ပြည်နယ်၊ တိုင်းဒေသကြီး ၀န်ကြီးဌာန ၉ ခု ပြင်ဆင်ဖွဲ့စည်း

ဦးကျော်ထင်
ကြာသပတေး, 30 ဇွန် 2011

ဇွန်လ ၂၉ နဲ့ ၃၀ နှစ်ရက်ဆက်တိုက် ကျင်းပခဲ့တဲ့ ပြည်နယ်နဲ့ တိုင်းဒေသကြီး လွှတ်တော်တွေရဲ့ အထူး အစည်းအဝေး တွေမှာ ၀န်ကြီးဌာန ၉ ခုကို ပြင်ဆင် ဖွဲ့စည်း လိုက်ပါတယ်။ အရင်က သက်ဆိုင်ရာ တိုင်းဒေသ ကြီးတွေရဲ့ လိုအပ်ချက်အရ ဖွဲ့စည်းထားတဲ့ ၀န်ကြီး ဌာနတွေကို ဖျက်သိမ်း လိုက်ပြီး ပြည်နယ်နဲ့ တိုင်းဒေသကြီး အားလုံးမှာ တပြေးညီဖြစ်အောင် ဖွဲ့စည်းလာတာ ဖြစ်ပါတယ်။ အပြည့်အစုံကို စုံစမ်းထားတဲ့ ဗွီအိုအေ ထိုင်းအခြေစိုက် သတင်းထောက် ကိုကျော်ထင်က တင်ပြပေးထားပါတယ်။

ပြည်နယ်နဲ့ တိုင်းဒေသကြီး လွှတ်တော်တွေရဲ့ အထူး လွှတ်တော်အစည်းအဝေးကို မနေ့ကနဲ့ ဒီကနေ့ ၂ ရက် ကျင်းပခဲ့ပြီး ၀န်ကြီးဌာနတွေကို ကြေညာရုံပဲဖြစ်လို့ အစည်းအဝေးက ၁၀ မိနစ်သာသာပဲ ကျင်းပပြီး ပြီးစီး သွားပါတယ်။

ရခိုင်ပြည်နယ်လွှတ်တော် ဥပဒေပြုရေး ကော်မတီဝင် ဦးအောင်မြကျော်က လက်ရှိ ၀န်ကြီးတွေပဲ အပြောင်းအလဲ ဖြစ်တဲ့ ဌာနတွေကို တာဝန် ယူသွားမယ်လို့ ဆိုပါတယ်။

“ပြည်နယ်လွှတ်တော် အစည်းအဝေးတော့ ပြီးသွားပါပြီ။ အပြောင်းအလဲကတော့ ဌာနတွေကို ပြောင်းလိုက် တာပါ။ တချို့ ဌာနတွေကို ဗဟိုက ကိုင်သွားတယ်။ ထပ်ပြီးတိုးလာတဲ့ ဌာနတွေကိုပဲ အပြောင်းအရွှေ့ လုပ်တဲ့ သဘောမျိုးပါ။ လူကတော့ ဒီအတိုင်းပါပဲ။ လူ ၉ ယောက် ကတော့ ၉ ယောက်ပဲ။ ဘယ်ဌာနကို ဘယ်သူ ကိုင်ရမယ်ဆိုတာ မနက်ဖြန်မှ ဥက္ကဋ္ဌက ကြေညာပေးမယ်။ အစည်းအဝေး ကတော့ အဲဒီ ဌာနတွေကို ကြေညာတာနဲ့ဆိုတော့ ၁၀ မိနစ်လောက်ပဲ ကြာပါတယ်။”

စောစောပိုင်းတုန်းကတော့ လွှတ်တော်သက်တမ်း ၅ လအတွင်း ပထမအကြိမ်ခေါ်တဲ့ အထူး အစည်းအဝေးမို့ ကိုယ်စားလှယ် တွေက ဒီသက်တမ်းထဲ လိုအပ်ချက်တွေကို တင်ပြဖို့ ပြင်ဆင်ခဲ့ပေမဲ့ အခြေအနေ မပေးခဲ့ပါဘူး။

ရန်ကုန်တိုင်းဒေသကြီးမှာ အရင်က ရှိထားတဲ့ ၀န်ကြီးဌာနတချို့ အပြောင်းအလဲ ဖြစ်လာတယ်လုိ့ လွှတ်တော် ကိုယ်စားလှယ် ဒေါက်တာ ညိုညိုသင်းက ပြောပါတယ်။

“၀န်ကြီးဌာန ၉ ခုကို ပြင်ဆင်ပြောင်းလဲပြီး ၀န်ကြီးတွေကို နေရာပြန်ချပေးတာ။ အပြောင်းအလဲ နည်းနည်း ရှိတယ်။ နာမည်လေးတွေ ပြောင်းတယ်။ တချို့ ၀န်ကြီးဌာနတွေ၊ ပညာရေး၊ ကျန်းမာရေး၊ နိုင်ငံခြားရေးတို့ ပြုတ်သွားတာ။ လူသစ်တွေတော့ မပါဘူး။ ဒီလူတွေကိုပဲ ၀န်ကြီးဌာန ပြောင်းပစ်တာပေါ့၊ ပြောင်းတယ်ဆိုတာ ပြုတ်သွားတဲ့ ၀န်ကြီးဌာနတွေ ရှိတယ်။

“ခုနက ကျမပြောသလို ပညာရေး၊ ကျန်းမာရေး၊ နိုင်ငံခြားရေး၊ လူဝင်မှု ကြီးကြပ်ရေးတို့၊ ယဉ်ကျေးမှုနဲ့ သာသနာရေးတို့၊ ဒါတွေ ပြုတ်သွားတယ်။ ပြုတ်သွားတော့ လစ်လပ်နေတဲ့ အဲဒီ ၀န်ကြီးတွေကို တခြား ၀န်ကြီးဌာနတွေမှာ ခန့်လိုက်တယ်။ အရင်က ၄ ခုကို တယောက်ထဲ ကိုင်တာတွေ ရှိတယ်မလား၊ အခုက တယောက်ကိုတခု၊ အလွန်ဆုံး ၂ ခုပဲ ဖြစ်သွားတယ်။”

ကချင်ပြည်နယ်၊ ရခိုင်ပြည်နယ်၊ စစ်ကိုင်းနဲ့ ရန်ကုန်တိုင်း ဒေသကြီးတို့လို နေရာတွေမှာ တိုင်းရင်းသား ရေးရာ ၀န်ကြီးတွေ ရှိကြပါတယ်။ ဒီဝန်ကြီးတွေ ထဲက အများစုဟာ အခုထိ သက်ဆိုင်ရာ အစိုးရ အဖွဲ့ရုံးတွေမှာ ရုံးခန်း နေရာတောင် မရကြ သေးဘူးလို့ သိရပါတယ်။

အမည်မဖော်လိုတဲ့ တိုင်းရင်းသားရေးရာ ၀န်ကြီးတယောက်က သူတို့မှာ မယ်မယ်ရရလည်း အလုပ် မရှိသလို အစိုးရအဖွဲ့ အစည်းအဝေး တွေကိုလည်း မတက်ရ ကြောင်းနဲ့ အစိုးရအဖွဲ့ ကိစ္စတွေကို ပြည်တွင်း ပြည်ပ မီဒီယာတွေနဲ့ ဆက်သွယ်ပြောရင် လွှတ်တော် ကိုယ်စားလှယ် တာဝန်ကပါ ဖြုတ်ပစ်မယ်လို့ ခြိမ်းခြောက်မှုတွေ ရှိကြောင်း ဗွီအိုအေကို ပြောပါတယ်။

Ref: VOA News