(၁ဝ၅) မိုင် ကုန်သွယ်ရေးဇုန်တွင် နယ်စပ် ကုန်သွယ်မှု ထိခိုက် ကျဆင်း

NEJ /၂၂ ဧပြီ ၂၀၀၉

(၁ဝ၅) မိုင် ကုန်သွယ်ရေးဇုန်သို့ အသစ်ပြောင်းရွှေ့လာသည့် သွင်းကုန်တာဝန်ခံက မူဝါဒ အသစ်များ ချမှတ်ကာ ကုန်ပစ္စည်း ဖမ်းဆီးမှုများ လုပ်နေသဖြင့် နယ်စပ် ကုန်သွယ်ရေး ထိခိုက်နေသည်ဟု ကုန်သည်များက ပြောသည်။

စစ်တပ်မှ နကသသို့ ဧပြီ (၁၈) ရက်မှစ၍ ပြောင်းရွှေ့တာဝန်ယူသည့် ဗိုလ်ကြီး မိုးမြင့်အောင်သည် ကုန်သည်များ၊ ဧဂျင့်များ အပေါ် ရိုင်းရိုင်းစိုင်းစိုင်း ပြောဆို ဆက်ဆံကာ တင်းကျပ်သော မူဝါဒအသစ်များ ချမှတ်နေသောကြောင့် နယ်စပ် ကုန်သွယ်ရေး လုပ်နေသူများ အခက်အခဲ ဖြစ်နေသည်ဟု ဧဂျင့်တဦးက ပြောသည်။

“အတော်ကို မောက်မာရိုင်းစိုင်းတာဗျာ။ မင်းတို့ကုန်တွေ မပါဘူးဆိုရင် စစ်ဆေးရေး ကွင်းထဲ ဖြတ် မလျှောက်ရဘူးတို့၊ တိုင်ချင်တဲ့ နေရာတိုင်တို့၊ ငါ့တပ်ထဲမှာဆို မလွယ်ဘူးတို့ အဲလို ပြောနေတာ။ ကုန်သွယ်မှု ချောမွေ့ မြန်ဆန်အောင် ပြေပြေလည်လည် ပြောဆိုရမယ့်ဟာ အကျိုးအကြောင်း တင်ပြတာကိုတောင် လက်မခံဘူး” ဟု အဆိုပါဧဂျင့်က ပြောသည်။

ဂျူတီဆောင်ပြီးဖြစ်သည့် တင်သွင်းမည့် ကုန်ပစ္စည်းအရွယ်အစား အတိမ်းအစောင်း အနည်းငယ်မျှ ကိုပင် လက်မခံသည့် အတွက် အခက်အခဲ ဖြစ်ကြရကြောင်း ၎င်းကပြောသည်။

တရုတ်ပြည်မှ စက်ရုံများ ကွဲလွဲမှုအရ အရွယ်အစားလည်း ကွဲလွဲမှုရှိတတ်သဖြင့် ကုန်ပစ္စည်း အရွယ်အစားကို ပါမစ် လျှောက်စဉ်က အတိုင်း တပုံစံတည်း ဖြစ်ရန် မလွယ်ကူသည့် အပြင် ပါမစ်သက်တမ်း သုံးလအတွင်း ရသည့် ပစ္စည်းကို အမြန် ဝယ်ယူရကြောင်း၊ အရွယ်စား အနည်းငယ် ကွဲလွဲလျှင် ယခင်က ခွင့်ပြုခဲ့သော်လည်း ယခုအခါ ဂျူတီဆောင် စာရင်းနှင့် ကားပေါ်ပါ စာရင်းကို တိုက်ဆိုင် စစ်ဆေးရုံသာမက အရွယ်အစား အနည်းငယ်လွဲနေပါက ဖမ်းဆီးနေကြောင်း ၎င်းက ဆက်လက်ပြောသည်။

ကားတစီးပေါ်တွင် ကုန်ပစ္စည်းအမျိုးအမည် (၃ဝ) ထက်ပို မတင်ရဟုလည်း မူဝါဒအသစ် ချမှတ်လာသည်ဟု နယ်စပ် ကုန်သည်တဦးက ပြောသည်။

၎င်းက “အရင်က Items (၆ဝ၊ ၇ဝ) တင်လည်း ရတယ်။ အခုက (၃ဝ) ထက် ပိုမတင်ရတော့ဘူး။ ထော်လာဂျီ အစိတ်အပိုင်းဆိုဗျာ ဘရိတ်၊ ဘက်မှန်၊ တာယာ၊ မူလီ တိုလီမုတ်စတွေ (၁ဝဝ) ကျော်လောက်ရှိမယ်။ ထော်လာဂျီပဲ သွင်းမယ်ဆိုရင် အဲဒီအတွက် ကားလေးငါးစီး ခွဲတင်ရမလို ဖြစ်နေပြီ” ဟု ပြောသည်။

သွင်းကုန်စစ်ဆေးရေးဂိတ်တွင် စစ်ဆေးကြန့်ကြာမှုများကြောင့် ကုန်ကားများ ထွက်သင့်သလောက် မထွက်နိုင်ဘဲ (၁ဝ၅) မိုင်တွင် ညအိပ်နေရသည်ဟု ကားသမားတဦးက ပြောသည်။

“အရင်က ကုန်စုံတင်တဲ့ကား (၄ဝ) ကျော်ထွက်နိုင်တယ်။ အခု (၃ဝ) လောက်ပဲ ထွက်နိုင်တယ်။ (၁ဝ) စီးကျော် ကျော် ရပ်နားထားရတယ်။ မြေဆီတင်တဲ့ကားဆို တနေ့ (၁၂ဝ၊ ၁၃ဝ) ထွက်တယ်။ အခု အဲဒီပုဂ္ဂိုလ် ရောက်ကတည်း က (၆ဝ၊ ၇ဝ) ပဲ ရှိတော့တယ်။ မထွက်နိုင်တော့ဘူး။ ကားတွေကို စစ်တာ အချိန်ကြာနေလို့ပါ” ဟု အဆိုပါ ကားသမားက ပြောသည်။

နယ်စပ်ကုန်သွယ်ရေး အဓိကလုပ်နေသည့် (၁ဝ၅) မိုင် ကုန်သွယ်ရေး ဇုန်တွင် အတွေ့အကြုံ နည်းပါးပြီး ဆက်ဆံရေး မပြေပြစ်သည့် ဝန်ထမ်းကို ခန့်ထားသည်မှာ မသင့်လျော်ဘဲ ယခုလုပ်ရပ်များက တရားဝင်နယ်စပ် ကုန်သွယ်ရေး လမ်းကြောင်းပေါ်က ကုန်သည်များကို မှောင်ခို လမ်းကြောင်းပေါ် တွန်းပို့ နေသကဲ့သို့ ဖြစ်ကြောင်း ကုန်သည်များက ပြောသည်။

Ref: ခေတ်ပြိုင်