အက်စ်အက်စ်အေ မြောက်ပိုင်းအဖွဲ့နှင့် မြန်မာအစိုးရ စစ်တပ်များ တိုက်ပွဲ ကျယ်ပြန့်

2011-04-05

SSPP/SSA ရှမ်းပြည်တပ်မတော် အက်စ်အက်စ်အေ မြောက်ပိုင်း တပ်တွေနဲ့ မြန်မာ စစ်တပ်တွေ ဟာ အရင်က ရှမ်းပြည် အလယ်ပိုင်း၊ အက်စ်အက်စ်အေ မြောက်ပိုင်း ဌာနချုပ်ရှိရာ ဝမ့်ဟိုင်း ဒေသ အနီးမှာ တိုက်ပွဲတွေ ဖြစ်နေရာက အခုအခါ လားရှိုး၊ သီပေါနယ် အထိ ပျံ့နှံ့လာတယ်လို့ ရှမ်းတပ်နဲ့ နီးစပ်သူတွေက ပြောပါတယ်။

ဒီအကြောင်းနဲ့ပတ်သက်လို့ ရှမ်းသံတော်ဆင့် သတင်းဌာန အယ်ဒီတာ ဦးစိန်ကြည်ကလည်း အခုလို ပြောပါတယ်။

“အစကတော့ လေးငါးမြို့နယ်ပေါ့ ဥပမာ မိန်းမော၊ မိန်းရိုင်၊ တန့်ယန်း၊ မိုင်းရှူး၊ မိန်းနောင်ပေါ့၊ အခုဟာက ၁၀ မြို့နယ် ၁၁ မြို့နယ် အထိ ပြန့်သွားပြီလို့ ပြောနိုင်တယ် ဥပမာ လားရှိုးမြို့နယ် သီပေါမြို့နယ်ပါတယ် အခု နမ့်ဆန် မြို့နယ်လည်း ဖြစ်နေပြီ တပ်မဟာ ၃ လှုပ်ရှားတဲ့ နယ်မြေတွေကို သူတို့ တပ်တွေ ဖြန့်ကျက် လှုပ်ရှားနေတယ်။ အဲဒါကြောင့် နအဖ တပ်က အက်စ်အက်စ်အေ ထိမ်းချုပ် နယ်မြေထဲကို လာပြီးတော့ ကျူးကျော် တိုက်ခိုက်တယ်။ စစ်ဆင်ရေး လုပ်တယ်။ ၃ ရက်နေ့က မန္တလေးဖက်က ကျောက်မဲ၊ လားရှိုးအထိ အစီးပေါင်း ၇၀၊ ၈၀၊ နအဖ တပ်တွေ အသစ်တွေ ဗမာပြည်ကနေ ဖြည့်တင်းနေတယ်။”

ရှမ်းပြည်မြောက်ပိုင်း နမ့်ဆန်မြို့အနီးမှာလည်း လွန်ခဲ့တဲ့ လကုန်ပိုင်းက တိုက်ပွဲ ဖြစ်ပွားခဲ့ပြီး၊ တိုက်ပွဲတွေ အားလုံးမှာ ရှမ်းတပ်ဖွဲ့တွေက ပြောက်ကျား စနစ်နဲ့ ပြန်လည် တိုက်ခိုက် တာကြောင့် မြန်မာ အစိုးရ တပ်ဖက်က ထိခိုက် ကျဆုံးတာ ပိုများတယ်လို့ ဦးစိန်ကြည်က ဆက်ပြောပါတယ်။

“နမ့်ဆန်မြို့ရဲ့ အရှေ့တောင်ဖက်လောက်မှာ ကျမယ်။ အဲဒါ ၂၈ရက် ၂၉ ရက်နေ့တုံးက ဖြစ်တယ် နအဖဖက်က တော်တော် အသေ အပျောက် များတယ်။ အရပ်သတင်း အရတော့ နအဖဖက်က အနည်းဆုံး ၁၀ ယောက်ကျော်ကျော် ကျတယ် ။ အက်စ်အက်စ်အေ ဖက်ကလည်း ၂ယောက် ၃ ယောက်ကျတယ်။ အဲဒါ တကယ့်ကို တိုက်ပွဲကြီးပဲ။ လေးငါး နာရီလောက် ကြာတယ် ပြောတယ်။ နအဖ ဖက်က အကျအဆုံး များတယ်ဆိုတာ မတ်လ ၁၃ ရက်နေ့ကနေ မနေ့က ဧပြီလ ၄ ရက်နေ့အထိ အားလုံး ခြုံကြည့်လိုက်ရင် အနည်းဆုံး ၅၀ လောက်တော့ ကျဆုံး သေကျေ နိုင်တယ်လို့ သုံးသပ် နိုင်တယ် နအဖ ဖက်ကပေါ့လေ။”

အခုအခါ အက်စ်အက်စ်အေ မြောက်ပိုင်း ဝမ်ဟိုင်းဌာနချုပ်ရဲ့ အနောက်ဖက် ကျေးသီးမြို့၊ တောင်ဖက် ရှိမိန်းနောင်မြို့၊ အရှေ့တောင် ဖက်ရှိ မိုင်းရှူးနဲ့ မြောက်ဖက်က မိန်းရိုင် လာရှိုးဖက်ကနေ ဌာနချုပ်ကို တိုက်ခိုက်ဖို့ မြန်မာ စစ်အစိုးရ တပ်တွေ အလုံးအရင်းနဲ့ အင်အား ဖြည့်တင်း နေတယ်လို့လည်း သိရပါတယ်။

Ref: RFA News