ဝန်ကြီး ဦးအောင်မင်းနှင့် အဖွဲ့ ရခိုင်ပြည် လွတ်မြောက်ရေး ပါတီနှင့် ဘန်ကောက် မြို့မှာ တွေ့ဆုံဆွေးနွေး

2012-06-28

မြန်မာနိုင်ငံ ငြိမ်းချမ်းရေး ဖော်ဆောင်ရေးအဖွဲ့ ဒုတိယ ဥက္ကဋ္ဌ ပြည်ထောင်စု ၀န်ကြီး ဦးအောင်မင်းနဲ့ အဖွဲ့ဟာ ရခိုင်ပြည် လွတ်မြောက်ရေး ပါတီ (ALP) နဲ့ ထိုင်းနိုင်ငံ ဘန်ကောက်မြို့ Grand Four Wings ဟိုတယ်မှာ မနေ့မနက်ပိုင်း က တွေ့ဆုံ ဆွေးနွေးခဲ့ပါ တယ်။

အဲဒီလိုတွေ့ဆုံရာမှာ အရင်ပြည်နယ် အဆင့် ဆွေးနွေး ခဲ့စဉ်က သဘော တူခဲ့တဲ့ အချက်တွေကို လက်တွေ့ ဆောင်ရွက်တဲ့နေရာ မှာ တွေ့ကြုံရတဲ့ အခက်အခဲတွေကို ဆွေးနွေး ခဲ့ကြတယ်လို့ ALP အထွေထွေ အတွင်းရေးမှူး ဒေါ်စောမြရာဇာလင်းက ပြောပါတယ်။

"ဥပမာ ဆက်သွယ်ရေးရုံး ဖွင့်တဲ့ကိစ္စတွေမှာ ဆိုလို့ရှိရင် ရဲဘက်ဆိုင်ရာက စောင့်ကြည့်တဲ့ အပိုင်းတွေရှိ တယ်။ ထောက်လှမ်းရေးပိုင်း က စောင့်ကြည့်တဲ့ အပိုင်းတွေ ရှိတယ်။ ဆိုတော့ ရုံးလုပ်ငန်းတွေ အတွက် ကြိုးစားရတဲ့ သူတွေအတွက်ကတော့ စိတ်အနှောင့် အယှက်တွေဖြစ်တယ်။ အဲဒီကိစ္စတွေကို အစိုးရပိုင်းကနေပြီးတော့မှ ကူညီစေချင်တဲ့ အပေါ်မှာ ကျွန်မတို့ ဆက်လက် ဆွေးနွေးတာ ရှိပါတယ်။ ပြီးလို့ရှိရင် မြန်မာ တစ်နိုင်ငံလုံးကို ရခိုင်လွတ်မြောက်ရေး ပါတီနဲ့ ဆိုင်တဲ့ လူပုဂ္ဂိုလ်တွေ၊ ရဲဘော်တွေ လွတ်လပ်စွာ သွားလာ လှုပ်ရှားခွင့် ရရှိဖို့ ဆိုတဲ့အပေါ်မှာ ကျွန်မတို့ အနေနဲ့ ထပ်မံဆွေးနွေးတာ ရှိပါတယ်"

ဒါ့အပြင် အခုလတ်တလော ရခိုင်ပြည်နယ် တွင်းက ဒုက္ခသည်တွေကို သွားရောက် အကူအညီပေးရေး ကိစ္စတွေလည်း ဆွေးနွေး ခဲ့ ကြောင်း ဒေါ်စောမြရာဇာလင်းက ပြောပါတယ်။ ပြည်ထောင်စု ၀န်ကြီး ဦးအောင်မင်းတို့ ဘက်က ပြန်လည်ဆွေးနွေးချက် တွေနဲ့ ပတ်သက်ပြီးတော့လည်း -

"ကောင်းပါတယ်။ အပြုသဘောဆောင်တဲ့ ဆွေးနွေးမှုတွေ အများကြီး ရှိတယ်လို့ ကျွန်မ အနေနဲ့ သုံးသပ်ပါတယ်။ ဘာဖြစ်လို့လည်း ဆိုလို့ရှိရင် ကျွန်မတို့ ဘက်က အခက်အခဲတွေ တင်ပြတဲ့ အချိန်မှာ သူတို့တွေက နည်းလမ်းတွေပေးတယ်။ တချို့နေရာမှာ ကျွန်မတို့ အနေနဲ့ ဆက်သွယ်ရေးရုံးတွေ ဖွင့်လို့မရတဲ့ နေရာတွေမှာလည်းပဲ စီးပွားရေး ရုံးတို့ ဘာတို့ စတင် လုပ်ဆောင်လို့ ရတယ်။ ပြီးလို့ရှိရင် အနာဂတ် တချိန်ချိန်မှာလည်း စိတ်ကောင်း စေတနာကောင်းတွေနဲ့ နှစ်ဦးနှစ်ဘက် အားလုံး အတတ်နိုင်ဆုံး ကြိုစားပြီးတော့မှ ရခိုင်ပြည်အရေး၊ ရခိုင်ပြည်သူ လူထုတရပ်လုံးရဲ့ သာယာဝပြောရေးနဲ့ မြန်မာနိုင်ငံ တစ်ခုလုံးရဲ့ ငြိမ်းချမ်းရေး ဖော်ဆောင်မှု လုပ်ငန်းစဉ်တွေကို အားလုံး အတူတကွ ပူးပေါင်းဆောင်ရွက်ကြမယ်ဆိုတဲ့ ဆွေးနွေးမှု များစွာပါပဲ၊ ဒီနေ့ဆွေး နွေးတာကတော့"

မကြာခင်လပိုင်းတွေက ALP အဖွဲ့ဟာ စစ်တွေမြို့မှာ ရုံးခွဲ သွားရောက် ဖွင့်လှစ်ခဲ့ရာမှာ ဒေသခံတွေက သောင်းသောင်းဖြဖြ ကြိုဆို ခဲ့ကြပါတယ်။ မြန်မာပြည်တွင်းမှာ အခြေ မစိုက်သေးပေမဲ့ ပလက်ဝ၊ ကျောက်တော်နဲ့ တခြားသင့်တော်တဲ့ နယ်တွေဘက်မှာ လည်း ALP ရုံးခွဲတွေ ဖွင့်လှစ်ဖို့ စီစဉ်နေတယ်လို့ သိရပါတယ်။

မနေ့က တွေ့ဆုံဆွေးနွေးပွဲမှာ ALP ဒုဥက္ကဋ္ဌ ခိုင်စိုးနိုင်အောင်၊ အတွင်းရေးမှူး ဒေါ်စောမြရာဇာလင်း၊ ငြိမ်းချမ်းရေး ဆက်သွယ်ရေး တာဝန်ခံ ခိုင်အေးလင်းနဲ့ ၀န်ကြီး ဦးအောင်မင်း၊ ၀န်ကြီး ဦးခင်ရီနဲ့အဖွဲ့တို့ ပါဝင် ကြပါတယ်။ နောက်တစ်ကြိမ် ပြည်ထောင်စု အဆင့် ဆွေးနွေးပွဲကို နှစ်ဘက် အသင့်ဖြစ်တဲ့ အချိန်မှာ တွေ့ဆုံဆွေးနွေးမယ်လို့ သိရပါတယ်။

Ref: RFA News