ယနေ့စစ်တပ်... ဘာတွေဖြစ်နေသလဲ (၂၀)

စစ်တက္ကသိုလ်၏ အစဉ်အလာတို့သည် ကောင်းမွန်၏။ မြင့်မြတ်၏။

စစ်သားဟောင်းကြီး တဦး၏။ အဆိုဟု ပြောကြသော ...ငါ့သားများ စစ်ထဲဝင်ရင်လေ.. သူ့ကို ပြောလိုက် စမ်းပါကွာ... စစ်တပ်ဆိုတာ တကယ်တမ်းသာ လိုက်နာ ကျင့်ကြံမယ်ဆိုရင် တကယ့် ယောင်္ကျားကောင်း ယောင်္ကျားမြတ်တွေ ဖြစ်စေနိုင်တဲ့ အတတ်ပညာတွေကို သင်ကြားလေ့ကျင့် ပေးရာ ကျောင်းကြီးပေါ့... ဆိုသော စကားလေး တခွန်းသည် ယနေ့စစ်တပ်၏ နေရာ အတော်များများတွင် တွေ့နေရသော ၀ါဒဖြန့် ဆောင်ပုဒ်တခု ဖြစ်နေပေပြီ။

အဆိုပါ စစ်သားဟောင်းကြီး၏ စကားဟုဆိုသော ရည်ညွန်း စကားစုလေး၏ အဓိပ္ပါယ်မှာ အလွန်မှန်ပါ၏။ စစ်သားဖြစ်သော ကျနော် ထောက်ခံပါသည်။ မြန်မာစစ်တပ်တွင်း လွတ်လပ်ရေး ကြိုးပမ်းမှု ကာလမှ စတင် တည်ထောင်ကတည်းက မွန်မြတ်မှန်ကန်သည့် စိတ်ဓာတ် ခံယူချက်တို့ဖြင့် စတင် ဖွဲ့စည်းခဲ့ခြင်း ဖြစ်၏။ ထိုသို့ ရှိနှင့်ပြီးသော အစဉ်အလာကောင်းများ ကျင့်ထုံးများ၊ စည်းကမ်းများကို တကယ်တမ်းသာ လိုက်နာ ကျင့်ကြံ စောင့်ထိန်းလိုက်နာမည် ဆိုပါလျှင် အလွန်မှ စိတ်ဓာတ်ရေးရာရော ကိုယ်ခန္ဓာ သန်စွမ်း ကြံခိုင်မှု အရပါ ပြည့်ဝစေမည့် အခြေအနေများ စုစည်း ထားသော လူသား အဖွဲ့အစည်းကြီး ဖြစ်၏။ စနစ် ကျ န သော နည်းနာ၊ စည်းကမ်း၊ စောင့်ထိန်းမှု တို့ကို ကြပ်ကြပ်မတ်မတ် လေ့ကျင့် သင်ကြားပေးသော အဖွဲ့ အစည်း ဖြစ်၏။

သို့သော် တကယ်တမ်းသာ ဆိုသည့် တင်ကြိုနိမိတ်ဖတ် ပြောစမှတ်ပြုနိုင်သည့် စကားတလုံးကို ရှေ့တင် သုံးသပ်ထားသည်ကို ဂရုပြုသင့်ပေသည်။

တကယ်တမ်းသာ .. ဟူသည့် ရည်ညွန်းစကားသည် လွန်စွာမှ တာသွားလှ၏။ တကယ်တမ်း လိုက်နာ ကျင့်ကြံနိုင်သော စည်းကမ်း၊ လုပ်ထုံးလုပ်နည်း၊ ဥပဒေသများ ချမှတ်ဖွင့်ဆို ပြဌာန်း ထားပါလျှက် ယနေ့ ကျနော်တို့ တပ်မတော် ဘာကြောင့် နာမည်ပျက်၊ သမိုင်းနွံနစ်မည့် လက်နက် ကိုင်တပ်ဖွဲ့ဟု ကမ္ဘာတွင် ကျော်ဇောနေခဲ့ ပါသနည်း။ တကယ်တမ်း လုပ်သင့်လုပ်အပ်သော တာဝန်၊ ၀တ္တရား၊ လုပ်ထုံးလုပ်နည်းတို့ကို မလုပ်ဘဲ၊ မလုပ်သင့်သည့် အမျိုးသား သစ္စာဖောက်၊ ကိုယ်ကျိုးရှာ၊ အာဏာရူးသည့် ပုဆိန်ရိုး လုပ်ရပ်မျိုး အစဉ်အလာ ဆိုးများကိုသာ လုပ်ဆောင် နေခြင်းကြောင့် ဖြစ်သည်။

လုပ်သင့်သည်ကို မလုပ်၊ မလုပ်သင့်သည်များကို မိုက်ရူးရဲ ဆန်ဆန် လုပ်နေကြခြင်းကြောင့် နဂိုက နာမည်ကောင်း ရှိခဲ့သော မျိုးချစ် တပ်မတော်သည် ကိုယ့်ပြည်သူ ပြည်သား အများကပင်၊ အော့နှလုံးနာ၊ ရွံရှာ စက်ဆုပ်သော၊ မျိုးဖျက်လူတစ်စု၏ နောက်လိုက် လက်ကိုင်ဒုတ်၊ အကြမ်းဖက် လက်နက်ကိုင် အဖွဲ့ အစည်း အဖြစ် ထင်မြင်သွားကြခြင်း ဖြစ်ပါသည်။

ကျနော်တို့ လူငယ်များ ရင်ထုမနာ ကြေကွဲရသည်မှာ ဤအကြောင်းကြောင့် ဖြစ်သည်။ တိုင်းပြည်တပြည် အတွက် အင်မတန် အရေးကြီးလှသော အဖွဲ့အစည်းကြီးအတွင်း စိတ်ဓါတ်ရေးရာ အရ ချို့ယွင်းပျက်စီး နေခြင်း၏ အကျိုးဆက်အား ချင့်မျှော်တွေးဆ၍ အလွန်စိတ်မကောင်း ဖြစ်မိပါ၏။

ထို့ကြောင့် အချိန်မနှောင်းသေးဟု ယူဆကာ ပြုပြင်ပြောင်းလဲမှုများ၊ အရေးယူ ဆောင်ရွက်မှုများ၊ အမှန် တရားကို ဖေါ်ညွန်သော ဥပဒေပြုမှုများ ပေါ်ထွန်း လာစေလိုသောကြောင့် မျိုးချစ် စစ်အရာရှိငယ် တဦးအနေဖြင့် တတ်စွမ်းသမျှ ဆောင်ရွက်နေခြင်း ဖြစ်ပါသည်။

တရားမျှတ၊ သမာသမတ်ကျကျ နေထိုင်ကျင့်ကြံမှုကို ဓမ္မ၊ မှန်ကန်ဖြောင့်မတ် မျှတခြင်းဟု ဆို၏။ သို့သော် တရားမျှတမှုမရှိ၊ နိုင်လိုမင်းထက်၊ နှိပ်စက်ကလူ၊ တဖက်သက် အနိုင်ကျင့် မတရား ရက်စက်သော အခါမျိုးတွင် အဓမ္မတို့ လွှမ်းမိုးသည်... တရားမျှတမှု ကင်းမဲ့သည် ဟု ဆိုကြ၏..။ မင်္ဂလာရှိသော နံနက်ခင်း တွင် ကျက်သရေမဲ့သော အခင်းတခု ဖြစ်ပွားခဲ့ပါလျှင် အမင်္ဂလာ ဖြစ်ပြီဟု ဆိုကြ၏။ ကျနော်တို့ တပ်မတော် တွင်းတွင်လည်း ထိုနည်းတူပါပင်၊ တပ်မတော်ကို တည်ထောက်သူ မျိုးချစ်အာဇာနည် ကြီးများက စစ်သည်တော်ကြီးများ ချမှတ် လမ်းညွန်ခဲ့သည့် မွန်မြတ်သော အစဉ်အလာများ၊ လုပ်ထုံး လုပ်နည်းများ၊ စိတ်ဓာတ် ခံယူချက်များ လက်ဆင့်ကမ်း ပေးထားခဲ့ပြီ ဖြစ်၏။

ယောင်္ကျားကောင်းတို့ တတ်အပ်သော အတတ်ပညာ၊ စိတ်ဓာတ်၊ အတွေးအခေါ်၊ မျိုးချစ်စိတ်၊ အမျိုး သားရေး တာဝန်များ၊ နိုင်ငံကြီးများ ပီသစေမည့် လူကြီးလူကောင်းတို့ အတွေး အခေါ်များကို စနစ်တကျ လေ့ကျင့် သင်ကြားပေးခြင်းများ ရှိခဲ့ပါ၏။ သို့သော် ယနေ့ နယက (ခေါ်) စစ်အာဏာသိမ်း အဓမ္မ ဖိနှိပ် အုပ်ချုပ်သော စစ်အုပ်ချုပ်မှု စနစ်အောက်တွင် တပ်မတော်၏ အစဉ်အလာကောင်းတို့သည် ပပျောက် ကုန်၏။ ငါတို့သည် တိုင်းပြည်နှင့် လူမျိုးကို ချစ်၍ တပ်မတော်တွင်း ၀င်ခဲ့ပါသည်ဟု စစ်အာဏာပိုင် ဗိုလ်ချုပ်ကြီးများ ကြားလောက်သော နေရာတွင် အော်ရဲ၊ ပြောရဲသူ တယောက်မှ မရှိတော့ပေ။

ရဲရင့်သော မျိုးချစ်စိတ်၊ ခိုင်မာသော အမျိုးသားရေး ခံယူချက် သန့်စင်သည့် သစ္စာစောင့်သိမှု စံနှုန်း များသည် မသိလိုက် မသိဘာသာနှင့် ဖယ်ရှားခံလိုက်ရကုန်၏။ တရားဝင် မဟုတ်သော အမိန့်များ။ တားမြစ် မှုများကြောင့် ပယ်ဖျက်ခံလိုက်ရ ကုန်၏။ ယနေ့လက်တွေ့ပင်.... ဥပမာ ကြည့်ပါ။ မွန်မြတ်သော အာဇာနည် သူရဲကောင်းတို့၏ စံနမူနာကို ယူမည်စိုးသောကြောင့် တပ်မတော်တွင်းတွင် ဗိုလ်ချုပ်အောင်ဆန်း အပါအ၀င် သမိုင်းဝင်မျိုးချစ် အာဇာနည်ကြီးများ၏ အခန်းကဏ္ဍကို နှိမ့်ချ ဖျောက်ဖျက် ခံထားရသည်မှာ အထင် အရှားပင်....။

ဗိုလ်ချုပ်အောင်ဆန်း ကဲ့သို့သော အမျိုးသား ခေါင်းဆောင်များ၏ မွန်မြတ်သန့်စင်သော သမိုင်းကို ဖျောက်ဖျက်လိုက်သည် ဆို၍၊ သူတို့ထက် သာလွန်သည့် အရည်အချင်း၊ စိတ်ဓာတ်၊ ခံယူချက်၊ အတွေး အခေါ်၊ ပေးဆပ်စွန့်လွှတ်မှု၊ ခေါင်းဆောင်ကောင်း၊ စံနမူနာကို ပြသနိုင်သူ စစ်ခေါင်းဆောင်သစ်တို့ ပေါ်ထွက် နေလျှင် ကိစ္စမရှိ။

ယခုတော့.... လူလွန်မသား တကိုယ်ကောင်းဝါဒရှင် အာဏာရူးတို့က သူတို့ကို သူတို့ တိုင်းပြည် ခေါင်းဆောင်ဟု ကြော်ငြာပြီး ဗြောင်ဗြောင်တင်းတင်း ကိုယ်ကျိုးရှာနေ၏။ အာဏာနှင့် ပြည်သူကို အနိုင်ကျင့် နေ၏။ သူ့ကိုယ်သူ ဘုန်းတန်ခိုးရှင်ကြီး၊ ဘယ်တော့မှ မမှားသော အုပ်ချုပ်သူ နိုင်ငံ့အကြီး အကဲကြီး၊ ပဒေဿရာဇ် ဘုရင်ကြီးဟု တွင်တွင် ၀ါဒဖြန့်နေ၏။

ကျနော်တို့ လူငယ်တွေ မည်သူ့ကို စံတင်နမူနာ ယူနိုင်ပါမည်နည်း။
ထိုအခါ နဂိုရှိပြီး တိုင်းချစ်ပြည်ချစ် စိတ်ဓာတ်ရေးရာ အမွေအနှစ်ကောင်းတို့သည် စံလွဲကုန်၏။ ကောင်းမြတ် မှန်ကန်သော သမိုင်းတို့လည်း ငုပ်လျိုးလွဲလိမ် ခံခဲ့ရသည်ကို ကြည့်၍ မိမိတို့ လူကောင်း သူကောင်း ဖြစ်အောင် ကြိုးစား၍ကော သမိုင်းတွင် လေးစားဂုဏ်ယူ နိုင်ပါမည်လား ဟူသည့် အတွေးတိမ်တိမ် တို့ကြောင့် လူများစွာ၊ စစ်သားများစွာ၊ လူငယ်များစွာတို့သည် အများသောက်သော မိုးခါးရေကို လိုက်သောက် သွားကြတော့သည်။

ဤသို့သော မျိုးဆက်သစ် လူငယ်တွေအကြား ဘယ်ဟာ ဘယ်သူကို ဆရာတင်၍၊ ဘာကို စံနမူနာပြု လေးစားရမှန်း မသိအောင် ထားခဲ့ ရသည့်ကြားထဲ နိုင်ငံ့သမိုင်း၊ စစ်သမိုင်း တို့သည်လည်း ယနေ့အာဏာပိုင် တို့၏ ၀ါဒဖြန့် သိမ်းသွင်းရာ လိုရာဆွဲ ၀တ္ထုတွေ ဖြစ်ကုန်၏။

ကျနော်တို့ ဗိုလ်လောင်း ဘ၀က စာပေနှင့် လေ့ကျင့်ရေး အပိုင်းများ သင်ကြားပေးခဲ့သော အရာရှိကြီး များသည် ယနေ့တပ်မတော်တွင် အင်မတန်ရှားပါးနေပြီ ဖြစ်သော မျိုးချစ် စစ်သားကြီးများ စာရင်းတွင် ထည့်သွင်းအပ်သည့် ဆရာကောင်း၊ ခေါင်းဆောင်ကောင်းများ ဖြစ်ကြပါသည်။ အဓိကအားဖြင့် စစ် တက္ကသိုလ် စာပေဌာနများမှ နည်းပြအရာရှိကြီးများကို ဆိုလိုပါသည်။ (လေ့ကျင့်ရေးဆိုဒ်မှ တကိုယ်ကောင်း ဖေါ်လံဖား အရာရှိအချို့ကို မဆိုလိုပါ။)

စစ်တက္ကသိုလ်တွင် စာပေများ သင်ကြား လေ့ကျင့်ပေးရင်းဖြင့် မြန်မာ့သမိုင်းအတွက် အရေးပါသောအခန်းမှ စွန့်လွတ် ပေးဆပ်သွားသူ မျိုးချစ်ကြီးများ၊ ကမ္ဘာ့သမိုင်းများမှ သမိုင်းဝင် ခေါင်းဆောင်ကြီးများ၏ မြင့်မား မွန်မြတ်လှသော စိတ်ဓာတ်ခံယူချက် အတွေးအခေါ်များကို သင်ရိုးညွန်းတမ်းတွင် မပါသည့်တိုင်အောင် ကျနော်တို့လို နောင်တခေတ်၏ ခေါင်းဆောင်ဖြစ်လာမည့် လူငယ်များ သိအပ်သည်ဟု ဆိုကာ သင်ကြား ပြသပေး၏။ ပဲ့ပြင်ညွန်ပြ ဆိုဆုံးမ၏။ အဘယ်ကြောင့် ဆိုသော် ကျနော်တို့ စစ်တက္ကသိုလ် တက်ရောက် နေချိန် ၁၉၉၀ ကျော် ကာလများတွင် စစ်တပ်တွင်းနှင့် အုပ်ချုပ်ရေး အာဏာပိုင် အဖွဲ့အစည်း အဆင့်ဆင့် အတွင်း ကိုယ်ကျင့် သိက္ခာပျက်ပြားသော ရောဂါဆိုးကြီးနှင့် အမျိုးသားရေး စိတ်ဓာတ် ခြစား၊ ၀ဲစားသော ရောဂါကြီး နှစ်ခုတို့က ကျယ်ကျယ်ပြန့်ပြန့် ဖြစ်ပွားနေပြီ ဖြစ်သောကြောင့် ပင်။

စစ်ဗိုလ်မှူးကြီးများဖြစ်ကြသော နည်းပြဆရာတို့သည် စစ်တပ်အကြောင်း ဘာဆိုဘာမှ မသိသေးသည့် ကျနော်တို့ ဗိုလ်လောင်းများအား ပြင်ပလောက ရောက်သွားလျှင် ကြုံလာ ရင်ဆိုင်လာ ရနိုင်သည့် အခြေအနေတို့ကို အရိပ်အမွက်မျှ ပြောပြတတ်၏။ ဆောင်ရန်၊ ရှောင်ရန်၊ စောင့်စည်းရန်၊ ထိန်းသိမ်းရန်၊ သားကောင်း အာဇာနည်အဖြစ် နေထိုင် ကျင့်ကြံနိုင်ရန် လမ်းပြပေးလိုက်၏။ အရှိကို အရှိတိုင်း သိအောင် လည်း ကြိုးစားရန် သင်ပြ၏။ သမိုင်း၏ ဖြစ်စဉ်များမှ အမှန်တရားကို လေ့လာ၊ မိမိတို့နိုင်ငံ၏ လက်တွေ့ ဖြစ်စဉ်များမှ အဖြေထုတ်၊ သုံးသပ်၊ တိုင်းပြည်အနာဂတ် အတွက် ကောင်းရာမွန်ရာ ဖြစ်စေမည့် လုပ်ရပ်၊ အတွေးအခေါ်များ ကိုယ့်ဘာသာ တွေးခေါ်လုပ်ကိုင် တတ်ဖို့ အရေးကြီးကြောင်း သင်ကြားဆိုဆုံးမခဲ့၏။

ထိုသို့ မွန်မြတ်မှန်ကန် အမြင်ကျယ်စွာ သွန်သင် ပဲ့ပြင်ပေးခဲ့သည့် ဆရာများ ကျေးဇူးကြောင့် ကျနော်တို့ ယနေ့ တိုင်းပြည်ကို လမ်းမှားသို့ ဆွဲချနေသော စစ်အာဏာရှင် အုပ်ချုပ်ရေးစနစ်ကို ပြတ်ပြတ်သားသား ဆန့်ကျင် ဖီဆန်လာကြသည်ကို တွေ့ရှိရ၏။


အဘယ်ကြောင့်ဆိုသော် စစ်တက္ကသိုလ်တွင် သင်ကြားရသော မျိုးချစ် နည်းပြ အရာရှိကြီးများ သည် အခြားသော ဗိုလ်သင်တန်း ကျောင်းများတွင်လည်း ဤသို့သော မျိုးချစ်စိတ် အရင်းခံသည့် နည်းနာ စိတ်ဓာတ် ခံယူချက်များ၊ အတွေးအခေါ်များ မွေးမြူတတ်စေရန် သွားရောက်သင်ကြား ပေးကြသောကြောင့် ဖြစ်၏။ သို့သော် ပေးကားပေး၏မရ၊ ကျွေးကား ကျွေး၏ မ၀ဆိုသလိုပါပင်...။ လူတိုင်း စစ်ဗိုလ်တိုင်းတော့ အမှန်တရားဘက် ရဲရဲ ရပ်တည်ခြင်းမျိုး မလုပ်နိုင်ရှာသေးပေ။

အချို့သူတို့သည် လူစင်စစ်မှ လူနှင့် အင်မတန်ရင်းနှီးသော လေးဘက်သွား သတ္တ၀ါသာသာ အတွေးအခေါ် ခံယူချက်များသို့ ပြောင်းလဲသွားသည်ကို ၀မ်းနည်းစဖွယ် တွေ့ရ၏။ သူတို့သည် သူတို့သခင်အပေါ် သစ္စာ ရှိယုံ၊ သခင်အလိုကျ အမြီးထောင်ပြ။ ဟောင်ပြ ငေါက်ငန်းပြ နေယုံဖြင့် သူတို့ဘ၀ ပြည့်စုံ တာဝန်ကျေပြီဟု ယူဆ သူတွေပင် ရှိခဲ့ပါ၏။

ထို့ကြောင့် ဤစာပိုဒ် အစပိုင်းတွေ ကျနော်ဆိုခဲ့သည့်အတိုင်း တပ်မတော်သည် တကယ်တမ်းသာ လိုက်နာ ကျင့်ကြံမည် ဆိုလျှင် ယောင်္ကျားကောင်း ယောင်္ကျားမြတ်တွေ ဖြစ်စေနိုင်သည့် အလေ့ အကျင့်များကို သင်ကြား လေ့ကျင့်ပေးရာ ကျောင်းကြီးဖြစ်သည် ဆိုသည့် စကားကို ယနေ့ မျိုးချစ်စစ်သား ပြည်သူ ပြည်သားတို့ စဉ်းစားမျှော်မြင် သုံးသပ်စေချင်၏။ ကိုယ်တိုင် လိုက်နာ ကျင့်သုံးခံယူ ဆောက်တည်စေချင်၏။
သင်ပေးခြင်းကို ရ၏။ လေ့ကျင့်ပေးခြင်းကို ခံယူ မှတ်သားနိုင်၏။ အမှန်တကယ်လည်း ကောင်းမြတ် သင့်လျှော်၏၊ တိုင်းပြည်အတွက်လည်း အဖိုးတန် သားကောင်းရတနာတွေ ဖြစ်စေနိုင်၏။ သို့သော် ဘာကြောင့် စစ်သားတိုင်းသည် မျိုးချစ်စစ်သား၊ ပြည်သူ့သားတွေ ဖြစ်မလာပါသနည်း၊ တကယ်တမ်း ဘာကြောင့် ခံယူချက် ကောင်းတို့ကို မကျင့်သုံး နိုင်ပါသနည်း။

လူငယ်တယောက် အမြင်ကို တင်ပြလိုပါသည်။
ယနေ့ စစ်အာဏာသိမ်း စစ်ဗိုလ်ချုပ်ကြီး များသည် သူတို့၏ ဖျက်မရတော့သော မှားယွင်းမှု လုပ်ရပ်များ အတွက် မကြာမီ သမိုင်းတွင် နွံနစ်တော့မည်ကို သိ၏။ ကျဆုံးခန်းကို ရောက်တော့မည်ကို သိ၏။ သို့သော်လည်း လူသက်တမ်းအရ နှစ်အနည်းငယ်သာ အသက်ရှင် ရပ်တည်နိုင်တော့မည့် သူတို့၏ နောက်ဆုံး အချိန်တွေအတွင်း အလွန်တရာ မက်မောဖွယ် ကောင်းလှသည့် အာဏာရှင် အရသာကို မစွန့်လွှတ် နိုင်တော့သောကြောင့် မီးစာကုန် ဆီခန်းသည်အထိ မိုက်တွင်းနက် ဇာတ်ခင်းသွားရန် ကြံစည်ပြီး ကြလေပြီ ဖြစ်၏။

သို့အတွက် တပ်မတော်ကိုလည်း သူတို့၏ အာဏာ တည်မြဲရေးအတွက် အသုံးချ ဒေါက်တိုင်တခု၊ ခိုင်းဖတ် ကျေးကျွန် အဖွဲ့အစည်းတခုအဖြစ် ရသရွေ့ အသုံးချနေအုန်းမည်သာ ဖြစ်၏။ သူတို့သားချင်း ဆွေမျိုးတစု ကောင်းစားရေး တခုတည်းက လွဲ၍ တိုင်းပြည်မျက်နှာ၊ ပြည်သူ့ မျက်နှာ၊ နောင်လာနောက်သား မျက်နှာ စသည်တို့ကိုလည်း သူတို့ကြည့်တော့သည် မဟုတ်။ ရသရွေ့အမြတ်ထုတ် ဂုတ်သွေးစုပ်ကာ ပြည်သူ လူထုကြီးမှ မကျေနပ်မှု အဟုန် အမြင့်ဆုံးဖြစ်လာ၍ အုံကြွလာချိန်တွင် ထွက်ပြေးခိုလှုံ နေထိုင်ဖို့ပင် (အရှေ့တောင် အာရှနိုင်ငံ တနိုင်ငံအတွင်း ၎င်းတို့ မိသားစုပိုင် ဂေဟာကြီးများ ဆောက်လုပ်ထားပြီး) ပြင်ဆင်ပြီး ဖြစ်ပေသည်။

ဤအတိုင်း သူခိုးဓါးပြတို့ ဖိစီးနှိပ်စက် ကိုယ်ကျိုးရှာ နေကြသည်ကို ပြည်သူတို့ တပ်မတော်သားတို့ လက်ပိုက်ကြည့် နေကြမည်လား။ တရားမျှတမှု ဥပဒေ စိုးမိုးမှုတို့ ရရှိအောင်.... တရားဥပဒေ ဆိုသည့် စည်းကမ်းပြည့်ဝ တည်ငြိမ်သည့် စည်းကမ်းများ ပေါ်ထွက်လာအောင် မလုပ်ဘဲ ကြောက်တယ်.. ကြောက်တယ်… ပြောပြီး နောက်ကွယ် ဝေးဝေးမှာ ဖယ်ပုန်း ခြေရာဖျောက် နေကြမည်လား။

ကြောက်သူ များလေလေ၊ စစ်အာဏာသိမ်း ဓါးမြကြီးများ အတွက် မတရား ဓါးပြတိုက် လုယက်ရန် အချိန်များများ ပိုရလေ ဖြစ်ကြောင်း ကျနော်တို့ စစ်တပ်တွင်းမှ မျိုးချစ်စစ်သည်တို့ သိစေချင် လှပါ၏။ လက်ရှိ စစ်တပ်တွင်း အလုပ်လုပ် နေကြသော စစ်သည် အဆင့်အတန်း အားလုံးတို့သည် တကယ်တမ်းသာ တိုင်းပြည်ကို ချစ်ခင်မြတ်နိုး၍ စစ်တပ်တွင်း ၀င်ခဲ့ပါသည်ဆိုလျှင် ယနေ့ခေတ်ပျက် ခေတ်ကျပ် အခါသမယ ကို လက်ပိုက်ကြည့်နေ၍ မသင့်တော့ပါ။

စစ်တက္ကသိုလ်ဆင်း စစ်အရာရှိ ကြီးငယ်များ၊ အခြားသော ဗိုလ်သင်တန်း အသီးသီးမှ ဆင်းသော ညီနောင် အရာရှိများ၊ မျိုးချစ်စစ်သည်များ အားလုံးတို့ ပြည်သူ့ သားကောင်းများအဖြစ် ၀င့်ဝင့် ထယ်ထယ် နေလိုပါသည်ဆိုလျှင်.. ပြည်သူ့မျက်နှာကို ကြည့်တတ်မှ ပြည်သူ့ အလိုကျ တာဝန်ထမ်းပါမှ ရပါမည်။....

ပြည်သူ့ မျက်နှာကိုမကြည့် ကိုယ့်ဘို့သာ ကြည့်ပြီး အာဏာ၊ ရာထူး၊ ငွေကြေး၊ အခွင့်အရေး၊ ပေးစွမ်း နိုင်သော အာဏာရှင် သူခိုးဓါးပြများ အလိုကျသာ ဖေါ်လံဖား ပုဆိန်ရိုး လုပ်နေကြမည် ဆိုလျှင် ကျနော်တို့ တိုင်းပြည်သည် များမကြာသော ကာလအတွင်း ကမ္ဘာ့မြေပုံပေါ်မှ ပျောက်ကွယ် သွားလိမ့်မည် ဖြစ်ကြောင်း စေတနာဖြင့် အကြံပေး တင်ပြလိုက်ပါရစေ။

ထို့ကြောင့် တပ်မတော်တွင်း ပြဌာန်းထားသော စည်းကမ်း နည်းဥပဒေများကို အတိအကျ လိုက်နာ စောင့်ထိမ်းနိုင်အောင် ကြိုးစားပါ။ စစ်ဗိုလ်ချုပ်ကြီးများက ဖောက်ဖျက်၍ ဒို့လည်း ကျူးလွန် ဖောက်ဖျက်ရ ပါသည် ဆို၍ တိုင်းပြည် လက်ရှိဘ၀က လွတ်မည် ကျွတ်မည် မဟုတ်ကြောင်း သတိပြုကြပါ။

တကယ်တမ်းသာ စည်းမျဉ်း စည်းကမ်းများကို စစ်သည်အဆင့်အတန်း အားလုံးအတိအကျ လိုက်နာပြီး ထားရှိမွေးမြူ သင့်သည့် မျိုးချစ်ပြည်ချစ်၊ တိုင်းချစ်စိတ်ဓာတ်ကို ကိုယ်စီ လေးလေးနက်နက် မွေးမြူ ကျင့်သုံး လာကြပြီဆိုလျှင် စစ်အာဏာရှင် ဓားမြဗိုလ်ချုပ်ကြီးများ ဤမြေ၊ ဤဒေသတွင် ဆက်လက်နေထိုင် မင်းမူ ဗိုလ်ကျ အနိုင်ကျင့်ရန် ဘယ်နည်းနှင့်မျှ ဖြစ်နိုင်တော့မည် မဟုတ်ကြောင်း ပြည်ချစ်သော စစ်သားတိုင်း သိစေလို၊ တွေးတော စေလိုလှပါသည်။

(စစ်တက္ကသိုလ်တွင်း အတွေ့အကြုံများကို ဆက်လက်ရေးသားနိုင်ရန် ကြိုးပမ်းပါအုံးမည်။ လောလော ဆယ်တွင် မိမိ၏ ရှားပါးလှသော ကိုယ်ပိုင်အချိန်တွင်းမှ ကြိုးစားအချိန်လု ရေးသားရ ပါသောကြောင့် အရေးအသား ချောမွေ့ ပြေပြစ်မှု အားနည်းနေသည်ကို စာဖတ်သူများအနေဖြင့် နားလည် ခွင့်လွှတ် ပေးစေလိုပါသည်)

ဆက်လက်ဖေါ်ပြပါမည်။
ဗိုလ်ကြီးနေသူ (အငြိမ်းစား တပ်မတော် အရာရှိတစ်ဦး)

Ref: ပြည်သူ့တပ်မတော်