ကရင်ငြိမ်းချမ်းရေး ကောင်စီအဖွဲ့ဝင် ၆ဦး နအဖ ဖမ်းမိ၊ တဦး ပစ်သတ်ခံရ

နန်းထူးစံ
နိုဝင်ဘာလ ၃၀ရက်။

ကေအဲန်ယူ/ကေအဲန်အယ်လ်အေ ငြိမ်းချမ်းရေးကောင်စီ တပ်ဖွဲ့ဝင် ၆ဦးကို ယနေ့မနက်တွင် နအဖ စစ်တပ်မှ ဖမ်းဆီးလိုက်ပြီး ၁ ဦးကို ပစ်သတ် လိုက်သည်ဟု ကေအိုင်စီက စုံစမ်းသိရှိရသည်။

ယနေ့မနက် ၉နာရီကျော်အချိန်၌ ကရင်ပြည်နယ်၊ မြ၀တီခရိုင်ရှိ ဖလူးကျေးရွာနှင့် မနီးမဝေး ပလောတပို့ ဒေသတွင် လှုပ်ရှားသည့် ဗိုလ်တဲခီး ဦးစီးသော ငြိမ်းချမ်းရေး ကောင်စီတပ်ဖွဲ့ကို နအဖ စစ်ကြောင်းက ၀ိုင်းမိပြီး ပစ်ခတ်ခဲ့ခြင်းကြောင့် ၁ ဦး ကျဆုံးကာ ၆ဦးမှာ အရှင် ဖမ်းဆီး ခံလိုက်ရခြင်း ဖြစ်သည်။

ကေအဲန်ယူ/ကေအဲန်အယ်လ်အေ ငြိမ်းချမ်းရေး ကောင်စီအဖွဲ့မှ ဗိုလ်မှူးချုပ် အဆင့်ရှိသူ စောတီမသီက “ဒီမနက် ကျနော်ကြားတာ က ဗိုလ်တဲခီးရဲ့ တပ်ဖွဲ့ဝင် ၆ ဦးကို နအဖ စစ်တပ်က ဖမ်းဆီးတယ်။ ၁ ဦးကို ပစ်သတ် လိုက်တယ်လို့ ကြားတယ်။ ဒါပေမယ့် အသေး စိတ်တော့ မသိသေးဘူး။”ဟု ကေအိုင်စီကို အတည်ပြု ပြောဆိုသည်။

ဖလူးဒေသတွင် လှုပ်ရှားနေသည့် ကေအဲန်အယ်လ်အေ တပ်ဖွဲ့ဝင်တဦးက “အခု နအဖတွေက ဝေါ်လေကို တက်ဖို့လေ။ သူတို့ တက်လာတဲ့ လမ်းတလျှောက်မှာ သေနတ် လိုက်ပစ်တယ်။ ဖလူး အပေါ်ဘက် ပလောတပို့မှာ သူတို့ (ငြိမ်းချမ်းရေး ကောင်စီအဖွဲ့) ကို စစ်တပ်က တွေ့ပြီးတော့ ၀ိုင်းလိုက်တာလို့ ကျနော်ကြားတယ်။ အဲဒီမှာရှိတဲ့ သူတို့အဖွဲ့က လူနည်းတယ်လေ။”ဟု ပြောသည်။

လက်ရှိအချိန်တွင် ဖလူးဒေသ၌ နအဖ စကခ (၈) လက်အောက်ခံ ခလရ (၆၂) လှုပ်ရှားလျှက် ရှိပြီး ထိုတပ်ရင်းသည် နိုဝင်ဘာ ၂၄ ရက်နေ့က ဝေါ်လေဒေသသို့ သွားရန် ဖလူး ကျေးရွာတွင် ရောက်ရှိနေပြီး ဖြစ်သော်လည်း ရှေ့ဆက်သွားမည့် လမ်းကြောင်းများကို ဒီကေဘီအေ တပ်နှင့် ကေအဲန်အယ်လ်အေ တပ်ဖွဲ့များ ပိတ်ဆို့ ထားခြင်းကြောင့် ဝေါ်လေ လမ်းကြောများကို လက်နက်ကြီးများဖြင့် လိုက်လံ ပစ်ခတ်လျှက်ရှိကြောင်း အဆိုပါ ကေအဲန်အယ်လ်အေ တပ်သားက ပြောသည်။

ယင်းသို့ ဖမ်းဆီး၊ ပစ်သတ်ခံရသည့် ငြိမ်းချမ်းရေးကောင်စီ တပ်ဖွဲ့ဝင်ထဲတွင် ဗိုလ်တဲခီး ပါဝင်ခြင်း မရှိသလို ထိုအဖွဲ့၏ ဥက္ကဌ ဗိုလ်ချုပ် စောထင်မောင်နှင့် ဗိုလ်ချုပ်စောရင်နုတို့ကို ဆက်သွယ် မရခဲ့ပေ။

Ref: KIC News