သဲသဲ
ကြာသပတေးနေ့၊ မတ်လ ၁၇ ရက် ၂၀၁၁
နယူးဒေလီ(မဇ္ဈိမ) ။ ။ သြစတြေးလျ နိုင်ငံသား မစ္စတာ ရော့စ်ဒန်ကလေ၏အမှု အာမခံရရေး လျှောက်ထား ချက်ကို ရန်ကုန်မြို့ ကမာရွတ်မြို့နယ် တရားရုံးမှ ကြာသပတေးနေ့တွင် ပယ်ချ လိုက်သည်။
မစ္စတာဒန်ကလေကို စွဲဆိုထားသည့် ပုဒ်မ ၅ ခု အနက်၊ လူဝင်မှုကြီးကြပ်ရေး ပုဒ်မနှင့် နာကျင်စေရန် ကြံရွယ်ချက်ဖြင့် မူးယစ်ဆေးဝါး တိုက်ကျွေးခြင်း ပုဒ်မ ၃၂၈ တို့မှာ အာမခံ မရနိုင်သော အမှုများ ဖြစ်သည် ဆိုကာ တရားရုံးက ဆုံးဖြတ်ကြောင်း မြန်မာတိုင်းမ်၏ ပြောရေး ဆိုခွင့်ရှိသူ ဦးဝေလင်းက ဆိုသည်။
“အခြေအနေကြည့်ပြီး အာမခံအတွက် အယူခံတက်ရင်လည်း တက်ပါမယ်။ မရသေးခင်တော့ အထဲက နေပဲ အမှု ရင်ဆိုင် နေရမှာပေါ့”ဟု မစ္စတာ ဒန်ကလေ၏ ရှေ့နေ တဦးဖြစ်သူ ဦးမင်းစိန်က ပြောသည်။
ကြာသပတေးနေ့ ကြားနာမှုတွင် ဆရာဝန်တဦးနှင့် တရားလို သက်သေ ခြံစောင့် ဝန်ထမ်း တဦးကို တရားရုံးမှ စစ်ဆေးခဲ့သည်။ ဆရာဝန်မှာ တရားလို မခိုင်ဇာ ကို ရဲမှ စစ်ဆေးခဲ့စဉ်က မူးယစ်ဆေးဝါး သုံးစွဲထားခြင်း ရှိ၊ မရှိကို ဆေးမှတ်တမ်း ယူခဲ့သူ ဖြစ်ကြောင်း ဦးမင်းစိန်က ဆိုသည်။ အမှုကို ယခုလ ၂၃ ရက်နေ့တွင် ထပ်မံ ချိန်းဆို လိုက်ပြီး မှုခင်း ဆရာဝန်ကို စစ်ဆေးမည်ဖြစ်သည်။
တရားခွင်သို့ သြစတြေးလျနိုင်ငံ သံအမတ်ကြီးလည်း လာရောက်ခဲ့သည်။ အင်းစိန် ထောင်တွင် ချုပ်နှောင် ထားသည့် မစ္စတာ ဒန်ကလေမှာ ထောင်တွင်း ကောင်းမွန်စွာ နေရပြီး ကျန်းမာစွာ ရှိကြောင်း မြန်မာတိုင်းမ်း တာဝန်ရှိသူများက ပြောသည်။
မစ္စတာဒန်ကလေမှာ အရေးပေါ် ပြဋ္ဌာန်းချက် လဝက ပုဒ်မ ၁၃ (၁) အပြင် မခိုင်ဇာကို နာကျင်အောင် လုပ်မှု ပုဒ်မ ၃၂၃၊ နာကျင်စေရန် ကြံရွယ်ချက်ဖြင့် မူးယစ်ဆေးဝါးကို တိုက်ကျွေးခြင်း ပုဒ်မ ၃၂၈၊ လက်ရောက်ခြင်း ပုဒ်မ ၃၅၂ နှင့် သွားလာပိုင်ခွင့် ရှိသည့် နေရာသို့ မသွားလာနိုင်အောင် ပိတ်ပင်ခြင်း ပုဒ်မ ၃၄၁ တို့ဖြင့် တရား ရင်ဆိုင် နေခြင်းဖြစ်သည်။
Ref: မဇ္ဈိမ
Friday, March 18, 2011
ရော့စ်ဒန်ကလေ အာမခံ ပယ်ချခံရ
Subscribe to:
Post Comments (Atom)
Posts
0 comments:
Post a Comment