တိုင်းရင်းသားလက်နက်ကိုင်တပ်မတော် ၁၂ ခု စုပေါင်း၍ Union Army ဖွဲ့စည်း

Thursday, 17 February 2011

ယခုလ ၁၂ ရက်မှ ၁၆ ရက်အထိ ထိုင်းနယ်စပ် တနေရာ၌ ကျင်းပသော ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ (United nationality Federal Council) UNFC ပထမ ညီလာခံမှ Union Army တပ်မတော် ဖွဲ့စည်းလိုက်ကြောင်း ညီလာခံ တက်ရောက် ခဲ့သူ တဦးက ပြောပြသည်။

UNFC ညီလာခံအား Committee for Emergence of Federal Union (CEFU )၊ National Democratic Front (NDF) ၊ United nationality League for Democracy- Liberty Area (UNLD-LA ) တို့ ကမကထပြု ကျင်းပ၍ ဖက်ဒရယ် ကောင်စီ ဆိုင်ရာ ဖွဲ့စည်းပုံ ကိုလည်း ချမှတ်နိုင်ခဲ့၏။

ညီလာခံမှသဘောတူ ဖွဲ့စည်းလိုက်သည့် ဖက်ဒရယ်ကောင်စီ အောက်၌ (၁) နိုင်ငံရေး ဦးဆောင် အဖွဲ့ Political Leading Bureau – (၂) ဗဟိုကော်မတီ Central Committee နှင့် (၃) ဗဟို အလုပ်အမှုဆောင် ကော်မတီ Central Executive Committee ဟူသော အဓိက ၃ ရပ် ထပ်မံ ဖွဲ့စည်းပြီး ဗဟို အလုပ်အမှုဆောင် CEC အောက်တွင် နိုင်ငံရေး ဌာန Political Department နှင့် ကာကွယ်ရေး ဌာန Defense Department ထားရှိကြောင်း သိရသည်။

CEC ဉက္ကဌ အဖြစ် KNU မှ ဗိုလ်ချုပ်ကြီး မူတူးဆေးဖိုး၊ ဒု ဥက္ကဌ ( ၁ ) အဖြစ် KIO မှဒု-ဗိုလ်ချုပ်ကြီး ကောရီဇော်ဆိုင်း၊ ဒု ဥက္ကဌ ( ၂ ) အဖြစ် KNPP မှ ဗိုလ်ချုပ် အေပယ်ရတွိတ်၊ အတွင်းရေးမှူး အဖြစ် NMSP မှ နိုင်ဟံသာ၊ ဒု အတွင်းရေးမှူး (၁) ဗိုလ်မှူးကြီး ခွန်ဥက္ကာ PNLO နှင့် ဒု-အတွင်း ရေးမှူး(၂) ရွှေမျိုးသန့်တို့ ဖြစ်ကြသည်။

နိုင်ငံရေးဦးဆောင်အဖွဲ့ Political Leading Bureau တွင် KIO မှ ဒု-ဗိုလ်ချုပ်ကြီး အဲန်ဘန်းလှအောင်၊ CNF မှ ဇင်ကျုံးနှင့် NMSP ဥက္ကဌ နိုင်ထောမွန် တို့ တာဝန်ယူ ကြသည်။

နိုင်ငံရေးဌာန Political Department နှင့် ကာကွယ်ရေး ဌာန Defense Department ကို C E C မှ ဒု ဥက္ကဌ (၁) နှင့် ဒု ဥက္ကဌ (၂) တို့ တာဝန် ယူကြမည် ဟုလည်း ဖွဲ့စည်းပုံတွင် ပါရှိသည်။

နိုင်ငံရေးဌာန Political Department တွင်လည်း ဥပဒေရေးရာ၊ ပြည်ထဲရေး နှင့် နိုင်ငံခြားရေး ကဏ္ဍ၊ ကာကွယ် ရေးဌာန Defense Department တွင် မြောက်ပိုင်း စစ်ဒေသ (တရုတ်-မြန်မာနယ် စပ်)၊ အရှေ့ပိုင်း စစ်ဒေသ (ထိုင်း-မြန်မာ နယ်စပ်)၊ အနောက်ပိုင်း စစ်ဒေသ ( အိန္ဒိယ-မြန်မာနယ်စပ်) နှင့် အထူး စစ်ဒေသ ဟူ၍ သတ်မှတ်ပြီး Union Army ပြည်ထောင်စု တပ်မတော်ဟု သတ်မှတ်ကြောင်း သိရသည်။

ဖက်ဒရယ် ကောင်စီ ဌာနချုပ်ရုံး လက်အောက်၌ ပြန်ကြားရေး အဖွဲ့နှင့် ဘဏ္ဌာရေး အဖွဲ့ ထားရှိရန်လည်း သဘောတူကြောင်း ညီလာခံ တက်ရောက်သည့် အဆိုပါ ပုဂ္ဂိုလ်က သျှမ်းသံတော်ဆင့်သို့ ပြောသည်။

ထို့အပြင် ၁၆ မျက်နှာ ၊ ၉ ခန်းနှင့် ပုဒ်မ ၃၂ ရှိ UNFC ဖက်ဒရယ်ကောင်စီ ဖွဲ့စည်းပုံ မူကြမ်းကိုလည်း ရေးဆွဲနိုင်ခဲ့သည် ဟု ဆို၏။

တက်ရောက်သူ ၅၃ ဦး ရှိသည့် ညီလာခံတွင် အဖွဲ့ဝင် ၁၂ ဖွဲ့ ပါဝင်သော UNFC ကို ဖွဲ့စည်း လိုက်ခြင်း ဖြစ်ကြောင်း အဆိုပါ ပုဂ္ဂိုလ်က ပြောသည်။

၎င်း ၁၂ ဖွဲ့မှာ ချင်းအမျိုးသားတပ်ဦးCNF ၊ ကချင် လွတ်လပ်ရေး အဖွဲ့ချုပ် KIO ၊ ကရင်အမျိုးသား အဖွဲ့ချုပ် KNO ၊ ကရင်နီ အမျိုးသား တိုးတက်ရေး ပါတီ KNPP ၊ ကရင် အမျိုးသား အစည်းအရုံး KNU ၊ လားဟူ ဒီမိုကရက်တစ် အစည်း အရုံး LDU ၊ ရခိုင်အမျိုးသား စည်းလုံး ညီညွတ်ရေး ပါတီ NUPA ၊ မွန်ပြည်သစ် ပါတီ NMSP ၊ ပလောင်ပြည် လွတ်မြောက်ရေး တပ်ဦးPSLF၊ ပအိုဝ်း အမျိုးသား လွတ်မြောက်ရေး အဖွဲ့ချုပ် PNLO ၊ သျှမ်းပြည် တိုးတက်ရေး ပါတီ - သျှမ်းပြည် တပ်မတော် SSPP-SSA နှင့် ဝ အမျိုးသား အဖွဲ့ချုပ် WNO တို့ ဖြစ်ကြသည်။

UNFC ၏ ထူးခြားချက်တခုမှာ အဖွဲ့အစည်း နှင့် ပြည်နယ် အခြေခံ အပြင် တိုင်းရင်းသား လူမျိုးစု အခြေခံဖြင့် ဖွဲ့စည်း ထားကြောင်း (တပ်ပေါင်းစု အခြေခံကိုမူ လက်မခံသေးကြောင်း) သိရသည်။

UNFC ၏ အတွင်းရေးမှူးလည်းဖြစ်၊ ညီလာခံ ဉက္ကဌလည်းဖြစ်သော နိုင်ဟံသာက - UNFC ၏ ရည်ရွယ်ချက် နှင့် ဖွဲ့စည်းပုံ ဥပဒေ ကို လက်ခံသည့် မည်သည့် အဖွဲ့အစည်းမဆို အဖွဲ့ဝင်အဖြစ် ကြိုဆိုကြောင်း ညီလာခံ၌ ပြောကြားခဲ့ သည်ဟု ဆိုသည်။

Ref: သျှမ်းသံတော်ဆင့်