ယက်တောနှင့် ဆက်စပ်မှုမရှိဟု FDB ငြင်းဆို (ဒေါက်တာနိုင်အောင်နှင့် အင်တာဗျူး)

မေကျော်
ဗုဒ္ဓဟူးနေ့၊ ဇွန်လ 03 2009 18:10 - မြန်မာစံတော်ချိန်

ချင်းမိုင် (မဇ္ဈိမ)။ ။ ဒေါ်အောင်ဆန်းစုကြည် နေအိမ်သို့ ရေကူး ဝင်ရောက်ခဲ့သူ မစ္စတာ ဂျွန် ဝီလျံ ယက်တောနှင့် ထိုင်းနိုင်ငံအခြေစိုက် မြန်မာနိုင်ငံ ဒီမိုကရက်တစ် တပ်ပေါင်းစု - FDB သည် ဆက်စပ်ပတ်သက်မှု မရှိကြောင်း အဖွဲ့၏ အထွေထွေ အတွင်းရေးမှူးချုပ် ဒေါက်တာနိုင်အောင်က ပြောဆိုသည်။

အတိုက်အခံများကို ထိုးနှက်အပုတ်ချလေ့ရှိသော စစ်အစိုး၏ အင်တာနက် ဝဘ်ဆိုဒ် တခု ဖြစ်သော သာကီနွယ်တွင် FDB နှင့် မစ္စတာယက်တော တွေ့ဆုံနေသည်ဟု ဓာတ်ပုံနှင့်တကွ ဖော်ပြ စွပ်စွဲချက်အပေါ် သူက တုံ့ပြန်ပြောဆိုခြင်း ဖြစ်သည်။

အဆိုပါ ဓာတ်ပုံမှာ FDB က လစဉ်ထုတ်ဝေသော အီလက်ထရောနစ် ဖိုရမ် မဂ္ဂဇင်းတွင် ဖော်ပြခဲ့သည့် ဓာတ်ပုံကို ရယူကာ ထင်ယောင်ထင်မှား ပြုလုပ် ထားခြင်းသာ ဖြစ်ကြောင်းနှင့် ဓာတ်ပုံတွင် ပါရှိသူမှာလည်း သြစတြေးလျား နိုင်ငံသား သတင်းစာဆရာ မစ္စတာ ဖီးလ် သောတန် (Phil Thorton) ဖြစ်ပြီး ဂျွန် ဝီလျံ ယက်တော မဟုတ်ကြောင်း သူက ပြောဆိုသည်။

ဤကိစ္စနှင့်ပတ်သက်ပြီး မဇ္ဈိမသတင်းထောက် မေကျော်က ဒေါက်တာနိုင်အောင်ထံ ဆက်သွယ်မေးမြန်းထားသည်ကို တင်ပြလိုက်ပါသည်။

သာကီနွယ် ဝဘ်ဆိုဒ်မှာ ဂျွန်ယက်တောက FDB ကို ရောက်ခဲ့တယ်လို့ ပြောပါတယ်။ အဲဒါ မှန်ပါသလား။

သာကီနွယ် ဝဘ်ဆိုဒ် ဆိုတာတော့ နအဖဘက်က သတင်းတွေ တင်ပြတာတို့၊ ထောက်ခံ ရေးသားတာ တို့ကြောင့် နအဖ ဘက်ကလို့ ပြောရမှာပေါ့နော်။ ဟုတ်တယ်၊ မဟုတ်ဘူး မသိပါဘူး။ ပြောချင်တာကတော့ အဲဒီပုံကို ကြည့်ခြင်းအားဖြင့်တော့ နအဖ ဘက်ကနေပြီးတော့မှ ကျနော်တို့တွေကို အကြောင်းအမျိုးမျိုးနဲ့ သတင်းတွေကို ပုံဖျက်ပြီး ထင်ယောင်ထင်မှား ဖြစ်အောင် လုပ်နေတာ ပိုပြီး သိသာလာပါတယ်။

သာကီနွယ်မှာက ဂျွန် ဝီလျံ ယက်တောဟာ FDB ကို ရောက်ခဲ့ပါတယ်ဆိုပြီး ဓာတ်ပုံနဲ့ တင်ထားတာပါ။ သူတို့က အဲဒီ ဓာတ်ပုံထဲက ပုဂ္ဂိုလ်ဟာ ယက်တောလို့ ပြောထားပါတယ်။

အမှန်မှာက အဲဒီဟာက ယက်တောလည်း မဟုတ်ဘူး။ တော်တော်များများ သင်တန်းတွေ လုပ်ပေးနေတဲ့ သြစတြေးလျား နိုင်ငံသား သတင်းစာဆရာ မစ္စတာ ဖီးလ် သောတန် (Phil Thorton) ပါ။ အဲဒါကလည်း FDB ရုံးမှာ မဟုတ်ပါဘူး။ ကျနော်တို့ AAPP (နိုင်ငံရေးအကျဉ်းသားများ ကူညီစောင့်ရှောက်ရေးအသင်း - မြန်မာနိုင်ငံ) ရုံးမှာပဲ မီဒီယာ Strategy (မီဒီယာ မဟာဗျူဟာ)နဲ့ ပတ်သက်တဲ့ သင်တန်းတခု လုပ်တာပါ။

အခု ယက်တောဟာ၊ လက်ရှိ တရားရင်ဆိုင်နေရတဲ့ အချိန်မှာ ဂျွန်ဝီလျံယက်တောဟာ နယ်စပ်က အဖွဲ့အစည်းတွေနဲ့ အဆက်အသွယ် ရှိတယ်။ ဒါမှ မဟုတ် စီအိုင်အေ ဖြစ်တယ်ဆိုပြီး အမှုကို မကြီးကြီးအောင် လုပ်နေတယ်။ ချဲ့ထွင်နေတဲ့ သဘောပဲ ဖြစ်ပါတယ်။

နောက် ကျနော်တို့တွေနဲ့ အဆက်အသွယ်ရှိတယ်ဆိုပြီး ကျနော်တို့ကပဲ ခိုင်းသလိုလိုနဲ့ ပြောနေတဲ့ ကိစ္စနဲု့ ပတ်သက်ပြီးတော့ အများရဲ့ အမြင်မှာ ထင်ယောင်ထင်မှား ဖြစ်အောင်။ ယက်တောရဲ့ ရှေ့နေပြောတဲ့ အထဲမှာလည်း အားလုံး အကုန်သိထားပြီးပြီလို့ ထင်ပါတယ်။

နအဖ ဘက်ကနေပြီးတော့မှ ကျနော်တို့ကို ပြီးခဲ့တဲ့ ရက်ပိုင်းတွေ အတွင်းမှာပဲ ဖောက်ခွဲရေးကိစ္စနဲ့ ပတ်သက်ပြီးတော့ စွပ်စွဲတယ်။ အခုလည်း ယက်တောနဲ့ ပတ်သက်ပြီးတော့ စွပ်စွဲတယ်ဆိုတော့ သူတို့က ကျနော်တို့ကို ပုံဖျက်တဲ့ သတင်းတွေ ပြည်သူလူထုကြားမှာ ထင်ယောင်ထင်မှား ဖြစ်အောင်၊ နိုင်ငံတကာမှာ ထင်ယောင်ထင်မှား ဖြစ်အောင် လုပ်တာမျိုးလို့ ကျနော်တို့ ပြောချင်ပါတယ်။

ဒေါက်တာ နိုင်အောင် ဆိုလိုတာက ဒီဓာတ်ပုံထဲက ပုဂ္ဂိုလ်က မစ္စတာယက်တော မဟုတ်ဘူး၊ တခြားတယောက်လို့ ပြောတာလား။ ဒါမှမဟုတ် ဓာတ်ပုံက မှားနေတာလို့ ပြောတာလား။

ယက်တော မဟုတ်ပါဘူး။ ဓာတ်ပုံက ကျနော်တို့ ဓာတ်ပုံအစစ်ပါ။ ဓာတ်ပုံကို မြန်မာနိုင်ငံ ဒီမိုကရက်တစ် အင်အားစု ဝက်ဘ်ဆိုက် www.democraticforumburma.org မှာရှိတဲ့ ဖိုရမ် ဂျာနယ်အတွဲ ၁၊ အမှတ် ၁၊ ၂ဝဝ၉ ခုနှစ် ဧပြီလထုတ်မှာ တင်ထားတဲ့ ဓာတ်ပုံပါ။ ကျနော်တို့ သတင်းထုတ်ပြန်တဲ့ အထဲမှာလည်း ပါပြီးသားပါ။ အဲဒါက သူ (ယက်တော) မဟုတ်ဘူးခင်ဗျ။

အဲဒီ ဓာတ်ပုံကို သာကီနွယ်က ဘယ်လိုရသွားတာလဲ။

လစဉ်စာစောင်ပေါ့။ ကျနော်တို့က အီလက်ထရောနစ် မဂ္ဂဇင်း ထုတ်တယ်။ အဲဒီ အီလက်ထရောနစ် ဖိုရမ် မဂ္ဂဇင်းထဲမှာ ကျနော်တို့ရဲ့ လှုပ်ရှားမှုအနေနဲ့ အဲဒီ ဓာတ်ပုံနဲ့ သတင်းဆောင်းပါးတွဲ ထည့်ထားတာ။ အဲဒါကို ခိုးယူပြီး သတင်းအမှား ဖန်တီးတာပါ။

Ref: မဇ္ဈိမ