အာရပ်လှိုင်းစီးသူများ

ဂါမဏိ

အာရပ်နိုင်ငံတွေမှာ အောင်ပွဲခံခဲ့၊ အောင်ပွဲခံဖို့ အားထုတ်နေတဲ့ အာဏာရှင် အစိုးရ ဖြုတ်ချရေး တော်လှန်ရေး လှိုင်းကို မြန်မာပြည် မှာလည်း စီးဖို့ လိုလားကြိုးစားနေကြသူတွေ မနည်းမနော ရှိနေပါတယ်။ အခုအခါ အာရပ် လှိုင်းကို ကမ္ဘာ့နိုင်ငံပေါင်း (၅၂) နိုင်ငံမှာ စီးခဲ့ပြီဖြစ်ပေမယ့် ကမ္ဘာ့ ဝါရင့် အာဏာရှင်နိုင်ငံ မြန်မာပြည် ကျန်နေပါ သေးတယ်။ အခုဆောင်းပါးမှာ အာရပ်လှိုင်း စီးခဲ့တဲ့ နိုင်ငံတွေကို တတ်နိုင်သလောက် စာရင်း ကောက်ထားပါတယ်။

၁။ ၂၀၁၀ ခုနှစ် ဒီဇင်ဘာ (၁၇) ရက် - အရှေ့အလယ်ပိုင်းက အာရပ်နိုင်ငံတခု ဖြစ်တဲ့ ကျူနီးရှား နိုင်ငံမှာ အာဏာရှင် လက်ပါးစေ ပုလိပ်မတယောက်ရဲ့ နှိပ်စက်မှုတွေကို မခံနိုင်တော့တဲ့ အဆုံး ဘွဲ့ရ အလုပ်လက်မဲ့ တဖြစ်လဲ ဟင်းရွက်စုံ တွန်းလှည်း သမားလေး မိုဟာမက်ဘွာဇီဇီဟာ ကိုယ့်ကိုယ်ကိုယ် မီးရှို့ သတ်သေ ခဲ့ရာကနေ ကျူနီးရှား တော်လှန်ရေး ပေါက်ဖွား လာခဲ့ပြီး (၂၈) ရက်အကြာ ၂၀၁၁ ခုနှစ် ဇန်နဝါရီလ (၁၄) ရက်မှာ အာဏာရှင် သမ္မတ ဘင်အလီ ထွက်ပြေး သွားတဲ့အတွက် ဒီမိုကရေစီ လိုလားသူတွေ အောင်ပွဲ ရသွားခဲ့ပါတယ်။ ဒီလူထု တိုက်ပွဲအတွင်း လူ (၂၀၀) ကျော် ပစ်သတ် ခံခဲ့ရပါတယ်။

ဒီမိုကရေစီဆိုလို့ မူးလို့တောင် ရှူစရာမရှိဘဲ အာဏာရှင်တွေနဲ့ သက်ဦးဆံပိုင် ပဒေသရာဇ်တွေ ကြီးစိုးတဲ့ အာရပ် ကမ္ဘာ၊ အကြမ်းဖက် ဝါဒ အားပေးတယ် ဆိုတဲ့ အစ္စလမ် အာရပ် ကမ္ဘာမှာ ကြုံတောင့်ကြုံခဲ ဒီမိုကရေစီတော် လှန်ရေးတခု အောင်ပွဲ ခံသွားတာဟာ အာဏာရှင်တွေရဲ့ ဖိနှိပ် ချုပ်ချယ်မှုတွေကို အံကြိတ် ခံနေရတဲ့ ဘဝတူ အာရပ်နိုင်ငံတွေကို ဂယက်ရိုက် သွားခဲ့ပါတယ်။

၂။ ဒီလိုနဲ့ ၂၀၁၁ ခု ဇန်နဝါရီ (၂၅) ရက်မှာ အီဂျစ်တော်လှန်ရေး စခဲ့ပြီး ဖေဖော်ဝါရီ (၁၁) ရက်မှာ အာဏာရှင် မူဘာရတ် ရာထူးက ဆင်းပေးခဲ့လို့ ဒီမိုကရေစီ သမားတွေ ပဏာမ အောင်ပွဲ ရသွားခဲ့ပါတယ်။ လူပေါင်း (၉၀၀) နီးပါး အသက် ဆုံးခဲ့ပါတယ်။

၃။ ဒီနောက် လစ်ဗျားနိုင်ငံမှာ အာဏာရှင်ကဒါဖီဆန့်ကျင်ရေး တော်လှန်ရေး ဖေဖော်ဝါရီ (၁၈) ရက်မှာ စခဲ့ပြီး အာဏာရှင်ရဲ့ ရက်ရက်စက်စက် အကြမ်းဖက် သတ်ဖြတ်မှုကြောင့် လူထု တိုက်ပွဲ အဖြစ်ကနေ လက်နက်ကိုင် တိုက်ပွဲအဖြစ် ပြောင်းလဲသွားပြီး ဒီကနေ့ထိ အာဏာရှင်နဲ့ ဒီမိုကရေစီ ဘက်သားတွေ အပြင်းအထန် လက်နက် ကိုင် တိုက်နေဆဲ ဖြစ်ပါတယ်။ အခုထိဆိုရင် လူပေါင်း (၁၃,၀၀၀) လောက် သေခဲ့ပါပြီ။

၎။ မြန်မာပြည်က ရွှေ့ပြောင်းအလုပ်သမားတွေ တော်တော်များများရှိတဲ့ ဘာရိန်း ကျွန်းနိုင်ငံလေး မှာလည်း ဖေဖော်ဝါရီ (၁၄) ရက်မှာ လူထုတိုက်ပွဲ စခဲ့ပါတယ်။ သက်ဦးဆံပိုင် ပဒေသရာဇ် ဘုရင် အယ်လ်ခါလီဖာက ရက်ရက်စက်စက် သတ်ဖြတ် နှိမ်နင်းတဲ့ ကြားက ဇွဲနဘဲနဲ့ တော်လှန်ရေး လုပ်ခဲ့တဲ့အတွက် နောက်ဆုံးမှာ အိမ်နီးနားချင်း ပဒေသရာဇ် နိုင်ငံတွေကို အကူအညီတောင်း၊ စစ်တပ်တွေ ခေါ်ပြီး မတ်လ (၁၄) ရက်မှာ အကြီးအကျယ် နှိမ်နင်းခဲ့ပါတယ်။ လူထု ဆန္ဒပြပွဲတွေ အတွင်းမှာ စစ်တပ်နဲ့ ပုလိပ်တွေ ပစ်ခတ် နှိမ်နင်းမှုကြောင့် ဒဏ်ရာရသူ တွေကို ဆေးကုပေးခဲ့တဲ့ ဆရာဝန်တွေ၊ သူနာပြု ဆရာမတွေ ကိုပါ ပဒေသရာဇ် အာဏာရှင်က ဖမ်းဆီးထောင် ချခဲ့ပါသေးတယ်။ လူ (၄၀) လောက် အသက် ဆုံးခဲ့ပါတယ်။ မတန်တဆ အင်အားနဲ့ နှိမ်နင်းခံရလို့ မတတ်သာ ဘဲ ငြိမ်နေရပေမယ့် ဆက်တိုက်မယ့် အခြေအနေ ရှိပါတယ်။

၅။ ယီမင်နိုင်ငံမှာလည်း ဇန်နဝါရီလလယ်မှာ အာဏာရှင် သမ္မတ အလီဆာလယ်ကို တော်လှန်တဲ့ လူထုတိုက် ပွဲတွေ ပေါ်ထွက် လာခဲ့ပါတယ်။ သမ္မတ ဆာလယ်ကလည်း ပြင်းပြင်း ထန်ထန် ပစ်ခတ် သတ်ဖြတ် နှိမ်နင်းခဲ့လို့ အခုထိ လူပေါင်း (၁,၀၀၀) လောက် အသတ် ခံခဲ့ရပြီး ဖြစ်ပါတယ်။ မေလထဲမှာတော့ တချို့နေရာတွေမှာ လူထုတိုက်ပွဲဟာ လက်နက်ကိုင် တိုက်ပွဲ အဖြစ် ဖြစ်ထွန်း သွားခဲ့ပြီး အခု နောက်ဆုံး အခြေအနေကတော့ တိုက်ပွဲပုံ စံ (၂) မျိုး ပေါင်းစပ် တိုက်ပွဲဝင်နေတဲ့ သဘော ရှိပါတယ်။

ကျူနီးရှားနဲ့ အိဂျစ်လူထုတိုက်ပွဲတွေ အတိုင်းအတာတခုအထိ အေးအေးဆေးဆေးနဲ့ အောင်မြင် သွားပြီး အမေရိကန် ဆန့်ကျင်ရေးသမား လစ်ဗျားမှာတော့ သွေးချောင်း စီးနေတာ တွေ့တဲ့အခါ တချို့ လေ့လာသူတွေက အမေရိကန်ရဲ့ မဟာမိတ် နိုင်ငံတွေမှာ စီးပွားရေး ပိတ်ဆို့မှု မရှိလို့ အမေရိကန်နဲ့ စီးပွားရေး အပါအဝင် ဘက် ပေါင်းစုံ အဆက်အသွယ် တွေလည်းရှိ၊ စစ်တပ် တွေကလည်း အမေရိကန် စစ်တပ်နဲ့ အဆက်အဆံရှိ၊ အမေရိ ကန်စစ်တက္ကသိုလ်တွေ၊ စစ်သင်တန်း ကျောင်းတွေမှာ သင်တန်း တက်တာတွေ ရှိတဲ့အတွက် ဒီမိုကရေစီ အမေရိကန် နိုင်ငံက အတွေး အခေါ်တွေ၊ စိတ်ဓာတ်တွေ စိမ့်ဝင် ကူးစက်နေလို့ လူထုတိုက်ပွဲကို ပစ်ခတ် နှိမ်နင်းတာမ ရှိဘဲ တော်လှန်ရေးတွေ အောင်သွားတယ်လို့ ယူဆ ခဲ့ကြပါသေးတယ်။ ဒါပေမယ့် ယီမင်နဲ့ ဘာရိန်း အပါအဝင် အမေရိကန်ရဲ့ အမာခံ မဟာမိတ် နိုင်ငံတွေမှာ ရက်ရက်စက်စက် ပစ်သတ်ပြီး ဒီမိုကရေစီမရ၊ လူထုတိုက်ပွဲ မနိုင်ဘဲ ဖြစ်နေတဲ့အခါ စောစောက စဉ်းစားချက်တွေကို ပယ်ဖျက် လိုက်ကြရပါတော့တယ်။

၆။ အမေရိကန်ဆန့်ကျင်ရေးသမား ဆီးရီးယားနိုင်ငံမှာ လူထုတိုက်ပွဲတွေ ဇန်နဝါရီ (၂၆) မှာ စပေါ်ခဲ့ပြီး အာဏာရှင် သမ္မတ အာဆဒ်က ရက်ရက်စက်စက် ပစ်ခတ် နှိမ်နင်းလို့ အခုအထိ လူပေါင်း (၁,၈၀၀) ကျော် အ သက် ဆုံးခဲ့ပါတယ်။ ဒါပေမယ့် ပြည် သူလူထုတွေဟာ အခုထိ ဇွဲနဘဲ ကြီးကြီးနဲ့ တိုက်ပွဲ ဝင်နေဆဲဖြစ်ပြီး လက်နက်ကိုင် တိုက်ပွဲနဲ့ ပေါင်းစပ်မယ့် အလားအလာ ရှိနေပါတယ်။ ဆီးရီးယား အာဏာရှင် အစိုးရကို ရုရှားနိုင်ငံက ရာနှုန်းပြည့် ထောက်ခံကူညီနေပါတယ်။ နအဖ-ကြံ့ဖွတ်ကို တရုတ်နိုင်ငံက ထောက်ခံ သလိုမျိုး ကုလသမဂ္ဂ ဗီ တိုအာဏာနဲ့ လက်နက်ခဲယမ်း အပါအဝင် ဘက်ပေါင်းစုံက ထောက်ခံ ပေးနေတာ ဖြစ်ပါတယ်။

ဒီ (၆) နိုင်ငံအပြင် အာဏာရှင်ဆန့်ကျင်ရေး လူထုတိုက်ပွဲဆိုတဲ့ အာရပ်လှိုင်း စီးခဲ့တဲ့ တခြား အာရပ် နိုင်ငံတွေက တော့…

၇။ သက်ဦးဆံပိုင်ပဒေသရာဇ် ဂျော်ဒန် - ဇန်နဝါရီ (၁၄) ရက် လူထုတိုက်ပွဲ စခဲ့ပြီး အကြမ်းဖက် နှိမ်နင်းခံရ၊ အသေအပျောက် နည်းနည်းရှိ၊ အခုထိ တိုက်နေဆဲ။

၈။ သက်ဦးဆံပိုင်ပဒေသရာဇ် အိုမန် - ဇန်နဝါရီ (၁၇) ရက် လူထုတိုက်ပွဲ စခဲ့ပြီး ပစ်ခတ် နှိမ်နင်းခံရ၊ လူ (၁၀) ယောက်နီးပါး သေ၊ မေလနှောင်းပိုင်း အရှိန်လျော့။

၉။ သက်ဦးဆံပိုင်ပဒေသရာဇ် ကူဝိတ် - ဖေဖော်ဝါရီ (၁၉) ရက် လူထုတိုက်ပွဲစပြီး အကြမ်းဖက် နှိမ်နင်းခံရ၊ အသေအပျောက် မရှိ၊ ဇွန်လအထိ တိုက်နေဆဲ။

၁၀။ သက်ဦးဆံပိုင်ပဒေသရာဇ် ဆော်ဒီအာရေးဗျ - ဇန်နဝါရီ (၂၁) ရက် လူထုတိုက်ပွဲ စခဲ့ပြီး အကြမ်းဖက် နှိမ်နင်း ခံရ၊ အသေအပျောက် နည်းနည်းရှိ၊ လောလောဆယ်မှာ အမျိုးသမီးတွေ ဦးဆောင်ပြီး ကားမောင်းခွင့် ရရေး ခေါင်းစဉ်နဲ့ လူထုတိုက်ပွဲ ဆက်လုပ် နေပါတယ်။

၁၁။ သက်ဦးဆံပိုင်ပဒေသရာဇ် မော်ရိုကို - ဇန်နဝါရီ (၃၀) ရက် လူထုတိုက်ပွဲစခဲ့ပြီး အကြမ်းဖက် နှိမ်နင်းခံရ၊ လူ (၁၀) ယောက်နီးပါး သေ၊ အခုထိ တိုက်နေဆဲ။

၁၂။ မော်ရိုကို သိမ်းပိုက်ခံ အနောက်ဆာဟာရ - ဖေဖော်ဝါရီ (၂၆) ရက် လူထုတိုက်ပွဲ စခဲ့ပြီး အကြမ်းဖက် နှိမ်နင်း ခံရ၊ အသေအပျောက် နည်းနည်းရှိ။

၁၃။ အီရတ် - ဖေဖော်ဝါရီ (၁၀) ရက် လူထုတိုက်ပွဲစခဲ့ပြီး အကြမ်းဖက်ပစ်ခတ် နှိမ်နင်း ခံရ၊ လူ (၃၀) ကျော် သေ၊ ဇွန်လနှောင်းပိုင်း အရှိန်လျော့။

၁၄။ အီရတ် ကာဒစ်စတန် - ဖေဖော်ဝါရီ (၁၇) ရက် လူထုတိုက်ပွဲစခဲ့ပြီး အကြမ်းဖက် ပစ်ခတ် နှိမ်နင်းခံရ၊ လူ (၁၀) ယောက်လောက်သေ။

၁၅။ လက်ဘနွန် - ဖေဖော်ဝါရီ (၂၇) ရက် လူထုတိုက်ပွဲစခဲ့၊ ဂိုဏ်းဂဏ အကြမ်းဖက်မှုကြောင့် (၁၀) ယောက် လောက်သေ။

၁၆။ အဇ္ဇရေးနယ်စပ် - မေ (၁၅) ရက်နဲ့ ဇွန်လထဲမှာ လူထုချီတက်ပွဲလုပ်၊ (၄၀) ခန့်ကို အဇ္ဇရေးက ပစ်သတ်။

၁၇။ အယ်လ်ဂျီးရီးယား - ဒီဇင်ဘာ (၂၉) ရက် စတိုက်ခဲ့ပြီး အကြမ်းဖက်နှိမ်နင်းခံရ၊ မိမိကိုယ် မီးရှို့ဆန္ဒပြသူ (၄) ယောက်ပါ၊ ရဲများလည်း ဆန္ဒပြ၊ မေလနှောင်းပိုင်း အရှိန်လျော့၊ လူ (၁၀) ယောက်နီးပါးသေ။

၁၈။ မော်ရီတေးနီးယား - ဇန်နဝါရီ (၁၇) ရက် လူထုတိုက်ပွဲစခဲ့ပြီး ဧပြီအထိ။

၁၉။ ဆူဒန် - ဇန်နဝါရီ (၃၀) ရက် လူထုတိုက်ပွဲစခဲ့ပြီး အကြမ်းဖက်နှိမ်နင်းခံရ၊ အသေအပျောက် နည်းနည်း ရှိ။

ဒီနိုင်ငံတွေထဲမှာ အယ်လ်ဂျီးရီးယား၊ မော်ရီတေးနီးယား၊ ဆူဒန်တို့က ရုရှား-တရုတ် မဟာ မိတ်တွေ ဖြစ်ပြီး ကျန်တာအားလုံး အမေရိကန်ရဲ့မဟာမိတ် အာဏာရှင် နိုင်ငံတွေ ဖြစ်ပါတယ်။ အီရတ်နဲ့ အီရတ် နိုင်ငံထဲက ကာဒစ်စ တန် ပြည်နယ်တို့ ဆိုရင် အမေရိကန် စစ်တပ်တွေ ရောက်ရှိ သိမ်းပိုက်ထားပြီး ဒီမိုကရေစီ ရနေပြီဆိုတဲ့ နိုင်ငံတွေ ဖြစ်သလို လက်ဘနွန်ကတော့ ဒီမိုကရေစီ တပိုင်း နိုင်ငံဖြစ်ပါတယ်။ ဒီတော့ ခြုံကြည့်လိုက်ရင် အမေရိကန်လူ ဖြစ်ဖြစ် အမေရိကန် ဆန့်ကျင်ရေး သမား ဖြစ်ဖြစ် အာဏာရှင်တွေဟာ အာဏာကို ထိန်းသိမ်းနိုင်ဖို့ အတွက် အကြမ်းဖက်ဖို့ လက်မနှေးဘူး၊ လူသတ်ဖို့ ဝန်မလေးဘူး ဆိုတာ တွေ့ရပါတယ်။

အာရပ်ကမ္ဘာမှာ အာဏာရှင်ဆန့်ကျင်ရေးလှိုင်း မစီးခဲ့တာ ကာတာနဲ့ ယူအေအီးပဲ ကျန်ပါတယ်။ ဒီ (၂) နိုင်ငံ မှာတော့ အင်တာနက်ထဲ ကွန်ယက်ဖွဲ့ ကြေညာချက် ထုတ်တဲ့ အဆင့်က မတက်ခဲ့ပါဘူး။

ကမ္ဘာ့သတင်းတွေမှာ သိသိသာသာ မပါခဲ့ပေမယ့် အာရပ်ကမ္ဘာရဲ့ ပြင်ပမှာလည်း အာရပ်လှိုင်း စီးတဲ့ နိုင်ငံတွေ မနည်းမနော ရှိခဲ့ပါတယ်။ ရှိနေပါတယ်။ အာရှတိုက်မှာ ဆိုရင် …

(၁) အမေရိကန်ဆန့်ကျင်ရေးအမာခံ အစ္စလာမ်အာဏာရှင်စနစ် အီရန် နိုင်ငံကတော့ သတင်းတွေမှာ အပါများလို့ ထင်ရှား ခဲ့ပါတယ်။ အီရန်မှာ ဖေဖော်ဝါရီ (၁၄) ရက်မှာ လူထုတိုက်ပွဲ စခဲ့ပါတယ်။ (၁၅) ယောက်လောက် ပစ်သတ်ခံရပြီး မေလထဲမှာ အရှိန် လျော့သွားခဲ့ပါတယ်။

(၂) အမေရိကန်မဟာမိတ်ဖြစ်တဲ့ တူရကီနိုင်ငံမှာ ကာ့ဒ်တိုင်းရင်းသားတွေက မတ်လ (၂၄) ရက်မှာ တိုင်းရင်းသား တန်းတူ အခွင့်အရေး လူထုတိုက်ပွဲ စခဲ့ပြီး အကြမ်းဖက် နှိမ်နင်းခံရလို့ (၅) ယောက် လောက် သေခဲ့ပါတယ်။ အခုထိ ဆက်တိုက် နေတုန်း ဖြစ်ပါတယ်။

(၃) တရုတ်နိုင်ငံနဲ့ ... (၄) ဗီယက်နမ်နိုင်ငံမှာတော့ အဓိကအားဖြင့် အင်တာနက် လှုပ်ရှားမှု အဆင့်ပဲ ဖြစ်ခဲ့ပါတယ်။ တရုတ်ပြည်မှာ ဖေဖော်ဝါရီ (၂၀) ရက် လူထုတိုက်ပွဲ စဖို့ စည်းရုံး ပြင်ဆင် ခဲ့ပေမယ့် တရုတ် အာဏာရှင် အစိုးရက အင်အား အကြီးအကျယ်သုံး ဟန့်တား နိုင်ခဲ့ပါတယ်။ ဗီယက်နမ်မှာတော့ ဖေဖော်ဝါရီနဲ့ မတ်လအတွင်း ကိုယ့်ကိုယ်ကို မီးရှို့ဆန္ဒပြမှု တခုနဲ့ ဆန္ဒပြပွဲ အသေးစား တချို့ ဖြစ်ခဲ့ပါတယ်။

(၅) တရုတ်ကိုလိုနီ တိဘက်မှာ ဇွန် (၆) ရက်ကနေ အခုအထိ သံဃာတွေနဲ့ အရပ်သားတွေ ဆန္ဒ ပြနေကြပါ တယ်။ တရုတ် အစိုးရကလည်း ဖြိုခွဲ ဖမ်းဆီးတာတွေ လုပ်ခဲ့ပါတယ်။ အသေအပျောက် သတင်း မကြားရသေး ပါ။

(၆) ၂၀၀၄-၂၀၀၅ မှာ လူထုတိုက်ပွဲတွေ ဖြစ်ခဲ့ပြီး ၂၀၀၈ မှာ ဒီမိုကရေစီ တော်လှန်ရေး ငြိမ်းချမ်းစွာ အောင်မြင် သွားခဲ့တယ် ဆိုတဲ့ မောလဒိုက်နိုင်ငံမှာ ၂၀၁၁ မေ (၁) ရက်နေ့မှာ လူထု ဆန္ဒပြပွဲတွေ စခဲ့ပါတယ်။ ဒါကို ၂၀၀၈ မှာ အာဏာရလာခဲ့တဲ့ ဒီမိုကရေစီ တော်လှန်ရေး ခေါင်းဆောင် ဆိုသူ လက်ရှိ သမ္မတက အကြမ်းဖက် နှိမ်နင်းခဲ့ပါတယ်။

(၇) အာဖဂန်နစ္စတန်နိုင်ငံမှာ မတ်လ (၆) ရက်ကစပြီး အမေရိကန်ဆန့်ကျင်ရေး လူထု ဆန္ဒပြပွဲတွေ လုပ်ခဲ့ကြ ပါတယ်။ မေလကုန် အထိ အယောက် (၃၀) လောက် ပစ်သတ် ခံခဲ့ရပြီ ဖြစ်ပါတယ်။

(၈) ပစိဖိတ်သမုဒ္ဒရာထဲက ဖီဂျီကျွန်းနိုင်ငံမှာ မတ်လ (၄) ရက် လူထုတိုက်ပွဲစဖို့ စီစဉ်ခဲ့ပေမယ့် စစ်အာဏာ ရှင်တွေက ကြိုတင်ပြီး ရက်ရက်စက်စက် နှိပ်ကွပ် ခဲ့ပါတယ်။

အာဖရိကတိုက်မှာ အာရပ်လှိုင်းစီးတဲ့ နိုင်ငံတွေကတော့ ...

(၁) အိုင်ဗရီကို့စ်နိုင်ငံမှာ ရွေးကောက်ပွဲနိုင်တဲ့သူကို အာဏာလွှဲမပေးတဲ့ အာဏာရှင် ဂဘာ့ဂ်ဘိုကို ကုလသမဂ္ဂ အသိအမှတ်ပြု ရွေးကောက်ပွဲနိုင် ဥတ္တရက ဖေဖော်ဝါရီ လကုန်ပိုင်းမှာ လက်နက်ကိုင် တိုက်ပွဲ စတင် ဆင်နွှဲခဲ့ပါ တယ်။ တချိန်တည်းမှာ အမျိုးသမီး ခေါင်းဆောင် အိုင်ယာတူရေက အမျိုးသမီး ငါးသောင်းလောက် ပါဝင်တဲ့ လူထု တိုက်ပွဲကို မတ်လ (၃) ရက်နေ့နဲ့ (၈) ရက်နေ့တွေမှာ ဆင်နွှဲခဲ့ပါတယ်။ အာဏာရှင် အစိုးရက ဆန္ဒပြအမျိုး သမီး (၁၀) ယောက်လောက်ကို ပစ်သတ်ခဲ့ပါတယ်။ ဒါပေမယ့် ဧပြီ (၁၁) ရက်မှာ အာဏာရှင် ဂဘာ့ဂ်ဘိုကို အရှင်ဖမ်းမိပြီး တော်လှန်ရေး အောင်မြင် သွားခဲ့ပါတယ်။

(၂) အာဖရိကတိုက်က ဘာကီနာဖာစိုနိုင်ငံမှာလည်း ဇန်နဝါရီလကုန်ကစပြီး လူထု တိုက်ပွဲတွေ ကြီးကြီး မားမား ဖြစ်ခဲ့ပါတယ်။ ကျောင်းသားတွေ ပစ်သတ် ခံခဲ့ရပါတယ်။ ဧပြီလ (၁၅) ရက်မှာတော့ တပ်မတော်သား တွေနဲ့ ရဲတွေကလည်း လူထု တိုက်ပွဲထဲ ပါလာပြီး တပ်တွင်း ပုန်ကန်မှုတွေ ဟိုတကွက် ဒီတကွက် ပေါ်လာပါတယ်။ ဒီနောက်မှာ လူထု တိုက်ပွဲထဲ အတိုက်အခံ နိုင်ငံရေး ပါတီတွေ၊ လယ်သမားတွေ၊ ကုန်သည်တွေ၊ အနုပညာရှင် တွေ၊ ကျောင်းဆရာတွေ၊ တရားသူကြီးတွေ ပါဝင် လာပါတယ်။ အာဏာရှင် သမ္မတ ဘလေ့စ်ကွမ်ပါအောက တော့ အကြမ်းဖက် သတ်ဖြတ်မှုတွေ လှည့်ဖျားမှုတွေ သုံးပြီး အခုအချိန်ထိ အာဏာကို ဖက်တွယ်နေတုန်းဖြစ် သလို ပြည်သူလူထုကလည်း ဇွဲနဘဲ ကြီးကြီးနဲ့ ဆက်လက် တိုက်ပွဲ ဝင်နေဆဲ ဖြစ်ပါတယ်။

(၃) အာဖရိကတိုက်က ရုရှားမဟာမိတ် အင်ဂိုလာနိုင်ငံမှာ မတ်လ (၆) ရက်နဲ့ (၇) ရက်တွေမှာ လူထု တိုက်ပွဲ အသေးစားတွေ ဖြစ်ခဲ့ပါတယ်။

(၄) အာဖရိကတိုက်က ကင်မရွန်းနိုင်ငံမှာ အလုပ်သမားတွေနဲ့ ပြည်ပရောက် အတိုက်အခံ တွေက ဖေဖော်ဝါရီ (၂၃) ရက်မှာ လူထု တိုက်ပွဲတွေ ဆင်နွှဲခဲ့ပေမယ့် အစီအစဉ် ညံ့ဖျင်းလို့ အလွယ်တကူ နှိမ်နင်း ခံခဲ့ရပါတယ်။

(၅) အာရပ်တပိုင်း အာဖရိကတပိုင်း ဂျီဘူတီနိုင်ငံမှာလည်း ဇန်နဝါရီ (၂၈) ရက်မှာ လူထုတိုက်ပွဲ စခဲ့ပြီး အတိုက်အခံ ခေါင်းဆောင်တွေ အားလုံးလိုလို အဖမ်း ခံရပြီးနောက် ဖေဖော်ဝါရီ လကုန်ပိုင်းမှာ အရှိန် လျော့သွားခဲ့ ပါတယ်။ ဆန္ဒပြသမား (၅) ယောက်လောက် အသတ် ခံခဲ့ရပါတယ်။

(၆) ဂါဘွန်နိုင်ငံမှာ ဇန်နဝါရီ (၂၉) ရက်မှာ လူထုတိုက်ပွဲစတင်ခဲ့ပြီး အကြမ်းဖက်နှိမ်နင်း ခံခဲ့ ရပါတယ်။ အခုအ ချိန်ထိ ကျောင်းသားတွေက ဦးဆောင်ပြီး လူထု တိုက်ပွဲ ဆင်နေဆဲ ဖြစ်ပါတယ်။

(၇) ရုရှားနဲ့ တရုတ် မဟာမိတ် မိုဇမ်ဘစ်နိုင်ငံက အလုပ်သမားတွေ ဧပြီ (၆) ရက်မှာ လူထု တိုက်ပွဲ စခဲ့တာကို ပုလိပ်တွေက ဖြိုခွင်းလို့ အလုပ်သမား တချို့ သေဆုံးခဲ့ပါတယ်။ နောက်ပိုင်းမှာ စစ်ပြန် ရဲဘော်ဟောင်းတွေ ပါ ဝင်လာ ခဲ့ပါတယ်။ အခုအချိန်ထိ လူထု ဆန္ဒပြပွဲတွေ ဆက်ဖြစ် နေသလို ပစ်သတ် ခံရတာည်း လူ (၂၀) နီးပါး ရှိ သွားပြီ ဖြစ်ပါတယ်။

(၈) သက်ဦးဆံပိုင် ပဒေသရာဇ်နိုင်ငံ ဆွာဇီလန်မှာ ပဒေသရာဇ်အာဏာရှင် ဆန့်ကျင်ရေး လူထု တိုက်ပွဲကို မတ် လ (၁၈) ရက်ကနေ ဧပြီလအထိ ဆင်နွှဲခဲ့ပြီး အကြမ်းဖက် ဖြိုခွဲ ခံခဲ့ရပါတယ်။

(၉) ယူဂန္ဓာနိုင်ငံမှာ ဖေဖော်ဝါရီ ရွေးကောက်ပွဲမသမာမှုတွေကြောင့် ဥရောပနဲ့ ကမ္ဘာ့ဘဏ် အချစ်တော် အာဏာရှင် မူဆယ်ဗင်နီကို ဆန့်ကျင် ဆန္ဒပြပွဲတွေ ဧပြီ (၁၁) ရက်မှာ စဖြစ်ခဲ့ပါတယ်။ အကြမ်းဖက် ဖြိုခွင်းမှုကြောင့် ဧပြီ လကုန်အထိ (၁၀) ယောက်လောက် သေခဲ့ပြီ ဖြစ်ပါတယ်။

(၁၀) ဇင်ဘာဘွေနိုင်ငံမှာ မတ်လ (၁) ရက် လူထု ချီတက်ပွဲလုပ်ဖို့ စီစဉ်ခဲ့ပေမယ့် အာဏာရှင် မူဂါဘီက တင်ကြို နှိပ်ကွပ် နိုင်ခဲ့ပါတယ်။

(၁၁) စစ်ဘုရင်တွေ လွှမ်းမိုးနေတဲ့ ဆိုမာလီယာနိုင်ငံမှာ ဖေဖော်ဝါရီ (၁၇) ရက်မှာ စစ်ဘုရင် ဆန့်ကျင်ရေး ငြိမ်းချမ်းရေး တောင်းဆို ဆန္ဒပြခဲ့ကြပြီး ဧပြီ (၇) ရက်မှာတော့ ကုလ ဝန်ထမ်း စရိတ်တွေ၊ အဲန်ဂျီအို စရိတ်တွေ အသုံးများတာကို ဆန္ဒ ပြခဲ့ကြပါတယ်။ သမ္မတ အာဏာတိုးပြီး ရွေးကောက်ပွဲ ရွှေ့ဆိုင်း တာကို မကျေနပ်လို့ ဇွန် (၉-၁၀) ရက်တွေမှာ ဆန္ဒပြတာ (၂) ယောက် ပစ်သတ် ခံရပါတယ်။

အာရှအလယ်ပိုင်းမှာတော့ …

(၁) ဒီမိုကရေစီအတော်အသင့်ရှိတဲ့ အာမေးနီးယားနိုင်ငံမှာ စီးပွားရေးကျပ်တည်းမှု တွေကြောင့် ဇန်နဝါရီ (၁၉) ရက်မှာ လမ်းဘေး ဈေးသည်တွေက လူထုတိုက်ပွဲ စဖွင့်ခဲ့ပြီး နောက်ပိုင်းမှာ နိုင်ငံရေး ချုပ်ချယ်မှု တွေကိုပါ ဆန္ဒ ပြ အရှိန်မြင့်လာခဲ့တာ မေလကုန်အထိ ဖြစ်ပါတယ်။ အစိုးရဆီက လိုက်လျောချက် ကြီးကြီးမားမား ရခဲ့ပါတယ်။ အစိုးရက အကြမ်းမဖက် ခဲ့လို့ အသေအပျောက် မရှိခဲ့ပါ။

(၂) အာဏာရှင်တပိုင်း အဇာဘိုင်ဂျန်မှာ လွတ်လပ်ခွင့်ပိုရရေးနဲ့ အကျင့်ပျက်ခြစားမှု ဆန့်ကျင်ရေး အတွက် မတ် (၁၁) ရက်မှာ လူထုတိုက်ပွဲစခဲ့တာ မေလအထိ ဆင်နွှဲခဲ့ပါတယ်။ အစိုးရက အကြမ်းဖက် နှိမ်နင်းတာ မလုပ် ပေမယ့် လူဖမ်းပွဲ အကြီးအကျယ် လုပ်ခဲ့ပါတယ်။

(၃) ၂၀၀၃ ခု နှင်းဆီရောင်တော်လှန်ရေးနဲ့ ဒီမိုကရေစီနိုင်ငံဖြစ်လာတဲ့ ဂျော်ဂျီယာ နိုင်ငံမှာတော့ ဒီမိုကရေစီ အစိုးရရဲ့အကျင့်ပျက်ခြစားမှု၊ စီးပွားရေး ညံ့ဖျင်းမှုတွေကို မေလ (၂၁) ရက်ကစပြီး တပတ်ကြာ လူထု တိုက်ပွဲ ဆင်ခဲ့ကြပါတယ်။ ရဲတွေက ဖြိုခွဲခဲ့ရာမှာ (၂) ယောက် သေခဲ့ပါတယ်။

ယေဘုယျအားဖြင့် ဒီမိုကရေစီနိုင်ငံတွေလို့ ပြောနိုင်တဲ့ ဥရောပနိုင်ငံ တချို့မှာလည်း စီးပွားရေး မကျေနပ်ချက် တွေနဲ့ အကျင့်ပျက် ခြစားမှုတွေကြောင့် အာရပ်လှိုင်း လိုက်စီး ကြတာတွေ ရှိပါတယ်။

(၁) အယ်လ်ဘေးနီးယားနိုင်ငံမှာ စီးပွားရေးညံ့ဖျင်းမှုနဲ့ လာဘ်ပေးလာဘ်ယူမှုကို မကျေနပ်လို့ ဇန်နဝါရီ (၂၁) ရက်ကစပြီး လူထုတိုက်ပွဲ တိုက်ခဲ့တာ ဆန္ဒပြသမား (၄) ယောက် အသတ် ခံခဲ့ရပါတယ်။

(၂) ဥရောပတိုက်ရဲ့ နောက်ဆုံးအာဏာရှင်နိုင်ငံ ရုရှားတပည့် ဘယ်လာရုစ်မှာ မတ်လ (၂၅) ရက်ကနေ အခု ထိ လူထုတိုက်ပွဲတွေ အပတ်စဉ်ဖြစ်ခဲ့ပြီး အကြမ်းဖက် ဖြိုခွဲ ခံခဲ့ရပါတယ်။

(၃) ခရိုအေးရှားနိုင်ငံမှာ ဖေဖော်ဝါရီ (၂၂) ရက်မှာ လမ်းပေါ်လူထုတိုက်ပွဲတွေ ပေါက်ဖွားခဲ့ပြီး အကြမ်းဖက် ဖြိုခွဲ ခံရပါတယ်။ ဧပြီလဆန်းမှာ အရှိန် လျော့သွားခဲ့ပါတယ်။

(၄) ဒီမိုကရေစီနိုင်ငံဖြစ်တဲ့ စပိန်နိုင်ငံမှာ ဘယ်ပါတီဝင်မှမဟုတ်တဲ့ လူငယ်တွေက မေ (၁၅) ရက်မှာ လူထု တိုက်ပွဲ ဆင်နွှဲပြီး နိုင်ငံရေး၊ စီးပွားရေး ပြုပြင် ပြောင်းလဲမှုတွေ တောင်းဆို ခဲ့ကြပါတယ်။ အခုအထိ ဆက်လက် ဆန္ဒပြနေဆဲ ဖြစ်ပါတယ်။ ရဲတွေနဲ့ အကြမ်းဖက် မှုတွေ ရှိခဲ့ပါတယ်။

(၅) ဂရိနိုင်ငံမှာ စီးပွားရေးမကျေနပ်ချက်တွေအပေါ်ကနေ လူထုတိုက်ပွဲတွေ မေ (၂၅) ရက်မှာ စခဲ့ပြီး အခုဆိုရင် ပိုပြီးတော့ ပြင်းထန် လာပါတယ်။ ရဲတွေနဲ့ အကြမ်းဖက်မှုတွေ ရှိပါတယ်။

(၆) အင်္ဂလိပ်ရဲ့ နောက်ဆုံးလက်ကျန် ကိုလိုနီတခုဖြစ်တဲ့ မြောက်အိုင်ယာလန်မှာ အင်္ဂလိပ် ဆန့်ကျင်ရေး လူထု တိုက်ပွဲတွေ ဇွန် (၂၂) ရက်မှာ စတင်ခဲ့ရာမှာ အဓိက အားဖြင့် အင်္ဂလိပ် လိုလားသူတွေက အကြမ်းဖက် မှုတွေ လုပ်ခဲ့ပါတယ်။

(၇) ဆိုက်ပရပ်နိုင်ငံမြောက်ပိုင်းမှာ ဇန်နဝါရီ (၂၈) ရက်ကစပြီး တူရကီသြဇာခံ အစိုးရ ဆန့်ကျင်ရေး လူထု တိုက်ပွဲ စလုပ်ခဲ့ပါတယ်။ ဧပြီနောက်ပိုင်းမှာ အရှိန် လျော့သွားပါတယ်။

တောင်အမေရိက-မြောက်အမေရိကမှာ …

(၁) အမေရိကန်ပြည်ထောင်စု ဝစ္စကွန်ဆင်ပြည်နယ်မှာ အလုပ်သမားတွေနဲ့ ကျောင်းသား တွေရဲ့ လူထုတိုက် ပွဲ ဖေဖော်ဝါရီ (၁၄) ရက်မှာ စဖြစ်ခဲ့ပါတယ်။ အဓိကအားဖြင့် အလုပ်သမား သမဂ္ဂ အခွင့်အရေး ဖျက်သိမ်းမခံရ ဖို့ ကာကွယ် တောင်းဆိုတာ ဖြစ်ပြီး အခုအချိန်ထိ တိုက်ပွဲ ဝင်နေဆဲ ဖြစ်ပါတယ်။ အင်ဒီယားနားနဲ့ အိုဟိုင်းယိုး ပြည်နယ်တွေ ကိုလည်း ကူးစက် ပျံ့နှံ့နေပါတယ်။

(၂) မက်ဆီကိုမှာ မတ် (၂၈) ရက်ကစပြီး မေလဆန်းအထိ အစိုးရနဲ့ မူးယစ်ဂိုဏ်းတွေ စားကျက် လုတဲ့ မူးယစ် ဆေးစစ်ပွဲဆန့်ကျင်ရေး လူထု တိုက်ပွဲ ဆင်ခဲ့ကြပါတယ်။

(၃) ဘိုလစ်ဗီးယားမှာ ကုန်ဈေးနှုန်းကျဆင်းရေးနဲ့ အစိုးရပြောင်းလဲရေးအတွက် ဖေဖော်ဝါရီ (၁၀) ရက်မှာ လူထုတိုက်ပွဲ စခဲ့ကြတာ ဧပြီလလယ် အထိ တိုက်ပွဲ ဝင်နေဆဲ ဖြစ်ပါတယ်။ အကြမ်းဖက် နှိမ်နင်းမှုတွေ ရှိပေမယ့် အသေအပျောက် သတင်း မကြားရပါ။

(၄) ပီရူးနိုင်ငံမှာ သတ္တုတွင်းလုပ်သားတွေက မေလဆန်းမှာ စတင် ဆန္ဒပြခဲ့ပြီး ဇွန်လထဲမှာ ဒေသ တော်တော် များများကို လူထု တိုက်ပွဲတွေ ပျံ့နှံ့ သွားခဲ့ပါတယ်။ အကြမ်းဖက် ခံရလို့ (၅) ယောက်နဲ့ (၁၀) ယောက်ကြား သေခဲ့ပါတယ်။ အခုထိ တိုက်နေဆဲ ဖြစ်ပါတယ်။

ဒါတွေကတော့ လက်လှမ်းမှီသမျှ စာရင်းပဲဖြစ်ပါတယ်။ ဒီလူထုတိုက်ပွဲတွေ အားလုံးဟာ ကျူနီးရှားနဲ့ အီဂျစ် တော်လှန်ရေး တွေရဲ့ လှုံ့ဆော်မှုကြောင့် ဖြစ်လာတာလို့ အဲဒီနိုင်ငံတွေက တိုက်ပွဲ ဝင်သူတွေ ကိုယ်တိုင် ပြောကြသလို အာရပ်  တော်လှန်ရေးလက္ခဏာ ဖြစ်တဲ့ အင်တာနက် အသုံးချ စည်းရုံးတာ၊ စီစဉ်တာ တွေလည်း လုပ်ခဲ့ကြတဲ့ အတွက် “အာရပ်လှိုင်းစီးသူများ” လို့ သတ်မှတ်တာ ဖြစ်ပါတယ်။

အာရပ်လှိုင်းစီးတာကို လေ့လာကြည့်တဲ့အခါ အာရပ်လှိုင်းဟာ အနာခံစီးရတာ ဖြစ်ပါတယ်။ သက်တောင့် သက်သာ ဇိမ်နဲ့ စီးရတာ မရှိသလောက်ပါ။ နိုင်ငံ တော်တော်များများမှာ စစ်တပ် သို့မဟုတ် ပုလိပ်က တဖြောဖြော သတ်နေတဲ့ကြားက နောက်မတွန့်ဘဲ ဇွဲနဘဲကြီးကြီးနဲ့ စီးနေကြတာ တွေ့ရပါတယ်။ ဗမာ စစ်တပ်နဲ့ မတူလို့ ငြိမ်းချမ်းစွာ အောင်မြင်သွားတာ ဆိုတဲ့ ကျူနီးရှားမှာ လူ (၂၀၀)၊ အီဂျစ်မှာ လူ (၁,၀၀၀) နီးပါး အသေခံ ခဲ့ရပါတယ်။ ဒါ့အပြင် အာရပ်လှိုင်းကို စစီးတာဟာ အများအားဖြင့် သာမန် ပြည်သူတွေပဲ ဖြစ်ပြီး နိုင်ငံရေး အတိုက်အ ခံပါတီတွေက နောက်မှလိုက်ပြီး တက်စီးကြတာ ဖြစ်ပါတယ်။ မစီးတဲ့ ပါတီတွေ ကတော့ မြောင်းထဲ  ရောက်ကုန် ကြပါတယ်။

အာရပ်လှိုင်းစီးတဲ့ (၅၂) နိုင်ငံဟာ တနိုင်ငံနဲ့ တနိုင်ငံ ထပ်တူညီတာ တခုမှမရှိသလို မူလအာရပ်လှိုင်း ကျူနီးရှား သို့မဟုတ် အိဂျစ်တို့နဲ့ ထပ်တူ ညီတာတွေလည်း မတွေ့ရပါဘူး။ ကမ္ဘာ့ အဆိုးဆုံး အာဏာရှင် နိုင်ငံတွေ ဆိုးပေ နိုင်ငံတွေ ပါသလို ဒီမိုကရေစီ နိုင်ငံလို့ အများ သတ်မှတ်ထားတဲ့ နိုင်ငံတွေလည်း ပါပါတယ်။ အမေရိကန် ဘက်သားကော ရုရှား-တရုတ် ဘက်သားရော ပါနေပါတယ်။ ဒါပေမယ့် အာဏာရှင် ဆန့်ကျင်ရေး အပါအဝင် မတရားမှု ဆန့်ကျင်ရေး လှိုင်းစီးတာတော့ တူနေပါတယ်။

အာရပ်လှိုင်းစီးတာ (၅၂) နိုင်ငံရှိပေမယ့် အာဏာရှင်ဘိုးအေ နိုင်ငံကြီးဖြစ်တဲ့ မြန်မာပြည် ကတော့ လှိုင်းစီးတဲ့ အထဲ မပါခဲ့တာ ထူးဆန်း နေပါတယ်။ ဒါပေမယ့် အခုနောက်ဆုံး အခြေအနေအရ ကရင်၊ ရှမ်း၊ ကချင်နယ်မြေတွေ မှာ လက်နက်ကိုင် တိုက်ပွဲတွေ တခြိမ်းခြိမ်း ဖြစ်လာနေပြီး အဲဒီကမှ မြို့ပေါ် လူထု တိုက်ပွဲတွေ၊ တပ်တွင်း ပုန်ကန် မှုတွေကို တွန်းအားပေးမယ့် အလားအလာ၊ လက်နက်ကိုင် တိုက်ပွဲနဲ့ လူထုတိုက်ပွဲ ပေါင်းစပ်မယ့် အလားအလာတော့ ရှိနေပါတယ်။ လူထုတိုက်ပွဲ ပေါက်ကွဲ လာတဲ့ အခါကျမှပဲ အတိုက်အခံ ပါတီတွေ ပါဝင်လာနိုင်ကောင်း ပါရဲ့ ...။ ။