ပြည်သူလူထုထမင်းငတ်သည်မှာ အရေးမဟုတ်ဟု တိုင်းမှူး သောင်းအေး ဆို

7/12/2009

တာကလူး (နိရဉ္စရာ) ရခိုင်ပြည်နယ်တွင် အများပြည်သူ ထမင်းငတ် အခက် ကြုံနေသည်မှာ အရေးမဟုတ် စစ်တပ် မိသားစုများသာ ထမင်းမငတ်ဖို့ အရေးကြီးသည်ဟု တိုင်းမှူး သောင်းအေးက ပြောကြား လိုက်ကြောင်း ပုဏ္ဍားကျွန်း မြို့နယ်မှ လယ်သမား တစ်ဦးက ပြောသည်။

အဆိုပါ ပြောကြားမူမှာဏ္ဍားကျွန်းမြို့နယ်ရှိ တန်းစွယ်၊ မင်းဂံ နှင့် ကျော်ဇံ ကျေးရွာတို့မှ ဒေသခံ တောင်သူလယ်သမားများမှ လယ်မြေ သိမ်းခံရ၍ လုပ်ကိုင် စားသောက်ရန် အခက်အခဲ ဖြစ်နေကြရသဖြင့် အနောက်ပိုင်း တိုင်းမှူး တိုင်းမှူးအား သွားရောက် အသနားခံစဉ် ပြောဆိုလိုက်ခြင်း ဖြစ်သည်။

အဆိုပါ ကျေးရွာများမှ ကျေးရွာသားများ စုပေါင်း ပိုင်ဆိုင်သည့် ကျွဲနွားစားကျက်မြေ (၁၆) ဧကကို ပုဏ္ဍားကျွန်းမြို့ အခြေစိုက် ခမရ(၅၅၀)မှ ဗိုလ်ကြီးနိုင်ဝင်း ဦးဆောင် ပြီး ဇူလိုင်လ (၂)ရက်နေ့တွင် သိမ်းယူခဲ့သည်။

ကျွဲနွား စားကျက်မြေများကို စစ်တပ်မှ အတင်းအဓမ္မ သိမ်းယူခဲ့ပြီးနောက် အဆိုပါ စားကျက်မြေတွင် ကျေးရွာသားများကို ခေါ်ယူပြီး အခမဲ့ လယ်ယာ ထွန်ယက်စိုက်ပျိုး ခိုင်းခဲ့သည်။ သို့အတွက် ဒေသခံ လယ်သမားများက အမ်းအခြေစိုက် အနောက်ပိုင်းတိုင်းစစ်ဌာနချုပ်သို့ သွားရောက်ပြီး တိုင်းမှူးသောင်းအေးကို တိုင်ကြားခဲ့သည်။

အမည်မဖေါ်လိုသူ အရပ်သား တဦးက “တိုင်းမှူး သောင်းအေးက ခင်ဗျားတို့ ထမင်းငတ်နေတယ် အခက်ကြုံနေတယ် ဆိုတာ အရေးမကြီးဘူး၊ စစ်တပ်မိသားစုတွေ မငတ်ဖို့ အရေးကြီးတယ်။ စစ်တပ်က ပြောတာကို လိုက်နာရမယ်။ ခိုင်းတာကို လုပ်ပါ။ လယ်ထွန် ခိုင်းရင် ထွန်ပေးရမယ်။ မထွန်ပေးဘူးဆိုရင် ဒဏ်ငွေ ၅၀၀၀၀ စီပေးရမယ် ဆိုပြီး တုန့်ပြန် ပြောကြား ခဲ့ပါတယ်” ဟု ပြောသည်။

တိုင်းမှူးသောင်းအေးသည် မြန်မာနိုင်ငံအတွင်း ကျေးလက်မြို့ပြ တပြေးညီ တဟုန်ထိုး တိုးတက်ရေးအတွက် နေ့ညမအား ကြိုးပမ်း ဆောင်ရွက် လျက်ရှိသည်ဟု ပြောဆိုနေသည့် နအဖ စစ်အစိုးရ၏ ရခိုင်ပြည်နယ် ဆိုင်ရာ အာဏာအရှိဆုံး ပုဂ္ဂိုလ်တစ်ဦး ဖြစ်သည်။

အတင်းအဓမ္မ မြေသိမ်းယူခဲ့သည့် လယ်မြေများပေါ်တွင် တန်းစွယ်ရွာမှ (၆)ဧက၊ မင်းဂံရွာမှ လ(၅)ဧက နှင့် ကျော်ဇံရွာမှ (၅) ဧက ထွန်ယက် စိုက်ပျိုးပေးရမည်ဟု စစ်တပ်က ခွဲတမ်းချ ခဲ့သည်ဟု သိရသည်။

တခြား လယ်သမားတစ်ဦးက “ကျွဲနွားတိရစ္ဆာန်တွေကို အသုံးပြုပြီး လယ်ထွန် နေရတာဆိုတော့ စားကျက်မြေဆိုတာ လယ်သမားတွေ အတွက် အင်မတန်မှ အရေးကြီးပါတယ်။ မြေကို သိမ်းလိုက်တဲ့ အပြင် သူတို့ဆီက ဘာမှမပေးပဲ ထွန်ယက်စိုက်ပျိုးခိုင်းတယ်။ ကျွန်တော်တို့ ကျေးရွာတွေမှာက အကုန်လုံး ဆင်းရဲသား လယ်သမားတွေပါ။ ဒီလို စိုက်ချိန်ပျိုးချိန် အလုပ်များနေတဲ့ အချိန်မှာ အရင်းမပါပဲ အလုပ်လဲ လာခိုင်းတယ်ဆိုတော့ ဘယ်သူ့မှ မလုပ်ချင်ကြပါဘူး။ ဒါပေမယ့် မလုပ်ရင် ကျပ်ငွေ ၅၀၀၀၀ လျော်ရမယ်ဆိုတော့ နောက်ဆုံးတော့ စစ်တပ်က ခိုင်းတာကို လုပ်ပေးကြရမှာ ဖြစ်ပါတယ်” ဟု ပြောသည်။

၎င်းအပြင် တိုင်းမှူး သောင်းအေးက အဆိုပါ စားကျက်မြေများအပြင် ရခိုင်ပြည်နယ်အတွင်း လယ်သမားများ ဘိုးစဉ်ဘောင်ဆက် လုပ်ကိုင်စားသောက်လာသည့် လယ်မြေများ အားလုံးကိုလည်း စစ်တပ်မှ ပိုင်ဆိုင်ကြောင်း ပြောကြားခဲ့သည် ဟုဆိုသည်။

Ref: နိရဉ္စရာ