ထိုင်းရောက် တရားမဝင် လုပ်သားများ မှတ်ပုံတင်ခွင့်ပြုပြီ

အောင်မြတ်စိုး
ဗုဒ္ဓဟူးနေ့၊ ဧပြီလ ၂၇ ရက် ၂၀၁၁

ဘန်ကောက် (မဇ္ဈိမ) ။ ။ အကြောင်းအမျိုးမျိုးကြောင့် မှတ်ပုံမတင်သေးသည့် ထိုင်းနိုင်ငံရှိ ရွှေ့ပြောင်း လုပ်သားများကို မှတ်ပုံတင်ခွင့် တရားဝင် ခွင့်ပြုပြီဟု ထိုင်းအစိုးရ ကြေညာချက်ကို ကိုးကား၍ နေးရှင်း သတင်းက ဗုဒ္ဓဟူးနေ့တွင် ဖော်ပြ လိုက်သည်။

မှတ်ပုံတင်ခွင့်ပြုရေး ဆုံးဖြတ်ချက်ကို ထိုင်းဝန်ကြီးချုပ် အဘီဆစ်ဝေ့ချာချီဝက ဧပြီလ ၂၆ ရက်၊ အင်္ဂါနေ့တွင် ပြုလုပ်သော ထိုင်းအစိုးရ အဖွဲ့ အစည်းအဝေး၌ သဘောတူကြောင်း လက်မှတ် ထိုးခဲ့ခြင်း ဖြစ်သည်။

ဝန်ကြီးချုပ်ရုံး အမြဲတမ်း လက်ထောက်ပြန်ကြားရေးမှူးများ ဖြစ်သော နာယ်စုဖချား ကြိုင်စမု နာယ်ဝိချရ ကာနိကောန် နှင့် နာယ်မာရု မာ့စ်ယဝါနိက “တရားမဝင် နေထိုင် လုပ်ကိုင်နေသည့် ရွှေ့ပြောင်းအ လုပ်သမားများကို မှတ်ပုံတင်ရေး စီမံချက်မှ ၁၉၇၉ ခုနှစ် လူဝင်မှု ကြီးကြပ်ရေး ဥပဒေပုဒ်မ ၁၇ ကို အသုံးပြုပြီး အလုပ် လုပ်ကိုင်ရန် ရည်ရွယ်သူများနှင့် ၎င်းတို့၏ ၁၅ နှစ်အောက် ကလေးများကို တနှစ်ထက် မကြာသော ယာယီ နေထိုင်ခွင့် ပေးရန်” ဟု အစည်းအဝေး အပြီး သတင်း ထုတ်ပြန်ရာတွင် ပြောဆိုခဲ့ကြသည်။

အဆိုပါ လဝက ဥပဒေပုဒ်မ ၁၇ သည် “အစိုးရအဖွဲ့၏ သဘောတူညီချက်ဖြင့် နိုင်ငံခြားသား တဦးဦးကို နေရပ် ရင်းသို့ ပြန်လည် ပို့ဆောင်ခြင်း မပြုဘဲ ထိုင်းနိုင်ငံ အတွင်း ယာယီ နေထိုင်ခွင့်ပြုသည်” ဟု အဓိပ္ပာယ် သက်ရောက်သည်။

အစီအစဉ်အရ ရွှေ့ပြောင်းလုပ်သားများနှင့် ၎င်းတို့ရင်သွေးငယ်များကို နိုင်ငံအတွင်း ယာယီနေထိုင်ခွင့် ထော်ရော် (၃၈/၁) ထုတ်ပေးမည် ဖြစ်ကာ ၎င်းနောက်ပိုင်း မိဘများကို ကျန်းမာရေး ဆေးစစ်မှု ခံယူပြီး အလုပ် လုပ်ခွင့် လက်မှတ် လျှောက်ထားခွင့် ပြုမည်။

အလုပ်လုပ်ခွင့်သက်တမ်း တနှစ်ရှိမည်ဖြစ်ပြီး ယခင်ကဲ့သို့ အလုပ် သမားများသည် ကျန်းမာရေး ဆေးစစ်ခ၊ အာမခံနှင့် အလုပ် လုပ်ခွင့် ပါမစ်အတွက် ငွေ ပေးသွင်းပြီးနောက် အလုပ် လုပ်နိုင်မည်။ စနစ်တခုလုံး ပိုမို ကောင်းမွန်ရန် ရည်ရွယ်၍ လိုအပ်သော အသေးစိတ် ပြင်ဆင် စရာများ ရှိသဖြင့် စတင် မှတ်ပုံတင်ရမည့် ရက်ကို အတိအကျ မသတ်မှတ်သေးပေ။ သို့သော် မကြာခင် ရက်ပိုင်းအတွင်း စတင်မည်ဟု အလုပ်သမားရေး အဖွဲ့များက ဆိုသည်။

“ကျန်းမာရေးနဲ့ အလုပ်သမားဝန်ကြီးဌာနတွေက အသေးစိတ် ပြင်ဆင်စရာလေးတွေ ရှိနေလို့၊ တပတ် နှစ်ပတ်တော့ ကြာနိုင်တယ်။ ဆိုတော့ ရွှေ့ပြောင်း အလုပ်သမားတွေနဲ့ ပြင်ဆင်စရာ ရှိတာတွေ ပြင်ဆင် စေချင်ပါတယ်။ အလုပ်ရှင်ကို မှတ်ပုံ တင်ပေးဖို့ တိုက်တွန်းတာ၊ ကလေးတွေအတွက် အထောက်အထား စာရွက်စာတမ်း ပြင်ဆင်တာတွေ ကိုပေါ့” ဟု ရွှေ့ပြောင်း အလုပ်သမား အရေး ပူးပေါင်း ဆောင်ရွက်မှုအဖွဲ့ Migrant Working Group (MWG) မှ တာဝန်ခံ တဦးက မဇ္ဈိမကို ပြောသည်။ ပေးသွင်းငွေ ပမာဏသည် ယခင်ကဲ့သို့ ရှိနိုင်မည်ဖြစ်ကာ ကလေးများအတွက် ငွေပေးသွင်းရမည် မဟုတ်ဟု ဆိုသည်။

ကျန်းမာရေး ဆေးစစ်ခ၊ အာမခံနှင့် အလုပ်လုပ်ခွင့် မှတ်ပုံတင် ကုန်ကျငွေ အားလုံးသည် ဘတ်ငွေ ၃၈ဝဝ ဖြစ်သည်။ မှတ်ပုံတင် မပြုလုပ်မီနှင့် ပြုလုပ်ပြီးနောက် ထပ်မံ ဝင်ရောက် လာသူများကိုမူ တားဆီးသွားမည် ဖြစ်သည်။ ထို့နောက် မှတ်ပုံ တင်ပြီးနောက် မှတ်ပုံ မတင်ခဲ့သည့် အလုပ်သမားများ၊ ၎င်းတို့၏ အလုပ်ရှင်များ၊ နေထိုင်ခွင့် ပေးသူများနှင့် သက်ဆိုင် သူများကို ဖမ်းဆီးခြင်းနှင့် ဥပဒေအရ အရေးယူခြင်းများ ဆောင်ရွက်သွားမည်ဟု သတင်း ထုတ်ပြန်ချက်တွင် ပါရှိသည်။

“အလုပ်သမား တော်တော်များများ လာရောက် မှတ်ပုံတင်ကြမယ်လို့ ကျနော်တို့ မျှော်လင့်တာပါပဲ။ ရွှေ့ပြောင်းတွေ မှတ်ပုံ တင်ရင် ကလေးတွေလည်း ပါလာမှာပါ။ ဒါပေမဲ့ ကလေးတွေအတွက် ကျန်းမာရေး စောင့်ရှောက်ခွင့် ပေးမပေးကတော့ ကျနော်တို့ စောင့်ကြည့် ရဦးမှာပါ” ဟု MWG တာဝန်ခံက ပြောဆိုသည်။

ယခင်က ဒုဝန်ကြီးချုပ် အမှူးပြုသော နိုင်ငံခြားသား အလုပ်သမား စီမံခန့်ခွဲရေး ကော်မတီကိုပါ လုပ်ငန်းများ ပိုမို အဆင် ပြေစေရန် အလုပ်သမား ဝန်ကြီးဌာန လက်အောက်၌ ဗဟိုနှင့် ခရိုင်အဆင့် ဌာနများ တိုးချဲ့ ဖွင့်လှစ်မည် ဖြစ်သဖြင့် ပိုမို မြန်ဆန်ကာ လွယ်ကူမှု ရှိမည်ဖြစ်သည်။

“ထိုင်းတော်ဝင်အစိုးရကို တိုက်တွန်းလိုတာက မှတ်ပုံတင်စနစ်ကို လွယ်ကူချောမွေ့စေဖို့နဲ့ လုပ်ငန်း ရှင်တွေကို ရွှေ့ပြောင်းတွေ မှတ်ပုံ တင်စေဖို့ ဖိအား ပေးစေ လိုတာပါပဲ။ ပြီးတော့ မှတ်ပုံ တင်ထားတဲ့ အလုပ်သမားတွေရဲ့ အခွင့်အရေးနဲ့ အကာအကွယ် ပေးရေးတွေ၊ နိုင်ငံသား စိစစ်မှုပြုရေး လုပ်ငန်း ကိစ္စမှာလည်း သူတို့ တတ်နိုင်လောက်တဲ့ အခြေအနေ ဖြစ်အောင်၊ ၁၅ နှစ်အထက်နဲ့ ၁၈ နှစ်အောက် ကလေးတွေကိုလည်း တရားဝင် မှတ်ပုံ တင်ခွင့် ပြုတာ စတာတွေပါ” ဟု MWG တာဝန်ခံက ပြောဆိုလိုက်သည်။

၂ဝဝ၉ ခုနှစ် သြဂုတ်လထဲတွင် မှတ်ပုံတင်ခွင့် ပြုသောအခါ မြန်မာ၊ လာအို၊ ကမ္ဘောဒီယား ရွှေ့ပြောင်း အလုပ်သမား ၁.၃ သန်း မှတ်ပုံ တင်ခဲ့ကာ၊ ယခုနှစ် ဖေဖော်ဝါရီ လကုန် သက်တမ်း ဆက်ခွင့် ကုန်ဆုံးသော အခါ အလုပ်သမား ဦးရေ ၈၄၅,၁၃၉ ဦးသာ တရားဝင် တည်ရှိ တော့သည်ဟု ထိုင်းအလုပ်သမား ဝန်ကြီးဌာန ထုတ်ပြန်သော စာရင်းဇယားကို ကိုးကား၍ နိုင်ငံတကာ ရွှေ့ပြောင်း နေထိုင်သူများ ရေးရာ IOM အဖွဲ့က ဧပြီလ ၁၁ ရက်နေ့တွင် သတင်း ထုတ်ခဲ့သည်။

မြန်မာ၊ လာအို၊ ကမ္ဘောဒီးယား ၃ နိုင်ငံမှ ယာယီနိုင်ငံကူးလက်မှတ် ကိုင်ဆောင်၍ အလုပ် လုပ်နေသူ ၅၅ဝ,ဝဝ၃ ဦး ဖြစ်ပြီး၊ ထိုအထဲတွင် မြန်မာက ၃၅၂,၇၄၈ ဦး ပါဝင်သည်ဟု ဆိုသည်။

အလုပ်သမားရေး လုပ်ဆောင်နေသော အဖွဲ့များက တရားဝင်နှင့် တရားမဝင် မြန်မာ ရွှေ့ပြောင်း အလုပ်သမား ၂ သန်းခန့် ထိုင်းနိုင်ငံအတွင်း အလုပ် လုပ်ကိုင်နေသည်ဟု ခန့်မှန်းထားသည်။

Ref: မဇ္ဈိမ