ဝ နယ်သို့ ဆန် နှင့် စားနပ်ရိက္ခာ တင်ဆောင်ခွင့်ပိတ်ပင်

Wednesday, 31 March 2010

နတလ ၀န်ထမ်း နှင့် NGO ၀န်ထမ်းများ ခွင့်ရက်ရှည်ပေး၍ နေရပ်ပြန်ရန် နအဖ အာဏာပိုင်များ ညွှန်ကြားလိုက်ပြီး နောက်ပိုင်း ၀ နယ်သို့ စားနပ်ရိက္ခာ တင်ဆောင်ခွင့်ကိုပါ ပိတ်ပင်လိုက်သည်ဟု စုံစမ်းသိရှိရသည်။

“ဗမာဝန်ထမ်းတွေ NGO ၀န်ထမ်းတွေ ပြန်ခေါ်ပြီးနောက်ပိုင်း အခု သံလွင် အနောက်ခြမ်းကလာတဲ့ စားနပ်ရိက္ခာတွေ ကျနော်တို့ ဘက်ခြမ်းကို ပေးမလာတော့ဘူး၊ အဓိကကတော့ ဆန်ပေါ့ အစစ်အဆေးထူတယ်”- ဟု ၀ နယ် သားတဦးက ပြောပါသည်။

မတ်ခ်ျ ၂၄-၂၅ နောက်ပိုင်း သံလွင်အနောက်ခြမ်းမှ ၀င်သည့် စားနပ်ရိက္ခာ ဆန်စပါးများ ၀ နယ်သို့ တင်ခွင့် ပိတ်ပင်သည့် နည်းတူ မိုင်းဆတ်၊ တာချီလိတ်ဘက်မှ ထိုင်းနယ်စပ် တောင်ပိုင်း ၀ တပ်ဖွဲ့ ထိန်းချုပ်နယ်မြေ မိုင်းယွန်း၊ မိုင်းကျွတ်၊ ဟွေ့အော့ ဘက်သို့လည်း စားနပ်ရိက္ခာ တင်ဆောင်ခွင့် ဟန့်တားထားသည်ဟု ဆို၏။

“အဓိက ဆန်၊ စပါးပေါ့။ တင်ပို့ခွင့် မရှိဘူးတဲ့။ ကျနော်တို့ ဘက်ကတော့ ဘာမှ မထိခိုက်ပါဘူး၊ အရင်ကတည်း က ကျနော်တို့ ဗမာဆန်မှ မစားတာ၊ ဆန်အရမ်းကြမ်းတော့ ၀က်ဘဲကျွေးတယ်”- ဟု အမည်မဖ်ါလိုသည့် ပန်ဆန်းအခြေစိုက် ၀ တပ်မှူး တဦးက သျှမ်းသံတော်ဆင့်သို့ ပြော၏။

မြောက်ပိုင်း ၀ ဒေသသည်ဒေသထွက်သီးနှံ အပြင် တရုတ်ပြည်မှ စားနပ်ရိက္ခာအချို့ကို အားထား၏။ တောင်ပိုင်း ၀ တပ်ဖွဲ့ကလည်း ထိုင်းမှဝင်သည့် စားသောက်ကုန် အသုံးများ၏။

“အထူးသဖြင့် တာချီလိတ်ကနေ ကျနော်တို့တောင်ပိုင်း ၀ ဌာနချုပ်ဘက် ဆန်နဲ့ စားသောက်ကုန် အပြင် အိမ်ဆောက်ပစ္စည်း၊ ဆက်သုံးဆီတွေ တင်ပို့ခွင့် ပိတ်ပင်ထားတယ်၊ သွားရေး လာရေး ခက်ခဲအောင်၊ ခုခံကာကွယ်ဖို့ တပ်စခန်းတည်ဆောက် မွမ်းမံရာမှာ အခက်အခဲဖြစ်အောင် စက်သုံးဆီကို ဖြတ်တောက်ချင်တဲ့ သဘော”- ဟု တောင်ပိုင်း ၀ တပ်မှူး တဦးကလည်း ပြောပါသည်။

စစ်အစိုးရ နှင့် အပစ်ရပ်တို့အကြား နိုင်ငံရေးအရ စုပေါင်းဆွေးနွေး အဖြေရှာခြင်း မရသဖြင့် ဤကဲ့သို့ တင်းမာလာခြင်း ဖြစ်သည်။ ၀ အကြီးအကဲ များနှင့် တန့်ယန်း၌ ဆွေးနွေးရန် ဧပြီ ၁ ရက်တွင် ထပ်မံ ချိန်းဆိုထားသည်ဟု သတင်း ရထားသော်လည်း မည်သည့် ခေါင်းဆောင်များ/အဆင့်မြင့် ကိုယ်စားလှယ်များ ပါဝင်မည်ကိုမူ မသိရသေးပေ။

Ref: သျှမ်းသံတော်ဆင့်