မဲပေးမည့် ဝန်ထမ်းများအား ဝန်ကြီးချုပ်က မုန့်ဖိုးပေးမည်

Thursday, 04 November 2010

ရွေးကောက်ပွဲနေ့တွင် မဲပေးသွားကြမည့် အစိုးရ ၀န်ထမ်းများနှင့် ကြိုတင်မဲ ပေးခဲ့ကြသည့် ၀န်ထမ်းများ အားလုံးကို ဝန်ကြီးချုပ်က မုန့်ဖိုးအဖြစ် ငွေပေးမည်ဟု သိရှိရကြောင်း နေပြည်တော် ၀န်ထမ်း အသိုင်းအ၀ိုင်းက ပြောသည်။

“အလံသစ် တင်တဲ့နေ့ကလည်း ၀န်ထမ်းတွေကို မုန့်ဖိုးဆိုပြီး တယောက် ကျပ်သုံးထောင် ပေးတယ်။ ၀န်ကြီးချုပ်က ပေးတဲ့ မုန့်ဖိုးပါ” ဟု နေပြည်တော် ၀န်ထမ်းတဦးက ရှင်းပြသည်။

ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ (ကြံ့ဖွံ့ပါတီ) ၏ ဥက္ကဋ္ဌ ၀န်ကြီးချုပ် ဦးသိန်းစိန်က ၎င်း အရွေးချယ်ခံ ၀င်ရောက် ယှဉ်ပြိုင်မည့် နေပြည်တော် ဇမ္ဗူသီရိမြို့နယ်တွင် နေထိုင်သော ၀န်ထမ်းများအားလုံး နိုဝင်ဘာလ ၇ ရက်နေ့တွင် မဖြစ်မနေ မဲပေးရမည် ဖြစ်ကြောင်း၊ ယင်းနေ့တွင် မဲမပေးလိုပါက ကြိုတင်မဲ ပေးရမည်ဖြစ်ပြီး ကြံ့ဖွံ့ပါတီကိုသာ မဲပေးရမည်ဟု ညွှန်ကြားချက် ထုတ်ထားကြောင်း သတင်းရရှိသည်။

နိုဝင်ဘာလ ၇ ရက်နေ့၌ အစိုးရ၀န်ထမ်းများအားလုံး မဲပေးကြရာတွင် အစိုးရ ၀န်ကြီးဌာန တခု အတွက် မိနစ် ၅၀ သတ်မှတ် ထားပြီး အစိုးရ ၀န်ထမ်းများ မဲရုံများသို့ သွားရောက် မဲပေးရမည့် အချိန်ကိုလည်း ၀န်ကြီးဌာန အလိုက် သတ်မှတ် ပေးထား ကြောင်း သိရှိရသည်။

“စီးပွားရေးနဲ့ ကူးသန်း ရောင်းဝယ်ရေး ၀န်ကြီးဌာနအတွက် မဲပေးချိန်က မနက် ၁၁ နာရီ မိနစ် ၂၀ ကနေ နေ့လယ် ၁၂ နာရီ ၁၀ မိနစ် အထိပါ။ သတ်မှတ်ထားတဲ့ အချိန်အတွင်းမှာ အားလုံးမဲရုံကို သွားပြီး မဲပေးရမယ်။ နေပြည်တော် စီးပွား ကူးသန်းမှာ စုစုပေါင်း ၀န်ထမ်းက ၇၀၀ ရှိတော့ အားလုံး မိနစ် ၅၀ အတွင်း မဲပေးရမယ်ဆို ကြိတ်ကြိတ် တိုးရမယ့် ပုံပဲ။ တချို့ ၀န်ထမ်းတွေ က မတိုးချင်လို့ ကြံ့ဖွံ့ကိုပဲ ကြိုတင်မဲတွေ ပေးလိုက်ကြပြီ” ဟု စီးပွားရေးနှင့် ကူးသန်း ရောင်းဝယ်ရေး ၀န်ကြီးဌာန ရုံးအဖွဲ့မှူး ရုံးခန်းမှ တာဝန်ရှိသူတဦး ကပြောသည်။

တခြားသော ၀န်ကြီးဌာနများလည်း မဲပေးချိန် မိနစ် ၅၀ စီရရှိထားကြပြီး မဲပေးရမည့် အချိန် စာရင်း အတိအကျ ထွက်ရှိနေပြီ ဖြစ်ကြောင်း သိရသည်။

စစ်အစိုးရက အစိုးရ ၀န်ထမ်းများကို အတင်းအကျပ်ဖိအားပေးကာ မဲပေးခိုင်းခြင်းသည် ရွေးကောက်ပွဲ ဥပေဒကို ချိုးဖောက်ရာ ရောက်သည်ဟု နိုင်ငံရေး သမားများနှင့် နိုင်ငံရေးပါတီများက မကြာခဏဆိုသလို ထောက်ပြပြောဆို ဝေဖန်ပြီး ရွေးကောက်ပွဲ ကော်မရှင်ထံသို့ တိုင်ကြားကြသည်။

မဲပေးနိုင်သူဦးရေ ၆ သိန်းကျော်ရှိသော နေပြည်တော်တွင် စစ်ရာထူးများမှ အငြိမ်းစား ယူထားသည့် ဗိုလ်ချုပ်ကြီးများ ယှဉ်ပြိုင် ကြမည်ဖြစ်ပြီး သူရဦးရွှေမန်းက ဇေယျာသီရိမြို့နယ်၊ ဦးသိန်းစိန်က ဇမ္ဗူသီရိမြို့နယ်၊ သီဟသူရ ဦးတင်အောင် မြင့်ဦးက ပုဗ္ဗသီရိမြို့နယ်၊ ဦးမြင့်လှိုင်က ဒက္ခိဏသီရိမြို့နယ် တို့တွင် ကြံ့ဖွံ့ပါတီ၏ ပြည်သူ့လွှတ်တော် ကိုယ်စားလှယ်
လောင်းများအဖြစ် ယှဉ်ပြိုင်ကြမည် ဖြစ်သည်။

Ref: ဧရာဝတီ်