သတ်မှတ်ရက် ကျော်လွန်သော်လည်း မိုင်းလားတပ်ဖွဲ့ ရပ်တည်ချက် မပြောင်း

Thursday, 22 April 2010 19:46

စရဖ အရာရှိချုပ် ဗိုလ်ချုပ်ရဲမြင့်ကိုယ်စား အဖွဲ့တဖွဲ့က နယ်ခြားစောင့်တပ် အသွင်ပြောင်းရန် မိုင်းလားတပ်ဖွဲ့အား ထပ်မံသွားရောက် ဖိအားပေးခဲ့သည်ဟု စုံစမ်း သိရှိရပါသည်။

“အရင် တြိဂံတိုင်း ဂျီဝမ်းခေါင်းဆောင်တဲ့ အဖွဲ့လာသွားတယ်၊ နေ့ချင်းပြန်ဘဲ၊ အရင်ကလို ဧည့်ခံကျွေးမွေးရေး ဘာမှမရှိ။ မျက်နှာလဲ သိပ်မကြည်ဘူး ဆိုဘဲ” - ဟု မိုင်းလား - ကျိုင်းတုံပြေး ကားဆရာတဦးက ပြောပါသည်။

ဧပြီ ၁၈ ရက်နေ့ မနက်ပိုင်း ယခင်တြိဂံစစ်တိုင်း လုံခြုံရေး အရာရှိ ပထမတန်း ဒုဗိုလ်မှူးကြီးသန်းထွဋ်သိန်း နှင့် အဖွဲ့က မိုင်းလားသို့ နေ့ချင်းပြန်သွားပြီး နယ်ခြားစောင့်တပ် အသွင်ပြောင်းမည့် စာရင်းများ ပေးပို့ရန် သွားရောက်သိမ်းသွင်း ဖိအားပေးခဲ့သည်ဟု ဆိုသည်။

ခိုင်လုံသည့်သတင်းရပ်ကွက် တခုကလည်း -“သတ်မှတ်ရက် ကျော်လွန်ပေမယ့် မိုင်းလားတပ်ဖွဲ့ ထပ်မံ အဖြေပေးဖို့ မရှိဘူး၊ ရွေးစရာလမ်းက ၂ ခုပေါ့၊ တခု က တောင်းဆိုထားတဲ့ အချက် ၆ ချက်ဘဲ ပြန်လည်တောင်းဆိုမယ်။ နောက်တခု က တခြား အပစ်ရပ်တွေလို ဘာမှ မပြောမဆိုဘဲ ဒီအတိုင်း ဆိတ်ငြိမ်နေလိုက်မယ် ဆိုဘဲ” - ဟု ပြော၏။

အပစ်ရပ်ဒေသဘက်သို့သွားရောက်လေ့လာခဲ့သည့် ထိုင်းနယ်စပ်နေပုဂ္ဂိုလ်တဦးက - “မိုင်းလားတပ်ဖွဲ့ အပါအ၀င် အခြား အပစ်ရပ် အဖွဲ့တွေ စစ်ရေး ပြင်ဆင်မှုက မရပ်မနားဘဲ။ နအဖ ဘက်ကတော့ အပစ်ရပ် နယ်ခြားဒေသ တွေမှာ လက်နက်ကြီးတွေ တပ်ဆင် ထားတာကလွဲလို့ ဒီအတောအတွင်း အင်အား ထပ်ဖြည့်တာ မရှိသေးဘူး။ တိုက်ပွဲဖြစ် မယ့်အလားအလာလဲ ခန့်မှန်းရ ခက်တယ်။ ရွေးကောက်ပွဲ ပြီးရင်တော့ မပြောတတ်ဘူး၊ အခုဟာက မိုးတွင်းလဲ ၀င်တော့မယ်။ တရုတ်ဝန်ကြီးချုပ်လဲ ဗမာပြည်ကို လာမယ်ဆိုတော့၊ နအဖ ဘက်ကလဲ ချင့်ချင့်ချိန်ချိန် လုပ်နေရတဲ့ ပုံမျိုးဖြစ်နေတယ်”- ဟု သျှမ်းသံတော်ဆင့်သို့ သုံးသပ်ပြ၏။

တရုတ်နယ်စပ်ဘက်အခြေစိုက်သည့် ကချင်လွတ်လပ်ရေးတပ်မတော်၊ ၀ ပြည်သွေးစည်းရေး တပ်မတော်၊ အမျိုးသား ဒီမိုကရက်တစ် တပ်မတော် - (သျှမ်းပြည်အရှေ့ပိုင်း) နှင့် အပစ်ရပ် သျှမ်းပြည် တပ်မတော်တို့သည် ကိုးကန့်အရေးအခင်း နောက်ပိုင်း၊ မိုင်းလား အတွင်းရေးမှူး လုပ်ကြံခံရသည့် နောက်ပိုင်း တဖွဲ့နှင့်တဖွဲ့ ပိုမိုဝင်ထွက် နီးစပ်မှု ရှိလာကြောင်း၊ မတရား အသင်းအဖွဲ့အဖြစ် နအဖ ကြေငြာခဲ့မည် ဆိုလျှင် လက်တွဲ ပူးပေါင်း တုန့်ပြန်ရန် အဆင်သင့် ရှိကြောင်း၊ ကိုးကန့် အရေးအခင်းကို သင်္ခဏ်းစာ ယူ၍ ပြဿနာတွဲကူ ဖြေရှင်းရန် မကြာခင်က သဘောတူညီမှု ရယူနိုင်ခဲ့ကြောင်း -ခိုင်လုံသည့် သတင်းက အတည်ပြု ပြောဆိုပါသည်။

၂၀၀၉ နိုဝင်ဘာ ၂၉ ရက် (သျှမ်းပြည်စစ်တိုင်း သုံးတိုင်းကြီးကြပ်သူ ) တိုင်းချုပ် ဗိုလ်ချုပ်မင်းအောင်လှိုင်ထံ တင်ပြ တောင်းဆိုသည့် အဓိက အကြောင်းရင်း ၆ ချက်မှာ -နယ်ခြားစောင့်တပ် အဖြစ် အသွင်ပြောင်းရလျှင်....
၁။ နအဖ စစ်အရာရှိများ မိုင်းလား တပ်ဖွဲ့အတွင်း ၀င်ရောက် တာဝန်ထမ်းခြင်း မပြုလုပ်သေးရန်၊
၂။ မွမ်းမံ/စစ်သင်တန်းအား လည်း မိုင်းလားနယ်မြေအတွင်း၌သာ ပြုလုပ်ရန်၊
၃။ တာဝန်ထမ်းဆောင်နိုင်သေးသည့် အသက် ၅၀ ကျော် မိုင်းလားအရာရှိများ ရာထူးမှ ရပ်နားခြင်း မပြုရန်၊
၎။ မိုင်းလားတပ်ဖွဲ့ ထိန်းချုပ်နယ်မြေ အားလုံး နဂိုအတိုင်း ထားရှိသွားရန်၊
၅။ စစ်အစိုးရ၏ ဌာနဆိုင်ရာ အုပ်ချုပ်ရေး ယန္တရားများ မိုင်းလားဒေသအတွင်း ၀င်ရောက်ထမ်းဆောင်ခြင်း မပြုသေးရန်၊
၆။ မိုင်းလားတပ်ဖွဲ့၏ စစ်တပ်ပိုင်းဆိုင်ရာ/အုပ်ချုပ်ရေးပိုင်း ဆိုင်ရာ ကော်မတီများအား နဂိုအတိုင်း ထားရှိရန် - စသည်တို့ ဖြစ်ပါသည်။

Ref: သျှမ်းသံတော်ဆင့်