ရန်ကုန်မှာမသင်္ကာစရာ ဖောက်ခွဲရေးပစ္စည်းတွေ့

မသင်းသီရိ
တနင်္ဂနွေ, 03 ဧပြီ 2011

ဒီကနေ့ ရန်ကုန်မြို့လယ် လူစည်ကားရာ ဆူးလေဘုရားအနီး ဘတ်စ်ကား မှတ်တိုင် တခုမှာ မသင်္ကာဖွယ်ရာ အထုပ် တခုထဲကနေ မီးခိုးတွေ ထွက်လာပြီး ပေါက်ကွဲမှု ဖြစ်မှာကို စိုးရိမ်ရတဲ့ အတွက် ရဲတွေက သိမ်းဆည်း သွားပါတယ်။ ရန်ကုန်တိုင်း ကျောက်တံတား မြို့နယ်ထဲက မြို့တော်ခန်းမ အနီးမှာ ဖြစ်ပွားခဲ့တဲ့ ဒီ အဖြစ်အပျက်ကြောင့် လုံခြုံရေးတွေ တိုးမြှင့် ချထား လိုက်ရတယ် လို့လည်း ရဲတပ်ဖွဲ့က ပြောပါတယ်။ ဒီအခြေအနေတွေနဲ့ ပတ်သက်လို့ အပြည့်အစုံကို ဆက်သွယ် စုံစမ်းထားတဲ့ မသင်းသီရိက တင်ပြ ပေးထားပါတယ်။

ရန်ကုန်မြို့တော်ခန်းမအနား ဆူးလေ ဘုရား လမ်းမကြီးပေါ်က လူစည်ကားတဲ့ ဘတ်စ်ကားမှတ်တိုင် အနားက သစ်ပင် အောက်မှာ နေ့လယ် ၁ နာရီလောက်က ဗုံးပါတယ်လို့ ယူဆရတဲ့ အိတ်တလုံး တွေ့ခဲ့တာပါ။ သိပ်မပြင်းထန်တဲ့ ပေါက်ကွဲသံနဲ့ အတူ အိတ်ထဲကနေ မီးခိုးတွေ ထွက်လာတာမို့ အနားကလူတွေ ကြောက်လန့်တကြား ဖြစ်ခဲ့ပါတယ်။ ဒါပေမဲ့ ဒီအိတ်ကို မကြာခင်မှာပဲ ကျောက်တံတား ရဲစခန်းက တာဝန်ရှိသူတွေ လာသိမ်း သွားတယ်လို့ အဲဒီ ဘတ်စ်ကားမှတ်တိုင် အနားမှာ ရှိနေတဲ့ မျက်မြင် သက်သေ တဦးက ပြောပါတယ်။

“ကပ်စတယ်လ် အင်တာနက် ကဖေးဆိုင်ရှေ့မှာ၊ လမ်းလယ်ကျွန်းက ရေတမာပင် အောက်မှာ၊ ၄၃ ကားမှတ်တိုင်၊ ၁၂၅ တို့ ဘာတို့ အဲဒီလို အစုံရှိတဲ့ နေရာပေါ့။ လူစုံတဲ့ နေရာပေါ့၊ အသံတော့ အကျယ်ကြီး မပေါက်လိုက်ဘူး။ ပုံမှန် နည်းနည်းလောက်ပဲ ပေါက်သွားတယ်။ မီးခြစ်ပေါက်တဲ့ ပုံစံမျိုးလိုပေါ့၊ အဲဒီလောက်လေးပဲ အသံက ထွက်သွားတယ်။ နောက် အငွေ့လေးတွေ ထွက်လာတော့ ဘေးကလူတွေကလည်း ရှောင်လိုက် ကြတာပေ့ါ။”

ဖြစ်ဖြစ်ချင်း အနားမှာ သံဆူးကြိုးတွေချပြီး လမ်းခဏ ပိတ်ခဲ့ပေမဲ့ အခုညနေတော့ ပုံမှန်အတိုင်း သွားလာနေပြီ ဖြစ်ပါတယ်။

“ဖြစ်ဖြစ်ချင်းတော့ ရဲတွေရော တော်တော် ရှုပ်သွားတယ်။ လောလောဆယ်တော့ ဖယ်လိုက်ပါပြီခင်ဗျ။ ပေါက်ကွဲပြီး ထွက်လာတဲ့ အရင် လူတွေကတော့ အခုချိန်ထိ ရှိပါသေးတယ်။ လူတွေကတော့ ပုံမှန် သွားနေကြပါပြီ။ အဲဒီ နေရာလေးမှာပဲ တဲလေးတွေ ထိုးပြီးတော့ တချို့တော့ ကျန်သေးတယ်၊ သန့်ရှင်းရေးတွေလည်း လုပ်ထားပါတယ်။”

အခင်းဖြစ်ခဲ့တဲ့ နေရာအနီးက မျက်မြင်သက်သေတဦး ပြောပြခဲ့တာ ဖြစ်ပါတယ်။

ဗွီအိုအေ မြန်မာပိုင်းက တာဝန်ခံ နယ်မြေ ကျောက်တံတား ရဲစခန်းကို ဖုန်းဆက်သွယ် မေးမြန်းခဲ့ပေမဲ့ ပြန်လည် ဖြေကြားခြင်း မရှိပါဘူး။ ဒါပေမဲ့ ပန်းဘဲတန်း ရဲစခန်းက တာဝန်ရှိ ဒု-ရဲအုပ်တဦးကတော့ မီးခိုးတွေ ထွက်နေပြီး အထဲမှာ ဗုံးပါတယ်လို့ ထင်ရတဲ့ အိတ်တလုံးကို သိမ်းဆည်း ထားတယ်ဆိုတဲ့ အကြောင်းနဲ့ ဒီအခြေ အနေတွေကြောင့် ရန်ကုန်မှာ လုံခြုံရေး တိုးမြှင့် ထားတယ်လို့ ပြောပါတယ်။

“ဆူးလေဘုရားနဲ့ မြို့တော်ခန်းမကြားက ပလက်ဖောင်းပေါ်ကလို့ ပြောတယ်။ ပေါက်ကွဲမသွားဘူး။ တနာရီလောက် ကလို့ ပြောတယ်။ ဗုံး ဆိုပြီးတော့ ပြောနေကြတာပဲ။ သူတို့က တပ်တာ ပြုတာတွေ မမှန်တဲ့ အတွက်ကြောင့် ဗုံးက ထမကွဲဘဲနဲ့ မီးတောက်လေးတွေ ထလောင်တယ်လို့ ပြောတယ်။ ကျနော်တို့လည်း သေချာမသိဘူး၊ ကျောက်တံတား မေးကြည့်မှ သိမှာ။ ဗုံးနဲ့တူတဲ့ ပုံစံမျိုးလို့တော့ ပြောတာပဲ။ တွေ့တယ်ဆိုပြီး ပြောလို့သာ ကျနော်တို့ ဒီမှာ လုံခြုံရေးတွေ အပြည့်ချနေတာ။”

ပန်းဘဲတန်း ရဲစခန်းက တာဝန်ရှိသူတဦး ဖြေကြားခဲ့တာ ဖြစ်ပါတယ်။

တခါ ပြီးခဲ့တဲ့ ဖေဖော်ဝါရီလ ၂၇ ရက်တုန်းကလည်း အင်းစိန်မြို့ ကမ်းနားအလယ်မှာရှိတဲ့ အောင်ဇေယျ တံတား အနီးမှာ ဗုံးပေါက်ကွဲမှု ဖြစ်ခဲ့တာကြောင့် ထိခိုက် ဒဏ်ရာရမှုတွေ ရှိခဲ့ပါတယ်။ မနှစ် ဧပြီလ သင်္ကြန်တွင်းတုန်းကလည်း မင်္ဂလာ တောင်ညွန့်မြို့နယ်က X2O ရေကစား မဏ္ဍပ်မှာ ဗုံးပေါက်ကွဲမှု ဖြစ်ခဲ့တာကြောင့် အခု သင်္ကြန်ကာလ မရောက်ခင် ရန်ကုန်မြို့ အတွင်းမှာ လုံခြုံရေးတွေ တင်းကျပ်တာ၊ တိုးမြှင့် စောင့်ကြည့်တာတွေလည်း ရှိနေတာပါ။

နေပြည်တော် အပါအ၀င် ရန်ကုန်၊ မန္တလေးနဲ့ တခြားမြို့ကြီးတွေရဲ့ ရေကစား မဏ္ဍပ်ကြီးတွေမှာ လုံခြုံရေး ၀န်ထမ်းတွေ ထားရှိဖို့နဲ့ CCTV စောင့်ကြည့် ကင်မရာတွေ တပ်ရဖို့ အပါအ၀င် အရေးပေါ် မိုင်းရှာ ကိရိယာတွေ ရှိပါမှ သင်္ကြန်မဏ္ဍပ်တွေ ဆောက်ခွင့် ပေးမယ်လို့ သက်ဆိုင်ရာ လုံခြုံရေး ဌာနတွေကလည်း စာ ထုတ်ပြန် ထားပါတယ်။

Ref: VOA News