ပြန်ကြားရေးဝန်ကြီး ဦးကျော်ဆန်းနဲ့ ဗွီအိုအေ

ဒေါ်ခင်စိုးဝင်း
သောကြာ, 04 နိုဝင်ဘာ 2011

ပြည်ထောင်စု ပြန်ကြားရေးဝန်ကြီး ဦးကျော်ဆန်းက တာဝန်သိမှုနဲ့အတူ စာပေ လွတ်လပ်ခွင့်တွေ ရှိလာတာနဲ့ အမျှ နောက်ဆုံးမှာ စာပေ စိစစ်ရေး အဖွဲ့ဆိုတာ စာပေ ရေးသားမှုတွေကို စောင့်ကြည့်တဲ့ အဖွဲ့ အဖြစ်နဲ့သာ ရှိကောင်း ရှိတော့မှာ ဖြစ်တယ်လို့ ပြောဆို လိုက်ပါတယ်။ နိုင်ငံရေး အကျဉ်းသားတွေ ထပ်ပြီး လွှတ်ပေးဖို့ ရှိမရှိနဲ့ ပတ်သက်လို့ မှတ်ချက် မပေးပေမဲ့ နယ်ဝေး ထောင်ရောက် အကျဉ်းသားတွေကို မိသားစုတွေနဲ့ နီးတဲ့အရပ်တွေကို ပြောင်းရွှေ့ပေးဖို့ စီစဉ်နေတယ်လို့ ၀န်ကြီး ဦးကျော်ဆန်းက ပြောပါတယ်။ ဘန်ကောက်ကနေ ဗွီအိုအေ ၀ိုင်းတော်သူ ဒေါ်ခင်စိုးဝင်းက ပြန်ကြားရေး ၀န်ကြီး ဦးကျော်ဆန်းကို ဒီကနေ့ သီးသန့်တွေ့ဆုံ မေးမြန်း ထားပါတယ်။

ကမ္ဘာပေါ်မှာ စာပေလွတ်လပ်ခွင့်မရှိဆုံးနိုင်ငံတွေ စာရင်းထဲမှာ မြန်မာနိုင်ငံ မပါဝင်တော့အောင် တာဝန် အရှိဆုံး ပြန်ကြားရေး ဝန်ကြီး တစ်ယောက် အနေနဲ့ ဘယ်လို ကိုင်တွယ်နေလဲ ဆိုတာ မေးဖြစ်ခဲ့ပါတယ်။ ဝန်ကြီး ဦးကျော်ဆန်းကတော့ သူရဲ့ ဆောင်ရွက်ချက်တွေကို လွှတ်တော်ထဲမှာ တင်ပြဆွေးနွေးခဲ့ပြီးတော့ စာပေစိစစ်မှု ကန့်သတ်ချက် တွေကို လျှော့ပေါ့ ပေးနေပြီးတော့ သတင်း လွတ်လပ်ခွင့်တွေ ပိုပြီး ရှိလာအောင်လည်း ကြိုးပမ်း နေတဲ့ အကြောင်းကို အခုလို ပြောပြပါတယ်။

“နောက်ဆုံးကျရင်တော့ ဒေါ်ခင်စိုးဝင်းပြောတဲ့ သတင်းလွတ်လပ်ခွင့်တို့၊ စာအုပ်စာစောင် ထုတ်ဝေခွင့် ဆိုတာတွေက စောစောက ဥပဒေနဲ့ အညီ သတ်မှတ် ပေးထားတဲ့ ဘောင်တွေ အတွင်းက လွတ်လပ်မှုနဲ့ တာဝန်ယူမှု၊ လွတ်လပ်မှုနဲ့ ဆင်ခြင်တုံတရား ဘောင်အတွင်းက လွတ်လပ်စွာ ရေးသား ဆောင်ရွက်ခွင့်တွေ ရသွားမှပဲဖြစ်ပါတယ်။”

ဒီမိုကရေစီ ပြုပြင်ပြောင်းလဲရေးတွေ အကောင်အထည်ဖော်နေတဲ့နေရာမှာ စာပေစိစပ်ရေး အဖွဲ့ ဆိုတာ မရှိသင့်တော့ ဘူးလို့ စာပေ စိစစ်ရေး အကြီးအကဲက ပြောဆိုခဲ့တဲ့အပေါ် ဝန်ကြီး ဦးကျော်ဆန်းကလည်း သူ့ရဲ့အမြင်ကို အခုလို ပြောပြပါတယ်။

“နောင်ကျရင်တော့ အဲ့ဒီစာပေစိစစ် ဆိုတာက စာပေရေးသားမှုတွေကို စောင့်ကြည့်ယုံလောက်ပဲ လုပ်တဲ့ အလုပ်မျိုးကို လုပ်ဖို့ ရှိပါတယ်။ အဲဒီလောက်ပဲ ရှိကောင်း ရှိတော့မှာပါ။”

ဒီမိုကရေစီထွန်းကားတဲ့ နိုင်ငံကြီးတွေတင်မကပဲ အိမ်နီးချင်း အာဆီယံနိုင်ငံတွေတောင်မှ သမ္မတပဲ ဖြစ်ဖြစ်၊ ဝန်ကြီးချုပ်ပဲ ဖြစ်ဖြစ်၊ နိုင်ငံခြားရေး ဝန်ကြီးပဲ ဖြစ်ဖြစ်၊ ဝန်ကြီး ဌာနအလိုက် စသဖြင့် ပြောခွင့်ရ ပုဂ္ဂိုလ်တွေ သတ်သတ်မှတ်မှတ် ထားရှိပြီးတော့ သတင်းထူးရင် ထူးသလို သတင်းဌာနတွေက အချိန်မရွေး ဆက်သွယ်လို့ ရကြပါတယ်။ မြန်မာ နိုင်ငံတွင်းက သတင်း အချက်အလက်တွေကို မှန်မှန်ကန်ကန် သိရှိနိုင်ဖို့အတွက် သတင်းဌာနတွေ အနေနဲ့ အဆက်အသွယ် ရရှိဖို့ အခက်အခဲ ရှိပါတယ်။ ဒီကိစ္စနဲ့ ပတ်သတ်ပြီးတော့ ဝန်ကြီး ဦးကျော်ဆန်းက အခုလိုဖြေပါတယ်။

“ဝန်ကြီးဌာနအလိုက် သတင်းနဲ့ပတ်သတ်ပြီးတော့ contact person (ဆက်သွယ်ရမယ့်သူ) တွေ စပြီးတော့ ဖွဲ့စည်း တာဝန်ပေးနေပြီ။ ပြီးလို့ရှိရင် သူနဲ့အတူ သူ့မှာ သတင်းနဲ့ပတ်သတ်ပြီးတော့ ဆောင်ရွက် ထုတ်ပြန်ပေးရန် အတွက် သူ့ရဲ့ media group၊ team လေးတွေ စတင်ဖွဲ့စည်းပေးနေပြီ။ ဒါ့ကြောင့် နောက်ပိုင်းကျရင် ဝန်ကြီးဌာနအလိုက် contact person တွေ စောစောကဒေါ်ခင်စိုးဝင်းပြောတဲ့ ဝန်ကြီးဌာနအလိုက် spokesman တွေက ဒါလေးတွေကို သူတို့ဘက်ကလည်း သူတို့ဝန်ကြီးဌာနနဲ့ အဓိကဆိုင်တဲ့ကိစ္စတွေမှာ မေးမြန်းလာရင် ပြောဆိုပြီးတော့ ပြန်ကြားပေးမယ်။ မမေးမြန်းသည့်တိုင် သူ့ဝန်ကြီးဌာနကထုတ်ပြန်သင့်တဲ့ အကြောင်းအရာ သတင်းတွေဆိုရင်လည်း သူတို့က ထုတ်ပြန်သွားမှာ ဖြစ်ပါတယ်။”

မြန်မာအစိုးရဝန်ကြီးတွေက မြန်မာနိုင်ငံမှာ နိုင်ငံရေးအကျဉ်းသားဆိုတာ မရှိပါဘူးလို့ ပြောလေ့ရှိတာကြောင့် ဝန်ကြီး ဦးကျော်ဆန်းရဲ့ အမြင်ကို သိရအောင် မေးကြည့် ပါသေးတယ်။

“ကနေ့ ကျနော်တို့ အကျဉ်းကျနေတဲ့ပုဂ္ဂိုလ်တွေက သတ်မှတ်ထားတဲ့ စည်းမျဉ်း စည်းကမ်း ဥပဒေတွေကို ကျူးလွန်တဲ့ အတွက်ကြောင့် အဲ့ဒီ စည်းမျဉ်းစည်းကမ်း ဥပဒေအရပဲ ကျနော်တို့ အရေးယူ ထားတာ ဖြစ်ပါတယ်။ သို့သော်လည်း အဲ့ဒီထဲမှာ နိုင်ငံရေး လုပ်တဲ့ ပုဂ္ဂိုလ်တွေလည်း ပါကောင်း ပါမှာပါပဲ။ ဒါတွေ အားလုံးကိုလည်း သမ္မတကြီးက သူ့ကို အခြေခံဥပဒေက အပ်နှင်းထားတဲ့ လုပ်ပိုင်ခွင့်ကို ဆင်ခြင် တုံတရားနဲ့ ကျင့်သုံးပြီးတော့ ဒါတွေကို ဘာလုပ်ပေးနေလဲ၊ ဖြေလျှော့ပေးနေပါတယ်။”

သမ္မတဦးသိန်းစိန်အစိုးရ တက်လာပြီးတဲ့နောက် လွတ်ငြိမ်းချမ်းသာခွင့် နှစ်ကြိမ် ပေးခဲ့ပြီးတော့ အကျဉ်းသား ၁၆,၀၀၀ ကျော် လွှတ်ပေးခဲ့ပြီး ဖြစ်တယ်လို့ ဝန်ကြီး ဦးကျော်ဆန်းက ရှင်းပြပါတယ်။ ဒီလိုလွှတ်ပေးတဲ့အထဲမှာ နိုင်ငံရေး အကျဉ်းသား မဆိုသလောက်ပဲ ပါခဲ့တဲ့အတွက် နောက်ထပ် ထပ်လွှတ်ဖို့ရှိမရှိ မေးမြန်းရာမှာတော့ အခုလို မှတ်ချက်ပေးပါတယ်။

“ဥပမာ ရပ်ဝေးမှာပေါ့၊ ရပ်ဝေးဆိုတာထက် အစွန်အဖျား အကျဉ်းထောင်တွေမှာ ရောက်နေကြတဲ့ တချို့သော အကျဉ်းကျ ပုဂ္ဂိုလ်တွေကို ဆိုရင် ကနေ့အခါမှာ သူတို့တွေ ပိုပြီးတော့ မိသားစုနဲ့ ထိတွေ့ဖို့ အဆင်ပြေပြေ ဖြစ်ဖို့ရန်အတွက် သွားရေး လာရေး လွယ်ကူတဲ့ အကျဉ်းထောင်တွေကို ပြန်ရွှေ့ ပေးတာတွေ လုပ်နေပါတယ်။”

မြန်မာအစိုးရက ဒီမိုကရေစီရေးကို ရှေးရှုပြီးတော့ ပြုပြင်ပြောင်းလဲရေးတွေ အကောင်အထည် ဖော်နေတဲ့ နေရာမှာ အိမ်နီးချင်း နိုင်ငံတွေနဲ့ ရင်ဘောင် တန်းနိုင်အောင် အခြေခံ အဆောက်အအုံတွေ၊ လူသား အရင်းအမြစ်ရဲ့ အရည်အသွေး မြင့်မားရေး စတာတွေဟာ နိုင်ငံတကာရဲ့အကူအညီတွေ လိုအပ်နေတယ်လို့ ဝန်ကြီး ဦးကျော်ဆန်းက အခုလိုပြောပါတယ်။

“ကျနော်တို့ ကနေ့ မီဒီယာပိုင်းဆိုင်ရာတွေရော၊ ကျန်တဲ့အပိုင်းတွေရော၊ အနာဂတ်အတွက် ပြင်ဆင် ပြုပြင် တည်ဆောက်မှုတွေ လုပ်နေတယ်။ အဲဒီလို ဆောင်ရွက်ရာမှာ နိုင်ငံတကာက ပူးပေါင်း ဆောင်ရွက်မှုတွေ၊ အကူအညီတွေ ပေးမယ်ဆိုလည်း ကျနော်တို့က ကြိုဆိုတယ်။ အလားတူပဲ အကြောင်း အမျိုးမျိုးနဲ့ ပြည်ပကို ရောက်နေကြတဲ့ မြန်မာနိုင်ငံသားတွေက ကိုယ့်နိုင်ငံရဲ့ အဆင့် မြင့်မားရေးအတွက် ပူးပေါင်း ဆောင်ရွက်ကြမယ်၊ အကူအညီတွေ ပေးကြမယ် ဆိုရင်လည်း ကျနော်တို့က ကြိုဆိုပါတယ်။”

ပြည်ထောင်စု ပြန်ကြားရေးဝန်ကြီး ဦးကျော်ဆန်းကို ဒီကနေ့ သီးခြားတွေ့ဆုံမေးမြန်းခဲ့တာ ဖြစ်ပါတယ်။

Ref: VOA News