နအဖလောက် နီးနီး

ခုနောက်ပိုင်းနှစ်တွေအတွင်း မြန်မာပြည်မှာ တော်လှန်ရေးနဲ့ ပတ်သတ်တဲ့ ဗွီဒီယို၊ ရုပ်ရှင်ကားတွေကို ပုဂ္ဂလိက ကုမ္ပဏီတွေက အပြိုင်အဆိုင် ထုတ်လုပ် ရိုက်ကူးလာကြတာကို တွေ့ရပါတယ်။ အဲသလို ကားမျိုးတွေက ခွင့်ပြုချက် အမြန်ကျပြီး နအဖ စစ်အစိုးရဆီကလည်း အခွင့်အရေးတွေ ရရှိတာမို့ ကုမ္ပဏီတွေက အပြိုင်အဆိုင် ထုတ်လုပ် လာကြတာ ဖြစ်တယ်လို့ သိရှိရပါတယ်။ နအဖရဲ့ ဗွီဒီယို ဆင်ဆာ အဖွဲ့ကလည်း ဒီမိုကရေစီတို့ လူ့အခွင့်အရေးတို့နဲ့ ပတ်သက်တဲ့ ဇာတ်ကားတွေ စကားတွေ မပါရင်ပြီးရော့။ ကျန်တာ အကုန်ခွင့်ပြုတယ်။ နအဖရဲ့ ရည်ရွယ်ချက်ကတော့ တိုင်းတပါး နယ်ချဲ့တွေ မကောင်းဘူး။ (တကယ်ပြောချင်တာက အင်္ဂလိပ်နှင့် အမေရိကန် မကောင်းကြောင်း ပြောချင်တာ။) နအဖပဲ ကောင်းတယ်၊ နအဖပဲ ကယ်တင်ရှင်၊ နအဖကဘဲ တိုင်းပြည်ကိုချစ်တယ်။ ကျန်တဲ့လူက မချစ်ဘူးပေါ့။ ဒါကြောင့် စစ်တပ်ကိုပဲ ကိုးကွယ်ကြရမယ် ဆိုတဲ့သဘောပါဘဲ။

အဲသလိုနဲ့ အင်္ဂလိပ်ခေတ်နဲ့ ဂျပန်ခေတ်ကို ဇာတ်အိမ်တည်ပြီး ရိုက်ထားတဲ့ ဗွီဒီယို ခွေတခွေ တောရွာတရွာကို ရောက်လာပါသတဲ့။ ပိုစတာတွေမှာ အင်္ဂလိပ်၊ ဂျပန်တွေက သေနတ်တွေ တကားကားနဲ့၊ တော်လှန်ရေး သမားတွေကလည်း ခမောက်ကြီးတွေဆောင်ပြီး လက်ပတ် အနီတွေနဲ့ ရိုင်ဖယ်ခေါင်းတုံးတွေကို ကိုင်လို့ဆိုတော့ တရွာသားလုံးက ကားကောင်းမယ်ဆိုပြီး အုတ်အော် သောင်းနင်း လာကြည့်ကြပါသတဲ့။

ဇာတ်ကားကတော့ ထုံးစံအတိုင်းပါဘဲ၊ ဂျပန်စစ်သားတွေက လူတွေကိုသတ်၊ အရက်သောက်၊ အမျိုးသမီးတွေကို ဖျက်ဆီး။ အလားတူပါဘဲ အင်္ဂလိပ် စစ်သားတွေကလည်း မြန်မာလူမျိုးတွေ အပေါ် အနိုင်ကျင့်တာတွေ၊ အရင်းရှင်ကြီးတွေပီပီ လူထုတွေကို ဂုတ်သွေးစုတ်ပြီး အနိုင်ကျင့်ပုံတွေ၊ အင်္ဂလိပ် စစ်ပုလိပ်တွေက မျိုးချစ် တော်လှန်ရေး သမားတွေကို ဖမ်းဆီးနှိပ်စက်၊ ပိုင်ဆိုင်တဲ့ စည်းစိမ် ဥစ္စာတွေကိုသိမ်း ၊ ကာယကံရှင်တွေကို ဖမ်းဆီးလို့ မမိတိတဲ့အခါ မိဘ ဆွေမျိုးသားသမီးတွေကို ဖမ်းဆီးနှိပ်စက်။ လာအဖမ်းမခံရင် သတ်ပစ်မယ်လို့ ခြိမ်းခြောက်၊ ပြန်ပေးဆွဲ၊ ပြီးတော့ ရွာထဲက သမီးပျိုတွေ ဆိုရင်လည်း စစ်ပုလိပ်တွေရဲ့ မုဒိမ်းကျင့် ခံရမှာကြောက်လို့ ထင်းခွေ ရေခပ်တောင် မထွက်ရဲတဲ့ဘ၀။ နောက်ဆုံးတော့ အင်္ဂလိပ်နှင့် ဂျပန်တွေကို တော်လှန်ရေး သမားတွေက အပြတ်ချေမှုန်းပြီး မျိုးချစ်တော်လှန်ရေး သမားနဲ့ ကျေးတောသူ ညားသွားကြတဲ့ ဇာတ်လမ်းပါဘဲ။

ဇာတ်ကားဆုံးတော့ လူအုပ်ကြီးက အိမ်ပြန်မယ်ဆိုပြီး ဗွီဒီယိုရုံထဲက တိုးဝှေ့ထွက်လာကြချိန်မှာ ရွာသား တယောက်ရဲ့ စကားကြောင့် ဗွီဒီယိုကြည့် ပရိတ်သတ်တွေအားလုံး တ၀ါးဝါး ပွဲကျသွား ကြပါသတဲ့။ သူပြောလိုက်တဲ့ စကားကတော့ ....

“အင်္ဂလိပ်စစ်သားတွေ၊ ဂျပန်စစ်သားတွေ စောက်ကျင့်နဲ့ ဆိုးပုံ၊ ရက်စက်ပုံများကတော့ကွာ နအဖ စစ်သားတွေ နီးနီးပဲ”

လောက်စာသီး