ဒေါ်အောင်ဆန်းစုကြည်အမှု သက်သေကိစ္စ ပြင်ဆင်ချက် ရန်ကုန်တိုင်း တရားရုံး ကြားနာမည်

03 June 2009

ပြဋ္ဌာန်းထားတဲ့ ဥပဒေကို ချိုးဖောက်တယ်လို့ စွပ်စွဲပြီး တရားစွဲဆို ခံနေရတဲ့ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် ဘက်က ခုခံချေပဖို့ တင်သွင်းတဲ့ သက်သေတွေကို ပယ်ချခဲ့တာနဲ့ ပတ်သက်လို့ ပြန်လည် သုံးသပ်ဖို့ လျှောက်လဲ တင်ပြချက်ကို တရားရုံးက လက်ခံ လိုက်ပါတယ်။ အစောပိုင်း တရားခွင်ရဲ့ ဆုံးဖြတ်ချက်ဟာ ဥပဒေနဲ့ မညီတဲ့ လုပ်ရပ်ဖြစ်တာမို့ ပြန်လည် သုံးသပ်လက်ခံဖို့ အကျိုးဆောင် ရှေ့နေတွေရဲ့ တင်ပြချက်ကို ကြားနာပြီး အခုလို ပြင်ဆင်ချက် လျှောက်ထားတာကို လက်ခံလိုက်တာပါ။ တရားခွင် အခြေအနေတွေကို စောင့်ကြည့်နေတဲ့ ကိုအောင်လွင်ဦး က အပြည့်အစုံကို တင်ပြ ပေးထားပါတယ်။

ဒေါ်အောင်ဆန်းစုကြည် အပေါ် တားဆီးကန့်သတ်ထားတဲ့ အမိန့်ကို ဖောက်ဖျက်တယ်လို့ စွပ်စွဲပြီး ကြားနာနေတဲ့ ရန်ကုန် အင်းစိန်ထောင်တွင်းက တရားခွင်မှာ၊ သူ့ဖက်က ခုခံ ထွက်ဆိုပေးဖို့ သက်သေ ၄ ယောက် တင်သွင်းခဲ့ပေမယ့် တရားရုံးက လက်မခံပဲ တယောက်သာ ခွင့်ပြုခဲ့တဲ့ အတွက် ရန်ကုန်တိုင်း တရားရုံးကို ပြင်ဆင်ချက် လျှောက်ထားတာကို အခုနောက်ဆုံး လက်ခံလိုက်တာပါ။ သက်သေ ၄ ယောက် အဖြစ်နဲ့ ဒေါ်အောင်ဆန်းစုကြည် ရဲ့ အမျိုးသားဒီမိုကရေစီ အဖွဲ့ချုပ် (NLD) ပါတီ က ဒုဥက္ကဋ္ဌ ဦးတင်ဦး၊ အတွင်းရေးမှူး ဦးဝင်းတင်၊ တောင်ကြီးမြို့က တရားရုံးချုပ်ရှေ့နေ ဒေါ်ခင်မိုးမိုး နဲ့ ဧရာဝတီတိုင်း လပွတ္တာမြို့နယ် လွှတ်တော် ကိုယ်စားလှယ် ဦးကြည်ဝင်း တို့ကို တင်သွင်းခဲ့ပေမယ့် ဦးကြည်ဝင်း တဦးထဲကိုသာ တရားရုံးက ခွင့်ပြုခဲ့တဲ့နောက် အခုလို ပြန်လည်သုံးသပ်ဖို့ လျှောက်ထားခဲ့တာကို လက်ခံခဲ့တာပါ။ ဒီအတွက် မူလက သတ်မှတ်ထားသလို အပြီးသတ် လျှောက်လဲချက် ပေးမယ့် အစီအစဉ်ဟာလည်း နောက်ဆုတ်သွားပါပြီ။ ရန်ကုန်တိုင်း တရားရုံးက အခု နောက်ဆုံး ကြားနာပြီး လျှောက်လဲချက်ကို လက်ခံခဲ့တာနဲ့ ပတ်သက်လို့ ဒေါ်အောင်ဆန်းစုကြည် ရဲ့ ဥပဒေ အကျိုးဆောင် တဦးဖြစ်တဲ့ ဦးဥာဏ်ဝင်း ပြောပြတာကတော့ ....

“ကျွန်တော်တို့ ဒီနေ့ ၃နာရီ တိုင်းတရားသူကြီးရုံးမှာ ကျွန်တော်တို့ တဘက်ပဲ လျှောက်လွှာ တင်တယ်။ ဒီအမှုကို လက်ခံ ထိုက်တယ်ဆိုတာကို ကျွန်တော်တို့ အကိုးအကား တွေနဲ့ လျှောက်လွှဲချက် ပေးပါတယ်။ လျှောက်လွှဲချက် ပေးပြီးတော့ တိုင်း တရားသူကြီးက အမှုကို လက်ခံတယ်ဆိုတဲ့ အမိန့်ချပါတယ်။ ပြီးတော့ ၂ ဘက်ပေါ့၊ တရားလို ဘက်ရော၊ ကျွန်တော်တို့ဘက် ရော လျှောက်လွှဲချက် ပေးဖို့ ၅ရက်နေ့ ၃နာရီကို ရက်ချိန်း ပေးပါတယ်။ ၅ရက်နေ့ ၃နာရီ ကြားနာပြီးရင် သင့်တော်တဲ့ တရက်မှာ တရားသူကြီးက အမိန့်ချမယ်။ ကျွန်တော်တို့ ပြောတဲ့အတိုင်း လက်ခံတယ်ဆိုရင် အောက်ရုံးမှာ သက်သေတွေ ထပ်စစ်ရမယ်။ အင်းစိန် တရားရုံးမှာ ၅ရက်နေ့ မနက် ၁၀နာရီမှာ အပြီးသတ် လျှောက်လွှဲချက်ပေးဖို့ ရက်ချိန်း ပေးထားပါ တယ်။ အဲဒီ ရက်ချိန်းက အခုလို တိုင်းတရားရုံးက အမှုကို ပြင်ဆင်ဖို့ လက်ခံလိုက်တယ် ဆိုတဲ့ အဲဒီ ရက်ချိန်းကတော့ အလိုလို ရွှေ့သွားပါတယ်။ တိုင်းတရားရုံးက ဒီပြင်ဆင်မှုနဲ့ ပတ်သက်ပြီးတော့ အပြီးသတ် အမိန့် မချမချင်း အဲဒီဟာ ရွှေ့မယ်။”

အစောပိုင်း တရားခွင်ရဲ့ ဆုံးဖြတ်ချက်အရ ဒေါ်အောင်ဆန်းစုကြည် ဘက်က သက်သေ ၁ ယောက်သာ တင်ပြ ထွက်ဆိုခွင့် ရပြီး တရားလိုအဖြစ် တရားစွဲဆိုထားတဲ့ အာဏာပိုင်တွေ ဖက်ကတော့ သက်သေ ၁၄ ယောက်အထိ ရုံးတော်မှာ ထွက်ဆို ခွင့် ရခဲ့တာမို့လည်း ဒါဟာ မျှတတဲ့ ဆုံးဖြတ်ချက် မဟုတ်ဘူးဆိုပြီး ရှေ့နေတွေက ပြောနေတာပါ။ အခုလို ပြင်ဆင်ချက်ကို လက်ခံကြားနာဖို့ ဆုံးဖြတ် လိုက်ပြီးတဲ့နောက် ရည်ရွယ်ထားသလို သက်သေတွေ အားလုံး တရားခွင်မှာ ကြားနာခွင့်ရမယ် ဆိုရင်တော့ ခုခံချေပဖို့အတွက် အလားအလာတွေ ရှိလာလိမ့်မယ်လို့လည်း ဥပဒေ အကျိုးဆောင်တွေက မျှော်လင့်ထားကြ တာပါ။

“ဥပဒေ သဘောအရတော့ အရေအတွက်ကတော့ အရေးမကြီးပါဘူး။ အရည်အချင်းက အရေးကြီးတယ်။ ဒါပေမဲ့ ဒီလို ကျွန်တော်တို့ ဘက်ကို တယောက်တည်း ပေးထား ပြန်တော့လည်း ဘယ်လိုပဲ ဖြစ်ဖြစ် တဘက်စောင်းနင်း သဘောရောက်တယ်။ အဲဒီတော့ ကျွန်တော်တို့ တင်ပြတဲ့ သက်သေကို အပြည့်အ၀ ပေးလို့ရှိရင် ကျွန်တော်တို့ ခုခံချင်တဲ့ လမ်းကြောင်းကို ကျွန်တော်တို့ အပြည့်အ၀ လုပ်လို့ ရတဲ့ သဘောပေါ့။”

ဒေါ်အောင်ဆန်းစုကြည် ကို တရားခွင်မှာတင်ပြီး ရှေ့နေ ရှေ့ရပ်တွေနဲ့ ခုခံ ကာကွယ်ခွင့် ပေးထားပေမဲ့၊ တရားစီရင်ရေး စနစ်ဟာ လွတ်လပ်မှုမရှိဘူး၊ အာဏာပိုင်တွေရဲ့ စွက်ဖက်မှုတွေ ရှိနေတယ်ဆိုပြီး ဝေဖန်မှုတွေလည်း ရှိနေတာပါ။ ဒါပေမဲ့လည်း အခုနောက်ဆုံး ဒီလို ပြင်ဆင်ချက်ကို လိုက်လျော လာတာမျိုးတွေ ရှိလာနေတဲ့အချိန် ဒါဟာ တရားစီရင်ရေး စနစ် လွတ်လပ်မှုရှိလာပြီလို့ ယူဆ နိုင်ပါသလား။ ဦးဥာဏ်ဝင်း ကတော့ အခုလို မှတ်ချက်ပေးပါတယ်။

“ကျွန်တော်တို့ အားလုံးကို ခြုံပြီးတော့၊ အပြီးသတ် အမိန့်လည်း မရသေးတော့ မပြောနိုင်ဘူး။ လက်ခံ တိုင်းတရားရုံးက လက်ခံတာကတော့ ကျွန်တော်တို့ ဥပဒေ လမ်းကြောင်းကို ဦးတည်တဲ့ လက္ခဏာ အဖြစ်လို့ ကျွန်တော် မြင်ပါတယ်။ ဥပဒေနဲ့ အညီသာ အဆုံးအဖြတ် ပေးမယ်ဆိုရင် ဒေါ်အောင်ဆန်းစုကြည်ဟာ ဘယ်ပြစ်မှုကိုမှ မကျူးလွန်ဘူးလို့ ဥပဒေအရ ကျွန်တော် မြင်ပါတယ်။ ဘယ်လို ဖြစ်လာမလဲ ဆိုတာနဲ့ ပတ်သက်ရင်တော့ ကျွန်တော် ခန့်မှန်းပြီးတော့ မပြောသင့်ပါဘူး။ တရားရုံးပေါ် မှာပဲ မူတည်ပါတယ်။”

ဒေါ်အောင်ဆန်းစုကြည် ရဲ့ ဥပဒေ အကျိုးဆောင် တဦးဖြစ်တဲ့ ဦးဥာဏ်ဝင်း ပါ။ တားဆီး ကန့်သတ်ထားတဲ့ အမိန့်ကို ဖောက်ဖျက်တယ်လို့ စွပ်စွဲပြီး ကြားနာနေတဲ့ ရန်ကုန် အင်းစိန်ထောင် တွင်းက တရားခွင်မှာ၊ အခုလာမယ့် သောကြာနေ့ ကျရင် နှစ်ဖက် ရှေ့နေတွေ အပြီးသတ် လျှောက်လဲချက်တွေ တင်သွင်းဖို့ အစောပိုင်းတုန်းက သတ်မှတ် ထားတာမို့၊ မကြာခင် စီရင်ချက်တရပ် ချမှတ် လိမ့်မယ်လို့ တွက်ဆနေခဲ့ကြတာပါ။ ဒါပေမဲ့ အခုနောက်ဆုံး ထွက်ပေါ်လာတဲ့ တရားရုံး ဆုံးဖြတ်ချက် အရ ဆိုရင်တော့ တွက်ဆ ထားသလောက် မြန်ဆန်မှာ မဟုတ်တော့ဘူးလို့ ဆိုရမှာပါ။

Ref: VOA News