတာမရဘူး။ ပြန်ပြီးတော့ လေ့လာရ ဦးမယ်။ ကျွန်မတို့ ပြည်သူတွေ တစ်ယောက်ချင်းနဲ့ စကားပြောဖို့ ဆိုတာလည်း တကယ်တမ်း လက်တွေ့ကျကျ မဖြစ်နိုင်ဘူး။ ဖြစ်နိုင်ရင်တော့ ပြောတာပေါ့။ ဖြစ်နိုင်ရင်တော့ကျွန်မ ထိုင်နားထောင်မယ်။ တစ်ယောက်ပြီး တစ်ယောက် မိုက်ပေးပြီးတော့ ပြောကြတော့။ အဲဒီလိုဆိုလည်း ပြီးမှာ မဟုတ်ဘူး။
ပြီးတော့ အဲဒီလိုပြောတာ တွေက ကျွန်မတော့ သဘောကျတယ်။ တစ်ယောက်ထဲ ထပြီး ပြောတာတွေက အင်မတန် ငြီးငွေ့စရာကောင်းတယ်။ ဟိုဘက် ပြန်ပြော။ ဒီဘက်က ပြန်ပြောဆိုတော့ ပိုပြီးတော့လည်း စုံတယ်။ပိုပြီးတော့လည်း အားလုံးအတွက် ပိုပြီးတော့လည်း အားလုံးအတွက် တန်ဖိုးရှိတယ်။တစ်ယောက်ထဲက ပြောတာကို ကျန်တဲ့သူတွေက နားထောင်နေရတာ တစ်ခါတစ်လေ ကျွန်မစိတ်ထဲမှာ နည်းနည်း ဒီမိုကရေစီ မကျလို့။ ကျွန်မတို့ သွားပြီးတော့ ဒီလူထဲက တစ်ယောက်ကို လက်ညှိုးထိုးပြပါမယ်။ ထပြီးတော့ စိတ်ထဲရှိတဲ့ ဆန္ဒကို ခပ်တိုတိုလေးပြောတော့။
(အမေစုနဲ့ အတူ လွတ်လပ်တဲ့ ဒီမိုကရေစီကြီးကို ရယူပိုင်ဆိုင် ချင်ပါတယ် ခင်ဗျား)
ကျွန်မတို့လေ တစ်နေ့ကျရင် ပြည်သူ့ဟစ်တိုင် တစ်ခုလုပ်ရမယ် အဲဒီတော့ အဲဒီမှာဆိုရင် ပြည်သူတွေက ပြောချင်တာ ပြောလို့ ရအောင်။ ကျွန်မတို့ကလည်း ပြည်သူတွေရဲ့ အသံတွေကို ကြား-- ဟိုဘက်က ဘာပြသနာရှိလဲ ကူညီလို့ရမလား။ အနောက်က တိုးနေလို့လား။
(စည်းကမ်းရှိပါ။ စည်းကမ်းရှိပါ။ စည်းကမ်းရှိပါ။)
သိပ်ပြီးတော့ မလောကြပါနဲ့။ နောက်ဆိုရင် ကျွန်မတို့ တစ်ယောက်နဲ့ တစ်ယောက် အများကြီး စကားတွေ ပြောဖို့ အခွင့်အရေးတွေ ပေါ်လာမှာပါ။
ဒီတစ်ခါတည်း နဲ့ မဟုတ်ပါဘူး။ နောင် အကြိမ်ကြိမ် အခါခါ ရှိမှာပါ။ အဲဒီကျရင် စိတ်ရှည် လက်ရှည်နဲ့ သီးခံပေးကြပါ။ ဒီတစ်ခါ မကြားရမှ နောင်တစ်ခါ ပြန်လာမှာပေါ့။ တော်ကြာ ပြန်မလာဘဲ နေမယ်။ ကြာကြာ ပြောလို့ရှိရင် ပြည်သူတွေလည်း ပင်ပန်းမယ်လို့ ကျွန်မထင်ပါတယ်။ အနှစ်နှစ်ဆယ်ကျော်ပြီတဲ့ ပင်ပန်းတာ။ အဲဒီတော့ တော်တော်ကို ကျင့်သားရနေပြီပေါ့။
တော်တော် ပင်ပန်းနေကြပြီပေါ့ ပင်ပန်းတယ် ဆိုတာက ကိစ္စမရှိပါဘူး။ ပင်ပန်းရကျိုးနပ်ဖို့က အရေးကြီးတာ။ ပင်ပန်းရကျိုးနပ်တယ် ဆိုရင် ဘယ်လောက် ပင်ပန်းရ ပင်ပန်းရ ရတယ် ခံနိုင်တယ်။ အဲတော့ ကျွန်မတို့ရဲ့ အားတွေကို ပင်ပန်းရကျိုး နပ်အောင်လို့ အသုံးချရမယ်။ ကျွန်မအခု ပြောချင်တာက စိတ်ဓာတ်မကျပါနဲ့။ ကျွန်မတို့ရဲ့ တိုင်းပြည်ကို ကြည့်ပြီး စိတ်ဓာတ်ကျချင် ကြတာ ဖြစ်မှာပဲ။ ရှိမှာပဲ။ အခုထက်ထိ ဘယ်မှ မရောက်သေး ပါလား။ အခုထက်ထိ ဘာမှလည်း တိုးတက်မှုမရှိပါလားဆိုတဲ့ စိတ်တွေ ရှိနိုင်ပါတယ်။ ဒါပေမယ့် ဒီလိုစိတ်ပျက်စရာ အကြောင်းမရှိပါဘူး။ ကျွန်မတို့ ကြိုးစားရမယ်။ ဝီရိယဆိုတာဟာ အင်မတန်မှ အရေးကြီး ပါတယ်။ ခပ်ကြမ်းကြမ်းပဲ ဝီရိယထုတ်ရမယ်။
အလုပ်စလုပ်တဲ့ အခါမှာ ဝီရိယ ထုတ်ရမယ်။ အလုပ် အလယ်ပိုင်းရောက်တဲ့ အခါမှာ ဝီရိယ ထုတ်ရမယ်။ အလုပ် နောက်ဆုံးပိုင်း ရောက်ခါနီးမှာ ဝီရိယ ထုတ်ရမယ်။ အလုပ်ဆိုတာ ပြီးတယ်ရယ်လို့ မရှိဘူး။ အလုပ်တစ်ခု ပြီးရင်လည်း နောက်အလုပ်က ပေါ်လာမှာပဲ။ အဲတော့ နိုင်ငံတစ်နိုင်ငံကို တည်ဆောက်တယ် ဆိုတာလည်း အဲလိုပဲ အလုပ်တွေ တစ်ခုပြီး တစ်ခု လုပ်သွားရမှာ ဒီလောကကြီးမှာ ကျေနပ်စရာ၊ ကျေနပ်စရာ အချိန်တွေဆိုတာ ဘယ်တော့မှမရှိဘူး။ သို့သော်လည်း ကျွန်မတို့အတွက်တော့ ကျေနပ်စရာ အချိန်တွေ အတိုင်းအတာ တစ်ခုထိတော့ လိုကိုလိုတယ်။ အဲဒီလို ကျေနပ်နိုင်တဲ့ အတိုင်းအတာ တစ်ခုအထိရောက်ဖို့တော့ အားလုံး ဝိုင်းတွန်းကြရမယ်။ မကြိုးစားဘဲနဲ့ မရဘူး။ ကျွန်မအနေနဲ့တော့ ကျွန်မကတော့ လုပ်ပေးမယ်လို့ ကျွန်မ မပြောနိုင်ဘူး။ ပြည်သူရဲ့ ယုံကြည်မှုရှိရင်၊ ပြည်သူရဲ့ အားကိုးမှုရှိရင်၊ ပြည်သူရဲ့ ထောက်ခံမှုရှိလို့ ရှိရင် ကျွန်မမှာ လုပ်အားတွေ အများကြီးတက်လာမယ်။ အဲဒီလုပ်အားတွေနဲ့ ပြည်သူနဲ့ အတူလုပ်မယ်။ ကျွန်မတစ်ယောက်ထဲတော့ လုပ်လို့မရဘူး။ ကျွန်မတစ်ယောက်ထဲလဲ မလုပ်ချင်ဘူး။ တစ်ယောက်ထဲလုပ်တယ် ဆိုတာ ဒီမိုကရေစီ မဟုတ်ဘူးနော်။
(ဟေး၊ ဟေး-------------------------------)
ကျွန်မ တစ်ယောက်ထဲ လုပ်ဖို့ လုံးဝ ရည်ရွယ်ချက် မရှိဘူး။ အများနဲ့ အတူလုပ်မှာ။ ကျွန်မတို့ အပေါ်မှာ ကြင်နာမှု ရှိတဲ့ ကမ္ဘာသူ ကမ္ဘာသားတွေနဲ့ အတူ လုပ်မယ်။ ကျွန်မတို့ အားလုံး အတူတူ လုပ်မယ်။ တစ်ချို့တွေ ထင်သလို လက်သီးလက်မောင်း တန်းပြီးတော့ ရှေ့ကနေ ပြီးတော့ ဟီးရိုးကြီး လုပ်တာ။ အဲဒါမျိုးက သတ္တိ မဟုတ်ဘူး။ သတ္တိ ဆိုတာဟာ စိတ်ဓာတ် ခိုင်ခိုင်မာမာနဲ့ ကိုယ်လိုချင်တဲ့ ကိစ္စကို ဖြစ်မြောက်အောင်လို့ ပင်ပန်းခံပြီးတော့ လုပ်နိုင်တာ။ ဒါမှ အဲဒီလို သတ္တိမျိုးတွေ မွေးရမယ်။ တကယ်တော့ သတ္တိဆိုတာ နိစ္စဓူဝ လုပ်နေရမှာ။ ကျွန်မတို့ ပြည်သူတွေက မနက် မိုးလင်းတာနဲ့ ဒီကနေ့ တစ်နေ့ကို ရင်ဆိုင်ဖို့ သတ္တိတွေ ထုတ်နေကြရမယ် မဟုတ်လား။ ဒီသတ္တိတွေကို အကျိုးရှိအောင်လို့ သုံးကြမယ်။ တကယ့်ကို ထိထိရောက်ရောက်နဲ့ ကျွန်မတို့ ပြည်သူတွေနဲ့ ကျွန်မတို့ နိုင်ငံအတွက် အကျိုးရှိအောင် သုံးရမယ်။ ကိုယ်တစ်ယောက်ထဲအတွက် စဉ်းစားဖို့ မဖြစ်ဘူး။ ကိုယ့်မိသားစု တစ်ခုတည်းအတွက် စဉ်းစားလို့မဖြစ်ဘူး။ ကျွန်မ ထပ်တလဲလဲ ပြောချင်ပါတယ်။ နိုင်ငံရေးဟာ ဒို့နဲ့ မဆိုင်ဘူးဆိုတဲ့ စိတ်ဓာတ်ကို မထားပါနဲ့။ ဒါဖေဖေ အရင်ကတည်းက ပြောခဲ့ပါတယ်။ လွပ်လပ်ရေး မရခင်ကတည်းက ပြောခဲ့တဲ့ စကားပါ။ နိုင်ငံရေးဟာ ကိုယ်နဲ့ မဆိုင်ဘူးလို့ ပြောနေပေမယ့် နိုင်ငံရေးက လာပြီးတော့ ဆိုင်နေလိမ့်မယ်တဲ့ ရှောင်နေလို့မရဘူး။ အားလုံးဟာ နိုင်ငံရေးပဲ။ အခုဒီမှာ ကျွန်မတို့ လာပြီးတော့ ကျွန်မတို့ ကို ထောက်ခံနေတာတင် နိုင်ငံရေးမဟုတ်ဘူး။ အိမ်မှာနေပြီးတော့ ဟင်းချက်နေတဲ့ အမျိုးသမီးလဲ နိုင်ငံရေး လုပ်နေရတာပဲ။ ဘာဖြစ်လို့လဲဆိုတော့ သူ့မှာ သူ့ရှိတဲ့ ပိုက်ဆံနဲ့ လောက်အောင် ချက်နေရလို့လေ။ အဲဒါလဲ နိုင်ငံရေးပဲ။ သားသမီးတွေ ကျောင်းနေနိုင်အောင် ရုန်းကန်ရတာလည်း နိုင်ငံရေးပဲ။ အားလုံး နိုင်ငံရေးပဲ။ အားလုံး နိုင်ငံရေးနဲ့ မလွတ်ဘူး။ အဲဒီတော့ နိုင်ငံရေးနဲ့ ဒို့နဲ့ မဆိုင်ဘူး။ ဒို့က နိုင်ငံရေးထဲ မပါချင်ဘူးလို့။ ပြောတာဟာ နိုင်ငံရေးကို နားမလည်လို့ ပြောတဲ့ ကိစ္စ။ ကျွန်မတို့ ပြည်သူတွေဟာ နိုင်ငံရေးကို နားလည်အောင် လုပ်ပါ။ ကျွန်မတို့လည်း သင်ပေးပါ။ တစ်ယောက်နဲ့ တစ်ယောက် သင်ယူရမှာ။ ပြည်သူကနေ ကျွန်မတို့ ဒီမိုကရေစီအတွက် လှုပ်ရှားနေတဲ့သူတွေကို သင်ပေးမှ ကျွန်မတို့လည်း မမှားမှာ။ ဒီမိုကရေစီမှာ အရေးကြီးတဲ့ တစ်ခုက ဘာလည်း ဆိုတော့ အရှေ့ကနေပြီးတော့ လုပ်နေတဲ့သူတွေကို အနောက်ကလူတွေက ထိန်းနိုင်ရမယ်။ ထိန်းပိုင်ခွင့် ရှိရမယ်။ အဲဒါဒီမိုကရေစီပဲ။
ပြည်သူတွေရဲ့၊ ပြည်သူတွေ ထိန်းတာကို ကျွန်မတို့တွေ ခံပါ့မယ်။ ပြည်သူမဟုတ်ဘဲ ထိန်းသိမ်းတာကို သိပ်မခံချင်ဘူး (ရယ်လျက်)။ ကျွန်မစိတ်ထဲမှာ ဘာမှ မရှိပါဘူး။
ကျွန်မထိန်းသိမ်းခံရတဲ့ နှစ်တွေအတွင်းမှာ ပေါ့နော် လုံခြုံရေး တာဝန်ယူရတဲ့သူတွေနဲ့ အများကြီး ဆက်ဆံရပါ တယ်။ သူတို့ ကျွန်မအပေါ်မှာ ကောင်းခဲ့ပါတယ်။ ကျွန်မပေါ်မှာ ကောင်းကောင်းမွန်မွန် ဆက်ဆံပါတယ်။ အဲတော့ ဒါကတော့ အမှန်ကို အမှန်အတိုင်း ကျွန်မပြောရမှာပါ။ ကျေးဇူးတင်ထိုက်တဲ့သူကို ကျေးဇူးတင်ရမှာပဲ။ အဲဒီလို သာမန် လုံခြုံရေး ဝန်ထမ်းတွေထဲက ကျွန်မအပေါ်မှာ ကောင်းကောင်းမွန်မွန် ဆက်ဆံခဲ့တဲ့သူတွေကို ကျွန်မ ကျေးဇူးတင်ပါတယ်။ စိတ်ထဲမှာ တကယ့်ကို ကျွန်မစိတ်ရင်းနဲ့ ပြောတာပါ။ ကျွန်မတို့ဟာ ပြည်သူ အချင်းချင်းမှာ တစ်ယောက်ပေါ်မှာ တစ်ယောက် စေတနာထားနိုင်အောင်လို့ တစ်ယောက်ကို တစ်ယောက် ကျေးဇူးတင် နိုင်အောင်လို့။ မြင်နိုင်စေချင်တယ်။ ဆရာတော်ကြီးတစ်ပါးက ကျွန်မ ခပ်ငယ်ငယ်တုန်းက ဟောခဲ့ တယ်။ ကျေးဇူးပြုတဲ့သူ ဆိုတာ ရှားတယ်တဲ့။ ကျေးဇူးကို သိတတ်တဲ့သူဆိုတာ ရှားတယ်ပေါ့။ ကျွန်မ အဲဒီတုန်းက ငယ်တာကိုး အဲဒီစကားကို သိပ်သဘောမတူချင်ဘူး။ ဘာလဲဆိုတော့ ဟုတ်ပါပြီ ကျေးဇူး ပြုနိုင်တဲ့ သူဆိုတာ ရှားတယ်ဆိုတာ ကျွန်မ လက်ခံတာပေါ့နော်။ ဘာဖြစ်လို့လဲ ဆိုတော့ ကိုယ့်ကို ကျေးဇူး ပြုတယ်ဆိုတာ လူတိုင်းကလည်း ဒီလောက်ထိလုပ်ပေးတာမဟုတ်ဘူး။ ဒါပေမယ့် ကျေးဇူးသိတတ်တဲ့ သူဟာ ရှားတယ် ဆိုတာ ကျွန်မ သိပ်ပြီး လက်မခံပါဘူး။
လူပဲ၊ လူပဲပေါ့ လူဖြစ်မှ ကျေးဇူးသိရမှာပေါ့။ မဟုတ်ဘူးကွာ ငြင်းတဲ့သူက ရှိတယ်။ ကျေးဇူးသိတယ် ဆိုတဲ့ အဓိပ္ပါယ်က နောက်ကျတော့ ရိုးရိုးလေးပဲ။ အချင်းချင်းကို တန်ဖိုးထားတတ်တာပဲ။ အချင်းချင်းကို တန်ဖိုးထား တတ်လိုက်ရင် --- ဟာ နည်းနည်းတော့ သည်းခံပါဦးဟေ့ -- ခဏလေး နောက်ကထလိုက်လို့ ဘာဖြစ်သွား တာမှ မဟုတ်ဘဲ။ တစ်ယောက်နဲ့ တစ်ယောက်တော့ သည်းခံရမှာပဲ။ တစ်ယောက်က မတ်တပ်ထလိုက်လို့ စိတ်ဆိုးစရာ အကြောင်းမရှိဘူး။ ဒေါသ ကြီးပဲ။----- ရှေ့က ကျွန်မ မနေ့တုန်းက အိမ်ရှေ့မှာ ပြောသလိုပေါ့။ အရှေ့ကလူကလည်း အနောက်ကလူကို သိတတ်မှု၊ နားလည်မှုရှိရမယ်။ အနောက်ကလူကလည်း အရှေ့က လူကို နားလည်မှု သည်းခံမှုရှိရမယ်။ အဲဒါမှ ကျွန်မအတွက် အဆင်ပြေမှာ။ ဒီတော့ ပြည်သူတွေ အနေနဲ့ ကျွန်မ ဘယ်လိုဆက်ပြီးတော့ နိုင်ငံရေး ခရီးသွားမလဲ ဆိုတာ သိချင်လာမယ်။
(သိချင်ပါတယ်။---------- )
သိတန်သရွေ့လည်း သိမယ်။ ပြည်သူကို အားကိုးပြီး လုပ်တယ်ဆိုရင် ပြည်သူနဲ့ အမြင်ချင်း ဖလှယ်ထားရမယ်။ ကျွန်မကတော့ ဒီ--ဒီ ပြည်သူတွေကြားမှာ ကျွန်မတို့က အားလုံးကြားမှာပေါ့နော် အမျိုးသားရင်ကြားစေ့ရေး ကိစ္စကို ဆက်ပြီးတော့ လုပ်သွားမှာပါ။ ဒါဟာ အရေးကို ကြီးတယ်။
(ထောက်ခံပါတယ်။------------------)
ကျွန်မစိတ်ထဲမှာတော့ ဘယ်သူပဲ ဘာဖြစ်လို့။ ဘယ်သူနဲ့တော့ဖြင့် အဆင်ပြေအောင်လုပ်လို့မရဘူး။ ဘယ်သူနဲ့ တော့ဖြင့် စကားပြောလို့မရဘူး ဆိုတာ လုံးဝမရှိဘူး။ ဘယ်သူပဲဖြစ်ဖြစ် အဆင်ပြေအောင် လုပ်ချင်တဲ့စိတ်ရှိရင် လုပ်လို့ရရမယ်။ စကားပြောချင်တဲ့ စိတ်ရှိရင် စကားပြောလို့ ရရမယ်။ ကျွန်မကတော့ ဒီလမ်းအတိုင်း သွားမှာပဲ။ ဒီလမ်းအတိုင်း သွားတဲ့အခါမှာတော့ ကျွန်မတို့ဘက်က ပြည်သူ့အင်အားတွေ လိုပါတယ်ဆိုတာ အခု ဒီမှာ ပြောပြီးတော့ အသိပေး ကြေညာလိုက်ပြီ။
(ညီပါတယ်။--- ညီညွတ်ရေး၊ ညီညွတ်ရေး ------- )
ကျွန်မတို့ ဘာပဲလုပ်ဖို့ ဆုံးဖြတ်၊ ဆုံးဖြတ် ပြည်သူကို အသိပေးပါ့မယ်။ အခုဆိုလို့ရှိရင် ကျွန်မတို့ အဖွဲ့ချုပ်နဲ့ ဒါ--- အဖွဲ့ဝင်တွေနဲ့လည်း တွေ့ပြီးတော့ သေသေချာချာ ပြောပြီးတော့ ဆွေးနွေးတာ မရှိဘူး။ ပြောပြီး ဆွေးနွေးပြီး ကျွန်မက အဖွဲ့ချုပ်တစ်ခုထဲနဲ့ လုပ်မှာ မဟုတ်ဘူးနော်။ ကျွန်မကနေပြီးတော့ ကျွန်မတို့ ဒီမိုကရေစီ အတွက် လုပ်နေတဲ့ အစုအဖွဲ့တွေ အားလုံးနဲ့ ကျွန်မတွဲပြီး လုပ်ချင်တယ်။ နောက်ပြီးတော့ ပြည်သူကလဲ အဲဒီထဲမှာ ဝင်ပါ ပေးစေချင်တယ်။ တစ်ခုခု လုပ်ပြီလို့ ဆုံးဖြတ်လိုက်လို့ရှိရင် ကျွန်မတို့ ပြည်သူကို ပြောပြမယ်။ ရှင်းပြမယ်။ တစ်ခါ တစ်လေ ဆိုရင် ပြည်သူက ကျွန်မတို့ လုပ်တဲ့ကိစ္စတွေကို ပြည်သူက သဘောမတူတာလည်း ရှိမယ်။ ဒါကတော့ ဒီလိုပဲ။ လူတိုင်းတော့ တစ်သဘောတည်း မဖြစ်နိုင်ဘူး။ အဲဒီသဘောမတူတာကို လက်ခံနိုင်တာ လည်း ဒီမိုကရေစီရဲ့ သဘောတရားတစ်ခုပဲ။ ဒါပေမယ့်လည်း ကျွန်မတို့ ရှင်းပြမယ်။ ဘာဖြစ်လို့ ကျွန်မတို့ ဒီလိုလုပ်ရသလဲ။
ပြည်သူ သဘောမတူပေမယ့်လည်း ဘာဖြစ်လို့ လုပ်ရတာလည်း ဆိုတော့ ပြည်သူကို စည်းရုံး ယူရမှာပေါ့။ စည်းရုံးတယ် ဆိုတာ ဒါပဲလေ။ ပြည်သူရဲ့ ယုံကြည်မှု၊ နားလည်မှု အဲဒါကို ရအောင် လုပ်မယ်။ မဲရအောင် လုပ်တာ မဟုတ်ဘူး။ အဲဒီတော့ ကျွန်မတို့ ပြည်သူတွေရဲ့ နားလည်မှု ပြည်သူတွေရဲ့ ထောက်ခံမှု အဲဒါတွေကို ရယူပြီး တော့ ဆက်လုပ်သွားမယ်။ အခုချိန်မှာ တိတိကျကျ မပြောနိုင်တာကို ကျွန်မ တောင်းပန်ပါတယ်။ ဒီအချိန်မှာ အခုပဲ ထွက်လာပြီးတော့ ဒါလုပ်မယ်၊ ဒါလုပ်မယ်၊ ဒါလုပ်မယ် ပြောတာလည်း ဒါ မစဉ်းစား၊ မဆင်ခြင်ဘဲနဲ့ ပြောတဲ့စကားလည်း ဖြစ်နိုင်တယ်။ ကျွန်မတို့ ဒီအချိုးအကွေ့မှာ ပြည်သူတွေရဲ့ အသံတွေကို အများကြီး ကြားချင်ပါတယ်။ အဲဒီအသံတွေကို နားထောင်ပြီးတော့ ရှေ့ခရီးကို ဘယ်လို ဆက်ပြီးတော့ သွားမလဲ ဆိုတာ။ သွားသင့်လဲ ဆိုတာ ကျွန်မတို့ ဆုံးဖြတ်မယ်။ ဒါပေမယ့် စောစောက ကျွန်မတို့ ပြောသလိုပဲ အရေးကြီးဆုံးဟာ ပြည်သူရဲ့ အင်အားနဲ့ ကျွန်မတို့ လုပ်မယ်။ ဒီမိုကရေစီလိုချင်တဲ့ အစုအဖွဲ့တွေ အားလုံးနဲ့ ကျွန်မတို့ လက်တွဲပြီး တော့ လုပ်မယ်။ နောက်ပြီးတော့ ကျွန်မတို့ဟာ ဒီကျွန်မတို့ နိုင်ငံမှာ ရင်ကြားစေ့ရေး အတွက် ကျွန်မတို့ လုပ် သွားမယ်။ ရင်ကြားစေ့ရေးအတွက် လုပ်သွားပြီးတော့ ပြည်သူတွေ အနည်းဆုံး နာမယ့်နည်းနဲ့၊ လုံးလုံး မနာဘူးလို့ လည်း ကျွန်မမပြောနိုင်ဘူး။ ဒါက ဒီလို ကျွန်မ အာမခံလိုက်လို့ရှိရင် ဒါလည်း လာဘ်ပေးတာတစ်မျိုးပဲ။ ကျွန်မတို့နဲ့ လိုက်လို့ မနာစေရဘူး ဆိုတာ အဲဒီလိုလည်း ကျွန်မပြောလို့ မရဘူး။ နာချင်လည်း နာတာပဲ။ ကျွန်မတို့လည်း ခံရတာပဲ။ ကျွန်မတို့ လုပ်ဖော်ကိုင်ဖက်တွေလည်း ခံရတာပဲ။ ဒါပေမယ့်လည်း ပြည်သူလူထု အနည်းဆုံး နာမယ့်နည်းတွေကို ကျွန်မတို့ ရှာပြီးတော့ လုပ်ပါ့မယ်။ ပြည်သူကလည်း တစ်ခါတစ်လေ နည်းနည်း အနာခံရမယ် ဆိုရင်တော့ သည်းခံပြီး အနာခံပါလို့။ ကျွန်မ အခုကတည်းက ပြောထားချင်ပါတယ်။ လိုတော့ လိုချင်ပါတယ်။ အနာတော့ မခံချင်ပါဘူး။ အဲဒီလိုတော့ မလုပ်နဲ့။
သည်းခံနေတာ ကြာပြီဆိုတော့ မဟုတ်တဲ့ဟာတွေကို သည်းခံနေတာလား။ သည်းခံသင့်တာတွေကို သည်းခံနေ တာလား။ ကျွန်မ ပြောချင်တယ်နော်။ ဟို အမှားနဲ့ အမှန်ကို ခွဲခြားပြီးတော့ သိရမယ်။ အမှန်ဘက်ကနေ ရပ်တည်ရဲတဲ့ သတ္တိရှိရမယ်။ အမှားနဲ့ အမှန်ဆိုတာ တစ်ချိန်နဲ့ တစ်ချိန်နဲ့ တူတာမဟုတ်ဘူး။ အချိန်တွေ ပြောင်း သလို အခြေအနေတွေ ပြောင်းသလို အဖြေတွေကလည်း ပြောင်းနေတယ်။ ဒါပေမယ့် အဲဒီဟာကို လုပ်သင့်တာ မလုပ်သင့်တာကတော့ ဆင်ခြင်ပြီးတော့ ကိုယ့်ရဲ့ ကိုယ့်ရဲ့ လိပ်ပြာ၊ ဒါဘယ်လိုပြောသလဲ ဖေဖေပြောခဲ့တဲ့ စကား တစ်ခွန်းရှိပါတယ်။ သူ့လိပ်ပြာရဲ့ ခုံရုံးရှေ့မှာ သူ မားမားမတ်မတ် ရပ်ပြီးတော့ အစစ်ခံရဲတယ်တဲ့။
(ကြိုက်တယ်၊ ကြိုက်တယ်----------)
ကျွန်မရဲ့ လိပ်ပြာခုံရုံး ရှေ့မှာလည်း နေ့တိုင်း မတ်တပ်ရပ်ပြီးတော့၊ ကျွန်မတို့ ပြည်သူတွေလဲ ဒီလိုပဲ ကိုယ့်ရဲ့လိပ်ပြာခုံရုံးရှေ့မှာ နေ့တိုင်း မတ်တပ်ရပ်ပြီးတော့ မားမားမတ်မတ် အစစ်ခံကြည့်ကြပါ။ အဲဒီလို အစစ်ခံ ကြည့်တဲ့အခါ ကိုယ်ဟာ လုပ်သင့် လုပ်ထိုက်တာတွေကို လုပ်နေသလား ဆိုတဲ့ အဖြေက ပေါ်လာပါလိမ့်မယ်။ အဲဒီလိုပေါ်လာလို့ရှိရင် ကျွန်မတို့ရဲ့ အင်အားတွေက အရမ်းတန်ဖိုးတက်မှာ။ အင်အားဆိုတာ မှန်မှန်ကန်ကန် သုံးမှတကယ့်ကို အဖိုးတန်တာ ၊ မှန်မှန်ကန်ကန် သုံးတဲ့ အင်အားရဲ့ အာနိသင်ကို ဘယ်သူမှ ဖြိုလို့မရဘူး။ အဲဒါကိုတော့ မှတ်ထားကြမှ။ ကျွန်မတို့ ပြည်သူတွေကိုလေ ကိုယ်ချင်းစာတဲ့စိတ်၊ တစ်ယောက်နဲ့ တစ်ယောက် နားလည်တဲ့စိတ်၊ တစ်ယောက်ကို တစ်ယောက်သည်းခံတဲ့စိတ်ကလေး၊ အခုနည်းနည်း စမ်းကြည့်ရအောင်၊ နည်းနည်းစမ်းကြည့်မယ်နော်။ နည်းနည်းစမ်းကြည့်မယ် ဆိုတော့။ စမ်းကြည့်မယ်။ ဟိုဘက်ကလူတွေက မကြားရလို့ဆိုပြီးတော့ အော်နေကြတယ်။ အဲဒီတော့ ကျွန်မလည်း ပြောတာပြီးတော့မယ်။ အဲဒီတော့ ဒီရှေ့က လူတွေက ဟိုဘက်ကို နည်းနည်း ထွက်သွားပြီတော့ ဟိုဘက်ကလူတွေကို နေရာပေးပါလား။
(ပေးမယ်ဟေ့--- ပေးမယ်--------------)
------------ အကြိမ်ကြိမ်အခါခါ ပြောခဲ့ပါတယ်။ အင်အားတွေ မရှိရင် ကျွန်မတို့ လုပ်တဲ့ အလုပ်တွေဟာ အောင်မြင်နိုင်မှာ မဟုတ်ပါဘူး။ အဲဒီတော့ အင်အားတွေကို စနစ်တကျလုပ်မှပဲ စနစ်တကျသုံးမှပဲ ထိရောက်မှာ ဒီတော့ နည်းနည်းလေး စနစ်တကျဖြစ်အောင်ဘယ်လိုလုပ်မလဲ။ ကျွန်မပြောပြမယ်။ အရှေ့ကလူတွေက မတ်တပ်ထတဲ့ အခါ နောက်ကလူတွေက စိတ်တိုကြတယ်။ အဲဒီတော့ ကျွန်မပြောချင်တာ အရှေ့ကလူတွေကလည်း အကြာကြီး မထပါနဲ့။ နောက်ကလူတွေက ခဏလောက်ထတာကို သည်းညည်း ခံကြပါ။။ ခဏထတာပဲ ဘာဖြစ်လဲ။ တစ်ချိန်လုံး ထရင်တော့ တစ်မျိုးပေါ့။
နောက်ပြီးတော့ မှာပါရစေ။ မျှော်လင့်နေရုံနဲ့ ရမှာမဟုတ်ဘူး။ လိုချင်နေရုံနဲ့ ရမှာ မဟုတ်ဘူး။ လိုချင်တာ ရအောင်ကို လုပ်တတ်မှ၊ လုပ်ရဲမှ၊ လုပ်နိုင်မှ ------------------ ကျွန်မတို့ အကောင်းဆုံး နည်းလမ်းတွေ ရှာပြီး တော့ ကိုယ်လိုချင်တဲ့ ပန်းတိုင်ကို ရောက်အောင် သွားရမယ်။ ကျွန်မက အမျိုးသား ရင်ကြားစေ့ရေးကို အမြဲတမ်း ယုံကြည်တယ်။ ဒီနည်းကို သွားကို သွားရမယ် ဆိုတာ ကျွန်မယုံကြည်တယ်။ ထောက်ခံနေတဲ့ သူတွေရှေ့မှာ
(လက်ခုပ်သံများ ဆူညံပွက်လောရိုက်လျက်)
ကျွန်မယုံကြည်တာ လူ့အခွင့်အရေးကို ယုံကြည်တယ်။ တရားဥပဒေ စိုးမိုးရေးကို ယုံကြည်တယ်။ အဲဒါတွေ အတွက်တော့ကျွန်မ အမြဲတမ်း လုပ်ဆောင်သွားမှာပါ။ ပုဂ္ဂိုလ်ရေးအရ ဘယ်သူ့ကို မုန်းလို့၊ ဘယ်ဝါ့ကို မုန်းလို့ ဆိုပြီးတော့ လုပ်နေတာမဟုတ်ဘူး။ အဲဒီစိတ်တွေ ကျွန်မမရှိဘူး။ အချိန်လည်း မရှိဘူး။ ဒီလောကကြီးမှာ အလုပ် အများဆုံး (လက်ခုပ်သံများ-----)
အခု ကျွန်မ ထိန်းသိမ်းခံနေရတဲ့ ကာလတစ်လျှောက် ကျွန်မရဲ့ လုံခြုံရေးအတွက် တာဝန်ယူတဲ့ တာဝန်ယူရတဲ့ ပုဂ္ဂိုလ်တွေကပေါ့နော် ကျွန်မအပေါ်မှာ ကောင်းခဲ့ပါတယ်။ ကျွန်မအပေါ်မှာ တော်တော် ကောင်းခဲ့ပါတယ်။ ဒါ ကျွန်မ အမှန်အတိုင်း ပြောတာ။ အဲဒါကိုလည်း ကျွန်မ တန်ဖိုးထားပါတယ်။ ကျေးဇူးတင်ပါတယ်။ ထပ်ပြီးတော့ ဒီလိုပဲ နေရာအမျိုးမျိုးမှာ ကဏ္ဍအမျိုးမျိုးမှာ ကောင်းကောင်းမွန်မွန် တစ်ယောက်ကို တစ်ယောက် ကောင်း ကောင်း မွန်မွန် ဆက်ဆံပြီး လုပ်ဆောင်သွားစေချင်တယ်။ အဲဒီလိုကျွန်မအပေါ်မှာ ကောင်းကောင်းမွန်မွန် ဆက်ဆံ သလို ပြည်သူတွေအားလုံးအပေါ်မှာ ကောင်းကောင်းမွန်မွန် ဆက်ဆံစေချင်တယ်။
(လက်ခုပ်သံများ ဆူညံပွက်လောရိုက်လျက်)
ကျွန်မလိုပဲ ပြည်သူတွေအပေါ်မှာ အကျယ်ချုပ်ချပြီးတော့ မဆက်ဆံစေချင်ဘူး
(လက်ခုပ်သံများ ဆူညံပွက်လောရိုက်လျက်)
ကျွန်မအပေါ်မှာ ကောင်းကောင်းမွန်မွန် ဆက်ဆံသလို ပြည်သူတွေ အပေါ်မှာလည်း ကောင်းကောင်းမွန်မွန် ဆက်ဆံပါလို့ ကျွန်မက မေတ္တာရပ်ခံပါတယ်။ ကောင်းမွန်တဲ့ ကိစ္စကို တန်ဖိုးထားရမယ်။ ကျေးဇူးတင်ထိုက်သူ ကို ကျေးဇူးတင်ရမယ်။ ကိုယ် မကြိုက်လို့ အားလုံး မကောင်းဘူးလို့ ပြောလို့ မဖြစ်ဘူး။ ကောင်းတာလည်း ရှိတယ်။ မကောင်းတာလည်း ရှိတယ်။ မကောင်းတာ မကောင်းဘူး ပြောရင်လည်း စိတ်ဆိုးနေလို့ မဖြစ်ဘူး။ မလုပ်နဲ့ ။
(လက်ခုပ်သံများ မစဲ---)
လူတစ်ယောက်ရဲ့ ကျေးဇူးကို ပွဲထုတ်ရတာလောက် အင်မတန်မှ အားရစရာ ကောင်းတာ မရှိဘူး။ အင်မတန်မှ အားရစရာ ကောင်းတယ်။ အင်မတန်မှ ကျေနပ်စရာကောင်းတယ်။ ကျွန်မက လုပ်ချင်ပါတယ်။ ကျေးဇူးတင်စရာ တွေသာ လုပ်ကြစမ်းပါ ကျွန်မက တစ်ချိန်လုံးခေါ်ပြီး ကျေးဇူးတင်နေပါ့မယ်။ အခုလည်း ပြည်သူတွေကို ကျေးဇူးတင်ရမှာပဲ။ ကျေးဇူးတင်ပါတယ်။ ကျွန်မတို့ ဗမာတွေရဲ့ သတ္တိက ကောက်ရိုးမီးလိုပဲလို့ ခဏခဏ ပြောတာ ကျွန်မ လုံးဝ မကြိုက်ဘူး။ အဲဒါဟာ ကျွန်မတို့ ဖြစ်သင့်တဲ့ ကိစ္စမဟုတ်ဘူး။ အဲဒီလို မဖြစ်ရဘူး။ လူဆိုတာ လူဖြစ်ကာမှ လူပီပီနေရတယ်။ လူ့သိက္ခာ ဆိုတာရှိတယ်။ လူ့အခွင့်အရေး ကြေညာစာတမ်းမှာ ဘာနဲ့ စလဲဆိုတော့ လူတိုင်း၊ လူတိုင်းဟာ မွေးရာပါ ဂုဏ်သိက္ခာရှိတယ်။ အဲဒီ ဂုဏ်သိက္ခာကို ထိန်းသိမ်းရမယ်။
(လက်ခုပ်သံများ ဆူညံလျက်)
သိက္ခာကို ထိန်းသိမ်းရမယ်။ အဲဒါကို ပြောတာ။ ပြည်သူတွေအတွက်ပဲ လုပ်ပေး၊ ပြည်သူတွေ အတွက်ပဲ လုပ်ပေးလို့။ လူတိုင်း၊ လူတိုင်းဟာ ကိုယ့်တာဝန်ကို ကျေပွန်ရမယ်။ အဲဒီလိုလုပ်နိုင်မှ ကျွန်မတို့ နိုင်ငံတိုးတက်မှာ။ ကျွန်မတို့ နိုင်ငံ မတိုးတက်လား။ တိုးတက်လားဆိုတာ။ ကျွန်မထက် ပြည်သူတွေ ပိုပြီးတော့ သိတယ်။ မတိုးတက်လို့ ဘယ်သူ့ကြောင့်၊ ဘယ်ဝါ့ကြောင့်လို့ ပြောမယ့်အစား ကျွန်မတို့ အားလုံး လက်ညီတက်ညီ နဲ့ လက်တွဲပြီးတော့ တိုးတက်အောင်လို့ လုပ်နိုင်ဖို့ အခွင့်အရေးတွေ ပေးပါလို့ပဲ။ အဲဒီလိုပဲ ကျွန်မပြောချင်တယ်။
လက်ဖြန့်ပြီး တောင်းတာလဲ မကြိုက်ဘူး။ ကိုယ်ကိုယ်တိုင်လည်း လက်ဖြန့် မတောင်းချင်ဘူး။ ကျွန်မတို့ ပြည်သူကလည်း လက်ဖြန့်ပြီးတော့ တောင်းချင်တဲ့ စိတ်မရှိဘူးလို့ ယုံကြည်တယ်။
(ဟုတ်ပါတယ်။ ဟုတ်ပါတယ် -------------------)
ကျွန်မတို့ တိုးတက်ရေးအတွက်၊ ကိုယ့်ရပိုင်ခွင့်တွေကို လိုချင်တယ်လို့ ကျွန်မတို့ ယုံကြည်တယ်။ ကိုယ့်တိုးတက်ရေးအတွက် လုပ်ပိုင်ခွင့်တွေ ရအောင်လို့ ကျွန်မတို့ လုပ်ပေးရမယ်။ နောက်ပြီးတော့ အားလုံးကို လိုက်ပြီးတော့ ထမင်းဝေဖို့ မဟုတ်ဘူး။ ကိုယ့်ထမင်းကိုယ် ဝအောင် ရှာနိုင်တဲ့ အရည်အချင်းတွေ၊ အခွင့် အလမ်းတွေ ရှိဖို့။
(လက်ခုပ်သြဘာသံများ ဆူညံလျက်)
ကျွန်မတို့ ဆက်လုပ်သွားမယ့် အလုပ်တွေဟာ ကျွန်မတို့ ဒီမိုကရေစီကို ယုံကြည်တဲ့ အစုအဖွဲ့တွေနဲ့ တိုင်တိုင်ပင်ပင် လုပ်သွားမယ်။ အမျိုးသား ဒီမိုကရေစီ အဖွဲ့ချုပ် ဆိုပြီး အဲဒီလို ကျွန်မတို့ ထီးထီးကြီး လုပ်သွားမှာ မဟုတ်ဘူး။ အများနဲ့ တူတူ လက်တွဲပြီးတော့ လုပ်သွားမယ်။ အဲဒီအများကို ဝန်းရံရမှာ ပြည်သူပဲ။ ပြည်သူတွေ မဝန်းရံဘဲ ကျွန်မတို့ ဘာမှ လုပ်လို့မရဘူး။ ပြည်သူတို့ အကူအညီကိုလိုလို့ ကျွန်မတို့ တောင်းတယ်။ တောင်းတဲ့ အခါကြရင် ကျွန်မတို့ အပေါ်မှာ ယုံယုံကြည်ကြည် လိုလိုလားလားနဲ့ ဒီအင်အားတွေနဲ့ ပံ့ပိုးပေးပါလို့။ အခုကတည်းကနေ မေတ္တာရပ်ခံထားပါတယ်။ အဲဒီတော့ အားတွေမွေးထား။ ထမင်းများများစားထားလို့ ပြောရမှာလည်း အားနာတယ်။ ထမင်းသိပ်မရှိဘူးဆိုရင် ဘယ်လို ပြန်ဖြေရမလဲလို့။ အားတွေ မွေးထားကြ။ ကိုယ်ကိုကိုယ် --- စိတ်အားရော၊ ခန္ဓာကိုယ်အားရော မွေးထားကြ။ အဲဒီအားတွေနဲ့ ကျွန်မတို့ အတူတူ လက်တွဲပြီးလုပ်မယ်။ ကျွန်မတို့ အတူလက်တွဲပြီး လုပ်ကြပြီဆိုလို့ရှိရင် ပန်းတိုင်ကို ရောက်အောင် ကျွန်မ ပွင့်ပွင့်လင်းလင်းပဲပြောမယ်နော်။ ကျွန်မတို့ လူတွေထဲမှာ ပန်းတိုင်ရောက်တဲ့ဟာကို မမြင်လိုက်ရတဲ့သူတွေ အများကြီးပဲ။ ဒါပေမယ့် ဒီမှန်ကန်တဲ့ ပန်းတိုင်ကို ရည်မှန်းပြီး လျှောက်သွားရတယ်ဆိုတဲ့ ဘဝတစ်ခုရဲ့ တန်ဖိုးက ဘယ်လိုမှ ဖြတ်လို့ မရဘူး။ လူတိုင်းက အနိစ္စသဘော မကင်းပါဘူး။ တစ်နေ့ကျ ကိစ္စပြီးသွားမှာပဲ။ ဒါပေမယ့် မပြီးခင် အချိန် အတွင်းမှာ အနည်းဆုံး ကိုယ်ဘယ်လို နေခဲ့တယ်။ ထိုင်ခဲ့တယ်ဆိုတာ သိကြဖို့။ ကျွန်မတို့ တွေ့တုန်းမှာ ကျွန်မတို့ရဲ့ ကွယ်လွန်သွားတဲ့ လုပ်ဖော်ကိုင်ဖက်တွေ၊ ဒီမိုကရေစီရဲဘော်ရဲဘက်တွေ ကို ကျွန်မ ဂုဏ်ပြုချင်တယ်။ အခု အထိပြင်းပြနေကြတဲ့ ကျွန်မတို့ရဲ့ ဒီမိုကရေစီ လုပ်ဖော်ကိုင်ဖက်၊ ရဲဘော်ရဲဘက်တွေကို ဂုဏ်ပြုချင်တယ်။ အားလုံး အမြန်ဆုံး လုပ်နိုင်ပါစေလို့ ကျွန်မတို့ ပြည်သူတွေက ဝိုင်းပြီး ---------
(လက်ခုပ်သံ သြဘာသံများ အမေစု ကျန်းမာပါစေ၊ ချမ်းသာပါစေဆိုသော အသံများ မစဲတော့ပေ။)
ပြီးပါပြီ။ ။
(မှတ်ချက်။ ။ ပရိသတ်များ၏ သြဘာသံများ၊ လက်ခုပ်သံများ၊ အသံကူးယူမှု ချို့ယွင်းချက် များကြောင့် စာသားအဖြစ် ပြောင်းလဲ ရေးသားရာတွင် အကျအပေါက်အချို့ ကျန်ရှိနိုင်ပါကြောင်း ကြိုတင် မေတ္တာရပ်ခံ အပ်ပါသည်။)
The Voice Weekly Web Team (2:30 AM, Nov 15, 2010)
Ref: THE VOICE
Read More...
Collapse...
သန်းထိုက်ဦး
Tuesday, 16 November 2010
နအဖ စစ်အစိုးရတပ်နှင့် တိုးတက်သော ဗုဒ္ဓဘာသာ ကရင်အမျိုးသား တပ်မတော် (DKBA)၊ ကရင် အမျိုးသား အစည်းအရုံး (KNU ) တို့မှ တပ်ဖွဲ့ဝင်များ ပြီးခဲ့သည့် တပတ်က တိုက်ပွဲများ ဖြစ်ပွားခဲ့ရာ စစ်အစိုးရ ဘက်မှ တပ်သား ၄၀ ခန့် ဒဏ်ရာ ရရှိကြောင်း သတင်းရရှိသည်။
ကရင်ပြည်နယ် ဘုရားသုံးဆူမြို့နယ် အနီးတ၀ိုက်တွင် နိုဝင်ဘာလ ၁၃ ရက်နှင့် ၁၄ ရက်တို့၌ DKBA ၊ KNU တပ်မဟာ (၆) မှ တပ်ဖွဲ့ ၀င်များနှင့် နအဖ၏ ခြေမြန်တပ်ရင်း (ခမရ) ၂၇၀ နှင့် ၂၈၄ တပ်ဖွဲ့ဝင်များ တိုက်ပွဲ ၃ ကြိမ်ခန့် ဖြစ်ပွားခဲ့ကြောင်း၊ ဒဏ်ရာရသူ ၄၀ ခန့်ရှိသော်လည်း အကျအဆုံးကိုမူ မသိရသေးကြောင်း စစ်အစိုးရနှင့် နီးစပ်သူတဦးက ဧရာဝတီသို့ ပြောသည်။
“မနေ့က ဘုရားသုံးဆူကို ဒဏ်ရာရပြီး သယ်လာတဲ့ သူတို့ စစ်သားတွေထဲက တော်တော်များများက ဘုရားသုံးဆူ ကနေ ကီလိုမီတာ ၂၀ ဝေးတဲ့ ကျောက်ကွေး (ကျောက်ကွဲ) ရွာ တိုက်ပွဲမှာ မိုင်းနင်းမိပြီး ဒဏ်ရာရခဲ့တာပါ” ဟု ပြောသည်။
ယခုအခါ ဒဏ်ရာရရှိခဲ့သည့် စစ်သားများကို ဘုရားသုံးဆူမြို့ရှိ အစိုးရတပ်တွင်း၌ ဆေးဝါး ကုသပေးနေကြောင်း ၎င်းက ဆိုသည်။
နိုဝင်ဘာလ ၈ ရက်နေ့တွင် DKBA တပ်ဖွဲ့ဝင်များက ဘုရားသုံးဆူမြို့ကို ခေတ္တ သိမ်းပိုက်ပြီးနောက်ပိုင်း စစ်အစိုးရက အရှေ့တောင်တိုင်း စစ်ဌာနချုပ်နှင့် စစ်ဒေသ ကွပ်ကဲရေး ဌာနချုပ် (စကခ) လက်အောက်ခံ တပ်ရင်း ၇ ရင်းကို ယင်းဒေသတွင် တိုးချဲ့ ချထားကြောင်း သိရသည်။
စစ်အစိုးရနှင့် DKBA တိုက်ပွဲများကြောင့် ထွက်ပြေးတိမ်းရှောင်ခဲ့ရသည့် ဘုရားသုံးဆူမြို့ဒေသခံများသည် ယခုအခါ မြို့ထဲတွင် ပြန်လည် ဝင်ရောက် နေထိုင်နေကြပြီဟု သတင်း ရရှိသည်။
ထို့အပြင် ကရင်ပြည်နယ် ကော့ကရိတ်မြို့နယ် ဝေါ်လေဒေသတွင် နိုဝင်ဘာ ၁၄ ရက်နေ့က စစ်အစိုးရ တပ်များနှင့် DKBA တပ်မဟာ ၅ မှ တပ်မဟာမှူး ဗိုလ်မှူးကြီး နှုတ်ခမ်းမွေး (စောလားပွယ်) ဦးဆောင်သော တပ်ဖွဲ့ဝင်များ တိုက်ပွဲ ဖြစ်ပွားမှုကြောင့် ဒေသခံ ရွာသား ၄၀၀ ခန့် ထိုင်းနိုင်ငံ တာ့ခ်ခရိုင်၊ ဖုတ်ဖရမြို့နယ်ဘက်ကမ်းသို့ ထွက်ပြေး တိမ်းရှောင်လာကြောင်း၊ ယမန်နေ့ ညနေက လူဦးရေ ၂၀၀ ခန့် ထပ်မံ ရောက်ရှိလာကြောင်း ကရင်ဒုက္ခသည်အရေး ဆောင်ရွက်နေသူ တဦးက ပြောသည်။
“မပြန်ရဲကြသေးဘူး။ အဲဒီ နေရာမှာပဲ ရှိနေသေးတယ်။ ထိုင်း အာဏာပိုင်တွေကလည်း နေရပ်ပြန်ဖို့ ဖိအား ပေးတာတွေ မကြားရ သေးဘူး” ဟု ၎င်းက ဆိုသည်။
ထိုဒေသတွင် DKBA တပ်မဟာ ၅ နှင့် တိုက်ပွဲဖြစ်သော နအဖတပ်မှာ စကခ ၈ လက်အောက်ခံ တပ်ရင်းများ ဖြစ်ကြောင်း သိရသည်။
စစ်အစိုးရ ကမ်းလှမ်းထားသော နယ်ခြားစောင့်တပ်ဖွဲ့ရေးကို DKBA တပ်ဖွဲ့ဝင်အများစုက ပြီးခဲ့သည့် ဇူလိုင်လ ကုန်ပိုင်းတွင် လက်ခံ ခဲ့ကြသော်လည်း ဗိုလ်မှူးကြီး စောလားပွယ်၏ တပ်ဖွဲ့ကမူ ယင်းအစီအစဉ်ကို သဘော မတူသောကြောင့် ခွဲထွက်ခဲ့သည်။
ဗိုလ်မှူးကြီး စောလားပွယ် တပ်ဖွဲ့သည် ကရင်ပြည်နယ် မြ၀တီမြို့နှင့် ကြာအင်းဆိပ်ကြီး မြို့နယ်များတွင် လှုပ်ရှား နေကြောင်း သိရသည်။
Ref: ဧရာဝတီ်
Read More...
Collapse...
ဦးဇော်ဝင်းလှိုင်
အင်္ဂါ, 16 နိုဝင်ဘာ 2010
NLD ပါတီ တရားဝင် နိုင်ငံရေးပါတီ အဖြစ်နဲ့ ဆက်လက် တည်ရှိနေကြောင်း လျှောက်ထားတဲ့ အမှုမှာ ဒေါ်အောင်ဆန်း စုကြည်က တရားဝင် လျှောက်ထားသူ ဖြစ်တဲ့အတွက် ရန်ကုန်တိုင်း တရားရုံးချုပ်မှာ ဒီကနေ့ ကျမ်းကျိန်လွှာ လက်မှတ် သွားထိုး ခဲ့ပါတယ်။ ဒီအမှုကို လက်ခံသင့် မခံသင့်ဆိုတဲ့ ကိစ္စကိုတော့ လာမယ့် နိုဝင်ဘာ ၁၈ ရက်နေ့ နေပြည်တော် တရားရုံးချုပ်မှာ ကြားနာမှာ ဖြစ်ပါတယ်။ အပြည့်အစုံကို ဆက်သွယ် စုံစမ်းထားတဲ့ ကိုဇော်ဝင်းလှိုင်က တင်ပြ ပေးထားပါတယ်။
NLD ပါတီ အနေနဲ့ တရားဝင် နိုင်ငံရေးပါတီအဖြစ် ဆက်လက် တည်ရှိနေကြောင်း တရားရုံးမှာ လျှောက်လွှာ တင်ခဲ့တုန်းက ကာယကံရှင်ဖြစ်တဲ့ ဒေါ်အောင်ဆန်းစုကြည်ဟာ နေအိမ် အကျယ်ချုပ်နဲ့ ဖမ်းဆီးထိန်းသိမ်း ခံနေရဆဲကာလ ဖြစ်တာမို့ အမှုတွဲနဲ့ အတူ Affidavit ခေါ် ကျမ်းကျိန်လွှာကို ပူးတွဲ မတင်လိုက်ရတဲ့ အတွက် ဒီနေ့ ရန်ကုန်တိုင်း တရားရုံးမှာ လက်မှတ် သွားထိုးရတာပါ။
ဒေါ်အောင်ဆန်းစုကြည်က NLD ပါတီကို စတင် တည်ထောင်ခဲ့သူအဖြစ်နဲ့ စွဲချက် တင်ထားတဲ့ အတွက် ဒီနေ့မနက်ပိုင်း ရန်ကုန်တိုင်း တရားရုံးမှာ ကျမ်းကျိန်လွှာ လက်မှတ် ထိုးခဲ့တဲ့အကြောင်း ဒေါ်အောင်ဆန်းစုကြည်နဲ့ အတူ လိုက်ပါသွားခဲ့တဲ့ NLD ပြောခွင့်ရပုဂ္ဂိုလ် ဦးအုန်းကြိုင်က ပြောပြပါတယ်။
“ဒီနေ့ ကျနော်တို့ မနက် ၁၁ နာရီခွဲက ရန်ကုန်မြို့ ဘားလမ်းမှာရှိတဲ့ ဗဟိုတရားရုံးချုပ်ကို ဒေါ်အောင်ဆန်းစုကြည် သွားပါတယ်။ ကျနော်တို့ NLD က တရားဝင် နိုင်ငံရေးပါတီ အဖြစ်နဲ့ ဆက်လက် တည်ရှိနေကြောင်း တရား စွဲဆိုထားတဲ့ အမှုနဲ့ ပတ်သက်ပြီး Affidavit ခေါ်တာပေါ့၊ ဥပဒေ စကားနဲ့တော့၊ ကျမ်းကျိန်လွှာ လုပ်ပါတယ်။ အမှုရုံးချိန်းက ၁၈ ရက်နေ့ ဖြစ်ပါတယ်။ ၁၈ ရက်နေ့ အမှု ကြားနာမှာကတော့ နေပြည်တော်မှာလို့ သိရပါတယ်။”
၁၈ ရက်နေ့ ရုံးချိန်းရှိနေတာ ဒေါ်စုက ဘာဖြစ်လို့ ကျမ်းကျိန်ရတာပါလဲ။ ဒေါ်စုနဲ့ ဘယ်လို ပတ်သက်နေလဲ။
“အဲဒီအမှုကို စွဲဆိုထားတာက ဒေါ်အောင်ဆန်းစုကြည်က NLD ပါတီကို စတင် တည်ထောင်သူ အဖြစ်နဲ့၊ NLD ပါတီရဲ့ တာဝန်ခံ အဖြစ်နဲ့ သူက တရား စွဲဆိုထားတာလို့ ကျနော် သိပါတယ်။ တရားရုံး Procedure များရဲ့ လိုအပ်ချက်အရ တရားစွဲဆိုသူက Affidavit လုပ်ရတယ်လို့ ဆိုပါတယ်။ အဲဒါကတော့ ကျနော် ဒီလောက်ပဲ သိပါတယ်။”
၁၈ ရက်နေ့ ရုံးချိန်း ကြားနာမှုကို နေပြည်တော်မှာ လုပ်မယ်ဆိုတော့ ဒေါ်အောင်ဆန်းစုကြည် ကိုယ်တိုင် သွားရမှာပေါ့၊ အဲဒီသဘောလား။
“အဲဒါ ဦးဉာဏ်ဝင်းကို ကျနော်မေးကြည့်တော့ ဒေါ်အောင်ဆန်းစုကြည်က လိုက်နိုင်မှာ မဟုတ်ပါဘူးလို့ ပြောပါတယ်။ အကျိုးဆောင်များပဲ သွားမယ်လို့ ပြောပါတယ်။”
ဒေါ်အောင်ဆန်းစုကြည် မလိုက်နိုင်ဘူး၊ ရှေ့နေနဲ့ပဲ သွားမယ့် သဘောလား။
“ဟုတ်ပါတယ်၊ အဲဒီသဘောပါ။ ဆရာ ဦးဉာဏ်ဝင်းတို့ပဲ သွားကြမှာပါ။”
NLD ပြောခွင့်ရပုဂ္ဂိုလ် ဦးအုန်းကြိုင် ပြောပြခဲ့တာ ဖြစ်ပါတယ်။
အကျိုးဆောင် ရှေ့နေကြီး ဦးဉာဏ်ဝင်းနဲ့အတူ နေပြည်တော်ကို သွားမယ့် နောက်အကျိုးဆောင်ရှေ့နေ တဦးကတော့ ဦးကျော်ဟိုး ဖြစ်ပါတယ်။ သူက အခုစွဲချက် တင်ထားတဲ့ အမှုဟာ NLD ပါတီ တရားဝင် နိုင်ငံရေး ပါတီအဖြစ် ရပ်တည်ခွင့် ရရုံတင် မကဘဲ ပြီးခဲ့တဲ့ ၁၉၉၀ ခုနှစ် ရွေးကောက်ပွဲမှာ အနိုင်ရခဲ့တဲ့ ပါတီကို လွှတ်တော် ခေါ်ပေးရေး ကိစ္စပါ ပါဝင်တယ်လို့ အကျိုးဆောင် ရှေ့နေကြီး ဦးကျော်ဟိုးက ပြောပါတယ်။
“ကျနော်တို့ စွဲထားတဲ့ ကိစ္စက လွှတ်တော်ခေါ်ပေးဖို့ပဲ။ လွှတ်တော်ခေါ်ပေးဖို့ အတွက်ကို သီးခြား သက်သာခွင့် ဥပဒေပုဒ်မ ၄၅၊ ၅၅ နဲ့ စွဲတဲ့ အခါကြတော့ ကျမ်းကျိန်လွှာ မပါလို့ မဖြစ်ဘူး။ မပါလို့ မဖြစ်တဲ့အတွက် အခု ကျနော်တို့က အမှုသာ တင်လိုက်ရတယ်၊ ဒေါ်စုက မလွတ်လာသေးတော့ ကျမ်းကျိန်လွှာ ပါမသွား ဘူးပေါ့လေ။ အခု ဒေါ်စုက အပြင် ရောက်နေတော့ ဥပဒေအရ လိုအပ်တဲ့ ကျမ်းကျိန်လွှာကို ဒီနေ့ လုပ်တာပါ။ လုပ်ပြီးတော့ အဲဒီနေ့ကြရင် တင်ပြပြီး အမှုကို ဆောင်ရွက် သွားမှာပေါ့။
“၁၉၉၀ ပြည့်နှစ် ရွေးကောက်ပွဲရလဒ်အရ ဥပဒေအရ ခေါ်ပေးရမယ့် လွှတ်တော်ကို ခေါ်ပေးဖို့။ ဒီရွေးကောက်ပွဲ ရလဒ်ကို ပျက်အောင် ဒီလို ဖန်တီးတာကို တားမြစ် ပေးဖို့ပေါ့။ ပြီးတော့ ဥပဒေအရ ခေါ်ရမယ့် လွှတ်တော်ကိုလည်း ခေါ်ပေးဖို့ပေါ့၊ နှစ်ချက်ပေါ့။ ကျနော်တို့က ဥပဒေ ပြဋ္ဌာန်းချက် အတိုင်းကတော့ အစိုးရ အဖွဲ့တခု အနေနဲ့ မလုပ်သင့် မလုပ်ထိုက်တာကို မလုပ်ဖို့၊ ဥပဒေနဲ့ မညီတဲ့ဟာကို မလုပ်ဖို့ပေါ့လေ။ ဥပဒေနဲ့အညီ လုပ်ရမယ့် ဟာလေးတွေ လုပ်ပေးဖို့၊ ဒါကိုပဲ ကျနော်တို့ တင်ပြမှာပါ။”
အခုဟာ တော်တော်လေး ရှုပ်ထွေးသွားတဲ့သဘော ဖြစ်သွားတာပေါ့၊ ရွေးကောက်ပွဲက ကြားထဲမှာ ကောက်လုပ် လိုက်တဲ့ အခါကြတော့။
“ဟုတ်ပါတယ်၊ အဲဒါကြောင့်လည်း ကျနော်တို့က Cause of Action ပေါ်လာတယ်ပေါ့လေ။ ဘာဖြစ်လို့လဲဆိုတော့ ဒီအမှုကို စွဲဖို့အတွက် မှုခင်း အကြောင်းချင်းရာ ပေါ်လာတဲ့ သဘောပေါ့။ ရွေးကောက်ပွဲ ဒီလို လုပ်တဲ့ အတွက်ကြောင့် ပထမ ရွေးကောက်ပွဲရဲ့ ရလဒ်ကို အကောင်အထည် မဖော်ရတဲ့ အတွက်ကြောင့်၊ ဒီဟာကို နောက်ရွေးကောက်ပွဲ လုပ်တဲ့အကြောင်းကြောင့် တင်တဲ့သဘောပေါ့။”
နိုဝင်ဘာလ ၁၈ ရက်နေ့ နေပြည်တော်မှာ ကြားနာမှာကတော့ ဒီအမှုကို လက်ခံမယ်၊ လက်မခံဘူး ဆိုတာပဲ ရှိသေးတယ်လို့ ဦးကျော်ဟိုးက ပြောပြပါတယ်။ ဒေါ်အောင်ဆန်းစုကြည်ဟာ ရန်ကုန်တိုင်း တရားရုံးကတဆင့် NLD ရုံးချုပ်ကို ပြန်သွားပြီး အဲဒီမှာရှိနေတဲ့ တိုင်းရင်းသား ခေါင်းဆောင်တွေနဲ့ တွေ့ဆုံပြီး ပြောင်းလဲလာတဲ့ ခေတ်နဲ့အညီ ဒုတိယအကြိမ် ပင်လုံညီလာခံ ခေါ်ယူနိုင်ရေး ကိစ္စကို ဆွေးနွေးခဲ့တယ်လို့ NLD ပြောခွင့်ရပုဂ္ဂိုလ် ဦးအုန်းကြိုင်က ဆက်ပြောပြပါတယ်။
“မကြာသေးမီကထွက်တဲ့ ကလေးမြို့ ကြေညာစာတမ်း ဒုတိယ ပင်လုံညီလာခံ ကျင်းပရေးဆိုတဲ့ အပေါ်မှာ သူတို့ရဲ့ ထောက်ခံတဲ့ သဘောထား အသီးသီးကို ပြည့်ပြည့်စုံစုံပဲ တင်ပြ ဆွေးနွေး ကြပါတယ်။ အဲဒါကို ဒေါ်အောင်ဆန်းစုကြည်က နားထောင်ပြီးတော့ သူလည်းပဲ ဒုတိယ ပင်လုံညီလာခံ ဆိုတာကို သဘောထား ရှိတဲ့အကြောင်း၊ သူကတော့ ဒီခေတ် ၂၁ ရာစုခေတ် ပိုပြီး ကျယ်ပြန့် ထက်မြက်လာတဲ့ နည်းပညာတွေနဲ့ ပိုပြီးတော့ အံဝင်ခွင်ကျ ဖြစ်မယ့် ညီလာခံမျိုးဖြစ်အောင် ကြိုးစားရမယ့် အကြောင်း ဆွေးနွေးပါတယ်။”
NLD ပြောခွင့်ရပုဂ္ဂိုလ် ဦးအုန်းကြိုင် ပြောပြခဲ့တာ ဖြစ်ပါတယ်။
ဒီနောက်မှာတော့ ဒေါ်အောင်ဆန်းစုကြည်ဟာ မကြာခင် ပြည်လုံးကျွတ် NLD လူငယ် စည်းဝေးပွဲ ခေါ်ယူနိုင်ရေး အတွက် NLD လူငယ်ပိုင်းနဲ့ တွေ့ဆုံ ဆွေးနွေး ခဲ့တယ်လို့ သိရပါတယ်။
Ref: VOA News
Read More...
Collapse...
Tuesday, 16 November 2010
နေအိမ် အကျယ်ချုပ်မှ ပြန်လည် လွတ်မြောက် လာသော ဒေါ်အောင်ဆန်း စုကြည်ကို တွေ့မြင်၍ မိန့်ခွန်း နားထောင်ရ ပြီးနောက် လူငယ် အများစုသည် နိုင်ငံရေးကို ကြောက်ရွံ့စိတ် နည်းသွားပြီး နိုးကြားမှုရှိလာကြောင်း သိရသည်။
ဧရာဝတီက လူငယ်ဦးရေ ၁၀၀ ကို တွေ့ဆုံမေးမြန်းခဲ့ရာ ဒေါ်အောင်ဆန်းစုကြည်နှင့် အတူ ဒီမိုကရေစီ အရေးတွင် ရဲရင့်စွာ ပူးပေါင်း ဆောင်ရွက် သွားမည်ဖြစ်ကြောင်း၊ နိုင်ငံရေး လှုပ်ရှားမှုများတွင် တက်ကြွစွာ ပါဝင် လှုပ်ရှား လိုကြကြောင်း ဖြေဆိုကြသည်။
ဒေါ်အောင်ဆန်းစုကြည် လွတ်မြောက်လာသော နိုဝင်ဘာလ ၁၃ ရက်နေ့နှင့် မိန့်ခွန်း ပြောကြားသော နိုဝင်ဘာလ ၁၄ ရက်နေ့တွင် လူငယ်များ အပါအဝင် ပြည်သူလူထု ထောင်သောင်းချီ၍ ကြိုဆို နှုတ်ဆက်ခဲ့ကြသည်။
“လိုချင်ရုံ၊ တောင့်တရုံ၊ မျှော်လင့်ရုံနဲ့ မရဘူး။ လိုချင်တာကို ရအောင် ယူတတ်ရမယ် ဆိုတဲ့ အမေ့မိန့်ခွန်း ကြားကတည်းက ကျနော်တို့ လူငယ်တွေ အမေနဲ့အတူ တရားမျှတမှုနဲ့ ဒီမိုကရေစီအတွက် တိုက်ပွဲတွေ အများကြီး တိုက်ရဦးမယ် ဆိုတာ သိလာတယ်။ ထောင်ကျမှာ၊ နှိပ်စက်ခံရမှာတော့ ကြောက်တယ်။ ဒါပေမယ့် ကြောက်နေလို့ ပြီးသွားမှာမှ မဟုတ်တာ။ ကြောက်တဲ့ကြားက ကြောက်စိတ် ဖျောက်ပြီး နိုင်ငံရေး လှုပ်ရှားမှုတွေမှာ ပါဝင်သွားမယ်” ဟု အသက် ၂၄ နှစ်အရွယ် ကွန်ပျူတာပညာရှင် လူငယ်တဦးက ဆိုသည်။
ရန်ကုန်မြို့ ရွှေဂုံတိုင်ရှိ အမျိုးသားဒီမိုကရေစီ အဖွဲ့ချုပ်ရုံး (NLD) သို့လည်း ဆယ်ကျော်သက်အရွယ် လူငယ်များ လာရောက်ပြီး ဒေါ်အောင်ဆန်းစုကြည် ရုပ်ပုံပါ သော့ချိတ်များ၊ တီရှပ်အင်္ကျီများ ၀ယ်ယူကြသူ၊ ၀ယ်ယူရန် စုံစမ်းကြသူ လူငယ် အများအပြား ရှိကြောင်း သိရှိရသည်။
“အန်တီ့ဓာတ်ပုံပါတဲ့ သော့ချိတ်လေး လိုချင်လို့လာဝယ်တာ။ NLD ရုံးလာရင် အပြင်ကနေ အစိုးရလူတွေက ဓာတ်ပုံ ရိုက်ယူတာတွေ ရှိလို့ စိတ်ထဲမှာ အဖမ်းများ ခံရမလားဆိုပြီး လန့်တယ်။ ကြောက်ပေမယ့် ဖြစ်ချင်ရာဖြစ်ဆိုပြီး ရုံးမှာ သော့ချိတ် လာဝယ်တာပါ” ဟု အနောက်ပိုင်း တက္ကသိုလ်မှ အသက် ၁၉ နှစ်အရွယ် ကျောင်းသူတဦးက ပြောသည်။
NLD မှ လူငယ်အဖွဲ့ဝင်တဦးက ပါတီဝင်မဟုတ်သော လူငယ်များ NLD ရုံးသို့ လာရောက်မှုနှုန်း မြင့်တက် လာသည်ဟု ဆိုသည်။
“ဆယ်ကျော်သက်တွေ လာကြတယ်။ တချို့ကလည်း ဒေါ်အောင်ဆန်းစုကြည် ဘယ်အချိန် ရုံးဆင်း၊ ရုံးတက် လုပ်သလဲ ဆိုတာ လာမေးကြပြီး စောင့်ကြည့်ကြတယ်။ တချို့လူငယ်တွေက ၂ ယောက်တွဲ၊ ၃ ယောက်တွဲလာပြီး ရုံးရှေ့မှာ လာစောင့် တာမျိုးတွေလည်း ရှိတယ်” ဟု အဆိုပါ NLD လူငယ်က ပြောသည်။
ပုဂ္ဂလိက သတင်းမီဒီယာများမှ သတင်းထောက်လူငယ်များလည်း NLD ရုံးသို့ နေ့စဉ် ၀င်ထွက် သွားလာကြကြောင်း သိရသည်။
“အခုအခြေအနေက အရင်နဲ့မတူဘူး။ သာမန်လူငယ်တွေရော၊ သတင်းထောက် လူငယ်တွေရော NLD ရုံးကို နေ့စဉ် လိုလို လာနေကြတယ်။ အရင် အန်တီ လွတ်တုန်းကဆိုက မြန်မာနိုင်ငံ နိုင်ငံခြား သတင်းထောက်များ အသင်းက သတင်းထောက် လူကြီးတွေပဲ ရှိခဲ့တာ။ အခု အရမ်း အားရဖို့ ကောင်းပါတယ်။ ဘယ်နေရာကြည့်ကြည့် လူငယ်တွေ ချည်းပဲ” ဟု နိုင်ငံခြား သတင်းဌာန တခုအတွက် အလုပ်လုပ်နေသူ သတင်းထောက် တဦးက ဆိုသည်။
လူငယ်သတင်းထောက်တဦးက “စိစစ်ရေး လွတ်တာ၊ မလွတ်တာက စာပေစိစစ်ရေးနဲ့ပဲ သက်ဆိုင်မယ်။ ကိုယ်က သတင်းသမား ဆိုတော့ ဒေါ်အောင်ဆန်းစုကြည် သတင်းတွေ ဆက်တိုက် ရေးသွားမယ်။ နေ့စဉ် မဟုတ်တောင် NLD ရုံးကို တပတ် ၂ ကြိမ်လောက် သွားမယ်” ဟုပြောသည်။
ဒေါ်အောင်ဆန်းစုကြည် အနေဖြင့် လူထုနှင့် ထိတွေ့နိုင်မည့် အပတ်စဉ် ဟောပြောပွဲများ ပုံမှန်ပြုလုပ် စေချင်သော လူငယ် အများအပြား ရှိနေကြောင်း သိရှိရသည်။
“အလုပ်က မအားတော့ အပတ်စဉ် စနေ၊ တနင်္ဂနွေနေ့တိုင်း ဒေါ်စုနဲ့ လူထု အမြဲထိတွေ့ သွားနိုင်မယ့် ဟောပြောပွဲမျိုး လုပ်စေချင်တယ်။ အဲဒီလို လုပ်ဖြစ်ရင်တော့ အလုပ်က လူငယ်တွေစုပြီး သွားနားထောင်မယ်” ဟု ဆေးဝါး ပစ္စည်း ရောင်းချသည့် ကုမ္ပဏီတခုတွင် အလုပ် လုပ်နေသော လူငယ် တဦးက ဆိုသည်။
ဒေါ်အောင်ဆန်းစုကြည်က တိုင်းပြည်၏ အနာဂတ်သည် လူငယ်များလက်ထဲတွင် ရှိနေပြီး လူငယ်များကို ပြုစု ပျိုးထောင်ပေးရန် အလွန် အရေးကြီးကြောင်း နိုဝင်ဘာလ ၁၄ ရက်နေ့ မိန့်ခွန်းနှင့် သတင်းစာ ရှင်းလင်းပွဲတွင် ထည့်သွင်း ပြောဆိုသွားသည်။
Ref: ဧရာဝတီ်
Read More...
Collapse...
Posts
