စစ်အစိုးရ ဝါဒဖြန့်ဆောင်းပါး အတွေ့ရနည်းတော့မည်

ဖနိဒါ
အင်္ဂါနေ့၊ ဂျူလိုင်လ ၀၆ ရက် ၂၀၁၀

ချင်းမိုင် (မဇ္ဈိမ) ။ ။ ပြည်တွင်းသတင်းစာစောင်များတွင် လာမည့် ရက်သတ္တပတ်မှစ၍ စစ်အစိုးရ၏ ဝါဒဖြန့် ဆောင်းပါးများ ပုံမှန် ထည့်ရန် မလိုတော့ကြောင်း ပြည်တွင်း အယ်ဒီတာများနှင့် စာပေ စိစစ်ရေးက ပြောသည်။

ရွေးကောက်ပွဲအကြိုကာလ နိုင်ငံရေးပါတီများနှင့်ဆက်ဆိုင်သော သတင်း၊ ဆောင်းပါးများကို ပြန်ကြားရေးဝန်ကြီး ဌာန လက်အောက်ရှိ စာပေ စိစစ်ရေးက ပိတ်ပင် တားဆီးဖြတ်တောက်မှု သိသိသာသာ တိုးများလာ၍ ဝေဖန်မှုများ ထွက်လာချိန်တွင် စစ်အစိုးရက တုံ့ပြန် လိုက်ခြင်းဖြစ်သည်။

သို့သော် ရံဖန်ရံခါ “ညွှန်ကြား” သည့် အခါ၌မူ မထည့်မနေရ ထည့်ပေးရမည်ဟု စာပေစိစစ်ရေးက သတိပေး ထားသည်။

“သတင်းစာ နေ့တိုင်းမှာ ပေါ်လစီဆောင်းပါး ပါတယ်လေ။ တပတ် ထွက်တဲ့ ဆောင်းပါးတွေထဲက သူတို့ကြိုက်တဲ့ ဆောင်းပါးကို ထည့်ခိုင်းတာပါ။ ဒီတပတ်ထွက်တဲ့ ဂျာနယ်တွေမှာကို ပေါ်လစီ မပါတော့ ပါဘူး” ဟု အပတ်စဉ်ထုတ် ဂျာနယ် အယ်ဒီတာတဦးက ပြောသည်။

မဇ္ဈိမက ဆက်သွယ်မေးမြန်းသောအခါ ရန်ကုန် ဗဟန်းမြို့နယ်ရှိ စာပေစိစစ်ရေးမှ စာစစ်မှူး တဦးက “ဟုတ်ပါတယ်။ အမြဲတမ်း မထည့်ရ တော့ပါဘူး။ ဒါပေမဲ့ တခါတလေ အထက်က ညွန်ကြားလာတာမျိုး ဆိုရင်တော့ ထည့်ပေးရမယ်” ဟု ပြောသည်။

အများအားဖြင့် အတိုက်အခံများကို ထိုးနှက်တိုက်ခိုက်သော စစ်အစိုးရ အလိုကျ ရေးသားထားသော၊ စာပေ အသိုင်း အဝိုင်းတွင် ”ပေါ်လစီ ဆောင်းပါး” ဟု ခေါ်ဝေါ်ကြသော၊ နာမည်ဝှက် အမျိုးမျိုးဖြင့် ရေးသားထားသော ဆောင်းပါးများကို ပုဂ္ဂလိကပိုင် ဂျာနယ် မဂ္ဂဇင်းများ တွင်လည်း ပုံနှိပ်ဖော်ပြရန် ပြန်ကြားရေး ဝန်ကြီးဌာနက ပေးပို့လေ့ရှိပြီး ဖော်ပြခြင်း မပြုလျှင် ပုံနှိပ် ထုတ်ဝေခွင့် လိုင်စင် ပိတ်သိမ်းသည် အထိ အရေးယူမည်ဟု စာနယ်ဇင်းများကို စာပေစိစစ်ရေးက သတိပေးမှု မကြာခဏ ပြုလုပ်သည်။

စာပေစိစစ်ရေးနှင့် မှတ်ပုံတင်ဌာနက သတင်းများကို ယခင်က ၃ ဦးပါ အဖွဲ့ ၅ ဖွဲ့ဖြင့် စိစစ်ခဲ့ရာမှ ပြီးခဲ့သည့် လကုန်ပိုင်းမှ စ၍ ၁၂ ဦးပါ အဖွဲ့ တခုတည်းဖြင့်သာ ပြောင်းလဲ စိစစ်နေသည်။

ဆင်ဆာဖြတ်တောက်မှုမှာ စာပေစိစစ်ရေး ညွှန်ကြားရေးမှူး ဗိုလ်မှူးတင့်ဆွေ ရာထူးကို အစားထိုးရန် ရောက်ရှိလာသော ရေတပ်မှ ပြောင်းရွှေ့ လာသည့် ဒုတိယ ဗိုလ်မှူးကြီး မျိုးမြင့်မောင်က တွဲဘက် ဒုညွန်မှူးအဖြစ် တာဝန်ယူသည့် နောက်ပိုင်း ပိုမို တင်းကျပ်လာကြောင်း ပြည်တွင်း သတင်းစာ ဆရာများက ပြောသည်။

ဈေးကွက်အတွင်း ယနေ့ အသစ်စက်စက် ဝင်ရောက်လာသော “ပြည်သူ့ခေတ်” ဂျာနယ်၏ ပထမဆုံး စာစောင်သည် ဆင်ဆာ ဖြတ်တောက်မှု အများအပြား ကြုံတွေ့ လိုက်ရသည်။

“ပြည်သူ့ခေတ်က ဆင်ဆာဖြတ်တာက များတယ်။ ကျနော်က ဂျာနယ် ဝယ်ထားပြီးပြီ။ ကျနော့် အင်တာဗျူးဘဲ မဟုတ်ဘူး။ ဘယ်နိုင်ငံရေး သမားတွေရဲ့ အင်တာဗျူးတွေ တခုမှ မပါဘူး။” ဟု ရွေးကောက်ပွဲ ဝင်ပြိုင်ရန် ပြင်ဆင်နေသော မတူကွဲပြားခြင်းနှင့် ငြိမ်းချမ်းရေး ပါတီခေါင်းဆောင် ဦးနေမျိုးဝေက မဇ္ဈိမကို ပြောသည်။

“ကျနော်တို့က သတင်းလွတ်လပ်ခွင့်ကိုတော့ ဦးထိပ်ပန်တယ်။ အဲဒါ ကျနော်တို့ သန္နိဋ္ဌာန်ဘဲ” ဟု သူက ဆက်ပြောသည်။

Ref: မဇ္ဈိမ