နိုင်ငံရေးအကျဉ်းသား လွှတ်လျှင် တိုင်းပြည်ပြဿနာ ရှင်းနိုင်မည်

ကိုပေါက်
ဗုဒ္ဓဟူးနေ့၊ မတ်လ ၂၃ ရက် ၂၀၁၁

နယူးဒေလီ (မဇ္ဈိမ) ။ ။ လူမှုနယ်ပယ်များ၌ သြဇာညောင်းသည့် နိုင်ငံရေး အကျဉ်းသားများကို ထိန်းသိမ်းမည့် အစား တွေ့ဆုံ ဆွေးနွေးပါက ပြည်သူကို စည်းရုံးနိုင်မည့် အပြင် တိုင်းပြည် ပြဿနာ များကိုပါ ဖြေရှင်း နိုင်မည်ဟု နိုင်ငံရေး အကျဉ်းသားများ ကူညီ စောင့်ရှောက်ရေး အသင်း (မြန်မာနိုင်ငံ) AAPP-B က ပြောသည်။

ဗုဒ္ဓဟူးနေ့တွင် ကျရောက်သည့် ထိုင်းနိုင်ငံအခြေစိုက် AAPP-B တည်ထောင်ခြင်း ၁၁ နှစ်ပြည့်တွင် တွဲဘက် အတွင်းရေးမှူး ကိုဘိုကြည်က ပြောဆို လိုက်ခြင်း ဖြစ်သည်။

“ဒီလူတွေကို ထောင်ထဲမှာ ထည့်ထားမယ်၊ နှိပ်စက်ညှဉ်းပန်းနေမယ်ဆိုရင် ဒါဟာ အမျိုးသား ပြန်လည် သင့်မြတ်ရေး အတွက် မလိုလားတာ၊ အသွင် ကူးပြောင်းရေး အတွက်ကို မလိုလားတာလို့ ပြောလို့ရပါတယ်” ဟု သူက မဇ္ဈိမကို ပြောသည်။

၁၁ နှစ်တာ ကာလအတွင်း မြန်မာနိုင်ငံ အကျဉ်းထောင် အချို့၌ စာရေး စာဖတ်ခွင့်နှင့် လမ်းလျှောက်ခွင့်ကို တနေ့လျှင် မိနစ် ၂ဝ မှ ၁-၂ နာရီအထိ တိုးမြှင့် ရရှိလာသဖြင့် တိုးတက်မှု အနည်းငယ် ရှိလာသော်လည်း အခြားသော အဓိကကျသည့် တိုးတက်မှုများ လိုအပ်နေသေးသည်ဟု ဆိုသည်။

“အစားအသောက်က အရင်အတိုင်းပဲ တိုးတက်မှု မရှိသေးဘူး။ နေရာထိုင်ခင်း အနေအထားအရ ဥပမာ အင်းစိန် ထောင်မှာ ဆိုရင် လူ ၅ဝဝဝ/၆ဝဝဝ လောက်ပဲ ဆံ့တဲ့ဟာက လူ ၉ဝဝဝ/၁ဝဝဝဝ လောက် ဖြစ်နေတော့ အရမ်းကျဉ်းတယ်။ ကျန်းမာရေး စောင့်ရှောက်မှု မှာလည်း အရင်ကထက် ပိုပြီး ဆုတ်ယုတ်လာတယ်လို့ ပြောလို့ရတယ်” ဟု ကိုဘိုကြည်က ပြောဆိုသည်။ နှိပ်စက် ညှဉ်းပန်းမှု များမှာလည်း အချို့ထောင်များ၌ ဆက်ရှိနေသေးသည်ဟု ဆိုသည်။

APP-B ဖွဲ့စည်းမှု ၁၁ နှစ်မြောက် အခမ်းအနားအား ရုံးစိုက်ရာ မဲဆောက်မြို့၌ ယနေ့ကျင်းပ ခဲ့ကြပြီး၊ စာရေးဆရာမ နှင်းပန်းအိမ်၏ ‘အမှောင်လှိုင်းထဲက သူရဲကောင်းတို့ တိုင်းပြည်’ စာအုပ်အား ဖြန့်ဝေခဲ့သည်။ အဆိုပါ စာအုပ်မှာ လွတ်လပ်သော အာရှအသံ RFA ၌ အပတ်စဉ် တင်ဆက်နေသော ဆောင်းပါး ၄ဝ ကျော်အား စုစည်း ဖော်ပြထားခြင်း ဖြစ်သည်။

ဆရာမ နှင်းပန်းအိမ် မြန်မာပြည်တွင်း ရှိနေစဉ်က ထောင်ဝင်စာ သွားရောက်ခဲ့ရသည့် ကလေး၊ ခန္တီး၊ မိုင်းဆက်၊ မြစ်ကြီးနား၊ ဘူးသီးတောင် ထောင်များ အကြောင်းနှင့် အကျဉ်းထောင်တွင်း ကျဆုံး သွားခဲ့ရသော အာဇာနည်များ၊ အကျဉ်းကျခံ သူရဲကောင်းများ အကြောင်း ရေးဖွဲ့ထားခြင်း ဖြစ်သည်။

AAPP-B ကို နိုင်ငံရေးအကျဉ်းသားဟောင်းများက သက္ကရာဇ် ၂ဝဝဝ ပြည့်နှစ်တွင် စတင် ဖွဲ့စည်းခဲ့ကြပြီး၊ နိုင်ငံရေး အကျဉ်းသား လွတ်မြောက်ရေး အတွက် နိုင်ငံတကာတွင် လှုံ့ဆော်ခြင်းကို ကျယ်ပြန့်စွာ လုပ်ဆောင် နိုင်ခဲ့သော်လည်း နိုင်ငံရေး အကျဉ်းသား များအား ကူညီရေး လုပ်ငန်းများကိုမူ အပြည့်အဝ မလုပ်ဆောင်နိုင်ခဲ့ကြောင်း ကိုဘိုကြည်က ပြန်လည် သုံးသပ်သည်။

“နိုင်ငံရေးအကျဉ်းသားပေါင်း ၂ဝဝဝ ကျော် ရှိတဲ့အထဲမှာ ကျနော်တို့ လက်လှမ်းမီတာက ၁ဝဝဝ ကျော်ကျော် လောက်ပဲ ရှိတယ်။ ကျနော်တို့မှာ ငွေရေး ကြေးရေး အရလည်း အခက်အခဲတွေ ရှိတယ်” ဟု သူက ဆိုသည်။

နိုင်ငံရေးအကျဉ်းသား ကူညီရေးကိစ္စများကို အမျိုးသားဒီမိုကရေစီအဖွဲ့ချုပ် NLD က ဆောင်ရွက် နေသည့် အပေါ် ထောက်ခံ ကြိုဆိုကြောင်းနှင့် ပြည်သူလူထု တရပ်လုံးကလည်း ထဲထဲဝင်ဝင် ပူးပေါင်း ပါဝင်လာမှသာ အကျဉ်းသားများနှင့် ၎င်းတို့၏ မိသားစု ဝင်များ၏ အခက်အခဲများအား ယခုထက်ပို၍ ဖြေရှင်း ပေးနိုင်မည်ဖြစ်ကြောင်း ပြောဆိုသည်။

Ref: မဇ္ဈိမ