05 October 2009
ကချင်ပြည်လွတ်လပ်ရေးအဖွဲ့ (KIO) နဲ့ မြန်မာ စစ်အစိုးရကြား နောက်ဆုံး အကြိမ် တွေ့ဆုံ ဆွေးနွေးပြီးတဲ့ နောက်မှာ ရေရှည် တည်တံ့တဲ့ ငြိမ်းချမ်းရေးကို တည်ဆောက် နိုင်ဖို့အတွက် နှစ်ဘက် အပေးအယူ လုပ်ဖို့ လိုအပ်တယ်လို့ KIO အဖွဲ့ဘက်က ထုတ်ဖော် ပြောဆို လာပါတယ်။ ဒီလို ထုတ်ဖော်ပြောဆို လာတာကတော့ မြန်မာ စစ်အစိုးရ ဘက်က KIO ရဲ့ လက်နက်ကိုင် တပ်ဖွဲ့ဖြစ်တဲ့ KIA ကို နယ်ခြားစောင့်တပ် အဖြစ် အသွင်ပြောင်းဖို့ ထပ်မံ တောင်းဆို လာလို့ ဖြစ်ပါတယ်။ အပြည့်အစုံကို ထိုင်းအခြေစိုက် သတင်းထောက် ကိုမိုးဇော်က တင်ပြထားပါတယ်။
KIO နဲ့ မြန်မာစစ်အစိုးရတို့ အကြားမှာ လွန်ခဲ့တဲ့ အပတ် သြဂုတ်လ ၂၉ ရက်နေ့က ကချင်ပြည်နယ် မြို့တော် မြစ်ကြီးနားမှာ နောက်ဆုံး အကြိမ် တွေ့ဆုံ ဆွေးနွေးခဲ့တာပါ။ ဒီဆွေးနွေးပွဲမှာ မြန်မာ စစ်အစိုးရ ဘက်က အရင်က တောင်းဆိုထားတဲ့ အတိုင်း KIA ကို နယ်ခြားစောင့်တပ် အဖြစ် အသွင်ပြောင်းဖို့ ထပ်မံ ဆွေးနွေး ခဲ့တယ်လို့ KIO အဖွဲ့ရဲ့ အထွေထွေ အတွင်းရေးမှူး ဒေါက်တာလဂျာက အခုလို ထုတ်ဖော် ပြောဆိုပါတယ်။
“တပ်အမည်ကတော့ နယ်ခြားစောင့်တပ်ပဲ ဖြစ်ရမယ်ဆိုပြီး ပြောပါတယ်။ ဒါပေမဲ့ ကျနော်တို့လည်း နယ်ခြားစောင့် တပ်ရဲ့ သဘော သဘာဝ၊ အုပ်ချုပ်မှု၊ ကွပ်ကဲမှု အစစ အရာရာ ကျနော်တို့ မသိသေးဘူး။ မသိသေးတော့ အဲဒါတွေကို ကျနော်တို့ အချက်အလက် မေးမြန်းလိုတဲ့ သဘောပဲ ရှိပါတယ်။”
မြန်မာစစ်အစိုးရက KIO အပါအ၀င် အပစ်ရပ် အဖွဲ့စည်း တွေကို လွန်ခဲ့တဲ့ ဧပြီလကုန် ပိုင်းက နယ်ခြားစောင့်တပ် ဖွဲ့စည်းဖို့ တောင်းဆို ခဲ့ပါတယ်။ ဒါပေမဲ့ KIO က တပ် အသွင် ပြောင်းရေးကို မူအားဖြင့် လက်ခံခဲ့ပေမဲ့ နယ်ခြားစောင့်တပ် အစား ကချင်ပြည်ဒေသ ကာကွယ်ရေး တပ်အဖြစ် အသွင် ပြောင်းလဲဖို့နဲ့ ဒီလို အသွင်ပြောင်းလဲ ဖွဲ့စည်းရာမှာလည်း ၂၀၁၀ ရွေးကောက်ပွဲ အပြီး အရပ်သား အစိုးရ ပေါ်ပေါက်လာတဲ့ အချိန်မှ အဆုံးသတ် ဆွေးနွေးဖို့ ပြန်လည် တောင်းဆို ထားပါတယ်။
ဒါကို မြန်မာစစ်အစိုးရဘက်က လက်မခံခဲ့ဘဲ အခုနောက်ဆုံး ဆွေးနွေးပွဲမှာ နယ်ခြားစောင့်တပ် ဖွဲ့စည်းရေးကို ထပ်မံ တောင်းဆိုလာတာ ဖြစ်ပါတယ်။ ဒီလိုအခြေအနေမှာ KIO နဲ့ မြန်မာ စစ်အစိုးရ အကြား ရေရှည် ခိုင်မြဲတဲ့ ငြိမ်းချမ်းရေးကို ဆက်လက် ထိန်းသိမ်းမယ် ဆိုရင် နှစ်ဘက် အပေးအယူလုပ်ဖို့ လိုအပ်မယ်လို့ ဒေါက်တာလဂျာက ဆက်ပြောပါတယ်။
“ကျနော်တို့ ငြိမ်းချမ်းရေးက ပျက်ပြားလို့ မဖြစ်ဘူး။ တည်တံ့တဲ့ ငြိမ်းချမ်းရေး ရရှိအောင် ကြိုးစားရမယ်။ ကျနော်တို့ ဒီ အသွင် ကူးပြောင်းရေး ကိစ္စမှာတော့ စစ်နဲ့၊ လက်နက်နဲ့ ဖြေရှင်းလို့ အဖြေ မရနိုင်ဘူး ဆိုတဲ့၊ စစ်မက်နဲ့ တိုက်ပွဲနဲ့ ဖြေရှင်းတဲ့ နည်းနာကိုတော့ ကျနော်တို့ လုံးဝ မလိုလားဘူး ဆိုတဲ့ သဘော ထုတ်ပြန်ထားပြီး ဖြစ်ပါတယ်။ ငြိမ်းချမ်းရေး ပျက်ပြားလို့တော့ မကောင်းဘူးလေ။ ဆိုတော့ အပေး အယူတော့ ရှိရမှာပေါ့။ နှစ်ဘက် စလုံးက ဒီဟာကို အချိန်ယူပြီး တော့မှ အပေးအယူ ဆွေးနွေးတဲ့ သဘောတော့ ရှိရမှာပါ။”
KIO ဘက်ကတော့ တပ်အသွင်ပြောင်းလဲရေးကို ဆက်လက် ဆွေးနွေးမယ်လို့ ပြောပါတယ်။ အခုနောက်ဆုံး ဆွေးနွေးပွဲ မှာတော့ မြန်မာ စစ်အစိုးရ ဘက်က တပ်အသွင် ပြောင်းလဲရေးကို ဘယ်အချိန် နောက်ဆုံးထား ပြောင်းလဲရမယ် ဆိုတာကိုတော့ ထပ်မံ ဆွေးနွေးတာ မရှိခဲ့ပါဘူး။
KIO နဲ့ မြန်မာစစ်အစိုးရတို့ဟာ တပ်အသွင် ပြောင်းလဲ ရေးနဲ့ ပတ်သက်ပြီး ၈ ကြိမ် ဆွေးနွေးခဲ့ ပေမဲ့ အခုချိန် ထိတော့ တိကျတဲ့ အဖြေ မရသေးပါဘူး။
Ref: VOA News
Tuesday, October 6, 2009
တပ်အသွင်ပြောင်းရေး KIO အပေးအယူ ပြုလုပ်လို
Subscribe to:
Post Comments (Atom)
Posts
0 comments:
Post a Comment