နိုင်ငံရေးအကျဉ်းသား ၉ ဦး ထောင်ဒဏ်ချမှတ်

23 March 2009

နိုင်ငံရေးအကျဉ်းသားတွေ ပြန်လွှတ်ပေးဖို့ ကုလသမဂ္ဂ လူ့အခွင့်အရေး ကော်မရှင်ရဲ့တောင်းဆိုမှုတွေ မကြာခင်ကပဲ ထွက်ပေါ် လာခဲ့ပေမယ့် နိုင်ငံရေး အကျဉ်းသား မရှိပါဘူးလို့ ပြောနေတဲ့ မြန်မာ စစ်အစိုးရကတော့ နိုင်ငံရေး လှုပ်ရှားသူတွေ ကို ဖမ်းဆီး ထောင်ချမှုတွေ လုပ်နေဆဲ ဖြစ်ပါတယ်။ အခုနောက်ဆုံး အန်န်အယ်လ်ဒီ အမျိုးသား ဒီမိုကရေစီအဖွဲ့ချုပ် အဖွဲ့ဝင်တွေနဲ့ လူမှုရေး လုပ်ငန်းတွေ လုပ်ရင်းနဲ့ ဖမ်းဆီး ခံရသူတွေကို အကျိုးဆောင် ရှေ့နေတွေ၊ မိသားစုတွေ မပါဘဲနဲ့ ထောင်ဒဏ်တွေ ချမှတ်နေပါတယ်။ အကြောင်းစုံကို စုံစမ်းထားတဲ့ မနန္ဒာချမ်းက တင်ပြပေးထားပါတယ်။

၂၀၀၈ ကျောင်းသားသမဂ္ဂများအဖွဲ့မှ ကိုအောင်ကျော်ကျော်၊ ကိုသန်းထွန်းဇင်၊ ကိုထင်အောင်၊ ကိုဇေယျာဦး၊ ကိုမျိုးသန့်နဲ့ ကိုတင်ထွန်းတို့ ၆ ဦးကို ဒီကနေ့ပဲ အင်းစိန် အထူး တရားရုံးမှာ စီရင်ချက်တွေ ချမှတ်ခဲ့တာပါ။ သူတို့ ၆ ဦးထဲက
ကိုအောင်ကျော်ကျော်နဲ့ ကိုဇေယျာဦး ကိုတော့ ပုဒ်မ ၆ တရားမ၀င် အသင်းအဖွဲ့ ဖွဲ့စည်းမှု၊ ၅၀၅(ခ) နိုင်ငံတော် အကြည်ညို ပျက်စေမှု ပုဒ်မတွေနဲ့ ၇ နှစ် ထောင်ဒဏ်တွေ ချမှတ်ခဲ့ပါတယ်။

ကိုထင်အောင်၊ ကိုတင်ထွန်းနဲ့ ကိုသန်းထွန်းဇင်တို့ ကိုတော့ ပုဒ်မ ၆ တရားမ၀င် အသင်းအဖွဲ့ ဖွဲ့စည်းမှုနဲ့ ၅ နှစ် ချမှတ်ခဲ့ပြီး ကိုမျိုးသန့် ကိုတော့ ပုဒ်မ ၁၄၅ ဆန့်ကျင်သော အစုအဝေးမှာ ပါဝင်မှု နဲ့ ၂ နှစ် ချမှတ်ခဲ့ပါတယ်။ သူတို့ကို အခုလို စီရင်ချက် ချမှတ်ချိန်မှာနဲ့ စီရင်ချက် မချခင် တရားရုံးတင် စစ်ဆေး ချိန်တွေမှာ မိသားစုဝင်တွေ အနေနဲ့ သွားရောက် နားထောင်ခွင့် မရသလို၊ အကျိုးဆောင်ပေးမယ့် ရှေ့နေတွေလည်း လိုက်ပါ ဆောင်ရွက်ခွင့် မရှိဘူးလို့ ဒီကနေ့ စီရင်ချက် ချမှတ်ခံရတဲ့ အထဲမှာ ပါဝင်သူတဦးရဲ့ မိသားစုဝင်က အခုလို ပြောပြပါတယ်။

“မိသားစုဘက်က ရှေ့နေကလေ၊ ရှေ့နေတွေက ဖမ်းနေတာဗျ၊ ရှေ့နေတွေငှားရင် ပိုပြီးတော့တောင်မှ ပြဿနာ ဖြစ်သေး တယ်လေ။ ကျနော်တို့က တရားဥပဒေ စိုးမိုးရေးဆိုရင် သူ့ တရားဥပဒေအရ လူတယောက်ရဲ့ ရပိုင်ခွင့် အားလုံး ရစေချင်တာပေါ့။ ဥပဒေရဲ့ ရပိုင်ခွင့် ထဲမှာ အတူတူပဲ တပြေးညီ ဖြစ်စေချင်တယ်။ ပထမ ကျနော် ဗုဒ္ဓဟူးနေ့ ၁၈ ရက်နေ့က သွားတွေ့ လိုက်တယ်။ တွေ့တဲ့ အခါကျတော့ တရားသူကြီး တွေကိုလည်း ပြောထားတယ်၊ အက်စ်ဘီကိုလည်း ပြောထားတယ်။ ကျနော်တို့ မိသားစုနဲ့ နွေးနွေးထွေးထွေး တွေ့ချင်ပါတယ်လို့ ပြောထားတယ်တဲ့။ အဲဒီတော့ တွေ့ခွင့်ပေးပါ့မယ်လို့ ပြောပါ တယ်။ တရားသူကြီး ဘက်ကလား မသိဘူးပေါ့နော်။ ဒါပေမဲ့ တကယ်တမ်းကျတော့ ကျနော်တို့ အထဲတောင် ၀င်လို့ မရဘူး။”

အခုလို မိသားစုဝင်တွေအနေနဲ့ အကျိုးဆောင်ပေးမယ့် ရှေ့နေတွေ မပါဘဲ တရား စီရင်ချက် ချမှတ် ခံရတဲ့ အပေါ်မှာလည်း

“စိတ်ထဲမှာတော့ သိပ်ပြီး ဘ၀င်မကျဘူးပေါ့။ ဒါပေမယ့် သိပ်တော့ ၀မ်းနည်းတာတို့ ဘာတို့ မရှိပါဘူး။ ကလေးတွေက လုပ်သင့် လုပ်ထိုက်တယ် ထင်လို့ လုပ်ကြတာပဲလေ။ သူတို့ရဲ့ လွတ်လပ်စွာ သဘောထား ကွဲလွဲခွင့်ပေါ့၊ သူတို့ရဲ့ ရင်ထဲမှာ ရှိတဲ့ဆန္ဒ ဖော်ထုတ်ကြတာပဲ။ တိုင်းပြည် ပျက်အောင်ဖျက်မယ့် ကလေးတွေတော့ မဟုတ်ပါဘူး ခင်ဗျာ။ တိုင်းပြည် ကောင်းစား စေချင်လို့ ဆောင်ရွက်တဲ့ ကလေးတွေပဲ ဖြစ်ပါတယ်။”

မိသားစုဝင်တဦး ပြောပြခဲ့တာ ဖြစ်ပါတယ်။

အခု စီရင်ချက်ချမှတ်ခံခဲ့ရသူ ၂၀၀၈ ကျောင်းသားသမဂ္ဂ အဖွဲ့ဝင်တွေကို ၂၀၀၈ ခုနှစ် သြဂုတ်လ ၇ ရက်နေ့မှာ အာဏာပိုင် တွေက ဖမ်းဆီးခဲ့တာ ဖြစ်ပြီး စစ်ကြောရေးမှာ ၁၅ ရက်လောက် ထိန်းသိမ်း ခဲ့ပါတယ်။ အဲဒီနောက် ၉ လပိုင်း ၉ ရက်နေ့ကျမှ အင်းစိန်ထောင်မှာ ပြောင်းရွှေ့ ထိန်းသိမ်းခဲ့တာ ဖြစ်ပါတယ်။

အလားတူပဲ အန်န်အယ်လ်ဒီ အမျိုးသားဒီမိုကရေစီအဖွဲ့ချုပ် လူငယ် အဖွဲ့ဝင်တွေ ဖြစ်တဲ့ မထက်ထက်ဦးဝေ၊ ကိုဝင်းမြင့်မောင် (ခေါ်) ကိုပဲပြုတ်နဲ့ ကိုထွန်းထွန်းဝင်းတို့ ၃ ဦးကိုလည်း ဒီကနေ့ အင်းစိန် အထူးတရားရုံးမှာ အရေးပေါ် စီမံမှု အက်ဥပဒေပုဒ်မ ၅ ညနဲ့ ထောင်ဒဏ် ၅ နှစ်စီ စီရင်ချက် ချမှတ်ခဲ့ပါတယ်။ သူတို့တွေကို စီရင်ချက် ချမှတ်ချိန်မှာလည်း အကျိုးဆောင် ရှေ့နေတွေ၊ မိသားစုဝင်တွေ သွားရောက်ခွင့် မရခဲ့ပါဘူး။ သူတို့ ၃ ဦးကို အာဏာပိုင်တွေကနေ ပြီးခဲ့တဲ့ နှစ်ကုန် ဒီဇင်ဘာလ ၃၀ ရက်နေ့က ပြည်သူ့ လွှတ်တော်ရှေ့ ချီတက် ဆန္ဒပြမှုနဲ့ ဖမ်းဆီးခဲ့တာပါ။

ဖမ်းဆီးစဉ်က သူတို့ ၃ ဦး အပါအ၀င် စုစုပေါင်း အန်န်အယ်လ် ဒီအဖွဲ့ဝင် ၉ ဦးဟာ ဒေါ်အောင်ဆန်းစုကြည် လွတ်မြောက် ပါစေ ဆိုတဲ့ ဆိုင်းဘုတ်ကို ကိုင်ဆောင်ရင်း အန်န်အယ်လ်ဒီ ရုံးချုပ်ရှေ့ကနေ ပြည်သူ့ လွှတ်တော်ရှေ့ကို ချီတက်ခဲ့ကြတာ ဖြစ်ပါတယ်။ နောက်ပိုင်းမှာ အာဏာပိုင်တွေ ကနေ အဲဒီထဲက ၆ ဦးကို ပြန်လွှတ်ပေးခဲ့ပြီး မထက်ထက်ဦးဝေ၊ ကိုဝင်းမြင့်မောင် နဲ့ ကိုထွန်းထွန်းဝင်းတို့ ၃ ဦးကိုတော့ ဒီကနေ့မှ ၅ ညနဲ့ ထောင် ၅ နှစ်စီ ချခဲ့တာဖြစ်ပါတယ်။

အခု လလယ်လောက်ကပဲ ကုလသမဂ္ဂရဲ့ မြန်မာပြည်ဆိုင်ရာ လူ့အခွင့် အရေး အထူး စုံစမ်းစစ်ဆေးသူ တောမတ်စ် အိုဟဲ ကင်တားနား (Tomas Ojea Quintana) က ကုလသမဂ္ဂ လူ့အခွင့်အရေး ကောင်စီမှာ တင်သွင်းခဲ့တဲ့ အစီရင်ခံစာ ထဲမှာ မြန်မာ စစ်အစိုးရအနေနဲ့ ၂၀၁၀ ခုနှစ်ကြရင် ကျင်းပမယ့် ရွေးကောက်ပွဲ မတိုင်ခင် မြန်မာပြည်မှာရှိတဲ့ နိုင်ငံရေး အကျဉ်းသားတွေ အားလုံးကို လွှတ်ပေးဖို့ အရေးကြီးတယ်လို့ ပြောဆိုခဲ့ပြီး ရက်ပိုင်းအတွင်းမှာပဲ အခုလို တက်ကြွ လှုပ်ရှား သူတွေကို ထောင်ဒဏ်တွေ ဆက်လက် ချမှတ်ခဲ့တာ ဖြစ်ပါတယ်။ ဒါ့အပြင် အခုလို အကျိုးဆောင် ရှေ့နေတွေ လိုက်ပါခွင့် မရှိဘဲ ထောင်ဒဏ်တွေ ချမှတ်ခဲ့တာတွေ အပေါ် မြန်မာပြည်ရဲ့ တရားစီရင်ရေး စနစ်မှာ အားနည်းချက်နဲ့ ပတ်သက်လို့လည်း မစ္စတာကင်တားနားက ထောက်ပြ ပြောဆိုခဲ့ပါတယ်။

Ref: VOA News