လူ့အခွင့်အရေး အပြောင်းအလဲ လက်တွေ့ ဖော်ဆောင်ဖို့ အီးယူ တိုက်တွန်း

ဦးသားညွန့်ဦး
တနင်္လာ, 28 ဖေဖော်ဝါရီ 2011

နိုင်ငံခြားရေးဝန်ကြီး ဟီလာရီ ကလင်တန် (Hillary Clinton) က ပြောဆို လိုက်တဲ့ တချိန်တည်းမှာပဲ EU ဥရောပ သမဂ္ဂ နိုင်ငံခြားရေး မူဝါဒ အကြီးအကဲ ကလည်း မြန်မာ အပါအ၀င် နိုင်ငံတချို့က လူ့အခွင့်အရေး အခြေအနေ တွေနဲ့ ပတ်သက်ပြီး နိုင်ငံတကာ အနေနဲ့ ဆုံးဖြတ်ချက်တွေ ချမှတ်ရုံတင် မဟုတ်ဘဲ လက်တွေ့ အပြောင်း အလဲတွေ ဖြစ်လာရေး လုပ်ဆောင်နိုင်ဖို့ဟာ လူ့အခွင့်အရေး ကောင်စီ အတွက် စိန်ခေါ်ချက် ဖြစ်တယ်လို့ ပြောဆို လိုက်ပါတယ်။ ဒီအကြောင်းနဲ့ ပတ်သက်လို့ ကိုသားညွန့်ဦးက တင်ပြ ပေးထားပါတယ်။

မနေ့ ဖေဖော်ဝါရီလ ၂၈ ရက်နေ့က စတင်လိုက်တဲ့ ၁၆ ကြိမ်မြောက် လူ့ အခွင့်အရေး ကောင်စီ ညီလာခံ အတွင်းမှာ လူ့အခွင့်အရေး ချိုးဖောက်မှုတွေနဲ့ ပတ်သက်လို့ ကောင်စီရဲ့ ဆုံးဖြတ်ချက်တွေ၊ ထုတ်ပြန်ချက်တွေဟာ အရေးပါပေမဲ့ တကယ်တမ်း အပြောင်း အလဲတွေ လက်တွေ့ ဖြစ်လာအောင် ဘယ်လို ဆောင်ရွက် ကြမလဲလို့ EU ဥရောပသမဂ္ဂ နိုင်ငံခြားရေး မူဝါဒဆိုင်ရာ အကြီးအကဲ ကက်သရင်း အက်ရ်ှတွန် (Catherine Ashton) က မေးခွန်း ထုတ်လိုက်တာပါ။ မကြာခင်က လူထု လှုပ်ရှားမှုတွေ ဖြစ်ခဲ့တဲ့ တူနီးရှား၊ အီဂျစ် နိုင်ငံတွေကို ကိုယ်တိုင် သွားရောက်ပြီး ဆန္ဒပြ လူငယ်တွေနဲ့ ကိုယ်တိုင်ကိုယ်ကျ တွေ့ဆုံခဲ့သူပါ။

မြန်မာနိုင်ငံ အပါအ၀င် အခြား လူ့အခွင့်အရေး ချိုးဖောက်ခံရတဲ့ နိုင်ငံတွေမှာ လက်တွေ့ အပြောင်း အလဲတွေ ရှိလာဖို့ ကိစ္စဟာ လက်ရှိ လူ့အခွင့်အရေး ကောင်စီအတွက် စမ်းသပ် အကဲစမ်းမှု တရပ် ဖြစ်နေတယ်လို့ ပြောသွားပါတယ်။ ဆုံးဖြတ်ချက်တွေ ချမှတ်တာ ကြေညာချက် သက်သက်နဲ့တော့ မအောင်မြင် နိုင်ဘူးလို့လည်း ထောက်ပြခဲ့ပါတယ်။

“ဒီဆုံးဖြတ်ချက်တွေ၊ ထုတ်ပြန်ချက်တွေ ဆိုတာဟာ အကြံပြုချက်တွေပါ။ တကယ်တမ်း ဘယ်လို ရလဒ်တွေ ထွက်လာမလဲ ဆိုတာက အရေး ကြီးပါတယ်။ လက်တွေ့အခြေအနေမှာ အပြောင်း အလဲတွေ ဖြစ်လာမလား ဆိုတာဟာ တကယ့် စိန်ခေါ်မှု ဖြစ်ပါတယ်။ လစ်ဗျား၊ အီရန်၊ ဘဲလားရုစ်၊ မြန်မာ၊ မြောက်ကိုရီးယား၊ ဒီနိုင်ငံတွေက ပြည်သူလူထု အနေနဲ့ လွတ်လပ်စွာ ပြောဆိုခွင့်၊ လွတ်လပ်စွာ မဲပေး ရွေးချယ်ခွင့်၊ တရားဥပဒေ စိုးမိုးမှု၊ တန်းတူညီမျှတဲ့ အခွင့်အရေး၊ တိကျမှန်ကန်တဲ့ အုပ်ချုပ်မှု စသဖြင့် သူတို့ ရသင့်တဲ့ အခြေခံ အခွင့် အရေးတွေ တကယ်ပဲ ရနိုင်မလား ဆိုတာပါ။”

သူပြောသလိုပါ၊ မြန်မာနိုင်ငံနဲ့ ပတ်သက်လို့ အရင် လူ့အခွင့်အရေး ကော်မရှင် ကတည်းက အခု လူ့အခွင့်အရေး ကောင်စီ ဖွဲ့စည်းပြီးချိန် အထိ ကုလသမဂ္ဂ အနေနဲ့ ဆုံးဖြတ်ချက်တွေ အမျိုးမျိုး ထုတ်ပြန်၊ တောင်းဆို ချက်တွေ အမျိုးမျိုး ထုတ်ခဲ့ပေမဲ့ မြန်မာ နိုင်ငံမှာ လူ့အခွင့်အရေး အခြေအနေ ဘာမှ သိသာ ပြောင်းလဲမှု မရှိခဲ့ဘူးလို့ လူ့အခွင့်အရေး လှုပ်ရှားသူတွေက ရှုမြင်ပါတယ်။ မြန်မာ အာဏာပိုင်တွေ ဘက်ကလည်း ဒီအကြံပြုချက်တွေ အပေါ်မှာ လောက်လောက် လားလား ပြန်ပြီး တုံ့ပြန် ဖြေရှင်း ကိုင်တွယ် ပေးတာမျိုး မရှိခဲ့ပါဘူး။

တချိန်တည်းမှာလည်း မြန်မာအစိုးရ အပါအ၀င် လူ့အခွင့်အရေး ချိုးဖောက်တဲ့ အစိုးရ အတော် များများက လူ့အခွင့် အရေးနဲ့ ပတ်သက်လို့ ဝေဖန် လာရင် ဒါဟာ ပြည်တွင်းရေးကို စွက်ဖက်တာ၊ နိုင်ငံရေး ပယောဂ မကင်းဘူး၊ နောက် အနောက် နိုင်ငံတွေက သူတို့ အယူအဆတွေကို သွတ်သွင်းဖို့ ကြိုးစားတာ စသဖြင့် ကုလသမဂ္ဂမှာ ပြန်လည် ချေပလေ့ ရှိပါတယ်။ လူ့ အခွင့်အရေးဟာ အနောက် နိုင်ငံတွေရဲ့ တန်ဖိုးတရပ် အနေနဲ့ သွတ်သွင်း နေတယ် ဆိုတဲ့ စွပ်စွဲချက် တွေကိုတော့ ဒါဟာ မှန်ကန်မှု မရှိဘူးလို့ ကက်သရင်း အက်ရ်ှတွန်က ပြောပါတယ်။

“EU ဥရောပသမဂ္ဂဟာ ဥရောပစံနှုန်း၊ တန်ဖိုးတွေကို တခြားနိုင်ငံတွေကို သွတ်သွင်းဖို့ ကြိုးစား နေတယ်လို့ ဝေဖန် စွပ်စွဲ ခံရတာတွေ ရှိပါတယ်။ ဒီစွပ်စွဲချက် တွေကို လုံးဝ ငြင်းဆန် ပယ်ချပါတယ်။ လွတ်လပ်စွာ ပြောဆိုခွင့်၊ လွတ်လပ်စွာ စုဝေးခွင့်၊ တရားမျှတမှုနဲ့ တန်းတူမှုတွေဟာ တကယ်တော့ ဥရောပ သားတွေ အတွက် အခွင့်အရေးတွေ မဟုတ်ပါဘူး။ ဒါဟာ တကမ္ဘာလုံး၊ လူသား အားလုံး ရသင့်ရထိုက်တဲ့ အခွင့်အရေး ဖြစ်ပါတယ်။ အာဖရိက၊ အာရှနဲ့ လက်တင် အမေရိကားက ပြည်သူလူထုတွေဟာ သူတို့ရဲ့ ကိုယ်ပိုင် အခွင့်အရေး တွေကို စွဲမက်မှု သိပ်မရှိလှဘူး ဆိုတဲ့ လိမ်လည်မှု ထောင်ချောက်ထဲကို ကျမတို့ ရောက်မသွားဖို့ အရေးကြီးပါတယ်။”

၁၆ ကြိမ်မြောက် လူ့အခွင့်အရေးကောင်စီ ညီလာခံကို မတ်လ ၂၅ ရက်နေ့အထိ ပြုလုပ် သွားမှာ ဖြစ်ပြီး နိုင်ငံ အကြီး အကဲတွေ အတော် များများလည်း ဂျနီဗာမှာ ရောက်ရှိ နေပါတယ်။ ညီလာခံ စချိန်မှာတော့ လစ်ဗျား အရေးနဲ့ အရှေ့အလယ်ပိုင်း လူထုအုံကြွမှု ကိစ္စတွေက ပိုပြီး နေရာယူ နေပါတယ်။ ပြီးခဲ့တဲ့ မြန်မာနိုင်ငံနဲ့ ပတ်သက်တဲ့ UPR အစည်းအဝေးက အကြံပြုချက် တွေကို အခု ညီလာခံကို တင်ပြကြမှာ ဖြစ်ပါတယ်။

မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး ကိုယ်စားလှယ် သောမတ်စ် အိုဟေး ကင်တားနား (Thomas Ojea Quintana) ကတော့ ဒီညီလာခံကို မြန်မာနိုင်ငံ ဆိုင်ရာ လူ့အခွင့်အရေး နောက်ဆုံး အခြေအနေ အစီရင်ခံ တင်ပြရမှာဖြစ်လို့ ညီလာခံ မတိုင်ခင် မြန်မာနိုင်ငံကို သွားရောက်ခွင့် သူတောင်းဆို တာကို မြန်မာ အာဏာပိုင်တွေ ဘက်က လက်မခံခဲ့ပါဘူး။

Ref: VOA News