DKBA နယ်ခြားစောင့် တပ်ပြေးများကို မက်လုံးပေး စည်းရုံး

Wednesday, 23 February 2011

ကရင်ပြည်နယ် အခြေစိုက် တိုးတက်သော ဗုဒ္ဓဘာသာ ကရင်အမျိုးသား တပ်မတော် (DKBA) နယ်ခြားစောင့် တပ်ဖွဲ့မှ တပ်ဖွဲ့ဝင်များ လက်နက် ခဲယမ်းများနှင့် အတူ ထွက်ပြေးမှု အရေအတွက် များပြား လာသည့်အတွက် ပြန်လည် စည်းရုံးမှု ပြုလုပ်နေ ရသည်ဟု DKBA တပ်ဖွဲ့ဝင်များက ပြောသည်။

DKBA သည် နအဖ စစ်အစိုးရ ကမ်းလှမ်းသည့် နယ်ခြားစောင့်တပ် အဖြစ် ယမန်နှစ် သြဂုတ်လ ၁၈ ရက်နေ့မှ စတင် အသွင် ပြောင်းခဲ့ပြီး လက်ရှိတွင် တပ်ရင်း ၁၀ ရင်းရှိရာ အင်အား ၂၀၀၀ ၀န်းကျင် ရှိကြောင်း၊ ထွက်ပြေးသွားသည့် အင်အားမှာ ၂၀၀ ကျော် ရှိကြောင်း DKBA နှင့် ကရင်အမျိုးသား အစည်းအရုံး(KNU) တာဝန် ရှိသူများက ပြောဆိုသည်။

“နယ်ခြားစောင့်တပ်က လူတွေ တပ်ကနေ ထွက်ပြေးပြီး KNU နဲ့ DKBA (နယ်ခြားစောင့်တပ် ဖွဲ့ရန် လက်မခံသည့် အဖွဲ့) အဖွဲ့တွေဆီ သွားပေါင်းတာတွေ အခြား နည်းတွေနဲ့ တပ်ကနေ ထွက်ပြေး တာတွေက တလ တလ မနည်းဘူး၊ တချို့တပ်တွေ ဆိုရင် ဖွဲ့စည်းပုံ မပျက်တပျက်ပဲ၊ ဒါကြောင့် အထက်အမိန့်နဲ့ မက်လုံးပေး စည်းရုံးမှုတွေ လုပ်နေကြတယ်”ဟု မြ၀တီ ခရိုင်တွင် လက်ရှိ တာဝန် ထမ်းဆောင်နေသော DKBA တပ်မှူးတဦးက ဧရာဝတီသို့ ပြောသည်။

ထွက်ပြေးသည့် တပ်ဖွဲ့ဝင်များကို မက်လုံးပေးစည်းရုံးရာတွင် အစိုးရအသစ်မှ မကြာမီ လစာများ အဆပေါင်း များစွာ တိုးပေးမည် ဖြစ်ပြီး ရေမီး အစုံပါရှိမည့် နေအိမ် တန်းလျားများနှင့် သားသမီးများ အတွက် အခမဲ့ ပညာသင်ကြားခွင့် အပါအ၀င် တခြား ခံစားခွင့်များကို နိုင်ငံတော်မှ ထောက်ပံ့ပေးမည့် အစီအစဉ်များ ပါဝင်ကြောင်း ၎င်းက ဆိုသည်။

နယ်စပ်သို့ ထွက်ပြေးလာသော နယ်ခြားစောင့်တပ်ဖွဲ့ဝင် တဦးက“အောက်ခြေရဲဘော်က လက်ရှိ ကျပ် ၃ သောင်း ခွဲ ရတယ်၊ တပ်ရင်းမှူး ပြောတာက အစိုးရအသစ် ကနေ လစာ ၅ ဆ တိုးပေးမယ်လို့ ပြောတယ်၊ မင်းတို့ ၁ သိန်းခွဲရမယ် လို့ပြောတယ်၊ သူ့စကားကို ဘယ်သူမှ မယုံဘူး၊ ဒါကြောင့် ထွက်ပြေးလာတာ"ဟု ပြောသည်။

ကရင်ပြည်နယ်အတွင်းရှိ နယ်ခြားစောင့် တပ်များကို ခေတ်မီတပ်ရင်း တပ်ဖွဲ့များ တည်ဆောက်ရန် နေပြည်တော်မှ တပ်ရင်း တရင်းလျှင် ကျပ် သိန်း ၁၀၀၀ ကျော်နှုန်းဖြင့် DKBA ၉၉၉ ဗျူဟာမှူးဟောင်း ဗိုလ်ချစ်သူနှင့် ကရင်နယ် နယ်ခြားစောင့်တပ် ၁၀၂၂ တပ်ရင်းမှ ဗိုလ်မောသိုတို့ကို လုပ်ပိုင်ခွင့်နှင့် ငွေကြေးများ ချပေးထားကြောင်း သိရသည်။

လက်ရှိအခြေအနေအရ DKBA နယ်ခြားစောင့် တပ်များတွင် ဆောက်လုပ်ရေး လုပ်ငန်းများ စတင်နေပြီ ဖြစ်သည်ဟု ကရင်ပြည်နယ် အခြေစိုက် ဆောက်လုပ်ရေး အဖွဲ့ တခု၏ အငယ်တန်း အင်ဂျင်နီယာ တဦးက ပြောပြသည်။

“ကျနော်တို့အဖွဲ့ကို ဗိုလ်ချစ်သူ တို့ ဗိုလ်မောသိုတို့က တဆင့် ကန်ထရိုက် ပေးတယ်၊ အခု လက်ရှိ ဆောက်နေတဲ့ ဦးစားပေး တဲ့ အထဲမှာတော့ အိမ်ထောင်သည် လိုင်းခန်းတွေ မဆောက်ရသေးဘူး၊ စုပေါင်း နေထိုင်လို့ရမယ့် ဘားတိုက် လိုမျိုးတော့ ဆောက်တဲ့ အထဲမှာ ပါတယ်”ဟု ၎င်းက ဆိုသည်။

ယင်း ဆောက်လုပ်ရေး စီမံကိန်းကြောင့် အကျိုးအမြတ်များရရှိ ခံစားရမည့် သူများမှာ နယ်ခြားစောင့် တပ်ဖွဲ့ဝင်များ မဟုတ် ဘဲ လုပ်ငန်း လုပ်ပိုင်ခွင့် ရရှိသူများသာ ဖြစ်လိမ့်မည် ဖြစ်ကြောင်း နယ်ခြားစောင့် တပ်ဖွဲ့ ၀င်များက ပြောကြသည်။

ထို့အပြင် စည်းရုံးမှုများကို တပ်ဖွဲ့ဝင်များက အယုံအကြည်မရှိသည့်အပြင် တပ်ဖွဲ့ဝင်များ ထွက်ပြေးမှုမှာ လျှော့နည်း သွားခြင်း မရှိကြောင်း၊ ယခုရက်ပိုင်း အတွင်း ကရင်အမျိုးသား အစည်းအရုံး (KNU) တပ်မဟာ ၇ သို့ ထွက်ပြေး လာသည့် နယ်ခြား စောင့်တပ်မှ တပ်မှူး တဦးက ပြောသည်။

“နယ်ခြားစောင့်တပ်က လူတွေကို တိုက်တန်းလျားတွေပေးမယ် ဆိုပြီးပြောတယ်၊ အခု သူတို့ ဆောက်နေတာ တွေက တပ်ရင်း တပ်ဖွဲ့ရုံးတွေ သင်တန်း ခန်းမတွေ လေ့ကျင့်ရေး တွေပဲ ဆောက်နေကြတယ်၊ သူတို့ ပြောနေတာနဲ့ လက်တွေ့ တခြားစီပဲ၊ လက်တွေ့မှာက ရှေ့တန်းက ရဲဘော်တွေ စားစရာ ရိက္ခာမရှိလို့ ရွာသားတွေဆီက တောင်းနေရတယ်၊ အခေါက်ပေါင်းများတော့ ရွာသားတွေလည်း မပေးနိုင်တော့ဘူး”ဟု ၎င်းက ဆိုသည်။

ကရင်နယ် ခြားစောင့်တပ်ဖွဲ့များမှ ထွက်ပြေးသည့်တပ်ဖွဲ့ဝင်အများစုမှာ အောက်ခြေတပ်သား အများစုဖြစ်ပြီး ၎င်းတို့နှင့် အတူ တပ်မှူးငယ်တချို့သာပါရှိကြောင်း၊ တပ်ဖွဲ့အတွင်း အထက်နှင့်အောက် အကျိုးခံစားခွင့် ကွာခြားမှု ကြီးမားခြင်း၊ တာဝန်နှင့် လုပ်ပိုင်ခွင့် မမျှတခြင်း၊ ကရင် တိုင်းရင်းသားချင်း ပြန်လည် တိုက်ခိုက်မှု မပြုလုပ်လိုခြင်း များကြောင့် ထိုသို့ ထွက်ပြေးကြခြင်း ဖြစ်ကြောင်း သိရသည်။

အသက် ၅၀ ကျော်၍ DKBA အဖွဲ့မှ ထုတ်ပယ်ခံရပြီး မြ၀တီမြို့တွင် နေထိုင်သူ တဦးက“နအဖ မဟုတ်တာ DKBA လည်း သိတယ်၊ နယ်ခြားစောင့် တပ်လည်း သိတယ်၊ ခက်တာက ပိုင်ဆိုင်မှုနဲ့ မိသားစု အရေးက အမှန်တရားကို မမြင်နိုင်ကြတော့ ဘူး၊ ဗိုလ်ချစ်သူတို့ မောသိုတို့ ဆိုရင် ကရင်ပြည်နယ်မှာ လူချမ်းသာတွေ ဖြစ်ကုန်ပြီ၊ ကရင်တွေရဲ့ အားနည်းချက်ကို နအဖ ကောင်းကောင်း သိတယ်”ဟု ပြောဆိုသည်။

ဗိုလ်မှူးကြီး စောလားပွယ်(ဗိုလ်နှုတ်ခမ်းမွေး) ဦးဆောင်သည့် DKBA တပ်ဖွဲ့သည် နယ်ခြားစောင့် တပ် ဖွဲ့စည်းရေးကို လက်မခံဘဲ ရွေးကောက်ပွဲ ကျင်းပနေသည့် ၂၀၁၀ နိုဝင်ဘာ ၇ ရက်နှင့် ၈ ရက်နေ့များမှစတင်၍ ကရင်ပြည်နယ် အတွင်း ရှိ နအဖ တပ်များကို တိုက်ပွဲများ ဆင်နွှဲနေခဲ့သည်။

Ref: ဧရာဝတီ်