မတရားတဲ့ ထိုင်းအလုပ်ရှင် မြန်မာအလုပ်သမားတွေ တရားစွဲမည်

မအေးအေးမာ
ဗုဒ္ဓဟူး, 20 ဧပြီ 2011

ဘန်ကောက်မြို့ ဒင်ဒန်း မြို့နယ်ထဲက အိမ်တွင်းစက်ချုပ်ရုံမှာ ပိတ်လှောင်ပြီး အလုပ်ခိုင်းစေ ခံထားရတဲ့ မြန်မာ အလုပ်သမား ၃၉ ယောက်ကို ဧပြီလ ၁၉ ရက်မှာ ထိုင်းလူကုန်ကူးမူ နှိမ်နှင်းရေး အထူးတပ်ဖွဲ့က ကယ်ထုတ် ပေးခဲ့ပါတယ်။ ပြန်လည် လွတ်မြောက် လာတဲ့ မြန်မာ အလုပ်သမား တွေထဲက ၁၅ ဦးဟာ အလုပ်ရှင်ကို တရားစွဲဆိုဖို့ ပြင်ဆင် နေပါတယ်။ ဒီအကြောင်း အပြည့်စုံကို ထိုင်း အခြေစိုက် သတင်းထောက် မအေးအေးမာက သတင်း ပေးပို့ထားပါတယ်။

အိမ်တွင်းအထည်ချုပ် စက်ရုံမှာ အတင်းအကျပ် အလုပ်စေခိုင်း ခံထားရတဲ့ မြန်မာ အလုပ်သမား ၃၉ ယောက် ဟာ သူတို့ကို ထိုင်းလူကုန်ကူးမူ တိုက်ဖျက်ရေး အထူးရဲတွေက ကယ်ထုတ်ပြီး ပြန်လည် လွတ်မြောက်လာ ပြီးတဲ့နောက် သူတို့ထဲက ၁၅ ဦးဟာ လူသား မဆန်စွာ ပြုမူခဲ့တဲ့ သူတို့ အလုပ်ရှင်ကို လူကုန်ကူးမှု၊ အိမ်တွင်းမှာ အတင်းအကျပ် ပိတ်လှောင်ပြီး အလုပ်စေခိုင်းမှု၊ လုပ်အားခ နစ်နာ စေမှုတွေနဲ့ တရားစွဲတော့မှာ ဖြစ်ပါတယ်။ တရားလို အဖြစ် ဖမ်းဆီရာမှာ တိုင်ချက်ဖွင့်ခဲ့တဲ့ ထိုင်းနိုင်ငံရောက် မြန်မာ နိုင်ငံသားများ အဖွဲ့ တာဝန်ခံ ဦးကျော်သောင်းက ဦးဆောင်ပြီး တရားစွဲဆိုမှာ ဖြစ်ကြောင်း အခုလို ပြောပြပါတယ်။

“အလုပ်သမားတွေအတွက် ဆုံးရှုံးနစ်နာခတွေ၊ အလုပ်သမားအခွင့်အရေး ချိုးဖောက် ခံရမှုတွေ၊ အလုပ်သမား တွေကို မတရား သဖြင့် ပိတ်လှောင်ပြီးတော့ အလုပ်လုပ်ခ အပြည့်အ၀ မပေးတာတွေ အကုန်လုံးပေါ့။ အလုပ်သမားတွေရဲ့ ဆုံးရှုံး နစ်နာမှု ဟူသမျှကို အဲဒီ အလုပ်သမားတွေရဲ့ ကိုယ်စား တရားလို အဖြစ် အမှုဖွင့်ထားတာပါ။ ဒီ အလုပ်သမားတွေရဲ့ ကိုယ်စား တရားလို ဖြစ်ပါတယ်။”

များသောအားဖြင့် အလုပ်ရှင်တွေဟာ နယ်မြေခံ ရဲတွေကို ညှိနှိုင်းထားတာတွေ ရှိတတ်တာကြောင့် ဒင်ဒန်း နယ်မြေခံ ရဲစခန်းကို အကြောင်း မကြားဘဲ လူကုန်ကူးမူ တိုက်ဖျက်ရေး အထူးတပ်ဖွဲ့ကို တိုက်ရိုက် ဆက်သွယ်ခဲ့တဲ့ အကြောင်းကိုလည်း ပြောပြပါတယ်။ အလုပ်သမား တွေထဲက ထွက်ပြေး လာခဲ့တဲ့သူ တဦးက သူတို့ နေထိုင်ခဲ့တဲ့ နေရာကို လိုက်လံ လမ်းပြခဲ့ပြီး အလုပ်ရှင်ကို ဖမ်းဆီး ရမိဖို့ ကြိုးစား ခဲ့တာလို့ ဆိုပါတယ်။

၁၉ ရက်နေ့ကတော့ သက်ဆိုင်ရာ အာဏာပိုင်တွေက စစ်ဆေးနေစဉ်မှာပဲ အလုပ်ရှင်က ရဲတွေကို လမ်းပြ အဖြစ် လုပ်ပေးခဲ့သူ မောင်ဖြိုးဝေဦးကို လူရှေ့မှာပဲ ရိုက်နှက်တာ လုပ်ခဲ့သေးကြောင်း မောင်ဖြိုးဝေဦးက အခုလို ပြောပြပါတယ်။

“ကျနော်နဲ့ လမ်းမှာ မျက်နှာချင်းဆိုင် တိုးတယ်။ မျက်နှာချင်းဆိုင်မှာ ကျနော် လာနေရင်းနဲ့ ရိုက်ချ လိုက်တာ။ ကျနော်က အခုချိန်မှာ သူဌေးမရဲ့ အမုန်းဆုံးလူ ဖြစ်နေတယ်။ အခု သူဌေးမက အစစ အရာရာ ကျနော့်ကိုပဲ ကျနော့်ကြောင့်ပဲ ဖြစ်ရတယ်ပေါ့။ ကျနော် ကလည်း အဲဒီတုန်းက ထွက်ပြေး သွားတဲ့သူ ဆိုတော့။ တကယ်လို့ ဒီဟာတွေ ပြီးပြတ်သွားပြီ ဆိုရင်တောင်မှ ဒီနယ်မှာ ဆက်လုပ်ဖို့ ဆိုတာ စိတ်ထဲမှာ စိုးရိမ်စိတ်တော့ ဖြစ်တယ်။ ကိုယ့်အနေနဲ့ အဲဒီလို လုံခြုံမှု မရှိဘူး ဆိုရင်တော့ စိုးရိမ်ရတဲ့ သဘောမှာ ရှိတယ်လေ။”

အလုပ်ရှင်သူဌေးမက မောင်ဖြိုးဝေဦးကို လူကုန်ကူးမူ နှိမ်နှင်းရေး အထူးတပ်ဖွဲ့ ရုံးထဲမှာတောင် ခြိမ်းခြောက်မူတွေ လုပ်ခဲ့ သေးတယ်လို့ ဆိုပါတယ်။ လက်ရှိမှာတော့ အလုပ်သမား ဥပဒေ ချိုးဖောက်မှု စွပ်စွဲချက်နဲ့ အလုပ်ရှင် လင်မယား ၂ ဦးကို ရဲတွေက ဖမ်းဆီး ထားပါတယ်။

၂၀ ရက်နေ့မှာတော့ အလုပ်သမားတွေထဲက ၁၅ ဦးက တရားလိုအဖြစ် တရား စွဲဆိုမှာ ဖြစ်တာကြောင့် သူတို့တွေကို ပထုံဌာနီ နဲ့ နွံထဘူရီက ကယ်ဆယ်ရေး စခန်းကို ပို့ဆောင်မယ့် အချိန်မှာ ကျန်တဲ့ တရား မစွဲဘူးဆိုတဲ့ အလုပ်သမား တွေကိုတော့ ဒင်ဒန်း ရဲစခန်းကနေ လက်ထိပ်ခတ် သံကြိုးနဲ့ချည်ပြီး ကားပေါ်ကို ခေါ်ထုတ် သွားတာကြောင့် တရားစွဲဖို့ ကျန်ခဲ့တဲ့ အလုပ်သမားတွေ အတွက် စိတ်မသက်မသာနဲ့ ထိတ်လန့်မူတွေ ဖြစ်ခဲ့ ရတယ်လို့ ဆိုပါတယ်။

ဒီလို အလုပ်သမားတွေအနေနဲ့ အားကိုးရာမဲ့သလို ဖြစ်နေချိန်မှာ မြန်မာ သံရုံးဘက်က အကူအညီ ပေးတာ မျိုးတွေ မတွေ့ရှိ ရဘူးလို့ ဦးကျော်သောင်းက ပြောပြပါတယ်။

ထိုင်းနိုင်ငံအနေနဲ့ လူကုန်ကူးမူကိစ္စကို ဥပဒေအရ လုပ်ဆောင်မူတွေ ပြီးလို့ နစ်နာကြေး ပေးမယ် ဆိုရင် မြန်မာ အာဏာပိုင်တွေ လက်ထဲကနေ တဆင့် တရားဝင် ပေးအပ်မယ့် အခြေအနေ ရှိတာကြောင့် တရားဝင် မြန်မာငွေလဲ နှုန်းနဲ့ အလုပ်သမားတွေ နစ်နာကြေး ပြန်ရမယ် ဆိုရင်လည်း အလုပ်သမားတွေ အတွက် နစ်နာမူတွေ ထပ်ဖြစ် လာနိုင်တယ် လို့လည်း ပြောပြပါတယ်။ လက်ရှိ မှာတော့ အလုပ်သမား ၁၄ ဦးကို ကယ်ဆယ်ရေး စခန်းတွေမှာ ထားပြီး အဓိက သက်သေ ကိုဖြိုးဝေဦး ကိုတော့ လုံခြုံရေးအရ လူကုန်ကူးမှု တိုက်ဖျက်ရေး အထူးတပ်ဖွဲ့က ရဲစခန်းမှူး ကိုယ်တိုင် တာဝန်ယူ ပေးထားပါတယ်။


Ref: VOA News