တိုင်းရင်းသားပါတီများ ကြံ့ခိုင်ရေးပါတီကဲ့သို့ လှုပ်ရှားစည်းရုံးခွင့် မရှိ

Wednesday, 07 July 2010

သျှမ်းပြည်အတွင်း နိုင်ငံရေးပါတီ ၁၀ ခု ထက်မနည်းရှိသည့်အနက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေး ပါတီ တပါတီတည်းသာ လွတ်လပ်စွာ သွားလာ စည်းရုံး ဟောပြော မဲဆွယ်ခွင့် ရှိကြောင်း အမည်မဖေါ်လိုသည့် နိုင်ငံရေး ပါတီ အသိုင်းအ၀ိုင်းက ပြောပါသည်။

“ကျနော်တို့ သျှမ်းပြည်မှာ ကြံ့ဖွတ်ပါတီ၊ တစည ပါတီအပါအ၀င် တိုင်းရင်းသားပါတီတွေ စုစုပေါင်း ၁၀ ခု ထက် မနည်းရှိတယ်။ မှတ်ပုံတင် မကျသေးတဲ့ ပါတီတွေလဲ ရှိသေးတယ်၊ ဒါပေမယ့် ကြံ့ဖွတ်ကလွဲလို့ ဘယ်ပါတီမှ လွတ်လွတ်လပ်လပ် စည်းရုံးရေး ဆင်းခွင့် မရဘူး”- ဟု တိုင်းရင်းသား နိုင်ငံရေးပါတီဝင် ကျိုင်းတုံသား တဦးက ပြောပါသည်။

ဂျွန်လဆန်းပိုင်းကစ၍ ၂၀၁၀ ရွေးကောက်ပွဲကော်မရှင်မှ နိုင်ငံရေးပါတီများအား ပါတီထောင်ခွင့် မှတ်ပုံတင် ခွင့်ပြုချက် ဆက်တိုက် ချပေးခဲ့သော်လည်း တိုင်းရင်းသား ပါတီများမှာ ပါတီဝင်ဦးရေ ပြည့်မှီရေး အတွက်သာ စည်းရုံးခွင့် ရကြောင်း၊ ပါတီ အနိုင်ရရှိရေး ဆိုင်ရာ လွှတ်တော် ကိုယ်စားလှယ်လောင်း/ပြည်နယ် ကိုယ်စားလှယ်လောင်း ထောက်ခံမဲ ရရေးအတွက် စည်းရုံးခွင့် မရသေးကြောင်း - တိုင်းရင်းသားနိုင်ငံရေးပါတီ အသိုင်းဝိုင်းက ပြောပါသည်။

“ကျနော်တို့ ကျိုင်းတုံမှာ ကျေးရွာအုပ်စုတိုင်းကို သွားစည်းရုံးတယ်။ ကျေးရွာအုပ်စုတခု အင်အား ၃၅၀ ပြည့်ရမယ်၊ ကြံ့ဖွတ်ပါတီ မ၀င်မနေရ၊ ၀င်ပြန်တော့လဲ ပါတီဝင်ကြေး တယောက် ၁၀၀၀ ကျပ် ထပ်ကောက်သေးတယ်၊ သူ့ခေတ် ဆိုတော့လဲ သူလုပ်ချင်ရာ လုပ်နေတယ် ” - ဟု ကြံ့ဖွံ့ပါတီထဲ အဓမ္မ ၀င်ခိုင်းခံရသူ ဒေသခံတဦးက ပြောပါသည်။

ရန်ကုန် တောင်ဥက္ကလာပ ရုံးချုပ်စိုက်သည့် သျှမ်းတိုင်းရင်းသားများ ဒီမိုကရက်တစ် ပါတီက ပါတီမှတ်ပုံတင် ကျချိန်မှစ၍ သျှမ်းပြည် မြို့ကြီး အချို့တွင် မြို့နယ်ရုံးခွဲများ ဆက်တိုက် ဖွင့်ခဲ့သော်လည်း နယ်ဘက်သို့မူ စည်းရုံးရေး မဆင်းသေးကြောင်း၊ သံလွင် အရှေ့ခြမ်း မိုင်းတုံ၊ မိုင်းဆတ် ဘက်တွင်လည်း ကြံ့ဖွံ့ပါတီသာ ရှိကြောင်း - မိုင်းတုံ မြို့ခံ တဦးက ဤကဲ့သို့ ပြောပြပါသည်။

“ကြံ့ဖွတ်ပါတီဘဲရှိမယ်ဆိုရင် အဲဒီဒေသ/မြို့နယ် ရွေးကောက်ပွဲလုပ်စရာ မလိုတော့ဘူးတဲ့၊ အလိုလိုနေရင်း သူတို့ ပါတီကလူဘဲ လွှတ်တော် ကိုယ်စားလှယ်/ပြည်နယ် ကိုယ်စားလှယ် တန်းဖြစ်မယ်တဲ့ ”

သျှမ်းပြည်တွင် ပြည်ခိုင်ဖြိုးပါတီ USDP၊ တိုင်းရင်းသားစည်း လုံးညီညွတ်ရေးပါတီ UNP နှင့် ၁၉၄၇ ပင်လုံညီလာခံ တက်ရောက်သူ သျှမ်းဝါရင့် နိုင်ငံရေးသမား ဦးရွှေအုံး ဦးဆောင်သည့် ပြည်ထောင်စု ဒီမိုကရေစီပါတီ UDP တို့ အပါအ၀င် စစ်အုပ်စု ရွေးကောက်ပွဲ ကော်မရှင်ထံ ပါတီ တည်ထောင်ခွင့် လျှောက်သည့် နိုင်ငံရေးပါတီ ၁၂ ခုရှိ ကြောင်း အဆိုပါ အသိုင်းအ၀ိုင်းက ပြော၏။

“လားရှိုးမြို့တခုထဲ နိုင်ငံရေးပါတီ မှတ်ပုံတင်ရထားတဲ့ ပါတီ ၅ ခုက ပါတီရုံးချုပ်တွေ၊ ရုံးခွဲတွေ ဆိုင်းပုဒ်တွေ အသီးသီး ဖွင့်လှစ် ထားပြီးပြီ၊ ကချင်ပါတီဖြစ်တဲ့ NSSPP ပါတီက မှတ်ပုံတင် ကျလာရင် မူစယ်မှာ ရုံးဖွင့်မယ်လို့ သိရတယ်” - ဟု လားရှိုးမြို့ခံ တဦးက ပြောပါသည်။

လားရှိုးမြို့၌ ရုံးဖွင့်သည့် နိုင်ငံရေးပါတီ ၅ ခုမှာ သျှမ်းတိုင်းရင်းသားများ ဒီမိုကရက်တစ်ပါတီ SNDP ခေါ် ကျားဖြူ ပါတီ (မြို့နယ်ကော်မတီ -ဥက္ကဌ စိုင်းအောင်ကြီး)၊ လားဟူ အမျိုးသား ဒီမိုကရက်တစ်ပါတီ LNDP (ရုံးချုပ် - ဥက္ကဌ ဂျဟားဆဲ ၅၆ နှစ်)၊ ၀ အမျိုးသား စည်းလုံးညီညွတ်ရေးပါတီ WNUP (ရုံးချုပ်- ဥက္ကဌ တာ့ပလိ)၊ ကိုးကန့် ဒီမိုကရေစီနှင့် စည်းလုံး ညီညွတ်ရေးပါတီ KDUP (ရုံးချုပ် - ဥက္ကဌ လော်ရှင်းကွင်း ၆၀ နှစ်)၊ နှင့် ကြံ့ဖွံ့ပါတီ (ရုံးခွဲ - ဥက္ကဌကျောက်မဲသား ဦးနော်ခမ်းဦး) တို့ဖြစ်သည်။

ကျန်ပါတီများမှာ ၁၉၉၀ ရွေးကောက်ပွဲ အနိုင်ရ တိုင်းရင်းသား စည်းလုံးညီညွတ်ရေး ပါတီ NUP မှ ဟိုပန်မြို့နယ် ပြည်သူ့ ကိုယ်စားလှယ် ခွန်ထွန်းလူ ဦးဆောင်သည့် ၀ ဒီမိုကရေစီပါတီ WDP၊ ယခင် PSLA ပလောင်ပြည် လွတ်မြောက်ရေး တပ်မတော် ဥက္ကဌ ဟောင်းမိုင်အိုက်မုန့် ဦးဆောင်သည့် ပလောင် အမျိုးသားပါတီ/ ပလောင် တိုင်းရင်းသား ဒီမိုကရက် တစ်ပါတီ PNP/PNDP ၊ လားရှိုးမြို့ ရပ်ကွက် ၂ နေ ဦးပေါ်ဦး (ရုံးခွဲဥက္ကဌ) တိုင်းရင်းသား စည်းလုံး ညီညွတ်ရေးပါတီ NUP၊ အင်းအမျိုး သားဖွံ့ဖြိုးရေးပါတီ INDP၊ ကယန်း အမျိုးသားပါတီ KNP နှင့် ကချင်ပါတီဖြစ်သည့် သျှမ်းပြည်မြောက်ပိုင်း တိုးတက်ရေးပါတီ NSSPP တို့ဖြစ်ကြသည်။

Ref: သျှမ်းသံတော်ဆင့်