နိုင်ငံရေးအကျဉ်းသား လွှတ်ပေးရေး ကုလကြေညာချက် အမေရိကန် ထောက်ခံ

25 March 2009

တရားလက်လွတ် ဖမ်းဆီးမှုတွေကို ကြားနာတဲ့ ကုလသမဂ္ဂရဲ့ လူ့အခွင့်အရေး ဆိုင်ရာ လုပ်ငန်းအဖွဲ့က မြန်မာနိုင်ငံမှာ အကျဉ်းချ ခံနေရတဲ့ နိုင်ငံရေး အကျဉ်းသားတွေကို လွှတ်ပေးဖို့ မြန်မာ စစ်အစိုးရကို တောင်းဆို လိုက်တာကို အမေရိကန် နိုင်ငံခြားရေး
ဝန်ကြီးဌာနက ကြေညာချက်တစောင် ထပ်ဆင့် ထုတ်ပြန်လိုက်ပါတယ်။

စစ်အစိုးရက နိုင်ငံတကာရဲ့ မေတ္တာရပ်ခံချက်တွေကို လိုက်နာခြင်း မရှိတဲ့အပေါ် စိတ်ပျက်မိတယ် လို့လည်း အမေရိကန် နိုင်ငံခြားရေး ၀န်ကြီးဌာနရဲ့ ကြေညာချက်မှာ ဖော်ပြထားပါတယ်။

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည် အပါအ၀င် ၈၈ မျိုးဆက် ကျောင်းသား ခေါင်းဆောင်တွေ ဖြစ်တဲ့ မင်းကိုနိုင်၊ ကိုမင်းဇေယျာ၊ ကိုဂျင်မီ၊ ကိုပြုံးချိုနဲ့အခြား နိုင်ငံရေး အကျဉ်းသားတွေကို ဆက်လက် ဖမ်းဆီးထားတာဟာ တရားဥပဒေနဲ့ မညီဘူး၊ စစ်အစိုးရ အနေနဲ့ ဒီလို ဖမ်းဆီးထားတာကို မှန်တယ်ဆိုပြီး ဘယ်လိုမှ သက်သေ မပြနိုင်တဲ့ကြောင်း ကုလ သမဂ္ဂအဖွဲ့က သဘောထား ထုတ်ပြန်ထားတာကို အမေရိကန် နိုင်ငံခြားရေး ၀န်ကြီးဌာနက ကြေညာချက်မှာ ထပ်ဆင့် ဖော်ပြပါတယ်။

ဒေါ်အောင်ဆန်းစုကြည်ကို ဆက်လက်ဖမ်းဆီးထားတာဟာ မြန်မာစစ်အစိုးရ ကိုယ်တိုင် ထုတ်ပြန်ထားတဲ့ ဥပဒေတွေကို ချိုးဖောက်တာ ဆိုပြီးတော့လည်း ပြောပါတယ်။

ဒီကြေညာချက်နဲ့ပတ်သက်လို့ အမေရိကန် နိုင်ငံခြားရေးဝန်ကြီး ဌာန ပြောရေးဆိုခွင့် ရှိသူ မက်ဂန် မတ်ဆန် (Meggan Mattson) က ဗွီအိုအေကို အခုလိုပြောပါတယ်။

“မြန်မာနိုင်ငံအတွင်းမှာ နိုင်ငံရေးအကျဉ်းသားတွေကို ဆက်လက် ချုပ်နှောင်ထားတဲ့ အတွက်နဲ့ စစ်အစိုးရက နိုင်ငံတကာနဲ့ ကုလသမဂ္ဂ လုံခြုံရေး ကောင်စီရဲ့ တောင်းဆိုချက် တွေကို လေးစားလိုက်နာဖို့ တောင်းဆိုချက်တွေကို စစ်အစိုးရက မသိကျိုးကျွံ ပြုနေတာကို စိတ်ပျက်မိတဲ့ အကြောင်း” အမေရိကန် နိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူ မက်ဂန် မတ်ဆန်က ပြောဆိုသွားပါတယ်။

Ref: VOA News

....