နိုင်ငံရေးသိပ္ပံ သင်ကြားသင့်ဟု NLD ပြော

ထွန်းထွန်း |
အင်္ဂါနေ့၊ မတ်လ ၀၁ ရက် ၂၀၁၁

နယူးဒေလီ(မဇ္ဈိမ) ။ ။ လူ့အဖွဲ့အစည်းရှိ မည်သည့် ကိစ္စရပ်မျိုးနှင့် မဆို ထိတွေ့ ဆက်စပ်နေသည့် နိုင်ငံရေး သိပ္ပံ ဘာသာရပ်ကို မြန်မာနိုင်ငံ တက္ကသိုလ်များ၌ ပြဋ္ဌာန်း သင်ကြား သင့်ကြောင်း အမျိုးသား ဒီမိုကရေစီ အဖွဲ့ချုပ် NLD က ပြောသည်။

“Political Science က အင်မတန် အရေးကြီးတဲ့ ဘာသာရပ် ဖြစ်တယ်။ Political Science ကို ကျောင်းသား လူငယ်တွေ အားလုံး သိသင့်တယ်။ နောက်ပြီး ရိုးရိုးတန်းတန်း အရပ်သူ အရပ်သားတွေလဲ သိသင့်တယ်။ Political Science ဆိုတာက ကျနော်တို့ လူ့ အဖွဲ့အစည်းတွေမှာ အကြောင်းအရာ ကိစ္စတိုင်းကို ထိတွေ့နေတဲ့ ကိစ္စကြီး ဖြစ်တယ်ပေါ့ဗျာ” ဟု NLD ခေါင်းဆောင်တဦး ဖြစ်သူ ဦးဝင်းတင်က မဇ္ဈိမကို ပြောသည်။

လွတ်လပ်ရေးရပြီးစ မြန်မာနိုင်ငံ တက္ကသိုလ်များတွင် နိုင်ငံရေး သိပ္ပံကို အထူးပြု အနေဖြင့် သင်ယူခွင့် ရှိခဲ့သည်။ ၁၉၆၂ အာဏာ သိမ်းပြီးစထိ အနောက်တိုင်း သမိုင်း ဌာနတွင် နိုင်ငံရေး သိပ္ပံကို တွဲဖက် ထားခဲ့ပြီး ထိုစဉ်က သင်ရိုးများတွင် အစိုးရ မူဝါဒများ ထည့်သွင်း သင်ကြားခြင်း မဟုတ်ဘဲ အုပ်ချုပ်မှု၊ လူ့အဖွဲ့အစည်း၊ စီးပွားရေး စသည့် ကဏ္ဍများအလိုက် သင်ယူခဲ့ရသည်။ စာရေးဆရာ နိုင်ငံရေး သမားကြီး ဦးသိန်းဖေမြင့်က တက္ကသိုလ်တွင် မာ့က်စ်ဝါဒ သင်ကြားသင့်သည်ဟု လှုံ့ဆော်ရေးခဲ့သည်။

“အစိုးရနဲ့ မကိုက်လို့ဆိုတဲ့၊ ငါတို့ ပေါ်လစီနဲ့ မကိုက်တဲ့ဟာမျိုး မဟုတ်ဘဲနဲ့ ခေတ်အလိုက် ပြောင်းသွားတဲ့ ဒီ Trend ကြီး တခုလုံးပေါ့။ ရွေ့လျားနေတဲ့ အခြေခံရုပ်တွေ၊ အုပ်ချုပ်ရေး စနစ်တွေ၊ ပတ်ဝန်းကျင် လူ့အဖွဲ့အစည်းရဲ့ စနစ်တွေ ပြောင်းလဲ လာတဲ့အမျှ၊ စီးပွားရေး စနစ်တွေ ပြောင်းလဲ လာတာနဲ့အမျှ၊ နိုင်ငံရေး ပညာရဲ့ ပြောင်းလဲမှုတွေ၊ နိုင်ငံရေး ပညာရဲ့ အပြောကျယ်မှုတွေ အဲဒါတွေ အကုန်လုံးကို ပို့ချတာပဲဗျ” ဟု ဝါရင့် နိုင်ငံရေး သမားကြီး ဦးဝင်းတင်က ပြောဆိုသည်။

မြန်မာ့ဆိုရှယ်လစ် လမ်းစဉ်ပါတီ (မဆလ) သည် ပါတီမူဝါဒများကို သင်ကြား ပို့ချသည့် ဗဟို နိုင်ငံရေး သိပံ္ပကျောင်းကို ၁၉၆၃ နောက်ပိုင်းတွင် ဖွင့်လှစ်ခဲ့သည်။ မြန်မာ့ ဆိုရှယ်လစ် လမ်းစဉ်ကို ဦးဆောင် ရေးဆွဲခဲ့သည့် မောင်ချစ်လှိုင် ဦးစီးသည့် ထိုကျောင်းတွင် နိုင်ငံရေး သင်တန်းခေါ်သည့် ကေဒါ သင်တန်းများ ဖွင့်လှစ်ခဲ့ပြီး သင်တန်းသားများကို ပါတီ စည်းရုံးရေး လုပ်ငန်းများ ဆောင်ရွက်စေခဲ့သည်။

မဆလကို ဝေဖန်သင်ကြားမှုဖြင့် မန္တလေး တက္ကသိုလ် သမိုင်းနှင့် နိုင်ငံရေး သိပ္ပံ ပါမောက္ခ ဒေါက်တာ မောင်မောင်ကြီး ထုတ်ပယ် ခံခဲ့ရသည်။ ထို့နောက် တက္ကသိုလ်များတွင် နိုင်ငံရေး သိပ္ပံကို အောင်မှတ်အတွက် မသင်မနေရ သင်ရသည့် အခြေအနေမျိုး ရှိခဲ့သည်။

ပြည်တွင်းအခြေစိုက် ဝါရင့်စာရေးဆရာတဦးက “ဟိုခေတ်တုန်းက Political Science ဆိုတဲ့ ဟို subject (ဘာသာရပ်) ပြည့်ပြည့်ဝဝ ပေါ့ဗျာ။ မဆလ ခေတ်က သင်တဲ့ Political Science ဆိုတဲ့ ဟာကတော့ နာမည်သာ Political Science ဆိုပေမယ့်လို့ မြန်မာ့ ဆိုရှယ်လစ် လမ်းစဉ်ရဲ့ သဘောတရားကို သင်တာပေါ့ဗျာ။ အခု Political Science ဆိုတဲ့ ဘာသာရပ်ရဲ့ ကဏ္ဍတွေ စုံလင် အောင်ပေါ့ဗျာ။ ပြည့်ပြည့်စုံစုံ သင်မယ်ဆိုရင် နိုင်ငံရေးနဲ့ ပတ်သက်လို့ ဗဟုသုတ ရှိမယ်၊ အမြင်ကျယ်မယ် ပေါ့ဗျာ” ဟု မဇ္ဈိမကို ပြောသည်။

ယခုလ ၂၄ ရက်ထုတ် ရန်ကုန်ထုတ် ပြည်သူ့ခေတ်ဂျာနယ်၌ စာရေးဆရာ စံမြတ်က နိုင်ငံရေး သိပ္ပံ ဘာသာရပ် ပြန်လည် ပြဋ္ဌာန်းသင့်ကြောင်း ဆောင်းပါး ရေးခဲ့သည်။

ဆောင်းပါးထဲတွင် “နိုင်ငံခြားက ခေါင်းဆောင် အများအပြားဟာ အများ အားဖြင့် တက္ကသိုလ် ဘွဲ့ရ ပညာတတ် တွေပါ။ ပြီးတော့ နိုင်ငံရေး သိပ္ပံပညာ၊ နိုင်ငံရေး ဆိုင်ရာ ဘောဂဗေဒ ပညာ၊ နိုင်ငံရေး ဆိုင်ရာ သမိုင်းပညာ၊ နိုင်ငံရေး ဆိုင်ရာ ဥပဒေပညာ၊ လူမှုရေး သိပ္ပံပညာ စသဖြင့်နဲ့ အောင်ခဲ့ကြသူတွေ များပါတယ်။ ပညာတွေကို ဒီလိုစနစ်တကျ တတ်ခဲ့ကြလို့ပဲ သူတို့ နိုင်ငံတွေကို လက်တွေ့ အုပ်ချုပ်ကြတဲ့ အခါမှာ တည့်မတ် မှန်ကန်အောင် ဦးဆောင်နိုင်ကြပြီး နိုင်ငံကိုလဲ ဖွံ့ဖြိုး တိုးတက်အောင် လုပ်ဆောင် ပေးနိုင်ခဲ့ကြတာပါ။ ဒါကို ကျနော်တို့ အတုယူကြ ရပါလိမ့်မယ်” ဟု ဖော်ပြပါရှိသည်။

တက္ကသိုလ်များတွင် နိုင်ငံရေးသိပ္ပံ ဘာသာရပ် ပြဋ္ဌာန်းခြင်းမျိုးကို အမျိုးသား ဒီမိုကရေစီ အင်အားစု ပါတီ NDF ကလည်း ထောက်ခံသည်။

“ ကျနော်တို့ကျောင်းမှာ ရှိတုန်းတည်းကလဲပဲ Political Science ဆိုတာ ရှိခဲ့တာပဲ။ Political Science ဆိုတာက တော့ဗျာ … အများကြီး ကျယ်ဝန်း တာပဲ။ မြန်မာနိုင်ငံတော် အဆင့် တက္ကသိုလ်တွေမှာ ရှိသင့်တာပေါ့။ ဒါ့အပြင် တခြားနိုင်ငံက လာပြီးတော့ သင်တဲ့ တက္ကသိုလ် တွေမှာ လဲပဲ ဒီဘာသာရပ်မျိုးတွေ ရှိရင် ပိုပြီး ကျယ်ကျယ်ပြန့်ပြန့် သိရတာပေါ့” ဟု ပါတီခေါင်းဆောင် ဦးခင်မောင်ဆွေက မဇ္ဈိမကို ပြောဆိုသည်။

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ကလည်း နေအိမ် အထိန်းသိမ်းခံမှ ပြန်လွတ် အပြီး NLD ရုံးချုပ်ရှေ့ လူထု ဟောပြောပွဲ၌ လူတိုင်းသည် နိုင်ငံရေးနှင့် ပတ်သက်နေပြီး မပတ်သက် ချင်လျှင်လည်း ပတ်သက် နေရမည်ဟု ပြောကြား ခဲ့သေးသည်။


Ref: မဇ္ဈိမ