ဗိုလ်ကြီးဟောင်း နေမျိုးဇင် ဖမ်းဆီးခံရမှု NLD ကူညီမည်

နရီလင်းလက်
Thursday, 07 April 2011

ဖမ်းဆီးထိန်းသိမ်းခံရသည့် ဗိုလ်ကြီးဟောင်း ကိုနေမျိုးဇင်အား မိသားစုနှင့်တွေ့ဆုံခွင့် ရရှိရန် တရားဥပဒေ လမ်းကြောင်း အရ အမျိုးသား ဒီမိုကရေစီ အဖွဲ့ချုပ် (NLD) ဥပဒေပြု အထောက်အကူပြု အဖွဲ့မှ ကူညီသွားမည်ဟု ရှေ့နေ ဦးအောင်သိန်းက ပြောလိုက်သည်။

NLD လူငယ်များ ဖွဲ့စည်းထားသည့် သွေးကူညီပေးရေး အဖွဲ့တွင် လိုက်လံ ကူညီပေးနေသည့် ကိုနေမျိုးဇင်ကို ရဲအထူး သတင်း တပ်ဖွဲ့ (SB) မှ မေးမြန်းဆွေးနွေး စရာများ ရှိသည်ဟု ဆိုကာ ခေါ်ဆောင်သွားသည်မှာ ၆ ရက်မြောက် ပြည့်ပြီဟု သိရသည်။

ယခု ဖမ်းဆီးမှုသည် အစိုးရသစ်ဖွဲ့စည်းပြီးချိန်၌ ပထမဆုံး ဖမ်းဆီးမှု ဖြစ်သည်။

“မိသားစုက စိတ်ပူပြီး ဘာလုပ်ရမလဲဆိုတာ အကြံတောင်းတာနဲ့ ကျနော်တို့ဘက်ကနေ အာဏာပိုင် တွေဆီ ကိုနေမျိုးဇင်ကို မိသားစုနဲ့ တွေ့ဆုံခွင့်ပေးဖို့ စာတင်ဆိုပြီး ဥပဒေကြောင်း အရ အကြံပေးထားတယ်။ ဒီအတွက်လည်း ဒီနေ့ ဒါမှမဟုတ် မနက်ဖြန် နောက်ဆုံး ထားပြီးတော့ ရန်ကုန်တိုင်း ရဲသတင်းတပ်ဖွဲ့မှူး ရုံးရယ်၊ နေပြည်တော် ရဲသတင်းတပ်ဖွဲ့ မှူးရုံးရယ်ကို လိပ်မူပြီး စာတင်မယ်။ ရုံးလက်ခံ တစောင် ယူထားမယ်”ဟု ရှေ့နေ ဦးအောင်သိန်းက ဧရာဝတီကို ပြောသည်။

သူက ဆက်၍“မေးမြန်းစရာရှိတယ်ဆိုပြီး ခေါ်သွားတာ ၂၄ နာရီ ကျော်နေပြီဆိုတော့ မိသားစုကို တွေ့ခွင့် ပေးဖို့ စာတင်တာကို ပထမဆုံး လုပ်ခိုင်းထားတယ်။ တချို့ တပတ်လောက် ခေါ်မေးပြီးမှ ပြန်လွှတ်တာတွေ ရှိတတ်သလို အခု ဘာကိစ္စကြောင့် ခေါ်သွားပါတယ် ဆိုတာ သေချာမသိရဘူး။ သူကလည်း စစ်တပ်က ထွက်လာတဲ့ လူဆိုတော့ တပ်ပိုင်းဆိုင်ရာ ကိစ္စတွေများရှိ နေလား။ ဒီနောက်မှာမှ ဖြစ်လာတဲ့ အခြေအနေ ကြည့်ပြီး လုပ်သင့် လုပ်ထိုက်တာ ဆက်လုပ် သွားမှာပေါ့”ဟု ပြောသည်။

ဧပြီ ၂ ရက်နေ့ ညနေ ၄ နာရီတွင် ခေါ်ဆောင်သွားပြီး ၃ ရက်နေ့တွင် အာဏာပိုင်များက အ၀တ်အစားများ လာရောက် ယူဆောင် သွားကာ ဧပြီလ ၄ ရက်နေ့တွင် နေအိမ်နှင့် အတူ တွဲဖွင့်ထားသည့် အင်တာနက် ဆိုင်သို့ ၀င်ရောက်၍ စစ်ဆေးမှုများ ပြုလုပ်ပြီး ကိုနေမျိုးဇင် အသုံးပြုသည့် လက်ပ်တော့ (ခရီးဆောင် ကွန်ပျုတာ) ကို ယူဆောင်သွားသည်ဟု ကိုနေမျိုးဇင်၏ မိခင် ဒေါ်ခင်သီ ကပြောသည်။

“အိမ်ရော ဆိုင်ရော ၀င်လာပြီး စစ်သွားတာ။ သူ သုံးတဲ့ ကွန်ပျုတာကို ယူသွားမယ် ပြောတော့ အန်တီတို့က ဘာတွေပါလဲ ဖွင့်ကြည့် မယ် ဆိုတော့ ဖွင့်ကြည့်တာ ဘာမှ မတွေ့ဘူး။ ဘာမှလည်းမရှိဘူး။ ဒါပေမယ့် သူတို့က ကွန်ပျူတာကို ယူသွားမယ် အထဲက ဒေတာတွေကို စီဒီထဲ ထည့်ပြီး ထားခဲ့ပေးပါမယ် ပြောတယ်။ ဘာမှ မတွေ့ရင်တော့ နောက် ၃ ရက်လောက်နေ လာပို့ပေးပါမယ် ပြောသွားတယ်။ ဒီကနေ့ ဆို ၃ ရက်ပြည့်ပြီ အခုထိ အကျိုး အကြောင်းဘာမှ လာပြောတာ မရှိသေးဘူး။ အန်တီတို့လည်း အရမ်း စိုးရိမ်ပြီး သားကို အမြန်ဆုံး ပြန်တွေ့ချင်တယ်”ဟု ၎င်းက ပြောဆိုသည်။

သွေးကူညီပေးရေးအဖွဲ့ ခေါင်းဆောင် ကိုညီညီက“ဘယ်နေရာမှာထားတယ်။ ဘာအတွက်ကြောင့် ဖမ်းသွားတယ် ဆိုတာ အခုချိန်ထိ မိသားစု ၀င်တွေရော ၊ ကျနော်တို့ပါ ဂဃနဏ မသိရဘူး။ မရမ်းကုန်းက အောင်သပြေ စစ်ကြောရေး စခန်းမှာ ထားတယ် ဆိုတာကလည်း အကြားပဲရှိတယ်။ ဒီလို မသိရတဲ့ အတွက်ကြောင့်လည်း ရန်ကုန်က NLD သွေးကူညီပေးရေး အဖွဲ့ရော၊ အနယ်နယ် အရပ်ရပ်မှာ စည်းရုံးထားတဲ့ အဖွဲ့ဝင်တွေ အကုန်လုံးက အရမ်းကို စိုးရိမ်နေကြတယ်”ဟု ပြောသည်။

ဧပြီလ ၄ ရက်နေ့က အာဏာပိုင်များသည် အိမ်အနှံ့ ရှာဖွေခြင်း ၊ ဓာတ်ပုံရိုက်ခြင်းများ ပြုလုပ်သည့် အပြင် ကိုနေမျိုးဇင် သုံးစွဲခဲ့သည့် ခရီးဆောင် ကွန်ပျုတာကိုပါ သိမ်းဆည်း သွားခဲ့သည်။

“အဲဒီလို ရှာဖွေနေတဲ့ အချိန်မှာ ကျနော်တို့မှာ မျက်မြင် သက်သေအဖြစ်နဲ့ ဥပဒေကြောင်း အရ နေပိုင်ခွင့် ရှိပေမယ့် အပြင်မှာ စောင့်နေတဲ့ SB တယောက်က ၀င်လို့ မရပါဘူး။ အပြင်ကနေ စောင့်နေပါ ဆိုတာနဲ့ မကြည့်လိုက်ရဘူး။ ဒါပေမယ့် သူတို့ လက်ပ်တော့ ယူသွားမယ် ဆိုတော့ မိသားစုဝင်တွေက ဖွင့်ခိုင်းတာနဲ့ ဖွင့်ကြည့်တာ မိသားစုဝင်တွေ ပြောပြချက်အရ ဘာမှ မတွေ့ပါဘူးပေါ့။ ပြည်တွင်းမှာ တရားဝင် ထုတ်ထားတဲ့ ဗိုလ်ချုပ်အောင်ဆန်း အထ္ထုပ္ပတ္တိလို စာအုပ်တွေ ၊ ဦးသန့် စာအုပ်တွေ ပဲ တွေ့ရတယ် ပြောတယ်”ဟု ကိုညီညီက ပြောသည်။

လက်ရှိ အစိုးရသစ်လက်ထက်တွင် အာဏာပိုင်များပြောခဲ့သည့် Good Goverment ၊ Clean Goverment ကဲ့သို့ အုပ်ချုပ် မှု စနစ်ကောင်းဖြင့် အုပ်ချုပ် သွားမည်ဆိုသည့် အတိုင်း ကိုနေမျိုးဇင်သည် ပရဟိတမှ လွဲ၍ နိုင်ငံတော် ပျက်စီးစေမည့် လုပ်ရပ်မျိုး မတွေ့ရှိပါက ခြွင်းချက်မရှိ ပြန်လွှတ်ပေးမည်ဟု ယုံကြည်ကြောင်း သူက ပြောဆိုသည်။

“ပရဟိတ လုပ်ငန်းဆိုတာကလည်း ဘယ်အစိုးရပဲ တက်တက်ပေါ့ နိုင်ငံသား တယောက်ရဲ့လွတ်လပ်စွာ လုပ်ပိုင်ခွင့်ပဲ။ ဒီဟာ ပေါ်မှာ အကြောင်းရှာပြီး အရေးယူ ဆောင်ရွက်တာတွေ လုပ်မယ်ဆို လုပ်တဲ့အစိုးရရဲ့ တာဝန်ပဲဖြစ်တယ်။ လက်ရှိ အခြေအနေမှာလဲ အစိုးရသစ်က ပေါ်ထွန်းလာပြီ ဆိုပေမယ့် ပုံသဏ္ဍာန်ကတော့ အစိုးရ အဟောင်း ပုံသဏ္ဍာန် လမ်းကြောင်း ပေါ်မှာပဲ ဆက်လျှောက် နေပြီး အသစ်ဆိုတဲ့ သဘောထားပေါ်မှာ ကောင်းကောင်း မလျှောက်တတ် သေးတာလား သဘော မပေါက် သေး ဘူးလားတော့ မသိဘူး။ အရင်ပုံစံ အဟောင်းမှာပဲ ဆက်လျှောက် နေသေးတယ်”ဟု ရှေ့နေ ဦးအောင်သိန်းက ပြောသည်။

ဥပဒေဆိုင်ရာအရ အစိုးရသစ်ပြောင်းလဲလိုက်ပြီးချိန်တွင် တရားရုံးများ၌ ရန်ကုန်တိုင်း ဒေသကြီး လွှတ်တော် ဆိုသည့် အခေါ်အဝေါ် ပုံသဏ္ဍာန်အရ ပြောင်းသာပြောင်းလဲ သွားပြီး တကယ့် အနှစ်သာရ ဖြစ်သည့် အာဏာပိုင်များ ပြောဆိုနေသော ကောင်းမွန်၊ သန့်ရှင်းသည့် အစိုးရသစ် ဆိုသည်ကို ရောက်ရန် မျှော်မှန်း၍ မရနိုင်သေးဟု သူက ပြောသည်။

“ဘာမှ မရှိတာကို တွေ့ပေမယ့် ခရီးဆောင်ကွန်ပျုတာ ထပ်ယူသွားတာကို ကြည့်ရင် အီလက် ထရွန်နစ် ဥပဒေ ၃၃ ဃ ၊ ၃၈ တို့နဲ့ နှစ်ရှည် ထောင်ဒဏ်တွေ ချမှတ်လို့ ရတဲ့ အနေအထားတွေ ရှိနေတယ်လေ။ အိမ်မှာ ဖွင့်စစ်တာ မတွေ့ဘူး ဆိုပေမယ့် သိမ်းဆည်းသွားတဲ့ အာဏာပိုင်တွေ အနေနဲ့ ရဲလုပ်ထုံး လုပ်နည်းအရ ရှာဖွေ ပုံစံနဲ့ စနစ်တကျ သိမ်းဆည်းသွားတာ မဟုတ်ဘဲ စာရွက် တရွက်မှာ ယူသွားပါတယ် ရေးသွားတာမျိုး ဆိုတော့ ခရီးဆောင် ကွန်ပျုတာ ပြန်ပေးရင်တောင် အီးမေးလ် ၊ အင်တာနက် နဲ့ ပတ်သက် တာတွေနဲ့ အရေးယူမယ် ဆို ရတာပဲ။ အဲဒီလို ပုံစံက သူတို့ လုပ်နေကျပဲဆိုတော့ စောင့်ကြည့်ရမှာပေါ့”ဟု ဦးအောင်သိန်းက ပြောသည်။

အသက် ၃၆ နှစ် အရွယ်ရှိ ဗိုလ်ကြီးဟောင်း ကိုနေမျိုးဇင်သည် တောင်ကြီးမြို့ တပ်ထိန်းအဖြစ် တိုင်းမှူး လုံခြုံရေး တာဝန်ယူကာ ဆောင်ရွက်ခဲ့ပြီး ၂၀၀၅ ခုနှစ်တွင် တပ်မတော်မှ အငြိမ်းစား ယူခဲ့သည်ဟု သိရသည်။

Ref: ဧရာဝတီ်