DKBA နဲ့ မြန်မာစစ်တပ်ကြား တင်းမာမှု တိုး

မအေးအေးမာ
အင်္ဂါ, 30 နိုဝင်ဘာ 2010

ရွေးကောက်ပွဲ ကျင်းပပြီး နောက်တရက် နိုဝင်ဘာလ ၈ ရက်နေ့ကစလို့ ကရင်ပြည်နယ် အတွင်းမှာ DKBA တိုးတက်သော ကရင် ဗုဒ္ဓဘာသာ တပ်ရင်း တချို့နဲ့ မြန်မာ စစ်တပ်တို့ အကြား တိုက်ပွဲတွေ ဆက်ပြီး ဖြစ်ပွားနေတာမှာ အခုနောက်ဆုံး ထိုင်း၊ မြန်မာ နယ်စပ် ကရင်ပြည်နယ် မြ၀တီခရိုင် ဝေါ်လေ ဘက်မှာ မြန်မာ စစ်တပ်နဲ့ DKBA အကြား တိုက်ပွဲတွေ ဆက်ဖြစ်နေပြီး အဲဒီဒေသက ဖလူးကြီး၊ ဖလူးလေးနားမှာ ပြောင်းဖူး အခွန်ဂိတ်မှာ ထိုင်နေတဲ့ ငြိမ်းချမ်းရေးကောင်စီ အဖွဲ့နဲ့ မြန်မာစစ်တပ်တို့ ပစ်ခတ်မှု ဖြစ်ခဲ့ပါတယ်။ အဲဒီ ပစ်ခတ်မှုအတွင်း ငြိမ်းချမ်းရေး ကောင်စီဘက်က ကျန်နေတဲ့ တပ်သားတချို့ကို မြန်မာ စစ်တပ်က ဖမ်းဆီး ခေါ်ဆောင် သွားတယ်လို့ DKBA တပ်ဖွဲ့က ပြောပါတယ်။ အပြည့်အစုံကို စုံစမ်းထားတဲ့ မအေးအေးမာက တင်ပြ ပေးထားပါတယ်။

ထိုင်း၊ မြန်မာနယ်စပ် ကရင်ပြည်နယ်ထဲမှာ တိုက်ပွဲတွေ ဆက်တိုက်ဖြစ်နေပြီး မြန်မာစစ်အစိုးရနဲ့ အပစ်အခတ် ရပ်စဲရေး လုပ်ထားတဲ့ DKBA တို့ဟာ တဦးနဲ့တဦး၊ တဘက်နဲ့ တဘက် တင်းမာမှုဟာ အမြင့်ဆုံး အခြေအနေကို ရောက်ရှိ နေပါတယ်။ ဒီနေ့ မနက်ပိုင်းမှာလည်း တိုက်ပွဲတွေ ဆက်ဖြစ်နေ သေးကြောင်း DKBA ဘက်က တပ်မှူးတဦးက အခုလို ပြောပါတယ်။

“အခြေအနေက ကျနော်တို့ ဝေါ်လေဒေသကို သူတို့က လက်ရှိ ရိက္ခာပို့မယ်၊ အပေါ်မှာရှိတဲ့တပ်ကို အရွှေ့ အပြောင်း လုပ်ရ မယ်လေ။ အဲဒီ ၀င်ရောက် ထိုးဖောက်တဲ့ တပ်ကို ကျနော်တို့က အခု ခြုံခို တိုက်ခိုက်တယ်။ ဖြစ်တဲ့နေရာက သိပ် မဝေးတော့ဘူး၊ ဖလူး ကနေပြီးတော့ တမိုင်ကျော်ကျော် နှစ်မိုင်ဝန်းကျင်လောက် ရောက်နေတယ်။ ကျနော်တို့က ဖလူးဘေးနားကနေ ပစ်တယ်။ သူတို့က ဖလူးကြီးရော ဖလူးလေးရော ကနေ ကျနော်တို့ကို ပစ်တယ်။”

ဒီနေ့ တိုက်ပွဲဖြစ်နေတဲ့ အခြေအနေကို ပြောပြသွားတာ ဖြစ်ပါတယ်။

နှစ်ဘက် ပစ်ခတ်မှု၊ ခြုံခိုတိုက်ခိုက်မှုတွေကြောင့် အထိအခိုက်၊ အကျအဆုံး အခြေအနေ တွေကို မေးမြန်း ကြည့်တဲ့ အခါမှာတော့ မြန်မာ စစ်တပ်ဘက်က ထိခိုက်မှုတွေ ရှိတယ်လို့ ပြောပါတယ်။

“ဒီနေ့ကတော့ ထိခိုက်ဒဏ်ရာရတာ ရှိတယ်လို့ ပြောတယ်။ အရေအတွက်တော့ မရသေးဘူး။ ပစ်ခတ်တဲ့ အတွက် ၄ ယောက် ထိခိုက် ဒဏ်ရာရတယ်လို့ ပြောတယ်။ ၄ ယောက်ထဲမှာ ၂၃၀ ဒု-ရင်းမှူးတယောက် အပါအ၀င်ပေါ့။”

ဒီသတင်းနဲ့ပတ်သက်ပြီး သီးခြား အတည်ပြုချက်တွေကိုတော့ မသိရသေးပါဘူး။ ဒီနေ့ ဖြစ်ပွား ခဲ့တာကတော့ ဖလူးကြီးနဲ့ ဖလူးလေးရွာ အနီးက ပြောင်းစိုက်ခင်း တွေကနေ ပြောင်းခွန်တွေ ကောက်ဖို့ ဂိတ်ချထားတဲ့ မြန်မာစ စ်အစိုးရနဲ့ အပစ်ရပ်အဖွဲ့ တခုဖြစ်တဲ့ ငြိမ်းချမ်းရေး ကောင်စီ တပ်ဖွဲ့ဝင်တွေ ဖြစ်တဲ့ ဗိုလ်သဲခီး အုပ်စုနဲ့လည်း မြန်မာ စစ်တပ်တို့ ပစ်ခတ်မှုတွေ ဖြစ်ခဲ့တယ်လို့ ဆိုပါတယ်။

“ဒီနေ့ဖြစ်တာက ငြိမ်းချမ်းရေးကောင်စီ စစ်တပ်နဲ့ဖြစ်တယ်။ ၂ ယောက်ဖမ်းမိတယ်။ ဖလူးကြီးနဲ့ ဖလူးလေးက တဆက်တည်းပဲ ပြောလို့ရတယ်။ အဲဒီ အပေါ်နားလေးမှာ ပြောင်းဖူးခင်း တဲထဲမှာ သူတို့ နေတယ်ပေါ့။ တပ်ကလည်း အဲဒီမှာ ထိုးစစ်ဆင်ဖို့ ဟိုချောင်း ဒီချောင်း၊ ငြိမ်းချမ်းရေး တပ်နဲ့ တိုးတဲ့အခါကြတော့ သူတို့က ငြိမ်းချမ်းရေး ယူတားတယ် ဆိုတော့ အေးအေးဆေးဆေး နေတယ် ထင်တယ်။ အနေအထားက အဲဒီလိုမျိုး။ သူတို့ဦးစီးက ဒု-ဗိုလ်မှူးကြီး သဲခီး၊ တပ်က လာပစ်တော့ သူတို့က ပြန်ပစ်တယ်။ အခုတောင် အလောင်းတလောင်း ရှိနေတယ်၊ အဲဒီမှာ။ ၆ ယောက် ဖမ်းခံထိတယ် ကြားတယ်။”

ဒီလိုပစ်ခတ်မှုကြောင့် အနီး ပြောင်းခင်းက ရွာသွားတွေဟာ ထိုင်းနိုင်ငံဘက်ကို ထွက်ပြေး တိမ်းရှောင် လာခဲ့ကြပါတယ်။

ငြိမ်းချမ်းရေးကောင်စီကလည်း နယ်ခြားစောင့်တပ်ကို လက်မခံဘဲ ငြင်းပယ်ထားတဲ့ အဖွဲ့တဖွဲ့ဖြစ်ပြီး စစ်အစိုးရ တပ်တွေက သူတို့ လက်နက်တွေကို သိမ်းဆည်း ထားတာတွေလည်း ရှိပါတယ်။ လက်နက်တွေ ကိုင်ပြီး ဂိတ်တွေမှာ မနေရဘူးလို့လည်း စစ်အစိုးရ ဘက်က အမိန့် ထုတ်ထားတာတွေလည်း ရှိနေပါတယ်။

သူတို့ကတော့ စစ်တပ်နဲ့သူတို့ ပြဿနာ မရှိဘူးဆိုပြီး နေထိုင်နေရာကနေ ပစ်ခတ်ပြီး ဖမ်းဆီး တာကို ခံလိုက် ရတယ်လို့ ဆိုပါတယ်။

“အဲဒီနေရာက စစ်ဖြစ်နေတာ နှစ်ရက်၊ သုံးရက်ရှိပြီဆိုတော့၊ သူတို့က ငြိမ်းချမ်းရေး ယူထားပြီး နအဖကလည်း မပစ်ဘူးထင်ပြီး အမှုမဲ့ အမှတ်မဲ့ နေတယ်။ ရောက်လာပြီးတော့ သေနတ် ကိုင်တာ တွေ့တော့ ပစ်ထည့် လိုက်တယ်။ ပစ်လိုက်တဲ့ အဖွဲ့က စစ်ကြောင်းမှူးကို ပြန်မေးတယ်၊ ပစ်လိုက်တာ ငြိမ်းချမ်းရေး ကောင်စီ ထိပြီဆိုတော့ ငြိမ်းချမ်းရေး ကောင်စီ ဖြစ်ဖြစ် ဘာဖြစ်ဖြစ် အကုန်ပစ်တဲ့၊ ဒု-ဗိုလ်မှူးကြီးက အမိန့်ပေးတယ်။”

DKBA ဘက်က ပြောတာကတော့ တိုက်ပွဲတွေ ဆက်ဖြစ်နိုင်သေးတာမို့ ကရင်ဒုက္ခသည် တွေကို ထိုင်းနိုင်ငံ ဘက်က ပြန်ခိုင်းတာတွေ မလုပ်ဖို့နဲ့ ကရင် လူထုတွေ အတွက် လုံခြုံမှုတွေ မရှိသေးဘူးလို့ ဆိုပါတယ်။

“ထိုင်းဘက်က ရွာသားတွေကို ပြန်မောင်းထုတ်တယ်။ ပြန်ခိုင်းတယ်ပေါ့၊ ဘာမှမဖြစ်ဘူး။ ဒါပေမဲ့ မဖြစ်ဘူးဆိုတာ သူတို့ ပြောတာပဲ။ ကျနော် ပြောတယ်၊ စစ်ပွဲက ဖြစ်မယ်ဆိုရင် လနဲ့ နှစ်နဲ့တောင် ဖြစ်ဦးမယ်၊ ကံမကောင်းရင်။ အဲဒီတော့ ပြန်ပို့တာ မကြာသေးဘူး၊ ဆက်ဖြစ်တော့ ဒီလူတွေ ပြန်ပြေးရတယ်။ မပြေးရင် ကျည်ဆန်တွေက အကုန် ထိကုန်မယ်။ ထိုင်းကလည်း ပြန်ပို့တယ် ဆိုတာ လက်ရှိ နအဖရဲ့ ဖိအားကြောင့်လည်းပါမယ်။”

မနက်ကဖြစ်ခဲ့တဲ့ တိုက်ပွဲတွေကြောင့် ထိုင်းနိုင်ငံဘက်ခြမ်းကို ဒုက္ခသည် ၅၀၀ ကျော် ထပ်မံ တိမ်းရှောင် လာခဲ့ကြပါတယ်။ တချို့ကတော့ တောတောင်တွေ ထဲမှာပဲ ပုန်းအောင်း နေကြဆဲ ဖြစ်ပါတယ်။

Ref: VOA News