ဦးသန့် အရေးအခင်းမှာ ပါဝင်ခဲ့သူ ကျောင်းသားတွေရဲ့ အထိမ်းအမှတ် အခမ်းအနား ကျင်းပ

2012-12-11

ကုလသမဂ္ဂအတွင်းရေးမှူးချုပ်ဟောင်း ဦးသန့် ဈာပန အရေးအခင်း နှစ်ပေါင်း ၃၈ နှစ်ပြည့် အထိမ်းအမှတ် အခမ်းအနားကို ရန်ကုန်မြို့ ၊ မရမ်းကုန်း မြို့နယ်မှာရှိတဲ့ ပေါက်စေတီကျောင်းတိုက်မှာ ဒီကနေ့ ဒီဇင်ဘာလ ၁၁ ရက်နေ့ မနက်ပိုင်းက ကျင်းပခဲ့ပါတယ်။

ဒီအခမ်းအနားဟာ (၃၈) နှစ်တာကာလအတွင်းမှာ ပထမဆုံးအကြိမ် ကျင်ပတာဖြစ်ပြီး ရဟန်းသံဃာတော်တွေ၊ ဦးသန့် အရေးအခင်းမှာ ပါဝင် လှုပ်ရှားခဲ့တဲ့ လူပုဂ္ဂိုလ်တွေ၊ ၈၈ မျိုးဆက်ကျောင်းသား ခေါင်းဆောင်တွေ၊ ပါတီအသီးသီးက ကိုယ်စားလှယ်တွေ၊ တက္ကသိုလ် ကျောင်းသားများ သမဂ္ဂ အဖွဲ့ဝင်တွေနဲ့ ဗမာနိုင်ငံလုံးဆိုင်ရာ ကျောင်းသားသမဂ္ဂ အဖွဲ့ဝင်တွေ အပါအဝင် လူဦးရေ တစ်ထောင်နီးပါး တတ်ရောက် ခဲ့ကြပါတယ်။

ဦးသန့် ကွယ်လွန်ချိန်က ဦးနေဝင်းအစိုးရလက်ထက်ဖြစ်ပြီး မြန်မာနိုင်ငံကို ပြန်လည်သယ်ဆောင်လာတဲ့ ဦးသန့်ရဲ့ ရုပ်ကလာပ်ကို အစိုးရ သတ်မှတ်တဲ့နေရာ မဟုတ်ဘဲ ဦးသန့်နဲ့ ထိုက်တန်တဲ့နေရာမှာ သဂြိုလ်ခွင့်ရဖို့ ကျောင်းသားရဟန်းရှင်လူ ပြည်သူ အများအပြားက တောင်းဆို ဆန္ဒပြကြရာမှာ စစ်တပ်က အကြမ်းဖက် ဖြိုခွင်းခဲ့ရာမှာ ကျောင်းသားတစ်ချို့ သေဆုံးပြီး အများအပြား ဖမ်းဆီး ထောင်ချ ခံခဲ့ရပါတယ်။

ဦးသန့်ဟာ ကုလသမဂ္ဂအတွင်းရေးမှူးချုပ် အဖြစ် တာဝန်ထမ်းဆောင်ခဲ့စဉ်က ရုရှားနဲ့ အမေရိကန် နှစ်နိုင်ငံ ကျူးဘား အရေးအခင်းမှာ စစ်ဖြစ်တော့မယ့် အနေအထားကနေ ကာကွယ် တားမြစ်ပေးနိုင်ခဲ့သူ အဖြစ် ထင်ရှားသူ ဖြစ်ပါတယ်။

ကုလသမဂ္ဂအတွင်းရေးမှူးချုပ်အဖြစ် (၁၉၆၂- ၁၉၇၁) အထိ တာဝန် ထမ်းဆောင်ခဲ့တဲ့ မြန်မာနိုင်ငံသား ဦးသန့်ရဲ့ နောက်ဆုံး ဈာပန ကာလအတွင်း မြန်မာနိုင်ငံက ရဟန်းရှင်လူတွေ လှုပ်ရှားခဲ့ပုံတွေကို ရေးသားထားတဲ့ "ဦးသန့်အရေး လှုပ်ရှားမှု မှတ်တမ်း" စာအုပ် မိတ်ဆက်ပွဲကို ဒီဇင်ဘာလ (၄) ရက်နေ့က ဗိုလ်အောင်ကျော် လမ်းမှာရှိတဲ့ HOME ခန်းမမှာ စတင်ဖြန့်ချီ ခဲ့ပါတယ်။

Ref: RFA News