နယ်ခြားစောင့်တပ်အရေး မွန်ပြည်သစ်ယခင်အတိုင်း ဆက်လက် ရပ်တည်မည်

မင်းထက်အောင်၊
မတ် ၂၈၊၂၀၁၀။

မင်းထက်အောင်(မတ်-၂၉)။ ။ အပစ်ရပ်မွန်ပြည်သစ်ပါတီ ဗဟိုကော်မတီဝင်များ၏၂၀၁၀ ခုနှစ်၊ ပုံမှန် အစည်းအဝေး တစ်ရပ်တွင် နယ်ခြားစောင့်တပ် ဖွဲ့စည်းရေးနှင့် ပတ်သက်၍ ပါတီ၏ ဆုံးဖြတ်ချက်များ တစ်စုံတစ်ရာ အပြောင်းအလဲမရှိ၊ ပါတီနှင့် တပ်ပိုင်း ဆက်လက် ရပ်တည်ရေးအတွက် ပေါ်ပေါက်လာသော နောင်အစိုးရသစ်နှင့်သာ နိုင်ငံရေးအရ တွေ့ဆုံ ဆွေးနွေး အဖြေရှာသွားမည်ဟု သိရသည်။

ဗဟိုဌာနချုပ်ပြောခွင့်ရပုဂ္ဂိုလ်တစ်ဦးက ဖုန်းဖြင့်ပြောကြားရာတွင် “အခုဆုံးဖြတ်လိုက်တာက နယ်ခြားစောင့်တပ် မပြောင်းဘူး၊ ပြည်သူ့စစ်လည်း မလုပ်ဘူး၊ အရင် ရပ်တည်ချက်တွေ အတိုင်းပါဘဲ၊ ဗဟိုကော်မတီတွေ အားလုံး အမြင်တစ်ထပ်တည်း ကျပါတယ်၊ မဲခွဲရတာ မရှိပါဘူး” ဟု ပြောဆိုပါသည်။

ယင်းအစည်းအဝေးကို မွန်ပြည်နယ်၊ ရေးချောင်းဖျားဒေသရှိ မွန်ပြည်သစ်ပါတီ ဗဟိုဌာနချုပ်၌ (၁၀) ရက်ကြာခန့် ကျင်းပခဲ့ကြရာ ယမန်နေ့တွင် ပြီးဆုံးခဲ့ခြင်း ဖြစ်သည်။

ယမန်နှစ်မတ်လဆန်းပိုင်းမှစ၍ ဥက္ကဌနိုင်ထောမွန်ခေါင်းဆောင်သော မွန်ပြည်သစ်ပါတီ ခေါင်းဆောင်များကို နယ်ခြားစောင့်တပ် ပြောင်းလဲရေး အတွက် နေပြည်တော် ကိုယ်စားလှယ် ဗိုလ်ချုပ်ရဲမြင့် စတင် တောင်းဆိုခဲ့ရာ မွန်ပြည်သစ် ဗဟိုကော်မတီဝင်များ လက်မခံပယ်ချကြောင်း နောက်ပိုင်းတွင် ရတခတိုင်းမှူးမှ တဆင့် နေပြည်တော်သို့ ပြန်လည် အကြောင်းကြားခဲ့သည်ကို သတင်းများတွင် ဖေါ်ပြခဲ့ပြီးဖြစ်သည်။

တဖန်နောက်ပိုင်းတွင် အခါအခွင့်ကြုံတိုင်း ရတခတိုင်းမှူး ဗိုလ်ချုပ်သက်နိုင်ဝင်းထံမှ တဆင့် နေပြည်တော်ကိုယ်စား အကြိမ်ကြိမ် ဖိအားပေး ပြောကြားမှုများ ဆက်လက် ပြုလုပ်ခဲ့သည်ကို တွေ့ရှိခဲ့ရသည်။

ထို့နောက် ယခုလ(၁၆) ရက်နေ့တွင်လည်း မွန်ပြည်သစ် ထိပ်ပိုင်းခေါင်းဆောင်များကို ရတခတိုင်းမှူး မော်လမြိုင်မြို့တွင် ခေါ်ယူ တွေ့ဆုံခဲ့စဉ် မွန်ပြည်သစ်ပါတီ နယ်ခြားစောင့်တပ် ပြောင်းလဲ ဖွဲ့စည်းသွားရန် ထပ်မံဖိအားပေး ပြောကြားခဲ့သည်ကို ယခင် သတင်းတွင်လည်း ဖေါ်ပြခဲ့ပြီးဖြစ်သည်။

သို့ရာတွင် “သတ်မှတ်ရက်ရောက်လာလို့ ဒီလဆန်းပိုင်းကတည်းကပဲ ဗဟိုကော်မတီ ပုံမှန် အစည်းအဝေး ခေါ်ခဲ့တာ၊ တိုင်းမှူးနဲ့ တွေ့တဲ့ ကိစ္စကြောင့် အစည်းအဝေး ခေါ်တာလည်း မဟုတ်ပါဘူး၊ အနားယူသွားတဲ့ ဗဟိုကော်မတီ (၃) ဦးနေရာ အစားထိုးဖို့ အရန် ဗဟိုကော်မတီတွေ တက်လာပါတယ်၊ ပါတီရဲ့ လုပ်ငန်းအရပ်ရပ်ကို အချိန်ကာလနဲ့အညီ ပြန်လည် သုံးသပ်ရတာတွေလည်း ရှိတယ်၊ ဒါကြောင့် အချိန်ယူရတာပါ” ဟု ဗဟိုဌာနချုပ် ပြောခွင့်ရပုဂ္ဂိုလ်က ဆက်လက် ပြောကြားပါသည်။

ယမန်နှစ်တွင် ဝါရင့်ဗဟိုကော်မတီဝင်ဟောင်းများဖြစ်ကြသည့် နိုင်ဥာဏ်ထွန်း၊ နိုင်လဝီမွန်နှင့် ဗိုလ်မှူးကြီးကိုတာ တို့ အသီသီး နှုတ်ထွက်စာတင်ပြီး ပါတီမှ အနားယူခွင့်ရခဲ့သည်။

အကဲခတ်အချို့အမြင်အရ ဧပြီလတွင် အုပ်ချုပ်ရေးဌာနလက်အောက်ရှိ အလယ်အလတ်ပိုင်း အရာရှိငယ် တစ်ချို့ အလုပ်ဌာနများ အပြောင်းအလဲ ရှိနိုင်သည်ဟု ဆိုပါသည်။ သို့သော်လည်း မည်သူတွေ ဖြစ်နိုင်ကြောင်း တပ်အပ် မပြောဆိုနိုင်သေးပေ။

ယခုနှစ်ဆန်းပိုင်းအတွင်း နအဖထံတရားဝင်ပေးပို့ခဲ့သော (၂၀၁၀) ခုနှစ်၊ မွန်ပြည်သစ်ပါတီ အရေအတွက်တွင် အင်အား (၃၅၀၀) ကျော်ရှိကြောင်း အရာရှိများ နာမည်နှင့်တကွ ဖေါ်ပြထားသော စာရင်းအရ သိရသည်။

၁၉၉၅ ခုနှစ်၊ စစ်အစိုးရနှင့်အပစ်အခတ်ရပ်စဲသည့် အခမ်းအနား၌ မွန်ပြည်သစ်ပါတီဝင် အင်အား (၇၈၆၀) ဦးရှိသည်ဟု ထိုစဉ်က နအဖ သတင်းစာများတွင် တရားဝင် ဖေါ်ပြ ပါရှိခဲ့သည်။

ပါတီထိပ်ပိုင်းခေါင်းဆောင်တစ်ဦးနှင့် ယခင်တွေ့ဆုံမေးမြန်းချက်တစ်ရပ်တွင် နိုင်ငံတော်၌ တစ်ခုတည်းသော တပ်မတော် ရှိရမည့်အဆိုကို လက်ခံနိုင်သော်လည်း မွန်ပြည်နယ် အစိုးရ လက်အောက်တွင် မွန်ပြည်နယ် အတွင်း၌ လှုပ်ရှားမည့် မွန်နယ်ခြားစောင့်တပ် ပုံစံမျိုးသာ ဖွဲ့စည်းသင့်သည်ဟု ဆိုပါသည်။

Ref: ကောင်းဝါ