နေပြည်တော်ဆုံးဖြတ်ချက်လက်ခံရမည်ဟု ၀ တပ်ဖွဲ့အား ထပ်မံခြိမ်းခြောက်

Thursday, 24 June 2010

နယ်ခြားစောင့်တပ်အသွင် ပြောင်းရေးအတွက် ၀ တပ်ဖွဲ့ခေါင်းဆောင်ပိုင်း အချို့နှင့် နအဖ ကိုယ်စားလှယ်များ ပန်ဆန်း ဌာနချုပ်၌ ထပ်မံတွေ့ဆုံရာ ‘အသွင်ပြောင်းရေး၌ နေပြည်တော်၏ စီမံကိန်း လက်မခံလျှင် အဆိုးဘက် ဦးတည်နိုင်သည်’ - ဟု ၀တပ်ဖွဲ့အား နအဖ ကိုယ်စားလှယ်က ထပ်မံ ဖိအားပေး ခြိမ်းခြောက်ခဲ့သည်ဟု ဆိုသည်။

“၂၁ ရက်တုန်းက လားရှိုးဒုတိုင်းမှူးဦးဆောင်တဲ့ နအဖ ကိုယ်စားလှယ်အဖွဲ့နဲ့တရုတ်အဖွဲ့ မိုင်းလျဲမ်း (ယူနန်နယ်) မှာတွေ့ပြီးပြီးချင်း ပန်ဆန်းကိုပြန်အိပ်တယ်။ မနေ့တုန်းက ၀ ခေါင်းဆောင်ပိုင်းအချို့နဲ့တွေ့တယ်၊ ၀ စစ်ဦးစီးချုပ် နဲ့ ဥက္ကဌကြီးပေါက်ယူချမ်းတို့တော့မတွေ့ဖြစ်ဘူး။”- ဟု ပန်ဆန်းအရာရှိနှင့်ရင်းနှီးသည့် လားရှိုးသားတဦးပြော ပါသည်။

ဂျွန် ၂၂ ရက်နေ့ အရှေ့မြောက်ပိုင်းတိုင်း စစ်ဌာနချုပ် ဒု-တိုင်းမှူး ဗိုလ်မှူးချုပ် ၀င်းသိန်းနှင့် တန့်ယန်း အခြေစိုက်စစ်ဗျူဟာမှူး ဗိုလ်မှူးကြီး ခိုင်ဇော်တို့ ဦးဆောင်သည့် အင်အား ၄၀ ၀န်းကျင် ကိုယ်စားလှယ်အဖွဲ့ နှင့် ၀ ခေါင်းဆောင်ပိုင်း များဖြစ်သည့် UWSP ဒုဥက္ကဌ ရှောက်မင်လျံ၊ ဒုအတွင်းရေးမှူး ပေါက်ယိုယီး နှင့် ပေါက်ယိုလျံ၊ ကျောက်ကော်အန်း၊ ကျောက်ဝန်ကွမ်း၊ လီဇူးလျဲ့ ခေါ် ဦးအောင်မြင့်တို့ ပန်ဆန်း၌ တနာရီကြာ တွေ့ဆုံခဲ့သည် ဟု ဆို၏။

တွေ့ဆုံပွဲ၌ နယ်ခြားစောင့်တပ်အသွင် ပြောင်းရေး ကိစ္စသည် ‘နေပြည်တော် ဆုံးဖြတ်ချက် ဖြစ်သဖြင့် လက်မခံလျှင် အဆိုးဘက် ဦးတည်နိုင်ကြောင်း’ နအဖ ကိုယ်စားလှယ်မှ ထပ်မံ ဖိအားပေးခဲ့သော်လည်း ၀ တပ်ဖွဲ့တို့ တစုံတရာ တုန့်ပြန် ဆွေးနွေးခြင်း မပြုကြောင်း ပြောပါသည်။

“နအဖ ကိုယ်စားလှယ်တွေ နယ်ခြားစောင့်တပ်အသွင် ပြောင်းရေးအကြောင်း တနာရီလောက် ပြောသွား ပြီးတဲ့နောက်- ဘာတွေမေးမြန်း/တောင်းဆို လိုက်ပါသလဲလို့ မေးတော့ ၀ ခေါင်းဆောင်တွေက ပြောစရာ မရှိကြောင်း ဖြေကြားတယ်။ အခမ်းအနားမှူးကလဲ တွေ့ဆုံပွဲ ပြီးဆုံးကြောင်း ကြေငြာလိုက်တယ်”- ဟု ၀ အရာရှိတဦးက ပြော၏။

ဂျွန် ၂၀ ရက်နေ့ကတည်းက အဆိုပါ နအဖ ကိုယ်စားလှယ်အဖွဲ့ လားရှိုး - တန့်ယန်းမှ ပန်ဆန်းသို့ရောက်ရှိ နေပြီး ဂျွန် ၂၂ ရက်နေ့ မနက်ပိုင်းမှ လားရှိုးသို့ တပ်ခေါက်ပြန်သွားကြသည်ဟု ဆို၏။

ယခုတွေ့ဆုံမှုသည် ဧပြီ ၂၈ နောက်ဆုံးထားပြီး နယ်ခြားစောင့်တပ်အသွင် မပြောင်းလျှင် ၀ တပ်ဖွဲ့ အပါအ၀င် အပစ်ရပ်များ အားလုံး တရားမ၀င် အသင်းအဖွဲ့ ဖြစ်သွားမည်ဟု နအဖ မှ ခြိမ်းခြောက် ပြောဆိုပြီး နောက်ပိုင်း ဒုတိယ အကြိမ် တွေ့ဆုံခြင်းဖြစ်သည်။

ပန်ဆန်းရောက် နအဖ ကိုယ်စားလှယ်အဖွဲ့တိုင်းသည် ပန်ဆန်းမြို့တွင်းရှိ မေရှင်း ဟိုတယ်တွင်သာ တည်းခိုကြရာ နအဖ နှင့် ၀ ဆက်ဆံရေး ပြေလည်စဉ်က ၀ အာဏာပိုင်တို့ ညစာစားပွဲ တည်ခင်း ဧည့်ခံလေ့ ရှိသော်လည်း ယခု လားရှိူး ဒု-တိုင်းမှူး နှင့်အဖွဲ့ ခရီးစဉ်တွင်မူ ဟိုတယ်မှ ကျွေးမွေးသည့် အစားအစာ များဖြင့်သာ ပြီးဆုံးခဲ့ရကြောင်း ပန်ဆန်းမြို့ခံ တဦးက သျှမ်းသံတော်ဆင့်သို့ ပြောပြပါသည်။

ထို့အတူ မိုင်းလားတပ်ဖွဲ့အားလည်း မနက်ဖြန် ဂျွန် ၂၄ ရက်နေ့၌ တြိဂံတိုင်း ဂျီဝမ်းသစ် ပထမဆုံး အကြိမ် သွားရောက် ဆွေးနွေးဖွယ် ရှိသည်ဟုလည်း စုံစမ်း သိရှိရပါသည်။

Ref: သျှမ်းသံတော်ဆင့်