..............................

Monday, November 7, 2011

DKBA အပစ်ရပ်ပြီ

သန်းထိုက်ဦး
November 4, 2011

အစိုးရနှင့် တိုးတက်သော ဗုဒ္ဓဘာသာ ကရင်အမျိုးသား တပ်မတော် (DKBA) အဖွဲ့ ကိုယ်စားလှယ်များ အပစ်အခတ် ရပ်စဲရေး အတွက် ထပ်မံ တွေ့ဆုံ ဆွေးနွေးခဲ့ရာ ယမန်နေ့က သဘောတူ လက်မှတ် ရေးထိုးလိုက်ကြောင်း DKBA တပ်မဟာ ၅ ၏ စစ်ဦးစီးချုပ် ဗိုလ်ချုပ် စောလားပွယ်က ဧရာဝတီသို့ ပြောသည်။

လက်ရှိ အစိုးရက အမှန်တကယ် အပစ်အခတ်ရပ်စဲရေးလုပ်မည်ဟု ထင်သောကြောင့် သဘောတူ လက်မှတ် ရေးထိုးခဲ့ခြင်း ဖြစ်ပြီး နိုဝင်ဘာ ၆ ရက်နေ့တွင် ထုတ်ပြန်ကြေညာမည်ဟု ၎င်းက ဆိုသည်။

ပြီးခဲ့သည့်လ ၂၆ ရက်နေ့က ပထမအကြိမ် ဆွေးနွေးပွဲ ပြုလုပ်သည့် ကရင်ပြည်နယ် ဘားအံမြို့တွင်ပင် ယခု ဒုတိယ အကြိမ် တွေ့ဆုံခြင်း ဖြစ်သည်။

ဆွေးနွေးပွဲတွင် အစိုးရဘက်မှ တိုင်းရင်းသားရေးရာနှင့် ပြည်တွင်းငြိမ်းချမ်းရေး ဖော်ဆောင်မှု ကော်မတီ ဥက္ကဌ ဦးသိန်းဇော်
ဦးဆောင်ပြီး DKBA ကိုယ်စားလှယ် အဖွဲ့ကို ဒု စစ်ဦးစီးချုပ် ဗိုလ်မှူးကြီး မိုရှေး ဦးဆောင်သည်ဟု သိရသည်။

အပစ်အခတ်ရပ်စဲရေး နှစ်ဘက် သဘောတူလက်မှတ်ထိုးပြီးနောက် ဘားအံ အခြေစိုက် တပ်မ ၂၂ လက်အောက်ခံ တပ်ရင်း တချို့ ပြန်ဆုတ်သွားကြောင်း၊ မြ၀တီမြို့နယ် အတွင်းရှိ ဆုံဆည်းမြိုင် ဒေသတွင် DKBA ဌာနချုပ် သတ်မှတ်ရန် အစိုးရက စီစဉ် ထားကြောင်း စောလားပွယ်က ဆက်ပြောသည်။

DKBA အဖွဲ့သည် ကရင်အမျိုးသား အစည်းအရုံး (KNU) နှင့် ပူးပေါင်းပြီး မဟာမိတ်အဖြစ် ရပ်တည်ခဲ့သော်လည်း အစိုးရ ကိုယ်စားလှယ်များနှင့် သွားရောက် ဆွေးနွေးမှုနှင့် ပတ်သက်၍ KNU ကို အသိပေးခြင်း မရှိကြောင်း သိရသည်။

ဤအတောအတွင်း KNU၊ မွန်ပြည်သစ်ပါတီ (NMSP)၊ ရှမ်းပြည် တပ်တော် မြောက်ပိုင်း (SSA-N)၊ ကချင် လွတ်လပ်ရေး တပ်မတော် (KIA) တို့ကိုလည်း အစိုးရက ငြိမ်းချမ်းရေး ကမ်းလှမ်းလျက်ရှိသည်။

ယခင် စစ်အစိုးရ လက်ထက်တွင် ကမ်းလှမ်းခဲ့သော နယ်ခြားစောင့်တပ် အသွင်ကူးပြောင်းရေးကို DKBA တပ်ဖွဲ့ဝင် အများစုက ပြီးခဲ့သည့်နှစ် ဇူလိုင် လကုန်ပိုင်းက လက်ခံ ခဲ့ကြသော်လည်း ဗိုလ်ချုပ် စောလားပွယ်(ခေါ်) ဗိုလ်နှုတ်ခမ်းမွေးက ယင်းအစီ အစဉ်ကို သဘောမတူသောကြောင့် ခွဲထွက်ခဲ့ခြင်း ဖြစ်သည်။

ယင်းသို့ ခွဲထွက်ခဲ့ပြီးနောက်ပိုင်း DKBA တပ်ဖွဲ့ဝင်များသည် မြ၀တီမြို့ ကြာအင်းဆိပ်ကြီး မြို့နယ်တို့တွင် KNU တပ်ဖွဲ့များနှင့် ပူးပေါင်း၍ ပြန်လည် လှုပ်ရှားခဲ့သည်။

ထို့အပြင် နယ်ခြားစောင့်တပ် ဖွဲ့စည်းရေးကို လက်မခံဘဲ ရွေးကောက်ပွဲ ကျင်းပသည့် ၂၀၁၀ နိုဝင်ဘာ ၇ ရက်နှင့် ၈ ရက်နေ့ များမှ စတင်၍ ကရင်ပြည်နယ် အတွင်းရှိ အစိုးရတပ်များကို တိုက်ပွဲများ ဆင်နွှဲနေခဲ့သည်။

DKBA သည် ၁၉၉၄ ခုနှစ်တွင် KNU မှ ခွဲထွက်၍ ယခင် စစ်အစိုးရနှင့် ငြိမ်းချမ်းရေး ယူခဲ့သော တိုင်းရင်းသား လက်နက်ကိုင် အဖွဲ့ ဖြစ်သည်။

လတ်တလောတွင် ကချင်ပြည်နယ်နှင့် ရှမ်းပြည်နယ်အတွင်း၌လည်း တိုက်ပွဲများဖြစ်ပွားနေပြီး ရာနှင့်ချီသော ဒေသခံများ ထွက်ပြေး တိမ်းရှောင် နေကြရသည်။

မြန်မာနိုင်ငံတွင် ၁၉၄၈ ခုနှစ် လွတ်လပ်ရေးရပြီးချိန်မှစ၍ လက်နက်ကိုင်အဖွဲ့များ ပေါ်ပေါက်လာပြီး ပြည်တွင်းစစ် ဖြစ်ပွားခဲ့သည်။
၁၉၈၈ နောက်ပိုင်းတွင် အစိုးရက လက်နက်ကိုင် အဖွဲ့ အများအပြားနှင့် အပစ်အခတ် ရပ်စဲရေး လုပ်ဆောင် နိုင်ခဲ့သော်လည်း ယနေ့ အချိန်အထိ တည်ငြိမ်အေးချမ်းမှု မရှိသေးပေ။ ကချင်ပြည်နယ်၊ ရှမ်းပြည်နယ်နှင့် ကယားပြည်နယ်ရှိ စသည့် တိုင်းရင်းသား ဒေသများတွင် တိုက်ပွဲများ ဖြစ်ပွား နေကြသည်။

Ref: ဧရာဝတီ

0 comments:

အပေါ်သို့