နိုင်ငံရေး အကျဉ်းသား ကူညီထောက်ပံ့ရေး NLD ဆောင်ရွက်

ဦးဇော်ဝင်းလှိုင်
တနင်္လာ, 17 ဇန်နဝါရီ 2011

နိုင်ငံရေး အကျဉ်းသားတွေနဲ့ သူတို့မိသားစုဝင်တွေကို တတ်နိုင်တဲ့ဘက်က ကူညီ ထောက်ပံ့ပေးနိုင်ဖို့ ပြီးခဲ့တဲ့ လွတ်လပ်ရေး နေ့တုန်းက မဲနှိုက်ခဲ့ကြတာမှာ ဒေါ်အောင်ဆန်းစုကြည်က သူမ မဲပေါက်ခဲ့တဲ့ နိုင်ငံရေး အကျဉ်းသား အပြင် အဲဒီလူနဲ့ အမှုတွဲ တတွဲတည်း ဖြစ်ကြတဲ့ တခြား နိုင်ငံရေး အကျဉ်းသား ၅ ယောက်ကိုပါ တပါတည်း ကူညီ ထောက်ပံ့ ပေးမယ်လို့ ဆိုပါတယ်။ အဲဒီ နိုင်ငံရေး အကျဉ်းသား မိသားစုဝင်တွေနဲ့ မနေ့က NLD ရုံးချုပ်မှာ ဒေါ်အောင်ဆန်းစုကြည် တွေ့ဆုံခဲ့ပါတယ်။ အပြည့်အစုံကို ကိုဇော်ဝင်းလှိုင်က တင်ပြ ပေးထားပါတယ်။

NLD အထွေထွေ အတွင်းရေးမှူး ဒေါ်အောင်ဆန်းစုကြည် ကူညီဖို့ မဲပေါက်သူကတော့ လှိုင်သာယာမြို့နယ်က နိုင်ငံရေး အကျဉ်းသား ကိုစိုးမင်းမင်း ဖြစ်ပါတယ်။ ဒါပေမဲ့ ကိုစိုးမင်းမင်း အပြင် သူနဲ့ အမှုတွဲ တတွဲတည်းဖြစ်တဲ့ လှိုင်သာယာ မြို့နယ်ကပဲ တခြား နိုင်ငံရေး အကျဉ်းသား ၅ ယောက်ကိုပါ တပါတည်း ကူညီဖို့ ဒေါ်အောင်ဆန်းစုကြည်က ဆုံးဖြတ်ပြီး အဲဒီ နိုင်ငံရေး အကျဉ်းသား မိသားစုဝင်တွေနဲ့ တွေ့ဆုံခဲ့တဲ့ အကြောင်း NLD ပြောခွင့်ရပုဂ္ဂိုလ် ဦးအုန်းကြိုင်က ပြောပြပါတယ်။

“ကိုစိုးမင်းမင်း မဲပေါက်ပြီးတဲ့နောက် အထွေထွေ အတွင်းရေးမှူးက ကိုစိုးမင်းမင်းနဲ့ အမှုတွဲများဖြစ်တဲ့ ကိုသန့်ဇင်မျိုး၊ မလှလှမော်၊ ဦးတင်ယု၊ ဦးကျော်စိုးဝင်း၊ ကိုဝင်းမြင့် စတဲ့ အဲဒီ နိုင်ငံရေး အကျဉ်းသားတွေကိုပါ သူက အမှုတွဲ အားလုံးကို တာဝန်ယူပြီး ကူညီဖို့ ဆုံးဖြတ် လိုက်ပါတယ်။ အဲဒီ နိုင်ငံရေး အကျဉ်းသား ၆ ဦးရဲ့ မိသားစုတွေ၊ လှိုင်သာယာကပဲ ဖြစ်ပါတယ်။ အဲဒီ မိသားစုတွေက ဒီနေ့ ရုံးကိုလာပြီး အဖွဲ့ချုပ် အထွေထွေ အတွင်းရေးမှူးက သူတို့ကို လက်ခံ တွေ့ဆုံပါတယ်။”

အဲဒီလို တွေ့ဆုံတဲ့အထဲ နိုင်ငံရေး အကျဉ်းသား ၆ ဦးရဲ့ မိသားစုဝင် ၂၅ ယောက်လောက် အပြင် NLD ဗဟိုလူမှု အထောက် အကူပြု အဖွဲ့က တာဝန်ခံ ဦးနိုင်းနိုင်းနဲ့ တခြား ဗဟို အလုပ်မှုဆောင် အဖွဲ့ဝင်တွေ တက်ရောက် ကြတယ်လို့ ဆိုပါတယ်။

နိုင်ငံရေး အကျဉ်းသားတွေရဲ့ ကျန်းမာရေး အခြေအနေ၊ ထောင်ဝင်စာ တွေ့နိုင်ရေး ကိစ္စနဲ့ အကျဉ်းကျ နေသူတွေရဲ့ သားသမီးတွေ ပညာ သင်ကြားနိုင်ရေး ကိစ္စတွေကို ဆွေးနွေးပြီး ဒေါ်အောင်ဆန်းစုကြည်က သူတို့ကို အားပေးစကား ပြောကြား ခဲ့တယ်လို့ ဆိုပါတယ်။

“အဲဒီမှာ အထွေထွေ အတွင်းရေးမှူးက နိုင်ငံရေး အကျဉ်းသား တဦးစီရဲ့ ကျန်းမာရေး အခြေအနေ၊ ထောင်တွင်း နေထိုင်ရတဲ့ အခြေအနေနဲ့ နောက် ထောင်ဝင်စာ သွားရောက်နိုင်တဲ့ အခြေအနေတွေ၊ သွားရေးလာရေး အခက်အခဲ အခြေအနေတွေကို မေးပါတယ်။ မေးပြီးတော့ သူတို့တွေ ထောင်ဝင်စာ ပုံမှန် သွားနိုင်ဖို့ အတွက် ဘယ်လို ပံ့ပိုး ကူညီရမလဲဆိုတာ သူတို့ မိသားစုတွေနဲ့ ညှိနှိုင်းပါတယ်။ အဲဒီ ထောင်ကျ နိုင်ငံရေး အကျဉ်းသားတွေရဲ့ သားသမီးတွေ ပညာရေးကိုလည်း စိတ်ဝင်တစား မေးပါတယ်။ မေးပြီးတော့ ကလေးတွေကို ပညာ ကြိုးစားကြဖို့ ဆုံးမ သြ၀ါဒ ပေးပါတယ်။

“အဲဒီနောက် အခုလို ထောင်ကျနေတဲ့ အတွက်ကြောင့် ဘာမှ အားငယ်စရာ မရှိတဲ့အကြောင်း၊ ဒါဟာ တကယ့် အများ အကျိုးအတွက် ဆောင်ရွက်ရင်း အခုလို ဖြစ်သွားတဲ့ အတွက် ဂုဏ်ယူရမှာတောင် ဖြစ်ကြောင်း၊ အဲဒါတွေ ပြောပြီးတော့ မိသားစုကို အားပေးစကား ပြောပါတယ်။”

NLD ပြောခွင့်ရပုဂ္ဂိုလ် ဦးအုန်းကြိုင် ပြောပြခဲ့တာ ဖြစ်ပါတယ်။

နိုင်ငံရေးကြောင့် အကျဉ်းကျနေသူတွေနဲ့ သူတို့မိသားစုဝင်တွေကို ရုပ်ဝတ္ထုပစ္စည်း၊ ဒါမှမဟုတ် စိတ်ပိုင်း ဆိုင်ရာ အကူအညီတွေ ပေးနိုင်ဖို့ဆိုတဲ့ ရည်ရွယ်ချက်နဲ့ နိုင်ငံရေး အကျဉ်းသားများ ကူညီထောက်ပံ့ရေး အစီအစဉ်တခုကို ဒေါ်အောင်ဆန်းစုကြည် ကိုယ်တိုင် ဦးဆောင်ပြီး ပြီးခဲ့တဲ့ ဇန်န၀ါရီလ ၄ ရက်နေ့ လွတ်လပ်ရေးနေ့က စတင် အကောင်အထည် ဖော်လိုက်တာပါ။

နိုင်ငံရေး အကျဉ်းသားတွေရဲ့ ဓာတ်ပုံနဲ့ ကိုယ်ရေးရာဇ၀င် အကျဉ်းချုပ်ပါတဲ့ ရင်ထိုးတွေကို ကူညီချင်သူ စေတနာရှင် တွေက မဲနှိုက် တာဝန် ယူကြတဲ့ အစီအစဉ် ဖြစ်ပါတယ်။ နိုင်ငံရေး အကျဉ်းသားတွေကို ရုပ်ဝတ္ထုပစ္စည်း ကူညီမှ မဟုတ်ဘဲ စိတ်ပိုင်းဆိုင်ရာ ကူညီတာဟာလည်း သူတို့လုပ်နေတဲ့ လုပ်ငန်းတွေကို ထောက်ခံ အားပေးရာ ရောက်တယ်လို့ ဆိုပါတယ်။

ဒီနှစ် နှစ်သစ်ကူးချိန်မှာ အမျိုးသား ဒီမိုကရေစီ အဖွဲ့ချုပ်က စစ်မှန်တဲ့ အမျိုးသား ပြန်လည်သင့်မြတ်ရေး အတွက် နိုင်ငံရေး အကျဉ်းသားတွေကို လွှတ်ပေးဖို့ လိုအပ်တဲ့ အကြောင်း မြန်မာ စစ်အစိုးရကို တိုက်တွန်း ထားပါတယ်။

ဒါ့အပြင် ဇန်န၀ါရီ ၃၁ ရက်နေ့မှာ စတင်မယ့် လွှတ်တော်သစ်ကို တက်ကြမယ့် NDF ပါတီက ကိုယ်စားလှယ်တွေ ကလည်း လွှတ်တော်ထဲ ရောက်တာနဲ့ အကျဉ်းသားတွေ လွတ်ငြိမ်း ချမ်းသာခွင့်ပေးဖို့ ဦးစားပေး တောင်းဆိုမယ်လို့ ပြောပါတယ်။

အခုရက်ပိုင်းအတွင်း နိုင်ငံရေး အကျဉ်းသားတွေ အနေနဲ့ ကျန်းမာရေး ဆိုးရွားတဲ့ အခြေအနေတွေနဲ့ ရင်ဆိုင် နေကြရတယ်လို့ မိသားစုဝင် တွေက ပြောပါတယ်။ အထူးသဖြင့်တော့ ဝေးလံ ခေါင်ဖျားတဲ့ ဒေသတွေကို အပို့ ခံထားရတဲ့ နိုင်ငံရေး အကျဉ်းသားတွေဟာ ရာသီဥတု ဒဏ်ကို ခံစားရတဲ့အပြင် လုံလောက်တဲ့ ဆေးဝါးကုသမှုလည်း မရကြဘူးလို့ ဆိုပါတယ်။

NLD ကတော့ နိုင်ငံရေး အကျဉ်းသားတွေနဲ့ သူတို့မိသားစုဝင်တွေကို ကူညီ ထောက်ပံ့နိုင်ဖို့ အတွက် ပြီးခဲ့တဲ့ ဇန်န၀ါရီလ ၂ ရက်နဲ့ ၃ ရက်နေ့တွေမှာ လွတ်လပ်ရေးနေ့ အကြို ရန်ပုံငွေ ဈေးရောင်းပွဲ ကျင်းပခဲ့တာမှာ ကျပ် သိန်း ၁၀၀ လောက် ရခဲ့တယ်လို့ ဆိုပါတယ်။

Ref: VOA News