တောင်ပိုင်း ၀ တပ်ဖွဲ့နှင့် ပြဿနာတက်စေရန် လားဟူ ပြည်သူ့စစ် ကို လက်ကိုင်တုတ်အဖြစ်သုံး

အင်္ဂါနေ့၊ 08 စက်တင်ဘာလ 2009


တောင်ပိုင်း ၀ တပ်ဖွဲ့နှင့် ပြဿနာဖြစ်စေရန် လားဟူပြည်သူ့စစ် အဖွဲ့အား ဒေသခံ အစိုးရ စစ်တပ်က အင်အား ဖြည့်တင်း ပေး၍ ၀ တပ်ဖွဲ့ ထိန်းချုပ် နယ်မြေ အတွင်း ကျူးကျော် နယ်လှည့် ခိုင်းသည့် အပြင် ၀ တပ်ဖွဲ့နှင့် ပြဿနာ တက်လျှင် ချက်ချင်း ပူးပေါင်းတုန့်ပြန် ကူတိုက်မည်ဟု ပြောထားကြောင်း မိုင်းတုံမြို့နယ် လားဟူ အသိုင်းအ၀ိုင်းက ပြောပါသည်။

“အရင်က ဂျပီးကွယ် ဦးဆောင်တဲ့ နားကောင်းမူး လားဟူပြည်သူ့စစ် တပ်ဖွဲ့မှာ လူသူ လက်နက် အင်အား ၄၀ လောက်ရှိတယ်။ အခု လက်နက် အပြည့်အစုံနဲ့ ၂၀ ထပ်ဖြည့်ပေးတယ်၊ ပြီးတော့ ၀ နယ်ထဲ စစ်ကြောင်း လှည့်ခိုင်းတယ်၊ ၀ ကိုသွားရန် စခိုင်းသလိုပေါ့။ ၀ ဘက်က စပစ်ရင် ဗမာ စစ်တပ်က ချက်ချင်း ကူတိုက်မယ်လို့ ပြောထားတယ်” - ဟု အမည်မဖေါ် လိုသည့် လားဟူ အမျိုးသား တဦးက ပြောပါသည်။

ကိုးကန့်အရေးအခင်းပြီးနောက်ပိုင်း တောင်ပိုင်း ၀ တပ်ဖွဲ့ နှင့် စစ်အစိုးရ အကြား တင်းမာမှု ဖြစ်ပွား လာခဲ့ပြီး မိုင်းတုံ - မိုင်း ဆတ် - တာချီလိတ် တလျှောက် နအဖတပ် လမ်းကင်းများက ၀ တပ်ဖွဲ့ဝင်များ၏ အသွားအလာ အပေါ် အထူးတင်းကြပ် စစ်ဆေးကြောင်း၊ မိုင်းဆတ်မြို့ အရှေ့တောင်ဖက် တွင်လည်း သံချပ်ကာကား အကြီးအသေး ၁၀ စီးခန့် ချထားသည့် အပြင် တပ်အင်အား ၂၀၀ ကျော် ၃၀၀ ခန့်လည်း ထပ်ဖြည့်ထားကြောင်း - မိုင်းဆတ်မြို့ခံ ကုန်သည် တဦးက ပြော၏။

စက်သေနတ် နှင့် အမြောက် တပ်ဆင်ထားသည့် (အသေးစား) တိုက်ပွဲဝင် သံချပ်ကာ ကားမှာ စစ်သား ၃-၄ ယောက် လိုက်ပါနိုင်ပြီး အကြီးစားတွင် ၇-၈ ယောက် ၀င်နိုင်သည်ဟု ဆို၏။

“အခုဆို ၀ အရာရှိတွေ ဟိုဟိုဒီဒီသွား/လာချင်ရင် ဗမာစစ်တပ် အာဏာပိုင်ကို - နာမည်၊ ရာထူး၊ လက်နက် အမျိုးအမည် လူစာရင်း ၃-၄ ရက် ကြိတင် အကြောင်းကြား ထားရတယ်။ ၀ အရာရှိတွေလဲ ဗမာအာဏာပိုင် တွေနဲ့ မရှုပ်ချင်တော့ ဒရိုင်ဘာ ငှားပြီး သွားတယ်၊ အရင်က ကားမောင်းခ ၁ ရက် ဘတ် ၂၀၀-၃၀၀ ကနေ အခု ဘတ် ၁၀၀၀ - ၁၅၀၀ အထိ ခုန်တက်သွားတယ်” - ဟု အမည် မဖေါ်လိုသည့် တာချီလိတ် ကားဆရာ တဦးက သျှမ်းသံတော်ဆင့်သို့ ပြောပြပါသည်။

စစ်အစိုး၏ ပစ်မှတ်သည် မိုင်းတုံ - နားကောင်းမူး - ပုံပါကျင် - (ထိုင်းနယ်စပ်) ဘီပီဝမ်း ကားလမ်း အနောက် ဘက်ခြမ်းရှိ တောင်ပိုင်း ၀ ဌာနချုပ် မိုင်းကျွတ်ဘက် ဖြစ်ကြောင်း၊ ၀ တပ်ဖွဲ့အား ထိုးစစ်ဆင်လျှင် လားဟူ ပြည်သူ့စစ် တပ်ဖွဲ့ကို ရှေ့ပြေးတပ် အဖြစ် အသုံးချမည် ဖြစ်ကြောင်း၊ ထိုင်းနယ်စပ် တလွှားအခြေချ နအဖ တပ်များတွင်လည်း လူသူလက်နက် အင်အား အများအပြား ဖြည့်တင်း ထားကြောင်း - ပုံပါကျင် အခြေစိုက် ဗျူဟာမှူး ဗိုလ်မှူးကြီးကျော်သူနှင့် ရင်းနှီးသည့် ကားဆရာ တဦးက ပြောပြပါသည်။

“၅ ရက်နေ့က ဗမာတပ် အင်အား ၅၀ လောက် မိုင်းတုံ - ပုံပါကျင် ကားလမ်း နောက်ဘက် ထိုင်းနယ်စပ်နား နမ့်လုတ် တောင်ပေါ် ၀ တပ်စခန်း အထိ ကျူးကျော် ၀င်ရောက် သွေးထိုး စမ်းကြည့်တယ်။ ၀ တပ်နား မရောက်ခင် ၀ တပ်ဘက်က သေနတ် ပစ်ဖေါက် ခြိမ်းခြောက်တဲ့ အတွက် သူတို့ အားလုံး ပြန်ဆုတ် လိုက်ရတယ်” - ၀ တပ်မှူး တဦးနှင့် ရင်းနှီးသည့် ပုံကျင်မြို့ သားတဦးက ပြောပြ၏။

Ref: သျှမ်းသံတော်ဆင့်