မြစ်ကြောင်းနဲ့ မြစ်ကမ်းများမှာ ဓာတ်သတ္တု ရှာဖွေစမ်းသပ်ထုတ်လုပ်မှု တားမြစ်

2012-03-29

တန်ဖိုးမဖြတ်နိုင်တဲ့ နိုင်ငံတော်ရဲ့ သဘာဝအမွေအနှစ်ဖြစ်တဲ့ ဧရာဝတီ၊ သံလွင်၊ ချင်းတွင်းနဲ့ စစ်တောင်းမြစ် လေးသွယ်ရဲ့ သဘာဝ ပတ်ဝန်းကျင်ကို စဉ်ဆက်မပြတ် ထိန်းသိမ်း စောင့်ရှောက်ဖို့ မြစ်ကြောင်းနဲ့ မြစ်ကမ်းက ပေ ၃၀၀ အတွင်း ဓာတ်သတ္တု ရှာဖွေ စမ်းသပ် ထုတ်လုပ်တာ တားမြစ်လိုက်ကြောင်း သတ္တုတွင်း ၀န်ကြီးဌာန ပြည်ထောင်စုဝန်ကြီး ဦးသိန်းထိုက်က မနေ့က အမိန့် ထုတ်ပြန် လိုက်ပါတယ်။

ဖွဲ့စည်းပုံ အခြေခံဥပဒေပါ ပြဋ္ဌာန်းချက်နဲ့ မြန်မာ့သတ္တုတွင်း ဥပဒေပါ ပြဋ္ဌာန်းချက်တွေကိုလည်း ကြေညာချက်မှာ ပါရှိတာကို ဒီကနေ့ထုတ် သတင်းစာ တွေမှာ ဖော်ပြပါတယ်။ သဘာဝ ပတ်ဝန်းကျင် ထိန်းသိမ်းရေး လုပ်ငန်းတွေ လုပ်နေတဲ့ Eco Dev ဦးဆောင် ညွှန်ကြားရေးမှူး ဦးဝင်းမျိုးသူကတော့ မြစ်ကြောင်း ထိန်းသိမ်းရေး အတွက် နဂိုကတည်းက ဥပဒေ ထုတ်ပြန်ထားတာ ရှိတယ်လို့ ပြောပါတယ်။

ဒီလ ၁၅ ရက်နေ့မှာလုပ်တဲ့ ပြည်ထောင်စုအစိုးရအဖွဲ့ အစည်းအဝေးရဲ့ သဘောတူညီချက်အရ သတ္တုတွင်း ၀န်ကြီး ဌာနက မြန်မာ့ သတ္တုတွင်း ဥပဒေပုဒ်မ ၃၉ အရ ကျင့်သုံးပြီး ဒီအမိန့်ကို ထုတ်ပြန် လိုက်တယ်လို့ ဖော်ပြ ထားပါတယ်။

ဒီလို ဥပဒေတွေရှိပါလျက် ဧရာဝတီမြစ်ကြောင်း တစ်လျှောက်တင်မက မေခနဲ့ မလိခမြစ်မှာရော တခြား မြစ်တွေမှာပါ ရိုးရာနည်း မသုံးတော့ဘဲ စက်ယန္တရား ကြီးတွေနဲ့ ရွှေတူးဖော်နေတဲ့ အတွက် မြစ်ရေ ညစ်ညမ်း နေတယ်လို့ သဘာဝ ပတ်ဝန်းကျင် ထိန်းသိမ်းရေး သမားတွေက ပြောပါတယ်။

သတ္တုတွင်း ၀န်ကြီးဌာနရဲ့ ကြေညာချက်မှာ ဒီမြစ်လေးသွယ် ထိန်းသိမ်းရေးကို စနစ်တကျ ပေါင်းစည်း ဆောင်ရွက်ဖို့၊ ပစ္စုပ္ပန်နဲ့ အနာဂတ် မျိုးဆက်တွေ အကျိုးအတွက် သန့်ရှင်း ကောင်းမွန်တဲ့ ပတ်ဝန်းကျင် ဖြစ်ပေါ် လာစေဖို့နဲ့ မြစ်ကြီးတွေ ရေစီး ရေလာ ကောင်းရေး အတွက် စဉ်ဆက်မပြတ် ထိန်းသိမ်း စောင့်ရှောက်ဖို့ လိုအပ်တယ်လို့ ဖော်ပြထားပါတယ်။

ဥပဒေတွေ တားမြစ်ချက်တွေရှိပေမဲ့ ဧရာဝတီမြစ်ကြောင်း တစ်နေရာမှာ ရွှေရှာနေတဲ့ လှေအစီး ၃၀၀ လောက်တောင် တွေ့ခဲ့ ရတယ်လို့ လေ့လာသူ တစ်ဦးက ပြောပါတယ်။

Ref: RFA News