မြန်မာနိုင်ငံကို အမေရိကန် ပိတ်ဆို့မှု ဆက်ထားမည်

ဗုဒ္ဓဟူး, 06 ဧပြီ 2011

မြန်မာပြည်မှာ စစ်အစိုးရကနေ အရပ်သား အစိုးရကို ပြောင်းလဲသွားပြီ ဆိုပေမဲ့လည်း အမေရိကန် ပြည်ထောင်စုက မြန်မာပြည်ကို ချမှတ် ထားတဲ့ အရေးယူ ပိတ်ဆို့မှု တွေကိုတော့ ဆက်ပြီး လုပ်ထားဦးမှာပဲလို့ အမေရိကန်ရဲ့ အရှေ့ အာရှနဲ့ ပစိဖိတ် ရေးရာ လက်ထောက် နိုင်ငံခြားရေး ၀န်ကြီး ကာ့တ် ကမ်းဘဲလ် (Kurt Campbell) က ပြောလိုက်ပါတယ်။

သူ့ရဲ့ အာရှခရီးစဉ်အတွင်း စင်ကာပူနိုင်ငံမှာ မနေ့တုန်းက သတင်းထောက်တွေကို မြန်မာပြည်နဲ့ ပတ်သက်ပြီး အခုလို ပြောခဲ့တာပါ။

လက်ရှိအခြေအနေတွေအရ အမေရိကန် ပြည်ထောင်စုက မြန်မာပြည်ကို ချမှတ်ထားတဲ့ ပိတ်ဆို့ အရေး ယူမှုတွေကို ပြန်ရုပ် သိမ်းဖို့ မသင့်တော် သေးဘူးလို့ ယူဆတဲ့ အကြောင်း မစ္စတာ ကာ့တ် ကမ်းဘဲလ်က ပြောပါတယ်။

မြန်မာအစိုးရက ဘယ်လို လုပ်ဆောင်နေတယ် ဆိုတာကို ကျနော်တို့ စောင့်ကြည့်နေတယ်၊ ခေါင်းဆောင် ပိုင်းနဲ့ ထိရောက်ပြီး အကျိုးရှိတဲ့ ညှိနှိုင်းမှုတွေ လုပ်ဖို့ ဖြစ်နိုင်ခြေ ရှိမရှိ ဆိုတာကိုလည်း လေ့လာ စောင့်ကြည့် နေတယ်လို့ ဆိုပါတယ်။

မြန်မာအစိုးရ ခေါင်းဆောင်သစ်တွေနဲ့ အမေရိကန်ဘက်က ညှိနှိုင်းပြောဆိုဖို့ ကြိုးစားမယ့် အရေးကို မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကလည်း ထောက်ခံ အားပေးတယ်၊ ကျနော်တို့ဘက်ကလည်း အစိုးရ ခေါင်းဆောင် သစ်တွေနဲ့ ညှိနှိုင်းမှုတွေ လုပ်ဖို့ ရှိနေတာပါလို့ မစ္စတာ ကမ်းဘဲလ်က ပြောပါတယ်။

မြန်မာအစိုးရသစ်ရဲ့ သဘောသဘာဝနဲ့ ပတ်သက်ပြီး မှတ်ချက်ပေး ပြောဆိုဖို့တော့ သိပ်ပြီး စောနေ သေးတယ် လို့လည်း ဆိုပါတယ်။

လက်ထောက် နိုင်ငံခြားရေးဝန်ကြီး မစ္စတာ ကာ့တ် ကမ်းဘဲလ်ဟာ မြန်မာပြည်ကို ၂ ကြိမ် သွားခဲ့ ဖူးပါတယ်။ လက်ရှိ သမ္မတ ဦးသိန်းစိန်နဲ့လည်း တွေ့ဆုံဖူးတဲ့ သူပါ။ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် နဲ့ရော တိုင်းရင်းသား နိုင်ငံရေး ခေါင်းဆောင် တချို့နဲ့ရော တွေ့ဆုံဖူးပါတယ်။ မစ္စတာ ကမ်းဘဲလ်ရဲ့ အခု အာရှ ခရီးစဉ်မှာ တရုတ်နဲ့ အိန္ဒိယ နိုင်ငံတွေကိုလည်း သွားမှာ ဖြစ်ပါတယ်။

Ref: VOA News