အစိုးရတပ်က ကချင်ဘက် လက်နက်ကြီး ပစ်ခတ်

ဖနိဒါ
သောကြာနေ့၊ ဇူလိုင်လ ၂၂ ရက် ၂၀၁၁

ချင်းမိုင် (မဇ္စျိမ) ။ ။ မည်သည့်ဘက်သို့ ရည်ရွယ်ပစ်ခတ်မှန်း မသိရသေးသော လက်နက်ကြီး အလုံး ၂ဝ ကျော် ပစ်ခတ်မှုကို ကချင်ပြည်နယ် ဒေါ့ဖုန်းယန်မြို့နယ်ခွဲ အခြေစိုက် အစိုးရ အမြောက်တပ်က ကြာသပတေးနေ့ ညပိုင်းတွင် ပြုလုပ်ခဲ့ကြောင်း ကချင် လွတ်မြောက်ရေး အဖွဲ့ KIO က ပြောသည်။

KIO ဌာနချုပ်ရှိရာ လိုင်ဇာမြို့မှ ၂၅ မိုင်အကွာရှိ အဆိုပါ အမြောက်တပ်က မည်သည့်အရပ်သို့ ချိန်ရွယ် ပစ်ခတ် သည်ကို မသိရ သော်လည်း ည ၉ နာရီမှ ၁၁ နာရီအတွင်း လက်နက်ကြီး ပေါက်ကွဲသံများ လိုင်ဇာမြို့မှ အတိုင်းသား ကြားခဲ့ရသည်။

“ကျနော်တို့ဘက်ကို ပစ်တယ်ထင်တယ်။ ကျနော်တို့ တပ်ရင်း ၂၄ ကို ပစ်တာလား၊ ဘယ်မှာ ထိခိုက်တာရှိမရှိ မသိသေးတော့ ပြောလို့ မရသေးဘူး။ ၈၁ နဲ့ ၇၆ မမ လက်နက်တွေ ဖြစ်မယ်ထင်တယ်။ ဘယ်နေရာမှာ ကျတယ် ဆိုတာ အခုထိ စုံစမ်း နေပါတယ်။ အလုံး ၂ဝ ကျော်လောက်” ဟု KIO တွဲဘက်အတွင်းရေးမှူး ဦးလနန်က မဇ္ဈိမကို ပြောသည်။ KIO ကို ခြိမ်းခြောက်ခြင်း ဖြစ်နိုင်သည်ဟု ဆိုသည်။

KIA တပ်မဟာ ၅ လက်အောက်ခံ တပ်ရင်း ၂၄ မှာ ဒေါ့ဖုန်းယန်အရှေ့ဘက်၌ တည်ရှိသည်။

မြစ်ကြီးနား-ဗန်းမော်ကားလမ်းရှိ ဒေါ့ဖုန်းယန်မြို့နယ် ခလားနှင့် နွမ်လန်းရွာကြား ပျဉ်နှင့် သံဘောင်ဖြင့် လုပ်ထားသော တံတား ၂ စင်းကို KIO တပ်ဖွဲ့များက ကြာသတေးနေ့တွင် မိုင်းခွဲခဲ့အပြီး လက်နက်ကြီး ပစ်ခတ်မှု ဖြစ်လာခဲ့သည်ဟု လိုင်ဇာမှ အရာရှိ တဦးကလည်း မဇ္စျိမကို ပြောသည်။

“ဒေါဖုန်းယန်ရဲ့ ခလားနဲ့ နွမ်လန်းရွာ အောက်ဘက်က တံတားရယ်၊ အထက်က တံတားရယ် ဖောက်ခွဲ လိုက်တယ်။ ည ၈ နာရီ ကျော်ကျော်လောက်မှာ တံတား မိုင်းခွဲတာကို အစိုးရဘက်က ဘယ်လို ထင်သလဲ မသိဘူး၊ လက်နက်ကြီးနဲ့ ပစ်တယ်။ ၂ စင်းတော့ မိုင်းခွဲတယ်။ တစင်းက မိုင်းမကွဲဘူးလို့ ပြောတယ်” ဟု သူက ဆိုသည်။

ဗုဒ္ဓဟူးနေ့ ညတွင်လည်း မြစ်ကြီးနား-ဗန်းမော်ကားလမ်းရှိ ဝိုင်းမော်မြို့နယ် ဂါးရားယန်နှင့် ကဇူးရွာအကြား ပမွေမြစ်ပေါ် ဆောက်လုပ် ထားသော ပေ ၃ဝ ခန့်အရှည် ကွန်ကရစ်တံတားကို မိုင်းခွဲ ဖျက်ဆီး ခဲ့သေးသည်။

ယခုရက်ပိုင်းအတွင်း မြစ်ကြီးနားနှင့် ဗန်းမော်ဘက်မှ အစိုးရ စစ်ယာဉ်တန်းများနှင့် စစ်အင်အား တိုးချဲ့လာသဖြင့် တံတားများ ဖျက်ဆီး ပစ်ရသည်ဟု ဦးလနန်က ဆိုသည်။

“အစိုးရတပ်ရဲ့ လှုပ်ရှားမှုကြောင့် ကျနော်တို့ဘက်က ကြိုတင်စီမံပြီး လုပ်ရတာပဲ။ စစ်ယာဉ်တန်းတွေလည်း ကျနော်တို့ လိုင်ဇာဘက်ကို တက်လာတယ်လို့ သတင်း အတိအကျ ရလာတယ်။ အဲဒါကြောင့် ကျနော်တို့ လုပ်သင့်လို့ လုပ်တယ်လို့ သတ်မှတ်တယ်” ဟု သူက ပြောသည်။

ဖားကန့်မြို့နယ် နမ်တိန်ရွာအနီး တောင်ကုန်းတခုပေါ်ရှိ ကားလမ်းတွင် မြောက်ပိုင်းတိုင်း စစ်ဌာနချုပ် - မပခ လက်အောက်ခံ တပ်ရင်း ၂၉၈ မှ တပ်ဖွဲ့များနှင့် KIO စစ်ယူနီဖောင်းဝတ် အစိုးရ တပ်ဖွဲ့များ အကြား ဇူလိုင် ၂ဝ ရက် ညနေပိုင်းတွင် မှားယွင်း ပစ်ခတ်မှု ဖြစ်ခဲ့ ကြောင်းနှင့် တနာရီခန့်ကြာ တိုက်ပွဲအတွင်း ဒုဗိုလ်တဦး၊ တပ်ကြပ် တဦးနှင့် တပ်သားတဦး သေဆုံးကာ၊ ၇ ဦး ဒဏ်ရာ ရရှိကြောင်း KIO သတင်းရပ်ကွက် အဆိုအရ သိရသည်။

ဒဏ်ရာပြင်းဒဏ်သူ ၃ ဦးကို မိုးကောင်း ဆေးရုံသို့ ပို့လိုက်ပြီး၊ ကျန် ၄ ဦးမှာ ကာမိုင်း ဆေးရုံတွင် ဆေးကုသမှု ခံယူနေသည်။

“အစိုးရတပ်တွေ မကောင်းတာ လုပ်တာတွေကို KIO တပ်သားတွေ လုပ်တယ် ထင်အောင် လုပ်တာလည်း ဖြစ်နိုင်တယ်။ သူတို့က ရိုးသားတဲ့ ရည်ရွယ်ချက် မဟုတ်ပါဘူး။ ဒီလို စစ်ပွဲကာလတွေမှာ တခြား ကိုယ့်ရဲ့ ရန်သူရဲ့ ယူနီဖောင်း ဝတ်တယ် ဆိုတာက မသမာနည်းပါ၊ ကောက်ကျစ်တဲ့ စဉ်းလဲတဲ့ ကျင့်ကြံမှု တခုပဲ။ ရိုးသားမှု မရှိဘူး။ သူရဲဘောကြောင်တဲ့ လုပ်ရပ်ပါ” ဟု ဦးလနန်က ပြောသည်။

ပြီးခဲ့သည့် ဇွန်လပိုင်းတွင်လည်း ဗန်းမော်ကားလမ်းပေါ်၌ KIO ယူနီဖောင်းဝတ် အစိုးရတပ်ဖွဲ့ ခရီးသည်များကို စစ်ဆေး မေးမြန်းမှု၊ ရိုက်နှက်မှု ပြုလုပ်ခဲ့ကာ၊ လက်ရှိ ဖားကန့်လမ်းပေါ် တိုက်ပွဲအပြင် အခြား နေရာများ၌လည်း ယခုလို လှည့်စားမှုများလည်း ရှိနိုင်သည်ဟု သူက ဆိုသည်။

ဇွန်လ ၉ ရက်တွင် စတင်ခဲ့သည့် အစိုးရတပ်နှင့် KIO အကြား တိုက်ပွဲများကြောင့် စစ်ဘေးရှောင်ခဲ့သည့် ကချင်ဒုက္ခသည် ၁၆ဝဝဝ ကျော် အတွက် တရုတ်နိုင်ငံ ယူနန်ပြည်နယ် ရင်ကျန်းခရိုင်ရှိ ကြက်ခြေနီအဖွဲ့က တရုတ်ယွမ်ငွေ ၈ သောင်းခန့် တန်ဖိုးရှိ ဆေးဝါး ပစ္စည်းများ ပထမဆုံးအကြိမ် ထောက်ပံ့ခဲ့ကြောင်း KIO ကျန်းမာရေးဌာန အရာရှိတဦး ပြောဆိုချက်အရ သိရသည်။

“ကူးစက်ရောဂါတွေနဲ့ပတ်သက်တဲ့ ကာကွယ်ဆေးဖြစ်တဲ့ ငှက်ဖျားဆေး၊ တုပ်ကွေးရောဂါတွေကို ပုံမှန် ကူညီနေတယ်။ ကျနော်တို့ ကျန်းမာရေး ဌာနကို ပုံမှန်ကူညီနေတဲ့ အဖွဲ့က စစ်ပြေး ဒုက္ခသည်တွေ အတွက်ပါ သောက်ဆေးတွေ ကူညီတာပါ” ဟု သူက ပြောသည်။ လိမ်းဆေး၊ သောက်ဆေးနှင့် ပိုးသတ်ဆေးများသာ ပါဝင်သဖြင့် ထိုးဆေးများ လိုအပ်သေးသည်ဟု ဆိုသည်။

လက်ရှိ စစ်ပြေးဒုက္ခသည်များသည် ဝမ်းကိုက်၊ နှာစေး၊ ချောင်းဆိုး၊ မျက်စိနာ၊ အရေပြား ယားယံခြင်း စသည့်ရောဂါများ ဖြစ်ပွားနေသဖြင့် ပဋိဇီဝ ထိုးဆေးများ လိုအပ်နေသည်။

နှစ်ဖက် အပစ်ရပ်စဲရန် ကြားဝင်စေ့စပ်ပေးသော ငြိမ်းချမ်းတည်ငြိမ်ရေးနှင့် ညှိနှိုင်းရေး ကိုယ်စားလှယ် များနှင့် KIO က ပြီးခဲ့သည့် ဇွန် ၃ဝ ရက် တွေ့ဆုံမှု နောက်ပိုင်း ဇူလိုင် ၇ ရက်တွင် ကိုယ်စားလှယ် တဦးမှတဆင့် အပြန်အလှန် စာပေးပို့ခဲ့ကာ ယနေ့ထိ ပြန်လည် တွေ့ဆုံဆွေးနွေးမှု မရှိသေးပေ။

Ref: မဇ္ဈိမ